DU SA LADAW LABAN (1) NA MUNGGA

Dai ni na laban nhtoi gaw shaning (A) htum nna shaning (B) de shang ai shawng nna shani na nhtoi rai nga ai. Nawku daw jau ai lamang hte seng ai shata hti laika hta shaning nnan nhtoi rai nga ai. Shaning nnan hta anhte ni tinang a hkum hpe masam maram yu nna lai di na shaning ting hta Karai Kasang hte rau sakhkrung lu na matu n-gun la kyu hpyi nna myit masin nnan, hkum hkrang nnan hte hkawm sa lu na matu hkyen lajang ai aten mung rai nga ai.

Shaning nnan nhtoi hpang ai hte maren, ndai du sa ai ladaw hta lahkawng lang bai du sa na (hpang jahtum na aten hta) Hkristu Madu hpe hkap tau la lu na matu shadum ai sha n-ga, lai wa sai shaning (2000) ning jan hta shangai wa ai Madu Yesu hpe kalang mi bai anhte a myit masin hta hkap tau la lu na matu shadum ya ai hte hkyen lajang na matu jaw da ai aten ahkying mung re.

Ndai Hkrismat Poi hta Madu Yesu hpe gingdan ai hte anhte a myit masin salum, kun dinghku hte wuhpung wuhpawng hta hkap tau la lu na matu shakut shaja ai hte maren lahkawng lang bai du sa na Madu Yesu hpe hkap tau la lu na matu shajin shachyip lu na matu akyu hpyi shakut let hkyen lajang sa wa lu u ga.

SADI MAJA NGA MU

Shana mayu ai lam; Tsaw htum ai Karai Kasang gaw, shi a kasha mungkan ga de du sa wa ia ten hta, na a hkap tau la ai hpe ra sharawng nga ai. Ning shawng jaw n hkrum ai ndai mabyin gaw kabu gara ai, shagrau sha-a poi shara lahkawng hta byin shangun ai. Sumsing lamu hte ginding aga! Ndai mabyin yaw December (25) ya hta byin na rai nna, dai poi kaba a matu, nang gaw du na ra ai laban bat mali hkyen lajang na matu lajin hkrum sai.

Myit mada ala dingda nga ai ladaw: du sa ladaw kaw nna hkap tau la ga ai. Dai hta lai, hpang na shata ting gaw dinghku kata na lamang ni rai sai. Aten ahkying hpe bai shagrau aw law chye ai ni anhte bai rai sana ga ai. Kumhpaw kumhpa ni mari ga ai. Dum nta ni hpe shatsawm shakya ga ai. Lu sha kaja ni lajang ga ai.

Dai zawn rai galaw lajang ai yawng hta, ahkyak ai gaw Madu Yesu shi hkum nan anhte kaw du sa na lam rai nga ai. Dai ni na kabu gara shiga anhte hpe tsun ai zawn Madu galoi du sa na hpe anhte n chye ai rai tim, shi du sa na lam gasadi jaw da sai. Ya aten hta chyawm, Madu Yesu gaw anhte a salum hpe matu mahkai na matu lam yan n-nan tam nga ai. Ya aten, Madu gaw anhte a matu laklai ai shaman chyeju kumhpa hpe lajang nga ai. Dai kumhpa ni hpe, shi hpang de sa let myit masin hpaw tawn da ai ni hpe jaw na lam, du sa ladaw hte Hkrismat gaw tsun dan nga ai.

Kaning re ai kumhpa anhte hpe Madu jaw na kun? Kawa Karai a anhte a ntsa tawra myit hpe bai shadum ya ai. Prat a mayak manghkang ni hpe hkam jan jin na myit mada shara jaw ya ai. Na a tsawra manaw manang ni hpe garan kachyan na matu ningmu nnan, hpaji nnan lu la na re, Shi Madu a lagaw nhpang hta, na a mara, shut kata ai lam npe sa du tawn da ai rai yang, shut hpyit mara a majaw hkam sha nga ai kaw nna lawt lam lu na re. Ndai yawng hta grau nna, Shi Madu tsun ai hte maren, Shi Madu a lata lahpan hta anhte hpe mara tawn da ai majaw, ngai pyaw simsa ai, kabu gara ai chyeju anhte lu la na re. Dai majaw, Madu a hpyi lajin saw saga ai hpe dai ni jang hkal la ga. Madu Yesu hte Shi a kumhpa hpe hkap la na matu atsam yawng hte jin jin rai nga ga. Shani shagu akyu hpyi ai hte chyum laika hti ai hta aten grau bai jaw ga. Mara raw Sakramentu hpe hkam la na shakut ai marang e, Madu a shaman kumhpa hpe hkam la na pat shingdang ai lam ni kaw nna lawt na re.

Madu Yesu gaw nang hte rau kabu pyaw nga ai. Jin jin rai na matu shata mi tup nang hpe aten jaw da sai. Lani hte lani, lahkam mi hte lahkam mi, Madu hte ni htep wa ai rai nna, Shi madu nang hpang de ni htep wa sai ngu nna, hkam sha ga!

Madu Yesu e, Na a saw shaga ai hpe ngai hkap la nngai. Na a wenyi, Na a chyeju hte, Nang Madu du sa wa ai, shangai nhtoi hta jin jin rai nga na matu ngai hpe garum ya e.

DU SA LADAW LABAN (1)I NA CHYUM LAIKA

DUSA LADAW LABAN (1)

3rd December, 2017

CHYUM LAIKA DAW 1

Esa 63:16-17, 64:1,3-8

Ya hti na gaw myihtoi Esaia a Laika hta na rai nga ai.

Madu e, nang nan anhte a Wa rai nga ai; moi chyaloi nhkoi kaw nna, na a mying nsang hpe hkye hkrang la ai wa ngu tsun nga ai. Madu e, Na a lam kaw nna anhte hpe hpa majaw shadam n ta? Nang hpe n hkrit hkungga hkra, anhte a myit masin hpe hpa majaw shaja ya nta? Na a ali ama ni ngu ai, Na a Sali wunli amyu ni a matu bai wa rit. Madu e, Sumsing lamu hpe hpaw malang nna, yu wa rit law. Nang du sa jang Na a man e bum ni ashun gari masai. Nang hpe myit mada ai wa a matu, Nang zawn chyeju madun ai Karai Kasang kaga hpe, kadai mung nna yu ai hte myit hte mung n mu yu ai. Dinghpring ai lam galaw nna, Na a lam  dum ai nihpe, Nang lam madun dan ndai. Anhte shut hpyit ai shaloi, Nang pawt sindawng nit dai: anhte na na wa Nang hpe gumlau saga ai. Anhte yawng nsan nseng ai wa zawn tai wa saga ai: anhte a dinghpring ai lam mahkra, agang chyalang re ai hpun nba hte bung nga ai. Anhte yawng namlap zawn nyip mat nna, anhte a shut hpyi ai gaw nbung zawn anhte hpe ahpawt kau mani ai.

Na a mying nsang hpe shaga ai wa hte, Nang hpe manoi manat na matu tinang a hkum hpe shadut ai wa kadai mung nnga ai: hpa majaw nga yang, Nang gaw na a myiman hpe makoi kau nna, anhte a shut hpyit ai hta anhte hpe tawn da mani ai. Raitimung, Made e, Nang gaw anhte a Kawa rai nga ndai: anhte gaw ga kagam rai nga ga ai, Nang gaw di bu sama rai ndai: anhte yawng na a lata a amu rai nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Kor 1:3-9

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

Tsawra ai hpu nau ni e, anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw nanhte hte a nga nga malit ga law, Yesu Hkrsitu a marang e nanhte hkam la ai chyeju mahkra a majaw, ngai tut naawng e Karai Kasang hpe chyeju dum nga nngai. Lam a myu myu hku nna Karai Kasang shi a chyeju kumhpa ni anhte hta shalaw shahtam sai majaw, ngai chyeju dum nga nngai. kaning rai nme law, nanhte a sara ni n-gup atsawm shagu hte hkaw dan lu ai majaw, chye chyang ai lam shgu hta nanhte hkum tsup nga myit dai, Hkristu a matu sakse hkam ya ai lam ni mung, nanhte hta e dan leng wa sai. Shing rai, anhte a Madu Yesu Hkristu a paw pru na lam ala nga nga yang, hpa chyeju hkumhpa mung n kadawn nga myit dai. anhte a Madu Yesu Hkristu a nhtoi e mung, mara shagun shara n nga hkra, Shi nanhte hpe shangang shakang na marin dai. Hpa majaw nga yang, Karai Kasang nan Shi a Kasha Yesu Hkristu hte matut mahkai nga lu na matu, nanhte hpe shaga la manit dai: dai Karai Kasang chyawm gaw kangka re ai wa rai nga ai.

Ya hti ai gaw Karai Kasang a mungga rai nga ai.

KABU GARA SHIGA

Marku 13:33-37

Yesu shi a sape ni hpe tsun mu ai gaw, Sumsing lamu hte ginding aga lai mat wa na, ahkying aten hpe nanhte n chye nga myit dai majaw, sadi nna maja nga mu. Dai lam gaw, tsan tsan mung de hkawm sa wa ai masha hte bung nga ai: dai wa gaw shi a nta hpe kau da yang, shi a ali ama ni hpe arai mahkra ap ya nna, langai hte langai hpe bungli karan jaw da ai; chyinghka sin ai wa hpe mung, maja nga u, ngu nna hkang da nu ai. Dai nta madu gaw nrim e, yup tung e, u goi hpawa e, jahpawt manap e, galoi e bai du wa na ra ai hpe nanhte n chye myit dai majaw, a maja nga mu. Shing nrai, Shi akajawng sha du nna, nanhte n dum shami yup nga ai hpe w amu na ra ai. Nanhte hpe ngai tsun ai hte maren yawng hte hpe ngai tsun nga nngai: a maja nga mu.

Ya hti ai gaw Madu a Kabu Gara shiga rai nga ai.

HKRISTU HKAWHKAM POI SHANI NA MUNGGA

Shani shana na sakhkrung nga sa lam hta shingdu kaw nna hting hkang ai lam gaw masha hkum shagu hta teng sha nga ai. Shingdu kaw nna shadut shadang ya ai majaw tinang a ningmu hta galaw sa ai lam law malawng gaw langai hte langai nbung chye nga ai. 

Hkristu Hkawhkam poi hpe galaw ai shaloi Shi Madu gaw anhte a myit jasat hte shamu shamawt galaw sa ai lam hpe lam madu ya ai uphkang ai Wa re ai nre ai hpe masam maram yu na aten rai nga ai. Hkristu Hkawhkam a lam woi up hkang ai hta sakhkrung nga sa na matu gaw ahkyak nga ai re ngu dum shai nna shi a tara lam ni hpe hkan sa nna Karai Kasang hte rau sakhkrung nga sa na matu gaw ahkyak nga ai.

Anhte a asak aprat hta anhte a Madu Hkristu Hkawhkam up hkang ai hta nga sa nna Karai Kasang hte rau sakhkrung nga sa let jet ai Karai Kasang a kashu kasha ni byin tai wa lu u ga.

KAJI HTUM AI WA

Dai ni anhte Hkristu hkawhkam poi nhtoi hpe myit dum galaw ai aten hta, anhte ni a prat hpe kaning re ai manu, shadawn shadang hte masam maram na hpe Madu Yesu asan sha tsun ai hpe na la lu ga ai. Hpang jahtum Tara Jeyang na matu Hkristu du sa ai aten hta marai hkum shagu a gam maka hte seng nna hpa makoi magap da ai lam N-nga lu sai. Karai kasang hte rau kabu pyaw lu na ni gaw kaji htum ai hpu nau ni hpe garum dat ya lu ai ni rai ma ai. Dagam kau hkrum ai ni chyawm gaw shinggyim masha ni ra kadawn nga ai hpe N-galaw ya kau sai ni rai ma ai.

Dinghpring ai ni gaw Karai kasang a mungdan de shaga la hkrum nna htani htana nhtum n wai ngwi pyaw sim sa ai hpe lu la na rai sai. Hkristu gaw Tara agyi zawn galaw ai rai tim, Kawa Karai e lajang da ai amu hpe gun hpai ai sha rai nga ai. Hkap la hkrum ai lam a npawt madung gaw kabu gara shiga hta na “Tsawra myit” ngu ai hpe hkap la hkan sa ai lam rai nga ai. Tara jeyang ai lam mung, mara kap ai ni hte N kap ai ni ngu nna, anhte lu da ai Tara Kanu ni hte shadawn ai lam n rai, kaga masha ni a mai kaja ai lam hpe kade daram galaw ya lu sai hta madung da nga ai.

Kawsi hkrum ai ni hpe jaw sha ai, hpang gara nga ai ni hpe lu na jaw ai, manam tai hkawm ai ni hpe daw jau ai, singgu krin rai nga ai hte hpe sari sadang hte makawp ya ai, machyi masha ni hte bawngdung nga ai ni hpe gawn lajang, yu lakawn ai, dai aten ni hta Madu Yesu hkum nan matsan dum la hkrum ai rai sai. Dai masha ni a matsan mayan jam jau hkrum ai lam gaw Shi Madu hkum nan a rai wa nna, shinggyim masha ni ru yak jam jau hkrum dik ai shara hta Shi Madu mung nga nga ai. Karai Kasang hpe tsawra ai hte htingbu wa hpe tsawra ai gaw maren sha rai nna htingbu wa hpe tsawra ai lam gaw Karai Kasang hpe tsawra ai lam rai sai.

‘A lu ai ni’ shagrau sha a hkrum ai gaw shinggyim masha ni ra kad¬awn ai hpe kaji dik ai masa hte galaw lai wa sai majaw rai nga ai. Anhte shinggyim masha ni lu galaw ai hta lai jan na galaw shangun ai lam N-nga ai. Mungkan ntsa hta byin nga ai masa lam ni hpe mu chye la nna ahkyak la, garum shingtau, galaw lawm ai amu magam sha ra kadawn nga ai. Madu Yesu a matu mung, mungkan ntsa hta byin ai lam gaw htani htana prat a matu ahkyak ai lam rai sai. Matsan dum garum la ai amu kaji, shinggyim ma¬sha ni a chyeju dum ai hte tsawra shawang myit (karuna, Metta) gaw shi a mungdan hta ning ngai nga lu na lam rai sai.

Anhte ahkyak la ya ra ai ni gaw kadai wa rai ta? Kabu gara shiga hta na la sai hpan kru hta lawm ai ni rai nna shinggyim masha ni abyin nga ai, hkam sha ding yang rai nga ai hpe shagyin da ya ai mabyin kru nan rai nga sai. Hkristan ni a matsan dum lama ai amu magam hpe shaleng ya ai ni mung rai nga ai. Hkris¬tu a ga garan nga ai hkum hkrang hpe anhte makau hta tam mu lu na matu kabu gara shiga anhte hpe ningdat sai. Kawsi hkrum ai, hpang gara nga ai, tsasam wa, singgu krin nga ai, machyi makaw hkrum ai ni, hte bawng dung nga ai ni hta Hkristu matut nna yubak hkam sha nga ai. Dai masha ni hpe ahkyak la mu ya ai gaw adaw achyen rai nga ai Hkristu a hkum hkrang hpe ahkyak la ai lam rai sai.“Garum shingtau la na ra kadawn nga ai masha hpe ngai hpang jahtum garum la sai gaw galoi wa rai sa ta?” ngu nna tinang hkum hpe gasan san yu na mai nga ai.

HKRISTU HKAWHKAWM POI SHANI NA CHYUM LAIKA

HKRISTU HKAWHKAM POI

No, 26, 2017

CHYUM MUNGGA DAW 1

Ezekela 34:11-12, 15-17

Ya hti na gaw myihtoi Ezekela a laika hta na rai nga ai.

Madu Karai ning nga ai, Ngai hkum nan nye a sagu ni hpe sawk tam na nngai. Sagu rem wa bra nga ai sagu ni hpe hkan shakut tam ai zawn ngai mung nye sagu ni hpe hkan tam na nngai. Lamu sin nna mak mat ai shani, bra ayai mat ai ni hpe shara shagu na bai tam shaw woi la na nngai. Ngai hkum nan nye sagu ni hpe bau na nngai. Shanhte hpe hpum shangun na nngai. Dam mat ai ni hpe hkan tam na nngai. Masha ni gau mat wa ai sagu ni hpe hkan mawai la na nngai. Nra daw ai sagu hpe ahkyen kayawp na nngai. Gawng kya ai sagu hpe n-gun shaja na nngai. Hpum sau ai hte n-gun ja ai ni hpe chyawm gaw ngai jahten na nngai. Ngai gaw tara ai hpe galaw ai sagu rem wa rai nngai. Nye sagu hpung e, sagu mi hte sagu mi hpe, sagu hte bainam, la ni hpe ngai ginhka dawdan na nngai, nga nna Madu Karai tsun ai.

Ya hti ai gaw Karai Kasang a mungga rai nga ai. 

CHYUM MUNGGA DAW 2

1 Korinhtu 15:20-26, 28

Ya hti na gaw Korinhtu ni kaw San Pawlu shagun dat ai lai¬ka langai hta na rai nga ai.

Hkristu gaw si mat ai kaw na bai hkrung rawt sai majaw, si taw mat ai ni hpe bai jahkrung sharawt la na ra ai lam kam shut shara n nga ai. Masha langai mi a nhkan e, si ari pru sai. Masha langai mi a nhkan e, hkrung rawt ai bai pru sai rai. Masha yawng gaw Adam hte dun ai majaw si ra sai zawn, Hkristu hte dun ai ni yawng hpe mung bai hkrung sharawt la na rai. Marai hkum hpe chyawm bai hkrung sharawt ai hta lam masat da ya ai. Shawng nnan Hkristu, shi bai du yang, si ai ni yawng, bai hkrung rawt na rai. Shaloi jahtum nhtoi du na. Hkristu, wenyi dagu du, ahkang aya, du magam, yawng hpe dan kau nna, Kawa Karai Kasang hpe mungdan ap ya na ru ai. Gumlau mahkra hpe dang kabye dip kau ai du hkra Hkristu up na rai nga ai. Jahtum hpyen gaw si atsam re. Dai hpe mung dang kau yeng kau na sana rai. Hkristu up ai hta yawng hpe shakyet ngut jang, Kasha shi, Karai Kasang npu e, shanu na wu ai. Shing rai, Karai Kasang gaw mahkra ting hpe up ai baw tai na ra ai.

Ya hti ai gaw Karai Kasang a mungga rai nga ai.

KABU GARA SHIGA 

Mahte 25:31-46

Ya hti na gaw Mahte a laika hta na Kabu Gara Shiga rai nga ai.

Masha kasha gaw shi a hpung shingkang dan hkung let, lamu kasa ni nlang rau du sa ai shaloi, tinang a hpung shingkang tinang ntsa e dung let, amyu baw shagu hpe shi a man e, jahpawng da nna, sagu rem wa, sagu hte bainam garan jahka ai zawn, shanhte hpe garan nna, dingman ai hpe hkra de, kaga ni hpe pai de, di tawn da na mu ai. Hkra de nga ai ni hpe, hkawhkam wa tsun ai gaw, Nye Wa shaman ya sai ni e, sa marit, Mungdan hpe sa hkam la mu. Mungkan nnan hpan da kaw nna, lajang da sai. Hpa rai nga yang, Ngai kawsi yang, lusha jaw myit dai. Hpang gara yang, ntsin jaw myit dai. Tsasam manam rai yang, tinang kaw hkap la myit dai. Bu hpun n kap yang, jahpun myit dai. Ngai machyi yang yu lajang, htawng rawng yang, sa kawan katsan ya myit dai. Shaloi ding hpring ai ni gaw, Madu e, nang kawsi ai hpe anhte galoi mu nna galaw jaw ta? hpang gara ai hpe anhte galoi mu nna, lu na jaw ga ta? Nang manam tai hkawm ai hpe anhte galoi mu nna, daw ga ta? singu krin rai nga ai hpe anhte galoi mu nna, jahpun ga ta? Nang machyi hkrum ai hte htawng rawng nga ai hpe, anhte galoi mu nna, nang hpe kawan yu ga ta? ngu nna shi hpe htan na ma ai. Dai rai nna hkawhkam wa gaw, Nanhte hpe ngai teng teng tsun ma de ga, Ndai ngai nau ni hta na kaji htum ai wa hpe nanhte galaw ai gaw, nanhte ngai hpe galaw ma nit dai, rai nga ai, ngu nna shanhte hpe htan na mu ai. Bai, pai maga de nga ai ni hpe, Dagam dala hkrum ai ni e, ngai hte hka wa nna nta gumlau hte shi a salung sala ni a matu lajang da ai n htum n mat ai wa nde shang wa mu: kaning rai nme law, ngai kawsi yang nanhte ngai hpe sha na n jaw myit dai ; hpang gara yang, nanhte ngai hpe lu na n jaw myit dai: ngai manam tai hkawm yang, nanhte ngai hpe n daw myit dai ; singu krin rai jang, nanhte ngai hpe n jahpun myit dai; machyi hkrum ai hte htawng rawng nga yang, nanhte ngai hpe n yu lajang myit dai, ngu na mu ai. Shaloi shanhte mung, Madu e, nang kawsi ai, hpang gara ai, manam tai hkawm ai, singu krin re ai, machyi hkrum ai hte htawng e nga ai hpe, anhte galoi mu nna, nang hpe n galaw daw ga ta? ngu nna htan na mu ai. Dai rai nna, Ngai nanhte hpe teng teng tsun ma de ga, Ndai ni hta na kaji htum ai wa hpe nanhte a galaw myit dai majaw ngai hpe n galaw myit dai rai nga ai, ngu nna shanhte hpe htan na mu ai. Shaloi shanhte gaw n htum n wai ari de shang wa na ma ra ai; ding hpring ai ni mahtang n htum n wai asak de shang lu na ma ra ai, ngu wu ai.

Ya hti ai gaw Karai Kasang a mungga rai nga ai.

PRANWAN LADAW (33) LABAN SHANI NA MUNGGA

Dai ni na Kabu Gara Shiga hta Karai Kasang gaw anhte shinggyim masha marai hkum shagu hpe atsam marai baw sumhpa hpe jaw tawn da ai hpe kadai mung ndang shara nnga nga ai. Kade daram atsam marai rawng ai hta anhte hpe jaw ya ai atsam marai ni hpe tinang gara hku akyu jashawn ai, gara hku jai lang ai ngu ai gaw ahkyak nga ai.

Tinang lu tawn da ai atsam marai ni hpe njai lang ai rai yang lani mi na aten hta anhte shamat kau chye nga ai. Bai nna tinang lu tawn da ai atsam marai ni hpe anhte a matu sha n-ga, kaga masha ni a matu mung akyu pru na matu gaw ahkyak nga ai. Hpa majaw nga yang anhte masha hkum ngau shagu gaw shada da garum shingtau ai hte sha sak hkrung mai nga ai.

Karai Kasang jaw ya ai shaman chyeju ni hpe dum shai nna masha yawng a matu akyu pru ai shara hta jai lang lu na matu shakut shaja lu u ga.

KANG KA AI HTE SADI DUNG AI MAYAM

Dai ni hti ai Chyum ga daw ni hta ‘kang ka ai’ lam hpe madung na lu sai. Kangka ai ni gaw makam masham hte hpring ai ni rai ma ai. Shanhte ni gaw kam ging ai ni rai ma ai, hpa ma¬jaw nga yang, Karai Kasang hte Hkristu, Karai Kasang a amyu sha, hte Karai Kasang a hpan da ai lam hta shanhte hkum tsep kawp tawn da ai majaw rai nga ai. Ga shagawp laika hta lawm ai num hte mung bung nga ai. Shi gaw kang ka nga ai hte kun dinghku masha ni, manang ni hte mayam ni mung shi hta kam shamyet ma ai. Shi gaw Karai Kasang hpe hkrit hkungga ai hte dai ahkrung nga ai Karai Kasang hpe shakawn shagrau nga ai.

Kasa Mahte a gashadawn hta, Madu Yesu gaw Yuda Nawku hpung woi ni hpe ga tsun nga ai. Karai Kasang a mungga hpe shan¬hte kaw ap tawn da sai. Dai hte maren, Kasa Pawlu a Htesaloni masha ni mung Madu bai du sa na hpe ala nga ma ai. Madu galoi aten bai du sa ai rai tim, akajawng sha du wa na hpe kasa Pawlu myit kam nga ai. Dai re ai majaw, n yup nga ai sha su hprang nga na shadum sai. Su hprang nga ai rai tim, samwi kaw nna hpung shingkang hte yu hkrat wa na Hkristu hpe myi kaba hpaw let ala nga ai hku n rai, lam shagu hta maja nga let masa lam shagu hta Hkristu hpe mu lu na matu maja ra nga ai. Dai gaw Yuda madu jan a matu, Gashaka dingsa hpung woi ni a matu, hte shawng ningnan na Hkristan ni a matu sadi dung ai lam rai sai.

Rai yang, dai ni na aten hta sadi dung ai lam gaw kaning rai lachyum pru a ta? Anhte ni gaw Hkristu hta ap da hkrum sai ni re majaw sadi dung ai Hkristan ni rai ra ga ai. Kashin kamun hkam la ai marang e, Karai Kasang gaw anhte hpe Chyoipra ai Wenyi hte dazik dawk da sai. Hkristu hte seng sai hte Shi Madu a marang e Karai Kasang hte mung seng wa sai. Anhte a n-gup/prat hte N teng ga ai law ngu tsun tim, dazik gaw prat tup kap nga na sai.

Ga shagawp laika hta, sadi dung ai gaw nang nga ai shara rai nna, kang ka ai gaw ya, ndai aten rai nga ai. Dai numsha a matu, shi a nrum ntau, kashu kasha ni, mayam ni, hpaga ga ai ni, hte matsan mayam ni hpe sadi dung ai lam rai sai. Dai masha ni yawng hkra hpe sadi dung ai hte shi a ga shadik ra sai. Anhte a matu mung, sadi dung ai gaw ya jang jang ra sai. Hkristan uhpung uhpawng ni hta anhte hkum ap da ai hte Madu Hkristu nga lai wa sai zawn myit masin san seng ai hte nga pra na ahkyak ai. Kasa Mahte hta mu lu ai hte maren sadi dung ai hta grai yak ai lam nga ai. Gara mayam hpe madaw kang ka ai ngu nna tsun a ta? Lu ai ahkaw ahkang hpe la nna gumhpraw tam shakut sai, kam da sai hte maren galaw ai mayam she rai nga ai.

Hpang jahtum kasa Pawlu a laika hta, sadi dung ai lam gaw n myit mada ai sha du sa na Hkristu nan rai sai. “Grai kaja sai, kangka ai hte sadi dung ai mayam e” nga nna Hkristu tsun na, na mayu ai rai yang, shi hpe hkap tau la ga; kawsi hpang gara nga ai ni, matsan mayan kabai da hkrum ai ni, bawng dung nga ai ni, machyi makaw hkrum nga ai ni hpe anhte a lata hte garum la na lawan ga! Lani mi aten htum shagu, Madu Yesu hpe ngai dai ni hkrum sai kun? Ngu nna tinang hkum gasan san ga. Shi Madu kaw du lu sai kun?

Sawn sumru mai ai lam; Jet ai Hkristan/Kahtawlik ngai rai nga ai kun? Karai Kasang hte myiman chyaw mu katut ai aten, ngai galaw lai wa sai prat hkrun lam hte seng nna hpa hpe tsun dan lu na rai ta?

PRANWAN LADAW (33) LABAN SHANI NA CHYUM LAIKA

PRAN WAN LADAW HTA LABAN 33

19th Nov, 2017

CHYUM MUNGGA DAW 1

Ga Shagawp 31:10-13, 19-20, 30-31

Ya hti na gaw Ga Shagawp laika hta na rai nga ai.

Sari rawng ai num hkrup na yak ai. Shi gaw lungseng hta grau hpu nga ai. Shi hta madu wa kam krem nga ai. Shi matsan mayan n hkrum na ra ai. Prat tup shi gaw madu wa a matu kaja lam hkrai di nga ai. Shi gaw sagu ri, lachyit ri, tam nna lata ri da galaw nga ai. Shi gaw gawng hte, kabang hte, ri ri nna sumpan da ai. Shi gaw matsan mayan ni hpe jaw ya, kawsi hpang gara ai ni hpe, garum rai nga ai. Hkum shingyan tsawm ai hkalem chye nna, hpraw tsawm ai, grit mat chye ai. Madu hpe hkrit hkungga ai num gaw shakawn ang ai jan rai nga ai. Shi galaw ai yawng hta akyu dum mu. Kadai yawng mung shi hpe shakawn mai ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Htesaloni 5:1-6

Ya hti na gaw Htesaloni ni kaw San Pawlu shagun dat ai laika langai hta na rai nga ai.

Hpu nau ni e, dai aten, dai ladaw a lam nanhte hpe ka shana shara n nga ai. Madu a nhtoi gaw lagut zawn du sa na ra ai, hpe nanhte chye chyalu re. Masha ni tsun ai, yawng simsa shim ai, nga ma yang, akajawng sha hten bya hkrum hkra na ma ai. Numsha hta shinggyim machyi pru ai zawn lawan du na ra ai. Masha ni lawt na ma ai n rai. Hpu nau ni, nanhte gaw nsin hta myit n rai. Dai nhtoi nanhte kaw kajawng kaja lagut zawn du na n byin mai ai. Nanhte nlang nhtoi hte seng ai ni rai myit dai. Anhte gaw shana hte nsin hte n seng ga ai. Kaga ni zawn yup malap nga ai ni n mai rai ga ai. N yup nga nna htauli htaula rai nga ga.

Ya hti ai gaw Karai Kasang a mungga rai nga ai.

KABU GARA SHIGA

Mahte 25:14-30

Ya hti na gaw Mahte a laika hta na Kabu Gara Shiga rai nga ai.

Yesu ga shadawn tsun ai gaw, Masha langai mi bu hkawm na maw ai. Shi a mayam ni hpe shaga la nna shi a rai ap ya da mu ai. Langai mi hpe gumhpraw joi manga, langai mi hpe lahkawng, langai mi hpe joi mi di nna, tinang a atsam hte maren, ap ya da mu ai. Dai hpang hkawm mat wa ai. Gumhpraw joi manga lu ai wa gaw, pru wa nna hpaga ga ai hte amyat joi manga kap la wu ai. Dai zawn lahkawng lu ai wa mung, joi lahkawng myat la wu ai. Joi mi lu ai wa mahtang gaw gumhpraw hpe nhkun htu nna lup da wu ai. Tawng marang hpang, madu bai du wa ai. Mayam ni hpe hpaga jahpan la wu ai. Joi manga lu ai mayam gaw amyat joi manga hte hpawn sa nna, Madu e, ngai hpe joi manga jaw ni ai. Kaga joi manga myat la se ai, ngu wu ai. Madu gaw, Ara, sadi sahka kaja ai mayam e, arai loi sha hta nang kang ka nit dai. Arai law a ntsa e, ngai nang hpe san da na de ai. Na Madu a kabu gara ai hta shang lawm u, ngu nna shi hpe tsun mu ai. Gumhraw joi lahkawng lu ai wa mung, sa nna, Madu e, joi lahkawng ngai hpe arang ya ndai. Amyat joi lahkawng lu la se ai, ngu wu ai. Madu gaw, Ara, sadi sahka dung kaja ai mayam e, arai loi sha hta kangka nit dai. Arai law a ntsa e, ngai nang hpe san da na de ai. Na a madu a kabu gara ai hta shang lawm u, ngu shi hpe tsun wu ai. Joi mi arang ai wa chyawm gaw, sa nna, Madu e, nang maji ai wa re.

Tinang n gat ai kaw na dan la, tinang n ayai ai kaw na magawn la ndai hpe ngai chye ai. Ngai dai rai, hkrit nna, na gumhpraw hpe ga hta htu lup da nngai. Na arai nang nga ai, ngu wu ai. Madu gaw, lagawn ai, n hkru ai, mayam e, tinang n gat ai kaw na dan la, n ayai ai shara na magawn la ai hpe nang chye ndai. Nye gumhpraw hpe boi ai shara kaw da ang ndai. Ngai bai wa yang arang hte atu ngai la na we ai. Shi a gumhpraw joi hpe la nna, joi shi lu ai wa hpe jaw mu. Lu ai wa hpe kahtap jaw nna law htam wa na ra ai. N lu ai wa kaw na, naw shaw la na ru ai. Dai n hkru ai mayam hpe shinggan nsin de shaden kau mu. Dai yang wa utik let hkrap ngoi nga na ra ai, ngu nna jeyang nu ai, nga ai.

Ya hti ai gaw Madu a Kabu Gara shiga rai nga ai.

PRANWAN LADAW (32) LABAN SHANI NA MUNGGA

Anhte a makau grup yin na awngdang ai ni hpe yu dat yang shakut shaja ai ngu ai hpe shanhte a prat hta galaw lai wa ai hpe teng sha mu lu na re. Tinang a lit magam hpe tup hkrak rai nna aten dep galaw lu na matu gaw ahkyak nga ai. 

Karai Kasang a Mungdan galoi du na, masha asak galoi htum na ngu ai hpe kadai mung nchye ga ai majaw aten du wa ai shani hte jin jin rai na matu gaw dai ni ngu ai aten ahkying kaw nna shajin shachyip ra na re ai hpe dai ni na Kabu Gara Shiga hta Madu Yesu shadum jahprang ya nga ai.

Wenyi lam hta sha n-ga mungkan a nga sa ai lam ni hta mung tinang galaw ra ai hpe aten ahkying n-garawt ai sha dai ni ngu ai aten ahkying hta galaw lu nna awngdang ai ngu ai hpe lu la na matu shakut shaja sa wa lu u ga.

YA YA JANG SHAJIN DA GA

Kalang mi na ten hta, asak kaba sai masha ni hpang de ‘nang teng sha wa si na hpe dum u’ nga nna Telephone hte shana na re ai lam langai mi byin ai da. Tsun shana hkrum ai ni a bai htang galaw ai lam mung shai la nga ai. Masha n kau mi gaw, telephone shaga ai wa ‘mana’ rai na re ngu shadu ma ai, shi hkrai sha lagawn dum nna hkan matut hkawm ai rai nga ngu shadu ai ni mung lawm nga ai. Dai zawn sha rai nna, kadai mung dai shiga hpe ahkyak n shatai ma ai. Kadai mung shawoi na hte maren sha rai nga hkawm nna wenyi sak hkrung lam a matu alak mi rai galaw ai mi n nga ai. Tim, lak lai ai marai mi gaw nga nga ai. Slg jan Jean Taylor rai nna asak (82) ning rai sai Kahtawlik num hpawmi shi rai nga ai. ‘si du’ gaw shaga nga ai ngu ai hpe shi atsawm chye madat la nu ai. Shi gaw asak kaba wa sai hte machyi makaw law law hpe hkrum sha ai rai tim, aput angun ai lam n nga ai sha Karai Kasang hta yawng may¬awng hpe ap tawn da nu ai. ‘Si du’ gaw shi hte rau n tsan sai ngu ai hpe chye nga ai hte shi a aten ni hpe akyu rawng ai hte jai lang nga ai. Karai Kasang hte hkrum zup na ten hta myit nyan masin hta mai kaja nga na matu shi a ngam nga ai aten ni hta masha kaga ni mai byin ai daram tsawra ai hte galaw ai amu magam yawng hpe mung Karai Kasang sharawng awng ai hta galaw sa nga ai.

Dai ni na kabu gara shiga hta mung, ndai lam hpe mu lu na re; ‘si du’ gaw anhte hpe ala nga ai lam chye na nna, anhte ndai mungkan ga kaw nna pru mat wa na aten a matu tinang hkum galoi mung lajang shachyip da ra ai hpe dum chye shangun ai.

Gashadawn hta; Madu Yesu gaw, tinang a pyen ding a matu sau law hkra n shajin gun ai, myit n su ai mahkawn ni a lam hpe madi madun nga ai. Mahtai gaw, shanhte gaw, la nnan wa du wa ai ten hta, jin jin n rai ai hte, hkungran poi shara de mung n lu shang lu sai.

Rai yang, la nnan wa du wa na hpe hpa majaw dai myit n su ai mahkawn ma ni gaw n shajin da ai rai? Myit su ai mahkawn ma ni zawn n rai, shanhte n shajin da ai hte, la nnan wa hpe hkap la na myit mung n lawm ai nhten. Shi hpe hkap pang hkalum na matu ahkyak da ai rai yang, chyip chyip lajang da na rai nna pyengding a matu sau mung law hkra lajang da na re. 

Anhte na lu ai hte maren, la nnan wa n du wa shi yang, yawng yup shamoi taw nga ma la ai. Dai lam gaw maumwi hta grau ahkyak ai lam rai sai. Marai rai gaw shi du sai lam marawn jahtau dat ai shaloi, lajang shachyip na aten n nga sai. Hpang hkrat sai!

Dai gaw anhte a prat hta mung seng nga ai. Madu Yesu galoi aten hta du sa wa nna shi hte rau nga lu na matu Sumsing lamu de anhte hpe woi wa na teng teng n chye ga ai. Dai na de daw rai na kun, hpawt de kun, du wa na bat/shata hta rai na kun? N chye lu uga ai. Dai majaw, ya ya jang byin wa na lam a matu lajang shachyip da ga. Lani mi na aten hta, anhte gaw mungkan ga na lai pru wa ra na re. 

Dai ni, ya aten jang, anhte ready, jin jin rai taw nga ra sai lo!

PRANWAN LADAW (32) LABAN SHANI NA CHYUM LAIKA

PRAN WAN LADAW HTA LABAN 32

12th Nov, 2017

CHYUM MUNGGA DAW 1

Hpaji Byeng-ya 6:12-16 

Ya hti na gaw Hpaji Byeng-ya laika hta na rai nga ai.

Byeng-ya chyawm gaw n wai let, htoi kabrim nga ai. Dai hpe tsaw ai ni aloisha mu tam lu ma ai. Dai hpe tam ai ni mung mu hkrup la ma ai. Byeng-ya gaw tinang hpe sharawng ai ni mu hkrup la lu hkra, dai shi lawan sa madun dan ai. Jahpawt manap hkap la ai wa mung, myit gawm lu na n rai, shi a wang chyinghka lam e, dung nga ai hpe mu na ru ai. Byeng-ya hpe dum nga ai gaw, htauli htaula rai nga ai. Dai a matu maja la nga ai wa mung myit rutsang hta na, dai jang, lawt lu na ra ai. Byeng-ya gaw shi hpe gying ai ni hpe hkan kawan tam la nga ai. Lam hkan n-gaw n wai let, shanhte kaw dan pru ai. Myit tsang garum let, hkan hkrum lu ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Htesaloni 4:13-18

Ya hti na gaw Htesaloni ni kaw San Pawlu shagun dat ai laika langai hta na rai nga ai.

Hpu nau ni e, si mat ai ni a lam masa hkrak chye la shangun mayu ga ai. Shaloi myit mada lam kata ai ni zawn, yawn hkyen n rai na myit dai. Yesu si nna bai hkrung rawt sai hpe kam sham ga ai. Yesu hta kam sham nna si ai ni hpe shi hte rau Karai Kasang woi wa na hpe mung kam sham ga ai. Nanhte hpe anhte sharin ya ai gaw Madu a ga rai nga ai. Madu bai du sa ai shaloi, anhte hkrung ngam taw nga ai ni, shawng si mat sai ni hta hpa grau lu na ga ai n rai. Aming ga jahtau ngoi na ra ai. Lamu kasa agyi a nsen, Karai Kasang a pahtau nsen hte Madu hkum nan lamu na yu wa ra ai. Hkristu hta kam sham nna, si wa ai ni shawng bai hkrung rawt na ma ai. Anhte naw hkrung nga ai ni mung, dai rau, jahpawng la nna, lamu kata summwi hta Madu hpe wa hkrum na ga ai. Madu hte prat dingsa nga mat na saga ai. Ndai myit nna, shada da n-gun jaw hkat nga mu!

Ya hti ai gaw Karai Kasang a mungga rai nga ai.

KABU GARA SHIGA

Mahte 25:1-13

Ya hti na gaw Mahte a laika hta na Kabu Gara Shiga rai nga ai.

Yesu tsun ai, Lamu mungdan gaw, tinang pyending lang nna, la nnan hpe pang la na pru sa ai mahkawn shi hte bung na ra ai. Shanhte hta na manga gaw myit n su ma ai. Manga gaw myit su ma ai. Myit n su ai ni pyending a matu sau shajan n lawm ma ai. Myitsu ai ni sau shajan lawm ma ai. La nnan lawan n pru ai majaw, shanhte yup malap wa ma ai. Yuptung hpawa e, La nnan du wa ra ai. Tau la na sa wa mu, nga jahtau garu nga ai. Dai mahkawn ni yawng tinang a pyending rawt lajang ma ai. Myit n su ai ni gaw, anhte a pyending si mat sai. Sau garan jaw mi, ngu nna myitsu ai ni hpe hpyi mu ai. Myitsu ai ni gaw, anhte a matu n law na nhten! Dut ai ni gaw mahtang sa mari la masu, ngu htan ma ai. Shanhte mari na pru mat ai hpang jang, La nnan du wa ai hte jin nga ai ni shi rau hkungran poi de shang mat ma ai. Hpang, chyinghka la kau ma ai. Mahkawn kaga ni bai du nna, Madu e, anhte hpe hpaw la mi, ngu hpyi ma ai. La nnan gaw, hkrak tsun ai, ngai nanhte hpe n chye made ai, ngu htan mu ai. Dai majaw n maja nga mu! Dai shani, dai ahkying ngu ai hpe nanhte n chye myit dai.

Ya hti ai gaw Madu a Kabu Gara shiga rai nga ai. 

SAN PRA AI NI YAWNG MAYAWNG A POI SHANI NA MUNGGA

Daini na nhtoi hta San Pra ai ni yawng a poi hpe anhte galaw nga ga ai. Nawku hpung kaw nna anhte hpung masha ni akyu hpyi nna garum shingtau lu na matu tara shang ndau shana nna San Pra ai ni ngu masat tawn da hkrum ai ni sha n-ga, anhte chye ai, nchye ai San Pra ni law law nga ai ngu ai hpe dai ni na poi gaw sakse hkam ya nga ai.

San Pra ai ni gaw Karai Kasang hte ni htep ai ni rai nna anhte ra ai chyeju ni hpe hpyi garum ya mai ai hta n-ga, shanhte a ngasat ngasa ai lam ni hpe kasi la mai ai ni mung rai nga ai. Shanhte ni gaw shani shana na ngasat ngasa ai lam ni hta kaja dik htum ai hku nna Karai Kasang yaw shada ai hpe hkan shatup let nga sa lai wa sai ni rai nga ai.

San Pra ai ni hpe shakawn shagrau akyu hpyi let shanhte a garum shingtau ai hpe lu la ai sha n-ga, shanhte hpe kasi la let shani shana na anhte a sak hkrung nga sa ai lam hta kasi la let Karai Kasang yaw shada ai hpe hkan shatup lu ai Karai Kasang a kashu kasha ni byin tai wa lu u ga.

A LU AI NI

“San pra ai ni” (Saints) ngu rai n masat shi yang, san seng ai Numsha hte Lasha ni hpe ‘A lu ai ni’ (Blessed) ngu nna shawng shamying ga ai. Shanhte gaw anhte Hkristan makam masham a share shagan ni rai ma ai. Shanhte gaw matsan mayan rai nga lai wa sai (snr) zingri zingrat hkrum sha na ma sai. Rai tim, Karai Kasang a matsan dum tsawra ai hte ngwi pyaw simsa ai chyeju shanhte hta hpring tup nga ai. San seng ai myit masin hte yaw shada lam ni hte kaning rai nga sa na, dinghpring ai hte sum nung ai masha byin hkra kaning rai nga sa na anhte hpe sharin ya ai ni rai ma ai. Yu maya re ai anhte a prat hta lak lai ai amu magam galaw let nga lu na matu woi awn la ya sai. Shanhte gaw kaja wa sha ‘A lu ai ni’ rai ma ai.

“Share shagan ni” hte ‘San Pra ai masha ni’ n –nga ai shinggyim uhpung gaw yu maya masha ni hpawng de nga ai lam sha rai nna, kadai e mung yu kaba ai, n-gun la ai, arawng la ai lam n nga na re. Kasi la mai ai masha anhte yawng hta ra ahkyak ai. Yak hkak jam jau ai aten ni hta myit masin shaja la lu na matu, ngwi pyaw kabu gara ai aten ni hta chyeju dum chyeju htang chye lu na matu, hkungga shagrau ai hte ging dang ai ni, anhte hta ra ga ai. Hpa majaw nga yang, shanhte gaw, prat a ahkying aten shagu hta Karai Kasang a shaman chyeju hpe tam mu la ai majaw ngwi pyaw kabu gara ai hte nga lai wa sai. Lachyum rawng, akyu pru ai hte, sak hkrung nga sa lu na matu madun ya lai wa sai. Sumsing Lamu na anhte a Kawa Karai Kasang, Chyoipra nga ai hte maren, anhte mung Chyoi pra nga lu na matu Madu Yesu a saw shaga ai lam hpe mahtai jaw ya ai ni mung shanhte rai ma sai.

Sawn sumru mai ai lam; Dai ni hti ai “A lu ai Tara” hpe na la ai marang e, mungkan n tsa hta sak hkrung hkawm sa lu na matu n-gun atsam, marai lu la sai kun? ‘San pra ai ni’ madun sharin ya lai wa sai sak hkrung lam hta hkan nang hkan sa na matu ngai jin jin rai sai kun? Ya aten hta ngai hkam sharang ra ai lam gaw hpa wa mi rai kun? Ngai dang kau lu nga a ni?

SAN PRA AI NI YAWNG MAYAWNG A POI SHANI NA CHYUM LAIKA

SAN PRA AI NI YAWNG MAYAWNG A POI 

5th Nov, 2017

CHYUM MUNGGA DAW 1

Shingran 7:2-4,9-14

Ya hti na gaw, Shingran laika hta na rai nga ai.

Jan praw maga de na pru lung wa nna, ahkrung nga ai Karai Kasang a dazik lang ai lamu kasa kaga hpe: ngai Yawhan mu nngai. Dai lamu kasa gaw, anhte a Karai Kasang a shangun ma ni hpe, kahtan e dazik garai n shakap yang, aga hpe mung, nammukdara hpe mung, hpun ni hpe mung hkum jahten kau mu, nga nna lamu ga hte nammukdara hpe jahten shabya na ahkang lu ai lamu kasa mali hpe, nsen kaba hte jahtau wu ai. Shaloi, dazik shakap hkam la ai ni hpe hti ai jahpan ngai na nngai: Israela kashu kasha ni a amyu yawng hta na, sen mi mun mali e hkying mali dazik shakap ai hkam la masai. Dai hpang, yu u, mungdan shagu hta na mung, baw lakung shagu hta na mung, amyu baw shagu hta na mung, ga amyu shaga ai hta na mung, kadai n dang hti lu ai, masha unawng kaba hpe ngai mu nngai. Ndai ni gaw hpraw ai hpun palawng bu hpun nna, tinang a lata hta namhtan hpun lakung lang let, Ting¬nyang a man e mung, Sagu Kasha a man e mung, tsap nga ma ai. Shanhte gaw, nsen kaba hte jahtau let, Tingnyang hta dung nga ai anhte a Karai Kasang hte Sagu Kasha gaw, Awng Dang nga u ga law, nga ma ai. Bai, lamu kasa yawng hte gaw dai Tingnyang hpe shinggrup let, salang ni hte dusat mali a grup yin e kawan tsap nga ma ai. Shaloi, shanhte gaw Tingnyang a man e dingnyawm dagup nna, Karai Kasang hpe nawku let, Amen. Shakawn kungdawn ai, hpung shingkang, hpaji byeng-ya, chyeju dum ya ai, arawng sadang, ahkang aya hte, n-gun atsam gaw, Karai Kasang kaw a nga nga u ga law. Amen, nga nna tsun ma ai. Shaloi, salang ni hta na langai mi gaw, Hpun palawng ahpraw bu hpun ai ndai ni gaw, kadai ni rai nga ma ta? Kanang na pru wa ma ta? nga nna ngai hpe hkap san nngai. Ngai gaw, Nye a Madu e, nang chye nga ndai, ngu nna shi hpe htan wu ai. Shaloi shi tsun ai gaw: Ndai ni gaw, zingri zingrat kaba hpe hkam sharang ngut nna, Tinang a hpun palawng hpe Sagu Kasha a asai hta hkrut jahpraw la ai ni rai nga ma ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1Yawhan 3:1-3 

Ya hti na gaw, Yawhan shagun dat ai laika langai hta na rai nga ai. 

Karai Kasang a kashu kasha ni anhte hpe ngu shamying mi ai majaw, Kawa gaw anhte hpe gade wa tsawra da mi hka! Shi a kashu kasha ni nan anhte rai nga ai. Dai rai nna, mungkan ga gaw shi hpe n chye wu ai majaw, anhte hpe mung n chye n hkap la ma ai. Tsawra ai ni e, Karai Kasang a kashu kasha ni, anhte ya e rai nga ga ai; hpang e anhte hpa tai na, garai n shadan dan nga ai. Dai hpe shadan dan ai shaloi, anhte Shi hte maren bung na ga ai lam hpe anhte chye nga ga ai; hpa majaw nga yang, Karai Kasang shi hkum nan nga nga ai hte maren, anhte shi hpe mu lu na ga ai. Ndai lam hpe myit mada ai masha yawng hte gaw, Hkristu Madu chyoi pra nga ai hte maren, tinang a hkum hpe shachyoi shapra ya ra ai. 

Ya hti ai gaw, Karai Kasang a mungga rai nga ai.

KABU GARA SHIGA

Mahte 5:1-12 

Ya hti na gaw, Mahte a laika hta na Kabu Gara Shiga rai nga ai.

Yesu gaw masha unawng uwa hpe mu jang, bum ntsa de lung wa ai; dai yang e shi dung nga yang, shi sape ni shi a makau de sit sa wa ma ai. Shaloi Yesu shanhte hpe sharin shaga let, tsun wu ai gaw: Myit masin hta matsan mayan ai ni gaw, ngwi pyaw nga ma ai; lamu mungdan gaw shanhte a mungdan rai nga malu ai. Myit sumnung ai ni gaw ngwi pyaw nga ma ai; shanhte mungkan ga hpe madu lu na mara ai. Yawn hkyen hkrum ai ni gaw ngwi pyaw nga ma ai; shanhte shalan shabran ai hkrum na mara ai. 

Dinghpring ai hte krawsi hpang gara ai ni gaw ngwi pyaw nga ma ai; shanhte gaw hkru kat wa na mara ai. Matsan dum chye ai ni gaw ngwi pyaw nga ma ai; shanhte matsan dum la ai hkrum na mara ai. Myit san seng ai ni gaw ngwi pyaw nga ma ai; shanhte gaw Karai Kasang hpe mu lu na mara ai. Ngwi pyaw sim sa ai hpe shabyin ai ni gaw ngwi pyaw nga ma ai; shanhte hpe Karai a kasha ni ngu shamying na mara ai. Dingman ai lam a majaw, zingri zingrat hkrum ai ni gaw ngwi pyaw nga ma ai; lamu mungdan gaw shanhte a mungdan rai nga malu ai. Nye a amying majaw masha ni nanhte hpe asawng zingri zingrat di ai hte, n teng n man ai hku mara amyu myu shagun da ai shaloi, nanhte ngwi pyaw nga myit dai: lamu mungdan hta e nanhte a shabrai kumhpa kaba nga malit dai majaw, kabu gara nna, ngwi pyaw nga mu.

Ya hti ai gaw, Madu a Kabu Gara shiga rai nga ai.