PRANWAN LADAW (17) LABAN SHANI NA MUNGGA

Masha hkum shagu gaw tinang hta rawng ai atsam marai yawng hpe jai lang na matu yak hkak nga ai. Dai rai yang tinang hta rawng ai atsam marai kau chyen mi hpe sha asung jashawn chye nga ai. Hpa majaw nga yang tinang galaw ai amu magam ni hta myit maju jung ai lam nnga ai majaw re.

Lama wa na tinang galaw ai lam hpe ra sharawng ai, myit lawm ai rai yang gaw n-yup n-sha, nbyin nmai ngu ai myit hte shakut shaja na gaw teng sha rai nga ai. Tinang a myit masin yawng n-gun mahkra hpe jai lang nna galaw ai wa gaw teng sha awngdang ai hpe lu la na re.

Dai re ai majaw, tinang a matu gara gaw ahkyak ai n-ahkyak ai hpe chye ginghka na matu hte ahkyak ai amu bungli ni hta nna, ahkyak dik htum ngu ai hpe lata la let ra sharawng ai myit hpe bang da nna, tinang a myit masin yawng n-gun mahkra hpe jai lang let awngdang ai hte galaw sa wa lu na matu Karai Kasang hpang de akyu hpi let shakut shaja sa wa ga.

MADU A MUNGDAN

“Sumsing Lamu a mungdan” gaw. . . . . . . . . 

Lai wa sai laban 2 hta Karai Kasang a mungdan lam ni hpe anhte na la lu saga ai. Nli gat ai wa, Mam hte tsing a lam, ni gaw Karai Kasang a mungdan lam hpe tsun dan sai. Dai ni kalang mi bai Karai Kasang a mungdan lam hpe makoi da ai sutgan, kaja teng ai hkachyi hte nawng hta e kabai bang nna ‘Nga’ amyu myu hpe magawn la ai sumgawn ni hte shingdaw tawn ai hpe na la lu sai.

Madu Yesu gaw Sumsing Lamu a mungdan lam hpe chye na lu na matu gashadawn amyu myu lang let tsun hpaw dan nga ai. Ndai gashadawn ni hta na la ai majaw, Karai Kasang a mungdan lam hte up hkang hkaw dung ai masa hpe loi li chye madat lu ga ai. Tim, Madu Yesu tsun dan nga ai dai gashadawn ni a kata lam de ahkyak ai lama mi anhte yawng a matu nga nga ai hte dai gaw anhte a ra sharawng myit rai nga ai. Kaja wa anhte hpa hpe ra marin a ta? Aprat hta anhte tam nga ai gaw hpa rai ta? Aprat hta n nga yang n mai ai, kaman li la sha rai na re ngu kam da ai gaw hpa wa mi rai na kun?

Anhte a ra sharawng ai lam hte seng nna dai ni na la ai chyum mungga ni gaw hpaw tsun dan nga sai. Chyum mungga daw (I), hkawhkam laika langai hta, Karai Kasang lata la sai amyu masha ni hpe up hkang na gaw magam lit kaba rai nga ai majaw, kaja ai hte n kaja ai hpe chye ginhka lu nna, chye je yang na hpaji byeng-ya hpyi ai Shawlamun a lam hpe anhte na lu sa ga ai. Asak galu ai, sut su na matu n hpyi ai Shawlamun hpe Karai Kasang gaw sharawng awng nga ai. Htani htana n grin ai, htum mat chye ai arung arai hpe n hpyi ai sha, Rudi ning pawt re ai, dinghpring ai, tsawra matsan dum chye ai, Tara rap ra lam hpe jaw ya ai, Nyan marai/ hpaji byeng-ya/ chye chyang lam hpe hpyi ai gaw Karai Kasang myit ra ai hte maren nga sa galaw lu na lam rai nga ai. Kabu gara shiga hta mung Sumsing Lamu a mungdan lam hte seng nna anhte na la sai. Karai Kasang a mungdan gaw ahkyak nga ai hpe ndai gashadawn ni hta anhte mu lu sai kun? Arai yawng mayawng gaw nambat lahkawng she rai na re. Karai Kasang a sut gan hpe tam mu ai hpang kaga hpe ngam kau da lu na mai byin ai kun?

Anhte a sak prat na mabyin masa ni hta Karai kasang up hkang nga ai ngu ai hpe tam lu na matu myit sharawng awng nga ai kun? Anhte a sak prat hpe Karai Kasang up hkang la na matu anhte hpa hpe kau da ra na rai ta? Karai Kasang hte ni htep wa na, Shi hpe sha myit machyu jung lu na matu anhte a prat hta lata san kau ra ai lam ni law law nga nga ai. Ndai amu ni galaw lu na matu teng sha wa yak la nga ai.

Dai ni, anhte a myit masin salum hpe hpaw ya nna Shi Madu hpe sha sung htum ai sharawng awng ai myit hte anhte a prat hta ning shawng jaw lu na matu Karai Kasang kaw na shaman chyeju hpyi la nga ga! Dai rai yang she, yak hkak la ai ndai mungkan hta Shi Madu Karai hpe sakse hkam lu nna Karai Kasang myit ra ai hte maren aanhte sak hkrung hkawm sa lu na rai nga ai.

PRANWAN LADAW (17) LABAN SHANI NA CHYUM LAIKA

PRANWAN LADAW HTA LABAN (17) 

30th July, 2017 

CHYUM MUNGGA DAW 1 

1 Hkawhkam 3:5.7-12 

Ya hti na gaw Hkawhkam laika hta na rai nga ai. 

Gribeon shara e, Madu Karai Kasang gaw yupmang hta, Shawlumon kaw dan pru nna tsun ai, Ngai nang hpe hpa jaw na hpyi e, ngu wu ai. Shawlumon tsun ai, ya chyawm gaw, nye Karai Kasang Madu e, Nang gaw nye wa Dawi a malai, Na a mayam wa hpe hkawhkam shatai ndai. Ngai mahtang ma kaji naw rai nga nna, shang wa, pru wa, lam n chye nngai. Nang lata la ai, n dang hti lu ai, law la ai, myit sawn n hkap lu ai, Na amyu kaba hta, Na a mayam wa lawm nga nngai.

Kaja ai hte n kaja ai hpe ngai chye ginhka lu nna, na a amyu masha hpe chye jeyang na, hpaji byeng-ya rawng ai myit, na a mayam wa hpe jaw ya e law! Ndai galu kaba ai Na a amyu hpe kadai jeyang lu na rai ta? ngu hpyi wu ai. 

Shawlumon dai lam hpyi ai majaw shi ga Madu man e mai kaja nga lu ai. Karai Kasang gaw, ndai lam nang hpyi nga ai rai nna, asak galu ai, sut su sut lu ai, na a hpyen ni hpe sat kau lu na lam nang n hpyi ndai, tara daw dan lu na lam chye ginhka lu hkra hpaji byeng-ya hpyi ndai majaw, nang hpyi ai hte maren ngai jaw sade ai. Ngai nang hpe hpaji byeng-ya rawng ai hte chye chyang ai myit jaw ni ai. Nang zawn hpaji rawng ai, na a shawng e kadai n nga, na a hpang e kadai n pra na ra ai. 

Ya hti ai gaw Karai Kasang a mungga rai nga ai.

CHYUM MUNGGA DAW 2 

Roma 8:28-30 

Ya hti na gaw Roma ni kaw San Pawlu shagun dat ai laika hta na rai nga ai. 

Shakyet da sai hte maren, shaga la sai, Karai Kasang hpe tsawra ai ni a matu, yawng mayawng mai kaja hkra jawm byin wa sai, anhte chye ga ai. 

Tinang a kasha gaw kahpu kanau lanlak hta e, alat ningshawng tai u ga, mi moi na htang da sai ni hpe, shi a Kasha a gawng shingyan hte bung na matu, shi anhte hpe san da chyalu rai sai. San da chyalu ni hpe shaga mu ai. Shaga la sai ni hpe dinghpring shangun ya mu ai. 

Ya hti ai gaw Karai Kasang a mungga rai nga ai.

KABU GARA SHIGA 

Mahte 13:44-46 

Ya hti na gaw Mahte a laika hta na Kabu Gara Shiga rai nga ai. 

Lamu mungdan gaw, ga dachyawk hta makoi da nna, masha mu hkrup ai hte bai makoi da ai sutgan hte bung nga ai. Kabu gara wa nna, shi lu malu hpe dut kau nhtawm dai ga dachyawk hpe mari la wu a i.

Bai lamu mungdan gaw kaja reng ai kachyi hpe tam ai hpaga la hte bung ai. Manu kaba ai kachyi langai mi hpe mu jang, nhtang wa nna tinang lu malu dut kau nhtawm, dai hpe mari la ai. 

Ya hti ai gaw Madu a Kabu Gara shiga rai nga ai.

PRANWAN LADAW (16) LABAN SHANI NA MUNGGA

Mai kaja ai lam mahkra a npawt daju rai nga ai Karai Kasang gaw Shi hpan da ai Shi a kashu kasha ni yawng hte hpe hpang jahtum hta Shi hpang de bai du shang wa na hpe ra sharawng nga ai. Dai re ai majaw Karai Kasang gaw myit galu kaba let tsawra myit hte lam dam mat ai ni hpe ala taw nga ai ngu ai hpe dai ni na mungga hte lakap nna anhte dum shai lu nga ai. 

Nkru nkaja ai ni hpe hten za na matu n-ra sharawng ai sha, galai shai nna Shi hpang de bai nhtang wa na matu Myi Htoi ni hpe shangun dat ai hta n-ga, Shi a Kasha Singtai hpe shangun dat ai du hkra anhte hpe tsawra ngai ai. Myit malai lu nna Karai Kasang hpang de bai nhtang wa na matu galoi mung ala nga ai.

Dai rai yang anhte a myit masin hta nju ndawng ai, tingkyeng a matu myit ai, manawn ai, namak law hpa ai, manang wa hpe jahten mayu ai, zawn re ai myit ni hpe koi gam kau nna Kaja ai myit hpe bang da let anhte hkrun lam a hpang jahtum na pandung rai nga ai Karai Kasang a ngwi pyaw simsa ai hta htani htana shang lawm lu u ga.

MAM HTE TSING

Nhkru n kaja ai nat satan a magam bungli ni law chyam bra wa nga ai ndai mungkan hta nang/ngai a myit jasat gaw hpa wa rai ta? Anhte dang di lu ai lama ma wa nga ai kun? Galai shai wa lu na matu anhte sak jaw ap nawng gwi ai i? Ndai ga san ni gaw dai ni na kabu gara shiga hta anhte hpe san nga ai. Nhkru ai nat satan a bungli gade mi law htam nga ai rai tim, Karai Kasang a mungdan hpe gaw gap da lu sai. Chying hkrang tum daram sha mi rai tim, Karai Kasang a mungdan gaw a up nga sai. Dai gaw ga hta hkai da nna tu prut wa sai mam zawn rai nga ai. Raitim, kung ai daram gaw tu kaba sai n rai. Mam dan ten mung rai n du shi ga ai. Ya aten hta chyawm, mam hte tsing rau tu nga ai zawn, kaja ai hte n hkru ai mung ndai mungkan hta rau anga nga ai.

Rai yang, anhte hta lata la na lam masum nga nga ai. Langai; yawng hpe dai zawn sha rai nga u ga ngu tsun kau na lam rai na nhten.

Anhte hpa mung n-galaw lu ai gaw ngu nna myit ai hte mung bung nga ai. Hpa n shai la ai, tinang hta hpa n sa hkra yang rai sai ngu ai lam rai na re. Lahkawng; myit htum ai hte marawn jahtau na mi rai kun? Hten run nga ai mungkan ga hpe mada yu nna, “E, shinggyim masha ni dai zawn rai byin mayu jang mung rai nga u ga” ngu matsa jahtau na lam sha rai nga ai. ‘Ngai chyawm gaw loi simsa ai hta azim sha nga sana’ ngu myit la nna lawt lam tam na masa rai nga ai. Masum; Dai Nsin mungkan hpe matsa jahtau na malai hkap la let nhtoi a wan hpe shachyi ga! Kasa Mahte a laika hta, “nanhte gaw mungkan ga a Ning htoi rai nga myit dai.

Pyengdin hpe shatu nhtawm, mung npu e tawn da ai gaw, kadai n galaw yu ai, pyengdin shadun hta tawn da nna, dai gaw, nta e nga nga ai n lang hte hpe Jahtoi ya mu ai” nga nna Madu Yesu gaw anhte hpe mungkan ga a Jum hte Ninghtoi tai na numhtet da sai.

Dai ni na nsin mungkan hta anhte kaning rai ninghtoi htoi tu shangun lu na rai? Teng sha wa anhte Akyu hpyi let lam shagu hpe lu la awng dang lu na re. Nat satan a magam bungli hpe mung Akyu hpyi ai marang e dang kau lu na rai nga ai. Ka¬rai Kasang a mungdan lam hkan tsun sakse hkam ai bungli gaw matut manoi rai nga na re. Masa lam law law nga ai hte anhte dai hpe galaw na matu ning dat hkrum sa ga ai. Pyengdin hpe shatu let shadun hta yawng mu lu na matu htoi tu shangun ga! 

Sawn sumru yu mai ai lam; Ndai lam masum hta na gara hpe mahtang nang lata la na rai ta? TA sharawt kau na kun? Lawt lam tam na kun? Nhtoi hpe shatu ai hku nna mai kaja ai magam bungli hpe anhte a makau grup yin hta shakut galaw na kun?

PRANWAN LADAW (16) LABAN SHANI NA CHYUM LAIKA

PRANWAN LADAW HTA LABAN (16)

23th July, 2017

CHYUM MUNGGA DAW 1

Byeng-ya laika 12 : 13. 16-19

Ya hti na gaw Byeng-ya laika hta na rai nga ai.

Madu e, nang hta lai nna, masha mahkra hpe lanu ya ai Karai kaga n nga ai. Nang dawdan ai hpe n tara ai kadai nga na n rai.

Na a atsam mahtang ding hpring ai lam, a n pawt rai nga ai. Nang gaw mahkra a ntsa e up nga ndai majaw, nlang hte hpe hkyamsa ya hkraw nga ndai. 17Na a kup tsup ai atsam hpe n kam sham, Nang hpe chye ai ni n gawn n sawn rai, shaloi sha, Nang n-gun madun ga ndai.

Tinang ra ai made n-gun hpe galoimung shapraw lu ai. N-gun mahkra a npawt daju rai nga tim, Nang matsan dum ai hte daw dan nga ndai, Hkyamsa ai hku shanhte hpe up hkang nga ndai. Dinghpring ai ni sumnung ra ai lam, ndai amu ni a marang e, Na amyu masha ni hpe Nang sharin ya ndai.

Shingrai, shanhte a shut hpyit mara ni a matu myit malai lu na aten jaw nga ai, ngu nna myit mada lu ai lam, Na a kasha ni hpe kaja wa jaw ya nit dai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 8 : 26-27

Ya hti na gaw Roma ni kaw San Pawlu shagun dat ai laika hta na rai nga ai.

26Wenyi mung anhte a gawng run gawng tsang hpe lanu lahku ya nga ai. Akyu hpyi mai ai hte maren, anhte n chye hpyi nga ga timung, wenyi nan n-gup n hkawn ai, myit kraw ga hte anhte a matu hpyi htinglu ya mi ai. 27Kraw lawang sawk yu chye ai wa gaw, wenyi a myit hpa re ai chye ya nga ai. Karai Kasang ra ai hte maren, chyoi pra ai ni a matu shi hpyi htinglu ya nga ai. 

Ya hti ai gaw Karai Kasang a mungga rai nga ai.

KABU GARA SHIGA

Mahte 13 : 24-30

Ya hti na gaw Mahte a laika hta na Kabu Gara Shiga rai nga ai.

Yesu tsun ai, sumsing lamu a mungdan, hkauna hta nli kaja gat ai wa hte bung nga ai. Masha ni yup pyaw nga yang, gumklau sa wa nna, mam hta tsing tum gat bang nhtawm pru mat wa ai. Ya mam maku tu wa nna, asi si jang, tsing mung dan dawng wa ai. Nta madu a mayam ni sa du nna, Madu e, na a hkauna hta e, nli kaja she nang gat sai nrai ni? Hpa rai tsing tu a ta? ngu mu ai.

Gumlau wa di nu ai, ngu tsun mu ai. Shanhte gaw, anhte dai hpe magang kau na hkraw nni? ngu wu ai. Shi mahtang, n rai, nanhte tsing hpe baw yang, mam shalawm kau lu ai. Naw nga u ga. Dai lahkawng nmut ta du hkra tu kaba wa mu ga. Nmut ta du jang. tsing hpe shawng dan mahkawng nna, nhtan nhtawm wan hta nat kau mu. Mam hpe chyawm gaw nye a dum hta mahkawng da mu, ngu nna mam dan ai ni hpe ngai tsun na mawe ai, ngu mu ai. 

Ya hti ai gaw Madu a Kabu Gara shiga rai nga ai.

PRANWAN LADAW (15) LABAN SHANI NA MUNGGA

Yi sun hkau na galaw ai masha hkum shagu gaw ang ai arang ni hpe bang nna galaw sa yang she akyu amyat lu la mai nga ai. Tinang a n-gun lagaw dat ai sha n-ga, hkai li ni hpe mung rang ra ai rai yang tinang gat hkai ai hkai li shagu tu na matu hte asi si na matu myit mada ai re.

Karai Kasang gaw anhte masha hkum shagu hpe Shi a kaja ai mungga nli tum hpe gat hkai ya sai rai yang apu pu, asi si na hpe myit mada nga ai re. Tinang lu da sai Karai Kasang a mungga asi si wa na matu gaw, ga sau hte bung ai anhte a myit masin hkum hkrang hta nkaja ai amu bungli, agung alau ni hpe dang kau nna kaja ai amu magam galaw ai hte kaja ai myit masin hpe gaw gap lu ai rai yang Karai Kasang jaw ya ai nli tum gaw htam law law asi si apu pu wa na re.

Dai rai yang, anhte sak hkrung nga sa ai hkrun lam hta mai kaja ai amu bungli ni hpe hkan shatup galaw sa ai hte kaja ai myit masin hpe gaw gap lu nna tinang a matu sha nre, manang ni a matu mung akyu pru ai amu bungli ni hpe galaw sa wa lu u ga.

NLI GAT AI WA, NLI TUM, GA SAU

Dai ni e Madu Yesu gaw kabu gara shiga laika ni hta na dan dawng dik ai gashadawn hte anhte hpe tsun shadum ya sai. Anhte mu chye na ai, nli tum, ga sau, hte Nli gat ai wa ni a lam sumru yu yang Madu Yesu jaw mayu ai shiga hpe anhte asan sha chye madat ga ai. Nhpaw n ya lu ai Nli tum ni gaw shara shagu hta hkrat wa ai rai tim, Nli gat ai wa gaw law htam hkra shu la lu na hpe n myit mada nga ai. Lamu ga chyawm gaw dai du wa na rai nga ai nli tum hpe hkap la lu na matu atsawm sha htu, htai da na ra nga ai.

Anhte gaw dai lamu ga rai nna, Karai Kasang gaw Nli gat ai wa rai nga ai hte Mungga gaw nli tum rai nga ai. Nli tum law malawng kaw nna law law wa mayat la na pahkam jaw n ra nga ai. Dai nli tum law malawng gaw yawng n rai nga ai hte anhte ni gaw nli tum law malawng kaw nna law law mayat lu na ning dat hkrum sa ga ai. Dai ni, ndai ning dat ai lam hpe anhte, Hkristan marai mi hku nna kaning rai hkap la sai kun?

Shawng nnan, ga sau kaja ai lamu ga byin tai lu na matu shakut shaja ai hpe pat shing dang ai lam law law nga ai lam anhte dum chye ra nga ai. Ya aten, anhte a prat hta mau hpa shiga, arung arai, ruyak jam jau, tam lu tam sha lam, lam law law gaw anhte a myit hta hpring chyat nga nna Karai a mungga hpe shara n jaw lu nga ai. Dai majaw, Karai e gat dat ai nli tum ga sau kaja hta hkrat na matu anhte kaw nna lajang ai lam gaw aloi ali hte byin lu na nrai. Raitim, hkyen lajang ai hta hkam sharang ai lam ra ai hte dai nli 

anhte hta hkrat tu wa ai rai yang law law mayat wa lu nara ah¬kyak nga ai.

Masha n bung ai hte maren, ndai hkyen lajang ai lammung n bung na re. Masha n kau mi a matu dai mungga hpesadi maja ai hte hkap la nna tinang a salum de jat/hta bang la ai lam mi rai na re. Kaga n kau mi a matu rai yang, dai hte shai ailam rai na mai byin ai. Karai a mungga hpe hkap hta la ai hta hkan nna shai na re. Amu magam hta shakut let daw jau na shakut ai masha kaja ni law law nga nga ai. Dai masha ni a matu rai yang, azim sha nga let, Karai a mungga hpe madat la nna akyu hpyi let myit aru yu ai gaw hkyen lajang ai rai sai.

Dai majaw, hpu nau ni e, Karai a mungga anhte a myit ma¬sin salum hta prut tu let dang latsa, kru shi, sumshi mayat wa lu ga law. Karai a mungga gaw kaja wa sha anhte hpe Asak jaw ya ai, ahkrung nga ai mungga rai nga u ga law!!!

Sawn sumru yu mai lam: Kaning re ai lamu ga sau ngai rai nga ai kun? Nli tum (Karai a mungga) ngai a prat hta tu prut lu na matu hpa gaw hkum pat da nga ai rai? Karai a mungga ngai a salum hta tu prut mayat wa lu na matu hkum pat da ai lam ni hpe ngai kaning rai jasan jaseng kau lu na rai ta?

PRANWAN LADAW (15) LABAN SHANI NA CHYUM LAIKA

PRANWAN LADAW HTA LABAN (15) 

16th July, 2017 

CHYUM MUNGGA DAW 1 

Esaia 55:10-11

Ya hti na gaw Myihtoi Esaia laika hta na rai nga ai.

Marang hte hkyen gaw, lamu de na htu hkrat nna, dai de bai n wa ai sha, nli gat ai wa hpe nli, makam galaw ai wa hpe sha hpa jaw lu hkra ga hpe madit let, matsun maku shaprut nna asi si shangun ai zawn, nye mungga mung dai hte maren tai na ra ai. Dai ngai hpang de kaman nhtang wa na n rai. Ngai ra ai hku shadik ya na ra ai. Ngai shangun ai amu hta, awng wa na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 8:18-23 

Ya hti na gaw Roma masha ni kaw San Pawlu shagun dat ai laika hta na rai nga ai.

Ndai prat na tsinyam tsindam gaw. anhte kaw e shadan shapraw na ra ai hpung shingkang hte shadawn n ding nga ai, ngai myit nngai. Hpan da sai yawng myit ndaw ai hte Karai Kasang a kashu kasha ni paw pru na ra ai hpe ala nga ma ai. Hpan da sai nlang chyawm gaw, hten bya lam npu e, shagrit kau ai hkrum sai. Tinang ngu ai hku chyawm n rai, raitim, hten bya lam de sharen da hkrum ai kaw na shalawt hkam nhtawm, Karai Kasang a kashu kasha ni a pru lawt ai hpung shingkang hta shang lu na, myit mada nga nna, shagrit kau ya ai wa dai hpe hkam nga ai. Hpan da sai nlang, ya du hkra madai nna, gadau gadap rai nga ma ai hpe anhte chye ga ai.

Wenyi a chyeju nhtoi hkam la ai anhte mung, tinang a kraw lawang hta madai nga nna, hkum hkrang a htingrai htingrat ai lam, kasha yin la ai chyeju hpe ala nga ga ai.

Ya hti ai gaw Karai Kasang a mungga rai nga ai.

KABU GARA SHIGA

Mahte 13:1-9

Ya hti na gaw Mahte a laika hta na Kabu Gara Shiga rai nga ai.

Yesu nawng makau e sa dung nga ai. Masha unawng shi hpang de zuphpawng sa wa ma ai. Li langai mi hta Yesu shang dung nga ai. Shawa masha ni mahkra gaw hkinggau hta e tsap nga ma ai. Ga shadawn, law law hte shanhte hpe tsun mu ai gaw, Nli gat ai wa gaw nli gat na pru sa wa ai. Gat dat wu yang, nkau mi lam makau e hkrat nna, u ni hta sha kau mu ai. Nkau ni ga n law ai lungrawk e hkrat nna, ga n htat ai majaw, ya jang tu pru timung, jan katen jang kraw mat nna ru n jung lu ai majaw hkraw si mat ai. Nkau mi ju hpun nhpang e hkrat nna, ju hpun ni tu kaba wa ai hte lim kau mu ai. Nkau mi ga kaja hta hkrat nna, asi si wa ai. Nkau mi dang latsa, nkau mi kru si, nkau mi sumshi si mayat wa ai. Na tu ai wa gaw na la u ga, ngu mu ai. 

Ya hti ai gaw Madu a Kabu Gara Shiga rai nga ai.

PRANWAN LADAW (14) LABAN SHANI NA MUNGGA

“Ngwi pyaw sim sa ai” ngu ai gaw shara mi kaw nga nna tam la mai ai ngu ntsun ai rai tim masha law law hte galaw sa ai hpe yu yang ngwi pyaw simsa ai hpe lu na matu shakut shaja ai hpe mu lu na re. Shim lam nga ai, lu sut lu su ai, magup sumhpa hte hpring tsup ai shara hta hkum hkrang a matu ngwi pyaw simsa ai hpe jaw ya mai tim, myit masin a ngwi pyaw simsa ai lam hpe chyawm gaw tinang hkum nan gaw gap la chye yang she lu la mai nga ai.

Ruyak jam jau ai gaw mungkan jut shagu, masha hkum shagu hta hkum hkra ai gaw teng sha re. Marai langai a mayak gaw kaga ni hte nbung tim yakhkak ai gaw yawng hta nga na re. Ndai ru yak jamjau ai ni hpe lai di lu na matu gaw anhte a myit masin Karai Kasang kaw maju jung na matu ahkyak nga ai. Karai Kasang hte rau nga sa nna lu la ai chyeju n-gun atsam ni gaw anhte hkrum hkra nga ai yak hkak ai lam ni hpe hkam jan lu na, lai di lu na matu garum shingtau ya nga ai.

Hki ba nna lit li hkrum ai anhte yawng hte gaw Karai Kasang hpang de sit shang nna mungkan a mayak mahkak lam ni a kaang hta anhte a myit masin ban sa ai hkrum lu u ga.

SAPE TAI AI

Madu Yesu gaw, shi kaw sa du na, sung ai mahku mara ai lam hta shang lawm na, shi a hpang hkan nang let sape tai na matu, anhte hpe saw shaga nga ai. Shi a kandang hpai na matu saw shaga ai rai tim, ban sa lam jaw na mung shi Madu sha rai nga ai. Madu Yesu jaw na kandang gaw loi la ai hte lit gaw tsang la ai nga tim, mai kaja ai lam hte sape tai na ngu ai lam gaw aloi sha rai na re ngu nna yu kaji kau na gaw n mai na re. Sape tai let hkan nang na ngu ai gaw tinang hkum hpe tsep kawp n dang nyet kau let asak ap nawng kau ai lam hta lai kaga n nga ai. Wenyi sak prat lam hpe lata la nna Hkristu hta seng nga let, wenyi hte n htan shai ai sak prat hta n hkrung nga na matu Roma hpung  masha ni hpe San Pawlu tsun ai lam mung matsing la na lam rai sai.

Hkristu jaw ai kandang hpe hpai la ai lam gaw; Hkristu Madu madun dan ai lam hta sak hkrung nga pra na, Hkristu a bandung gaw anhte a bandung rai nga na, anhte a shingran, myit mada da ai lam ni yawng hpe Hkristu hta e hkrang shapraw la na lam rai sai. Anhte a atsam hte chyu sha dai kandang hpe hpai taw ai n rai, Hkristu hte rau, Hkristu kaw nna lu la ai atsam hte hpai nga ai hpe myit dum ra ga ai.

PRANWAN LADAW (14) LABAN SHANI NA CHYUM LAIKA

PRANWAN LADAW HTA LABAN (14)

9th, July, 2017

CHYUM MUNGGA DAW 1

Zakaria 9:9-10

Ya hti na gaw myihtoi Zakaria a laika hta na rai nga ai.

Ziun shayi sha e, nachying kabu gara nga u. Yeruslem shayi sha e garu jahtau u! Na a hkawhkam wa nang hpang de du na ra ai. Shi gaw dinghpring nga nna hkye hkrang la ai lam shapraw nu ai. Shi gaw sumnung myit rawng nna, lawze ntsa e, rai sa, lawze kanu a kasha ntsa e, jawn nga ai. Ngai gaw Ehprim a hpyenleng ni hpe, Yerusalem a gumra ni hpe, jahtum kau na nngai. Hpyen ndan mung agrawp kau hkrum na ra ai. Shi gaw maigan amyu ni hpe ngwi pyaw lam tsun dan nna, namukdara kaw nna, namukdara du hkra, Uhprat hkanu kaw nna, lamu ga htum hkra up nga na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 8:9.11-13

Ya hti na gaw Roma ni kaw San Pawlu shagun dat ai laika hta na rai nga ai. 

Nanhte hta Karai Kasang a Wenyi rawng nga yang gaw, nanhte hkum shan hta n rai, Wenyi hta nan rawng nga myit dai. Langai ngai gaw Hkristu a Wenyi n rawng yang dai wa shi hte n seng nga ai. Dai hta kaga, si mat ai ni kaw Yesu hpe hkrung sharawt la ai wa Wenyi gaw, nanhte hta e rawng nga a yang gaw, si mat ai ni kaw na Hkristu Yesu hpe hkrung sharawt la ai wa gaw, nanhte hta mung rawng nga ai Wenyi a lata hte nanhte a si chye ai hkum hkrang ni hpe mung, jahkrung ya na marin dai.

Hpu nau ni e, hkum shan a myit hkan na matu, hkum shan a hka kap ai ni rai nga ga ai n rai, Hkum hkrang hte seng ai asak sha hkrung nga myit yang, nanhte si na rai nga myit dai. Hkum hkrang shan a arawn alai hpe Wenyi hte sat kau myit yang, nanhte hkrung nga na marin dai. 

Ya hti ai gaw Karai Kasang a mungga rai nga ai.

KABU GARA SHIGA

Mahte 11:25-30

Ya hti na gaw Mahte a laika hta na Kabu Gara Shiga rai nga ai.

Yesu tsun ai . Lamu hte ga a Madu, Wa e, hpaji beng-ya rawng ai ni hte myit kunghpan ai ni kaw na, ndai lam nang makoi magap da nhtawm ma kaji ni hpe madun dan ai majaw, ngai nang hpe shakawn kungdawn nngai. Ndai, Wa e, Nang tsaw ai hku rai nga lit dai. Nye Wa ngai hpe arai yawng mayawng ap ya ni ai. Wa hta kaga dai kasha hpe kadai n chye lu ai. Dai kasha hte dai kasha jahtoi ya mayu ai masha hta kaga, Wa hpe mung kadai n chye lu ai. 28Hki ba nna lit li gun ai ni yawng hte e, ngai kaw wa marit! Ngai nanhte hpe bansa shagun na made ai. Ngai sumnung ai hte myit gyip nga nngai. Nye a lam sharin la mu. Nanhte a myit masin bansa ai hkrum na malit dai. Nye a kandang hpai loi ai hte, nye a lit mung tsang nga li ai, ngu mu ai.

Ya hti ai gaw Madu a Kabu Gara Shiga rai nga ai.