2018:PRANWAN LADAW LABAN (26) NA MUNGGA

Hkyik hkam ai amu magam ni gaw kaji kajaw re ai kaw nna npawt hpang ai ngu ai hpe nmai malap na re. Kaji ai amu bungli ni hta pyi nkang ka ai masha gaw amu bungli kaba ni hta kangka na matu gaw nmai byin nga ai. 

Dai ni na kabu gara shinga hta Madu Yesu tsun ai hta na Shi a hpang hkan nang ai wa hpe hka gawm mi jaw ya ai wa gaw shaman chyeju teng sha lu na re hpe na la lu ga ai. Hka gawm mi gaw nra ai wa a matu, hka ntaw ntsang lu ai wa matu gaw manu jahpu nnga ai daram raitim mung, hka hpang gara ai wa a matu gaw manu dan dik ai, ahkyak dik htum rai nga ai.

Tinang a htingbu wa hpe garum shingtau ai lam ni hta myit masin kaja bang tawn da lu nna manang wa a ra kadawng ai lam ni hta kaji ai amu bungli kaw hpang nna kaba ai amu bungli ni hta shang lawm lu na matu shakut shaja sa wa lu u ga.

TENGMAN AI LAM HTA TSAP NA GA AI KUN?

San Thomas More a lam na la na re. Thomas gaw Oxford dakkasu hta hpaji sharin la nna jan mau lu la ai hpang, mung shawa uphkang rung hta amu shang galaw sai. Shi gaw magam gun ai hta grai lawan ai hte reng rawt lung wa sai. 1529 ning, Henry hkawhkam VIII gaw shi hpe England mung dan a Hkring mang daju aya hte shagrau da sai. Dai hpang myit n pyaw hpa tsin yam Thomas More a prat hta byin wa sai.

Hkawhkam Henry VIII shi a hkawhkam jan hpe jahka kau nna tara n shang ai kalang mi bai num langai mi hpe hkungran la sai. Shi a hkungran ai lam hpe ninghkap ai ni nga ai majaw, hkawhkam wa gaw arawng aya lu ai du kaba ni hpe shi a bai hkungran ai lam gaw tara shang ai, ngu ai gashaka laika hta dagam nna ta masat mahkret shangun sai.  Lama na dai laika hta ta masat ka na ningdang ai du kaba ni gaw mungdan hpe gumle gumlau di ai ni re ngu masat nna rim na lam Henry Hkawhkam wa ga shana dat sai. 

Thomas More hpang de gashaka laika hpai sa ai wa gaw Lord Norfolk rai nga ai. Kade daram tsun shanem yu ai rai tim, Thomas More myit galai ai lam n nga, ta masat mahkret na ning dang kau sai. Hpang jahtum gaw Lord Norfolk wa mung myit htum wa ai hte shi manang Thomas hpe “n dai hkungran ai lam tara shang/ n shang ngai mung n chye ai, rai tim Thomas e, nang kaw lata masat ka da ai ni a mying hpe yu yu u, nang shanhte hpe chye nga ai le, anhte galaw ai zawn nang n lu galaw ai kun? Hku hkau kanawn mazum lam a matu le” nga nna tsun sai. Thomas More gaw shi a kraw kata hta chye taw nga ai, shut ai lam hpe n dagam lu ai hte ta masat lekmat ka na ningdang kau sai. Dai hpang Thomas More gaw rim hkrum sai hte, 1535 ning July 6 ya shani sat kau hkrum sai. 

Dai ni na kabu gara shiga hta, anhte a lagaw, lata, myi ni hpe kahtam dut kau, malawk kau na Madu Yesu gaw kaja wa n tsun nga ai. Madu Yesu gaw, shi a prat na masha ni chye na lu hkra tsun ai sha rai nga nna, sak jaw ap nawng ai lam galaw let, shut hpyit mara hpe koi yen kau nna Karai Kasang a mungdan de du shang lu hkra shakut na matu shadum ai lam rai nga ai. Thomas More a mabyin hta raitim, tinang hkum hpe ap nawng kau ai, baw daw sat kau na raitim, ngangkang ai hte nga lai wa sai. Shi rim hkrum ai hpang e, shi a kasha hpang de laika ka da ai hta shi a myit kraw kata hta mung grai myit yak ai lam byin pru sai. 

Dai hta;

Tsawra ai sha Meg e,   

Ngai gawng kya ai hte manu mana hkrit kajawng nga ai ndai aten hta rai tim, Karai Kasang hpe kam shut na lam gaw n nga na re. N bung laru hpe mu jang kamsham myit kya wa ai hte hka de lup wa ai kasa Petru, Madu Yesu hpe bai shaga ai hte shi a lata hte bai dun sharawt la ya ai hpe myit dum nna, ngai mung Hkristu a garum shingtau la na hpe kam sham let hpyi nem nga nngai. Dai re majaw tsawra dik ai she e, Ah Wa hta byin wa na re ai lam ni a majaw ngai sha a myit hta ru yak ai lam n byin nu ga. Karai Kasang myit ra ai hta kaga hpa mug n byin lu ai. Hpa mi byin ai raitim, kade n kaja ai mi zawn raitim, teng sha kaja dik ai lam re ngu Ah Wa hkap la nngai. 

Tsawra ai Wa, Thomas More,

Dai ni na kabu gara shiga gaw ndai gasan ni tinang hkum hpe san na matu saw shaga nga ai. Shut hpyit mara de woi sa wa ai agung alau lam ni hpe tawt lai lu na ngai kade wa n-gun ja nga ta? Kade daram yak hkak, jahkrit shama ai raitim, tinang a tengman ai kamsham myit a n tsa ngang ngang tsap lu na ngai n-gun rawng nga ai kun? Karai Kasang a mungdan a matu ngai hta na manu dan dik ai lam hpe asum hkam na ngai ra sharawng nga ai kun?

2018:PRANWAN LADAW LABAN (26) NA CHYUM LAIKA

PRAN WAN LADAW HTA LABAN 26

30th September 2018

CHYUM MUNGGA DAW 1

Bu Hkawm 11:25-29

Ya hti na gaw, Buhkawm laika hta na rai nga ai.

(Mawshe gaw amyu masha ni a agyi salang sanit shi hte hpe jahpawng la nna, Shawa Ginsum a grup e tsap shangun wu ai.) Madu gaw sumwi hte yu wa nna, Mawshe hta rawng ai atsam marai hta na la nhtawm, agyi salang sanit shi a ntsa de mara ya wu ai. Dai atsam marai shanhte a ntsa de yu hkrat wa jang, myihtoi htoi ma ai; dai kaw nna myihtoi bai n htoi lu ma ai. Dai salang hpung hta lawm ai, Eldad hte Medad mying ai marai lahkawng gaw, jahpan hta lawm ti mung, Ginsum de n sa ai sha dap e nga nga ma ai. Dai salang yan a ntsa de mung dai atsam marai yu hkrat wa nna, shan gaw dap kata e myihtoi htoi ma ai. Shaloi shabrang langai mi gat sa nna, Eldad yan Medad gaw dap kata e myihtoi htoi nga ma ai, nga nna Mawshe hpe tsun dan wu ai. Dai rai nna, shabrang apart kaw nna Mawshe a hkringmang tai ai, Nun a kasha Yawshu gaw, Nye a Madu, Mawshe e, shan hpe jahkring kau u, ngu nna Mawshe hpe tsun wu ai. Mawshe chyawm gaw, Nye a matu nang manawn nga nni? Madu a amyu masha yawng the gaw, myihtoi hkrai rai nga mu ga; Madu gaw shi a atsam marai hpe shanhte yawng a ntsa de mara jaw ya u ga law, ngu nna tsun wu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Yaku 5:1-6

Ya hti na gaw, Kasa Yaku shagun dat ai laika hta na rai nga ai.

Sut su ai ni e, ngai nanhte hpe tsun ai ga hpe madat mara la mu: Nanhte a ntsa e du magang ra ai tsinyam majaw, hkrap shabam nga mu. Nanhte a sutgan mahkra yat mat wa nna, nanhte a hpun nba hpe manut e sha kau ma nu ai. Nanhte a ja hte gumhpraw hta pyi, nhkan jung nga ai; dai nhkan mung nanhte a mara a lam sakse hkam ya ai hte, nanhte a hkum shan hpe sha kau na ra ai. Shing rai, hpang jahtum na nhtoi ni a matu, wan grung ai zawn re ai sutgan hpe nanhte mahkawng da manit dai. Yu mu, nanhte a yi hkauna ni hpe dan shagun nhtawm, bungli galaw ai ni a shabrai hpe nanhte hkalem sha kau manit dai; dai ni a shabrai gaw jahtau nga ai hpe mada la mu; mam dan ai ni a garu ai nsen mung, zawnawng zawwa up ai Madu a na hta e hkrang shang wa sai hpe dum chye mu. Nanhte gaw ga ntsa e n dut n dang ai hku lu sha nna, pyaw daw hkrai kadaw myit dai; sat ai shani du ni ti mung, dusat dumyeng zawn, nanhte a myit dik hkra lu sha manit dai. Ding hpring ai ni hpe mung nanhte daw dan nna sat kau manu ai; shanhte gaw nanhte hpe hkum shingdang lu sai n rai.

Ya hti ai gaw, Karai Kasang a mungga rai nga ai.

KABU GARA SHIGA

Marku 9:38-43. 45. 47-48

Ya hti na gaw, Marku a laika hta na Kabu Gara Shiga rai nga ai.

Sape Yawhan gaw Yesu hpe, Sara e, anhte kaw n hkan nang ai masha langai mi na a amying hte nat shaden kau ai hpe anhte mu hkrup saga ai, rai ti mung, anhte kaw n hkan nang ai majaw, shi hpe hkum kau ga ai, ngu nna tsun wu ai. Yesu mahtang, Shi hpe hkum hkum kau mu: nye a amying hte lamik kumka galaw ai wa gaw, nye a lam hpe n kaja ai hte shatan kau na n rai. Anhte a gumlau maga e n nga ai wa gaw, anhte a hpang maga nga ai wa rai nga ai. Nanhte hpe ngai teng teng tsun made ai gaw: Hkristu kaw hkan nang ai sape ni rai nga myit dai, nga nna nanhte hpe ntsin htinggap mi jaw ai wa kadai mung, shi a shabrai hpe n lu la na n rai.

Lam mi gaw, Ndai kam sham nga ai ma kaji ni hta na langai mi hpe, myit kataw shangun ai wa kadai rai ti mung, shi a du hta htumrin kaba noi nna, nawng hta kabai bang kau na gaw, shi a matu grau nna mai nga ai, na a lata nang hpe mara galaw shangun yang gaw dai hpe kahtam di kau u: lata lahkawng hkum ai hte ngarai mung na n si n krip ai wan de shang na hta, lata hten ai hte asak hkrung ai de shang na gaw grau mai nga ai. Na a lagaw nang hpe mara galaw shangun yang gaw, dai hpe kahtam di kau u; lagaw lahkawng hkum nga ai hte, ngarai mung de jahkrat kau ai hkrum na hta, lagaw hten ai hte asak hkrung ai de shang na gaw, grau mai nga ai. Na a myi nang hpe mara galaw shangun yang gaw, dai hpe malawk kau u; myi lahkawng maga hkum ai hte, byet n si nna wan mung n si n krip ai, ngarai mung de jahkrat kau ai hkrum na hta, myi maga sha nga ai hte, Karai Kasang a mungdan de nang shang na gaw, grau mai nga ai.

Ya hti ai gaw, Madu a Kabu Gara Shiga rai nga ai.

2018:PRANWAN LADAW LABAN (25) NA MUNGGA

Mai kaja ai mahkra hte hpring tsup ai Karai Kasang a yaw shada, ra sharawng ai gaw anhte shinggyim masha ni a rasharawng ai hte shai chye nga ai. Shinggyim masha ni a myit gyip ai majaw dam lada ai hku mu chye na matu yak hkak nga ai.

Karai Kasang a man e kaba dik htum ai masha gaw shinggyim masha a man hta kaji kadun ai zawn re ai ni rai nga ai. Myit shagrit shanem chye ai, manang wa hpe tsawra myit madun chye ai, manang wa a akyu ara a matu sakjaw ap nawng chye ai wa gaw Karai Kasang a man hte kaba dik ai ni rai nga ai. Hpa majaw nga yang Karai Kasang a man e kaba dik htum ai ngu ai hpe tinang masat la, tam la nmai nga ai. Bai nna kaba dik htum ai byin hkra nga nna yaw shada let nmai shakut la nga ai.

Anhte a asak aprat hta kaji dik htum ai ni hpe garum shing tau let Karai Kasang hpe kam sham daw jau let Karai Kasang man hta kaba dik htum ai ni byin tai lu u ga.

GRAU HTUM AI WA

“Karai Kasang a mungdan hta kaba htum ai ngu na ni gaw ma kaji ni rai nga ai”

Kalang mi hta grai sut su ai hte masha ni hpe mung grai garum tsawra chye ai masha langai mi nga ai. Shi gaw, shi a mani shapyaw chye ai, kaja ai kasi hte shawang tsawra myit kaba a majaw mying dan hkung ai wa rai nga ai. Masha ni myit ru yawn hkyen hkrum ai aten shi kaw sa nna myit shapyaw la lu ma ai. Shi gaw kaja ai hku sha mu mada chye ai ngu masha ni hkap la ma ai. Lani mi akajawng sha shi si mat ai majaw, hku hkau chye ai masha ni mau mat ma ai. Bai nna, masha ni n ju nna sat kau ai kun, hpa majaw si wa ai rai kun? Shadu ai lam law law nga nga sai. Dai aten, shi hpa majaw si mat ai hpe daw dan la lu nna shana dat ai majaw masha ni grau mau mat sai. Shi hkum shi sat si ai da!

Na ai hte, masha ni n kam lu ma ai. Dai daram, chye pyaw ai masha wa kaning rai hkum nan sat si mat ai kun? Raitim, hpang de chye la lu ai gaw, shi gaw loi mi pyi pyaw lu ai masha n rai ai da. Shi masha ni hpe mani pyaw hkra galaw ai gaw, shi a kraw kata hta nga ai garen gari lam, myit machyi ai ni hpe magap makoi da lu na matu rai nga ai. Shi gaw manu mana myit yawn hkyen nna, n kaja ai ningmu hte sha yu ai wa mung re da. Raitim, shi gaw kung zet ai wa re ngu madun lu na matu mani pyaw hpa tsun jahta let shakut lai wa sai. Shi naw kaji nga yang, pyaw pyaw sha rai nga chye ai wa rai nna dai zawn rai n nga yang masha ni shi hpe myit htum myit daw mat na hpe mung hkrit nga ai majaw a pyaw sha rai nga dan lai wa sai.

Myit pyaw lu na matu hka hpung yawt ai wa gaw hkrit nna rai rai, masha ni mu mada u ga ngu nna rai rai, n-gun atsam kaba dat let hpung yawt shakut sai. Anhte law law wa dai zawn rai chye nga ai. Grau nna chye chyang, kung zet ai wa gaw hka de amai sha yu wa nna grau kaja ai hku hpung yawt ai wa byin tai lu na re. Dai majaw, anhte hkum hpe ap tawn da let shakut sa wa na ra ahkyak nga ai. Ndai mungkan ga a n-gun atsam gaw shagyeng shama nna lu ma ai. Tinang hkum nan n-gun dat, ja gumhpraw ma hkam, kaga masa ni hku nna dip da lu jang she, masha (snr) masa lam lama ma gaw tinang myit ra ai zawn rai wa na re.

Dai zawn re ai hpe, jawngma n kau mi manang wa hpe aroi ara di ya ai jawng wang hta, daru magam grai lang ai kanu kawa nga ai nta hta, hpung woi ningbaw ni hpung masha ni hpe grai dip da ai shaloi, sut masa galaw shakut ai ni a lapran, mungdan shada htingrai htingrat tsun shaga ai ten ni hta mu lu na re.

Sape ni shanhte shada, gadai wa grau dik rai na kun nga tsun jahta ai hpe Yesu chye ai lam dai ni na kabu gara shiga hta lawm nga ai. N-gun atsam rawng dik kadai rai? Madu Yesu gaw ma kaji langai mi hpe shaga la nna, shanhte a kaang e shatsap tawn n htawm, dai ma hpe pawn la let, “Makaji ni hta na ndai zawn re ai ma marai mi hpe, nye a mying majaw hkap la ai wa kadai mung ngai hpe hkap la nga ai”, ngu tsun wu ai. Karai Kasang a mung dan hta kaba htum ai ngu na wa gaw dai zawn rai san seng ai ma kaji rai nga ai. Ma kaji ni hta shanhte shada n ju n dawng rai na, mying kaba gum rawng shangun na hpa degree, sut su ai lam, awng dang ai lam n nga nga ai. Anhte hpe ging hka ya ai lam lama ma hpe galoi mung a tam nga chye nga ai. Raitim, anhte hta nga ai garen gari lam hte hkrit kajawng ai lam ni hpe hkap la ai rai yang, zin lum ai lam hpe tam na mai nga ai. Anhte hkrit kajawng ai rai yang, n-gun atsam, daru magam hpe tam chye nna, shada madat mara ai lam n nga mat sai. Raitim, anhte kaja wa madat la ai rai yang, yawng a kraw kata hta rawng ai, hkrit kajawng ja ai lam hpe mu tam na re. Ma kaji ni gaw ga shaga n chye shi ai ten rai tim, masha ni hte matut mahkai na myit rawng nga nna, machyi la hkrum ai rai tim, lawan bai shalan shabran la chye nga ai. Shanhte gaw, tinang hkum maga la na, (snr) mayam byin nga na matu, sut su ai lam, daru magam, arawng sadang, lit magam, hkrang sumla hpa mung n lu nga ai.

Sawn sumru mai ai lam: Ngai a sak hkrung nga sa lam (snr) masha kaga hte kanawn mazum lam ni hta ngai a arawng sadang (snr) hpa arawng aya mung n nga ai hpe jai lang nga ai kun?

2018:PRANWAN LADAW LABAN (25) NA CHYUM LAIKA

PRAN WAN LADAW HTA LABAN 25

23rd September 2018

CHYUM MUNGGA DAW 1

Hpaji Byeng-ya 2:12,17-20

Ya hti na gaw, Hpaji Byeng-ya laika hta na rai nga ai.

Tara n lang ai ni gaw, tinang a kraw lawang hta ning nga ma ai. Ding hpring ai wa gaw anhte hpe sharu shatsang ai hte, anhte a lam hpe ningdang kau ai majaw, shi hpe shinggrup nna htim ga. Anhte a tawt lai ai amu a majaw, shi anhte hpe daru shadum nna, ji woi ni a matsun maroi lam ni hpe n hkan shatup ai majaw, shi anhte a ntsa de mara shangun da nga ai. Ding hpring ai wa tsun ai ga tengman rai nga ai kun, naw yu yu ga; shi hta nan gara hku byin wa na hpe anhte la yu ga. kaning rai nme law, ding hpring ai wa gaw Karai Kasang a kasha rai yang gaw, dai Madu shi hpe maga nna, shi a hpyen ni a lata hta na shi hpe hkye mawai la na ra ai. Dai rai nna, shi hpe zingri nna, nni nkri jaw ai hku shi hpe chyam yu ga. Shingrai, shi a sumnung shingdi ai hte shakut sharang ai myit, gade wa galu kaba nga ai hpe anhte chye lu na ga ai.  Dai ding hpring ai wa hpe kaya kahpa re ai hku anhte sat kau ga; kaning rai nme law, shi nan tsun sai hte maren, lam shagu hta e Karai Kasang shi hpe makawp maga la na ra ai, nga nna n hkru ai ni tinang a kraw hta e tsun nga ma ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Yaku 3:16- 4:3

Ya hti na gaw, kasa Yaku shagun dat ai laika hta na rai nga ai.

Hpu nau ni e, ladu lai ai hku manawn masham ai hte, arawng sadang ra marit ai lam nga yang, kashuk kashak hte, n hkru n kaja ai amu amyu amyu byin pru nga ai. Ntsa de na hpaji byeng-ya chyawm gaw, shawng e san pra san seng rai nga ai; dai hpang e, htinglu htinglai ya chye ai, sumnung shingdi ai hte, manang wa a akyu hpe tam nga ai; matsan dum la ai myit rawng nga nna, mai kaja ai amu amyu myu hpe hkan galaw nga ai; dai gaw, myiman n lata ai hte hpyi hpun n chye ai hpaji byeng-ya rai nga ai. Ngwi pyaw simsa ai hpe shabyin ai ni gaw, sumnung shingdi ai nli gat hkai da nna, dai hta na ding hpring chyoi pra ai asi law law si pru na ra ai. Nanhte hta e ga li ga law ai hte, dangrang hkat ai lam ni kanang na pru wa ma ta? Nanhte a daw shan ni hta e gasat nga ai, marin marit ai hte maren, n lu la ai majaw, sat kau na jin jin rai nga myit dai. Nanhte hta manawn ai myit n shadik lu ai majaw, kashun la na matu, ga law ai hte gasat nga myit dai. Nanhte akyu n hpyi ai majaw, ra ai hte maren n lu la myit dai. Nanhte hpyi timung, nanhte a pyaw daw lam ni hpe grau nna hkan lu na matu, n htap n htuk ai hte n ang ai hpe hpyi nga ai majaw, n lu la myit dai.

Ya hti ai gaw, Karai Kasang a mungga rai nga ai.

KABU GARA SHIGA

Marku 9:30-37

Ya hti na gaw, Marku a laika hta na Kabu Gara Shiga rai nga ai.

Yesu hte shi a sape ni dai bum de nna yu wa ai hpang, Galile mung hku lai sa wa ai; rai timung, shi a sape ni hpe sharin achyin ya nga ai majaw, shi lai sa wa ai hpe kadai mung n chye la u ga, shi ra nga ai. Yesu shi a sape ni hpe, Masha Kasha gaw masha ni a lata de ap kau ai hkrum nna, shanhte shi hpe sat kau na mara ai hte, sat kau ai hpang  masum ya nhtoi hta shi bai hkrung rawt na ra ai, ngu nna tsun dan mu ai. Shanhte mahtang dai ga hpe n chye na timung, shi hpe san na hkrit nga ma ai. Dai hpang shanhte Kaperna-um de du ma ai. Nta nhku de rawng nga yang, Yesu shanhte hpe, Nanhte lam hkan e, hpa lam tsun hkat nga myit ta? ngu nna san mu ai.

Sape ni mahtang atsinsha nga ma ai; kaning rai nme law, Grau kaba ai wa kadai mahtang rai kun? nga nna lam hkan e tsun hkat masai. Shaloi Yesu dung nna, sape shi lahkawng hte hpe shaga la nhtawm shanhte hpe, Grau mayu ai wa kadai rai ti mung, yawng a hpang na wa hte, yawng a ali ama tai wa na ra ai, ngu nna tsun mu ai. Bai, ma kaji langai mi hpe Shi shaga la nna, sape ni a ka-ang e shatsap tawn wu ai; dai ma hpe magra let Yesu shanhte hpe, Ndai zawn re ai ma kaji langai mi hpe, nye a amying majaw hkap la ai wa kadai mung, ngai hpe hkap la ai sha n rai, ngai hpe shangun dat ai wa hpe she hkap la ai rai nga ai.

Ya hti ai gaw, Madu a Kabu Gara Shiga rai nga ai.

ATEN LADAW A KUMLA HPE SAWN SUMRU AI

Lai wa sai aten hta, Wasarabyin Yawhan XXIII gaw, “aten ladaw a kumla hpe sawn sumru yu ai” lam gaw Karai hpaji hpe hkaja ai lam re ngu tsun lai wa sai. Dai zawn rai galaw ai a marang e, Karai Kasang a lam lama ma garai n tsun shi yang, Mungkan n tsa byin nga ai lam ni hpe shawng madat sumru yu nna, hpan Madu anhte hpe hpa tsun mayu ai lam na la na ra ai. Dai hta, Karai Kasang gaw n dai Mungkan n tsa hta a hkrung nga ai rai nna, shinggyim masha ni a mahku mara ai hta mung Shi lawm nga ai hpe dinglik yu ai a marang e, Karai Kasang hpe grau chye chyang wa na rai nga ai. 

Dai ni na kabu gara shiga hta mung, Madu Yesu gaw, aten ladaw hpe maram yu ai hku nna, makau grup yin hta hpa byin nga ai kun, masha kaga ni shi hpe kadai wa re ai nga nna myit ma ai lam san yu sai. Sape n kau mi masha ni myit ai lam hpe mahtai jaw ya sai. Dai hpang Madu Yesu gaw jet ai machye machyang hte hpring tsup ai hte Petru hpe, “ngai kadai rai nga ai, nang tsun lu na i? ngu san ai. “Na a myit kraw kata hta, kaning rai myit nga ai kun? ngu sawn la mai nga ai. Petru a mahtai gaw Karai Kasang a chyeju hte hpring tsup nna Madu Yesu hpe hkye la Madu re lam htai ya sai. Dai tengman ai mahtai majaw, “nang Petru rai ndai, dai lung hkrung n tsa hta ngai a Nawku Hpung hpe ngai de da na nngai” nga nna arawng aya jaw hkrum sai. Dai aten hta, Petru gaw kabu pyaw myit hte hpring tsup nna, Madu Yesu jaw ya sai makam masham hte hpring tsup wa sai. Dai re ai majaw, “dai masha kasha gaw nni nkri law law wa hkrum nna, agyi salang ni, hkinjawng agyi ni hte laika ka sara ni e, nyet kau ai hkrum na hte, sat kau ai hkrum n htawm.......” nga ai na jang hkrit kajawng nu ai.  Petru kam lu nna Madu Yesu tsun ai ga hpe hta la nu ai. 

Raitim, Petru hpe, “Satan e, nye a hpang de sit mat wa mu” nga dat sai. Petru ndai ga a majaw kaning rai mat nna, ngam ai sape ni hta mung myit yak mat na re. “Ngai gaw shi a matu kaja dik ai she galaw ya mayu ai wa, dai zawn rai prat htum mat na hpe makawp maga ya mayu ai she re wa, masha ni shi hpe hkungga lara di na she ngai ra sharawng ai wa, Sara hpe kaja wa n chye na mat sai, ngai myit ai hte gaw grai shai nga ai. Hkyela Madu nni nkri yubak hkam ra ai, nga ai gaw lachyum n pru ai, kajawng shangun ai lam she re” nga nna Petru myit yu na sai. “Karai Kasang hte seng ai lam n rai, masha hte seng ai lam hpe sha nang myit nga ndai” nga Madu Yesu tsun nu ai. Tsun mayu ai gaw, Karai Kasang a madang hte n rai, shinggyim masha a madang hte tara jeyang ai lam ngu mayu ai re. Masha a madang gaw hpa rai na kun? Amai sha pyaw pyaw rai nga mayu ai, hpa yak hkak ai lam hpe mung n ra ai, prat hta ngwi pyaw simsa mayu ai. Raitim, Karai Kasang a madang hte gaw shai nga a hka! Nni nkri yubak kaw nna lu la ai ngwi pyaw ai lam, yawn hkyen ai kata kaw nna lu ai jet ai kabu gara lam, si hkrung si htan a majaw lu la ai htani htana asak hpe Madu Yesu gaw madun ya sai. Jet ai ngwi pyaw simsa lam gaw lu su mying kaba ai masha ni myit da ai hte shai la nga ai. Pyaw dik ai lusha poi kaba, grai manu dan ai mawdaw ni, dum nta ni a majaw “Ngwi Pyaw” lu ai n rai, dai lam yawng a kata lam de, n ngwi n pyaw ai, kaman sha re ngu hkam sha ai, myit daw myit hten ai lam ni, tsa chyaru ya, nang hpam lu sha mat ai, kun dinghku hka bra ai, mang hkang law la ai kashu kasha ni hte manu mana garen gari hkam sha ai mabyin ni nga nga ai. 

Ndai mungkan ntsa hta, nam pan hte hpring ai yupra, hpung shingkang hte hpring ai lam n maw, n nga nga ai. Dai hpe Madu Yesu gaw shi a prat hte nan anhte hpe sharin ya mayu ai teng man ai lam mung rai nga ai. 

Sawn sumru yu mai ai lam: Gara madang hpe ngai a prat hta hkan nang hkan galaw nga a ta? Masha a madang hte kun? Karai Kasang a madang hta kun?

2018:PRANWAN LADAW LABAN (24) NA CHYUM LAIKA

PRAN WAN LADAW HTA LABAN 24 

16th September 2018

CHYUM MUNGGA DAW 1

Esaia 50:5-9

Ya hti na gaw, Esaia a laika hta na rai nga ai.

Madu gaw nye a na hpe hpaw ya ni ai. Ngai mahtang lale kau ai hte kanut mat wa ai n rai. Ngai gaw kayat ai ni hpe nye a shingma, shabyi mun baw ai ni hpe nye a shabyi ap ya nngai; asawng asang di ai ni hte, mayen mahtaw bun ai kaw na, nye a myiman hpe kayin kau ai n rai. Kaning rai nme law, Madu gaw ngai hpe garum na ra ai. Dai rai nna, asawng asang di ai lam ni gaw, ngai hpe myit n jahtum kau nga ai. Ngai kaya kahpa n hkrum lu na hpe ngai chye ai majaw, nye a myiman hpe nhpai lung zawn ngai shatai da nngai. Ngai mara n lu ai hpe madun dan lu ai wa gaw, nye a makau e nga ai. Dai rai nna, ngai hpe tang shawn mayu ai wa kadai rai timung, tara rung de sa nna tsun hkat ga. Ngai hpe mara shagun ai wa kadai rai ta? Dai wa gaw ngai hpe sa tsun ru ga. Yu u, Madu Karai Kasang ngai hpe garum na ra ai; ngai hpe daw dan na kadai gwi nga a ta?

Ya hti ai gaw, Karai Kasang a mungga rai nga ai.

CHYUM MUNGGA DAW 2

Yaku 2:14-18

Ya hti na gaw, Kasa Yaku shagun dat ai laika hta na rai nga ai.

Nye a hpu nau ni e, Marai langai ngai, Ngai gaw kam sham nga nngai, nga nna tsun timung, mai kaja ai amu bungli n galaw yang gaw, hpa akyu nga a ta? Makam masham gaw dai wa hpe hkye hkrang la lu a ni? Hpu nau langai ngai, shing n rai, kajan langai ngai, hpun palawng atsawmsha n lu hpun ai hte, asak bau na shahpa n lu yang gaw, nanhte hta na masha langai mi gaw, Ngwi pyaw ai hte wa ma sit; lum nga mu, hkru hkra sha mu, ngu nna dai yan hpe tsun ti mung, hkum hte asak a matu ra nga ai hte maren, n jaw dat yang gaw, hpa akyu nga na a ta? Dai hte maren, Makam masham hta mai kaja ai amu bungli n lawm yang gaw chyasi rai nga ai. Dai zawn re ai hpu wa hpe ndai hku tsun na ra ai; Ngai gaw kam sham nga nngai; nang mahtang mai kaja ai amu bungli galaw nga ndai, nga nna nang tsun nit dai. Ya, mai kaja ai amu bungli langai mi pyi n galaw ai, na a makam masham ngai hpe madun dan rit; shaloi, ngai galaw ai mai kaja ai amu ni nang hpe madun dan ai hte, nye a kam sham ai lam madun na de ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 8:27-35

Ya hti na gaw, Marku a laika hta na Kabu Gara Shiga rai nga ai.

Yesu hte shi a sape ni gaw, Kesare Hpilipi a grup yin na kahtawng ni hpe kawan na matu rawt sa wa ma ai. Shanhte hkawm sa wa nga yang, Yesu shi a sape ni hpe, masha ni, ngai hpe kadai wa re ai shadu nga ma ta? ngu nna san mu ai. Sape ni htan let, masha nkau mi gaw, Yawhan Baptista re ai; kaga hte gaw, Elia re ai; bai kaga hte gaw, myihtoi ni hta na langai mi rai nga ai, nga nna tsun ma ai, ngu nna shi hpe tsun dan mu ai. Bai Yesu shanhte hpe, nanhte mahtang ngai hpe kadai wa re ai, shadu nga myit ta? ngu nna san mu ai. Petru htan let, nang gaw Hkristu ngu ai Karai Kasang a Chyoi pra ai Wa rai nga ndai, ngu nna shi hpe tsun wu ai. Shaloi Yesu gaw, shi a lam kadai hpe mung n tsun dan u ga, shanhte hpe ginhtim da mu ai.

Dai aten kaw nna, Masha Kasha gaw nni nkri law law wa hkrum nna, du salang ni, hkyingjawng agyi ni hte tara sara ni e nyet kau ai hkrum na hte, sat kau ai hkrum nhtawm, masum ya nhtoi hpang e bai hkrung rawt wa na lam, shi shanhte hpe sharin achyin hpang mu ai. Petru gaw, shi hpe woi la nna daru shadum wu ai. Yesu mahtang kayin wa ai hte, shi a sape ni hpe mada yu let, Petru hpe, Satan e, nye a hpang de sit mat wa u; Karai Kasang a lam hku n rai, masha a lam hku sha nang myit nga ndai, ngu nna daru kau wu ai. Bai shawa masha ni hte shi a sape ni hpe Yesu shaga la nna shanhte hpe tsun mu ai gaw; ngai hpang de hkan sa mayu ai wa kadai rai timung, tinang hkum hpe n dang kau nna, shi a wudang hpai let, ngai kaw hkan nang ru ga. Tinang asak hpe hkye la mayu ai wa kadai mung, asak sum na ra ai; nye a matu hte kabu gara shiga a majaw, asak sum ai wa chyawm gaw, dai hpe hkye la lu na wu ai.

Ya hti ai gaw, Madu a Kabu Gara shiga rai nga ai.

2018:PRANWAN LADAW LABAN (23) NA MUNGGA

Karai Kasang jaw ya ai shaman chyeju gaw anhte hta law la ai hpe ndum nshai ai byin chye nga ai. Shani shagu na nga sa ai lam hta mayak mahkak law law nnga ai sha nga sa lu ai. Tinang galaw mayu ai amu bungli ni hpe galaw lu ai gaw sung sung myit yu yang Karai Kasang a shaman chyeju nan rai nga ai.

Lu la sai Karai Kasang a shaman chyeju hpe shamat kau ai shaloi she manu dan ai lam hpe dum chye lu nga ai. Hkamja lam hpe shamat kau ai shaloi, lu ai arung arai hten za mat wa ai shaloi she manu dan ai ngu ai hpe grau chye lu nga ai.

Anhte a sak hkrung nga sa ai lam hta Karai Kasang jaw ya ai shani shagu na shaman chyeju ni hpe dum shai let manu shadan lu na matu hte grau akyu pru ai hku nna jai lang lu na matu shakut shaja sa wa lu u ga.

MYI NMU, NA NNA AI NI TAI NGA GA AI KUN?

Anhte ni a myi n mu, Na n na ai lam hpe Madu Yesu gaw shamai shatsai ya mayu nga ai.

“Oh, Wa Karai Kasang e, Na lahpang ai ni a ru yak ai lam gaw, masha law law wa shanhte hpe mang hkang jaw ai ni ngu mu mada ai lam rai nga ai. Dai masha ni, myi kyaw ai ni hte chyahten labye ai ni hpe gaw matsan dum ma ai. Raitim, na nna ai ni hte gaw masin n-galu ma ai majaw shanhte gaw manang n tam ai sha nga na htap htuk ai ngu myit la ma ai” (William Barclay)   

Masha law law, myi n mu ai gaw na nna ai hta grau sawng ai ngu hkam la ma ai. Raitim, myi mung n mu, na mung n na ai Helen Keller gaw na nna ai mahtang grau nna dingbai dingna jaw ai ngu myit la sai. Nang n-na lu sai nga yang, n dai mungkan n tsa lam hpa n chye lu sai. Radio hpaw da ai mung kaman rai mat sai. TV yu ai mung lagawn hpa rai sai. Masha kaga hte mung jahta na n mai byin mat sai. Dai hpang gaw, garen gari nga hkam sha na re. 

Ndai zawn rai na nna ai ni a mabyin gaw daini na kabu gara shiga hpe grau nna chye na shangun sai. Madu Yesu shamai shatsai ya sai, dai na nna ai hte ma-a ai wa kade daram myit pyaw na lam anhte hpe chye shangun sai. Shi a prat hta shawng nnan hkam sha lu ai rai wa sai. Rai yang, “hpa majaw Madu Yesu gaw na hpang n-na, ma-a ai wa hpe shamai ya ai kun? Shawng nnan, anhte dai ni na la sai, myihtoi Esaia laika hta, hkye hkrang la ai Karai Kasang du sa ai shaloi, “myi hten ai ni myi mu lu nna, na n-na ai ni na la lu na mara ai” nga ai. Dai ma-a nna, na n na ai wa hpe shamai ya ai marang e, Madu Yesu gaw, myihtoi Esaia tsun da ai, Hkyela Madu du sa jang chye lu na lamik kumla lahkawng hpe hkum tsup shangun sai. Lahkawng ngu na hta, Madu Yesu gaw tsawra matsan dum myit hte hpring ai wa, myi n mu, na n na ai hpe tsi shamai ya ai wa re ai hpe chye shangun sai. Madu Yesu gaw shi hpe shawa masha hpawng kaw na shapraw la ai. Na n na ai ni gaw kalang lang gaya hkrum chye ma ai. Masha kaga ni san ai loi dik ga san ni hpe pyi n htai lu ma ai hte masha kaga hte n bung ai, nga shara n nga ai ngu hkam sha chye ai. Dai majaw, shawa hpawng kaw nna shi hpe shaga shapraw la ai a marang e, Madu Yesu gaw kaja wa matsan dum lama ai lam madun dan sai. 

Hpang jahtum, dai, na n na ai hte ma-a ai wa hpe shamai ya ai lam gaw, dai ni na nang, ngai a matu myit mada shara rai nga sai. Dai ni na anhte law law wa mung, hkum hkrang hta n rai tim, Wenyi lam hta na n na, ma-a ai ni rai chye nga ga ai. Madu Yesu hpe anhte a shinglet hkra ya na, shi a layung anhte a na hta achyaw bang ai hte, wenyi lam tsun ai, na la na matu dai ni na kabu gara shiga gaw anhte hpe shadum ya nga ai. Teng sha tsun ga nga yang, Chyum Mungga hpe aten loi mi jaw nna hti na, sumru yu na, akyu hpyi nna anhte a n-mu, n-na, ma-a ai Wenyi hpe Madu Yesu shamai shatsai ya na matu dai ni na mungga gaw anhte yawng hpe saw shaga nga ai.

Sawn sumru mai ai lam: Madu Yesu hpe n mu, n na, n shaga lu hkra byin nga ai lam ngai a prat hta nga ai kun? Tinang a kun dinghku, u hpung u hpawng, jau ginwang ni hta grau kaja wa na matu n galaw ai a marang e, ngai gaw myi n mu, na n na, ma-a tai wa sai kun?

2018:PRANWAN LADAW LABAN (23) NA CHYUM LAIKA

PRAN WAN LADAW HTA LABAN 23

9th September 2018

CHYUM MUNGGA DAW 1

Esaia 35:4-7

Ya hti na gaw, myihtoi Esaia a laika hta na rai nga ai.

Nden ja ai myit rawng nga nna, hkum hkrit nga mu, ngu nna myit htum ai ni hpe tsun mu. Yu mu, nanhte a Karai Kasang gaw matai tai na matu mung, shi kaw na ari jaw na matu mung, du na ra ai; nanhte hpe hkye hkrang la na matu shi nan du na ra ai. Dai shaloi e, myi hten ai ni, myi mu lu nna, na n na ai ni, na lu na mara ai. Lagaw hten ai wa gaw, shan nga zawn gumtawng lu nna, ma-a ai wa a shinglet mahkawn mangwi na ra ai. Kaning rai nme law, hkraw hkun ai shara e, hka hpawk hpaw nna, zaibru jang e hka lwi na ra ai. Kahtet kabrim ai zai bru jang hta hka ing nga nna, hkraw hkun ai hta hka hpawk hpaw na ra ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Yaku 2:1-5

Ya hti na gaw, Kasa Yaku shagun dat ai laika hta na rai nga ai.

Nye a hpu nau ni e, hpung shingkang lu ai anhte a Madu Yesu Hkristu hpe kam sham manit dai majaw, myiman lata ai hku masha hpe hkum ginhka mu. Ga shadawn tsun jang, Ja lachyawp chyawp nna, reng ai hpun palawng bu hpun ai masha langai mi hte, n tsawm ai hpun palawng bu hpun ai matsan mayan masha langai mi, nanhte a nawku jawng hta shang wa ma ai. Shaloi dai reng ai hpun palawng bu hpun ai wa hpe, nanhte hkungga ai hte hkap tau nna, salang wa e, chyeju hte ndai lahkum hta dung nga u, ngu nna tsun myit dai. Raitim, dai matsan mayan re ai wa hpe, Wo nang e tsap nga u; shing n rai, nye a lagaw nhpang e ga hta dung nga u, nga nna tsun myit dai. Dai zawn galaw yang, nanhte a myit hta e masha ni hpe ginhka nna, n ding n man ai hku daw dan ai tara agyi ni tai wa myit dai. Ngai tsawra ai hpu nau ni e, madat mara la mu; Kam sham ai sutgan hta lu su wa na hte, Karai Kasang hpe tsawra ai ni a matu shi madat da ai mungdan a Sali wunli hpe hkam la lu u ga, Karai Kasang gaw mungkan ga a man e matsan mayan ni hpe lata la manu ai, n rai ni?

Ya hti ai gaw, Karai Kasang a mungga rai nga ai.

KABU GARA SHIGA

Marku 7:31-37

Ya hti na gaw, Marku a laika hta na Kabu Gara Shiga rai nga ai.

Yesu gaw Turu ginwang de nna pru jang, Sidun mare hprang nna, Dekapoli ginwang ka-ang hku lai sa wa nhtawm, Galile nawng de sa du ai. Shaloi na lahpang nna, ma-a ai masha langai mi hpe, shanhte shi hpang de woi sa mu ai rai nna, dai wa a ntsa e lata mara ya na hpyi nem wu ai. Yesu gaw shawa masha kaw nna dai wa hpe hkrai woi sa nhtawm, shi a na lashing hku layung shawn bang ai hte, mayen mahtaw nhtawm, shi a shinglet hpe mung ahtawk ya wu ai. Shaloi Yesu gaw lamu de mada yu nna, dai wa hpe E-hpa-hta ngu nna madai let tsun wu ai; dai gaw, Hpaw wa u, ngu ai rai. Shaloi jang shi a na hpaw wa ai hte, shi a shinglet lakung hpyan mat wa nna, ga dan dan tsun lu ai. Dai lam kadai hpe mung ntsun dan mu ga, Yesu shanhte hpe ginhtim da ai; rai timung, shi ginhtim da magang shanhte grau nna hkai dan magang rai nga ma ai. Shawa masha ni mung, nachying mau mat ma ai rai nna, shi yawng mayawng hte hpe mai kaja ai hku galaw nga ai, na lahpang ai ni hpe na lu shangun nna, n chye shaga ai ni hpe ga tsun shangun lu ai, nga ma ai.

Ya hti ai gaw, Madu a Kabu Gara shiga rai nga ai.