2018:CHYOI PRA AI HKUM HTE SAI POI SHANI NA MUNGGA

Dai ni na poi nhtoi gaw Madu Yesu anhte shinggyim masha ni hpe tsawra nna hkye hkrang la sai hte anhte a hkrun lam hta Wenyi n-gun la lu na matu Shi a hkum hte sai hpe jaw ya ai hpe shadum jahprang ya nga ai.

Chyoi Pra ai Misa Hkungga hpe sa lawm nna Shi a hkum hte sai hpe hkam la lu ai gaw manu dawdan nlu ai Karai Kasang jaw ya ai kumhpa kaba rai nga ai. Shi a Hkum hte Sai hpe hkam la ai marang e Karai Kasang gaw anhte hte rau nga nna ra ai chyeju ni hpe jahkum shatsup ya nga ai.

Mara raw sacramentu hpe hkam la let shut hpyit mara ni kaw nna jasan jaseng hkrum ai hte san seng ai myit masin hte, Chyoi Pra ai Hkum hpe hkungga kamsham ai hte hkam la lu na matu shakut shaja sa wa ga.   

WENYI LU SHA

“Chyoipra ai Hkum hte Sai Poi” gaw Madu Yesu, Shi hkum nan anhte a matu Wenyi lusha shatai na jaw ya ai lam hpe shagrau ya ai poi re”

Sumla ka sara wa marai mi gaw, Germany mungdan na Nawku jawng langai mi hta laklai ai chyinghka lajang da ai da. Dai chyinghka hpe daw mali garan shatsawm da nna daw shagu hta kabu gara shiga laika mali hta na mabyin ni hpe sumla kamahkret shakap da ai da. Langai ngu na daw hta, n tsin yam 6 mahkret shakap da nna, ‘Hkanan’ kahtawng na hkungran poi hta hka kaw nna tsabyi shatai ya ai lamik kumla hpe mahkret shakap tawn da ai. Dai gaw Madu Yesu shi a sape ni a matu lajang ai hpang jahtum shana shat sha poi hta tsabyi hpe shi a sai galai ya ai masat kumla rai nga ai. 

Lahkawng ngu na daw hta, muk tawng manga hte Nga lahkawng kamahkret da nna, ‘Kapernaum’ mare hta muk hte nga shalaw jaw ai hpe la tawn da ai. Dai gaw, Yesu gaw shi a hkum shan hte masha ni hpe jaw sha na masat kumla rai nna, “nanhte hpe sumsing lamu de na muk jaw ai gaw Mawshe n rai,.... ngai gaw sumsing lamu de na du yu wa ai, hkrung ai muk rai nga nngai, muk n dai sha ai wa kadai mung htani htana ahkrung nga na ra ai, ngai jaw ai muk chyawm gaw, nye a shan rai nga li ai (Yn 6:32,51)” ngu ai lam hpe shadum ya nga ai. 

Masum ngu na daw gaw, masha marai 13 sha ku hta dung nga ai hpe ka mahkret da nna, hpang jahtum daw sha poi hpe la tawn da ai re. Hpang jahtum shana shat sha poi hta, Yesu gaw hka hpe tsabyi shatai ai sha n rai, tsabyi hpe shi a sai, muk hpe Shi a hkum shan de galai dat sai. 

Daw mali hta gaw, masha marai 3 sha ku hta dung nga ai hpe ka mahkret da nna, Ema-U kahtawng na mabyin hpe la da ai. Ema-U kahtawng mabyin hta Yesu muk hpe la nna, shaman n htawm, ahkyep alep ngut jang dai sape lahkawng hpe jaw mu ai. Hpang jahtum shana shat sha poi hte shing daw yu mai nga ai. 

Ndai sumla ka sara a chyinghka gaw, kabu gara shiga hta byin lai wa ai hpang jahtum shat sha poi hpe shing gyin madun ai rai sai. Ndai lam ni yawng gaw dai ni anhte galaw nga ai Chyoipra ai Hkum hte Sai poi hpe tsawm htap ai hte hkrang shala ya nga ai re. Chyoipra ai Hkum hte Sai Poi gaw Madu Yesu shi hkum nan anhte a matu wenyi lu sha shatai na jaw ya ai lam hpe shagrau ya ai rai nga sai.     

Sawn sumru mai ai lam; Ngai a prat hta Chyoipra ai hkum hpe manu shadan nga ai kun? Madu Yesu shi a hkum hpe anhte a Wenyi lu sha shatai ya ai zawn, dai lam hpe ngai a shani shagu na nga sa prat hta kaning rai lachyum shapraw na rai?

2018:CHYOI PRA AI HKUM HTE SAI POI SHANI NA CHYUM LAIKA

HKRISTU A CHYOI PRA AI HKUM HTE SAI POI

3rd June 2018

CHYUM MUNGGA DAW 1

Pru mat wa ai Laika 24:3-8

Mawshe gaw Madu a ga mahkra hte shi hkang dat ai tara mahkra, amyu masha ni hpe tsun shana wu ai. Amyu masha ni yawng mung, Madu tsun matsun mahkra anhte hkan galaw na ga ai, nga nna lang lata sha htan ma ai. Mawshe gaw Madu a ga mahkra ka da ngut jang, jahgpawt jau jau rawt nna, bum lagaw e tawn hkungri gaw nhtawm, Israela amyu shi lahkawng hkan nna, nlung shadaw shi lahkawng jun da wu ai. Israela a kashu kasha ni hta na shabrang ni hpe shi shangun dat nna, shanhte gaw Madu a matu wan nat hkungga hte mahku hkungga di na usu ni hpe sat nawng ya ma ai.

Mawshe gaw sai ka-ang hkup la nna, jarung hta bang tawn wu ai; ka-ang hkup gaw, tawn hkungri hta lapri bun wu ai. Dai ga shaka laika mung shi la nna, shawa hpawng a man e hti dan wu ai; shanhte mung, Madu tsun matsun mahkra hpe anhte madat let hkan galaw na ga ai, nga nna tsun ma ai.  Shaloi Mawshe gaw dai sai la nna, amyu masha ni hpe lapri bun let, Yu mu, sai ndai gaw, ya ngai tsun dan ai Karai Kasang a mungga mahkra hte maren, Madu nanhte hte tawn da ai Ga Shaka a asai rai nga ai, ngu nna tsun wu ai.

Ya hti ai gaw, Karai Kasang a mungga rai nga ai.

CHYUM MUNGA DAW 2

Hebre 9:11-15

Ya hti na gaw, Hebre masha ni hpang de shagun dat ai laika hta na rai nga ai.

Hkristu gaw, du na ra ai shaman chyeju lam mahkra a npawt daju Jau tai na matu du sa jang, ndai hpan tawn ai mungkan ga hte n seng nna, masha a lata hte n shachyaw ai, grau kaba ai hte grau hkum tsup ai nawku ginsum hta shi lai sa nu ai. Shing rai, bainam hte dumsu kasha a asai hte n rai, shi hkum nan a asai hte, chyoi pra ai shara de kalang mi sha shang nna, htani htana hkye hkrang la ai lam lu la nu ai. Ya, bainam sai, usu sai hte nga upra a wan wu hte, awu asin hkrum ai ni a ntsa e lapri ya jang, hkum shan san seng hkra shanhte hpe shachyoi shapra ya lu ai teng yang gaw, Karai Kasang kaw nawng ya ai Hkristu a asai gaw, ahkrung nga ai Karai Kasang hpe daw jau lu hkra, nanhte a myit masin hpe si gying ai arawn alai hta na, grau nna shachyoi shapra ya lu na n rai ni? Dai rai nna, Hkristu gaw Ga Shaka Nnan a htinglu htinglai ya ai wa rai nga ai; hpa majaw nga yang, shawng na ga shaka a tawt lai ai amu ni hta na masha ni hpe hkye hkrang la na matu, Hkristu gaw si hkam sai majaw, shaga la hkrum ai ni gaw, Karai Kasang ndat da ai htani htana sali wunli hkam la lu ma ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 14:12-16. 22-26

Ya hti na gaw Marku a laika hta na Kabu Gara Shiga rai nga ai.

Matsi n rawng ai muk sha ai poi hta shang ai shani e, Shalai dat ai poi hte seng ai sagu kasha hpe, Yuda masha ni sat nawng ai htung nga ai majaw, Yesu a sape ni gaw, Dai Shalai dat ai poi sha na matu, gara shara hta e na a matu sa shachyip na, nang ra nga n ta? ngu nna shi hpe san mu ai. Shaloi sape shi lahkawng hpe shi shangun dat nna, Mare de sa masu; hka dibu hpai ai masha langai mi mu na ra ai: shi a hpang e hkan nang nna, shi gara kaw shang timung, dai nta madu hpe, Nye a sape ni hte rau Shalai dat ai poi hpe ngai sha lu na, nye a matu san da ai gawk kanang nga a ta? nga nna sara gaw san shangun dat mi ai, ngu mu: shaloi, lajang shachyip da ai ntsa gawk kaba shi madun na ra ai; dai yang e anhte a matu jin jin lajang da mu, ngu nna tsun dat mu ai. Dai sape yan pru wa nna, mare de shang wa ma yang, Yesu tsun dat ai hte maren mu ma ai rai nna, Shalai dat ai poi shachyip da ma ai.

Yesu hte shi a sape ni shat sha nga yang, shi muk la nna, shaman nhtawm, ahkyep alep di nna shanhte hpe jaw let, la mu, ndai gaw Nye a Hkum rai nga li ai, ngu mu ai. Bai, gawm hpe mung shi la nna, chyeju dum shakawn ngut jang, shanhte hpe jaw nna, shanhte nlang dai hta na lu ma ai.  Shanhte hpe Shi tsun mu ai gaw: ndai gaw, masha law law a matu ru kau ya ai, dai ga shaka hte seng ai, nye a asai rai nga li ai.  Nanhte hpe ngai teng teng tsun made ga: Karai Kasang a mungdan hta e tsabyi chyaru nnan hpe ngai lu lu na nhtoi du hkra, ndai tsabyi chyaru hpe, ngai kalang mi pyi bai n lu na ni ai, ngu nna tsun mu ai. Dai hpang shakawn kungdawn ga mahkawn ngut jang, shanhte gaw Tsanlun Bum de sa wa ma ai.

Ya hti ai gaw, Madu a Kabu Gara shiga rai nga ai.

2018:CHYOI PRA AI TRINITA POI SHANI NA MUNGGA

Shinggyim masha gin shapraw tawn da ai “Computer” dai ni na aten hta mau nma ai atsam ni rawng ai rai tim ndai aria ni hpe gin shapraw tawn da ai masha a baw nu hta rawn ai hpe gaw nmai chye nga ai.

Karai Kasang hpan tawn da ai shinggyim masha ni atsam marai kade nga ai raitim Karai Kasang a nyan hpaji hpe myit hkawn nmai nga ai. Karai Kasang shadum jahprang ai, shadan shaleng dan ai hpe chyu sha chye na hkawn hkrang lu ai re. 

Karai Kasang a lam hpe kup tsup hkra nchye na lu ai raitim, Karai Kasang hte rau nga sa let Shi Madu hta grau grau kam sham tsawra shingbyi shamyet shanat nga sa lu u ga,

Kawa, Kasha, Chyoi Pra ai Wenyi kaw hkungga shakawn nga u ga.

SUNG HTUM AI MUNGSUNG

Tsawra matsan dum myit arawn alai gaw, masha kaga hpe Trinita Karai Kasang a mungsung lam hpe madun dan lu ai kaja dik ai sakse rai sai.

Kalang mi na saradaw marai mi gaw mare kaba langai na Nawku jawng hta ‘N-gun shaja’ sakramentu jaw na Missa hta, Yesu kashin kamun hkam ai sumla soi shakap da ai pat hkuwat hpe madun let, sakramentu hkam la na la kasha marai mi hpe mada yu shangun ai. Saradaw gaw yawdan hka na Yesu sumla hpe layung madi let, ‘Shi gaw Karai Kasang rai nga nni? ngu san yang, ‘rai nga ai’ nga la kasha dai htai ya sai. Sumwi kata na Kawa Karai Kasang sumla hpe madi let, ‘shi gaw taw?’ ngu yang, ‘Shi mung Karai Kasang rai nga ai’ ngu htai sai. Dai hpang Yesu a baw ntsa e gawan taw nga ai Chyoipra ai wenyi hpe madun let san yu yang, ‘Shi mung Karai Kasang rai nga ai’ ngu la kasha mahtai jaw sai. “Rai yang, Karai Kasang  masum rai nga ai le” nga tsun yang, “N re! Karai Kasang langai sha re! nga nna la kasha dai ja ja tsun sai. Saradaw mung, dai pat na sumla ni hpe yu let, ‘ngai gaw n chye na ai law’ ngu wu ai. N-gun shaja sakramentu hkam la na dai la kasha gaw Saradaw hpe mau let tsun ai gaw, “Wasaradaw, dai hpe chye na na n ra nga ai, dai gaw Mungsung gasung rai nga ai” ngu ai da!

Ndai gaw anhte Hkristan makam masham a akri madung rai nna Ru pawt mung rai nga ai hte anhte a prat hta mung hkum hkra shangun ra nga ai. Nawku Hpung na hkam la ai makam masham (doctrine) ni hta ‘Chyoipra ai Trinita’ a lam gaw chye na yak dik ai lam rai nga ai. Nang kade wa chye chyang ai masha raitim, Trinita a lam pu pu le le n chye na lu na re. Anhte a myit nyan gaw Karai Kasang daram galoi mung n kaba lu ai majaw re. Dai gaw San Augustine, Chyoipra ai Trinita a mungsung lam hpe myit sawn ai shaloi mung byin wa sai.

Ma kasha marai mi panglai hkin gau zaibru jang hta n-hkun kaji htu nga ai hpe sa mu jang san Augustine gaw, dai hpa galaw na lam san wu yang, “ngai panglai hka yawng hpe ndai n hkun hta bang kau na” ngu htai ya sai. San Augustine mung mani asawng let, galoi mung n mai byin ai lam tsun sai. Shaloi ma kasha dai gaw, “ndai hpe galaw lu na loi nga ai, raitim, nang a nyan marai hte Chyoipra ai Trinita mungsung lam yawng hpe chye na na matu gaw grau n mai byin ai” ngu tsun dat nu ai.

Anhte mungsung lam hpe tsun ai shaloi, anhte hpa n chye na ai ngu ai lam n rai nga ai. Raitim, dai a lam anhte yawng n chye na lu ai ngu ai lam she re. Karai Kasang gaw anhte n chye na lu ai lam n re. Trinita Karai Kasang hku nna anhte hkam sha, chye na, na la loi na matu Karai Kasang gaw shi hkum nan anhte hpe matut mahkai nga ai. Shinggyim masha hkrang “Madu Yesu” hku nna anhte hte matut mahkai lam galaw sai. Hkristu hku nna, Karai Kasang gaw shi a n sam kumla rai nga ai tsawra matsan dum myit hpe hpaw madun dan sai. “Karai Kasang gaw Shi a kasha shingtai hpe jaw kau ai du hkra, mungkan ga hpe tsaw ra wu ai (Yn 3:16)”. Tsawra myit gaw kawa Karai Kasang, Kasha hte Chyoipra ai Wenyi hpe galung da ai lam re. Dai majaw anhte a matu mung, tsawra matsan dum myit arawn alai hpe grau grau mu mada hkam sha magang, Trinita Karai Kasang a lam hpe grau chye na let nga sa lu ai lam rai nga ai.

Sawn sumru mai ai lam; Trinita Karai Kasang a lam hpe ngai a prat hta kaning rai mu, chye na lu ai kun? Tengman ai Trinita Karai Kasang a mungsung gasung gaw ngai a prat hta a shanu nga ai kun?

2018:CHYOI PRA AI TRINITA POI SHANI NA CHYUM LAIKA

CHYOI PRA AI TRINITA POI

27th May 2018

CHYUM MUNGGA DAW 1

Tara jahprang 4:32-34, 39-40

Ya hti na gaw, Tara Jahprang laika hta na rai nga ai.

Da ndai gaw Israela a kashu kasha ni hpe Mawshe tsun ai ga rai nga ai: Ginding aga ntsa e Karai Kasang shinggyim masha ni hpe hpan da ai nhtoi kaw nna, nanhte garai n pra yang na, lai mat sai prat ni mahkra hta ndai lam hpe gawn yu mu: Lamu ga htum ai maga kaw nna maga mi du hkra , ndai daram kaba ai amu byin yu sa ni? Karai Kasang wan kata na tsun dat ai nsen hpe nanhte na la nna nang hkrung nga ai zawn, amyu kaga ni na la nna naw hkrung nga ma ni? Nanhte a Madu Karai Kasang gaw, lamik kumla hte mauhpa amu, n-gun ja ai lata ladawn ai lahpum the nanhte a matu majan gasat ai, hkrit hpa amu hte chyam dinglik yu ai lam amyu myu hpe, Egutu mung hta nanhte man e galaw dan nna, masha amyu ni hta na nanhte hpe, Shi a amyu shatai na matu shaw la nu ai. Dai zawn re ai hku hpara shaje shi a matu masha amyu ni hpe lata la lu sa ni? 

Dai rai nna, Madu gaw sumsing lahta tang hte ginding aga ntsa e Karai Kasang langai sha rai nga nna, Shi hta kaga Karai shaje n nga sai hpe, dai ni e dum hprang nna, kraw lawang kata e matsing gun la mu law. Nang hte na a prat tup a matu nang hpe jaw da ai mungdan hta, nang asak galu nga u ga matu mung, dai ni e, ngai tsun da ai matsun maroi ga hte hkang da ai tara lam ni hpe nanhte hkan shatup lu na rai myit dai, ngu nna Mawshe hkaw tsun da ai rai.

Ya hti ai gaw, Karai Kasang a Mungga rai nga ai.

CHYUM MUNGGA DAW 2

Roma 8: 14-17

Ya hti na gaw, Roma masha ni hpang de San Pawlu shagun dat ai laika hta na rai nga ai.

Hpu nai ni e, Karai Kasang a Wenyi e woi lakawn la hkrum ai ni yawng hte gaw, Karai Kasang a kasha ni rai nga ma ai. Kaning rai nme law, bai hkrit kang na matu mayam a wenyi hpe nanhte hkam la manit dai n rai; Abba, Wa e, nga nna jahtau chye lu hkra, kasha shatai ai wenyi hpe nanhte hkam la manit dai. 

Dai Wenyi nan anhte a wenyi hte hkrum nna, anhte Karai Kasang a kasha ni rai nga ga ai hpe, sakse hkam ya ma ai. Shi a kasha ni rai nga yang gaw, sali wunli hkam la ai ni mung rai nga ga ai. Hkristu hte rau hpung shingkang hkam la lu hkra, shi hte rau nni nkri hkrum nga yang gaw, Karai Kasang a sali wunli hkam la ai ni anhte rai nga ga ai.  

Ya hti ai gaw, Karai Kasang a mungga rai nga ai.

KABU GARA SHIGA

Mahte 28:16-20

Ya hti na gaw, Mahte a laika hta na Kabu Gara Shiga rai nga ai.

Yesu a sape shi langai hte gaw, Shi shanhte hpe hkang da ai hte maren, Galile mung na bum de lung mat wa ma ai. Shi hpe mu jang, shanhte nawku ma ai; nkau mi mahtang ai n kam ma ai. Yesu shanhte hpang de sit sa wa nna, Sumsing lamu hta e mung, ginding aga hta e mung, up hkang na ahkang nlang hte hpe ngai kaw ap ya ni ai. Dai majaw nanhte pru sa nna, masha amyu baw shagu hpe sape shatai let, Kawa, Kasha, Chyoi Pra ai Wenyi a mying nsang hte, kashin kamun jaw nga mu; ngai nanhte hpe hkang da mada shanhte hkan shadik lu mu ga, sharin shaga ya mu. Dai hta kaga, lamu ga aprat htum mat hkra, ngai nanhte hte rau dinggrin a nga nga na nngai, ngu nna Yesu Madu Shi a sape ni hpe matsun dat mu ai.

Ya hti ai gaw, Madu a Kabu Gara Shiga rai nga ai.

2018:CHYOI PRA AI WENYI YU HKRAT WA AI POI SHANI NA MUNGGA

Madu Yesu a hpang hkan nang ai Sape ni gaw myit daw myit hten ai sha n-ga, hkrit tsang let garen gari hkrum ai aten hta bai hkrung rawt sai Madu Yesu hpe mu lu let myit awai la lu sai re. Madu Yesu shanhte a man de pru sa nna n-gun jaw lai wa sai re.

Raitim mung, Shi a sape ni gaw shan hte a ningbaw wa rai nga ai Madu Yesu gaw shanhte hte rau shawng de na zawn nnga sai ngu ai hpe myit nhkawn lu ai sha matut nna shawng lam de hkawm sa na matu myit ung ang taw nga ai ahkying aten hta shanhte a ntsa Chyoi Pra ai Wenyi yu hkrat wa ai shaman chye ju hpe hkam la lu sa ai. Chyoi Pra ai Wengyi jaw ya ai n-gun atsam hte lam woi madu ai a marang e Shi a sape ni gaw Madu Yesu a Mungga hpe nhkrit ntsang ai sha hkaw tsun hpang wa nna Nawku Hpung hpe gaw de hpang wa sai re.

Chyoi Pra ai Wenyi Sape ni a ntsa yu hkrat wa nna n-gun atsam lu la ai zawn anhte ni mung Chyoi Pra ai Wenyi hpe hkap la nna Madu a tara mungga ni hpe anhte asak aprat hta nhkrit ntsang sakse hkam lu u ga.

NAWKU HPUNG A ASAK

Kalang mi na masha marai mi tsun ai gaw, Chyoi pra ai wenyi hpe anhte hkam sha lu ai lam langai mi gaw myi jat shakap ai hte bung ai da. Anhte atsawm sha dai myi jat hpe ladi ntsa shakap da sai kaw na gaw malap kau sai. Anhte mada nga ai sumla hkrung hpe mu lu ai, anhte hti nga ai laika buk hpe hti lu ai, myi jat gaw mu ya na matu n rai, shi hku nna mu la na matu rai nga ai. Chyoi pra ai wenyi mungsung lam hpe tsun lu ai langai mi gaw, Pentekosti shani e, Sape ni hkrum katut ai, ‘Nbung Laru kaba’ zawn rai nga ai. Npawt nhpang laika hta rai yang, Karai Kasang a ‘nsoi nsa’ ngu bai tsun ma ai. Wenyi gaw atsam ning ja jaw ai, (snr) nsoi nsajaw ya nna, hkam la ai wa mung asak lu la ai hte n-gun atsam rawng wa ai.

Kalang mi na jau tai jawng ma (brother) marai mi nga ai. Shi hta sharawng awng ai myit n nga ai majaw, manang ni gaw shi hpe chyoipra ai wenyi shalet ya u ga akyu jawm hpyi ya ma ai da. Shi jau ginwang de laning mi bungli sa garum ra ai shaloi, shi hpe Wenyi atsam jaw ya na saranum marai mi hte hkrum sai. Dai aten kaw na shi prat lak lai wa sai. Shi a myi ni htoi tu kabrim wa nna, shi a lagaw lahkam ni gum tsat wa sai. Shi hkum hpe shi mung grai sadi wa sai hte yu tsawm hkra shakut sai. Gam maka tsawm ai ngu na kun, n tsawm ai ngu na kun, shi gaw lai hkra Wenyi atsam jat la lu nna jau tai jawng de bai n du wa mat sai da!

Wenyi gaw Nawku hpung a nsa rai nga ai. Wenyi nsa grai n lu shi ai shaloi Nawku hpung gaw hkri tung kata rawng ai ma hte bung nga ai. Nbung laru kaba hpe hkap la ai hpang she Nawku hpung gaw Karai Kasang a asak hte hpring wa sai. Karai Kasang a nsoi nsa gaw naw kaji nga ai Nawku hpung hpe moi na atsam kaba jaw ai zawn, hkrit kajawng nga ai Sape ni hpe marai rawng shangun nna, tsun shaga na hte shamai shatsai na shaman chyeju kumhpa jaw sai. Dai ni mung dai hte maren rai nga ai. Dai aten kaw na Chyoipra ai wenyi gaw Nawku hpung a awng dang na n-gun hte asak tai wa sai. Dai lam gaw labau hta dan dan leng leng mu lu sai. Lai wa sai aten hta Nawku hpung gaw anhte n ra sharawng ai lam ni byin wa sai hte n- gun kya hkrat sum lai wa sai. Ningbaw ningla ni hta ning ra ai lam ni nga let, Martin Luther gaw du magang ra ai mang hkang ni hpe tau nau tsun lai wa sai. Aten ladaw ni lai wa sai hte, Nawku hpung gaw asak hkung nga ai sha n-ga, grau nna rawt jat wa ai hte grau san seng wa sai. Ndai zawn rai ngang kang agrin nga ai gaw, Karai Kasang a wenyi matut manoi n sa jaw nga ai a majaw sha rai nga ai.

Gumhpraw hpe sha shi a prat hta madung da ai masha marai mi nga ai. Karai Kasang hpe mung Nawku hpung hta mung galoi mung myit n lawm nga ai. Lani mi hta moi shi kawlik jawng kaw hkau hkat sai manang hte bai hkrum katut ai. Shi manang hte bai hkrum zup ai shaloi moi na manang gaw naw rai nga ai kun nga nna mau mat sai. Kaning rai byin sai kun shi manang hpe bai san yu wu ai shaloi, “ mabyin gaw grai galu ai law, gadun ai hku tsun ga nga yang, “Wenyi hta pra ai Asak” sharin hpawng lung ngut ai hpang, ngai na prat hta ahkyak ai lam law law hpe shalai kau sai hpe bai myit dum lu sai. Moi, Karai Kasang gaw n tsa lam sha nga ai rai tim, Myit a sim sa ai kabu pyaw ai hpe hkam sha ai kaw nna, Karai Kasang gaw ngai  a prat a daju tai wa sai” nga nna manang wa tsun dan sai.

Dai ni anhte Chyoipra ai Wenyi yu hkrat wa ai poi nhtoi hpe shagrau nga ai hte Chyoipra ai wenyi hpe hkap la lu ai hpang, hkrit kajawng nga ai sape ni galai shai mat wa sai hpe mu lu saga ai. Shanhte mu la sai, na la sai Yesu a mungga ni gaw shanhte hta shara la wa sai. Yawng hpe shanhte chye madat wa sai hte dai Nazareth na wa Yesu gaw sat kau ai hkrum tim, bai hkrung rawt sai lam sakse hkam ai hte masha ni hpe mung marai dat let n hkrit n tsang hkaw tsun masai.

Sawn sumru mai ai lam: Ngai a prat hta mung, Yesu hpe kam sham ai lam, Nawku hpung hte shi a ningbaw ni hpe n chye na ai zawn re ai aten nga lai wa sai kun? Ndai lam kaw na myit nyan jahtoi ai lama ma lu la sai kun?

2018:CHYOI PRA AI WENYI YU HKRAT WA AI POI SHANI NA CHYUM LAIKA

CHYOI PRA AI WENYI YU HKRAT WA AI POI

20th May 2018

CHYUM MUNGGA DAW 1

Kasa 2:1-11

Ya hti na gaw, Kasa laika hta na rai nga ai.

Ya Pentekawste shani du jang, kasa ni yawng shara mi hta rau hpawng nga ma ai. Shaloi, nbung laru kaba wa ai zawn, lamu de na nsen akajawng kadu pru nna shanhte rawng nga ai nta, dai nsen hte hpring chyat rai wa ai. Wan shinglet zawn re ai baw mung shanhte kaw dan pru nna, bra karan wa nhtawm, langai hte langai a ntsa e jung nga ai. Shanhte nlang hte mung Chyoi Pra ai Wenyi hte hpring nna, dai Wenyi shadut mu ai hte maren, ga amyu myu shaga wa ma ai. Ya, sumsing lamu a npu e nga ai masha amyu shagu hta na, tara hkan shatup ai Yuda masha ni Yerusalem mare e nga nga ma ai. Dai kadu ai nsen na la jang. Masha unawng uwa hpawng sa nna, sape ni tsun ai ga hpe, tinang nang a ga hku na la lu ma ai.

Shanhte mak mat ai rai nna, mau mahka let, Yu mu, ya shaga nga ai ndai ni gaw, Galile masha hkrai n rai ma a ni? Dai rai yang gaw, anhte langai hte langai, tinang nang a dai daw shara na ga hku na la lu ai gaw, kaning re ai i? Parhti, Media, Elam mung na ni hte, Mesopotamia mung e nga nga ai ni; Yuda hte Kapodoki mung, Pontu hte Asia, Hprugi hte Pamhpuli; Egutu hte Kureni ginwang hkan e nga ai Libia mung na ni; Roma nna wa nga ai ni, Yuda masha ni hte tara nnan hta la ai ni, Kreti hte Arabi mung na ni anhte rai nga ga ai; rai ti mung, anhte yawng hte gaw, Karai Kasang a mauhpa amu magam lam shanhte hkai dan ai ga hpe, tinang nang a ga hku na la lu ga hka! nga nna myit kahpra let tsun ma ai. 

Ya hti ai ga, Karai Kasang a mungga rai nga ai.

CHYUM MUNGGA DAW 2

1Korinhtu 12:3-7, 12-13

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, Chyoi Pra ai Wenyi hte sha n rai yang gaw, Yesu gaw Madu rai nga ai, nga nna kadai n tsun lu ai. Ya, chyeju kumhpa amyu myu nga timung, dai ni hpe karan jaw ai Wenyi gaw, langai sha rai nga ai. Daw jau ai lam amyu myu ti mung, Madu langai sha hpe anhte daw jau nga ga ai. Mauhpa atsam amyu myu nga ti mung, yawng mayawng hta e dai lam mahkra hpe shabyin ai Karai Kasang gaw langai sha rai nga ai. Rai ti mung, akyu chyeju lu la u ga she, dai Wenyi gaw langai hte langai hta e, Shi a atsam shapraw shadan dan nga ai. 

Masha a hkum hkrang hta daw sha law law rawng nga ti mung, dai ni yawng hte gaw hkum hkrang langai sha jawm tai nga ma ai. Dai hte maren Hkristu mung, daw shan law law lu ai hkum hkrang langai sha rai nga ai. Anhte yawng mayawng, Yuda ni hte Greka ni rai ti mung, mayam ni hte shanglawt ni rai ti mung, hkum hkrang langai sha tai na matu, Wenyi langai sha hta e kashin kamun hkam la saga ai rai nna, anhte yawng jawm lu na matu, dai Wenyi hpe jaw ya mani ai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 20:19-23

Ya hti na gaw, Yawhan a laika hta na Kabu Gara Shiga rai nga ai.

Dai laban bat a shawng shani na nsin rim e, Yuda masha ni hpe hkrit ai majaw sape ni hpawng nga ai nta e chyinghka la da sa yang, shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape ni mung dai Madu hpe mu lu jang, kabu gara nga ma ai. Bai, Yesu gaw, Nanhte ngwi pyaw nga myit ga; nye Wa Ngai hpe shangun dat ai hte maren, ngai mung nanhte hpe shangun dat made ai, ngu mu ai. Shing rai nhtawm, sape ni a ntsa e, Shi nsa kawut nna, Chyoi Pra ai Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara hpe rai ti mung, nanhte shagun da yang gaw, dai mara naw nga na ra ai, ngu nna shanhte hpe tsun mu ai.

Ya hti ai gaw, Madu a Kabu Gara Shiga rai nga ai.

2018:YESU LAMU DE LUNG WA AI POI SHANI NA MUNGGA

Dai ni na poi nhtoi gaw Kawa Karai Kasang shangun dat hkrum ai Madu Yesu gaw Shi galaw ra ai mungkan ga ntsa na amu bungli ni ngut kre ai hte Kawa Karai Kasang hpang de bai nhtang wa ai poi nhtoi rai nga ai. Sumsing lamu de rai nlung wa shi yang Shi a sape ni hpe Kabu Gara Shiga hpe mungkan ting chyam bra wa nna, masha hkum shagu Shi hpe kamsham let hkye hkrang la ai hkrum lu na matu lit shatsam htet shana lai wa sai re.

Madu Yesu gaw Shi gun hpai ra ai amu magam lam ni hpe kangka ai hte ngut kre ai du hkra sakjaw ap nawng nna, awng padang ai hpe hkam la lu sai re. Madu Yesu a kasi hpe la nna Kabu Gara Shiga hpe Karai Kasang shatsam da ai hte maren shani shana na anhte a sak hkrung nga sa ai lam hta sakse hkam hkaw tsun lu ai hte makau grup yin na tinang a htingbu wa hpe Karai Kasang hte nyi htep wa let hkye hkrang la ai shaman chyeju hpe hkam la lu na matu skakut shaja lu u ga.

SAKSE HKAM NGA GA

Tengman ai Hkristan ni a sakse hkam ai, jet ai tsawra myit hte mara dat ya ai lam hpe madun ai mabyin langai mi nga ai. Dai gaw 1960 ning hkan byin ai Miwa mung a “Htung hking rawt malan” laman rai nga ai.

Jau hte Hkristan num sha lahkawng gaw si dam jaw hkrum sai. Nawku hpung a labau ni hta abyin nga ai hte maren, zingri zingrat ai ni gaw shanhte hpe jahpoi asawng ma ai. Jau hpe mung lama na nang dai num sha lahkawng hpe gap sat na rai yang, nang hpe gaw shalawt dat na nga nna gasadi jaw ma ai. Shi mung hkap la sai. Num sha yan mung sat hkrum na aten hpe la taw nga sai. Kaga bawng dung masha marai mi gaw shi a gawk kata na dai num sha yan hpe mada yu nga let mu mada ai gaw, shanhte a myiman gaw asit awat rai nga tim, makam masham hta tsawm htap nga ai, n chye tsun na daram yawn hkyen nga tim, makam masham hta kabu gara nga ai. Shinggyim masha re majaw, hkrit gari nga tim, makam masham hpe ning dang kau ai lam n nga ai sha, asak si hkam na myit hkut da nu ai.

Sin hpyenla ni kayep da nna pru wa sai, shanhte hpe gap sat na wa mung, si nat lang let pru wa sai. Shi gaw shanhte a ginwang up wa rai nga ai. Num sha yan mung kahte la nna jau hpe grai hkungga la ra ai hte bau jaw baw gum wu ai. Shan hta na marai mi gaw: “nang an hpe grai n gap shi yang, nang anhte hpe galaw lai wa sai yawng a matu kraw kata kaw nna chyeju dum nngai. Nang anhte hpe kashin kamun jaw nit dai, htani htana asak de du na lam sharin ya sai. Ya sinat lang tawn ai lata hte sha Chyoipra muk mung jaw sha nit dai. Hkristan ni gaw kalang lang gawng kya ai hte shut hpyit mara galaw shut chye ai rai tim, shanhte gaw mara raw dat kau ya ai hkrum na re, nga nang anhte hpe sharin ya sai. Nang ya an hpe galaw maw ai lam hpe bai myit dum lu ai shaloi, Yuda zawn rai myit htum mat ai n rai ai sha, Petru zawn rai bai myit malai lu u. An a hpang jahtum na n sa hta nang hpe pawt sin dawng ai lam hpa n nga ai hpe dum ya rit, Karai Kasang shaman ya u ga, masha hkum shagu gaw sin la ai aten ni hpe lai di ra na sha rai nga ai. An lahkawng gaw chyeju dum ai myit hte si wa sai” nga tsun let kalang mi bai bau jaw wu ai.

Shan yan a hpungup wa gumle kau ai hpe chye yang grau hkam sha na re majaw, ya na zawn shawng hkrum sha shangun ai hpe gaw Madu lajang ai re lam shan chye la nu ai. Jau a myit gaw ja la nga ai. Shi num sha yan hpe gap sat kau sai. Dai hpang e gaw, shi hkum nan mung, kumyunit hpyen la ni a gap sat ai hkrum sai. Ndai gaw Miwa mungdan, Kiangsi mungdaw hta byin wa sai.

Madu Yesu hkang da ai makam masham hpe sakse hkam na hte tsawra na matu gaw anhte yawng hpe sha-ang nga ai. Anhte a kashin kamun hte N-gun shaja sakramentu a marang e, Hkristu Yesu hpe sakse hkam na matu shaga la hkrum sai. Raitim, anhte a kashin kamun hte N-gun shaja sakramentu gaw dai hta grau nga ai. Dai miwa numsha lahkawng galaw lai wa sai hta grau na matu pyi anhte hpe saw shaga nga ai. Madu Yesu a kabu gara shiga hkaw tsun shachyam shabra na gaw Jau, Mama, Sara ni a lit sha n rai nga ai. Kashin kamun hte N-gun shaja sakramentu hta anhte yawng garan la sai lit magam rai nga ai.

Yesu lamu de lung wa ai poi nhtoi gaw Nawku daw jau ai shaning ting hta ahkyak dik ai poi nhtoi langai mi mung rai nga ai. Dai re ai majaw lak lai ai hku nna poi nhtoi hpe shagrau nga ga ai. N dai Yesu lamu de lung wa ai poi nhtoi hpe shing daw yu ga nga yang, duk kasha langai mi hpe marai mi hpang marai mi hkap la let kagat shing jawng ai poi hte bung nga ai.

Lai wa sai 2000 ning, dai ni na aten hta, Madu Yesu gaw mungkan ga na shi a magam bungli hpe shi hpang hkan nang ai ni hpe jaw tawn da sai. Ndai magam bungli hkum tsup lu na lam gaw, mi na Miwa num sha yan zawn, tinang a makam masham hpe sakse hkam na, shanhte a hpung up wa hpe mara raw dat ya ai zawn hte tinang a asak hpe ap nawng kau ai du hkra Karai Kasang hta kam sham ai hpe sakse hkam na lam rai nga ai. Kashin Kamun hte N-gun shaja sakramentu hpe hkam la ai a marang e, Chyoi pra ai Wenyi myit jahtoi ya ai hte maren anhte galaw ra ai magam bungli ni hpe bai htang galaw na matu “Yesu Lamu de lung wa ai poi” nhtoi gaw anhte hpe saw shaga nga ai.

Sawn sumru mai ai lam: Kashin kamun hte N-gun shaja Sakramentu a lachyum hpe ngai hkum hkum tsup tsup chye ai kun? Kashin Kamun hte N-gun shaja Sakramentu chyeju a marang e galaw ra ai lit magam hpe hkap la na ngai jin jin rai sai kun? Madu Yesu hkang da ai lam ni ngai na prat hta teng sha byin wa lu na matu, kabu gara shiga hpe sakse hkam lu na ngai a makam masham kade wa n-gun ja nga a ta?

2018:YESU LAMU DE LUNG WA AI POI SHANI NA CHYUM LAIKA

YESU LAMU DE LUNG WA AI POI

13th May 2018

CHYUM MUNGGA DAW 1

Kasa 1:1-11

Ya hti na gaw, Kasa laika hta na rai nga ai.

Shawng e ngai ka da ai laika hta, Htawhpilu e, Yesu sumsing lamu de shalun la hkrum ai nhtoi du hkra, shi galaw dan ai amu ni hte sharin shaga ai lam yawng hte hpe ngai ka lajang da se ai. Shi shalun la hkrum ai shani e, Chyoi Pra ai Wenyi a garum ai hte Shi lata la ai kasa ni hpe, ga matsun hkang da nu ai. Yesu si mat ai hpang , dai kasa ni hpe Shi a hkum shadan dan nna, kam ging ai sakse lam law law hte Shi naw hkrung nga ai hpe madun dan wu ai. Shing rai shanhte rau hpawng nga ai shaloi Yesu gaw, Yerusalem mare kaw na nanhte n pru ai sha, ngai kaw nna na la ai, Wa a ga ndat hpe ala nga mu; kaning rai nme law, ngai hkum nan nanhte hpe tsun da ai hte maren, Yawhan gaw hka hte kashin kamun jaw ai; nanhte chyawm gaw nhtoi gade n na yang, Chyoi Pra ai Wenyi hte kashin kamun hkam la na marin dai, ngu nna shanhte hpe tsun mu ai. Dai rai nna, Yesu hte rau hpawng nga ai ni gaw, Madu e, dai mundan hpe ya aten e Israela masha ni kaw bai de ya na rai ni? ngu nna san ma ai.

Yesu mahtang gaw, Wa shi a ahkaw ahkang hte hkang tawn ai ahkying aten ladaw hpe, nanhte chye shara n nga ai. Rai ti mung, Chyoi Pra ai Wenyi nanhte a ntsa e du jang, n-gun atsam lu la na myit dai rai nna, Yerusalem mare hte Yuda mung ting, Samari mung hte lamu ga htum hkra, nanhte nye a sakse ni tai wa na marin dai, ngu nna shanhte hpe tsun wu ai. Ndai ga tsun jang, shanhte yu nga ninglen, Shi hpe ntsa de shalun la ai rai nna, sumwi gaw shanhte a man e shi hpe magap la mat wa ai. Shanhte lamu de naw azi yu nga yang, yu mu, hpraw tu ai hpun palawng bu hpun ai marai lahkawng shanhte a makau e tsap pru nna, Galile masha ni e, htaw lamu de hpa rai azi yu nga myit ta? Nanhte a man na sumsing lamu de shalun la ai wa dai Yesu gaw, nanhte mada yu nga yang, Shi sumsing lamu de lung wa ai zawn, dai hku Shi bai du na ra ai. ngu nna kasa ni hpe tsun mu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Ehpesu 1:17-23

Ya hti na gaw, Ehpesu masha ni hpang de Kasa Pawlu shagun dat ai laika hta na rai nga ai.

Hpu nau ni e, anhte a Madu Yesu Hkristu a Karai Kasang, hpung shingkang rawng ai Kawa gaw, Shi hkum nan hpe chye chyang lu na matu, nanhte a myit masin hpe hpaji byeng-ya hte myit leng ai chyeju Shi jaw ya u ga, ngu nna ngai hpyi nngai. Karai Kasang shaga la ai a jaw e, myit mada shara gade wa nga ai hpe mung, chyoi pra ai ni gaw hpung shingkang rawng ai sali wunli gade wa hkrum lu na hpe; Shi hpe kam sham ai ni a matu, shi a chyeju atsam gade wa galu kaba nga ai hpe mung, nanhte chye lu na matu, Karai Kasang nanhte a myit masin na myi hpe jahtoi jasan ya malit ga, ngu nna ngai hpyi nga nngai. Karai Kasang gaw, Hkristu hta shabyin da ai amu hpe gawn yu jang, nanhte chye lu na myit dai.

Shi a atsam hte Hkristu hpe si mat ai kaw na sharawt la nna, sumsing lamu hta shi a hkra maga e dung nga shangun da wu ai. Du Magam, Ahkaw Ahkang, Hpung Shingkang hte Up ai Aya lu ai ni nlang hte a ntsa e mung, ndai prat hte htawm hpang na aprat e shamying lu ai amying ahkang mahkra a ntsa e mung, shi hpe shagrau shatsaw da nu ai. Karai Kasang gaw arai baw sumhpa hpe shi a lagaw npu e tawn da nu ai rai nna, yawng mayawng hpe up hkang lu na matu, Nawku Hpung a baw Shi hpe shatai da wu ai. Dai Hpung gaw Hkristu a hkum hkrang rai nga nna, yawng mayawng hpe jahpring shatsup ya ai Hkristu gaw, dai Nawku Hpung a marang e jahkum shatsup ai hkrum wu ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 16: 15-20

Ya hti na gaw, Marku a laika hta na Kabu Gara Shiga rai nga ai.

Yesu gaw kasa shi langai kaw dan pru nna, shi shanhte hpe, Nanhte mungkan ting chyam hkra hkaw dan mu; kam sham nna kashin kamun hkam ai wa gaw hkye hkrang la ai hkrum na ra ai; n kam n sham ai wa chyawm gaw, daw dan ai hkrum na ra ai. Kam sham ai ni madun dan lu na lamik kumla gaw, da ndai ni rai nga ai: Shanhte nye a amying hte nat ni hpe shaden kau lu na mara ai; chyasam ga amyu myu shaga wa na mara ai; shanhte a lata hte lapu hpe magra jum lu na hte, gung rawng ai baw hpe lu ti mung, hpa mung n hkrum na ma ai; machyi makaw hkrum ai ni a ntsa e lata mara ya nna, dai ni bran wa na mara ai, ngu nna shanhte hpe matsun dat mu ai. Shing rai, Madu Yesu gaw, shanhte hpe ga tsun da ai hpang, sumsing lamu de shalun la ai hkrum nna, Karai Kasang a hkra maga e dung nga ai. Kasa ni gaw hkawm sa wa nna, shara shagu hkan e hkaw dan ma ai: Madu mung shanhte hpe shingtau nna, galaw dan ai lamik kumla hte mungga hpe shagrin ya mu ai.

Ya hti ai gaw, Madu a Kabu Gara Shiga rai nga ai.

2018: PASKA LADAW HTA LABAN (6) SHANI NA MUNGGA

Karai Kasang gaw tsawra myit hte hkum tsup ai rai nna shinggyim masha ni hpe hpan tawn da sai re. Shinggyim masha ni shut hpyit lam dam mat ai aten ladaw hta Madu Yesu gaw Kawa Karai Kasang a shangun dat ai hkrum nna Shi a asak hpe nawng jau ya let hkye hkrang la sai re.

Jet ai tsawra myit rawng ai wa gaw tinang tsawra ai ni a matu mai kaja ai amu bungli galaw ya na yak hkak ai lam ni hpe lai di lu na matu teng sha n-gun atsam rawng nga ai. 

Shani shana na anhte a sak hkrung nga sa ai lam hta Karai Kasang hte tinang a htingbu wa a matu sakjaw ap naw lu na matu jet ai tsawra myit hpe gaw gap la lu u ga.

DAI MADU A TSAWRA MYIT

Tsawra myit e galaw lu ai lam gaw mau hpa rai nga ai

Laiwa sai shaning ni hta, ‘Reader’s Digest” magazine gaw, ‘Milwaukee’’ tsi rung na ma chyangai a lam bang da sai. Ma dai gaw myi n mu ai, myit n hprang ai hte bawnu katsing si ai. Shi gaw namsi hta loi mi sha kaba nna nsen hte hkra ai hpe n chye hkam sha ai. Kanu Kawa ni shi hpe kabai kau da ai. Tsi Rung na masha ni mung hpa galaw na re n chye mat sai. Dai majaw lani mi hta, ma manga a kanu hpe shaga la nna, ma dai hpe bau na san yu ai hte, ‘shi kade nna yang si na re nga ma tsun dan sai. ‘May’ nga mying ai num dai gaw, lama na ma n dai hpe ngai bau maka yang, shi aloi sha n si lu na tsun let kabu gara woi mat wa sai.

N loi la ai rai tim, ma dai hpe shi bau maka sai. Shani shagu ma dai a hkum hkrang hpe manat ya ai. Shi gaw akyu hpyi ya ai, hkrap ai hte ma a n tsa shi lata mara ya ai. Marai mi gaw, shi hpe aten jahtum she re, lajang da ai kaga shara de sa tawn kau su nga wu ai. Shi gaw ma hpe ‘Leslie’ ngu shamying ai. Ma dai kaba wa ai hte ‘May a matu mung grai jam jau wa sai. Raitim, shi myit n htum ai, shaning 10, 15 lai wa sai. Asak 16 ning hta lam hkawm sharin ai rai tim hpa n htang wu ai. Ndai aten ni yawng hta, ‘May’ shi hpe matut tsawra ai, Akyu hpyi ya ai hte maumwi law law hpe mung tsun dan sai. Lani mi hta, ‘Leslie’ a lata layung gaw sumri ntsa mahkyit ai hpe mu hkrup sai. Hpa lachyum wa rai kun shi mau nga ai. Leslie gaw ‘Music’ hpe hkam sha chye lu ai kun? ‘May’ gaw madun sumpyi hpan law law la n na shi a makau hta tawn da n htawm langai ngai hpe gaw myit lawm wa kun myit mada nga ai. Hpang e gaw, ‘May” hte Madu wa gaw ‘Piano’ dingsa langai mari nna Leslie a gawk hta bang da ya sai. ‘May’ gaw Leslie a lata lahpum ni hpe lang let kaning rai dum na sharing ya tim, shi hpe yu yang chye madat ai zawn n san ai.

1971 May shata lana mi hta, piano dum ai nsen na ai majaw ‘May’ yan la gaw rawt wa sai. Shawng e gaw, Radio pat da na malap sai ngu myit nga ai. ‘Leslie’ a gawk de shang yu ai shaloi she Piano shawng kaw dung, mani sum sai rai shi a ta hte dum taw nga ai hpe sa mu kajawng sai. Shanhte n myit yu lu ai lam hpe mu hkrum sai. Teng ai lam ngu na pyi yak la nga ai. Leslie gaw yup ra kaw na shi chyu galoi mung n lu rawt ai, Piano hta galoi mung n dung yu ai, shi hkrai sha Piano galoi mung n hkra yu ai, ya gaw grai pyaw hkra dum taw nga sai. May gaw kaning rai bai tsun dan na pyi n chye mat sai raitim shi chye lu ai gaw, tsawra myit hta dai ninghtawng byin pru wa ai lam rai sai.

Ndai mabyin gaw, dai ni hti ai mungga hta na Hkristu sharin shaga ai shada tsawra nga na lam hpe madi madun ai lam rai sai. Tsawra myit nachying kaba la ai atsam hpe madun ya nga sai. Mungkan ga ndai hta Karai Kasang tawn da ya ai, anhte a matu lajang da ya ai, kaba ai n gun atsam gaw “Teng man ai tsawra myit” re. Ndai atsam gaw Mungkan ting hta nga ai gumhpraw hte mari la n lu ai. Mungkan ting na ningbaw ningla ni n lu ai mung n dai atsam re. Mungkan ting na hpyen dap ni mung n lu mahkawng ya atsam re. Dai hta grau nna tsawra myit gaw num la kadai raitim, gara hpung masa amyu sha rai tim kade kaba ai arung a rai mi lu ai raitim, n lata ai sha shinggyim masha shagu lu ai atsam rai nga ai. Tsaw ra myit gaw, hkam kaja ai hte sut su ai ni a matu chyu nrai, mying dan hkung ai hte bawnu byin dik ai ni a matu chyu mung n rai nga ai. Tsawra myit gaw yawng a matu rai nga ai. Tsawra myit gaw Karai Kasang man hta mung, mungkan ting na shinggyim masha man hta mung anhte hpe maren mara byin shangun lu ai lam langai mi rai nga ai.

‘May’ a tsawra myit gaw, Leslie a prat hpe galai shai ya ai zawn, anhte mungkan ga hpe galai shai ya lu ai, ngu ai dai ni hti ai Chyoipra chyum laika hta rawng ai kabu gara shiga nan rai sai. Lama na anhte galaw ai rai yang, anhte mung n dai prat hta tsawra myit a marang e mauhpa lamik kumla galaw lu na rai nga ai. Madu Yesu mung shi a prat hta, tsawra myit hte magam bungli galaw lai wa sai zawn rai nga ai.

Sawn sumru mai ai lam: Madu Yesu sharin shaga ai, “Shada tsawra nga mu” ngu ai hpe anhte a kun dinghku, bungli magam shara hte, uhpung uhpawng hta, ngai kaning rai ta tut galaw lu na rai ta? Leslie a n tsa tawn da ap nawng lai wa sai, May a tsawra myit gaw ngai hpe kaning rai ning dat nga ai kun?

2018: PASKA LADAW HTA LABAN (6) SHANI NA CHYUM LAIKA

PASKA LADAW HTA LABAN 6

6th May 2018

CHYUM MUNGGA DAW 1

Kasa Laika 10:25-26, 34-35, 44-48

Ya hti na gaw, Kasa laika hta na rai nga ai.

Petru gaw, Komiliu a nta de du jang, dai hpyen du wa shi hpe hkap tau la nna, shi a lagaw nhpang e lahput hput di let dingyawm dagup nga ai. Petru chyawm gaw, Rawt u, ngai mung masha she rai nga nngai. ngu nna tsun let shi hpe dun sharawt la wu ai. Shaloi Petru ga hpaw nna, Karai Kasang masha a myiman n lata ai gaw, ya ngai kaja wa chye se ai; amyu baw shagu hta Karai Kasang hpe hkrit hkungga ai hte dingman ai amu galaw ai ni gaw, Shi a man e myiman pa nga ai, ngu nna dai nta hta hpawng nga ai ni hpe tsun wu ai. Petru gaw dai lam naw tsun nga yang, shi a ga madat la ai ni yawng a ntsa de Chyoi Pra ai Wenyi yu hkrat wa ai. 

Chyoi Pra ai Wenyi ngu ai kumhpa hpe maigan amyu ni a ntsa de n hpaw n ya karan jaw ai majaw Petru hte shi kaw hkan nang ai, kam sham ai Yuda masha ni mau mahka nga ma ai; hpa majaw nga yang, dai maigan masha ni ga amyu myu tsun ai hte, Karai Kasang hpe shagrau sha-a ma ai hpe shanhte na la lu ma ai. Dai rai nna Petru gaw, Ndai ni gaw anhte zawn Chyoi Pra ai Wenyi hkam la sai rai nna, shanhte hpe hka hte kashin kamun jaw na hpe kadai hkum lu a ta? ngu wu ai. Shing rai, Yesu Hkristu a amying nsang hte shanhte hpe kashin kamun jaw na lam shi hkang da mu ai. Dai hpang shi shanhte hte rau nhtoi loi mi naw hkring nga na, shanhte hpyi ma ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1Yawhan 4:7-10

Ya hti na gaw, Kasa Yawhan shagun dat ai laika langai hta na rai nga ai.

Tsawra ai ni e, anhte shada da tsawra nga ga: tsawra ai myit gaw Karai Kasang kaw nna rai nga ai rai nna, tsawra ai myit rawng ai wa kadai rai ti mung, Karai Kasang a kasha rai nga ai hte, Karai Kasang hpe chye chyang nga ai. Tsawra myit n rawng ai wa gaw Karai Kasang hpe chye chyang wu ai n rai; kaning rai nme law, Karai Kasang gaw tsawra myit rai nga ai. Karai Kasang a Kasha a marang e anhte asak hkrung nga lu u ga, Karai Kasang dai Kasha Shingtai hpe mungkan ga de shangun dat ai shaloi, shi a tsawra ai myit anhte kaw dan pru sai. Anhte gaw Karai Kasang hpe tsawra ai lam n rai, Karai Kasang anhte hpe tsawra ai lam ngai tsun mayu nngai: anhte a shut hpyit mara la kau ya ai gawng malai hkungga tai na matu, Karai Kasang shi a Kasha hpe shangun dat ai gaw Shi anhte hpe tsawra ai lam madung nan rai nga ai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 15:9-17

Ya hti na gaw, Yawhan laika hta na Kabu Gara Shiga rai nga ai.

Yesu Shi a sape ni hpe tsun wu ai gaw: Wa gaw ngai hpe tsaw ra ai zawn, ngai mung nanhte hpe tsawra made ai. Nye a tsawra ai hta maju jung nga mu. Ngai gaw nye Wa a ga matsun hkan shatup nna, Shi a tsawra ai hta maju jung nga ai zawn, nanhte mung nye a ga matsun hkan shatup yang gaw, nye a tsawra ai hta maju jung na myit dai. Nye a kabu gara ai myit nanhte hta rawng nga na hte, nanhte a kabu gara ai gaw hpring tup wa na matu, ga ndai ngai nanhte hpe tsun da made ai. Ngai nanhte hpe tsawra ai zawn, nanhte shada da tsawra nga mu, dai gaw nye a ga matsun rai nga li ai. Jinghku wa a matu tinang a asak nawng kau hkra tsawra ai lam hta, kaga grau kaba ai tsawra myit gaw kadai hta mung n rawng lu ai. 

Nanhte nye a ga matsun hkan shatup yang gaw, nye a jinghku ni rai nga myit dai. Ya kaw nna ngai nanhte hpe shangun ma n ngu na ni ai; kaning rai nme law, shangun ma gaw shi a madu myit maw ai lam hpe atsawm sha n chye wu ai. Nanhte hpe jinghku she ngai ngu na nngai; hpa majaw nga yang, nye Wa kaw na ngai na la ai lam yawng hte hpe, ngai nanhte hpe tsun dan ma sade ai. Nanhte ngai hpe lata la myit dai n rai; ngai she nanhte hpe lata la sai rai nna, nanhte pru sa wa nna, asi si na hte nanhte a asi grin nga u ga, ngu nna ngai nanhte hpe sa da made ai. Dai rai nna, nye a amying hte nanhte hpyi mahpyi hte hpe, Wa gaw nanhte hpe jaw na ra ai. Nanhte shada da tsawra nga mu, ngu nna ngai nanhte hpe hkang da nngai.

Ya hti ai gaw, Madu a Kabu Gara Shiga rai nga ai.