2025: PRAN WAN LADAW LABAN (7) NA MUNGGA

“Prat hta tinang jaw ai daram, tinang bai hkrak lu la na re”
Ndai ga malai kaning nga mayu nga a ta? Lawu de na maumwi ni gaw ga malai a lachyum hpe htai ya lu na re. “Shut hpyit mara hpe shut hpyit mara hte matai n mai htang ai ngu na yu ai masha a ngawk langai mi a maumwi nga ai. Lani mi hta shi gaw “Buddha” hpe mu nna, kaja wa sha “Buddha” ndai shi sharin shaga ai hte maren nga sa ai kun chyam yu na myit yu wu ai. Dai la wa gaw “Buddha” hpe nga manga matsa mawa ga yawng hte marawn bun nu ai. “Buddha chyawm gaw myit galu kaba ai hte madat ya nga ai. Dai la wa tsun hpa ma mat ai shaloi, “Buddha” shi hpe tsun ai gaw; sha e, lama masha marai mi kaga wa kaw na kum hpa ni hpe hkap la na ning dang ai rai yang, dai kum hpa ni kadai kaw bai wa na rai? Dai la wa bai htai ya ai gaw, “Masha shagu chye nga ai, kum hpa dai ni, jaw ai wa hpang de bai wa na re” ngu wu ai. Sha e, nang ya sha ngai hpe matsa mawa ga grai jaw nit dai. Ngai na a kum hpa hpe hkap la na ning dang nngai, ngu bai htan ya ai. Dai la wa hpa n tsun lu sai.

“Buddha” bai kahtap tsun ai gaw, sari sadang rawng ai masha hpe shatan nhkan ga tsun ai wa gaw lamu de mayen mahtaw ai wa hte bung nga ai. Mayen gaw lamu de kap lu na n rai, Dai myiman de she bai nhtang wa na rai nga ai. Prat kaw nna lu la ai yawng gaw, prat de tinang jaw ai hte maren rai nga ai.

Daini na kabu gara shiga gaw tsaw htum ai Karai Wa a Kasha ni tai lu na matu anhte hkum shagu hta nga ra ai myit masin hpe shadum ya nga ai. Madu gaw anhte shinggyim masha ni a myit masin hpe grai mu chye nga ai. Tinang hpe tsaw ra ai ni hpe sha bai tsaw ra ai , tinang hpe madat mara ya ai, ndang kalang n tsun ai ni hpe sha hku hkau chye ai, dai zawn myit masa rawng ai ni manang wa hpe madat ya chye na matu, tinang manawn ai, n ju ndawng ai ni hpe tsaw ra daw jau na matu, “masha ni nanhte hpe hkan galaw na, nanhte tsaw myit ai hte maren, nanhte mung dai zawn shanhte hpe hkan galaw mu” nga nna tsun shadum sharin shaga nga ai. Tinang jaw ai mai kaja ai kum hpa gaw tinang teng sha bai lu la ai mai kaja ai kum hpa nan rai nga ai.

2025: PRAN WAN LADAW LABAN (6) NA MUNGGA

“Matsan ai”ngu ai shaloi, anhte gaw sutgan arai n lu ai masha ni hpe tsun ga ai. Kaja wa nga yang ndai zawn matsan mayan re ai gaw kaja ai lam nrai, yubak she rai nga ai. Ndai matsan mayan lam ni hpe anhte a lapran na shamyit kau ra ai gaw Hkristan shagu a bungli rai nga ai re. Shing rai yang, “matsan mayan ni a lu nga ai” ngu tsun ai shaloi, Yesu a myit hta hpa rawng a ta? Hpa lachyum tsun mayu ai rai ta?

Chyum Laika hta “matsan mayan” ngu ai ga si hpe lam amyu myu hku lang nga ai. Anhte chyena ga ai hte maren sutgan arung arai n lu ai ni hpe tsun mai nga ai. Hpa majaw nga yang, sutgan arai n lu ai majaw, shanhte gaw matsan mayan n gaw n hpra ai hte daru magam arawng aya n nga ai, matsan ai majaw dip sha hkrum nga ma ai. Sutgan arung arai n lu, garum shing tau ai lam n lu, makawp maga ai n hkrum re ai aten ni hta shanhte a kam shamyet myit gaw Karai Kasang kaw sha yawng rai nga ai.

Dai zawn Karai Kasang hta sha machyu shamyet shanat ai ni gaw “anhte matsan mayan ni a lu myit dai; kaning rai nme law, Karai Kasang a mung dan gaw anhte a mungdan rai nga malit dai” ngu Madu Yesu tsun hkrum ai ni rai nga ma ai. Dai majaw matsan mayen ai ni a lu ma ai ngu tsun hkrum ai ni gaw, shanhte a ngwi pyaw lam gaw Mungkansut rai hta sha n rai nga ai, ngu chye na ai ni rai nga ai. Karai Kasang gaw shanhte a ngwi pyaw sim sa lam hte yawng mayawng rai nga ai ngu kam sham ma ai rai nna, dai ni gaw kaja wa a lu ai ni rai nga ai. Madu Yesu “matsan mayen ai ni” ngu shaga ai ni gaw anhte kadai mung mai byin nga ai.

Anhte ya yang aten ladaw hta nkau mi sutgan arawng sadang n lu tim, kangka ai hku hkawm sa ai, katsi ai kaw na makawp maga na n lu ma tim, Karai Kasang jaw na hkam jan lu ai chyeju hpe hpyi nem ai, malu masha taw ai, kraw si hkrum nga yang Shi kaw asak ap nawng let n-gun atsam hpyi nem ai, machyi makaw hkrum yang ja gumhpraw n lu ai majaw tsi Sarawun de n lu sa tsi ai shaloi, Madu Shi a shamai shatsai ai hpe ap nawng hpyi nem ai, nta masha marai mi si wa jang Karai Kasang a matsan dum lama ai hte sumsing mungdan hta anga nga lu ai ngu kam sham ai, ndai zawm lam ni hta anhte gaw daini na kabu gara shiga hta na Madu tsun ai a lu ai ni rai nga ga ai.

2025: PRAN WAN LADAW LABAN (5) NA MUNGGA

Shagrit shanyem lu ai masha ni, Karai a man e tinang wa matsan mayan, n ging n dan ai, ngu, hkam la ai ni hpe Karai Kasang gaw laksan chyeju jaw nna shăging shădan ya ai. Karai a mungga hpe htawn shăna sakse hkam ya na matu Karai Kasang gaw yawng hpe saw shaga ai. Isaiah, Pawlu, nga hkwi masha Simon, marai masum hte tinang nang kungkyang ai, sharawng awng ai hta hkan nna prat a hkrun lam lata la let nga nga ai ni hpe Karai Kasang laksan chyeju jaw ya nna Karai a mungga htawn tsun ai ni tai wa lu ma ai. Isaiah, Pawlu, Simon_ marai masum hte gaw shanhte Karai a man e mara lu ai ni, n ging n dan ai ni re ai lam hpe myit dum ma ai. Karai Kasang gaw shanhte masum hte hpe laksan chyeju jaw nna shachyoi shapra ya ai. Laklai ai hku mung, Karai a saw shaga ai chyeju hpe hkam la lu ma ai. Isaiah gaw, “Ngai a shinglet n san seng ai, n san n seng ai masha ni a lapran e ngai nga nga nngai” nga ai. Pawlu tsun ai hta, Yesu shi hpe hkum hkrang madun dan ai lam, kadai n shadu ai aten hta shangai wa ai masha zawn (Kasa tai wa ai, yawng a jahtum ai Kasa tai wa ai hpe ngu ai), re ai lam tsun ai. Simon mahtang Yesu a matsun hkan nna sumgawn jahkrat dat yang sumgawn je mat na daram nga hkwi la lu ai majaw, “Madu e, ngai kaw na tsan tsan de sit mat u; ngai mara kap ai wa rai nngai”, nga ai.

Karai Kasang a shangun ma tai ai ni, tinang nang a prat hpe ap nawng dawjau ai ni yawng gaw ninggun kya ai masha ni rai ma ai. Shanhte hta ra rawng ai lam ni mu jang shatan jahpyak chye ga ai. Gawng kya ra rawng ai ni rai ninglen, shanhte hpe Karai e shangun lang ai lam hpe myit dum ra ga ai. Sasana hta ap nawng dawjau ai ni yawng mung, tinang nang n ging n dan ai wa re ai lam hpe yin la, shagrit shanyem ai myit hte ap nawng dawjau ra ai lam hpe shadum ya ai. Lam mi mung, hpa kaning re ai kanbau amu mi galaw nga ai rai tim, Karai Kasang gaw langai hpe saw shaga ai, Karai Kasang a mungdan a matu, tinang a machye machyang, kanbau bungli hta hkan nna sasana amu hta ap nawng ya mai ai lam hpe mung shadum ya ai.

Tinang n myit mada ai aten, myit mada ai shara hta, n myit mada ai mabyin hku nna mung, Karai Kasang gaw langai hpra hpe alak rai saw shaga chye ai. Laklai ai chyeju lu la nna ja/lungseng awng ai rai na kun, ja hpaga sum mat ai kun, arawng aya kaja lu la ai rai kun, arawng aya kaw na jahkrat kau ai hkrum na kun, machyi makaw hkala nba hkrum ai mi rai na kun, maigan de bungli sa galaw na ahkang lu la ai mi rai na kun, awng ai, sum ai, yawng hta Karai Kasang saw shaga ai lam tai lu ai. Isaiah zawn, “Madu e, ngai hpe shangun rit” ngu htan ya mai ga ai. Sawlu gaw gumra kaw nna hkrat mat ai hte myi n mu mat ai; shaloi, shi shaga la ai lam ningnan lu la ai. Simon gaw n dum shami nga hkwi nga yang, nga n lu ai majaw myit ru nga ai aten hta nga law law lu nna kabu awng lu ai hta, shaga la ai lam ningnan lu la ai.

Yesu gaw Simon hpe tsun ai, “Ya kaw nna nang gaw masha hkan hkwi ai wa tai lu na” nga ai. Dai ga na jang Simon gaw lu mi lu hpe kau da nna Yesu hpang hkan nang ai, nga ai. Simon zawn hkan galaw lu ai ni law law nga ma ai zawn, tinang galaw nga ai amu makan, sut lu nga mai ai lam ni hpe tawk hprut jahka da ai mi n galaw lu ga tim, tinang galaw nga ai magam bungli hku nna, lu lawm ai ja sutgan hku nna, “Madu e, ngai hpe shangun rit” ngu htan ya mai ga ai.

2025: PRAN WAN LADAW LABAN (4) NA MUNGGA

“Mawshe a Tara matsun hte maren, Yesu a kanu yan kawa gaw kasha alat hpe Yerusalem Nawku Htingnu e Karai Kasang kaw sa ap ya ma ai; kaning rai nme law, kasha alat shagu hpe Madu Karai Kasang a matu shachyoi shapra nawng da nna, tara matsun hte maren hkungga nawng ya lu na rai” nga ai. Yesu a sape ni yawng mung, tinang nang a hkum hpe adum sha rai, Kasang hpe ap ya ra ai lam rai nga ai.

Shadang sha alat (Ma Gam) shagu hpe nhtoi ladaw gu jang Karai Kasang kaw na bai mari la ra ai. Sagu bainam nga dumsu alat shagu hpe mung tara matsun hte maren bai mari la ra ai. Shing n di lu jang, dusat a du manai daw kau ya ra ai. Shawng shawng na Paska hta Egyip mung ting masha alat yawng, shawng lat ai dusat shagu sat kau hkrum ma tim, Israel nta ni hta chyinghka e sagu sai chya da ai rai yang, lawt lu ma ai. Dai mabyin hpe shadum ya ai. Yesu a sai hte hkye la hkrum ai ni yawng gaw kasha alat tai wa shajang ga ai; Yesu a hpu nau ni tai wa ai majaw (Hebre Laika), sut-li kumhtaw dagraw hkam la na ni tai wa ma ai.

Yesu hpe chye chyang kamsham hkap la ai ni a matu gaw hkye hkrang la hkrum na rai ma ai. N kam n sham ai ni a matu, Yesu gaw myit kataw hpa tai wa na ra ai. Yesu hpe Htingnu e sa ap ya ai shaloi, Wenyi e shadut ai hte maren, Simeon gaw dai lam hpe tau tsun ai. Num myihtoi Anna mung ma Yesu a lam hte seng nna sakse hkam ya ai. Marai lahkawng a sakse hkam ai ga gaw kang ai, teng ai lam rai nga ai. Hkye hkrang la ai lam hpe myit mada ai ni yawng a matu, masha tai wa ai Yesu hpe kamsham hkap la ra ai. Yesu gaw shi a hkum shan hpe wudang ntsa e jen noi si hkam ai hku nna hkungga nawng ya na, shi a hkum Karai Kasang hpe tup hkra ap nawng ya na lam, Hebre Laika hta tsun da ai.

Ma shangai ai hpang aten n sharen ai sha, kanu kawa gaw ma hpe kashin kamun hkam la lu hkra lajang ya ra ai lam Nawku Hpung e matsun ai. Dai gaw, Karai Kasang hpe ap ya ai lam re: Karai a kasha shatai ya ai, kasha alat shatai ya ai lam rai nga ai. Kashin kamun hkam la sai ni yawng, Karai a kasha ni tai wa nna, “kasha alat” ngu ai arawng hte sari sadang lu la ai rai nga ai. Madu majing gaw Karai Kasang re ai lam hpe shadum ya ai. Anhte hpa mi galaw law, Madu langai hpe sha madung shatai galaw ya ai, dawjau ap nawng ai lam rai nga ai. Tinang galaw ai amu shagu, Karai a matu, mai kaja ai amu hpa mi galaw tim, Madu re ai Karai Kasang a matu galaw ya ga ai. Tinang nang a prat hkrun lam hte amu bungli ni, yawng gaw Karai Kasang a matu rai ra ai hpe myit dum ra ga ai. Kashin kamun a marang e, tinang nang a asak aprat, galaw ai amu yawng Karai Kasang hpe ap ya shakut ra ga ai. Kaba grau dik ai gaw tinang a hkum hpe nyet kau nna asum hkam ai amu ni, machyi hkam ai amu ni galaw ai rai yang, myit masin hkum hkrang hpawn ap nawng ya ai lam rai nga ai. Yesu a ap nawng ai lam gaw myit masin hkum hkrang tup hkra hte Karai Kasang hpe ap nawng dawjau lai wa ai; wudang ntsa e jen noi si hkam ai lam gaw sakse rai nga ai.

2025: PRAN WAN LADAW LABAN (3) NA MUNGGA

“Amyu sha ningbaw Nehemia, Jau Ezra, jaiwa ni, hkinjawng ni gaw shawa masha ni hpe myit jasu shadum jahprang nga ma ai rai nna, tsap let Karai a mungga madat nga ai ni gaw myiprwi si hkaw ma ai”

Babylon mungdan kaw shaning law law mayam tai mat ai amyu masha ni tinang a buga de bai du wa ai hpang, shawa hpawng a man e Moshe a Tara Jahprang Laika hpe hti dan ai. Karai a amyu sha ni tara n hkan ai majaw tsin-yam krum sha ma ai lam, mayam shătai hkrum ai lam, shanhte a shut hpyit mara a majaw re ai lam, yin la ma ai. Karai e matsan dum myit san san hte bai lawt wa lu ma ai lam, Karai a mungga hpe hkap madat hkan shatup ma ai rai yang, Karai Kasang a makawp maga bausin ai chyeju hkam la na lam hpe chye na la ma ai. Kabu ai, yawn ai, chyeju dum ai myit hte myiprwi si hkrat ma ai, nga ai. Moshe hta grau ai wa, Yesu hkum nan tara jawng hta shi hpe shăang da ai chyum mungga hti dan ai. Hti ngut jang shawa masha ni hpe tsun ai, “Nanhte madat nga yang Chyum mungga ndai gaw dai ni nan dik wa sai” nga ai. Myihtoi Isaiah tau tsun da ai “Hkristu/ Sau Chya Hkrum ai Wa” gaw Yesu shi hkum nan re ai lam hpe tsun hpaw dan ai. Karai e prat shagu na masha ni hpe jaw da ai ga-sadi dik wa sai, nga ai. Dai majaw, “Kabu Gara Shi-ga” ngu tsun ai. Hti ngut jang mung, “Hkristu hpe chyeju dum shakawn ga ai” ngu htan ya ga ai.

Madu Yesu a hkye hkrang la ai amu, mara raw shadat ya ai amu, Chyoi Pra Wenyi kumhpa, shamai shatsai ai chyeju, shada hpe kahkyin gumdin ya ai chyeju,… Sakramentu 7 hku nna kamsham ai masha langai hpra hpe shachyoi shapra ya ai, shalan shabran ya ai, tsawra chye ai myit masin hte shada galung kahkyin wa lu ai…kaba dik ai hkye hkrang la ai chyeju kumhpa ni rai nga ai. Marai lagnai hpra mung Hkristu a hkum hkrang na adaw ashan tai wa shajang ai. Mauhpa tsawra kahkyin shabawn nga lu ai lam n rai a hka?

Karai a mungga hti dan shagu, Kabu Gara Shi-ga hti dan shagu, myit malai lu na lam saw shaga ai, kabu ninggu lu na lam, prat a matu myit mada lu ai lam, shing re ai chyeju kumhpa ni hpe jaw ya ai: azi madat ga ai kun? Azi madat hkam sha nna tinang a myit masin kraw lawang hta bang sharawng da ai rai yang, dai mungga gaw tinang a adaw ashan tai wa na rai nga ai. Chyum mungga hti dan shagu, hkam sha ai myit hte madat la ga ai kun? Chyeju dum shakawn ai myit pru wa lu ga ai kun?

2025: PRAN WAN LADAW LABAN (2) NA MUNGGA

“Shi tsun mi tsun hkan galaw mu!” Yesu a kanu Maria gaw makam masham asak mahkrun hta kaja dik ai kasi madun dan ai, Yesu a kanu rai ninglen, Yesu a shawng shang na sape kaja mung re ai lam chye lu ga ai. Ruyak kyindut hkrum ai aten hta garum ya chye ai kanu, kamhpa mai ai kanu re ai lam hpe mung sharin la lu ga ai.

Isaiah a laika hta Karai Kasang gaw shi a amyu masha ni hpe n kau da na lam, Yerusalem hpe kalang bai gaw sharawt na lam, Karai Kasang hkum nan shi a amyu masha hpe bai hkungran la na lam tsun ai. Masha amyu baw shagu mung, Karai a mau-hpa amu ni hpe mu lu nna Shi a hpung shingkang hpe mu lu na ma ai lam tsun ai. Yesu shi galaw dan ai mau-hpa lamik kumla ni hta shawng na lang madun dan ai gaw Hkanan Mare na hkungran poi hta re ai lam, San Yawhan ka da ai. Dai mare na hkungran poi de Yesu hte kanu, lahkawng yan shaga da hkrum ma ai. Kanu Maria gaw poi a matu ra ai amu ni hpe garum na matu du nga ai rai ang ai. Yesu gaw dai poi de du sa ai a marang e, hkungran poi hpe shachyoi shapra ya na matu du sa ai rai nga ai. Yesu gaw shi gawde na ra ai Nawku Hpung hte hkungran la na la ningnan re ai lam hpe mung shadum ya ai.

Poi langai galaw yang shat lu-sha hkrak jang, yawng e hkru kat hkra sha lu jang sha poi pyaw ai. Poi madu hku nna mung arawng lu mai ai baw rai nga ai. Hkanan hkungran poi hta sabyi chyaru ma mat ai majaw, hpajau hpala ni mahtang grai myit ru na ma ai. Kamying kamawng n byin shi yang poi madu, la ningnan kaya n hkrum na matu Maria gaw kasha Yesu hpe tsun dan garum hpyi ai. Maria mahtang kasha Yesu hkye la lu ai lam, Kasha gaw Karai a Kasha majing re ai lam hpe kamsham ai. Chyalai atsam rawng ai wa re ai lam hpe kam ai. Kanu e hpyi lajin jang kasha wa ningdang kau na n re ai hpe mung kam ai. Yesu gaw shi lamik kumla galaw dan na aten rai n du shi ai lam tsun ai. Rai tim Yesu a kanu gaw hpajau hpala ni hpe tsun ai, “Shi tsun mi tsun hpe hkan galaw mu!” nga ai. Hpajau hpala ni mung Yesu matsun ai hte maren yam kaba kru kaw hka jahpring bang ma ai. Dai hpang shanhte hpe tsun ai, “Hpajau hpala ningbaw wa hpe sa jaw mu” nga ai. Hka gaw sabyi chyaru tai mat ai; mu grau ai tsa mung tai wa ai. Kun dinghku hta ra kadawn dumhprut ai lam ni law law nga ai. Nu Maria hku nna Kasha kaw akyu hpyi htinglu ya na lam kamhpa mai ga ai.

Yesu gaw Karai a Kasha majing re ai lam hpe shadan dan ai. Dai lam hpe shawng kamsham ai wa mung kanu hkum nan rai nga ai. Shi kanu e hpyi lajin jang kasha wa gaw ningdang kau na n re ai lam hpe mung hkrak kam ai. Dai majaw, Maria gaw makam masham a kasi kamang nan rai nga ai. Yakhkak jamjau hkrum ai ni hpe garum ya na myit kaba ai wa rai nga ai. Yesu a kaja dik ai sape mung re ai lam hpe sharin la lu ga ai. “Kanu” ngu ai arawng sadang hta jan nna kuptsup ai sape re ai lam hpe San Luka ning nga ka da ai: “…. Grau nna, Karai Kasang a ga hpe madat ai hte hkan shatup ai wa gaw a lu ai” nga ai. Kuptsup ai sape re ai lam hpe madi ai rai nga ai. Kaja dik ai sape re ai majaw mung, Kasha hkam la ai nni nkri hpe rau hkam la ai; kasha hpe wudang ntsa jen sat ai shaloi kanu gaw hkan sa ai. Yesu sumsing lamu de lung wa ai hpang mung, Kasa ni hpe, shawng shawng na sape ni hpe kanu tai ya lai wa ai.

 Ra kadawn dumhprut wa ai aten hta Yesu kaw dingtawk akyu hpyi shakut ga ai kun?
 Bukda, Hindu, Miwa… makam masham hpung kaba ni hta nat hpra
ngu ai sumla, medaw maya, ngu nna kamhpa akyu hpyi ma ai. Dai hpa hpe shadum ya ai rai ta?
 Yesu a sape kaja tai lu na matu kanu Maria a kasi ni hpe sumru yu yu rai ninggun la chye ga ai kun?

2025: YESU KASHIN KAMUN HKAM AI POI SHANI MUNGGA

Yesu gaw Karai e shangun dat ai, Karai a shangun ma re ai lam Chyum mungga masum hte madi madun ai. Dinghta ga ntsa, Karai Kasang a hkye hkrang la ai amu hpe tup hkra madat mara galaw shatup ai shangun ma re ai majaw, hkye hkrang la ai kaw du lu na matu, dai Karai a shangun ma hpe madat mara ra ga ai. Karai a shangun ma gaw Yawhan Baptista a lata kaw na Kashin Kamun hkam la ai; dai ngut jang sasana magam galaw hpang na rai nga ai.

Isaiah a laika hta ka da ai “Karai a shangun ma” gaw hkrak kadai hpe madi ai, Israel amyu ting hpe kun? Shawng shawng e nga lai wa ai myihtoi/ hkawhkam langai ngai kun? Karai a sau chya hkrum ai hkawhkam wa du na kun, gara hku du na kun? Ngu ai lam hpe hkrak asan sha n chye lu ga ai. Dai “Karai a shangun ma” gaw teng sha Yesu hpe sha-ang ai lam, Nawku Hpung e mahtai jaw ai. Noah a prat hta shut hpyit mara htat ai shinggyim masha ni hpe ari dam jaw ai; mungkan mara hpe hka hte kashin kau ai. Dai hpang uhkru-du gaw sanlun matsun makrang nna asak ningnan bai hpang sai lam, Noah hpe kumla wa jaw ai. Moshe a prat hta Karai a amyu masha ni gaw Panglai Hkyeng hpe rap tawng nna lawt kawt wa lu ma ai; hpyen ni gaw dai panglai hta lim si mat ma ai. Yawhan Baptista e jaw ai kashin kamun, myit malai ai kumla rai nga ai. Dai mabyin ni yawng, Yesu shabyin ya na Kashin Kamun Sakramentu a matu hkyen lajang ai lam ni rai nga ai.

Isaiah laika hta tsun da ai, Karai Kasang gaw shi a Shăngun Ma hpe Wenyi jaw ya nna dingman dinghpring ai hte maren Karai a mungdan a lam hkaw tsun na ra ai, nga ai. Yesu kashin kamung hkam la ai aten hta sumsing lamu chyinghka hpaw malang wa ai, nga ai. Dai hpang, Chyoi Pra Wenyi shi a ntsa e uhkru-du hkrang hku yu hkring ai, nga ai. Myihtoi wa e tsun da ai ga gaw Yesu kashin kamun hkam ai hta dik wa ai. Sumsing lamu hte ginding a-ga matut mahkai na lam hkrang wa ai. Shut hpyit mara hte ningsin chyip re ai mungkan ga hpe Karai Kasang matsan dum nna Yesu hta htinglu htinglai lu na lam tai wa ai. Dai majaw, Yesu kashin kamun hkam la ai lam gaw hkye hkrang la ai labau, Karai a masing hta ahkyak ai mabyin langai rai nga ai. Yesu shi hkam la lu ai Wenyi hte hpang e shi gaw kamsham ai ni hpe dai Wenyi n-hpaw n-ya jaw ya na rai nga ai.

Yesu gaw Karai a shangun ma tai nna shinggyim masha ni hpe dawjau lai wa ai. Kawa a myit ra ai lam ni hpe shatup ya ai. Kasa laika hta mung, Yesu gaw Chyoi Pra Wenyi e sau chya ya hkrum ai Wa rai nna, mai kaja ai amu law law (hkye la ai amu ni) galaw lai wa ai sakse ni nga ai lam, Kasa Peteru shadum ya ai. Karai Kasang hpe hkrit hkung ga ai myit hte dinghpring ai tara hkan ai ni yawng mung, Karai Kasang shărawng awng ai masha ni tai wa ma ai lam, sakse hkam da ai.

Yesu a sape shagu mung, dinghta ga e masha tai wa ai a yaw shada madung gaw Karai a nchyang mayam/shăngun ma tai na matu re ai lam hpe myit dum ra ga ai. Karai Kasang a mungdan gawgap ai lam hta tinang nang hpe Karai e gara maga hku shang lawm akyu jăshawn mayu ai lam hpe tam la ra ga ai. Karai e gara hku mi shaga la hkrum ai rai tim, yawng bung ai lit gaw dinghpring chyoi pra ai, yawng hpe tsawra dawjau ai, tengman ai tara hpe hkan shatup ai amu ni rai nga ai. Yesu gaw kuptsup dik htum ai Karai a shangun ma re ai lam, shi galaw ai amu ni, shi hkaw tsun sharin shaga ai lam, shi a prat mahkrun hta nan adan sha mu lu ga ai. Shi hkum nan Kawa e shangun ai amu ni hpe ra n rawng ai hku hkan galaw ai zawn, sape ni hpe mung matsun ai, “Yawng hta grau mayu ai wa gaw yawng hta kaji grau ai wa, ngu, myit la nna yawng hpe dawjau ai wa tai lu na” nga ai. Dai majaw, “Ngai hpe Madu e, ngu shagu sumsing mungdan de shang lu na n rai; sumsing lamu e nga ai Wa a myit ra ai lam hpe hkan shatup ai ni chyu sha, Karai a mungdan de shang lu na” nga ai. Kawa Karai Kasang e matsun ai, “Shi a ga hpe madat mu” nga ai.

2025: HKAWHKAM MASUM POI SHANI NA MUNGGA

Ehpesu Laika hta tsun da ai, "Karai Kasang e gran da ai masing, shawng shawng na masha ni n chye lu ai lam ni hpe, ya, Kasa ni hte myihtoi ni hpe shadan dan sai; makam masham a shinggan na maigan masha ni, Yesu Hkristu hta, Jew/ Israel amyu sha ni hte rau sutli kumhtaw jawm dagraw hkam la na ma ai...." nga ai. Hkawhkam marai masum ngu tim hpaji kunghpan ai masha marai masum a lam she re. Karai Kasang e hpaw madun dan ai lam, mungkan ting hpe uphkang ai hkawhkam ni a Hkawhkam Bethlehem kaw shangai wa sai, ngu ai lam hpe shagan a hpang hkan nang ai ni mu tam la ma ai. Dai zawn hpaji rawng ai, Karai Kasang hpe tam ai ni re ai majaw, shanhte hpe hkawhkam masum, ngu nna shagrau ya ai lam re. Karai Kasang e shadan dan ai lam hpe hkan tam ai ni, Karai e shabyin ai amu nlang hte hpe hkap la ai ni yawng mung, "hkawhkam" ngu ai arawng aya lu mai ai lam shadum ya ai.

Isaiah Laika hta tsun da ai lam, Babylon e mayam tai ai kaw nna bai lawt wa ai Israel amyu masha ni, Yerusalem Nawku Htingnu de lung kawan ma ai lam tsun da ai. Mungkan ga gaw awu asin hte hpring ai, ningsin e ka-up da ai mungkan re ai lam; Karai e shadan dan ai Ninghtoi kaba hpe gale amyu masha ni mung mu lu nna, amyu baw shagu Karai Kasang hpe nawku dawjau lu na lam tsun da ai.

Mahte gaw, shawng shawng na myihtoi ni tsun da ai ga, grau nna Isaiah Laika hta tsun da ai ga gaw shangai chyinghkai wa ai, dai Hkristu Yesu hta teng sha dik wa sai lam hpe tsun hpaw dan ai. Yesu hta madun dan ai, Karai shi a hkum hpe shi shadan dan ai lam gaw masha amyu baw shagu a matu re ai lam hpe sharin ya ai. Bai, hpaji ninghkring marai masum, Karai Kasang galaw ai amu hpe hkan tam ai ni hte tai shai nna, hkawhkam Herod gaw, gumrawng gumtawng ai majaw, Karai Kasang e shabyin ai amu hpe ningdang nyet kau ai. Herod gaw, tinang a machye machyang, arawng aya, ja gumhpraw hpe manoi ai, matsan dum n chye ai, Karai Kasang nan madun dan hkra rai tim n hkap la lu ai majaw, dai asak Madu jaw ya mayu ai asak a chyeju ni hpe tat kau nu ai.

Anhte a prat hta Nuclear majan byin lu na madang tsaw jat wa nga ai hpe dum mai ga ai. Nuclear majan byin jang, mungkan hpa byin wa na ta? Wan galip hkrup ai ni, nsa hkra ai ni yawng hkru mat, si mat na rai nga ai. Wan hte nuclear sama hte tsan ai mungdan hkan na masha ni ana zinli hte si jawng na ma ai. Nsa n hkra lu ai, tsan gang ai mungdan ni hta hpa byin na ta? Mungkan ting hpe nuclear wanhkut hte kă-up da ai majaw, shaning hti nna mungkan ting sinchyip mat na. Mungkan ting jan hte ninghtoi n lu ai majaw, dinghta ga kătsi ge nna hpa mung hkai sha n mai ai majaw…. “Ngut sai!” ngu ai kaw du mat na rai nga ai. Kadai kaning re ai mungdan ningbaw ni, kaning re ai hpaji ninghkring wa a sharin shaga ai, kasi madun ai, tsun ai ga…., hpe kam lu na, madat ya lu na rai ta? Mungkan mungdan ningbaw ni tai shai hkat nna hkrai kanawn mazum nga ma ai. UN uhpung mung lam shagu hta kam hpa n mai wa nga ai, ra rawng hkrat sum ninggun kya wa nga ai. Kadai masha wa yawng e kam mai ai ninghtoi tai ya lu na rai ta?

Hkristu Yesu gaw Ninghtoi majing rai nga ai; Gintawng Shagan majing rai nga ai. Sumsing mungdan de mătut bu hkawm ai hkrun lam hta, dai ninghtoi a lam madun ai hpe hkam la ra ga ai. Ndai dinghta prat hta sinchyip, sinmak rai, ruyak jamjau hkrum ai, machyi makaw hkrum ai, accident hkrum ai, myit daw myit kaji hkrum ai,…. tinang hta byin wa ai mabyin ni hpe n chye na ai majaw ung ang ai, mungkan ting mung manghkang ni law la nga ai. Ndai zawn byin nga ai ndai dinghta prat hta teng sha, Yesu Hkristu a matsun madun ai lam ra kadawn ga ai.

Tinang hkum hpe shagrit lu ai hte tengman ai lam hpe hkan tam ai ni (hpaji rawng ai masha marai masum), dumsu wa-kang hta taw nga ai ma hpe mu nna kamsham lu ai ni (matsan ai sagu rem nchyang ma ni) sha, Karai e shagrau ya na hkawhkam aya hkam la shajang na rai ma ai. Mungkan ja sutgan marin, gumrawng gumtawng ai ni, mungkan arawng aya nga-mu nga-mai lam hpe hkrai tam ai ni, dai Ninghtoi hpe n lu mai ai. Karai e madun dan ai mau-hpa hkye hkrang la ai chyeju kumhpa ni hpe n tam, n hkam la kam ai ni, dai Ninghtoi hpe n mu lu ma ai. Karai Kasang hpe kraw, sin kata kaw na hpang gara ai myit hte hkan tam ai ni sha, Karai Kasang shabyin ai amu ni hpe masat hkap la lu nna, “Hkawhkam kasha ni” ngu ai arawng sadang shagrau ya ai hpe hkam la lu na rai ma ai.

Anhte law mi law, Hkristan makam masham hpe n tam ai sha lu la ga ai; kanu kawa kaw na lu ai ni she law ga ai. Kashin kamun sakramentu a marang e hkam la lu ai shaman chyeju ni a jaw e, kanu kawa hpe mung, Karai Kasang hpe mung, kade lang, gara hku chyeju htang ga a ta?

Kashin kamung hkam la lu ga ai majaw, shaga la hkrum ai lit madung nga ai; mungkan masha ni hpe ninhtoi jahtoi ya na lam re. Kasi kaja madun ga ai kun? Masha ni hpe myit kataw shangun ai ningsin mahtang tai kau ai kade lang she rai ga ta?

Prat hkrun lam hta ningsin chyip, nga ai gam maka hkrum katut wa ai aten ni hta, gara hku sharai la lu ai lam ni hpe shada gam garan ya mai ga ai.

2024: CHYOI PRA AI HTINGGAW POI NA MUNGGA

Josep yan Maria gaw kasha hpe, “Sha e, nang hpa majaw an (kanu kawa) hpe shing di a ta?” ngu ma ai. Yesu gaw, “Nan hpa majaw ngai hpe hkan tam mi ta?” ngu, htan ya ai. Kanu kawa hte kasha ni a lapran chye na hkat na yak ai aten law law nga chye ai. Shada chye na lu hkra shakut ra ai hte (Kolose), n chye na ai lam ni hpe Maria zawn (Luka), kraw hta kyem da nna Karai a lata hta ap ya ra ai lam sharin la lu ga ai.

Phone/ face book n nga ai prat, Josep yan Maria kasha mat mat ai majaw, kade tam kyin kau na ma ai hpe shingran hku mu lu na ga ai. Tsam mari tam mu nna “Hpa majaw an kanu kawa hpe n tsun ai nga hkawm a ta?” ngu ai zawn, kasha hpe san dat yang kasha gaw n ra n ra rai, “Nan hpa rai ngai hpe hkan tam mi ta?” nga, ga tap tap ngu htan ya ai zawn she rai nga ai: “Ngai gaw Wa a amu hta kyin taw nga ra ai lam nan n chye mi ni?” nga ai. Ndai yang, shan kanu kawa hta grau ai Wa, Karai Kasang a amu hte seng nna tsun ai lam dum ma ai majaw, shan kanu kawa hpa n tsun ma nu ai. Rai tim, Ma Yesu gaw dinghta ga na kanu kawa a ga hpe mung madat ra ai majaw, Nazareth Mare de hkan nang wa nna, kanu kawa a renghkang ai npu e kaba wa ai lam, San Luka ka da ai.

Yesu a ma prat labau kaga Kasa ni n ka da ma ai; Luka mung grai kadun ai hku sha ka da ai. Ndai mabyin a lam kadai mi tup hkrak mahtai n jaw lu ai majaw, rosary mungsung ga-sung langai hku myit sumru akyu hpyi lu na lam, Nawku Hpung e matsun da ai. Josep hte Maria, kasha Yesu a lam grau chye na lu hkra sumru yu ra ma ai, hkaja la ra ma ai. Karai e shabyin ai amu, shan hta grau ai Karai a Kasha majing re ai lam, masha majing mung re ai lam, matut hkaja ding-yang rai na ma ai. Yesu mung kaga shinggyim masha ni zawn sha, gawng grawng wa nna machye machyang mung jat wa ai, nga nna Luka ka da ai. Shanhte masum hte shada a lapra kanawn mazum lam, sharin la, hkaja la ra ma ai. Marai masum hte mung Karai Kasang a yaw sing ai amu ni hpe chye na lu hkra shakut ra ma ai. Yesu gaw masha majing mung re ai majaw, anhte zawn sha, Kawa Karai a myit mang yaw shada ai lam hpe tam la ra ai, chye na lu na matu sumru akyu hpyi let mahtai tam la ra ai. Kanu kawa yan hte kasha ni a lapran, kun dinghku langai na nta masha ni a lapran, kanawn mazum ai lam hta langai hte langai hta rawng ai atsam marai ni, mai kaja ai, kamhpa mai ai ningli ningja ni nga ai zawn, langai hpra hta ninggun kya ai lam ni mung law law nga ai hpe mu mada lu na ga ai. Shada a lam grau grau chye na lu hkra, maram hkaja la ra ga ai. Shada sharin achyin hkat, lam matsun sharai ya hkat ra ai lam, myit galu hkam sharang hkat ra ai lam, kanawn mazum lam hta tsawra myit gaw akri madung re ai lam, Kolose laika hku nna shadum ya ai. Bai, dinghku hta rau nawku akyu hpyi ra ai lam hpe mung matsun ya ai.

Makam masham hta htep lahti n re ai dinghku ni hten bya na loi laai. Dinghku hta kade yakhkak jamjau ai rai tim, makam masham ngang kang nna lam shagu hta Karai e sing da ya ai prat a maka hpe chye na hkap la lu ai rai yang, shada tsawra kahkyin gumdin nga lu na rai nga ai. Hten bya nga ai dinghku ni hpe garum ya na shakut ga ai kun? Dinghku shada kawan katsan ninggun jaw hkat ai lam galaw ga ai kun? Shakut sharang akyu hpawng man man sa shakut ga ai kun? Shada ya sha sha hkrum jahta hkat, ninggun jaw hkat na ahkyak dik ai lam hpe mung myit dum mai ga ai.

2024: ADWENTU LADAW LABAN (4) NA MUNGGA

“Madu e shi (Maria) hpe jaw da ai ga-sadi dik wa na lam hpe kam ai numjan gaw a lu ai” nga, Elizabeth gaw Maria hpe tsun ai. Shan lahkawng yan ma-hkum hte rai ma ai. Lahkawng yan hta byin ai amu gaw Karai Kasang kaw na re ai, prat hte prat Shi jaw lai wa ai ga-sadi hpe shadik ya nu ai. Mika adan rai tsun da ai myihtoi ga gaw ndai re: Karai Kasang shi a masing kaba awng nan awng na, teng nan teng wa na, nga ai re. Israel myu sha ni shadu ai gaw hkye hkrang la ai lam shanhte a matu sha rai na, ngu, myit la ma ai. Mikah a matu, messiah up reng ai ladaw du ai shaloi, Israel masha ni a matu sha n rai, Karai Kasang hpe san seng ai myit hte nawku kam sham ai; bai, rap-ra tara hpe hkan shatup ai ni yawng, Messiah up reng ai npu na masha ni tai wa na ma ai. Messiah up reng lu ai aprat hta ngwi pyaw simsa ai lam mungkan ting a matu rai na, nga ai. Hkristu hkum nan “simsa ai wa” rai na, nga ai.

Maria yan Elizabeth, lahkawng yan gaw prat hte prat ban hte ban, myihtoi ni tsun da ai Karai a ga-sadi hpe kam ma ai, Karai Kasang hpe tup hkrak kamhpa ai, shagrit shanyem ai yan rai ma ai. Shan gaw alak rai arawng aya lu ai, myi-man pa ai htinggaw aru arat kaw na n rai ma ai. Rai tim shan hta byin wa ai lam, laksan Karai Kasang shan hpe lăta la nna, Karai a hkye hkrang la ai masing hta lawm wa ai lam hpe shan kamsham hkap la ma ai; kabu chyeju dum shăkawn ma ai. Maria gaw reng dik htum ai ma, Hkristu a kanu tai na she rai tim, masha a ningmu hta grit grau ai gumgai Elizabeth hpe sa hkrum ai; garum ya na matu rai nga ai. Dai majaw Maria hpe hkrum ai hte Elizabeth tsun ai, “Madu a kanu ngai hpe sa kăwan ai, ngai hpa wa gingdan a ta?” ngu, grit nyem ai myit hte hkap bawp la ai. Ga dai na jang Elizabeth a hkriwang na ma, Yawhan gaw kabu ai majaw gumlawt ai, nga ai.

Karai Kasang maga ra n rawng, kangka ai; Shi a ga-sadi n hprai ai.

“Madu e shi (Maria) hpe jaw da ai ga-sadi dik wa na lam hpe kam ai numjan gaw a lu ai” nga, Elizabeth gaw Maria hpe tsun ai. Elizabeth shi hkum hpe mung shăang nna tsun ai, ngu, tsun lu ai. Shan lahkawng yan, Karai a amyu ting hte rau, Karai Kasang a hkye hkrang la ai lam hpe myit mada a la nga ma ai. Lahkawng yan hta byin ai amu, Karai Kasang kaw na re ai lam hpe hkap la ma ai (Maria gaw mahkawn kasha, hkawn zin/ Elizabeth gaw gumgai maudaung).

Anhte a aprat aban, shara ginra, labau, shani shagu na mahkrum madup ni, manghkang ni a lapran, galoi mi lawt lu? Kadai e sa hkye la na? Galoi mi simsa wa na? ngu nna hkam sha let, kamsham myit mada ai lam hkrat sum hkraw hkyet wa chye ga ai. Karai Kasang a hkye hkrang la ai amu, prat ban shagu na masha ni a matu re ai; masha amyu shagu a matu re ai lam, chyum mungga ni hku nna shadum ya ai.

Maria hte Elizabeth, shan hta byin ai amu laklai ai lam, Karai e shabyin ai amu re ai lam hpe kam ma ai. Tinang nang a prat hta Karai e laksan chyeju jaw ai lam ni hpe myit dum ga ai kun? Laklai ai hku awng dang wa ai, ja/lungseng awng ai, hpaga awng ai, arawng aya shagrau sharawt hkrum ai,…. shing re ai aten ni hta Karai e ahkaw ahkang jaw ai, shabyin shatai ya ai, ngu, chye hkam la ga ai kun? Machyi kaba hkrum ai, hkala nba hkrum ai, tsin-yam hkrum ai,… shing re ai aten ni hta mung Karai e laksan ahkaw ahkang jaw ai, shagrit shanyem lu na matu, Karai Kasang hpe grau kamhpa shamyet shanat na matu ahkaw ahkang jaw ai, ngu, hkam la chye ga ai kun?

2024: ADWENTU LADAW LABAN (3) NA MUNGGA

Shawng na bat hta, “Myit malai lu nna Madu a matu hkrun lam lajang mu!” nga ai. Ndai Laban hta gaw masha ni san ai, “Anhte hpa galaw ra na rai ta?” nga, san ma ai. Myit malai ai lam a kumla ni hpa hpa galaw ra ai lam hpe tsun ai rai nga ai. Yawhan Baptista a mungga hta du sa maw ai Madu a hkrun lam hpe lajang ai ni myit malai ai kumla kashin kamun hkam la ma ai. Myit malai n lu ai ni jeyang ai hkrum na lam sadi jaw ai. Shaloi masha ni gasan san ai hta myit malai lu nna hkye hkrang la hkrum na matu tatut hkan galaw ra ai amu ni a lam san ma ai. Yawhan htan tsun ai ga hpe gumhpawn dat yang, rap-ra tara hte masha shada matsan dum hkat ra ai lam, lahkawng yan hpe shatup ra ai lam rai nga ai. Anhte prat, anhte a ban na masha ni “right” ngu ai, hkam sha lu ai, hkam sha ang ai ahkaw ahkang ni a lam grai kajai ma ai: human right (shinggyim ahkaw ahkang), legal right (tara upade mahkrun hkan nna hkam la ging ai ahkaw ahkang), personal right (langai hpra hpra tinghkrai ahkaw ahkang)__ hkam sha ging ai ahkaw ahkang hpan law law. “Right/Justice” maga hkrai shanang shaga nna “Compassion/ mercy” ngu ai shada matsan dum hkat ai lam hpe gaw shingkawt da chye ga ai; manghkang rai nga; ai. Matsan dum chye ai ningli hpe makam masham mahkrun hku nna sha sharin la lu ga ai. “Justice/right without mercy”, rap-ra tara/tinang hkam la ra ai ahkaw ahkang hta “matsun dum ai”, ngu ai ningli n lawm jang Karai Kasang a man e n jaw ai/n tara ai maga gale wa lu ai. Karai a man e yawng gaw shut chye ai, mara lu ai, ra kadawn ai ni hkrai rai ga ai. Dai majaw, anhte manghkang hparan shagu, dai hpe myit dum nna jeyang dawdan ra ga ai. Masha kau mi, tinang a ningmu, machye machyang, tara mahkrun hpe atik anang jum tek da nna manang wa a ningmu hpe n sawn shalawm ya ai, manang wa hta kade gara hku machyi wa lu ai hpe n sawn shalawm ai sha jeyang chye ma ai lam hpe myit dum mai ga ai. Karai Kasang maga, Shi a dinghpring ai, san seng chyoi pra ai, tara ai mahkrun hku tup hkrak jeyang ai rai yang kadai masha wa Karai Kasang a man e tsap dan lu na rai ta? (Shkk 130:3).

Madu du sa ai nhtoi gaw jeyang ai nhtoi mung rai na lam hpe kaga myihtoi ni zawn sha Yawhan Baptista shadum ya ai. Jeyang ai kaw na lawt lu na matu langai hpra gaw tara hkung ga ai hte dinghpring ai ni rai ra ai; dai hta lai jan nna, masha shada matsan dum hkat ai amu ni galaw ra ai lam hpe shadum ya ai. Dai gaw myit malai ai lam a kumla rai nga ai. Anhte myit malai lu nna myit masin sat lawat galai shai wa ai rai yang, shut hpyit mara lu ai shinggyim amyu hpe Karai Kasang gaw shi a tsawra myit a majaw, ningnan re ai mahku mara hpe shabyin ya na lam, myihtoi Zehpania tsun shadum ai. Shut hpyit mara lu ai amyu re ai majaw, wenyi mahkrun hta lagaw lata katsing si ai ni zawn tai nga ni hpe, “Hkum hkrit mi; Madu Karai Kasang gaw nanhte a lapran e nga nga ai” nga, ninggun jaw ai. Zehpania a mungga akri gaw ndai re: tara matsun ni hpe hkan shatup ai ni, dinghpring ai ni, Karai a man e matsan mayan dum ai ni “Anawah” (shagrit shanem lu ai) gaw jeyang dawdan ai shani, jahten sharun ai kaw na lawt lu na ma ai (2:3).

Hpilipi Laika hta mung, gawng kya ai shinggyim masha ni, hkrit myit, agam ai myit n rawng ai sha, ra kadawn ai lam ni (grau nna wenyi a akyu ara) Karai Kasang kaw tut e hpyi la mai ai lam, San Pawlu ninggun jaw ai. Tinang hkum hpe mung kam n mai, dinghta ga na kaning re ai rit kawp tara/ahkaw ahkang ni hpe mung tup hkrak kam shamyet n lu ai dinghta ga e, Karai Kasang kaw akyu hpyi nna sha, tinang jaw ai hku myit lu na, simsa ai lam majing hpe lu la mai ai lam sharin ya ai. Myit mada let, myit galu ai hte akyu hpyi let ala dingda nga ra ai lam hpe sharin ya ai.

Dinghta ga ntsa, namak lahpa myit a majaw, tara upade hpe kam mi ra jahkrat nna mungmasha ni nga jamjau ai, myit tsaw myit dap ai majaw shada gasat hkat ai, shing re ai masa ni hpe tinang galai kau ya n lu tim, nang/ngai galaw lu ai lam gaw tinang nang na n hkru n kaja ai myit, myit magaw ai alai, gumrawng gumtawng ai alai, matsan dum n chye ai alai ni hpe tinang sha galai kau lu ai n rai a hka?

2024: ADWENTU LADAW LABAN (2) NA MUNGGA

“Madu a matu hkrun lam lajang mu; lam ni hpe shăding mu; hkaraw ni hpe kăput jăhpring nna tsaw ai bum ni hpe shăgrit kau mu….”, nga ai. Baruk a laika hta tsun da ai gaw dai amu ni hpe Karai e nan shăbyin na lam tsun da ai. Yawn hkyen kaya hkrum ai Karai a amyu masha ni baw dap mada nna, Karai a hkye hkrang la ai amu hpe mu lu na lam tsun da ai.

Shaning law law, majan law law a majaw, jahtum e Yeruselem hten bya mat ai; kung zet ai masha ni Babylon de bawng masha hku nna woi la, mayam shatai hkrum ma ai. Yerusalem e ngam nga ai masha ni mung maigan hpyen ni e adip arip rai uphkang ai npu e taw mat ma ai. Dai zawn re ai madang de shăgrit kau hkrum ai Karai Kasang a amyu masha ni kaya hkrum ma ai. Lawt lu na lam myit mada shara n nga ai. Babylon e bawng masha tai nga ai ni a matu mung, tinang buga de bai htang wa lu na myit mada shara n nga sai. Shing re ai aten hta, Karai a amyu masha ni hpe, “Baw sharawt nna sinpraw jan pru maga mada yu nga mu! Nanhte hkye hkrang la hkrum ai aten ni wa sai” ngu ai ga gaw kabu mai ai shi-ga nan rai nga ai. Sinpraw sinna, kaga ga rai ayai aya byin nga ai Karai a amyu masha ni Yerusalem de bai gyin hpawng wa lu na lam, hkrun lam ting mung apri anyen rai na, Karai e nan shabyin ai amu rai na lam tsun ai. Katsan ga de gawt kau hkrum ai Ewa a amyu matu yawng gaw ndai dinghta ga e ruyak jamjau amyu myu, myit daw hpa amyu myu hkrum katut nga ma ai. Tsinyam tsindam yawng a ningpawt gaw shut hpyit mara re ai lam, shawng na chyum mungga hta mung, Kabu Gara Shiga hta mung, shadum ya ai; myit malai lu nna “Madu a matu hkrun lam lajang mu” nga ai.

Shawng na chyum mungga hte Kabu Gara Shi-ga hpe shadawn yu yang, Baruk a Laika hta shinggyim amyu masha hku nna tinang a atsam hte lawt lu na, hkye hkrang la hkrum na myit mada shara n nga ai lam; hkye hkrang la ai lam hpe Karai Kasang hkum nan galaw hpang ai, shabyin ai lam hpe tsun da ai. Kabu Gara Shi-ga hta rai jang, shinggyim amyu hku nna mung, tinghkrai langai hpra hku nna mung, lawt lu, hkye hkrang la ai hkrum na matu, shinggyim masha maga hkum nan shakut la ra ai, hkrun lam lajang da ra ai lam hpe tsun da: myit malai lu ra ai, ngu ai rai nga ai.

Hkye hkrang la ai lam hpe galoi mung Karai Kasang maga na hpangai, Shi e lajang ai, Karai Kasang a chyeju kumhpa san san re ai lam, Karai Kasang n lawm ai sha n mai byin ai lam hpe dum ra ga ai. Kaga maga mi rai jang masha hkum nan mung Karai e ladawn jaw ai hkye hkrang la ai chyeju ni hpe hkum nan shakut la na lit lu ai lam hpe shadum ya ai.

Ja lungseng lu la na matu kade tsaw ai bum ni hpe mung shagrit kau ma ai; kade sung ai hkaraw nhkun ni hpe mung kaput kau lu ma ai. Kade yak ai lam hpe rai tim jahtuk shatsawm la lu ma ai. Htani htana asak a matu salu salat hkaw ra na ga ai; pu ba ai, machyi hkamai, asum hkam ai lam ni galaw ra na ga ai. Tinang a sat lawat nga-sa lailen, dinghpring ai hku nga lu na matu, teng sha machyi hkam ra na ga ai.

Hpilipi Laika hta Kasa Pawlu shadum ya ai gaw Hkristu hta ra n rawng kuptsup ai lam a jaw e, Shi hta jung noi nga ai ni anhte gaw maikaja ai apu asi law law si ya lu ai hte Karai a hpung shingkang hpe shapraw dan lu na lam tsun ai. Hkristu Yesu a lam grau grau chye na hkawn hkrang nna tsawra myit kuptsup wa lu na matu, shada akyu ya hkat na ahkyak ai lam hpe shadum ya ai.

2024: ADWENTU LADAW LABAN (1) NA MUNGGA

Karai Kasang gaw Shi Dawi hpe jaw da ai ga-sadi teng wa na lam; Shi a amyu masha hpe teng sha hkye la na lam; Karai a Kasha du maw sai majaw maja let la nga na lam shadum ya ai. Karai Kasang Shi Hkawhkam Dawi hpe jaw da ai ga-sadi hta Dawi a amyu matu kaw na rawt ai, dinghpring ai hte ra n rawng ai, kuptsup ai wa rai na lam tsun da ai. Labau hpe gawn yu yang Dawi a tingnyang a ntsa shăchyaw dung ai hkawhkam ni gaw, dai zawn ra n rawng ai wa n nga yu ai; jahtum e Dawi a hkaw-yan mung di mat ai, mungdan mung hten run mat ai. Mungdan hten bya ai hpang shaning 800 jan hta du sa na Messiah/Hkristu a lam myihtoi Yeremia tau nau tsun da ai myihtoi ga rai nga ai.

Kaja wa sha, Hkristu du sa ai aten hta masha law malawng n chye kau dat ma ai. Dai ni du hkra Israel amyu masha ni Hkristu/Messiah hpe la nga ding-yang rai ma ai. Hkristu hpe chye chyang hkap la ai ni a matu mung, mungkan ga a ăgung ălau ni a majaw hte kaga myit ru tsang hpa law law a majaw, Karai a hkye hkrang la ai chyeju ni hpe n hkap lu ai, myit daw myit hten nna hkrup mara nga shalai kau chye ga ai. Lu lu sha sha rai, pyaw hpa ni hta len shănang nga ai ni hpe San Luka a Kabu Gara Shi-ga hku nna shadum ya ai: hkrit tsang hpa ni kaw na mung, pyaw hpa agung alau ni kaw na mung, lawt lu, hkamjan lu na matu aten shagu akyu hpyi let la maja nga na lam shadum ya ai. Dai Madu du sa ai nhtoi gaw nanhte a matu chyinghtep zawn rai na ra ai, sadi maja nga mu, nga, shadum ya ai.

Ya ndai aten hta nan, anhte mungdan masha ni hku hku ai, kawsi hpang gara hkrum sha nga ma ai; n dang tsun hkra re ai myit ru myit tsang lam ni a majaw hkrit shajang nga ma ai. Mungkan e byin nga ai manghkang ni hte kumla ni mung jahtum nhtoi de du maw sai zawn she rai nga sai. Shing re ai aten hta, “Nanhte a baw sharawt da mu! Nanhte shălawt dat hkrum ai aten ăni sha rai nga sai”, nga, Kabu Gara Shi-ga e shadum ya ai.

Anhte a aprat, anhte a aten hta, dinghta ga e pyaw ai, yak ai, hkrit tsang ra ai, kaning re ai mahkrum madup hta rai tim, Karai a hkye hkrang la ai chyeju kumhpa ni hpe man man hkam la lu na matu, man man akyu hpyi ra ga ai. Anhte yawng gaw gawng kya ai amyu rai ga ai. Karai a man e matsan mayan re ai ni rai ga ai. Du sa na Dawi a aru arat Hkristu chyu sha, dingman ai, ra n rawng ai hku kuptsup ai wa rai nga ai. Shi a marang e sha, shi hta chyu sha, hkye hkrang la hkrum na ga ai. Matsan ai majaw, myit daw ai majaw, Karai Kasang hte tsan nga na kun? Lu lu sha sha rai, pyaw daw ni hta len nga na rai kun? Yawng gaw myit malai lu nna, Karai e ladawn ya nga ai chyeju kumhpa ni hpe gritnyem ai myit hte hkam la na rai kun?

2024: PRAN WAN LADAW LABAN (34) NA MUNGGA

“Ngai a mungdan ndai mungkan ga hte n seng li ai” Hkawhkam ngu ai shaloi, mungdan hpe up hkang ai wa, tingnyang hta dung ai wa, hkawhkam daru magam hpe kam ai hta jai lang ai, langchyi htingnu kaba hta nga ai, dai zawn anhte dum la ga ai. Hkawhkam wa hpe shi a hpyen dap/ mungshawa ni makawp maga la ai. Shi hpe bau jaw ma ai, shanhte a asak, n'gun atsam yawng hte si ai du hkra gasat ya ma ai. Hkawhkam ni gaw sut gan law law lu ma ai, si shangun na, hkye la na aming du hkra mung shawa/ dap shawa ningtsa hta shi lu ai.

Madu Yesu chyawm gaw dai hte shai ai hkawhkam langai mi rai nga ai. Shi a tingnyang gaw wudang rai nna, anhte hpe daw jau ai masa hte up hkang nga ai. Shi a atsam ninggun gaw tsawra matsan dum ai lam hte mara hte si ai kaw nna anhte hpe hkye hkrang shaw la nu ai rai sai. Shi gaw anhte hpe makawp maga ai, bau sin ai hte anhte a matu si hkam ai, kaja dik ai Sagurem wa nan rai nga ai. Shi myit sharawng ai lam gaw anhte htani htana asak lu la na matu Shi a asak hte hkye hkrang la na lam rai nga ai. Shi a arawng aya gaw anhte hpe mara dat ya nna, Kawa Karai Kasang a tsawra matsan dum ai lam de anhte hpe woi wa na lam rai nga ai. Madu Yesu hpe tara jeyang ai hta, Pilate wa gaw, shi a arawng aya, up hkang sha nga ai shara shamat kau na tsang nna makawp maga nga ai wa re ai lam mu lu saga ai. Tengman ai lam hta hkawm nna jaw ai lam hpe madi madun na ahkaw ahkang gaw lu sai. Raitim, shi a hkrat sum lam re majaw mada shalai kau sai. Shi a lawt lam hpe sha tam la kau sai.

Si hkrung si htan lam hte mungkan arawng aya a shawng hta Madu Yesu gaw azim sha, n shut n shai nga dan sai. Anhte akyu ara a matu yawng mayawng hpe hkap la sai. Grit nem ai myit hte yawng ap nawng sai. ‘Manang ni a matu tinang asak nawng kau hkra tsawra ai myit hta grau kaba ai tsawra myit ngu ai gaw n nga sai’ (Yh 15:13). ‘Masha kasha wa pyi, masha hpe yam sha na nga nna du sa ai n rai, masha hpe galaw daw ya na hte shi a asak hpe nawng ya kau nna masha law law hpe hkye mawai shaw la na matu du sa ai’ (Mk 10:45) nga nna Shi hkaw tsun ai hte maren sak hkrung hkawm sa lai wa sai.

2024: PRAN WAN LADAW LABAN (33) NA MUNGGA

Dai ni na kabu gara shiga hta, masha kasha du sa na lam, hpang jahtum ninghtoi (snr) mungkan htum na aten a lam hpe tsun dan nga ai. Hkrit kajawng hpa dai hten run wa lam hpe; jan gaw sin mat wa nna, shata ni nip mat na, shagan ni mung lamu de na di hkrat wa na, nga nna hkrit na zawn tsun dan sai. Raitim, Madu Yesu madung da nna tsun mayu ai lam gaw, dai byin wa na hkrit kajawng hpa lam ni n rai, ‘ningnan hpang wa na prat a lam’ she rai nga ai.

Mai hpang hpun hpe madi nna tsun ai gaw; ahkying aten hta hkan nna, byin ai mabyin ni hpe yu let chye madat na matu rai nga ai. Shi a mungkan ga na prat htum mat ai hpang, mungkan labau, shinggyim labau, ningnan byin pru wa na lam hpe Madu Yesu gaw sape ni hpe tau nau sharin shadum, lajang da shangun ai lam rai sai. Ndai lam gaw teng sha wa mungkan labau hta Karai Kasang a prat ladaw ningnan hpang ai rai sai. Sumsing lamu kaw nna, Karai Kasang yu wa ai hpe anhte shingran mu lu na matu loi ai, raitim, dai hta shara bai la ai gaw, Karai Kasang hpang de bai lung wa ai hte Sumsing lamu na ting nyang hta hkaw dung ai lam rai nga ai. Madu Yesu, shi bai du sa na gasadi jaw kau da ai raitim, aten gaw n masat kau da ai. Masha kasha hpung shingkang hta bai du sa nna, Karai Kasang a mungdan hpe gaw gap na rai nga ai. Raitim, kadai n chye lu ai. Anhte hkrit tsang na lam gaw n nga ai. ‘Hpang jahtum aten’ ngu ai gaw akyu n jaw lu ai. Kawa Karai Kasang chyu sha chye ai rai nna, kadai n chye lu ai hpe anhte na lu sai. Dai hpe dum la nna, anhte maja let sha nga na kun?

Shing n rai, lani mi hta htum mat na rai nga ai anhte a prat a matu lama ma galaw shakut sa wa na kun?

Hpang jahtum na aten hpe n chye lu ai hte maren, ya anhte nga nga ai aten hpe manu shadan let kabu gara ai hte sak hkrung hkawm sa nna, Madu Yesu bai du sa na ra ai aten hpe myit mada nga ga. Anhte a masin salum hta Madu Yesu hpe bang da nna, masha kasha du sa let gasadi jaw da ai htani htana asak de du lu na matu, akyu hpyi let mai kaja ai magam bungli galaw, shada daw jau let sakse hkam sa wa ga law!

2024: PRAN WAN LADAW LABAN (32) NA MUNGGA

Dai ni na la ai chyum mungga daw (1) hta kabu gara shiga hta na gaida jan ni gaw anhte a gam jaw gam ya chye ai myit hpe bai dum sawn yu na shatsam sai. Kaja wa sha matsan jam jau ngaai raitim, shan yan gaw Karai Kasang lajang da ai lam hta kam sham myit kaba hte sak jaw lai sai.

Rai yang, anhte gaw kaning di na? Gam jaw gam ya chye ai ni anhte rai ga ai kun? ‘Matsan mayan raitim, dip sha hkrum ai raitim, Tsaw ra chye ai Karai Kasang a lata hta kabu gara nga ga ai’, ngu ai teng man ai lam hpe gaida jan yan gaw anhte hpe shadum ya nga ai. Anhte hpe galoi mung shaman ya nga ai, kau da na n rai nga ai Karai Kasang hta anhte hkum hpe matut ap tawn da ga.

Anhte manu shadan ai gaw hpa rai ta? ngu ai hpe myit sawn sumru shangun sai. Ja gumhpraw, arung arai, Hpaji jan mau, arawng aya, shimlum ai lam ni rai na kun? Dai lam ni yawng gaw sadi pyi n jaw ai, yawng mat mat chye nga ai. (Shr) Karai Kasang kun? jahtum rai yang, kaja wa ahkyak ai lam gaw anhte shinggyim masha n sawn ai ni hpe, grau nna galaw daw jau ai, matsan dum lama garum la ai lam gaw, Madu Yesu hkang da ai ‘nanhte shada da tsaw ra nga mu’ ngu ai lam nan rai sai. Kade kaji htum ai daw jau lam raitim, hpang gara nga ai marai langai mi hpe hka gawm mi sha jaw ai wa kadai mung, manu shabrai bai n lu la ai sha nga na n rai. Madu Yesu a man hta anhte kade jaw ai ngu ai hta n mahta nna, gara hku daw jau ai she grau ahkyak nga ai; tsaw ra ai wa jaw ai kumhpa hta, jaw ai wa a tsaw ra myit gaw manu dan dik nga ai. Anhte a prat law malawng hta Madu Yesu a matu kaba htum ai amu n lu galaw na ga ai raitim kaji ai amu law law hpe tsaw ra myit kaba hte galaw lu na teng sha rai na re. Manaw manang ni hpe gam garan daw jau na hte, Shi a mai kaja ai chyeju hting let ya ai mahkrai shatai na matu, Karai Kasang anhte hpe shaman chyeju jaw ya nga ai.

Dai rai yang, Matsan dum garum ya chye ai ni tai na matu hpa wa mi anhte hpe gang tawn da ai kun, myit yu mai nga ai. Dai ni na anhte a Hkristan wuhpung wuhpawng hta, anhte kaning rai tsun shaga, daw jau, garum shingtau ya nga ga ai kun? Karai Kasang a lata hta anhte a yawng mayawng, byin mabyin hpe ap tawn da nna, anhte ra ma ra Karai Kasang chyu sha jaw ya lu ai ngu ai hpe kam sham ga ai kun? Anhte bang jaw, gam ya ai aten hta tsawra myit hte, daw jau ai myit hte rai ga ai kun? Ndai lam ni hpe teng sha galaw ai rai yang anhte a makam masham ngang grin/ kang wa na re.

Dai ni na mungga hpe na la ai marang e, matsan mayan ni hpe grau tsawra chye wa nna, gam jaw gam ya chye wa lu na matu, Karai Kasang hpe n dut ndang ap nawng daw jau lu na n'gun atsam hpyi la ga!

2024: PRAN WAN LADAW LABAN (31) NA MUNGGA

Dai ni, anhte ni, lai wa sai aten, shanhte a sak prat hta lak san re ai, mau hpa amu byin tai lai wa sai, Nawku Hpung kaw nna ‘Sanpra ai ni’ ngu shamying hkap la da sai ni hpe myit dum let shagrau nga ga ai. Dai re ai majaw, ‘A lu ai Tara’ gaw shanhte hte htuk la nga ai rai nna, lai wa sai aten hta shanhte san pra ai ni galaw lai wa sai amu magam ni, sak hkrung nga sa lam ni, htung hking hte shinggyim hpung hpe galaw lai wa sai lam ni gaw, Karai Kasang a hpung shingkang hpe shagrau sha a lai wa masai. Htani htana asak lu la na re ai hpe n dai ‘A lu ai Tara’ gaw pahkam hkam ya nga ai. Ratim, kaja wa kabu gara shiga nan rai sai ngu anhte hkap la ga ai kun? Matsan mayan re ai ni kaja wa ‘A lu ma ai’ ngu myit la sai kun? Yawn hkyen hkrum nga ai ni, ngwi pyaw simsa lam a matu gun hpai nga ai ni, kaja wa sha kabu pyaw lu ai ngu ‘A lu ai Tara’ tsun ai hpe myit hkrum a ni?

Akri madung hpe yu ga nga yang, masha nkau mi kaja wa ‘A lu ma ai’ lam gaw, shanhte a matsan mayan rai, myit mada shara nan n lu ai prat hta Karai Kasang hta lai nna, kadai hta mung myit ai lam n nga ai majaw re. Dai re ai majaw, ningpawt hte jahtum rai nga ai, langai sha nga ai Karai a atsam hta ru jung lu ma ai. Prat hta byin ai, ru yak shoi hpa, yawn hkyen ai lam yawng hta na Karai chyu sha shanhte hpe shalawt la ya lu ai hpe hkap la ma ai.

Dai ni na poi ninghtoi a ahkyak ai hte kam sham mai ai lam gaw, anhte hte rau nga nga ai masha nkau mi Karai Kasang a shingnip hta pyaw nga ma ai ngu ai lam re. Ndai lam gaw, Karai Kasang a tsawra matsan dum ai lam hta hkan sa chye na matu anhte hpe myit shalen ya na re. Ya na zawn rai yak hkak, pawt sindawng la ai mungkan ningtsa hta kaja ai Kahtawlik Hkristan ni anhte tai wa lu na matu anhte hpe myit atsam jaw ya na re. Dai majaw, san pra ai ni ngu ai hpe Nawku hpung kaw nna, masat tang da ya sai ni chyu sha re ngu anhte chye madat n shut ga. Sanpra ai prat madang de anhte yawng mung du lu na saw shaga hkrum ga ai. ‘A lu ai Tara’ lam hta hkrak tup hkan sa nga pra let san pra ai masha madang dep lu ai masha ni law law nga na re hpe anhte ning dang n lu ai.

San Pra ai ni yawng a poi ninghtoi hpe anhte myit dum galaw nga ai ten, anhte ni yawng mung san seng san pra wa let, Madu Yesu hte rau ning ngai lu na matu akyu hpyi garum ya u ga, sanpra ai ni hpe anhte hpyi nem ga law!

2024:PRAN WAN LADAW LABAN (21) NA MUNGGA

Shekem, ngu ai shara gaw Abraham, Isak, Yaku, ji-jum ni a ginru ginsa labau shara rai nga ai. Amyu sha lam-yan hte makam masham lam-yan a matu ahkyak ai hkrum zup shara rai nga ai. Karai Kasang hte Abraham ga-shaka jaw hkat ai buga, Abraham a amyu matu hpe jaw da ai buga rai nga ai. Egyip mung e shaning tsa ru nna mayam tai hkrum ai hpang, zaibru jang e shaning 40 ning bu hkawm ai hpang, jahtum e, Yawshu woi awn ai Karai a amyu masha gaw dai buga de du shang madu la lu ma ai. “Yawshu” ngu ai ga-si hte “Yesu” ngu ai ga-si lachyum langai sha re ai hpe dum ra ga ai. Karai e jaw ai lamu ga de du shang madu la lu ai hte rau, Karai hpe mahtang jaw jau na kun, buga masha ni jaw jau ai Karai Kasang shaje ni hpe jaw jau na kun, lata la mu, nga nna Yawshu tsun ai. Yawshu hte shi a htinggaw amyu matu ni gaw Karai Kasang hpe sha jaw jau na lam tsun ai shaloi, kaga ngam ai amyu matu ni mung, Karai Kasang hpe jaw jau na lam, Karai shaje ni hpe kau da na lam ga-sadi jaw ma ai. Shingrai, Israel amyu masha ni Karai hte ga-shaka bai shagrin ma ai.

Yesu tsun ai ga, “Ngai a shan gaw sha-hpa majing; ngai a sai gaw lu-hpa majing” ngu ai ga na la jang, shi kaw hkan nang ai masha unawng na pat kau nna Yesu hte hka mat wa ma ai, nga ai. Yesu shi tsaw ai, hkaw dan ai ga ni hkap la kamsham ging ai hku mau-hpa muk shalaw jaw ai, kaga mau-hpa lamik kumla ni mu ma ai rai tim, jahtum chyalai, shi a shan sha ra ai, shi a sai lu ra ai, ngu ai hta Yesu hpang n hkan nang gwi ai majaw hka mat ma ai. Yesu gaw sape 12 hpe san ai, “Nanhte gaw...?” ngu ai shaloi Petru htan ai, “Madu e, anhte kadai kaw chye hkan na rai ta? Nang gaw asak jaw ai mungga lu ai hte Karai a Chyoi Pra ai Wa rai lit dai” ngu, htan ya ai. Asai ashan kaw na prut pru ai ga n rai; wenyi e jasu jahprang ai chyeju lu ai majaw, Petru gaw shing ngu htan ya lu ai rai nga ai.

Shawa masha hpe Yesu tsun ai, “hkum sai shan gaw hpa akyu n jaw lu ai; ngai tsun ai ga gaw wenyi hte asak rai nga ai” nga ai.

Wenyi hte seng ai lam hpe tsun yang, masha ni gaw ndai dinghta ga na sawn shen lu ai baw hku myit la ai rai yang, wenyi a lam kaning di chye lu na n re ai lam hpe ngu ai re. Wenyi lam hpe gaw wenyi a mahkrun hku sha chye na hkap la mai ai. Mungkan lam hku shadawn sawn shen nna wenyi asak a lam chye na hkap la lu na n mai byin ai. “Ngai a shan sha-hpa majing, ngai a sai gaw lu-hpa majing” ngu ai shaloi, Yesu gaw ading tawk tsun ai; gumwai ga hku tsun ai n rai. Dai majaw, ga dai hpe n hkap la lu ai ni shi kaw na hka mat wa ai shaloi, shanhte hpe n shingdang ai. Yesu gaw kamsham ai ni shi a shan hpe sha mai hkra, shi a asai hpe lu mai hkra, hkungga nawng jau ai ladat hku nna shabyin na rai nga ai. Petru gaw dai hpe tau nau chye da ai n rai tim, Yesu tsun ai yawng gaw teng man ai lam hpe tsun ai; n shut n shai kam ging ai, ngu, hkam la ai. Shi a shagrit shanem ai myit, shi n chye madat tim Yesu gaw asak jaw ai mungga hkaw tsun ai, ngu hkrak sha kamsham ai majaw, Petru gaw jaw ai hpe lata la lu ai lam rai nga ai.

Karai Kasang hte matut mahkai ai, wenyi mungkan a lam sharin hka ja hkam la ai shaloi, teng sha shagrit shanem ai myit rawng ra ga ai. Anhte n chye na lu ai mungsung ni hpe kam ging ai wa (Yesu) hte shi e san da ai Nawku Hpung e tsun ai gaw kam ging ai, ngu ai majaw kamsham hkap la ga ai re. Sakramentu ni a lam hpe kaning re ai hpungtang hpaji, myit hpaji, sawn hpan hpaji hte mahtai shapraw ya na n mai byin ai. Kam ging ai majaw, kam ai, ngu ai hta jan na n nga sai. Yawshu hpe Israel amyu matu shagu htan ya ai, “Anhte mung nang zawn, Karai hpe sha hkap la jaw jau na ga ai” ngu, ga-sadi jaw ninglen, buga na nat hpara/ Karai shaje ni hpe nawku jawjau ai mara kahtap kahtap nna shut hpyit ma ai.

Sakramentu ni hpe hkam la ai anhte mung, Karai Kasang hpe sha kamsham nawku jaw jau na, ngu ai ga-sadi jaw da ninglen, anhte a prat hta kaga hpara shaje ni hpe nawku jawjau ai lam kade lang she galaw kau ga ai: marin ai, ju malu ai, tinang ra mayu ai byin mayu ai maga shanang nna Hkristan myit jasat nga-sa lailen hte mung, makam masham hte mung, nhtan shai nna hkan galaw kau chye ga ai. Yesu kaw na gan hka mat ai kade lang she rai a hka! Hkungga nawng jau ai Missa lawm shagu, Yawshu zawn, Kasa Petru zaw, asak jaw ai Madu hpe sha lata la na ga ai; shi a tara mungga ni hpe madat mara na ga ai, ngu, ga-sadi bai kahtap jaw jaw di ga ai.

2024: PRAN WAN LADAW LABAN (21) NA MUNGGA

Madu e, anhte kadai hpang de wa na rai nga a ta?

Ndai laban bat na mungga ni gaw tengman ai lam hpe lata la na aten hpe tsun dan sai. Lapran hta n mai nga, maga ga de tsap shangun sai. Karai Kasang hpang maga kun? Nhtan shai ai maga de kun? Madu Yesu a sharin shaga ai lam_ Shi Madu gaw Sumsing lamu de na yu wa ai Asak muk rai nna htani htana asak jaw ya ai ngu ai lam hpe n chye madat ai hte aput angun nga ma ai. Yuda ni mung, ‘ndai wa kaning rai nna anhte hpe shi a ashan jaw sha lu na rai ta?’ nga nna mau nga ma ai. Madu Yesu a sape ni nan mung dai sharin shaga ai lam gaw yak la nga nna kadai wa madat lu na rai ta? nga nna hkap la yak nga ma ai.

Madu Yesu a sharin shaga ai hta lam lahkawng lawm nga ai. Madu Yesu a ga hpe n hkap la lu ai Sape ni gaw ta sharawt kau nna htingnut mat na lam sha rai nga sai. Shanhte shawng de nga lai wa sai prat de bai wa let nga nna Madu Yesu hte gaw hka mat na lam sha rai nga sai. Sape 12 gaw kaga ni hta dai ga ni hpe n chye madat ai rai tim, Madu Yesu hta naw noi nga ma ai. Simun Petru mahtang tsawm htap la ai ga; ‘Madu e, anhte kadai hpang de wa na rai nga a ta? Nang gaw htani htana asak jaw ya ai mungga lu ndai’ nga nna tsun hkap la sai. Petru a Madu Yesu a ningtsa, sadi dung ai hte kangka myit hpe anhte mu ya lu sai. Sape 12 a malai ga shaga la sai Petru a hkam la ai gaw shanhte ni kam sham nga ai hte Madu Yesu gaw Chyoipra ai Kawa Karai Kasang a Kasha re ai hpe hkap la sai rai nga ai.

Kaja wa sha, anhte hta na ra sharawng ai lam hpe galoi mung asan sha Shi Madu tsun sang lang dan nga ai. Anhte hpe masu nna mung, tsun sharawt ai hku nna mung anhte a myit shang sha ai hpe magra la na n rai nga ai. Wudang a jaw teng ai lam hpe mung jen noi si hkrum ai lam hpe mung Shi anhte hpe tsun dan sai. Anhte Shi hpang hkan nang na kun? Hka mat na kun? Myit daw dan na gaw anhte a lit sha rai nga sai!

2024: MARIA HPE LAMU DE SHALUN LA AI POI SHANI NA MUNGGA

“Gawan katsan chye ra ai”

Dai ni na kabu gara shiga gaw Nu Maria, shi a kana Elizabeth kaw alak mi sa chyai ai hpe tsun dan ai. Ndai mabyin hpe, Nu Maria gaw ra kadawn nga ai ni hpang de sa nhtawm shawang tsawra myit madun ai lam chye na na matu madi madun ai. Ma hkum re ai num lahkawng a shada tsun jahta hkat ai hpe yu yu nna, shawng nnan Nu Maria a matsan dum chye ai myit hpe mu ya lu ai. Nu Maria gaw, shi hte mahkrum madup bung ai hta na lai kadai n nga sai hpe chye nga ai. Raitim, shi gaw mungkan ga a hkyela Madu hpe hkritung hta gun da nna, Elizabeth chyawm gaw lam shawng baw ya na Yawhan hpe gun da nga ai. Shan lahkawng hkrum shaga ai ten, Elizabeth a hkritung na ma gaw kabu gara ai hte gum lawt nga ai. Elizabeth mung; “Numsha ni hta nang a lu ndai, na a hkritung na ma mung a lu lit dai,..., kam sham ai num sha gaw a lu ai, kaning rai nme law, dai Madu kaw nna shi hpe tsun ai ga gaw dik wa na ra ai” nga ai.

Anhte marai hkum shagu gaw dai Madu hpe gun da ai ni rai nna, dai Hkristu a lam shawng lajang ya ai ni re ngu dum sawn la mai ai. Anhte shada da hkrum zup ai mi rai rai, sa kawan chyai ai ten hta rai tim, shada da a hkam sha lam hpe madi shadaw ya lu ai, yawn hkyen ai ni hpe n-gun jaw ya lu ai, myit ru yak hkak ai ni hpe lam madun ya lu ai. Dai hpe anhte myit jung nna yu yu ai shaloi, shada da kawan katsan ai ten hta dai Madu hpe shaprat ya lu na re. Myit sawn sumru yu ai lam gaw dai hta nga pra lu ai. Dai gaw anhte kaning rai kawan katsan lu na matu sharin la lu ai shara nan rai nga ai.