PASKA LADAW LABAN (3) NA MUNGGA

Bai hkrung rawt wa ai Madu Yesu gaw anhte hte rau nga ai hpe anhte myit hte chye lu tim ta tut kam sham na matu gaw yak hkak nga ai. Hpa majaw nga yang, anhte a myit masin hta mungkan a lam ni hpe chyu sha shani shana myit sumru let sak hkrung nga sa ai majaw re. Grau nna anhte hta e kabu pyaw hpa lam shing nrai yawn hkyen ai lam ni hpe laklai nna hkam sha ai rai yang Karai Kasang hpe malap kau chye nga ai.

Dai ni na Kabu Gara shiga hta Madu Yesu a Sape lahkawng gaw shanhte a Sara, Madu Yesu wudang ntsa hta si hkrum ai hpang garen gari myit hki lit li hkrum let asum jaw let tinang a mare buga de bai nhtang wa ai lam kaw Madu Yesu gaw shanhte hte rau hkawm sa ai rai tim Shi Madu hpe nchye yu, n-matsing mat nga ai.

Sape lahkawng hpang shana na daw sha poi hta Madu Yesu re ai hpe dum shai ai zawn anhte ni mung Karai Kasang hte matut mahkai ai, akyu hpyi ai lam, grau nna Misa Hkungga hta grau nna tinang a awng dang ai lam ni hte hkrat sum ai lam ni a lapran hta Karai Kasang hpe dum shai lu nna Shi Madu a tara lam ni hta matut nna sak hkrung nga sa lu u ga.

SALUM KATA HTA WAN HKRU SAI

Lai wa sai lahkawng ning hta, mashi kaw tsi ga lajang ra ai. Yawng rai yang tsi rung hta laban bat lahkawng nga kau ra ai. Tsi rung kaw rawng nga ai ten, kanan (copy) jak langai mi nga ai hpe mu hkrup ai. Dai jak de shani shagu sa nna, chyum daw kadun ni hpe kanan sa dip la ai. Tsi sarama ni tsi jaw na sa ai ten, ngai mung shanhte hpe laika pa langai jaw ai. Nau nna ai hpang, tsi rung kaw nga ai tsi sarama ni gaw chyum daw kadun ni a lam tsun nga masai. ‘Karai Kasang gaw tsawra ai myit rai nga ai’ (1Yh 4:8), ‘nanhte shada da tsawra nga mu’ (Yh 13:34), ‘tut nanwg e kabu gara nga mu; n sim nsa akyu hpyi nga mu, lam shagu hta shakawn kungdawn nga mu’ (1 Hte 5:16-18). Kade wa mau hpa rai nga a hka!

Dai ni na kabu gara shiga hpe yu yang ndai zawn re ai hpe mu mada ai. Ema-u mare de wa ai sape lahkawng yan gaw myit htum nga ai. Shanhte a ningbaw wa Madu Yesu gaw wudang hta jen noi si hkam mat sai rai nna shan yan mung garen ai hte hkrit tsang ai hpe hkam sha nga sai. Dai aten hta she, salang marai mi shan yan kaw du pru nna tsun ai gaw, ‘myihtoi ni htawn tsun ai ga mahkra hpe kam sham lu na, hpaji n rawng ai hte myit ja ai ni e, Hkristu gaw shingre ai nni nkri hkam nna, shi a hpung shingkang hta shang ning ngai na ra ai, n rai ni? Shing nga tsun sharawt nhtawm, Mawshe ka da ai kaw nna myihtoi ni yawng ka da ai chyum laika ni hta na, Shi hta ang ai ga yawng a ga lachyum, shan hpe tsun hpaw dan mu ai.

Ndai kaw anhte lam yan lahkawng hpe mu ga ai. Langai; ndai yan gaw, Madu Yesu a sape ni rai tim, Chyum laika hpe atsawm nhti yu shi ma ai. Lama na shan yan, Chyum laika hpe sadi maja ai hte hti yu ai rai yang, Madu Yesu gaw Sumsing lamu hta ning ngai nga na shawng e nni nkri hkrum sha na hpe chye na re. Lahkawng ngu na hta, Madu Yesu gaw kaja wa sha Chyum Laika hpe atsawm chye nga ai. Shanhte rau sha lam hkawm sa nga ai ten hta pyi, Chyum laika hta na mungga ni a lam atsawm byan dan lai wa sai. Madu Yesu dai zawn tsun dan ai shaloi, shan yan a masin salum kata hta wan grung wa sai.

Wasarabyin Francis tsun ai rai yang, masha n kau mi gaw Chyum Laika galoi shagu hti ra ai nga ai. Shanhte a nhpye, sumbu hta gun hkawm ra ai nga ai. Bus mawdaw jawn ten, wanleng ni jawn ten, chyum daw ni hpe hti ging ai nga ai. Hpa majaw dai gaw ahkyak ai rai?

Chyum laika gaw Karai Kasang a mungga rai nga ai majaw re. Chyum laika hpe hti ai shaloi, Karai Kasang anhte hpe ga shaga ai. Hpaji hte wenyi n-gun atsam anhte hpe Madu jaw ya ai. Anhte a myit mang ai, amu bungli galaw ai hpe Madu Karai shading sharia ya ai. “nanhte shada da tsawra nga mu” (Yh 13:34). “Jaw mu, shing rai jang, nanhte hpe jaw na marin dai” (Lk 6:38). “Madu, nanhte hpe myit dum ya nga ai majaw, nanhte a myit ru myit tsang ai nlang hte nan, Shi a ntsa e kabai mara da u” (1 Pet 5:7).

Anhte a cellphone ni hpe aten law law yu masawp nna nga ga ai. Internet, Facebook hta aten law law shama ga ai, TV yu ai aten grai law ai hte pyaw hpa lam amyu myu hta aten jahtum ga ai. Dai zawn re ai lam ni hpe jahkring mi shingdu gayin da nna, Chyum laika hpe hti la ga. Dai gaw anhte ni hpaji chye wa na hte Karai Kasang hte ni htep wa na lam rai nga ai. Dai shaloi, Ema-u mare de sa wa ai sape lahkawng yan zawn, anhte a masin salum kata hta mung kam sham ai wan grung wa na rai nga ga ai. 

PASKA LADAW LABAN (3) NA CHYUM LAIKA

PASKA LADAW HTA LABAN 3

30 April, 2017

CHYUM MUNGGA DAW 1

Kasa 2 : 14. 22-28

Ya hti na gaw Kasa laika hta na rai nga ai.

Chyoi Pra ai Wenyi kasa ni a ntsa e yu hkrat wa ai Pentekawste shani e, Petru gaw sape shi langai hte rau rawt nna, nsen shaja let, sa du hpawng ai masha unawng hpe tsun wu ai gaw: Israela masha ni e, ga ndai madat la mu: Nanhte chye nga myit dai hte maren, Karai mKasang gaw Nazaret na Yesu hpe lata san da nna, nanhte hpang de shangun dat ai wa rai nga ai hpe sakse hkam ya na matu, dai Yesu a lata hte Shi magam ningsam, mauhpa amu hte lamik kumla ni, nanhte a man e galaw dan wu ai. Karai Kasang Shi ra sharawng ai hku yaw shada ai hte maren, Yesu hpe ap kau ai shaloi, nanhte gaw tara maigan ni a lata hte, shi hpe wudang hta jen sat kau myit dai; si hkrung si htan a nni nkri hpe Karai Kasang raw kau ya nna, shi hpe jahkrung sharawt nu ai. Hpa majaw nga yang, si hkrung si htan gaw shi hpe hkang shadang lu ai n rai. Kaning rai nme law, dai Yesu hpe sha-ang nna Dawi tsun ai gaw: Madu hpe nye a myiman chyaw ngai tut nawng e mu lu nga nngai; Shi nye a hkra maga e nga nga ai majaw, ngai dakan dakring tsap lu na nngai.

Dai re ai majaw, nye a myit masin kabu nga ai hte, nye a shinglet awng nga ni ai. Kaning rai nme law, nye a Wenyi hpe katsan ga de kau da ya na n rai; Na a chyoi pra ai Wa hten byak hkrum na, nang n hkraw nga ndai. Asak hkrung ai lam, nang ngai hpe madun nit dai; Na a man e nang ngai hpe kabu gara ai hte jahpring ya na rin dai, nga nna ka da nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1Petru 1 : 17-21

Ya hti na gaw Kasa Petru shagun dat ai laika langai hta na rai nga ai.

Hpu nau ni e, Nanhte akyu hpyi ai shaloi, myiman n lata ai sha, langai hte langai a amu hte maren daw dan ai Kawa hpe nanhte hpyi shaga nga myit dai. Dai rai nna, ndai dinghta ga ntsa e, nanhte manam tai hkawm ai laman e, hkrit hkungga ai hte Shi a ga hkan shatup nga mu. Ji wa ni kaw nna hkan dagraw ai, akyu n pru nna, kaman lila re ai nga sat nga sa ai lam hta na, hten mat chye ai ja gumhpraw hte nanhte hpe hkye mawai la sai n rai; Hkristu ngu ai, ana ahkya n kap ai, ra n rawng ai sagu kasha a hpu gying la ai asai hte sha, nanhte hkye mawai la ai hkrum sai hpe myit dum nga mu.

Dai Hkristu gaw, ginding aga garai n hpan da ai kaw nna, Karai Kasang e san da ai hkrum nna, ndai hpang jahtum ai aten e, nanhte a matu mara dan hkung pru wa sai. Si ai ni kaw na shi hpe jahkrung sharawt la ai hte, shi hpe hpung shingkang jaw ai Karai Kasang hpe, shi a marang e nanhte kam sham ai ni tai wa ma nit dai: shing rai, nanhte a makam masham hte myit mada shara gaw, Karai Kasang hta jung nga ai.

Ya hti ai gaw Karai Kasang a mungga rai nga ai.

KABU GARA SHIGA

Luka 24 : 13-35

Ya hti na gaw Luka a laika hta na Kabu Gara Shiga rai nga ai.

Yesu bai hkrung rawt ai shani e, Yesu a sape lahkawng gaw, Yerusalem mare kaw nna deng sanit daram tsan ai, E-ma-u kahtawng de sa wa ma ai rai nna, lai wa sai nhtoi masum ya hta byin wa sai lam ni hpe shada tsun chyai nga ma ai. Shing rai tsun jahta let sa wa nga yang, Yesu hkum nan sit sa nna, shan hte rau hkawm sa wa ai, rai ti mung, shi hpe n chye mu ga, shan a myi hpe myi le le ya mu ai. Shaloi Yesu gaw, Nan hkawm sa wa let, shada da tsun jahta ai lam gaw, hpa lam rai ta? ngu nna san yang, shan gaw myiman sum let hkring tsap nga ma ai. Shaloi dai yan hta na Hkle-o-pa ngu ai wa gaw, Nang gaw Yerusalem mare e sa manam nga da nhtawm, ya hte dai mare e byin lai ai lam ni hpe, nang hkrai sha n chye n ni? Ngu nna htan wu ai. Dai rai nna Yesu gaw, Hpa lam rai ta? ngu nna bai san yang, shan gaw, Nazaret na Yesu a lam rai nga ai: dai wa gaw Karai Kasang a man e mung, masha yawng a man e mung, lata atsam hte n-gup hpaji a nsam rawng ai myihtoi wa rai nga ai. Rai timung, hkinjawng agyi ni hte anhte a du salang ni gaw, dai wa hpe sat kau ai lam daw dan na matu ap kau nhtawm, wudang hta jen da manu ai. Anhte chyawm gaw, dai wa gaw Israela amyu hpe hkye hkrang la na wa re ai, ngu nna myit mada ga ai. Ndai lam ni byin ai gaw, dai ni masum ya du timung, dai ni e anhte a hpung hta na numsha nkau mi gaw anhte hpe wa shamau mi ai. Shanhte lup de jau jau sa yu ai shaloi, Shi a moi mang hpe n mu jang, shanhte bai wa nna, Madu hkrung nga ai, nga nna shingran hta mu ai lamu kasa ni tsun dan ai lam, wa tsun shana mi ai. Anhte a hpu nau ni nkau mung, lup de sa yu nna, numsha ni tsun ai hte maren mu ma ai: dai wa hpe chyawm gaw shanhte n mu ai da, ngu nna dai sape yan Yesu hpe tsun dan mu ai. 

Shaloi Yesu gaw, Myihtoi ni htawn tsun ai ga mahkra hpe kam sham lu na, hpaji n rawng ai hte myit ja ai ni e, Hkristu gaw shing re ai nni nkri hkam la nna, Shi a hpung shingkang hta shang ningngai na re ai, n rai ni? ngu nna shan hpe tsun wu ai. Shaloi Mawshe ka da ai kaw nna, myihtoi ni yawng ka da ai Chyum Laika ni hta na, Shi hta ang ai ga yawng a lachyum shan hpe tsun hpaw dan mu ai. Ya, dai yan sa wa ai kahtawng de du magang yang, Yesu gaw lai nna sa wa na zawn rai nga ai. Dai rai nna, shan gaw, An hte rau shang nga ga; jan du sai; nsin mung sin wa ra ai, ngu nna shi hpe tsun ma ai.

Ya, shan hte rau shat sha na dung nga yang, shi muk la nna shaman nhtawm, ahkyep di ai hte shan hpe jaw mu ai. Shaloi shan a myi hpaw nna, Yesu nan rai nga ai chye ma ai: shi chyawm gaw, shan kaw na mat mat wa ai. Shan gaw, lam e an hte ga tsun nna, Chyum Laika a ga lachyum tsun hpaw dan mi ai shaloi, an a myit masin gadau gadap mali ai, nga nna shada da tsun ma ai. Shan lahkawng dai ahkying hta nan rawt nna, Yerusalem mare de bai wa nhtawm, sape shi langai hte kam sham ai hpung manang ni rau hpawng ma ai hpe mu ma ai. Sape ni gaw, Madu teng teng bai hkrung rawt sai: Simun hpe mung shi a hkum madun dan mu ai, ngu nna shan hpe hkap tsun dan ma ai. Shaloi shan gaw, lam e hkawm sa wa yang byin ai lam ni mung. muk ahkyep karan ai hta Yesu re ai chye lu ai mung, tsun dan mu ai.

Ya hti ai gaw Madu a Kabu Gara shiga rai nga ai.

PASKA LADAW LABAN (2) NA MUNGGA

Karai Kasang hpan da ai anhte shinggyim masha ni gaw asak aprat galu kaba wa ai hte maren machye machyang hpaji hte sut masa lam ni hta rawt jat galu kaba wa ai zawn Karai Kasang hpe kamsham tsawra ai lam hta mung rawt jat wa ra na re. Madu Yesu a Sape ni, Kasa ni mung aten ahkying la nna mahkrum madup law law hpe lai di let, Shi Madu hpe grau grau kamsham wa nna sakjaw ap nawng lu lai wa sai.

Makam masham hta rawt jat kung hpan wa na matu gaw anhte a asak aprat hta Karai Kasang hte mu hkrum ai ngu ai mahkrum madup ni hte Karai Kasang gaw anhte a asak aprat hta kaning rai garum shingtau lai wa sai ngu ai ni hpe yu nna tinang a kam sham ai lam hpe shangang shakang lu na re.

Kasa ni, grau nna Kasa Thomas, gaw Madu Yesu hkum nan shanhte a man hta pru sa nhtawm n-gun shaja ya ai mahkrum madup gaw shanhte a matu manu dan ai mahkrum madup langai byin tai wa ai zawn anhte a prat hta mung Karai Kasang hpe manoi manat let Shi Madu a garum shingtau ai ni hpe mu hkrum nna bai hkrung rawt wa ai Madu Yesu hpe grau grau nna kamsham let yak hkak ai lam ni hpe lai di lu u ga.

MAKAM

Hkrung rawt sai Madu Yesu gaw, Shi a bai hkrung rawt wa ai hpung shingkang lam hpe, shi a sape ni hpe aten hte aten hpaw shaleng dan sai. Asan rai mat sai lup sung hku a lam tsun dan ai sape ni hte, Madu Yesu hkum shadan dan ai hpe mu ai hpawmi ni wa tsun dan ai rai tim, sape ni gaw makam hta n-gun kya la ai hte, Yuda du gyi salang ni rim na hpe mung hkrit tsang nga ma ai. Shanhte hta Madu Yesu dan pru dan ai shaloi, sakse hku nna, shi a wunma ni, lata na hpri hkang hte chyeju lwi pru ai salum na wunma ni hpe madun ya sai. Shanhte a hkrit myit hpe shazim kau ya ai hte shut hpyit ai ni hte mahku mara tawn da lu na, tsawra matsan dum chye ai Karai Kasang hte manang tai wa lu na ‘ngwi pyaw simsa ai’ hpe Madu Yesu jaw ya sai.

Madu Yesu rai nga ai hpe kasa Htawma asan sha chye la lu ai ten, ‘ngai a Madu, ngai a Karai e’, nga nna kam sham ai hte tsun hpaw shadan sai. Madu Yesu si hkam ai hte bai hkrung rawt ai marang e, anhte mung Shi Madu hta asak ningnan lu la na rai nga ai. Shi a chyoipra ai wenyi hpe mung anhte a matu jaw ya nna, Shi Madu hpe chye lu na, shaman chyeju hpe hkam sha lu na, bai hkrung rawt ai Atsam a majaw, prat ningnan hta hkawm sa lu na chyeju atsam anhte hpe jaw ya sai. Chyeju atsam jaw ya ai Karai Wa kaw nna lu la sai shaman chyeju ni hpe myit sawn yu nga ga law!

PASKA LADAW LABAN (2) NA CHYUM LAIKA

PASKA LADAW HTA LABAN 2

23, April, 2017

CHYUM MUNGGA DAW 1

Kasa 2 : 42-47

Ya hti na gaw Kasa laika hta na rai nga ai.

Kashin Kamun hkam la ai hpung masha nnan ni gaw, Kasa ni a sharin shaga ai lam, hpu nau ni rau kanawn hpawng ai lam, muk ahkyep karan ai lam hte, akyu hpyi ai lam hta htep lahti hkan nga ma ai. Masha yawng hte mung hkrit kang shajang ma ai; kaning rai nme law, Kasa ni gaw mau hpa amu hte lamik kumla law law hpe galaw dan ma ai. Kam sham ai ni nlang hte gaw, shara mi hta rau hpawng nna, arai yawng mayawng hpe jawm lang ma ai; tinang a sut arai ni hpe mung shanhte dut kau nna, marai shagu hpe tinang ra ai hte maren, karan jaw mu ai. Shani shagu myit langai sha hte Nawku Htingnu hta shanhte htep lahti machyu nga nna, shanhte a nta e muk ahkyep karan jaw ma ai. Shanhte gaw Karai Kasang hpe shakawn kungdawn let, kabu gara ai hte lusha shahpa jawm sha ma ai; masha mahkra a man e, mung myiman pa nga ai. Madu mung, hkye hkrang la hkrum ai ni hpe, lani hte lani shanhte a hpawng hta jat wa shangun ya mu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Petru 1 : 3-9

Ya hti na gaw Kasa Petru shagun dat ai laika langai hta na rai nga ai.

Hpu nau ni e, anhte a Madu Yesu Hkristu a Kawa Karai Kasang kaw shakawn kungdawn a nga nga u ga: Yesu Hkristu si mat ai ni kaw nna bai hkrung rawt wa ai a marang e, anhte ngang kang ai hte myit mada lu na matu, dai Kawa gaw matsan dum ai myit hte anhte hpe bai shangai shangun ma ni ai. Shing rai anhte bai shangai wa lu ai majaw, n run n hten ai, awu asin n kap ai hte, nwai nmat chye ai sali wunli hpe, anhte hkam la na myit mada nga ga ai. Dai sali wunli gaw, nanhte a matu mara sumsing lamu hta e kyem da nga ai. Hpang jahtum na nhtoi hta, shadan dan na aten e, nanhte myit dai; shi hpe garai n mada mu ti mung, kam sham ma nit dai rai a matu lajang da sai, hkye hkrang la ai chyeju hpe hkam la lu na matu, kam sham ai myit a marang e, Karai Kasang a n-gun atsam nanhte hpe makawp maga na ra ai.

Ya chyahkring chyahkra e, nanhte agung alau hte tsinyam tsindam amyu myu hpe hkrum nga timung, dai hkye hkrang la ai lam a majaw, nanhte grai kabu gara nga lu myit dai. Ja ajet lu na matu, wan hta e chyam yu ra ai; nanhte a kam sham ai myit chyawm gaw, hten mat chye ai aja hta grau hpu nga ai rai nna, Yesu Hkristu dan pru ai nhtoi hta e, shakawn kungdawn ai, hpung shingkang hte arawng sadang hpe, nanhte hkam ging wa lu na matu, dai kam sham ai myit gaw, agung alau hte tsinyam tsindam a marang e shangang shakang ya ai hkrum na ra ai. Yesu Madu hpe nanhte n mu yu ti mung, shi hpe tsawra nga nna, ndang tsun hkra kabu sharawng nga myit dai; kaning rai nme law, kam sham ai myit hkan tam nga ai, nsa wenyi hpe hkye hkrang la ai shabrai kumhpa hpe, nanhte teng teng hkam la na hpe chye nga myit dai.

Ya hti ai gaw Karai Kasang a mungga rai nga ai.

KABU GARA SHIGA 

Yawhan 20 : 19-31

Ya hti na gaw Kasa Yawhan a laika hta na Kabu Gara Shiga rai nga ai.

Dai laban bat a shawng shani na nsin rim rim e, Yuda mashani hpe hkrit ai majaw, sape ni hpawng nga ai nta e chyinghka lada sa yang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan mu ai. Sape ni mung, Madu hpe mu lu yang, kabu gara nga ma ai. Bai Yesu gaw, Nanhte ngwi pyaw nga myit ga; nye Wa ngai hpe shangun dat ai hte maren, ngai mung nanhte hpe shangun dat made ai, ngu mu ai. Shing nga nhtawm, sape ni a ntsa e nsakawut nna, Chyoi Pra ai Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara hpe rai ti mung, nanhte shagun da yang gaw, dai mara naw nga na ra ai, ngu nna shanhte hpe tsun wu ai.

Shing rai Yesu sa du ai shaloi, Kasa shi lahkawng hta lawm ai, Marun Ma ngu ai Htawma gaw, shanhte hte rau n nga ang ai. Dai rai nna, kaga sape ni shi hpe, Anhte gaw Madu hpe mu lu sa ga ai, ngu nna tsun dan mu ai. Htawma chyawm gaw, Shi a lata hta hpri hkang hpe ngai n mu, dai hpri hkang hta nye a layung n shawn yu, shi a garep hta nye a lata n bang yu yang gaw, ngai n kam nngai, ngu shanhte hpe tsun wu ai.

Dai hpang matsat ya du jang, Yesu a sape ni nhku e bai hpawng nga ma ai rai nna, Htawma mung shanhte hte rau lawm nga ai. Chyinghka la da ti mung, Yesu sa du nna, shanhte a ka-ang e tsap let, Nanhte ngwi pyaw nga myit ga law, ngu wu ai. Shaloi Shi gaw Htawma hpe, Na a layung nang de ladawn nna, nye a lata hpe yu yu u; na a lata ladawn nna, nye a garep hta bang yu u; n kam n sham ai myit hpe kau da nna, kam sham u, ngu wu ai. Dai rai nna, Htawma gaw, nye a Madu, nye a Karai Kasang rai nga ndai, ngu nna shi hpe htan wu ai. Yesu gaw, Htawma nang ngai hpe mu lu ai majaw kam sham nit dai; n mu lu ti mung, kam sham ai ni gaw ‘a’ lu ma ai, ngu shi hpe tsun wu ai.

Ndai laika hta n ka da ai lamik kumla kaga law law mung, Yesu gaw shi a sape ni a man e galaw dan nu ai; rai ti mung, Yesu gaw Karai a Kasha hte dai Hkristu nan rai nga ai hpe nanhte kam sham nna, Shi a mying ningsang a, marang e asak hkrung ai lu la myit ga nga nna ndai hte wa ka tawn nga ai.

Ya hti ai gaw Madu a Kabu Gara shiga rai nga ai.

PASKA POI SHANI NA MUNGGA

Madu Yesu Hkristu  si ai kaw nna bai hkrung rawt ai paska poi gaw anhte a matu ahkyak dik ai poi re. Dai re ai majaw shaning shagu Paska Poi a matu lu sha gam ai ladaw hte hkyen lajang nna galaw sa ai. Lusha gam ai ladaw hta Madu Yesu gaw nni nhkri yu bak hpe hkam nna si hkrum ai zawn anhte a myit hpe ndang nyet kau nna nhkru nkaja ai hpe koi gam kau let mai kaja ai lam hpe shakut shaja galaw sa ai re. Dai re ai majaw Lusha gam ladaw hta kaja dik ai hku hkyen lajang lu yang tinang a matu manu dan ai hte akyu chyeju hte hpring tsup ai hte Pasla Poi hpe shang lawm lu na re. 

Dai ning na Paska Poi hpe shang lawm ai shaloi tinang galaw ai mai kaja ai lam ni hpe matut nna galaw lu na matu ahkyak ai re. Madu Yesu a bai hkrung rawt ai hta shang lawm let shaning shagu grau grau kaja ai Karai Kasang a kashu kasha ni byin tai wa ai sha n-ga, mungkan hkrun lam hta mung rawt jat galu kaba wa na matu nkam ai, lagawn ai myit zawn re ai ni hpe lai di lu let galaw ang ai amu bungli ni hpe madung dat galaw sa lu let awng dang ai chyeju hpe ndai Paska Poi a marang e shaning ting hta hkam la lu u ga.

HKRUNG RAWT AI MADU YESU

Madu Yesu tsawra ai sape wa yawhan gaw, shi a kabu gara shiga hpe; Madu Yesu a mungga ni hte amu magam, hpe myi hte chyaw mu lu ai sakse wa hku nna ka jahkrat da sai. Madu Yesu bai hkrung rawt wa ai Paska laban jahpawt hta lup de shawng nnan du ai sape wa gaw Yawhan rai nga ai. Shi mu mada ai gaw hpa n nga sai lup sung hku rai nna dai mabyin gaw Madu Yesu a bai hkrung rawt ai hpe kam sham na byin wa sai. Dai asan sha rai mat sai lup sung hku hpe mu ai shaloi, Madu Yesu tau nau tsun da sai, ‘masum ya’ na ai hpang bai hkrung rawt wa na ngu ai ga ni hpe bai myit dum lu na sai.

Makam masham chyeju kumhpa a jaw e Yawhan chye la lu ai gaw, mungkan ga na gara lup sung hku mung dai asak jaw ya ai Madu hpe tawn zing da lu na n rai ai, ngu ai lam re. ‘si ai kaw nna bai hkrung rawt ai ngu ai lam’ gaw Hkristan makam masham a akri madung rai sai. Chyoipra ai wenyi a chyeju marang e, Madu Yesu anhte hpe jaw ya ai gaw, Shi Madu hpe chye na na hte, Shi a bai hkrung rawt ai atsam hpe chye lu na ‘makam myi’ rai sai. Anhte lu la mai ai, kaba dik htum ai myit pyaw simsa lam gaw, ahkrung nga ai Hkristu hpe hkrum katut lu na hte, anhte a Hkyela Madu re ai lam hkum nan hkam sha ai lam rai sai.

Hkrung rawt sai Hkristu hpe hkrum zup lu nna kabu gara lu ai lam hpe nang kaning rai gam garan lu na rai?

PASKA POI SHANI NA CHYUM LAIKA

YESU BAI HKRUNG RAWT AI NHTOI

16, April, 2017

CHYUM MUNGGA DAW 1 

Kasa laika 10 : 34 a, 37-43

Ya hti na gaw Kasa laika hta na rai nga ai.

Roma hpyen du Korneliu a nta e, Petru ga hpaw nna, hpawng nga ai ni hpe hkaw tsun dan ai gaw: Yawhan kashin kamun lam hkaw dan ai hpang, Galile mung kaw nna Yuda mung ting e kajai gara wa ai lam hpe, nanhte nan chye nga myit dai. Dai gaw, Nazaret na Yesu a lam rai nga ai. Karai Kasang gaw, Chyoi Pra ai Wenyi hte mung, n-gun atsam hte mung, shi hpe chya ya wu ai. Karai Kasang dai Yesu hte rau nga nga ai majaw, mai kaja ai amu ni shi galaw nna, nat gung lau e zingri zingrat hkrum ai ni yawng mayawng hpe shamai ya let, kawan katsan hkawm nga ai.

Shing rai, Yuda mung ting hte Yerusalem mare hta e, shi galaw ai amu yawng mayawng a sakse ni anhte rai nga ga ai: dai wa hpe nan shanhte hpun hta jen sat kau mu ai; Karai Kasang chyawm gaw masum ya nhtoi hta Shi hpe jahkrung sharawt la wu ai rai nna, mung masha yawng a man e n rai, Karai Kasang shawng e lata san da sai sakse ni a man e sha, dai wa hpe dan pru shangun wu ai. Dai sakse ni gaw, si ai kaw na Shi bai hkrung rawt ai hpang e, Shi hte rau lu sha ai ni anhte nan rai nga ga ai.

Shi Madu nan mung, hkrung ai ni hte si ai ni a tara agyi tai na matu, Karai Kasang san da ai wa rai nga sai lam, mung masha ni hpe tsun dan let sakse hkam ya na matu, shi anhte hpe hkang da mani ai. Myihtoi mahkra mung, Yesu a lam sakse hkam ya let, Shi hpe kam sham ai ni yawng, Shi a mying ningsang a marang e, mara raw dat kau ya ai hkrum na mara ai, nga nna tsun dan ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Kolose 3 : 1-4

Ya hti na gaw Kolose masha ni hpang de San Pawlu shagun dat ai laika hta na rai nga ai.

Hpu nau ni e, nanhte Hkristu hte rau teng man ai asak de rawt wa manit dai rai, dai Hkristu gaw sumsing lamu hta Karai Kasang a hkra maga e dung nga ai majaw, lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu.

Kaning rai nme law, nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung shi hte rau hpung shingkang hta dan pru na marin dai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 20 : 1-9

Ya hti na gaw Yawhan a laika hta na Kabu Gara Shiga rai nga ai.

Dai laban bat a shawng shani e, nhtoi garai nhtoi yang, Maria Magdalena jau jau e lup de sa wa ai rai nna, lup chyinghka la ai nlung sit nga ai hpe mu wu ai. Dai majaw, Simun Petru yan Yesu tsawra ai sape hpang de gat wa nhtawm, Madu hpe lup de na shanhte la nna, kanang e tawn da mu ai hpe anhte n chye ga ai, ngu nna shan hpe tsun mu ai.

Shaloi Petru yan kaga sape pru nna, lup de sa wa ma ai. Shan rau gat sa wa yang, kaga sape Petru hpe gat lai kau da nna, lup de shawng sa du ai. Shaloi shi gum yu yang, sumpan ginyan taw nga sha mu wu ai; rai timung, shi kata de n shang ai. Simun Petru chyawm gaw shi a hpang e hkan gat nang nna, dai de du jang, kata de shang yu nga ai. Sumpan ginyan taw nga ai hpe mung, baw na hpajet gaw sumpan hte rau n re ai, kaga ga rai nna, katsu taw nga ai hpe mung shi mu wu ai.

Dai majaw, lup de shawng du ai kaga sape mung hkan shang wa nna, mu lu ai hte kam sham wu ai. Kaning rai nme law, Yesu gaw si ai ni kaw na bai hkrung rawt wa na ra ai, nga nna Chyum Laika hta rawng nga ai hpe, ndai ahkying du hkra shan n chye madat ma ai.

Ya hti ai gaw Madu a Kabu Gara shiga rai nga ai.

KUNGLA SHAMAN POI SHANI NA MUNGGA

Karai Kasang myit ra ai hku rai u ya ngu tsun ai shaloi ngwi pyaw simsa ai aten hta gaw loi nga ai. Rai tim tinang ap nawng ra ai, jam jau ai ahkying aten hta chyawm gaw yak nga ai. Kadai Mung ru yak jam jau ai hpe nra nga ai. 

Hebre masha ni gaw Madu Yesu Jerusalem mare de lawze jawn nna shawng wa ai shaloi shanhte a hkawhkam re ngu marawn let tsun na matu loi nga ai. Kungla lap hpe lang nna marawn jahtau na matu gaw n-yak ai majaw re. Rai timung, shanhte tsun ai hpe hkan shatup na matu gaw sakjaw ap nawng ra ai majaw hprai mat nga ai. 

Madu Yesu Jerusalem mare shang wa ai shaloi Shi matu shimlum ai lam nnga ai hpe chye ai rai tim, Shi galaw ang ai lam hpe nhkrit nkang ai sha galaw lai mat wa ai zawn anhte ni yawng mung galaw ang ai galaw ging ai lam ni hpe ru yak ai rai tim ngwi pyaw ai rai tim ta tut galaw lu u ga.

HPA BAW SAK JAW NA RAI TA?

Kungla shaman poi gaw, Madu Yesu Hkristu a nni nkri hkam la ai, si hkam ai hte bai hkrung rawt ai laban bat hpe tau nau lajang ai rai sai. Ndai mabyin ni kaw nna anhe hpa hpe sharin la lu sai rai? Tsun ga nga yang, Madu Yesu, masha kaga ni a Lawze kasha hpe shap la ai kaw nna hpang ga.

Karai atai rai nga ninglen shingbyi shara tam ai, sut su ai hte matsan mayan re ai lam ni a gahti galai byin ai ga rai sai. Mungga gaw masha sa tai ai lam a akyu ara mung rai nga ai.

Madu Yesu gaw, Shi mungga hkaw tsun na matu ‘hkali’ mung shap la sai, masha wunawng wuwa hpe jaw sha na matu muk tawng hte ‘nga’ hpe shabrang ma kaw nna hkoi la sai. Shi bai hkrung rawt wa na matu lup sung hku mung shap la sai, hte ya chyawm Yerusalem mare de jawn shang wa na matu lawze hpe shap la sai. Lawze kaw nna garum kahtau hpe shi Madu ra kadawn ai zawn, anhte marai hkum shagu kaw nna mung garum kahtau la na hpe Madu ra sharawng nga ai. Kade daram kaji ai, n dan dawng ai rai tim, ahkyak ai langai mi gaw, ‘anhte a Sara wa dai hpe ra nga ai’ ngu ai lam rai sai. Madu Yesu gaw shani shagu na anhte a amu magam hpe ra sharawng nga ai. Dai amu magam gaw kun dinghku kata, magam bungli shara hta, buga hta, Jau ginwang hta, hte wuhpung wuhpawng kata rai mai nga ai. Madu jaw da sai shaman chyeju ni hpe masha kaga ni hta gam garan hkat na, aten jaw ya na, prat hta ru yak jam jau hkrum nga ai ni hpe Madu a tsawra myit garan kachyan ya na anhte saw shaga hkrum sai.

Du na ra ai Chyoipra ai laban bat laman e, “Madu e, nang ngai kaw nna hpa hpe ra sharawng a ta? Ngu nna matut manoi san nga ga!

KUNGLA SHAMAN POI SHANI NA CHYUM LAIKA

KUNGLA SHAMAN AI LABAN

9, April, 2017

CHYUM MUNGGA DAW 

1 Esaia 50 : 4-7

Ya hti na gaw myihtoi Esaia a laika hta na rai nga ai.

Hki ba hkrum ai wa hpe shalan shabran ai ga chye tsun lu hkra, Madu gaw sharin achyin hkam la ai sape a shinglet ngai hpe jaw ni ai. Shi a ga na la na matu, jahpawt shagu shi ngai hpe jasu nga ai: sape wa madat la ai zawn ngai mung madat la lu u ga, Madu nye a na hpe hpaw ya ni ai.

Ngai mahtang lata kau ai hte kanut mat wa ai n rai. Ngai gaw kayat ai ni hpe nye a shingma, shabyi mun baw ai ni hpe nye a shabyi, ap ya nngai: asawng asang di ai hte, mayen mahtaw bun ai kaw na nye a myiman kayin kau ai n rai.Kaning rai nme law, Madu gaw ngai hpe garum na ra ai; dai majaw asawng asang di ai lam ni gaw ngai hpe myit n jahtum kau nga ai. Ngai kaya kahpa n hkrum lu na ngai chye ai majaw, nye a myiman hpe mung, nhpai lung zawn ngai     shatai da nngai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

Hpilipi 2 : 6-11

Ya hti na gaw Hpilipi masha ni hpang de San Pawlu shagun dat ai laika hta na rai nga ai.

Hpu nau ni e, Hkristu Yesu gaw, Karai Kasang nan rai nga timung, Karai Kasang hte maren rai nga na hpe n manoi ai sha, mayam madang hpe hkap la na matu, Karai Kasang a hpung shingkang hpe raw tawn nna, shinggyim masha hte bung hkra tai wa sai. Shing rai masha a hkum shan hku anhte kaw dan pru nhtawm, shi hkum hpe shagrit shanem nna, si ai du hkra madat mara nga ai, gaja wa, Udang hta si ai du hkra madat mara nga ai.

Rai timung, Karai Kasang gaw shi hpe shagrau nna, amying yawng mayawng hta grau ai amying shingteng shi hpe jaw da wu ai. Dai re ai majaw, sumsing lamu tang hta, ginding aga tsang hta na hte, lawu na tsang na lahput yawng hte gaw Yesu a amying hte hput di na mara ai. Dai hta n-ga, Kawa Karai Kasang a hpung shingkang a matu mara, Yesu Hkristu gaw Madu rai nga ai, nga nna shinglet yawng mayawng kajai gumhkawng na mara ai.

Ya hti ai gaw Karai Kasang a mungga rai nga ai.

KABU GARA SHIGA 

Mahte 27 : 11-54

Ya hti na gaw Mahte a laika hta na Madu Yesu a nni nkri

yubak lam rai nga ai. Madu Yesu hpe Roma munggyi wa Puntsiu Pilatu a man de woi jashawn mu ai; dai du kaba gaw, Nang Yuda ni a hkawhkam rai nga nni? ngu nna Shi hpe san wu ai.

Yesu gaw, nang tsun ai hte maren rai nga nngai, ngu wu ai. Rai timung, hkinjawng agyi ni hte salang ni Yesu hpe mara shagun yang, shi hpa mung n htan wu ai. Shaloi Pilatu gaw, shanhte na a lam sakse gade wa hkam ya ai hpe n na n ni? ngu nna shi hpe tsun wu ai. Yesu mahtang ga hkaw mi n htan ya ai. Dai rai nna, munggyi wa nachying mau nga ai.

Dai poi aten hta e, munggyi wa shawa masha ni ra ai hku hkan nna, htawng rawng ai masha langai ngai hpe dat ya na htung nga ai. Dai shaloi e, Baraba ngu ai, kajai gumhkawng ai bawng dung masha langai mi nga ai. Masha law law hpawng nga ai majaw, Pilatu gaw, Nanhte a matu dat ya na, kadai mahtang hpe ra myit ta? Baraba hpe ra myit ni? shing n rai, Hkristu ngu ai Yesu hpe ra myit ni? ngu nna shanhte hpe san wu ai. Kaning rai nme nga yang, manawn masham ai a majaw, shanhte Yesu hpe ap kau ma ai Pilatu chye nga ai.

Ya, tara tingnyang hta e shi dung nga yang, shi a madu jan shi kaw shangun dat nna, dai ding hpring ai wa hpe hpa mung hkum di u; dai ni pyi, yup mang hta e shi a majaw, ngai myit ru myit tsang grai hkrum ni ai, ngu nna htet dat wu ai. Hkinjawng agyi ni hte salang ni chyawm gaw Baraba hpe hpyi nna, Yesu hpe sat kau na, ngu nna shawa masha ni hpe shadut ma ai. Shaloi dai du kaba shanhte hpe san yu nna, ndai yan hta na nanhte a matu dat ya na, gara mahtang hpe ra myit ta? ngu nna san yang, shanhte gaw, Baraba hpe ra ga ai, ngu nna htan ya ma ai. Bai Pilatu gaw, Hkristu ngu ai Yesu hpe ngai kaning di na rai ta? ngu nna shanhte hpe tsun mu ai.

Shanhte yawng, Udang hta jen da u, ngu mu ai. Bai shi gaw, Hpa majaw dai hku di na i? Shi n hkru ai lam hpa galaw sa ta? Ngu wu ai. Shanhte chyawm gaw, Udang hta jen da u, nga nna grau jahtau bu ma ai. Pilatu mahtang gaw, gara hku mung n dang lu ai hte, kabrawng kabrang byin wa ai hpe mu yang, hka la nna, shawa masha ni a man e, lata kashin let, ndai ding hpring ai wa a asai hkaw kau ya ai gaw, nye a mara n rai sai; nanhte nan dai lit hpe hkap la mu, ngu wu ai. Dai rai nna, masha yawng hte gaw, shi a asai anhte a ntsa e mung, anhte a shu sha ni a ntsa e mung, mara nga u ga, ngu nna htan ma ai. Shaloi jang Pilatu gaw Baraba hpe, shanhte ra ai hte maren dat ya mu ai. Yesu hpe mahtang shi kayat nna, Udang hta jen da ai hkrum u ga, ap kau dat wu ai.

Shaloi dai munggyi wa a hpyen ma ni gaw, Yesu hpe htingnu nhku de woi wa nna, dai hpyen dap na ni yawng hte hpe Yesu a man de shaga jahpawng tawn mu ai. Shanhte shi a hpun palawng raw kau nna, ahkyeng asan ai nba lawai ya mu ai; ju kagup mung shanhte hkri la nhtawm, shi a baw hta shagup ya nna, shi hkra lata e mai-aw yan mi jum shangun ma ai. Shaloi Yesu a man e lahput hput di let, shi hpe asawng nna, Yuda ni a hkawhkam wa e, nang galu kaba nga u ga law, ngu mu ai. Bai, shi hpe mayen mahtaw bun nhtawm, dai mai-aw yan hpe shanhte la nna, shi a baw hpe kayat ya mu ai. Shanhte shi hpe asawng asang di ngut jang, hkyeng ai nba raw kau nna, shi a hpun palawng hpe jahpun nhtawm, udang hta jen da na matu woi sa wa ma ai.

Shanhte pru sa wa yang, Simun mying ai Kureni mung masha langai mi hpe shanhte mu hkrup nna, shi hpe Yesu a udang hpai shangun ma ai. Ya Gol-go-hta ngu ai, Baw Pungkum mying ai shara de du jang, hka ai tsi hte hpaw ai tsabyi chyaru shi hpe jaw lu timung, Yesu dai hpe chyim yu nhtawm, n kam lu wu ai. Shi hpe udang hta jen da ngut jang, shanhte shi a hpun palawng hpe hpaida da ai hte jawm karan la ma ai. Shaloi dai yang e, dung nga nna, shi hpe sin da mu ai. Shi a baw ntsa e, “Ndai wa gaw Yuda ni a Hkawhkam, Yesu rai nga ai,” nga nna shi a mara madun ai laika hpe, shan hte shakap da ma ai. Yesu hte rau damya laghkawng hpe, hkra magade langai mi, pai maga de langai mi jen da mu ai. Lam e lai sa wa ai ni mung, shi hpe asawng asang di nna, shanhte a baw hpe kanga let, “Nawku Htingnu hpe jahten sharun kau nna, masum ya laman hta, bai de lu na, nga ai wa e, Na hkum hpe nan hkye la u; nang Karai Kasang a Kasha rai yang gaw, udang hta na yu hkrat wa rit,” ngu mu ai. Hkinjawng agyi ni, tara sara ni hte salang ni mung, “ Masha kaga hpe shi hkye la sai;ya, tinang a hkum hpe n hkye la lu a hka! shi gaw Israela a Hkawhkam rai yang gaw, Udang hta na yu wa u ga; shaloi anhte shi hpe kam sham na ga ai. Shi gaw Karai Kasang hpe kam hpa nga ai; Karai Kasang shi hpe ra sharawng ai rai yang, ya shi hpe mawai la u ga: kaning rai nme law, ngai gaw Karai Kasang a Kasha rai nga nngai nga nna shi tsun da ni ai,” ngu nna Yesu hpe asawng let tsun mu ai. Shi hte rau, udang hta jen da hkrum ai damya yan mung, dai hte maren shi hpe aroi arip di mu ai. Ya Jan pungding madi ai kaw nna ahkying masum du hkra, mung ting e nsin chyip rai mat sai. Ahkying masum daram e Yesu gaw nsen kaba hte, Eli, Eli, Lama sabak-htani nga nna jahtau wu ai: dai gaw nye a Karai Wa e, nye a Karai Wa e, nang ngai hpe hpa rai kau da nga n ta? nga ai rai lu ai. Dai makau e tsap nga ai ni nkau mi gaw dai hpe na la jang, Shi Eia hpe shaga nga ai, nga ma ai. Shaloi jang shanhte hta na marai langai ngai mi gat sa nna, hka kamu la nhtawm, kumba yan hta shakap nhtawm, lu na matu shi hpe jaw wu ai. Kaga ni mahtang gaw, Naw la u ga: Elia shi hpe sa hkye la na kun, anhte yu yu ga, nga ma ai.

Bai Yesu gaw nsen kaba hte bai jahtau wu ai hpang, shi a wenyi hpe jahti kau wu ai.

( Ya, yawng hput di let, jahkring mi myit sumru yu ra ai.)

Shaloi nawku htingnu na nba grang, ntsa de nna hkren, ka-ang brang ga mat wa ai. Ginding aga mung ashun awam wa nna, lunghkrung ni ga mat wa ai; lup ni mung hpaw mahka wa nna, Chyoi pra ai ni a hkum tsawp law law wa rawt wa nga ma ai. Yesu bai hkrung rawt ai hpang, shanhte lup ni hta na pru wa nhtawm, dai chyoi pra ai mare de shang wa nna, masha law law hpe tinang nan a hkum madun dan ma ai. Hpyen latsa up ai du hte, shi hte rau Yesu hpe sin nga ai ni gaw, dai nnang nawn hte byin mabyin hpe mu jang, shanhte hkrit kahpra nna, kaja wa, ndai wa gaw Karai Kasang a Kasha nan rai nga ai, nga nna tsun ma ai.

Ya hti ai gaw Madu a Kabu Gara shiga rai nga ai.

LUSHA GAM LADAW LABAN (5) NA MUNGGA

Karai Kasang ra sharawng ai hte anhte shinggyim masha ni byin mayu ai lam gaw grai shai chye nga ai. Hpa majaw nga yang Karai Kasang gaw mai kaja ai Wa re ai hta n-ga, shawng hpang yawng hpe chye lu nna anhte shinggyim masha ni gaw ting gyeng myit rawng nna tinang man na sha mu chye ai majaw re.

Karai Kasang hpe kamhpa nna Shi a myit hpe hkan shatup ai ni gaw galoi mung shut shai ai lam nnga na re. Rai tim tinang byin mayu ai hpe sha hkan shatup ai wa chyawm gaw lam dam chye nga ai. Karai Kasang  a lam hpe hkawm sa ai shaloi Lazaru a kana Matha hte Mary zawn shanhte a kanau nnga mat ai hpe hkap la chye nna Madu Yesu hpang hkrat nna du ai majaw shan a kanau asak si hkrum ai re ngu mara nshagun ai yawn hkyen ai lam hpe pi Madu Yesu hpang de sit shang nna shalan shabran la chye nga ai.

Ndai lu sha gam ladaw hta tinang a myit hpe ndang nyet kau nna Karai Kasang ra sharawng ai lam hpe hkan shatup galaw sa nna ru yak jam jau ai aten hta Karai Kasang hta shingbyi nna Shi Madu hte rau sak hkrung nga sa lu u ga.