LUSHA GAM LADAW LABAN (3) MUNGGA

Ndai lusha gam ladaw hta madung dat galaw sa ai magam ni gaw kyu hpyi ai hta shaja ai, tinang hkum hpe ndang nyet kau ai amu magam ni hte ra kadawn ai ni hpe garum shing tau ai ni rai nga ai.

Tinang hkum hpe ndang yet ai amu bungli ni gaw malu masha gam ai, akyang lai len ni hpe gram ai, mara hpe n-galaw na matu shakut shaja ai hte kaga magam bungli ni law law mai byin nga ai.

Karai Kasang hte tsan gang shangun ai mara ni hpe myit yawn myit malai let mai kaja ai lam hta sakhkrung nga sa na matu shakut shaja ra nga ai. Ndai zawn mara hpe koi gam ai shaloi tinang a myit masin n-gun mahkra hte shakut shaja ai hta n-ga, Karai Kasang a shaman chyeju hpe kyu hpyi ai hta hkam la ai a marang e awng dang ai hpe lu la mai nga ai.

Ndai lu sha gam ai ladaw hta akyu hpyi ai hpe grau nna shakut shaja let Karai Kasang a shaman chyeju hpe hkam la ai hte tinang shakut shaja ai a marang e mara ni hpe koi gam kau lu na matu shakut shaja sa wa ga.

ASI KAJA SI AI MAIHPANG HPUN TAI NGA GA

Tsin yam tsin dam, Mung masa, Shingra Tara, lam ni gaw Karai Kasang a mungdan hte n jaw ai hpe lata la nna shut hpyit mara galaw ai a akyu ara re ai hpe sharin ya nga ai kun? Yuda amyu masha ni, Egutu mung hta (400) ning mayam yam nga ai prat hta hkrum sha ai tsin yam tsin dam lam hpe, Karai Kasang hpe n kam n sham ai hte shut hpyit mara a matu myit malai n lu ai a majaw rai na re ngu hkap la ma ai. Rai timung, Karai Kasang chyawmgaw, matsan dum ai myit, ga sadi tawn da sai hte maren, shi a shangun ma Mawshe hpe dat dat nna shalawt la nu ai.

Madu Yesu a mungga madat nga ai ni gaw, Yerusalem ginwang kaw byin ai lam hte seng nna, shut hpyit mara a majaw rai kun, ngu ai lam hpe san ma ai. Shawng na gaw Yerusalem Nawku htingnu hta byin ai, rai nu ai. Pilatu wa gaw, nawku htingnu de hkungga nawng ya na matu lung wa ai, Galile masha ni hpe rim sat na lam shi a hpyen hpung ni hpe shangun dat nu ai. Galile masha ni Pilatu pawt sin dawng hkra kaning rai shut sai kun? (snr), Yuda ni a san seng dik ai shara; Yerusalem nawku htingnu hta, hpa majaw dai amu galaw ai kun? Yuda ni a matu dai mabyin gaw, mung masa lam roi rip hkrum dik ai hte, Makam lam yan hta sawng dik roi rip hkrum ai rai sai. Lahkawng ngu na lam gaw, anhte mungga hta na la sai hte maren, langchyi run hkrat nna masha marai (18) si hkrum ai lam rai sai.

Yuda amyu sha ni gaw, dai zawn tsin yam hkrum sha ai hpe shut hpyit mara a majaw re, ngu yin la chye ma ai. Chyum laika hta mung dai zawn rai sadi jaw da nga ai. ‘Kaning rai n me law, ding hpring ai wa gaw sanit lang kataw ti mung, bai rawt lu na ra ai; Tara n lang ai ni chyawm gaw, tsin yam tsin dam hte htum mat na ma ra ai’ (Ga 24:16).

Madu Yesu, madi madun tsun sharin ya mayu ai teng sha hkrit tsang ra ai lam ngu ai gaw; n myit mada ai, akajawng sha si mat ai rai yang, tinang a shut hpyhit mara ni a matu myit malai lu na aten n lu ai hte, Sumsing lamu, ginding aga a Tara Agyi wa hte hkrum na matu, lajang shachyip ai hpe n lu galaw kau na lam, rai nga ai. Gam maka n tsawm ai, tsin yam tsin dam hkrum sha ai, ngu ai lam gaw,  masha lata ai lam n-nga, yawng kaw du pru ai hpe Yoba laika anhte hpe shadum ya nga ai. Madu Yesu asan sha anhte hpe sadi jaw ai lam gaw; tinang a arawn alai, galaw sa wa ai magam ni hpe sadi sahka ai hte lit la ra ai, dai ni jang tinang a myit, masin, salum, hkum hkrang hpe jahten sharun chye ai shut hpyit mara hpe htu lup kau na lam, rai nga ai. Myit malai n lu ai sha ngam taw ai tinang a mara gaw, hkum hkrang kata na ‘cancer’ (mawng ana) hte bung nga ai. Myit malai lu ai hte, Karai Kasang hkyem sa jaw na tawng bang let Shi Madu a shamai shatsai ai chyeju kumhpa hpe n hpyi nem ai rai yang, anhte a Wenyi hpe sat kau ya na rai nna, dai gaw hkum hkrang hten run ai hta grau sawng nga ai.

Asi nsi ai maihpan hpun hpe sadi jaw ai, Madu Yesu a gashadawn ndai a lachyum gaw, anhte a myit masin, salum hta shut hpyit mara ru jung nga lu na ahkang jaw da chye ai anhte ni hpe tsun ai rai sai. Palestine buga masha ni a matu, mai hpang si gaw ahkyak ai, asha nga ai nam si rai nga ai. Maihpang hpun gaw, tu ai masum ning rai yang, asi law law si ya sai. Lama na asi n si ai rai yang, kaga hpun ni tu kaba lu u ga, dai hpe kran kau ra nga ai. Hkraw si wa let, asi n si lu ai maihpan hpun a kumla gaw, Yuda masha ni a matu, shut hpyit mara ni, myit malai nlu ai mara ni a majaw byin ai re, ngu hta la ma ai. Karai Kasang a mungga matsun ai hpe bai n htang galaw na hkrat sum ai Israela amyu sha ni a amtu asi n si ai maihpang hpun gaw kumla rai nga ai. Karai Kasang hpe sadi ndung ai Israela amyu masha ni a hkrat sum lam hpe sadi jaw lai wa sai myihtoi ga ni law law nga nga ai. Madu Yesu a gashadawn hta mung, Karai Kasang a hkam sharang ai lam, tim dai hkam sharang ai hte matsan dum lama ai hpe lu nan lu na re ngu n myit na lam lawm nga ai. Dai hta, Karai Kasang a tara je yang daw dan ai lam gaw, ni ai tsan ai rai tim, du wa na rai nga ai.

Rai yang, Karai Kasang hpa majaw shi amyu masha ni hpe Jeyang ai rai? Shi a Chyoipra ai hte dingman kanga ka ai hta anhte ni mung galu kaba wa lu na matu, anhte a shut hpyit mara ni hpe san seng kau ya na matu tara Jeyang ai rai nga ai. Anhte a mai kaja ai lam a matu rit kawp tara hpe Madu jaw ya nna, Shi Madu Karai hpe hkrit hkungga tsawra lu na matu wenyi shaleng ya na rai nga ai. Karai Kasang gaw myit galu kaba ai hte hkam sharang nga ai. Tim, du ja, na htat, myit ja la ai hte Madu hpe ning hkap ai, myit malai lu na yak ai ni a matu ‘ngarai wan’ nga nga ai.

Karai Kasang a Jeyang daw dan ai lam gaw n tara ai hte n tsawra ai lam rai sai kun? ‘Kaning rai nme law, ga ning tsa e nang tara dara nga yang, mungkan ga na ni gaw ding hpring ai lam sharin la ma ai’ (Esa 26:9). Shut hpyit mara a matu Karai Kasang Jeyang na hpe htawn shana ai gaw, myit malai lu na sadi n jaw hkrum ai ni hkrum sha na hta grau mai nga ai.

Karai Kasang gaw matsan dum myit kaba hte, Shi hte bai mahku mara galaw lu na matu anhte hpe aten jaw nga ai. Dai aten gaw, ‘ya ya nan’ rai nga ai. N tin ra ai law ngu nna n myit la ga. Akajawng du wa chye ai, si hkrung si htan, tsin yam tsin dam gaw, myit malai lu na, shading sharai na aten, anhte hpe n jaw na re. Aten shagu hta sadi maja let nga na Madu Yesu anhte hpe sadi jaw da sai.

Shut hpyit mara hpe galaw chye ai hte myit malai n chye lu ai lam a akyu gaw asi kaja n si lu ai hte kran krau hkrum sha ai de pyi du shangun na re. Madu Karai gaw Shi a shaman chyeju hte mara kaw nna tsan gang na aten, anhte hpe jaw da ai hte dai aten gaw ya ya jang rai nga ai. Lama na, lani mi sha hpang hkrat ai rai yang pyi, shaman chyeju gaw lai mat nna anhte a aten mung htum mat ai hpe dum chye lu na re.

Karai Kasang a Chyoipra ai hte ding hpring kangka ai hpe nang hpang gara nga ai kun? 

“Madu Yesu e, Nang Madu a Chyoipra san seng ai hte ding hpring kangka ai hta ngai mung galu kaba wa lu na atsam jat jaw ya rit. Ya shaloi na aten hta Nang Madu jaw ya ai shaman chyeju hpe hkap la chye let, Nang Madu ra sharawng ai lam hte ngai a prat a matu lajang da ya ai Nang Madu a yaw sing ai lam hta ‘mai sa Madu e,’ ngu nna hkan sa lu na garum chyeju jaw ya rit law. Amen”

LUSHA GAM LADAW LABAN (3) N A CHYUM LAIKA

Lusha gam Ladaw (3)

28^th February, 2016

CHYUM MUNGGA DAW 1

PRU MAT WA AI. 3:1-8a. 13-15.

Ya hti na gaw, Pru Mat Wa Ai Laika hta na rai nga ai. 

Dai aten hta e, Mawshe gaw shi a katsa Yehtru ngu ai Midian hkinjawng a sagu bainam hpung hpe rem nna nga nga ai. Dai hpung ni hpe nam mali jahtum de shi gawt sa wa ai rai nna, Horeb ngu ai Karai Kasang a bum de  sa du ai. Shaloi Karai Kasang a lamu kasa gaw singwum hta shi kaw dan pru ai: dai hpe shi yu yu yang, wan grung nga timung singwum gaw n hkru mat nga ai. Dai rai nna, Mawshe gaw, Singwum hpa rai n hkru mat ai kun? Mauhpa lam kaba wora hpe ngai sa yu se ga, nga ai.

Shi sit sa wa ai hpe madu mu yang, Karai Kasang gaw, Mawshe e, Mawshe e, nga nna dai singwum kata na shi hpe shaga ai: shi gaw, Nang e rai nga nngai, ngu nna htan wu ai. Shaloi Karai Kasang gaw, Nang de hkum sit nit; na a kyepdin raw kau u; dai nang kabye ai ga gaw chyoi pra ai ga rai nga ai, nga nna mung; ngai gaw na nwa a Karai Kasang, Abraham a Karai Kasang, Isak a Karai Kasang, Yuku a Karai Kasang rai nga nngai, nga nna mung tsun wu ai. Dai rai nna, Mawshe gaw Karai Kasang hpe yu na hkrit wu ai majaw, shi a myiman magap da wu ai.

Bai Madu gaw, Egutu mung e nye a amyu hkrum ai ru tsang lam hpe ngai mu se ai rai nna, shanhte a hpareng ni a majaw hkrap sharung ai nsen hpe ngai na ya mase ai: shanhte hkrum ai nni nkri hpe ngai chye nga nngai: shanhte hpe Egutu masha ni a lata  na hkye hkrang la na hte, 

dai mung kaw nna ja kat ai hte kaba nga ai, nga chyu hte lagat ntsin lwi ai mung de woi wa na, ngai yu sa ring ngai.

Shaloi, Mawshe gaw, Yu u, Israela a kashu kasha ni hpang de ngai sa du nna, Nanhte a nji nwoi ni a Karai Kasang gaw ngai hpe nanhte hpang de shangun dat nngai, ngu mawe yang, shanhte mung, Dai Karai Wa a mying ningsang kaning nga lu ta? nga nna san yang, ngai kaning ngu bai htan na rai ta? ngu nna Karai Kasang hpe tsun wu ai.

Shaloi Karai Kasang gaw, NGAI A RAI NGA NNGAI; dai wa nan ngai rai nga nngai. NGAI A RAI NGA NNGAI nga ai wa gaw nanthe hpang de ngai hpe shangun dat ni ai, ngu nna Israela a kashu kasha ni hpe nang tsun na rin ndai, ngu nna Mawshe hpe tsun wu ai.

Bai Karai Kasang gaw Mawshe hpe, Nanhte a nji nwoi ni a Karai Kasang, Abraham a Karai Kasang Isak a Karai Kasang, Yaku a Karai Kasang  ngu ai Madu gaw, ngai hpe nanhte hpang de shangun dat ni ai, ngu nna Israela a kashu kasha ni hpe nang tsun na rai ndai: dai gaw htani htana nye a amying rai nga na li ai; dai gaw prat mi hte prat mi na nye a masat dingsat mying rai nga na lit ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 10: 1-6. 10-12.

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Ndai lam langai mi hpe nanhte n chye n mai ai ngu nna, shadum dat nngai. Ngai tsun  mayu ai lam gaw: Anhte a ji wa ni yawng gaw dai sumwi npu e gawp ma ai hte, nawng lapran hku rap sa wa ma ai. Shing rai, yawng hte gaw dai sumwi hte nawng hta e, Mawshe hte matut mahkai ai hkrum lu hkra kashin kamun hkam la ma ai. Shanhte yawng hte gaw dai mauhpa shahpa maren sha nna, dai mauhpa luhpa mung maren lu ma ai. Kaning rai nme law, shanhte kaw hkan nang ai mauhpa lunghkrung hta na shanhte lu ma ai rai nna, dai lunghkrung gaw Hkristu rai nga ai. Rai ti mung, shanhte hta na malaw maga hte hpe Karai Kasang n sharawng da mu ai rai nna, shanhte dai nam mali hkan e run byak mat ai hkrum ma ai.

Anhte a ji wa ni gaw n kaja ai arai hpe myit marin nga ma ai zawn, anhte n marin u ga she, dai lam hte gaw anhte a matu shari tai wa masai. Shanhte nkau mi aput angun nga ma ai zawn, nanhte gaw aput angun hkum rai myit; dai ni gaw Jahten ai Wa a lata e hten byak ai hkrum manu ai.

Dai lam yawng hte gaw shari tai u ga, shanhte hta byin wa sai rai nna, anhte hpe sharin achyin ya na matu ka da nga ai; kaning rai nme law, anhte a aprat hta e dai ahtik labau ni dik wa sai rai. Dai rai nna, marai langai ngai gaw jan rai tsap nga nngai, nga nna myit yang gaw, shi n kadawng u ga sadi ra ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 13:1-9

Ya hti na gaw, Luka a Laika hta na Kabu Gara Shiga rai nga ai.

Dai aten hta e, masha nkau mi Yesu kaw sa du nna, Pilatu gaw Galile masha nkau mi a asai hpe, shanhte nawng ya ai hkungga asai hte kayau kau ai lam, Shi hpe tsun dan mu ai. Shi shanhte hpe,  Dai Galile masha ni shing re ai hkrum ma ai majaw, Galile masha yawng hta mara grau law ai ngu nna nanhte myit da mu ni? Dai nrai; ngai nanhte  hpe tsun de ga: nanhte mung myit malai n lu yang gaw, nanhte nlang dai hte maren hten bya mat na marin dai.

Ndai ga shadawn mung Shi tsun wu ai gaw: Masha langai mi shi a tsabyi sun hta hkai da ai  maihpang hpun langai mi tu lu ai rai nna, dai hta na asi sa tam yang, n mu wu ai. Dai rai nna shi gaw, Ngai masum ning tup dai maihpang  hpun hta na asi sa tam ti mung, n mu we ai; dai hpe kran kau u; hpa rai ga lahpawt tu nga na a ta? ngu nna sun lajang ai wa hpe tsun wu ai. Dai wa gaw, Madu e, dai ning sha gaw naw tu nga yu u ga; de a nhpang grup e ngai htu kapun nna hpun apawm na we ai: dai hpang asi si yang gaw tu nga u ga: asi n si yang gaw nang kran kau na rai nga ai, ngu nna madu hpe htan wu ai.

Ya hti ai gaw Madu a Kabu Gara Shiga rai nga ai.

LUSHA GAM LADAW LABAN (2) MUNGGA

Nhkum tsup ai shinggyim masha a prat hta ru yak jam jau, yak hkak ai lam ni gaw galoi mung nga na re. Mayak mahkak nkau mi gaw tinang hkrai sha lai di na matu nmai byin nga ai. Atsam rawng ai masha ni hpe garum hpyi ai hta lai jang Karai Kasang hpang de sit shang nna garum hpyi n-gun la lai di mai nga ai.

Karai Kasang gaw mahkra dang chye ai rai nna Shi a matu nmai byin ai lam ni nnga ai. Dai rai yang Karai Kasang kaw manoi manat nna sakhkrung ai lam gaw anhte a asak aprat hta kaja dik htum ai rai nga ai. Karai Kasang hte rau sakhkrung nga sa ai lam hta Karai Kasang hte mu hkrum ai mahkrum madup gaw manu dawdan nlu nga ai.

Kabu Gara Shiga hta Kasa Petru, Yawhan hte Yaku gaw bum ntsa hta Madu Yesu hte rau nga ai shaloi Karai Kasang hpe mu hkrum lu sai re. Ndai mahkrum madup gaw shanhte a matu kabu pyaw dik htum rai nna bum ntsa kaw matut ng

a na hpe pi dawdan sai re. Ndai mahkrum madup gaw shanhte a asak aprat hta, grau nna ru yak jam jau hkrum ai shaloi, Karai Kasang hpe kam hpa na matu n-gun atsam jaw ya na gaw teng sha re.

Ndai lu sha gam ai ladaw hta tinang a hkum hpe ndang nyet kau nna tara shadik ai lam ni hta shakut shaja let Karai Kasang hte mu hkrum ai ngu ai mahkrum madup hpe lu la nna ndai mahkrum madup gaw anhte ra rawng gawng kya ai ten hta n-gun atsam jaw ya lu ai mahkrum madup byin tai wa u ga.

KARAI A HPUNG SHINGKANG HTA SAK HKRUNG NGA GA

Karai Kasang a hpung shingkang hte Shi hkum nan anhte a prat hta a nga nga ai lam hpe dum chye lu na, hpa gaw shingdang tawn da ya sai kun?

Shut hpyit mara hte n kam n sham ai lam re ai gaw, teng nga ai. Makam masham gaw, anhte a myi hte n mu lu ai, myit masin hte n hkap la lu ai hpe mu lu na, hkap la lu na atsam jaw ya ai. Makam Masham a myi hta e, Karai Kasang a shaga la ai lam hpe Abraham mu chye lu sai. Karai Kasang, shi prat a matu yaw shada da ai hpe sha n rai, shi aru arat amyu masha yawng a matu, Karai Kasang hte htani htana mahku mara kanawn mazum lu na Gashaka tawn da na hpe mung dam lada ai hte mu chye ya sai. Karai Kasang a hpung shingkang hta, myiman chyaw mu lu na lam hpe tau nau chyim yu lu na makam gaw lajang ya sai. Rai yang, Madu Karai hte Shi a hpung shingkang hta myiman chyaw mu lu na matu lajang shachyip nga ai kun? Karai Kasang gaw, Shi a hpung shingkang hpe anhte hte garan kachyan ya na matu sharawng awng nga ai. Dai lam hpe, Madu Yesu ahpraw n sam galai ai bum ntsa, sape ni mu lu sai hta anhte mung loi mi chye la lu sa ga ai. Madu Yesu a myiman htoi kabrim let Shi a hpun palawng mung hpraw tsawm la nga ai.

Karai Kasang hte Sinai bum ntsa hta Mawshe hkrum zup shaga nna yu wa ai shaloi, Mawshe a myiman htoi tu kabrim nga ai (Pru 34:29). Mawshe a myiman htoi kabrim nga ai majaw, Israela amyu masha ni n yu lu ma ai, nga nna Kasa Pawlu tsun da ai (2 Kor 3:7).

Ahpraw nsam galai ai bum ntsa hta Madu Yesu gaw; Israela amyu masha ni Tara jaw ya ai, hkik hkam dik ai Mawshe, kaba dik ai myihtoi Elia, Shi tsawra dik ai Sape Petru, Yaku, Yawhan, ni hte rau, dan pru nga ai. Rai yang, dai mau hpa dan pru ai lam hta ahkyak ai kumla gaw hpa rai sata?

Yerusalem mare hta byin na; Sadi run ai, n hkap la ai, wudang hta nni nkri hkam la na lam ni hpe atsawm chye ai hte Madu Yesu, bum de lung wa sai. Wudang hkrun lam hpe hkawm lu na matu Madu Yesu gaw Mawshe yan Elia hte hkrum shaga ai zawn rai nga ai. Kawa Karai mung Madu Yesu hte ga shaga nna, ‘ndai wa gaw, ngai tsawra ai kasha rai nga ai, shi a ga madat mara nga mu’ (Lk 9:35, Mk 9:7) nga nna matsun da sai. Madu Yesu hte kasa ni hpe ka up da ai samwi gaw, Hkye hkrang la ai Madu du sa ai aten hta Karai Kasang anga nga ai lam madun ya ai samwi gaw Nawku Htingnu hta hpring chyat wa na re ngu ai, Yuda ni a myit mada shara hpe jahpring jatsup ya sai.

Madu Yesu, Mawshe yan Elia hte ga shaga nga ai ten hta Petru, Yaku hte Yawhan ni gaw yup kaba hta yup nga ai ngu, San Luka tsun da nga ai (Lk 9:32). Yup shamwi ai kaw nna rawt wa jang, Madu Yesu gaw ahpraw nsam htoi tu nga ai hte, Mawshe yan Elia hte rau rai nga ai hpe kasa ni mu ma ai.

Karai Kasang a hpung shingkang hpe, anhte ni a wenyi yup shamwi nga ai majaw, n mu lu kau dat ai aten kade wa rai mat sai kun? Karai Kasang a lam yan hta, anhte hpe yup shamwi kau lu ai lam, law law nga nga ai. Anhte a nsu nhprang ai myit hte ‘n sawn sumru ai prat’ gaw, n tsen ai lam hte gasan ni hpe dinglik yu n lu na matu galaw da ya sai. Mai mai sha rai nga taw mayu ai prat a majaw mung, Hkristu Madu anhte hpe saw shaga ai, ningdat ai lam ni hpe, myit yu lu na shingdang da ya ai. Anhte a ‘myit ja’ ai lam gaw, Madu Yesu anhte hpe jaw ya na lam yan ningnan hpe n mu lu hkra pat da ya chye ai. Myit hki lit li ai lam pi gaw, Karai Kasang a hpung shingkang hpe mu lu na pat da ya chye ai.

Na a wenyi lam yan ‘su hprang’ nga ai kun? Petru, Yaku hte Yawhan ni gaw Yesu Hkristu a hpung shingkang hpe sakse tai lu na ahkaw ahkang lu ma sai. Hkristu a hpang hkan nang sai anhte ni mung, dai hpung shingkang hpe sakse hkam lu na shaga la hkrum ma sai.

Anhte ni yawng, htoi tu ai myiman hte, Madu a hpung shingkang hpe mu lu na hte, anhte hkum nan mung Madu Yesu hta lang hte lang galai shai wa lu na, wenyi gaw anhte hpang de du sa wa na rai nga ai. Madu Yesu gaw, Shi tsawra ai sape ni rai nga ai anhte ni hpe, Shi a hpung shingkang shaleng dan mayu nga ai. Madu Yesu anga nga ai lam hpe hkungga la ra ai hte kam sham let nang tam nga ai kun?

"Madu Yesu Hkristu e, Nang hta galoi mung a maja nga na, ngai a prat hta Nang Madu aten shagu a nga nga ai hpe chye lu na, Nang Madu a Sak hkrung Mungga gaw shani shagu na ngai a hkrun lam hta malu masha tai nga ai hpe chye lu na shatsam ya rit. Nang Madu a hpung shingkang hpe ngai mu lu mayu nngai law."

LUSHA GAM LADAW LABAN (2) N A CHYUM LAIKA

21^st February, 2016

CHYUM MUGGA DAW 1

NPAWT NHPANG 15: 5-12. 17-18.

Ya hti na gaw, Npawt Nhpang Laika hta na rai nga ai.

Dai nhtoi hte hta e, Karai Kasang gaw Abram hpe shinggan de woi shapraw nna, Sumsing lamu de mada yu u; dai shagan ni hpe nang dang hti yang gaw hti yu u: na a myu matu ni dai hte maren rai na mara ai, ngu nna shi hpe tsun wu ai. Abram mung Madu hpe kam sham wu ai rai nna, dai gaw shi a ding hpring ai lam ngu nna Madu sawn la ya wu ai. Bai Shi tsun wu ai gaw, Ndai mung hpe na a sali wunli shatai na matu, ngai nang hpe jaw sana nga nna, Hkaladea masha ni nga ai Ura mare kaw nna nang hpe shaga woi wa ai Madu ngai rai nga nngai, ngu wu ai.

Shaloi Abram gaw, Madu e, dai mung nye a sali wunli tai na gaw, ngai kaning di chye lu na rai ta? ngu nna san wu ai. Madu gaw, Masum ning du ai dumsu upra langai mi, masum ning du ai bai nam yi langai mi, masum ning du ai sagu la langai mi hte u hkru du langai mi, ura kasha langai mi nye a matu la tawn u, ngu wu ai, Dai hte maren dai ni nlang hte hpe shi la tawn nna, hkum shagu hpe ka-ang brang brang di ga nhtawm, maga mi de chyen chyen di nna jahka tawn wu ai: u yan hpe chyawm gaw shi n ga wu ai, U matse ni dai mang de pyen hkrat ma ti mung, Abram dai ni hpe hkap gawn kau wu ai.

Jan du wa jang, Abram gaw yup sha-up hkrum nna, ja htat ai nsin hta hkrit gari mat wa ai. Jan shang mat nna, nsin htat nga ai shaloi, wan hkut hku ai wan mang hte, wan tu ai shanan paw pru nna, shan chyen ni a lapran hku lai mat wa ai. Dai shani e Madu gaw Abram hte ga shaka tawm da nna, Egutu hka nu kaw nna Uhprat hka nu kaba du hkra dam ai lamu ga hpe, na a amyu matu ni hpe ngai jaw da se ai, ngu nna tsun wu ai.

Ya hti ai gaw, Karai kasang a mungga rai nga ai.

CHYUM MUNGGA DAW 2

HPILIPI 3: 17-21. 4:1.

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai.

Hpu nau ni e, Nanhte hpawm nna, ngai madun dan ai kasi hte maren hkan galaw nga mu. Anhte gaw nanhte a kasi ningli tai saga ai rai nna, dai zawn hkan nang ai ni hpe yu matsing nga mu. Kaning rai nme law, shawng e ngai nanhte hpe law law lang tsun dan nna, ya e hkrap let nanhte hpe tsun dan ai hte maren, Hkristu a Udang hte nhtan shai ai hku hkan galaw ai ni law law nga ma ai. Shanhte a chyahtum ai gaw hten byak ai rai nga ai; shanhte a Karai Kasang gaw tinang a kan rai nga ai; tinang a kaya kahpa hta gumrawng nga ma ai; dinghta ga na arai ni hpe hkrai myit tsang nga ma ai.

Anhte a buga chyawm gaw sumsing lamu hta e rai nga ai; dai yang nna Madu Yesu Hkrsitu ngu ai Hkye Hkrang La ai Wa hpe anhte ala nga ga ai. Shi gaw arai yawng mayawng hpe Shi a npu e tawn da lu na atsam a marang e, anhte a grit nem ai hkum hkrang hpe ningnan galai nna, Shi a hpung shingkang rawng ai hkum hkrang hte bung hkra, shachyaw jahtap na ra ai.

Dai rai nna, ngai tsaw ra ai hte sharawng awng nna, nye a kabu gara shara hte janmau rai nga ai, jinghku ni e, dai Madu hta dakan dakring rai nna tsap nga mu, ngai tsaw ra ai ni e.

Ya hti ai gaw, Karai Kasang a mungga rai nga ai.

KABU GARA SHIGA

LUKA 9: 28b-36

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Yesu gaw Petru, Yawhan, Yaku hte hpe woi wa nna, akyu hpyi na nga bum ntsa de lung wa ai. Akyu hpyi nga yang, Shi a myiman gaw ahpraw nsam galai mat nna, Shi a hpun palawng mung hpraw tu ai hte, kabrim kabram rai wa lu ai. Shaloi, Mawshe yan Elia ngu ai masha lahkawng, hpung shingkang hte dan pru nna, Yerusalem mare e shatup na ra ai, Shi lai wa na lam Shi hte ga tsun nga ma ai.

Petru hte shi a manang yan gaw yup shamwi nga ma ai; rai ti mung, n yup ai sharang nna, Shi a hpung shingkang hte Shi hte rau tsap nga ai hpe mu ma ai. Dai yan gaw Yesu kaw na wa magang yang, Petru gaw, Madu e, ndai yang e nga na anhte a matu mai nga ai; nang e Na a matu langai mi, Mawshe a matu langai mi, Elia a matu langai mi, sum masum, anhte gap saga nga nna Yesu hpe tsun wu ai; rai ti mung, shi hpa tsun ai n chye wu ai.

Dai ga tsun nga yang, sumwi du nna shanhte hpe ka-up wa nga ai: dai sumwi kata de shang lawm wa yang, shanhte hkrit nga ma ai. Dai sumwi hta na nsen ngoi pru wa nna, Ndai wa gaw, ngai Sha, ngai lata la ai Wa rai nga ai: Shi a ga madat mara mu, nga ai. Dai nsen ngoi pru wa ai hpang, Yesu shi hkrai nga ai hpe mu ma ai; sape ni mung atsin sha nga nna, shanhte mu ai lam ni hpe, dai aten hta kadai hpe mung n tsun dan ma ai.

Ya hti ai gaw, Madu a Kabu Gara Shiga rai nga ai.

LUSHA GAM LADAW LABAN (1) MUNGGA

Lu sha gam ai ladaw hta tinang hkum hpe ndang nyet kau nna nkaja ai lam hpe koi gam let Karai Ksang hpang de myit malai lu let bai nhtang wa na matu shakut shaja ai aten ladaw rai nga ai.

Nkaja ai hpe koi gam nna kaja ai lam hta hkan shatup na ngu shakut shaja ai shaloi gung lau ai lam ni law law hkrum hkra chye nga ai. Nat satan a gung lau ai ngu ai hta tinang a hkum tinang gung lau la ai gaw lai di na matu grau yak nga ai. 

Tinang hkum hpe gung lau ai ngu ai shaloi tinang koi gam ai hpe myit hta nna nlu shamat kau ai gaw hkrat sum na lam a npawt nhpang rai nga ai. Ga shadawn, shan nsha na ngu daw dan ai hpe myit hta galoi mung dum shai nna "ngai shan nsha na re" ngu nna ten tup shadum taw nga ai gaw tinang hkum hpe gung lau ai hte bung nga ai. Aten ahkying na wa yang shadum la hkrum ai anhte a myit gaw shadum ai lam hpe hkan galaw nang chye nga ai.

Anhte koi gam na ngu ai hpe ten tup shadum la ai lam n-galaw ai sha Karai Kasang a shaman chyeju a majaw koi gam lu ai hte galaw na ngu ai hpe shadum la ai lam galaw let Karai Kasang a shaman chyeju hte hkan shatup galaw lu let Karai Kasang hte grau nyi htep ai ni ndai lu sha gam ladaw hta byin tai wa u ga.

MADU SHARAWNG AWNG AI LAM HTE RAWT JAT GALU KABA WA GA

Lusha gam ladaw nhtoi (40) ya hta, Chyoipra ai Wenyi Karai Kasang, nang hpe kaning rai garum ya na ra sharawng nga a ta?

Kabu gara shiga anhte hpe tsun dan ai hta, Yawdan hka e Madu Yesu kashin kamun hkam la ngut ai hpang, Chyoipra ai Wenyi a atsam hte hpring wa nna, Judea a nam mali kata, simsa ai shara, tinang hkrai sha nga na matu, mare de na ngoi garu ai n sen hte tsan ai de woi len mat wa sai. Madu Yesu, shi hkrai sha, nhtoi (40) ya tup, dinghku masha, manaw manang ni kadai hte mung matut mahkai ai lam n nga ai sha, sa nga nga sai. Judea nam mali gaw; dam lada la ai zai bru jang, lung rawk ni, bum marawn ni, hte sung la ai hkaraw n hkap ni deng law law matut manoi rai nga ai shara rai nga ai. Mungkan ntsa hta na hkai sha n mai ai bum shakrin ni hte hpring tup ai, shara langai mi rai nga ai. Shawlu a man kaw nna David hprawng hkawm let Yuda nam maling hkan nga hkawm ai shaloi; “hka n rawng ai hkraw ai hte krin ai prang hta e”, (shk 63:1) nga dai lamu ga hpe tsun lai wa sai. 

Kawa Karai e, Madu Yesu hpe Hkyela Madu tai na Sasana magam lit jaw ai hpang kalang ta ngu na ten hta, hpa majaw wenyi gaw, dai zawn re ai machyi shim ai shara de Yesu hpe woi mat wa ai rai?

Karai Kasang hte hkrum shaga na matu Mawshe yan Elia n’htoi (40) ya tup akyu hpyi ai, lu sha gam ai zawn sha Madu Yesu mung hkan galaw nang ai rai sai. Karai Kasang gaw Mawshe yan Elia hpe, shi a Mungga htawn shana na, myihtoi magam, dingman kang ka ai hte Karai Kasang hpe tsawra na hte htingbu wa hpe tsawra chye na lam de woi sa wa na magam bungli gun hpai lu na kun chyam yu ai rai sai. Sinai bum a nam maling kata e Mawshe, Elia lu sha gam akyu hpyi nga ai ten hta, Karai Kasang gaw shan lahkawng hpe Shi a sak hkrung Mungga hte jahkru shakat ya sai. Karai Kasang hte rau lak san machyi shim ai aten lu la ai marang e, Karai Kasang shan hpe jaw da ai lit hpe kam sham, myit mada tsawra ai hte galaw lu na n-gun ban la lu sai. Dai hte maren, Madu Yesu mung, Shi hta ap tawn da sai Sasana Magam bungli hpe gun hpai lu na matu, Sumsing Lamu na Kawa Karai hte mali shi ya, mali shi na tup akyu hpyi nna machyi shim ai shara hta rau sha sa nga let n-gun ban la sai. 

Madu Yesu, shawng na lang, gung lau hkrum ai gaw, malu masha hta rai nga ai. Tim, Madu gaw, Chyum Mungga hta na ga; ‘masha gaw Muk hte sha asak hkrung lu ai nrai, Karai Kasang a n-gup hta na pru ai mungga nlang hte hte hkrung nga lu na ra ai’ (Tra 8:3, Mt 4:4) ngu htan ya let, Satan hpe dang kau sai.                                                    

Lahkawng lang na agung alau gaw, Mungkan ga na arawng aya, sutsu nga pyaw lam ni hpe Satan hpe nawku let, lu la na matu tsun hkrum ai rai sai. Tim, ‘na a Madu Karai Kasang hpe nang nawku lu na rai nna, Shi hpe hkrai daw jau lu na ndai’ (Tra 6:13) nga ai mungga hte htan ya let, Satan hpe dang kau lu sai. 

Masum lang ngu na agung alau gaw, Madu Yesu, Karai Kasang a Kasha rai nga ai hpe chye nga ning len, dai lam hpe madun lu na, Karai Kasang hpe chyam na matu nat satan shangun ai rai sai. Rai tim, anhte hti lu sai hte maren, Madu Yesu gaw, ‘dai Madu na a Karai Kasang hpe nang chyam yu lu na n rai,’ (Tra 6:16) nga ai mungga hpe madi let satan hpe dang kau lu sai. 

Rai yang, nam mali e Madu Yesu agung alau hkrum ai mabyin kaw nna, anhte hpa hpe sharin hkam la lu sai kun? Tinang a prat hta du wa na re ai mara/agung alau ni hpe adawt kau lu na myit mada shara lu la sai kun? Madu Yesu nam mali e, nat a agung alau hkrum ai shaloi, Shi hpe Chyoipra ai Wenyi e woi len ai. Madu Yesu Shi hkum shi a atsam hpe kam nna sa ai gaw n rai ai. Chyoipra ai wenyi hta kam shamyet nga ai rai nna n-gun atsam, nyan hpaji, nden marai, hte tinang hkum hkang dang lu na chyeju lu la sai. Agung alau hpe tinang chyu dang kau lu na nre ai lam Madu chye nga ai. Chyoipra ai wenyi a atsam, garum ya na chyeju, anhte ra kadawn nga ai. 

Madu Yesu gaw, Shi a Wenyi hpe anhte a gawng kya ai lam a matu jaw da ya sai hte yak hkak hkrum wa ai ten hta anhte hpe lam woi atsam jaw ya na matu rai nga ai. Shi Madu hta shagrit shanem ai hte kam shamyet nga ai ni hpe, satan gasat ai kaw nna hkam manga kau lu na chyeju atsam Madu Yesu jaw nga ai. “Dai makam masham hte seng ai mai kaja ai gasat gala ai hpe a gasat nga na’ (1 Tim 6:12)Karai Kasang ra sharawng nga ai hte atsam marai hpe Chyoipra ai wenyi jaw ya na rai nga ai. Shut hpyit mara galaw ang na lam kaw nna lawt lu na matu, Karai Kasang a hpaji atsam hte lam madun ya na hpe nang tam nga ai kun? 

Nhtoi (40) ya lu sha gam ladaw ndai gaw, nam mali e Madu Yesu (40) ya lu sha gam akyu hpyi ai hpe hkan galaw ai rai nna, Karai Kasang a amyu masha ni anhte a matu shaning shagu galaw ai lusha gam akyu hpyi ai lamang rai nga ai. Madu Yesu hte rau hkawm sa let, akyu hpyi ai, lu sha gam ai, gam jaw gam ya ai, myit malai lu ai, hte tinang hkum hpe bai gram lajang da nna, Hkristan ni a ‘shalai wa ai Poi’ rai nga ai, “Paska’ poi a matu lajang shachyip da ga. Madu Yesu gaw, wenyi nshat, laklai atsam anhte hpe jaw ya ai marang e, agung alau hpe dang kau lu nna Shi Madu a myiman hpe mu mada lu na rai nga ai. Hkristu a nni nkri hkam ai lam hta anhte mung hkawm sa ai marang e, Shi Madu a bai hkrung rawt ai awng dang lam hta mung anhte shang lawm lu na rai nga ai.

Ndai lajang shachyip ai hte ningja jat la ai ladaw hta, Madu a wenyi hte kamsham, myit mada, tsawra ai lam hta anhte galu kaba wa nna, anhte a prat hta mung Madu a sharawng awng ai lam hpe grau nna hkap la lu na matu, Madu Yesu kaw akyu hpyi ga!

LUSHA GAM LADAW LABAN (1) N A CHYUM LAIKA

14^th February, 2016

CHYUM MUNGGA DAW 1

TARA JAHPRANG 26: 4-10

Ya hti na gaw, Tara Jahprang Laika hta na rai nga ai.

Israela masha ni yawng hte hpe Mawshe ning nga ai: Hkinjawng agyi wa gaw shawng myin ai nsi naisi amyu shagu hpe na a lata na la nna, na a Madu Karai Kasang a tawn hkungri a man e tawn da na rai wu ai.

Shaloi na a Madu Karai Kasang a man e nang tsun na gaw: Nye wa gaw brak hkawm ai Arame masha rai nga ai; shi gaw n law n htam ai masha ni hte rau Egutu mung de yu wa nna, galu kaba ai hte atsam rawng nna law htam ai amyu tai wa lu hkra, dai yang e shingbyi nga ai.

Egutu masha ni chyawm gaw anhte hpe n htum nni zingri zingrat ai hte, aja  awa yam sha kau mi ai. Shaloi anhte a ji wa ni a Madu Karai Kasang hpang de anhte hpyi jahtau saga ai rai nna, Madu anhte a nsen madat mara ya ai hte, anhte hkrum ai bungli lit hte nni nkri hpe yu ya mi ai.

Dai rai nna, Madu gaw n-gun ja ai lata hte ladawn dat ai lahpum, hkrithpa lam law law hte lamik kumla mauhpa amu madun nna,  Egutu mung na anhte hpe shaw woi wa nhtawm, nga chyu hte lagat ntsin lwi ai ndai mungdan hta woi shawn tawn da mani ai.

Ya, Madu e, Nang ngai hpe jaw ai yi hkauna a shawng myin ai nsi naisi ngai la sa ring ngai, ngu nna na a Madu Karai Kasang a man e nawng let, Shi hpe dingnyawm nawku na rai ndai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Roma 10: 8-13

Ya hti na gaw, Roma masha ni hpang de San Pawlu shagun dat ai Laika hta na rai nga ai.

Hpu nau ni e, Chyum Laika hpa tsun a ta ? ‘Dai mungga gaw nang hte htep rai nga ai;  na a n-gup hte kraw lawang hta e rawng nga ai,’-dai gaw anhte hkaw tsun dan ai makam masham rai nga ai. Shingrai, ‘Yesu gaw Madu rai nga ai,’ nga nna na a n-gup ga hte hkap hta la nna, Karai Kasang si mat ai ni kaw na Shi hpe hkrung sharawt la ai hpe, na a myit masin hta kam sham yang gaw, nang hkye hkrang la ai hkrum na rin dai. Kaning rai nme law, myit masin mahkra hte kam sham yang gaw, ding hpring ai lu la na ra ai; n-gup ga hte dai makam masham hpe hkap hta la yang gaw hkye hkrang la ai hkrum na ra ai.

Chyum Laika gaw Shi hpe kam sham ai ni yawng mayawng hte gaw kaya kahpa n hkrum na ra ai, nga nna tsun ai shaloi, Yuda ni hte Greka masha ni hpe n ginhka nga ai: dai Madu gaw yawng mayawng a ntsa na Madu langai sha rai nga ai; Shi hpe shaga ai ni yawng mayawng hpe garum na matu, Shi chyeju sutgan hte hpring nga ai. Shingrai, Madu a mying ningsang hpe shaga ai masha kadai mung hkye hkrang la ai kaw du lu na ra ai.Ya hti ai gaw, Karai Kasang a mungga rai nga ai.

KABU GARA SHIGA

LUKA 4: 1-13.

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Yesu gaw Chyoi Pra ai Wenyi hte hpring let, Yawdan hka nna bai wa yang, dai Wenyi e nam mali de nhtoi mali shi ya tup woi hkawm wu ai rai nna, nat e gunglau ai hkrum wu ai. Dai nhtoi mahkra a laman e Shi hpa mung n sha ai rai nna, jahtum ai de kaw si wu ai.

Dai rai nna Nat gaw, Nang Karai Kasang a Kasha rai yang gaw, ndai nlung hpe muk tai u ga tsun u, ngu nna Shi hpe tsun wu ai. Yesu htan let, Masha gaw muk hte sha hkrung nga lu na n rai, nga nna ka da nga ai, ngu wu ai.

Bai, Nat gaw Shi hpe tsaw ai shara de woi lung nna, mungkan ga na mungdan nlang hpe myi grip mi hta madun dan nna, Ndai ahkang aya mahkra hte, dai mungdan ni a hpung  shingkang hpe ngai nang hpe jaw na de ai: dai gaw ngai hpe ap ya ni ai rai nna, ngai jaw mayu ai wa kadai hpe mung jaw lu nngai. Dai re ai majaw, nye a man e nang nawku yang gaw, ndai yawng mayawng na a tai na ra ai, ngu nna Shi hpe tsun wu ai. Shaloi Yesu gaw, Dai Madu na a Karai Kasang hpe nang nawku lu na rai nna, Shi hpe hkrai daw jau lu na ndai, nga nna ka da nga ai, ngu nna htan wu ai.

Bai, Nat gaw Yerusalem mare de Shi hpe woi sa nna, Nawku Htingnu a nchyun e shadun tawn nhtawm, Nang Karai Kasang a Kasha rai yang gaw, Na a hkum hpe nang de nna le ra de jahkrat dat u; kaning rai nme law, Nang hpe bau sin na, Na a matu Shi a lamu kasa ni hpe Shi hkang da nu ai; Bai, Nlung hta Na a lagaw n ahtu u ga, shanhte a lata hta Nang hpe pawn la na mara ai, nga nna ka da nga ai, ngu wu ai. Yesu gaw, Dai Madu na a Karai Kasang hpe nang chyam yu lu na n rai, nga nna rawng ai, ngu nna htan wu ai.

Nat gaw agung alau lam mahkra shatup ngut jang, bai sa ang ai aten du hkra Shi kaw na pru wa ai.

Ya hti ai gaw, Madu a Kabu Gara Shiga rai nga ai.

PRANWAN LADAW LABAN (5) MUNGGA

Karai Kasang a mau hpa lamik kumla anhte a prat hta byin pru wa na matu gaw anhte shinggyim masha a myit hkrum ai lam lawm ra na re. Kasa Petru gaw shana ting nga hkan ai rai tim nlu nna myit daw hten taw nga ai aten hta Madu Yesu hpe mu hkrum ai re. Madu Yesu gaw Patru hpe “sung ai de sit nna singgawn hpe jahkrat u” ngu ai hte maren hkan galaw nna mau hpa lamik kumla byin pru wa ai re.

Madu Yesu gaw Petru a shang lawm ai lam nnga ai sha nga law law hpe lamik kumla kaba hku nna jaw ya mai ai rai tim mung n-galaw ai sha Petru shi hkum nan sung ai de sit sa nna nga hkan na matu shawng saw shaga galaw sha-ngun ai hpang she nga law law hpe lu hkan la sai re.

Anhte a asak aprat hta grau nna myit daw hten ai ahkying aten hta lamik kumla kaba byin pru lu na matu gaw tinang myit shatawng shada ai, chye na lu ai lam hpe tawn da nna Karai Kasang hpe kam sham ai hte Shi Madu matsun madun ai hpe hkan shatup lu na matu ahkyak nga ai. 

Kam sham ai myit kaba hte Karai Kasang matsun madun ai hpe hkan shatup galaw sa ai a marang e anhte a asak aprat hta mauhpa chyeju sut gan ni hpe Karai Kasang kaw nna hkam la lu u ga. 

KARAI KASANG HPE HPANG GARA AI NI TAI NGA GA

‘Nga’ law law hpe rim la lu ai lamik kumla hpe Madu Yesu hpa majaw galaw dan sai kun? Ndai lamik kumla a majaw, Madu Yesu kaw katut bang sa wa ai shawa masha ni hta lama ma byin na sai. Shanhte gaw Karai Kasang hpe hpang gara nga ai hte Shi a mungga hpe mung madat la mayu nga ai. Ndai mabyin hpe mahta nna, Madu Yesu gaw sape ni hpe ahkyak ai lam sharin ya mayu nga ai. Simon Petru mung shana tup grai shakut let hpa nlu la sai rai tim, Madu Yesu hte shawa masha ni hpe yu let, Madu a Mungga hpe madat la sai. Na a mungga hte maren, ngai singgawn jahkrat na nngai. Nang mung Simon Petru zawn rai, hkrat sum ai, jam jau ai ten hta, Madu a mungga hpe hkap la madat na myit nga ai kun?

  

Ndai mabyin masa hpe yu la nna, Karai Kasang gaw Shi a hpung shingkang a matu kaning rai bungli galaw ai, ngu ai ahkyak ai tengman ai lam hpe chye la lu sai. Anhte hkum nan galaw lu ai hta grau kaba ai lam hpe Karai Kasang myit mada da nu ai. Karai Kasang a mungga hpe madat lu nna hkan galaw ai marang e, anhte dang di lu ai hta grau law la ai magam hpe shangut shakre la lu ai.

“Madu Yesu hta n chye na lu na daram anhte hpe tsawra ai lam nga nna, Wenyi hkye hkrang la na lam hta anhte hpe mung saw shaga nga ai. Anhte n lawm ai sha, Madu hpa mung n-galaw nga ai. Kaga masha ni a Wenyi hpe hkye hkrang la na matu, mungkan ting hpe hpan da ai Madu gaw, matsan mayan, kaji kadun la ai wenyi akyu hpyi nsen hpe ala nga ai. {Lisieux na San Therese}. 

Karai Kasang a mungga hpe htawn shana ai shaloi, Shi a Mungdan lam shaleng dan nna Shi a Atsam pru wa sai. Karai Kasang a mungga hpe shinggyim masha ni kam sham ai hte madat mara ai shaloi, shanhte gaw Hkristu hta ‘ningnan hpan da ai’ hkrum sai. Karai Kasang gaw nang/ngai zawn re ai yu maya shinggyim masha ni hpe lata la let Shi a kasa shatai nhtawm, anhte a shani shagu na amu bungli hta jai lang let masha kaga ni hpe Shi a mungdan de shaga la shangun sai.

Dai ni, Madu Yesu, ‘masha hpe hkan hkwi na masha’ tai na anhte hpe saw shaga nga ai. Shi Madu a ninghtoi anhte hta htoi kabrim na matu ahkang jaw ra na re. Kabu gara shiga a kabu pyaw hpa lam hpe anhte nga sa, tsun shaga ai hta Hkristu a ninghtoi hpe masha kaga ni mu lu na matu Karai Kasang ra sharawng nga ai. ‘anhte hpe Hkristu hta tut nawng e padang manau hta n law shangun nna, shi a chye chyang ai manam pyaw bat anhte a lata hte shara shagu hkan e shapraw shadan ai Karai Kasang gaw, a nga u ga law: kaning rai n me law, anhte gaw hkyehkrang la hkrum ai ni hta mung, sum mat hkrum ai ni hta mung, Karai Kasang a man e Hkristu hta ngwi pyaw bai rai nga ga ai” (2kor 2:14-15).

Kabu gara shiga a kabu pyaw ai lam hpe na a makau mayang e nga ai ni hpe sakse hkam nga ai kun? Madu Yesu hpe, htingbu ni, magam gun manang ni, jinghku jingyu ni, chye chyang tsawra wa lu u ga, shanhte a matu nang akyu hpyi ya nga ai kun?

Madu Yesu e, Nang hpe n chye ai ni, na a hpang n hkan nang ai ni a matu, ngai a salum hpe matsan dum tsawra myit hta jahpring ya rit; ngai a kun dinghku, manaw manang ni, hte magam gun manaw manang ni a matu, Nang Madu a hkye hkrang la lam a sakse kaja ngai tai wa lu u ga law, AMEN!!!

PRANWAN LADAW LABAN (5) NA CHYUM LAIKA

7^th February, 2016

CHYUM MUNGGA DAW 1

ESAIA 6:1-8.

‘Ngai nang nga ai law; ngai hpe shangun dat rit.’

Ya hti na gaw, myihtoi Esaia a Laika hta na rai nga ai.

Hkawhkam Uzziah si ai shaning hta, Madu gaw galu kaba nna tsaw htum ai tingnyang hta dung nga ai hpe ngai mu nngai; Shi lawai ai hpun nba Nawku Htingnu ting hpring nga ai. Shi a ntsa e Serahpin tsap nga ma ai: langai hte langai singkaw kru kru tu nga ma ai. Langai wa mi hpe, ‘Zawnawng zawwa up ai Madu gaw, San Pra, San Pra, San Pra rai nga ai. Ginding aga ting Shi a hpung shingkang hte hpring nga ai law.’ nga nna tsun ma ai. Shing nga tsun jahtau ai wa a nsen majaw chyinghka hkinbawng ni  ashum awam nga nna, nta ting wan hkut hte hpring nga ai. 

Dai rai nna ngai gaw, ‘Ngai wa tsinyam hkrum lu nngai; ngai htum mat ni ai; ngai n san n seng ai nga nga nngai; rai ti mung, zawnawng zawwa up ai Madu dai Hkawhkam wa hpe, nye myi hte nan mu lu se hka’. ngu nna tsun nngai.

Shaloi, Serahpim langai mi gaw tawn kungri ntsa na, lakap hte matep la ai wan n-ga, shi a lata hte lang let ngai hpang de pyen sa wa ai. Dai wa nye a n-gup hpe ahtawk let, ‘Yu u, dai gaw na a nten hpe hkra sai; Na a mara hpe yeng seng kau sai; Nang shut hpyit ai hpe mung raw dat kau nu ai.’ nga ai.

Bai, ‘Ngai kadai hpe shangun dat na i? Anhte a matu kadai wa sana i? nga nna Madu san ai nsen hpe ngai na nngai. Dai rai nna, ngai gaw, ‘Ngai nang e nga ai law, ngai hpe shangun dat rit.’ ngu nna htan we ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 15: 1-11.

‘Shanhte hkaw dan ai mungga hpe ngai mung hkaw dan nga ai; dai hpe nan nanhte kam sham manit dai.’

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Ngai nanhte hpe hkaw tsun dan nna nanhte mung hkam la sai hte, naw hkan nang yu ai, Kabu Gara Shiga a lam hpe, nanhte naw myit dum la na matu, ngai bai shapraw shadan de ai. Ngai nanhte hpe tsun dan yu ai mungga hpe, nanhte manat nga yang gaw, de a marang e hkye hkrang la ai hkrum lu na myit dai; dai hku n rai yang gaw nanhte a makam masham li la rai nga ai.

Ngai hkam la sai grau ahkyak ai lam hpe, ngai shawng nnan e nanhte hpe ap ya sade ai: dai gaw, chyum laika ni tsun ai hte maren, Hkristu gaw anhte a shut hpyit mara a matu si hkam sai; lup makoi ai shi hkrum nhtawm masum ya nhtoi hta e, bai hkrung rawt wa sai. Shi gaw Kehpa kaw dan pru wa ai; dai hpang kasa shi lahkawng kaw dan pru mu ai; dai hpang lang lata sha, hpu nau manga tsa jan Shi hpe mu dat ma ai: Shanhte hta na malawng maga ya du hkra nga shajang ma ai; nkau mi chyawm gaw yup pyaw mat masai. Dai hpang Yaku kaw mung, kasa ni yawng kaw mung, Shi dan pru mu ai. Hpang jahtum e, ngai nhtoi n gu ai ma zawn re ai wa kaw Shi dan pru ni ai.

Kaning rai nme law, kasa ni hta kaji htum ai wa ngai rai nga nngai; Karai Kasang a Nawku Hpung hpe ngai zingri zingrat di kau sai majaw, kasa ngu na pyi ngai n ging n dan nngai. Rai ti mung, Karai Kasang a 

chyeju majaw, ngai ndai hku byin lu nngai rai nga ai; Shi ngai hpe madun dan ai chyeju mung, ngai hta e kaman lila n rai mat ni ai. Shanhte yawng hta ngai grau nna bungli gunhpai nngai; dai gaw ngai n rai, ngai  hte rau a nga nga ai Karai Kasang a chyeju sha rai nga ai; rai ti mung, ahkyak ai lam gaw, shanhte hkaw dan ai mungga hpe, ngai mung hkaw dan nga ai; dai hpe nan nanhte kam sham manit dai.

Ya hti ai gaw Karai Kasang a mungga rai nga ai.

KABU GARA SHIGA

LUKA 5: 1-11

‘Shanhte arai mahkra hpe kau da nna, Shi kaw hkan nang ma ai.’

Ya hti na gaw, Luka a Laika hta na Kabu Gara Shiga rai nga ai.

Dai aten hta e, masha wunawng wuwa Karai Kasang a mungga madat la na matu, Yesu kaw ginjup sa wa ma yang, Genesaret nawng makau e Shi tsap nga ai rai nna, hka hkin gau de nna loi mi sit sa wa na matu shi hpe hpyi wu ai rai nna, dai li hta dung let, dai kaw nna shawa masha ni hpe sharin shaga wu ai.

Shi ga tsun ngut jang, hka sung ai de sit sa nna, nga magawn la na matu, sumgawn ni hpe jahkrat dat mu, ngu nna Simun hpe tsun ai. Simun mahtang gaw, Madu e, mana tup anhte shakut ti mung, hpa n lu ga ai; rai ti mung, Na a ga a majaw sumgawn jahkrat na we ai, ngu nna htan wu ai. Shing rai jahkrat jang, shanhte gaw nga unawng kaba magawn hkrup lu ma ai; shanhte a sumgawn ni je wa malu ai rai nna, li kaga hta nga ai manang ni hpe sa garum na matu, dingsi shaga la ma ai. Shanhte sa garum nna,  li lahkawng yan lup wa  mangang hkra, bang jahpring mu ai.

Simun Petru gaw dai hpe mu jang, Yesu a lagaw nhpang e hput di nna, Madu e, ngai hte hka mat wa su; ngai gaw mara kap ai masha rai nga nngai, ngu wu ai. Kaning rai nme law, shing rai nga magawn la lu ai majaw, shi mung, mau mahka nga ma ai; Simun a manang yan, Zebedi a kasha Yaku hte Yawhan mung, dai zawn mau mat ma ai.

Shaloi, Yesu gaw Simun hpe, Hkum hkrit et; ya kaw nna masha hpe hkan hkwi na rin dai, ngu wu ai. Shanhte a li yan hpe danam e sek da nhtawm, arai mahkra kau da nna, Shi kaw hkan nang ma ai.

Ya hti ai gaw Madu a Kabu Gara Shiga rai nga ai.