PRANWAN LADAW (18) LABAN SHANI NA MUNGGA

“Masha a prat gaw pandung nre, hkrun lam re” ngu ai English ga malai nga ai. Ndai ga malai a yaw shada ai lam gaw shinggyim masha a aprat hta tinang yaw shada ai pandung du na matu shakut shaja nga ai shaloi pandung du jang she myit pyaw myit dik na nre. Ndai pandung du na matu shakut ai hkrun lam gaw myit pyaw myit dik na matu ahkyak nga ai.

Madu Yesu a asak aprat hte shi a hpang hkan nang ai ni hpe yu ai shaloi hpang jahtum na aten hta lu la na akyu ara ni hpe myit mada nna shakut shaja lu ai sha nrai. Shanhte hkum nan shani shagu galaw sa ai lam ni gaw shanhte a matu myit pyaw myit dik ai lam hpe jaw ya ai majaw amu magam law law hpe awngdang lu nga ai.

Ndai zawn myit pyaw myitdik ai lam hpe lu la na matu gaw kaning re ai aten, arung arai, ja gumhpraw, arawng sadang lu yang she ngu ai hta n-madung ai sha kaning re ai aten hta raitim tinang hkawm sa ai hkrun lam hta myit pyaw myit dik na matu gaw ahkrak nga ai.

Dai rai yang ndai mungkan ntsa hta bu hkawm nga ai anhte ni gaw Karai Kasang hta maju jung nna tinang galaw sa ai amu bungli ni hpe sharawng awng let pandung langai du na matu shakut shaja ai lam hta myit pyaw myit dik ai lam hpe hkam la lu u ga.

SUMSING SUT GAN HPE TAM MAHKAWNG CHYE RA

Sali wunli garan la na manghkang byin nga ai hpu nau yan a lapran, hpran ya na hpe Madu Yesu, hpa majaw ningdang kau ai kun? Shi Madu mu mada ya ai gaw, tara rap ra lam hte sharap shara lam nrai, namak lawhpa ai hte lu lawm lam a majaw rai nga ai. 

 Dai hte seng nna, Madu Yesu gaw, sahti angawk langai mi a lam gashadawn tsun dan sai. Rai yang, dai sun hkauna kaba lu ai wa hpe, Madu Yesu gaw mana/angawk ngu nna tsun ai rai kun? Madu Yesu, dai sahti wa a chye tam galaw ai, sutsu hkra galaw lu ai lam ni hpe mara shagun ai n rai, ‘ngai na, ngai a’, ngu ai namak law hpa, tingkyeng chyu myit ai a majaw rai nga ai.

Ndai gashadawn gaw, Lazarus hpe nra sha pyi n kam jaw sha ai sahti wa a lam gashadawn hte mung bung nga ai. Sahti angawk wa gaw masha kaga a matu myit ya na myit masin shamat kau nu ai. Shi a prat gaw, shi a arung arai ni hta, shi hkum shi hta sha myit let aten jahtum kau sai. Shi a wenyi mung shi si ai hte sum mat sai.

Ndai sahti angawk wa a lam hta, Madu Yesu sharin ya mayu ai gaw, tinang a ja/gumhpraw sut su ai hpe kaning rai sung lang na ngu ai re. Gam jaw gam ya ai hta anhte bai lu la ai re. Karai Kasang man hta sut su nga ai ni gaw, ndai prat hta sha nrai, htani htana prat hta pyi n hpaw n-ya lu la na rai nga ai.

Karai Kasang man hta sut su ai wa ngu ai shaloi, ja, sutgan law law lu ai hpe ngu ai n rai. Karai Kasang a laklai ai shaman chyeju, htoi kabrim ai myit mada shara lu ai wa rai nga ai. Shi gaw sutsu ai lam hpe tsaw nga ai n rai, ding hpring dingman ai hpe tsaw ai rai nna, sut rai kachyi mi sha hta ram dum nga ai. Ra kadawn nga ai matsan masha ni a matu shi a nta chyinghka hpaw da nna, yawn hkyen hkrum nga ai ni hpe mung, shi a n-gun atsam yawng hte shalan shabran ya nga ai. Shi a sutgan hpe Sumsing Lamu hta mahkawng da ai wa rai nga ai.

Dai ni na gashadawn hta; “Na a sutgan gara kaw rai ?” ngu ai gasan hpe Madu Yesu san nga ai. Sut gan gaw anhte a masin salum hte grai matut mahkai nga ai. Anhte a masin salum hta manu shadan dik ai gaw, anhte a hpu reng dik htum ai sutgan rai nga ai. Rai yang, nang hpa hpe manu shadan dik ai rai?

“Madu Yesu e, lu lawm mayu ai ngai a myit, masha kaga ni hte seng ai hpe ra marin ai ngai a myit hpe shalawt la rit law. Arai yawng mayawng hta, Nang Madu hpe chyu sha sharawng awng ai myit lu mayu nngai. Nang Madu shaman jaw da ai chyeju sut gan ni hpe mung, Nang Madu a hpung shingkang grau htum wa na matu hte, ra kadawn ai htingbu wa a mai kaja lam a matu sung lang lu na, ngai hpe garum la rit law!!!

PRANWAN LADAW (18) LABAN SHANI NA CHYUM LAIKA

CHYUM MUNGGA DAW 1

HPAJI BYENG-YA 1:2; 2:21-23

Ya hti na gaw Hpaji Ningli laika hta na rai nga ai.

Kaman lila, kaman lila, nga nna Tara Hkaw Ningbaw Wa tsun nga ai. Kaman lila, kaman lila, yawng mayawng kaman lila hkrai rai nga ai.

Masha langai ngai chye chyang ai hpaji hte, amu bungli amyu myu galaw shapraw ti mung, dai amu hta hpa n shakut lawm ai wa a matu htawng da ya ra ai majaw, dai mung kaman lila hte tsinyam kaba rai nga ai.

Masha gaw jan a npu e amu galaw shaja nna, shi a shakut sharang ai lam a majaw, hpa akyu lu la a ta? Shi gaw shi a prat tup yawm hkyen ai hkrum sha nna, shi a amu bungli ru yak ai hkrai rai nga ai; gaja wa, shana e pyi shi myit awai lu ai n rai. Dai mung kaman lila hku rai nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2               

KOLOSE 3: 1-5. 9-11

Ya hti na gaw, kolose masha ni hpang de San Pawlu shagun dat ai laika hta na rai nga ai.

 Nanhte gaw Hkristu hte rau teng man ai asak de bai rawt wa manit dai majaw, Hkrsitu gaw Karai Kasang a hkra maga e dung nga ai lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang  mungdan a lam ni hpe myit manoi nga mu. Nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung Shi hte rau hpung shingkang hta dan pru na marin dai.

Dai re ai majaw, dinghta ga na arawn alai hpe nanhte hta e jasim tawn kau mu: dai arawn alai gaw, nse nsa ai amu, awu asin re ai, ngang kayut ai, n kaja ai hpe marin marit ai myit hte, hpara sumla hpe nawku ai hte bung nga ai, nammak lawhpa lam ni rai nga ma ai.

Shada da masu magaw ga hkum tsun myit. Nanhte a gawng shingyan dingsa hte rau, arawn alai dingsa hpe mung raw kau nna, gawng shingyan nnan hpe dagraw la manit dai. Dai gawng shingyan nnan gaw, Hpan Wa Ningsang a hkrang sumla hte grau nna bung wa magang, Karai Kasang hpe chye chyang ai hta grau nna kup tsup wa magang rai nga ai.

Shaloi e, Yuda masha hte Greka masha, matu gadoi hkam ai wa hte matu gadoi n hkam ai wa, garing garang re ai masha hte Skuti masha, mayam wa hte shanglawt wa ngu nna, n mai ginhka ai: Hkristu chyu sha nga ai: Shi gaw yawng mayawng rai nga ai hte, yawng mayawng hta e nga nga ai. 

Ya hti ai gaw Karai Kasang a mungga rai nga ai.

KABU GARA SHIGA

LUKA 12: 13-21

Ya hti na gaw, luka a laika hta na kabu Gara Shiga rai nga ai.

Lang mi na, shawa hpawng kata de masha langai mi gaw, Sara e, ngai hpu wa hpe ngai hte sali wunli karan la na lam tsun ya e, ngu nna Yesu hpe tsun wu ai.

Yesu gaw, Jinghku wa e, nan a ntsa e tara agyi hte hparan wa tai na, ngai hpe kadai san da a ta? ngu nna shi hpe htan wu ai.

Shaloi shawa masha ni hpe Yesu tsun ai gaw: Nammak lawhpa ai myit mahkra hpe hkap shadang lu hkra, sadi ai hte maja nga mu. Kaning rai nme law, masha gaw sutgan law law lu ti mung, dai sutgan shi a asak hpe rem sin nga ai n rai, ngu mu ai.

Ndai ga shadawn mung Yesu hkai dan wu ai: Sahti langai mi a yi hkauna gaw nsi naisi hkai nmai grai kaja lu ai. Dai rai nna, dai wa gaw, Ngai kaning di na i? nye a nsi naisi shinggyin da na shara ngai n lu nngai, ngu nna myit yu nga ai. Shaloi shi gaw, Ngai ning rai galaw na we ai: nye a mam dum dingsa ni hpe ngai run kau nna, grau kaba ai galaw na we ai: dai ni hta nye a nsi  naisi hte sut rai mahkra hpe ngai shinggyin da nhtawm, ngai hkum hpe ning ngu na we ai: Nye a myit masin e, shaning law law a matu, arai kaja law law hpe nang mahkawng da nit dai. Myit hkum ru sa; lu nu, sha nu. pyaw pyaw rai nga u, ngu nna tsun na nngai, nga ai.

Shaloi Karai Kasang gaw dai sahti wa hpe, Masha angawk e, dai na jang na a asak hpe dawm la kau ya na ra ai: dai rai nna, nang mahkawng shachyip da ai arai ni gaw, gade a matu tai na ra ta? ngu wu ai.

Tinang a matu sutgan mahkawng da nhtawm, Karai Kasang hta n lu n su ai wa gaw, dai zawn re ai masha rai nga ai, ngu nna Yesu shanhte hpe tsun mu ai.

Ya hti ai gaw Madu a Kabu Gara Shiga rai nga ai.

KANU KAWA POI SHANI NA MUNGGA

Karai Kasang a shaman chyeju gaw masha hkum shagu hta hkam la lu nga ai. Karai Kasang gaw anhte kashu kasha ni ngamu ngamai na matu ra ai hpe jaw ya nga ai. Dai rai yang anhte lu la sai shaman chyeju ni hpe manu shadan nna jai lang na gaw anhte a lit rai nga ai.

Dai hte maren anhte hta ra ai lam ni hpe mung shi Madu kaw nna hpyi la mai nga ai.

Dai ni na Kabu Gara Shiga hta anhte ra ai hpe hpyi la na matu sharin ya nga ai. Shi Madu, Kawa Karai Kasang kaw tawn da ai myit masa hte akyu hpyi ai shaloi myit ndaw nhten ai sha hpyi ra ai lam hpe kasi la mai nga ai. Dai hta n-ga Karai Kasang jaw ya ai mahtai hpe hkap la lu na matu mung ahkyak nga ai. Hpa majaw nga yang Karai Kasang gaw mahkra dang chye ai majaw anhte hte kaning re ai akyu ara ni hkuk ai hpe grau chye ai majaw rai nga ai. Grau nna anhte hpyi ai hpe nlu la shi ai shing nrai, nlu la ai aten ahkying hta myit ndaw nhten ai sha matut nna shi Madu hta manoi manat kamsham lu na matu ahkyak nga ai.

Dai rai yang akyu hpyi ai shaloi myit masin san seng ai hte Karai Kasang hpang de myit ndaw nhten ai sha hpyi lu na matu hte Karai Kasang myit ra ai hpe hkap la lu na matu shakut shaja sa  wa ga.

NA A AKYU HPYI AI LADAT JAW NGA AI KUN?

Karai Kasang hpe “Sumsing Lamu na anhte a Wa e, ngu shaga nna, Shi Kasha ni anhte hta ra kadawn ai lam yawng hpe gwi gwi hpyi na matu, Madu Yesu sharin ya sai. Karai Kasang hpang de gwi gwi sa na matu, Madu Yesu gaw si hkam ai hte bai hkrung rawt ai marang e anhte a matu lam hpaw ya sai. Karai Kasang kaw nna garum hpyi shawn ai shaloi, anhte lu la ging ai ngu ai hpe jaw na n rai. Tim, shaman chyeju hte matsan dum ai hte bai htang ya na rai nga ai. Madu Karai gaw anhte hpe tsawra ai hte mara raw ya ai zawn, anhte a htingbu ni hpe mung dai hte maren anhte galaw na myit mada nga ai. Sumsing lamu na Kawa Karai gaw, Shi a Kasha, anhte ni hpe tsawra ai majaw, kamsham myit kaba hte akyu hpyi mai nga ai. Kaja ai lam anhte hpe jaw ya na Madu Karai kabu pyaw nga ai.

Madu Karai a tsawra ai hte chyeju ningsang gaw Shi Madu a chyeju ningsang hte atsam a marang e, Madu Yesu sharin ya ai zawn, anhte shada da mung tsawra ai hte chyeju dum ai myit hte daw jau lu na re. Nang a manaw manang ni hpe shanhte hkrum ging ai hte maren galaw ai kun? (snr) Madu shanhte hpe galaw daw na zawn chyeju ningsang hte, tsawra myit hte rai kun? Madu Yesu sharin ya ai hta; Karai Kasang hpe anhte shut ai mara  a matu hpyi nem tawng ban ai shaloi, masha kaga ni tinang hpe shut ai hpe mung hkyem sa ya na lam lawm ai. Madu Yesu mara dat hkyem sa jaw ai zawn, nang mung galaw lu na rai kun? 

Shana aten du ai manam gashadawn;

Karai Kasang anhte hta hpa hka mung n kap ai hte anhte ni mung Shi Madu a chyeju hte ningshawng jaw ai hpe n hkam la ging ai ni re ngu myit dum yang, Karai Kasang kaw nna anhte hpa mi naw myit mada nga na rai ta? Karai Kasang gaw galoi mung anhte hpe kaja dik ai sha jaw na matu jin jin rai nga sai hpe, Madu Yesu gaw shi a aten hta na htunghking lai masa hta anhte hpe htawng madun dan sai. Chyum laika na aten hta rai yang, kadai manam hpe (chye ai/ chyasam) rai tim alum ala hkap tau la nna, (lagaw kashin ya ai lam mung lawm ai), tinang hta nga ai kaja dik ai lu sha hte hkap daw na htung lai tara nga ma ai. Gara aten hta manam du shang wa ai rai tim, nang galaw nga ai bungli hpe jahkring kau nna, manam hpe daw jau let shara lajang ya ra ai. Tinang a n’ta masha ni hte manam a matu yup shara lajang ya ra ai. Tinang a n’ta masha ni hte manam a matu yup shara n law ma yang, n’ta masha ni gaw, shinggan de pru nna byin mai ai shara hta yup ra ai. Mare kahtawng de manam du shang wa ai rai yang, manam hpe gawn lajang na lit gaw buga masha ni yawng hta lit nga ai.

 

Karai Kasang anhte n’tsa nhpaw n-ya myit;

Lama na, htingbu ni pyi, shana yup tung ten, muk tawng atik anang hpyi mai ai rai yang, Sumsing lamu na anhte a wa gaw, kaning re ai mabyin masa, ladaw hta rai tim, tsawra myit hte n jaw ai sha nga na kun? Madu Yesu sharin tsun dan ai hta pyi grau nna Sumsing Lamu na Kawa Karai gaw jaw ya na ra nga ai. “yup ngu n nga ai Karai Kasang kaw, anhte mung n-yup ai sha hpyi ai rai yang, grau law hkra pyi jaw ya na rai nga ai” nga nna (San Augustine of Hippo, 340-425 AD) shadum ya ai. Anhte hta ra kadawn ai lam ni hpe sumsing lamu na Kawa Karai gaw jan hkra jaw ya na re lam Madu Yesu gasadi da sai. Karai Kasang gaw kaja dik ai hpe anhte hpe jaw ya na re. Shi Madu a Chyoipra ai wenyi hpe pyi anhte n’tsa e ru jaw ya ai marang e, Karai a shaman chyeju law law hpe hkam la shangun sai. Sumsing Lamu na Kawa Karai hpang de, na a ntsa tsawra matsan dum nga ai hte maren, kam sham myit kaba hte nang sit shang nga ai kun?

“Sumsing Lamu na anhte a Wa e, Nang gaw tsawra let, matsan dum ai hte chyeju jaw ya nga ai. Madu Yesu a sape ni, hpu nau ni anhte rai nga sai hta n-ga, Nang Madu Karai a kashu kasha ni rai nga sai a jaw e, grau nna kam sham, myit mada tsawra ai hte shaman chyeju ningsang, n taw n tsang lu la na matu galoi mung hpyi nga ga ai law!”

KANU KAWA POI SHANI NA CHYUM LAIKA 2016

KANU KAWA POI

24th July 2016

CHYUM MUNGGA DAW 1

NPAWT NHPANG 18: 20-32

Ya hti na gaw, Npawt Nhpang laika hta na rai nga ai.

Madu gaw Abraham hpe tsun ai gaw: Sodom mare hta Gomorra mare a ntsa e mara gade wa shagun ma hka! Shanhte a shut hpyit ai gaw kaba la nga ai majaw, ya ngai sa yu nna, ngai kaw hkrang pru ai nsen hte maren, shanhte gaja wa galaw ai n galaw ai gaw ngai yu yu na we ai; n galaw ai rai yang mung ngai chye na we ai, ngu nna tsun wu ai.  Abraham kaw sa manam ai ni gaw myiman kayin nna Sodom maga de sa wa ma ai; Abraham chyawm gaw Madu a man e naw tsap nga ai. Shaloi Abraham gaw sit sa nna, Ding hpring ai ni hpe n kaja ai ni hte rau, gaja wa nang jahten kau na wu ni? Dai mare hta e ding hpring ai masha manga shi a majaw, dai mare hpe matsan dum ai hte n jahten ai, n da lu n ni? Ding hpring ai ni hte n kaja ai ni hpe maren yubak jahkrum na gaw, nang hte tsan nga u ga; rai sa, dai gaw nang hte, tsan nga u ga: ga ntsa ting a Tara Agyi Wa gaw ding man ai hku galaw na n rai ni? ngu nna tsun wu ai.

Dai rai nna Madu gaw, Sodom mare kata e ding hpring ai masha manga shi hpe ngai mu yang gaw, dai ni a majaw, shara ting hpe ngai shalai kau na we ai, ngu wu ai.

 Bai Abraham gaw, Ngai ga nhpu hte dap sha rai nga nngai, rai ti mung, Nang Madu hpe ngai bai hpyi nem nngai: ding hpring ai masha manga shi hta manga yawm nga nhten; shing rai masha manga yawm ai majaw, mare ting hpe jahten na wu ni? ngu nna bai tsun yang, Dai mare hta marai mali shi manga ngai mu we yang gaw, dai shara hpe ngai n jahten na nngai, ngu wu ai.

Bai Abraham gaw, Dai mare e mali shi nang mu hkrup na nhten, ngu nna kahtap tsun yang, Madu gaw, Dai mali shi a majaw ngai n jahten na we ai, ngu mu ai.

Bai Abraham gaw, Nye a Madu masin hkum pawt et, ngai naw tsun we ga: dai mare hta marai sumshi nang mu hkrup na nhten, ngu yang gaw, Madu gaw, Marai sumshi ngai mu yang gaw, ngai n di na nngai, ngu wu ai.

 Bai Abraham gaw, Nye a Madu hpe ngai naw tsun na nngai; dai mare hta marai hkun mu hkrup na nhten, bai ngu wu yang, shi gaw, Dai marai hkun a majaw ngai n jahten na nngai, ngu wu ai.

Bai Abraham gaw, Nye a Madu masin hkum pawt et; ndai lang mi sha ngai naw tsun n ga: dai mare hta marai shi mu hkrup na nhten, ngu yang, Madu gaw, Dai marai shi a majaw dai shara hpe ngai n jahten na nngai, ngu wu ai.

Ya hti ai gaw Karai Kasang a mungga rai nga ai.

 

CHYUM MUNGGA DAW 2

KOLOSE 2: 12-14

Ya hti na gaw, kolose masha ni hpang de San Pawlu shagun dat ai laika hta na rai nga ai.

Nanhte kashin kamun hkam ai shaloi, Hkristu hte rau lup kau ai hkrum manit dai; dai hta n ga, si mat ai ni kaw na Hkristu hpe jahkrung sharawt la ai Karai Kasang a atsam hpe, nanhte kam sham ai a marang e, kashin kamun hkam ai shaloi, Hkristu hte rau sharawt la ai hpe mung hkrum manit dai.

Nanhte gaw tara tawt lai ai hte, matu gadoi n hkam ai majaw, chyasi ni rai nga ti mung, Karai Kasang anhte a shut hpyit mara mahkra hpe raw dat kau ya nna, Hkristu hte rau nanhte hpe jahkrung ya manit dai. Karai Kasang gaw tara hta hkang da ai hte maren n hkan nna, anhte wa ra ai hka hpe shaprai kau ya sai; wudang hta e dai hpe dit shakap let, Shi dai hpe yeng seng kau nu ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 11: 1-13

Ya hti na gaw, luka a laika hta na kabu Gara Shiga rai nga ai.

Lang mi na Yesu gaw shara mi hta akyu hpyi nga ai rai nna, shi hpyi ngut jang, shi a sape langai mi gaw, Madu e, Yawhan gaw shi a sape ni hpe akyu hpyi na sharin ya ai zawn, anhte hpe mung sharin ya mi, ngu nna Yesu hpe tsun wu ai. Shaloi shi gaw, Nanhte akyu hpyi yang, ning ngu mu: Wa e, Na a mying ningsang Chyoi Pra nga lit ga; Na a mungdan du wa ru ga. Anhte ra ai lusha gaw, shani shagu anhte hpe jaw mi. Anhte hpe shut ai ni yawng mayawng a mara, anhte raw kau ya ga ai majaw, anhte a mara hpe mung raw kau ya mi. Agung alau nga ai de anhte hpe hkum du shangun mi, ngu nna sape ni hpe tsun mu ai.

Bai Shi shanhte hpe, Nanhte hta na langai mi jinghku lu ai rai nna, yuptung e shi kaw sa nhtawm, Jinghku wa e, muk tawng masum ngai hpe gan hkoi ya e; nye a jinghku wa hkrun lam de na ngai kaw du ra ai rai nna, shi hpe jaw sha na hpa mung n lu nngai, ngu yang, nhku de na wa gaw, Ngai hpe hkum shatsang et; chyinghka mung la kau se ai; ngai sha ni mung ngai hte rau yup ma sai: nang hpe jaw na ngai n rawt lu ni ai, ngu nna hkap htan ya ai.

Ngai nanhte hpe tsun made ga, jinghku re ai nga nna, n rawt jaw hkraw ti mung, shi akroi anoi hpyi nga ai majaw, dai wa hpe ra mara rawt jaw na wu ai.

Bai, nanhte hpe ngai ngai tsun made ai gaw, Hpyi mu, shaloi lu la na myit dai; tam mu, shaloi nanhte mu na myit dai; akawk mu, shaloi nanhte a matu hpaw ya na ra ai. Kaning rai nme law, hpyi ai wa kadai mung lu la ai; tam ai wa mung mu la ai; akawk ai wa hpe mung hpaw ya na ra ai. Nanhte hta kadai kawa mung, kasha gaw muk hpyi yang, nlung jaw na wu ni? Nga hpyi yang, nga a malai lapu jaw na wu ni? Udi hpyi yang, n gaw gawk jaw na wu ni? Dai rai nna, nanhte n hkru ai ni pyi, tinang a kasha ni hpe kaja ai kumhpa chye jaw yang gaw, dai hta grau nna sumsing lamu na Kawa gaw, shi kaw hpyi ai ni hpe dai Chyoi Pra ai Wenyi jaw na ra ai, ngu nna sape ni hpe Yesu tsun mu ai.
Ya hti ai gaw Madu a Kabu Gara Shiga rai nga ai.

HKRISTU UP AI DINGHKU TAI NGA GA

Hkristu a ngwi pyaw simsa ai gaw na a prat, kun dinghku hta a up nga ai kun?

Madu Yesu gaw Martha hte Mary ni a nta de sa gawan yu nna shanhte daw jau ai hpe kabu gara hkap la chye nga ai. Ndai jahkring mi hkrum zup ai aten hta Martha hte Mary a n bung la ai kyang lailen ni hpe mu la nu ai. Daw jau na matu Martha sharawnng ai rai tim Madu Yesu hpe ala majen ai mamjaw, pu ba ai hpe hkam sha nga ai. Mary chyawm gaw, si mani ai hte Madu Yesu a lagaw nhpang e dung let, madat let nga nga ai. Shanhte a Madu, Sara wa dai aten ra sharawng ai gaw makau kaw nga nna madat la na re ai hpe shi chye da nu ai. Myit kahtet ai hte tsang taw nga ai gaw, Madu Yesu hpe aten jaw nna madat mara na kaw nna tsan shangun ai. Anhte a myit tsang ya ai, myit katu ai lam ni hpe tawn kau nna Shi Madu hta kam hpa shamyet ai rai yang, anhte ra kadawn ai hpe lu la na lam Madu shateng ya ai. Shi a chyeju gaw anhte a matu simsa lam rai nga ai. Madu Yesu hpe nang teng sha wa tam nga ai kun? Na a dum nta hta Madu Yesu hpe sharawng awng ai hte hkap pang hkalum nga ai kun?

Madu gaw, anhte a masin salum kata sha n rai, anhte a dum nta, shani shagu na prat a masa lam ni hta mung shara jaw na ra sharawng nga ai. Anhte lu mi lu, galaw mi galaw lam shagu hpe Madu hta ap nawng da ai rai yang, Shi Madu hpe hkungga shakawn ai rai sai. Hpang jahtum, anhte lu mi lu yawng gaw Karai Kasang a kumhpa re ai gaw asan sha rai nga ai. “nanhte hpa lam galaw myit yang, mung sumtu hta rai timung, magam bungli hta rai timung, Madu Yesu a amying ningsang hpe gang let, yawng mayawng hte hpe agalaw nga nna, Shi a marang e Kawa Karai Kasang hpe shakawn kungdawn nga mu” (Kol 3:17) ngu nna kasa Pawlu htet da sai. Nang, dung ai, lu ai, sha ai, manam daw ai aten shagu hta Madu Yesu hkum nan mung nanhte dum nta a manam rai nga ai hpe dum mu. Ji Abraham, shi n chye ai manam masum hpe atsawm sha hkap hkalum la ai marang e, shi hpe shaman chyeju n daw ntsang jaw ya na Madu Karai hpe hkap hkalum la hkrup sai. Shi Madu jaw da ai chyeju kumhpa ni hte masha kaga ni hpe atsawm dawjau ai hte, akyu jashawn na anhte hpe ra sharawnng nga ai. Dai hpang, Madu Karai anhte hpe htam latsa n-ga bai shaman ya nna anhte hpe kabu gara shangun na rai nga ai.

“Madu Yesu e, Nang Madu hta anga nga na gaw ngai a prat hte kabu gara hpa rai nga ai. Nang Madu hta chyu sha myit machyu jung nna kaga n ra kadawn ai lam ni hta nna ngai hpe shalawt la rit law!

PRANWAN LADAW (16) LABAN SHANI NA MUNGGA

Karai Kasang gaw mungkan ga hpe hpan tawn da ai shaloi shinggyim masha sha n-ga, kaga amyu baw sumhpa hpe mung hpan da sai re. Shinggyim masha ni mayat maya wa ai shaloi langai hte langai hpraw nsam nbung ai zawn galaw sa lu ai atsam mung nbung nga ai. Dai rai yang, shinggyim masha ni nga sa ai lam hta nbung ai amu bungli ni hpe galaw nna shada da madi shadaw sak hkrung nga sa yang she nga mu nga mai ai hpe lu la na re.

Dai ni na Kabu Gara Shiga hta kasi la mai ai lam ni law law nga ai hta na langai mi gaw Matha hte Mary hpe yu nna kasi la mai nga ai. Nbung ai amu bungli ni hpe galaw sa ai shaloi ahkyak dik htum gaw tinang galaw ai amu mung kaja dik ai hte masan sa dik ai hku nna galaw sa ai re. Manang ni galaw ai n-galaw ai hpe yu nna myit daw hten ai lam nnga ai sha, tinang a amu hta maju jung nna galaw sa na matu gaw ahkyak nga ai.

Anhte a asak aprat hta galaw sa ra ai amu bungli ni hpe azin ayang chye nna kaja dik htum ai amu hpe shawng nnan galaw sa lu na matu hte tinang galaw sa ai mai kaja ai amu bungli ni hpe manang ni a majaw hten za mat ai lam nnga ai sha kangka ai hte galaw sa lu let tinang a matu hte manang ni a matu akyu pru ai amu bungli ni byin tai wa u ga.

PRANWAN LADAW LABAN (16) NA CHYUM LAIKA

17th July 2016

CHYUM MUNGGA DAW 1

NPAWT NHPANG 18: 1-10a

Ya hti na gaw, Npawt Nhpang laika hta na rai nga ai.

Abraham gaw shani jan ja ai aten e, shi a sum chyinghka kaw dung nga yang, Madu gaw Mamre a wamyi hpun makau e shi kaw dan pru nga ai. Abraham mada yu nga yang, shi a makau e masha marai masum tsap nga ma ai. Dai ni hpe mu jang, sa tau la na, sum chyinghka nna gat sa nhtawm, ga de dingnyawm dagup let tsun wu ai gaw, Nye a madu e, na a man e ngai myiman pa nngai rai yang gaw, na a mayam wa kaw na hkum lai sa wa et; ntsin loi mi la sa ya de ga; nanhte a lagaw kashin kau ngut jang, dai hpun npu e naw sa nga mu: muk n-gup mi mung ngai naw la sa na nngai; shingrai nanhte garai n lai sa wa yang, n-gun loi awai la mu: kaning rai nme law,  dai a matu nanhte a mayam wa kaw nanhte du sa manit dai, ngu wu ai. Shanhte mung, Nang tsun ai hte maren di u, ngu mu ai.

Shaloi Abraham gaw sum kata e nga ai Sara hpang de alawan gat shang wa nna, Muk shadung jare masum alawan gan gumchya nhtawm muk pa kaba u, ngu nna tsun da wu ai. Bai Abraham gaw dumsu hpung de gat sa nhtawm, nu nu nai rai hpum sau ai dumsu kasha dun wa nna, shangun ma hpe ya mu ai; dai wa mung alawan sat lajang wu ai.

Shing di htawbat hte nga chyu mung, shi lajang ai dumsu kasha mung shi la nna, shanhte a man e baw jaw mu ai: Abraham chyawm gaw dai hpun npu shanhte a makau e tsap nga ai; shanhte mung sha nga ma ai.

Shaloi shanhte gaw, Na a madu jan Sara gaw kanang nga a ta? ngu nna san mu ai. Abraham gaw, Wora sum e nga ai, ngu nna htan wu ai. Shanhte hta na langai wa gaw, Htaning ndai aten hta nang hpang de ngai teng teng bai du na ring ngai rai nna, na a madu jan Sara gaw shadang sha lu na ra ai, ngu nna tsun wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

KOlOSE 1: 24-28

Ya hti na gaw, Kolose masha ni hpang de San Pawlu shagun dat ai laika hta na rai nga ai.

Ya nanhte a matu mara ngai tsinyam tsindam hkrum ai majaw, kabu gara nga nngai. Hpa majaw nga yang, ndai tsinyam tsindam a marang e, Hkristu a hkum hkrang rai nga ai Nawku hpung a matu, dai Madu naw hkrum ra ai yubak nni nkri hpe, nye a hkum shan hta e ngai jahkum shatsup nga nngai.

Nanhte hpe Karai Kasang a mungga htawn shana ya na matu, Karai Kasang ngai hpe ahkang jaw da ai shaloi, Nawku Hpung a ali ama ngai tai wa ni ai. Ngai htawn shana ai mungga gaw: moi chyaloi nhkoi prat mi hte prat mi Karai Kasang makoi magap da nna, ya e Shi a amyu masha ni hpe shadan ai mung sung rai nga ai. Karai Kasang gaw Shi a chyoi pra ai ni hpe dai mung sung madun dan nna, de a hpung shingkang hte manu dan ai sutgan gade wa galu kaba ai gaw, tara maigan masha ni hpe madun dan ai mung Shi ra nga ai. Dai mung sung gaw, Hkristu gaw nanhte hte rau nga nga nna, nanhte hpung shingkang lu la na myit mada shara Shi rai nga ai.

Dai Hkristu a lam hpe nan anhte hkaw dan nga ga ai. Masha shagu hte hpe Hkrsitu hta e jahkum  shatsup na matu, Shi a hpaji byeng-ya hte nanhte yawng hte hpe shadum jahprang ai hte sharin shaga nga ga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 10: 38-42

Ya hti na gaw, Luka a laika hta na Kabu Gara Shiga rai nga ai.

Lang mi na Yesu gaw kahtawng langai mi hta shang wu ai: Marhta ngu ai numsha langai mi mung, shi a nta hta Yesu hpe hkap la wu ai. Dai numsha gaw Maria ngu ai kanau langai mi lu ai: shi gaw Madu a lagaw nhpang e dung nga let shi a ga madat nga ai. Marhta chyawm gaw galaw jaw ai amu law law a majaw myit kyin dum nga ai: dai rai nna, shi sit sa nhtawm, Madu e, ngai nau gaw galaw jaw ai amu hta ngai hpe hkrai sha rap di da ai hpe nang hpa n nawn n ni? ngai hpe garum na, shi hpe tsun dat ya e, ngu wu ai. Shaloi Madu gaw Marhta, Marhta nang gaw amu lam law law a majaw myit ru nna tsang nga ndai; rai ti mung, ra ai gaw loi li sha rai nga ai; hkrak nga yang langai mi sha ram nga ai. Maria gaw kaja htum ai kumhtaw lata la nu ai rai nna, dai hpe shi kaw na shaw la kau ya lu na n rai, ngu nna Marhta hpe htan wu ai.

Ya hti ai gaw Madu a Kabu Gara Shiga rai nga ai.

PRANWAN LADAW (15) LABAN SHANI NA MUNGGA

Nawku hpung kaw nna sharin achyin ya ai tara lam ni yawng hpe gumhpawn dat yang dai ni na Kabu Gara Shiga hta Madu Yesu tsun ai, Karai Kasang hte htingbu wa hpe tsaw ra u, ngu ai tara kanu lahkawng hpe lu la na rai nga. Kashin Kamun Sakramentu hpe hkam la ai shaloi Kanu Kawa hte bawjum (wenyi) kanu kawa ni gaw tinang a kasha ni hpe Karai Kasang hte htingbu wa hpe tsawra chye na matu lit hpe hkam la ai re.

Shani shagu na sak hkrung nga sa ai lam hta Karai Kasang hpe tsawra ai ngu ai hpe Shi Madu tawn da ai tara lam ni hpe htep lahti hkan nang ai sha n-ga manang wa hpe tsawra ai lam hpe tatut nga sa ra na re. Ndai lam ni hpe awngdang ai hte galaw sa lu na matu gaw Karai Kasang hte nyi htep wa na matu, Karai Kasang kaw na shaman chyeju ni hpe lu la na matu akyu hpyi ai wenyi hkrun lam hta shakut ai hpe galaw sa ra na re.

Tinang chye na lu sai tara lam ni hpe tatut nga sa ai lam hta Karai Kasang hpe tsaw ra ai lam tinang a htingbu wa hte ganawn mazum ai lam hta hkrang shapraw lu na matu ahkyak nga ai. Htingbu wa hpe matsan dum lama ai myit hte pawnba garum shingtau lu na matu Karai Kasang hpe manoi manat let hpang jahtum na nhtoi hta Htani Htana asak hpe hkam la lu ai kashu kasha ni byin tai wa lu u ga.

KARAI KASANG A MATSAN DUM AI HTE TSAWRA MYIT

Karai Kasang a matsan dum ai hte tsawra myit, kade daram dam lada ai hte shinggyim masha yawng a ntsa nga ai lam, madun dan na matu Madu Yesu gaw gashadawn ni hpe tsun dan sai. Hkrun lam hta laja lana damya hkrum ai wa a maumwi gaw madat nga ai ni a matu katsing galang gaw n rai nga ai. Yerusalem kaw nna Yerihko de sa wa ai lam gaw kaji la ai hte lung rawk ning gam ni mung law la nga ai. Yerusalem na sut su ai ni gaw Nshung ta a amtu Yerihko hta nta lu ma ai. Dai n shawp la ai lam kaji hta damya ni gaw arai kashun la nna kawng marawn hkan aloi sha hprawng mat lu nga ai. Myit grin ai ni kadai mung ndai lam hta tinang chyu n hkawm sa ma ai. Magawp maga hkrum mu ga, manaw manang ni hte hkawm sa ma ai.

Rai yang, lam ntsa kaw si na zawn rai nna taw nga ai damya hkrum ai wa hpe, hpa majaw hpung woi ningaw ni n hkye la ai rai? Dai wa gaw shanhte a jinghku wa re nga n hkam la ai kun? Dai hta, tara maigan masha re ai, Yuda ni shinggan da ai, Samari wa she, shi a kun dinghku masha majing hpe zawn rai nna, lakawn lanawn garum la sai rai kun? Hpu nau majing zawn rai matsan dum garum la sai. Jinghku majing gaw kadai rai? Masha kaja n ngu ai, yu kaji hkrum ai Samari wa hpe she, Yuda ni kasi yu la na, matsan dum chye ai wa ngu Yesu galaw dat sai. Hkinjawng wa hte Levi wa, garum la na matu, hpa majaw n hkring ai rai kun? Hkinjawng wa gaw jasan jaseng ai magam bungli galaw ra na hkrit ai majaw rai na nhten. 

 Shi a tara shadik ai lam gaw, matsan dum lama ai magam de n du sai. Levi wa mung, damya hkrum ai wa hpang de du ai rai tim koi kau da ai. Machyi hkrum sha masu nna shi hpe madaw damya mya na hkrit ai majaw rai na nhten. Shi a jinghku wa hpe hkye mawai la na malai, shi hkum shim lam lu na matu ahkyak da sai.

Tinang a htingbu wa hpe tsawra na lam hkai dan ai Madu Yesu a maumwi anhte hpe hpa tsun sai kun? Langai; manang wa shi hkrai sha jam jau hkrum hkra galaw la ai rai tim, anhte garum nan garum la ra ai. Lahkawng; ra kadawn ai ni hpe tsawra matsan dum, yu lakawn na ngu ai shaloi, tatut galaw nan galaw ra na re. Yaw shada lam kaja ai hte matsan dum myit madun ai, ngu ai hte sha gaw n ram na re. Hpang jahtum; kaga masha ni a ntsa tawn da ai anhte a tsawra myit gaw Karai Kasang a tsawra myit zawn dam lada galu kaba ra na rai nga ai. Karai Kasang gaw kadai hpe mung lata kau nna tsawra matsan dum ai n rai. Karai Kasang a tsawra myit gaw shadawn shadang n nga ai. Karai  Kasang anhte a ntsa mai kaja nga ai hte maren, anhte mung manaw manang, jinghku wa a n’tsa mai kaja ai hpe galaw sa wa ga. Madu Yesu gaw Karai Kasang a tsawra myit hpe sharin ya ai sha n rai, Karai Kasang gaw anhte a yawn hkyen hkrum sha ai hpe garan la kau ya nna ngwi pyaw kabu gara ai hpe bai lu la na matu shrawng awng nga ai hpe mung madun ya ai.

Wudang ntsa hta si hkam ai marang e, shut hpyit mara, nni nkri, hte si hkrung si htan hpe Madu Yesu awng dang la lu sai. Dai wudang nta hta sha Karai Kasang a tsawra myit kade daram dam lada sung htum ai hpe Madu Yesu madun dan sai. Shi Madu a nni nkri hkam sha ai lam gaw, anhte hpe shamai shatsai ya ai, bai gaw gap ya nna htani htana asak hpe jaw ya sai. Shut hpyit mara, yak hkak, jam jau ai lam yawng kaw nna teng sha lawt lu ai jet ai awm dawm hpe Karai Kasang anhte hpe jaw ya ai. Dai lam gaw Madu Yesu Hkristu a wudang marang e rai nga ai. Hkristu a wudang hpe hkap la na, na a htingbu wa/jinghku wa a matu tsawra ai myit hte, na a asak nawng kau ya na jin jin rai sai kun?

“Madu Yesu e, Na a tsawra myit gaw ngai a prat a matu ru pawt rai u ga law. Manang wa a matu, ngai a asak hpe pyi sak jaw ap nawng kau lu na chyeju n-gun atsam, ningja jaw ya rit law!”

PRANWAN LADAW LABAN (15) NA CHYUM LAIKA

10th July 2016

CHYUM MUNGGA DAW 1

TARA JAHPRANG 30:10-14

Ya hti na gaw, tara jahprang laika hta na rai nga ai.

Mawshe gaw shawa masha ni hpe ning nga ai: Nang gaw na a Madu Karai Kasang a nsen madat nna, ndai tara laika hta ka da ai hkang da ai ga hte matsun maroi ga ni hpe hkan shatsup let, na a Madu Karai Kasang hpang de na a myit masin hte kraw lawang mahkra hte kayin wa yang gaw, Madu gaw na nji nwa ni hta awng sharawng ai zawn na a akyu matu nang hta mung awng sharawng na ra ai.  Dai ni ngai nang hpe hkang da ai matsun maroi gaw, nang n hkan lu hkra yak ai n rai; nang n dep lu hkra tsan la ai mung n rai.

Dai tara hpe anhte madat nna hkan shatup lu hkra, sumsing lamu de kadai lung nna anhte hpang de dai hpe la sa na i? nga nna nang san na gaw, dai tara sumsing lamu de nga ai n rai. Dai tara anhte madat nna hkan sa shatup lu hkra, Nammukdara wora hkran kadai rap nna, anhte hpang de la sa na i? nga nna nang san na matu mung, dai tara Nammukdara wora hkran de nga ai n rai. Dai mungga gaw nang hkan lu na matu, nang hte htep rai nga ai: na a n-gup hta mung, na a kraw lawang hta mung, rawng nga lit dai.

Ya hti ai gaw Karai Kasang a mungga rai nga ai.

 

CHYUM MUNGGA DAW 2

KOLOSE 1: 15-20

Ya hti na gaw, kolose masha ni hpang de San Pawlu shagun dat ai laika hta na rai nga ai.

Hpu nau ni e, Hkristu gaw myi e n mu lu ai Karai Kasang a hkrang sumla rai nga ai hte, hpan da ai baw yawng mayawng hta na alat ningshawng rai nga ai. Sumsing lamu hte ginding aga hta nga ai yawng mayawng hte gaw, Hkristu hta e hpan tawn da nga sai: mu lu ai baw sha n ga, anhte n mu lu ai hkawhkam tingnyang hta dung ai ni, ahkaw ahkang lu ai ni, up hkang na aya lu ai ni hte, hpung dagu rawng ai ni nlang hte gaw, Hkristu a marang e, shi a matu mara, hpan tawn da nga sai; hpa mung garai n hpan da yang, shi nga nga sai hte, yawng mayawng gaw shi a majaw grin nga ai.

Nawku Hpung gaw Hkristu a hkum hkrang rai nga nna, Shi mahtang de a abaw rai nga ai. Shi gaw lam shagu hta kaba htum ai ningbaw ningla tai u ga, dai Hpung a npawt nhpang  rai nga ai hte, si mat ai ni kaw na alat ningshawng wa rai nga ai.

Kaning rai nme law, kawa myit ra ai majaw, Hkristu hta e Karai Kasang a atai hkum hkum tsup tsup rawng nga sai. Yesu Hkristu udang hta si hkam nna htingrai htingrat ya ai shaloi, Karai Kasang gaw yawng mayawng hpe shi hkum hte htinglu htinglai ya nga ai: rai sa, sumsing lamu e nga ai hte hpe rai ti mung, ginding aga e nga ai hte hpe rai ti mung, Hkristu a lata e htinglu htinglai ya nga ai hpe Karai Kasang lajang da wu ai.

Ya hti ai gaw Karai Kasang a mungga rai nga ai.

 

KABU GARA SHIGA

LUKA 10: 25-37

Ya hti na gaw, luka a laika hta na kabu Gara Shiga rai nga ai.

 Dai aten hta e, sara langai mi gaw Yesu hpe chyam dinglik yu na matu, rawt tsap nga nna, Madu e, htani htana asak lu la hkra, ngai hpa galaw ra a ta? ngu nna san wu ai. Yesu gaw, Tara hta kaning nga nna ka da nga a ta? Nang gara hku hti lu n ta? nga nna tsun jang, dai sara wa gw, Dai Madu na a Karai Kasang hpe, na a myit masin mahkra hte, na a wenyi mahkra hte, na a n-gun atsam mahkra hte, na a myit mang mahkra hte tsaw ra lu na ndai; na a htingbu wa hpe mung na a hkum hte maren tsaw ra lu na ndai, ngu nna htan wu ai. Yesu gaw, nang htan ya ai ga teng nga ai: shing rai hkan galaw nga u, shaloi nang asak hkrung na rin dai, nga nna shi hpe tsun wu ai.

 Rai ti mung, dai wa gaw shi a ding man ai myit hpe madun dan mayu nna, Nye a htingbu wa gaw kadai rai nga a ta? ngu nna bai san wu ai.

Yesu gaw, masha langai mi Yerusalem mare nna Yerihko mare de yu wa nga yang, damya hkrum wu ai: dai ni gaw shi a hpun palawng raw kau nna, nhtum nni di kayat nhtawm, ganoi noi si sa yang she, shi hpe kau da nna wa mat ma ai.

Hkinjawng langai mi dai lam hku lai sa ang nna, dai wa hpe mu jang, koi kau da wu ai. Dai hte maren lewi masha langai mi mung, dai yang du nna dai wa hpe mu timung, koi kau da wu ai. Rai ti mung, Samari   masha langai lam hkawm sa wa yang, dai wa kaw du nna, shi hpe mu jang, matsan yu dum ai. Shi hpang de sit sa nna, shi a nma ni hta namman hte tsabyi chyaru ru bun nhtawn, kayawp ahkyen wu ai. Dai hpang shi a gumra hta shajawn nhtawn, manam nta langai mi de shi hpe lakawn wa nna, lajang ya wu ai.

Hpang shani e shi gumhpraw lap lahkawng shaw nna, dai manam nta madu hpe ya let tsun wu ai gaw: Ndai wa hpe yu lajang ya rit; shi a majaw ndai hta jan nna ma ai gumhpraw hpe, ngai bai wa jang she, nang hpe jaw na we ai, ngu da wu ai. Ya nang myit yu ai hte maren, dai masha masum hta na damya hkrum ai wa hte htingbu daw ai wa gaw, kadai mahtang rai nga a ta? ngu nna sara wa hpe htan wu ai. Dai tara sara gaw, dai wa hpe matsan dum ai wa re ai ngu wu ai. Yesu gaw, Nang mung dai zawn wa galaw nga u, ngu nna shi hpe tsun dat wu ai.

Ya hti ai gaw Madu a Kabu Gara Shiga rai nga ai.

PRANWAN LADAW (14) LABAN SHANI NA MUNGGA

Madu Yesu Hkristiu gaw Nawku Hpung hpe gaw de hpang ai shaloi shi hkum nan sha nrai, shi hte rau-nga rau-hkawm sa ai Sape (12) hpe mung lata san da ai hta n-ga kaga masha ni hpe mung Karai Kasang a Mungdan gaw gap ai hta lit shatsam lai wa sai re. Dai ni na Kabu Gara Shiga hta na la lu ai marai (72) hte kaga masha ni mung shang lawm ai hpe mu lu ga ai.

Dai rai yang, Madu Yesu a Nawku Hpung hta masha hkum shagu gaw tinang hte seng ai lit magam ni hpe kangka ai hte galaw sa ai a marang e Nawku Hpung gaw rawt jat galu kaba wa nna dai ni na aten du hkra shaning hking lahkawng ning lai di nna grin nga sai re.

Dai hte maren dai ni na aten Nawku Hpung a amu magam ni hta Sarabyin, Saradaw, Jau, Mama, Tarahkaw Sara hte hpung masha ni gaw tinang hte seng ai amu bungli ni hpe kangka ai hte galaw sa ai a marang e matut nna rawt jat galu kaba wa lu na re. Grau nna mungkan jut shagu hta du nga ai kamsham ai nawku hpung masha ni gaw lak lak lai lai nrai tim tinang a makam masham hpe sha-ngang shakang nna nga sa ai lam hpe galaw sa let Madu Yesu hpe sakse hkam ai a marang e nawku hpung a magam bungli ni hta shang lawm mai nga ai.

Nawku hpung masha, kaji kaba yawng gaw tinang a sak hkrung hkawm sa ai lam hta Karai Kasang hpe manoi manat let Karai Kasang a shaman chyeju hpe hkam la nna Madu Yesu a nawku hpung rawt jat galu kaba wa ai lam hta nbung ai lit magam ni hpe gun hpai let mungkan masha ni a man hta Madu Yesu hpe sakse hkam lu ai jet ai nawku hpung masha ni tau wa lu u ga. 

HKAW TSUN SAK SE HKAM NGA GA

‘Chyahkawn ni a ka-ang de sagu kasha hpe zawn’ nga nna sape ni hpe tsun ai shaloi, Madu Yesu kaning ngu mayu ai rai? Chyahkyawn gaw sagu kasha hte rau shanu nga na lam, myihtoi Esaia tau nau tsun lai wa sai. Dai lam ni gaw, Hkristu, lahkawng lang ngu na du sa ai ten hta, yawng mayawng gaw dai Madu up hkang ai npu e zin lum nga nna, Karai Kasang a mungdan gaw Sumsing lamu hte ginding aga nga yawng nga pra a ntsa a-up nga na aten hpe madi madun ai rai sai. Tim, ya shaloi na aten hta gaw, kabu gara shiga hpe ninghkap ai ni, roi rip mayu ai ni hte hkrum katup wa na hpe, Sape ni kaw nna myit mada da ra nga ai. Madu Yesu gaw, mungkan ga na mara ni a matu, shagu hkungga nawng hkam na du sa wa ai rai sai. Anhte mung, Madu Yesu hpe daw jaw daw ya ai magam hta anhte a sak prat hpe ap nawng lu na rai nga ai.

 Kaga sape sanit shi hpe, Karai a mungga htawn shana hkawm na Madu Yesu dat dat ai gaw hpa lak lai ai lam nga sai kun? Sanit shi ngu ai gaw Chyum laika hta ahkyak ai hti hkum langai rai nga ai. Nam mali e, amyu masha ni hpe woi awn ai hkrun lam hta garum na matu, Mawshe gaw salang sanit shi hpe lata la sai. Yuda ni a Sanhedrin; amyu masha ni up hkang ai Kongsi hta marai sanit sha hte hpaw ninghtan da ai. Madu Yesu a aten hta, sanit shi ngu ai gaw mungkan ting na amyu mungdan hti hkum ngu sawn la ma ai.

Shi Madu a mying hta tsun shaga na, shi Madu a atsam hta magam bungli galaw na, dai sape sanit shi hpe Madu Yesu htet dat sai. Shanhte galaw ang ai Sasana magam hpe kaning rai gun hpai na hpe mung matsun dat sai. Masha ni hpe masu magaw ai lam n-nga, tsawra myit masin tup hte daw jau lu na rai nga ai. Karai Kasang a mungdan lam hkaw tsun na sha ahkyak ai rai nna kaga lam hta ahkyak n la na rai lu ai. Sung lang ang ai arung arai ni sha lang let, atsang awang sha hkawm sa ai marang e, Karai Kasang a mungga hpe grau madung dat tsun shaga lu na rai nga ai. Shanhte galaw ra ai amu hpe, hpa mit mada da ai lam n tawn ai sha, shakut shaja let galaw sa na rai nga ai. Matsan mayan hkam sharang ai lam gaw namak law hpa ai kaw nna koi yen kau ya let, Karai Kasang jaw ya na shaman chyeju hpe myit mada shangun ai. Sape ni shanhte hkum nan hta n rai, Madu Yesu hta kam shamyet nga na matu Madu ra sharawng nga ai.

Lama na, amyu masha ni Karai Kasang saw shaga ai lam hte Shi a mungga hpe ningdang kau ai rai yang, shanhte hta hten byak ai gaw du na re nga nna, sadi jaw ai hte Shi Madu a matsun ga hpte jahtum sai. Karai Kasang, Shi a mungga anhte hpe jaw ai ten, bai htang galaw na lit kaba lu saga ai. Karai Kasang hta hkum tsup shim lum ai prat lu la u ga, Karai Kasang shi a mungga anhte hpe jaw da sai.

Hpa majaw, sape ni amu magam awng dang wa ai, wenyi lam yan hta awng dang wa ai rai tim, Madu Yesu gaw kabu gara na ahkang n jaw ai rai? Madu Yesu asan sha madun mayu ai gaw, Karai Kasang chyu sha anhte ni a tengman ai, kabu pyaw na ru pawt rai nga ai lam rai sai. Kaning re ai masa hta rai tim, kaja ai ten, yak ai ten hta rai tim, awng dang ai, hkrat sum ai ten rai tim, Madu Yesu Hkristu hta awng dang ai lam lu la na hpe Karai Kasang anhte hpe pahkam hkam ya sai. Nat satan ni yawng hpe dang manga kau lu ai atsam, Shi Madu Yesu hta nga ai lam sape ni hpe hkrak chye shangun sai. Dai majaw, Madu Yesu, mungkan ga de du sa ai gaw nat satan hpe gawt kau na matu rai sai. Dai hte maren, anhte ni mung, sape ni zawn, nat satan a magam bungli ni hpe dang manga kau lu na wenyi n-gun atsam, Madu Yesu anhte hpe jaw da sai.

“Madu Yesu e, kabu gara shiga a tengman ai hte kabu pyaw lam gaw ngai a prat hpe galai shai ya nna ngai a makau mayang na ni hpe sakse hkam lu u ga law. Ngai hkawm sa ai shara shagu hta Nang Madu a tengman ai hte Ninghtoi hpe shachyen shabra lu na chyeju jaw ya rit law!

PRANWAN LADAW LABAN (14) NA CHYUM LAIKA

3rd July 2016

CHYUM MUNGGA DAW 1

ESAIA 66: 10-14

Ya hti na gaw, myihtoi Esaia a laika hta na rai nga ai.

Yerusalem hpe tsaw ra ai ni e, shi hte rau kabu gara ai hte myit pyaw nga mu; Shi a lam sharung shayawt ai ni yawng hte e, shi hte rau kabu gara ai myit awng sharawng nga mu: shing rai nanhte gaw shi a shalan shabran ai madoi chyu hpang chyu nna, hkru kat na myit dai; nanhte chyu shup nna, shi a n taw n tsang ngamu ngamai ai hta ngwi pyaw nga na marin dai.

Kaning rai nme law, Madu gaw ning nga ai: Ngai gaw ngwi pyaw ai hpe hka nu zawn, maigan amyu ni a arawng sadang hpe, hka rawt kaba wa ai zawn, Yerusalem mare de du shangun na nngai. Nanhte chyu chyu nna, ba kaye ai hte lahput ntsa e makrai chyai ai hkrum na myit dai. Kanu gaw kasha hpe shangwi shapyaw ya ai hte maren, ngai nanhte hpe shangwi shapyaw nna, nanhte gaw Yerusalem mare hta ngwi pyaw ai hkrum na myit dai.

 Nanhte dai hpe mu jang, nanhte a myit masin kabu gara nna, tsit lali ai tsingdu prut kaba wa ai zawn, nanhte a nrut nra ni galu kaba tsang wa na ra ai. Madu a lata gaw shi a ali ama ni hpe makawp maga na ra ai.

Ya hti ai gaw karai kasang a mungga rai nga ai.

CHYUM MUNGGA DAW 2

GALATI 6: 14-18

Ya hti na gaw, Galati masha ni hpang de San Pawlu shagun dat ai laika hta na rai nga ai.

Hpu nau ni e, Ngai chyawm gaw anhte a Madu Yesu Hkristu a udang hta kaga shakawng shara n nga li ai. Dai udang a marang e mungkan ga gaw, ngai a matu tsun yang jen sat kau ai hkrum nu ai.

Masha gaw matu gadoi ai lam hkam ai n hkam ti mung, hpa n ra ai; shi bai hpan da hkrum ai masha nnan tai wa na mahtang ahkyak kaba rai nga ai. Ndai ga madung hte maren hkan galaw ai ni yawng mayawng Karai Kasang a Israela amyu majing tai wa ma ai: shanhte a ntsa e ngwi pyaw ai hte matsan dum ai chyeju a nga u ga law.

Ya kaw nna kadai mung ngai hpe hkum sharu shatsang ma nu ga: Yesu a nma hkang nye a hkum  Shingyan hta hkang nga li ai. Hpu nau ni e, anhte a Madu Yesu Hkristu a chyeju nanhte a nsa wenyi hte rau a nga nga u ga law. Amen.

Ya hti ai gaw Karai Kasang a mungga rai nga ai.

KABU GARA SHIGA

LUKA 10: 1-12. 17-20.

Ya hti na gaw, luka a laika hta na kabu Gara Shiga rai nga ai.

 Dai aten hta, Madu Yesu gaw sape kaga sanit shi lahkawng hpe san la nna, shi hkum nan sa kawan na mare hte shara shagu de, marai lahkawng hkawng hpe shi a shawng e shangun dat wu ai. Shi shanhte hpe, Nmut shang na shara law law nga ai, amu galaw ai ni mahtang n law ma ai. Dai majaw mam Madu gaw shi a nmut amu hta, amu galaw na masha jashawn u ga, a hpyi nga mu.

Nanhte sa wa ma nu; chyahkyawn ni a ka-ang de sagu kasha hpe zawn, ngai nanhte hpe shangun dat ma de ai. Gumhpraw jan, htingpa hte kyepdin re ai ni hkum gun myit; lam e naw rai nga yang, kadai hte mung hkum shachyen myit.  Gara nta hta mung nanhte shang yang, Ndai nta hta ngwi pyaw ai a nga nga u ga, ngu nna shawng tsun mu. Dai nta hta myit galu nna simsa ai lam hkan ai masha nga ai rai yang gaw, nanhte jaw ai ngwi pyaw chyeju dai wa a ntsa e nga nga na ra ai; n nga ai rai yang gaw, dai gaw nanhte hpang de bai nhtang wa na ra ai.  Dai nta hta e nga nga nna, shanhte jaw ai hte maren lu sha mu: kaning rai nme law, amu galaw ai wa gaw shabrai hkam la ging nga ai: nta mi kaw nna nta mi de hkum htawt nga mu.

Gara mare hta mung nanhte shang nna, shanhte nanhte hpe hkap la yang gaw, nanhte a man e baw tawn ai hte maren lu sha mu. Dai yang na machyi ai ni hpe shamai ya nna, Karai Kasang a mungdan nanhte hte ani sha du ra ai ngu nna, shanhte hpe tsun dan mu. Gara mare hta rai timung, nanhte shang nna, shanhte n hkap la yang gaw, dai mare a lam de pru nhtawm. Anhte a lagaw hta kap ai nanhte a mare na ga nhpu pyi, nanhte hpe jeyang na maga de anhte katsut kau da ga ai: rai timung, Karai Kasang a mungdan ani sha du ra ai hpe chye nga mu, ngu nna tsun da mu. Nanhte hpe ngai tsun made ga, dai nhtoi e Sodom gaw dai mare hta naw chyamai na ra ai, ngu nna Yesu gaw sape ni hpe tsun dat mu ai.

Dai sape sanit shi lahkawng chyawm gaw kabu gara ai myit hte bai wa nna, Madu e, na a amying tsun jang nat ni pyi anhte a ga madat ma ai, ngu nna tsun ma ai. Shing nga yang Yesu gaw, satan gaw lamu de nna myihprap zawm hkrat wa ai hpe ngai mu se ai. Lapu hte n-gaw gawk ni hpe kabye lu na hte, gumlau ai atsam hpe dang lu na ahkang ngai nanhte hpe jaw ma de ai rai nna, hpa e mung nanhte hpe hkala lu na myit dai n rai. Rai timung, nat ni nanhte a ga madat ma ai majaw, hkum kabu myit; nanhte a amying sumsing lamu hta ka da nga ai majaw, kabu nga nga mu, ngu nna shanhte hpe tsun mu ai.

Ya hti ai gaw Madu a Kabu Gara Shiga rai nga ai.