Bai hkrung rawt ai hpang nhtoi (40) ya rai yang, hpa majaw Madu Yesu, Sape ni hpe tawn kau da ai rai?
Chyum Laika hta, (40) ya ngu ai gaw ahkyak ai hti hkum re. Karai Kasang a myiman hpe mu lu na matu, Mawshe gaw bum n’tsa hta nhtoi (40) ya tup lusha gam let akyu hpyi nga ai. Gasadi jaw da ai mungdan de du shang wa lu na matu (40) ning, nam mali e, hkyen lajang ra sai. Hkrung rawt ai hpang (40) ya tup, Madu Yesu gaw, shara law law hta sape ni hpe dan pru dan nna, Shi Madu bai hkrung rawt sai hpe shateng ya nna, Shi Madu galaw lai wa sai Sasana magam bungli hpe galaw lu na lajang ya sai.
Madu Yesu a pru sa mat ai lam hte Lamu de lung wa ai lam gaw, Sape ni a matu jahtum hte ningnan hpang ai lam rai sai. Shi Madu tsawra ai Sape ni hte, hkrum hkrang hte nawng rau nga ai ten htum mat nna, lam nnan hte bai rau nga nga na ningnan byin ai masat rai sai. Mungkan htum ai ten du hkra rau rai nga na hpe Madu Yesu gasadi jaw da sai. Hpung shingkang hte hkrung rawt sai Hkyela Madu gaw Sumsing lamu de lung wa nna Kawa Karai a hkra maga de hkaw dung nga ai de Chyoipra ai Wenyi hpe mung shangun dat ya nna, Yawdan hka e Shi Madu hta yu hkrat wa nna, Sasana magam hpang wa ai zawn, Sape ni mung Wenyi hte hpring wa na rai nga ai. Madu Yesu, Sape ni hpe tawn kau da ai shaloi, yawn hkyen myit kaji let nga taw ma ai n rai. Hta n-ga, kabu myit pyaw ai hte hpring nga nna Chyoipra ai Wenyi yu hkrat wa na hpe myit katu let nga nga ma ai.
Madu Yesu, Sape ni hpe hpang jahtum tsun da ai mungga gaw; Shi Madu a hkye hkrang ai magam hte, Sape ni hpe mung, hkyela na matu si hkam ai hte hpung shingkang hta bai hkrung rawt sai hpe sakse hkam let mungkan shara shagu de, dai hkye hkrang la ai lam a kabu gara shiga hpe hkaw tsun dan na matu rai sai. Sape ni a magam lit gaw; Israela amyu masha a matu chyu sha n rai, amyu masha yawng a matu re ai, hkye hkrang la na kabu gara shiga hpe hkaw tsun gam garan na lam rai sai.
Karai Kasang a tsawra ai hte hkye hkrang la na kumhpa gaw amyu masha langai a matu chyu sha n rai, hkap la kam sham ai, mungkan ting na masha ni a matu rai nga ai. Kabu gara shiga gaw, Karai Kasang a atsam ningja rai nna, shut hpyit ai ni, dip sha hkrum ai ni, hpe shamai shatsai ya na, bai sharawt la na, hte Madu a langai sha tai nga shangun ai tsi kaba rai sai. Kabu gara shiga a, atsam ningja hpe nang kam sham ai kun?
Nawku hpung ting hpe Madu Yesu jaw da ai, kaba dik ai magam lit mung n dai rai sai. Kam sham sai ni yawng hpe maren mara jaw da ai magam lit gaw; kabu gara shiga hpe shachyam shabra na hte Mungkan ga
hkyela Madu re ai Hkristu Yesu a kasa kaja ni rai na lam rai sai. Ndai magam lit hpe gun hpai na matu kabai da hkrum ai n rai, hkrung rawt sai Madu gaw, Chyoipra ai Wenyi a marang e, anhte hta naw matut galaw nga ai. Dai ni, Madu Yesu lamu de lung wa ai poi nhtoi hta, Shi a hkum hkrang rai nga ai anhte ni hpe, nnan bai gram ya nna, ninggun atsam ningja jat ya nga ai hte, shi jaw da sai Magam lit hpe mungkan ting hta gun hpai lu na matu laknak shakap ya sai. Kabu gara ai shiga hta kabu gara ai lam hpe masha kaga ni hpe sakse hkam nga ai kun? Bai hkrung rawt na lam hta nang myit mada nga ai kun?
No comments:
Post a Comment