PRANWAN LADAW (26) LABAN SHANI NA MUNGGA

Ra rawng gawng kya ai shinggyim masha ni re ai majaw, sut shai ai lam ni gaw anhte hta galoi mung nga na re. Ahkyak ai gaw tinang shut shai ai ngu ai hpe dum shai nna, shading sharai na matu shakut shaja ai lam re. 

Mara Kaba galaw ai hpe dum shai ai wa gaw, mara kaji hpe galaw nna mara nshadu ai masha hta sumsing lamu mungdan hte grau nyi chye nga ai. Hpa majaw nga yang tinang galaw ai hpe mara n-shadu ai wa gaw dai mara a mayam kaw nna lawt lu na matu nmai byin na re. Raitim mara kaba hpe galaw nna dum shai ai wa gaw lani mi na aten hta shi a shakut shaja ai hte Karai Kasang a shaman chyeju a jaw e mara kaba a mayam prat kaw nna lawt mai nga ai.

Dai majaw, tinang galaw ai mara, kaji kaba ni hpe dum shai nna Karai Kasang hpang de sit shang hkyam sa hpyi nem let mara a mayam prat kaw nna lawt lu na matu shakut shaja sa wa lu u ga.

KANING RE "KASHA" TAI NA GA AI KUN?

Galai shai ai labau hta hkik hkam dik ai gaw San Augustine a prat hta rai sai. Shi a shawng daw na prat gaw hkrup mara rai let shi a kanu, ra sharawng ai kabu gara shiga a, sharin shaga ai hpe hkan nang na hte n htan shai la nga ai. ‘Confession’ ngu ai grai mying dan hkung ai, San Augustine ka ai laika buk hta shi a ram prat aten na nga hkawm ai ladaw ni mung lawm nga ai. Asak (17) ning aten, shi kaw shang wa ai num hte ma langai mi lu sai. Kabu gara shiga gaw myit asan sha tawn da ai ni hte seng ai ngu shi hkap la ai hte, Tengman ai lam hpe shi mung tam hkawm sai. Asak (32) ning aten ladaw hta, shi gaw sak jaw ap nawng lu na matu galai shai wa sai. Shi ka ai laika ni hta na, shi a glai shai ai labau hpe kadun dawk hku tsun dan ai gaw;

“Nang hpe ngai tsawra na matu hpang hkrat ni ai, 

Moi shawng de na raitim ningnan re ai tsawm htap ai Wa e, 

Nang hpe ngai tsawra na matu hpang hkrat ni ai.

Na a shaga marawn ai n sen ngai a na pi pat de du sai, 

Na a nhtoi htoi tu nna ngai a myi pat nga ai hpe hpaw kau ya sai, 

Na a manam pyaw la ai sama hpe ngai hpang de shangun dat nna 

Ngai marawp la lu sai majaw ngai ba kalawp ni ai.

Ngai chyim yu sai hte dai hpe ngai hpang gara kaw si nngai, 

Nang ngai hpe ahtawk ya sai hte Na a ngwi pyaw ai hpe ra marin ai majaw, 

Ngai a hkum hkrang wan zawn hkru nga ai”. 

San Augustine a mabyin hpe yu yang, dai ni na la ai, ‘n sa na nngai’ nga tsun tim myit bai galai nna amu sa galaw ai kasha hte bung ai hpe mu lu ai. Kawa a myit ra sharawng ai hpe hkan galaw ai ni hte seng nna dai ni na kabu gara shiga gaw asan sha tsun dan sai. Dai kasha gaw shawng nnan e ning dang kau ai rai tim, hpang e myit malai lu let sa galaw sai. Shinggyim uhpung kaw nna ginhka hkrum ai rai tim, Yawhan Baptista a sharin shaga ai hte Karai Kasang myit ra ai hpe hkan galaw ai, kang hta sha ai ni hte shawa num ni hte shabung mai ai kasha shi rai nga ai. Kaga kasha wa chyawm, hkin jawng ni hte laika ka ai sara ni hte shabung mai nga ai. Kam sham myit grai kaba ai zawn raitim, Karai Kasang myit ra ai hpe teng sha wa n hkan galaw ma ai.

Ndai ga shadawn gaw, ningdang kau ai raitim, hpang e myit malai nna sa galaw ai kasha wa a mahkrum madup hpe myit yu shangun sai. Raitim, hpa gaw shi myit hpe galai shai shangun nna, dai galai shai ai lam gaw hpa hpe lu la ai anhte n chye lu ga ai. Shi a tsawra matsan dum chye ai myit sha rai na sai. Shi hta rawng ai kaja ai myit a majaw rai na sai. Shi gaw kawa a ra sharawng ai hpe hkan galaw na hpang hkrat ai raitim grai hpang hkrat hkra gaw n rai nga ai.

Galai shai ai lam gaw mabyin masa rai nna, hkawm sa ai hkrun lam gaw si ai kaw she shakre na sai. Masha marai mi kaw masin salum hta glai shai ai lam hkrum sha chye ai. Tim, dai kaning rai byin pru sai rai? Shawng na lahkam ngu na hta, tinang a ya aten na prat hpe kachyi mi mung n ra sharawng ai lam shawng byin ai.

Lahkawng ngu na hta kapaw kau dat ai aten rai na re. Dai mabyin masa hta hkan nna anhte hpe lama ma galaw byin hkra, wan shatu dat ya ai lam rai sai. Hpang jahtum ngu na hta sak hkrung lam ning¬nan de sa wa ai lam hta ahkyak ai amu magam hpe galaw shakut ai rai sai.

Anhte yawng gaw Mungkan ndai hta bu hkawm nga ai ni hkrai rai ga ai. Hkum tsup ai galai shai wa na de hkawm sa nga ga ai. Ya aten na tinang a prat hpe n ra sharawng ai lam nga ai kun? Madu Yesu hte grau sung ai mahku mara ai lam tawn da na myit sharawng nga ai kun? Anhte a kun dinghku masha ni hte htingbu ni hpe Madu Yesu tsawra ai zawn anhte mung tsawra na myit ga ai kun? Ningdang kau ai raitim amu galaw na matu dum hprang lu sai kasha wa zawn hkan galaw na myit nga ai kun? 

Sawn sumru mai ai lam; Karai Kasang a numhtet ga hpe hkan galaw na ngai a myit jasat gaw gara kasha hte bung nga ai rai? Dai hpe ngai kaning ngu hkam sha ai kun?

PRANWAN LADAW (26) LABAN SHANI NA CHYUM LAIKA

PRAN WAN LADAW HTA LABAN 26

1st Oct, 2017

CHYUM MUNGGA DAW 1

Ezekela 18:25-28

Ya hti na gaw myihtoi Ezekela a laika hta na rai nga ai.

Nanhte gaw Madu jeyang ai lam ding ai n rai, nga nna tsun myit hka: Israela dap e madat mara u! Nye a lam ding nga ai n rai ni? Nanhte a lam mahtang n ding nga ai n rai malit ni?

Dinghpring ai wa htak mat nna mara amu galaw yang, dai amu majaw shi si na ra ai. Shi galaw yu ai mara hte shi si na ra ai. Tara n lang ai wa gaw tara n lang ai hku kau da nna, tara hta tengman ai hku hkan yang, shi gaw tinang asak mawai la lu na ra ai. Shi galaw yu ai, tawt lai ai mara mahkra sumru yu nna kau da ai majaw, shi hkrak hkrung nga na ra ai. Shi si na n rai.

Ya hti ai gaw Karai Kasang a mungga rai nga ai.

CHYUM MUNGG DAW 2

Hpilipi 2:1-11

Ya hti na gaw Hpilipi ni kaw San Pawlu shagun dat ai laika hta na rai nga ai.

Hkristu hta hkrung nga ai majaw n-gun nga myit dai re. Shi a tsawra myit nanhte hpe shalan shabran ya nga ai. Wenyi hta nanhte kanawn mazum nga myit dai hte, shada da n-gaw n wai, matsan dum masin machyi hkat nga lu myit dai. Nanhte myit hkrum mang rum nna, tsawra myit langai sha hta jawm nga myit yang, ngai kabu dik ni ai. Ga li ga law, kaman lila shakawng ai, hpa mung n galaw ai sha myit nem nga let, tinang hkum hpe n rai, manang wa hpe shagrau nga mu. Tinang hte seng ai sha n rai, gale hte seng ai hpe mung myit yu nga myit ga.

Hkristu a myit nan nanhte hta rawng nga myit ga. Shi gaw Karai Kasang a asam hta pra nga tim, Karai Kasang hte bung nga na shingjawng kashun na myit n nga wu ai. Tinang hkum hpe shagawm kau nna, mayam atai la let, shinggyim masha raw tai wa sai. Masha raw rai nna, tinang hkum shagrit kau nhtawm,si ai du hkra madat mara nga ai. Dik nna, udang hta si ai du hkra madat mara nga ai. Lamu lahta tang, dinghta tsang, hte katsan ga na ni yawng Yesu a mying hte hputdi nna, Hkristu gaw Madu rai nga ai, nga nna, Kawa Karai Kasang a hpung shingkang a matu shagrau kajai gumhkawng na; Karai Kasang gaw shi hpe shagrau nna, mying shingteng yawng hta grau ai mying jaw da wu ai, rai nga ai.

Ya hti na gaw Karai Kasang a mungga rai nga ai.

KABU GARA SHIGA

Mahte 21:28-32 

Ya hti na gaw Mahte a laika hta na Kabu Gara Shiga rai nga ai. 

Marai langai mi shadang sha lahkawng lu ai. Kasha alat hpang de sa nna, sha e, dai ni tsabyi sun de bungli sa galaw su! ngu wu ai. Kasha gaw, sa na nngai Madu e, nga tim n sa mat ai. Kasha shadoi kaw mung dai hte maren sa tsun wu ai. Shi gaw Ngai n sa na, nngai nga timung myit malai nna sa ai. Dai yan hta na kadai mahtang kawa a myit hkan shatup lu a ta? ngu san mu ai. Shanhte gaw, Kasha shadoi rai nga ai, ngu mu ai. Yesu gaw, Ngai nanhte hpe hkrak tsun made ga; kang hta ai ni hte shawa num ni, nanhte a shawng e, Karai Kasang a mungdan hta shang shang rai nga ma ai. Yawhan gaw dinghpring ai lam hpe hkan let, nanhte kaw sa du sai, raitim, nanhte shi hpe n kam mu ai. Kang hta ai ni hte shawa num ni chyawm gaw shi hpe kam sham ma ai. Nanhte gaw dai hpe mu timung, shi hpe kam sham na, myit malai bai lu na myit dai n rai. 

Ya hti ai gaw Madu a Kabu Gara shiga rai nga ai.

PRANWAN LADAW (25) LABAN SHANI NA MUNGGA

Dai ni na Kabu Gara Shiga hta Karai Kasang a shadawn ndang ai tsawra myit hte shinggyim masha ni a myit jasat hpe sabyi sun madu hte shi a shangun masha ni hpe ga shadawn hku nna sang lang dan ai hpe mu lu ai. Sabyi sun madu gaw shangun masha ni hpe amu galaw ai aten nbung ai rai tim yawng hpe maren mara manu jahpu jaw ya sai re. Karai Kasang shinggyim masha ni hpe tsawra ai myit gaw shinggyim masha ni kade daram n-gun atsam lu dat ai ngu ai hta madung nda ai sha yawng hpe rap ra ai hte tsawra lu ai Wa rai nga ai.

Raitim mung, shinggyim masha ni a myit jasat hta tinang hte gingdan ai hpe lu la sai raitim, manang wa shi lu ging ai hta lai jan nna lu la ai shaloi manawn masham ai myit rawng nna manang wa hkam la lu ai shaman chyeju hpe ndawng n-yawt ai myit rawng chye ai hpe mung dai ni na Kabu Gara Shiga gaw shadum jahprang ya nga ai.

Tinang hte manaw manang ni hkam la lu sai shaman chyeju ni hpe dum nna Karai Kasang hpe chyeju dum ai sha n-ga, masha hkum ngau shagu hpe mung tinggyeng myit nrawng ai sha maren mara tsawra lu na matu shakut shaja sa wa ga.

MATSAN DUM N JIN AI KARAI KASANG

Dai ni na kabu gara shiga hpe hti yu ai shaloi, hpa hpe myit yu na kun atsawm n chye lu ai. Shawng nnan hta yu yang, sabyi sun madu wa, ‘N Tara ai’ ngu lu na nhten. Masha n kau mi shani tup bungli galaw ai rai tim, hkying hkum mi sha bungli galaw ai ni hte maren, shabrai lu la ai. Rai tim bai myit yu yang, dai shabrai hkap la na matu sun madu wa hte shawng jahkrup ngut da sai hpe mu lu ai. Dai majaw, myit hkrum da sai hpe jaw ai rai nna, n tara ai lam gaw n nga na sai. Teng sha wa, shi gaw grai matsan dum chye ai wa rai nga ai. Hkying hkum mi sha amu bungli galaw sai ni hpe mung, lani mi na shabri shabrai shi jaw nu ai. Anhte tup hkrak n chye lu ai rai tim, hkying hkum mi sha bungli sa du galaw ai ni gaw, asak kaba nna, hkum n tai nna, jan ja prang hta shani tup bungli nan nan n lu galaw ai ni mung mai byin ai. Dai hpe sun madu wa mung chye ya na sai nhten.

Dai zawn lama rai yang, sun madu wa kade daram matsan dum chye ai hte mai kaja la ai hpe mu lu na re. Bungli galaw sha ai masha ni hpe garum mayu ai hte lani mi na matu shabrai jaw sai.

Lam maga mi hku nna mung anhte naw yu yu ga. Shani tup bungli galaw sai ni shabrai grau law lu mayu nna aput angun nga ai shaloi, sun madu wa gaw, ‘nang hte seng ai hpe la wa su’ ngu dat ai. Tsun mayu ai gaw, tinang hkap la lu ai hpe myit dik nga u, ngu ai re.

Myit dik ai ngu ai ga hpe yu yang, ngwi pyaw ai lam a npawt, ga si ngu mu lu na re. Dai majaw anhte ni, ‘myit dik myit pyaw lu ai’ ngu tsun chye ga ai. Hpang jahtum daw de she bungli shang galaw ai ni chyawm gaw grau nna myit dik lu na rai sai. Sabyin sun madu wa hpe mung grau nna chyeju dum taw na sai.

Karai Kasang anhte marai hkum shagu hpe tsawra la nga ai hte shani shagu shaman ya nga ai. Hkam la lu ai chyeju n lang hte a matu Karai Kasang hpe chyeju dum nga ga! Teng sha wa, ndai lam gaw, anhte hpe ‘myit dik myit pyaw shangun na re.

PRANWAN LADAW (25) LABAN SHANI NA CHYUM LAIKA

PRAN WAN LADAW HTA LABAN 25 

24th Sep , 2017 

CHYUM MUNGGA DAW 1

Esaia 55:6-9

Ya hti na gaw myihtoi Esaia a laika hta na rai nga ai. 

Madu hpe mu lu ai aten e, shi hpe tam mu! Shi naw ni nga yang shi hpe hpyi shaga mu! Tara n lang ai wa gaw, tinang lam hpe, n hkru ai wa gaw tinang a myit lam hpe, kau da nna, Madu hpang de kayin wa u ga. Madu gaw dai wa hpe matsan dum na ra ai. Anhte a Karai Kasang hpang de kayin wa u ga. Shi mara hpe htum hkra raw dat kau ya na ra ai. Madu tsun ai, Ngai myit mang ai lam, nanhte myit mang ai hku n rai. Nanhte a lam ni, nye a lam zawn n rai, nga ai. Lamu gaw ga hta tsaw nga ai. Nye a lam ni mung, nanhte a lam ni hta, grau tsaw nga ai, nga ai. 

Ya hti ai gaw Karai Kasang a mungga rai nga ai.

CHYUM MUNGGA DAW 2

Hpilipi 1:20- 24. 27

Ya hti na gaw Hpilipi ni hpang de San Pawlu shagun dat ai laika hta na rai nga ai. 

Nanhte a akyu hpyi ai hte Yesu Hkristu a Wenyi a lanawn ya ai a marang e, ndai lam mung nye a hkye hkrang la ai lam tai na re ai, ngai chye nga nngai. Kaning rai me law, Ngai asak hkrung ai gaw Hkristu nan rai nga ai. Si wa jang mung amyat rai nga ai. Raitim hkum hkrang hta naw hkrung nga yang, nye a bungli hta akyu kaja pru nga jang lata la na pyi yak rai nga li ai. Hkristu hte rau rai mat wa na ngai ra nngai. Grau kaja nga li ai. Hkum hkrang hte naw hkrung nga jang gaw, nanhte a matu grau akyu rai nga ai. Dai hta n-ga nanhte a arawn alai Hkristu hta Kabu Gara Shiga hte gingdan nga u ga. Shaloi, ngai nanhte kaw sa du hkrum ai raitim, tsan gang nga raitim, Wenyi langai sha hte lahpran tsap nga mu. Hkrsitu a Kabu Gara Shiga hte bung pre hkra rai nga mu.

Ya hti ai gaw Karai Kasang a mungga rai nga ai.

KABU GARA SHIGA

Mahte 20:1-16

Ya hti na gaw Mahte a laika hta na Kabu Gara Shiga rai nga ai. 

Lamu mungdan gaw, tsabyi sun hta amu galaw masha saw bang na, jahpawt jau pru sa wa ai nta madu hte bung nga ai. Lani mi gumhpraw lap mi jaw na hku, amu galaw ai ni hte bawng jahkut  nhtawm tsabyi sun de shangun dat mu ai. Ahkying masum daram hta shi pru sa nna, gat hkan kaman nga ai masha kau mi hpe mu hkrup yang, nanhte dai sun de sa wa masu, ging dan ai hku jaw na made ai, ngu tsun mu ai. Shanhte mung, sa wa ma ai. Ahkying kru hte jahku hkan mung pru sa nna, dai hku bai di wu ai. Ahkying shi langai hta pru sa wa nna, tsap nga ai masha ni hpe mu jang, nanhte hpa rai nang e kaman tsap nga myit ta? ngu san mu ai. Shanhte gaw, kadai mung anhte hpe n saw myi ai, ngu mu ai. Shi gaw, nanhte mung sun de sa masu ngu mu ai. Shana de, sun madu gaw, amu galaw ai ni hpe shaga la nhtawm, hpang jahtum shang ai ni kaw nna shawng nnan shang ai ni gu hkra, shabrai jaw u, ngu nna shi a hpareng wa hpe tsun da wu ai. 

Shaloi ahkying shi langai e shang ai ni sa nna gumhpraw lap gu hkra la ma ai. Shawng shang ai ni du yang, grau lu la na myit nawn nga ma ai. Raitim, shanhte mung lap hpra sha lu shajang ma ai. Shing re ai majaw, shanhte gaw, hpang jahtum shang ai ni ndai ni gaw hkying hkum mi sha galaw ma ai. Anhte mahtang, jan ja hkam let, dai ni tup galaw ga ai mi, maren sha lu ai hku di ndai, ngu nta madu hpe put ngun ma ai. Shi gaw, shanhte na  langai mi hpe, jinghku wa e, ngai nang hpe n maw sha ai. Gumhpraw  lap mi jaw na ngu an bawng hkut nna sa ndai n rai ni? Nang hte seng ai hpe la u. Hpang shang ai wa hpe nang hte maren jaw na ngai ra nngai. Nye arai hpe ngai ra ai hku n mai di a ni? Ngai kaja ai hku galaw ai hte nang myi akrawn lam nga a ni? ngu htan wu ai. Dai hte maren hpang hkrat ai ni shawng na mara ai. Shawng ai ni hpang hkrat na mara ai, ngu wu ai. 

Ya hti ai gaw Madu a Kabu Gara shiga rai nga ai.

PRANWAN LADAW (24) LABAN SHANI NA MUNGGA

Dai ni, na la lu ai chyum mungga ni hta manang wa hpe mara raw dat chye na matu shadum jahprang ya nga ai hpa majaw nga yang, nhkum ntsup ai ni rai ga ai majaw shada da shut shai ai lam ni galoi mung nga na re. Ndai zawn shut shai wa ai shaloi shada da mara raw dat ya lu na matu gaw anhte marai hkum shagu a matu ahkyak nga ai.

Anhte manang wa hpe shut shai wa ai shaloi, tinang a mara hpe dum shai nna manang wa kaw nna mara raw dat ya na hpe hpyi lajin ra na re. Dai rai yang she shada da si mani ai hte bai ganawn mazum lu na re. Bai nna, manang wa tinang hpe shut shai ai shaloi manang wa nhpyi nem ai rai tim, manang wa hpe mara raw dat lu ai wa gaw shi a myit masin kraw lawang hta hki ba lit li ai hpe shaprai shamat kau lu na re.

Dai rai yang, dai ni na chyum mungga ni shadum jahprang ai hte maren mara raw dat ya na matu hpyi nem nna shagrit shanem ai myit hpe anhte lu la ai sha n-ga anhte hpe shut hpyit ai ni hpe mung mara raw dat ya lu ai chyeju ni hpe Wa Karai Kasang kaw nna hkam la lu u ga.

KADE LANG MARA DAT YA NA RAI TA?

Dai ni na kabu gara shiga hpe madat la ai marang e anhte yawng hta dum hprang la lu ai lam, n chyi n mu nga ai lam ni byin pru na sai. Madu Yesu gaw, “sanit shi e htam sanit lang du hkra” mara raw ya mai ai lam tsun sharin sai. Anhte sak prat htum ai aten du hkra galaw na yak la nga ai. Matai bai htang na matu anhte shinggyim myit hta rawng nga ai. Dai myit jasat hpe byeng la lu na matu Madu gaw, “mara n dat ya hkraw ai mayam a gashadawn” hte anhte hpe sharin shaga sai.

Lama na, hka yawng rau kau ya ai hkawhkam wa a myit masa gaw grai kaja teng ai lam rai yang, hka raw dat kau ya hkrum ai rai tim, (shi lu la ra ai hka loi mi hpe ra mayu ai) dai mayam wa a lam gaw yawn hpa kaba rai nga sai. Shi gaw tsawra matsan dum chye ai hkawhkam wa a kyang lai len hpe yu la na ning dang kau sai. Dai majaw, shi gaw, ‘akyu n rawng ai yamti’ rai mat sai. Dai mayam hpe shi galaw ai amu hte dat dat kau dat ai rai yang,  hkawhkam wa arawng n lu, kaya hpa she rai na sai. Dai majaw, dai akyu n rawng ai mayam wa hpe htawng hta e bang da wu ai.

Ndai ga shadawn gaw kasa Mahte ka da ai Madu Yesu a sharin shaga ai lam hta na ‘uhpung uhpawng hte seng ai lam’ (Mt 18) hta na rai nga ai. Kasa Mahte kaw nna sharin ya mayu ai gaw, Uhpung Uhpawng kata, grau nna Hkristan ni a lapran shada da  kaning rai galaw, daw ra ai lam rai nga ai. Karai Kasang anhte marai hkum shagu hpe gawn lajang ai zawn anhte shada da mung galaw na ra ang ai. Kam sham ai ni anhte, mara a matu Madu Yesu a Sai hte raw dat kau ya hkrum sai anhte ni shada da a mara hpe mung masin salum kata na raw dat kau na ra ga ai.

Rai yang, gasan langai mi nga ai gaw, anhte a hpu nau wa hpe kade lang mara raw dat kau ya ai lam n rai, kaning rai mara raw dat kau ai lam rai sai. ‘Sanit shi e htam sanit lang’ mi nga tim, lam masum hpe ndai kaw mada yu ga!

Langai; nang chyu hkra machyi hkrum ai ngu n myit la ga. Kaga maga na ni hpe mung nang kaw nna hkra machyi shangun sai. Nang mung mara raw kau ya na matu ra kadawn nga ai. Lahkawng: Na a hkum hpe laja lana hkum myit la u, anhte yawng gaw mayam sha rai nga ai. Mara n dat ya chye ai mayam wa sha shi hkum shi grai ahkyak la ai rai nna dai gaw shaman chyeju kaw nna shi hpe dawm kau ya sai. Masum; Mara raw ya u! Galaw ngut ai hte rau, ngwi pyaw kabu gara ai hpe hkam sha nga ga!

Ningrum ningtau jan marai mi, shi a madu wa kaga num hte shut ai hpe sa mu hkrup la wu ai. Shi mara raw ya let madu wa hpe n ta de bai woi wa ai. Rai tim, madu wa gaw shi a ningrum ningtau jan dai mara dingsa hpe sha atsun nga ai majaw mau nga ai. Dai zawn atsun nga ai hpe n hkam sharang lu ai majaw, "nang raw kau sai dai mara hpe hpa majaw aten shagu hta bai tsun tsun rai nga a ta?" ngu nna san yu wu ai. Madu jan mung, ‘Re, nang hpe ngai mara dat kau ya ai hpe nang n malap kau u ga, ngai dai ga hpe atsun nga ai re’ da!!!

Sawn sumru mai ai lam; Nang a prat hta mara raw dat kau ya n lu ai lam kade daram nga ai kun? Mara raw dat kau ya tim, malap n lu ai sha galoi mung adum nga ai kun? Mara raw dat ya hkrum ai shaloi na hkam sha lam hpe bai sawn sumru yu ga!

PRANWAN LADAW (24) LABAN SHANI NA CHYUM LAIKA

PRAN WAN LADAW HTA LABAN 24

17th Sep, 2017

CHYUM MUNGGA DAW 1

Sirak 27:30. 28:1-7

Ya hti na gaw Sirak a laika hta na rai nga ai.

Sindawng masin pawt ai gaw, matsat shabat rai nga ai. Rai timung mara kap ai wa dai hta ahpum kap nga ai. Matai dawp ai ni gaw, Madu a matai hkam sha na maru ai. Madu mahtang shanhte a mara ni hpe azin ayang matsing da ya ai. Htingbu wa a shut ai hpe hkyamsa ya u. Shaloi nang hpyi yang, na a mara hpe mung hkyamsa ya na re. Htingbu wa hpe myit n si ai wa; Madu shamai ya ai hpe myit mada lu na kun? Manang ni hpe matsan n chye dum ai wa; tinang a mara ni a matu hkyamsa hpyi mai na kun? 

Tinang shinggyim masha wa, myit n si hkraw ai rai yang; shi a mara ni hpe kadai dat kau ya na rai ta? Jahtum ten hpe dum nna, hpyen myit kau da u. Si, hten bya lam hpe dum nna mara koi u! Tara lam ni hpe dum nna, htingbu wa hpe hkum n dawng et; Tsaw Htum ai wa a ga shaka hpe dum nna, mara hkyamsa nga u!

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 14:7-9

Ya hti na gaw Roma ni kaw San Pawlu shagun dat ai laika hta na rai nga ai.

Anhte hta kadai rai timung, tinang hkum a matu mara sha hkrung nga ai n rai. Kadai rai timung tinang hkum a matu mara sha si wa ai n rai. Hkrung nga yang gaw, Madu a lam anhte hkrung nga ga ai. Si wa yang mung Madu a lam anhte si wa ga ai. Hkrung timung, si timung, Madu hte anhte seng nga ga ai. Si mat ai ni hte hkrung nga ai ni hpe Madu nga lu hkra, Hkristu gaw si hkam nna bai hkrung rawt wa sai.

Ya hti ai gaw Karai Kasang a mungga rai nga ai.

KABU GARA SHIGA

Mahte 18:21-35

Ya hti na gaw Mahte a laika hta na Kabu Gara Shiga rai nga ai.

Petru Yesu kaw sit sa nna, Madu e, nye hpu nau wa ngai hpe bai shut shut rai yang gaw ngai kade lang, shi a mara raw kau nga lu na rai ta? Sanit lang du hkra rai ni? ngu wu ai. Yesu gaw, sanit lang du hkra sha n rai; sanit shi e htam sanit lang du hkra mai rai nga ai, ngai nang hpe tsun de ai, ngu wu ai. Dai rai nna, lamu mungdan gaw, shi a mayam ni hpe jahpan la mayu ai hkawhkam langai mi hte bung nga ai. Ga jahpan la yang, gumhpraw mun mi hka kap ai masha langai mi hpe, shi kaw woi sa mu ai. Hka wa na hpa mung shi n lu ai majaw shi hkum, shi a madu jan, kasha ni mung, shi lu malu yawng hte hpe mung, dut kau nna, hka wa u ga, nga nna shi a madu hkang da nga ai.

Mayam wa gaw, lahput hput di da nna, shi hpe nawku let, Ngai hpe matsan naw dum e law. Ngai mahkra nang hpe wa na de ai, ngu wu ai. Mayam madu wa mung shi hpe matsan dum nna dat dat wu ai. Hka mung raw kau ya ai.

Dai mayam wa pru nna, shi kaw peksan latsa sha hka kapai mayam manang langai mi hpe hkrum jang, shi hpe dun la nna mung, lahput hput di nna, ngai hpe matsan dum e law! Ngai nang hpe wa na de ai, ngu hpyi nem wu ai. Shi mahtang n hkraw ai. Hka wa kau ai aten du hkra htawng hta jahkrat da wu ai. Dai hpe manang mayam ni mu jang, shanhte grai myit yu machyi ma ai. Byin ai lam shanhte a madu hpe shana da mu ai. Shi a madu gaw shi hpe dai jang shaga la nna, N hkru ai mayam e, nang ngai hpe hpyi nem ai majaw, na a hka yawng ngai raw kau ya sade ai. 33 Ngai nang hpe matsan dum ai hte maren na mayam manang hpe matsan dum mai ndai n rai ni? ngu wu ai. Shi a madu mung masin pawt nna, hka wa tawng ai du hkra, pyada ni a lata de ap ya dat wu ai. Nanhte kadai rai tim, tinang hpu nau wa a mara hpe myit masin yawng hte n raw kau myit yang gaw, lamu na nye Wa mung, nanhte hpe tai na marin dai, ngu wu ai.

Ya hti ai gaw Madu a Kabu Gara shiga rai nga ai.

PRANWAN LADAW (23) LABAN SHANI NA MUNGGA

Karai Kasang gaw shinggyim masha hpe tsawra ai majaw hpan tawn da nna shani shana ra nga ai chyeju ni hpe jaw ya nga ai. Dai rai yang Karai Kasang a tsawra myit kaba a jaw e hpan da hkrum ai shinggyim masha ni mung tsawra myit hta mahta nna sakhkrung nga sa ra na re.

Dai ni na Karai Kasang a mungga ni hta tsawra myit hpe madun dan na matu shadum jahprang da sai re. Grau nna tinang hte ganawn mazum ai manaw manang ni shut shai ai aten hta shut shai ai lam a majaw mara matut nna nbyin na matu hte shada da prinem ai hpe lu la na matu shakut ra na hpe mung shadum da sai re.

Nhkum tsup ai shinggyim masha re ai majaw shut shai ai lam anhte hta law law nga wa ai aten ahkying hta tsawra myit hpe madung da nna shada da shading sharai grum shingtau lu na matu shakut shaja sa wa ga.

HPU NAU MYIT HTE SHARAI HKAT GA

Jau tai jawng de rai n shang shi ai shawng shaning hta e, motorcycle dingsa langai mi ngai mari la ai. Rai timung, Ah Wa gaw ngai hpe shi a mawdaw lang na ahkang jaw ai majaw, motorcycle nau n jawn byin ai. Dai majaw, ngai na manang wa hpe Dollar 250 hte dut jaw kau ai. Gumhpraw jaw na re ngu ala yu ai raitim, shi ngai hpe galoi mung n jaw mat sai. An lahkawng a lapran pawt hkat ai lam n byin shangun mayu ai majaw, shi hpe ading tawk gaw n tsun yu ai. Ya aten dai lam hpe ngai bai myit yu ai rai yang, ngai a mara re hpe asan sha mu lu sai. Ngai hku nna atsam dat let gumhpraw hpe ading tawk hpyi ang sai rai nga ai.

Dai ni na kabu gara shiga hta Madu Yesu tsun ai ndai lam rai nga ai. “na n hpu n nau wa nang hpe shut hpyit kau yang gaw, shi hpang de sa nhtawm, nan lahkawng hkrai chyaw rai di nna, shi a mara hpe madun u” nga Madu Yesu tsun da nga ai hte shi Madu nan dai zawn galaw sai. Shi myit n hkrum ai lam nga yang, dai wa hpe nan shi Madu tsun nga ai. Pharishe ni hte tsun shaga hkat ai hta n dai lam ni hpe anhte law law lang na yu ga ai.

Ndai kabu gara shiga a shawng daw hta, mat mat ai sagu kasha a gashadawn hpe anhte na lu ga ai. “nanhte kaning ngu myit da mu ta? masha langai ngai sagu latsa lu nna, dai hta na langai dam mat yang, dai jahku shi jahku hpe bum lang hkan e shi tawn da nhtawm, dam mat ai hpe sa tam ga ai, n rai ni? Dai hte maren, ndai ma kaji langai mi hpe pyi jahten kau ai hkrum na gaw, sumsing lamu hta nga ai nye Wa gaw, n hkraw nga ai. (Mt 18:12, 14).

Ndai gashadawn ngut ai hte nan, dai ni hti ai mungga, hpu nau myit hte sharai hkat na lam, hpe hti lu sai. Dai hpang, “Madu e, nye hpu nau wa ngai hpe bai shut shut rai yang gaw, ngai kade lang shi a mara raw kau nga lu na rai ta? sanit lang du hkra rai ni? Ngu wu ai. Yesu gaw, sanit lang du hkra sha n rai, sanit shi e htam sanit lang du hkra, mai rai nga ai, ngai nang hpe tsun de ai, ngu nna Petru san ai hpe Madu Yesu htai ya ai hpe anhte hti lu na re. (Mt 18:21-22)

Ndai hta anhte mu mada ai gaw, dai ni na mungga ‘hpu nau myit hte sharai hkat na lam’ hpe mara dat ya na lam ka da ai mungga lahkawng hte kasa Mahte ka shinggrup da ai hpe mu lu ai. Tsun dan mayu ai lam gaw, marai rai anhte hpe shut shai wa ai rai yang, shi hpe shawng anhte si mani ai hte tsun shaga yu na, dai hpang shi hpe mara raw ya na lam rai sai.

Hpa majaw nga yang, masha ni hpe si mani ai hte tsun shaga na, mara raw ya na lam gaw n loi la nga ai. Karai Kasang a garum la ai hpe anhte ra kadawn ga ai. Dai re majaw, si mani ai hte tsun shaga chye na, dingman ai hte nga pra nna anhte myit kraw kata kaw na nan mara raw ya lu na matu ra nga ai shaman chyeju ni hpe wa Karai Kasang kaw nna hpyi la ga!

PRANWAN LADAW (23) LABAN SHANI NA CHYUM LAIKA

PRAN WAN LADAW HTA LABAN 23

10th Sep, 2017

CHYUM MUNGGA DAW 1

Ezekela 33:7-9 

Ya hti na gaw myihtoi Ezekela a laika hta na rai nga ai.

Masha kasha e, Israela dap ntsa e sin ai wa tai na matu, ngai nang hpe san da ni ai. Nye a n-gup ga madat nna, nye a ga hte shanhte hpe shadum jahprang u; Ngai gaw tara n lang ai wa hpe, Tara n lang ai wa e, nang hkrak si lu na ndai, ngu nna tsun yang, nang dai wa hpe, shi a lam na nhtang wa hkra, n shadum yang, tara n lang ai wa tinang a mara hta si wa timung, shi a sai hpe na lata na ngai hpyi la na nnagi. Tara n lang ai wa hpe shi a lam na yang, dai wa gaw shi a mara hta si wa timung, nang gaw na a asak hpe hkye la nu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

Roma 13:8-10 

Ya hti na gaw Roma ni kaw San Pawlu shagun dat ai laika hta na rai nga ai. 

Shada da tsawra ai hta kaga, kadai hte mung hpa hka hkum kap mu. Masha kaga hpe tsawra ai gaw jep ai tara hpe shatup ngut nu ai. Masha num hkum shaw, masha hkum sat, hkum lagu, myit hkum marin, nga ai hte htet da ai ga kaga naw nga ayang gaw, dai hte gaw, Na a htingbu wa hpe na a hkum hte maren nang tsawra lu na ndai, nga ai ga langai sha hte gumhpawn nga ai. Tsawra ai gaw htingbu wa hpe n hkru n hkra galaw yu ai n rai. Dai rai, tsawra ai gaw jep ai tara a shatup shadik ai lam rai nga ai. 

Ya hti ai gaw Karai Kasang a mungga rai nga ai.

KABU GARA SHIGA

Mahte 18:15-20

Ya hti na gaw Mahte a laika hta na Kabu Gara Shiga rai nga ai. 

Na nhpu nnau wa nang hpe shut hpyit kau yang, shi hpang de sa nhtawm, nan lahkawng hkrai chyaw rainna, shi a mara hpe madun u. Na a ga madat la yang gaw, nhpu nnau wa hpe mawai la lu nu ai. Na a ga n madat la yang gaw, marai langai lahkawng hpe naw shaga la nna, hpa hku hpa lam rai timung, sakse lahkawng masum a n-gup ga hte daw dan ya mu. Shanhte a ga n madat hkraw yang gaw, dai Hpung hpe sa shana ya mu. Dai Hpung hpe mung n madat hkraw yang gaw, tara maigan wa hte kang hta ai wa zawn na a man e, shi rai u ga. Ngai hkrak tsun made ga, Dinghta ga hta nanhte gyit da mada gaw, lamu hta mung gyit da ai hkrum na mara ai. Dinghta ga hta nanhte raw maraw gaw, lamu hta mung raw kau hkrum na mara ai. 19 Nanhte hpe tsun made ga, Nanhte hta na marai lahkawng dinghta ga hta e, myit hkrum da ai hte hpa lam hpe mung hpyi yang gaw, lamu na nye Wa gaw shan a matu hpyi ai lam shatup ya na mu ai. 20 Marai lahkawng masum, nye a mying hpe gang nna, zuphpawng nga ma yang, dai yang shanhte a ka-ang e, ngai mung lawm nga nngai, ngu mu ai. 

Ya hti ai gaw Madu a Kabu Gara shiga rai nga ai.