2018: PASKA LADAW HTA LABAN (5) SHANI NA MUNGGA

Karai Kasang hpan tawn da ai shinggyim masha ni gaw kaja ai hte nkaja ai hpe ginghka lu na matu hte kaja ai hpe lata la nna dawdan lu na matu atsam marai rawng nga ai. Kaja ai nkaja ai hpe chye ginghka na matu Karai Kasang a sharin shaga ai tara lam ni hte lakap nna sawn sumru chye yang she shut shai ai lam ni nnga na re.

Anhte a makau grup yin kaw na mabyin masa ni gaw shani shagu galai shai wa nna, gara gaw kaja ai nkaja ai ngu ai hpe chye ginghka lu na matu gaw, dai ni na anhte a rawt jat taw nga ai prat a mayak mahkak langai mi rai nga ai.

Sabyi lakung laking hte bung ai anhte ni gaw Sabyi hpun rai nga ai Karai Kasang hte ten tup matut mahkai nna sak hkrung nga sa let ra ai chyeju ni hpe hkam la lu ai sha n-ga, mai kaja ai lam ni hpe Shi Madu matsun ai hte maren lata la lu let sak hkrung nga sa lu u ga.

TSABYI RU MADUNG (NAWKU HPUNG)

Madu Yesu hte galung nga ai gaw Nawku Hpung hta shi a-nga nga ai hpe anhte sakse hkam ai lam rai nga ai.

1969 July 20 ya shani manang wa “Armstrong” hte rau shata ga de du ai ‘Aldrin’ hta tsun na ndai mabyin lu la sai. Armstrong shata ga hta lam hkawm na hkyen lajang nga yang, shi gaw muk (bread) hte tsabyi n tsin (Wine) hpe shaw la nna jak n tsa mara tawn da nu ai. Dai hpang byin ai hpe shi tsun dan ai gaw: “ Ngai tsabyi hpe tsabyi gawm de ru bang dat ai, (ginding aga gang jahkrat n’gun) htam 6 na htam 1 sha nga ai shata ga hta tsabyi n tsin gaw magyi magaw rai gau ngwi sha gawm hpring hkra lwi hkrat wa sai. Dai lam hpe bai myit yu yang, shata ga hta yawng a shawng ru jaw ai n tsin hte yawng a shawng na lu sha gaw Missa hkung ga hta lang ai muk hte tsabyi rai taw nga ai gaw mau hpa rai wa sai. Dai hpe shi grai n lu sha yang, Aldrin gaw kasa Yawhan a kabu gara shiga hta na mungga daw hpe hti ai. Dai gaw, “Ngai gaw tsa byi ru madung rai nga nngai, nanhte gaw lakung lakying ni rai nga myit dai, ngai hta noi nga nna ngai mung dai wa hta noi nga ai rai yang gaw, dai wa gaw asi law law si wa lu ai, kaning rai n me law, ngai hte hka jang, nanhte hpa mung n galaw lu myit dai”.

Shi chyu hkrum sha sai shata ga na n dai mabyin hpe, “Ngai gaw, nachying lak lai ai hku nna n ta ga de nga ai nawku hpung hte galung ai hta n-ga, Nawku hpung gaw shara shagu hta nga ai ngu myit dum hkam la lu ai” ngu nna tsun dan sai.

Ndai mabyin gaw dai ni hti ai kabu gara shiga hpe lak lai ai lachyum shapraw ai hta n-ga, anhte lakung lakying ni gaw, tsabyi ru madung re ai Madu Yesu hte galung nga ai lam shadum ya ai. Anhte gaw Madu Yesu hte lam masum hku nna matut galung nga ai. Langai, Shi a mying ningsang hta anhte zuphpawng nga ai a marang e, “marai lahkawng masum, nye a mying hpe gang nna zup hpawng nga ma yang gaw, dai yang shanhte a ka-ang e, ngai mung lawm nga nngai” (Mt 18:20). Lahkawng, Shi a mungga hpe madat ai a marang e; “nanhte a ga madat ai wa gaw, nye a ga madat ai wa mung rai nga ai” (Lk 10:16). Masum, Shi a hkum hte sai hpe hkam la ai a marang e; “nye a shan sha nna nye a sai lu ai wa gaw, ngai hta rawng nga ai; dai wa hta mung ngai rawng nga nngai” (Yh 6:56).

Tsun mayu ai lam gaw, lama na anhte dai ni Madu Yesu hpe tam ai rai yang, Shi a Nawku Hpung hta mu lu na rai nga ai. Kalang lang anhte masha ni tsun ai, “ngai Madu Yesu hpe lu tam ai hte, Shi hte matut mahkai na ngai hta lam nga ai, Nawku hpung n ra ai” nga ai hpe na yu na re. N kau mi bai tsun ai, “ngai a nta hta akyu hpyi lu ai, laban shani hkan nawku jawng n sa ra ai” nga ai mung na yu na re. Dai zawn nga na ai shaloi, “Nawku hpung na kaga de e Yesu n nga ai, nang tsun ai zawn re ai Yesu n nga ai” ngu nna marawn mayu na re. Dai Yesu gaw lai wa sai 2000 ning hta Kalvary kawng n tsa hta si hkam sai. Dai ni anhte chye ai Yesu gaw, Paska laban jahpawt manap e hkrung rawt sai Yesu hte Nawku hpung hta anga nga ai wa rai nga ai.

Damasku mare de lung wa ai hkrun lam hta na kasa Pawlu a mahkrum madup hpe bai yu yu ga; “akajawng sha lamu de na nhtoi shi a grup yin e htoi tu pru wa ai, shi mung ga e kadawng taw mat ai hte, Shawlu, shawlu, nang ngai hpe hpa rai zingri nga n ta? nga nna shi hpe tsun ai nsen na wu ai. Madu e, nang kadai rai nga n ta? ngu nna san wu yang, Madu gaw, nang zingri zingrat ai Yesu rai nga nngai” (Kasa 9:3-5) ngu nna htan ya sai. Kasa Pawlu gaw myit shuk nu ai, shi Yesu hpe zingri zingrat n di yu shi ai. Kasa Pawlu gaw Yesu a hpang hkan ai ni hpe chyu sha zing ri nga ai. Dai mabyin gaw shi hta N’htoi jahtoi ya sai. Yesu hte shi a hpang hkan nang ai ni gaw langai sha rai nga ai. Yesu hte shi a hpang hkang nang ai ni hpe jahka ai gaw, hkum hkrang kaw na baw hpe jahka la ai zawn rai nga ai. Shaning law law hpang kasa Pawlu gaw; “ Yesu gaw dai hpung ngu ai hkum hkrang a baw rai nga ai. Shi gaw n pawt n hpang alat ning shawng rai nga ai” (Kol 1:18) nga nna ka da sai. Tsun mayu ai lam gaw, lama na dai ni na masha ni Yesu hpe tam ai rai yang, anhte, Nawku Hpung gaw shanhte ni mu hkra shakut ya ra ai.

Nawku Hpung a lam sharin nga yang sara gaw, jawngma ni hpe, “lama na n sawn yu lu na daram kapaw ai majaw mungkan ting si mat nna anhte gawk ndai na masha ni sha ngam nga ai ngu ga, Yesu a Nawku hpung gaw kanang rai nga na rai?” ngu nna san wu ai. Jawngma ni jahkring mi mau mat nna, marai mi gaw lata sharawt let, “Yesu a Nawku hpung gaw ndai laika sharin gawk hta nan rai taw nga ai” ngu bai htan ya sai.

Kaga langai mi anhte chyelu ai gaw; Nawku Hpung gaw masha ni sa mahkawng nga ai “shara” n re! Arau sha akyu hpyi, rau nawku daw jau, Hkristu a hkum hte sai hpe rau jawm lu sha ai “Masha” ni nan Nawku hpung rai nga ai. Nawku hpung gaw, hkau lam mam nsi law law hte tsabyi si law law hpe jawm pawng yang she lu la ai Missa Hkungga hta lang ai Muk hte Tsabyi zawn rai nga ai. Rau sha jawm pawng nga ai a marang e, Yesu Hkristu a Nawku Hpung anhte tai wa sai. Ndai mungkan hta Yesu a Nawku hpung hpe masha ni mu mada hkra galaw lu sai. Dai ni na masha ni hkrung rawt sai Yesu hpe mu lu hkra anhte galaw sai kun?

Sawn sumru mai ai lam: Nawku Hpung hta hkrung rawt sai Yesu hpe mu lu hkra ngai galaw sai hte, dai ni na kabu gara shiga gaw ngai hpe kaning rai ning dat nga ai rai?

2018: PASKA LADAW HTA LABAN (5) SHANI NA CHYUM LAIKA

PASKA LADAW HTA LABAN 5

29th April 2018

CHYUM MUNGGA DAW 1

Kasa 9:26-31

Ya hti na gaw, Kasa laika hta na rai nga ai.

Sawlu gaw Yerusalem de du wa jang, sape hpung hta shang lawm maw ai, rai ti mung, shi Nawku hpung de hkrak kayin shang wa sai hpe n kam ma ai majaw, sape ni yawng shi hpe hkrit da mu ai. Barnaba chyawm gaw shi hpe kasa ni hpang de woi wa ai rai nna, Sawlu hkawm sa wa nga yang Yesu Madu shi kaw dan pru nna, ga tsun ai lam hpe mung, Damasku mare hta Yesu a amying nsang gang nna, nden ja ai myit hte shi hkaw dan ai lam hpe mung, kasa ni hpe hkai dan wu ai. Shing rai Sawlu gaw sape ni hte rau nga nga nna, Yerusalem mare e n dut n dang hkawm nga let, Madu a mying nsang gang nna, nden ja ai myit hte hkaw tsun nga ai. Greka ga shaga ai Yuda masha ni hte shi ndang hkat nga ai rai nna, Dai lam hpe hpu nau ni chye jang, Sawlu hpe Kesare mare de woi sa nna, Tarshu de shangun dat mu ai. Dai nhtoi hte hta e, Yuda mung, Galile mung hte Samari mung hkan e nga ai Hpung gaw, ngwi pyaw simsa ai hte hpung masha ni hpe sharin shaga madi shadaw ya ma ai. Shing rai Madu hpe hkrit hkungga ai hte Chyoi Pra ai Wenyi a shalan shabran ai hpe hkam la nna, Yesu a lam hta hkawm sa let, shanhte law htam wa ma ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 Yawhan 3:18-24

Ya hti na gaw, Kasa Yawhan shagun dat ai laika langai hta na rai nga ai.

Ngai shu ngai sha ni e, N-gup ga tsun ai hku chyu sha n rai, mai kaja ai amu bungli hpe hkan galaw ai hku nna sha, tsawra ai myit majing hpe anhte madun dan ra ga ai. Dai hku hkan galaw jang she, anhte gaw tengman ai a kashu kasha ni rai nga ga ai hpe chye lu ga ai. Shing rai, anhte a myit anhte hpe mara shagun yang gaw, Karai Kasang anhte a myit hta grau kaba ai hte, yawng mayawng hpe chye chyang nga ai majaw, Shi a man e jasim ya lu ga ai. Tsawra ai ni e, anhte a myit anhte hpe mara n shagun yang gaw, nden ja ai myit hte Karai Kasang a man de shang wa lu ai rai nna, anhte hpyi mahpyi hte hpe shi kaw nna lu la na ga ai; hpa majaw nga yang, Karai Kasang hkang da ai ga hpe hkan shatup nga ga ai hte, Shi a man e sharawng awng ai amu hpe galaw nga ga ai. 

Shi anhte hpe hkang da ai ga gaw ndai rai nga ai: Shi a Kasha Yesu Hkristu hpe kangka ai hte kam sham lu na hte, Madu Yesu tsun da ai hte maren shada da tsawra lu na myit dai. Shi hkang da ai ga hpe hkan shatup ai gaw, Shi hta e a nga nga ai rai nna, Shi mung dai wa hta e a nga nga ai: Shi anhte hpe jaw da ai Wenyi a majaw, anhte hta e Shi a nga nga ai hpe anhte chye lu ga ai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 15:1-8

Ya hti na gaw, Yawhan a laika hta na Kabu Gara Shiga rai nga ai.

Yesu gaw Shi a sape ni hpe tsun mu ai gaw: Ngai gaw tsabyi ru madung rai nga nngai, nye Wa gaw tsabyi sun madu rai nga ai. Ngai hta asi n si ai lakung shagu hpe Shi krum kau wu ai: asi si ai lakung shagu hpe chyawm gaw, asi grau si lu u ga, tsan kau ya wu ai. Nanhte chyawm gaw, ngai nanhte hpe tsun dan ai mungga a majaw, ya e pyi asan apra rai nga manit dai. Ngai hta noi nga mu, ngai mung nanhte hta noi nga na nngai. Tsabyi lakung gaw tsabyi ru madung hta n noi yang gaw, shi chyu sha asi n si lu ai zawn, nanhte mung ngai hta n jung n noi yang gaw asi n si lu na myit dai.

Ngai gaw tsabyi ru madung rai nga nngai; nanhte gaw lakung lakying ni rai nga myit dai. Masha kadai mung ngai hta noi nga nna, ngai mung dai wa hta noi nga ai rai yang gaw, dai wa gaw asi law law si wa lu ai: kaning rai nme law, ngai hte hka jang nanhte hpa mung n galaw lu myit dai. Ngai hta n jung n noi ai wa gaw, hkraw mat ai lakung lakying hpe zawn kabai kau ai hkrum na ra ai, dai hkraw mat ai lakung lakying ni hpe masha ni e magawn la nhtawm, wan hta kabai nat kau ma ai. Nanhte ngai hta noi nga nna, nye a mungga mung nanhte hta noi nga ai rai yang gaw, nanhte hpa hpyi mayu yang hpyi mu: hpyi ai hte maren, nanhte hpe madat ya na ra ai. Nye Wa a hpung shingkang dan hkung wa na matu, nanhte asi law law si wa na ra ai; shaloi, nye a sape ni teng teng tai wa na myit dai.

Ya hti ai gaw, Madu a Kabu Gara Shiga rai nga ai.

SAGUREM KAJA NGU AI GAW

Kaja ai sagurem wa gaw shi a hkrung rawt sai asak anhte hpe garan ya na matu Shi a asak ap nawng kau sai.

Samuela laika langai hta ramma Dawi gaw dai Hpilisti masha share la ngang Goliat hpe kasat na matu ap nawng ai lam hti yu ga ai. Hkawhkam wa gaw, “Nang ma sha naw rai nga n dai, dai wa gaw kaji kaw nna majan gun man sai” ngu nna Dawi hpe tsun nu ai. Dawi gaw, “Na a mayam nye wa a sagu ni rem nga ai shaloi, hkanghkyi, atsap sa nna, sagu hpung na sagu kasha la sha mat wa yang, ngai hkan shachyut nna, sagu kasha hpe shi a n-gup na shaw la we ai, ngai e htim kawa wa yang, shi a mun hta magra shading nna kayat sat kau we ai. Dai n kam n sham ai Hpilisti wa hpe mung dai hte maren di na we ai (1 Sam 17:33-36) ngu bai htan sai. Anhte yawng chye ai hte maren Dawi ma gaw dai Goliat hpe lakli hte n lung langai mi hte sha gasat kau sai.

Moi prat na sagu rem ni a hkrit hpa gaw dai nam maling na matse du sat ni sha n rai, lagu lagan damya ni mung rai nga ai. “W. M Thomson” shi ka ai “Lamu ga hte laika buk” hta mung yawn hkyen hpa mabyin langai ka da ai. Lani mi na aten, “Tabar” bum makau mayang hta, sagurem shabrang marai mi gaw shi sagu ni hpe rem sin nga yang, akajawng sha lagut damya masum gale sa wa ai. Shabrang ma dai, hpa byin wa na hpe chye ai rai tim, n hprawng ai sha tsap nga let, sagu ni dai lagut damya ni a lata n du u ga, shakut sai. Hpang jahtum e gaw shabrang ma dai, shi rem sin ai sagu ni a matu asak jaw kau ra sai. Ndai zawn moi prat na sagurem ni, shanhte a sagu hpung a n tsa, sak jaw ap nawng ai lam gaw Karai Kasang hpe sagurem hte gashadawn na matu chyum laika ka sara ni hpe shatsam sai. Karai Kasang gaw ngai sagu hpe rem ai wa rai nga ai, si ai hkaraw a shingnip hta e ngai hkawm sa wa timung, ngai aru ara hpe n hkrit nngai (Sh.k 23:1-4) nga nna shakawn kungdawn sara wa mahkawn da sai.

Israela Nawku hpung a ningbaw ni mungkan n tsa hta Karai Kasang a shara la sai hte shanhte hkum nan mung sagurem ni hte shingdaw sai. Raitim lai sai aten ladaw mi hta, Israela ningbaw ni gaw dai hpe grit nem shangun sai. Ndai lam byin pru ai shaloi, myihtoi Ezekela gaw tinang hkum hpe sha bau ai Israela sagurem ni gaw dingnye lu mu ga, sagu ni hpe n bau myit dai, gawng kya ai sagu ni hpe, nanhte n-gun shaja ai n rai, machyi hkum ai sagu hpe, shamai ya ai n rai, n ra daw ai sagu hpe, ahkyen kayawp ai n rai, masha gawt la mat ai sagu hpe, hkan mawai la ai n rai, nanhte gaw myit ja nna a dip arip hte shanhte hpe reng myit dai.. sagurem ni e, Karai Kasang ga madat mara mu, Karai Kasang ning nga ai… ngai a sagu ni hpe shanhte a lata na ngai hpyi la nna… sagurem wa langai mi hpe mung ngai san da nna, sagu ni hpe shi rem nga na ra ai, shi gaw nye a shangun ma Dawi rai na ra ai, shi sagu ni hpe bau nna, dai ni a sagurem wa tai na ra ai” (Eze 34: 2-4,9-10,23) nga nna tsun da sai.

Dai ni hti ai kabu gara shiga hta gaw ndai lam ni hte shai nga ai. Yesu tsun ai,”Ngai gaw sagurem wa kaja rai nngai, sagurem wa kaja gaw, sagu ni a matu tinang a asak nawng ya kau lu ai,…. nye a n sen madat na mara ai. Shaloi sagu hpung langai sha, sagurem wa langai sha, rai na ra ai.” Tsun mayu ai gaw, myihtoi Ezekela tsun da ai gaw Madu Yesu hta dik wa sai. Sagurem wa kaja Dawi zawn, shi gaw gawng kya ai, myit kaji ai, machyi ai sagu ni hpe yu lajang nna, dam mat ai hte mat mat ai sagu ni hpe tam na lawan nga ai. Madu Yesu dai hta jan nna galaw sai, sagu ni a matu shi a asak ap nawng kau sai. Dai hta grau ai lam gaw, si ai kaw na bai hkrung rawt ai hte ahkrung nga sai shi a asak hpe shi a sagu ni hpe garan jaw ya sai.

Dai ni hti ai chyum mungga daw (1) hta Petru tsun ai lam mung rai nga ai. Chyahten labye wa mai tsai wa ai gaw Yesu Hkristu a mying ningsang hte re ai lam tsun dan sai. Kasa Petru gaw masha ni hpe Yesu hta kamsham ai hte wenyi shamai shatsai hkrum lu na saw shaga sai. Dai gaw chyum mungga daw (2) hta kasa Yawhan tsun ai lam mung rai nga ai. Shi gaw, Madu Yesu a marang e anhte gaw Karai Kasang a kashu kasha ni tai wa sa ga ai. Anhte a mahtai gaw hpa mi rai na kun?

Sawn Sumru mai ai lam:    Madu Yesu ngai a sagurem wa tai n na shi a asak ngai a matu nawng kau ya sai majaw Karai Kasang hpe chyeju dum nga ai kun? Sagurem wa kaja Madu Yesu a kasi kaja mada la nna, ngai a kun dinghku u hpung hta kaja ai sagurem wa ngai kaning rai tai lu na rai?

2018: PASKA LADAW HTA LABAN (4) SHANI NA CHYUM LAIKA

PASKA LADAW HTA LABAN 4

22nd April 2018

CHYUM MUNGGA DAW 1

Kasa 4:8-12

Ya hti na gaw, Kasa laika hta na rai nga ai.

Yuda masha ni a hkinjawng agyi ni, du salang ni hte sara ni gaw, Yerusalem mare e nga nna, Kasa Petru yan Yawhan hpe san yu ma ai. Shaloi, Petru gaw Chyoi Pra ai Wenyi hte hpring nga nna, shanhte hpe tsun mu ai gaw: Mung masha ni a du agyi salang ni e, Ndai lagaw hten ai wa hpe matsan dum garum ai amu hte, shi kaning rai mai wa lu ai lam hpe, dai ni e an hpe san jep yu ai rai yang gaw, nanhte hte Israela amyu yawng hte hpe, ngai kabu gara ai hte tsun dan made ga: nanhte udang hta jen sat kau nna, Karai Kasang e si ai ni kaw na jahkrung sharawt la ai, Nazaret wa Yesu Hkristu a amying ningsang hte, ndai wa gaw nanhte a man e amai atsai tsap nga ai. Dai Yesu gaw, nanhte nta gaw ai ni lata kau ai nlung rai nga ti mung, ningjut jahtum na nlung tai wa sai. Shi hta kaga hkye hkrang la ai lam n nga sai; kaning rai nme law, ndai ga ntsa e masha ni hpe jaw ai amying shingteng mahkra hta na, Yesu ngu ai mying hta kaga, anhte hpe hkye hkrang la lu ai amying ningsang shaje kanang mung n nga sai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1Yawhan 3:1-2

Ya hti na gaw, Kasa Yawhan shagun dat ai laika langai hta na rai nga ai.

Ngai shu ngai sha ni e, Wa Karai Kasang gaw anhte hpe gade wa tsawra da mi hka! Karai Kasang a kashu kasha ni ngu nna anhte hpe shamying da mi ai; dai hte maren Shi a Kasha ni nan anhte rai nga ga ai. Mungga gaw shi hpe n hkap la ai majaw, anhte hpe mung n hkap la nga ai. Tsawra ai ni e, Karai Kasang a kasha ni anhte ya e rai nga ga ai, rai ti mung, htawm hpang e anhte hpa mi tai wa na ga ai hpe garai n shadan dan nga ai; dai hpe shadan dan ai shaloi, Madu Karai Wa hte bung na ga ai hpe sha anhte chye nga ga ai; kaning rai nme law, Shi hkum hpe nan anhte mu lu na ga ai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 10:11-18

Ya hti ai gaw, Kasa Yawhan a laika hta na Kabu Gara ai Shiga rai nga ai.

Yesu tsun ai gaw: Ngai gaw kaja ai sagu rem wa rai nga nngai: kaja ai sagu rem wa gaw, sagu ni a matu tinang a asak nawng ya kau ai. Nchyang wa chyawm gaw, sagu rem wa majing, n re ai hte, sagu ni hpe n madu ai majaw,chyahkyawn sa wa ai hpe mu jang, sagu ni hpe kau da nna hprawng mat wa chye ai; chyahkyawn mung sagu ni hpe amya sha nna, shabra kau nga ai. Dai wa gaw nchyang sha rai nga ai majaw, sagu ni a matu n tsang ai rai nna, hprawng mat wa ai. Ngai gaw kaja ai sagu rem wa rai nga nngai: nye a Wa gaw ngai hpe chye ai hte, ngai mung Wa hpe chye nngai zawn, nye a sagu ni hpe ngai chye nngai, nye a sagu ni mung ngai hpe chye ma ai. Dai sagu ni a matu mung nye a asak nawng ya kau nngai.

Ndai lawng hta n lawm ai sagu kaga mung ngai naw lu nngai. Dai sagu ni hpe mung ngai woi wa nna, shanhte nye a nsen hpe madat na mara ai; shaloi sagu hpung langai sha, sagu rem wa langai sha rai na ra ai. Ngai gaw nye a asak hpe bai lu la u ga ngu nna, asak nawng ya kau nngai majaw, nye Wa ngai hpe tsaw ra nga ai. Kadai rai ti mung nye a asak hpe kashun la kau lu ai n rai; nye a myit hte ngai nawng ya kau nngai. Nye a asak hpe nawng kau ya na ahkang hte, bai lu la na ahkang ngai lu nngai; ndai gaw, nye a Wa ngai hpe hkang da ai majaw rai nga ai.

Ya hti ai gaw, Madu a Kabu Gara Shiga rai nga ai.

HKRUNG RAWT SAI YESU GAW KANING RE HKUM HKRANG LU AI KUN?

M.V Toroshita mying ai hka sanghpaw kaji gaw gumhpraw dum kaw bungli galaw ai ni law law hpe htaw let, grai mying dang hkung ai pyaw chyai shara re ai Philippines mungdan na, Boracay Panglai hkinggau de sa wa nga yang, 1991 ning March shata 28 ya, Chyoipra ai mali ya shani lup mat wa sai. Dai hta si lawm mat ai ni a wenyi minla lam gamung shahta sai.

Dai yawn hkyen lam byin ai hpang lahkawng na rai yang, dai kaw si mat ai ni law malawng magam gun ai gumhpraw dum na chying hkyen hta zaibru hte hka madi ai lagaw hkang ni hpe shana zawng ai wa gaw mu ai da. Hkrat si mat ai hta ma kaji ni mung lawm nga ai. Dai byin ai hpang, zawng ai wa gaw dai rung de shana e shang na ning dang wu ai. Kaga sin langa wa mung dung hkum gaw shi chyu chyu n tsa de rawt wa nna, saboi n tsa e mara taw ai hpe mu wu ai. Mau ai hte dai dum hkum hpe bai jahkrat tawn da yang mi na zawn sha bai rawt wa nna bai taw taw ai da. N kam ai hte kalang mi bai jahkrat tawn wu ai. Dai dung hkum mung masum lang ngu na bai sharawt lung wa ai shaloi chyawm gaw hkrit ai hte shinggan de hprawng dum bre mat wa sai da!

Nanhte hta na kadai wa minla hpe mu yu sata? Minla gaw kaning san ai rai? Kabu gara shiga gaw Madu bai hkrung rawt ai hpang minla a lam tsun wa sai. Sape ni chyawm gaw kajawng ai hte hkrit gari mat ma ai rai nna, minla mu ga ai nga nna myit nga ma ai (24:37) Yesu gaw shanhte ung ang nga ai hpe shamat kaw na matu “Ngai hpe masawp yu mi, minla ngu ai gaw, ngai hpe nanhte mu ai zawn, ashan hte nnut nra rawng ai n rai” (39) ngu nna tsun mu ai. Madu gaw nga kakang hpe pyi sha dan hkra rai shi hta hkum hkrang nga ai lam madun dan sai. Hkrung rawt sai Hkristu gaw kaning re ai hkrum hkrang lu ai kun?

“Kadai wa sumsing lamu de lung wa mayu ai kun?” Ngu ai laika ka ai “Jim Auer” ka da ai hta, hkrung rawt sai Hkristu a hkum hkrang gaw moi na hte shai nga ai. Dai gaw minla mung n rai, hkum hkrang hte wenyi hka taw ai mung n rai, nga ai. Hkrung rawt sai Madu gaw sha lu ai, lu lu ai, raitim chying hka, shakum zawn re ai arung arai ni shi hpe n shing dang lu ai. Shi myit ra ai hte maren, paw dan lu ai, mat mat mai ai. Anhte a hkrung rawt ai hkum hkrang mung dai zawn rai na hpe tsun dan ai la mi rai kun.

Hkrung rawt sai Madu a dan pru dan ai lam gaw, Sape ni a htum mat hkyen nga ai makam masham hpe n-gun jaw ya ai rai sai. Shi gaw kaja wa Messiah rai nga ai kun? Kaja wa shi gaw si ai kaw na bai hkrung rawt sai kun? Sape ni gaw kamsham na hkrit ai zawn rai nga ai. Dai gaw kalang lang anhte hkrat sum ai aten na myit masa hte mung bung nga ai. Chyoipra ai wenyi gaw Nawku hpung hpe matut lam madun shatsam ya nga ai hpe anhte kamsham ga ai. Raitimung, kalang lang anhte a makam masham gaw myit ung ang lam a adawt ai hpe hkrum ga ai. Ga shadawn, machyi makaw mai tsai wa na matu nsim nsa akyu hpyi ai raitim, hpa mahtai mung n lu la ai. Anhte tsawra ai ni, anhte hpe manu mana machyi hkra galaw ya ai, (snr) n chye na ai aten ni hta Karai Kasang hpe n htan shai ai. Dai gaw anhte a makam masham gaw agung alau hte laja lana re ai mayak mang hkang ni hpe lai di nga ai. Makam masham ngu ai gaw ngwi pyaw ai aten raitim, ru yak aten hta raitim Karai Kasang hpe hkap la ai hte kamsham ai lam rai nga ai. Hta n ga, Karai Kasang hpe hkrit hkungga ai hte tsawra ai masha ni gaw mayak manghkang hte ung ang ai lam kaw na lawt lu na ngu n tsun lu ai hpe gashaka dingsa na Yoba a lam gaw anhte hpe sharin ya nga ai.

Sawn sumru mai ai lam;    Makam masham hpan masum nga ai ngu tsun ma ai. Agung alau hte mayak mang hkang n nga ai gaw ma chyai ai hte bung ai. Chyam yu hkrum ai shaloi ung ang myit mahtang dang kau ai rai yang hkalung ai makam masham rai nga ai. Ung ang ai hpe dang kau lu ai rai yang she jet ai makam masham rai nga ai. Ndai ni hta na ngai gara makam masham hpe mahtang lu da ai kun? Hpa majaw rai?

2018: PASKA LADAW HTA LABAN (3) SHANI NA CHYUM LAIKA

PASKA LADAW HTA LABAN 3

15th April 2018

CHYUM MUNGGA DAW 1

Kasa 3:13-15, 17-19

Ya hti na gaw, Kasa laika hta na rai nga ai.

Petru gaw shawa masha ni hpe tsun ai gaw: Israela masha ni e, Abraham, Isak hte Yaku a Karai Kasang nga ai, anhte a ji wa ni a Karai Kasang gaw, Shi a Shangun Ma Yesu hpe yawng mayawng hta grau ai hpung shingkang jaw ya nu ai: nanhte mahtang dai Yesu hpe ap kau myit dai rai nna, Pilatu shi hpe dat kau na myit da yang, nanhte gaw Pilatu a man e dai wa hpe nyet kau myit dai. Dai chyoi pra ai hte ding hpring ai wa hpe nanhte mara shagun da nna, masha sat ai wa hpe mahtang hpyi la nhtawm, asak Madu hpe nan sat kau myit dai. Karai Kasang chyawm gaw si ai ni kaw na shi hpe jahkrung sharawt la nu ai: anhte mung dai lam a sakse ni rai nga ga ai. 

Ya rai ti mung, hpu nau ni e, nanhte hte nanhte a du salang ni dai lam hpe n chye nna galaw kau ai hpe ngai chye nga nngai. Dai gaw, Karai Kasang a Hkristu nni nkri hkrum na ra ai nga nna, myihtoi ni yawng a n-gup hte, Karai Kasang shi nan tau tsun ai lam hpe hkan shadik ai rai nga ai. Dai rai nna, nanhte a shut hpyi mara raw mat na matu, myit malai lu nna, Karai Kasang hpang de kayin wa marit, ngu nna Petru hkaw tsun dan wu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 Yawhan 2:1-5

Ya hti na gaw, Kasa Yawhan shagun dat ai laika langai hta na rai nga ai.

Ngai shu ngai sha ni e, nanhte shut hpyi mara n galaw myit ga, ndai shadum ai ga nanhte hpe ka dat nngai. Rai ti mung, masha langai ngai mara galaw hkrup sayang gaw, Kawa a man e anhte a matu htinglu htinglai ya ai wa anhte lu ga ai: dai wa gaw Yesu Hkristu ngu ai, ding hpring ai Madu rai nga ai. Dai Yesu Madu gaw anhte a mara hpe la kau ya ai gawng malai hkungga rai nga ai; anhte a mara hpe sha n rai, mungkan ting a mara hpe mung shi gun la kau ya ai. Karai Kasang hkang da ai ga hpe anhte hkan shatup yang gaw, Shi hpe chye chyap nga ai hpe anhte chye lu ga ai. Ngai shi hpe chye chyap nngai nga nna, marai langai ngai tsun ti mung, Karai Wa hkang da ai ga hpe n hkan shatup yang, dai wa gaw tengman ai hpe n hkap la ai majaw, masu ai wa rai nga ai. Kadai rai ti mung, Karai Kasang a mungga hkan yang gaw, Madu a tsaw ra ai lam dai wa hta e kaja wa teng teng hkum tsup wa salu ai. 

Ya hti ai gaw, Karai Kasang a mungga rai nga ai.

KABU GARA SHIGA

Luka 24:35-48

Ya hti na gaw, Luka a laika hta na Kabu Gara Shiga rai nga ai.

Yesu bai hkrung rawt ai shani e sape lahkawng gaw Ema-u mare de sa wa ma ai. Yerusalem mare de bai wa nhtawm, shan sa wa nga yang byin ai lam ni hte, muk ahkyep karan jaw ai shaloi Yesu re ai chye lu ai hpe mung, kasa shi langai hpe tsun dan ma ai. Dai lam hte hpe shanhte jawm tsun nga yang, Yesu hkum nan shanhte a ka-ang e tsap nga nna, Nanhte ngwi pyaw nga myit ga, ngu nna shanhte hpe tsun mu ai. Sape ni chyawm gaw kajawng ai hte hkrit mat ma ai rai nna, Minla mu ga ai nga nna myit nga ma ai. Yesu gaw, Nanhte hpa rai myit ung ang nga myit ta? Ngai nan rai nga nngai, Nye lata hte lagaw hpe yu yu mu: ngai hpe masawp yu mi; minla ngu ai gaw, ngai hpe nanhte mu ai zawn, ashan hte nrut nra rawng ai n rai, nga nna sape ni hpe tsun nhtawm, shi a lagaw lata ni shanhte hpe madun dan mu ai. Shanhte gaw nau kabu lai nna n kam lu ai majaw, mau let tsap nga ma ai. Dai rai nna Yesu gaw, Nang e shahpa lama mi lu myit ni ? ngu nna shanhte hpe san mu ai. 

Shaloi nga kakang daw mi shanhte shi hpe jaw sha mu ai. Shi gaw dai la nna, shanhte a man e sha dan nga ai. Shaloi Yesu gaw, Mawshe a tara hta, myihtoi ni a laika hte Shakawn Kungdawn Laika hta mung, ngai hpe sha-ang nna ka da ai lam mahkra dik wa na rai nna, nanhte hte rau ngai naw nga yang, ngai nanhte hpe tsun ai mungga a lachyum ndai rai nga ai, ngu nna shanhte hpe tsun mu ai. Shaloi Chyum Laika ga ni hpe chye na lu na matu, shi shanhte a myit hpaw ya nna, Hkristu gaw nni nkri hkam la nna, masum ya nhtoi hta si ai ni kaw na bai hkrung rawt wa na ra ai, ngu nna ka da ai lam hpe mung myit dum nga mu. Yerusalem mare hta e hkaw hpang nga mu: nanhte gaw ndai lam ni a sakse ni rai nga myit dai, ngu nna Yesu gaw shi a sape ni hpe tsun dat mu ai.

Ya hti ai gaw, Madu a Kabu Gara Shiga rai nga ai.

2018: PASKA LADAW HTA LABAN (2) SHANI NA MUNGGA

Bai hkrung rawt sai Madu Yesu gaw myit daw myit hten let hkrit tsang nna makoi nga ai Shi a sape ni hpang de du sa nna ngwi pyaw sim sa ai hpe jaw ya let Chyoi Pra ai Wenyi hpe jaw ya sai re. Dai aten kaw nna sape ni a myit hta ung ang ai lam ni, hkrit tsang ai lam ni hte myit daw hten ai lam ni mat mat nna, Shi Madu hpe sakse hkam let tara mungga ni hpe hkaw tsun hpang wa sai re.

Bai hkrung rawt sai Madu Yesu gaw sape ni hte rau nga ai zawn anhte a makau kaw mung nga ai hpe dum shai nna anhte a hkrit tsang ai lam ni, myit daw hten ai lam ni hpe lai di lu let, ngwi pyaw sim sa ai hpe hkam la lu u ga Shi Madu hpe anhte a prat hta hkap la lu na matu shakut shaja sa wa lu u ga.

HKRUNG RAWT SAI MADU HTA KAMSHAM AI

Marai rai gaw nang hpe myi pat kau ya nna, na a shawng e nga ai ‘ hka pung ’ hta hka rawng n rawng san ai ngu ga. Lama mi nang galaw lu ai gaw hka pung de du hkra sa nna dai hta hka rawng n rawng chyam yu na. Dai hpe gaw mahkrum madup hte sharin la ai ngu ai.

Kaga langai mi nang di lu na gaw nlung kasha la nna dai hte kabai bang dat yu na. Hka pung hte hkra ai nsen na jang hka n rawng ai hpe nang chye nna, kapruk ai nsen na yang gaw hka rawng nga ai hpe chye lu na. Dai gaw sawn sumru nna machye machyang lu la ai lam rai nga ai. Masum ngu na lam langai mung nga ai. Dai gaw marai rai hpe yu shangun nna, hka rawng ai n rawng ai hpe bai tsun shangun na. Dai zawn re chye na ai gaw kam sham ai lam rai nga ai.

Mahkrum madup, sawn sumru yu ai lam hte kam sham ai lam gaw ndai prat hta machye machyang lu la na lam masum rai nga ai. Anhte gaw hkam sha lu ai mahkrum madup ni hta anhte myit hte sawn sumru yu ai hte, anhte a kraw salum hta kam sham ai hku nna sharin la Nga ai kun? Hpaji chye ai ni tawt sawn da ai hku rai yang anhte machye machyang a 80% hpe masha ni tsun tawn da ai lam hpe kam sham ai hku na sharin la lu ai da.

Anhte hta na masha loi mi sha mungkan de bu hkawm yu na re. Mungkan labau (World History) sharin ai shaloi, mungkan hta mungdan law law nga nna shanhte a shara ni, nga ai amyu sha ni a lam ni hpe mung chye la nga ai. Kaja wa sha du yu sai masha ni chyu sha mu yu sai lam ni, shanhte a nga sa lam, htunghkying ni hpe atsawm tsun dan lu ai. Shanhte a mahkrum madup hpe tsun dan ai shaloi, kam sham nna, dai mungdan ni hpe myit shingran mu lu nga ai. Shanhte tsun dan ai a majaw anhte mung du yu sai zawn rai hkam sha lu chye nga ai.

Anhte a makam masham machye machyang law malawng mung Chyoipra ai chyum laika anhte hpe tsun dan ai hta kam sham ai kaw na lu la ai. Chyum laika hta rawng ai masha ni Madu Yesu hte hkrum zup lu ai, shi a prat magam bungli hte shi sharin shaga ai hpe tsun dan ai.

Yesu si hkam ai hpang shi a sape ni gaw grai myit n pyaw ai, myit daw hten mat ai, hte hkrit gari nna makoi hprawng hkawm mat ai hpe bai myit yu ga. Raitim, Paska Poi manap hta shanhte hta lama mi byin wa sai. Nachying lak lai ai hku nna shanhte galai shai wa sai. Shanhte kaja wa nan kabu gara ngwi pyaw ai hte pru sa nna hkrung rawt sai Madu Yesu a lam tsun hkawm ma ai. Shanhte zingri zingrat sat kau na pyi n hkrit n tsang ai sha myit sharawng awng wa sai. Ndai ta latsup mi sha re ai masha ni a prat hte hpaw tsun ai lam gaw shinggyim labau hpe galai shai shangun sai. Ndai hpaji n sharin yu ai masha ni Yesu a bai hkrung rawt ai hpe masu hkawm ai ngu ga, shanhte hta na marai rai gaw, zingri na, sat kau na hkrit nna hpaw tsun dan kau na nhten.

Raitim, kadai mung dai zawn n-galaw ai. Hkung rawt sai Madu hpe sakse hkam ai lam gaw kachyi mi pyi myit ung ang ai lam, myit kaji ai lam n nga ai hta n-ga, grau grau she n–gun ja, atsam marai rawng ai hte hkaw tsun wa masai. Mau hpa lamik kumla galaw lu ai atsam pyi lu la ma ai. Kasa Htawma galaw ai zawn Yesu a garep hta layung anhte n hkra lu ai, Yesu a hkrung rawt ai hpe sape ni zawn n hkam sha lu ai rai tim, Chyoipra ai chyum laika a sakse hkam ai hpe kam sham lu nga ai.

Sawn sumru mai ai lam; Madu Yesu si mat ai hpang hte bai hkrung rawt ai hpang na sape ni a mahkrum madup hpe myit sumru yu ga. Ya aten ngai na prat gaw gara madang hta rai nga ai kun? Yesu si mat ai hpang na kun? (snr) bai hkrung rawt ai Paska hpang na kun?

2018: PASKA LADAW HTA LABAN (2) SHANI NA CHYUM LAIKA

PASKA LADAW HTA LABAN 2
8th April 2018
CHYUM MUNGGA DAW 1

Kasa 4:32-35

Ya hti na gaw, Kasa Laika hta na rai nga ai.
Kam sham ai shawa hpung ting gaw myit mang langai sha rai nga ma ai: kadai mung, tinang lu ai arai hpe, nye a n tsun ai sha, yawng mayawng hpe jawm lang ma ai. Kasa ni mung Madu Yesu bai hkrung rawt ai lam hpe, atsam kaga hte sakse hkam ya ma ai rai nna, masha ni a man e shanhte mahkra myiman pa nga ma ai. Dai hta n-ga, hpung masha ni hta kadawn ai masha langai mi pyi n nga ai; kaning rai nme law, ga htingra lu ai ni, nta lu ai ni kadai mung, dai dut nna lu la ai gumhpraw hpe, kasa ni kaw sa ap ya ma ai. Dai rai nna, kadawn ai wa kadai hpe mung, rap shara nna, karan jaw karan ya ma ai.
Ya hti ai gaw, Karai Kasang a mungga rai nga ai.

CHYUM MUNGGA DAW 2

1Yawhan 5:1-6

Ya hti na gaw, Kasa Yawhan shagun dat ai laika langai hta na rai nga ai.
Tsawra ai ni e, Yesu gaw dai Hkristu nan rai nga ai, nga nna kam sham ai wa kadai rai timung, Karai Kasang a kasha rai nga ai. Kawa hpe tsawra ai wa gaw, Kawa e shaprat ai kasha mahkra hpe tsawra nga ai. Karai Kasang hpe tsawra ai hte, Shi hkang da ai ga hpe hkan shatup yang gaw, Karai Kasang a kashu kasha ni hpe anhte tsawra nga ga ai hpe chye lu ga ai. Kaning rai nme law, Karai Kasang hkang da ai ga hpe hkan shatup ai gaw, Shi hpe tsawra ai lam madung rai nga ai. Shi hkang da ai ga mung yak la nga ai n rai: hpa majaw nga yang, Karai Kasang a kasha kadai rai ti mung, mungkan ga hpe dang kau nu ai. Mungkan ga hpe dang kau lu ai padang lam gaw anhte a makam masham rai nga mali ai.Kaning rai nme law, mungkan ga hpe kadai wa dang kau lu a ta? Yesu gaw Karai Kasang a Kasha rai nga ai hpe kam sham ai wa chyu sha, mungkan ga hpe dang kau lu ai. Dai Yesu Hkristu gaw hka hte mung, sai hte mung sa du ai wa nan rai nga ai; hka hte sha n rai, hka hte mung sai hte mung Shi sa du nga ai. Chyoi Pra ai Wenyi mung tenman ai npawt rai nga ai majaw, dai wenyi nan shi a matu sakse hkam ya nga ai.
Ya hti ai gaw, Karai Kasang a mungga rai nga ai.

KABU GARA SHIGA

Yawhan 20:19-31

Ya hti na gaw, Yawhan a laika hta na Kabu Gara Shiga rai nga ai.
Dai laban bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sayang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape ni mung Madu hpe mu lu yang, kabu gara nga ma ai. Bai, Yesu gaw, Nanhte ngwi pyaw nga myit ga; nye a Wa ngai hpe shangun dat ai hte maren, ngai mung nanhte hpe shangun dat made ai, ngu mu ai. Shing nga nhtawm sape ni a ntsa e nsa kawut nna, Chyoi Pra ai Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara hpe rai ti mung, nanhte shagun da yang gaw, dai mara naw nga na ra ai, ngu nna shanhte hpe tsun wu ai. Shing rai Yesu sa du ai shaloi, kasa shi lahkawng hta lawm ai, Marun Ma ngu ai Htawma gaw, shanhte hte rau n nga ang ai. Dai rai nna kaga sape ni shi hpe, Anhte gaw Madu hpe mu lu saga ai, ngu nna tsun dan mu ai. Htawma shyawm gaw, Shi a lata hta hpri hkang hpe ngai n mu, dai hpri hkang hta nye a layung n shawn yu, yang gaw, ngai n kam nngai, nga nna shanhte hpe tsun wu ai.
Dai hpang matsat ya du jang, Yesu a sape ni nhku e bai hpawng nga ma ai rai nna, Htawma mung shanhte hte rau lawm nga ai. Chyinghka la da ti mung, Yesu sa du nna, shanhte a ka-ang e tsap let, Nanhte ngwi pyaw nga myit ga law, ngu wu ai. Shaloi, shi gaw Htawma hpe, na a layung nang de ladawn nna, Nye a lata hpe yu yu u; na a lata ladawn nna Nye a karep hta bang yu u; n kam n sham ai myit hpe kau da nna, kam sham u, ngu wu ai. Dai rai nna, Htawma gaw, nye a Madu, nye a Karai rai nga ndai, ngu nna shi hpe htan wu ai. Yesu gaw, Htawma, nang ngai hpe mu lu ai majaw, kam sham nit dai; n mu lu ti mung kam sham ai ni gaw ‘a’ lu ma ai, ngu nna shi hpe tsun wu ai. Ndai laika hta n ka da ai lamik kumla kaga law law mung, Yesu gaw shi a sape ni a man e galaw dan nu ai; rai ti mung, Yesu gaw Karai Kasang a Kasha hte dai Hkristu nan rai nga ai hpe kam sham nna, Shi a amying ningsang a marang e asak hkrung ai lu la myit ga, nga nna ndai hte wa ka tawn nga ai.
Ya hti ai gaw, Madu a Kabu Gara Shiga rai nga ai.