2024: PASKA LADAW LABAN (5) NA MUNGGA

Dai ni na kabu gara shiga hta Hkristu Madu hte anhte a lapran tawn da ra ai mahku mara, kanawn mazum lam hpe hpaw tsun dan ai. Sabyi hkai ai wa gaw Kawa Karai Kasang, sabyi ru gaw kasha rai nna anhte ni gaw lakung lakying ni rai nga ai lam sharin ya sai. Asi n si ai lakung shagu hpe gaw krum kau na rai nga ai. Akyu n pru ai hpa lam hpe mung n galaw na rai nga ai. Asi si ai lakung shagu hpe pyi asi grau si u ga nga tsan kau na rai nga ai. 

Hkristu Madu hte grau ni htep ai hte nga lu na matu anhte ni gaw n hkru n kaja ai kyang lai len ni hpe koi yen kau ra nga ai. Tinang a n kaja ai lam de sa mayu ai anhte a myit ni hpe shadip kau nna Madu Yesu hta sha myit machyu let sak prat hpe lachyum pru ai, kabu pyaw ai hta hkawm sa lu na rai nga ai. Lai wa sai aten hta Hkristan ni hpe zingri zingrat ai kaw nna hpang e Hkristu a sape kaba tai wa ai san Pawlu a galai shai wa ai prat hkrun lam gaw ya tsun taw nga ai sharin ya ai lam a matu kaja dik ai ga shadawn rai sai. Shi gaw Hkristu Madu a hpang hkan nang ai ten ru yak jam jau amyu myu hpe hkam sharang nna, hpang jahtum shi a asak hpe pyi ap nawng kau sai. “ngai hte hka jang, nanhte hpa mung n galaw lu myit dai” nga nna Hkristu tsun ai mungga gaw jaw la nga ai.

Asi si ai rai yang pyi,hpun ru madung re ai Madu a majaw sha rai nga ai. Hpu reng dik ai asi gaw Karai Kasang hte htingbu wa hpe tsaw ra ai lam nan rai sai. Hkristu Madu hte rau galoi mung ani sha nga let Karai Kasang a mungdan a matu asi law law si lu na matu shaman chyeju ni hpe hpyi la saga!

2024: PASKA LADAW LABAN (5) NA CHYUM LAIKA

PASKA LADAW HTA LABAN 5
April 28, 2024
CHYUM MUNGGA DAW 1

Kasa 9:26-31

Ya hti na gaw, Kasa laika hta na rai nga ai.
Sawlu gaw Yerusalem de du wa jang, sape hpung hta shang lawm maw ai, rai ti mung, shi Nawku hpung de hkrak kayin shang wa sai hpe n kam ma ai majaw, sape ni yawng shi hpe hkrit da mu ai. Barnaba chyawm gaw shi hpe kasa ni hpang de woi wa ai rai nna, Sawlu hkawm sa wa nga yang Yesu Madu shi kaw dan pru nna, ga tsun ai lam hpe mung, Damasku mare hta Yesu a amying nsang gang nna, nden ja ai myit hte shi hkaw dan ai lam hpe mung, kasa ni hpe hkai dan wu ai. Shing rai Sawlu gaw sape ni hte rau nga nga nna, Yerusalem mare e n dut n dang hkawm nga let, Madu a mying nsang gang nna, nden ja ai myit hte hkaw tsun nga ai. Greka ga shaga ai Yuda masha ni hte shi ndang hkat nga ai rai nna, 30Dai lam hpe hpu nau ni chye jang, Sawlu hpe Kesare mare de woi sa nna, Tarshu de shangun dat mu ai. Dai nhtoi hte hta e, Yuda mung, Galile mung hte Samari mung hkan e nga ai Hpung gaw, ngwi pyaw simsa ai hte hpung masha ni hpe sharin shaga madi shadaw ya ma ai. Shin rai Madu hpe hkrit hkungga ai hte Chyoi Pra ai Wenyi a shalan shabran ai hpe hkam la nna, Yesu a lam hta hkawm sa let, shanhte law htam wa ma ai.
Karai Kasang a Mungga rai nga ai.

CHYUM MUNGGA DAW 2

1 Yawhan 3:18-24

Ya hti na gaw, Kasa Yawhan shagun dat ai laika langai hta na rai nga ai.
Ngai shu ngai sha ni e, N-gup ga tsun ai hku chyu sha n rai, mai kaja ai amu bungli hpe hkan galaw ai hku nna sha, tsawra ai myit majing hpe anhte madun dan ra ga ai.  Dai hku hkan galaw jang she, anhte gaw tengman ai a kashu kasha ni rai nga ga ai hpe chye lu ga ai. Shing rai, anhte a myit anhte hpe mara shagun yang gaw, Karai Kasang anhte a myit hta grau kaba ai hte, yawng mayawng hpe chye chyang nga ai majaw, Shi a man e jasim ya lu ga ai. Tsawra ai ni e, anhte a myit anhte hpe mara n shagun yang gaw, nden ja ai myit the Karai Kasang a man de shang wa lu ai rai nna, anhte hpyi mahpyi hte hpe shi kaw nna lu la na ga ai; hpa majaw nga yang, Karai Kasang hkang da ai ga hpe hkan shatup nga ga ai hte, Shi a man e sharawng awng ai amu hpe galaw nga ga ai.
Shi anhte hpe hkang da ai ga gaw ndai rai nga ai: Shi a Kasha Yesu Hkristu hpe kangka ai hte kam sham lu na hte, Madu Yesu tsun da ai hte maren shada da tsawra lu na myit dai. Shi hkang da ai ga hpe hkan shatup ai gaw, Shi hta e a nga nga ai rai nna, Shi mung dai wa hta e a nga nga ai: Shi anhte hpe jaw da ai Wenyi a majaw, anhte hta e Shi a nga nga ai hpe anhte chye lu ga ai.
Karai Kasang a Mungga rai nga ai.

KABU GARA SHIGA

Yawhan 15:1-8

Ya hti na gaw, Yawhan a laika hta na Kabu Gara Shiga rai nga ai.
Yesu gaw Shi a sape ni hpe tsun mu ai gaw: Ngai gaw tsabyi ru madung rai nga nngai, nye Wa gaw tsabyi sun madu rai nga ai. Ngai hta asi n si ai lakung shagu hpe Shi krum kau wu ai: asi si ai lakung shagu hpe chyawm gaw, asi grau si lu u ga, tsan kau ya wu ai.3Nanhte chyawm gaw, ngai nanhte hpe tsun dan ai Mungga a majaw, ya e pyi asan apra rai nga manit dai. Ngai hta noi nga mu, ngai mung nanhte hta noi nga na nngai. Tsabyi lakung gaw tsabyi ru madung hta n noi yang gaw, shi chyu sha asi n si lu ai zawn, nanhte mung ngai hta n jung n noi yang gaw asi n si lu na myit dai.
Ngai gaw tsabyi ru madung rai nga nngai; nanhte gaw lakung lakying ni rai nga myit dai. Masha kadai mung ngai hta noi nga nna, ngai mung dai wa hta noi nga ai rai yang gaw, dai wa gaw asi law law si wa lu ai: kaning rai nme law, ngai hte hka jang nanhte hpa mung n galaw lu myit dai. Ngai hta n jung n noi ai wa gaw, hkraw mat ai lakung lakying hpe zawn kabai kau ai hkrum na ra ai, dai hkraw mat ai lakung lakying ni hpe masha ni e magawn la nhtawm, wan hta kabai nat kau ma ai. Nanhte ngai hta noi nga nna, nye a Mungga mung nanhte hta noi nga ai rai yang gaw, nanhte hpa hpyi mayu yang hpyi mu: hpyi ai hte maren, nanhte hpe madat ya na ra ai. Nye Wa a hpung shingkang dan hkung wa na matu, nanhte asi law law si wa na ra ai; shaloi, nye a sape ni teng teng tai wa na myit dai.
Madu a Kabu Gara Shiga rai nga ai.

2024: PASKA LADAW LABAN (4) NA MUNGGA

Ndai laban hta, Hkristu Madu gaw Sagu rem wa kaja marai mi a prat hte Shi a hkum shadawn nna anhte hpe hpaw tsun dan nga ai. Shawng nnan, tinang a asak hpe pyi sum mat ai du hkra sagu rem sin ai hpe tsun dan ai. Dai zawn ap nawng lu na matu kaga/kadai a shadutai lam mung n-nga, tinang hkum nan a myit ai hte maren galaw sa ai. Jinghku wa/manang wa a matu tinang a asak ap nawng kau na jin jin re ai lam gaw tsawra myit hpe sak se hkam ai lam rai sai. Lahkawng ngu na hta, lahkawng maga a hku hkau kanawn mazum ai lam rai sai. Dai gaw, Kawa hte Shi Madu a hku hkau ai lam hpe madun ai. Sagu rem wa gaw sagu ni hpe chye ai zawn sagu ni mung shanhte a sagu rem wa hpe chye ma ai. Tingkyeng myit machyu ai ningbaw wa hta n dai lam ni n nga ai. Hpang jahtum hta, kaja ai sagu rem wa a sagu ni a n tsa tawn da ai myit masa hpe anhte kasi hta la na matu rai nga ai. Shinggyim masha yawng Karai Kasang a mungdan hta shang lawm lu na gaw dai ni na kabu gara shiga a sharin ya mayu ai lam rai sai.

Anhte ni kaw nna asak prat a mahtai hpe Karai Kasang hta tam ai rai tim, n kau mi chyawm gaw sut su nga mai ai, gum hkawng ai, ahkang aya lu ai zawn re ai lam ni hta, shut shai ai masa hte tam hkawm nga ai. Grau nna myit n pyaw hpa lam gaw, Karai Kasang hta prat a lachyum tam ai shada da, Hkristu hpe Madu re ngu hkap la kam sham ai ni shada da hta pyi shai hkat nga ai hpe dai ni anhte mu lu nga ai. Karai Kasang a tsawra matsan dum ai hta zim lum rap ra ai the sak hkrung hkawm sa ra ai anhte ni hta shai hkat ai majaw masha kaga ni a matu N kaja ai kasi n byin na matu said sahka ai hte hkawm sa wa ga law!

2024: PASKA LADAW LABAN (4) NA CHYUM LAIKA

PASKA LADAW HTA LABAN 4
Sagu Rem Wa Kaja Laban
April 21, 2024
CHYUM MUNGGA DAW 1

Kasa 4:8-12

Ya hti na gaw, Kasa laika hta na rai nga ai.
Yuda masha ni a hkinjawng agyi ni, du salang ni hte sara ni gaw, Yerusalem mare e nga nna, Kasa Petru yan Yawhan hpe san yu ma ai. Shaloi, Petru gaw Chyoi Pra ai Wenyi hte hpring nga nna, shanhte hpe tsun mu ai gaw: Mung masha ni a du agyi salang ni e, Ndai lagaw hten ai wa hpe matsan dum garum ai amu hte, shi kaning rai mai wa lu ai lam hpe, dai ni e an hpe san jep yu ai rai yang gaw, nanhte hte Israela amyu yawng the hpe, ngai kabu gara ai hte tsun dan made ga: nanhte udang hte jen sat kau nna, Karai Kasang e si ai ni kaw na jahkrung sharawt la ai, Nazaret wa Yesu Hkristu a amying ningsang hte, ndai wa gaw nanhte a man e amai atsai tsap nga ai. Dai Yesu gaw, nanhte nta gaw ai ni lata kau ai nlung rai nga ti mung, ningjut jahtum na nlung tai wa sai. Shi hta kaga hkye hkrang la ai lam n nga sai; kaning rai nme law, ndai ga ntsa e masha ni hpe jaw ai amying shingteng mahkra hta na, Yesu ngu ai mying hta kaga, anhte hpe hkye hkrang la lu ai amying ningsang shaje kanang mung n nga sai.
Ya hti ai gaw, Karai Kasang a mungga rai nga ai.

CHYUM MUNGGA DAW 2

1 Yawhan 3:1-2

Ya hti na gaw, Kasa Yawhan shagun dat ai laika langai hta na rai nga ai.
Ngai shu ngai sha ni e, Wa Karai Kasang gaw anhte hpe gade wa tsawra da mi hka! Karai Kasang a kashu kasha ni ngu nna anhte hpe shamying da mi ai; dai the maren Shi a Kasha ni nan anhte rai nga ga ai. Mungga gaw shi hpe n hkap la ai majaw, anhte hpe mung n hkap la nga ai. Tsawra ai ni e, Karai Kasang a kasha ni anhte ya e rai nga ga ai, rai ti mung, htawm hpang e anhte hpa mi tai wa na ga ai hpe garai n shadan dan nga ai; dai hpe shadan dan ai shaloi, Madu Karai Wa hte bung na ga ai hpe sha anhte chye nga ga ai; kaning rai nme law, Shi hkum hpe nan anhte mu lu na ga ai.
Karai Kasang a Mungga rai nga ai.

KABU GARA SHIGA

Yawhan 10:11-18

Ya hti ai gaw, Kasa Yawhan a laika hta na Kabu Gara ai Shiga rai nga ai.
Yesu tsun ai gaw: Ngai gaw kaja ai sagu rem wa rai nga nngai: kaja ai sagu rem wa gaw, sagu ni a matu tinang a asak nawng ya kau ai. Nchyang wa chyawm gaw, sagu rem wa majing, n re ai hte, sagu ni hpe n madu ai majaw, chyahkyawn sa wa ai hpe mu jang, sagu ni hpe kau da nna hprawng mat wa chye ai; chyahkyawn mung sagu ni hpe amya sha nna, shabra kau nga ai. Dai wa gaw nchyang sha rai nga ai majaw, sagu ni a matu n tsang ai rai nna, hprawng mat wa ai. Ngai gaw kaja ai sagu rem wa rai nga nngai: nye a Wa gaw ngai hpe chye ai hte, ngai mung Wa hpe chye nngai zawn, nye a sagu ni hpe ngai chye nngai, nye a sagu ni mung ngai hpe chye ma ai. Dai sagu ni a matu mung nye a asak nawng ya kau nngai.
Ndai lawng hta n lawm ai sagu kaga mung ngai naw lu nngai. Dai sagu ni hpe mung ngai woi wa nna, shanhte nye a nsen hpe madat na mara ai; shaloi sagu hpung langai sha, sagu rem wa langai sha rai na ra ai. Ngai gaw nye a asak hpe bai lu la u ga ngu nna, asak nawng ya kau nngai majaw, nye Wa ngai hpe tsaw ra nga ai. Kadai rai ti mung nye a asak hpe kashun la kau lu ai n rai; nye a myit hte ngai nawng ya kau nngai. Nye a asak hpe nawng kau ya na ahkang hte, bai lu la na ahkang ngai lu nngai; ndai gaw, nye a Wa ngai hpe hkang da ai majaw rai nga ai.
Madu a Kabu Gara Shiga rai nga ai. 

2024: PASKA LADAW LABAN (3) NA MUNGGA

Dai ni na kabu gara shiga gaw hkrung rawt sai Madu Yesu a lam hpe bai kahtap nna shadum ya ai lam rai sai.Hkristu bai hkrung rawt ai mabyin hpe kam sham lu na matu yak la nga ai sape ni hpe hkum hkrang kaw nna n ma hkang hpe madun let ahtawk hkra ya na matu matsun ai hte lu sha hpe pyi sha sai. Shawng de malu masha jaw sha ai wa she ya gaw lu sha hpyi taw nga sai. Lu sha rau sha ai gaw shanhte a kanawn mazum hku hkau ai lam hpe madun sai. Ahtawk hkra ai lam mung lachyum nga ai.

Lata gin dun shakram ai, lahpa hpe apuk ya ai gaw myit daw myit hten nga ai aten hta n-gun jaw ya ai lam rai sai. Ahtawk hkra ai lam hta ga si/hkum n ra ai sha hkam sha lam hpe shapraw ya nga ai. Chyoi pra hkum hpe hkam la ai shaloi Madu Hkristu hte hkrum hkra lu ai rai nna dai hta e anhte prat nnan lu la na matu akyu hpyi ga ai. Mara a n sin htawng kaw nna san seng ai prat de galai shai wa lu na matu akyu hpyi ai. Dai hte maren, kau da hkrum ai ni a prat hpe anhte hkum hkra chye ya na myit rawng wa na matu akyu hpyi ai.

Shanhte a ntsa anhte tawn da ai tsawra matsan dum myit gaw gyit hkang da ya ai lam yawng hkra kaw nna shalawt ya ai N’htoi tai na matu anhte myit mada ai. Ndai Paska poi ladaw hta hkrum hkra ai lam hpe grau nna chye na hkam sha ai hte anhte hkum nan a galai shai wa na hta n-ga, anhte hte hkrum zup kanawn nga ai ni a prat hpe mung galai shai ya u ga anhte akyu jawm hpyi ga law!

2024: PASKA LADAW LABAN (3) NA CHYUM LAIKA

PASKA LADAW HTA LABAN 3
April 14, 2024
CHYUM MUNGGA DAW 1

Kasa 3:13-15, 17-19

Ya hti na gaw, Kasa laika hta na rai nga ai.
Petru gaw shawa masha ni hpe tsun ai gaw: Israela masha ni e, Abraham, Isak hte Yaku a Karai Kasang nga ai, anhte a ji wa ni a Karai Kasang gaw, Shi a Shangun Ma Yesu hpe yawng mayawng hta grau ai hpung shingkang jaw ya nu ai: nanhte mahtang dai Yesu hpe ap kau myit dai rai nna, Pilatu shi hpe dat kau na myit da yang, nanhte gaw Pilatu a man e dai wa hpe nyet kau myit dai. Dai chyoi pra ai hte ding hpring ai wa hpe nanhte mara shagun da nna, masha sat ai wa hpe mahtang hpyi la nhtawm, asak Madu hpe nan sat kau myit dai. Karai Kasang chyawm gaw si ai ni kaw na shi hpe jahkrung sharawt la nu ai: anhte mung dai lam a sakse ni rai nga ga ai.
Ya rai ti mung, hpu nau ni e, nanhte hte nanhte a du salang ni dai lam hpe n chye nna galaw kau ai hpe ngai chye nga nngai. Dai gaw, Karai Kasang a Hkristu nni nkri hkrum na ra ai nga nna, myihtoi ni yawng a n-gup hte, Karai Kasang shi nan tau tsun ai lam hpe hkan shadik ai rai nga ai. Dai rai nna, nanhte a shut hpyi mara raw mat na matu, myit malai lu nna, Karai Kasang hpang de kayin wa marit, ngu nna Petru hkaw tsun dan wu ai 
Karai Kasang a Mungga rai nga ai.

CHYUM MUNGGA DAW 2

1 Yawhan 2:1-5

Ya hti na gaw, Kasa Yawhan shagun dat ai laika langai hta na rai nga ai.
Ngai shu ngai sha ni e, nanhte shut hpyit mara n galaw myit ga, ndai shadum ai ga nanhte hpe ka dat nngai. Rai ti mung, masha langai ngai mara galaw hkrup saying gaw, Kawa a man e anhte a matu htinglu htinglai ya ai wa anhte lu ga ai: dai wa gaw Yesu Hkristu ngu ai, ding hpring ai Madu rai nga ai. Dai Yesu Madu gaw anhte a mara hpe la kau ya ai gawng malai hkungga rai nga ai; anhte a mara hpe sha n rai, mungkan ting a mara hpe mung shi gun la kau ya ai. Karai Kasang hkang da ai ga hpe anhte hkan shatup yang gaw, Shi hpe chye chyap nga ai hpe anhte chye lu ga ai. Ngai shi hpe chye chyap nngai nga nna, marai langai ngai tsun ti mung, Karai Wa hkang da ai ga hpe n hkan shatup yang, dai wa gaw tengman ai hpe n hkap la ai majaw, masu ai wa rai nga ai. Kadai rai ti mung, Karai Kasang a mungga hkan yang gaw, Madu a tsaw ra ai lam dai wa hta e kaja wa teng teng hkum tsup wa salu ai.
Karai Kasang a Mungga rai nga ai.

KABU GARA SHIGA

Luka 24:35-48

Ya hti na gaw, Luka a laika hta na Kabu Gara Shiga rai nga ai.
Yesu bai hkrung rawt ai shani e sape lahkawng gaw Ema-u mare de sa wa ma ai. Yerusalem mare de bai wa nhtawm, shan sa wa nga yang byin ai lam ni hte, muk ahkyep karan jaw ai shaloi Yesu re ai chye lu ai hpe mung, kasa shi langai hpe tsun dan ma ai. Dai lam hte hpe shanhte jawm tsun nga yang, Yesu hkum nan shanhte a  ka-ang e tsap nga nna, Nanhte ngwi pyaw nga myit ga, ngu nna shanhte hpe tsun mu ai. Sape ni chyawm gaw kajawng ai hte hkrit mat ma ai rai nna, Minla mu ga ai nga nna myit nga ma ai. Yesu gaw, Nanhte hpa rai myit ung ang nga myit ta? Ngai nan rai nga nngai, Nye lata hte lagaw hpe yu yu mu: ngai hpe masawp yu mi; minla ngu ai gaw, ngai hpe nanhte mu ai zawn, ashan hte nrut nra rawng ai n rai, nga nna sape ni hpe tsun nhtawm, shi a lagaw lata ni shanhte hpe madun dan mu ai. Shanhte gaw nau kabu lai nna n kam lu ai majaw, mau let tsap nga ma ai. Dai rai nna Yesu gaw, Nang e shahpa lama mi lu myit ni ? ngu nna shanhte hpe san mu ai.  
Shaloi nga kakang daw mi shanhte shi hpe jaw sa mu ai. Shi gaw dai la nna, shanhte a man e sha dan nga ai. Shaloi Yesu gaw, Mawshe a tara hta, myihtoi ni a laika hte Shakawn Kungdawn Laika hta mung, ngai hpe sha-ang nna ka da ai lam mahkra dik wa na rai nna, nanhte hte rau ngai naw nga yang, ngai nanhte hpe tsun ai Mungga a lachyum ndai rai nga ai, ngu nna shanhte hpe tsun mu ai. Shaloi Chyum Laika ga ni hpe chye na lu na matu, shi shanhte a myit hpaw ya nna, Hkristu gaw yubak nni nkri hkam la nna, masum ya nhtoi hta si ai ni kaw na bai hkrung rawt wa na ra ai, ngu nna ka da ai lam hpe mung myit dum nga mu. Yerusalem mare hta e hkaw hpang nga mu: nanhte gaw ndai lam ni a sakse ni rai nga myit dai, ngu nna Yesu gaw shi a sape ni hpe tsun dat mu ai.
Madu a Kabu Gara Shiga rai nga ai.

2024: PASKA LADAW LABAN (2) NA MUNGGA

Ngwi pyaw simsa ai gaw nanhte hte rau a nga nga u ga” ngu ai shakram ga gaw hkrung rawt sai Hkristu a kabu pyaw ai shakram ga rai sai. Ru yak jam jau hkrum nga ai aten Madu Yesu hpe kau da nna hprawng mat ai majaw yawn hkyen myit kaji nga ai sape ni hpe tinang kaw nna mara dat hkyem sa jaw ya ai lam madun dat ai rai sai. Madu Yesu hpe anhte kasi la ra ga ai. Prat hkrun lam hta yawn hpa lam, dingbai dingna hkrum ai lam kaw na lawt ai mi kadai n nga ai. Kabai da hkrum ai, adip arip hkrum ai shaloi anhte ni kaning rai bai htang galaw sai kun? Pawt sindawng ai hte kun? Matai bai htang ai hte kun? Zim rai nna nga let kun?

Dai masha ni a n tsa manawn masham tsun shabrawng let kun, machyi hkrum hkra bai galaw ai hte kun? N myit mada ai aten ni hta kalang ta bai htang ai shaloilahta e tsun ai zawn mai byin nga ai. Rai tim, myit sawn sumru yu nna bai htang galaw ai shaloi, masa lam ni hpe atsawm sha maram lu nna grau mai kaja ai hpe lata la lu na rai nga ai. Madu Yesu gaw sape ni a ntsa grai myit kaba ai hte bai htang galaw sai. Sape ni gaw shi Madu a matu hku hkau dik ai jinghku ni rai nna, n-gun atsam marai n rawng tim, masha kaja ni, shagrit shanem let nga sa chye ai ni re majaw, Sasana magam hpe gun hpai na matu myit jin jin rai nga ai majaw Madu Yesu gaw matut sawn tawn da sai.

Ndai laban hta sharin la mai ai gaw hkrung rawt sai Madu the hkrum zup ai shaloi anhte a sak prat galai shai lu na lam rai sai. Madu Yesu kaw nna mara raw chye madat ya ai hpe anhte hkam la lu sai majaw anhte ni mung manang wa a ntsa dai hte maren mara raw, hkyem sa jaw, chye na ya n matu shakut sa wa ga law!

2024: PASKA LADAW LABAN (2) NA CHYUM LAIKA

PASKA LADAW HTA LABAN 2
Divine Mercy Sunday
April 7, 2024
CHYUM MUNGGA DAW 1

Kasa 4:32-35

Ya hti na gaw, Kasa Laika hta na rai nga ai.
Kam sham ai shawa hpung ting gaw myit mang langai sha rai nga ma ai: kadai mung, tinang lu ai arai hpe, nye a n tsun ai sha, yawng mayawng hpe jawm lang ma ai. Kasa ni mung Madu Yesu bai hkrung rawt ai lam hpe, atsam kaga hte sakse hkam ya ma ai rai nna, masha ni a man e shanhte mahkra myiman pa nga ma ai. Dai hta n-ga, hpung masha ni hta kadawn ai masha langai mi pyi n nga ai; kaning rai nme law, ga hting-ra lu ai ni, nta lu ai ni kadai mung, dai dut nna lu la ai gumhpraw hpe, kasa ni kaw sa ap ya ma ai. Dai rai nna, kadawn ai wa kadai hpe mung, rap shara nna, karan jaw karan ya ma ai.
Karai Kasang a Mungga rai nga ai.

CHYUM MUNGGA DAW 2

1 Yawhan 5:1-6

Ya hti na gaw, Kasa Yawhan shagun dat ai laika langai hta na rai nga ai.
Tsawra ai ni e, Yesu gaw dai Hkristu nan rai nga ai, nga nna kam sham ai wa kadai rai timung, Karai Kasang a kasha rai nga ai. Kawa hpe tsawra ai wa gaw, Kawa e shaprat ai kasha mahkra hpe tsawra nga ai. Karai Kasang hpe tsawra ai hte, Shi hkang da ai ga hpe hkan shatup yang gaw, Karai Kasang a kashu kasha ni hpe anhte tsawra nga ga ai hpe chye lu ga ai. Kaning rai nme law, Karai Kasang hkang da ai ga hpe hkan shatup ai gaw, Shi hpe tsawra ai lam madung rai nga ai. Shi hkang da ai ga mung yak la nga ai n rai: hpa majaw nga yang, Karai Kasang a kasha kadai rai ti mung, Mungkan ga hpe dang kau nu ai. Mungkan ga hpe dang kau lu ai padang lam gaw anhte a makam masham rai nga mali ai. Kaning rai nme law, mungkan ga hpe kadai wa dang kau lu a ta? Yesu gaw Karai Kasang a Kasha rai nga ai hpe kam sham ai wa chyu sha, mungkan ga hpe dang kau lu ai. Dai Yesu Hkristu gaw hka hte mung, sai hte mung sa du ai wa nan rai nga ai; hka hte sha n rai, hka hte mung sai hte mung Shi sa du nga ai. Chyoi Pra ai Wenyi mung tenman ai npawt rai nga ai majaw, dai wenyi nan shi a matu sakse hkam ya nga ai.
Karai Kasang a Mungga rai nga ai.

KABU GARA SHIGA

Yawhan 20:19-31

Ya hti na gaw, Yawhan a laika hta na Kabu Gara Shiga rai nga ai.
Dai laban bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sayang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape nimung Madu hpe mu lu yang, kabu gara nga ma ai. Bai, Yesu gaw, Nanhte ngwi pyaw nga myit ga; nye a Wa ngai hpe shangun dat ai hte maren, ngai mung nanhte hpe shangun dat made ai, ngu mu ai. Shing nga nhtawm sape ni a ntsa e nsa kawut nna, Chyoi Pra ai Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara hpe rai ti mung, nanhte shagun da yang gaw, dai mara naw nga na ra ai, ngu nna shanhte hpe tsun wu ai. Shing rai Yesu sa du ai shaloi, kasa shi lahkawng hta lawm ai, Marun Ma ngu ai Halma gaw, shanhte hte rau n nga ang ai. Dai rai nna kaga sape ni shi hpe, Anhte gaw Madu hpe mu lu saga ai, ngu nna tsun dan mu ai. Htawma chyawm gaw, Shi a lata hta hpri hkang hpe ngai n mu, dai hpri hkang hta nye a layung n shawn yu, yang gaw, ngai n kam nngai, nga nna shanhte hpe tsun wu ai.
Dai hpang matsat ya du jang, Yesu a sape ni nhku e bai hpawng nga ma ai rai nna, Htawma mung shanhte hte rau lawm nga ai. Chyinghka la da ti mung, Yesu sadu nna, shanhte a ka-ang e tsap let, Nanhte ngwi pyaw nga myit ga law, ngu wu ai. Shaloi, shi gaw Htawmahpe, na a layung nang de ladawn nna, Nye a lata hpe yu yu u; na a lata ladawn nna Nye a karep hta bang yu u; n kam n sham ai myit hpe kau da nna, kam sham u, ngu wu ai. Dai rai nna, Htawma gaw, nye a Madu, nye a Karai rai nga ndai, ngu nna shi hpe htan wu ai. Yesu gaw, Htawma, nang ngai hpe mu lu ai majaw, kam sham nit dai; n mu lu ti mung kam sham ai ni gaw a lu ma ai, ngu nna shi hpe tsun wu ai. Ndai laika hta n ka da ai lamik kumla kaga law law mung, Yesu gaw shi a sape ni a man e galaw dan nu ai; rai ti mung, Yesu gaw Karai Kasang a Kasha hte dai Hkristu nan rai nga ai hpe kam sham nna, Shi a amying ningsang a marang e asak hkrung ai lu la myit ga, nga nna ndai hte wa ka tawn nga ai.
Madu a Kabu Gara Shiga rai nga ai.

2024: PASKA POI SHANI NA MUNGGA

Kalang lang e, kabu gara shiga kaw nna n dum shai ai lam langai ngai gaw mabyin masa kaba langai mi hpe chye na lu na matu lachyum jaw ya ai. Dai ni na kabu gara shiga hta, Madu Yesu a lup de sa ai num sha ni gaw, dailup hpe pat da ai Nlung sit mat nga ai hpe sa mu ai, nga ai. Dai gaw, Hkristu Madu a bai hkrung rawt ai lam gaw shinggyim masha hte Karai Kasang lapran din tawn da ai shakum the bung ai N lung kaba gaw sit mat nna Karai Kasang hpang de sa ai lam re ai Hkristu a lam gaw asan awang hpaw malang mat ai lachyum hte bung nga ai. Sin nga ai gawk na hku wat hpe hpaw dat ya nhtawm Karai Kasang a ninghtoi hpe hpring tup shangun ai hte ma bung ai.

Paska poi gaw, anhte a matu Nawku Hpung a prat hkrun lam hta hkrung rawt sai Hkristu hte grau ni htep na matu bai galaw ya ai. Dai zawn Madu hte mahku mara bai tawn da lu ai lam gaw anhte hpe grau kaja shangun ai hta n-ga, san seng ai hte agrin nga na lam rai sai. Hkristu Madu a ga ndat ni, ga shadawn ni yawng gaw anhte a matu rai nna anhte a lam hpaw tsun dan ya ai. Chyoi pra ai wenyi yu hkrat ai a marang e, nnan bai hpan da hkrum ai kasa ni zawn, Hkristu Madu a bai hkrung rawt ai a marang e anhte mung dai mahkrum madup hpe lu la mai nga ai. Paska poi a awng padang gaw shut hpyit mara a gyit hkang da ai kaw nna anhte hpe shaw la sai.

Hkristu Madu a N’htoi de anhte sit shang wa ai lam n-nga ai sha shut hpyit mara krung kata na pru wa na matu hkrit tsang nga ai rai yang Paska poi gaw anhte a matu lachyum n nga na re. Anhte ni gaw tinang a prat hpe tinang hkum nan gaw gap na, jahten kau na lata la mai nga ai, lata la ra nga ai. Anhte ni gaw, shut hpyit mara a majaw htani htana hkrat sum mat na hte ging dan nga ai rai tim, Yesu Hkristu a bai hkrung rawt ai hkring htawng hpe lu la sai majaw htani htana prat de hkye la hkrum na hpe myit mada lu saga ai. Dai gaw Paska poi a kabu gara shiga nan rai nga sai.

2024: PASKA POI SHANI NA CHYUM LAIKA

PASKA POI SHANI YESU BAI HKRUNG RAWT AI NHTOI
March 31, 2024
CHYUM MUNGGA DAW 1

Kasa Laika 10:34a, 37-43

Ya hti na gaw, Kasa Laika hta na rai nga ai.
Roma hpyen du Korinliu a nta e, Petru ga hpaw nna, shanhte hpe hkaw tsun dan ai gaw. Yawhan kashin kamun lam hkaw dan ai hpang, Galile mung kaw nna Yuda mung ting kajai gara wa ai lam hpe, nanhte chye nga myit dai: dai gaw, Nazaret na Yesu a lam rai nga ai. Karai Kasang gaw, Chyoi Pra ai Wenyi hte mung, n-gun atsam hte mung, shi hpe chya ya wu ai; Karai Kasang shi hte rau nga nga ai majaw, mai kaja ai amu ni shi gala nna, nat gunglau e zingri zingrat hkrum ai ni yawng mayawng hpe shamai ya let kawan katsan hkawm nga ai. Shing rai, Yuda mung ting hpe Yerusalem mare hta e, shi galaw ai amu yawng mayawng a sake ni anhte rai nga ga ai: dai wa hpe nan shanhte hpun hta jen sat kau mu ai; Karai Kasang chyawm gaw masum ya nhtoi hta shi hpe jahkrung sharawt la wu ai rai nna, mung masha yawng a man e n rai, Karai Kasang shawng de lata san da sai sakse ni a man e sha, dai wa hpe dan pru shangun wu ai. Dai sakse ni gaw, si ai kaw na Shi bai hkrung rawt ai hpang e, Shi hte rau lu sha ai ni anhte nan rai nga ga ai. Shi Madu nan mung, hkrung ai ni hte si ai ni nga sai lam, mung masha ni hpe tsun dan let sakse hkam ya let, Yesu hpe kam sham ai ni yawng, Shi a mying ningsang a marang e, mara raw dat kau ya ai hkrum na mara ai, ngu nna tsun dan ma ai.
Karai Kasang a Mungga rai nga ai.

CHYUM MUNGGA DAW 2

Kolose 3:1-4

Ya hti na gaw, Kolose masha ni hpang de San Pawlu shagun dat ai laika hta na rai nga ai.
Hpu nau ni e, nanhte Hkristu hte rau tengman ai asak de bai rawt wa manit dai rai nna, dai Hkristu gaw sumsing lamu hta Karai Kasang a hkra maga e dung nga ai majaw lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu. Kaning rai nme law, nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung shi hte rau hpung shingkang hta dan pru na marin dai.
Karai Kasang a Mungga rai nga ai.

KABU GARA SHIGA

Yawhan 20:1-9

Ya hti na gaw, Yawhan a laika hta na Kabu Gara Shiga rai nga ai.
Dai laban bat a shawng shani e, nhtoi garai n htoi yang, Maria Magdalena jau jau e lup de sa wa ai rai nna, lup chyinghka la ai nlung sit mat nga ai hpe mu wu ai. Dai majaw shi gaw Simun Petru yan Yesu tsawra ai sape hpang de gat wa nhtawm, Madu hpe lup de na shanhte la nna, kanang e tawn da mu ai hpe anhte n chye ga ai, ngu nna, shan hpe tsun mu ai. Dai majaw Petru yan kaga sape pru nna, lup de sa wa ma ai. Shan rau gat sa wa yang, kaga sape gaw Petru hpe gat lai kau da nna, lup de shawng sa du ai.
Shaloi shi gum yu yang, sumpan gin-yan taw nga ai sha mu wu ai; rai ti mung, shi kata de n shang ai. Simun Petru chyawm gaw shi a hpang e hkan gat nang nna, dai de du jang, kata de shang yu nga ai. Sumpan ginyan taw nga ai hpe mung, baw na hpajet gaw sumpan hte rau n re ai, kaga rai nna katsu taw nga ai hpe mung, shi mu wu ai. Dai majaw, lup de shawng du ai, kaga sape mung hkan shang wa nna, mu lu ai hte kam sham wu ai. Kaning rai nme law, Yesu gaw si ai ni kaw na bai hkrung rawt wa na ra ai ngu nna, Chyum Laika hta rawng nga ai hpendai ahkying du hkra, shan n chye madat ma ai.
Madu a Kabu Gara Shiga rai nga ai.

2024: KUNGLA SHAMAN POI SHANI NA MUNGGA

Madu Yesu nni nkri kam la ai laban bat gaw kaga lu sha gam laban bat ni zawn hkrung rawt ai Paska mungsung gasung gaw Hkristu Madu a si hkam ai hte bai hkung rawt ai, rau sha byin ai mung sung langai rai nga ai. Dai ni kaw nna, du na ra ai Laban bat mi tup hta dai mung sung ga sung hpe sung sung dum chye lu na rai sai. Aung padang hte hkrat sum yawn hkyen lam san san ngu n hkap la ai sha dai mabyin lahkawng hpe kalang ta hkam la na aten rai sai.

Awng padang hte hkrat sum lam ngu masa langai hpra n masat ai sha sum mat ai kaw nna awng padang ai lam re ngu masat lu na rai sai. Asak hpe si hkam ai kaw nna lu la sai rai nga ai. Nni nkri hkam ai laban bat gaw bai hkrung rawt ai poi a matu n pawt lam n rai. Kalwari na yawn hkyen ai gaw Paska poi a matu ga sadi n rai nga ai. Hkristu Madu a si hkam ai the Udang gaw awng padang dawn hkawn rai sai. Si hkam ai hta nan asak hkrung lam gaw nga nga sai. Si ai hte hkrung ai lam gaw langai sha re ai Hkristu Madu a mung sung rai nga sai. Madu Yesu a si hkam ai hta asak hkrung lam hpe mungkan ga de la wa ya ai majaw dai ni anhte pyaw lu ga ai.

Anhte a sak hkrung lam gaw Hkristu a si hkam ai hte bai hkrung rawt ai hta shang lawm na matu rai sai. Si ai the hkrung ai hpe kalang ta hkam la lu na rai sai. Dai zawn hkam la lu na prat ningnan hpe kashin kamun hkam la ai shani kaw nna anhte hpang wa sa ga ai. Si ai hpang de she n rai, n dai prat kaw ma rai nga ai. Madu hte rau anhte ni hkrung rawt ai teng ai rai tim, hkum tsup ai hkrung rawt lam gaw n rai nga ai. Anhte ara marin ai hte shut hpyit mara a matu si ai lam gaw htum ngu n nga na re, galoi mung shakut shaja ra ai lam langai rai nga ai. Shut hpyit mara hpe koi yen kau lu na matu shakut shaja let nga sa ai sha n-ga, Hkristu Madu a hpang hkan nang na mung ra ahkyak ai. Hkristu Madu a hpang hkan nang ai ni a matu galai shai ai lam gaw a nga nga na re.

2024: KUNGLA SHAMAN POI SHANI NA CHYUM LAIKA

KUNGLA SHAMAN POI

March 24, 2024

CHYUM MUNGGA DAW 1

Esaia 50:4-7

Ya hti na gaw, Esaia a laika hta na rai nga ai.

Hki ba hkrum ai wa hpe shalan shabran ai ga chye tsun lu hkra, Madu gaw sharin achyin hkam la ai sape ni a shinglet ngai hpe jaw ni ai. Shi a ga na la na matu, jahpawt shagu shi ngai hpe jasu nga ai: sape wa madatla ai zawn ngai mung madat la lu u ga, Madu nye a na hpe hpaw ya ni ai. Ngai mahtang lale kau ai hte kanut mat wa ai n rai. Ngai gaw kayet ai ni hpe nye a shingma, shabyi mun baw ai ni hpe nye a shabyi, ap ya nngai asawng asang di ai ni hte, mayen mahtaw bun ai kaw na nye a myiman kayin kau ai n rai. Kaning rai nme law, Madu gaw ngai hpe garum na ra ai; dai majaw, asawng asang di ai lam ni gaw ngai hpe myit n jahtum kau nga ai. Ngai gaw kaya kahpa n hkrum lu na, ngai chye ai majaw, nye myiman hpe mung nhpai lung zawn ngai shatai da nngai.

Karai Kasang a Mungga rai nga ai.

CHYUM MUNGGA DAW 2

Hpilipi 2:6-11

Ya hti na gaw, Hpilipi masha ni hpang de San Pawlu shagun dat ai laika hta na rai nga ai.

Hpu nau ni e, Hkristu Yesu gaw Karai Kasang nan rai nga timung, Karai Kasang hte maren rai nga na hpe n manoi nga ai sha, mayam madang hpe hkap la na matu, Karai a shingkang hpe raw tawn nna, shinggyim masha hte bung hkra tai wa sai. Shingrai, masha a hkum shan hku anhte kaw dan pru nhtawm, Shi hkum hpe shagrit shanem nna, si ai du hkra madat mara nga ai, kaja wa, wudang hta si ai du hkra madat mara nga ai. Rai ti mung, Karai Kasang gaw Shi hpe shagrau nna, amying yawng mayawng hta grau ai amying shingteng Shi hpe jaw da wu ai. Dai re ai majaw, sumsing lamu tang hta, ginding aga tsang hta na hte, lawu tsang na lahput yawng hte gaw, Yesu a amying hte hput di na mara ai. Dai hta n-ga, Kawa Karai Kasang a hpung shingkang a matu mara, Yesu Hkristu gaw Madu rai nga ai, nga nna shinglet yawng mayawng kajai gumhkawng nga na mara ai.

Karai Kasang a Mungga rai nga ai.

KABU GARA SHIGA

Marku 15:1-39

Ya hti na gaw, Marku a laika hta na, anhte a Madu Yesu Hkristu a nni nkri yubak lam rai nga ai.

Yesu Hkristu hpe rim la ai hpang jahpawt jau jau e, dai salang hpawng hta lawm ai hkinjawng agyi ni, du salang ni hte sara ni yawng hte gaw bawng hkut masai rai nna, Yesu hpe gyit nhtawm, Shi hpe dun wa nna, Pilatu kaw ap ya mu ai. Pilatu gaw shi jep yu nna, Nang Yuda ni a hkawhkam rai nga nni? ngu nna san yang, Yesu gaw, Nang tsun ai hte maren rai nga nngai, ngu nna htan wu ai. Hkinjawng agyi ni mahtang mara law law wa Shi hpe shagun ma ai. Dai rai nna Pilatu gaw, Nang hpa mung n htan ya nni? Shanhte nang hpe shagun ai mara gade wa law nga ai hpe yu yu u, ngu nna san wu ai, Yesu chyawm gaw ga hkaw mi pyi n htan wu ai rai nna, Pilatu grai mau nga ai. Dai poi a laman e, shanhte hpyi ai the maren htawng rawng ai masha langai mi hpe Pilatu dat dat na htung nga ai. Dai aten e gumlau kabrawng ai hte masha sat ai hpung hta lawm ai, Baraba ngu ai wa langai mi htawng rawng nga ai. Shaloi shawa masha ni lung wa nna, htung hte maren htawng rawng ai masha langai ngai hpe dat dat na hpyi ma ai. Pilatu mahtang gaw Yuda ni a hkawhkam hpe dat dat na nanhte ra nga myit ni? ngu nna shanhte hpe htan mu ai. Kaning rai nme law, manawn masham ai majaw, hkinjawng agyi ni Yesu hpe ap kau mu ai hpe shi chye nga ai. Hkinjawng agyi ni chyawm gaw, shanhte a matu Baraba hpe dat dat u ga, nga nna shawa masha ni hpe myit shadut yu mu ai. Pilatu mahtang shanhte hpe bai htan nna, Rai taw, Yuda ni hkawhkam ngu nna, nanhte tsun ai wa hpe ngai kaning di na rai ta? ngu wu ai, shanhte gaw, Wudang hta jen da u, nga nna bai jahtau ma ai.

Pilatu gaw, shi n hkru ai amu hpa galaw sata? Ngu nna san mu ai. Shanhte mahtang, Wudang hta jen da u, nga nna grau jahtu bu ma ai. Pilatu gaw shawa masha ni hpe myit shapyaw ya mayu ai hte, shanhte a matu Baraba hpe dat ya nna, Yesu hpe anu kayat nhtawm, jen da ai hkrum u ga ap kau dat wu ai. Shaloi hpyen la ni gaw, Pretorium ngu ai htingnu a wang kata de Yesu hpe woi wa nna, hpyen dap ting hpe shaga tawn mu ai. Shanhte gaw hkyeng ai hpun nba Shi hpe jahpun nna, ju kagup hkri nhtawm, Shi hpe shagup ya ma ai hte, Yuda ni a hkawhkam e, nang a lu nit ga law, ngu nna shi hpe asawng let shakram ma ai.

Bai mai-aw yan hte Shi a baw hpe kayet nna, Shi hpe mayen mahtaw bun mu ai hte, lahput di let nawku ma ai. Yesu hpe asawng asang di ngut jang, hkyeng ai hpun nba hpe shanhte raw kau nna, shi a hpun palawng hpe jahpun ma ai. Shaloi, wudang hta Yesu hpe jen da na matu, shi hpe dun sa wa ai rai nna, shi a wudang hpe hpai ya u ga, nam kahtawng na wa nna, lai hkawm sa wa ai Alesandru yan Ruhpu a kawa, Simun ngu ai Kureni mung masha langai mi hpe shagwi ma ai. Ya, Golgohta ngu ai shara de shanhte shi hpe dun du ma ai. Golgohta a ga lachyum gaw, Pungkum Kawng ngu ai rai lu ai. Shaloi mura hte tsabyi chyaru kayau nna, Yesu hpe jaw ma ai, rai ti mung, Shi n kam lu mu ai. Ya shanhte wudang hta e Shi hpe jen da nna, Shi a hpun palawng hpe karan tawn ai hte, langai hte langai la ang na matu hpai da da ma ai. Wudang hta shi hpe jen da ai gaw jahpawt ahkying jahku rai nga ai. Dai hta kaga, ‘Yuda ni a hkawhkam’ ngu nna shi a mara hpe madun ai laika ka shakap tawn mu ai.

Yesu hte rau damya lahkawng hpe mung, shi a hkra maga de langai mi, pai maga de langai mi jen da mu ai. Lam e lai wa ai ni mung, Shi hpe asawng asang ngu nna, tinang a baw hpe kanga let, Aha! Nawku Htingnu hpe run kau nna, masum ya laman e bai de lu ai wa e, Na hkum hpe nan hkye la nna, wudang hta na yu wa rit, ngu mu ai. Hkinjawn agyi ni hte sara ni mung, dai hte maren asawng asang di let, masha kaga hpe shi hkye la ai; Shi hkum nan pyi n hkye la lu a hka! Shi hpe kam sham lu na matu, Israela a hkawhkam dai Hkristu gaw, anhte mu nga yang, wudang hta na ya yu hkrat wa u ga, nga nna shada da tsun ma ai. Yesu hte rau wudang hta jen da ai yan mung Shi hpe aroi arip ngu mu ai. Ya shani ka-ang e du yang, dai kaw nna ahkying masum du hkra, mung ting hta e nsin chyip rai mat ai; ahkying masum hta e, Yesu gaw nsen kaba hte, Eloi, Eloi, Lama sabakhtani?ngu nna jahtau wu ai; de a ga lachyum gaw, Nye a Karai Wa e, Nye a Karai Wa e, hpa majaw nang ngai hpe kau da nga n ta? nga ai rai lu ai. Shaloi dai makau e tsap nga ai ni nkau mi gaw, Yu mu, Shi Elia hpe shaga nga ai, nga ma ai. Shaloi marai langai mi gat sa nna, hka kamu hpe tsabyi hkri hta tsing la nhtawm, maiaw nren hta shakap nna, Yesu a n-gup hta jaw mu ai rai nna, ‘Elia Shi hpe sa shayu la na kun, naw yu yu ga, ngu nna tsun ma ai. Yesu mahtang nsen kaba hte jahtau let nsa hti mat sai. Shaloi Nawku Htingnu na nba grang, ka-ang kren brang rai ga mat wa sai. Yesu gaw shing rai si mat ai hpe, shi a man e tsap nga ai hpyen latsa up ai du wa mu jang, Kaja wa, ndai wa gaw Karai Kasang a Kasha nan rai nga ai, ngu nna tsun ai.

Madu a Kabu Gara Shiga rai nga ai.

2024: LUSHAGAM LADAW LABAN (5) NA MUNGGA

Ja Chyum mungga kabu gara shiga hta, hkam sharang let ap nawng shakut na lam hpe madung tsun shapraw dan nhtawm, dai zawn hkam sharang ap nawng shakut ai lam gaw ahkyak ai lam hpe mung sharin ya nga ai hpe mu lu ga ai. Si hkrung si htan lam hpe koi kau nlu hkam sha ra ga timung, dai hpe masha shagu hkrit kajawng ma ai. N hkrum ga ai mabyin langai re ai majaw rai nga ai. Kanu kawa ni gaw kashu kasha ni hpang de mai kaja na matu, yu bak tsin yam, pu ba ai hpe hkam sha ra ma ai.

Sara/num ni gaw, jawng ma ni jawng sharin laika hpe chye na matsing na matu, tau nau hkyen lajang ra ma ai. Tsi sara/du ni gaw machyi masha ni a matsing laika hpehkaja yu nna, htap htuk ai tsi ni hpe jaw sha ma ai. Jak rung na bungli galaw masha ni gaw, mung shawa masha ni a lu sha buhpun palawng ni a matu ba hkam nna amu galaw shajang ma ai. Lahta de madun ai hkam sharang apnawng shakut ai ga shadawn ni gaw, Hkristu gaw anhte ni hpe kaga masha ni a matu machyi hkam shangun mayu ai lam masa hpe hpaw dan nga ai. Maga mi de hkam sharing shakut ai majaw, ngam ai maga mi de akyu hkam sha lu ai lam hpe mu lu ai.

Madu Yesu hkum nan, hkam sharang ap nawng shakut ai lam amyu myu anhte hpe madun dan sai. Madu Yesu gaw dinghku a ngwi pyaw lam hpe tawn kau nna, baw tawn na shara pyi n lu ai prat hte, Kawa Karai a mungga hpe hkaw tsun hkawm yang, ru yak tsin yam law law hte, machyi hkam ai lam ni hpe hkam lai wa sai. Kasa ni a ntsa, tsawra shawang hpring tup hte, hkaw tsun sharin ai rai tim, marai mi a gum lai ai majaw, hpang jahtum Udang ntsa jen sat ai du hkra, machyi hkam mat wa sai.

2024: LUSHAGAM LADAW LABAN (5) NA CHYUM LAIKA

LUSHA GAM AI LADAW HTA LABAN 5
March 17, 2024
CHYUM MUNGGA DAW 1

Yeremia 31:31-34

Ya hti na gaw, myihtoi Yeremia a laika hta na rai nga ai.
 Madu ning nga ai: Yu mu, Israela hte Yuda a nta atsae ga shaka nnan tawn da na nhtoi du na ra ai. Shanhte a kaji kawa ni hpe lata hte dun la nna, Egutu mung de na woi wa ai shaloi e, shanhte hte tawn da ai ga shaka the maren n rai; kaning rai nme law, ngai shanhte a Madu rai nga timung, shanhte gaw nye a ga shaka dai ru kau ma ai, nga nna Madu tsun ai. Dai nhtoi ni du waai shaloi, Israela nta hte ngai ga shaka na gaw, da ndai rai nga ai: Nye a lata hpe shanhte a masin salum hta ngai hkai da nna, shanhte a myit hta ka da na we ai: ngai shanhte a Karai Kasang tai na nngai; shanhte mung nye a amyu tai na mara ai, nga nna Madu tsun ai. Dai shaloi shanhte langai hte langai tinang a htingbu wa hte hpu nau wa hpe, Karai Kasang a lam hpe chye nga u, nga nna sharin achyin ya na ra ai n rai; kaji htum aikaw nna kaba htum ai du hkra, shanhte yawng hte gaw ngai hpe chye chyang wa na mara ai: shanhte a mara hpe ngai raw kau ya nna, shanhte shut hpyit ai hpe bai dum ya na ni ai n rai, nga nna Madu tsun ai.
Karai Kasang a Mungga rai nga ai.

CHYUM MUNGGA DAW 2

Hebre 5:7-9

Ya hti na gaw, Hebre masha ni hpang de shagun dat ai laika hta na rai nga ai.
Hpu nau ni e, Hkristu gaw ndai dinghta ga ntsa e naw hkrung nga ai shaloi, si ai kaw na shi hpe hkye mawai la lu ai Karai Kasang hpang de, hkrap ngu hkrap ngoi nna myi prwi law law hte hpyi jahtau wu ai. Shi gaw myit grit nnem ai madat mara ai majaw, shi hpyi ai ga hpe Karai Kasang hkap madat la ya sai. Hkristu gaw Kasha teng teng rai nga ti mung, nni nkri hkrum ai hku madat mara ai lam sharin la wu ai; shing rai; Shi hkum tsup wa ngut jang, shi a ga madat mara ai ni yawng mayawnga matu, htani htana hkye hkrang la ai a npawt daju tai nga ai.
Karai Kasang a Mungga rai nga ai.

KABU GARA SHIGA

Yawhan 12:20-33

Ya hti na gaw, Yawhan a laika hta na Kabu Gara Shiga rai nga ai.
 Dai Paska poi a laman e, Yerusalem mare de lung waai ni hta Greka masha nkau mi lawm ma ai. Dai ni gaw Galile mung na Betsaida mare masha Hpilip kaw sa nna, Hkau e, anhte gaw Yesu hte hkrum mayu ga ai, ngu nna tsun ma ai. Hpilip gaw Andru hpe sa tsun nna, Andru yan Hpilip gaw Yesu hpe sa tsun dan ma ai. Dai rai nna Yesu gaw, Masha Kasha a hpung shingkang dan hkung na ahkying du wa na ra ai. Nanhte hpe ngai kaja wa teng teng tsun made ai gaw: Mam nhkyep gaw ga hta hkrat nna n hten mat yang gaw, langai sha a rai nga ai; hten mat yang she asi law law si wa ai. Tinang a asak hpe tsawra ai wa gaw asak sum na ra ai. Ndai Mungkan ga e tinang a asak hpe n dawng n yawt ai wa chyawm gaw, htani htana asak lu la hkra shi a asak hpe makawp maga nga ai. Ngai hpe daw jau ai wa gaw nye a hpang hkan nang ra ai; ngai nga ai shara e nye a shangun ma mung nga na ra ai.
Ya ngai nachying myit ru nga nngai: ngai kaning ngu tsun na i? Wa e, ndai ahkying hta na ngai hpe hkye hkrang la e. Rai ti mung, n dai lam a majaw she ngai ndai ahkying de du wa ni ai rai nna, Wa e, na a mying nsang hpe shagrau u law, nga nna Hpilip yan Andru hpe Yesu tsun wu ai. Shaloi sumsing lamu de na nsen gaw, Ngai shagrau se ai rai nna, bai naw shagrau na we ai, nga nna ngoi pru ai. Dai yang e tsap hpawng nga nna na la ai ni gaw, Mu ngoi nga ai, tsun ma ai; nkau mi mung,  Lamu kasa shi hpe ga tsun nga ai, nga ma ai.30Yesu gaw, Dai nsen gaw nye a matu n rai, nanhte a matu she ngoi pru wa ai. Ndai mungkan ga gaw, ya jeyang daw danai hkrum nga ai. Ngai chyawm gaw ga de nna sharawt tawn da ai hkrum jang, masha yawng hpe ngai hpang de woi la na we ai. Shing nga ai gaw, shi gara hku si na madun nna tsun ai rai nga ai.
Madu a Kabu Gara Shiga rai nga ai.

2024: LUSHAGAM LADAW LABAN (4) NA MUNGGA

Anhte a Karai Kasang gaw ting kyeng myit ai Madu n re ai lam asan sha chye lu nga ai. Shawng n pawt e mai kaja ai hte hpan da hkrum ai ni hten run wa ai shaloi, n kabai kau da ai sha, shi a kasha shingtai Madu Yesu hpe shangun dat nna, Shi Madu a tsaw ra matsan dum ai lam hpe madun dan sai. Kasha Yesu mung, n ni nkri law law hpe hkam la ai hta n-ga, hpang jahtum si ai kaw nna, bai hkrung rawt ai du hkra, Kawa Karai Kasang a ra sharawng ai lam hpe, tup hkrak hkan nang galaw lai wa sai. Kasha shingtai hpe mungkan ga de shangun dat ai lam hta anhte a ntsa e tawn da ai tsun n dang, shadawn shading n lu ai, chyeju hpring tsup ai lam hpe madun sai.

Dai re ai majaw, anhte hku nna, hkye hkrang la ai lam hpe ging dannna lu ai n rai, Karai Kasang a tsawra matsan dum ai lam kaba a majaw sha lu ai rai nga ai. Tinang hkum nan a shakut shaja ai majaw sha hkam lu ai lam re ngu n tsun lu ai. Lu sha gam ladaw a hpang daw de du wa ai aten, anhte a asak hkrun lam hta hkrum kadup lu ai masha ni a garum ya ai hte kaning rai Madu Yesu Hkristu gaw anhte a hkye la Madu hte Nhtoi re ngu nna hkap la sai lam ni hpe bai myit sum ru yu ga. Dai zawn sum ru yu nhtawm, anhte hkum nan mung dai hte maren masha kaga ni a matu, Madu Yesu gaw hkye hkrang la ai Madu hte Nhtoi Madu re ai hpe sakse hkam matut shakut hkawm sa wa ga law!!!

2024: LUSHAGAM LADAW LABAN (4) NA CHYUM LAIKA

LUSHA GAM AI LADAW HTA LABAN 4

March 10, 2024

CHYUM MUNGGA DAW 1

2 Hkawhkam Labau 36:14-16, 19-23

Ya hti na gaw, Hkawhkam Labau Laika lahkawng hta na rai nga ai.

Dai nhtoi hte hta e, hkinjawng agyi ni hte mung masha ni yawng hte gaw, maigan amyu ni a n tsawm n htap ai lam shagu hpe hkan nna, grai wa shut hpyit nga ma ai. Yerusalem mare hta e Madu shachyoi shapra da ai, shi a nta hpe mung awu asin di kau mu ai. Shanhte kaji kawa ni a Madu Karai Kasang gaw, Shi a amyu hpe mung shi shanu nga ai shara hpe mung matsan dum nga ai majaw, n sim n sa langai hpang langai hpe shi a kasa ni hpe shanhte hpang de shangun dat wu ai. Rai ti mung shanhte gaw Karai Kasang a kasa ni hpe aroi arip di kau ai hte, shi a ga hpe n kaw n law di nna, shi a myihtoini hpe asawng asang di kau mu ai. Dai rai nna, hkye hkrang la na lam n hku hkra, Madu a pawt sindawng ai gaw shi a amyu masha ni ntsa e kahtet bu nga ai.

Babelon mung na shahte a hpyen ni gaw Karai Kasang a nta hpe nat kau ai hte, Yerusalem mare bunghku hpe run kau nna, hkawhkam htingnu ni mahkra hpe nat kau nhtawm, de a manu dan ai arung arai nlang hte hpe shaza kau mu ai. Nhtu n hkum ai ni hpe Babelon mare de bawng dun wa mu ai rai nna, shanhte gaw Persia mungdan up hkang ai aten du hkra, Babelon hkawhkam wa hte shi a kasha ni a mayam ni rai nga ma ai. Shing rai, Yeremia a n-gup hta Madu tsun ai ga dik wa sai. Madu ning nga ai: Israela lamu ga gaw laban shaning ni hpe shatup na mara ai; dai mungdan gaw de a katsi katsang re ai nhtoi mahkra hta ban nga nna, sanit shi ning du hkra hkam nga ai. Ya Yeremia htawn tsunai Madu a ga dik wa na matu, Persia hkawhkam Kuru hkaw dung ai shawng shaning hta e, Madu gaw shi a myit hpe shadut ya nna, shi gaw shi a mungdan ni hproi hkra hkang dat ai laika shabra dat wu ai.Dai laika hta ka ai gaw: Persia hkawhkam Kuru ning nga ai: Sumsinglamu na Madu Karai Kasang gaw ga ntsa na mungdan ni mahkra hpe nye a lata hta ap ya ni ai; Yuda mung Yerusalem mare hta e, shi a matu nta langai mi galaw na, shi ngai hpe hkang da ni ai. Ya shi hte seng ai amyu masha kadai mung, Madu Karai Kasang shi hte rau nga nga nna, Yerusalem mare de shi lung wa u ga, ngu nna ka dat wu ai.

Karai Kasang a Mungga rai nga ai.

CHYUM MUNGGA DAW 2

Ehpesu 2:4-10

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

4Hpu nau ni e, nachying matsan dum chye ai Karai Kasang gaw, tsaw ra ai myit kaba hte anhte hpe tsaw ra mi ai rai nna, shut hpyit mara e anhte chyasi zawn tai nga ai shaloi, Hkristu hte hpawn Shi anhte hpe jahkrung la mani ai: Shi a chyeju hte sha anhte hkye hkrang la ai hkrum manit dai. dai hta n-ga Karai Kasang gaw, Hkristu Yesu hta anhte hpe matsan dum ai a marang e, Shi a chyeju gade wa galu gaba htum nga ai hpe, prat dingsa e madun dan na matu, Hkristu Yesu hte hpawn anhte hpe sharawt la nna, sumsing lamu lahta tang e Hkristu hte rau anhte hpe hkaw dung shagun mani ai. Kaning rai nme law, makam masham a marang e chyeju hte sha nanhte hkye hkrang la ai hkrum manit dai: dai gaw anhte kaw na n rai; tinang galaw ai magam bungli a majaw mung n rai; Karai Kasang a kumhpawkumhpa sha rai nga ai. Dai rai nna, ndai lam hta kadai mung gumrawng gumtawng shara n nga ai: hpa majaw nga yang, shawng npawt e Karai Kasang yaw shada aihte maren, mai kaja ai bungli lam hta anhte hkawm nga u ga, Hkristu Yesu hta e anhte hpan da hkrum nna, Karai Kasang shi nan shachyaw da ai magam bunli anhte rai nga ga ai.

Karai Kasang a Mungga rai nga ai.

KABU GARA SHIGA

Yawhan 3:14-21

Ya hti na gaw, Yawhan a laika hta na Kabu Gara Shiga rai nga ai.

Nikodemu mying ai Hparishe langai mi shana e Yesu kaw sa nna, Madu shi hpe tsun ai gaw: Mawshe gaw nammali e lapu hpe sharawt da ai zawn, kam sham ai ni nlang hte gaw Masha Kasha hta htani htana asak lu la hkra, dai masha kasha mung sharawt da ai hkrum na ra ai. Kaning rai nme law, Karai Kasang a Kasha hpe kam sham ai ni nlang hte gaw hten bya n hkrum ai sha htani htana asak lu la mu ga nga Karai Kasang Shi a Kasha Shingtai hpe jaw kau ai du hkra mungkan ga hpetsaw ra wu ai. Mungkan ga hpe daw dan na matu Karai Kasang dai Kasha hpe mungkan ga de shangun dat wu ai n rai; mungkan ga gaw shi a marang e hkye hkrang la ai hkrum lu na she shangun dat wu ai. Kasha hpe kam sham ai wa gaw daw dan ai n hkrum lu ai; n kam n sham ai wa chyawm gaw, Karai Kasang a Kasha a mying nsang hpe n kam n sham ai majaw, ya e pyi daw dan ai hkrum nga ai. Nhtoi gaw mungkanga de shang sai, rai ti mung, masha ni a arawn alai n hkru n kaja nga ai majaw shanhte gaw nhtoi hta nsin hpe grau tsawra ma ai: ndai lam a majaw shanhte daw dan ai hkrum nga ma ai. Kaning rai nme law, n hkru n kaja ai masha ni gaw tinang galaw ai amu dan pru na hkrit nna, nhtoi de n sit sa wa ma ai. Dingman ai wa chyawm gaw, tinang a amu shagu hpe Karai Kasang myit ra ai hku hkan galaw ai gaw, dan pru na matu nhtoi de sit sa wa ma ai.

Madu a Kabu Gara Shiga rai nga ai.

2024: LUSHAGAM LADAW LABAN (3) NA MUNGGA

Kahtawlik Nawku hpung shaning shagu galaw ai Paska poi gaw, kaga mungdan rai nga ai, Egypt masha ni kaw na, Shi lata la sai amyu sha ni hpe Yahweh Karai Kasang hkye hkrang la sai lam hpe myit dum galaw ai poi rai nga ai.

Dai re ai majaw, dai poi hpe Yuda masha nigaw, Nawku htingnu de jut shara shagu kaw nna sa zup let Karai Kasang hpe sa du nawku daw jau ai lam galaw ma ai. Htung hkying nga ai hte maren galaw ai lam hta, dusat ni hpe hkungga nawng jau ai lam rai nga ai. Dai zawn nawng jau ai du sat ni gaw, mara ana ahkya n kap sau reng ai raira ai. Kaga mare buga de na la sa ai dusat ni hpe ana ahkya kap n kap, jep sagawn ai hpung ni nga ma ai. Dai hpung ni hpaga la ni hte pawng nna, hpung myit su ni a shingdu madi hte ahkaw ahkang ni hpe jai lang let, kaga de na la sa ai hkrung kanu ni hpe yawng je kau nhtawm, hpaga la ni dut ai du sat ni hpe mari shangun ma ai.

Ndai mabyin ni hpe, Madu Yesu chye ai majaw, n ra ai lam rai nga ai. Madu Yesu gaw simsa ai, Tara rap ra ai, tsawra ai hte mara raw hkyemsa ai tara hte hpring tsup ai Karai Kasang a mungdan lam hkaw tsun ai. Dai lam hte n htan shai ai lam ni hpe Madu Yesu n ra sharawng ai. Kaga ni hta grau nna, matsan mayan n-gun kya ai ni hpe jam jau shangun ai lam ni hpe Madu Yesu n ra sharawng ai.

Shawng nnan hti ai Pru mat wa ai laika 20:1 17 hta, Tara Kanu (10) kaw, Karai Kasang hte masha shada galaw ra ai lam ni hpe madun da ai hpe mu lu ga ai. Kabu gara shiga hta na mabyin hpe yu ai shaloi, Madu Yesu gaw, teng man ai nawku daw jau lam gaw, hpawng shing ra masat hkrak ra ai hte, jaw jau ai masat hte maren, hpring tsup lam hpe rai timung, madung n tawn ai sha, anhte a asak hkrung lam hta, Karai Kasang a hpung shingkang a matu, myit sharawng awng ai hte, shakut shaja ra ai hta madung ai lam sharin da nga ai.

Matsan dum lama ai the tsawra myit hte hpring ai, salum madu ni hku nna, anhte hpe galai shai shangun ai lam hta, grau nna matsan mayan ni hte, ahkaw ahkang kata ai, ni a ntsa, matsan dum chye na matu, Karai Kasang kaw akyu jawm hpyi ga law.

2024: LUSHAGAM LADAW LABAN (3) NA CHYUM LAIKA

LUSHA GAM AI LADAW HTA LABAN 3
March 3, 2024
CHYUM MUNGGA DAW 1

Pru Mat wa ai laika 20:1-3, 7-8, 12-17

Ya hti na gaw, Pru Mat Wa ai laika hta na rai nga ai.
Ndai mungga mahkra hpe Karai Kasang tsun wu ai gaw: Ngai gaw, Egutu mung hte mayam tai nga ai nta na nang hpe hkye shaw la ai, na a Madu Karai Kasang rai nga nngai. Ngai hta Karai Kasang shaje hpe hkum naw hkum ku et. Na a Madu Karai Kasang a mying nsang hpe kaman lila hkum gang hkum tsun et; Kaning rai nme law, shi a mying nsang hpe kaman lila tsun ai wa hpe, Madu gaw mara shagun na ra ai. Laban nhtoi hpe shachyoi shapra na, dai nhtoi hpe dum u. 12Na a Madu Karai Kasang nang hpe jaw ai ga hta, na a asak galu lit ga, na nnu yan nwa hpe hkungga lara di u. Masha hpe hkum sat u. Masha num hkum shaw et. 15Masha rai hkum lagu et. Na a htingbu manang wa a lam n teng n man ai sakse hkum hkam u. Na a htingbu wa a nta hpe ra marit ai myit hkum rawng et; shi a madu jan hpe mung, shi a numsha lasha hpe mung, shi a dumsu lawze hpe mung, shi a lu ai arai mahkra hpe mung, ra marit ai myit hkum rawng et, nga nna Madu Karai Kasang tsun da nu ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 1:22-25

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, Yuda masha ni gaw lamik kumla hpyi ma ai; Greka ni mahtang hpaji byeng-ya tam ma ai: anhte chyawm gaw Wudang hta jen da hkrum ai Hkristu a lam hpe hkaw dan ga ai. Dai wa gaw, Yuda ni a man e myit kataw shara, maigan amyu ni a man e angawk angak rai nga ai. Rai ti mung, shaga la hkrum ai Yuda ni the Greka masha ni a matu mara, dai Hkristu gaw Karai Kasang a atsam hte, Karai Kasang a hpaji byeng-ya rai nga ai. Kaning rai nme law, Karai Kasang kaw na angawk angak re ai lam gaw masha a hpaji byeng-ya hta grau nga ai; Karai Kasang a n-gun kya ai gaw masha a n-gun atsam hta grau nga ai.
Karai Kasang a Mungga rai nga ai.

KABU GARA SHIGA

Yawhan 2:13-25

Ya hti na gaw, Yawhan a laika hta na Kabu Gara Shiga rai nga ai.
Dai aten hta Yuda masha ni a Shalai Poi du wa ra ai rai nna, Yesu gaw Yerusalem mare de lung wa sai. Shaloi nawku htingnu e sagu , dumsu, uhkru du dut ai ni hte, gumhpraw jak sha ai ni dung nga ma ai hpe shi mu wu ai rai nna, shingri hte galaw ai lasik la nhtawm, shanhte mahkra hpe mung, sagu dumsu ni hpe mung dai nta na shachyut kau nu ai; gumhpraw jak sha ai ni a gumhpraw hpe shi ayai kau ya ai hte, shanhte a ku ni hpe kanawng kadawng kau ya ai hte, shanhte a ku ni hpe mung, Ndai rai ni la wa mu; nye a, Wa a nta hpe hpaga nta hkum shatai mu, ngu nna tsun mu ai. Dai shaloi, Na nta hta manoi ai nja nhpra myit gaw, ngai hpe sha kau na ra ai, nga nna ka da ai ga hpe sape ni dum ma ai. Shing re ai majaw Yuda masha ni gaw, Nang ndai zawn galaw na ahkaw ahkang lu ai gaw, anhte chye luna matu, hpa baw lamik kumla madun dan lu na ta? Ngu nna Yesu hpe san mu ai. Yesu gaw, Ndai htingnu hpe hpya kau mu; masum ya laman e ngai dai hpe sharawt na we ai, nga nna shanhte hpe htan mu ai.
Shing nga ai majaw Yuda masha ni gaw, Ndai nawku htingnu hpe mali shi ning tup galaw sai; nang chyawm gaw masum ya laman e sharawt lu na wu ni? ngu mu ai. Rai ti mung, Yesu tsun ai gaw, shi a hkum hkrang ngu ai htingnu hpe sha-ang nna, tsun ai rai nga ai. Dai re ai majaw si ai ni kaw na jahkrung sharawt la ai hkrum ai shaloi, sape ni gaw shi shing nga tsun ai ga hpe myit dum ai rai nna, Chyum laika hpe mung, Yesu tsun da aiga hpe mung kam sham ma ai. Dai shalai Poi nhtoi ni a laman e, Yerusalem mare hta Yesu naw nga nga yang, masha law law wa shi madun dan ai lamik kumla mu lu ai majaw, shi a mying nsang hpe kam sham ma ai. Yesu chyawm gaw shanhte hpe n kam wu ai; masha yawng mayawng a lam shi chye ai majaw, masha a kraw kata e hpa baw myit rawng nga ai hpe chye da wu ai rai nna, masha wa a lam hpe kadai mung sakse hkam ya na shi n ra wu ai.
Madu a Kabu Gara Shiga rai nga ai.

2024: LUSHAGAM LADAW LABAN (2) NA MUNGGA

Shi shanhte a man e htoi kabrim ai asam galai mat wa ai. Lamu kaw ngoi pru ai nsen mung, ‘’Ndai gaw ngai tsawra ai kasha rai nga ai; shi a ga hpe madat mu”’ nga ai.

Dinghta ga ntsa e asak hkrung nga dingsa, n hten ai, ung-ang ai, kaja wa byin na kun, teng wa na kun, ngu nna hkam sha ra ding-yang rai na re. Hkrak byin na mu da ai, sawn da ai rai tim hprai shai mat ai mung law law re ai mahkrum madup lu ga ai. Petru gaw Yesu gălaw dan ai lamik kumla ni hpe mu ai majaw, “Nang gaw Karai a Kasha rai lit dai” ngu, masat shăgrau hkrum ai. Dai hpang jang Yesu gaw shi nni nkri hkam la ra ai lam, masha ni a lata e sat kau hkrum na lam tsun shăpraw dan ai shaloi gan myit daw mat ai. Yesu gaw nni nkri hkam la nna, wudang hkrun lam hkawm nna sha, shi a hkye hkrang la ai amu hpe shăngut shătawng lu na rai nga ai.

Anhte makam masham lu ai ni, makam masham amu ni hpe hkan galaw ding-yang re ai ni mung nni nkri hte agung alau hkrum katut ra ga ai. Kalang lang myit daw myit hten na zawn nga hkam sha ai aten ni nga na re. Abraham gaw kasha shingtai Isak a asak hpe Karai Kasang hpyi ai shaloi, teng sha ung-ang ai myit rawng na re. Rai tim, Asak hpe jaw ai Karai Kasang gaw dai asak hpe bai jăhkrung lu ai Wa re ai hpe kamsham ai. Kasha shingtai hpe sat nna wan nat hkungga nawng ya na lam hpyi ai Karai Kasang a ga hpe madat ya ai. Abraham chyam dinglik yu ai hkrum ai hte raw wa n bung tim, makam masham hkrun lam hta chyam dinglik yu ai amyu myu anhte hkrum ga ai. Akyu hpyi let bungli shachyen mat yang gumhpraw arang du hkra sum mat ai, akyu hpyi let hkawm sa tim hkala nba hkrum katut ai, akyu hpyi ding-yang rai tim machyi n mai hkraw ai, manghkang langai hpang langai shachyaw mat wa ai, dz., dz., mahkrum madup ni nga shajang na ga ai. Karai Kasang anhte kaw na lam amyu myu hku, hkungga shatai nawng ya na lam hpyi ai. Kasa Marku tang madun ai lam hta masha prat na nni nkri shoihpa ni hkam la ai jahtum e hpung shingkang dagraw hkam la na lam, Yesu a asam galai ai mabyin hku nna sharin ya ai. Htoi tu kabrim wa ai Yesu gaw Moshe yan Eliya hte shaga hkat ai: Yesu gaw kam ging ai Wa re ai lam hpe myihtoi kaba lahkawng sakse hkam ya ma ai. Sape ninghkring ni re ai Petru, Yaku hte Yawhan, shanhte mung tsun dan n chye hkra re ai kabu myit pyaw myit dik ai lam hpe hkam sha lu ma ai. Shanhte gaw dai zawn pyaw nan taw n mai ai_ bum lagaw de bai yu wa ra ma ai. Dinghta ga na mabyin ni, gam maka ni yawng hpe hkam la ra ai.

Madat măra na yak dik ai shinggyim masha ni hpe Karai Kasang tsun ai, “Shi a ga hpe madat mu” nga ai. Masha a Kasha tai hkam la ai Hkristu gaw kuptsup ai hku Kawa a myit hpe hkan shatup ai, si ai kaw du hkra madat mara ai, nga da ai. Shada tsang hte tsang hkam măna madat măra na yakhkak tim, madat măra na lit lu ai lam hpe shadum ya ai. Ningpawt shut hpyit mara mung, ga n madat ai mara n rai a hka! Kasa Pawlu lam matsun ai mung, “Kawa Karai gaw kasha shingtai hpe n lahpawt ai, mungkan masha ni hpe ap jaw kau ai du hkra tsawra ai; dai rai yang, kaga n jaw lu ai hpa naw nga na rai ta?” nga ai. Yesu hte rau, shi hta e asak hkrung ga ai rai yang, anhte kadai hpe, kaning re ai hpyen hpe mung hkrit tsang n ra ai lam shadum ya ai.
Myit sumru yu na matu:
* Myit daw myit hten ai aten ni hta Yesu a asam galai nna tu kabrim wa ai lam hpe hti yu nna ninggun la yu sai kun?
* Masha hkum shan hte re ai Yesu pyi, dai zawn hpung shingkang hkam sha yu ai hku nna, shi hkam la na n htum nni zingri zingrat ai hpe hkamjan lu hkra, Kawa Karai e ahkaw ahkang jaw ai.
* Anhte pyaw ai aten ni hta chyeju dum chye ga ai kun? Anhte mung, shalan shabran ai chyeju hpe hpyi shaja ra ga ai n rai a hka?

2024: LUSHAGAM LADAW LABAN (2) NA CHYUM LAIKA

LUSHA GAM AI LADAW HTA LABAN (2)
February 25, 2024
CHYUM MUNGGA DAW 1

Npawt Nhpang 22:1-2, 9-13, 15-18

Ya hti na gaw, Npawt Nhpang laika hta na rai nga ai.
Karai Kasang gaw Abraham hpe chyam yu na matu, Abraham e, ngu nna shaga yang shi gaw, Nang nga nga nngai ngu nna htan wu ai. Shaloi Karai Kasang gaw, Nang tsawra ai na a shadang sha Isak hpe woi nna, Moria mung de sa su; ngai nang hpe madun dan na bum ntsa e, shi hpe wan nat hkungga di nna nawng ya e, ngu wu ai. Abraham yan Isak gaw Karai Kasang madun ya ai shara de du jang, Abraham shi a lata ladawn nna, kasha hpe sat na nga, nhtu la lang wu ai. Shaloi Madu a lamu kasa gaw, Abraham, Abraham e, nga nna lamu de nna shaga pru ai. Abraham gaw, Nang nga nga nngai, ngu nna htan jang, lamu kasa gaw, Na a lata dai ma hpe hkum hkra et; hpa mung hkum di u; na a shadang sha shingtai hpe, ngai hpe n kam jaw na myit n rawng ndai majaw, nang Karai Kasang hpe hkrit hkungga ai gaw, ya ngai chye sade ai, ngu wu ai. Shaloi Abraham mada yu jang, shi a shingdu e sagu la langai mi sumwum hta nrung chya nna dau nga ai hpe mu wu ai.
Karai Kasang a Mungga rai nga ai.

CHYUM MUNGGA DAW 2

Roma 8:31-34

Ya hti na gaw, Roma masha ni hpang de San Pawlu shagun dat ai laika hta na rai nga ai.
Hpu nau ni e, Karai Kasang anhte hpang maga de lawm nga yang gaw, anhte hpe hpyen ni maga de kadai wa mi nga lu na a ta? Karai Kasang gaw Shi a Kasha hpe nan, lahpawt lama n di ai sha anhte a matu ap ya nu ai; dai daram hpu ging la ai kumhpa hte nawng, ra ai chyeju yawng mayawng Shi jaw na hpe, anhte ngang kang ai myit hte kam sham lu ga ai. Karai Kasang a lata la ai ni hpe kadai wa mi mara shagun lu na a ta? Karai Kasang gaw, mara n lu ai nga nna dat dat sayang gaw, daw dan lu ai wa kadai rai nga a ta? Hkristu Yesu mahtang rai na i? N rai law! Hkristu Yesu gaw anhte a matu si hkam sai; dai sha n rai, si mat ai ni kaw na jahkrung sharawt la hkrum nhtawm, Karai Kasang a hkra maga de dung nga let, anhte a matu hpyi htinglu ya nga ai.
Karai Kasang a Mungga rai nga ai.

KABU GARA SHIGA

Marku 9:2-10

Ya hti na gaw, Marku a laika hta na Kabu Gara Shiga rai nga ai.
Dai aten hta Yesu gaw Petru, Yaku hte Yawhan hpe shaga la nhtawm, tsaw ai bum de shanhte hpe hkrai woi lung wa mu ai. Shaloi shanhte a man e Shi a ahpraw nsam galai wa ai hte, Shi hpun palawng gaw kabrim kabram wa nna, nachying hpraw tu wa lu ai: ga ntsa na tsi chyaw ai wa kadai mung, dai daram hpraw jahtap lu na n rai. Mawshe yan Elia mung shanhte kaw dan pru ma ai: shan gaw Yesu hte ga tsun ma ai. Shaloi Petru gaw, Rabai e, ndai yang e nga na anhte a matu mai nga ai; nang e sum masum, Na a matu langai mi; Mawshe a matu langai mi, Elia a matu langai mi, anhte gap saga, ngu nna Yesu hpe tsun wu ai. Shanhte kahpra nga ma ai majaw, shi hpa tsun na hpe n chye nga ai. Dai shaloi, Sumwi du hkrat nna, shanhte hpe ka-up nhtawm, dai sumwi hta na nsen ngoi pru nna, Ndai wa gaw ngai tsawra ai, ngai sha rai nga ai; Shi a ga madat mara mu, nga ai. Ya akajawng sha, shanhte mada yu jang, Yesu hta kaga kadai hpe mung n mu manu ai. Dai bum de nna shanhte yu hkrat wa ai shaloi, Masha Kasha si ai ni kaw na garai n hkrung rawt wa yang, shanhte mu ai hpe mung n tsun dan mu ga, Yesu shanhte hpe ginhtim da mu ai. Shi hkang da ai ga hpe sape ni hkan shatup sai, rai ti mung, Si ai ni kaw na bai rawt wa na nga ai gaw, hpa nga ai rai lu hka? ngu nna shanhte hkrai shada da san hkat ma ai.
Madu a Kabu Gara Shiga rai nga ai. 

2024: LUSHAGAM LADAW LABAN (1) NA MUNGGA

“Dai Wenyi gaw Shi hpe masha n nga ai shara, zaibru jang de pru sa na lam shadut wu ai. Shi gaw zai-bru jang e nhtoi mali-shi ya nga nga ai rai nna, Satan e gunglau ai hkrum wu ai. Shi gaw matse labye dusat ni a lapran e nga nga ai rai nna, lamu kasa ni Shi hpe yu gawn ma ai” (Mk 1:12-13).

Kalang mi na aten (30 ning jan) hta, BBC Myanmar program kaw nna America e nga ai sehkam (Yate) ni a lam tsun pru wa ai. Pyaw hpa hkum sumhpa law la ai American masha ni a lapran, pyaw hpa ni hpe kau da nna, dinghku n de ai prat, atsin sha nga nna akyu hpyi shaja ai, myit sumru ai, lu-sha gam shaja ai, bungli galaw ai, ra kadawn ai ni hpe garum ai/ lakawn ai, dai zawn re ai aprat hpe lata la nga shăman ai ni law law a lam, mau n ma re ai hku hkai dan ai. Mungkan pyaw hpa ni hpe jin mat ai ni, lu su nga mai ai ni, hpaji madang nga ai ni mung lawm ma ai. Shanhte hpa majaw shing re ai aprat hpe lăta la ma hka? Shing re ai aprat hpe lata la ai ni gaw tinang myit ra ai hku, kam ai hku nga lu ma ai n rai. Uhpung hku nga ma ai; jahkrat da ya ai tara matsun ni hpe hkan ra ma ai; shada tsang hte tsang madat mara ra ma ai. Shinggan e nga ai masha ni tinghkrai awm dawm ahkaw ahkang nga, lu su nga-mai lam nga, pyaw hpa nga, awng dang ai prat de, nga nna tam shakut nga ma ai. Shing re ai baw ni hpe kau da nna hpa majaw yate/sehkam prat hpe lata la ma ai rai ta?

Teng sha, Wenyi e shădut ya ai chyeju lu la ai ni rai ma ai. Shanhte gaw jet ai, grin ai, grau reng ai sumsing sutgan hpe hkam la lu na lam tam ai ni rai ma ai. BBC Radio report hta tsun da ai lam ni gaw, shawng sawk săgawn ngut ai hpang masha ni hpe machye machyang hti ya, gam garan ya ai rai nga ai. Hkristan makam masham a ningpawt daw maga gawn yu yang, Madu Yesu a kasi hpe yu la nna zaibru jang de du mat ai ni law law, yate/sehkam jawng ni law law nga lai wa ai. Dai ni na prat du hkra shara law law e naw nga ai.

Lu-sha gam ai/ jahkran ai ladaw hta anhte hkum nan zaibru jang de, n sa nga ai rai tim, dinghta ga na aprat hpe n kau da ai rai tim, Madu Yesu hte, sehkam ni hte bung ai hku hkan galaw lu ai lam law law nga ai. Lu-sha gam ladaw hta, tinang nang a sung la ai kraw kata e kawsi hpang gara ai lam ni hpe hkan tam na aten ladaw rai nga ai. Dinghta ga na myit ru myit tsang lam ni, hkum shan a ra marin ai myit, lawhpa ai myit, gumrawng gumtawng ai myit, madat măra shăgrit shănyem n kam ai myit, ndai zawn re ai ni a marang e khi ba hkrum ai lam ni hpe myit sumru yu mai ga ai.

Tinang nang a myit masin wenyi hpe shăchyoi shăpra la ai aten rai nga ai. Yesu a makau grup grup, matse labye ni nga ai, nga ai. Dinghta prat hta agung alau hpyen ni hte shinggrup da ai. Dinghta ga na agung alau ni hpe dang kau lu hkra akyu hpyi shaja ai aten rai nga ai. Masha hkumshan hte re ai Karai a Kasha pyi lamu kasa ni a yu gawn ai hpe hkam la ra ai. Wenyi hkrun lam hta teng sha, Karai a madi shadaw ya ai chyeju hkam la ra ga ai.
Makam masham hpung kaba ni yawng hta, lu-sha jahkran ai ladaw nga ai zawn, sehkam ni/ sehkam ni bung ai hku nga sa ai uhpung ni nga ma ai. Dinghku de ai Muslim ni pyi lu-sha gam ladaw hpe ja ja manu shadan hkan shădik ma ai. Kadun dik ai hku mahtai jaw ga nga yang, tinang nang a myit masin hpe renghkang lu na matu, Karai a man e shăgrit shănyem lu na matu, si chye ai amyu re ai lam hpe myit dum let, hpang na prat e hkam la lu na grau ai shăgrau kumhpa ni hpe myit mada let, myit masin wenyi hpe shăchyoi shăpra la lu na matu rai nga ai.

Sumru yu na matu:
 Tinang hta gawng kya grau dik ai, kăhtap shut shut re ai hpa hpa nga a ta? Dai gawng kya ai lam ni hpe shărai lu hkra tatut hpa hpa galaw na ta?
 Kahin kamun hta jaw da ai ga-shaka ni hpe ya sha sha myit dum ga ai kun? Nat Satan hte shi a amu yawng, shut hpyit mara hpe kau da ai ga-sadi, Karai a tara hpe hkan shatup na ga-sadi, dai ni hpe jaw da ga ai n rai a hka!

2024: LUSHAGAM LADAW LABAN (1) NA CHYUM LAIKA

LUSHAGAM AI LADAW HTA LABAN (1)
February 18, 2024
CHYUM MUNGGA DAW 1

Npawt Nhpang 9:8-15

Ya hti na gaw, Npawt Nhpang a laika hta na rai nga ai.
Karai Kasang gaw Noa hte shi a shadang sha ni hpe tsun wu ai gaw: Yu mu, nanhte hte nanhte a kashu kasha ni hpe mung nye a ga shaka ngai tawn da nga nngai; nanhte hte rau sanghpawli na pru wa nna, ga ntsa e nanhte hte rau nga ai. a-u, yam nga, ashu ashan hte hkrung nga ai amyu baw sumhpa hpe mung, dai ga shaka ngai tawn da nngai. Nanhte hte ngai tawn da ai ga shaka gaw, ga ndai rai nga ai: Htawm hpawng de sha-u ing ai hka hte hkrung mahkrung hte hpe ngai n jahtum kau na we ai; lamu ga hpe jahten kau na matu mung, sha-u bai n sha-ing na ni ai. Bai, Karai Kasang tsun ai gaw: Ngai nanhte a lapran e mung, shu mashi shu masha prat dingsa ngai tawn da ai ga shaka a kumla gaw, Nye a n-goilatum sumwi hta ngai tawn sa se ai; dai gaw, ngai hte ginding aga a lapran e tawn da ai ga shaka hpe, myit dum lu na matu kumla tai na ra ai. Dai re ai majaw, ga ntsa e ngai lamu mu shangun ai shaloi, dai n-goilatum gaw sumwi hta dan pru na ra ai. Shaloi ngai hte nanhte a lapran e mung, hkrung mahkrung a lapran e mung, ngai tawn da ai ga shaka hpe myit dum na ra ai.Shing rai, hkrung nga ai baw sumhpa hpe jahten kau na matu, htawm hpang de sha-u hka bai n sha-ing na ni ai.
Karai Kasang a Mungga rai nga ai.

CHYUM MUMGGA DAW 2

1 Petru 3: 18-22

Ya hti na gaw, Kasa Petru shagun dat ai laika langai hta na rai nga ai.
Hpu nau ni e, Hkristu gaw, shut hpyit mara a majaw, kalang sha mi si hkam nu ai; Karai Kasang hpang de anhte hpe woi wa lu hkra, shi ding hpring ai wa nan, n ding n hpring ai ni a matu nni nkri hkam la nu ai. Dai Hkristu gaw hkum shan hta sat kau hkrum ti mung, wenyi hta jahkrung sharawt la ai hkrum nu ai; dai wenyi hte nan pru wa yang, htawng hta rawng nga ai wenyi ni hpe shi a lam tsun shana dan nu ai. Dai wenyi ni gaw, moi shawng na Noa a prat e sanghpawli hpe naw shachyaw nga ai shaloi, Karai Kasang myit galu ai hte la nga ti mung n madat mara ai ni rai nga ma ai.Dai sanghpawli hta jawn ai ni marai matsat chyu sha, hka hku nna, hkye mawai la ai hkrum lu ma ai.
Dai hka gaw Kashin Kamun a kumla rai nga ai; kaning rai nme law, ya e nanhte mung kashin kamun hka hku rap nna, hkye hkrang la ai ni hkrum nga manit dai. Kashin Kamun dai gaw hkum shan hta kap ai hkagrwi hpe shatsai kau ya ai lam n rai; ding hpring ai myit kaw nna Karai Kasang hpe ga sadi jaw ai lam rai nga ai. Shing rai,Yesu Hkristu bai hkrung rawt ai a marang e, Kashin Kamun gaw nanhte hpe hkye hkrang la nga ai. Yesu Hkristu mahtang gaw sumsing lamu de shang wa n htawm, Karai Kasang a hkra maga e dung nga ai rai nna, lamu kasa ni, ahkaw ahkang lu ai ni hte, hpung shingkang rawng ai ni gaw, shi hpe madat mara nga ma ai.
Karai Kasang a Mungga rai nga ai.

KABU GARA SHIGA

Marku 1:12-15

Ya hti na gaw, Marku a laika hta na Kabu Gara Shiga rai nga ai.
Dai aten hta Wenyi gaw nam mali hkan de Yesu hpe woi shadut ai. Satan e gung lau ai; matse labye ni the rau nga nga nna, lamu kasa ni shi hpe galaw daw mu ai. Yawhan hpe rim la ai hpang, Yesu gaw Galile mung de sa du nna, Karai Kasang a kabu gara shiga hpe tsun shana wu ai. Shi gaw, aten ladaw dik wa ai hte, Karai Kasang a mungdan ni wa magang ra ai; myit malai lu nna, kabu gara shiga hpe kam sham nga mu, ngu nna hkaw dan mu ai.
Madu a Kabu Gara Shiga rai nga ai.

2024: PRAN WAN LADAW LABAN (6) NA MUNGGA

Manggang kap ai masha langai mi Shi kaw du sa nna, lahput hput di let, hpyi lajin ai, “Nang hkraw ai rai yang, nang ngai hpe shamai ya lu na lit dai,” ngu wu ai. 41 Yesu gaw matsan yu dum ai myit hte, Shi a lata ladawn nna, shi hpe ahtawk ya let tsun ai, “Ngai kaja wa hkraw ya nngai, mai tsai nit ga,” ngu wu ai. (Mk 1:40-41) Manggang kap ai masha ni gaw Moshe a tara hte maren, dum nta masha ni hte mung, mare masha ni hte mung hka nna, mare shingnawm e nga ra ai. Lai sa lai wa re ai masha ni hpe mu jang, “N san n seng ai wa, n san n seng ai wa” ngu nna masha ni hpe sadi jaw ra ai. Manggang kap ai masha gaw hkum hkrang n san n seng ai hta n-ga, wenyi hta mung awu asin re ai masha, dingnye lu ai masha hku nna yawng e sawn la ma ai. Dai daram myit kaji hpa, kaga hpa naw nga na rai ta?

Marku gaw Yesu hpe matsan dum ai myit hte hpring ai wa hku nna mu mada shăngun măyu ai. Manggang kap ai masha a maga myit yu ga: kanu kawa, kahpu kanau ni a tsawra matsan dum myit hte mung tsan gang mat ra ai. Hku hkau ai manang ni hte mung hka ra mat ai. Ahpye alam re ai, yu matsat na zawn re ai kaga manggang kap ai ni hte sha manang shatai mai ai. Hpyi sha nna sha asak hkrung lu na rai nga ai. Shanhte a matu kabu hpa, pyaw hpa ngu nna hpa n nga ai. Gaya ai, kaprep ai, ga-ut machyi ai, hpu hkying ai…. Hka shin shara n lu, tsi tsi ya na kadai n nga.

Shing re ai masha, Yesu lai wa ai mu jang ding-nyawm dagup, lahput hput di let shi hpe shamai ya na lam Yesu kaw hpyi nem ai. Kaga masha ni kade matsan dum tim, manggang kap ai masha a makau de kadai n kahtep sa ai. Yesu mahtang shi a lata ladawn nna, shi hpe ahtawk ya let shamai ya ai. Fransik myu sha St. Damien gaw Yesu a matsan dum chye ai myit hpe kasi hta la nna, manggang masha ni hkrai nga ai zunlawng langai de, sasana sa ai; shanhte hpe yu lakawn na matu rai nga ai. Shanhte hte ni ni htep htep nga nna shanhte sha ai zawn lu sha ai, shanhte zawn nga ai. Jahtum e shi mung manggang ana kap la ai. Shi si wa ai aten du hkra, manggang ana lu ai ni hpe tsawra myit tup hkra madun dan let, shanhte hpe yu lăkawn lai wa ai. Yesu hte San Pra ai masha ni a tsawra matsan dum ai myit hpe kasi yu la nna, manggang ana kap ai ni hpe yu lăkawn ai shara ni, ap nawng dawjau ai Jau Mama ni, shawa hpung masha ni, mungkan ting shara law law e nga ai. Yu matsat na zawn re masha ni hte nga nna shanhte hpe lakawn ai amu nang/ngai galaw gwi na kun? Hkum hkrang ana, manggang ana kap ai masha, Yesu e shamai hkrum ai masha, tinang wa she rai taw yang gaw??? Manggang hta grau ai wenyi hta kap ai shut hpyit mara, awu asin, agang chyalang, kade grau hkrit hpa n rai kun? Shut hpyit mara a majaw myit malai lu ai masha langai, Karai e mara raw dat ya ai rai tim, “Jau hpe sa madun su”, nga, Yesu a mătsun ga gaw teng sha mara raw sakramentu hpe shăang tsun ai rai nga ai.

Shămai shătsai hkrum ai hpang ”hkungga nawng ya su”, nga ai. Karai Kasang kaw na hkam la lu ai hkum hkrang mai hkam kaja lam, wenyi a shaman chyeju ni a matu gara hku chyeju htang, kaning re ai hkungga nawng jaw ga ta?

Myit sumru yu na matu:
 Ruyak jamjau hkrum ai aten ni hta pyet pyet taw nna akyu hpyi yu sai kun?
 Matsan dum chye ai myit grau grau madun lu hkra, shaman shakyang ga ai kun?
 Shut hpyit mara kaba lu shagu, manggang kap ai masha zawn tai ai lam hpe myit yu mai ga ai n rai kun?

2024: PRAN WAN LADAW LABAN (6) NA CHYUM LAIKA

 Pranwan Ladaw Laban (6)
February 11, 2024
CHYUM MUNGGA DAW 1

Jaw Jau Laika 13:1-2, 45-46

Ya hti na gaw, Jaw Jau laika hta na rai nga ai.
Madu Karai Kasang gaw Mawshe yan Arun hpe tsun wu ai gaw: Masha a hkum hta akawng ai, gyigu gu ai, pang rai hpraw ai byin yang gaw, dai wa hta manggang kap ai kumla rai nga ai. Dai wa a nma hpe yu ya na matu, hkinjawng Arun hpang de, shing n rai, shi a shadang sha hkinjawng langai ngai hpang de dai masha hpe woi sa lu na rai nga ai. Mangang kap ai wa gaw, je ai hpun palawng bu hpun let, kara hpyan ayai kau ra ai; lahta nten hpe shi magap kau nhtawm, n san n seng ai, n san n seng ai, ngu nna jahtau na rai wu ai. Ana dai garai n mai yang, shi hta awu asin a rai nga ai; shi gaw n san n seng ai rai nga nna, shi hkrai nga nga na ra ai: shi a nga shara gaw dap shinggan e rai na rai nga ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 10:31-11:1

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Tsawra ai hpu nau ni e, nanhte sha ti mung, lu ti mung, hpa galaw ti mung, Karai Kasang a hpung shingkang hpe tam let yawng mayawng hpe galaw nga mu. Masha yawng mayawng hkye hkrang la ai hkrum lu mu ga, ngai nye a akyu n tam ai sha, malaw maga a akyu tam nga let, lam shagu hta nlang hte hpe myit shapyaw ya na matu ngai shakut nga nngai. Dai hte maren nanhte mung Yuda ni a matu raitim, Greka ni a matu raitim, Karai Kasang a Nawku Hpung a matu raitim, myit kataw shara galoi mung hkum tai nga myit. Ngai gaw Hkristu a kasi hpe yu la ai zawn, nanhte mung nye a kasi hpe yu la nna, hkan galaw ai ni tai nga mu.
Karai Kasang a Mungga rai nga ai.

KABU GARA SHIGA

Marku 1:40- 45

Ya hti na gaw Marku a laika hta na Kabu Gara Shiga rai nga ai.
Manggang kap ai masha marai mi mung Yesu hpang de sa ai rai nna, lahput hput di let, Nang hkraw n yang gaw, ngai hpe shapra ya lu na rai nga ndai, ngu nna hpyi nem wu ai. Yesu gaw matsan dum ai hte Shi a lata ladawn let, shi hpe ahtawk nna, Ngai hkraw nga nngai, san pra wa nu, ngu wu ai. Shaloi jang dai manggang shi kaw nna prai mat nna, shi san pra mat ai. Shaloi Yesu gaw, de a lam kadai hpe mung, ga hkaw mi pyi nang n tsun u ga, sadi nga u; pru wa nna hkinjawng wa hpe na a hkum madun dan nhtawm, shanhte a matu sakse tai u ga, nang san pra ai a matu, Mawshe tawn da ai hte maren, hkungga wa nawng ya u, ngu nna dai wa hpe ginhtim da nhtawm tin tin shabawn dat wu ai. Shi mahtang pru wa nna dai hpe aja awa hkai dan ai hte dai lam hpe kajai gum hkawng dat wu ai. shingrai Yesu gaw, mare kata de leng leng n shang lu ai rai nna, nam mali hkan e a nga nga ai. shara magup hkan na ni mung, Shi hpang de sa du ma ai.
Madu a Kabu Gara Shiga rai nga ai.

2024: PRAN WAN LADAW LABAN (5) NA MUNGGA

“Yesu gaw ana ahkya amyu myu hpe shămai shătsai ya ai hte, nat ni hpe gawt shăden kau ya ai” (Mk 1:34). Shing rai, Karai a mungdan du ra ai lam, bai, Kawa Karai a atsam hte hpung shingkang hpe madun dan wu ai. Yesu galaw ai amu yawng, atsam marai a ningpawt gaw Kawa Karai Kasang re ai lam hpe madun dan ai”.

Shawng na chyum mungga hta Yoba gaw dinghta ga na aprat, hki ba la ai, matsan jamjau ai, asak hkrung nga ai hpa lachyum n nga ai zawn, shi hkam sha ai lam hpe ka da ai. Shi hkum nan hkrum sha ai machyi shoi chyum ai mahkrum madup kaw na mahtai shapraw da ai. Asin chyip re ai dinghta ga na asak aprat, myit mada na hpa n nga ai hku, shi a shoi chyum ai lam hpe tsun dan ai (prat a jahtum daw hta sha mahtai kaja lu la ai). Yesu Madu du sa ai aten hta sha, dinghta ga na asak aprat a lachyum hte hkye hkrang la ai chyeju a lam chye la lu ga ai.

Dinhta ga aprat, teng sha ruyak hki ba jamjau ai lam amyu myu hkrum ga ai. Karai a mungdan dinghta ga de du sai rai tim, dinghta ga kaw na machyi makaw, matsan mayan, ruyak shoi-hpa ni hpe atsai ye kabai kau na matu du sa ai n re. Nni nkri hte shoi-hpa yawng a ru pawt hpe shămai ya na matu Yesu du sa ai rai nga ai. Shi hte hkrum katut ai ni shamai shatsai ai chyeju hkam la lu ma ai. Yesu gaw ana ahkya hpan hkum hkra hpe shămai ya ai rai tim, dinghta ga kaw na ana ahkya yawng hpe shămat kau ya na matu du sa ai n rai. Shămaishătsai hkrum na matu Shi hte hkrum kătut ra ga ai. Tinang a makam masham hta hkan nna gingdan ai hte hpe teng sha lu la mai ai. Mungdan ting tsirung, tsi-gawk ni law law nga ai. Tsi hpaji mung madang tsaw wa ding-yang, mau n ma re ai tsi tsi ladat ni nga nga ai rai tim, tsirung tsi-gawk ni hta masha galoi mung hpring nga na re. N si tsi mung galoi n lu shăpraw na re. Masha gaw si wa ra ai. Machyi makaw ana ahkya law law a ningpawt gaw machye machyang n nga ai lam mi, hkum nan hkamja tara n khan kam ai lam mi, masha shada tsawra matsan dum myit n rawng ai majaw lam mi, hkamja lam hkam sha na ahkaw ahkang hpe makawp maga ai tara upade hta ra rawng ai lam mi, ndai zawn ru-pawt hkinjang law law nga ai hpe dum mai ga ai. Masha law law mung tinang a hkamja lam hpe manu n shadan,hkum nan jahten la ai ni mung law law nga ma ai.

Shada tsawra dawjau, gărum shingtau hkat na hpe Karai Kasang ra shărawng ai. Shing rai, makam masham hpung ni kaw na hpaw da ai tsi-rung tsi jaw gawk ni gaw dan san ai kumla langai rai nga ai. Petru a kani, shămai shătsai hkrum ai hte rau, shi gaw dawjau ai amu hpe galaw ai, nga, ka da ai. Asak hkrung nga dingsa, shada tsawra dawjau ai amu, shada lakawn hkat ai amu galaw na Karai e ra sharawng ai.

Machyi makaw hte tsin-yam tsin-dam gaw masha atai, masha tai ai lam a adaw achyen rai nga ai. Machyi masha law law Yesu hpe ala nga ma ai rai tim, Yesu tsun ai, “Anhte kaga mare kahtawng ni de htawt ga, dai mare kahtawng ni hkan mung Kabu Gara Shi-ga htawn tsun lu na” nga ai. Yesu hte hkrum kătut ai ni, hkum hkrang, myit masin wenyi a shămai shătsai ai chyeju hkam la lu ma ai hte, shălan shăbran ai chyeju hkam la lu ma ai.

Akyu hpyi ai ahkyak ai lam hpe mung sharin ya ai. Yesu gaw shani tup pu ba ai rai tim, shi hkrai atsin sha, shana tup Kawa Karai kaw akyu hpyi ai. Atsam marai a ningpawt Kawa Karai re ai lam hpe madun dan ai.

Sumru yu na matu:
. Machyi makaw ana ahkya ni kaw na lawt lu na matu, tinang hkum hpe tinang shawng gawn ra ai n rai a hka!
. Machyi makaw hte kaga tsin-yam shoi-hpa hkrum katut ai aten hta, dai mabyin gaw tinang hpe Karai Kasang hte grau ni htep shăngun ai kun?
. Tinang mai hkam kaja ai, myit pyaw lu ai aten hta masha ni hpe tsawra dawjau na matu Karai e jaw da ai ahkaw ahkang n rai a hka?

2024: PRAN WAN LADAW LABAN (5) NA CHYUM LAIKA

Pranwan ladaw laban (5)
February 4, 2024
CHYUM MUNGGA DAW 1

Yoba 7:1-4, 6-7

Ya hti na gaw, Yoba a laika hta na rai nga ai.
Yoba gaw shi a jinghku ni hpe htan nna tsun ai gaw: Dinghta ntsa na masha a prat gaw, majan pa na ruyak shoihpa prat, n rai nga a hka i? Masha a nhtoi ni gaw nchyang wa a nhtoi ni zawn rai nga ai, n rai ni? Mayam wa gaw shingnip hpe ndawt la ai hte, shabrai sha ai wa gaw shabrai la na aten hpe myit mada nga ai zawn, ngai gaw shata law law wa ru yak hkrum sha nngai; nji nmu hpring ai shana gaw, nye a matu san da nga ai. “Galoi wa me shana lai nna, ngai yup rawt lu na i?” nga nna yup kaleng let ngai tsun nga nngai. “Shana aten bai du na, gade lanyan nga a hka!” nga nna yup rawt ai hpang ngai tsun nga nngai. Shani tup nsin sin wa ai ahkying du hkra, ngai gale galau hkrai rai nga nngai. Nye a nhtoi ni gaw da danghkyam hta grau lawan nna, nye a matu myit mada shara n tawn da ai sha lai mat wa sai. Nye a asak gaw nbung rai nga ai hpe dum nga u; nye a myi gaw mai kaja ai hpe bai mu sana n rai.
Karai Kasang a Mungga rai nga ai.

CHYUM MUNGGA DAW 2

1 Korinhtu 9:16-19, 22-23

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, Kabu Gara ai Shiga hpe ngai hkaw dan ai majaw, nye a matu arawng mala shara n nga ai: kaning rai nme law, dai hpe hkaw dan ai gaw ngai galaw ang ai amu rai nga li ai: ngai n hkaw dan yang gaw, ari hkrum ging ai wa tai nga nngai. Dai amu hpe nye a myit hte ngai galaw sa yang gaw, ngai shabrai hpyi lu nngai; rai ti mung, nye a myit hte dai lit hpe n hkam la ai majaw, nye a lata hta ap ya sai amu hpe hkan galaw ai sha rai nga nngai. Dai rai jang, nye a shabrai gaw hpa rai nga a ta? Ngai hkaw dan ai shaloi, jahpu n hpyi ai sha Kabu Gara Shiga hpe hkaw sharin na gaw nye a shabrai rai nga li ai: dai Kabu Gara Shiga hkaw dan ai majaw, ngai lu la ang ai shabrai hpe n hkap la nngai. Shing rai, ngai gaw kadai wa a shangun ma n rai ti mung, dang lu ai daram masha law law hpe woi bang la lu hkra, yawng mayawng a shangun ma ngai tai nga nngai. N-gun kya ai ni a matu n-gun kya ai wa zawn ngai tai nga nngai. Nkau mi hpe lam langai hte hkye hkrang la lu hkra, masha yawng mayawng hta lam yawng hpe ngai hkan shatup nngai. Dai Kabu Gara Shiga a matu ndai lam yawng hte hpe ngai naw hkan galaw nga nngai.
Karai Kasang a Mungga rai nga ai.

KABU GARA SHIGA

Marku 1:29-39

Ya hti na gaw Marku a laika hta na Kabu Gara Shiga rai nga ai.
Shaloi jang dai tara jawng hta na pru wa nhtawm, shanhte gaw Yaku yan Yawhan hte rau Simun yan Andre a nta de shang wa ma ai. Ya Simun a kani hkali bu nna kaleng taw nga ai; shaloi jang shanhte gaw shi a lam Yesu hpe tsun dan mu ai. Shaloi Yesu sit sa nna, Shi a lata jum let shi hpe sharawt wu ai. Dai hkali mung kawp mat nna, shi shanhte hpe galaw daw mu ai. Ya, jan shang nna shana ahkying du jang, shanhte gaw machyi makaw hkrum ai ni hte nat kap ai ni nga manga hte hpe, Shi hpang de sa hpai tawn mu ai. Dai rai nna mare ting, dai chyinghka lam makau e sa zup hpawng nga ma ai. Shing rai ana ahkya amyu myu hte machyi ai masha law law hpe Shi shamai shatsai ya nna, nat law law hpe mung shaden kau mu ai; Shi gaw Hkristu rai nga ai hpe, nat ni chye nga ma ai majaw, Shi shanhte hpe ga tsun na ahkang n jaw mu ai.
Jahpawt manap jau jau e, nhtoi grai nhtoi yang, Shi rawt pru nna, nam na machyi shim ai shara de sa wa nhtawm, dai yang e akyu hpyi nga ai. Shaloi Simun hte shi hte rau nga ai ni Shi hpe hkan tam nga ma ai: shanhte Shi hpe hkrum nna, nlang hte gaw nang hpe tam nga ma ai, ngu nna Shi hpe tsun mu ai. Yesu gaw, grup yin hkan na mare kahtawng ni hta e ngai hkaw dan lu u ga, shara kaga de anhte sa wa sa ga; dai lam majaw ngai sa du nngai, ngu nna shanhte hpe tsun mu ai. Shaloi, Galile mung ting na shanhte a tara jawng ni hta e, Shi sa hkaw dan nna, nat ni hpe shaden kau mu ai.
Madu a Kabu Gara Shiga rai nga ai.

2024: PRAN WAN LADAW LABAN (4) NA MUNGGA

Karai a mungdan du magang ra ai, ngu, hkaw tsun sharin shaga ai Yesu gaw hkum hkrang, myit masin wenyi hta gyit hkang shăren da hkrum ai masha langai hpe shămai dat ya ai hta, Karai a mungdan du ra ai lam madun dan ai. Yesu a sasana magam hta Nat Satan a n hkru n kaja ai amu ni hpe shamyit kau nna, kabu gara ai lam, simsa ai lam, mai hkam kaja ai lam hpe jaw ya ai. Yesu a mying ningsang hta n hkru n kaja ai amu yawng hpe dang kau lu ai. Hpungtang hpaji tsaw jat wa ai prat hta, hpaji kunghpan nga sai masha ni a lapran, galu kaba nga sai mungdan ni hta, nat, wenyi, numla, ndai lam hpe kajai pyi n kam ma ai. Rai tim, ningdang nyet kau n mai ai. Sinpraw mungdan masha ni a matu, nat a amu ni, wenyi shadam, numla shadam ni nga ai lam, teng ai hku nna hkap la nga ma ai.

Nat Satan nga ai lam, wenyi mungkan nga ai lam, Hkristan makam masham e hkap la ai. Nat Satan hte jahten sharun ai amu ni teng sha nga ai lam hpe kam ga ai. Nat Satan a jahten sharun ai amu ni gaw hkrang asam law law rai nga ai; masha a hkum hkrang hpe pyi hten bya shangun lu ai rai nga ai. Machyi sawng ai majaw rai rai, myit daw myit htum ai majaw rai rai, mana mat ai zawn, nat shung ai zawn re ai kumla ni byin chye ai. Kalang lang mung gaw nat shung ai lam teng sha byin chye ai. Ginhka dawdan chye na gaw ahkyak ai.

Madu Yesu a hkaw tsun sharin shaga ai lam gaw ahkaw ahkang lu ai masha langai hku nna tsun shaga ai. Moshe hte kaga myihtoi ni gaw, “Karai Kasang ning nga ai/ shing nga tsun shăngun ai” ngu nna tsun ma ai; Yesu gaw tara a madu hku nna tsun shaga sharin shaga ai hpe masha ni mau shakawn ma ai. “N san seng ai numla ni pyi Shi daru kajet yang Shi a ga hpe madat ma ai” nga ai. Yesu gaw n-gup aga hku hkaw tsun ai sha n rai, nat mungkan, wenyi mungkan hpe dang ai wa hku nna Kasa Marku hkai dan ai.

Dinghta ga ntsa, grau nna hpaji baw hpan law law kunghpan shajang ai prat hta laklai ai hku hkaw tsun ni law law nga ma ai; lata la mai ai hpaji law law nga ai prat re. Yesu hpe laklai ai hku myit sumru yu ga ai kun? Shi a mau-hpa sharin shaga ai lam ni, chyum mungga ni hpe hti sumru ai aten ni hta, madat la ai aten ni hta, ningnan re ai ai hku hkam sha yu ga ai kun? Shi a mau-hpa atsam hpe laklai ai hku hkam sha yu ga ai kun?

Nat Satan gaw masha kaw shang lu ai, nawku jawng hta mung nga lu ai, chyum laika hpe mung lakap nna tsun chye ai lam hpe myit ga ai kun? Jăhkrit shama ai ladat hta grau nna sumnung shingdi ai alai hku, pyaw hpa ni hku gunglau ai, shada n tsen shăngun ai, n ju n dawng shăngun ai, ndai zawn agung alau hpan law law hku nna masha ni hpe jahten sharun ai malawng re ai hpe dum mai ga ai.

Sumru yu na matu:
 Nat a ginshan yaw ai lam ni kaw na lawt lu na matu shani shagu akyu hpyi ga ai kun?
 Yesu gaw ahkaw ahkang hte rai sharin shaga ai; hkye hkrang la ai kaw du lu ai lam kamsham ga ai kun?

2024: PRAN WAN LADAW LABAN (4) NA CHYUM LAIKA

Pranwan Ladaw Laban (4)
Jananuary 28, 2024
CHYUM MUNGGA DAW 1

Tara Jahprang 18:15-20.

Ya hti na gaw, Tara Jahprang laika hta na rai nga ai.
Israela a kashu kasha ni hpe Mawshe tsun ai gaw: Na a Madu Karai Kasang gaw, na a hpu nau ni hta na, ngai zawn re ai myihtoi langai mi hpe, na a matu paw pru shangun na ra ai: dai wa a ga hpe nanhte madat lu na rai myit dai. Horeb bum e hpawng ai shani e, nang gaw na Madu Karai Kasang hpe hpyi nem let, Ngai n si n ga, ya hpang de nye a Karai Kasang a nsen ngai bai n na lu ni ga; dai wan kaba hpe mung ngai bai n mu ni ga, nga nna nang tsun nit dai. Shaloi Karai Kasang ngai hpe htan nna, Israela amyu masha ni tsun ai ga mahkra htap htuk nga malu ai.
Shanhte a kahpu kanau ni hta na nang zawn re ai myihtoi langai mi hpe, shanhte a matu ngai paw pru shangun na we ai rai nna, dai wa a n-gup hta nye a ga ngai hti bang na hte, ngai hkang da mada hte maren, shi shanhte hpe htawn tsun na ra ai. Nye a mying nsang hte shi htawn tsun ai nye a ga hpe, kadai wa n madat yang, dai wa hpe ngai deng na we ai. Rai ti mung, ngai n hkang da ai ga hpe, nye a amying gang nna tsun pru gwi ai myihtoi mung, hpara shaje a amying hte tsun pru ai myihtoi mung, si lu na rai nga ai, nga nna Madu Karai Kasang gaw ngai Mawshe hpe tsun nu ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 7:32-35

Ya hti na gaw, Korinhtu masha ni hpang de San Pawlu shangun dat ai laika langai hta na rai nga ai.
Hpu nau ni e, nanhte gaw myit ru myit tsang n nga myit ga ngai ra nga nngai. Num n la ai wa gaw, Madu Karai Kasang hpe myit shapyaw ya na lam chyu sha tsang nga ai majaw, Madu a lam hta htep lahti hkan galaw shakut lu ai; 33num la ai wa chyawm gaw, mungkan lam ni hpe tsang nga ai hte, shi a madu jan hpe myit shapyaw ya na lam hkan galaw shakut ra ai majaw, myit kabrang nga lu ai. Dai hte maren, num n wa ai jan gaw, mahkawn hkawn ji zawn, shi a hkum hte wenyi chyoi pra lu na lam hpe chyu sha tsang nga ai majaw, Madu a lam hta htep lahti hkan galaw shakut lu ai. Num wa ai jan chyawm gaw mungkan lam ni hpe myit tsang nga ai hte, shi a madu wa hpe myit shapyaw ya na matu, htep lahti hkan galaw shakut ra ai. Ngai ning ngu tsun ai gaw, nanhte hpe lashoi hte zawn shingdang da ai lam n rai, garum ai lam she rai nga ai: nanhte htap htuk jaw nga ai lam madun dan nna, Madu hpe n dut n dang daw jau lu myit ga tsun nga nngai.
Karai Kasang a Mungga rai nga ai.

KABU GARA SHIGA

Marku 1:21-28

Ya hti na gaw Marku a laika hta na Kabu Gara Shiga rai nga ai.
Yesu hte Shi a sape ni gaw Kaperna-um mare de shang ma ai. Shaloi jang laban nhtoi e shi shanhte a tara jawng hta shang nna sharin shaga nga ai. Shi sharin shaga ai lam hpe shanhte mau mat nga ma ai; kaning rai nme law, laika ka ai sara ni zawn nrai, daru magam ahkang lu ai wa zawn Shi shanhte hpe sharin shaga ya mu ai. Shaloi jang, shanhte a tara jawng hta e n san n seng nat kap ai masha marai mi lawm nga ai. Dai n seng ai nat jahtau nna, Nazaret na wa Yesu e, anhte nang hte hpa seng ga ta? anhte hpe jahten na nang sa du nni? nang kadai re ai ngai chye nga n ngai, ngu wu ai. Shaloi jang Yesu gaw, Atsim sha nga u; shi kaw nna pru wa u, ngu nna shi hpe daru kau wu ai. Dai rai nna, dai n seng ai nat gaw shi hpe bu kashan shangun nna, nsen kaba hte jahtau let shi kaw nna pru mat wa ai. Shaloi yawng hte gaw mau mahka nga nna, ndai gaw hpa rai nga a ta? ning nan sharin shaga ai lam rai I? daru magam ahkang hte n seng ai nat ni hpe pyi shi htet da nna, shanhte madat mara nga ma ai, nga nna shada da tsun hkat ma ai. Shaloi jang Galile mung ting na shara shagu hkan e, Shi a lam kajai gara gumhkawng pri rai wa sai.
Madu a Kabu Gara Shiga rai nga ai.