PRANWAN LADAW (22) LABAN SHANI NA MUNGGA

Tinang a hkum hpe “shagrit shanem ai masha” ngu nna tinang tsun ai wa gaw gumrawng gumtawng ai hte shakawng ai masha langai mi teng sha rai na re. Hpa majaw nga yang shagrit shanem ai ngu ai gaw tinang a n-gup aga hte tsun dan nmai ai sha amu bungli hte manang ni hpe madun dan sha mai nga ai.

Dai ni na Kabu Gara Shiga hta Madu Yesu gaw masha ni hpe shagrit shanem ai myit rawng nna nga sa ai a marang e tinang hte gingdan ai hpe manang ni jaw ya na re ngu nna tsun da nga ai. Tinang a myit masa lam kade daram madang nga ai gaw tinang dawdan la nmai nna manang ni masat ya ai hpe sha hkam la mai nga ai.

Shagrit shanem ai ngu ai gaw manang ni mu lu na matu mung galaw sa nmai nga ai. Karai Kasang a tara Mungga ni hpe hkan shatup nna Karai Kasang a man hta shagrit shanem ai hte nga sa ra na re. Karai Kasang a man hta shagrit shanem let nga sa ai wa gaw arawng aya ni hpe nmyit ai sha myit masin simsa ai hte nga sa lu na re. Myit masin hta simsa ai gaw manang ni tinang hpe shagrit shanem chye ai wa re ngu ai shakawn ga hta grau kaba nga ai. Ndai masha ni gaw tinang a hkum hpe shakawn shagrau na, manang ni a shakawn ai hpe hkam la na matu shanhte a prat hta n-ahkyak nga ai.

Karai Kasang a Tara Mungga ni hpe hkan shatup let Karai Kasang a man hta shagrit shanem chye nna nhtum nwai ai myit masin a simsa lam hpe anhte ni yawng hkam la lu u ga.

KADAI WA HPANG JAHTUM TAI MAYU A TA?

Masha kaga ni kaw nna hkungga la ra ai, yu kaba ai hpe ra sharawng ai gaw shinggyim myit wa n rai ni? Madu Yesu tsun ai gashadawn hta, hkungran poi saw shaga hkrum ai ni, reng grau ai dung shara ni lata la ai gaw anhte a lam nan rai nga ai. Tinang hkum sharawt la ai gaw, masha kaga ni hkrat ang tawn da ai hta rai chye ai. “Hkawhkam wa a man e, na hkum hpe, hkum shagrau et; daru magam rawng ai ni a shara, nta e, hkum tsap nga et; kaning rai n me law, nang mu mada lu ai du wa man e shagrit kau hkrum ai hta, ‘nang de lung wa rit’, ngu ai ga hpe grau na mai nga ai” (Ga 25: 6-7), ngu ai gashagawp hpe, Madu Yesu a gashadawn gaw jat ya ai lam rai sai.  Jet ai shagrit shanem lam gaw hpa rai nna, hpa majaw anhte a prat hte amu magam hta ahkyak shatai ra ai kun? Jet ai shagrit shanem lam gaw; na hkum hpe n kaja mu ai lam n rai, yu kaji la ai mung n rai. Jet ai shagrit shanem ai lam gaw, tinang hte seng nna tau nau myit tawn da ai kaw nna lawt shangun ai, kaji kadun myit ai lam kaw nna shalawt ya ai. Shagrit shanem ai lam gaw, tinang hkum hpe tengman ai hte chye na shangun nna, teng ai magam hpe galaw shangun ai. Tinang hkum hpe teng ai hte mu mada ai marang e, ram ging ai Jeyang daw dan ai lam galaw nna, tinang hkum hpe Karai Kasang mu ai zawn, mu la ai lam rai sai. Shagrit shanem chye ai masha gaw, tinang hkum hpe jet ai lam yan hta dinglik yu nna, myit htang kaba ai, makoi magap let shakawng la ai lam ni n nga ai. Tinang hkum hpe grau kaji ai, kaba ai hte mu mada ai lam n-nga, teng ai hta hkap la nga ai. Jet ai shagrit shanem lam gaw, myit htum ai, gum rawng ai lam ni kaw nna tinang hkum hpe shalawt dat nga ai. Shagrit shanem ai lam gaw, ahtik ahtawk byin ai, dang hkung ai, mying kaba ai, awng dang ai, (snr) hktat sum ai, lam ni a majaw kanga mat na n rai.

Shagrit shanem ai lam gaw, mai kaja ai hkring htawng ni lu la na matu npawt nhpang rai nga ai rai nna, Karai Kasang anhte hpe mu ai zawn mu shangun ai. Hkum nan chye chyang ai, dingman ai, n-gun atsam, hte anhte hta grau ai hpe dau jau na matu ap nawng shangun ai. Masha kaga a matu, kangka ai hte, sak jaw let tsawra daw jau lu na, shagrit shanem ai lam gaw shadut ya ai. “tinang dai shagawm kau nna, mayam a ahpraw nsam dagraw let, shinggyim masha hte bung hkra tai wa sai; shingrai, masha a gawng shing-yang lang let shi hkum hpe shi shagrit kau nna, si ai du hkra madat mara nga ai, kaja wa wudang hta si ai du hkra madat mara nga ai”, (Hpil 2:7-8) nga nna Madu Yesu a shagrit shanem ai lam hpe, kasa Pawlu gaw kaja dik ai sakse hku nna anhte hpe tsun dan sai. Shagrit shanem ai lam hpe tam nga ai hpe Karai Kasang gaw chyeju jaw ya na rai nga ai. Madu Yesu daw jau ai zawn, nang mung mayam langai tai mayu nga ai kun?

“Madu Yesu e, shut hpyit mara, tingkyeng myit hte gum rawng ai myit ni kaw nna ngai hpe hkye la na matu, Nang Madu, mayam tai lai wa sai. Nang Madu zawn shagrit shanem chye wa lu na matu, ndut ndang tsawra lu na matu, hte Madu madun dan ai ni hpe daw jau lu na matu ngai hpe garum la rit law”.

PRANWAN LADAW (22) LABAN SHANI NA CHYUM LAIKA

28th August  2016

CHYUM MUNGGA DAW 1

SIRAK 3: 17-20, 28-29

Ya hti na gaw, Sirak a laika hta na rai nga ai.

Ngai sha e, nang hte seng ang ai amu mahkra hpe, sumnung shingdi la ai hte hkan galaw nga u; shaloi kumhpaw kumhpa grai jaw ai wa hta, nang grau nna tsaw ra hkam la na ndai.

Nang grau nna galu kaba wa jang, grau nna myit shagrit shanem nga u; shaloi Madu a man e sharawng awng ai lu la na rin dai. Kaning rai nme law, Madu a atsam galu kaba htum rai nga ti mung, myit grit nem ai ni hpe Shi hkap la na ra ai.

Gumrawng gumtawng ai wa a arawn alai hpe, kadai n shading ya lu ai; hpa majaw nga yang, n hkru n kaja ai myit shi hta e ru jung nga ai.

Myit su ai wa mahtang gaw ga shagawp hpe ra sharawng ai hte myit aru yu nga ai. Sharin shaga ai mungga madat mara ai wa mung, hpaji rawng ai sara ni hpe kabu shangun nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

HEBRE 12: 18-19. 22-24

Ya hti na gaw, Hebre masha ni hpang de San Pawlu shagun dat ai laika hta na rai nga ai.

Nanhte kanang e du sai hpe myit dum nga mu: Achyang amang re ai, nsin chyip mak re ai hte, laru ru nga yang, Sina Bum na wan grung nga ai de nanhte du manit dai n rai. Pahtau ngoi ai hte, ga jahtau ai nsen ngoi pru ai shara de nanhte n du manit dai: dai nsen hpe na la ai ni gaw, Ga hkaw mi anhte  hpe bai hkum tsun rit, ngu nna hpyi nem ma ai.

Nanhte chyawm gaw, Ziun bum hte, ahkrung nga ai Karai Kasang a mare ngu ai, sumsing lamu na Yerusalem mare de du manit dai. Dai yang e, hti na dang lu ai lamu kasa unawng kaba gaw, sumsing lamu a mungdan masha ni hte, kasha alat ni a Hpung ting hte rau, kabu gara rai du zuphpawng nga ma ai.

Nanhte gaw yawng mayawng a tara agyi wa Karai Kasang kaw du manit dai; jahkum shatsup hkrum sai Chyoi Pra ai ni a wenyi ni hte jawm pawng nga manit dai. Ga shaka nnan gaw da ai, htinglu htinglai wa Yesu kaw nan nanhte du manit dai.

Ya hti ai gaw Karai Kasang a mungga rai nga ai.

 

KABU GARA SHIGA

LUKA 14: 1. 7-14 

Ya hti na gaw, Luka a laika hta na Kabu Gara Shiga rai nga ai.

Yesu gaw laban nhtoi langai mi hta, Hparishe agyi langai mi a nta e shat sha na matu, shang dung nga yang, shanhte shi hpe azi yu nga ma ai. Shaga da sai ni gaw reng grau ai dung shara ni lata la ai hpe Yesu mu jang, Shi shanhte hpe ga shadawn hku tsun mu ai gaw:

Masha langai ngai nang hpe num hkrungran poi de shaga yang, reng grau ai shara hta hkum dung et; nang hta arawng grau lu ai wa hpe mung shi shaga sai nhten. Shaloi, poi madu sa nna, Ndai wa hpe shara yen ya u, ngu nna nang hpe tsun jang, nang grai kaya ai hte yawng a jahtum ai de htawt dung lu na ndai.

Dai rai nna, masha nang hpe shaga yang, jahtum ai de sa dung nga u; shaloi poi madu sa nna, Jinghku wa e, reng grau ai shara de sit dung nga u, ngu nna nang hpe tsun jang, rau dung lawm ai ni yawng a man e nang arawng lu na rin dai. Tinang hkum hpe shagrau ai wa kadai mung, shagrit shanem ai hkrum na ra ai; tinang hkum hpe shagrit ai wa chyawm gaw, shagrau ai hkrum na ra ai, ngu wu ai.  Shi hpe shaga ai wa hpe mung Yesu tsun ai gaw:

Jahpawt shat, shing n rai, shana shat nang galaw daw ai rai yang, na a jinghku jingyu ni, nhpu nnau ni,  mayu dama ni hte sut lu ai htingbu ni hpe hkum shaga et. Hpa majaw nga yang, shanhte mung nang hpe bai shaga daw nna, chyeju htang lu na mara ai.

Nang poi galaw daw yang gaw, matsan mayan ni, jahten labye ni, lagaw hten ai ni hte myi kyaw ai ni hpe shaga la u; shing rai jang gaw, nang a lu nga ndai: shanhte nang hpe chyeju htang lu na ma ai n rai. Dai re ai majaw, ding man ai ni bai hkrung rawt wa ai shaloi, de a akyu chyeju nang hkam la na rin dai.

Ya hti ai gaw Madu a Kabu Gara Shiga rai nga ai.

PRANWAN LADAW (21) LABAN SHANI NA MUNGGA

Hpang jahtum na nhtoi hta Karai Kasang a mungdan daw sha poi hta kadai lawm na, nlawm na ngu ai gaw dai ni anhte nga sa ai lam hta madung nga ai. Shani shana na anhte a ngasat ngasa ai lam gaw tinang a hkye hkrang la hkrum na hkrun lam rai nga ai.

Ding hta ga ntsa na arawng sadang, ja gumhpraw ni gaw tinang ra ai hpe galaw ya hkrum na matu jai lang mai nga ai. Mungkan ga ntsa hta tinang hkum nan n-galaw tim lu mai ai lam ni law law nga ai rai tim, Karai Kasang a mungdan du lu na matu gaw sahti, matsan n-gin hka ai sha masha hkum shagu tinang hkrai shakut la ra na re.

Gyip ai chyin hka lam kaw nna she du mai ai re ngu nna Madu Yesu Kabu Gara Shiga hta tsun da ai hte maren gyip ai chyinhka lam hta sak hkrung nga sa ra na re. Gyip ai chyinghka lam ngu ai gaw tinang a hkum hpe ndang nyet kau nna Karai Kasang a tara lam ni hta sak hkrung nga sai lam re.

Karai Kasang a tara lam hta sak hkrung nga sai ai kadai mung sumsing mungdan sut gan hpe lu la na sha n-ga, ndai prat hta mung myit masin a, ngwi pyaw sim sa ai hpe teng sha lu na re. Mai kaja ai lam hta hkawm sa ai kadai mung mai kaja ai akyu ara ni hpe teng sha lu la na re. Dai rai yang anhte yawng gaw gyip ai chyihka lam ngu ai hpe nhkrit ntsang ai sha, mai kaja ai lam hpe ra sharawng let sak hkrung nga sa lu na matu shakut shaja sa wa ga.

GYIP AI CHYINGHKA HKU HKAN SA GA

Karai Kasang a mungdan lam a matu ‘chyinghka’ kumla gaw hpa rai sai kun?

Madu Yesu a gashadawn ni hta chyinghka la kau hkrum ai ni gaw, jan grai du ai ten wa ai hte nta madu wa hpe ginjang ai rai nna, shinggan kau hkrum ang ai ni rai nga ai. Madu Yesu a ten na sara ni gaw, tsun yak la ai, bawja ai jawngma ni hpe, laban bat mi tup daram, chyinghka la kau let, rip kawp tara hkan chye na hte, sadi dung na matu galaw chye nga ma ai.

Sumsing lamu de kadai wa shang lu na ta, nga nna san ai gasan hpe bai htang ya ai hku nna ndai maumwi hpe Madu Yesu tsun ai rai sai. Rabbi law law sharin ya ai gaw, mara kap ai majaw tinang hkum shinggan kau ai n kau mi kaw na lai, Israela amyu masha ni yawng hkye hkrang la ai hkrum na re ai, nga ma ai. Tsun mayu ai gaw, Karai Kasang a laksan lata la hkrum ai amyu masha ni rai nna, Karai Kasang hte Gashaka tawn da ai amyu re ai majaw re.

Madu Yesu chyawm gaw ading tawk mahtai n jaw ai sha, masa lam lahkawng hta mahta nna htai ya sai. Langai; Karai Kasang hte Gashaka da sai amyu pyi rai sai lo, nga nna Sumsing Lamu de automatic n du lu ai ngu tsun jahpra let madat nga ai ni hpe shamau dat nu ai. Lahkawng; Tara maigan mungdan na masha ni mung Karai Kasang a mungdan de shang lu mai ai lam tsun shalawm sai. Karai kasang a saw shaga ai lam gaw Yuda amyu, tara maigan amyu ni yawng a matu rai nga ai. Tim, gyip ai chyinghka kaw nna shang na matu n shakut ai rai yang, shinggan kau ai anhte hkrum mai ai hpe sadi jaw da nga ai.

Madu Yesu hpa majaw dai hpe tsun ai kun?

Chyinghka ngu nna Madu Yesu tsun ai gaw, Shi hkum nan hpe tsun ai rai sai. ‘Ngai gaw chyinghka hku rai nga nngai: ngai hta shang ai wa gaw, hkyehkrang la hkrum na wu ai’ (Yh 10:9). Anhte a shut hpyit mara ni a matu Shi asak hpe wudang hta ap jaw kau ai marang e, Karai Kasang a mungdan de shang na ‘Lam’ hpe Madu Yesu lajang da ya sai. Lama na, Karai Kasang a mungdan de shang nna, de a mungmasha atai mayu nga ai rai yang, Madu Yesu a wudang hkrun lam hpe anhte mung hkan nang na ra ga ai. Karai Kasang a mungdan de shang mayu ai rai yang, shut hpyit mara, agung alau ni hpe dang manga kau nna, Karai Kasang myit ra ai hpe hkan galaw na ra nga ai.  Kabu gara shiga gaw; shakut shaja ai hkrun lam hta tinang chyu n rai nga ai, ngu ai re. Karai Kasang gaw anhte hte rau rai nga nna Madu a chyeju ningsang gaw law la nga ai. Kabu gara shiga a makam hta hkying hkat shakut ai rai yang, awng dang ai lam de du lu na Madu Yesu pahkam hkam ya sai. Grau nna, yak hkak, jam jau agung alau hkrum wa ai ten hta, Karai Kasang a shaman chyeju hte garum la ai hpe nang kam hpa nga ai kun?

“Madu Yesu e, agung alau hkrum ai ten hta, Nang Madu a hkye la ai chyeju hpe galoi mung kam hpa nga lu na matu garum ya rit. Nang Madu a mungga hte nhtan shai wa na zawn re ai aten, agung alau hpe dang manga kau lu na atsam marai jaw ya let Nang Madu hta sadi dung nga lu na, ngai hpe garum ya rit law."

PRANWAN LADAW (21) LABAN SHANI NA CHYUM LAIKA

21st August 2016

CHYUM MUNGGA DAW 1

ESAIA 66: 18-21

Ya hti na gaw, myihtoi Esaia a Laika hta na rai nga ai.

Madu ning nga ai: Masha amyu ni hte, ga amyu baw kaga tsun ai ni mahkra hpe shinggyin na matu, ngai du sa nngai. Shanhte mung sa du nna, nye a arawng sadang hpe mu lu na mara ai. Ngai gaw shanhte hpe masat da ya nna, daw dan ai hta na lawt lu ai ni nkau mi hpe, masha amyu ni hpang de shangun dat na nngai: Ndan gap chye ai Tarshi, Pula, Luda amyu ni hpang de mung, Tubala yan Yawan hpang de mung, nye a lam garai n na yu ai hte, nye a hpung shingkang garai n mu lu ai, sumtsan mung na zunlawng ni hpang de mung, ngai shanhte hpe shangun dat na nngai. Shanhte mung maigan amyu ni hpe nye a hpung shingkang lam tsun dan na mara ai.

Dai hta kaga, Israela masha ni gaw lusha hkungga hpe, san seng ai ban ni hta Madu a nawku htingnu de la sa ai hte maren, nanhte a kahpu kanau ni mahkra hpe gumra hta mung, leng hta mung, krau ntsa e mung, lawze hte gawla-uk ntsa e mung htaw nna, Madu kaw ap ya na nga, mung mi hte mung mi kaw na, Yerusalem mare na nye a Chyoi Pra ai bum de woi wa na mara ai, nga nna Madu tsun ai.

Bai shanhte hta na nkau mi hpe, hkungga nawng jau ai agyi ni hte, Lewi masha ni a aya hta, ngai san da na nngai, nga nna Madu tsun ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

HEBRE 12: 5-7, 11-13

Ya hti na gaw, Hebre masha ni hpang de San Pawlu shagun dat ai laika hta na rai nga ai.

Madu gaw nanhte hpe kasha ngu nna shaga let, shadum jahprang ai mungga hpe malap kau manit ni? Madu ning nga ai : Ngai sha e, Madu sharin ra ai hpe n gawn n sawn hkum rai et; Shi nang hpe daru yang hkum myit kaji et, Madu shi tsaw ra ai wa hpe sharin nga ai, Shi hkap la ai kasha yawng hpe ari dan jaw nga ai, nga nna nanhte hpe shadum jahprang ya wu ai.

Dai rai nna, ari dan hkrum ai gaw nanhte hpe sharin ai lam langai mi rai nga ai: Karai Kasang gaw    nanhte hpe kasha zawn galaw nga ai.

Kawa e n daru sharin ai kasha kaning nga a ta? Ari dan hkam ai shaloi e, pyaw hpa zawn n rai, machyi la nga ai; rai ti mung, htawm hpang e she sharin hkam sha ai ni a matu, dai ari dan gaw ngwi pyaw ai hte ding hpring ai asi si shapraw ya nga ai.

Dai rai nna, kya noi nga ai lata lahpum hte, n-gun n rawng ai lahput hpe jan di da mu; nanhte hkawm sa wa ai lam hpe shatsawm shading mu: shaloi, hten mat ai lagaw lata ni, hkrihkraw n kashai ai sha, n-gun atsam bai lu la na ra ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 13: 22-30

Ya hti na gaw, luka a laika hta na kabu Gara Shiga rai nga ai.

Yesu gaw mare kahtawng langai hte langai de shang sa wa nna, sharin shaga let Yerusalem de lai sa wa ai. Shaloi masha langai mi gaw, Madu e, hkye hkrang la ai kaw du ai ni n law ma ni? ngu wu ai. Yesu gaw, Gyip ai chyinghka hku shang lu na matu, shaja mu: Ngai nanhte hpe tsun made ga, masha law law dai hku shang na matu tam ma ai, rai ti mung, n shang lu na nga na mara ai.

Nta madu rawt nna chyinghka la kau sayang, nanhte shinggan e tsap nga nna, chyinghka akawk let, Madu e, anhte hpe hpaw la mi, nga nna hpyi yang, dai nta madu gaw, Nanhte kanang na pru ai ngai n chye nngai, ngu nna htan na ra ai. Shaloi nanhte gaw, Nang hte rau anhte lu sha sa ga ai; anhte a lam hkan e mung nang sharin shaga ya nit dai, ngu na marin dai. Dai nta madu chyawm gaw, Nanhte kanang na rai myit dai gaw ngai gaja wa n chye nngai; n hkru n kaja ai ni yawng hte e, ngai kaw na pru mat wa mu, ngu nna htan kau na myit dai.

Abraham, Isak, Yaku hte myihtoi ni yawng, Karai Kasang a mungdan e nga nga ai hpe nanhte mu lu nna, nanhte hkum nan shinggan de shapraw kau ai hkrum ai shaloi, dai yang e hkrap ngu hkrap ngoi ai hte, wa  urin udik ai, rai na ra ai.

Dai shaloi, sinpraw sinna, dingdung dingda maga de na masha ni sa nna, Karai Kasang a mungdan hta ningngai nga na mara ai. Rai sa, hpang hkrat ai ni nkau mi gaw shawng na mara ai; shawng ai ni nkau mi mung, hpang hkrat na mara ai, ngu nna Yesu gaw shanhte hpe tsun ai.

Ya hti ai gaw Madu a Kabu Gara Shiga rai nga ai.

PRANWAN LADAW (20) LABAN SHANI NA MUNGGA

Dai ni na Laban nhtoi hta Nu Maria hpe lamu de woi shalun la ai poi hpe galaw nga ga ai. Nu Maria gaw anhte shinggyim masha ni hkye hkrang la hkrum na matu Kawa Karai Kasang a yaw sing ai amu magam hta laklai ai hte shang lawm lai wa sai.

Shi gaw npawt shut hpyit mara nkap ai sha shangai wa ai hta sha n-ga, shi a prat tup hta mara nkap ai hte Karai Kasang a myit ra ai hte sak hkrung nga sa lai wa sai re. Dai re ai majaw Karai Kasang hpan tawn da ai shinggyim masha ni yawng hta na san seng san pra dik htum a Karai Kasang a nchyang mayam rai nga ai.

Karai Kasang hpan tawn da ai anhte shinggyim masha ni gaw hpang jahtum na aten hta Karai Kasang hpang de bai du na re ngu myit mada ala nga ga ai raitim, Nu Maria gaw mungkan ga na asak aprat htum ai ten hta Karai Kasang hpang de bai du na matu hkrum hkrang hte wenyi hpawn sumsing lamu de woi shalun la hkrum sai re.

Ndai mungkan ga ntsa hta bu hkawm nga ai anhte ni gaw Nu Maria, Karai Kasang a myit ra ai hte shi a asak aprat hpe nga lai mat wa sai zawn anhte yawng mung tinang myit ra ai hpe nyet kau nna Karai Kasang ra sharawng ai hta sak hkrung nga sa let Karai Kasang a man hta Nu Maria zawn Shi Madu ra sharawng ai kashu kasha ni byin tai wa u ga.

DAI MADU HTA SHA

Karai Kasang a matu (salum) wan hkru hkum na nang sharawng nga ai kun? 

Mungkan ntsa hta ngwi pyaw simsa lam malai, garan ginghka na matu wan jahkrat na du sa ai re lam tsun ai shaloi, sape ni kajawng ma ai. Rai yang, kaning re ai wan hpe shi a myit hta kyem da sai kun? Chyum Laika hta rai yang, ‘wan’ gaw Karai Kasang hte seng ai lam rai nna, mungkan ga ntsa hte amyu masha ni a ntsa Karai a magam bungli hpe madun ya ai. Karai Kasang shi anga nga ai lam hpe, wan grung tim n hkru lawm mat ai singwum hta Mawshe hpe ga shaga ai anhte mu lu ai (Pru 3:2). Wan hpe Karai Kasang a hpung shingkang kumla ngu hta la ai (Eze 1:4,13), Karai Kasang makawp maga la ai (2 Hk.hk 6:17), Karai Kasang a Chyoipra ai lam (Tr. Jhp 4:24), Tengman ai Tara dawdan lam (Zeh 13:9), shut hpyit mara a ntsa Karai Kasang a pawt sin dawng ai lam (Esa 66:15-16), ngu anhte mu lu ga ai. ‘Wan’ hpe Chyoipra ai Wenyi a kumla hku nna mung mu mada ai (Mt 3:11, Kasa 2:3). Karai Kasang a wan gaw, anhte hpe jasan jaseng la ai rai nna Madu Karai hpe hkrit hkungga na matu hte Shi a mungga anhte hta anga nga na matu shadut nga ai.

Karai Kasang a mungdan du magang ra ai hpe, tara dawdan na aten hku nna, Madu Yesu masat la nga ai. Tara dawdan na lam hte seng nna Madu Yesu tsun ai lam gaw, Karai Kasang maga nga na (snr) Shi hte nhtan shai ai maga de rai na, hpe ahkyak la lata la lu na matu garum ya na lam rai sai. Karai Kasang dawdan na hpe anhte bai htang galaw ai lam gaw, ya aten hta mung, htawng hpang de mung, ahkyak ai hkrum hkra wa ai lam nga na re.

Karai Kasang mungdan lam hpe hkap la na (snr) n hkap la na lam gaw kun dinghku kata hta pyi yak hkak ai lam nga wa na re ngu Madu Yesu tsun sai. Hkristan makam masham a akri gaw Yesu Hkristu hta sadi dung ai lam rai nna, dai lam gaw kaga mahku mara ai lam yawng hta grau ra nga ai. Garan ginghka hkat na ngu Madu Yesu tsun ai shaloi, myihtoi Mihka a ga; ‘tinang hpe hpyen ai ni gaw, tinang a nta na ni rai nga ma ai’ (Mihka 7:6) ngu ai ga Madu Yesu a myit hta rawng nga ai. Anhte a prat hta kadai gaw numbat langai re ai hpe lata na matu Karai Kasang a tsawra ai gaw shadawn nga sai. Karai Kasang hta lai jan nna kaga hpe lata ai rai yang, dai gaw sumla nawku ai lam rai sai. Sape ni kadai hpe ningshawng jaw, numbat langai tawn ai hpe Madu Yesu jep yu ai lam mung rai sai. Jet ai sape wa gaw, arai yawng mayawng hta Karai Kasang hpe tsawra dik rai nna, Madu Yesu Hkristu a matu arai yawng hpe kau da gwi ai wa rai nga ai. Karai Kasang hta chyu sha sadi dung ai lam tawn da na, ningrum ningtau jan, kahpu kananu ni hta pyi grau ai sadi dung ai lam tawn na matu, Madu Yesu shadut ai lam rai sai. Karai Kasang sharawng awng ai lam hpe anhte galaw ai shaloi, nta masha ni a myit hta n lu hkap la ai rai yang, dinghku masha, manang ni hte hpyen tai wa mai nga ai. Hkristu a tsawra ai lam gaw, Karai Kasang hpe lam yan shagu hta ning shawng jaw numbat langai byin shangun sai kun?

“Madu e, Nang hpe chyu sha myit mada nga let, arai yawng hpe kau da nhtawm, prat galai shai wa lu u ga, Nang Madu  a tsawra myit, ngai hpe jaw ya rit. Nang Madu ra sharawng ai hte shakut galaw lu na matu, tsawra ai hte sadi dung ai lam, n-gun dat ya rit law."

PRANWAN LADAW (20) LABAN SHANI NA CHYUM LAIKA

14th August 2016

CHYUM MUNGGA DAW 1

YEREMIA 38: 4-6, 8-10

Ya hti na gaw, myihtoi Yeremia a laika hta na rai nga ai.

Hkawhkam wa a du salang ni gaw, Yeremia hpe sat kau u ga; shi gaw ning re ai ga tsun ai majaw, mare e naw ngam nga ai hpyen la ni hte, mung masha ni mahkra hpe myit kaji shangun nga ai. Ndai wa gaw amyu masha ni a ngamai wunli lam hpe n myit ya ai, jahten kau na she maw nga ai, ngu nna hkawhkam wa hpe tsun ma ai.

Shaloi hkawhkam Zedekia gaw, Yu mu, shi nanhte a lata hta rai nga ai; hkawhkam wa gaw nanhte ra ai hku Hkum da lu ai n rai, ngu mu ai.

Dai rai nna, shanhte gaw Yerimia hpe woi la nna, sin langa ni a wang kata na, hkawhkam kasha Malhkia a hka htung hta, sumri hte shi hpe shayu dat ma ai. Dai hka htung hta hka n rawng ai, hkumpup hkrai rai nga nna, Yeremia gaw hkumpup hta shang chyat rawng nga ai.

Dai lam hpe na la jang, E-bed-melek gaw hkaw hta na pru nhtawm, hkawhkam wa hpang de sa nna, Nye a madu hkawhkam wa e, myihtoi  Yeremia hpe du salang ni galaw ai lam nlang shut masai: Shi hpe hka htung  hta jahkrat bang kau manu ai; shi kawsi ai hte si na ra ai, ngu nna tsun wu ai.

Shaloi hkawhkam wa gaw, Myihtoi Yeremia garai n si yang, ndai shara na marai masum hpe shaga la nhtawm, hka htung kata na shi hpe shaw la u, ngu nna Hkusha masha Ebed-melek hpe hkang dat wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

HEBRE 12: 1-4

Ya hti na gaw, Hebre masha ni hpang de San Pawlu shagun dat ai laika hta na rai nga ai.

Ya ndai daram law ai makam masham a sakse ni gaw, anhte hpe sumwi zawn wang shinggrup da mi ai majaw, pat shingdang kau ai lam mahkra hte, anhte hta manoi nga ai  shut hpyit mara hpe kau da nna, anhte gat hpang wa ai hte maren, shakut sharang rai gat shadu ra ga ai.  Makam masham a npawt nhpang lam hte, jahkum shatsup ya ai wa Yesu hpe tut nawng e azi yu ga: dai Yesu gaw, Shi hkam la na ra ai kabu gara ai lam a majaw, kaya kahpa hkrum ai hpa zawn n nawn ai sha, udang lam hpe hkap hkam la nu ai; ya e Karai Kasang a tingnyang a hkra maga de wa dung nga sai.

Shut hpyit ai ni a lata ndai hte wa ndang kalang di kau ai hkrum sha ai Madu hpe myit dum nga mu: shaloi myit n-gun n rawng ai majaw, nanhte myit htum ai n hkrum na myit dai. Shut hpyit mara hte gasat gala ai hta, nanhte gaw asai pru ai hte si ai du hkra garai n gasat yu myit dai.

Ya hti ai gaw Karai Kasang a mungga rai nga ai.

KABU GARA SHIGA

LUKA 12: 49-53

Ya hti na gaw, luka a laika na kabu Gara Shiga rai nga ai.

Yesu Shi a sape ni hpe tsun mu ai gaw: Ga ntsa de wan jahkrat na, ngai du sa ring ngai: dai wan ya jang chyi kap na hpe ngai gade wa sharawng nga a hka! Ngai hkam na kashin kamun lam langai mi naw nga ai: dai hpe garai n hkam yang, ngai nachying kyin la nngai.

Ga ntsa de ngwi pyaw jaw na, ngai du sa ai zawn nawn myit ni? Ngai nanhte hpe tsun made ga: Dai hku n rai, shabra na she du sa ring ngai. Ya kaw nna nta langai sha hta na masha manga hte gaw, masum hte lahkawng ran, lahkawng hte masum ran, rai nna, shada hka bra na mara ai. Kawa gaw shadang sha hte, shadang sha gaw kawa hte; kanu gaw shayi sha hte, shayi sha gaw kanu hte; kamoi gaw kanam hte, kanam gaw kamoi hte shada hka bra na mara ai, ngu mu ai.

Ya hti ai gaw Madu a Kabu Gara Shiga rai nga ai.

PRANWAN LADAW (19) LABAN SHANI NA MUNGGA

Tinang n chye ai amu hpe galaw yang myit hki, pu ba ai lam grai nga ai. Hpa majaw nga yang nchye ai hpe byin hkra ngu nna myit masin hkum hkrang ma hkra hpe jai lang nna shakut shaja ra ai majaw re. Ten tup galaw taw nga ai amu chyawm gaw n-gun nau ndat ra ai sha galaw mai nga ai.

Hpang jahtum na aten Madu Karai Kasang galoi du sa na hpe nchye ga re majaw shi Madu du sa jang jin jin byin da mayu ai ni gaw kaga lata la mai ai nnga ai sha shani shagu mai kaja ai lam hpe galaw sa ra na re. Mai kaja ai amu hpe galoi mung galaw shakut ai gaw kaja ai masha tai wa nna kaja ai amu bungli galaw ai gaw shi a matu n-yak nga ai.

Kaja ai amu bungli hpe shani shagu galaw shakut ai wa gaw kaja ai masha tai wa nna, kaja ai masha gaw kaja ai amu hpe galaw na matu n-yak nga ai. Dai rai yang, hpang jahtum na aten galoi re, Madu Karai galoi du na hpe nchye ga ai anhte ni gaw shani shagu na nga sa ai lam hta kaja ai amu bungli ni hpe chyu sha lata galaw sa let kaja ai masha tai wa nna mai kaja ai lam hta myit pyaw myit dik let hkawm sa nna aten shagu hta shajin shachyip tawn da ai asak aprat hta nga sa lu u ga.

DAI MADU HTA E SADI DUNG NGA GA

Sutgan, lagut, Hkungran Poi, Nta de wa ai’ ngu ai ga ni hta bung ai lam hpa nga sai kun?

Shi a mungga hpe madat la nga ai shawa masha ni, hta la, chye la, lu na matu, shani shagu byin ai lam ni hta na maumwi zawn, gashadawn hta tsun sharin na Madu Yesu sharawng nga ai. Hkungran poi ngut ai hpang n myit mada ai sha bai wa na nta madu wa a maumwi hta mau hpa lam yan ni lawm nga ai. Nta madu wa a arung arai ni hpe sin nga ai mayam ni hpe mu na malai yup pyaw nga ai mayam ni hpe wa mu kau sai kun? Dai hta, arung arai law law sut su ai wa, lani mi hta yup rawt wa yang, lagut e yawng la kau ya ai hpe mu yang gaw taw? Rai yang, ndai lam ni gaw, Sumsing lamu a mungdan hte seng nna anhte hpe hpa tsun nga ai kun? Karai Kasang jaw ya na sutgan ni gaw ndai mungkan n tsa hta na sutgan ni hta grau manu dan nga ai.

Tim, Karai jaw da ai sutgan ni hpe atsawm hkang zing ai lam n nga yang, anhte aloi sha shamat kau mai ai. Ndai ga shadawn hta, Karai a mungdan na sutgan ngu ai gaw hpa mi rai sai kun? Lam yan shagu hta yu ga nga tim, dai gaw Karai Kasang a mungdan hpe tsun nga ai. Laklai ai hte mada yu ga nga yang, Madu Karai hkum nan, anhte tam nga ai sutgan rai nga ai. ‘N-gun chyalai rawng ai wa na a sutgan tai nna, gumhpraw sumpu lu la na ndai, nang hkum nan Shi Madu hta kabu pyaw nga na ndai’ (Yob 22:22-23).

Madu Karai gaw anhte hpe Shi a kashu kasha ni majing zawn mahku mara ai lam jaw ya nna, htani htana asak jaw na hpe mung gasadi jaw da sai. Lama na, Madu Karai hpe anhte a sutgan majing zawn tawn da lu ai rai yang, Shi Madu mung anhte hpe Sumsing Lamu na daw sha poi hta reng grau ai manang shatai la na rai nga ai.  Ndai gashadawn hta, sadi dung ai hte lagawn lamawn re ai hpe sadi jaw ai sharin ya ai lam ni lawm nga ai. Karai Kasang hta, sadi dung ai lam gaw hpa majaw ahkyak nga ai kun? Marai mi a matu, sadi dung ai lam gaw ngang kang ai hte nga lu na matu anhte hpe shakut shaja na ahkang jaw ai. Madu Karai gaw, anhte hpe ndaw nhka lu ai tsawra myit hte sadi dung ai lam hte gyit hkang da sai. Dai gaw, Gashaka tawn da ai ngu ai lachyum rai nna, gade yak hkak, jam jau ai rai tim, gasadi hpe grin nga shangun sai. Sadi dng ai lam gaw Karai Kasang a maka kumla rai nna, anhte kaw nna Shi Madu Karai myit mada ai mung dai sha rai ng ai. kaja wa, Karai Kasang gaw sadi dung nga na matu chyeju hte n-gun atsam jaw ya ai. Karai Kasang a kashu kasha ni tai lu ai gaw kabu pyaw hpa ahkang aya rai nna, lit kaba mung rau lawm nga ai. Anhte hpe jaw da sai chyeju sutgan hpe atsawm akawm sha jai lang na matu Madu Karai myit mada nga ai. Madu Karai law law jaw da ai rai yang, law law bai myit mada na re.

Nta madu wa tsan ai de hkawm mat wa ai ngu ai gaw, dai ni jang nta madu wa ra sharawng ai hpe galaw na (snr) hpang de she galaw na, anhte a matu agung alau rai nga ai. Sadi dung ai lam hta anhte kaning rai rawt jat galu kaba wa na rai? Karai Kasang a shaman chyeju gaw anhte hpe lam madun ya na re. Amu Kaji hta anhte kang ka ai rai yang, ap tawn da sai amu magam kaba hta mung anhte kang ka na re. Karai Kasang jaw da ai lit magam hta kang ka rai lu na nang jin jin rai sai kun?

Dai ni na aten, sadi dung na matu hpa majaw yak la ga ai kun? Ya prat na shinggyim uhpung gaw n dut ndang ahkang hpe sadi dung ai hta grau jai lang nna, n chye lu ai, tsun n lu ai shawng de na aten hta, gyit hkang hkrum na n kam ma ai. Marai rai a myit shang sha ai lam hta akrit akroi rai nna n kam dinglun ma ai. Dai zawn re ai hkring htawng hpe, anhte a matu sha n rai, hpang e du sa na anhte a kashu kasha ni a matu, galai shai kau na ra kadawn sa ga ai. Lama na anhte ni makam masham hpe shalai ya mayu ai rai yang, ramma ni a man e anhte gaw sadi dung ai ni shawng tai ra ai.

“Madu e, anhte shut hpyit ai rai tim, Nang Madu gaw sadi dung nga ai. Yak hkak jam jau ai lam hpe hkrum katut wa ai ten hta rai tim, Madu hta sadi dung nga lu na ngai hpe garum ya e. Ngai a lit magam hpe gun ai lam hta, Nang Madu jaw da ai chyeju kumhpa, aten ahkying, machye machyang ni hpe atsawm jai lang lu na, shakut shaja lu na garum la rit law. Amen.

PRANWAN LADAW (19) LABAN SHANI NA CHYUM LAIKA

7th August 2016

CHYUM MUNGGA DAW 1

HPAJI NINGlI  18: 6-9

Ya hti nga gaw, Hpaji Byeng-ya a laika hta na rai nga ai.

Dai Shalawt Dat ai Shana a lam, anhte a ji woi ji wa ni hpe shawng nna tsun dan manu ai. Shing rai, Karai Kasang shanhte hpe dagam da ai hte maren, teng teng byin na ra ai lam anhte a ji wa ni mu chye nna, kam hpa ai myit kaba hte hkawm sa wa na ma ai.

Na a amyu masha ni myit mada ai hte maren, ding hpring ai ni hkye hkrang la ai hkrum nna, n ding n man ai ni mahtang hten byak ai hkrum mat nu ai. Kaning rai nme law, anhte a hpyen ni hpe ari jaw ai amu a marang e, Nang anhte hpe na a myu masha ni shatai nna shagrau ya nit dai.

Ding man ai ni a kashu kasha ni lagyim ai hku nna hkungga nawng ya ai shaloi, shanhte ga shaka da ma ai: Chyoi Pra ai ni gaw shaman ya ai hte hkrit hpa lam ni hpe, lang lata jawm hkam la na mara ai; shing rai, shanhte gaw ji woi ni a mahkawn ga hpe mahkawn mangoi nga ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

HEBRE 11: 1-2. 8-12

Ya hti na gaw, Hebre masha ni hpang de San Pawlu shagun dat ai laika hta na rai nga ai.

Makam masham ngu ai gaw, anhte myit mada ai chyeju lam ni teng teng lu la na hpe myit hkut shangun nga ai, garai n mu yu ai lam ni teng teng nga ai hpe tau chye shagun ai mung rai nga ai. Anhte a ji woi ji wa ni gaw shanhte a makam masham a majaw, sharawng awng ai lu la manu ai.

Abraham gaw, shi hte shi a aru arat a sali wunli tai ma ra ai mungdan de, pru sa wa na matu shaga la ai hpe hkrum ai shaloi, kam sham ai hte madat sai; shi gade sa wa ai n chye ti mung, kam sham ai majaw, pru hkawm wa sai.

Abraham gaw kam sham ai majaw, chyasam masha zawn Karai Kasang ndat da ai mungdan de sa nga nna, dai ga ndat hte maren sali wunli jawm hkam la lu ai Isak yan Yaku hte rau ginsum hta sha rawng nga ma ai. Kaning rai nme law, Karai Kasang shachyaw da nna, npawt nhpang grin nga ai mare hpe, shi myit mada nga ai.

Sara mung aprat lai mat ti mung, kam sham ai a majaw, na um nasin rai wa lu na atsam lu la wu ai: kaning rai nme law, ga ndat tawn da ai wa kangka rai nga ai, ngu nna shi kam wu ai. Dai re ai majaw, la chyasi zawn re ai masha langai hta na, sumsing lamu na shagan ni hte, nammukdara makau na, n dang hti ai zaibru hta, grau law htam wa ai kashu kasha ni pra wa ma sai.

Ya hti ai gaw Karai Kasang a mungga rai nga ai.

KABU GARA SHIGA

LUKA 12: 32-48

Ya hti na gaw, luka a laika hta na kabu Gara Shiga rai nga ai.

Lang mi na Yesu Shi a sape ni hpe tsun mu ai gaw: Sagu hpung kaji e, hkum hkrit et: dai mungdan nanhte hpe jaw na, nanhte a Kawa myit sharawng nga ai. Nanhte lu ai arai dut kau nna, alu jaw mu; tinang a matu dingsa n chye ai gumhpraw jan galaw nna, lagut mung n du, manut e mung n sha lu ai, sumsing lamu e n htum n ma chye ai sutgan kyem da mu. Kaning rai nme law, nanhte a sutgan nga ai kaw, nanhte a myit masin mung nga na malit dai.

Nanhte gaw nshang e shingkyit kyit nna, pyengding shatu let, tinang a madu hkungran poi de na bai wa nna, chyinghka wa akawk yang, shi hpe shaloi jang hpaw la lu hkra ala nga ai ni zawn, nanhte mung rai nga mu.

Dai madu wa yang, maja nga ai ali ama ni gaw a lu ma ai. Ngai nanhte hpe teng teng tsun made ga: dai madu gaw Shi hkum shajin nna, shanhte hpe dung shangun nhtawm, shi nan shanhte hpe sa galaw jaw na mu ai. Yup tung hpawa e rai ti mung, u goi mahka de rai ti mung, shing rai maja nga ma ai hpe wa mu yang gaw, dai ali ama ni a lu ma ai.

Ndai hpe myit dum nga mu: gara ahkying aten hta lagut sa na hpe nta madu chye yang gaw, shi a maja nga nna, shi a nta de n tawk waw shang lu hkra, shi galaw na wu ai. Dai rai nna, nanhte mung chyip chyip rai nga mu: kaning rai nme law, nanhte n shadu ai aten hta Masha Kasha du sa na ra ai, ngu nna tsun mu ai.

Shaloi Petru gaw, Madu e, ndai ga shadawn gaw anhte hpe sha, shing n rai, yawng hpe tsun ai, rai nni? ngu nna san wu ai. Nta madu shi a kun dinghku ntsa e san tawn da nna, aten du jang lusha karan jaw lu na, kangka re ai myit su ai kunhting wa, kadai rai nga a ta? Shi a madu bai wa jang, shi hte seng ang ai bungli hkrak hkan galaw ai ali ama a nga ai.

Nanhte hpe ngai teng teng tsun made ai gaw, Dai madu gaw shi a arai mahkra a ntsa e dai shangun ma hpe san tawn da na wu ai. Shing n rai, dai ali ama gaw, Nye a Madu du wa na naw na la nga ai, nga nna shi a kraw kata e myit nga let, shangun ma manang ni numsha lasha hpe anu ajin di ai hte, lu nga sha nga nna, chyaru nang ai ni rai yang gaw, dai ali ama mada n hten ai nhtoi hte, n shadu ai ahkying hta, shi a madu du wa nna, dai wa hpe nhtum nni adup kau nhtawm, shi a kumhtaw dawm la ya nna, kangka n re ai ni hte rau tawn kau na ra ai. Tinang a madu a myit ra ai chye da ninglen, hpa mung n galaw n lajang ai ali ama gaw, law law lang anu kayet ai hkrum na ra ai: n chye nna kayat ging ai amu galaw kau ai ali ama chyawm gaw, loi mi sha anu kayat ai hkrum na ra ai. Law wa hkam la ai wa kaw na, law wa hpyi na ra ai. Law wa ap ya ai masha kaw na mung grau nna bai hpyi na mara ai.

Ya hti ai gaw Madu a Kabu Gara Shiga rai nga ai.