KARAI A KANU NU MARIA A POI NHTOI SHANI NA MUNGGA

Ngwi pyaw ai shaning nnan yawng a matu rai u ga. Shaning 2017 hpang ai shani hta Karai a Kanu, Nu Maria poi galaw ai gaw htap htuk nga ai. Hpa majaw nga yang anhte shinggyim masha ni a matu kaja dik htum ai kasi hpe Nu Maria kaw nna yu la mai nga ai. 

Karai Kasang a shinggyim masha ni hpe hkye hkrang la ai masing hta Nu Maria gaw shi a asak aprat yawng hpe Karai Kasang a yaw shada ai lam awng dang na matu sak jaw ap nawng lai wa sai re. Shi a myit ra sharawng ai hpe nre ai sha Karai Kasang a ra sharawng ai hpe tup hkrak hkan shatup lai wa sai.

Npawt shut hpyit mara nkap ai sha shangai wa ai Karai Kasang a lak lai ai shaman chyeju hpe lu la ai hte maren shi a asak aprat htum hkra shut hpyit mara nkap ai sha kang ka ai hte ap nawng lai wa sai. Karai a Kanu ngu nna Karai Kasang yaw shada ai hte maren Madu Yesu a Kanu, anhte yawng a Kanu re ai hpe tsaw ra myit kaba hte madun dan lai wa sai re.

Karai Kasang jaw ya ai anhte a lit magam yawng hpe kang ka ai hte galaw sa ra ai hpe dai ni na poi nhtoi shadum ya nga ai. Nu Maria a kasi hpe la nna kanu kawa kashu kasha ngu ai tinang hte seng a lit magam, tinang galaw ang ai amu bungli ni yawng hpe kang ka ai hte galaw lu nna Nu Maria zawn Karai Kasang a mying nisang hpe shadan shaleng lu u ga.

NU MARIA HPE KATSI LA NNA KARAI KASANG HTA MYIT MAJU JUNG NGA GA

Madu Yesu shangai wa ai mabyin hpe ka ai hta Kasa Luka ning nga ai, "Maria chyawm gaw dai ga yawng mayawng hpe matsing gun la nna, shi kraw kata e myit sumru yu nga ai", nga ka da ai. Ndai Mungga ni hta, Kasa Luka hpa hpe tsun mayu ai kun? Mai byin ai mahtai law law nga nga ai.

Shawng nnan, lai wa sai shata ni hta byin lai wa sai mabyin ni hpe Nu Maria sung sung wa myit yu nga ai. Lamu Kasa Gabriela sa kawan kau da ai hpe mung dum na re. Teng sha wa Lamu Kasa a mungga; "yu u, nang na-um nasin rai wa nna shadang sha shangai  na rin dai, shi a amying "Yesu" ngu nna, nang shamying ya na ru ai; dai wa gaw galu kaba na ra ai rai nna, Tsaw Htum ai wa a Kasha ngu ai hkam la na ra ai!" ngu ai mungga ni hpe bai myit dum nga na re. Dai hta n-ga, kana Elizabeth hte hkrum shaga ai ten hta shi a hkritung na ma mung gumlawt nga ai hpe myit dum nga na re. Bethlehem mare de hkrun lam galu hkawm sa wa ai ten, Ma Yesu hpe shangai la na shara tam la yak ai hpe mung myit yu nga na re.

Ya shaloi, Madu Yesu shangai wa ai aten yang na mabyin ni hpe mung myit aru yu chyalu rai na re. Sagurem ai ni, Ma Yesu hpe sa mu tam la nna kabu gara nga ai hpe mung shi sawn sumru yu nga na re. Grau nna mai byin ai gaw, shawng lam de kaning rai wa na hpe myit tsang ai lam ni mung nga sa re. Yawsep hte shan lahkawng ma chyangai dai hpe kaning rai bau kaba lu na kun? Kaning san ai ma tai wa na kun? Grai yak na kun (snr) grai si mani ai wa tai na kun? An kanu yan kawa hte rau nga na gaw mai byin na kun? Masha kaga ni shi hpe  hkap la na kun? Myit tsang ai lam law law mung nga na re.

Dai lam ni yawng hpe myit aru yu nga wu ai. Raitim, ngai myit ai gaw, grau nna shi myit taw na gaw, mungkan ga hpe hkyela mayu ai Karai Kasang, arawng sadang ahkang aya hpe n lang ai sha, matsan mayan re ai, shi hkum nan hte Yawsep, sagurem ni a lata hku nna galaw sa wa ai hpe myit aru yu nga na rai nga ai.

"Maria chyawm gaw dai ga yawng mayawng hpe matsing gun la nna, shi kraw kata e aru yu nga ai". Teng sha wa, yawng a shawng ningnan hpa hpe mung n chye madat na re. Rai ti mung, Karai Kasang gaw Shi lajang da sai hte maren amu galaw mat wa na hpe Nu Maria kam nga nu ai. Madu Yesu hkawm sa, shamu shamawt, tsun shaga ai hpe mung yu maram nga na re. Matut manoi rai nna shi yu maram lu ai lam ni hpe mung myit sumru yu let nga nga na re. Dai masa lam hku nna, bying yang gaw asan sha rai wa nna Karai Kasang a atsam hte tsawra myit hpe chye na hkap la wa na rai nga ai.

Karai a kanu, Nu Maria e, anhte a mahkrum madup ni hpe aten la let sawn sumru chye wa lu na nyan marai jaw ya rit. Simsa ai hte akyu hpyi ai, myit aru yu chye wa nna nang Nu zawn, anhte mung Karai Kasang hpe chye chyang wa lu nna anhte a prat hta kaning rai amu galaw nga ai hpe chye lu na matu garum ya rit law..... Amen!

CHYOI PRA AI MARIA KARAI A KANU HPE MYIT DUM POI SHANI NA CHYUM LAIKA

1st January 2017

CHYUM MUNGGA DAW  1

Bu Hkawm  6:  22-27.

Ya hti na gaw Bu Hkawm laika hta na rai nga ai.

Mawshe hpe Madu tsun wu ai gaw: Arun hte shi a shadang sha ni hpe ning ngu tsun u: Israela a kashu kasha ni hpe ning ngu shaman ya mu: Madu nang hpe shaman ya nna, bau sin nga u ga. Madu nang hpe shi a myiman a nhtoi jahtoi ya nna, matsan dum nga u ga. 

Madu nang hpe mada yu nna, ngwi pyaw sim sa ai hpe jaw jau ya u ga law, ngu na rai myit dai. Shing rai shanhte gaw, Israela a kashu kasha ni a ntsa e, nye a mying ningsang hpe gang shaga la nna, ngai shanhte hpe shaman chyeju jaw  na we ai.

Ya hti ai gaw Karai Kasang a mungga rai nga ai.

CHYUM MUNGGA DAW  2

Galati  4: 4-7.

Ya hti na gaw Galati masha ni hpang de San Pawlu shagun dat ai laika hta na rai nga ai.

Hpu nau ni e, aten ladaw gu jang, jep ai tara npu e nga ai ni hpe hkye hkrang shaw la na hte, kasha shatai na chyeju anhte hkam la lu na matu, numsha kaw na shangai ai hte, dai tara dingsa npu e prat wa ai, shi a Kasha hpe nan, Karai Kasang anhte hpang de shangun dat wu ai. Ya nanhte gaw, kashu kasha rai nga myit dai majaw, Karai Kasang a Kasha a Wenyi hpe anhte a myit masin de shangun dat nna, dai Wenyi mahtang gaw, Abba, Wa e, nga nna nanhte hta jahtau nga ai. Dai rai nna, nang gaw mayam naw rai nga ndai n rai, kasha nan rai nga nit dai; kasha nan rai nga yang gaw, Karai Kasang a marang e sali wunli hkam la ang ai wa mung rai nga ndai.

Ya hti ai gaw Karai Kasang a mungga rai nga ai.

KABU GARA SHIGA

Luka  2: 16-21.

Ya hti na gaw Luka a laika hta na Kabu Gara Shiga rai nga ai.

Lamu kasa ni wa mat ai hpang, sagu rem ni Betlehem mare du hkra sa nna, Maria yan Yosep hpe mung, dumsu wakang hta kaleng taw nga ai ma chyangai hpe mung mu ma ai. Shi hpe mu yang, dai ma a lam shanhte hpe shana dan sai hte maren, shanhte tsun kajai dat ma ai. Na la lu ai ni yawng hte mung, sagu rem ai ni shanhte hpe tsun dan ai ga a majaw mau nga ma ai.

Maria chyawm gaw dai ga mahkra matsing la nna, shi a myit hta e sumru yu nga ai. Sagu rem ai ni mung shanhte hpe tsun dan sai hte maren, na la lu ai hte mu la lu ai lam mahkra a majaw, Karai Kasang hpe shakawn kungdawn, shagrau sha-a let bai wa ma ai. Dai ma kaji hpe ashan kadoi na matu matsat ya nhtoi du jang, kanu a hkritung e garai n rawng yang, lamu kasa shamying da ai amying hte maren, shi hpe Yesu ngu nna shamying ya mu ai.

Ya hti ai gaw Madu a Kabu Gara shiga rai nga ai.

HKRISMAT POI SHANI NA MUNGGA

Madu Yesu shangai wa ai Hkrismat Poi hpe shaning shagu anhte galaw ga ai rai yang kabu pyaw hpa lam hte hpring ai aten ladaw langai rai ai. Pyaw hpa lam ni hte hpring tsup ai Hkrismat Poi hpe masha hkum shagu ala dingda ai aten ahkying rai nga ai.

Hkrismat yu ngwi ni hpe na lu ai, dum nta masha ni hte mu hkrum ai, tinang ra ai arung arai ni hpe kum hpa lu la ai, amu bungli kaw nna chyahkring mi ban sa lu ai hte kaga lam ni mung anhte a matu kabu pyaw hpa lam rai nga ai. Ndai lam ni hpe anhte Hkrismat ten hta lu la ai rai tim Hkrismat Poi nhtoi lai di ai hte anhte a kabu pyaw hpa lam ni yawm mat ai, shing nrai mat mat chye nga ai.

Hkrismat a ahkyak dik htum ai nam chyim hpe jaw jau ai kaw nna lu la mai nga ai. Kawa Karai Kasang gaw Shi a Kasha shingtai hpe anhte shinggyim masha ni a matu jaw ya sai. Nu Maria mung shi a asak aprat yawng hpe Karai a Kasha Madu Yesu anhte hpe jaw ya na matu sakjaw ap nawng lai wa sai. San Yosep mung Madu Yesu a kawa tai let makawp maga ya na matu ap nawng sai re. 

Dai rai yang jaw jau ai amu magam hte htingbu wa a matu ap nawng ai amu bungli ni hpe ndai Hkrismat hta galaw sa ai a marang e ngang grin ai kabu pyaw ai lam gaw anhte hte shaning ting hta hkam la lu u ga. Grau nna anhte a myit masin hpe jasan jaseng nna Karai Kasang gaw anhte hte rau nga ai (Immanuel) hpe madun dan lu let Madu Yesu jaw ya ai myit ngwi simsa ai lam hpe shaning ting hta hkam la lu u ga.

YAWNG JAW KAU AI KARAI KASANG

New York mare kaba na, "Conesus" ngu ai kahtawng a tsawm htap la ai shara hta na jau tai jawng hta, "novitiate" ten hta nga lai wa sai. Jau tai jawng gaw "Hemlock" hkanawng a lahta maga kaw rai nga ai. Dai kaw nga na mayak langai mi gaw N-shung ta hta grai katsi lagyi ai hpe hkam sha ra ai. Mabyin gaw ndai zawn rai nga ai.

December shata kaang, lani mi na nhtoi hta, anhte hta ‘hka’ n nga mat ai lam byin pru sai. Hkanawng kaw nna pipe hte hka chyup la ai rai tim, katsi la ai majaw, pipe ga gabrat mat ai. Gara kaw baw kaprang mat ai hpe chye na matu shani shagu hkanawng de yu nna gye nga ai shara  hta lup tawn da ai pipe hpe jep sagawn yu ra ai. Pipe dai gaw hkanawng kaw nna, kawng langai mi lai rai, jau tai jawng de len tawn da ai rai nga ai. 

Ngai naw adum nga ai gaw, bungli hpran hpareng rai nga ai brother Peter gaw ladat shaw sai. Shani tup lam hkawm nna pipe hpe jep hkawm ai, kade katsi lagyi la ai rai tim, hka chyup jak nta makau kaw ginsum kaji langai mi galaw la nna yup sin nu ai. Lani mi hta, ngai shi hpe zeng gaw rai nga nni, jawng kawng de lung wa nna wa yup rit le, ngu tsun yu ai. "Rai sai law, jawng up jau wa, pipe dai hpe byeng na matu tsun da ai majaw, ginsum kaw sha yup sana, dai kaw nga yang she, hka gayun ai shara ngai mu na rai nga ai", nga nna nhtang tsun ai. Teng sha wa, matsat ya ngu na hpang e hka pipe hpe lu byeng la nna, jau tai jawng de mung hka bai lu lang sai. 

Dai ni na kabu gara ai shiga hpe hti yu yang, brother Peter hpe dum nna shi a ap nawng lam hpe shingran nngai. Ndai lam gaw Madu Yesu anhte a matu galaw dan ai a kup tsup ai maka nan n rai ni?. Madu a matu gaw Sumsing lamu hta apyaw sha ningngai nga na aloi sha rai tim, yawng mayawng hpe  tawn kau nna anhte shinggyim masha zawn rai, sa nga na matu yu wa sai. 

Dai lam gaw Kasa Yawhan hpe myit shalan ya sai. Dai majaw, “dai mungga gaw masha a hkum shan dagraw la nna, chyeju hte tengman ai hpring let, anhte hta nga nga ya sai rai  nna, kawa hta na kasha shingtai a hpung shingkang zawn, anhte shi a hpung shingkang hpe mu lu saga ai”, nga nna ka tawn da sai. 

Ndai chyum ga kadun hpe anhte adum nga ga. Karai Kasang gaw anhte hpe tsawra dik ai majaw shi a kasha shingtai hpe jaw kau ni ai. Dai kasha mung mai kaja la ai hte tsawra chye dik nga ai. Shi Madu mung anhte hpe tsawra dik ai hte shi prat ting hpe anhte a matu jaw kau ai gaw, anhte a matu mara, udang ntsa hta si hkam ai hte sakse madun sai. 

Hkrismat nhtoi gaw laning mi hta kalang sha du ai. Raitim, dai Hkrismat a lachyum rai nga ai; Karai Kasang a anhte hpe tsawra ai myit, shi hkum nan anhte hpe jaw kau nna, shaman ya nga ai lam gaw, anhte a shani shagu na sak hkrung lam hta abyin nga na re. 

Dai ni na akyu hpyi hkungga hta Karai Kasang hpe shakawn kungdawn ga law. Kawa, Kasha, chyoipra ai Wenyi Karai Kasang gaw hpung shingkang shakawn kungdawn htani htana anga nga u ga law. Amen!

HKRISMAT POI SHANI NA CHYUM LAIKA

HKRISMAT  POI

25th December 2016

CHYUM  MUNGGA  DAW  1

Esaia 52: 7-10.

Ya hti na gaw myihtoi Esaia a laika hta na rai nga ai.

Kabu gara ai shiga gun nna, ngwi pyaw ai lam shana ai wa a lagaw, gade tsawm htap nga a hka! Kaja ai shiga kajai gumhkawng ai hte, hkye hkrang la ai lam shana ya let, na a Karai Kasang up nga ai, nga nna Ziun hpe tsun shana ai wa a lagaw gaw, bum lang ntsa e gade tsawm htap nga a hka! Na a sin langa ni a nsen madat: shanhte nsen sharawt nna, kabu gara ai hte rau garu ma ai: kaning rai nme law, Madu gaw Ziun mare de nhtang wa ai hpe, tinang nan myi chyaw mu lu na ma ai.

Yerusalem mare na katsi katsang shara ni e, mahkawn mangoi let rau garu mu: Madu gaw shi a amyu hpe shalan shabran ai hte, Yerusalem mare hpe hkye mawai la wu ai. 1Madu gaw, masha amyu baw ni mahkra a man e shi a chyoi pra ai lahpum ladawn dan nna, anhte a Karai Kasang a hkye hkrang la ai lam gaw, lamu ga htum hkra dan leng wa sai.

Ya hti ai gaw Karai Kasang a mungga rai nga ai.

CHYUM MUNGGA DAW  2

Hebre 1: 1-6.

Ya hti na gaw Hebre masha ni hpang de shagun dat ai laika hta na rai nga ai.

Hpu nau ni e, Karai Kasang gaw moi na lakhtak e, prat mi hte prat mi lam amyu myu hku nna, myihtoi ni a n-gup hte ji wa ni hpe ga tsun da nu ai. Ndai hpang jahtum na aten ladaw hta shi a Kasha a n-gup hte anhte hpe ga matsun jaw da mani ai.  Dai kasha hpe, sali wunli mahkra la na matu, Karai Kasang san da sai rai nna, shi a marang e ndai mungkan ga hpe hpan tawn da nu ai. Dai Kasha gaw Karai Kasang a hpung shingkang tu kabrim ai  ahtoi rai nga ai hte, Karai atai a hkrang sumla rai nga nna, shi hkang da ai mungga a atsam hte, shi yawng mayawng hte hpe bau sin nga ai. 

Ya, shut hpyit mara shatsai kau ya nna, matsaw ningtsang na daru magam a hkra maga de shi dung nga nna, lamu kasa ni hta shi grau reng ai amying hkam la sai hte maren, shanhte hta grau reng ai wa tai nga ai. Kaning rai nme law, “Ngai sha Nang rai nga ndai; dai ni e  ngai nang hpe shaprat sade ai;” bai nna, “Ngai gaw shi a Kawa tai nna, shi gaw Ngai sha rai na ra ai,” nga nna Karai Kasang tsun ai ga hpe, gara lamu kasa hpe shi tsun yu a ta? Dai hta kaga, shi a Kasha alat hpe mungkan ga de jashawn dat ai shaloi, Karai Kasang a lamu kasa ni yawng shi hpe nawku mu ga, nga nna tsun wu ai.

Ya hti ai gaw Karai Kasang  a mungga rai nga ai.

KABU GARA SHIGA

Yawhan  1: 1-5. 9-14.

Ya hti na gaw Yawhan a laika hta na Kabu Gara Shiga rai nga ai.

Shawng npawt e Mungga nga nga ai; dai Mungga gaw Karai Kasang hte rau nga nga nna, dai Mungga nan Karai Kasang rai nga ai. Dai Mungga gaw shawng npawt e Karai Kasang hte rau nga nga ai. Arai yawng mayawng hte gaw shi a marang e tai wa ai rai nna, shi n galaw lawm ai gaw langai mi pyi n nga ai. Shi hta e asak daju rawng nga ai rai nna, dai asak gaw, masha ni a nhtoi rai nga ai. Dai nhtoi gaw nsin hta htoi nga nna, nsin mahtang dai hpe n dang kau lu ai.

Mungkan ga e shangai wa ai masha yawng hte hpe jahtoi ya ai nhtoi nga nga sai: shi gaw nhtoi majing rai nga ai. Shi gaw mungkan ga e nga nga ai hte, mungkan ga mung shi a marang e tai wa sai; rai timung, mungkan ga gaw shi hpe n chye wu ai. Shi gaw shi a buga de du sa timung, shi a baw sang ni shi hpe n hkap la ma ai. Shi a mying ningsang hpe kam sham nna, shi hpe hkap la ai ni yawng hte hpe chyawm gaw, asai hte shaprat ai ni n rai, hkum shan a myit hte mung n rai, Karai Kasang e shaprat ai ni she rai nga ma ai.  Mungga gaw masha tai wa nna, anhte hte rau nga nga sai. Dai rai nna, Kawa hta na prat wa ai Kasha shingtai a hpung shingkang zawn, shi a hpung shingkang hpe anhte mu lu saga ai.

Ya hti ai gaw Madu a Kabu Gara shiga rai nga ai.

DU SA LADAW HTA LABAN (4) NA MUNGGA

Madu Yesu Hkristu shangai wa na Hkrismat poi hpe hkyen lajang ai aten ladaw a hpang jahtum na nhtoi de anhte du shang wa sai re. San seng san pra dik htum ai Madu Karai hpe hkap tau la lu na matu anhte a myit masin ni hpe jasan nga ai anhte ni gaw San Yawsep a kasi hpe la mai nga ai.

San Yawsep gaw shi hte mahtan da ai num sha Chyoi Pra ai Wenyi a hpung shingkang hte Madu Yesu hpe na-um na-sin ai lam nchye shi yang shawang tsaw ra myit kaba hte manang jan hpe jam jau nhkrum shangun mayu nna atsin sha ja hka kau ya na hpe myit hkut da sai re. Manang jan hpe mara njaw ai sha myit galu kaba ai hte hkap la lu ai hte manang jan a matu myit tau ya chye lu ai gaw anhte a matu kasi la hpa langai rai nga ai.

Ndai du sa ai ladaw hta myit masin hpe jasan jaseng ai sha n-ga, amu bungli hku nna, ta tut galaw sa mai ai lam hta tinang jaw dum ai aten shing nrai, manang wa shut shai ai aten ni hta San Yawsep zawn manang wa hpe n-jeyang daw dan ai sha tsawra myit madun dan lu na matu hte manang wa hpe mai kaja ai amu bungli ni hte garum shingtau lu na matu shakut shaja sa wa lu u ga.

KARAI KASANG A NSEN HPE SADI MAJA AI

Madu a lamu kasa Yawsep kaw dan pru nna tsun ai gaw; "yu u, dai hkawnsek gaw na-um nasin rai wa nna, shadang sha shangai na ra ai, Shi a amying Emanuela shamying ya na maru ai, nga ai: de a lachyum, Karai Kasang anhte hte rau rai nga ai, nga ai re ai". Ndai chye na ai lam, "Karai Kasang anhte hte rau rai nga ai" ngu ai hpe dai ni hti ai kabu gara shiga chyum daw ting hta mu lu na re. Dai majaw, Karai Kasang gaw anhte a lapran hta mung nga nga ai hpe dum hprang lu na lam rai nga ai. Dai hpe anhte atsawm sumru yu ga!

Shawng nnan, ga si ndai ni gaw myihtoi Esaia a laika hta na rai nga ai. Daw kaba (7) hta, Karai Kasang gaw Yuda hkawhkam Ahaza hpe; "shayi hkawnsek gaw gawng li nga nna, shadang sha shangai na ra ai; shi a mying hpe Emmanuela shamying ya na ru ai," (Esa 7:14) ngu anhte hti lu ga ai. Kasa Mahte mung, ga ndai hpe sha lang nna tsun ai gaw, Nu Maria a kasha, Madu Yesu, Emanuela, Karai Kasang anhte hte rau rai ai, ngu ai hpe shadan shaleng mayu nna rai sai. 

Nu Chyoi Pra ai Maria a prat hpe yu nna mung, ndai lam ni hpe asan sha mu lu ai. "Shi a kanu Maria gaw, Yawsep e mahtan da nga sai rai nna, shan shada da grai n kanawn yang, shi gaw dai Chyoi Pra ai wenyi a majaw na-um nasin rai wa sai", nga ai. Tsun ga nga yang, Maria gaw tara hkan shadik ai, sum num ai numsha rai nga ai majaw, Chyoipra ai wenyi gaw, shi a hkri tung hta asak nnan byin shangun sai. 

San Yawsep hta mung dai hte maren byin wa sai. Nu Maria a ntsa shi galaw ai amu magam hpe yu nna dingman ai masha re ai hpe anhte dum chye ga ai. Nu Maria hta na-um nasin re ai hpe chye jang, shi hpe n shabrawng mayu wu ai majaw, shi e lagyim dat kau na maw nga ai. San Yawsep dai zawn myit dawdan ngut ai hpang e she Karai Kasang shi hpe shaman ya ai mung laklai ai lam rai nga ai. Dai hpe yu yang, Karai Kasang hte Yawsep a lapran amu rau jawm galaw ai hpe mu lu ai. Karai Kasang a shaman chyeju marang e, Yawsep gaw dingman kangka ai masha tai wa nna, dai zawn kaja ai dawdan lam hpe, shi galaw lu ai rai sai. Dai zawn rai kaja ai lam hpe dawdan lu sai re majaw, Karai Kasang gaw grau nna shaman ya ai hte, Nu Maria a hkritung na ma gaw, Chyoi Pra ai Wenyi a atsam hte byin tai wa ai hpe, yup mang hta hpaw shaleng dan ai, hkam la lu sai. Karai Kasang sharawng awng ai hte maren hkan galaw ai Yawsep dai hpe na la jang, ‘dai Madu a kasa shi hpe hkang da wu ai hte maren, galaw wu ai rai nna, shi a madu jan hpe la nna nta de woi da nu ai. 

Masha law law wa, ngwi pyaw ai prat hta nga ai, amu bungli shakut galaw let kun dinghku hpe bau maka ai, hte hpan amyu myu nga mali ai. Rai tim, shanhte a shani shagu na sak prat hta Karai Kasang kade daram shaman ya nga ai hpe, marai kade wa dum hprang nga ai kun? anhte mau hpa n rai ni?. 

San Yawsep kaw nna anhte sharin la ra ai lam nan rai sai. Karai Kasang hpe kade wa sadi maja ai ngu yang, shi yup pyaw nga ai aten hta pyi amaja let nga nga ai. Dum chye la sai rai yang, shi a matu, Karai Kasang ra sharawng ai hpe kam sham myit kaba hte gun hpai mat wa sai. Dai gaw anhte hkum nan mung hkan galaw ra ai lam nan rai nga ai.

DU SA AI LADAW LABAN (4) NA CHYUM LAIKA

DU SA AI LADAW HTA LABAN (4)

18th December 2016

CHYUM MUNGGA DAW  1

Esaia  7: 10-14.

Ya hti na gaw myihtoi Esaia laika hta na rai nga ai.

Madu gaw Yuda ni a hkawhkam Ahaza hpe, Na Madu Karai Kasang kaw lamik kumla hpyi u; sung ai shara e rai timung, matsaw lahta tang e rai timung, hpyi u, ngu nna tsun wu ai. Ahaza chyawm gaw, Ngai n hpyi na; Madu hpe n chyam yu na nngai, ngu nna htan wu ai. Shaloi Madu gaw, Dawi amyu ni e, madat la marit; nanhte gaw masha hpe n kaw n law di na hpa n nawn ai hta n-ga, nye a Karai Kasang hpe mung n kaw n law di na myit ni? Dai re  majaw, Madu shi nan nanhte hpe lamik kumla madun na ra ai: yu mu, shayi hkawnsek na-um nasin rai wa nna, shadang sha shangai na ra ai; shi a mying hpe Emanuela ngu nna shamying ya na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW  2

Roma  1:1-7.

Ya hti na gaw Roma masha ni hpang de San Pawlu shagun dat ai laika hta na rai nga ai.

Tsawra ai hpu nau ni e, Hkristu Yesu a ali ama, Kasa aya hta dang da nna, kabu gara shiga hkaw tsun na matu, Karai Kasang e san da hkrum ai ngai Pawlu gaw, Karai Kasang a tsawra ai ni hte, chyoi pra ai masha tai wa mu ga shaga la hkrum ai ni, Roma mare na yawng hte hpe ga shana dat nngai.

Karai Kasang gaw dai kabu gara shiga hpe, moi moi shi a myihtoi ni a n-gup hte Chyum Laika hta ndat da nu ai. Dai shiga gaw, Karai Kasang a Kasha a lam tsun dan nga ai: Masha a hkum shan hku nna shi gaw Dawi a aru arat rai nga ai; shi hta rawng ai san pra htum ai wenyi a lam hku nna rai jang, si mat ai ni kaw nna bai hkrung rawt wa ai majaw, mahkra dang chye ai, Karai Kasang a Kasha rai nga ai hpe shi madun dan ya ai. Dai wa gaw, anhte a Madu Yesu Hkristu nan rai nga ai.

Shi a mying ningsang hpe shagrau sha-a na matu, masha amyu baw shagu dai kam sham ai lam hpe madat mara mu ga, shi a marang e, shi a chyeju hte, Kasa aya anhte hkam la saga ai. Nanhte mung, Yesu Hkristu e shaga la ai ni rai nga myit dai majaw, dai amyu masha ni hte rau, Hkristu hte seng ai ni tai wa marit dai.

Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw nanhte hta e a nga nga malit ga law.

Ya hti ai gaw Karai Kasang a mungga rai nga ai.

KABU GARA SHIGA

Mahte  1: 18-24.

Ya hti na gaw Mahte a laika hta na Kabu Gara Shiga rai nga ai.

Ya, Yesu Hkristu shangai wa ai lam ning rai nga ai: Shi a Kanu Maria gaw, Yosep e mahtan da sai rai nna, shan shada da garai n kanawn yang, shi gaw Chyoi Pra ai Wenyi a majaw na-um nasin rai wa sai. Shi a madu wa Yosep chyawm gaw ding man nga ai rai nna, shi a lam n shabrawng mayu ai majaw, lagyim dat kau na maw nga ai. Ndai lam ni hpe myit aru yu nga yang, Madu a Lamu Kasa langai mi yup mang hta shi kaw dan pru nna, Dawi a kasha Yosep e, na a madu jan Maria hpe la na hkum myit ru et; shi a na-um nasin gaw Chyoi Pra ai Wenyi kaw na rai nga ai; shi gaw shadang sha shangai na ra ai rai nna, nang shi a mying hpe Yesu ngu nna, shamying lu na rai nga ai. Kaning rai nme law, shi a amyu hpe tinang a shut hpyit mara kaw na hkye hkrang la ai wa shi rai nga ai, ngu wu ai. De a lam yawng hte gaw, Madu shi a myihtoi a n-gup hte tsun ai ga dik wa u ga matu byin wa sai. Dai myihtoi wa gaw, yu u, shayi hkawnsek na-um nasin rai wa na rai nna, shadang sha shangai na ra ai. Shi a amying, Emanuela shamying ya na mara ai: de a ga lachyum, Karai Kasang anhte hte rau nga nga ai, ngu ai rai. Yosep yup pyaw kaw na rawt wa nhtawm, Madu a Lamu Kasa shi hpe hkang da ai hte maren galaw wu ai rai nna, Maria hpe shi a madu jan hku nna shi a nta de woi la nu ai.

Ya hti ai gaw Madu a Kabu Gara shiga rai nga ai. 

DU SA LADAW HTA LABAN (3) NA MUNGGA

Dai ni na laban nhtoi gaw Madu Yesu bai du sa na aten hta jin jin rai nga na amtu hkyen lajang ai du sa ladaw a shawng nnan daw hte lai wa sai hkying lahkawng ning hta shangai wa ai Madu Yesu hpe kalang mi bai hkap tau la na matu hkyen lajang ai du sa ladaw a hpang na daw hpe matut mahkai ya ai aten rai nga ai. Dai re ai majaw nawku daw jau ai hta lang ai, grau nna Misa hkungga nawng ai shaloi Jau ni hpun ai palawng ni gaw “violet” nsam a lawu grit re ai “rose color” lang ai hpe mu mai nga ai.

Dai rai yang December (17) ya shani kaw nna Hkristmat poi a matu hkyen lajang ai hpe madung galaw sa ai re. Jau ni nlaw ai ginra ni hta Hkristmas poi hpe tau nau nna galaw hpang ai aten rai nga ai.

Akyu  hpyi shakut ai hte  tinang a hkum hpe ndang nyet kau let  Karai Kasang a myit ra ai hpe hkan nna manang wa hpe daw jau let tinang a myit masin hpe jasan jaseng lu u ga. Dai rai yang  san seng san pra dik htum ai Karai a Kasha Madu Yesu hpe anhte a myit masin hta hkap tau la lu nna Hkrismat a shaman chyeju hpe hkam la lu u ga.

MADU YESU HPE KASI LA AI

Dai ni na kabu gara shiga hta Yawhan gaw htawng hta e rawng nga ai ten, Madu Yesu e galaw dat ai amu bungli a lam na la ai, ngu ai hpe anhte hti lu ga ai. Dai majaw shi a sape ni hpe shangun dat nna, "nang gaw dai du sa na ra ai wa rai nga nni? Shing nrai, kaga hpe anhte naw myit mada lu na rai nga a ni?" ngu nna san shangun nu ai. Dai aten hta, Madu Yesu hpe Yawhan kaning rai myit da ai kun, mau hpa rai nga ai. 

Shawng nnan, Yawhan, htawng de rai n du shi yang, Madu Yesu hpe Yawdan hka hta kashin kamun hkam ya ai hpe anhte bai dum lu na re. Madu Yesu kashin kamun hkam la ai shaloi, Chyoipra ai Wenyi gaw, Uhkrudu zawn Madu a ntsa de yu hkrat wa ai hpe anhte myit dum na nhten. Dai aten hta sha; "ndai wa gaw, ngai sharawng awng ai, ngai tsawra ai kasha rai nga ai", ngu ai nsen na la sa ga ai. Dai re ai majaw, ndai lam ni yawng hpe Yawhan shi mu ai a marang e, Madu Yesu gaw, Hkyela Madu ajet rai ai hpe, shi chye na sai. 

Ahkyak ai kaga langai mi mung naw nga ai. Yawhan gaw kashin kamun jaw nga yang, "Shi (Hkyela Madu) a lata hta dai hkuwawn shi lang nga ai rai nna, shi a mam chyarang hpe shi yit jasan nhtawm, shi a mam hpe gaw dum hta shing gyin bang da nna, mam nsam hpe gaw, n sat lu ai wan hta nat kau na ru ai' (3:12)" ngu ai ga shawa masha hpe tsun lai wa sai. Yawhan, myit n galu ai hpe anhte chye lu na sai. Shinggyim masha ni galaw chye ai mara ni hpe dum hprang ai majaw, Hkyela Madu Yesu hpe, dai mara galaw ai ni hpe alawan sha shamyit kau nna, Karai a mungdan hpe lawan ai hte gaw gap na matu shi ra sharawng nga ai. Ya chyawm, shi gaw htawng hta rawng taw nga sai. Herod wa shi hpe nau  n na ai ten hta sat kau na hpe Yawhan tau chye da sai kun? Dai re ai majaw, lam shagu hta lawan ra sai ngu shi mu mada ai hte, Madu Yesu hpang de shi a sape ni hpe dat dat nu ai. Hkyela Madu re ai hpe shi myit sawn lu ai rai tim, hpa majaw lanyan taw ai hpe shi mau nga ai. 

Dai hpang daw na kabu gara shiga hta, Madu Yesu gaw shi galaw ai lamik kumla lam ni hpe tsun dan let, shi gaw, teng wa Hkyela Madu rai ai hpe Yawhan a sape ni hpe tsun shateng ya sai. Tim, Madu gaw, hpyen jaubu ni zawn, n kaja ai ni hpe lawan ladan sat shamyit kau na wa n rai. Dai hta n-ga, Karai Kasang a mungdan nnan hpe aten ahkying la let, si mani ai  hte, mai kaja ai masha ni a magam bungli rau jawm galaw ai hta gaw gap la na rai nga ai. Machyi ai ni hpe shamai shatsai ya nna kabu gara shiga hpe masha yawng kaw du hkra hkaw tsun na ra ai. Shi Madu de tawn da ai Nawku Hpung mung, hpun zawn kachyi sha re ai kaw nna grai kaba wa na rai nna, shi a lakung lakying ni hta pyi mungkan jut shara shagu na masha ni sa du shingbyi n-gun atsam la lu na rai nga ai. 

Shinggyyim uhpung uhpawng hta mayak manghkang ni law law nga nga ai. Shara law law hta hpyen majan byin ai, kun dinghku kata na anhte manu shadan ai lam ni gaw hkrat sum, hten run wa masai. Dai zawn re ai aten hta, Yawhan zawn, anhte mung, Karai Kasang hpe mau ai hte lama ma hpe lawan wan galaw ai, mu mayu na re. Raitimung, dai gaw Karai Kasang galaw ai bungli masa lam n rai nga ai. Teng sha wa, Karai Kasang gaw, yawng mayawng hpe up hkang nga ai rai tim, shi a aten, ladaw hta, shinggyim masha ni a mai kaja lam a matu shi amu galaw na re. Tsun ga nga yang, Karai Kasang gaw kaja dik ai ngu shi mu mada ai lam yan hta Shi a mungdan hpe mungkan ntsa hta gaw gap da na re. Buga shara n kau mi hta Nawku Hpung gaw lawan ai hte galu kaba ai rai tim, buga shara n kau mi hta gaw aten la ra na re. 

Raitim, Nawku Hpung gaw, Madu Yesu a mying hpe masha shagu na la ai ten du hkra galu kaba wa nna Shi Madu hta kam sham lu na ahkaw ahkang maren mara lu la na re.

DU SA AI LADAW LABAN (3) NA CHYUM LAIKA

DU  SA  AI  LADAW  HTA LABAN  3

11th December 2016

CHYUM MUNGGA DAW 1

Esaia  35: 1-6. 10.

Ya hti na gaw myihtoi Esaia a laika hta na rai nga ai.

Nam mali hte hkraw hkun ai shara gaw kabu gara na ra ai; Zaibru jang mung awng sharawng nna, mari pan zawn pu na ra ai; dai gaw grai wa pu an nna, sharawng let, kabu gara ai hte mahkawn mangwi na ra ai. Lebanon a arawng sadang, Hkamela hte Sharon a hpung shingkang, shanhte hpe jaw na ra ai; shanhte gaw Madu a arawng sadang, anhte a Karai Kasang a hpung shingkang hpe mu lu  na ra ai. N-gun kya ai lata hpe n-gun shaja mu; gari ai lahput ni hpe shangang mu; da ting mu; hkum hkrit myit, nga nna myit kaji ai ni hpe tsun mu. Yu mu, nanhte a Karai Kasang gaw matai htang na matu du na ra ai; nanhte hpe hkye hkrang la na matu, shi nan shabrai kumhpa lang let du sa na ra ai.

Dai shani e, myi hten ai ni myi mu lu nna, na n na ai ni na lu na mara ai. Lagaw hten ai wa gaw shan nga zawn gumtawng lu nna, ma-a ai wa a shinglet mahkawn mangwi na ra ai; kaning rai nme law, hkraw hkun ai shara e hka hpawk hpaw nna, zaibru jang e lwi na ra ai. Madu a majaw hkye hkrang la hkrum ai ni gaw nhtang wa nna, mahkawn mangoi let Ziun bum de du na mara ai; shanhte a myiman htani htana kabu gara ai dan hkung na ra ai. Shanhte gaw awng sharawng let kabu gara nga nna, yawn hkyen ai hte madai ai gaw sim mat na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW  2

Yaku  5:7-10.

Hpu nau ni e, Madu bai du sa ai nhtoi du hkra shakut sharang nga mu law. Yu mu, sun galaw ai wa gaw, ga a asau asi hpe ala nga ai rai nna, marang nhpaw hte hpang shaloi na marang dai ga hta e, htu shaya ai du hkra, myit galu ai hte shakut sharang nga ai. Nanhte mung shakut nga mu; Madu bai du sa na gaw ni magang ra ai majaw, myit hkum kaji nga mu.

Hpu nau ni e, nanhte daw dan ai n hkrum myit ga, shada da hkum aput angun nga mu; yu mu, tara agyi wa gaw chyinghka makau e tsap nga ai.

Hpu nau ni e, ruyak kyindut hkrum ai shaloi, nanhte gara hku shakut sharang ra ai hpe sharin la na matu, Madu a amying ningsang hta hkaw dan ai myihtoi ni gaw, nanhte a kasi ningli tai wa malit ga.

Ya hti ai gaw Karai Kasang a mungga rai nga ai.

KABU GARA SHIGA

Mahte  11: 2-11.

Ya hti na gaw Mahte a laika hta na Kabu Gara Shiga rai nga ai.

Hkristu e galaw da ai magam amu ni a lam hpe Yawhan gaw htawng hta e na la jang, shi a sape nkau mi hpe shangun dat nna, Nang gaw, “ DAI DU SA NA RA AI WA” , rai nga nni? Shing nrai, kaga hpe anhte naw ala ra a ni? nga nna Yesu hpe san dat mu ai. Yesu htan let shanhte hpe tsun mu ai gaw, Nanhte na la ai hte mu la ai lam mahkra, Yawhan hpe wa tsun dan mu; myi kyaw ai ni myi mu lu ma ai; lagaw hten ai ni hkawm sa lu ai; mang gang kap ai ni san pra lu ma ai; na lahpang ai ni, na lu ma ai; si mat ai ni bai hkrung rawt ma ai hte, matsan mayan ni hpe kabu gara shiga hkaw dan nga ai; ngai a majaw myit n kataw ai wa gaw a lu nga ai, ngu nna htan ya wu ai.

Ya, dai dat kasa ni wa mat nga ai shaloi, Yesu gaw Yawhan a lam hpe la kap nna, shawa masha ni hpe tsun shadum ai gaw: Nanhte hpa hpe yu na matu nam mali de pru sa wa myit ta? Nbung e kanga ai mai-aw hpa rai ni? Dai nrai yang, hpa hpe yu na sa myit ta? Kya mani ai lai sumpan bu hpun ai wa rai ni? N rai law. Reng htum ai bu hpun palawng bu hpun ai ni hkawhkam ni a htingnu hta tam ra myit dai. Dai nrai yang, hpa majaw sa pru myit ta? Myihtoi langai ngai  hpe sa yu na rai myit ni? Kaja wa, dai a majaw rai sai; nanhte hpe ngai tsun made ga: myihtoi hta grau kaba ai wa mung rai nga ai. Kaning rai nme law, na a man e, na a lam lajang magang na matu, nye a Kasa hpe na a shawng de ngai shangun dat na we ai, nga nna Chyum Laika hta ka da ai gaw, Yawhan hpe nan sha-ang ka da nga ai. Nanhte hpe ngai teng teng tsun made ga: Numsha kaw na shangai ai ni yawng hta na, kashin kamun jaw ai Yawhan hta grau kaba ai marai langai mi pyi n paw pru ai: rai timung, sumsing lamu mungdan hta kaji htum ai wa gaw Yawhan hta grau kaba nga ai.

Ya hti ai gaw Madu a Kabu Gara shiga rai nga ai.

DU SA LADAW HTA LABAN (2) NA MUNGGA

Madu Yesu gaw lai wa sai shaning hkying lahkawng ning hta shinggyim hkum hkrang hpe grai n-dagraw la shi yang shi du sa na hpe hkyen lajang na matu Myi Htoi ni law law du sa sai re. Dai myit htoi ni hta na hpang jahtum hte reng dik htum ai wa gaw dai ni anhte Kabu Gara Shiga hta na la lu ai Yahan Baptister rai nga ai.

“Myit malai lu mu, Karai Kasang a mungdan gaw du magang ra ai,” ngu nna hkaw tsun ai sha n-ga, shi hkum nan mung kaja wa sha tinang a hkum hpe ndang nyet kau nna tara shadik lai wa sai re. Madu Yesu du sa na hpe hkyen lajang ai shaloi myit malai lu nna kaja ai apu asi ni pru wa na matu laika ka ai sara ni hte Hparishe ni hpe shadum jahprang lai wa sai re.

Hkristmat a matu hkyen lajang ai ndai du sa ladaw hta tinang a hkum hpe ndang nyet kau ai magam lam ni hpe galaw sa let grau nna tinang a nhkru nkaja ai akyang lai len ni hpe myit yawn myit malai let kau da lu nna kaja ai amu bungli ni hpe galaw shakut let Madu Yesu hpe gingdan ai hte hkap tau la lu u ga.

PRAT HPE GALAI SHAI LET MADU HPANG SIT SHANG GA

"Nanhte a prat hpe galai shai wu"

"Society of Divine Word" S.V.D ngu ai  Sasana hpung hpe woi hpang ai "Arnold Janssen" gaw gumrawng ai wa re. Raitim, shi hpe maram yu yang, shagrit shanem ai wa mung rai nga ai. Shi a lam loi mi naw tsun dan mayu ai. 

Wajau Arnold Janssen, shi sasana hpung nnan woi de na ngu tsun ai shaloi, masha law law wa shi hpe atsam n rawng ai ngu tsun ma ai. Asak mung naw kaji ai, mahkrum madup mung n law shi ai hta n-ga, shi hta laklai ai atsam mung n nga ai hte ga tsun kaja ai wa mung n rai nga ai. Dai hta grau sawng ai gaw, dai zawn re ai atsam marai dat mayu ai ni hpe adawt ai ahkying aten re ngu tsun lu ai. Germany mungdan a tara agyi daju ‘Bismark’ gaw Kahtawlik Nawku hpung hpe zingri hpang wa ai hte Jau ni law law hpe mungdan kaw nna gawt shapraw kau ai ten rai nga ai. Raitim, Jau Janssen hpe n shingdang da lu ai. Shi hpe sasana uhpung ningnan woi de na matu Karai Kasang shaga la ai ngu hkam sha let, shakut sai. 

Bismark Nawku hpung hpe adawt ai lam gaw, ahkaw ahkang rai nga sai ngu mu mada ai. Yawng a shawng, mungdan kaw nna gawt kau hkrum ai Jau ni hpe saw shaga sai. Germany mung hta ginjaw shatai na n mai byin ai re majaw, Holland de shawng htawt sit sa sai. Dai kaw na, Style ngu ai shara hta 1875 ning e, Sasana uhpung ningnan hpe hpaw hpang dat nu ai. Dai aten kaw na mabyin ni gaw grai lawan rawt jat wa sai. 

Mali ning na ai hpang, 1879 hta, shawng ningnan na sasana magam gun Jau marai lahkawng hpe Miwa mung de sa dat lu sai. Dai hpang, Argentina de, Tongo de, rai nna sa dat lu ai gaw, German myu sha ni a garum shingtau ai lam law law lu la ai majaw re. Hpang e, 1889 ning hta, Mama uhpung hpe mung bai hpaw hpang dat lu sai. 1896 ning hta chyawm, Mama jawng kata hta e sha nga let, akyu hpyi ai, shinggan de n pru ai, Mama uhpung hpe mung hpaw ninghtan da lu sai. 

Arnold Janssen gaw shakut shaja ai wa rai nna, myit da ting let ja ja tawt lai wa sai. Shi sharawng awng ai lam gaw "Karai Kasang tsawra ai’ ngu ai hpe masha shagu na la lu na matu re. Shi mung dai kaja ai hkring htawng hta galu kaba ra wa ai hpe dum chye lu ai. Dai hpe shi kaning rai galaw ai rai? 

Yawng a shawng na lahkam hta, grau nna sadi sahka na lam re. Dai majaw, hkying ten shagu hta, rau hpawng de nga ai Jau manang ni hpe, shi a mara madi madun ya na hpyi shawn nu ai. Shanhte tsun ai hpe atsawm sha madat la nna, shagrit shanem ai hte mai kaja ai de yet yet galai shai wa sai. Teng sha wa, 2003 ning hta Nawku Hpung kaw nna "San Pra ai masha" dang da ai hkrum sai. 

Dai ni na kabu gara shiga hta mung, "myit malai lu mu"nga nna Yawhan Baptista jahtau ai hpe na lu sai. Bai nna, "Yawhan chyawm gaw, gawla-u mun hte da ai nba bu hpun nna, shi nshang e shanhpyi shingkyit kyit da ai: shi a sha hpa mung, dinggam yaw hte nam na lagat ntsin rai nga lu ai", nga anhte hti lu ga ai. Lak lai shai ai lam gaw, Yawhan, shi masha ni hpe galai shai na matu sha tsun ai n rai, shi hkum nan mung galai shai let, kasi kaja tai let shakut ai marang e, Karai Kasang hpang de masha ni hpe woi sa lu na rai nga ai. 

"Myit malai lu nna galai shai wa na lam", gaw shani shagu na sak hkrung nga pra ai hta anhte galaw shakut ra ai mahkyen nan rai sai hte grau kaja ai shinggyim masha tai wa na hte san pra ai masha tai wa na lam mung rai nga ai. Ndai lam gaw anhte a prat a matu langai sha re ai yaw shada lam mung rai ra na re. Dai gaw, mahsa ni hpe Karai Kasang hpang de woi sa ai lam mung rai nga ai. Dai gaw, Karai Kasang hte sung dik ai mahku mara galaw lu na lam mung rai nga ai.

DU SA AI LADAW LABAN (2) NA CHYUM LAIKA

4th December 2016

CHYUM MUNGGA DAW  1

Esaia  11: 1-10.

Ya hti na gaw myihtoi Esaia laika hta na rai nga ai.

Yese amyu a ndu hta nnaw rawt nna, shi a aru ni hta na makrung gaw asi si na ra ai. Madu a wenyi shi kaw sa nga nga na ra ai: hpaji byeng-ya hte shaleng ya ai, myit jaw ai wenyi, myitsu ai hte nden ja ai myit jaw ai wenyi chye chyang ai hte Madu hpe hkrit hkungga ai myit jaw ai wenyi shi hta e rawng nga na ra ai rai nna, shi gaw Madu hpe hkrit hkungga ai hta awng sharawng nga na ra ai.

Shi mu hkrup ai hte maren, n daw dan ai hte, na hkrup ai hte maren n jeyang na ra ai: ding man ai hku hkan let shi matsan mayan ni hpe tara dara nna, myit malang ai hku hkan let, ahkaw ahkang n lu ai ni a hpang maga de daw dan na ra ai. Shi a n-gup ga ngu ai shingna hte, tinang ra ai hku shabyin na matu, nhtum nni di kau ai ni hpe kayat sharin ya nna, shi nten na pru ai nsoi nsa hte tara nlang ai ni hpe sat kau na ra ai. Ding hpring ai gaw shi nshang a shingkyit, kangka re ai gaw shi hkum hkrang a shingkyit rai nga ai.

Shing rai, chyahkyawn gaw sagu kasha a manang tai nga nna, rawng gawk gaw bainam kasha hte rau hpum nga na ra ai; dumsu kasha hte hkanghkyi hkalung rau hkawm sa nna, ma kaji shan hpe dun woi na ra ai. Dumsu hte tsap rau ushat sha nna, de a hkalung ni rau hpum nga na mara ai; hkanghkyi gaw dumsu zawn yi hku sha na ra ai. Chyu chyu ai ma gaw pu htum a tsip ntsa e ginsup lu nna, chyu hka ai ma gaw pu-hkram hku hta shi a lata manaw bang lu na ra ai.

Nye a chyoi pra ai bum ting hta, shada da zingri ai hte, jahten shaza hkat na n rai, hpa majaw nga yang, nammukdara hka gaw shi a shara hpe lim kau ai zawn, Madu hpe chye chyang ai lam mungkan ting pri rai na ra ai.

Dai aten e, Yese a aru gaw, masha amyu baw ni a matu dan hkung ai kumla tai na ra ai; shi shanu nga ai shara gaw, hpung shingkang rawng na ra ai majaw, maigan amyu ni shi hpe hkan tam na mara ai.

Ya hti ai gaw Karai Kasang a mungga rai nga ai.

CHYUM MUNGGA DAW  2

Roma  15: 4-9.

Ya hti na gaw Roma masha ni hpang de Kasa Pawlu shagun dat ai laika hta na rai nga ai.

Hpu nau ni e, myit n htum ai sha, shakut sharang ai ni hpe, Karai Kasang shalan shabran garum ya ai lam, Chyum laika hta hti lu ai majaw, anhte myit mada shara nga lu u ga, shawng e ka da ai lam shagu gaw, anhte hpe sharin achyin ya na matu ka da nga sai.

 Ya anhte a Madu Yesu Hkristu a Kawa rai nga ai Karai Kasang hpe, nanhte myit mang langai sha hte, n-gup ga langai sha hte shakawn kungdawn nga lu myit ga,  Hkristu Yesu a kasi ningli hpe hkan nna, nanhte shada da myit mang ara sha rai nga lu na matu, shakut sharang ai hte, shalan shabran ai lam mahkra a npawt daju Karai Kasang gaw, nanhte yawng hpe awng nga u ga law.

Dai rai nna, Karai Kasang a hpung shingkang a matu mara, Hkristu gaw nanhte hpe hkap hkalum la sai hte maren, nanhte shada da hkap hkalum la mu. Ngai tsun nngai gaw: Ji wa ni kaw jaw da ai ga ndat hpe kangka ai hte shadik na matu chyu sha nrai, maigan amyu ni mung Karai Kasang a matsan dum ai chyeju a majaw, shi hpe shagrau sha-a lu mu ga, Hkristu gaw Yuda masha ni a ali ama tai wa sai. Shing rai, “ Maigan amyu ni a ka-ang e, ngai nang hpe shakawn na nngai; Na a mying ningsang hpe mahkawn mangwi na nngai,” nga nna Chyum Laika hta ka da nga ai.

Ya hti ai gaw Karai Kasang a mungga rai nga ai.

KABU GARA SHIGA

Mahte  3: 1-12.

Ya hti na gaw Mahte a laika hta na Kabu Gara Shiga rai nga ai.

Kashin Kamun jaw ai Yawhan paw pru ai shaloi, shi Yuda nam mali hkan e tara hkaw nna, 2 Sumsing lamu a mungdan du magang ra ai majaw, myit malai lu mu, nga nna tsun shana wu ai. Shing rai, myihtoi Esaia gaw, Nam mali kata e nsen jahtau tsun nga ai: Madu a lam lajang da mu, shi a lam masun ni hpe shading mu, nga nna Yawhan hpe sha-ang let tsun wu ai. Yawhan gaw gawla-u mun hte da ai nba bu hpun nna, shi a nshang e shan hpyi shingkyit kyit nga ai. Shi a shahpa mung, dinggam-yaw hte nam na lagat jahku rai nga lu ai. Dai shaloi e, Yerusalem na ni, Yuda mung ting na ni hte, Yawdan hka ginwang shara magup hkan na ni, Yawhan hpang de pru sa wa ma ai rai nna, tinang a shut hpyit mara hpe shapraw dan let, shi a lata hte Yawdan hka hta e Kashin Kamun hkam la ma ai. Ya, Hparishe hte Saduke masha ni law law wa Kashin Kamun hkam la na nga, sa ma ai hpe Yawhan mu jang, shanhte hpe shi tsun mu ai gaw: Pu htum amyu ni e, du magang ra ai ari dan hta na hprawng wa lu myit ga, nanhte hpe kadai shadum myit ta? Dai majaw, nanhte teng teng myit malai lu da ai rai yang gaw, htap htuk ai asi si mu.  Abraham gaw anhte a Wa rai nga mali ai, nga nna gumrawng ai hte nanhte a kraw e hkum tsun mu. Nanhte hpe ngai tsun made ga: Karai Kasang gaw ndai nlung ni hta na, Abraham a matu kasha ni hpe hpan shapraw da lu ai. Ya e pyi, dai dingwa gaw hpun npawt nhpang hkan e tawn da nga ai. Dai rai nna, asi kaja n si ai hpun mahkra hpe kran daw kau nna, wan hta kabai bang kau nga ai.

Ngai gaw, myit malai lu myit ga, hka hta nanhte hpe kashin kamun jaw made ai, rai timung, nye a hpang e du sa ai wa mahtang gaw, ngai hta n-gun grau ja ai wa rai nga nna, shi a hkyepdin gun na pyi ngai n ging n dan nngai. Dai wa gaw, Chyoi Pra ai Wenyi hte mung, wan hte mung, nanhte hpe kashin kamun jaw ya na ra ai. Shi a lata hta hkuwawn lang nga nna, shi a mam chyarang hpe shi yit jasan nhtawm, shi a mam hpe dum hta shinggyin bang da nna, mam nsan hpe  chyawm gaw n sat lu ai wan hta nat kau na ra ai.

Ya hti ai gaw Madu a Kabu Gara shiga rai nga ai.

DU SA LADAW HTA LABAN (1) NA MUNGGA

Nawku hpung a nawku daw jau ai shata hti laika hta dai ni na nhtoi gaw shawng nnan na nhtoi rai ai hta n-ga shaning (c) htum nna shaning (a) de su shang ai nhtoi rai nga ai. Ndai nhtoi gaw du sa ai ladaw a shawng nnan na nhtoi mung rai nga ai.

Madu Yesu Hkristu shangai wa na Hkrismat poi hpe hkap tau la na matu hkyen lajang ai ndai du sa ladaw hta tinang a myit masin wengyi ni hpe jasan jaseng let wengyi n-gun la ra na matu tawn da ya ai aten ladaw re.

Immanuel ngu ai mying lachyum, Karai Kasang anhte hte rau nga ai, hte maren shangai wa ai Madu Yesu hpe anhte a myit masin salum hta hkap tau la lu na matu shakut shaja ai aten rai nga ai. Karai Kasang gaw mai kaja ai hte san seng san pra ai wa re ai majaw mara law law galaw ai, nkaja ai myit masin ni hta ndu shang lu nga ai.

Dai rai yang tinang a mara ni hpe myit yawn myit malai ai hte Karai Kasang hpang de bai nhtang wa nna myit masin ni hpe jasan jaseng let shangai wa na Madu Yesu hpe hkap tau la lu na matu ndai du sa ai ladaw hta shakut shaja sa wa ga.

MADU YESU HTE HKRUM AI TEN

Ngai, jau tai Dakkasu kaw naw nga ai ten hta kaja ai lakjat law law hpe sharin hkam la lu sai. Raiim, dai lakjat ni hta na kaja dik htum ai, ngai mung grai sharawng lai wa sai  langai mi gaw,  hpang jahtum na langai mi re. Dai hte seng nna loi mi tsun dan mayu ai. 

Anhte jawngma pang ni, 1968, January shata hta Jau aya hkam la ga ai. Jau tai Dakkasu jawng n ngut shi yang, wunkat langai mi naw lung la ra ai. Chicago muklum kaba a, dingdung maga na, Park Ridge Lutheran Tsirung kaba hta shata (5) tup, ana zingli hpan amyu myu hkrum sha ai ni hpe kaning rai yu lakawn na sharin hkaja la sa ga ai. 

Anhte a lithkam wa gaw Protestant sara marai mi rai nga ai. Marai (8) lawm ai anhte uhpung na marai shagu hpe tsirung a section ni de lit jaw dat sai. Tinang ang ai section kaw nna masha marai rai hpe, laban bat ting, shani shagu sa hkrum kawan yu ra ga ai. Si mat sai masha ni, ga lajang tsi tsi ai lam ni hpe yu maram ngut ai hpang, anhte yu kawan ai machyi masha ni hte hkrum jahta ngut ai hpang, hkrum sha, mu la lu ai hpe sumtang ka nna tang madun ra ga ai. Hpang na bat rai yang, anhte ni ka tawn da ai hpe, Protestant Sara, Jau ni hte rau, anhte ni dinglik yu ai lam bai galaw ga ai. 

Wunkat ngut wa ai lani mi na ten hta, Protestant Sara wa gaw, anhte marai hkum hpra hpe shi a rung gawk de langai hpang langai shaga la nna, hpang jahtum masam maram ai lam galaw ai. Ngai a shawng na Jau wa shang ai ten, chyinghka hpe atsawm sha shi n la hkrup ai. Dai re ai majaw, shan yan tsun shaga ai nkau mi hpe na kau ya ai. Sara wa gaw, Jau shi machyi masha ni hpe grai chye yu kawan ai majaw, shakawn shagrau ai, “lama na, ndai tsi rung kaw galaw ai zawn, masha kaga ni hpe mung matut nna ahkyak shatai tsang ya chye ai rai yang, nang gaw Sasana magam hta grai awngdang na re” nga ai.  Dai hte maren, dai Jau gaw htawm de, Amerika mungdan sinna hkran na SVD Jau hpung a lithkam tai wa ai. Shi gaw grai kaja ai lithkam rai nga ai hte lahkawng lang lata dang da ai hkrum sai. 

Dai ni na kabu gara shiga hta, nta madu wa zawn galoi mung, jin jin rai nga ra ai lam, Madu Yesu gaw sape ni hpe tsun shadum wu ai. “Raitimung, nta Madu gaw, lagut sa na ahkying ladaw hpe chye lu taw gaw, shi a nta hpe n tawk waw u ga, shi amaja nga na ra ai nanhte dum mu. Dai rai nna nanhte mung chyip chyip rai nga mu; kaning rai n me law, nanhte n dum n mi re ai ahkying hta e, dai masha kasha du wa na ra ai”. 

Madu Yesu hte myiman hkrum rai mu lu na aten a matu anhte hkum anhte kaning rai shajin da ra na a ta? Teng sha wa, anhte a akyu hpyi nsen a majaw prat hta apyaw angawn sha rai nga lu na re. Dai hta grau nna, masha kaga ni hpe laklai ai hte chye na, tsang ya ra na nhten. Kaja wa nga yang, ndai lam ni yawng gaw, htani htana nta rai ai, Sumsing lamu de du shang wa ai shaloi Madu Yesu hte hkrum ai ten a matu, hkyen lajang ai lam yan ni rai na sai. 

DU SA AI LADAW LABAN (1) NA CHYUM LAIKA

DU SA AI LADAW HTA LABAN  1

27th November 2016

CHYUM MUNGGA DAW 1                                   

Esaia  2:1-5.

Ya hti na gaw myihtoi Esaia laika hta na rai nga ai.

Ndai gaw, Yuda mung hte Yerusalem mare a lam hte seng nna, Amot a kasha Esaia mu ai shingran rai nga ai. Du na ra ai prat hta e, Madu a nawku htingnu nga ai bum gaw, bum kaga ni a baw tai wa nna, kawng ni hta grau tsaw wa na ra ai; amyu baw mahkra dai de yan bang na mara ai; masha amyu law law wa sa du nna, sa marit, Karai Kasang gaw shi a lam anhte hpe sharin ya nna, shi a lam hku anhte hkan sa lu na matu, Madu a bum, Yaku a Karai Kasang a nawku htingnu de lung wa sa ga; kaning rai nme law, Ziun bum de na tara lam ni, Yerusalem mare na Madu a mungga pru na ra ai, nga nna tsun gara na ma ai.

Madu gaw amyu ni a lam e tara dara nna, masha amyu law law hpe jeyang na ra ai; shanhte gaw tinang a nhtu hpe najawn, tinang a ri ni hpe nhkyau dup kau na mara ai; amyu mi gaw amyu mi hpe nhtu n shaw na hte, htawm hpang de hpyen majan sharin sa na n rai. Yaku a dap ni e, sa marit; Madu a nhtoi hta anhte hkan hkawm sa ga.

Ya hti ai gaw, Karai Kasang a mungga rai nga ai.

CHYUM MUNGGA DAW  2

Roma  13: 11-14.

Ya hti na gaw Roma masha ni hpang de Kasa Pawlu shagun dat ai laika hta na rai nga ai.

Hpu nau ni e, Ndai aten gaw Karai Kasang lajang da ai chyeju prat re hpe nanhte chye nga myit dai majaw, nanhte ya e yup hprang wa na ra ai; kaning rai nme law, anhte shawng nnan kam sham sa ga ai hta, dai hkye hkrang la ai gaw anhte hta grau nna ni wa sai. Shana ahkying lai magang wa nna, shani nhtoi du magang ra ai. Dai re  ai majaw, nsin hte seng ai amu mahkra hpe kau da nna, nhtoi a hpyen hkying hpe dagraw nga ga. Tang pyaw shalat ai hte chyaru nang ai, hkum shan kayut ai hte nse nsa galaw ai, ga li ga law ai hte manawn masham ai hpe, n hkan tam ai sha, shani chyingtung e masha ni sadi sahka ai hte hkawm nga ai zawn, anhte mung htap htuk ai hte a hkawm sa wa ga. Dai hta  n-ga Madu Yesu Hkristu hpe bu hpun dagraw nga mu: hkum shan a marin marit ai hpe shadik na matu hkum maw hkum galaw myit.

Ya hti ai gaw Karai Kasang a mungga rai  nga ai.

KABU GARA SHIGA

Mahte  24: 37-44.

Ya hti na gaw Mahte a laika hta na Kabu Gara Shiga rai nga ai.

Yesu shi a Sape ni hpe tsun mu ai gaw: No-a a prat e byin ai hte maren, Masha kasha bai du sa ai shaloi e mung bai byin na ra ai. Kaning rai nme law, dai sha-u garai n ing yang na masha ni gaw, No-a sanghpawli kata de shang wa ai nhtoi du hkra, lu lu sha sha, num la num ya rai nga ma ai rai nna, dai sha-u ing wa ai hte, yawng hte hpe magawn mat wa ai du hkra, shanhte ndum shami rai nga ma ai. Masha Kasha bai du sa ai shaloi mung, dai hku byin wa na ra ai.

Dai shaloi e, marai lahkawng hkauna pa e rau nga ai rai nna, langai mi gaw woi la ai hkrum ai hte, langai mi hti nga mat lu na ra ai; numsha lahkawng htumrin hta rau rin nga ma ai rai nna, langai mi gaw woi la ai hkrum na ra ai, langai mi hti nga mat lu na ra ai. Dai rai nna, nanhte a Madu gara shani e du wa na hpe nanhte n chye myit dai majaw, a maja nga mu. Nta madu gaw, lagut sa na ahkying hpe chye lu yang, shi a nta hpe n tawk waw u ga, shi dai hpe sin nga na ra ai dum nga mu. Dai rai nna, nanhte mung jin jin  rai nga mu; kaning rai nme law, nanhte n dum shami re ai ahkying hta Masha Kasha du wa na ra ai.

Ya hti ai gaw Karai Kasang a mungga rai nga ai.

HKRISTU HKAWHKAM POI SHANI NA MUNGGA

Dai ni na laban nhtoi gaw pranwan ladaw a hpang jahtum na laban rai ai hta n-ga Hkristu Hkawhkam poi mung rai nga ai. Du sa ai ladaw hta hpang ai anhte a nawku daw jau ai lamang gaw ndai laban shani hta hpung dim dat nna du na ra ai laban gaw du sa ai ladaw a shawng na laban rai na re.

Hkristu Hkawhkam poi hta myit sumru n-gun la mai gaw Madu Yesu a hkaw hkam jan mau gaw manang wa hpe tinang a asak jaw let daw jau ai a majaw lu la ai hta n-ga, shi a hpang hkan nang ai ni mung lani hte lani grau grau nna law htam wa ai re. Kabu gara shiga hta tinang a mara hpe dum shai nna hkyem sa hpyi ai wa gaw Shi Madu a mungdan de du shang lu na re.

Shaning ladaw ting hta anhte galaw sa ai amu magam lam ni yawng gaw Madu Yesu hpe anhte a Hkawhkam re ngu ai hpe sakse hkam lu nna anhte a mara ni hpe dum shai let Hkristu Hkawhkam hpang de bai nhtang wa nna manang wa hpe daw jau let Shi Madu a mungdan gaw gap ai hta shang lawm lu ai ni rai wa u ga.

MADU YESU SHARIN YA AI TSAWRA MATSAN DUM AI LAM

‘Matsan dum lama ai lam hpe’ kabu gara shiga laika ka ai ni yawng hte ahkyak da htawng madun ma ai. Gashadawn, Kasa Mahte; kaw si hpang gara nga ai shawa masha hpe mu jang ‘nga’ hpe shalaw jahtam ya ai (14:13-21) nga nna ka da nga ai. Kasa Marku mung, machyi makaw hkrum ai ni a ntsa Madu Yesu matsan dum ai lam hpe matut manoi madi madun sai. Madu Yesu a Ninggawn tawa hte seng ai tsawra matsan dum myit hpe madi madun ai. Rai tim, Kasa Luka chyawm gaw, Madu Yesu a matsan dum lama ai lam a Sasana magam hpe grau nna mu shangun ai. Machyi makaw hkrum ai ni a ntsa Madu Yesu a matsan dum ai lam hpe madun ai hta n-ga, shi a kabu gara shiga laika hta ‘mat mat ai sagu kasha, mat mat ai dengga, kaja ai samari masha, dam mat ai kasha’, re ai gashadawn ni hpe ka madun da ai. Dai ni na kabu gara shiga hta chyawm, Madu Yesu a matsan dum tsawra ai lam hpe kaja ai lagut/damya marai mi a ntsa shi a mungga hte madun dan sai.

Hpa majaw salang wa dai Madu Yesu hpe magawp maga let tsun ai rai kun? anhte n chye lu ga ai. Shawng daw ten kaw nna Madu Yesu a lam hpe na yu sai wa rai kun? wudang ntsa hta Madu Yesu tsun ai, ‘Wa e, shanhte a mara hpe raw dat kau ya mu, shanhte hpa galaw ai hpe shanhte n chye nga myit dai’, ngu ai ga hpe na ai majaw mi rai kun? Madu Yesu, Shi a kanu hte Kasa Yawhan hpe tsun ai ga, “num sha e, ning sha hpe yu u, dai wa hpe mung, ning nu hpe yu u’, ngu ai ga ni na la ai majaw mung rai na nhten.

Teng sha wa Madu Yesu gaw nni nkri hkam sharang nga ai lam hpe yu yu nna myit yu kaba ai lam mung rai nga ai. Madu Yesu mung dai daram sung la ai ga hte shi hpe magawp magatsun shaga ai lagut/damya wa hpe bai nhtang tsun ai lam gaw; dai wa gaw tinang a mara hpe yin la let asawng asang nga ai manang damya wa hpe mung tsun shadum ai a majaw rai sai. Madu Yesu hpe mung, “Madu e, Nang na a mungdan hta du wa yang, ngai hpe myit dum la rit law,” nga nna hpyi wu ai. Teng sha wa ga ndai gaw Madu Yesu hpe mung myit shangwi ya lu ai rai nna, dai damya wa mung, ‘dai ni jang nang Ngai hte rau Hparadisu e nga na rin dai, ngu nna Sumsing kumhpa jaw ya hkrum sai.

Salang wa dai gaw grai laja lana re ai mazut ai amu hpe galaw shut ai majaw ya na zawn jen noi sat hkrum ai rai na sai. Tim, makam masham a grau dik ai amu hku nna, shi a mara hpe yin la ai hte Madu Yesu kaw hkyem sa hte chyeju hpyi nem sai. Dai hpe mu la ai marang e, Madu Yesu mung shi a mara hpe raw dat kau ya nna Hparadisu de rau shang wa na lam ga-sadi jaw sai.

Matsan dum ai, mara dat ya ai, tsawra ai, lakawn lanawn ya ai, nja n hpra re ai _ ndai lam ni yawng gaw, shani shagu na anhte a prat hta Karai Kasang jaw ya ai hpu reng dik ai chyeju kumhpa ni rai nga ai. Anhte a tsawra ai Kawa Karai Kasang, Chyoipra ai Wenyi Karai Kasang, hte Hkyela Madu Yesu Hkristu a mying ningsang htani htana shakawn kungdawn anga nga u ga law, Amen!!!

HKRISTU HKAWHKAM POI LABAN SHANI NA CHYUM LAIKA

HKRISTU HKAWHKAM WA A POI

20th November 2016

CHYUM MUNGGA DAW 1

2 SAMUELA 5: 1-3.

Ya hti na gaw, myihtoi Samuela a laika lahkawng hta na rai nga ai.

Israela amyu lakung ni yawng hte gaw, Hebron mare de Dawi kaw sa nna, Yu u, anhte gaw na a nrut nra, na a hkum shan rai nga ga ai. Moi shawng de anhte a ntsa e Sawlu gaw naw up nga yang, nang hkum nan Israela amyu hpe woi pru woi shang ai wa rai nga nit dai: Madu mung Nang gaw nye a amyu Israela hpe woi rem na wa hte, nye a amyu Israela a ntsa e Du Magam nang tai lu na ndai, nga nna Dawi hpe tsun ma ai.

Shing rai Israela agyi salang ni yawng, Hebron mare de hkawhkam wa kaw sa du ma ai; Dawi hkawhkam mung, dai Hebron mare hta Madu a man e shanhte hte ga shaka tawn da wu ai rai nna, shanhte mung Dawi hpe namman chya ya nna, Israela a hkawhkam shatai da mu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

KOLOSE 1: 12-20.

Ya hti na gaw, Kolose masha ni hpang de San Pawlu shagun dat ai laika hta na rai nga ai.

Nhtoi a mungdan hta e Chyoi Pra ai ni hte rau sali wunli hpe jawm hkam la lu hkra, Kawa Karai Kasang nanhte hpe shagging shadan ai majaw, anhte Shi hpe chyeju dum shakawn nga ga ai. Kawa gaw nsin a ahkang aya kaw na anhte hpe mawai la nna, Shi a tsaw ra ai Kasha a mungdan hta jashawn ya mi ai. Dai kasha hta e shalawt dat ya ai hkrum nna, mara raw dat ya na akyu hpe anhte lu la saga ai.

Kasha gaw myi e n mu lu ai Karai Kasang a hkrang sumla rai nga ai hte, hpan da ai baw yawng mayawng hta na alat ningshawng rai nga ai. Sumsing lamu hte ginding aga hta nga ai yawng mayawng hte gaw, Kasha hta e hpan tawn da nga sai: mu lu ai baw sha n-ga, anhte n mu lu ai, hkawhkam tingnyang hta dung ai ni, ahkaw ahkang lu ai ni, up hkang na ahkang aya lu ai ni hte, hpung dagu rawng ai ni nlang hte gaw, Kasha a marang e, Shi a matu mara, hpan tawn da nga sai; hpa mung garai n hpan da yang, Shi nga nga sai hte, yawng mayawng gaw Shi a majaw grin nga ai.

Nawku Hpung gaw Hkristu a hkum hkrang rai nga nna, Shi mahtang de a abaw rai nga ai. Shi gaw lam shagu hta kaba htum ai ningbaw ningla tai u ga, dai Hpung a npawt nhpang rai nga ai hte, si mat ai ni kaw na alat ningshawng wa rai nga ai.

Kaning rai nme law, Kawa myit ra ai majaw, Hkristu hta e Karai Kasang a atai hkum hkum tsup rawng nga sai. Yesu Hkristu udang hta si hkam nna htingrai htingrat ya ai shaloi, Karai Kasang gaw yawng mayawng hpe Shi hkum hte htinglu htinglai ya nga ai: rai sa, sumsing lamu e nga ai hte hpe rai ti mung, ginding aga e nga ai hte hpe rai ti mung, Hkristu a lata e htinglu htinglai ya nga ai hpe Karai Kasang lajang da wu ai.

Ya hti ai gaw Karai Kasang a mungga rai nga ai.

KABU GARA SHIGA 

LUKA 23: 35-43.

Ya hti na gaw, Luka a laika hta na Kabu Gara Shiga rai nga ai.

Mung masha ni gaw Yesu hpe mada yu let tsap nga ma ai. Du aya lu ai ni mung shi hpe asawng asang nga nna, Masha kaga hpe shi hkye la ai; ndai wa gaw Karai Kasang a Hkristu ngu ai, Karai Kasang lata ai wa rai yang gaw, shi hkum nan hpe shi hkye la u ga, nga ma ai.

Hpyen la ni mung sit sa nna hkri ai tsabyi chyaru ladawn jaw nhtawm, Nang Yuda ni a hkawhkam rai yang gaw, na hkum hpe nang nan hkye la u, nga nna shi hpe roi ma ai. Shi a ntsa e mung, Ndai wa gaw Yuda ni a hkawhkam rai nga ai, ngu ai laika shakap da nga ai.

Wudang hta noi nga ai damya langai mung, Nang gaw Hkristu n rai nni? Na a hkum hte an hpe mung hkye la mi, ngu nna shi hpe roi wu ai. Langai wa mi chyawm gaw, Karai Kasang hpe pyi n hkrit nni? An gaw an a mara majaw hkrum ging ai hte maren, daw dan ai hkrum saga ai: ndai wa chyawm gaw n hkru n kaja ai hpa mung galaw wu ai n rai, nga nna dai wa hpe daru let htan wu ai. Shing nga nhtawm dai damya gaw, Yesu e, Nang na a mungdan hta du wa yang, ngai hpe dum rit law, ngu nna hpyi wu ai. Shaloi Yesu gaw, Ngai nang hpe teng teng tsun de ga, Dai ni jang nang ngai hte Hparadisu e nga na rin dai, ngu nna shi hpe htan wu ai.

Ya hti ai gaw Madu a Kabu Gara Shiga rai nga ai.

PRANWAN LADAW (33) LABAN SHANI NA MUNGGA

Nawku hpung a nawku daw jau ai shata hti laika a hpang jahtum na daw de du wa sai rai yang anhte na la lu ai mungga ni mung hpang jahtum na ten ni hte seng ai hpe mu lu ga ai.

Jerusalem mare na nawku htingnu kaba gaw shaning law law aten ahkying la let tsawm htap ngang kang ai hku shachyaw da lu sai re. Ndai nawku htingnu gaw dai aten na masha ni a matu ahkyak ai shara langai rai nga ai. Raitim, Madu Yesu tsun ai hta e kade daram tsawm htap ngang kang tim lani mi na aten hta hten bya wa na re. Dai rai yang n-grin ai mungkan ga na arung arai ni hta myit njung ai sha Shi Madu matsun madun ai hte maren Karai Kasang hta maju jung na sak hkrung na matu shadum jahprang ya nga ai.

Htani htana grin ai Karai Kasang kaw maju jung let sak hkrung nga sa ai hte hpang jahtum na aten du ai aten hta nhkrit ntsang ra ai sha shajin shachyip da lu na matu myit dum shai let shakut shaja sa wa ga.

ANHTE A MYIT MADA SHARA GAW?

“Madu Yesu; hpang na prat de sa wa ai lam na anhte a myit mada shara”

Hpang na laban gaw Nawku hpung ladaw shaning a hpang jahtum na laban rai sai. Nawku hpung kaw nna Mungkan ting a Hkawhkam, Hkristu a poi ngu grai htap htuk hkra masat da ya sai. Dai poi n htoi a majaw kaja wa sha Hkristu gaw ‘Alpha’ n pawt hte ‘Omega’ N htum re ai lam bai shadum ya sai. Ndai mungkan ga n tsa hta anhte gaw aten ladaw ni (Moi, Ya, hpang na) hpe lai di hkawm sa ra nga ai. Kabu gara shiga hta, Yerusalem htingnu a mawn sumli da ai hpe mau nga ma ai Yuda ni hpe, “Ndai nanhte ni mu nga ma ai arai ni gaw, n run n hpya kau ai, n lung langai mi a ntsa e langai mi n mara nga lu na nhtoi du na ra ai nga nna Yesu tsun shadum sai. Mungkan ntsa na arung arai ni gaw dinggrin n nga lu ai rai tim du wa na ladaw de shamawt sa nga ai. Mungkan ga na lam gaw htum mat ai kaw du na re.

Madu Yesu a lam gaw, hpang na prat a lam chye mayu la ai anhte myit hpe shazim ya na matu n rai nga ai. Karai Kasang gaw yawng hpe up hkang nga ai chye shangun mayu ai rai nga ai. Anhte hta ahkyak ai gaw yawng mayawng hpe jaw ai myit masa hte hkap la hkrum sha na matu re. Mungkan htum wa na hte seng nna kaning re ai ningmu ni anhte hta nga ai raitim, madu Yesu gaw anhte hpe ga ngwi ga pyaw hte sharin shaga nga ai. Lam shagu gaw mau hpa, myit kap shara, tsawra matsan dum ai hte hpring nna anhte myit masin hta kap nga na re. N hka lu ai, tawn kau n lu ai, n kabai da lu ai, galoi mung rau nga mayu ai, n ja n hpra lam law law anhte hta nga nga ai. Yerusalem Nawku htingnu hpe yu mau let Karai Kasang hpe nawku daw jau na malap ai Yuda ni zawn mung rai nga ai. Arai yawng mayawng gaw lai htum mat na sha re. Karai Kasang chyu sha htani htana rai nga ai.

Anhte a makam masham hta sak hkrung hkawm sa ai akri namta gaw Karai Kasang hta aten shagu ap da let hkawm sa ai lam re. N gring nga lu ai prat, myit tsang hpa aten ladaw ni a majaw myihtoi masu ni, makam masham hpung nnan woi de ai ni, n jaw ai myit mada shara tsun kawam ai ni law law nga wa na re! Lamik kumla hte mau hpa amu law law galaw dan ai ni mung nga na re. Makam masham hta kam shut shangun na masha law law pru wa na re. Hkristan ni a matu gaw kade mung n hkrat sum hkra shakut na ra ai, kam sham sai ni rai nga ai hte maren, kam sham myit mada ai hte (Karai Kasang a ga sadi hta) akyu hpyi let nga nga ra ai.

Sawn sumru mai ai lam; Karai Kasang hta hpang nna shi hta e htum na prat ndai hta nang/ ngai hpa hpe myit ru yawn hkyen nga ai kun? Hpang na prat hpe myit tsang ai lam n nga, n dai prat hta tinang kam ai myit masa hte hkawm sa nga ai kun?

PRANWAN LADAW (33) LABAN SHANI NA CHYUM LAIKA

PRANWAN LADAW 33

13th November 2016

CHYUM MUNGGA DAW 1 

MALIHKI 4: 1-2.

Ya hti na gaw, myihtoi Malihki a laika hta na rai nga ai.

Dai Nhtoi du ra ai; dai gaw wan mang zawn grung kahtet nga ai: gumrawng gumtawng ai ni hte, tara n lang ai amu galaw ai ni yawng, yi hku ndu tai na mara ai. Du ra ai nhtoi gaw, npawt ndung n ngam hkra, shanhte hpe hkru kau na ra ai, nga nna Zaw nawng Zaw wa up ai Madu tsun ai. Nye a amying hpe hkrit hkungga ai ni a ntsa e chyawm gaw, ding hpring shangun ai ajan gaw, shamai shatsai ai atsam hte du pru na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

2 HTESALONI 3: 7-12.

Ya hti na gaw, Htesaloni masha ni hpang de San Pawlu shagun dat ai laika lahkawng hta na rai nga ai.

Anhte kasi ningli hte maren gara hku hkan sa galaw ra ai lam hpe nanhte nan chye nga ndai. Anhte gaw nanhte hte rau nga ai shaloi, lagawn lamawn rai nna kaman nga nga ai n rai; manu n ya ai sha, kadai wa a lusha hpe mung anhte n sha saga ai. Nanhte hta na langai a ntsa de lit li ai n shangun u ga, amu magam hte ru yak ai hta, anhte shani shana bungli galaw saga ai. Shing rai galaw ai gaw, nanhte anhte hpe n bau ra ai majaw n rai; anhte galaw ai hte maren, nanhte hkan galaw lu na matu, nanhte a matu kasi ningli tai saga ai.

Nanhte hte rau naw nga nga yang, Amu bungli n kam galaw ai wa gaw shat mung n sha u ga, ngu nna nanhte hpe htet da ga ai. Nanhte hta lawm nga ai ni nkau mi gaw lagawn lamawm rai nna, hpa amu bungli n galaw ai sha, tinang hte n seng ai hta hkan kajam nga ma ai hpe, anhte na la saga ai. Shing rai galaw nga ai ni gaw, ti nang a asak bau ya na matu, amu bungli hpe atsawm sha hkan galaw mu ga, ngu nna anhte hkang dat ai hte shadum jahprang ya nga ga ai.

Ya hti ai gaw Karai Kasang a mungga rai nga ai.

KABU GARA SHIGA 

LUKA 21: 5-19.

Ya hti na gaw, Luka a laika hta na Kabu Gara Shiga rai nga ai.

Dai nawku htingnu gaw reng hkik ai nlung hte mung, alu kumhpa ni hte mung, mawn sumli da ai rai nga ai, nga nna nkau mi tsun yang, Yesu gaw, Nanhte mu nga ai arai ni gaw, nlung langai mi a ntsa e langai mi n mara hkra, mahkra hten bya ai nhtoi du na ra ai, ngu mu ai.

Shing nga jang shanhte gaw, Sara e, dai zawn galoi byin wa na rai ta? Dai byin na ni wa magang jang, hpa kumla dan pru n ra ta? Dai byin na ni wa magang jang, hpa kumla dan pru na ra ta? ngu nna Yesu hpe san mu ai. Shaloi shi gaw, Nanhte hkalem kau ai n hkrum myit ga, sadi nga mu; kaning rai nme law, masha law law wa nye a amying hte paw pru nna, Ngai gaw dai wa rai nga nngai, ahkying mung du ra ai, nga nna tsun na mara ai: shanhte a hpang hkum hkan nang nga myit. Hpyen gasat ai hte gumlau rawt ai lam na yang, hkum hkrit myit: dai lam ni gaw shawng byin wa na ra ai: rai ti mung, jahtum ai gaw, dai shaloi jang, rai na n rai, ngu mu ai.

Bai Yesu gaw shanhte hpe tsun mu ai gaw: Amyu mi hte amyu mi, mung mi hte mung mi shada da gasat hkat na mara ai; nnang nawn kaba wa ai mung, shara kaga ga hta ana zinli hte hku hku ai byin wa na ra ai: sumsing lamu de na hkrit hpa hte lamik kumla kaba mung dan pru na ra ai. Rai ti mung, dai lam yawng garai n byin yang, masha ni gaw nanhte hpe rim la nna, zingri zingrat di nhtawm, tara jawng ni hte htawng ni hta ap kau na myit dai; nye a amying majaw hkawhkam ni hte du ni a man de nanhte hpe sa bang kau na mara ai. Dai shaloi e, nanhte nye a matu sakse hkam ya na aten rai nga ai. Dai re ai majaw, nanhte kaning ngu nna hkap tsun htan na, n tsang ra sai: kaning rai nme law, nanhte a hpyen ni nlang, n hkap htang lu hkra, ngai nanhte hpe n-gup ga hte hpaji jaw na made ai.

Nanhte gaw kanu kawa ni kahpu kanau ni, mayu dama ni hte jinghku jingyu ni e pyi, ap kau ai hkrum na marin dai: shanhte gaw nanhte hta na nkau mi hpe sat kau shangun na mara ai: nye a amying majaw masha yawng mayawng nanhte hpe n dawng n yawt na mara ai. Rai ti mung, nanhte a kara singgawng langai mi pyi, hten lu na n rai. Nanhte hkam sharang yang gaw, tinang a matu asak hpe lu la na marin dai.

Ya hti ai gaw Madu a Kabu Gara Shiga rai nga ai.

SAN PRA AI NI A POI NHTOI SHANI NA MUNGGA

Dai ni na poi nhtoi hta e Nawku Ppung kaw nna San Pra ai ni re ngu nna tara shang ndau shana shabra tawn da ai San Pra ai ni sha n-ga, kaga San Pra ai masha ni yawng a poi hpe galaw nga ga ai. Kaga San Pra ai ni ngu ai gaw Nawku Hpung kaw nna San Pra ai ni re ngu nna ndau shana ai lam nnga ai raitim, Karai Kasang a man hta san seng san pra ai masha ni law law nga nga ai. Hpa majaw nga yang masha a man hta san pra ai ni ngu nna rai ntsun shi yang Karai Kasang a man hta gaw san seng san pra ni shawng tai sai rai nga ai. 

San Pra ai masha ni gaw shanhte hte seng ai kaji ai/ kaba ai amu bungli ni hpe lak lak lai lai kaja dik htum ai hku galaw lai wa sai re. Masha a man hta kasi kaja madu lai mat wa ai hta n-ga Karai Kasang hte mung nyi htep ai ni rai nga ai. Dai re ai majaw San Pra ai masha ni gaw anhte a matu akyu hpyi garum ya mai nga ai. Shahte a, nga sat nga sa ai lam ni, myit masin kaja ai lam ni hpe anhte kasi la mai nga ai. 

Dai ni na poi nhtoi hta anhte masha hkum ngau shagu gaw San Pra ai masha ni hpe kasi la let tinang hte seng ang ai amu bungli ni hpe reng dik htum ai hku galaw sa ai hta n-ga, aten shagu Karai Kasang hta manoi manat nga sa na matu shadum jahprang ya nga ai. San Pra ai ni yawng a akyu hpyi garum ya ai a majaw mai kaja ai lam ni hpe tatut galaw sa lu ai hta n-ga Karai Kasang hpe grau grau kamsham chye ai ni tai wa lu u ga.

A LU AI MASHA TAI NGA GA

Dai ni na kabu gara shiga ‘A lu ai lam’ gaw chyum laika ting hta, masha ni chye dik ai, na yu dik ai, hkau dik ai mungga daw rai na sai. ‘A lu ai’ ngu ai lam gaw, Hkristan prat hpe nga sa lu na sung dik htum ai matsun lam nan rai nga ai. Dai ni na poi nhtoi hte maram yu ai rai tim, San Pra masha tai wa na lam yan rai sai.

Rai yang, dai a lachyum hpe anhte atsawm chye sai kun? Dai ni na poi nhtoi gaw ra nan ra ga ai. Anhte hpe kaning ngu mayu nga ai, ngu ai hpe mung chye na na ahkyak ai. Anhte yawng a matu; mungga, saw shaga ai lam, hte ga ningdat mung rai nga ai.

San Pra ai masha tai na gwi gwi rai ga! Ya na zawn tsun ai hpe masha n kau mi na ai majaw mani hpa shatai kau ya na nhten. San Pra masha tai na ngu ai gaw reng grau dik ai myit yaw shada lam, myit shingran, tim anhte teng sha lu la mai ai lam rai kun? Kadun dik ai mahtai gaw ‘lu la mai ai’ ngu ai rai.

Hpa majaw nga yang, sanpra masha ni a lam hta tengman ai lam hpe anhte malap kau ya ai majaw rai nga ai. Shanhte mung anhte zawn, hkum, sai, shan hte atsam marai hte gawng kya ai lam hte rai nga ai. Marit chye ai, yaw sing da ai, myit htum chye ai, gumrawng ai hte lak lai ai, masha ni rai ma ai. Shanhte mung anhte zawn mara kap ai ni rai ma ai. Dai gaw shanhte hpang wa ai lam rai tim, shanhte a mau mwi htum hkra gaw dai zawn n rai nga ai.

Asan sha zawn nga tim teng ai lam langai mi gaw, kadai mung San Pra masha tai let shangai wa ai mi n nga ai. Byin tai wa lu na lam lama mi she rai nga ai. San Pra ai ni a labau laika buk ni tam hti la nna hka ja la ga. Anhte dum chye lu ai hta pyi anhte hte grau ni htep nga ai. Shanhte ni a prat hta, agung alau re ai lam ni, ru yak jam jau ai lam ni hte hkrum katut lai wa sai. San Pra ai hte nga lu na matu shakut shaja lai wa sai, kalang lang kataw ai, galau ai ten ni nga tim, bai rawt nna matut hkawm sa ai, grau kaja ai hpe galaw ai, grau kaja na matu shakut ai, grai tsaw dep ai hpe yaw shatawng ma ai.

Dai ni na kabu gara shiga sharin ya ai/ byin shangun mayu ai hte maren tai wa lu na matu shakut shaja sai. Wenyi hta matsan mayan hkrum ai, shagrit shanem ai, matsan dum chye ai, simsa lam a matu shakut ai. Dai lam ni gaw ‘A lu ai ni’ ngu Madu Yesu tsun ai hte, ‘San Pra ai ni’ ngu Nawku Hpung e shamying ai ni tai wa na lam npawt rai sai.

Dai ni na poi nhtoi gaw, anhte dum ai raitim, n dum ai raitim, anhte a matu re ai lam hpe shadum ya ai. Dai zawn re ai hkik hkam ai lam gaw anhte galaw lu ai hta sha rai nga ai. San Pra ai ni yawng a poi gaw tsawm htap ai lama mi de anhte hpe dingsi shaga nga ai. Anhte hta rawng nga ai san pra ai lam hpe shadum ya ai, ga-sadi jaw ya ai. San Pra ai ni yawng gaw’ A lu ai’ myit mada shara anhte hpe jaw ya ai. Karai Kasang a chyeju jaw e, anhte ni mung san pra ai ni tai wa mai nga ai.

SANPRA AI NI A POI SHANI NA CHYUM LAIKA

6th November 2016

CHYUM MUNGGA DAW 1 

SHINGRAN 7:2-4. 9-14.

Ya hti na gaw, Yawhan a Shingran laika hta na rai nga ai.

Jan praw maga de na pru lung wa nna, ahkrung nga ai Karai Kasang a dazik lang ai lamu kasa hpe ngai Yawhan mu nngai. Dai lamu kasa gaw, Anhte a Karai Kasang a shangun ma ni hpe, kahtan e dazik garai n shakap yang, aga hpe mung, nammukdara hpe mung, hpun ni hpe mung hkum jahten kau mu, nga nna lamu ga hte nammukdara hpe jahten shabya kau na ahkang lu ai lamu kasa mali hpe, nsen kaba hte jahtau wu ai. Shaloi dasik shakap hkam la ai ni hpe hti ai jahpan ngai na nngai: Israela kashu kasha ni a amyu yawng hte na, sen mi mun mali e hkying mali dazik shakap ai hkam la ma sai.

Dai hpang, yu u, mungdan shagu hta na mung, baw lakung shagu hta na mung, amyu baw shagu hta na mung, ga amyu shagu hta na mung, kadai n dang hti lu ai masha unawng kaba hpe ngai mu nngai. Ndai ni gaw hpraw ai hpun palawng bu hpun nna, tinang a lata hta namhtan hpun lakung lang let, Tingnyang a man e mung, Sagu Kasha a man e mung tsap nga ma ai. Shanhte gaw nsen kaba hte jahtau let, Tingnyang hta dung nga ai anhte a Karai Kasang hte Sagu Kasha gaw, awng dang u ga law, nga ma ai. 

Bai, dai tingnyang hte salang ni hte dusat amyu mali a grup yin e, lamu kasa yawng hte gaw kawan tsap nga ma ai. Shaloi shanhte gaw tingnyang a man e dingnyawm dagup nna Karai Kasang hpe nawku, let, Amen Shakawn kungdawn ai, Hpung shingkang, Hpaji byeng-ya, Chyeju dum ya ai, Arawng sadang, Ahkang aya hta N-gun atsam gaw, htani htana prat dingsa e, anhte a Karai Kasang kaw a nga nga u ga law Amen, nga nna tsun ma ai.

Shaloi salang ni hta na langai mi, Hpun-palawng ahpraw bu hpun ai ndai ni gaw, kadai ni rai nga ma ta? Kanang na pru wa ma ta?. nga nna ngai hpe hkap san nngai. Ngai gaw, Nye a Madu e, nang chye nga ndai, ngu nna Shi hpe htan we ai. Shaloi shi tsun ai gaw: Ndai ni gaw, zingri zingrat kaba hpe hkam sharang ngut nna, tinang a hpun palawng hpe Sagu Kasha a asai hta hkrut jahpraw la ai ni rai nga ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

1 YAWHAN 3: 1-3.

Ya hti na gaw, Yawhan shagun dat ai laika langai hta na rai nga ai.

Karai Kasang a kashu kasha ni anhte hpe ngu shamying mi ai majaw, Kawa gaw anhte hpe gade wa tsaw ra da mi hka: Shi a kashu kasha ni nan anhte rai nga ga ai. Dai rai nna, mungkan ga gaw Shi hpe n chye wu ai majaw, anhte hpe mung n chye n hkap la ma ai. Tsaw ra ai ni e, Karai Kasang a kashu kasha ni, anhte ya e rai nga ga ai; hpang e anhte hpa tai na, garai n shadan dan nga ai. Dai hpe shadan dan ai shaloi anhte shi hte maren n bung na ga ai lam hpe anhte chye nga ga ai; kaning rai nme law, Shi hkum nan nga nga ai hte maren, anhte Shi hpe mu lu na ga ai. Ndai lam hpe myit mada ai masha yawng hte gaw, Hkristu Madu Chyoi Pra nga ai hte maren, tinang a hkum hpe shachyoi shapra ya ra ai.

Ya hti ai gaw Karai Kasang a mungga rai nga ai.

KABU GARA SHIGA 

MAHTE 5: 1-12.

Ya hti na gaw, Mahte a laika hta na Kabu Gara Shiga rai nga ai.

Yesu gaw masha wunawng wuwa hpe mu jang, bum ntsa de lung wa ai; dai yang e Shi dung nga yang, shi a sape ni shi a makau de sit sa wa ma ai. Shaloi Shi shanhte hpe sharin shaga let tsun wu ai gaw:

‘Myit masin hta matsan mayan ai ni gaw, a lu ma ai; lamu mungdan gaw shanhte a mungdan rai nga malu ai.

‘Myit sumnung ai ni gaw a lu ma ai; shanhte mungkan ga hpe madu lu na mara ai.

‘Yawn hkyen hkrum ai ni gaw a lu ma ai; shanhte shalan shabran ai hkrum na mara ai.

‘Ding hpring ai hte kawsi hpang gara ai ni gaw a lu ma ai; shanhte hkru kat wa na mara ai.

‘Matsan dum chye ai ni gaw a lu ma ai; shanhte matsan dum la ai hkrum na mara ai.

‘Myit san seng ai ni gaw a lu ma ai; shanhte gaw Karai Kasang hpe mu lu na mara ai.

‘Ngwi pyaw simsa ai hpe shabyin ai ni gaw a lu ma ai; shanhte hpe Karai a kasha ni ngu shamying na mara ai; ‘Dingman ai lam a majaw zingri zingrat hkrum ai ni gaw a lu ma ai; lamu mungdan gaw shanhte a mungdan rai nga malu ai. ‘Nye a amying majaw masha ni nanhte hpe asawng asang zingri zingrat di ai hte, n teng n man ai hku mara amyu my shagun da ai shaloi nanhte a lu myit dai: lamu mungdan hta nanhte a kumhpa kaba nga malit dai majaw, kabu gara nna ngwi pyaw nga mu.

Ya hti ai gaw Madu a Kabu Gara Shiga rai nga ai.