PRANWAN LADAW (13) LABAN SHANI NA MUNGGA

“Tinang hpe tsaw ra ai masha ni sha nrai, hpyen wa hpe mung tsaw ra u,” ngu nna Madu Yesu gaw shi a hpang hkan nang ai ni hpe htet shana ai sha n-ga, daini na Kabu Gara Shiga hta Yuda masha ni hte nhkrum ai Samari masha ni hpe shi hkum nna shawng nnan saw shaga ai lam hpe galaw lai wa sai re. Yuda masha ni hte Samari masha ni gaw shaning law law nju ndawng hkat lai wa sai hpe chye nga ninglen Samari mare kaw sa manam na matu hkyen lajang ai rai yang shi hpe nhkap la ai hpe hkrum hkra lai wa sai re. Madu Yesu a sape ni gaw Shi Madu hpe n-hkap la ai ndai masha ni hpe ari dan jaw mayu tim mung Madu Yesu gaw shanhte hpe daru nna shi a hkrun lam hpe bai matut hkawm sa sai re.

Madu Yesu gaw shi hte nre ai sha moi kaw nna nju ndawng hkat ai ndai myu sha lahkawng hpe bai jahkrum ya mayu ai myit nga nna shakut ai rai tim n-awngdang lu shi ai hpe mu lu ai. Ndai ahkying aten hta jeyang dawdan ai lam n-galaw ai sha, myit galu kaba hte aten ahkying htuk ai hpe matut la nga ai re.

Anhte yawng kasi la mai ai gaw tinang hpe ndawng nyawt ai masha ni hpe bai pri nem ai lam hpe lu la na matu shakut ra ai lam re. Tinang a mara a majaw nrai tim, tianang hpe nju ndawng ai masha ni hpe aten ahkying htuk shagu pri nem na matu shakut ai shaloi myit galu kaba ai hte aten ahkying la nna shakut ai rai yang lani mi na aten hta awngdang lu na re.

Madu Yesu a myit masa hpe kasi la nna tinang hpe ndawng n-yawt ai masha ni hpe pri nem hkra galaw sa lu ai atsam hpe Karai Kasang a shaman chyeju hte tinang a shakut shaja ai a marang e hkam la lu u ga.

HKRISTAN TSAWRA MYIT HTE SAK HKRUNG HKAWM SA GA

Samari kahtawng hpe jahten sharun kau na akyu hpyi ai Madu Yesu a Sape lahkawng hpe yu nna, nang mau nga ai kun? Yuda amyu masha ni hte Samari ni gaw tsaban kahtap nna singga hkat ma ai. Samari ginwang kaw nna lai di hkawm sa ai Yuda buhkawm masha ni law malawng asawng asang hkrum ma ai. Yuda marai mi hku nna n dum lu ai lam hpe Madu Yesu galaw sai. Samari mare buga kata hku nna hkawm lai di sa na sha n rai, shanhte kaw nna garum hpyi na pyi shi Madu galaw lai wa sai. Madu Yesu a hku hkau kanawn mazum na saw shaga lam gaw aja awa ning dang kau hkrum sai. Rai yang, dai lam hpe mu ai sape ni gaw n dang hkam ai rai nna, dai mare buga hten za mat na hpe ra sharawng wa ai gaw mau shara n nga na sai.   

 

Nang mung shanhte hte maren bai nhtang galaw na kun?

Rai tim, hkam sharang chye ai lam n-nga ai sape ni hpe Madu Yesu daru kau nu ai. Wudang ntsa hta si hkam na matu “Yerusalem mare de sa na shi myit dingren di da wu ai” gaw, Yuda, Samari masha ni hte tara maigan masha ni gaw, Karai Kasang hte mahku mara bai lu la nna, Hkristu hta amyu masha ni langai byin tai wa lu na matu rai sai.  Ya aten na anhte a prat hta hkam sharang/jan ai myit masa gaw grai ahkyak sai. Tim, kalang lang anhte ni, shut shai ai lam, masa hta hkam jan ga ai nrai kun? Hkristan tsawra myit gaw jinghku wa a matu mung, hpyen wa a matu mung mai kaja dik ai hpe tam nga ai. Hpyen wa hpe manang galaw ai marang e, shanhte hpe dang manga kau sai n rai ni? Nga nna America mungdan dinghku majan hta, hkam sharang ai hte myit sumnum ai Abraham Lincoln bai nhtang tsun nga ai. Nang hpe jam jau jaw, adawt re ai ni hpe nang kaning rai bai htang galaw na rai? Shanhte a hkrat sum lam n rai, mai kaja ai lam hpe mahtang nang tam nga ai kun?

Shi Madu a hpang hkan nang na anhte hpe saw shaga ai shaloi, dingbai dingna jaw na lam ni hpe kau tawn da lu na chyeju, Madu Yesu anhte hpe jaw na rai nga ai. Madu Yesu hta sadi dung nga lu na matu nni nkri hkam la ai lam ra ai. Karai Kasang ra sharawng ai hpe hkan galaw na matu tinang ra sharawng ai hpe tawn kau da ra ai. ‘Nta wa nna, nye wa hpe naw lup kau na nngai’, ngu tsun ai shaloi, nta kaw nga nna kawa si ai du hkra bau maka na lam rai nga ai. Masha kaga ni, asak kung sai anhte a kanu kawa ni hpe gawn lajang n ra na re ngu nna Madu Yesu tsun mayu ai gaw n rai na re. Tim, shi Madu sharin ya mayu ai gaw, anhte a prat hta Karai Kasang gaw nambat langai rai ra ai, ngu ai re. Yawng mayawng hta Madu Karai hpe tsawra ai rai yang, ngam ai lam ni gaw shi aten hte shi shara hta rai wa na re.

Prat a matu yaw sing da ai ban dung de/ shawng de myit machyu let hpang de n htang yu ai lam n-galaw na matu tsun sharin ai Yesu hpe sape ni mau na re. Anhte a bandung gaw, Karai Kasang hte htani htana ning ngai let pyaw nga na lam rai nga ai. Nahtai hpai let hpang de yawng ai wa gaw, shi galaw nga ai amu magam hpe magyi magaw byin shangun ai.

Dai hte maren, anhte tawn kau da ai hpe sha bai nhtang yu nga ai rai yang, Karai Kaang hpang de han nang ai lam hta dingbai dingna rai wa nna, Karai Kkasang anhte a matu lajang da ai hpe hkin lut kau na re. Shawng de sit saw a na lam yak hkam ai zawn rai wa yang, ‘lai wa sai nhtoi na kaja ai lam ni hpe’ (snr) ‘grau tsawm ai udat shara’ de n htang yu na anhte hpe byin shangun na re.

 Madu Yesu hta sha na a myi/myit machyu nga let, jahtum du hkra hkan nang na matu mahtai lu tam sai kun?

PRANWAN LADAW LABAN (13) NA CHYUM LAIKA

26th June, 2016

CHYUM MUNGGA DAW 1

1 HKAWHKAM 19: 16. 19-21 

Ya hti na gaw, Hkawhkam laika langai hta na rai nga ai. 

Madu gaw Elia hpe, "Rawt u; na a malai myihtoi tai na matu, Abela Mehola mare na, Shahpat a kasha Elisha hpe namman chya ya na ndai," ngu nna tsun wu ai.

Shaloi Elia sa wa nna, Shahpat a kasha Elisha hpe mu hkrup wu ai: shi gaw utang gap shi lahkawng hte hkaibang galau nna, shi hkum shi lahkawng ngu na gap hta lawm nga ai. Elia shi hpang de sit sa nna, shi a hpajawng Elisha a ntsa e kabai mara ya u ai.

Elisha gaw dai utang ni hpe kau da ai hte, Elia hpang de gat nang nna, Nye nu wa ni hpe ngai shakram da n-ga; dai hpang ngai nang kaw hkan nang na nngai, ngu nna tsun wu ai. Elia gaw, Wa su; ngai nang hpe hpa hkum da sata? ngu wu ai.

Elisha mung bai wa nna, shi a utang gap mi la sat nhtawm, nga shan hpe nahtai hking rai ni hte shadu nna, masha ni hpe jaw sha wu ai. Dai hpang shi rawt nna, Elia kaw hkan let, shi hpe daw jau nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

GALATI 5: 1, 13-18

Ya hti na gaw, Galati masha ni hpang de San Pawlu shagun dat ai laika hta na rai nga ai.

Hpu nau ni e, Anhte shanglawt tai na matu, Hkristu gaw anhte hpe shalawt dat mani ai: dai re ai majaw, dagrin dakang rai nga nna, mayam a kandang n-pu e bai hkum rawng nga mu.

 Hpu nau ni e, shanglawt ahkang lu la myit ga, nanhte hpe shaga da manit dai; rai ti mung, sadi nga mu, shing n rai, dai shanglawt ahkang gaw hkum shan a ra marin ai hpe hkan tam ai lam she tai wa na ra ai. Dai hku n rai u ga; tsaw ra ai myit hte shada da galaw daw mu; hpa majaw nga yang, Na a htingbu wa hpe tinang a hkum hte maren tsaw ra nga u, nga ai ga langai sha hta, tara lam mahkra hpe shadik lu na myit dai. Nanhte mahtang shada da n ju n dawng ga li ga law hkat yang gaw, nanhte a myit hpawm ai hpe jahten shabra kau na mara ai.  Ngai tsun mayu ai gaw: Chyoi pra ai Wenyi e madun ai lam hta hkawm sa yang gaw: hkum shan a ra marin ai lam hpe n hkan shatup na myit dai. Hkum shan a ra marin ai lam dai Wenyi hte nhtan shai nna, Wenyi mung dai hpe ningdang kau nga ai: shan lahkawng shada da nhtan shai hkat ai majaw, nanhte galaw mayu ai amu kaja mahkra hpe, galoimung galaw lu myit dai n rai. Chyoi Pra ai Wenyi a lakawn la ai hte nanhte hkan nang yang gaw, gara tara lam rai ti mung nanhte hpe hpa n di lu na. 

Ya hti ai gaw Karai Kasang a mungga rai nga ai.

KABU GARA SHIGA

LUKA 9: 51-62

Ya hti na gaw, luka a laika hta na kabu Gara Shiga rai nga ai.

Ya shi hpe sumsing lamu de shalun la na nhtoi du wa magang yang, Yerusalem mare de sa na Yesu myit dingyang rai nga ai majaw, shi a shawng e kasa ni hpe shangun dat wu ai. Shanhte sa wa nna, Shi a matu lajang da na, Samari masha ni a kahtawng langai mi de shang ma ai. Yerusalem mare de Yesu sa wa ai hpe shanhte chye ai majaw, shi hpe n hkap la ma ai. Sape Yaku yan Yawhan gaw dai hpe mu jang, Madu e, shanhte hpe jahkru kau na, an gaw lamu de na wan shaga na, Nang hkraw nga nni? ngu mu ai. Shi chyawm gaw shan hpe yu nna, daru kau mu ai. Dai rai nna shanhte kahtawng kaga de sa mat wa ma ai.

Shanhte lam e sa wa nga yang, masha langai mi gaw, Nang sa ai shara shagu de, ngai nang kaw hkan sa na nngai, ngu wu ai. Yesu gaw, Chyahkyawn ni nhkun lu ma ai; ntsa malen pyen ai u ni mung, u tsip lu ma ai; Masha Kasha chyawm gaw baw tawn na shara pyi n lu nga ai, ngu nna shi hpe tsun wu ai.

Bai kaga wa hpe, Ngai kaw hkan nang rit, ngu wu ai.  Dai wa gaw, Nye wa hpe wa makoi na ahkang naw jaw rit, ngu wu ai. Yesu gaw, Masha chyasi ni gaw tinang a chyasi ni hpe makoi mu ga; nang gaw Karai Kasang a mungdan lam sa hkaw dan su, ngu nna shi hpe tsun wu.

 Bai masha kaga langai wa mung, Madu e, ngai Nang kaw hkan nang na nngai; rai timung, nye nta na ni hpe wa shakram na ahkang naw jaw e, ngu wu ai. Yesu gaw, Na htai jum nna hpang de kayin yu ai wa kadai mung, Karai Kasang a mungdan hte n ging a dan nga ai, ngu nna shi hpe tsun wu ai.

Ya hti ai gaw Madu a Kabu Gara Shiga rai nga ai.

PRANWAN LADAW (12) LABAN SHANI NA MUNGGA

Madu Yesu dai ni na Kabu Gara Shiga hta tinang a hkum hpe ndang nyet kau nna tinang a wudang hpai let shi a hpang hkan nang u ngu nna shi a ali ama byin mayu ai ni hpe tsun u ai.

Tinang a hkum hpe ndang nyet kau ai ngu ai gaw masha hkum shagu hta rawt jat galu kaba na matu ahkyak nga ai. Tinang a myit hpe machyu nna byin mayu ai hku sha nga sa ai wa gaw awngdang na matu nmai byin nga ai. Hpa majaw nga yang hkrat sum ai masha ni law malawng gaw tinang galaw ra ai amu bungli ni hpe shi a aten ahkying ram ai aten hta n-galaw lu ai majaw rai nga ai. Dai hte maren rawt jat ai masha law malawng gaw galaw ra ai amu bungli ni hpe nkam tim shakut shaja nna galaw sa lu ai majaw awngdang ai ngu nna tsun mai nga ai.

Masha hkum shagu gaw yaw shada ai lam kaja ai, pandung kaja hpe tawn da lu ai raitim, ta tut hkan galaw ai hta lagawn ai, nkam ai, aten ahkying shalai kau ai a majaw ahkaw ahkang ni sum mat chye nga ai. Tinang a hkum hpe ndang nyet kau nna nkam ai, lagawn ai ngu ai hpe lai di lu ai rai yang awngdang ai ngu ai lagaw lahkam hpe htawt lu na re.

Madu Yesu a hpang hta hkang nang na shakut taw nga ai anhte ni yawng gaw anhte a wenyi lam hta galaw sa ra ai lam ni hpe nhprai n-yet ai sha shakut shaja lu nna Karai Kasang a shaman chyeju hpe lu la ai hta sha n-ga mungkan a lam ni hta mung awngdang ai ngu ai hpe lu la na matu galaw ra ai lam ni hpe Karai Kasang a shaman chyeju a jaw e galaw sa lu u ga.

MADU YESU GAW NA A MATU KADAI RAI TA?

Na a prat hpe kaning rai galai shai ya lu ai rai? Israela hta nga ai masha law law wa Madu Yesu hpe, Karai Kasang a chyalai n-gun rawng ai masha ngu chye na ma ai hte kaba dik htum ai myihtoi ni hte pyi shadawn ma ai. Petru chyawm gaw Madu Yesu san ai aten shagu, “Karai Kasang a Hkristu” re ai ngu ai mahtai hpe lawan ai hte htan ya nga ai. Dai gaw, Karai Kasang e hpaw shaleng dan ai rai nna, shinggyim masha kadai e mung tsun dan ai n rai. ‘Makam myi’ a majaw Madu Yesu teng sha wa kadai rai nga ai hpe Petru chye chyang nga ai. Madu Yesu; sau chya hkrum ai wa, Kawa Karai e shachyoi shapra ya ai hte mungkan ga de shangun dat ai hkrum nna shut hpyit mara a mayam tai nga ai anhte shinggyim masha ni hpe hkyela let Karai Kasang hpe htani htana ning ngai nga lu na matu, ,du sa ai wa, nga ai hpe shawng nnan shawa masha ni hpe Petru tsun dan sai. ‘Hkristu’ ngu ai Greek hte Hebrew ga lachyum gaw ‘Messiah’ rai nna ga lahkawng yan 'Sau chya hkrum ai wa’ ngu lachyum rawng ai.

Rai yang, Madu Yesu gaw, Karai Kasang a kasha, sau chya da hkrum ai wa, ngu ai hpe n tsun shabrawng na matu, hpa majaw shi a sape ni hpe gin htim da nu ai rai? Shi Madu a Sasana magam hte dai magam hpe kaning rai shangut shakre na, shanhte n chye madat lu ai hpe Madu Yesu chye ya ai majaw rai nga ai. 

Karai Kasang a hkye hkrang la ai amu magam ngut kre lu na matu, hkyela Madu Hkristu gaw, nni nkri hkam la let si hkam na lam, sape ni hpe Madu Yesu tsun dan sai. Dai ga hpe na lu ai sape ni kade wa hkrit kajawng nga sa hka! Shagrit shanem ai, nni nkri hkam sha ai, wudang ntsa hta si hkam ai marang e, sutgan a mayam prat kaw nna, shut hpyit mara hte si ai kaw nna, Madu Yesu gaw anhte hpe shalawt la sai. 

Lama na, anhte ni mung, dai Madu a Awng Padang hta shang lawm mayu ai rai yang, Shi Madu woi ningshawng ai lam de anhte hpai ra ai wudang hpai let hkan nang ra na re. Shaloi, shani shagu anhte hpai ra ai ‘wudang’ gaw hpa rai ta? Karai Kasang myit ra ai hte anhte myit ra ai lam shai wa yang, Shi Madu Karai myit ra ai lam hpring zup wa u ga. Yesu Hkristu hpe chye chyang mayu ai rai yang, si ai kaw nna bai hkrung rawt let, shut hpyit mara hte si du hpe dang manga kau lu ai, Madu Yesu a n-gun atsam hpe mung chye na ra na re. Karai Kasang a kashu kasha majing zawn nga sa lu na matu ra kadawn ai atsam marai hpe Chyoipra ai Wenyi gaw anhte yawng hpe jaw ya na rai nga ai. Anhte hkum dingtek a hkyela Madu, Yesu re ai hpe chye lu na makam, kabu gara shiga e sharin ya ai hte maren sak khkrung lu na atsam, kabu gara shiga hta awm dawm lu ai, kabu gara ai, tengman ai, lam ni hpe masha kaga ni hte mung gam garan lu ai n-gun marai, ni hpe Chyoipra ai wenyi jaw ya na rai nga ai. 

Madu Yesu kadai re ai ngu nang tsun lu na rai? 

“Madu Yesu e, Nang gaw ahkrung nga ai Karai Kasang a kasha, Hkristu Madu re ai hpe, ngai kam sham let yin la nngai. Ya mung, htani htana, Nang Madu hta anga nga lu na ngai a prat, myit mada shara, lu mi lu yawng hpe hkap la ya rit law, Amen."

PRANWAN LADAW LABAN (12) NA CHYUM LAIKA

19th June 2016

CHYUM MUNGGA DAW 1

ZEHKARIA 12:10-11; 13:1

Ya hti na gaw, myihtoi zehkaria a laika hta na rai nga ai. 

Madu gaw ning nga ai: Dawi a nta ntsa e mung, Yerusalem mare na ni a ntsa e mung, matsan dum chye ai hte, akyu hpyi nem ai myit ngai ru bun na nngai.

Dai shaloi e, shanhte galun waw ai wa hpe mu mada na mara ai; kasha shingtai a matu hkrap ai zawn, shi a matu hkrap ngu hkrap ngoi na mara ai: kasha alat a matu myit ru ai zawn, shi a matu myit ru na mara ai.

Dai shani e, Megido kadit hta e, Hadarimon a matu hkrap ngu hkrap ngoi rai nga ai zawn, Yerusalem mare hta e hkrap ngu hkrap ngoi kaba rai na ra ai.

Ya hti ai gaw karai kasang a mungga rai nga ai.

CHYUM MUNGGA DAW 2

GALITI 3: 26-29

Ya hti na gaw, Galati masha ni hpang de San Pawlu shagun dat ai laika hta na rai nga ai.

Hpu nau ni e, Nanhte yawng hte gaw Hkristu Yesu hpe kam sham ai a marang e Karai Kasang a kasha ni rai nga myit dai. Hkristu hta e kashin kamun hkam la ai ni nanhte yawng hte gaw, Hkristu hpe bu hpun dagraw la manit dai. Dai rai nna, Yuda hte Greeka n ginhka ai; mayam hte shanglawt n ginhka ai; lasha numsha mung n ginhka ai: nanhte yawng mayawng Hkristu hta e langai sha rai nga myit dai. Ya, nanhte gaw Hkristu hte seng nga myit dai majaw, Abraham a aru arat rai nga ai hte, dai ga ndat nga ai hte maren, sali wunli hkam la ai ni rai nga myit dai.

Ya hti ai gaw Karai Kasang a mungga rai nga ai.

KABU GARA SHIGA

LUKA 9: 18-24

Ya hti na gaw, luka a laika hta na kabu Gara Shiga rai nga ai.

Lang mi na Yesu gaw shi hkrai akyu hpyi nga yang, sape ni mung shi hte rau nga ma ai: shaloi shi shanhte hpe, "Shawa masha ni ngai hpe kadai shadu nga ma ta?" ngu nna san yu ai. Shanhte gaw, Yawhan Baptista; nkau mi gaw, Elia; nkau mi gaw, shawng na myihtoi langai ngai bai hkrung rawt ai, nga nna masha ni tsun shajang ma ai, ngu nna htan ma ai.

Bai Yesu gaw, "Nanhte mahtang ngai hpe kadai shadu nga myit ta?" ngu nna shanhte hpe tsun mu ai. Shaloi Petru gaw, Karai Kasang a Hkristu wa nang rai nga ndai, ngu nna htan wu ai. Dai lam kadai hpe mung n tsun mu ga, shi shanhte hpe ginhtim da mu ai. Yesu gaw sape ni hpe bai tsun ai gaw: Masha Kasha gaw nni nkri law law wa hkrum nna, agyi salang ni, hkinjawng agyi ni, tara sara ni e nyet kau ai hkrum na hte, sat kau ai hkrum nhtawm, masum ya nhtoi hta sharawt la ai hkrum na ra ai, ngu mu ai.

Bai yawng hte hpe Yesu tsun mu ai gaw: Nye a hpang hkan sa mayu ai wa kadai mung, tinang hkum hpe ndang kau nna, shani shagu tinang udang hpai let, ngai kaw hkan nang ru ga. Tinang a asak hkye la mayu ai wa kadai mung, asak sum na ra ai; nye a jaw e tinang a asak sum ai wa chyawm gaw, asak hkye la ai hkrum na ra ai.

Ya hti ai gaw Madu a Kabu Gara Shiga rai nga ai.

PRANWAN LADAW LABAN (11) MUNGGA

Yakhkak ai ngu ai gaw masha hkum shagu hkum hkra ra ai lam langai rai nga ai. Langai mi a yakhkak ai lam gaw langai mi hte nbung timung yawng gaw tinang a mayak mahkak hpe lai di ra na rai nga ai. Ndai zawn yakhkak ai lam ni hpe lai di ai shaloi kade daram galu kaba na ngu ai gaw tinang shakut ai hte yakhkak ai lam hta madung nga ai.

Yak ai ngu ai gaw, maga mi hku yu ga nga yang, tinang a matu ahkaw ahkang kaba rai nga ai. Hpa majaw nga yang awngdang ai, rawt jat galu kaba ai a shingdu hta yak hkak ai ngu ai hpe lai di ra nga ai. Yak ai ngu ai hpe lai di lu ai, grau nna tinang a asak aprat galu kaba na hte seng ai, gaw nnga nmai nga ai. Grau nna kaba ai yak hkak ai lam hpe lai di lu ai rai yang, grau nna kaba ai akyu ara hpe hkam la lu na re. 

Daini na kabu gara shiga hta grau nna kaba ai mara hpe hkyem sa lu ai num sha gaw Madu Yesu hpe sa daw jau ai lam hpe galaw lai wa sai. Mara nlu dum ai, shing nrai, mara kaji ni hpe hkyam sa hkam la lu ai masha ni gaw Madu Yesu hpe daw jau na matu malap kau ai hpe na lu ga ai. Grau nna kaba ai mara hpe hkyem sa hkam la lu ai wa gaw chyeju dum ai myit masin grau rawng nna daw jau lu ai re. Mara nlu dum ai, mara kaji galaw masha ni chyawm gaw galai shai na matu grau yak nna chyeju dum ai myit masin lu la na matu grau yak nga ai.

Anhte a asak aprat hta hkrum hkra ai mayak mahkak lam ni hpe ahkaw ahkang langai hku nna sawn la let Karai Kasang a chyeju a jaw e lai di lu ai hta n-ga, anhte a wenyi lam hta tianang a mara ni hpe dum shai nna Karai Kasang kaw nna hkyam sa lu la let chyeju dum ai myit masin hte tinang a htingbu wa hpe daw jau lu u ga.

TSAWRA MYIT HTE SAKHKRUNG HKAWM SA GA

Hparishe wa, Madu Yesu hpe shana shat sha na shaga ai rai tim, hpa majaw, htunghking nga ai hte maren hkungga ai lam n-galaw sai rai kun? Simon hpe yu yang, mying dang hkung ai ni law law hte chye hkat nga ai. Shawa masha ni a man hta Madu Yesu mying kaba ai hpe chye ai majaw, gum rawng gum tawng rai tsun shaga sai. Shawa num mai byin ai dai numsha hpe matsan dum let hkap la ai Madu Yesu hpe hpa majaw dinglun sai kun? Hparishe ni gaw, mara kap ai ni hpe shinggan kau ai, hpa nnawn ya ai hte dai ni hta ra kadawn ai shamai shatsai ya ai hte hkum tsup ai prat hpe shingdu yawn kau ai.

Mying hten ai, dai num sha gaw, masha ni e jahpoi asawng na lam chye nga ninglen, hpa majaw Madu Yesu hpang de sit sa nna sau chya ya ai rai? Madu Yesu hpe tsawra ai myit hte mara raw hkyem sa ya ai majaw chyeju dum ai myit ni a majaw rai nga ai. Shi a tsawra myit hpe n chye na ya ai sha majoi jai kau ai ngu myit la hkrum sai. Shagrit shanem ai hte myit malai lu ai myit masin hte, shi hpe, Karai Kasang a tsawra matsan dum myit madun ya ai wa hpe lak lai ai hte daw jau ya sai. Madu Yesu mung shi a galaw nga ai hte maren, dai zawn re ai mabyin kaw nna sharin achyin na lu gang shapraw la sai.

Madu Yesu gaw, dai hpaji chye ai nta madu wa rabbi hte mungshawa ni a sara a man e, hpa majaw, hka kap ai masha lahkawng a gashadawn hpe tsun ai rai ta? Ndai gashadawn gaw, mara n raw hkrum ai mayam wa a mabyin hte maren rai nga ai (Mt 18:23-35). Dai kaw na mayam langai wa mung law wa hkyem sa hkrum ai wa she matsan dum n chye, hkyem sa jaw n chye rai nga ai. hkyik hkam la ai tsawra myit gaw, mara raw hkrum nna san seng ai masin salum kaw nna lwi pru wa ai lam hpe Madu Yesu asan sha madun sai. “Tsawra myit gaw shut hpyit mara law law hpe magap da lu ai” (1 Pet 4:8), hte, tsawra ai myit gaw, Karai Kasang kaw na rai nga ai”(1 Yh 4:7). Numsha a laja lana htawng madun dan ai tsawra ai lam gaw, Karai Kasang a matsan dum lama ai hpe mu lu ai sakse rai sai.

Karai Kasang a matsan dum ai hte chyeju a majaw, nang chyeju dum nga ai kun? 

Masum ning Sasana magam hta, Madu Yesu gaw grai dam lada ai hku hkawm sa lai wa sai. Maria Magdalena mung, Madu Yesu, hte hkrum nna, satan sanit gawt kau hkrum ai ten du hkra yak hkak ai prat hta hkawm sa lai wa sai. Shi hpe zingri nga ai myit hpe shamai shatsai ya ai Madu gaw, Karai Kasang a tsawra ai myit hta mara raw ya ai lam a kabu myit pyaw ai hpe mung chye shangun sai. Hkrung rawt sai Madu hpe yawng a shawng mu hkrum na ahkaw ahkang mung lu la sai.

Madu Yesu hpe daw jau let hkan nang ai ni hta na marai mi gaw Yawhana ngu ai jan rai nga ai. Shi gaw Herod hkawhkam a kunhting wa Kuhta a madu jan rai nna sut su ai num rai nga ai. Ndai numsha yan hpe rau mu lu ai kaga shara mi chyum laika hta n nga ai. Rai yang, shan yan hpe ya na zawn rau sha hku hkau kanawn mazum let daw jau ai, Madu Yesu hta sadi dung ai lam gaw kaning rai byin wa sai kun? Teng sha wa, Madu Yesu hte Karai Kasang a mungdan lam kabu gara shiga gaw shan hpe galai shai ya sai. Ndai num sha yan, hpa ahkaw ahkang arawng aya mung n hpyi ma ai. Madu Yesu hpe chyeju dum nga let shagrit shanem ai hte daw jau nga ma ai. Shan yan a lu lawm tawn ai hte mung Madu Yesu jai lang lu na la sa masai.

 Anhte shinggyim masha ni a lai len gaw, tinang a matu ngu ai tingkyeng myit rai nga ai;  jaw ya na malai, lu la na hpe tam nga ai, hpang jahtum tai na hkrit nna yawng a shawng kaw nga mayu ai, daw jau na malai, daw jau hkam mayu ai. Madu Yesu zawn tingkyeng n myit ai sha sak jaw ap nawng ai tsawra myit hte manang ni hpe daw jau ai lam hpe kasi la let shakut lai wa sai ndai numsha yan hpe, anhte mung kasi la mai nga ai. Madu Yesu hpe sharawng awng ai myit hte daw jau ya nna lu la ai kabu gara ai lam hpe nang chye nga ai kun?

“Madu Yesu e, Nang Madu madun ya ai tsawra ai hte chyeju dum ai myit  hte ngai a salum hpe jahpring ya rit. Tsawra ai myit, gam jaw gam ya ai myit hte kaga masha ni hpe mung daw jau lu na ndut ndang myit hte kabu gara ai lam ngai hpe jaw rit law."

PRANWAN LADAW LABAN (11) CHYUM LAIKA

12th June 2016

CHYUM MUNGGA DAW 1

2 SAMUELA 12: 7-10. 13 

Ya hti na gaw, Samuela a laika lahkawng hta na rai nga ai. 

Dai aten hta Nahtan gaw Dawi hpe tsun wu ai gaw: Israela a Madu Karai Kasang ning nga ai: Israela masha ni a hkawhkam tai na, ngai nang hpe namman chya ya ni ai; Sawlu a lata na mung Ngai nang hpe hkye la sade ai; na madu a shayi sha hpe mung, shi a madu jan ni hpe mung na a lahpyen e ngai ap ya sade ai; Israela amyu hta Yuda amyu hpe Ngai nang hpe ap ya sade ai; dai hta n law yang, dai hta grau nna chyeju kahtap jaw na Ngai hkraw nga nngai.

Dai re ai mi, n hkru n kaja ai amu galaw nna, Madu a tara hpe hpa rai n gawn n sawn di kau nta? Hiti masha Uria hpe nang sat kau nna, shi a madu jan shaw la nit dai; gaja wa, Ammon a kashu kasha ni a nhtu hte nang shi hpe sat kau nu ai. Ya chyawm gaw nang Ngai hpe n gawn n sawn di kau nna, Hiti masha a madu jan hpe, na a madu jan di na matu woi la nu ai majaw, na a amyu matu ni nhtu hte hkrai kadup na mara ai, ngu nna Nahtan gaw Madu a mungga htawn tsun wu ai.  Shaloi Dawi gaw, Madu hpe ngai shut hpyit kau se ai, ngu nna Nahtan hpe tsun wu ai. Nahtan mung, nang galaw ai shut hpyit mara hpe Madu raw kau nu ai; nang hkum si na n rai, ngu wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

GAlATI 2: 16. 19-21

Ya hti na gaw, Galati masha ni hpang de San Pawlu shagun dat ai laika hta na rai nga ai.

Hpu nau ni e, masha gaw jep ai tara hpe hkan shatup ai majaw n rai, Hkristu Yesu hpe kam sham ai majaw sha ding hpring nga lu ai hpe anhte chye nga ga ai. Dai majaw, nanhte gaw Yesu Hkristu hpe kam sham ra ai hte maren, anhte mung Shi hpe kam sham ai ni tai wa saga ai. Ya e, jep ai tara hpe hkan shatup ai majaw n rai, Hkristu hpe kam sham ai a marang e anhte ding hpring wa lu ai lam hta, myit maju jung nga ga ai; kaning rai nme law, jep ai tara hpe hkan shatup ai hte kadai mung ding hpring wa lu ai n rai.

Ngai tsun mayu ai gaw: Karai Kasang a matu mara ngai hkrung nga lu n ga, dai jep ai tara a marang e, jep ai tara hte si ai hte maren hka mat ni ai. Ngai gaw Hkristu hte rau udang hta jen da ai hkrum nngai: ya e, nye a asak hte nan ngai naw hkrung nga ai n rai; ngai hta e rawng nga ai Hkristu a asak hte ngai hkrung nga nngai: ngai hpe tsaw ra nna, nye a matu shi hkum hpe nawng ya ai, Karai Kasang a Kasha hpe kam sham ai hte ngai hkrung nga nngai. Karai Kasang a chyeju kumhpa hpe ngai kau da na n rai: ding hpring ai chyeju gaw dai jep ai tara kaw na rai yang, Hkristu kaman lila sha si hkam kau nu ai.

Ya hti ai gaw Karai Kasang a mungga rai nga ai.

KABU GARA SHIGA

lUkA 7: 36-50

Ya hti na gaw, luka a laika hta na kabu Gara Shiga rai nga ai.

Hparishe langai mi gaw shi a nta e shat sha na Yesu hpe shaga wu ai. Dai Hparishe a nta de Yesu shang nhtawm shat sha na dung nga ai shaloi, dai mare na amying n kaja lu ai numsha langai mi shang nga ai. Yesu gaw dai Hparishe a nta e dung nga ai hpe shi chye wu yang, mura sau rawng ai lunghpraw gawm la sa nhtawm, shingdu maga Yesu a lagaw nhpang e hkrap nga let, Madu a lagaw hpe myiprwi hte madit ya wu ai rai nna, shi a kara hte katsut kau ya wu ai: Madu a lagaw hpe mung shi pup nna, mura sau hte chya wu ai.

Yesu hpe shaga ai Hparishe wa dai hpe mu jang, Ndai wa myihtoi rai yang gaw, shi hpe hkra ai numsha gaw, kadai hte kaning re ai numsha re ai mung, amying n kaja lu ai jan rai nga ai mung, shi chye na wu ai, nga nna shi a kraw e myit nga ai. Dai rai nna, Yesu gaw, Simun e, ngai nang hpe tsun shara lama mi nga ai, ngu wu ai. Simun gaw, Madu e, tsun u, ngu wu ai.

Shaloi Yesu gaw, Gumhpraw hkoi ya ai wa langai kaw, hka kap masha lahkawng nga ai: langai wa mi hta lap manga tsa, langai wa mi hta manga shi kap ai. Dai yan hka wa na n lu ma ai majaw, hka madu shan lahkawng hpe shalawt dat mu ai. Shing re ai majaw, dai yan hta kadai wa mahtang shi hpe grau tsaw ra ma ta? ngu nna simun hpe tsan wu ai.

Simun gaw, Grau law shalawt ya ai wa rai na re ai, nawn nngai, ngu nna htan wu ai. Yesu gaw, Nang daw dan lajang ai hku rai nga ai, ngu wu ai. Shaloi dai numsha hpe nang mu da nni? Ngai na  nta de shang tim, lagaw shin na ntsin nang n jaw ndai: shi chyawm gaw myiprwi hte nye a lagaw madit ya nna, shi a kara hte katsut kau ya ni ai.

Nang ngai hpe n pup ndai: shi chyawm gaw, ngai nhku de shang ai kaw nna, nye a lagaw hpe pup n sim nga ai. Nye a baw hpe namman n chya ya ndai: shi chyawm gaw, nye a lagaw hpe mura sau chya ya ni ai. Dai lam a majaw ngai nang hpe tsun de ga: dai numsha gaw shi a law la ai mara raw dat kau ya ai lu la nu ai rai nna, ndai daram tsaw ra ai myit madun dan sai; loi mi sha raw dat hkrum ai wa chyawm gaw loi mi sha tsaw ra nga ai, ngu nna tsun wu ai.

Dai numsha hpe mung, Na a mara raw dat kau ya sade ai, ngu nna Yesu tsun wu ai. Rau dung nga ai ni gaw, Mara nan raw dat kau ya lu ai ndai wa gaw, kadai wa rai ta? nga nna myit shajang ma ai. Yesu gaw, Na a kam sham ai gaw nang hpe hkye la nit dai; a pyaw sha wa nu, ngu nna dai numsha hpe tsun dat wu ai.

Ya hti ai gaw Madu a Kabu Gara Shiga rai nga ai.

YESU A SALUM NINGSANG POI LABAN MUNGGA 2016

“Manang wa kaja jang tinang mung kaja na re” ngu ai ga malai nga ai hte maren manang wa gaw tinang hpe nkaja ai amu magam galaw yang tinang mung nkaja ai hku matai htang na re ngu ai lachyum mung pru nga ai. Tinang kaning re bai htang nna galaw na gaw manang wa kaw madung nga ai. Tinang kaja na nkaja na gaw manang wa hte seng ai ngu nna mung sawn la mai nga ai.

Madu Yesu a Salum ningsang poi hpe galaw sa ai shaloi Madu Yesu a myit masa hpe myit sawn sumru kasi la mai nga ai. Madu Yesu gaw yawng mayawng, kaja ai hte nkaja ai masha yawng hpe maren mara n-ging hka ai sha tsawra ai hpe mu lu ai. Dai hta n-ga, nkaja ai masha ni hpe kaja shangun lu na matu Shi hkum nan hkan tam nna bai woi wa ai hpe mung mu lu ga ai. Madu Yesu galaw sa ai mai kaja ai amu bungli ni gaw Shi a makau grup yin kaw nna masha ni Shi hpe kaning rai galaw na ngu ai hta madung ntawn da ai sha, Shi hkum na myit masin kaw nna mai kaja ai myit rawng ai a majaw rai nga ai.

Madu Yesu a Salum Ningsang Poi hpe daini anhte galaw sa ai shaloi Shi Madu Karai Kasang zawn mai kaja ai amu bungli ni hpe manang ni anhte a ntsa kaja ai a majaw sha nre ai sha, nhkru nkaja ai masha ni a lapran hta mai kaja ai amu bungli ni hpe matut manoi galaw sa lu na matu anhte a myit masin hta jet ai tsaw ra myit hpe gaw gap da lu u ga.

TSAWRA MYIT HTE HPRING TSUP AI YESU A SALUM NINGSANG

Anhte shinggyim masha ni a Salum gaw tsawra myit a masat kumla rai nga ai hte myit mang, tsun shaga, shamu shamawt lam mahkra a npawt rai nga ai. Valentine day hta store seng hkan e, Salum sumla ni shara shagu hta shakap da ai hpe mu lu na re. Dai ni na aten hta, lata lahkawng maga hte Salum kumla galaw nna, tinang a tsawra myit, tsawra ai lam hpe htawng madun dan ma ai. Laika ni hta mung, sumla hkung ni hta mung, dai salum kumla hpe, tsawra myit hte la kap nna grai madun, shadan dan ma ai.

Nawku hpung hta Yesu a salum Ningsang poi kaba hpe Wasarabyin Pius IX gaw 1856 ning kaw nna woi awn galaw ai rai nga ai. Hpa majaw ndai poi hpe galaw ai rai ta? Yesu a Salum ningsang poi hpe galaw ai gaw, anhte hpe tsawra matsan dum n jin ai Yesu hpe chyeju dum shagrau ai lam mung rai nga ai.

Masha a hkum hkrang hta masin salum gaw, tsawra ai, n ju n dawng ai, kabu pyaw ai, yawn ai, myit machyi ai, hkrit tsang ai, matsan dum ai, myit daw ai zawn re ai, myit a shamu shamawt lam mahkra hpe hkam sha chye ai shara re ai hpe masha ni kam ma ai. Chyum laika hta shaleng da ai masha a salum gaw dai hta grau nga ai. Masha a masin salum gaw Karai Kasang hte tsaw ra kam sham matut mahkai ga shaga ai daju rai nga ai. Shada da tsawra nga ga (1Yh 4:11) nga ai hte maren anhte grai tsawra hku hkau ai masha ni, grau nna shanhte ru yak jam jau hkrum nga ai ten hta jahkring hkring myit dum kyu hpyi ya chye nga ga ai. Dai ten Madu Yesu mung anhte he rau shanhte a matu kyu hpyi ya nga ai hpe myit dum la mai nga ai.

 Dai ni na kabu gara shiga hta mung, dai salum a tsawra myit kaba la ai hpe anhte mu chye lu nga ai. Grau nna kasa Luka a laika, daw kaba 15 ting hta “mat mat ai” (sagu kasha, gumhpraw, kasha kaji) ni a gashadawn hkrai rai nga ai. Madu Yesu hpe sagurem wa kaja nga nna anhte shagrau ai gaw, Shi a sagu hpung ting a matu wudang ntsa hta asak si hkam ai du hkra anhte hpe tsawra ai lam sakse madun ai majaw rai nga ai. Dai kasha Karai Kasang hpe anhte lu la ai gaw anhte ging dan ai majaw n rai nga ai. “kaning rai nme law, Karai Kasang a kasha hpe kam sham ai ni n lang hte gaw, hten bya n hkrum ai sha, htani htana asak lu la mu ga nga, Karai Kasang gaw Shi a kasha shingtai hpe jaw kau ai du hkra mungkan ga hpe tsawra wu ai” (Yh 3:16). Kawa Karai Kasang a tsawra myit kaba hpe mung anhte mu chye lu saga ai. Dai tsawra matsan dum chye ai salum ningsang ni hpe mu, chye, hkam sha sai anhte ni, mungkan ga ntsa e nga pra sa wa na hpa hkrit tsang shara n nga sai. Lama na lam dam mat wa ai rai yang mung, sagurem wa kaja Yesu gaw anhte hpe mu la ai ten du hkra hkam tam la nna shi a lahpa hta mara hpai let n ta de bai woi wa na rai nga ai. Shi a Salum ningsang na chyeju ni hte n-hka mat ai sha hkawm sa na anhte a matu grau nna mai kaja nga ai. Ngwi pyaw shimlum ai prat hta anhte hkawm sa lu na re.

Dai ni na Poi nhtoi hpe myit dum galaw ai hte rau saw shaga ai lam mung rai nga ai. Madu Yesu gaw, Shi Salum de shang wa na matu anhte yawng hpe saw shaga nga ai. Shi Madu a Tsawra myit hta anhte hkum nan du shang ai marang e, dai Salum gaw, anhte a wunma kap ai salum ni hpe shamai shatsai ya nna, anhte a myit mada shara hpe sharawt ya nna, hkrit kajawng ai kaw nna anhte hpe hkye hkrang la na rai nga ai. Shi Madu a tsaw ra myit gaw kade wa kaba la nga ai hpe kalang mi bai dum chye lu na matu anhte hpe saw shaga nga ai. Anhte a shut hpyit mara ni, gawng kya ai lam ni, anhte hpe pat shing dang da lu na n rai. Madu Yesu a salum hta anhte a hkum hkrang, wenyi, kun dinghku, amu magam, yawng mayawng hpe ap tawn da nna kam hpa shamyet let sak hkrung hkawm sa nga ga! Madu Yesu a Salum hta kam sham ai hte akyu hpyi ap nawng nga ga! Anhte hta ra kadawn nga ai shaman chyeju ni hkrak sha lu la na re.

Dai re ai majaw, dai ni jang, Madu Yesu a saw shaga ai lam hpe hkap la ga. Madu Yesu a Salum ningsang hta na a myi hpe azi yu mada nga u. Shi Madu a tsawra myit gaw anhte hta lwi shang du wa nna, Sumsing Lamu de du hkra anhte hpe woi wa lu ga law.

"Madu Yesu a grit nem ai hte sumnum shingdi ai salum e, anhte a salum hpe mung, Nang Madu a Salum hte bung hkra sharai ya rit law."  

YESU SALUM NINGSANG POI CHYUM LAIKA 2016

5th June 2016

CHYUM MUNGGA DAW 1

EZEKELA 34: 11-16  

Ya hti na gaw, myihtoi Ezekela a laika hta na rai nga ai.

Madu Karai Kasang ning nga ai: Yu u, ngai hkum nan nye a sagu ni hpe rem nna hkan tam na nngai. Sagu rem wa gaw, bra nga ai sagu ni hpe hkan tam shakut ai hte maren, ngai mung nye a sagu ni hpe hkan tam na nngai. Lamu mu nna nsin sin ai shani e, shanhte bra wa ai shara shagu hkan, ngai  shanhte hpe woi wa na nngai. Amyu baw ni hta na, ngai shanhte hpe shapraw la nna, mungdan ni hta na shinggyin la nhtawm, tinang a buga de woi wa na nngai; Israela bum ga ntsa e mung, hka kau hkan e mung, masha shanu ai shara shagu hkan e mung, ngai shanhte hpe rem na nngai.

Udat shara kaja hta ngai shanhte hpe rem na nngai; tsaw la ai Israela bum ntsa e shanhte a ulawng rai na ra ai; dai yang e ulawng kaja hta, shanhte hpum nga na mara ai; Israela bum ntsa e tsit lali ai udat shara hta shanhte sha nga na mara ai. Ngai hkum nan nye a sagu ni hpe bau na nngai; shanhte hpe hpum shara madun dan na nngai. Dam mat ai sagu hpe hkan tam nngai; masha ni gawt mat wa ai sagu hpe, hkan mawai la na nngai: nra daw ai sagu hpe ahkyen kayawp na nngai: gawng kya ai sagu hpe n-gun shaja na nngai; sau hpum ai ni hte n-gun ja ai ni hpe chyawm gaw ngai yu yu na nngai: kaja ai sagu rem wa zawn ngai shanhte hpe bau na nngai, nga nna Madu tsun ai.

Ya hti ai gaw Karai Kasang a mungga rai nga ai.

  

CHYUM MUGGA DAW 2

ROMA 5: 5-11

Ya hti na gaw, San Pawlu Roma masha ni hpang de shagun   dat ai laika hta na rai nga ai.

Myit da ai gaw kaman lila n rai nga ai; kaning rai nme law, anhte hpe jaw ya sai Chyoi Pra Wenyi gaw, Karai Kasang a tsaw ra ai myit anhte a masin salum hta e ru bang ya mani ai. Anhte hpa n byin lu ai shaloi, Shi lajang da ai aten hta, Hkristu gaw shut hpyit ai masha ni a matu si hkam sai.

Kaja ai masha a matu pyi si hkam na n loi ai; kaja wa teng teng ding hpring ai wa a matu chyawm gaw si hkam ya ai gwi ai masha nga yang nga nhten. Rai ti mung, anhte mara kap nga ninglen, Hkristu anhte a matu si hkam ya ai gaw anhte hpe Karai Kasang tsaw ra nga ai lam a sakse rai nga ai.

Anhte ding hpring wa lu na matu Shi pyi si hkam ya sayang, Karai Kasang a pawt sindawng ai hta na gaw, Shi anhte hpe n hkye la ai nga na i? Anhte hpyen ni naw rai nga yang pyi Shi a Kasha a si hkam ai hte htinglu htinglai ngut ai hpang, Shi a asak sumdam hta e anhte hkye hkrang la ai hkrum na hpe grau nna myit mada lu ga ai. Dai sha n-ga, anhte Madu Yesu Hkristu a marang e, Karai Kasang hta nachying kabu gara nga ga ai. Dai Madu Yesu a majaw htinglu htinglai ai chyeju hpe, anhte ya hkam la saga ai.

Ya hti ai gaw Karai Kasang a mungga rai nga ai.

 

KABU GARA SHIGA

LUKA 15: 3-7 

Ya hti na gaw, luka a laika hta na kabu Gara Shiga rai nga ai.

Yesu gaw Hparishe ni hte tara sara ni hpe ndai ga shadawn tsun mu ai gaw: Nanhte hta, sagu latsa lu nna langai mi mat yang, dai jahku shi jahku hte hpe nam e naw tawn da nhtawm, mat ai sagu hpe mu la hkra n hkan tam ai, kadai wa nga na rai ta? Dai hpe mu la jang mung, kabu gara ai myit hte kahpa hta mara hpai nna, shi a nta de du wa jang, jinghku jingyu ni hte htingbu htingbyen ni hpe shaga nna, ngai hte rau kabu gara nga ga, nye a mat ai sagu hpe ngai bai mu la se ai, nga na ra ai.

Nanhte hpe ngai tsun made ga, dai hte maren myit malai shara n nga ai, ding hpring ai masha jahku shi jahku a majaw kabu gara ai hta, myit malai lu ai mara kap ai masha langai mi a majaw, sumsing lamu kata e grau nna kabu gara shara rai na ra ai.

Ya hti ai gaw Madu a Kabu Gara Shiga rai nga ai.