2022:HKRISMAT LĂDAW HTA LABAN (II) NA MUNGGA

Hpaji Ningli hta Karai a sung dik ai hpaji hpe reng dik ai shayi numsha langai hku tsun da ai. Htani htana Karai a man e nga nga ai wa, Karai a hkringsan da ai amyu masha a lapran e ningngai na lam, Yerusalem de du machyu nga na lam, tsun da ai. Yawhan a Laika hta gaw “Mungga” ngu ai ga lang da ai. Htani htana ӑ nga nga ai wa, htani htana ninghtoi re ai lam, hpan Madu mung re ai lam, dai “Mungga” gaw shinggyim masha hkum shan dagraw la nna anhte hte ӑ nga nga ai lam tsun ai. Ehpesu hta Karai a mauhpa hkye hkrang la ai masing hpe shakawn da ai. Dai Mungga, dai Ninghtoi, dai Hpaji Ningli hpe manu shadan ra ai lam; Shi a marang e, kamsham ai ni hkam la lu na chyeju kumhpa ni gaw shadawn shadang n nga, nhpaw n-ya hkam la lu na lam tsun ai.  
 
Sawn sumru chye ai myit, sawn chye ai myit, chye lu ai myit, shani shagu na mahkrum madup hte mabyin ni hpe ginhka chye nna, yawng hpe reng hkang lu ai, tinang a myit hpe mung reng hkang lu ai atsam a majaw, shinggyim masha gaw kaga yawng hta reng grau dik ai n rai a hka! Dai majaw, masha langai hpe shapan shalat ai lam hta hpaji sharin hkaja shabrai gaw tsaw dik htum rai nga ai_ malu masha bu hpun palawng ni hta lai lai jan jan gumhpraw ma hkam ra ai rai nga ai. Chye la ai hpaji machye machyang ni hpe akyu jashawn nna tinang tinghkrai akyu a matu, n jaw n ang ai hku, n tara ai hku shingjawng hkat na matu, kaga masha ni a asak hte nga-mu nga-mai lam ni hpe jahten sharun na matu shangun lang ai ni nga ma ai zawn, shawa dawtsa, yawng hpe nga-mu nga-mai lam a matu akyu jashawn ai ni mung nga ma ai. Matsaw lahta tsang kaw na ninghtoi n lu la ai rai yang, hpaji machye machyang ngu ai, kaman lila sha tai mat lu ai. Mungkan hpaji machye machyang hkaja ai, ngu yang, Hpan Madu hpe mu chye lu na lam, Madu re ai Karai e yaw sing ai amu ni hpe chye lu, hkan shadik lu ai rai yang sha, ra n rawng ai hku manu dan na rai nga ai.
 
Mungkan ga, dinghta ga na hpaji chye chyang kung hpan ninglen, mai kaja ai amu n galaw lu ai ni law law nga ma ai; hten byak nga ai ni law law nga ma ai; kaga masha ni a akyu ara hpe jahten ai ni mung law law nga ma ai. Chyum mungga masum hte, Karai a yaw sing ai amu a lam tsun dan ai. Htenza mat ai shinggyim masha ni hpe Karai e hkye hkrang la ai ladat a lam rai nga ai. “Hpaji Ningli” ngu ai wa, dinghta ga de du sa ai, masha a hkumshan dagraw hkam la ai. Dinghta myit myit ai ni Shi hpe n chye ma ai; n hkap la lu ma ai. Shi hpe kamsham hkap la ai ni mahtang, Karai e tsawra hkrum nna, htani htana hpung shingkan dagraw hkam la, sutli wunli dagraw hkam la na ahkaw ahkang lu la ma ai. Marai langai hpra hpra, dai Mungga hpe tinang a kraw sindai hta hkap la ra ai. 
 
Dai majaw, San Pawlu shadum ai hta, Hkristu hpe tup hkra chye chyang lu na lam, myit masin wenyi hta Karai a ninghtoi hte jahpring la lu mu ga, nga, lam matsun akyu hpyi ya ai. Chyaloi nhkoi kaw na Karai Kasang shi lata hkringsan da hkrum ai ni hkam la na hpung shingkang hpe myit mada nga ra ai lam, San Pawlu lam matsun ninggun jaw ga tsun ai.  Langai hpra gaw Karai e tsawra nna hpan da hkrum ai, hkye hkrang la hkrum ai, hpung shingkang dagraw hkam la na matu hkringsan da hkrum ai lam hpe chye la sai rai yang, Karai hpe chyeju n htang ai nga na kun? Shi a matsan dum chyeju ni hpe n shakawn ai nga lu na rai kun? Karai a tsawra myit hpe grau chye lu magang, hkaja magang, grau ai myit pyaw myit dik ai lam hpe lu la na n rai a hka?
 
Mungkan hpaji hkrai shachyut, dinghta ga na lam hpe hkrai myit ai ni mahtang dai hpan Madu, Hkye Madu hpe n chye kau dat na sha rai nga ai. Mungkan ga e abyen ai n ju n dawng lam ni hte kaga ruyak shoi-hpa ni, sum mat machyi mat ai lam ni hpe hkrum sha ai aten ni hta myit daw na sha rai nga ai. Karai e yaw sing ai amu ni hpe kamsham hkap la ai ni a matu, tinang lu ai, tinang hta byin wa ai lam yawng hpe tsawra myit hte hkam sharang hkap la lu nna, myit mada ai lam galoi mung n tat kau na rai nga ai. Dai gaw, Karai a yaw sing lam, Karai a tsawra myit hpe chye chyang lachyum htai lu ai majaw rai nga ai.   
 Tinang masha tai wa nna dinghta ga e sa nga sa pra lu ai lam a majaw  Karai Kasang hpe chyeju dum chye ai kun?
 Tinang hpe Karai e jaw da ai nyan hpaji machye machyang ni a jaw e  Karai Kasang hpe chyeju shakawn chye ai kun?
 Tinang hpe Karai e jaw ya ai hpaji machye machyang ni hpe gara hku  akyu jashawn lang ai kun?

2022:HKRISMAT LĂDAW HTA LABAN (II) NA CHYUM LAIKA

HKRISMAT LĂDAW LAHKAWNG NGU NA LABAN
January 2, 2022
CHYUM MUNGGA DAW 1

Sirak 24:1-2, 12-16

Ya hti na gaw, myihtoi Sirak a Laika hta na rai nga ai.
Hpaji byeng-ya gaw, shi a lam hpe mahkawn ga ni hte mahkawn pyaw nga ai. Shi a sari sadang a lam shi a masha ni a man e hkai dan nga ai. Matsaw lahta tsang na Wa a wuhpung wuhpawng a man e  shi a n-gup hpaw let Karai Kasang a shawng e tingnang hkum hpe shagrau sha-a nga ai. Ngai gaw awng dang ai amyu ni kaw malawm rai lu ni ai; Madu a Sali wunli hkam lu ai ni kaw lawm lu ni ai. Ngai gaw Lebanon mungdan kaw tu ai manam pyaw ai marau hpun zawn tsaw ai shara kaw tu nga lu sai. Sidadin hpun hte Hamon bum na Saipres hpun zawn shara lu tawn sai. Enjedi kaw na Namhtan (Supalun) hpun zawn, Jerihku mare kaw na Numripan zawn, Pa layang kaw tu tsawm ai Tsanlun hpun zawn, Hka kau e tsit lali rai tu tsawm ai Layang hpun zawn, rai nga ai. Hpun shanam zawn, manam pyaw ai namhawmi zawn, manu dan la ai mura sama zawn, ngai hawm pyaw la ai sama shamawng nngai. Chyoipra ai shara hta gabanum (Galbanum) hte onika (Onycha), manam pyaw ai namhpyit chyingmun ni hte mura sama hpe shamawng nngai. Nye a htoi kabrim la ai lakung ni hpe tu shabra tawn nngai.
Karai Kasang a Mungga rai nga ai.

CHYUM MUNGGA DAW 2

EHPESU 1:3-6, 15-18

Ya hti na gaw, Ehpesu ni hpang de San Pawlu shagun dat ai Laika hta na rai nga ai.
Anhte a Madu Yesu Hkristu a Kawa rai nga ai Karai Kasang gaw, a nga u ga law: shi gaw sumsing lamu lahta tang hta e, Wenyi hte seng ai shaman ya ai lam amyu myu hte, Hkristu hta e anhte hpe shaman ya mi ai: 4anhte gaw tsawra ai myit hte, shi a man e chyoi pra ai ni hte mara n rawng ai ni tai wa u ga, ginding aga garai n lat yang nna, shi anhte hpe Hkristu hta e lata la ma ni ai. Tsawra htum ai Kasha a marang e, anhte hpe jaw dat mi ai hpung shingkang rawng ai chyeju a lam hpe shakawn kungdawn u ga, shi a shawang myit sharawng awng nga ai hte maren, Yesu Hkristu a jaw e, kasha yin la na chyeju hkam la lu u ga, shi anhte hpe shawng nnan e san da ma ni ai.
Dai re ai majawm Madu Yesu hta e mung, chyoi pra ai ni yawng hte hta e mung, nanhte lu nga ai makam masham lam hpe ngai na yu nngai majaw, ngai mung, nye a akyu hpyi ai hta nanhte hpe adum nga let, nanhte a lam shakawn kungdawn na n sim n sa rai nga nngai. Anhte a Madu Yesu Hkristu a Karai Kasang ngu ai, hpung shingkang a Kawa gaw shi hkum nan hpe chye chyang lu mu ga, hpaji byeng ya hte shingran shapraw ai Wenyi nanhte hpe jaw ya u ga hte; shi shaga la ai a jaw e myit mada shara gaw gade wa kaba nga ai mung; n taw n tsang ai hpung shingkang rawng ai shi a Sali wunli gaw chyoi pra ai ni hta e gade wa kaba nga ai mung; kamsham nga ai anhte hta e shi a nachying galu kaba htum ai atsam gaw  gade wa galu kaba nga a hkra.
Karai Kasang a Mungga rai nga ai.
    
KABU GARA SHIGA     

Yawhan 1:1-5, 9-14

Ya hti na gaw, Yawhan a laika hta na Kabu Gara Shiga rai nga ai.
Shawng ningpawt e Mungga nga ai; dai Mungga gaw Karai Kasang hte rau rai nga ai rai nna, dai Mungga nan Karai Kasang rai nga ai. Dai Mungga gaw shawng ningpawt e Karai Kasang hte rau rai nga ai. 3Arai yawng mayawng gaw shi a marang e tai nga ai; nga manga hta shi n lawm ai tai wa ai gaw, langai mi muk n nga ai. Shi hta asak daju rai nga ai; dai asak gaw masha ni a nhtoi rai nga ai. Dai nhtoi gaw nsin hta htoi nga ai rai nna, nsin mahtang gaw dai hpe n chye hkap la wu ai. Mungkan ga de sa nga let, masha nlang hte hpe jahtoi ya ai nhtoi majing chyawm gaw, nga nga sai. Shi gaw mungkan ga e nga nga ai hte, mungkan ga mung shi a marang e nan tai wa sai: rai timung mungkan ga gaw shi hpe n chye wu ai. Shi gaw shi a mung ga de du sa ra ai rai timung, Shi a baw sang ni gaw shi hpe n hkap la ma ai. Shi a amying ningsang hpe kamsham ai ni ngu ai, shi e hkap la mala ni hpe, Karai Kasang a kashu kasha tai lu na ahkang shi jaw mu ai: dai ni gaw, asai hte shaprat ai ni narai, hkum shan a myit hte mung nrai, masha a myit maw ai hku hte mung n rai, Karai Kasang e shaprat ai ni she rai ma ai.Dai Mungga gaw masha a hkum shan dagraw la nna, chyeju hte tengman ai hpring let, anhte hta nga nga yu sai rai nna, Kawa hta na Kasha shingtai a hpung shingkang zawn, anhte shi a hpung shingkang hpe, mu lu sagaw ai. 
Madu a Kabu Gara Shiga rai nga ai.

2021:CHYOI PRA AI HTINGGAW POI SHANI NA MUNGGA

Karai Kasang gaw anhte a shani shagu na mahkrum madup ni hta anhte hte rau nga nga ai lam, Shi hpe kamsham hkap la ai ni a dinghku hta arau hpawng de ai lam, Karai Kasang ra sharawng ai dinghku hpawng tai ra ai lam, Karai a mungga hta ru jung nna asak hkrung ai a marang e, ngwi pyaw simsa shimlum ai dinghku tai lu na lam, ndai lam ni gaw madung rai nga ai. 

Shinggyim uhpung uhpawng yawng a ningpawt gaw kun dinghku re. Masha langai mi hta rawng ra ai myit masin wenyi a atsam marai ni hte machye machyang ni hpe hkaja la hpang ai shara mung kung dinghku sha re. Dai hpe chye ai Mao Zi Dong gaw shi a mungmasa bandung de du lu na matu, kun dinghku ni hpe shawng hpya run kau ai. Kanu kawa hte kasha ni a lapran tsawra manoi ai myit hpe dan kau lu hkra shawng galaw ai. Ra wa jang kanu kawa hpe rai tim htawng jahkrat na, adup abyen na, sat kau na, ngu ai myit masin bang ya ai. Comunit mungmasa party a lam matsun woi awn ai npu e, kanu kawa makyin jinghku, ngu, manu shadan ai lailen n nga hkra, shawng galaw kau ai. Shing re ai majaw, Miwa mungdan tsin-yam dam amyu myu hkrum sha lai wa ai; shaning law law matsan jamjau hpang hkrat ngam mat ai. Kun dinghku a san seng ai lam arawng sadang hpe kadai mung n jahten kau lu ai. Dai ni na prat hta Miwa mung communit masa npu e sha, kun dinghku hte seng ai ahkaw ahkang, sari sadang ni hpe bai jaw ya, makawp maga ya ai lam galaw wa ai gaw adan sha re.

Samuel Laika hta, Hanna gaw asak kaba lai ai hpang, akyu hpyi nna lu la ai kasha Samuel hpe Karai Kasang kaw bai ap jaw ya ai akyu hpyi hkungga a lam, dai hpang, jau kaba Eli a lata hta ma da, ap da ai lam tsun ai. Hanna a makam masham kaba ai, kasha lu mayu ai, lu la ai hpang e Karai Kasang hpe chyeju htang ai; Eli e sharin achyin ya na lam kasha hpe ma da ai. Kasha hpe Karai Kasang a matu ma da, nawng da ai majaw, Samuel gaw machye machyang kung hpan ai hpang, mying dan hkung ai myihtoi tai wa ai. Hanna gaw mau-dung hku, kaya kahpa hta prat jahtum na lam kaw na lawt lu ai hta n-ga, reng dik ai kasha lu la ai. Karai Kasang hpe ma da, nawng da let myit pyaw myit dik ai prat hpe lu la nu ai. Hkum nan makam masham kaba ai, myit n daw ai sha akyu hpyi chye ai majaw, shalan shabran ai lam hpe tup hkra lu la nu ai.

 Yawhan a Shagun Laika hta, hpan Madu Karai Kasang nan, Shi hpan da ai shinggyim masha, grau nna Hkristu e shalawt dat hkrum ai ni hpe kasha ni shatai la na matu, chyӑloi nhkoi kaw nna masing gran da chyalu re ai lam tsun ai. Kasha ni jet ai rai yang, Karai a tara matsun ni hpe hkan shatup ai ni rai na, Karai e ra sharawng ai hku hkan nna asak hkrung ai ni hpe Karai a dinghku hpawng hta shaga la ai, nga ai. Luka a Kabu Gara Shiga hta, Karai a Kasha majing re ai Yesu hpe Maria yan Yosep a htinggaw masha shatai da ai lam hpe asan sha chye lu ga ai. Shinggyim amyu ting hpe Karai Shi a htinggaw hta shalawm la lu na matu Karai e chyӑloi nhkoi kaw na sing da ai amu n rai a hka? Mau n ma re ai Karai a tsawra myit hte sung dik ai hkye hkrang la ai masing n rai a hka? Karai Kasang rai ninglen masha majing tai ai Yesu gaw Kawa Karai Kasang hpe mung, Maria yan Yosep hpe mung, ra n rawng ai hku nna madat mara ai. 

 “Na ga hte maren ngai hta byin wa u ga” ngu ai a marang e, Maria gaw myit ru hki-ba lam ni yawng hpe hkam la ra nu ai; wudang hkrun lam du hkra rai. Yosep mung Lamu Kasa e htai ya ai ga a majaw, Maria hpe hkungran la na dawdan lu ai. Prat a jahtum du hkra brang jet hku nga nna dinghku hpe woi awn lai wa nu ai. Yesu a madat mara ai lam mung, “Ngai myit ra ai hku n rai, nang Wa ra sharawng ai hku rai wa u ga” ngu, htan ya ai hta, n htum nni shoi chyum hkam la nna wudang ntsa jen noi si hkam nu ai. Karai a tara hkan shadik let shada hkung ga tsawra madat mara, lanu lahku hkat ai a marang e, Karai a asak hta jawm pawng lu nna, Karai a kasha jet jet, Karai dinghku masha ajet tai lu na ga ai.

 Karai a kasha ni tai wa ai, Karai a dinghku masha ni tai lu ai hta grau ai  arawng aya, sari sadang hpa wa naw nga na rai ta? 

 Shada madat mara ai gaw kade ahkyak ai hpe ya sha sha sumru yu ga ai kun?

 Shawng shawng na Nawku Hpung gaw kun dinghku langai hpra kaw na  gaw  sharawt hpang ai hpe dum ga ai kun?

2021:CHYOI PRA AI HTINGGAW POI SHANI NA CHYUM LAIKA

CHYOI PRA AI HTINGGAW POI
December 26, 2021
CHYUM MUNGGA DAW 1

1 Samuela 1:20-22,24-28

Ya hti na gaw, Samuela a Laika langai hta na rai nga ai.
Shing rai Hana na-um nasin rai nna, nhtoi gu jang shadang sha shangai wu ai; dai wa hpe Karai Kasang kaw hpyi la ai re ai majaw, Samuela ngu nna shamying wu ai. Ya Elakana gaw, shi a nta masha ni yawng hte rau, shaning shagu na hkungga jau na hte ga shaka raw na matu lung wa ai. Hana chyawm gaw, madu wa hpe, Ma chyu garai n hka yang, ngai n lung na nngai; chyu hka jang she, Karai Kasang man e prat tup anga nga na matu sa da ai hte hpawn, woi lung na nngai, nga nna nta e anga nga ai. Chyu jahka kau jang she, usu nga masum, shadung bye mi, tsabyi tau mi hte hpawn, ma hpe woi lung wa nna, Shilo shara na Karai Kasang nta de du ma ai. Dai ma chyawm gaw naw kaji nga la ai. Dai usu hpe sat nhtawm, ma dai hpe Eli kaw woi shawn tawn mu ai. Shaloi Hana gaw, Nye a madu e, nang hkrung nga ndai hte maren, ngai gaw shawng de lang mi, ndai yang na makau e tsap let Karai Kasang hpe akyu hpyi ai numsha rai nga nngai. Ma ndai lu la na matu ngai hpyi nngai: ngai hpyi hte maren Karai Kasang ngai e jaw ni ai: 28dai re ai majaw, ngai shi hpe Karai Kasang e jaw da ni ai; shi hpe si ai nhtoi du hkra Karai Kasang a matu jaw da ai rai sai, nga nna tsun ngut jang, dau yang e Karai Kasang hpe nawku ma ai.
Karai Kasang a Mungga rai nga ai.

CHYUM MUNGGA DAW 2

1 Yawhan 3:1-2, 21-24

Ya hti na gaw, Yawhan a shagun dat ai Laika langai hta na rai nga ai.
Yu mu, Karai Kasang a kashu kasha ni anhte hpe ngu shamying mi ai majaw, dai Kawa gaw anhte hpe kade wa tsawra da mi hka: shi a kashu kasha ni mung anhte rai nga ga ai.  Dai rai nna, mungkan ga gaw shi hpe n chye wu ai majaw, anhte hpe mung n chye mi ai. Tsawra ai ni e, Karai Kasang a kashu kasha ni, anhte ya e rai nga ga ai rai nna, anhte hpa mi tai na, garai n dan pru nga ai: rai timung, shi dan pru nga yang, anhte shi hte bung na ga ai, anhte chye ga ai: kaning rai n me law, shi hkum hpe nan anhte mu lu na gaw ai. Tsawra ai ni e, anhte a myit anhte hpe mara n shagun yang gaw, Karai Kasang a man e, anhte nden ja ai myit rawng nga ga ai rai nna anhte a hpyi mahpyi shi kaw nna, anhte lu la na ga ai: kaning rai n me law, shi a hkang da ai ga hpe anhte hkan shatup ga ai rai nna, shi a man e sharawng awng ai amu hpe galaw ga ai. Shi anhte hpe hkang da mi ai hte maren, shi a Kasha Yesu  Hkristu a amying nsang hta kamsham nna, shada da tsawra myit ga, dai gaw shi a hkang da ai ga rai nga ai. Shi a hkang da ai ga hpe hkan shatup ai wa gaw shi hta e anga ga ai rai nna, shi mung dai wa hta e anga nga ai: shi anhte hpe jaw da ai Wenyi a majaw, anhte hta e shi anga nga ai gaw, anhte chye nga ga ai.
Karai Kasang a Mungga rai nga ai.

KABU GARA SHIGA

Luka 2:41-52

Ya hti na gaw, Luka a laika hta na Kabu Gara Shiga rai nga ai.
Shi a kanu yan kawa gaw, shalai wa ai poi ten du jang, shaning shagu Yerusalam de sa ma ai. Dai ma gaw shi lahkawng ni du jang, dai poi a htung the maren shanhte lung wa ma ai; Dai nhtooi hte shalai ngut nna bai wa ma yang, dai ma Yesu gaw Yerusalam e hti nga mat ai; kanu yan kawa chyawm gaw dai nchye ma ai. Rau wa manang hpung hta lawm wa n dawn nga nna myit kau ma ai majaw, shan gaw lani shat wa nna, mayu dama ni hte chye chyap ai ni kaw shi hpe hkan tam ma ai. Dai ma hpe nmu jang, shan gaw shi hpe hkan tam let, Yerusalam mare de nhtan sa ma ai. Ya masum ya na wa saying she, dai nawku htingnu kata, sara ni a kaang e, shanhte a ga madat la nna, shanhte hpe jasan let, dung nga ai hpe, shan sa mu mu ai. 
Shi a ga na mana ni gaw, shi a myit kung ai hpe mung, shi htan ai ga a majaw mung mau nga ma ai. Shi hpe mu jang shan mau mat ma ai rai nna, shi a kanu gaw sha e, hpa rai an e ningdi mi ta? Yu u, nwa hte an myit ru myit tsang ai hte nang hpe hkan tam nga ga ai, ngu nna shi hpe tsun wu ai. Shi gaw, hpa rai ngai hpe tam myi ta? nye Wa  hte seng ai lam hta ngai nga lu mai ai, nan nchye myit ni? Ngu nna shan hpe htan wu ai. Raitimung, shi shan hpe tsun ai ga gaw, shan n chye na ma ai. Shi chyawm gaw shan  hte rau yu wa nna, Nazaret mare de du wa ai; shan a apu e mung shi taw nga ai; Shi a kanu gaw dai ga ma hkra hpe shi kaw hta matsin da wu ai. Yesu gaw hpaji brengra kumhpang wa ai  hte, gawng shin-ran kaba wa nna, Karai Kasang a man e mung, masha a man e mung mi man pa wa nga ai.
Madu a Kabu Gara Shiga rai nga ai.

2021:HKRISMAT POI SHNI NA CHYUM LAIKA

HKRISMAT POI SHANI NA CHYUM LAIKA
Chyum Laika Daw 1

Esaia 52:7-10

Kabu gara ai shiga gun nna, ngwi pyaw ai lam shana ai wa a lagaw, gade tsawm htap nga ai hka! Kaja ai shiga kajai gumhkawng ai hte, hkye hkrang la ai lam shana ya let, na a Karai Kasang up nga ai, ng anna Ziun hpe tsun shana ai wa a lagaw gaw, bum lang ntsa e gade tsawm htap nga a hka! Na a sin langa ni a nsen madat u, shanhte nsen sharawt nna, kabu gara ai hte rau garu mu ai, kaning rai nme law, Madu gaw Ziun mare de nhtang wa ai hpe tinang nan myi chyaw mu lu na ma ai.
Yerusalem mare na katsi katsang shara ni e, mahkawn mangoi let rau garu mu, Madu gaw Shi a amyu hpe shalan shabran ai hte, Yerusalem mare hpe hkye mawai la mu ai. Madu gaw, masha amyu baw ni mahkra a man e Shi a chyoi pra ai lahpum shadawng dan nna anhte a Karai Kasang a hkye hkrang la ai lam gaw lamu ga hteum hkra dan leng was ai.
Karai a mungga rai nga ai.

Chym Laika Daw II

Hebre 1:1-6

Hp unau ni e, Karai Kasang gaw moi na lakhtak hta, prat mi hte prat mi lam amyu myu hku nna, myihtoi ni a n-gup hte ji w ani hpe gat sun da nu ai. Ndai hpang jahtum na aten ladaw hta, Shi a Kasha a n-gup hte anhte hpe ga matsun jaw da mani ai. Dai Kasaha hpe Sali wunli mahkra hkam la na matu, Shi san da sai rai nna, Shi a marang e ndai mungkan ga hpe hpan tawn da nu ai.
Dai Kasha gaw Karai Kasang a hpung shingkang tu kabrim ai nhtoi rai nga ai hte, Karai atai a hkkkkrang sumla rai nga nna, Shi hkang da ai mungga a atsam hte, Shi yawng mayawng hte hpe bau sin nga ai.
Ya, shut hpyit mara shatsai kau y anna, matsaw ningtsang na daru magam a, hkra maga de Shi dung ng anna, lamu kasa ni hta Shi grau reng ai amying hkam la sai hte maren, shanhte hta Shi grau reng ai wa tai nga ai. Kaning rai nme law, “Ngai Sha, Nang rai nga ndai, dai ni e Ngai, Nang hpe shaprat sade ai, bai nna, Ngai gaw Shi a Kawa tai nna, Shi gaw, Ngai Sha rai na ra ai.” ng anna Karai Kasang tsun ai ga hpe, gara lamu kasa hpe Shi tsun yu a ta? Dai hta kaga, Shi a Kasha Alat hpe mungkan ga de jashawn dat ai shaloi, Karai Kasang a lamu kasa ni yawng Shi hpe nawku mu ga, ng anna tsun wu ai.
Karai Kasang a mungga rai nga ai.

Kabu Gara Shiga

Yawhan 1:1-5,9-14

Shawng npawt e Mungga nga nga ai, dai Mungga gaw Karai Kasang hte rau nga nga nna, Mungga nan Karai Kasang rai nga ai. Dai Mungga gaw shawng npawt e Karai Kasang hte rau nga nga ai. Arai yawng mayawng hte gaw Shi a marang e tai wa ai rai nna, Shi n galaw lawm ai gaw langai pyi n nga ai. Shi hta e, asak daju rawng nga ai rai nna, dai asak gaw mash ani a nhtoi rai nga ai. Dai nhtoi gaw nsin hta htoi ng anna, nsin mahtang dai hpe n dang kau lu ai.
Mungkan ga e shangai wa ai msha yawng hte hpe jahtoi ya ai Nhtoi nga nga sai. Shi gaw Nhtoi majing rai nga ai. Shi gaw, mungkan ga e nga nga ai hte, mungkan ga mung Shi a marang e tai wa sai, rai timung, mungkan ga gaw Shi hpe n chye wu ai. Shi gaw Shi a buga de du sa ti mung, Shi a baw sang ni Shi hpe n hkap la ma ai. Shi a amying ningsang hpe kam sham nna, Shi hpe hkap la ai ni yawng hte hpe chyawm gaw, Karai Kasang a kasha ni tai lu na atsam Shi jaw da nu ai, dai ni gaw, asai hte shaprat ai ni nrai, hkum shan a myit hte mung nrai, masha amyu maw ai lam hte mung nrai, Karai Kasang e shaprat ai ni rai nga ma ai.
Mungga gaw masha a hkum shan dagraw la nna, anhte hte rau nga sai. Dai rai nna, Kawa kaw nna shaprat ai Kasha Shingtai a hpung shingkang zawn, Shi a hpung shingkang hpe anhte mu lu saga ai.
Madu a kabu gara shiga rai nga ai.

2021:DECEMBER 24 YA YUP TUNG MISA NA CHYUM LAIKA

Chyum Laika Daw I

Esaia 62:1-5

Yerusalem mare a dinghpring ai gaw, Kabrim ala nga ai hte de a hkye hkrang la ai lam, pyeng ding zawn htoi tu nga ai du hkra, ngai Ziun a lam hta a tsin sha nga na nrai. Yerusalem mare a matu gaman nga na nrai. Dai aten hta maigan amyu ni, na a dinghpring ai hpe Hkawhkam ni mahkra, na a arawng sadang hpe mu mada nna, Madu a n gup na pru ai mying nnan hte nang hpe shamying na mara ai. Nang gaw madu a lata hta tsawm htap ai shanghkawng, na a Karai Kasang a lata hta hkawhkam janmau tai na rin dai. Htawm hpang de nang hpe mare dingsa ngu na mung, na a mungdan hpe katsi katsang shara ngu nna mung shamying sana nrai. Nang hpe ngai sharawng awng ai jan, na a mungdan hpe hkunghkran sai num nnan ngu nna shamying na maru ai. Kaning rai nme law Madu gaw nang hta awng sharawng nna, na a mungdan gaw hkungran madu lu na ra ai. Shabrang wa gaw mahkawn hte hkungran ai zawn na a shadang sha ni gaw nang hte hkungran na mara ai. La nna gaw, num nna majaw kabu gara ngai hte maren na a Karai Kasang, na a majaw kabu gara nga na ra ai. 
Karai Kasang a mungga rai nga ai

Chyum Laika Daw II

Kasa 13:16-17, 22-25

Pawlu gaw, Pesidi mung na Antiok mare de du ai shaloi, tara jawng hta rawt tsap nna shanhte atsin sha nga matu, lata dingsi let madun ya u ai. Shaloi shi tsun shadum ai gaw, Israela masha ni hte Karai Kasang hpe hkrit hkungga ni e, madat mara la mu ndai Israela amyu a Karai Kasang gaw anhte a ji wa ni hpe lata la mu ai rai nna, Egutu mung e naw nga nga yang dai amyu hpe shagrau nna, n gun lapring rawng ai lata hte dai mung de nna, shanhte hpe shaw la nu ai. Dai hpang shahte a hkawhkam tai na matu, Dawi hpe sharawt yu wu ai. Dai wa a lam, shi nan sakse  hkam ai gaw nye a mying hte tup ai Yese a kasha Dawi hpe ngai mu se ai. Dai wa gaw ngai ra ai hku yawng shadik ya na ra ai, nga ai. Dai wa amyu matu hta na Karai Kasang gaw ga ndat nga ai hte maren Isrela Masha ni a matu hkye hkrang la ai, Madu Yesu hpe paw pru shangun wu ai. Dai wa garai npru yang Yawhan mung Israela amyu hpe myit malai hte seng ai kashin kamun lam shawng hkaw dan manu ai. Bai Yawhan gaw shi gun ai magam pra wa na rai jang, ngai hpe kadai re ai nawn nga myit ta? Ngai gaw dai wan rai nngai, nye a hpang e langai mi du na ra ai, shi a gyep din raw na pi n ging nngai nga nna tsun wu ai.
Karai Kasang a mungga rai nga ai.

Kabu Gara Shiga

Mahte 1:18-25

Ya Yesu Hkristu shangai wa ai lam, ning rai nga ai. Shi a kanu Maria gaw, Yosep e mahtan da nga sai rai nna, shan shada da garai n kanawn yang, shi gaw Chyoi Pra ai Wenyi a majaw na-un na sin rai wa sai. Shi a madu wa Yosep chyawm gaw dingman nga ai rai nna, shi a lam n shebrawng mayu ai majaw lagyim dat kau na maw nga ai. Ndai lam ni hpe naw myit aru yu nga yang Madu a lamu kasa langai mi yup manang hta shi kaw dan pru nna Dawi a kasha Yosep e, na madu jan Maria hpe la na myit hkum ru et. Shi a na-um na-sin gaw chyoi pra ai wenyi kaw na rai nna, nang shi a mying hpe Yesu ngu nna shamying l una rai nga ai. Kaning rai nme law, shi a amyu hpe tinang a shut hpyit mara kaw na, hkye hkrang la ai wa shi rai nga ai, ngu wu ai. De a lam yawng hte gaw, Madu shi a myit htoi hta dik wa u ga matu byin wa sai. Shi gaw yu u, shayi hkawn sek na-um, nasin rai wa na rai nna shadang sha shangai na ra ai. Shi a mying Emanuel shamying ya na maru ai, nga ai. De a ga lachyum Karai Kasang anhte hte rau nga nga ai, ngu ai rai. Yosep yup pyaw kaw na rawt wa nhtawm madu a lamu kasa shi hpe hkangda ai hte maren, galaw wu ai rai nna, shi a madu jan hpe la wu ai. Rai timung, shadang hpe garai n shangai yang shi hte n ganawn ai sha nga nga ai. Dai shadang sha hpe Yesu ngu nna, shamying wu ai. 
Karai Kasang a kabu gara shiga rai nga ai.

2021:DU SA LADAW HTA LABAN (4) NA MUNGGA

 

“Shi gaw rawt tsap let sagu ni hpe rem sin makawp maga ya na ra ai…Sagu ni mung shi a lata hta shimlum lam lu la na ra ai”, nga, myihtoi Mihka tsun ai. Hebre Laika hta, dai kangka ai sagu rem wa gaw shi a hkum hpe hkungga shan shatai ap nawng na lam, tinang a myit masin hpe nawngjau ai amu, hkungga shatai ai amu gaw Karai a ga hpe madat mara ai amu re ai lam tsun da ai. Dai gaw Hkristu hpe shăang da ai. Yawng a shawng na kanu ningpawt Eva n madat mara ai majaw, shinggyim masha amyu ding-nye lu ai; dai hpe tai htang hpyan yan ya ai gaw Hkawn-zin Maria a madat mara ai amu re ai lam…. ‘‘Na ga hte maren ngai hta byin wa u ga” ngu, htan ya ai. Ga lӑreng ni gaw dai hte re. 

Anhte a mungdan kata shimlum lam n lu ai shara law law nga ai; mungmasa htenza mat ai kaw na mungdan ting, shimlum lam n lu mat ai. Shani shagu galoi hpa byin byin, hpawt ni hpa sha na, dinghku masha ni hte lu da ai sut-rai ni hpe gara hku makawp maga na, ngu nna, myit tsang ra ai lam kahtap wa nga ai. Mungkan ting hta mung, hkrit hpa shi-ga ni jat ding-yang rai nga ai. Galoi mi shimlum lu nna simsa wa na rai ta?

Ndai dinghta ga e maren re ai manghkang ni prat shagu, ban shagu e nga nga na re. Dai Hkye La Madu Hkristu hpe kamsham kamhpa ai ni chyu sha, shimlum lam, simsa lam hpe chyim yu hkam sha lu na rai ma ai. Ningpawt shut hpyit mara a majaw, prat shagu ban shagu na shinggyim masha ni a n hkru ai myit kaw na prut pru ai manghkang ni a nga nga na re. Shada ninghkap matai dawp hkat ai, gashun kashe re ai dinghta ga masha ni hpe awu asin ding-nye kaw na lawt lu na matu, Hkristu gaw shinggyim masha majing tai hkam la nna kuptsup dik ai MADAT MARA ai lam a majaw, dinghta ga na n hkru n kaja ai lam yawng hpe Kawa Karai Kasang hpe kamhpa let hkamjan lu ai majaw, awu asin ni a lapran hta dinghpring ai hku nga sa lu ai majaw, tinang a hkum hpe hkungga shan shatai nawng ya na gingdan ai wa tai lu na rai nga ai. 

Moshe a Tara matsun ni kaw nawngjau ai htung lailen ni hpe Karai Kasang matsat ai, lau mat hkra re ai, nga ai. Dai Hkristu gaw, dai hkungga hpe dawm kau nna ningnan re ai hkungga nawng ya lu na rai nga ai: “Nang ra sharawng ai lam hpe hkan shadik na matu ngai du sa ni ai”, nga ai. Kuptsup ai madat mara lam rai nga ai. Nang/ ngai, galaw lu na kun? Hkan galaw shakut ra na ga ai. Ningpawt ninghpang kanu Ewa ga n madat ai majaw htenza mat ai hku-hkau kanawn mazum lam (Karai hte masha a lapran, masha shada a lapran, masha hte dusat hpun kawa ni a lapran) hten run mat ai. Dai hpe tai htang tsi shamai na matu, chyaloi nhkoi kaw nna Karai e sing da ai amu, Ewa ningnan, dai hkawn-zin Maria hpe Lamu Kasa ga sa shana ai shaloi, dai hkawnzin gaw, “Na ga hte maren ngai hta byin wa u ga”, ngu, htan ya ai.  

 Madat mara ai lam kade ahkyak ai ngu ai hpe chye la lu ga ai. Tatut a matu lawu na lam ni hpe myit sumru yu mai ga ai. Shada hkam nna madat mara ga ai kun? Langai hte langai a ra sharawng ai lam, shada myit pyaw lam a matu galaw ya ga ai kun? Ra rawng hprai shai ai lam hta shada hkam sharang mara dat ya lu ga ai kun? 

Dusat ni, hpun kawa, hka-shi hka-nu ni a hkrap madai nsen ni hpe shinggyim masha ni madat ya ma ai kun? Lamu ga hte hpun maling ni pawt sindawng wa jang lamu ga ganan wa ai, nbung laru kaba, hka-mawru kaba ni byin wa ai, bum ni gyi ai, lamu marang laja lana sawng ai, shing n rai, lamu hpawng ai, kahtet lai, katsi lai re ai lam ni byin wa ai.  Masha shada hte mung, grup-yin shingra manan tara hte mung, hkung ga hkat nna simsa shimlum lam a matu, tinang a tingkyeng myit hpe shagrit kau lu na kun? Tinang a hkum hpe ningdang nyet kau ai amu gade galaw lu na kun?

 Lu ai hta jan nna lu mayu, jai mayu, pyaw mayu ai majaw, hpa hpe rai   rai lahpawt lama di kau ga ai kun? 

 Tinang n ra ai, jan ai, mahkawng da ai kaw na garan gam jaw ai lam  galaw gwi ga ai kun?

 Lahta na ga-san ni gaw shada hku-hkau, htingram hkat lu nna shimlum lam,  simsa lam hpe gaw sharawt, madi shadaw lawm lu ai lam ni rai nga ai.

 Masha e n di lu ai hpe Karai a chyeju hte yawng hpe galaw lu ai, nga,  Lamu Kasa Maria hpe tsun ai.

2021:DU SA LADAW HTA LABAN (4) NA CHYUM LAIKA

DU SA LADAW HTA LABAN 4
December 19, 2021
CHYUM MUNGGA DAW 1

MIHKA 5:2-5a.

Ya hti na gaw, myihtoi Mihka a Laika hta na rai nga ai.
Madu ning nga ai: Nang Betlehem Ehprat e, Yuda amyu law law hta nang kaji nga ti mung, Isarela amyu hpe up na Madu gaw, nye a matu nang kaw paw pru na ra ai: dai wa gaw moi chyaloi nhkoi kaw nna paw pru ai wa rai nga ai. Dai rai nna, shinggyim machyi ai numsha kasha shaprat ai aten du hkra, Madu shanhte hpe ap kau na ra ai: dai shaloi e naw ngam nga ai shi a kahpu kanau ni gaw, Israela kashu kasha ni hte rau nhtang wa na mara ai. Dai wa gaw tsap nga nna, Madu a n-gun hte mung, shi a Madu Karai Kasang a mying ningsang a daru magam hte mung, shi a sagu hpung hpe bau na ra ai: shanhte mung grin nga na mara ai; kaning rai nme law, shi gaw lamu ga htum hkra galu kaba wa na ra ai. Dai wa gaw anhte a ngwi pyaw Madu tai na ra ai.

Karai Kasang a Mungga rai nga ai.

CHYUM MUNGGA DAW 2

HEBRE 10:5-10

Ya hti na gaw, Hebre masha ni hpang de San Pawlu shagun dat ai Laika hta na rai nga ai.
Hpu nau ni e, Hkristu gaw ndai mungkan ga de du sa yang, ning nga tsun wu ai gaw: Hkungga hte kumhpa hpe nang n ra nga ndai; Nang nye a matu hkum hkrang lajang da nit dai: Hkum dingyawng nat ai hkungga hte, mara raw ai hkungga hpe, Nang n ra sharawng ndai; Shaloi e, Laika shabawn hta nye a lam ka da nga ai gaw: Karai Kasang e, nang e nga nga nngai; Nang myit ra ai hku hkan galaw na, ngai sa du ring ngai, ngu we ai,nga nna tsun ai. 
Jep ai tara hta hkungga nawng ai lam hkang da ti mung, Shi gaw, Shagu hkungga, kumhpaw kumhpa, hkum dingyawng nat ai hkungga hte, mara raw ai hkunga hpe nang n ra sharawng nga ndai, nga nna shawng tsun nu ai. Dai hpang, Ngai nang e nga nga nngai; myit ra ai hku hkan galaw na ngai du sa ring ngai, nga nna bai tsun ai. Dai rai nna, hpang na lam hpe shagrin na matu, shi shawng na lam hpe yeng seng kau wu ai. Shing rai, Karai Kasang myit ra ai hku re ai majaw, Yesu Hkristu a hkum hkrang hpe lang lata sha nawng ya ai a marang e, anhte gaw shachyoi shapra ai hkrum saga ai.
Karai Kasang a Mungga rai nga ai.

KABU GARA SHIGA

LUKA 1:39-45

Ya hti na gaw, Luka a Laika hta na Kabu Gara Shiga rai nga ai.
Dai aten hta e, Maria gaw Yuda mung na bum ga e nga ai mare langai mi de alawan rawt sa nna, Zakari a nta de shang nhtawm, Elisabet hpe hkrum shaga wu ai. Maria hkrum shaga ai ga hpe Elisabet na la jang, shi a hkritung na ma gumlawt nga ai. Elisabet mung Chyoi Pra ai Wenyi hte hpring nna, nsen kaba hte jahtau let, Numsha ni hta nang a lu ndai; na a hkritung na ma mung a lu nga ai. Nye a Madu a kanu ngai hpe sa kawan ai gaw hpa chyeju a jaw e rai ra ai i? Ngai nang hpe tsun de ga: Na a shakram ai ga nsen ngai na la ai hte rau, nye hkritung na ma kabu gara ai hte gumlawt nga ai. Madu shi hpe tsun ai ga dik wa na ra ai lam hpe kam sham ai numsha gaw ‘a’ lu ai, ngu nna tsun wu ai.
Madu a Kabu Gara Shiga rai nga ai.

2021:DU SA LADAW HTA LABAN (3) NA MUNGGA

Zehpania hte Pawlu, shan lahkawng yan tsun ai ga, “Kabu mu! Myit pyaw myit dik mu”, ngu ai ninggun jaw ga re. Kaning rai nga sa yang, hpa hpa hkan galaw yang kabu lu na, myit pyaw lu na, ngu ai lam hpe Yawhan Baptista tsun dan ai: tinang lu ai kaw na n lu ai ni hpe gam garan jaw na lam, n tara ai amu hte masu magaw ai amu ni hpe koi yen kau na lam, tinang lu lawm ai daram hte myit dik dum chye ra ai lam,…. ndai ni gaw kabu myit pyaw ai lam ajet hpe jaw ya ai lam sharin ya ai. Kabu myit pyaw ai lam majing gaw matsaw lahta tsang kaw na, Karai e jaw ya ai kumhpa re ai majaw, akyu hpyi nna lu la mai ai lam, San Pawlu sharin ya ai.

Myihtoi Zehpania gaw Yerusalem hpya run kau hkrum mahka, BC 587 a shawng e tsun ai myihtoi ga rai nga ai. Shawng shawng na daw hta Yerusalem uphkang Du ni, makam masham ningbaw ningla ni a n shawp n hkap ai, n tara ai, matsat shabat re ai alai ni hpe madi madun let jeyang ai ga ni hpe tsun ai. Daw kaba 13 hta gaw jeyang ai ga a malai, Karai Kasang gaw Yerusalem hpe arawng sadang bai shagrau ya na lam, Madu du sa ai nhtoi hta Shi a amyu masha a ntsa e tsawra myit ningnan hte shanhte a mara ni hpe raw dat hkyamsa jaw na lam, Karai Kasang nan shanhte a lapran e a nga nga na lam, kabu lu ai nhtoi hpe myit mada la nga na lam hkaw tsun ai.  

San Luka ka da ai Kabu Gara Shi-ga hpe ӑshin yu yang, shawa masha ni a man e yu matsat dik htum re ai hpyenla ni hte kang hta ai masha ni hpe myit dum shangun ai. Yuda masha ni a ningmu hta hpyenla ni hte kang hta ai ni gaw hpyen re, n tara ai amu galaw ai ni, jahkrit shama let shadut shagyeng di ai ni re ai majaw, Karai a Mungdan hte gara hku mung n gingdan ai, ngu shadu ma ai. Kasa Luka madi madun mayu ai lam gaw ndai re: kade n hkru ai, n shawp n hkap ai masha ni rai tim, Karai a Mungga hpe na la ai hpang myit malai lu nna n tara ai, n hkru n kaja ai amu ni hpe kau da ai rai yang, dai Hkye Hkrang la ai Wa Messiah hpe hkap bawp la lu na lam shadan dan ai. Karai e tsawra hkrum ai, hkringsan da hkrum ai amyu masha, Messiah hpe ӑla nga ai masha ni rai tim, myit malai n lu, n hkru ai lailen ni hpe n kau da, matsan dum garum hkat ai myit n rawng ai rai yang, ӑla taw nga ai Messiah hpe hkrum bawp la lu na n rai.

Yawhan Baptista hpyenla ni hte kang hta ai shawa magam gun ni hpe shadum ai hta, shanhte gun hpai nga ai makan bungli ni hpe kau da ra ai lam tsun ai n rai; tara dinghpring ai myit jasat hte, matsan dum chye ai myit masin hte asuya magam, shawa magam gun kaja tai na lam hpe sha tsun ai. Yawhan Baptista gaw dingtawk rai nna tsun ai; kraw kata kaw na nan myit malai lu ai rai yang, sharai na myit ai rai yang, tatut amu madun ra ai. Palawng kaba lahkawng lu ai wa gaw hpun na n lu ai wa hpe garan jaw na lam; kawsi hkrum ai wa hpe sha-hpa garan jaw na lam, tinang lu ang ai hta jan nna mawp sha ai n galaw na lam, …. ndai zawn tatut galai shai wa ra ai. Tinang a myit masin pri nen sanpra wa ai rai yang sha, du sa na Hkye La Madu hpe mu lu, hkap bawp la lu na rai nga ai. 

Zehpania mung, Pawlu mung, maren sha re ai lam hpe tsun ai. Kaba dik, reng dik htum ai kumhpa la sa ya na wa hte teng sha hkrum lu na re ai majaw kabu mu, nga ai. Law law lang anhte n kabu lu ai lam gaw tinang a akyu ara hpe sha, tinang a lam hpe sha myit dum nna, shada lakawn hkat ai, mada mara hkat ai amu ni hta hprai ai majaw, tinang lu lawm ai daram hta myit n dik lu ai majaw, grau lu hkra ngu shakut yang, n jaw a ang ai ladat ni mung lang kau, kaga masha ni a ahkaw ahkang hpe mung n gawn n sawn di wa, re ai manghkang ni a majaw rai nga ai.

 Kabu gara ai lam ajet gara kaw na gara hku tam la ai baw rai ta?

 Tinang ra ai, dinghku masha ni ra ai hta jan hkra htun da ai arai ni hpa  hpa rai ta? 

 Du sa ladaw laman hta kaning re ai baw arai ni kaning san ai masha ni hpe gam garan jaw lu na rai ta?

 Myit ru myit tsang ai lam, yakhkak ai lam law law a lapran, kraw kata na kabu gara simsa ai lam hpe gara hku shapraw dan gam garan ya lu  na rai ta? 

2021:DU SA LADAW HTA LABAN (3) NA CHYUM LAIKA

DU SA LADAW HTA LABAN 3

December 12, 2021
CHYUM MUNGGA DAW 1

ZEHPANI 3:14-18a

Ya hti na gaw, myihtoi Zehpani a Laika hta na rai nga ai.
Ziun shayi sha e, mahkawn mangoi u; Israela e, kabu jahtau u; Yerusalem shayi sha e, na a myit masin mahkra hte kabu gara nga nn, sharawng awng nga u. Madu gaw, nang hpe daw dan ai ga shabai kau nna, na a hpyen wa hpe manga kau nu ai. Israela hkawhkam ngu ai Madu gaw, na a ka-ang e rai nga ai; nang gaw tsinyam tsindam hpe, htawm hpang e hkrit ra ai n rai. Dai shani e, Yerusalem hpe, Ziun e, hkum hkrit et; na a lata hkum shakya et, nga nna tsun na ra ai. Na a Madu Karai Kasang gaw na a ka-ang e nga nga ai; Shi gaw daru magam rawng nna, hkye hkrang la na ra ai: na a lam hpe Shi kabu gara nna, sharawng awng na ra ai. Shi gaw nang hpe Shi a tsaw ra ai hta shangang ya na ra ai: Poi shani e galaw ai zawn, Shi nang hta mahkawn mangoi let kabu gara ka manawt nga na ra ai.
Karai Kasang a Mungga rai nga ai.

CHYUM MUNGGA DAW 2

HPILIP 4:4-7

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai.
Hpu nau ni e, Madu hta tut nawng e kabu gara nga mu; ngai bai tsun nngai, Kabu gara nga mu. Masha yawng hte gaw nanhte a sumnung ai myit hpe chye wa mu ga: Madu gaw ni magang wa ra ai. Hpa baw lam hta rai ti mung, myit hkum ru hkum tsang nga mu: lam shagu hta akyu hpyi nna, chyeju dum let, nanhte hpyi mayu ai lam mahkra hpe Karai Kasang kaw shana ya mu. Shaloi, masha a myit hte n htai ya lu ai Karai Kasang a ngwi pyaw ai gaw, nanhte a myit masin hte myit mang ai hpe, Hkristu Yesu hta e bau sin na ra ai.
Karai Kasang a Mungga rai nga ai.

KABU GARA SHIGA

LUKA 3:10-18

Ya hti na gaw, Luka a Laika hta na Kabu Gara Shiga rai nga ai.
Dai aten hta e, shawa masha ni gaw, Anhte kaning rai na rai ta? nga nna Yawhan hpe san ma ai. Shi shanhte hpe htan mu ai gaw: Palawng lahkawng lu ai wa gaw palawng n lu ai wa hpe karan u ga; shat lu sha lu ai wa mung dai hte maren jaw u ga, ngu mu ai. Kang hta ai ni mung Kashin kamun hkam la na sa nna, Sara e, anhte kaning rai na rai ta? nga nna shi hpe san ma ai. Shi gaw, Nanhte hta la na, shadang tawn ai made hta grau nna hkum adip la myit, ngu nna shanhte hpe tsun mu ai. Hpyen masha ni mung, Anhte wa gaw kaning rai na rai ta? nga nna san ma ai. Shi gaw, Kadai hpe mung adip arip hkum rai myit; jahkrit shama sha ai mung hkum rai mu; nanhte a shabrai hte ram dum nga mu, ngu nna shanhte hpe tsun mu ai. 
Masha ni chyawm gaw myit mada nga ma ai rai nna, Ndai Yawhan gaw Hkristu wa mi hkoi rai nga ai kun? nga nna yawng mayawng tinang a kraw kata e shi a lam myit sumru shajang nga ma ai. Shaloi Yawhan gaw, Ngai gaw nanhte hpe hka hta kashin kamun jaw made ai; rai ti mung, ngai hta atsam grau rawng ai wa gaw sa wa ra ai; Shi a kyepdin sumri raw na pyi ngai n ging n dan nngai: Shi gaw Chyoi Pra ai Wenyi hta mung, wan hta mung, nanhte hpe kashin kamun jaw na ra ai: Shi a lata hta Shi hkuwawn lang nna, Shi a mam chyarang hpe yit jasan kau nhtawm, mam gu hpe shi a dum hta shinggyin bang da nna, nsan hpe gaw n sat lu ai wan hte nat kau na ra ai, ngu nna mahkra hpe htan mu ai. Shing rai shi gaw shadum jahprang ai ga kaga law law hte mung, dai masha ni hpe Kabu Gara Shiga hkaw tsun wu ai.
Madu a Kabu Gara Shiga rai nga ai.

2021:DU SA LADAW HTA LABAN (2) NA MUNGGA

Shani shagu na myit ru myit tsang ai lapran hta, grup-yin e mu lu ai hkrit matsat hpa ni, jahkrit shama ai shi-ga ni a majaw, “galoi mi she lawt lu lu” ngu nna, madai shajang nga ga ai. Chyum mungga daw masum hte, Karai a n htum n wai tsawra matsan dum myit a lam, shinggyim masha ni hpe Karai a mungdan hta kuptsup ai ngwi pyaw simsa lam hte shagrau ya mayu ai lam, dai n htum n wai ai asak chyeju kumhpa ni hpe hkam la lu na matu, tinang nang a shut hpyit mara ni kaw na yawn hkyen myit malai let shut hpyit mara ni hpe ye seng kau ra ai lam ni hpe shadum ya ai. Shinggyim masha labau hta Karai Kasang mahtang labau Madu re ai lam hpe sharin la lu ga ai. 

B.C 587 hta Yerusalem Mare daju hpya run kau hkrum ai hpang, Karai a amyu masha ni gaw mungdan shamat kau ai, Yerusalem Nawku Htingnu htenza mat ai, masha law law Egyip mung de hpyen yen hku nga mat ma ai. Atsam rawng ai, hpaji chye ai ni law law Babylon de bawng masha hku nna woi la hkrum ma ai. Yerusalem e gaw n tai n mai re ai, matsan masha ni sha ngam nga ma ai. Yeremiah hte shi a sӑpe Baruk Egyip de hprawn woi la hkrum ma ai. Yeremiah a myit masa rawng ai Baruk myihtoi htoi ai ga, Yerusalem na Karai a amyu masha ni hpe shalan shabran ninggun jaw ai ga hta, “Baw sharawt nna kabu gara mu!” Dumbri dumbra rai mat ai Karai a amyu masha ni tinang a buga Palestine de bai kahkyin chyawm wa lu na lam, Karai a hkye hkrang la ai chyeju kade n na yang hkam la lu na ma ai lam, myit mada mai ai shi-ga jaw ya ai. 

Hpilipi Mare hpung masha ni hpe ninggun jaw ai mungga hta San Pawlu ning nga ai: Yesu dinghta ga de bai du sa na nhtoi a matu myit masin wenyi hprang shatsawm let, dai Madu hpe hkap bawp la na lam tsun ai. Gara hku hkyen lajang da ra na lam tsun ai hta, chyoi pra sanseng ra ai lam, shada tsawra zinlum hkat na lam, Hkristu a lam/makam masham lam hpe grau sung sung chye na hkra shakut ra ai lam, dingman dinghpring ra ai lam, ndai ni hpe shadum ya ai.Kabu Gara Shi-ga hta Yawhan Baptista shadum ya ai lam mung bung bung sha re ai: tinang nang a shut hpyit mara ni hpe dum sawn myit malai nna, n kaja ai, n jaw ai sat lӑwat ӑkyang lailen ni hpe sharai ra ai lam tsun shadum ai.

Karai a mungdan hte hkye hkrang la ai chyeju, ndai dinghta ga kaw nan de hpang sai re; ndai dinghta ga kaw na lawt kawt wa ai shani e sha tup hkra hkam la lu na ga ai. Reng dik ai hkye hkrang la ai chyeju kumhpa ni hpe hkam la na lam ya sa ya du, ya ju ya hkyeng, ya hkai ya asi di sha lu ai baw n rai; salu salat hkaw nna, tinang a hkum hpe ningdang nyet kau ai amu ni, tsawra matsan dum chye ai amu ni, tara dinghpring ai amu ni law law galaw let sha, salu salat shabrai hkam la mai ai hpe dum mai ga ai. Kalang mi na aten hta Mother Theresa gaw Mama ningnan langai hpe si maw ai masha langai hpang sa kawan, shalan shabran akyu hpyi ya na lam shӑngun dat ai. Shi grai kabu let bai htang wa ai shaloi Mother Theresa shi hpe san ai, “Nang gara hku hkam sha a ta?” ngu yang, htan ai ga, “Ngai Madu Yesu a lata hpe hkying hkum masum jum da lu ai majaw grai kabu nngai” nga, htan tsun ai. 

Tsawra matsan dum myit hpe shada madun dan hkat lu ai, dingman tara rap-ra ai lam hta, sanseng ai myit hta, yawn hkyen hkrum ai wa hpe shalan shabran ya lu ai hta, ndai zawn re ai amu kaw na lu la ai lam gaw teng sha kabu hpa jet ai rai nga ai. Hkye hkrang la ai chyeju kumhpa hpe hkam la lu ai lam rai nga ai. Masu magaw, n ju n dawng, manawn masham, pawt sindawng, mara n dat ya lu, …. Ndai zaw re ai masha langai hta myit pyaw ai lam, kabu ai myit masin n rawng lu ai. Yesu Madu anhte kaw du sa ai lam amyu myu hku du sa ai. Jet ai ngwi pyaw simsa lam hte kabu gara ai lam gaw Hkristu hte hkrum matut lu ai, mabyin shagu hta, shani shagu hkrum ai masha ni hta, bungli ni hta, Hkristu Yesu hpe mu lu ai lam a majaw rai nga ai. Sharung shayawt ai amyu myu a lapran, myit ru tsang hpa amyu myu a lӑpran, Karai a n htum n wai tsawra myit, Shi a kangka ai ga-sadi, Shi a mada mara ai lam ni hpe dum chye ai rai yang, shut hpyit mara ni hpe koi gam, tinang a myit masin hpe hprang shatsawm let Karai a hkye hkrang la ai chyeju kumhpa ni hpe mu mada hkam sha lu na ga ai.

 Dai ning na du sa ladaw hta wenyi hkrun lam hpe dingbai dingna jaw ai kaning re ai akyang lailen myit jasat hpe garam hprang shatsawm na myit lu a ta? 

 Shawoi nau n galaw man ai tsawra matsan dum amu ni hpa hpa galaw jat na myit lu a ta?

 Hkye hkrang la ai chyeju, jet ai kabu gara ai chyeju ni hpe gara hku kaning  rai gam garan ya lu na ta?    

2021:DU SA LADAW HTA LABAN (2) NA CHYUM LAIKA

DU SA LADAW HTA LABAN 2
December 5, 2021

CHYUM MUNGGA DAW 1

BARUK 5:1-9

Ya hti na gaw, myihtoi Baruk a Laika hta na rai nga ai;
Yerusalem e, sharung shayawt ai hte ru tsang ai a palawng raw kau nna, Karai Kasang kaw na lu la ai, n htum n wai hpung shingkang hte seng ai, tsawm htap ai palawng lawai nna, n htum n mat ai arawng sadang ngu ai janmau hpe, na a baw hta gup nga u. Kaning rai nme law, Karai Kasang gaw masha amyu baw shagu hpe na a hpung shingkang madun dan na ra ai: Karai Kasang nang hpe amying jaw nna, Ding Hpring ai Ngwi Pyaw Lam hte, Shakut Sharang ai a Arawng Sadang, nga nna nang hpe shamying ya na ra ai. Yerusalem e, tsaw la ai shara de rawt tsap nga nna, sinpraw maga de na a myiman yawng dat u; Chyoi pra ai Wa hkang da ai majaw, na a nsha ni sinpraw sinna maga de nna bai wa hpawng nga ma ai hpe mada yu u. Kar ai Kasang shanhte hpe myit dum ai majaw, shanhte kabu gara let nang hpang de sa du hpawng ma ai. Yerusalem mare kaw nna shanhte pru sa ai shaloi, hpyen ni shanhte hpe woi la nna, lagaw hku hkawm sa wa ma ai; ya, hkawhkam kasha ni hpe hpung shingkang hte hpai hkawm ai zawn, Karai Kasang shanhte hpe Nang hpang de bai woi wa ra ai. Tsaw la ai bum shagu hte, htani htana nga nga ai kawng ni hpe daw kau na ra ai; lamu ga hpe shara shatsawm na matu, hkaraw ni hpe kaput jahpring ya na ra ai, nga nna Karai Kasang daw dan nu ai. Israela gaw Karai Wa a hpung shingkang npu e ngwi pyaw ai hte hkawm sa lu na ra ai. Dai hta n-ga, maling ni hte manam pyaw hpun mahkra gaw, Karai Kasang a amying ahkang hte Israela hpe shingnip ka-up na ra ai; kaning rai nme law, Karai Kasang Shi a hpung shingkang a nhtoi hte, Israela hpe woi awn nna, Shi a matsan dum ai hte ding hpring ai chyeju hte, shanhte hpe makawp maga la na ra ai.
Karai Kasang a Mungga rai nga ai.

CHYUM MUNGGA DAW 2

PHILIP 1:4-6, 8-11

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai.
Hpu nau ni e, Nanhte hpe dum shagu e nye a Karai Kasang hpe chyeju dum nga nngai. Kabu Gara Shiga hpe nanhte nnan hkap la ai kaw nna ya du hkra, Karai Kasang a magam hta hkan shakut lawm ai majaw, nanhte mahkra a matu ngai akyu hpyi ai shaloi, galoimung kabu gara ai myit hte akyu hpyi nga nngai. Nanhte hta e mai kaja ai amu galaw hpang ai Wa gaw, Yesu Hkristu du sa ai nhtoi du hkra, dai hpe jahkum shatsup ya na ra ai, ngai kam nga nngai.
Hkristu Yesu a n-gaw n wai ai hta ngai nanhte yawng hpe gade wa tsaw ra la nngai gaw, Karai Kasang nye a sakse rai nga ai. Dai rai nna, nanhte shada da tsaw ra ai myit jat htam wa nna, Karai Kasang a lam hpe grau nna chye chyang wa lu na matu, ngai ahpyi nga nngai. Shing rai, grau htap htuk ai lam hpe nanhte chye ginhka lu nna, Hkristu a nhtoi hta san seng ai hte ra n rawng ai hku tsap lu na myit dai.Dai nhtoi hta e, Karai Kasang kaw hpung shingkang arawng sadang nga nga u ga matu, Hkristu anhte hta e shapraw ai arawn alai kaja hte, nanhte hpring chyat wa lu na myit dai.
Karai Kasang a Mungga rai nga ai.

KAGU GARA SHIGA

LUKA 3:1-6

Ya hti na gaw, Luka a Laika hta na Kabu Gara Shiga rai nga ai.
Dai aten hta e, Roma hkawhkam Tiberiu gaw hkaw dung ai shi manga ning hta, Punsiu Pilatu gaw Yuda mung e munggyi galaw nna, Herawt gaw Galile mung de, shi a kanau Hpilip gaw Ituri hte Trakuni mung de, Lisaniu gaw Abili mung e du aya hkam la shajang ma ai shaloi, Anna yan Kayahpa gaw hkinjawng agyi galaw ai lakhtak e, Karai Kasang a Mungga gaw, nam mali e nga ai Zakari a kasha Yawhan kaw du nga ai.    
Dai rai nna, Yawhan gaw Yawdan hka a grup yin na ginwang shagu de du hkawm nna, myit malai lu na kashin kamun lam hpe hkaw tsun dan nga ai: dai gaw, “Nam mali e tsun jahtau ai wa a nsen gaw: Madu a lam hpe lajang da mu; Shi a lam masun ni hpe shading mu. Hkaraw shagu hpe kaput jahpring nna, Bum hte kawng shagu hpe daw kau na mara ai; Magaw ai lam ni hpe shading nna, Machyawk marawk re ai lam ni hpe shara lu na rai nga ai: Shaloi masha yawng hte gaw Karai Kasang a hkye hkrang la ai lam mu lu na mara ai,” nga nna myihtoi Esaia a laika hta ka da ai hte maren rai wa sai.
Madu a Kabu Gara Shiga rai nga ai.

2021:DU SA LADAW HTA LABAN (1) NA MUNGGA

 “Dai laklai ai kumla ni byin hpang wa jang jan rai tsap nna baw sharawt da mu; kaning rai n me law, nanhte a matu hkye hkrang la ai lam ni htep wa ra ai” (Lk 21:28)

Moi na Israel amyu masha ni gaw Hkye La Madu dinghta ga e du sa lam hpe myit mada ma ai; anhte a matu gaw lahkawng ngu na lang, Hkye La Madu du sa na lam, yawng mayawng a jahtum na nhtoi hpe la nga ai lam, Advantu ladaw hpe myit dum galaw ga ai. Shing rai la nga ai ladaw laman hta ndai dinghta ga na myit ru hkyi-ba, nji nmu, hkrit tsang-hpa hte myit daw na zawn re baw yawng hpe hkamjan lu na lam shajin da ra ga ai. Ndai dinghta ga na mabyin ni hkrum katut tawt lai ai hpang, jahtum chyalai, dai Hkye La Madu du sa ai shaloi hkam la lu na, hkye hkrang la ai chyeju hpe n shut n shai myit mada kamhpa lu ai lam hpe shadum ya ai. 

Kabu Gara Shi-ga shawng na daw hpe madat la ai shaloi, hkrithpa, tsang-hpa a lam ni she rai nga ai. Laja lana nnang nawn ai, sawng dik ai marang hte hka mawru, tsunami, ja dik ai cyclone nbung laru, dz. daz., re baw hpe hkrum katut sha ai shara hkan na masha ni a matu, mungkan htum wa sai, ngu, hkam sha na ma ai. No. 2 ngu na mungkan majan byin ai aten hta, mungkan a jahtoi nhtoi de du nga sai, ngu, hkam sha lai wa na ma ai. Dai lahkawng lang ngu na mungkan majan a hpang, mungkan ting, mungdan shagu de du mat ai Covid ana zinli a majaw mung, shawoi galoi n byin yu ai laja lana re ai hka hpyen, wan hpyen, katsi kahtet shingra tara alai maka shai wa ai majaw mung, jahtum nhtoi hte mahkoi ni wa sai kun, ngu myit tsang nga na ma ai.

Mahte hte Marku ka da ai jahtum nhtoi ni wa mahka na kumla ni mahtang grau hkrit na zawn ka da ai. Luka ka da ai hta gaw hkrithpa ni tsun da tim, jahtum na ga-yan hta, “Jan rai tsap nna baw sharawt da mu”, nga ai ga gaw shalan shabran ga, myit mada lam jaw ya ai ga, myit marai nden gang bang ya ai ga she rai nga ai. 2020-2021 lahkawng ning ladaw laman na mungkan pinra e byin lai wa ai hka-hpyen, wan-hpyen, nbung laru-hpyen, majan shi-ga, htenza lam ni, galoi n byin yu ai sawng dik ai Covid ana zinli, Chyum Laika hta tsun da ai hkrit tsang-hpa, jahtum nhtoi ni magang wa sai kumla ni wa rai kun? Ga-san dai hpe htai ging ai, kaja dik ai gaw marai langai hpra tinang nang htai ra na re. 

Yesu Madu hpe kamsham nna shi hta asak aprat gawde ai, jahtum chyalai Yesu shi hpe myi-man chyaw mu lu na hpe myit mada ai ni a matu, lahkawng ngu na lang Hkristu du sa ai hpe kabu ai myit hte la nga na rai nga ai. Madu Yesu hpe tsawra kamsham ai ni, Karai a tsawra matsan dum mara raw dat ya ai hpe myit mada ai ni, ndai dinghta ga na ruyak shoi-hpa hte kaga hkrit tsang-hpa yawng hpe hkamjan lu ai ninggun atsam n taw n tsang hkam la lu na rai nga ai. 

Kamsham myit mada ai lam n lu ai ni a matu, ndai dinghta ga na akyu ara hpe sha myit mada ai ni a matu, n byin mayu ai baw byin wa ai shaloi, tsi la n mai ai baw machyi ana kap wa ai shaloi, koi yen n mai hpyen majan byin wa ai aten hta, hkrit hpa lamik kumla ni hpe mu ai shaloi, myit daw myit htum na lam sha tai wa na re. Kaga masha ni a akyu ara hpe n myit ai, tinang a akyu amyat sum mat na, tinang machyi hkrum na, tinang si mat na,… ndai lam ni hpe koi yen shaja na, myit ru myit tsang, hki ba ai hte aprat nga jahtum kau na ma ai.

Htessaloni Laika hta San Pawlu shadum ai hte maren, kamsham myit mada ai lam lu ai ni gaw, ndai dinghta ga hta hpa mi byin byin, tinang kaning re ai baw gam makam hkrum sha ai rai rai, dai ni, hpawt ni, galoi wa si wa wa, tinang a mungkan htum ai shani, jahtum nhtoi hta, dai Madu du sa ai shaloi myit masin wenyi asan apra rai nga lu na matu shajin da lu na lam, ninggun jaw lam matsun ya ai.

Sawn sumru mai ai lam:

 Jahtum nhtoi ngu ai hpe gara hku chye na lu a ta?

 Asak Madu tinang hpe shaga la ai nhtoi n chye ai majaw, gara hku hkyen shajin nga a ta?

 Ndai dinghta ga na myit ru myit tsang-hpa, ruyak shoi-hpa ni hpe hkamjan lu na lam, tinang a myit masin hpe gara hku shajaw sharai la ai kun?

2021:DU SA LADAW HTA LABAN (1) NA CHYUM LAIKA

DU SA LADAW HTA LABAN 1
November 28, 2021
CHYUM MUNGGA DAW  1

YEREMIA  33:14-16

Ya hti na gaw, myihtoi Yeremia Laika hta na rai nga ai.
Yu mu, Israela dap hta Yuda dap hpe sha-ang nna ngai tsun ai ga kaja mahkra hpe, ngai shadik na aten du na ra ai, nga nna Madu tsun wu ai. Dai shani, dai aten e, Dawi a matu Ding Hpring ai Makrung hpe ngai shatut nna, dai wa gaw mungdan kata e ding hpring ai hku daw dan na ra ai. Ndai aprat e Yuda mung hkye hkrang la ai hkrum nna, Yerusalem mare gaw asim sha nga lu na ra ai; dai mare hpe Ding Hpring ai Madu nga nna shamying ya na ra ai. 
Karai Kasang a Mungga rai nga ai.

CHYUM MUNGGA DAW 2

1 HTESALONI 3:12-4:2

Ya hti na gaw, Htesaloni masha ni hpang de shagun dat ai laika langai hta na rai nga ai.
Hpu nau ni e, Anhte a Madu Yesu Shi a chyoi pra ai ni yawng hte rau bai du sa ai shaloi, Wa Karai Kasang a man e nanhte mara n kap ai hku tsap nga lu hkra, Madu gaw nanhte a myit masin hpe chyoi pra ai lam hta shangang shakang ya u ga; nanhte hpe anhte tsaw ra nga ga ai hte maren, Madu gaw nanhte hta e, shada da tsaw ra ai hte masha yawng hte hpe tsaw ra ai myit  jalaw jahtam ya u ga. Bai lam mi gaw, hpu nau ni e, Karai Kasang hpe myit shadik ya na matu, nanhte kaning rai hkawm sa wa na lam hpe anhte madun dan sai hte maren, nanhte hkawm sa nga myit dai; ya, dai hta grau nna kup tsup wa lu myit ga, Madu Yesu hta nanhte hpe hpyi nem nna shadut jahkat dat ga ai. Madu Yesu a ahkaw ahkang hte, nanhte hpe gara hku hkang da saga ai lam, nanhte nan chye nga myit dai.
Karai Kasang a Mungga rai nga ai.

KABU GARA SHIGA

LUKA 21:25-28, 34-36

Ya hti na gaw, Luka a Laika hta na Kabu Gara Shiga rai nga ai.
Dai aten hta e, Yesu Shi a sape ni hpe tsun mu ai gaw: Jan, shata, shagan ni hta lamik kumla dan pru na ra ai; nammukdara hta hka leng ni a wu kadu ai nsen a majaw, ga ntsa na masha amyu mahkra myit mau ai hte ru tsang ai hkrum na ra ai: masha ni gaw mungkan ga e byin wa na ra ai amu ni hpe myit tau nna hkrit wa ai majaw, htan mat na mara ai. Dai shaloi e Masha Kasha gaw, daru magam hte hpung shingkang kaba hte nawng , summwi hte du sa ai hpe shanhte mu na mara ai. Dai lam ni byin hpang wa jang, baw sharawt mada yu mu; kaning rai nme law, nanhte a hkye hkrang la ai lam du na ni wa ra ai.  Raitimung, lu lai sha lai, chyaru nang ai hte, ding hta ga myit ru tsang ai lam ni a majaw, nanhte a myit masin li nga nna, dai nhtoi gaw mahkam htim ai zawn, nanhte a ntsa e akajawng sha n du pru u ga sadi nga mu;  kaning rai nme law, dai nhtoi gaw ga ntsa ting e nga nga ai ni nlang hte a ntsa e, shing rai du na ra ai. Dai rai nna, byin wa na ra ai lam ni yawng hta na nanhte lawt lu nna, Masha Kasha a man e tsap lu ging ai ni tai lu myit ga, akyu hpyi let, ahkying aten shagu hta a maja nga mu.
Madu a Kabu Gara Shiga rai nga ai.

2021:HKRISTU HKAWHKAM POI SHANI NA MUNGGA

Myihtoi Daniel tsun ai, Hkye La Madu Messiah Hkawhkam gaw jahtum chyalai, yawng mayawng hpe padang dip la lu na, nga ai. Shingran Laika hta Si-Du hpe awng dang nna hkrung rawt ai Hkristu Madu gaw yawng hpe uphkang ai Hkawhkam re ai lam tsun hpaw dan ai. Yesu gaw shi hkawhkam re ai lam, tara rung hta Pilatu a man e tsun shapraw dan ai; Kasa Yawhan dai lam hpe ka da ai. Tengman ai lam hpe tam ai ni, hkan shadik ai ni sha, dai Hkawhkam hpe hkap la lu ma ai. Hkawhkam ni hta Hkawhkam re ai lam, Shi a mungdan htani htana grin nga na lam, jahtum du hkra dai Hkawhkam hpe kangka ai hte madat mara dawjau ai ni, shadawn shadang n sawn lu ai shagrau kumhpa hkam la lu na lam, ndai lam ni hpe shadum ya ai.

Roman majan labau hta reng grau dik htum, majan ladat kunghpan dik htum ai majan jaubu Julius Sizar gaw, masha mun/sen kaba a si mang ni hpe kabye lai kau da nna B.C 44 hta Roman mungkan hta grau dik htum ai chyawm tiri tai wa ai. Kade mi n na, majan n sum yu ai hpyen Du daju, shi a masha ni shi hpe gyam sat kau ma ai. Masha mun kaba, sen kaba hpe sat kau nna shi amying gumhkawng wa lu ai hte hkawhkam tai wa ai hta n’ga, Roman Empire hpe gaw sharawt hpang da ya ai raitim, shi a masha ni e sat kau ai hkrum nu ai. Labau hta asak galu dik htum ai (shaning 500 daram) Roman Empire mung jahtum e hten bya mat ai sha re (Kaga Empire ni law law nga lai wa tim asak n galu ai).

Mungkan ting na hpyen jaubu hte hkawhkam ni a labau hpe hti ashin yu yang, mungkan arawng aya a matu, tinang hte tinang a amyu/mungdan a matu, ja gumhpraw a matu sha myit nna masha law law hpe sat agrawm kau ma ai. Uphkang ai, ngu ai ga-si hpe n jaw n ang ai hku lachyum htai lang ma ai. Jahkrit shama, hpyen ninggun, laknak ninggun, ja gumhpraw ninggun hta machyu nna uphkang renghkang ai; rapra tara, tsawra matsan dum ai baw tara, dingman dinghpring ai tara, chyoi pra sanseng ai tara mahkrun, dz. dz., re galoi prat hta rai tim jaw nga grin nga lu ai tengman lam hpe shagreng n kam ma ai. Anhte a mungdan na mungmasa labau-yan hta pra pra mu lu na rai nga ai.

Arawng aya lu ai uphkang Du ni a akyu ara, lauban ni a akyu ara, tinang a akyu ara, ndai zawn masha loi sha a akyu ara ni hpe makawp maga ai policy a majaw, mungdan masha law law kawsi hpang gara hkrum ai, bungli kata ai, mung shawa masha ni lu su nga mai na ahkaw ahkang n lu ai, uphkang masa hpe ninghkap jang majoi sat agrawm kau ai, Ndai dinghta ga na Du/Hkawhkam ni a alai hpe jahpra dan ai re. Kade kaja ai policy mi jahkrat da ai rai tim, marin malu ai, tingkyeng akyu tam ai, mungkan myit sha myit ai ni a majaw, dinghta ga na gara mungdan kaw rai tim, masha a sari sadang hte ahkaw ahkang hpe roi rip ai alai nga nga ai.

Tengman ai maga tsap ai ni nye a ga madat ma ai!
Kadai kaning re ai amyu masha, kaning re ai htunghking makam masham hta rai tim, tengman ai hpe n tam ai kadai n nga ai. Tengman ai lam hpe mu chye shagu, masha gaw hkap la ai n rai. Tinang a akyu yawm na, hkrat sum na tai jang dai tinang mu chye da ai tengman lam hpe ninghkap kau ai, shing n rai, nhtang chyung di kau ai, magap kau ai; galaw masu kau, koi kau nna dai tengman ai maga tsap ai ni hpe hpyen hku sawn la ai_ dai hta, n shawp n hkap ai, n hkru n kaja ai amu law law prut pru wa shangun ai. 
 Kashin kamun hkam la sai Hkristu a sape ni gaw tengman ai maga tsap na, ngu, ga-sadi jaw da ma ai. Yesu hkum nan, dai tengman ai lam hpe sakse hkam ai majaw, n tara ai masha ni a n ju n dawng ai hkrum nna dai “tengman ai lam” a jaw e sat kau hkrum ai. Yesu a sape ni mung, tengman ai maga tsap ai majaw, ndai dinghta masha ni a n ju n dawng ai hkrum nna zingri zingrat hkrum na ma ai. Yesu shi shadum da chyalu re.

 “Ngai a mungdan ndai dinghta ga kaw na n rai”
 Pilatu shadu ai hku n rai; Yesu e up ai mungdan gaw sumsing mungdan hte seng ai, masha a myit masin wenyi hpe uphkang ai lam sha rai nga ai. Kadai hpe mung adip arip n di ai. Tinang nang a myit masin hku nna chyoi pra dingman sanseng ai lam hpe jaw sai, ngu, manu shadan hkap la ai ni sha Hkristu Hkawhkam a uphkang ai npu de du ma ai. Hkristu Yesu hpe n chye ai ni pyi, tengman ai maga tsap ai ni yawng, Daniel Laika na hte maren, amyu shagu, mungdan shagu, makam masham shagu, yawng gaw Hkristu Hkawhkam a uphkang ai npu taw ai ni rai ma ai. Hkristu a mungdan mung htani htana grin nga na ra ai.

Sawn sumru mai ai lam:
» Ndai prat hta grup-yin na nsen ni, jaw ai n jaw ai, kaja ai n kaja  ai, law law nga ai. Kaja wa ginhka madat ga ai kun? N jaw tim  tinang madat ra jang hkan mat wa chye ga ai kun?
» Tengman ai maga tsap ai majaw, Hkristu pyi n lawt ai, zingri  hkrum na, tinang a akyu yawm na, amyat sum mat na byin chye  ai. Gara hku shajin da ga ai kun?
» Shani shagu “Na mungdan du wa ru ga” ngu ai akyu hpyi ga lachyum hpe adum sha rai akyu hpyi ga ai kun?

2021:HKRISTU HKAWHKAM POI SHANI NA CHYUM LAIKA

HKRISTU HKAWHKAM POI
November 21, 2021
CHYUM MUNGGA DAW 

Daniela 7:13-14

Ya hti na gaw, myihtoi Daniela a laika hta na rai nga ai.
Shana na shingran hta ngai mu mada nna, Masha Kasha zawn san ai wa langai mi, summwi hta jawn let du sa ai hpe ngai mu se ai. Moi chyaloi nhkoi na, asak kaba dik ai Wa hpang de shi du jang, dai wa a man de shi hpe jashawn mu ai. Masha amyu baw shagu hte, ga amyu myu tsun ai ni yawng, shi hpe daw jau na matu, daru magam, hpung shingkang hte mungdan, shi hpe ap ya wu ai. Shi up hkang ai gaw n htum nwai, htani htana prat dingsa up hkang ai lam rai nga nna, shi a mungdan gaw hten byak lu ai mungdan n rai.
Karai Kasang a Mungga rai nga ai.

CHYUM MUNGGA DAW 2

Shingran laika 1:5-8

Ya hti na gaw, Yawhan a Shingran laika hta na rai nga ai.
Yesu Hkristu gaw kangka re ai sakse wa, si mat ai ni hta na kasha alat, dinghta ga na hkawhkam ni hpe up ai Madu Magam rai nga ai. Shi anhte hpe tsawra nna, shi hkum nan a asai hte anhte a shut hpyit mara hpe raw dat ya mani ai; Shi a Kawa Karai Kasang hpe daw jau na matu, anhte hpe hkawhkam amyu hte hkungga nawng ai amyu shatai da mani ai: dai Yesu Hkristu kaw hpung shingkang hte daru magam ahkang, htani htana e a nga nga u ga law. Amen. Yu mu, shi gaw summwi hta du sa wa nna, yawng mayawng mung, shi hpe galun ai ni mung, shi hpe hkap mu na mara ai rai nna, dinghta ga na amyu nlang hte gaw, shi a majaw sharung shayawt ai hte, htawm hpang de du na ra ai Wa, Mahkra dang chye ai Madu Karai Kasang tsun nga ai.
Karai Kasang a Mungga rai nga ai.

KABU GARA SHIGA

Yawhan 18:33b-37

Ya hti na gaw, Yawhan a laika hta na Kabu Gara Shiga rai nga ai.
Pilatu gaw Yesu hpe, Nang Yuda masha ni a hkawhkam rai nga nni? ngu nna, san wu ai. Yesu gaw, dai gaw na a myit hte nang san nni? Shing n rai, masha kaga e nye a lam nang hpe tsun dan ma ni? ngu nna htan wu ai. Pilatu gaw, ngai Yuda masha rai nga a ni? Na a amyu masha ni hte Jau agyi ni gaw, nang hpe ngai kaw sa ap nga ma ai; nang hpa galaw shut nit ta? ngu nna bai san wu ai. Yesu gaw, Nye a mungdan gaw ndai mungkan ga na n rai li ai; nye a mungdan ndai mungkan ga na rai yang gaw, ngai Yuda masha ni a lata de n shang hkra, nye a ali ama ni gasat na masai; ya chyawm gaw, nye a mungdan ndai yang na n rai li ai, ngu nna Pilatu hpe htan wu ai. Dai re ai majaw Pilatu gaw, dai rai yang, nang teng teng hkawhkam rai nga n ni? ngu nna san wu ai. Yesu gaw, nang tsun ai hte maren, ngai teng teng Hkawhkam rai nga nngai: ngai gaw tengman ai a maga de sakse hkam ya ra nngai. Dai a matu ngai shangai chyinghkai wa ni ai hte, mungkan ga de du sa ring ngai: tengman ai hte seng ai ni yawng hte gaw, nye a ga nsen madat ma ai, ngu nna htan wu ai.
Madu a Kabu Gara shiga rai nga ai.

2021:PRAN WAN LADAW LABAN (33) NA MUNGGA

Anhte asak hkrung let nga nga ai ndai dinghta ga, htani htana grin nga lu na n rai; jahtum shani, yawng mayawng mat mat ai nhtoi du na lam hpe Madu Yesu hpaw tsun dan ai. Jahtum na aten ladaw ni wa ai aten hta mu lu na lamik kumla ni hpe tsun dan ai; rai tim, dai nhtoi ahkying hkrak n chye lu ai, nga ai. Galoi n byin yu ai ruyak kyindut ni gaw shawng shawng na kumla ni re ai hte, dai ruyak kyindut ni hpe kamsham myit ngang kang ai hte hkamjan lu ai ni awng padang lu la na lam; htenrun htenza ai a lapran, Karai a matsan dum hkye mawoi la na lam hpe myit mada nga ra ai lam sharin ya ai.

Dai ning July shata hta Germany mungdan hte sinna maga na mungdan kau mi, galoi n byin yu ai, sawng dik ai hka tung mawru kaba hkrum sha lai wa ma ai. 2020- 2021, dai lahkawng ning laman moi n byin yu ai laja lana madang, hka mawru, nbung laru, maling wan hkru, hkyen mungkan tun byawng ai majaw panglai hka rawt tsaw wa ai, mungkan ga kahtet madang grau tsaw jat ai, yawng e hkrum katut hkrit tsang dik ai Covid-19 ana zinli,… ndai ni yawng mungkan hten run ai lam hpe grai lawan shangun ai hpe mu lu ai. Mungkan ga gaw moi na zawn nga mai ai, nga pyaw ai mungkan ga n rai sai lam, mungkan masha ni hkap yin la wa ma ai. Shinggyim masha ni myit malai wa ma sai kun?

Ninggun rawng, machye machyang lu ai mungdan ni gaw kadai mung n kam shayawm ai, arung arai jak rung jak rai grau shapraw lu hkra, grau lu su wa hkra, power grau kaba wa hkra shingjawng ding-yang sha rai ma ai. Ga ntsa kaw na Co2 (gung nsa) lamu ganghkau maga shalun ai n sim n sa. Matsan ai mungdan na masha ni gaw maling agru kau nna mailing hpya dut sha ai lam mi, yi hkyen nat ai hku lam mi, mungkan hpe hkan jahten lawm ma ai. Dai majaw, “Green house effect” ngu ai, wan-hkut, gung nsa grai htat ai hku nna mungkan ga hpe hkÑyawp da ai. Dai majaw, “Global Climate Change” ngu ai, mungkan ga katsi kahtet, madi manyap, nbung marang, n man wa ai; tak sawn la n mai mat hkra htenza mat wa nga ai. Sharai ra ai gaw yawng chye na hkap la ma ai; myit malai nna sharai hpang n kam ma ai? 

Gara mungdan mung n kam shayawm ai. Shiggyim masha ni a nammak lawhpa myit a majaw, n jaw ai hku shingjawng hkat ma ai majaw, grau mayu ai majaw, n ju n dawng manawn masham a majaw, masha shada roi rip yam sha, zingri zingrat, sat hkat nat hkat,… sawng jat wa ai. Majan a majaw, n tara ai masa ni a majaw, matsan masha ni grau matsan jat; yi sun hkau-na arung arai, luhpa sha-hpa ni hpe shapraw ya na malai, tsi mawan ni hpe law lang daw shapraw ya na malai, masha sat laknak ni hpe gumhpraw htam law law grau jai lang wa ma ai.

Mungkan ga hpe jahten kau na hku Karai Kasang hpan da ai kun? Kawsi hpang gara manghkang, ana zinli manghkang, nbung laru hte hka-hpyen wan-hpyen, machyi makaw si hkrung si htan ni hpe Karai e hpan da ai kun? Masha e jahten ai sha re. Kaja wa Karai e hpan da ai mungkan ga hte nhprang sutgan, masha a asak jahten ai majan, marin ai myit, gumrawng gumtawng, n tara ai hku shingjawng hkat ai amu ni a majaw, kawsi hpang gara, machyi makaw hkrum sha ai; maling hte nam dusat ni, hka e nga ashu ashan ni mat wa ma ai; shingra maka katsi kahtet, yawng hpe shinggyim masha amyu e jahten kau ai hkrai rai nga ai.

Anhte a prat hta grau dansan ai hku mu mada wa ai: mungkan ga, moi prat na zawn nga mai ai mungkan n rai wa nga ai, hkrit tsang madang tsaw jat wa nga ai lam, hpungtang hpaji ninghkrin ni shadum ding-yang rai nga ai. Yak wa magang, kashun kasha, gali galaw, sat hkat, majan byin hkat ai lam grau sawng jat wa nga ai.

Jahtum chyalai, hpa mi byin byin, gade mi yakyak, makam masham n tat ai, tara hkan shaja nna nji nmu a lam ni hpe hkamjan lu ai, jahtum du hkra dinghprin ai myit hte hkamjan lu ai ni hkye hkrang la hkrum na rai ma ai.

Sawn sumru mai ai lam:
#  Tinang a mungkan htum na shani a matu gara hku hkyen da sai kun?
#    Kaja dik ai hku si wa lu na lam gara hku hkyen lajang da sai kun?
#  Dai nhtoi hte ahkying aten hpe n chye lu ai majaw sadi maja nga mu! (Mk13:33)

2021:PRAN WAN LADAW LABAN (33) NA CHYUM LAIKA

PRAN WAN LADAW HTA LABAN 33
November 14, 2021
CHYUM MUNGGA DAW 1

Daniela 12: 1-3

Ya hti na gaw, myihtoi Daniela a laika hta na rai nga ai.
Nang Madu Karai Kasang daw da ai aten hta e, na a amyu masha ni hpe makawp maga ai Du Magam Mikelu rawt pru na ra ai. Masha amyu ni shawng nga pra wa ai kaw nna dai aten du hkra, galoi n byin yu ai, ru tsang ai aten du na ra ai. Dai aten hta e, Jahpan laika hta mying lawm ai, na a amyu masha ni lawt lu na mara ai. Ga nhpu hta yup pyaw nga ai ni law law wa, yup hprang na mara ai; nkau mi gaw htani htana asak lu la nna, nkau mi gaw htani htana kaya kahpa hte arawng hpoi ai hkrum na mara ai. Myitsu ai ni gaw sumsing lamu a nhtoi zawn htoi tu kabrim na mara ai; masha law law hpe dinghpring ai maga de woi awn ai ni mung, shagan ni zawn htani htana prat dingsa e htoi tu na mara ai. 
Karai Kasang a Mungga rai nga ai.

CHYUM MUNGGA DAW 2

Hebre 10: 11-14,18

Ya hti na gaw, Hebre masha ni hpang de shagun dat ai laika hta na rai nga ai.
Hkungga nawng ai Jau kadai mung, shani shagu daw jau let, shut hpyit mara hpe galoi mung n raw kau ya lu ai, shagu hkungga amyu sha hpe law law lang kahtap nawng ya ma ai. Yesu Hkristu chyawm gaw, shut hpyit mara raw kau ya lu ai hkungga langai sha hpe nawng ya ngut jang, prat dingsa a matu Karai Kasang a hkra maga de dung nga sai; dai shata hta e, shi a hpyen ni shi a lagaw n-pu e tawn da ai du hkra shi la nga ai. Dai rai nna, shut hpyit mara raw dat ya ngut sai rai yang gaw, mara a matu hkungga nawng shara n nga na sai. 
Karai Kasang a Mungga rai nga ai.
   
KABU GARA SHIGA

Marku 13:24-32

Ya hti na gaw, Marku a laika hta na Kabu Gara Shiga rai nga ai.
Dai nhtoi ni hta e, ru tsang ai amyu myu byin ai hpang de, jan gaw sin mat wa nna, shata mung nip mat na ra ai; shagan ni mung lamu de na di hkrat mat nna, sumsing lamu hta e nga ai atsam ni gaw gari ashun wa na mara ai. Dai shaloi e, Masha Kasha gaw daru magam hte hpung shingkang hte nawng, summwi ni hta e du sa ai hpe, shanhte mu na mara ai. Dai shaloi e, Karai Kasang shi a lamu kasa ni hpe shangun dat nna, aga htum ai kaw nna lamu htum ai du hkra, nbung mali maga de na, shi a lata la ai ni hpe jahprawng la na maru ai.
Dai hta kaga, maihpang hpun hpe yu nna chye la mu; de a lakung lakying ni majawm wa nna lap prut wa jang, nlum ta ni wa ra ai hpe nanhte chye nga myit dai. Dai hte maren, dai lam ni byin hpang wa ai hpe nanhte mu ai shaloi, shi gaw chyinghka lam makau e ni wa ra ai hpe, chye nga mu. Nanhte hpe ngai teng teng tsun made ga; Ya pra nga ai ndai amyu masha ni garai n lai mat yang, dai lam yawng mayawng hte byin wa na ra ai. Sumsing lamu hte ginding aga lai mat wa timung, nye a ga gaw n lai mat na li ai. Rai timung, dai shani hte ahkying hpe, Wa hta kaga, kadai mung n chye lu ai; lamu kasa ni hte dai Kasha pyi dai hpe n chye lu ma ai.
Madu a Kabu Gara shiga rai nga ai.

2021:PRAN WAN LADAW LABAN (32) NA MUNGGA

1. Gumrawng gumtawng ai myit hte marin ai, malu (lawhpa) ai myit gaw Hkristan asak mahkrun rawt jat galu kaba lam hpe chye na shangun ai.

2. Shagrit shanyem ai myit hte matsan masha langai a myit marai atsam ningja gaw Hkristan asak mahkrun rawt jat lam hpe ninggun ban ya, madi shadaw ya lu ai, ngu ai lam re.    

Madu Yesu gaw sut lu su ai ni hpe mara shagun jahpoi ai n rai; matsan ai gaw kaja ai, ngu mayu ai lachyum mung n re ai hpe myit dum ra ga ai. Rai ti mung, sut lu su ai ni hta rawng chye ai gumrawng gumtawng ai myit hte shanhte galaw chye ai alai hpe shadum ya ai. Matsan masha ni, kaji kadun ai ni, n lu n lawm ai ni law mi law gaw shagrit shanyem chye ma ai hte shada grau matsan dum hkat chye ma ai.  

Yerusalem Nawku Htingnu kata hta alu ja sumpu baw hpan 13 ting shadun da ai; dai 13 ngu na mahtang kaw gaw tinang nang a myit hte bang jaw lu ai shawang alu sumpu rai nga ai. N lu n lawm ra kadawn ai ni hpe garum ya na matu rai nga ai. 

Moi mung, ya mung, galoi prat hta mung, alu law law bang jaw lu ai ni myi-man pa lu ma ai. Bang jaw ai ni langai hpra hta rawng ai myit masin n bung hkat na re. Kau mi gaw masha ni e n shakawn jang, kadai n mu n chye ya ai baw rai jang n kam bang ya ai ni nga ai zawn, tsawra matsan dum myit hte alu bang jaw ai ni mung nga na ma ai. Rai tim, tinang lu lawm ai kaw na jan ai hte hpe bang ya lu ai ni  hta shagrit shanyem na matu ram ram a lahta de yak na re. Lauban kasha Francis Assisi gaw kawa a myit hte shai dik ai hku, shi lu ang ai sutli yawng hpe ngam kau da ai hta n’ga, shi a hkum hta kap ai hpun palawng yawng a hpu jahkrat da ai. Kawa hpe ap kau da nna singgu krin nta kaw na pru mat wa ai hte tara shadik mat ai gaw mau-hpa rai nga ai.

Shinggyim masha ni ruyak jamjau, matsan mayan hkrum na lam hpe Madu Yesu ra sharawng madi shadaw ai n rai. Masha shagu kuptsup ai asak a chyeju kumhpa ni hpe hkam la lu mu ga, Yesu Shi mungkan ga de du sa ai; hkum nan matsan masha jahpan hta bang shalawm la nu ai. Matsan masha ni hpe n gawn n sawn n di na lam; hkumhkrang matsan tim Myit masin atsam ningja greng ra ai, dai hpe arang shatai nna wenyi hta sut su wa lu na matu ahkaw ahkang shatai mai ai lam Madu e sharin ya ai. 

Lai sai Laban mungga hta ning nga ai: “Wenyi hta matsan mayan ai ni kabu lu ma ai!”; “Yawn hkyen hkrum ai ni kabu lu ma ai!” nga, tsun da ai. Matsan mayan ai prat hte yawn hkyen lam gaw Ñrau kÑpyawn chye ai rai nga ai. Hkumhkrang hta she matsan tim rai dum ai ni mung nga na ma ai. Wenyi hta matsan mayan ai myit naw sharawng ra ai. Dai gaw, tinang n byin n tai ai majaw lam shagu hta, Karai a makawp maga bausin ya na hpe myit mada kamhpa ai lam rai nga ai. Shawng na Chyum mungga daw hte Kabu  Gara Shi-ga hta, Karai Kasang gaw, shagrit shanyem lu ai, myit san seng ai, matsan dum garum ya chye ai ni hpe mu mada ya ai, shagrau sharawt ya ai lam hpe adan sha mu lu ga ai. 

Anhte a mungdan na gam maka, matsan hta matsan, jamjau hta grau jamjau, matsan prat kaw na galoi lawt lu; Yesu tsun ai, “Matsan masha ni galoi mung nanhte hte nga nga na” nga nna Sape ni hpe shadum da ai. Nawku Hpung hku nna matsan masha ni, ruyak kyindut hkrum ai ni hpe garum madi shadaw ya ai jawng, tsirung, yu gawn shara ginra ni law law nga nga ai. Nawku Hpung organization hku woi galaw ai amu law law gaw Madu Yesu a hkye hkrang la ai amu hpe matut hkrang shapraw ya ai, dansan ai kumla ni rai nga ai. Anhte langai hpra, tinang a mare lawk, grup yin htingbu ni hpe mada mara madi shadaw ai lam hta kade gara hku shang lawm nga ga ta? Hkum nan kawan katsan tatut hkan lakawn ai amu ni hta shang lawm ga ai kun? 

Lu su ai, matsan ai hta hkan nna alu sak jaw ai shadawn shadang n bung hkat na re. Rai tim, yawng hta bung lu ai, shabung mai ai gaw Karai hpe chyeju htang ai myit masin, shagrit shanyem ai myit masin, ruyak kyindut hkrum ai ni hpe garum mayu ai myit masin, tsawra matsan dum shawang myit, ndai ni rai nga ai. Karai Kasang gaw dai zawn re ai myit masin kumhpa hpe grau manu shadan ai; gumhpraw arung arai kade law law jaw lu ai, ngu ai hta, kaning re ai myit masin hte jaw bang ya ai, ngu ai grau ahkyak ai lam hpe sharin ya ai. 

Sawn sumru mai ai lam: 

›  Alu sak jaw ga yang, lahpawt ai myit hte bang jaw ga ai kun?

››  Tinang a alu hpe masha ni n mu ya, shakawn n hkrum re ai aten hta myit daw chye ga ai kun?

››› Tinang pyi hpa n sha, hpa n jai re ai aten hta grau yakhkak ai masha langai garum sa hpyi ai aten hta kaning ngu htan ya chye ga ta?

2021:PRAN WAN LADAW LABAN (32) NA CHYUM LAIKA

PRAN WAN LADAW HTA LABAN 32

November 7, 2021

CHYUM MUNGGA DAW 1

1 Hkawhkam 17:10-16

Ya hti na gaw, Hkawhkam laika langai hta na rai nga ai.

Myihtoi Elia gaw Madu a ga na la jang, rawt sa nna, Sidun mung na Za-rep-hta mare de wa ai; mare chyinghka lam de du jang, gaida jan langai mi hpun hta nga ai rai nna, Elia gaw, Ngai lu na ntsin loi mi sa jaw rit, ngu nna shi hpe shaga ai. Shi gaw ntsin sa la wa nga yang, Elia gaw, muk hkyep mi mung la sa rit, ngu nna bai hpyi dat wu ai. Shaloi dai gaida jan gaw, Na a Madu Karai Kasang hkrung nga ai hte maren, ngai muk pa mi pyi n lu nngai; dibu hta muk shadung latup mi hte, namtau hta namman kaji mi sha rawng nga ai. Ngai hpun hkyep langai lahkawng sa hta nna, dai muk hpe nye a matu, ngai sha a matu mung, shadu ngut jang, an lahkawng sha nna, si na saga ai , ngu nna Elia hpe htan wu ai.

Bai Elia gaw, hkum tsang et, nang tsun ai hte maren, wa galaw jang, nye a matu muk pa kaji shawng shadu nna, sa jaw rit; dai hpang na a matu mung, nsha a matu mung shadu tawn u; hpa majaw nga yang, Israela a Madu Karai Kasang ning nga ai; Madu gaw ga ntsa e marang htu shangun ai shani du hkra, Dibu na muk shadung mung yawm mat na n rai; Namtau na namman mung yawm na n rai, nga ai, ngu nna shi hpe htawn tsun wu ai. Dai gaida jan Elia a ga hte maren, wa galaw wu ai. Shi mung, dai myihtoi wa mung, shi a kasha mung, laning mi tup sha nga lu ma ai. Madu gaw Elia a n-gup hta htawn tsun sai hte maren, dibu na muk shadung ma mat ai n rai, namtau na namman mung yawm mat wa ai n rai.

Karai Kasang a Mungga rai nga ai.

CHYUM MUNGGA DAW 2

Hebre 9:24-28

Ya hti na gaw, Hebre masha ni hpang de shagun dat ai laika hta na rai nga ai.

Hkristu gaw, sumsing lamu na chyoi pra ai shara majing a kasi kumla hku nna, masha a lata hte galaw tawn ai chyoi pra ai shara kata de n shang sai; Shi gaw, Karai Kasang a man e dan pru nna, anhte a matu htinglu htinglai ya na nga, sumsing lamu kata de nan shang wa sai. Ga shaka Dingsa hta, ningbaw tai ai Jau Kaba gaw, tinang a sai n re ai asai hte, dai chyoi pra ai shara de laning hte laning shang ra ai zawn, Hkristu gaw shi hkum hpe law law lang hkungga nawng ya ra ai n rai; law law lang nawng ya ra ai rai yang gaw, ginding aga lat kaw nna shi law law lang si hkam ra na nu ai. Rai timung, Hkristu gaw dai hku n galaw ai sha, shi hkum hpe hkungga nawng ya ai a marang e, shut hpyit mara hpe la kau ya na matu, ndai prat a jahtum ai de, shi kalang mi sha dan pru nu ai. Ya hpang de kalang mi bai dan pru ai shaloi, mara la kau ya na matu n rai, shi hpe myit mada la nga ai ni hpe, hkye hkrang la ai a shabrai kumhpa jaw na matu, shi dan pru na ra ai.

Karai Kasang a Mungga rai nga ai.

KABU GARA SHIGA

Marku 12:38-44

Ya hti na gaw, Marku a laika hta na Kabu Gara Shiga rai nga ai.

Yesu nawku htingnu nhku de sharin shaga nga yang, shi tsun mu ai gaw; Tara sara ni hpe sadi nga mu; shanhte palawng galu hpun nna hkawm sa mayu ai; gat hkan e hkungga ai hte shachyen ai, tara jawng ni hta grau reng ai lahkum ni hpe mung, poi hkan e grau ai dung shara ni hpe mung grai ra nga ma ai. Shanhte gaw gaida gaina ni lu da ai hpe sha shama let, masha a man e arawng tam ai hku galu galang akyu hpyi ma ai. Dai ni gaw, daw dan ai shaloi, kaba htum ai yubak hkrum na mara ai, ngu mu ai.

Lani mi na Yesu gaw, alu sumpu ang e man yawng nna dung nga yang, shawa masha ni dai alu sumpu hta e gumhpraw bang ma ai hpe yu nga ai. Sut su ai ni law law wa, law law sa bang ma ai. Shaloi, matsan mayan re ai gaida jan langai mi sa nna, peksan langai mi ging ai, magri dingsen lahkawng bang nu ai. De a majaw, Yesu shi a sape ni hpe shaga la nna, nanhte hpe ngai teng teng tsun made ga; ndai matsan mayan re ai gaida jan gaw, alu sumpu hta e bang da ai ni yawng hta, grau nna bang dat nu ai. Hpa majaw nga yang, shanhte yawng tinang lu ai hta na jan ai hpe sha bang da ma ai; shi chyawm gaw, kaji mi lu ai hta na lu malu mahkra hpe, rai sa, asak bau na mahkra hpe pyi bang kau nu ai.

Madu a Kabu Gara ai shiga rai nga ai.

2021:SAN PRA AI NI YAWNG A POI LABAN NA MUNGGA

Ndai dinghta ga, mungkan pinra hpe mada yu ga. Amyu, htunghking lailen, lu su matsan, amyu/madang ginhka hkat ai majaw byin nga ai manghkang kade she sawng a hka! N bung hkat ai majaw, grau mayu shingjawng hkat ai nhkan e, sat hkat nat hkat ding-yang rai nga ai. Bu hpun mawn sumli shingjawng hkat ai mungkan pinra hta, grau shingjawng hkat ai nhkan e, madang ginhka ai, n ju n dawng, manawn masham byin shangun ai majaw, sat hkat nat hkat ai kade she law htam nga a hka! 2020-2021 EURO CUP final hta shingra madu England Team sum mat ai shaloi Italian masha mu mi mu hpe Englik masha ni jawm adup abyen ma ai n rai a hka!  Lu shingjawng, awng padang lu shingjawng, machye machyang shingjawng, amying gumhkawng shingjawng hkat ai majaw, shada myit n pyaw, masin n si, tai htang hkat, manawn hkat, rai nna hpyen tai hkat nga ai mungkan ga wa n rai a hka!  N lu n lawm ai, matsan ai, shagrit shanem chye ai, mara n shagun chye ai, tai htang na n myit ai ni hpe gaw Ñnya ai, ninggun kya ai, n byin n tai ai majaw Ñsum jaw kau ai,.. ngu, masha malawng maga dai hku myit la chye ma ai n rai a hka! 

 Kade mung masu byin u, kade mung ninggun ja dum u, kade mung chye dum u, kade mung lu su nga mai u, kade mung arawng aya lu ai hte lu su nga-mai u, _ san pra ai masha n tai ai, myit masin wenyi a san seng san pra ai alai maka n lawm ai sha, Karai a mungdan, htani htana asak hkam la lu na n rai nga ai. Ndai dinghta ga ntsa e kade dingman san seng ai hku nga shakut ga tim, shut hpyit mara kaw na tsep kawp lawt lu na n mai byin ai. Dai majaw, ndai dinghta ga atsang madang, san pra masha tai shakut let, Karai a matsan dum garum ya ai chyeju kumhpa ni hpe shamyet shanat let, Karai a matsan dum lama hpe galoi mung myit mada let asak aprat hpe gawgap ra ga ai.  

 Sumsing mungdan hta du taw nga sai ni jahtau ai nsen__ “Hkye hkrang la ai lam gaw Karai Kasang hte dai Sagu Kasha kaw na re ai” ngu tsun ma ai. Jahtum chyalai, Karai a matsan dum mara raw dat ya ai chyeju, Madu Yesu a n sim n sa htunglu htinglai ya ai a jaw e sha, ra n rawng ai hku san pra wa lu ma ai re. Shanhte gaw, n dai dinghta ga na awu asin/agung alau ni, makam masham a majaw tinang a akyu amyat asum hkam kau ai, hpyen tai ai ni/ n tara ai ni, ninggun ja dum ai ni a n ju n dawng roi rip hkrum ai rai tim, yawng hpe hkam sharang let dinghpring ai lam hpe hkan shadik lu ai ni rai ma ai, nga, Shingran Laika hta tsun da ai.

Machyi makaw, kawsi hpang gara, n tara ai hku roi rip hkrum ai, mara kata mara shagun hkrum ai, yawn hkyen hkrum ai,… shing re ai aten ni hta gara hku hkamjan ga ai kun? Matai dawp chye ga ai kun? Mahte a Kabu Gara Shi-ga e sharin ya ai tara matsun (8) gaw san pra masha tai na matu garum ya ai tara matsun ni rai nga ai. Dai tara matsun (8) hpe n hkan ai sha, san pra masha n tai lu ai; ndai dinghta ga atsang madang hku san seng san pra ai aprat hpe n gawgap la lu ai rai yang, sumsing mungdan na san pra masha ni a hpawng hta shang lawm lu na n rai nga ai. 

Sawn sumru mai ai lam: 

››  Tinang hkum nan ndai dinghta ga e sanpra masha tai ra ai, tai   mai ai, ngu ai hpe hkap la ai kun?

››  Sanpra ai alai n lawm ai sha sumsing mungdan de n du mai ai   lam hkap la ai kun?

2021:SAN PRA AI NI YAWNG A POI LABAN NA CHYUM LAIKA

CHYUM MUNGGA DAW 1

Shingran 7:2-4. 9-14

Ya hti na gaw, Shingran laika hta na rai nga ai.

Jan praw maga de na pru lung wa nna, ahkrung nga ai Karai Kasang a dazik lang ai lamu kasa kaga hpe: ngai Yawhan mu nngai. Dai lamu kasa gaw, anhte a Karai Kasang a shangun ma ni hpe, kahtan e dazik garai n shakap yang, aga hpe mung, nammukdara hpe mung, hpun ni hpe mung hkum jahten kau mu, nga nna lamu ga hte nammukdara hpe jahten shabya na ahkang lu ai lamu kasa mali hpe, nsen kaba hte jahtau wu ai. Shaloi, dazik shakap hkam la ai ni hpe hti ai jahpan ngai na nngai: Israela kashu kasha ni a amyu yawng hta na, sen mi mun mali e hkying mali dazik shakap ai hkam la masai. Dai hpang, yu u, mungdan shagu hta na mung, baw lakung shagu hta na mung, amyu baw shagu hta na mung, ga amyu shaga ai hta na mung, kadai n dang hti lu ai, masha unawng kaba hpe ngai mu nngai. Ndai ni gaw hpraw ai hpun palawng bu hpun nna, tinang a lata hta namhtan hpun lakung lang let, Tingnyang a man e mung, Sagu Kasha a man e mung, tsap nga ma ai. Shanhte gaw, nsen kaba hte jahtau let, Tingnyang hta dung nga ai anhte a Karai Kasang hte Sagu Kasha gaw, Awng Dang nga u ga law, nga ma ai.

Bai, lamu kasa yawng hte gaw dai Tingnyang hpe shinggrup let, salang ni hte dusat mali a grup yin e kawan tsap nga ma ai. Shaloi, shanhte gaw Tingnyang a man e dingnyawm dagup nna, Karai Kasang hpe nawku let, men. Shakawn kungdawn ai, hpung shingkang, hpaji byeng-ya, chyeju dum ya ai, arawng sadang, ahkang aya hte, n-gun atsam gaw, Karai Kasang kaw a nga nga u ga law. Amen, nga nna tsun ma ai. Shaloi, salang ni hta na langai mi gaw, Hpun palawng ahpraw bu hpun ai ndai ni gaw, kadai ni rai nga ma ta? Kanang na pru wa ma ta? nga nna ngai hpe hkap san nngai. Ngai gaw, Nye a Madu e, nang chye nga ndai, ngu nna shi hpe htan wu ai. Shaloi shi tsun ai gaw: Ndai ni gaw, zingri zingrat kaba hpe hkam sharing ngut nna, Tinang a hpun palawng hpe Sagu Kasha a asai hta hkrut jahpraw la ai ni rai nga ma ai. 

Karai Kasang a Mungga rai nga ai.

CHYUM MUNGGA DAW 2

1 Yawhan 3:1-3

Ya hti na gaw, Yawhan shagun dat ai laika langai hta na rai nga ai.

Karai Kasang a kashu kasha ni anhte hpe ngu shamying mi ai majaw, Kawa gaw anhte hpe gade wa tsawra da mi hka! Shi a kashu kasha ni nan anhte rai nga ai. Dai rai nna, mungkan ga gaw shi hpe n chye wu ai majaw, anhte hpe mung n chye n hkap la ma ai. Tsawra ai ni e, Karai Kasang a kashu kasha ni, anhte ya e rai nga ga ai; hpang e anhte hpa tai na, garai n shadan dan nga ai. Dai hpe shadan dan ai shaloi, anhte Shi hte maren bung na ga ai lam hpe anhte chye nga ga ai; hpa majaw nga yang, Karai Kasang shi hkum nan nga nga ai hte maren, anhte shi hpe mu lu na ga ai. Ndai lam hpe myit mada ai masha yawng hte gaw, Hkristu Madu chyoi pra nga ai hte maren, tinang a hkum hpe shachyoi shapra ya ra ai.

Karai Kasang a Mungga rai nga ai.

KABU GARA SHIGA

Mahte 5:1-12a

Ya hti na gaw, Mahte a laika hta na Kabu Gara Shiga rai nga ai.

Yesu gaw masha unawng uwa hpe mu jang, bum ntsa de lung wa ai; dai yang e shi dung nga yang, shi sape ni shi a makau de sit sa wa ma ai. Shaloi Yesu shanhte hpe sharin shaga let, tsun wu ai gaw: Myit masin hta matsan mayan ai ni gaw, ngwi pyaw nga ma ai; lamu mungdan gaw shanhte a mungdan rai nga malu ai. Myit sumnung ai ni gaw ngwi pyaw nga ma ai; shanhte mungkan ga hpe madu lu na mara ai. Yawn hkyen hkrum ai ni gaw ngwi pyaw nga ma ai; shanhte shalan shabran ai hkrum na mara ai. Dinghpring ai hte krawsi hpang gara ai ni gaw ngwi pyaw nga ma ai; shanhte gaw hkru kat wa na mara ai. Matsan dum chye ai ni gaw ngwi pyaw nga ma ai; shanhte matsan dum la ai hkrum na mara ai.

Myit san seng ai ni gaw ngwi pyaw nga ma ai; shanhte gaw Karai Kasang hpe mu lu na mara ai. Ngwi pyaw sim sa ai hpe shabyin ai ni gaw ngwi pyaw nga ma ai; shanhte hpe Karai a kasha ni ngu shamying na mara ai. Dingman ai lam a majaw, zingri zingrat hkrum ai ni gaw ngwi pyaw nga ma ai; lamu mungdan gaw shanhte a mungdan rai nga malu ai. Nye a amying majaw masha ni nanhte hpe asawng zingri zingrat di ai hte, n teng n man ai hku mara amyu myu shagun da ai shaloi, nanhte ngwi pyaw nga myit dai: lamu mungdan hta e nanhte a shabrai kumhpa kaba nga malit dai majaw, kabu gara nna, ngwi pyaw nga mu.

Madu a Kabu Gara shiga rai nga ai.