MANAWN MASHAM MYIT HPE KANING RAI ANHTE DANG KAU LU NA RAI?

“Anhte hpe jaw da sai Chyoipra ai wenyi e Karai Kasang a tsawra ai myit, anhte a kraw lawang hta e ru bang ya manit ai” (Rom 5:5) hte maren, dai hte anhte dang kau lu na rai nga ai. Anhte a myit kraw lawang hta nga ai, n hkru n kaja ai myit, manawn masham ai myit, namak lawhpa myit, asung arung, ahkup ahkap nga ai myit ni hpe Chyoipra ai wenyi gaw jasan jaseng kau ya na rai nga ai. Karai Kasang a tsawra ai lam gaw, ting kyeng myit ai lam n-nga, anhte yawng a mai kaja ai lam hpe myit nga ai. Karai Kasang anhte a kraw kata hta bang tawn da ya ai tsawra myit gaw, tinang a jinghku wa/htingbu wa hpe kaja dik ai jaw ya na matu tam nga ai. Karai Kasang a tsawra myit gaw, anhte a n hkru n kaja ai myit yawng hpe jasan jaseng kau ya na rai nna, ra kadawn nga ai ni hpe gam jaw gam ya na matu n-gun jaw ya nga ai. Ra kadawn nga ai marai hkum shagu a matu anhte hta lit nga nga ai. Hpa majaw nga yang, Karai Kasang gaw anhte yawng hkra hpe Shi a hkrang sumla hte maren hpan tawn da sai rai nga ai (Npt Nph 1:26-27). Karai Kasang gaw anhte hpe tsawra nna, tsawra na matu hpan tawn da sai. Madu Karai tsawra ai zawn anhte tsawra ai shaloi, anhte gaw kabu pyaw dik ai hte lawt lam lu ai ni rai na re.

Anhte a jinghku ni/ htingbu ni hpe tsawra myit hte matsan dum garum kahtau ai lam gaw, Karai Kasang anhte a ntsa tawn da ya ai n htum n wai tsawra myit hpe htang madun ai lam rai nga ai. Ra kadawn nga ai, kaji htum ai wa hpe galaw daw ya ai a matu kumhpa bai nhtang lu na re lam Madu Yesu nan tsun tawn da sai. Garum hpyi let sit shang sa wa ai kadai hpe mung Madu Yesu ning dang kau wu ai n rai. Dai majaw, Shi Madu a sape ni rai nga ai anhte ni hpe mung dai hte maren galaw chye na matu saw shaga nga ai. Na a ntsa tawn da ai Karai Kasang a law la ai tsawra matsan dum lama ai hpe chyeju dum nga ai kun? Na a htingbu/ jinghku wa hpe dai Madu a tsawra myit hte maren galaw daw ya na matu jin jin rai sai kun? 

Mai kaja ai lam hta masha kaga ni sharawng awng ai zawn, nang mung rai nga ai kun? manawn masham ai hte n kam ai myit a majaw, sape ni hpe Madu Yesu daru kau nu ai. Shanhte ni zawn, Sape n re ai wa marai mi, Yesu a mying gang let nat gawt kau ai majaw myit n pyaw la nga ai. Dai wa hpe sape ni pat shingdang ai lam galaw sai. Madu Yesu mahtang; “nye a amying hte magam amu galaw ai wa gaw, nye a lam hpe n kaja ai ga alawan tsun lu na, kadai mung n nga ai” ngu bai tsun sai. Anhte mung, sape ni zawn, masha kaga ni, mai kaja ai lam galaw ai hpe, manawn ai myit, hkrit ai myit ni a majaw, myit yawn chye ga ai kun?

“tsawra ai myit gaw manawn masham n nga ai, . . .  dai teng man ai hte rau kabu gara nga ai” (1kor 13:4,6) nga nna san Pawlu gaw anhte hpe shadum ya nga ai. 

Shut hpyit mara hpe koi yen kau na lam hte seng nna sape ni hpe daru sharin ai shaloi, Madu Yesu lai lai jan jan tsun kau sai kun (MK 9:42-47)? Mungkan ga na nni nkri, hkam sha ai lam ni yawng hta grau manu kaba la ai, Karai Kasang hta htani htana ngwi pyaw simsa lam, ngu ai bandung shadaw kaba hpe Sape ni a matu tawn da ya sai. Asak naw hkrung nga lu na matu hkum hkrang a daw chyen langai ngai hpe tsi sara ni la kau ya ai zawn rai nga ai. Dai re ai majaw, wenyi si mat na lam de woi sa chye ai shut hpyit mara ni hpe koi yen kau ya lu na anhte shakut ra ga ai. Masha kaga ni hpe shut hpyit mara de lam woi na rai yang, kade daram lit kaba ai hpe Madu Yesu sadi jaw nga ai. Marai rai hpe shut hpyit na matu sharin ya ai rai yang, mara raw hkyem sa n jaw lu ai hpe Yuda ni hkap la ma ai. Grau nna, sak naw kaji ai ni a kam sham ai lam gaw hten bya loi ai hte shanhte hpe mai kaja ai kasi madun na ahkyak la nga ai. Masha kaga ni, grau nna sak naw kaji ai ni a man kaw kaja ai kasi hpe nang madun lu ai kun?

“Madu Yesu e, masha kaga ni hpe kabu gara shiga e sharin ai hte maren, kasi kaja madun lu na matu, Chyoipra ai wenyi hte ngai hpe jahpring ya rit. Nang Madu a Tengman ai ninghtoi, ngai kaw mung htoi tu ai marang e, masha kaga ni mung, shut hpyit mara a agung alau kaw nna lawt lu let prat nnan hta lawt lam lu la u ga law"

PRANWAN LADAW LABAN (26) MUNGGA

Manang ni mai kaja ai lam galaw ai hpe awng sharawng ai kun ngu tinang a hkum hpe san mai nga ai. Madu Yesu a kasa ni ga masha langai mi mai kaja ai lam hpe Madu Yesu a mying hta galaw nga ai hpe mu nna pat shing dang lai wa sai. Hap majaw nga yang manang wa shan hte zawn shing nrai shan hte hta grau nna mai kaja ai hpe galaw ai wa hpe manawn ai, ndawng n-yawt ai a majaw rai nga ai.

Dai rai yang Madu Yesu gaw "Anhte a gumlau maga e n nga ai wa gaw, anhte a hpang maga nga ai wa rai nga ai." ngu nna shadum jahprang ga tsun wu ai. Mai kaja ai lam hpe galaw ai gaw masha yawng shagu, makam masham shagu a yaw shada ai pan dung rai nga ai. Dai re ai majaw mai kaja ai lam hpe galaw ai masha kadai rai tim shakawn shagrau let grau nna kaja ai hpe galaw lu na matu garum shing tau ra na rai nga ai. Ahkyak ai gaw mai kaja ai hpe galaw ai hte masha ni hpe Madu Yesu zawn daw jau lu na matu rai nga ai.

Anhte langai hpra mung tinang hkrai mai kaja ai lam hpe shakut shaja galaw ai sha n-ga, manang ni grau nna kaja ai hpe nju ndawng ai nre ai sha, shakawn shagrau hte grau kaja ai magam bungli hte manang ni hpe daw jau ai lam hta garum shing tau lu u ga.

Fr. Philip Aung, MS

PRANWAN LADAW LABAN (26) SHANI NA CHYUM LAIKA

27 Sep, 2015

CHYUM MUNGGA DAW 1

Bu Hkawn  11:25-29

Ya hti na gaw, Bu hkawm laika hta na rai nga ai.

25 (Mawshe gaw amyu masha ni a agyi salang sanit shi hte hpe jahpawng la nna, shawa ginsum a grup e tsap shangun wu ai.)Madu gaw sumwi hte yu wa nna, Mawshe hta rawng ai atsam marai hta na la nhtawm, agyi salang sanit shi a ntsa de mara ya wu ai.Dai atsam marai shanhte a ntsa de yu hkrat wa jang, myihtoi  htoi ma ai; dai kaw nna myihtoi bai n htoi lu ma ai. 26 Dai salang hpung hta lawm ai, Eldad hte Medad mying ai marai lahkawng gaw, jahpan hta lawm ti mung, ginsum de n sa ai sha dap e nga nga ma ai. Dai salang yan a ntsa de mung dai atsam marai yu hkrat wa nna, shan gaw dap kata e myihtoi htoi ma ai. 27 Shaloi shabrang langai mi gat sa nna, Eldad yan Medad gaw dap kata e myihtoi htoi nga ma ai, nga nna Mawshe hpe tsun dan wu ai. 28 Dai rai nna, shabrang aprat kaw nna Mawshe a hkring mang tai ai, Num a kasha Yawshu gaw, nye a Madu, Mawshe e, shan hpe jahkring kau u, ngu nna Mawshe hpe tsun wu ai. 29 Mawshe chyawm gaw, nye a matu nang manawn nga nni? Madu a amyu masha yawng hte gaw, myihtoi hkrai rai nga mu ga; Madu gaw shi a atsam marai hpe shanhte yawng a ntsa de mara jaw ya u ga law, ngu nna tsun wu ai.

Ya hti ai gaw, Karai Kasang a mungga rai nga ai.

CHYUM MUNGGA DAW  2                                                       

Yaku  5:1-6

Ya hti na gaw, Kasa Yaku a shagun dat ai laika hta na rai nga ai.                                                

1 Sut su ai ni e, ngai nanhte hpe tsun ai ga hpe madat mara la mu: Nanhte a ningtsa e du magang ra ai tsinyam tsindam majaw, hkrap shabam nga mu. 2 Nanhte a sutgan mahkra yat mat wa nna, nanhte a hpun nba hpe manut e sha kau ma nu ai. 3 Nanhte a ja hte gumhpraw hta pyi, nhkan jung nga ai; dai nhkan mung nanhte a mara a lam sakse hkam ya ai hte, nanhte a hkum shan hpe sha kau na ra ai. Shing rai, hpang jahtum na nhtoi ni a matu, wan grung ai zawn re ai sutgan hpe nanhte mahkawng da manit dai. 4 Yu mu, nanhte a yi hkauna ni hpe dan shangun nhtawm, bungli galaw ai ni a shabrai hpe nanhte hkalem sha kau manit dai; dai ni a shabrai gaw jahtau nga ai hpe mada la mu; mam dan ai ni a garu ai nsen mung, zawnawng zawwa up ai Madu a na hta e hkrang shang wa sai hpe dum chye mu. 5 Nanhte gaw ga ntsa e n dut n dang ai hku lu sha nna, pyawdaw hkrai myit dai; sat ai shani du ni ti mung, dusat dumyeng zawn, nanhte a myit dik hkra lu sha manit dai. 6 Ding hpring ai ni hpe mung nanhte daw dan nna sat kau manu ai; shanhte gaw nanhte hpe hkum shing dang lu sai n rai.

      Ya hti ai gaw, Karai Kasang a mungga rai nga ai.

KABU GARA SHIGA   

Marku 9:38-43.45.47-48

Ya hti na gaw, Marku a laika hta na Kabu Gara ai Shiga rai nga ai.

38 Sape Yawhan gaw Yesu hpe, Sara e, anhte kaw n hkan nang ai masha langai mi na a amying hte nat shaden kau ai hpe anhte mu hkrup saga ai, rai ti mung, anhte kaw n hkan nang ai majaw, shi hpe hkum kau ga ai, ngu nna tsun wu ai. 39 Yesu mahtang, Shi hpe hkum hkum kau mu: nye a amying hte lamik kumla galaw ai wa gaw, nye a lam hpe n kaja ai ga hte shatan kau na n rai.40 Anhte a gumlau maga e n nga ai wa gaw, anhte a hpang maga nga ai wa rai nga ai.

41 Nanhte hpe ngai teng teng tsun made ai gaw: Hkristu kaw hkan nang ai sape ni rai nga myit dai, nga nna nanhte hpe ntsin htinggap mi jaw ai wa kadai mung, shi a shabrai hpe n lu la na n rai.

      42 Lam mi gaw, Ndai kam sham nga ai ma kaji ni hta na langai mi hpe, myit kataw shangun ai wa kadai rai ti mung, shi a du hta htumrin kaba noi nna, nawng hta kabai bang kau na gaw shi a matu grau nna mai nga ai.43 Na a lata nang hpe mara galaw shangun yang gaw, dai hpe kahtam di kau u: lata lahkawng hkum ai hte ngarai mung na n si n krip ai wan de shang na hta, lata hten ai hte asak hkrung ai de shang na gaw grau mai nga ai,45 Na a lagaw nang hpe mara galaw shangun yang gaw, dai hpe kahtam di kau u: lagaw lahkawng hkum nga ai hte, ngarai mung de jahkrat kau ai hkrum na hta, lagaw hten ai hte asak hkrung ai de shang na gaw, grau mai nga ai. 47 Na a myi nang hpe mara galaw shangun yang gaw, dai hpe malawk kau u; myi lahkawng maga hkum ai hte, byet n si nna wan mung n si n krip ai,48 ngarai mung de jahkrat kau ai hkrum na hta, myi maga sha nga ai hte, Karai Kasang a mungdan de nang shang na gaw, grau mai nga ai.

Ya hti ai gaw, Madu a Kabu Gara Shiga rai nga ai.  

KADAI A SHAKAWN SHAGRAU AI HPE NANG TAM NGA NTA?

Wudang n lawm ai sha, Karai Kasang a hpung shingkang hpe garan la na matu n mai byin nga ai. Nni nkri hkam la let wudang hta sat kau hkrum na lam tau nau tsun dan ai shaloi, Messiah Madu du sa ai lam, amu galaw na lam hpe n chye ai majaw, sape ni hta chye na hkawn hkrang ai lam n nga ai. Hta n-ga, dai hta lai nna garan mung n wam san wu ai. Sarawun kaw nna n kaja ai hte masat, daw dan ya ngut ai hpang, kaga ga san san na n chye mat ai zawn rai nga ai. Anhte n mu mayu ai hpe kade daram ning dang kau ya sai rai? Karai a mungga: kabu gara shiga hpe anhte na la lu sai hte maren, dai hpe hkap la ai, ning dang ai akyu ara ni hpe mung anhte chye ga ai. Tim, anhte a prat hpe Karai a mungga matsun ai hte maren gaw gap sa wa ai kun? Dai mungga hpe madat mara lu na hte hkan nang sa lu na matu Chyoipra ai Wenyi jahtoi ya u ga, Madu kaw akyu hpyi ga!

Shanhte a lapran hta kadai wa grau na kun ngu ai lam jahta ai hpe Madu Yesu na chye kau ya ai majaw, Sape ni grai gaya kahpa hkrum sha sai. Anhte mung, dai sape ni hte bung nga ga ai nrai? Kaga masha ni hpe tinang hkum hte shing daw yu nna shanhte a shakawn shagrau ai hpe ra sharawng ga ai. Shakawn shagrau ai hte arawng aya hpe ra sharawng ai lam gaw anhte hkum shan kata hta arawng nga ai lam nan rai sai. ‘Nang shi hpe Karai Kasang hta loi mi sha shagrit da nna, arawng sadang hte hpung shingkang shi hpe ka up ya nu ai’ (shk 8:5) nga nna shakawn kungdawn sara wa e, Karai Kasang a hpung shingkang anhte a matu lajang da ya ai hpe, ka tawn da nga ai.

Karai Kasang a Mungdan hta kaba dik ai gaw kadai rai na, sape ni chye la lu mu ga, Madu Yesu gaw ma kaji hpe pawn la let madun dan wu ai. Hkik hkam grau ai a lam, ma kaji ni kaning rai sharin ya lu ai rai? Moi prat na ma kaji ni hta, ahkaw ahkang, shara, hpa mung shanhte n lu ma ai. Shanhte gaw, shinggyim uhpung uhpawng hta grit htum ai tsang na rai nna, n ta bungli galaw na, shangun ai hpe galaw na, ni rai ma ai.

Ma kaji hpe pawn la ai Madu Yesu a kumla gaw hpa hpe madun ai kun? Shi a sape ni a man e, ma kaji hpe pawn la ai gaw, hkungga ging ai shara hta ma kaji ni hpe tawn da ai ngu madun dan nga ai.

Karai Kasang a Mungdan hta kaba grau dik ai gaw kadai rai na kun? shagrit shanem ai, myit masin hpraw tsawm ai, gumrawng gum tawng ai hpe kabai kau nna, shangun ma a shara (snr) ma kaji shara hpe la ai ni rai nga ai. Madu Yesu hkum nan anhte a matu kasi kaja rai nga sai. “shangun ma hpe yam sha na nga dusa ai n rai, shangun ma a amu hpe galaw daw ya na matu du sa ai” (Mt 20:28). Tinang dai shagawm kau nna, mayam a ahpraw nsam dagraw let”, (Hpil 2:7) nga nna kasa Pawlu mung Madu Yesu a lam hpe tsun da sai. Madu Yesu gaw shi a hkum hpe shagrit kau n’htawm (shi a teng wa shara gaw Kawa Karai a hkra maga kaw), anhte shinggyim masha sa tai let anhte hpe sharawt la nna Shi a Mungdan hta rau nga lu na matu sa wa sai.

Karai Kasang gaw gumrawng gumtawng ai ni hpe gang hkum kau nna, myit nem ai ni hpe chyeju jaw ya wu ai (Yk 4:6). Lama na, Karai Kasang a shaman chyeju, atsam hte hpring zup mayu ai rai yang, anhte a kraw kata kaw rawng ai, gumrawng ai myit, arawng aya tam ai myit, myit tsaw myit dap ai lam, ni yawng hpe shawng jasan kau na ra ang ga ai. Shaloi she, Karai Kasang a arawng aya, n-gun atsam, hte tsawra ai myit hte anhte hpe jahpring ya lu na rai nga ai. 

Tinang hkum hpe shagrit kau nna Madu Yesu zawn daw jau lu na nang jin jin rai sai kun?

“Madu Yesu e, Na a wudang a marang e, mungkan ga hpe hkye la sai hte shut hpyit mara hte si du hpe dang manga kau ya sai. Nang Madu a Awng Padang hte arawng aya hpe dai wudang hta ngai galoi mung mu lu u ga law. Nang Madu a Chyoipra ai lam yan hta sharawng awng ai hta ngai mung hkan nang lu na matu, shaman chyeju jaw, garum ya rit law!!!

PRANWAN LADAW LABAN (25) SHANI NA CHYUM LAIKA

September 20,2015

CHYUM MUNGGA DAW 1

Hpaji Byeng-ya 2:12.17-20

Ya hit na gaw, Hpaji Byeng-ya laika hta na rai nga ai.

Tara n lang ai ni gaw, tinang a kraw lawang hta ning nga ma ai: dinghpring ai wa gaw anhte hpe sharu shatsang ai hte, anhte a lam hpe ning dang kau ai majaw, shi hpe shinggrup nna htim ga. Anhte a tawt lai ai amu a majaw, shi anhte hpe daru shadum nna, ji woi ni a matsun maroi lam ni hpe n hkan shatup ai majaw, shi anhte a ntsa de mara shagun da nga ai. Ding hpring ai wa tsun ai ga teng man rai nga ai kun, naw yu yu ga; shi hta nan gara hku byin wa na hpe anhte la yu ga. kaning rai nme law, ding hpring ai wa gaw Karai kasang a kasha rai yang gaw, dai Madu shi hpe maga nna, shi a hpyen ni a lata hta na shi hpe hkye mawai la na ra ai.Dai rai nna, shi hpe zingri nna, nni nkri jaw ai hku shi hpe chyam yu ga. Shing rai, shi a sumnung shingdi ai hte shakut sharang ai myit, gade wa galu kaba nga ai hpe anhte chye lu na ga ai.Dai ding hpring ai wa hpe kaya kahpa re ai hku anhte sat kau ga; kaning rai nme law, shi nan tsun sai hte maren, lam shagu hta e Karai kasang shi hpe makawp maga la na ra ai, nga nna n hkru ai ni tinang a kraw hta e tsun nga ma ai.

Ya hti ai gaw, Karai kasang a mungga rai nga ai.

CHYUM MUNGGA DAW 2

Yaku 3:16-4:3

Ya hti na gaw, Kasa Yaku shagun dat ai laika hta na rai nga ai.

16 Hpu nau ni e, ladu lai ai hku manawn masham ai hte, arawng sadang ra marit ai lam ni nga yang, kashuk  kashak hte, n hkru n kaja ai amu amyu myu byin pru nga ai. 17 Ntsa de na hpaji byeng-ya chyawm gaw, shawng e san pra san seng rai nga ai; dai hpang e, htinglu htinglai ya chye ai, sumnung shingdi ai hte, manang wa a akyu hpe tam nga ai; matsan dum la ai myit rawng nga nna, mai kaja ai amu amyu myu hpe hkan galaw nga ai: dai gaw, myiman n lata ai hte, hpyi hpun n chye ai hpaji byeng-ya rai nga ai. 18 Ngwi pyaw sim sa ai hpe shabyin ai ni gaw, sumnung shingdi ai nli gat hkai da nna, dai hta na ding hpring chyoi pra ai asi law law si pru na ra ai. 1 Nanhte hta e ga li ga law ai hte, dangrang hkat ai lam ni kanang na pru wa ma ta? Nanhte a daw shan ni hta e gasat nga ai, marin marit ai hte maren, n lu la lu ai majaw, sat kau na jin jin rai nga myit dai. 2 Nanhte hta manawn ai myit n shadik lu ai majaw, kashun la na matu, ga law ai hte gasat nga myit dai. Nanhte akyu n hpyi ai majaw, ra ai hte maren n lu la myit dai. 3 Nanhte hpyi ti mung, nanhte a pyaw daw lam ni hpe grau nna hkan lu na matu, n htap n htuk ai hte n ang ai hpe hpyi nga ai majaw, n lu la myit dai.

Ya hti ai gaw, Karai Kasang a mungga rai nga ai.

KABU GARA SHIGA

Marku 9:30-37

Ya hti na gaw, Marku a laika hta na Kabu Gara ai Shiga rai nga ai.

30 Yesu hte Shi a sape ni dai bum de nna yu wa ai hpang, Galile mung hku lai sa wa ai; rai ti mung, Shi a sape ni hpe sharin achyin ya nga ai majaw, Shi lai sa wa ai hpe kadai mung n chye lu u ga, Shi ra nga ai. 31 Yesu Shi a sape ni hpe, Masha Kasha gaw masha ni a lata de ap kau ai hkrum nna, shanhte Shi hpe sat kau na mara ai hte, sat kau ai hpang masum ya nhtoi hta Shi bai hkrung rawt na ra ai, ngu nna tsun dan mu ai.32 Shanhte mahtang dai ga hpe n chye na ti mung, Shi hpe san na hkrit nga ma ai. 33 Dai hpang shanhte Kaperna-um de du ma ai. Nta nhku de rawng nga yang,Yesu shanhte hpe. Nanhte lam hkan e, hpa lam tsun hkat nga myit ta? ngu nna san mu ai.34 Sape ni mahtang atsin sha nga ma ai; kaning rai nme law, Grau kaba ai wa kadai mahtang rai kun? nga nna lam hkan e tsun hkat masai.35 Shaloi Yesu dung nna, sape shi lahkawng  hte hpe shaga la nhtawm shanhte hpe, Grau mayu ai wa kadai rai ti mung, yawng a hpang na wa hte, yawng a ali ama tai wa na ra ai, ngu nna tsun mu ai.

36 Bai, ma kaji langai mi hpe Shi shaga la nna, sape ni a kaang e shatsap tawn wu ai; dai ma hpe magra let Yesu shanhte hpe, 37 Ndai zawn re ai ma kaji langai mi hpe, nye a amying majaw hkap la ai wa kadai mung, ngai hpe hkap la ai sha n rai, ngai hpe shangun dat ai wa hpe she hkap la ai rai nga ai.

Ya hti ai gaw, Madu a Kabu Gara Shiga rai nga ai.

PRANWAN LADAW LABAN (25) MUNGGA

Anhte a lapran hta reng dik htum ai, kaba dik htum ai wa kadai rai ta ngu nna san yang mahtai amyu amyu pru wa na rai nga ai. Ja gum hpraw lu ai wa, arawng aya nga ai wa, hpa ji chye ai wa, n-gun lagaw ja ai wa ngu ai mahtai sha n-ga kaga mahtai law law mung nga na re. Anhte a mahtai ni n-bung ai gaw tinang a prat hta kaning re ai hpe ahkyak tawn da ai ngu ai kaw madung ai majaw rai nga ai.

Madu Yesu tsun ai gaw masha yawng a hpang e nga ai, masha ni hpe daw jau ai wa re ngu nna tsun shadum nga ai. Madu Yesu tsun ai reng dik htum ai wa gaw tinang a hkum hpe shagrit shanyem nna htingbu wa hpe daw jau ai wa re ngu ai shaloi masha langai mi a asak aprat hta sha nrai, wuhpung wuhpawng a labau hta prat ding sa kajai gum hkawng ai wa re ngu mung tsun ai rai nga ai. Tinang a hkum hpe tinang shakawn shagrau ai nre ai sha masha ni shakawn shagrau ai hpe lu ging ai gaw grau nna ahkyak nga ai. Shagrit shangyem ai hte htingbu wa hpe daw jau ai wa gaw masha hkum hkrang si mat tim shan hte a mai kaja ai lam gaw matut nna sak hkrung nga lu na re. Ndai masha ni a mai kaja ai hpe mu chye, na chye ai masha ni shakawn shagrau ai hta sha nrai shanhte a mai kaja ai lam hpe kasi la nna kaja ai lam hpe nga sa ai masha ni a prat hta matut nna sak hkrung nga lu na re.

Madu Yesu tsun ai “reng dik htum ai wa” ngu ai hpe na la ai ni anhte gaw anhte a myit shatawng shada ai reng dik htum ai ngu ai hpe nre ai sha Shi Madu tsun ai shagrit shanyem let manang wa hpe daw jau ai amu bungli galaw sa let Karai Kasang a man hta reng dik htum ai ni tai wa lu u ga.

Fr. Philip Aung, MS

PRANWAN LADAW LABAN (24) MUNGGA

Masha a madang gaw shi tsun shaga ai hta sha nre ai sha nga sa lam hpe yu nna chye mai nga ai. English ga malai hta “Hkum hkrang a tsun shaga ai nsen gaw n-gup na nsen hta graw ja ai” ngu nna nga ai hte maren anhte galaw sa ai amu magam lam ni gaw n-gup ga kaw nna anhte a lam hpe tsun ai hta grau nna dan leng na rai nga ai.

Madu Yesu gaw shi a Kasa ni hpe shi kadai re ai lam hpe san ai shaloi Kasa ni gaw mahtai amyu myu jaw ma ai. Kasa Petru gaw Nang gaw hkye hkrang la ai wa re ngu nna htan wu ai. Dai rai yang Kasa Petru gaw shi tsun ai hte maren Madu Yesu hpe kam sham nna shi a sak htum hkra kang ka ai hte shi Madu a hpang hkan nang lai wa sai re.

Anhte myit sumru yu mai lam langai gaw anhte a nga sat nga sa ai lam hpe yu nna Karai Kasang gaw anhte a matu kadai re ai kun ngu jep yu mai nga ai. N-gup ga gaw nna tsun ai hpe bai myit yu ai nre ai sha tinang a nga sat nga sa hpe yu nna Karai Kasang hpe kade daram kam sham ai kun ngu mu chye la mai nga ai. Kaja wa teng sha kam sham ai wa gaw shi a kam sham ai lam hpe amu bung li hku nna hkrang shapraw nga sa ai wa re.

Kasa Petru zawn Madu Yesu hpe hkye hkrang la ai wa re ngu nna kam sham let kaja wa sak hkrung nga sa lai wa ai zawn anhte ni mung shi a kasi hpe la nna kaja wa sha Karai Kasang hpe kam sham ai ngu ai hpe anhte a nga sat nga sa ai lam hte sak se hkam lu u ga.

NA MATU YESU GAW KADAI RAI?

Na a matu, Madu Yesu gaw kadai rai? 

Masha ni ngai hpe kadai wa re ai, nga ma ta? Nanhte mung ngai hpe kadai wa re ai, ngu myit nga ma ta? ngu nna Madu Yesu gaw Sape ni hpe san yu nu ai. Yawhan Baptista, Elia, Yeremia, myihtoi langai ngai, nga nna masha ni myit ma ai, ngu ai hpe yu yang, Israela hta Madu Yesu hpe chye chyang ma ai. Petru mahtang, ‘teng sha wa, Nang Hkristu rai nga ai’, ngu jaw teng ai hte htan ya sai. Ndai lam hpe Karai Kasang chyu sha Petru hpe shalen ya ai rai sai. Makam Masham a marang e, Madu Yesu, teng sha wa kadai re ai hpe Petru chye la sai. Madu Yesu hpe ‘Sau chya da hkrum ai wa’ (Messiah hte Hkristu) ngu nna yawng a shawng e chye ai Sape, Petru rai sai. ‘Hkristu’ gaw Greek ga rai nna, Hebre ga ‘Messiah’, sau chya hkrum ai wa’ ngu ai lachyum rai nga ai. Karai Kasang a hkyela ai amu magam byin lu na matu, masha kasha hta hkam la ra ai nni nkri ni a lam tsun dan ai shaloi, Petru a makam hpe jep ai hkrum sai. Dai nni nkri lam shiga na lu ai sape ni hta kade daram kajawng sai kun?

Karai Kasang myit ai hte shinggyim masha myit ai, galaw ai lam gaw kade wa shai la a hka: shagrit shanem ai, nni nkri hkam sha ai hte wudang ntsa e si hkam ai marang e, shut hpyit mara hte si ai hpe dang manga kau nna anhte yawng a matu hkye hkrang la lam hpe lu da ya sai. ‘Ngai kadai re ai ngu nang tsun n ta?” ngu ai ga san hpe Madu Yesu gaw anhte marai hkum shagu hpe lak san san nga sai.

Madu Yesu hpe tinang a hkyela Madu re ngu nna kam sham hkap la let hkan nang na ni hta, ap nawng kau ra ai lam law law nga ai hpe Shi Madu tsun dan nga ai. Lam shagu hpe ap nawng kau ai sha n-ga, tinang a asak pyi ap kau ra ai aten du wa na re. Dai zawn rai lajin ai hpe kadai wa kaning rai galaw lu na rai? Kawa Karai gaw anhte shinggyim masha ni shut hpyit mara hta si hkrung si htan kaw nna lawt lu na matu shi a kasha Yesu Hkristu hpe jaw kau ai. Hkum hkrang si hkam ai sha n rai, wenyi lam yan si hkam ai du hkra rai nga ai. Anhte a prat hte dai hpe galai la ai shaloi, anhte jaw kau ai hta grau law ai hpe anhte bai lu la ga ai.

Hkyem sa jaw ya ai, Ngwi pyaw simsa lam, ya aten Karai Kasang a Mungdan na sut gan ni hpe anhte mu tam ai shaloi, Karai Kasang shi hkum nan, jaw ya na rai nga ai kabu gara, ngwi pyaw simsa lam hpe anhte lu tawn da ai arai yawng mayawng hte myit pyaw ai hte galai kau lu na rai nga ai. Karai Kasang gaw shadawn sharam n nga jaw ya na re. Shi jaw ya na kabu pyaw hpa hte si hkrung si htan kaw nna, Hkristu a wudang gaw, awng padang de woi wa ai. Rai yang, shani shagu hpai ra ai, Hkristu matsun da ai wudang gaw hpa mi rai kun? Ngai a myit sharawng ai lam gaw, Shi Madu a myit ra ai lam hte bung wa ai shaloi, Shi Madu ra sharawng ai lam hkum tsup wa na re. Madu Yesu Hkristu hte rau awng dang lu na matu, ap nawng, sak jaw na matu jin jin rai sai kun?

Madu Yesu e, Nang gaw Ahkrung nga ai Karai Kasang a kasha, Hkristu rai nga ai hpe ngai kam sham ai hte yin la nngai. Nang gaw, ngai a Hkyela Madu rai nga ai. Shut hpyit mara hpe ning dang kau nna Nang Madu ra sharawng ai hpe hkap la n’htawm, wudang a Awng Padang hta hkawm sa lu na matu ngai a makam hpe n-gun shaja ya let, garum la rit law!!!

PRANWAN LADAW LABAN (24) SHANI NA CHYUM LAIKA

13 September, 2015

CHYUM MUNGGA DAW  1

Esaia 50:5-9

Ya hti na gaw, Esaia a laika hta na rai nga ai.

5 Madu gaw nye a na hpe hpaw ya ni ai: ngai mahtang lale kau ai hte kanut mat wa ai n rai. 6 ngai gaw kayat ai ni hpe nye a shingma, shabyi mun baw ai ni hpe nye a shabyi ap ya nngai: asawng asang di ai ni hte, mayen mahtaw bun ai kaw na, nye a myiman hpe kayin kau ai n rai. 7 Kaning rai nme law, Madu gaw  ngai hpe garum na ra ai. Dai rai nna, asawng asang di ai lam nig aw, ngai hpe myit n jahtum kau nga ai. ngai kaya kahpa n hkrum lu na hpe ngai chye ai majaw, nye a myiman hpe nhpai lung zawn ngai shatai da nngai. 8 Ngai mara n lu ai hpe madun dan lu ai wa gaw, nye a makau e nga ai. Dai rai nna, ngai hpe tang shawn mayu ai wa kadai rai ti mung, tara rung de sa nna tsun hkat ga. Ngai hpe mara shagun ai wa kadai rai ta? dai wa gaw ngai hpe sa tsun ru ga. 9 Yu u, Madu  Karai Kasang ngai hpe garum na ra ai; ngai hpe daw dan na kadai gwi nga a ta?

Ya hti ai gaw, Karai Kasang a mungga rai nga ai.

CHYUM MUNGGA DAW 2

                                                                                 Yaku 2:14-18

Ya hti na gaw, kasa Yaku shagun dat ai laika hta na rai nga ai.

14 Nye a hpu nau ni e, marai langai ngai, ngai gaw kam sham nga nngai, nga nna tsun ti mung, mai kaja ai amu bungli n galaw yang gaw, hpa akyu nga a ta? Makam masham gaw dai wa hpe hkye hkrang la lu a ni? 15 Hpu nau langai ngai, shing n rai, kajan langai ngai, hpun palawng atsawm sha n lu hpun ai hte, asak bau na shahpa n lu yang gaw, 16 nanhte hta na masha langai mi gaw, ngwi pyaw ai hte wa ma sit; lum nga mu, hkru hkra sha mu, ngu nna dai yan hpe tsun ti mung, hkum hte asak a matu ra nga ai hte maren n jaw dat yang gaw, hpa akyu nga na a ta? 17 Dai hte maren, makan masham hta mai kaja ai amu bungli n lawm yang gaw chyasi rai nga ai.

    18 Dai zawn re ai hpu nau wa hpe ndai hku tsun na ra ai: ngai gaw kam sham nga nngai; nang mahtang mai kaja ai amu bungli galaw nga ndai, nga nna nang tsun nit dai. Ya, mai kaja ai amu bungli langai mi pyi n galaw ai, na a makam masham ngai hpe madun dan rit: shaloi, ngai galaw ai mai kaja ai amu ni nang hpe madun dan ai hte, nye a kam sham ai lam madun na de ai.

Ya hti ai gaw Karai Kasang a mungga rai nga ai.

KABU GARA SHIGA

Marku 8:27-35

Ya hti na gaw, Marku a laika hta na Kabu Gara ai shiga rai nga ai.

27 Yesu hte Shi a sape ni gaw, Kesare Hpilipi a grup yin na kahtawng ni hpe kawan na matu rawt sa wa ma ai. Shanhte hkawm sa wa nga yang, Yesu Shi a sape ni hpe, Masha ni, ngai hpe kadai wa re ai shadu nga ma ta? ngu nna san mu ai. 28 Sape ni htan let, Masha nkau mi gaw, Yawhan Baptista re ai; kaga hte gaw, Elia re ai; bai, kaga hte gaw, Myihtoi ni hta na langai mi rai nga ai, nga nna tsun ma ai, ngu nna Shi hpe tsun dan mu ai. 29 Bai, Yesu shanhte hpe, Nanhte mahtang ngai hpe kadai wa re ai, shadu nga myit ta? ngu nna san mu ai. Petru htan let, Nang gaw Hkristu ngu ai Karai Kasang a Chyoi Pra ai Wa rai nga ndai, ngu nna Shi hpe tsun wu ai. 30 Shaloi Yesu gaw Shi a lam kadai hpe mung n tsun dan u ga, shanhte hpe ginhtim da mu ai.      

31 Dai a ten kaw nna, Masha Kasha gaw nni nkri law law wa hkrum nna, du salang ni, hkinjawng agyi ni hte tara sara ni e nyet kau ai hkrum na hte, sat kau ai hkrum nhtawm, masum ya nhtoi hpang e bai hkrung rawt wa na lam, shi shanhte hpe sharin achyin hpang mu ai. 32 Petru gaw Shi hpe woi la nna daru shadum wu ai. 33 Yesu mahtang kayin wa ai hte, Shi a sape ni hpe mada yu let, Petru hpe, Satan e, nye a hpang de sit mat wa u; Karai Kasang a lam hku n rai, masha a lam hku sha nang myit nga ndai, ngu nna daru kau wu ai.

34 Bai shawa masha ni hte Shi sape ni hpe Yesu shaga la nna shanhte hpe tsun mu ai gaw: Ngai hpang de hkan sa mayu ai wa kadai rai ti mung, tinang hkum hpe ndang kau nna, shi a wudang hpai let, ngai kaw hkan nang ru ga. 35 Tinang asak hpe hkye la mayu ai wa kadai mung, asak sum na ra ai: nye a matu hte kabu gara shiga a majaw, asak sum ai wa chyawm gaw, dai hpe hkye la lu na wu ai.

Ya hti ai gaw, Madu a kabu Gara Shiga rai nga ai.

PRANWAN LADAW LABAN (23) MUNGGA

Myi nmu ai ni a matu mu lu na matu gaw ahkyak dik htum ai rai nga ai. Na nna ai ni a matu mung na lu na matu gaw ahkyak nga ai. Tinang ra kadawn ai hpe lu mayu ai gaw masha hkum sagu a ra sharawng ai lam rai nga ai. Hpa majaw nga yang hkum hkrang hta lamama ra rawng ai rai yang, manang ni hta grau nna jam jau hkrum nga ai.

Chyum Mungga hta Madu Yesu gaw na nna na maa nga ai masha langai hpe na lu na matu hte ga shaga lu na matu shaman chye ju jaw ya sai re. Shi a na lu ai atsam lu la ai hte ga shaga lu ai lam gaw ndai masha a matu ja gum hpraw jaw ya ai hta grau nna kabu pyaw dik htum kum hpa nan rai sai. Madu Yesu gaw shi a makau grup yin kaw nna masha ni a matu ra rawng ai hpe ja hpring shatsup ya ai kabu gara shiga jaw ya ai Wa rai dai.

Shi Madu a kasi hpe la nna anhte a makau grup yin na masha ni a matu shanhte ra rawng ai lam hta jahpring shatsup ya ai a marang e kabu gara shiga hpe jaw ya mai nga ai. Ja gumhpraw arung arai ni hte sha n-ga, manang wa hpe chye madat ya ai, myit ru myit tsang ai ten hta managng shatai ya ai, yawn hkyen ai aten hta shalan shabran ya ai, machyi makaw ai ten hta gawan gatsan ya ai lam zawn re ai lam law law hpe tsaw ra myit hta madung da nna galaw sa mai nga ai. Mai kaja ai ahkyang lailen hte kaja ai ga si ni hpe manang wa ra kadawn ai ai hpe yu nna kabu gara shiga hpe jaw ya mai nga ai.

Anhte galaw sa wa ai lam hte tsun shaga ai gaw anhte a makau grup yin na manaw manang ni a matu gabu gara shiga byin tai wa lu ga.

Fr. Philip Aung, MS

PRAN WAN LADAW LABAN (23) SHANI NA MUNGGA

Madu Yesu kaw nang garum hpyi ai ten hta, Madu kaw nna kaning rai bai htang galaw ya na hpe nang myit mada ai rai? Shi Madu hpang de sit shang ai ten hta hkrit ai, n kam ai myit hte kun? (snr) kam sham kam hpa ai myit hte kun? Myit masin ding man ai, kam sham myit kaba hte sit shang wa ai kadai hpe mung  Madu Yesu myi man yawng kau na n rai. Madu Yesu galaw ai amu magam yawng hpe atsawm sha galaw nga ai. Shi Madu a magam bungli hta, Karai Kasang a mai kaja ai hte tsawm htap ai lam hpe mu lu na re.

Na lahpang nna maa ai masha langai mi hpe Madu Yesu hkrum ai shaloi, dai wa a mayak mahkak hpe yu matsan dum la nga ai. Gaya kahpa n hkrum mu ga, dai wa hpe shinggan de shapraw la nu ai. Dai hpang Madu gaw shi a layung hte na lashing hku hpe achyaw ya let shi a mayen hte nan dai wa a shinglet hpe ahtawk ya nna shi a makam hpe jasu sharawt dat ya sai. Madu a matsun ga hte maren, dai wa a na san mat wa nna ga leng leng tsun wu ai. 

 Dai masha wa a na lashing hku hta, shi Madu a layung achyaw bang ya ai gaw hpa lam rai sai kun? Ndai lamik kumla a ntsa, ‘Gregory ning hkring (540-604 AD) tsun ai gaw, “Karai Kasang a layung hpe Chyoipra ai wenyi nga ma ai. Madu Yesu a layung dai, na hpang wa a na lashing hku de achyaw ai lam gaw, Chyoipra ai wenyi a marang e, dai wa a wenyi hpe makam masham de woi la ai lam rai sai.

Ndai lamik kumla hpe yu nna, shawa masha ni gaw, masha kaga ni a ntsa Madu Yesu a matsan dum lama ai myit masin hpe sakse hkam ya ma ai. Madu gaw amu magam hpe atsawm sha galaw sai. Madu Yesu a sadi sahka chye ai, myit tau ya ai lam hta mayak jam jau law law n nga ai. Madu Yesu gaw anhte yawng hpe tsawra matsan dum myit kaba hte gawn lajang ya ai rai nna, anhte shada da mung dai hte maren galaw lu na saw shaga nga ai. Anhte a kraw salum hta rawng nga ai Chyoipra ai wenyi gaw, Madu Yesu tsawra ai zawn tsawra lu na byin shangun ai. Madu Yesu, garum lajang ya ai zawn, tsawra matsan dum myit kaba hte na a htingbu wa hpe nang gawn lajang nga ai kun? 

“Madu Yesu e, Na a wenyi hte ngai a salum hpe jahpring ya nna Nang Madu a tsawra ai hte ngai a salum hpe wang shagrung ya rit. Masha kaga ni a ra kadawn ai hpe tau ya chye nna shanhte hpe matsan dum garum ya lu na matu shaman ya rit. Nang Madu a matsan dum ai, ngwi pyaw simsa lam a matu lak nak ngai hpe shatai ya nna masha kaga ni hpe Nang Madu hta shamai shatsai hkrum lu hkra lajang ya lu u ga, ngai hpe shaman ya rit law!!!

PRANWAN LADAW LABAN (23) SHANI NA CHYUM LAIKA

September 6, 2015
CHYUM MUNGGA DAW 1

Esaia 35:4-7

Ya hti na gaw, myihtoi Esaia a laika hta na rai nga ai.
4Nden ja ai myit rawng nga nna, hkum hkrit nga mu, ngu nna myit htum ai ni hpe tsun mu. Yu mu, nanhte a Karai Kasang gaw matai tai na matu mung, Shi kaw na ari jaw na matu mung, du na ra ai; nanhte hpe hkye hkrang la na matu shi nan du na ra ai. 5 Dai shaloi e, myi hten ai ni, myi mu lu nna, na nna ai ni, na lu na mara ai. 6 Lagaw hten ai wa gaw, shan nga zawn gumtawng lu nna, ma-a ai wa a shinglet mahkawn mangoi na ra ai. kaning rai nme law, hkraw hkun ai shara e hka hpawk hpaw nna, zaibru jang e hka lwi na ra ai. 7 Kahtet kabrim ai zaibru jang hta hka ing nga nna, hkraw hkun ai hta hka hpawk hpaw na ra ai.
Ya hti ai gaw, Karai Kasang a mungga rai nga ai.

CHYUM  MUNGGA  DAW  2                                                                              

Yaku  2:1-5

Ya hti na gaw, Kasa Yaku shagun dat ai laika hta na rai nga ai.
1 Nye a hpu nau ni e, hpung shingkang lu ai anhte a Madu Yesu Hkristu hpe kam sham manit dai majaw, myiman lata ai hku masha hpe hkum ginhka mu. 2 Ga shadawn tsun jang, ja lachyawp chyawp nna, reng ai hpun palawng bu hpun ai masha la ngai mi hte, n tsawm ai hpun palawng bu hpun ai matsan mayan masha langai mi, nanhte a nawku jawng hta shang wa ma ai. 3 Shaloi, dai reng ai hpun palawng bu hpun ai wa hpe, nanhte hkungga ai hte hkap tau nna, Salang wa e, chyeju hte ndai lahkum hta dung nga u, ngu nna tsun myit dai. Rai tim, dai matsan mayan re ai wa hpe, Wo nang e tsap nga u; shing n rai, nye a lagaw nhpang e ga hta dung nga u, nga nna tsun myit dai. 4 Dai zawn galaw yang, nanhte a myit hta e masha ni hpe ginhka nna, n ding n man ai hku daw dan ai tara agyi ni tai wa myit dai.
5 Ngai tsaw ra ai hpu nau ni e, madat mara la mu: Kam sham ai sutgan hta lu su wa na hte, Karai Kasang hpe tsaw ra ai ni a matu shi madat da ai mungdan a sali wunli hpe hkam la lu u ga, Karai Kasang gaw mungkan ga a man e matsan mayan ni hpe lata la manu ai, n rai ni?
Ya hti ai gaw, Karai kasang a mungga rai nga ai.

KABU GARA SHIGA                                                                            

Marku 7:31-37

Ya hti na gaw, Marku a laika hta na Kabu  Gara ai Shiga rai nga ai.
31 Yesu gaw Turu ginwang de nna pru jang, Sidun mare hprang nna, Dekapoli ginwang ka-ang hku lai sa wa nhtawm, Galile nawng de sa du ai. 32 Shaloi na lahpang nna, ma-a ai masha langai mi hpe, shanhte Shi hpang de woi sa mu ai rai nna, dai wa a ntsa e lata mara ya na hpyi nem wu ai. 33 Yesu gaw shawa masha kaw nna dai wa hpe hkrai woi sa nhtawm, shi a na lashing hku layung shawn bang ai hte, mayen mahtaw nhtawm, shi a shinglet hpe mung ahtawk ya wu ai. 34 Shaloi Yesu gaw lamu de mada yu nna, dai wa hpe E-hpa-hta ngu nna madai let tsun wu ai: dai gaw, Hpaw wa u, ngu ai rai. 35 Shaloi jang shi a na hpaw wa ai hte, shi a shinglet lakung hpyan mat wa nna, ga dan dan tsun lu ai. 36 Dai lam kadai hpe mung n tsun dan mu ga, Yesu shanhte hpe ginhtim da ai; rai ti mung, Shi ginhtim da magang, shanhte grau nna hkai dan magang rai nga ma ai. 37 Shawa masha ni mung, nachying mau mat ma ai rai nna, Shi yawng mayawng hte hpe mai kaja ai hku galaw nga ai, na lahpang ai ni hpe na lu shangun nna, n chye shaga ai ni hpe ga tsun shangun lu ai, nga ma ai.
Ya hti ai gaw, Madu a Kabu Gara shiga rai nga ai.