CHYOI PRA AI HKUM HTE SAI POI SHANI NA MUNGGA

Nawku hpung a sakramentu ni hte seng nna sharin shaga ai lam hta ahkyak ai langai mi gaw Madu Yesu a Hkum hte Sai hpe hkam la ai Misa Hkungga nawng ya ai lam rai nga ai. Dai majaw laban shani shagu Jau nga ai nawku jawng hta Misa Hkungga nawng ya ai hta sa lawm nna Chyoi Pra ai hkum hpe hkam la ai lam gaw ahkyak ai rai nga ai.

Chyoi Pra ai Hkum hpe hkam la ai shaloi muk a nsam hta teng sha rawng nga ai Madu Yesu a hkum hte sai hpe hkam la nga ai. Madu Yesu a hkum hte sai gaw nawng jau ya sai muk hte sabyi chyaru lahkawng yan hta rawng nga ai. Ndai zawn Madu Yesu a hkum hta sai hpe hkam la lu ai gaw shadawn ndang hkra kaba la ai Karai Kasang jaw ya ai chyeju rai nga ai.

Madu Yesu a Hkum hte Sai gaw anhte a hkawm sa ai hkrun lam a matu n-gun jaw ya nga ai. Shiggyim masha a ra rawng gawng kya ai lam ni gaw kup tsup ai Karai Kasang a Hkum hte Sai hpe hkam la ai a marang e tawt lai mai nga ai. Karai Kasang hkum nan anhte hte rau nga nga ai lam hta grau nna kaba ai myit dik na lam nnga na re.

Daini Madu Yesu a Hkum hte Sai Poi hpe galaw sa ai a marang e Karai Kasang a Hkum hte Sai hpe laban shani shagu ging dan ai hte hkam la lu nna anhte a shani shagu na yak hkak ai lam ni hpe lai di lu ai n-gun atsam ni hpe lu la u ga.

ASAK MUK HTE HKYE HKRANG LA AI GAWM HTA MANOI NGA GA

Karai Kasang hte Shi jaw ya na nhpaw n-ya re ai prat hpe nang ra sharawng nga ai, Masha unawng uwa hpe malu masha n lu da ai raitim, jaw sha na matu Madu Yesu shatsam ai lam gaw sape ni hpe yak hkak shangun ai lam nan rai sai. Dai gaw, sape ni a makam hpe chyam yu na hte Karai Kasang hta e kam hpa na matu sharin ya ai lam ma rai sai. Masha hkying manga (5,000) hpe lu sha jaw ai lamik kumla hpe yu yang, Karai Kasang gaw Shi a kasha shingtai hpe teng sha wa shangun dat nna shi amyu masha ni a matu, myihtoi, Hkawhkam hte Hkyela Madu tai shangun ai nan rai sai. Masha hkying manga hpe Madu Yesu jaw sha ai lamik kumla gaw, kabu gara shiga laika (4) hte hta lawm ai langai sha re ai lamik kumla nan rai sai. Rai yang, ndai lamik kumla a, ahkyak ai shiga gaw hpa rai sata?
Nam mali e, Israela amyu masha ni hpe manna muk jaw sha ai Karai Kasang a lam hpe madi madun sai. Shi hpang hkan nang ai ni a matu, Madu Yesu madun ai mung rai nga ai. Madu Yesu gaw, Sumsing lamu na jet ai muk rai nna shinggyim masha ni a sung dik ai kaw si hpang gara lam hpe myit shadik ya lu ai, ngu ai Karai Kasang chyu galaw lu ai lam hpe, hpaw shaleng ya ai rai sai. Masha hkying manga hpe jaw sha ai lam gaw, lak lai dik ai. Karai Kasang a gam jaw gam ya ai lam hte anhte a matu nhtum nwai tsawra myit ngu ai hpe madun ya ai rai sai. Karai Kasang anhte ra sharawng ai hta grau nna n hpaw n-ya jaw ya ai hte anhte mung ra kadawn nga ai ni hpe bai gam jaw chye na matu rai nga ai. Anhte hta nga ai kachyi mi hpe Karai Kasang shalaw shahtam ya ai gaw kaga masha ni hpe mung gam garan ya na matu rai sai.

Masha hkying manga hpe Madu Yesu jaw sha ai lam gaw, Shi Madu a nhtum nwai daw sha poi (Missa hkungga) hpe madi madun ya ai mung rai sai. Gashaka dingsa na shalai wa ai poi hpe, Madu Yesu gaw ‘Gashaka nnan a Sai’ de galai ya sai. Gashaka dingsa hta, hpan da ai wa hpe chyeju dum chyeju htang ai hku nna, muk hte tsabyi hpe shagu hkungga nawng ya ma ai. Jau hte hkawhkam rai nga ai, Melhkizadek gaw, muk hte tsabyi hpe nawng jau lai wa sai hte dai gaw, Jau daju hte hkawhkam rai nga ai Madu Yesu a hkungga a tau nau kumla rai nga ai. Shalai wa ai poi na matsi n rawng ai muk hte zai bru jang na mau hpa lu sha ‘mana’ muk gaw Karai Kasang gaw shi a gasadi hta dung nga ai lam rai sai. Yuda ni a shalai wa ai poi hpang jahtum na ‘chyeju gawm’ gaw, Yerusalem hpe bai gaw gap na Hkyela Madu hpe ala dingda ai hpe madi madun ai. ‘Madu a daw sha poi’ (snr) ‘Missa hkungga’ hpe Madu Yesu shabyin da ai shaloi, Muk hte gawm hpe shaman ai lam gaw ‘Jaw teng ai hte lachyum ningnan’ rai nga sai. Ndai daw sha poi ningnan hta, Shi Madu a hkum hte sai lawm ai lam tsun da sai. ‘Yawng mayawng a shut hpyit mara a matu ru kau ya na’ nga nna Shi a sai hpe lachyum sang lang ya sai. Dai gaw, mara a matu, wudang ntsa hta si hkam ai lam rai nga ai. Shalai wa ai poi a sagu hkungga hpe wudang hta Shi si hkam ai marang e hkum tsup ya sai. Dai majaw, “mungkan ga a shut hpyit mara hpe la kau ya na Karai a sagu kasha’ nga nna Yawhan Baptista tsun lai wa sai. Madu Yesu gaw, Shi hkum hpe shagu hkungga zawn nawng kau ya nna, Kawa Karai hpe kabu shangun sai. Madu Yesu gaw, Shi hkum dai hpe ra n rawng ai sha nawng ya ai rai nna, ‘Shi hkum hpe shagu hkungga shatai let’ Karai Kasang hpe nawng ya sai. Dai dawsha poi gaw, Shi a si hkam ai hte bai hkrung rawt ai lam a masat dingsat rai nga ai. Asak a muk hpe nang hpang gara nga ai kun?

“Madu Yesu e, Nang gaw, ‘Asak a muk’ hte ‘hkye hkrang la ai gawm’ rai nga ndai. Chyeju dum chye ai myit hte ngai hpe jahpring ya nna, hkum hkrang hte wenyi hpe shamai shatsai let atsam jaw ya ai, Sumsing Lamu na muk hpe galoi mung marit nga na nngai law, Amen."

HKRISTU A HKUM HTE SAI POI NA CHYUM LAIKA

29th May 2016

CHYUM MUNGGA DAW 1

Npawt Nhpang 14: 18-20

Ya hi na gaw, Npawt Nhpang laika hta na rai nga ai.

Shalem a hkawhkam Melhkisedek gaw muk hte tsabyi chyaru la sa wa ai: dai wa gaw Tsaw Htum ai Karai Kasang a hkinjawng wa rai nga ai. Shi gaw Abraham hpe, Lamu hte aga hpan da ai Madu, Tsaw htum ai Karai Kasang gaw Abraham hpe shaman ya u ga: nang hpe gumlau ai ni hpe na a lata hta ap ya ai Tsaw Htum ai Karai Kasang kaw shakawn kungdawn nga nga u ga law, ngu nna shaman ya wu ai. Abraham hpe shi lu la ai mahkra hta na, htam shi hta htam mi Melhkisedek hpe jaw da wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

1 Korinhtu 11: 23-26

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Ngai nanhte hpe ap da ya ai matsun maroi ga gaw, dai Madu Yesu ap kau hkrum ai shana e, Shi muk la nna, chyeju dum ngut jang, dai hpe ahkyep alep di nhtawm, Ndai gaw nanhte a matu mara nye a Hkum rai nga li ai; ngai hpe adum nga na matu ndai galaw mu, ngu nna tsun mu ai.

Shanhte shana shat sha ngut jang, gawm hpe mung Shi la nhtawm, Ndai gawm gaw nye a Sai hta gaw da ai ga shaka nnan rai nga ai. Nanhte galoi rai ti mung ndai hpe lu yang, ngai hpe adum nga na matu ndai galaw mu, ngu nna tsun mu ai.

Shing rai, nanhte galoi rai ti mung, ndai Muk sha ai hte ndai gawm lu nga yang, dai Madu a si hkam ai lam, shi bai du sa ai du hkra, nanhte tsun shana ya myit dai.

Ya hti ai gaw Karai Kasang a mungga rai nga ai.

KABU GARA SHIGA 

Luka9: 11-17

Ya hti na gaw, Luka a laika hta na Kabu Gara Shiga rai nga ai.

Yesu gaw shawa masha ni hpe hkap la nhtawm, Karai Kasang a mungdan lam shanhte hpe hkaw dan nna machyi ai ni hpe shamai ya mu ai. Ya jan du wa magang nga yang, sape shi lahkawng gaw sit sa nhtawm, shawa masha ni hpe grup yin hkan na kahtawng ni hte nta ni hta wa yup nna, lusha tam sha mu ga, shabawn dat u; anhte gaw ya nam e she rai nga ga ai, ngu nna Shi hpe tsun mu ai.

Yesu gaw, Nanhte nan shanhte hpe sha na jaw mu, ngu nna shanhte hpe tsun mu ai. Shanhte gaw, Ndai masha nlang sha na lusha anhte n sa mari yang gaw, anhte kaw muk manga hte nga lahkawng hta kaga hpa mung n nga ai, ngu mu ai: kaning rai nme law, lasha hkrai hkying manga daram rai nga ai.
Shaloi Yesu gaw, Ndai ni hpe hpung mi hta manga shi shi daram di nna, dung nga shangun mu, ngu nna Shi a sape ni hpe tsun mu ai. Shanhte mung shing di nna, nlang hte hpe dung nga shangun mu ai. Shaloi Shi gaw dai muk manga hte nga lahkawng la nna, lamu de mada yu let dai hpe shaman nhtawm, ahkyep alep di nna, shawa masha ni hpe hkan jaw na matu Shi a sape ni hpe jaw da mu ai. Shaloi dai ni sha nna nlang hkru kat ma sai: shanhte a angaw angam adaw ahkyep hkan hta lahkawn la yang, mung shi lahkawng hpring dem naw rai nga ai.

Ya hti ai gaw Madu a Kabu Gara Shiga rai nga ai.

PENTEKAWSTE HPANG LABAN (2) NA MUNGGA

Karai Kasang hte Shi jaw ya na nhpaw n-ya re ai prat hpe nang ra sharawng nga ai Masha unawng uwa hpe malu masha n lu da ai rai tim, jaw sha na matu Madu Yesu shatsam ai lam gaw sape ni hpe yak hkak shangun ai lam nan rai sai. Dai gaw, sape ni a makam hpe chyam yu na hte karai Kasang hta e kam hpa na matu sharin ya ai lam ma rai sai. Masha hkying manga (5000) hpe lu sha jaw ai lamik kumla hpe yu yang, Karai Kasang gaw Shi a kash shingtai hpe teng sha wa shangun dat nna shi amyu masha ni a matu, myihtoi, Hkawhkam hte Hkyela Madu tai shangun ai nan rai sai. Masha hkying manga hpe Madu Yesu jaw sha ai lamik kumla gaw, kabu gara shiga laika (4) hte hta lawm ai langai sha re ai lamik kumla nan rai sai. Rai yang, ndai lamik kumla a ahkyak ai shiga gaw hpa rai sata?
Nam mali e, Israela amyu masha ni hpe manna muk jaw sha ai Karai Kasang a lam hpe madi madun sai. Shi hpang hkan nang ai ni a matu, Madu Yesu madun ai mung rai nga ai. Madu Yesu gaw, Sumsing lamu na jet ai muk rai nna shinggyim masha ni a sung dik ai kawsi hpang gara lam hpe myit shadik ya lu ai, ngu ai Karai Kasang chyu galaw lu ai lam hpe, hpaw shaleng ya ai rai sai. Masha hkying manga hpe jaw sha ai lam gaw, lak lai dik ai. Karai Kasang a gam jaw gam ya ai lam hte anhte a matu nhtum nwai tsawra myit ngu ai hpe madun ya ai rai sai. Karai Kasang anhte ra sharawng ai hta grau nna n hpaw n-ya jaw ya ai hte anhte mung ra kadawn nga ai ni hpe bai gam jaw chye na matu rai nga ai. Anhte hta nga ai kachyi mi hpe Karai Kasang shalaw shahtam ya ai gaw kaga masha ni hpe mung gam garan ya na matu rai sai.

Masha hkying manga hpe Madu Yesu jaw sha ai lam gaw, Shi Madu a nhtum nwai daw sha poi (Missa hkungga) hpe madi madun ya ai mung rai sai. Gashaka dingsa na shalai wa ai poi hpe, Madu Yesu gaw ‘Gashaka nnan a Sai’ de galai ya sai. Gashaka dingsa hta, hpan da ai wa hpe chyeju dum chyeju htang ai hku nna, muk hte tsabyi hpe shagu hkungga nawng ya ma ai. Jau hte hkawhkam rai nga ai, Melhkizadek gaw, muk hte tsabyi hpe nawng jau lai wa sai hte dai gaw, Jau daju hte hkawhkam rai nga ai Madu Yesu a hkungga a tau nau kumla rai nga ai. Shalai wa ai poi na matsi n rawng ai muk hte zai bru jang na mau hpa lu sha ‘mana’ muk gaw Karai Kasang gaw shi a gasadi hta dung nga ai lam rai sai. Yuda ni a shalai wa ai poi hpang jahtum na ‘chyeju gawm’ gaw, Yerusalem hpe bai gaw gap na Hkyela Madu hpe ala dingda ai hpe madi madun ai. ‘Madu a daw sha poi’ (snr) ‘Missa hkungga’ hpe Madu Yesu shabyin da ai shaloi, Muk hte gawm hpe shaman ai lam gaw ‘Jaw teng ai hte lachyum ningnan’ rai nga sai. Ndai daw sha poi ningnan hta, Shi Madu a hkum hte sai lawm ai lam tsun da sai. ‘Yawng mayawng a shut hpyit mara a matu ru kau ya na’ nga nna Shi a sai hpe lachyum sang lang ya sai. Dai gaw, mara a matu, wudang ntsa hta si hkam ai lam rai nga ai. Shalai wa ai poi a sagu hkungga hpe wudang hta Shi si hkam ai marang e hkum tsup ya sai. Dai majaw, “mungkan ga a shut hpyit mara hpe la kau ya na Karai a sagu kasha’ nga nna Yawhan Baptista tsun lai wa sai. Madu Yesu gaw, Shi hkum hpe shagu hkungga zawn nawng kau ya nna, Kawa Karai hpe kabu shangun sai. Madu Yesu gaw, Shi hkum dai hpe ra n rawng ai sha nawng ya ai rai nna, ‘Shi hkum hpe shagu hkungga shatai let’ Karai Kasang hpe nawng ya sai. Dai dawsha poi gaw, Shi a si hkam ai hte bai hkrung rawt ai lam a masat dingsat rai nga ai. Asak a muk hpe nang hpang gara nga ai kun?

“Madu Yesu e, Nang gaw, ‘Asak a muk’ hte ‘hkye hkrang la ai gawm’ rai nga ndai. Chyeju dum chye ai myit hte ngai hpe jahpring ya nna, hkum hkrang hte wenyi hpe shamai shatsai let atsam jaw ya ai, Sumsing Lamu na muk hpe galoi mung marit nga na nngai law, Amen!!!

PENTEKAWSTE HPANG LABAN 2 NA CHYUM LAIKA

HKRISTU A HKUM HTE SAI POI PENTEKAWSTE HPANG LABAN 2

29th May 2016

CHYUM MUNGGA DAW 1 

NPAWT NHPANG 14: 18-20. 

Shalem a hkawhkam Melhkisedek gaw muk hte tsabyi chyaru la sa wa ai: dai wa gaw Tsaw Htum ai Karai Kasang a hkinjawng wa rai nga ai. Shi gaw Abraham hpe, Lamu hte aga hpan da ai Madu, Tsaw htum ai Karai Kasang gaw Abraham hpe shaman ya u ga: nang hpe gumlau ai ni hpe na a lata hta ap ya ai Tsaw Htum ai Karai Kasang kaw shakawn kungdawn nga nga u ga law, ngu nna shaman ya wu ai. Abraham hpe shi lu la ai mahkra hta na, htam shi hta htam mi Melhkisedek hpe jaw da wu ai.

CHYUM MUNGGA DAW 2 

1 KORINHTU 11: 23-26.

Ngai nanhte hpe ap da ya ai matsun maroi ga gaw, dai Madu Yesu ap kau hkrum ai shana e, Shi muk la nna, chyeju dum ngut jang, dai hpe ahkyep alep di nhtawm, Ndai gaw nanhte a matu mara nye a Hkum rai nga li ai; ngai hpe adum nga na matu ndai galaw mu, ngu nna tsun mu ai. 

Shanhte shana shat sha ngut jang, gawm hpe mung Shi la nhtawm, Ndai gawm gaw nye a Sai hta gaw da ai ga shaka nnan rai nga ai. Nanhte galoi rai ti mung ndai hpe lu yang, ngai hpe adum nga na matu ndai galaw mu, ngu nna tsun mu ai. 

Shing rai, nanhte galoi rai ti mung, ndai Muk sha ai hte ndai gawm lu nga yang, dai Madu a si hkam ai lam, shi bai du sa ai du hkra, nanhte tsun shana ya myit dai.

KABU GARA SHIGA

LUKA 9: 11-17.

Yesu gaw shawa masha ni hpe hkap la nhtawm, Karai Kasang a mungdan lam shanhte hpe hkaw dan nna machyi ai ni hpe shamai ya mu ai. Ya jan du wa magang nga yang, sape shi lahkawng gaw sit sa nhtawm, shawa masha ni hpe grup yin hkan na kahtawng ni hte nta ni hta wa yup nna, lusha tam sha mu ga, shabawn dat u; anhte gaw ya nam e she rai nga ga ai, ngu nna Shi hpe tsun mu ai. 

Yesu gaw, Nanhte nan shanhte hpe sha na jaw mu, ngu nna shanhte hpe tsun mu ai. Shanhte gaw, Ndai masha nlang sha na lusha anhte n sa mari yang gaw, anhte kaw muk manga hte nga lahkawng hta kaga hpa mung n nga ai, ngu mu ai: kaning rai nme law, lasha hkrai hkying manga daram rai nga ai.
Shaloi Yesu gaw, Ndai ni hpe hpung mi hta manga shi shi daram di nna, dung nga shangun mu, ngu nna Shi a sape ni hpe tsun mu ai. Shanhte mung shing di nna, nlang hte hpe dung nga shangun mu ai. Shaloi Shi gaw dai muk manga hte nga lahkawng la nna, lamu de mada yu let dai hpe shaman nhtawm, ahkyep alep di nna, shawa masha ni hpe hkan jaw na matu Shi a sape ni hpe jaw da mu ai. Shaloi dai ni sha nna nlang hkru kat ma sai: shanhte a angaw angam adaw ahkyep hkan hta lahkawn la yang, mung shi lahkawng hpring dem naw rai nga ai. 

CHYOI PRA AI WENYI POI HPANG LABAN (1) NA MUNGGA

Karai Kasang gaw shinggyim masha hpe hpan tawn da nna kaja ai nkaja ai hpe gin hka lu ai htauli htaula myit hpe jaw ya ai hta n-ga shi myit ra ai hte maren daw dan lu ai awng dawm ahkaw ahkang hpe mung jaw ya sai re.

Shinggyim masha ni Karai Kasang a ra sharawng ai hpe ninghkap kau nna lam dam mat wa ai shaloi shinggyim masha ni hpe hkye hkrang la ai lam hta Kawa Karai Kasang gaw Shi a kasha, Madu Yesu hpe shangun dat sai re. Madu Yesu mung Kawa Karai Kasang a yaw shada ai lam hta hkawm sa nna Shi a magam bungli ngut kre ai shaloi sumsing mungdan de bai du shang wa ai hpang Chyoi Pra ai Wenyi hpe anhte a matu jaw ya sai re. Chyoi Pra ai Wenyi gaw shinggyim masha ni a hkye hkrang la ai hkrum lu na matu anhte hpe shani shagu garum shingtau ya nga ai.

Shinggyim masha ni a hkye hkrang la ai lam hta Kawa, Kasha hte Chyoi Pra ai Wenyi gaw maren mara shang lawm nna hkye hkrang la ai lam hpe jaw ya sai re. Kawa Karai Kasang a yaw shada ai lam hpe Madu Yesu gaw anhte hpe hkaw tsun madun dan lai mat wa sai. Ndai lam hta anhte hkawm sa ai shaloi garum shingtau n-gun jaw ya na matu Chyoi Pra ai Wenyi mung anhte hpe jaw ya sai re.

Ndai poi hpe galaw sa ai a marang re, anhte masha hkum shagu gaw tinang hte seng ai magam bungli ni hpe kang ka ai, dingman ai hte galaw sa ai hta Chyoi Pra ai Wenyi a garum shingtau ai hpe hkam la nna hpang jahtum nna aten hta Karai Kasang yaw shada ai hte marem anhte hkum ngau shagu gaw hkye hkrang la ai lam hpe lu la na matu shakut sa wa lu u ga.

CHYOIPRA AI WENYI KARAI ANHTE A MYIT MASIN HPE JAHOI YA RIT

Teng man ai lam hpe hpaw shaleng dan na gaw Chyoipra ai Wenyi a lit magam re ai lam, Madu Yesu gaw sape ni hpe tsun dan sai. Chyoipra ai wenyi; anhte a myit masin, salum hpe myit jahtoi ya ai wa a amu galaw ai hte kumhpa a marang e, Karai Kasang hta atai masum re ai: Kawa, Kasha, Chyoipra ai wenyi rawng ai hpe anhte chye lu ga ai.

Karai Kasang gaw yawng mayawng hpe hpan da nna kawa tai nga ai, hte Israela amyu masha gaw Shi a kasha alat re ai, ngu Yuda ni chye madat ai. Madu Yesu gaw Kawa Karai hpe n myit mada ai lam yan hku nna hpaw shaleng dan sai. Madu gaw, Shi a kasha shingtai hte mahku mara galaw ai marang e htani htana Kawa Karai rai nga nna, dai lam gaw gahti galai re ai lam re ai. Wenyi chyawm gaw Kawa Karai hte kasha lapran na garan gin hka n mai ai wa rai nga ai. Masum rai tim langai sha re ai Karai Kasang a lam hte garan ginhka n mai ai Kawa, Kasha, Chyoipra ai wenyi a kanawn mazum lam hpe Madu Yesu hpaw shaleng ya ai. Karai Kasang a hpung shingkang hpe shadan shadawng shaleng dan na gaw Madu Yesu hte Chyoipra ai wenyi a magam bungli rai nga ai hte Trinita Karai Kasang a tsawra ai hte hpung shingkang hta anhte hpe mung jawm hpawm nga shangun mayu ai lam rai nga ai.
Shalai wa ai poi rai n du yang, shalan shabran ai wa ngu ai, sape ni hte rau rai nna, ‘Tengman ai lam yawng mayawng’ hpe sharin ya let lam madun ya na re ai lam, Madu Yesu, sape ni hpe tsun dan sai. Hpang jahtum a jahtum hta e, Karai Kasang anhte hpe hpan da ai lam a yaw shada ai lam gaw, Chyoipra ai Trinita hta e, hpan da hkrum ai arai yawng mayawng gaw tsep kawp myit hkrum rap ra let jawm hpawm nga na rai nga ai. Ndai prat hta Chyoipra ai Trinita Karai Kasang hte makam masham a marang e jawm pawng nga nna hpang na prat du hkra rau rai nga na matu, kashin kamun a marang e anhte gaw saw shaga hkrum sai. 

Kawa Karai hte Shi a kasha; Madu Yesu Hkristu hpe hkum nan kaning rai chye lu na rai ta? Chyoipra ai wenyi gaw dai kawa hte kasha hpe anhte kaw shadan shaleng ya nna, Karai Kasang a mungga a tengman ai lam hpe chye chyang, chye na lu na makam chyeju mung jaw ya na rai nga ai. Chyoipra ai wenyi a marang e, Madu Yesu bai du sa ai ten du hkra, Shi Madu a hkye hkrang la ai lam hte bai hkrung rawt ai lam ngu ai moi moi kaw nna makam hpe, anhte hkaw tsun na rai nga ai. Karai Kasang a hpaji atsam hte chye chyang ai lam hta galu kaba wa lu na matu, Chyoipra ai wenyi gaw sara hte garum ya ai wa tai nga na, Madu Yesu anhte hpe jaw ya sai. Ntsa de nna du pru ai Hpaji hpe nang tam nga ai kun? Karai Kasang a mungga hpe sadi maja let madat mara let hkan nang hkan sa nga ai kun? 

  

CHYOI PRA AI WENYI POI HPANG LABAN (1) NA CHYUM LAIKA

CHYOI PRA AI TRINITA POI CHYOI PRA AI WENYI POI HPANG LABAN 1 

22th May 2016

CHYUM MUNGGA DAW 1 

GA SHAGAWP 8:22-31.

‘Lamu ga garai n nga, chyi nma hpri nhpra kaw nna Hpaji Hparat hpe shalat tawn da nu ai.’

Karai Kasang a Hpaji Hparat ning nga tsun jahtau ai gaw: Moi chyaloi nhkoi na amu hpe Madu garai n galaw nga yang, Shi ngai hpe npawt madung shatai da nu ai. Lamu ga garai n nga, chyi nma hpri nhpra kaw nna, Shi ngai hpe shalat tawn da ni ai. Sung htum ai shara garai n nga, lwi nga ai hka hpawk ni garai n pra yang, Shi ngai hpe shaprat ni ai. 

Bum ni hpe garai n gaw da ai hte, kawng ni garai n nga, Lamu ga hte de a dam lada ai shara ni hpe mung, dinghta ga na ga nhpu langai mi hpe mung garai n hpan da yang, Shi ngai hpe shaprat ni ai. Shi gaw Sumsing lamu hpe lajang shachyip da ai hte sung htum ai shara hpe jarit kawan da yang, ngai lawm nngai. Shi gaw Sumsing lamu a madin hpe shagrin da nna sung htum ai shara a hka hpawk ni hpe shangang da ai shaloi mung ngai lawm nngai. 

Madu gaw nammukdara jarit hpe n lai lung hkra hka leng ni hpe hkang da nna, lamu ga a npawt nhpang ni hpe gaw da ai shaloi, ngai mung hpa-awn wa zawn Shi hte rau nga nga nngai. Shi gaw nye a majaw shani shagu kabu gara nga ai; ngai mung Shi a man e tut nawng awng sharawng nga nngai. Shi hpan da ai ginding aga hta ngai kabu let chyai nga nna, shinggyim masha ni hte rau awng sharawng nga nngai.

CHYUM MUNGGA DAW 2 

ROMA 5:1-5

‘Chyoi Pra ai Wenyi ru bang ya ai tsaw ra ai myit a marang e, Madu Hkristu a lam hku nna Karai Kasang hpang de sit sa wa ga.’ 

Hpu nau ni e, anhte a Madu Yesu Hkristu a marang e, kam sham ai hte ding hpring wa nna, anhte Karai Kasang hte mahku mara rai ga ai. Yesu a marang e, ndai ding hpring shangun ai chyeju hpe anhte hkam la lu saga ai rai nna, Karai Kasang a hpung shingkang hpe myit mada lu ga ai majaw, nachying kabu sharawng nga ga ai. 

Dai hta n-ga, tsinyam tsindam hta e mung, kabu sharawng nga ga ai. Tisnyam tsindam mahtang gaw, hkam sharang ai; hkam sharang ai gaw ngang kang ai; ngang kang ai gaw myit mada ai; shabyin ya nga ai hpe anhte chye ga ai. Dai myit mada ai gaw kaman lila n rai nga ai; kaning rai nme law, anhte hpe jaw ya sai Chyoi Pra ai Wenyi gaw, Karai Kasang a tsaw ra ai myit anhte a masin salum hte e ru bang ya mani ai.

KABU GARA SHIGA 

YAWHAN 16 : 12 -15 

‘Kawa, Kasha, Chyoi Pra ai Wenyi a mying nsang hte shanhte hpe kashin kamun jaw mu ai’

Ngai nanhte hpe tsun da na lam law law naw nga ai rai timung, nanhte ya garai n hkam la lu myit dai. Rai tim mung, dai teng man ai Wenyi du sa jang, shi gaw teng man ai lam yawng mayawng nanhte hpe madun na ra ai: dai wa gaw shi a myit hte tsun dan na ra ai n rai; na la lu ai hte made tsun dan na ra ai: htawm hpang de byin na ra ai am mung, shi nanhte hpe tsun dan na ra ai. Dai wa gaw, ngai lu ai hta na shaw la nna, nanhte hpe tsun shana ya na rai nga ai majaw, nye a hpung shingkang shapraw ya na ra ai. Nye Wa lu malu gaw ngai lu ai rai nga ai: dai majaw, ngai lu ai hta na shi shaw la nna, nanhte hpe tsun shana ya na ra ai, ngu nna ngai tsun ni ai. 

CHYOI PRA AI WENYI YU HKRAT WA AI POI LABAN NA MUNGGA

Dai ni na poi nhtoi gaw anhte a nawku hpung a matu ahkyak ai poi nhtoi langai mi rai nga ai. Hpa majaw nga yang Chyoi Pra ai Wenyi yu hkrat wa ai aten kaw nna nawku hpung ngu ai hkrang hpe hpaw hpang wa sai rai nga ai. Madu Yesu a asak aprat hta nawku hpung byin tai wa na matu hkyen lajang ngut ai hpang Chyoi Pra ai Wenyi yu hkrat wa ai aten hta nawku hpung ngu nna hkrang shapraw ya sai re ai majaw dai ni na nhtoi gaw nawku hpung a shangai nhtoi ngu nna mung mai tsun nga ai.

Bai nna, hkrit tsang ai Sape ni gaw chyoi pra ai Wenyi yu hkrat wa nna shanhte hpe n-gun atsam jaw ya sai rai nga ai. Ndai aten kaw nna shanhte gaw Karai Kasang a Mungga hpe nhkrit ntsang hkaw tsun lai wa sai re. Chyoi Pra ai Wenye hpe hkam la lu sai ni gaw lak lai ai shaman chye ju hpe hkam la lu nna shahte a atsam hte nmai byin a amu bung li ni hpe awng dang ai hte galaw la lu sai rai nga ai.

Chyoi Pra ai Wenyi yu hkrat wa ai poi hpe galaw ai marang e Karai Kasang yaw shada tawn da ai hpe anhte hkan shatup galaw sa lu na matu hte anhte a ra rawng gawng kya ai lam ni hpe Chyoi Pra ai Wenyi a marang e n-gun shaja ya nna lam shagu hpe Karai Kasang a shaman chyeju a jaw e galaw awng dang la lu u ga.

CHYOIPRA AI WENYI A ATSAM MARAI HTE HPRING ZUP LU NA MATU KAWA KARAI KAW HPYI LA GA

Na a prat hta Chyoipra ai wenyi a kumhpa hte atsam hpe hkrum sha yu sai kun?“Chyoipra ai wenyi hkap la u” (Yh 20:22) 

Shi Madu shatsam da ai magam lit hpe galaw gun hpai sa wa lu na matu, Sape ni hta Chyoipra ai wenyi a atsam ra kadawn ai hpe Madu Yesu chye nga ai. Dai majaw, n’tsa de na atsam lu la ai ten du hkra Yerusalem kaw ala nga mu nga nna, sape ni hpe Madu Yesu gaw, Chyoipra ai Wenyi a atsam hte hpring wa ai, nga nna kabu gara shiga hta tsun da sai. 

“Dai hta kaga Yawhan gaw, wenyi gaw Sumsing Lamu de nna hkrudu zawn, yu hkrat wa ai hpe, ngai mu se ai; dai wenyi mung shi a ntsa e nga nga ai,...dai wa gaw, Chyoipra ai wenyi hta Kashin Kamun jaw ai wa rai nga ai, nga ai” (Yh 1:32, 33, Mk 1:8, Mt 3:11). “dai hpang Yesu gaw, Chyoipra ai wenyi hte hpring let, Yawdan hka nna bai wa yang, dai wenyi e, nam mali de nhtoi mali shi ya tup woi hkawm wu ai rai nna, ... Yesu chyawm gaw wenyi a atsam hte Galile mung de bai wa ai”, (Lk 4:1, 14). Sasana magam nnan hpang wa ai ten hta, Madu Yesu mung wenyi hte jahtoi ya ai hkrum ai zawn, Madu Yesu shatsam da sai Sasana magam bungli hpe matut galaw lu na matu, sape ni mung Wenyi e atsam jat ya ai hpe ra kadawn nga ai. 

Madu Yesu Hkristu hta kashin kamun hkam la sai ni gaw, Chyoipra ai wenyi e, ding hpring ai, ngwi pyaw ai hte kabu gara lu na rai nga ai. Chyoipra ai wenyi gaw, Karai Kasang a tsawra myit hte anhte a salum hpe jahpring ya na rai nna, Madu Yesu a sape majing ni zawn hkawm sa lu na matu ra kadawn ai atsam, ningja ni jaw ya na rai nga ai. Anhte a gawng kya ai lam hta wenyi gaw garum ya na rai nna, wenyi lam yan hta ndut ndang ahkang jaw na rai nga ai. Karai Kasang lam matsun ai hpe wenyi gaw lam masan ya na rai nna, Karai Kasang ra sharawng ai hte maren nga sa lu na matu lam jasan ya na rai n nga ai. Wenyi gaw, sanpra wa na lam yawng a npawt rai nna chyeju jaw ya nga ai. Karai Kasang a wenyi ngu ai; hpaji byeng-ya hte nyan jaw ai wenyi, hpaji daw ai hte daru magam rawng ai wenyi, chye chyang ai hte Karai Kasang hpe hkrit hkungga ai wenyi, nga nna wenyi a kumhpa ni hpe myihtoi Esaia madun dan sai. 

Pentecoste poi shani a kumhpa-Chyoipra ai wenyi ru jaw ya ai chyeju, Karai Kasang a shaman ai chyeju, ni gaw, Madu Yesu Hkristu a si hkam ai, bai hkrung rawt ai hte Sumsing Lamu de lung wa ai marang e, byin wa tai wa lu sai. Madu Yesu gaw sape ni a n’tsa n sa gawut ya nna Chyoipra ai wenyi hpe jaw ya sai. Karai Kasang, adam hpe nsa gawut bang ya ai zawn, Chyoipra ai wenyi a kumhpa mung, amyu masha nnan a matu ‘prat nnan’ byin shangun sai. Chyoipra ai wenyi marang e, hpan da ai lam nnan hpang wa sai. Karai Kasang gaw Shi a hpung shingkang a matu anhte hpe hpan da sai. Madu Yesu gaw ngwi pyaw simsa lam chyeju anhte hpe jaw ya sai. Dai hta, shut hpyit mara raw ya ai, hte mai kaja ai lam yawng lawm nga ai. kam sham ai hte hpring zup ai Madu Yesu a sape ni zawn nga pra lu na matu atsam marai nang ra sharawng ai kun? Chyoipra ai wenyi a atsam marai hte hpring zup lu na matu Kawa Karai kaw hpyi la ga! 

‘Madu Yesu e, Pentecoste poi nhtoi a kumhpa majaw mung, Chyoipra ai wenyi e jaw ya na prat nnan a majaw mung ngai chyeju dum nngai. Ngai a masin salum hpe wenyi hte jahpring ya ai marang e, Nang Madu a tsawra myit hte grung wa nna, Madu Karai hpe ndut ndang kabu gara ai hte daw jau lu mayu nngai law!!! 

CHYOI PRA AI WENYI YU HKRAT WA AI POI LABAN NA CHYUM LAIKA

CHYOI PRA AI WENYI YU HKRAT WA AI POI PENTEKAWSTE LABAN 15th May 2016

CHYUM MUNGGA DAW 1

KASA 2: 1-11. 

‘Shanhte nlang hte gaw Chyoi Pra ai Wenyi hte hpring nna, ga amyu myu shaga wa ma ai.  Ya Pentekawste shani du jang, kasa ni yawng shara mi hta rau hpawng nga ma ai. Shaloi nbung laru kaba wa ai zawn, lamu de na nsen akajawng sha kadu pru nna shanhte rawng nga ai hta dai nsen hte hpring chyat rai wa ai. Wan shinglet zawn re ai baw mung shanhte kaw dan pru nna, bra karan wa nhtawm, langai hte langai a ntsa e jung nga ai. Shanhte nlang hte mung Chyoi Pra ai Wenyi hte hpring nna, dai Wenyi e shadut mu ai hte maren, ga amyu myu shaga wa ma ai.

Ya, Sumsing lamu a npu e nga ai masha amyu shagu hta na, tara hkan shatup ai Yuda masha ni, Yerusalem mare e nga nga ma ai. Dai kadu ai nsen na la jang, Masha unawng uwa hpawng sa nna, sape ni tsun ai ga hpe, tinang nang a ga hku na a lu ma ai. Shanhte mak mat ai rai nna, mau mahka let, Yu mu, ya shaga nga ai ndai ni gaw Galile masha hkrai n rai ma a ni? Dai rai yang gaw, anhte langai hte langai, tinang nang a dai daw shara na ga hku na la lu ai gaw, kaning re ai i? Parhti, Media, Elam mung na ni hte, Mesopotamia mung e ga nga ni; Yuda hte Kapadokia mung, Pontu hte Asia, Hprugi hte Pamhpuli; Egutu hte Kureni ginwang hkan e nga ai Libia mung na ni; Roma nna wa nga ai ni,Yuda masha ni hte tara nnan hta la ai ni, Kreti hte Arabi mung na ni nan anhte rai nga ga ai; rai ti mung anhte yawng hte gaw, Karai Kasang a mauhpa magam lam shanhte hkai dan ai ga hpe, tinang nang a ga hku na la lu ga hka! nga nna myit kahpra let tsun ma ai.

CHYUM MUNGGA DAW 2 1

KORINHTU 12:3-7. 12-13.

‘Hkum hkrang langai sha tai na matu, Wenyi langai sha hte e kashin kamun hkam la saga ai.’ Hpu nau ni e, Chyoi Pra ai Wenyi hte sha n rai yang gaw, Yesu gaw Madu rai nga ai, nga nna kadai n tsun lu ai.

Ya, chyeju kumhpa amyu myu nga ti mung, dai ni hpe garan jaw ai Wenyi langai sha rai nga ai. Daw jau ai lam amyu myu nga ti mung, Madu langai sha hpe anhte daw jau nga ga ai. Mauhpa atsam amyu myu nga ti mung, yawng mayawng hta e dai lam mahkra hpe shabyin ai, dai Wenyi gaw langai hte langai hta e, Shi a atsam shapraw dan nga ai.

Masha a hkum hkrang hta daw shan law law rawng nga ti mung, dai ni yawng hte gaw hkum hkrang langai sha jawm tai nga ma ai. Dai hte maren, Hkristu mung, daw shan law law lu ai hkum hkrang langai sha zawn rai nga ai. Anhte yawng mayawng, Yuda ni hte Greka ni rai ti mung, mayam ni hte shanglawt ni rai ti mung, hkum hkrang langai sha zawn rai nga ai. Anhte yawng mayawng, Yuda ni hte Greka ni rai ti mung, mayam ni hte shanglawt ni rai ti mung, hkum hkrang langai sha tai na matu, Wenyi langai sha hte e kashin kamun hkam la saga ai rai nna, anhte yawng jawm lu na matu, dai Wenyi hpe jaw ya mani ai.

KABU GARA SHIGA

YAWHAN 20: 19-23. 

‘Nye Wa ngai hpe shangun dat ai hte maren, ngai mung nanhte hpe shangun dat made ai.’

Dai laban bat a shawng shani na nsin rim rim e, Yuda masha ni hpe hkrit ai majaw, sape ni hpawng nga ai nta e chyinghka la da sayang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai.

Shing nga tsun nhtawm, Shi a lata hte garep shanhte hpe madun dan wu ai. Sape ni mung dai Madu hpe mu lu jang, kabu gara nga ma ai. Bai, Yesu gaw, nanhte ngwi pyaw nga myit ga; Nye Wa ngai hpe shangun dat ai hte maren, ngai mung nanhte hpe shangun dat made ai, ngu mu ai.

Shingnga nhtawm, sape ni a ntsa e, Shi nsa kawut nna, Chyoi Pra ai Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara hpe rai ti mung, nanhte shagun da yang gaw, dai mara naw nga na ra ai, ngu nna shanhte hpe tsun mu ai.

YESU LAMU DE LUNG WA AI POI LABAN MUNGGA

Dai ni na laban shani hta Madu Yesu sumsing lamu de lung wa ai poi hpe anhte galaw nga ga ai. Shinggyim masha a hkum hkrang hpe dagraw la nna Karai Kasang a Mungdan lam hkaw tsun ai, nni hkri yu bak hpe hkam ai, wudang ntsa hta jen noi si hkrum ai hte bai hkrung rawt wa nna sumsing lamu de bai lung wa ai re.

Madu Yesu gaw, Kawa Karai Kasang matsun madun ai lam hpe kangka ai hte hkan shatup galaw sa nna, sumsing lamu de lung wa ai ngu ai gaw Shi a magam bungli hpe hpung dim dat ai, shi a magam bungli awng dang ai ngu mung sawn la mai nga ai. Kawa Karai Kasang kaw nna yu hkrat wa nna Shi hpang de bai du wa ai gaw magam bungli langai hpe shangut shakre ai lam rai nga ai.

Anhte galaw sa ai magam bungli ni hpe Karai Kasang matsun madun ai hte maren kangka ai hte ngut kre ai du hkra galaw la lu ai n-gun atsam dai ni na poi nhtoi hpe galaw ai a marang e hkam la lu u ga.

PRAT NINGNAN HTE MADU HTE RAU SAKHKRUNG GA

Bai hkrung rawt ai hpang nhtoi (40) ya rai yang, hpa majaw Madu Yesu, Sape ni hpe tawn kau da ai rai?

Chyum Laika hta, (40) ya ngu ai gaw ahkyak ai hti hkum re. Karai Kasang a myiman hpe mu lu na matu, Mawshe gaw bum n’tsa hta nhtoi (40) ya tup lusha gam let akyu hpyi nga ai. Gasadi jaw da ai mungdan de du shang wa lu na matu (40) ning, nam mali e, hkyen lajang ra sai. Hkrung rawt ai hpang (40) ya tup, Madu Yesu gaw, shara law law hta sape ni hpe dan pru dan nna, Shi Madu bai hkrung rawt sai hpe shateng ya nna, Shi Madu galaw lai wa sai Sasana magam bungli hpe galaw lu na lajang ya sai.

Madu Yesu a pru sa mat ai lam hte Lamu de lung wa ai lam gaw, Sape ni a matu jahtum hte ningnan hpang ai lam rai sai. Shi Madu tsawra ai Sape ni hte, hkrum hkrang hte nawng rau nga ai ten htum mat nna, lam nnan hte bai rau nga nga na ningnan byin ai masat rai sai. Mungkan htum ai ten du hkra rau rai nga na hpe Madu Yesu gasadi jaw da sai. Hpung shingkang hte hkrung rawt sai Hkyela Madu gaw Sumsing lamu de lung wa nna Kawa Karai a hkra maga de hkaw dung nga ai de Chyoipra ai Wenyi hpe mung shangun dat ya nna, Yawdan hka e Shi Madu hta yu hkrat wa nna, Sasana magam hpang wa ai zawn, Sape ni mung Wenyi hte hpring wa na rai nga ai. Madu Yesu, Sape ni hpe tawn kau da ai shaloi, yawn hkyen myit kaji let nga taw ma ai n rai. Hta n-ga, kabu myit pyaw ai hte hpring nga nna Chyoipra ai Wenyi yu hkrat wa na hpe myit katu let nga nga ma ai.

Madu Yesu, Sape ni hpe hpang jahtum tsun da ai mungga gaw; Shi Madu a hkye hkrang ai magam hte, Sape ni hpe mung, hkyela na matu si hkam ai hte hpung shingkang hta bai hkrung rawt sai hpe sakse hkam let mungkan shara shagu de, dai hkye hkrang la ai lam a kabu gara shiga hpe hkaw tsun dan na matu rai sai. Sape ni a magam lit gaw; Israela amyu masha a matu chyu sha n rai, amyu masha yawng a matu re ai, hkye hkrang la na kabu gara shiga hpe hkaw tsun gam garan na lam rai sai.

Karai Kasang a tsawra ai hte hkye hkrang la na kumhpa gaw amyu masha langai a matu chyu sha n rai, hkap la kam sham ai, mungkan ting na masha ni a matu rai nga ai. Kabu gara shiga gaw, Karai Kasang a atsam ningja rai nna, shut hpyit ai ni, dip sha hkrum ai ni, hpe shamai shatsai ya na, bai sharawt la na, hte Madu a langai sha tai nga shangun ai tsi kaba rai sai. Kabu gara shiga a, atsam ningja hpe nang kam sham ai kun?

Nawku hpung ting hpe Madu Yesu jaw da ai, kaba dik ai magam lit mung n dai rai sai. Kam sham sai ni yawng hpe maren mara jaw da ai magam lit gaw; kabu gara shiga hpe shachyam shabra na hte Mungkan ga
 hkyela Madu re ai Hkristu Yesu a kasa kaja ni rai na lam rai sai. Ndai magam lit hpe gun hpai na matu kabai da hkrum ai n rai, hkrung rawt sai Madu gaw, Chyoipra ai Wenyi a marang e, anhte hta naw matut galaw nga ai. Dai ni, Madu Yesu lamu de lung wa ai poi nhtoi hta, Shi a hkum hkrang rai nga ai anhte ni hpe, nnan bai gram ya nna, ninggun atsam ningja jat ya nga ai hte, shi jaw da sai Magam lit hpe mungkan ting hta gun hpai lu na matu laknak shakap ya sai. Kabu gara ai shiga hta kabu gara ai lam hpe masha kaga ni hpe sakse hkam nga ai kun? Bai hkrung rawt na lam hta nang myit mada nga ai kun?

YESU LAMU DE LUNG WA AI POI LABAN NA CHYUM LAIKA

8th May 2016

CHYUM MUNGGA DAW 1

KASA 1: 1-11

‘Nanhte htaw lamu de hpa majaw azi yu nga myit ta? Yesu gaw sumsing lamu de shalun la hkrum sai.’

Ya hti na gaw, Kasa Laika hta na rai nga ai.

Shawng e ngai ka da ai laika hta, Htawhpilu e, Yesu sumsing lamu de shalun la hkrum ai nhtoi du hkra, Shi galaw dan ai amu ni hte sharin shaga ai lam yawng hte hpe, ngai ka lajang da se ai. Shi shalun la hkrum ai shani e, Chyoi Pra ai Wenyi a garum ai hte Shi lata la ai kasa ni hpe, ga matsun hkang da mu ai.

Yesu gaw nni nkri hkrum ai hpang, Shi a hkum chyahkrung hpe, kam ging ai sakse law law hte, shanhte hpe madun dan wu ai; nhtoi mali shi ya laman e, kasa ni kaw dan pru nna, Karai Kasang a mungdan lam shanhte hpe tsun dan wu ai. Shing rai shanhte rau hpawng nga ai shaloi, Yesu gaw, Yerusalem mare kaw na nanhte n pru ai sha, ngai kaw nna na la ai, Wa a ga ndat hpe ala nga mu; kaning rai nme law ngai hkum nanhte hpe tsun dan ai hte maren, Yawhan gaw hka hte kashin kamun jaw ai; nanhte chyawm gaw nhtoi gade n na yang, Chyoi Pra ai Wenyi hta kashin kamun hkam la na marin dai, ngu nna shanhte hpe tsun mu ai.

Dai rai nna, Shi hte rau hpawng nga ai ni gaw, Madu e, dai mungdan hpe ya aten e Israela masha ni kaw bai de ya na rai ni? ngu nna san ma ai. Shi mahtang gaw, Wa gaw Shi a ahkaw ahkang hte daw da ai ahkying hte aten ladaw hpe nanhte chye shara n nga ai. Rai ti mung, Chyoi Pra ai Wenyi nanhte a ntsa e du jang, n-gun atsam lu la na myit dai rai nna, Yerusalem mare hte Yuda mung ting, Samari mung hte lamu ga htum hkra, nanhte nye a sakse ni tai wa na marin dai, ngu nna shanhte hpe tsun mu ai.

Ndai ga tsun jang, shanhte yu nga ninglen, Shi hpe ntsa de shalun la ai rai nna, summwi gaw shanhte a man na Shi hpe magap la mat wa ai. Shanhte lamu de naw azi yu nga yang, yu mu, hpraw tu ai hpun palawng bu hpun ai marai lahkawng shanhte a makau e tsap pru nna, Galile masha ni e, htaw lamu de hpa majaw azi yu nga myit ta? (Nanhte a man na sumsing lamu de shalun la ai wa dai Yesu gaw, nanhte mada yu nga yang, Shi Sumsing lamu de lung wa ai zawn, dai hku Shi bai du na ra ai, ngu nna tsun mu ai.)

Ya hti ai gaw Karai Kasang a mungga rai nga ai.

CHYUM MUNGGA DAW 2

EHPESU 1: 17-23

‘Shi gaw Yesu hpe Sumsing lamu hta e, Shi a hkra maga de dung nga shangun da wu ai.’

Ya hti na gaw, Ehpesu masha ni hpang de San Pawlu shagun dat ai Laika hta na rai nga ai.

Hpu nau ni e, Anhte a Madu Yesu Hkristu a Karai Kasang rai nga ai, hpung shingkang rawng ai Kawa gaw, Shi hkum nan hpe chye chyang lu na matu, nanhte a myit masin hpe hpaji byeng-ya hte myit leng ai chyeju Shi jaw ya u ga ngu nna, ngai hpyi nngai. Karai Kasang a shaga la ai a jaw e, myit mada shara gade wa nga ai hpe mung; Chyoi Pra ai ni gaw hpung shingkang rawng ai sali wunli gade wa hkrum la na hpe mung; Shi hpe kam sham ai ni a matu, Shi a chyeju atsam gade wa galu kaba nga ai hpe mung, nanhte chye lu na matu, Karai Kasang nanhte a myit masin na myi hpe jahtoi jasan ya malit ga, ngu nna mung, ngai hpyi nngai.

Karai Kasang gaw Hkristu hta shabyin da ai amu hpe gawn yu jang, Shi a n-gun atsam nachying galu kaba htum rai nga ai hpe, nanhte chye lu na myit dai. Shi a atsam hte Hkristu hpe si mat ai ni kaw na sharawt la nna, sumsing lamu hta hkra maga e dung nga shangun da wu ai. Du Magam, Ahkaw Ahkang, Hpung Shingkang hte Up ai aya lu ai nlang hte a ntsa e mung, ndai prat hte htawm hpang na aprat e shamying lu ai amying ahkang mahkra a ntsa e mung, shi hpe shagrau shatsaw da nu ai.

Karai Kasang gaw arai baw sumhpa hpe Shi a lagaw npu e tawn da nu ai rai nna, yawng mayawng hpe up hkang lu na matu, Nawku Hpung a baw Shi hpe shatai da wu ai: Dai Hpung gaw Hkristu a hkum hkrang rai nga nna, Yawng mayawng hpe jahkum shatsup ya ai Hkristu a chyeju, dai hta e hkum hkum rawng nga ai.

Ya hti ai gaw Karai Kasang a mungga rai nga ai.

  

KABU GARA SHIGA 

LUKA 24: 46-53

‘Yesu gaw shanhte hpe shaman ya nhtawm, Sumsing lamu de woi shalun la ai hkrum wu ai.’

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Yesu Shi sape ni hpe tsun mu ai gaw: Chyum laika hta gara hku ka da ai hpe dum chye nga mu: Hkristu gaw nni nkri hkam la nna masum ngu na nhtoi e, si ai ni kaw na bai hkrung rawt na ra ai; bai nna, masha amyu baw shagu hpe mara raw dat ya ai hkrum na matu myit malai lam hpe, Shi a amying nsang hte hkaw tsun dan na ra ai, nga nna ka da nga ai. Yerusalem mare e hkaw tsun hpang mu; nanhte gaw ndai lam ni a sakse ni rai nga myit dai. Yu mu, nye Wa a ga ndat nanhte a ntsa de shangun dat na ring ngai; dai rai nna matsaw ningtsang de na n-gun atsam hpe nanhte dagraw la ai nhtoi du hkra, ndai mare e naw la nga mala, ngu nna shanhte hpe tsun dat mu ai.

Dai hpang Shi shanhte hpe Behtani kahtawng a shingnawm de woi sa wa nhtawm, Shi a lata sharawt nna shanhte hpe shaman ya mu ai. Shing rai, shanhte hpe shaman ya nga yang, Shi shanhte kaw na hka mat wa nna, sumsing lamu de woi shalun la ai hkrum wu ai. Shanhte gaw Shi hpe nawku nhtawm, nachying kabu gara let Yerusalem mare de bai wa ma ai; Karai Kasang hpe shakawn kungdawn let, Nawku Htingnu e a nga nga ma ai.

Ya hti ai gaw Madu a Kabu Gara Shiga rai nga ai.