2023: PRANWAN LADAW LABAN (17) NA MUNGGA

Myit pyaw myit dik lu ai baw hpa hpa wa rai ta? Ja gumhpraw, arawng aya, shimlum lam, lu-hpa sha-hpa hte kaga pyaw hpa ni law law she rai nga ai. Rai tim, dinghta ga e jaw lu ai pyaw hpa ni, myit dik lu ai, ngu ai baw yawng gaw mu lu, măsawp yu lu, chyim yu lu ai, hkumshan hku chyim yu nna ginhka chye lu ai. Rai tim, reng grau ai baw ni hpe ndai hkumshan hte n mu lu, n chyim yu lu ai rai nga ai. Mai kaja ai baw ăjet, myit pyaw myit dik lu ai lam ăjet, tut e grin nan ai baw ni, dai Hkristu hta sha kuptsup ai lam nga ai. Makam masham myi hte hkan tam yang sha hkam la lu na rai nga ai. Reng grau dik ai Madu Yesu kaw na lu la mai ai chyeju sutgan ni hpe hkam la lu na she rai yang, manu hpa grau ai, n grin ai, hkumshan hku mu lu chyim yu lu ai baw sutgan ni hpe ra wa jang asum hkam kau gui ra ai lam sharin ya ai.

Hkawhkam Laika hta Karai Kasang gaw Solomon hpe tsun ai, “Hpyi măyu ai hpyi u, jaw na” nga ai. Solomon gaw reng dik htum ai kumhpa, ngu shi sawn la lu ai nyan hpaji hpe sha hpyi ai. Dai hpaji gaw, jaw ai n jaw ai, kaja ai n kaja ai hpe ginhka chye nna shi a mungdan hpe ladat jaw jaw uphkang lu na lam rai nga ai. Uphkang ladat jaw jang mungdan ngwi pyaw simsa nna mungdan masha ni sut lu nga mai wa na, kahkyin gumdin ai amu hpe gălaw lu jang, shinggan na hpyen ni hpe n hkrit ra na rai nga ai. 
Ginhka chye ai nyan, atsam ăhkyak dik ai. Anhte buga masha ni ja lungsen galaw ai ni law law nga ma ai. Ja nhkun, lungseng nhkun, majoi tak nna htu sum kau ai ni law law nga na ma ai. Sawn dinglik chye ai ni, amyat lu na hkrak măram lu jang arang kade bang ra tim gui ma ai. Sawn maram chye ai ni law law ja lung seng awng sha ma ai lam anhte chye ga ai. Yesu hkai dan ai mabyin hta gaw tak la ai amu hpe tsun ai n rai; kaja wa sutgan sumpu hpe ga kaw na htu shaw hkrup ai wa a lam rai nga ai. Dai hpang sutgan sumpu hpe galaw htu makoi kau nna, dai sun lamu ga hpe mări la kau ai lam tsun ai. Reng dik manu dan dik ai hpe chye la ai majaw, shi lu mi lu hpe dut kau nna dai ga dachyawk hpe mări la ai, nga ai. Bai, kaga mabyin hta reng ai hkăchyi hkan tam hkawm ai masha langai, reng ai hkachyi mu hkrup jang shi mung, lu mi lu hpe dut kau nna dai hkăchyi hpe mări la ai, nga ai. Karai Kasang a mungdan hpe mu hkrup ai ni nga ai zaw, dasang hkan tam nna mu la ai ni mung nga ma ai. Mabyin lahkawng yan hta tinang lu da ai sut-rai ni hpe asum hkam nna reng grau ai sutgan hpe lu hkra shakut la ai lam rai nga ai. 
Ga htu ga a chye nna mu hkrup ai ni kadai ni rai ta? Francis mung na hpyen Du Daju, labau shang masha, hpyen majan kungkyang dik, gumshem dik ai, awng dang dik ai hpyen Du_ Napoleon Bonapard rai nga ai. Uropa mungdan law law hpe găsat dang la ai, Roma mare na Sarabyin hpe pyi atik anang di nna Francis mungdan de htawt la ai, matse dik ai wa rai nga ai. Mungkan arawng aya, mungkan sutgan, dinghta ga na myit pyaw myit dik ai lam hpe tam ai wa rai nga ai. Waterloo majan hta sum mat nna shi gaw sharawt da ai Francis Empire yupmang hten bya mat ai. Shi hkum nan bawng masha tai mat ai. St. Helen, ngu ai zunlawng kaji hta prat htawng sharawng da hkrum ai. Shaloi sha myit pyaw myit dik ai lam majing, sutgan majing hpe mu hkrup nu ai. Karai a mungdan shinggyim masha ni a lapran, tinang a myit masin wenyi hta sha nga nga ai lam hpe mu hkrup nu ai. Shaloi shi shăgrit shănyem lu nu ai. Makam masham amu hpe shakut hpang ai, akyu hpyi shaja ai, zunlawng e nga ai ma kaji ni hpe tara laika sharin ya ai, Chyoi Pra Hkum a lam masha ni hpe tsun dan, sharin dan ai, sakse hkam ya ai. Shi hkum nan mung myit pyaw ai hku si wa lu ai. 

Kaga mabyin langai hta Spain amyu sha, Du amyu aru arat kaw na re ai Ignitius a lam_ hpyen găsat kung ai, mungkan arawng aya grai lu măyu ai, mungkan pyaw hpa ni hpe tam shărawng ai. Kalang mi na majan hta hkăla hkrum ai majaw tsi rung rawng nga ai aten ladaw hta sumrai laika ni langai hpang langai hti yu ai; myit pyaw ai lam lu la ai. Hti na laika ma mat jang wenyi makam masham hte seng ai laika buk ni shi hpe hkap jaw ai. Shawng e n kam hti tim kaga n lu mai ai majaw hti ai. Dai zawn laika baw hpan lahkawng hti yu nna măram yu ai. Shawng e shi hti ai sumroi laika ni gaw chyăhkring sha myit pyaw lu nna n grin ai. Pyaw mayu ai lam ni n lu la ai. Makam masham share shagan ni a lam hti ai a marang e myit pyaw myit dik ai lam majing hte grin ai lam hpe hkam sha nu ai. “Mungkan ting hpe madu la lu ai rai tim na wenyi asak sum mat yang hpa akyu nga a ta?” nga ai Chyum Laika e tsun ai ga-yan hpe sung sung myit yu nu ai. Dai gaw shi a ningmu hte shi a prat hpe galai shai wa shăngun ai. Jesuit Jau Hpung hpe gaw sharawt da ai Sanpra ai masha tai wa ai. Karai a mungdan hpe mu hkrup la ai wa rai nga ai. Anhte hkum shagu mung, sut lu nga mai na lam hte myit pyaw lam ni hpe tam let n myit mada ai manghkang katut kun, ruyak jamjau hkrum kun, accident hkrum kătut kun, machyi makaw hkrum kun, re ai lam ni hta Karai Kasang hpe tam mu ai, shi a chyeju kumhpa ni hpe hkam sha lu ai lam byin chye ai. Makoi magap nga ai sutgan hpe mu hkrup la ai hte n bung a hka? 

Grau kaja ai, grau reng ai sutli kumhtaw tam nna mu la ai ni kadai ni rai ta? Ya byin nga ai Russia hte Ukraine lapran na majan a hkinjang hpe maram yu ga. Ukraine na Luhansk hte Donetsk mungdaw lahkawng hta lup taw nga ai nhprang sutgan a manu Trillion 23 daram dan a da. Russia mungdan masha ni bungli n galaw ai sha shaning law law sha lu na dăram sutgan ni rawng ai. Dai hpe chye ai Putin gaw shi a mungdan masha mun sen nga si hkam shăngun nna majan gasat shăngun ai. Dai gaw n tara ai amu teng ai; rai tim, reng dik ai nhprang sutgan ni hpe she lu na rai yang, kade mung asum hkam gui ai n rai a hka! Ja hpaga, sun lamu ga, lungseng hpaga galaw ai ni, amyat lu na she rai yang arang shaw na n lăhpawt dum ma ai n rai a hka? England mungdan hkawhkam Edward VIII gaw shi manu shădan dik ai numjan hpe la lu hkra, hkawhkam ting-nyang hpe asum hkam nna daroi darat amyu shayi hte nga sha nu ai. Hkawhkam arawng aya hta shi tsawra ai num jan hpe la lu daw, hkaw ting-nyang hpe pyi asum hkam kau nu ai. 

“Karai a mungdan nanhte a lapran e sha nga nga ai” nga, Madu Yesu tsun ai. Tinang hta byin wa ai mabyin maka amyu myu hta Karai a mungdan hpe mu hkrup la lu ai zawn, “Ngai gaw hkrun lam re ai; tengman ai lam rai li ai; asak mung rai li ai” nga, tsun ai Madu Yesu kaw na sutgan majing hpe tam la ra ga ai. “Ngai gaw sumnung ai hte shăgrit shănyem ai wa rai nga ai; ngai kaw na shărin la mu, ngai nanhte hpe bansa ai lam jaw na” nga nna mung, “Ngai gaw sabyi ru madung rai li ai; ngai hta jung noi nga mu” nga nna mung, kaga sutgan amyu hkum sumhpa a ningpawt re ai lam mung tsun da ai. Shi a lam hkaja sawk săgawn nna tam shakut jang sha, dai sutgan ni hpe lu la mai ai. Tinang a hkum hpe ningdang nyet kau ai amu ni, tinang a arawng aya, nga-mu nga mai lam ni hpe asum hkam kau ra wa jang asum hkam gui ra na ga ai. Reng grau ai baw hpe she lu na rai yang, hpa hpe mung asum hkam gui ra ai lam hpe sharin ya ai.

Sumru yu na matu:
•Hkum hkrang hta kădawn ai shaman chyeju ni hpe hpyi la chye ga ai; wenyi hte seng ai shaman chyeju ni, jaw ai n jaw ai, kaja ai n kaja ai hpe ginhka chye ai nyan hpaji hpyi chye ga ai kun?
•Karai a mungdan anhte a lapran e nga nga ai, ngu ai lam hpe gara hku madi madun dan lu na rai ta?

2023: PRANWAN LADAW LABAN (17) NA CHYUM LAIKA

PRANWAN LADAW HTA LABAN 17 
July 30, 2023
CHYUM MUNGGA DAW 1

1 Hkawhkam 3:5, 7-12

Ya hti  r ana Hkawhakm laika langai  hta na rai nga ai.
Gribeon shara e, Madu Karai Kasang gaw yupmang hta, Shawlumon kaw dan pru nna tsun ai, Ngai nang hpe hpa jaw na hpyi e,ngu wu ai. Shawlumon tsun ai, ya chyawm gaw, nye Karai Kasang Madu e, Nang gaw nye wa Dawi a malai, Na a mayam wa hpe hkawhkam shatai ndai. Ngai mahtang ma kaji naw rai  r ana , shang wa, pru wa, lam n chye nngai. Nang lata la ai, n dai hti lu ai, law la ai, myit sawn n hkap lu ai, Na amyu kaba hta, Na a mayam wa lawm nga nngai. Kaja ai the n kaja ai hpe ngai chye ginhka lu nna, na a amyu masha hpe chye jeyang na, hpaji beng-ya rawng ai myit, na a mayam wa hpe jaw ya e law! Ndai galu kaba ai Na a amyu hpe kadai jeyang lu na rai ta? Ngu hpyi wu ai. Shawlumon dai lam hpyi ai majaw shi ga Madu a man e mai kaja nga lu ai. Karai Kasang gaw, ndai lam nang hpyi nga ai rai nna, asak galu ai, sutsu sut lu ai, na a hpyen ni hpe sat kau lu na lam nang n hpyi ndai, tara dawdan lu na lam chye ginhka lu hkra hpaji byeng-ya hpyi ndai majaw, nang hpyi ai the maren ngai jaw sade ai. Ngai nang hpe hpaji  byeng-ya rawng ai the chye chyang ai myit jaw ni ai. Nang zawn hpaji rawng ai, na a shawng e kadai n nga, na a hpang e kadai n  r ana ra ai.
Karai Kasang a Mungga rai nga ai.

CHYUM MUNGGA DAW 2

Roma 8:28-30

Ya hti na gaw Roma ni kaw San Pawlu shagun dai ai laika hta na rai nga ai.
Shakyet da sai hte maren, shaga la sai, Karai Kasang hpe tsaw ra ai ni a matu, yawng mayawng mai kaja hkra jawm byin wa sai anhte chye ga ai. Tinang a Kasha gaw kahpu kanau lanlak hta e, alat ningshawng tai u ga, mi moi na htang da sai ni hpe, shi a Kasha a gawng shingyan hte bung na matu, shi shanhte hpe san da chyalu rai sai. San da chyalu ni hpe shaga la mu ai. Shaga la sai ni hpe dinghpring shangun ya mu ai.
Karai Kasang a Mungga rai nga ai.

KABU GARA SHIGA

Mahte 13:44-52

Ya hti na gaw Mahte a laika hta na Kabu Gara shiga rai nga ai.
Lamu mungdan gaw, ga dachyawk hta makoi da nna, masha mu hkrup ai hte bai makoi da ai sut gan hte bung nga ai. Kabu gara wa nna, shi lu malu hpe dut kau nhtawm dai ga dachyawk hpe mari la wu ai. Bai lamu mungdan gaw kaja reng ai kachyi hpe tam ai hpaga la hte bung ai. Manu kaba ai kachyi langai mi hpe mu jang, nhtang wa nna tinang lu malu dut kau nhtawm, dai hpe mari la ai. Bai, sumsing lamu a mungdan gaw, nawng hta e kabai bang nna, nga amyu myu hpe magawn la ai sumgawn hte bung nga ai. Dai hpring chyat nga yang, shanhte gaw hkarang de karawt la mu ai rai nna, dung nga let, kaja ai baw hpe mung hta e bang da nna, n kaja ai baw hpe, kabai kau mu ai. Dai hte maren lamu ga htum na aten hta e byin na ra ai: Lamu kasa ni pru sa nna, ding hpring ai ni a kata na, n hkru ai ni hpe lata karan da na mu ai rai nna, wan htung hta kabai bang kau na ma ru ai: dai yang e hkrap ngu hkrap ngoi ai hte wa udik ai gaw rai nga ai. Ndai lam mahkra hte hpe, nanhte chye na da mu ni? Ngu nna san mu yang, shanhte gaw, Chye na nga ga ai, ngu mu ai. Bai shi gaw, dai rai nna sumsing lamu mungdan a matu sape tai sai laika ka ai sara kadai mung nta madu rai nga ai hte tinang a sut dek hta na, nnan baw mung dingsa baw mung shapraw ai wa hte bung nga ai, ngu nna shanhte hpe tsun mu ai.
Madu a Kabu Gara shiga rai nga ai.

2023: PRANWAN LADAW LABAN (16) NA MUNGGA

Shinggyim hpung/hpawng shagu hta hkan nang hkan sa ra ai tara matsun ni nga ai. “Tara gaw tara” ngu, tara/upade hte tup hkrak jeyang dawdan mara jaw ra ai, ngu jang, masha kau mi a matu tara yawng hpe hkan shătup na n mai byin na rai nga ai. Tara/upade hpe shăkya kau, tara tawt ai ni hpe mara jăhpa kau ya ai rai yang, masat da ai tara/upade mahtang kya mat na rai nga ai. Jeyang dawdan mara shăgun ai lam hta, tara/upade hte matsan dum hkyamsa jaw ai lam, ndai lahkawng a lam hpe dinglik sawn shen lu na matu myit jahprang ya ai.

Hpaji Byeng-ya Laika hta ning nga tsun da ai, “Nang (Madu Karai Kasang) gaw atsam ningja a ru ningpawt she rai tim, matsan dum ai hte tara jeyang ai….shing rai, dinghpring dum ai ni gaw myit galu myit mai ra ai lam hpe nang sharin ya lit dai” nga ai. Kabu Gara Shi-ga hta hkau-na madu gaw ning nga ai, “Tsing hpun ni hpe mam hpun ni hte arau tu kaba shăngun mu; mam dan ten hta mam tum ni hpe mamdum kaw lahkawn bang lu na, tsing hpun ni hpe shăbawn nna wan nat kau lu na” nga ai.

Dinghta ga hta kaja ai masha ni/ n kaja ai masha ni, kaja ai baw/ n kaja ai baw, ngu nna galoi mung a nga nga na rai nga ai. Bai kaja ai, ngu ai masha langai hta mung ra rawng gawng kya ai lam ni kăpyawn nga ai; dai hte maren, n hkru n kaja ai, ngu ai masha langai hta mung kaga masha ni hte grup-yin hpe kaja ai akyu jaw chye ai baw ni kăpyawn lawm nga na re. Ra n rawng ai, atsam marai yawng a ru ningpawt Karai Kasang pyi gaw shinggyim amyu a ntsa e myit gălu, matsan dum ai myit hte jeyang ai, nga ai. Dai lam hpe chye lu na matu, Chyum Laika kaw na kasi langai hte shadawn yu mai ai__ 

N tara ai hku matsan masha a sagu kasha hpe găshun la nna shi a manam hpe sat jaw ai masha langai a lam_ myihtoi Nathan gaw Hkawhkam Dawi hpe sa tsun dan ai. Dawi ning nga ai, “Shing re ai n tara ai amu, Karai a Tara Kanu (10) hpe tawt lai ai masha gaw si ging ai” nga, jeyang ga tsun nu ai. Myihtoi Nathan htan tsun ai, “Dai n tara ai amu gălaw ai wa gaw nang nan rai taw ai” ngu nna Dawi hpe tsun ai. Dawi gaw masha jan hpe găshun la nna madu wa hpe mung sat kau ai wa rai nga ai. Shi yip da ai mara hpe myihtoi e ăhprun dan ai. Dawi gaw shi a jeyang ga hte maren, shi si ari hte ging dan ai. Shaloi shi tsun ai, “Ngai shut ni ai, ngai hpe matsan dum hkyamsa jaw e law” ngu, hpyi nem ra nu ai.

Dinghta ga ntsa e n hkru n kaja ai baw ni, matse dik ai masha ni hpa rai nga nga ma ta? Karai Kasang gaw matse dik ai masha ni hpe ari jaw, shamyid kau ang ai, ngu nna mung; tinang hpe n tara ai hku galaw ai masha hkăla si mat na mung ra sharawng chye ga ai n rai a hka! Karai Kasang a myit galu hkam shărang ai lam hpe anhte shinggyim masha ni mahtang aput ăngun ngu chye ga ai n rai a hka!
Tara tawt ai ni, shut hpyit lam dam nga ai ni shanhte hpa majaw tara n hkan ma ai kun, mara hta lup taw ai ni hpa majaw shanhte a prat hpe sharai n mai byin taw nga ai kun, ngu ai hkinjang ni hpe shawng săgawn yu, chye na ya ai lam galaw ra ga ai. Maram sawn shen yu mai ai gaw law law nga ai hta mabyin langai a lam hpe ăshin yu ga. Anhte buga masha ni hta nanghpam hpan amyu myu a mayam tai mat ai ni law law nga ma ai. Shanhte dum ninglen shanhte hta byin nga ai n kaja ai lailen hpe sharai la n mai mat sai. Lăgu ai, măsu sha ai, rai găshun ai, masha sat ai du hkra, shanhte a majaw mare lawk hkan e hkrit tsang ra ai lam law law, manghkang law law nga nga ai. Kadai hpe akyu n jaw ai sha htenza nga ma ai. Shanhte hpe kaga masha ni hkrit matsat dik ma ai.

Shanhte dai zawn byin mat wa ai lam hkinjang ni hpe săgawn dat yang, kanu kawa ni atsawm rai hpaji n jaw lu ai, kasha ni hte kaga ga nga ai, dang hkra n maga kau lu ai, nanghpam amyu myu dut jaw ai ni law la ai, bungli kata ai, myit daw ai majaw prat hpe asum jaw kau ai; kanu kawa hta lai nna mare buga uphkang ai ni, makam masham hpung woi ni, shanhte hpe tang du hkra hkan maga ai lam n galaw ya ai, lu lang ai ni htenza hkra, kaji kadun mat hkra ngu ai masing jahkrat ai ni nga ai,….. tsun jat na law law nga ai. Ka-ni ya, tsa-ya ni a mara hkrai ngu n tsun lu ai. Masha uhpung uhpawng ting a ra rawng ai lam ni mung lawm na re.

Shinggyim uhpung uhpawng a nga-sa lailen, myit jasat, gălai shai shangun ai lam n galaw lu ai sha tara gaw tara, upade gaw upade, ngu ai hku nna tara shaja na hkrai galaw jang mung lachyum n pru na re. Matsan masha ni sut lu nga mai hkra, bungli kata ai ni kanbau makan lu shajang hkra, mungdan shimlum hkra, mungshawa masha ni  hpaji chye chyang kunghpan wa lu hkra, shing re ai lam ni hpe n galaw ya lu jang tara tawt lai ai masha law htam nga na sha rai nga ai. Tara gaw tara, upade gaw upade, ngu nna tara tawt ai, ninghkap ai masha ni hpe ladu lai ai ladat hku mara shagun sat agrawm kau ai masa mung she a nga nga. Hpakan maw ginra hta nanghpam tsi mawan dut ai ni, lu lang ai ni hpe sat agrawm kau ai Sabaw Maw labau hpe myit dum shangun ai. “Achoke acha ah-nah ti-mye yay” ngu nna kaja/n kaja n ginhka ai, bawm sharut bun ai masa mungdan law law hta byin nga ai. Mara shăgun hkat loi ai daram, shading sharai na yak la ai n rai a hka!

Kaja ai/ n kaja ai kapyawn nga ai dinghta ga na mabyin ni hta Karai e myit galu hkam sharang ai, matsan dum ai myit hte jeyang ai renghkang ai lam hpe teng sha chyeju shakawn ging ai. Kasi yu la shaman shakyang ging ga ai n rai a hka!

Sumru yu na matu:
• Tinang lu su awng dang wa ai aten hta ninggun kya ai ni, matsan mayan re ai ni a ntsa gara hku mu wa chye ai kun?
• Tinang dinghpring ai hku nga lu ai aten hta, shut hpyit gawng kya ai ni, lam dam ai ni a ntsa gara hku mu ga ai kun? Tinang lu ai arawng aya, ja gumhpraw, awng dang ai lam hpe gara hku akyu jashawn chye ga ai kun?

2023: PRANWAN LADAW LABAN (16) NA CHYUM LAIKA

PRANWAN LADAW HTA LABAN 16 
July 23,2023
CHYUM MUNGGA DAW  1

Hpaji Byeng-ya laika 12:13, 16-19

Ya hti na gaw Hpaji Byeng-ya laika hta na rai nga ai.
Madu e nang hta lai nna, masha mahkra hpe lanu ya ai Karai kaga nnga ai. Nang dawdan ai hpe n tara ai kadai nga na nrai. Na a atsam mahtang dinghpring ai lam a npawt rai nga ai. Nang gaw mahkra a ntsa e up nga ndai majaw, nlang hte hpe hkyemsa ya hkraw nga ndai. Na a kup tsup ai hpe n kam sham, nang hpe chye ai ni n gawn n sawn rai ai shaloi sha, nang n-gun madun ga ndai. Tinang ra ai made n-gun hpe galoi mung shapraw lu ai. N-gun mahkra a npawt daju rai nga tim, Nang matsan dum ai hte daw dan nga ndai, Hkyem sa ai hku shanhte hpe up hkang nga ndai. Dinghpring ai sumnung ra ai lam, ndai amu ni a marang e, Na amyu masha ni hpe Nang sharin ya ndai. Shingrai, shanhte a shut hpyit mara ni a matu myit malai lu na aten jaw nga ai, ngu nna myit mada lu ai lam, Na a kasha ni hpe kaja wa jaw ya nit dai.
Karai Kasang a Mungga rai nga ai.

CHYUM MUNGGA DAW 2

Roma 8:26-27

Ya hti na gaw Roma ni kaw San Pawlu shagun dai ai laika hta na rai nga ai.
Wenyi mung anhte a gawngrun gawng tsang hpe lanu lahku ya nga ai. Akyu hpyi mai ai hte maren anhte nchye hpyi nga ga timung, Wenyi nan n-gup n hkawn ai, myit kraw ga hte anhte a matu hpyi htinglu ya mi ai. Kraw lawang sawk yu chye ai wa gaw, Wenyi a myit hpa re ai chye ya nga ai. Karai Kasang ra ai hte maren, chyoi pra ai ni a matu shi hpyi htinglu ya nga ai.
Karai Kasang a Mungga rai nga ai.

KABU GARA SHIGA

Mahte 13:24-43

Ya hti na gaw Mahte a laika hta na Kabu Gara shiga rai nga ai.
Yesu tsun ai, Sumsing lamu a Mungdan, hkauna hta nli kaja gat ai wa hte bung nga ai. Masha ni yup pyaw nga yang, gumlau wa sa nna, mam hta tsing tum gat bang nhtawm pru mat wa ai. Ya mam maku tu wa nna, asi si jang, tsing mung dan dawng wa ai. Nta madu a mayam sa du nna, Madu e na a hkauna hta e, nli kaja she nang gat sai n rai ni? Hpa rai tsing tu a ta? ngu mu ai. Gumlau wa di nu ai, ngu tsun mu ai. Shanhte gaw, anhte dai hpe magang kau na, hkraw nni? ngu wu ai. Shi mahtang, n rai, nanhte tsing hpe baw yang, mam shalawm kau lu ai. Naw nga u ga. Dai lahkawng nmut ta du hkra kaba wa mu ga. Nmut ta du jang, tsing hpe shawng dan makawng nna, nhtan nhtawm wan hta nat kau mu. Mam hpe chyawm gaw nye a dum hta mahkawng da mu, ngu nna mam dan ai ni hpe ngai tsun na mawe ai, ngu mu ai. Ga shadawn kaga mung, shi shanhte hpe kahtap tsun mu ai gaw, Sumsing lamu a mungdan gaw, masha la nna shi a yi hta hkai ai chyinghkrang tum hte bung nga ai. Dai gaw tum abaw shagu hta kaji htum ai tum rai nga ti mung, kaba wa jang, shatmai lap ni hta grau kaba wa lu ai rai nna, hpun tai nga ai ntsa malen na u ni mung, de a lakung lakying ni hta sa dung nga ma ai, ngu mu ai.

Ga shadawn kaga mung, shi shanhte hpe tsun mu ai gaw, Sumsing lamu a mungdan gaw, numsha e la nna, muk shading dang masum hta bang dat wu yang, mahkra hte hpe shawawm dat lu ai matsi hte bung nga ai, ngu mu ai. Shing rai lam shagu Yesu gaw ga shadawn hku hte, shawa masha ni hpe tsun dan mu ai: kaning rai n me law, Nye a n-gup ga shadawn the ngai hpaw nna, Ginding aga nnan lat kaw nna, makoi da ai ga hpe ngai htai dan na nngai, nga nna myihtoi tsun ai ga dik wa u ga, ga shadawn hte n rai yang gaw, shi shanhte hpe hpa mung n tsun dan yu ai. Dai hpang shawa masha ni hte shi hka wa nna, dai nta hta e shang mat wa ai, Shaloi shi a sape ni shi kaw sit sa wa nna, Hkauna hta e tu ai tsing a ga shadawn lam anhte hpe htai dan mi, ngu mu ai. Shi htan nna, Nli kaja gat ai wa gaw, dai Masha Kasha rai nga ai: hkauna gaw, mungkan ga, rai nga ai: kaja ai nli gaw, dai mungdan a kashu kasha ni rai nga ma ai: tsing gaw, dai n hkru ai wa a kashu kasha ni rai nga ma ai: dai hpe gat ai gumlau wa gaw, Nat rai nga ai; nmut ta gaw, lamu ga htum na aten rai nga ai; mam dan ai ni gaw, lamu kasa ni rai nga ma ai. Dai tsing hpe gumdin la nna wan nat kau ai zawn, lamu ga htum na aten hta e mung, byin na ra ai. Dai Masha Kasha gaw shi a lamu kasa ni hpe shangun dat na rai nna, shanhte gaw shi a mungdan hta na, myit kataw shangun ai baw hte tara hte n bung ai amu galaw ai ni nlang hte hpe, lata shaw la nhtawm, wan htung hta kabai bang da na ma ru ai; dai yang e hkrap ngu hkrap ngoi ai hte wa udik ai gaw, rai nga ai. Dai shaloi e ding hpring ai ni gaw shanhte a Kawa a mungdan hta e, ajan zawn htoi kabrim na ma ra ai; na tu ai wa gaw na la u ga.
Madu a Kabu Gara shiga rai nga ai.

2023: PRANWAN LADAW LABAN (15) NA MUNGGA

Karai Kasang hpan da ai amu yawng gaw shi a shi akyu rawng ai hku hpan da ai. Lamu kaw na htu hkrat ai marang shing, n rai numri, lamu ga hpe madit ya nna tsingdu tsingman, hpun kawa, namlaw namlap ni hpe tu prut, tsit lali shăngun let, apu asi ni ja tsawm wa nna shinggyim masha hte dusat amyu ni sha lu na matu rai nga ai. Dai hte maren, Karai a mungga mung masha a myit masin hta jung nna prut ja wa lu na: san seng ai myit masin, sumnung shingdi ai alai, tsawra matsan dum chye ai alai, chyeju htang chye ai alai, dai zawn re ai wenyi a apu asi ni si jaw na matu Karai Kasang myit mada ai. Numri hte marang gaw shinggyim masha hte dusat ni hpe akyu n jaw da ai sha, salu tai nna lamu de mawng lung wa lu na n rai; Karai a mungga hpe mung lahpawt lama di kau lu na n rai, ngu ai gaw mungga madung rai nga ai.

Kabu Gara Shi-ga hta nli tum gat ai wa gaw kanang ang yang ang, li-tum law law hpe gat dat ai. Madu Yesu gaw shi du ai shara shagu hkan, mu hkrup ai masha ni yawng hpe Karai a mungdan hte seng ai mungga hpe n-hpaw n-ya hkaw tsun dan ai. Madat hkap la ai ni nga ai zawn, na la ninglen na-layawng yawng ai ni mung law law rai ma ai. Mungga hkap madat la ai ni hpan amyu myu nga ma ai: myit malai lu nna tinang nang a asak aprat hpe kaja ai maga gălai shai wa ai ni nga ai zawn, mungga gaw manu dan ai lam chye la ninglen tinang nang a nga-sa lailen hpe galai shai shangun na n kam ai ni mung law law nga ma ai.

Dai ni, anhte a prat hta byin nga ai lam ni hpe myit yu ga. Lai lam ntsa e hkrat ai nli tum__ Nawku Hpung a poi kaba ni, pyaw hpa poi, dawsha poi ni nga ai aten hta sha nawku sa ai hpung masha ni hte n bung a hka? Lung rawk a ntsa e hkrat ai nli tum__ Chyum mungga gaw asak jaw ai mungga, tengman ai mungga re ai chye ninglen, tinang hkam la ai ningmu hpe n tat kam ai, tinang pyaw len dum ai n kaja ai nga-sa lailen hpe n tat kau kam ai ni hpe tsun ai n rai a hka? Ju sumwum hta hkrat ai nli tum__ hpa lu hpa sha na, hpa bu hpung na, hpaga dingga, makan bungli, hpaji mahkrun, bungli mahkrun, ja gumhpraw, nga-mu nga-mai lam, ndai ni hta hkrai malawng aten jaw nna makam masham bungli ni hte tsan gang nga ai ni hpe ngu ai n rai a hka? Ga-sau kaja hta hkrat ai nli tum__   makam masham lam hta sharawng ai myit rawng ai, akyu hpyi nawku dawjau ai amu hpe man man galaw ai, tsawra matsan dum garum shingtau chye ai, mai kaja ai amu ni hta shang lawm ap nawng ai, shing re ai ni hpe tsun ai n rai a hka?

Nli tum hpe hkap la ai anhte a myit masin ni, lahta e tsun lai mat wa sai hpan 4 hta tinang gaw gara mahtang kaw ang ai kun? Shing ngu masat kau gaw n mai byin ai. Hpa majaw nga yang, anhte ow kap le kap re ai ni rai ga ai. Hpan maga mi kaw hkrai tup hkrak grin nan nga ga ai n re ai hpe myit dum mai ga ai. Agung alau ni mung hpan law law anhte hpe gunglau ding-yang re ai hte shut kataw ai, n gyeng mat ai aten ni law law she re ai hpe myit dum mai ga ai. Anhte mai kaja ai amu ni law law galaw nga ninglen, tinang n kam tat kau ai n kaja ai lailen lama ma mung lu ga ai hpe myit dum mai ga ai. Mai kaja ai amu re ai, galaw nan galaw ra ai amu ni hpe hprai kau ai aten ni mung law law nga ai n rai a hka!
Karai Kasang maga gaw anhte hpe shadum jăhprang lam matsun ai lam n-hpaw n-ya galaw ya ai; mai kaja ai amu ni galaw lu ai atsam marai hte ahkaw ahkang law law jaw da ai. Karai e jaw da ai chyeju kumhpa ni hpe lahpawt lama di kau ai aten ni law law wa n rai a hka? Ahkying aten hpe lahpawt lama di kau ai, tingkyeng akyu tam ai, lagawn lamawn nga shalai kau ai, lu lawm ai ja gumhpraw hpe lachyum n pru ai hku jai kau ai, shing re ai aten ni law law nga ai n rai a hka?

San Pawlu shadum ai hta, anhte san seng chyoi pra ai hku nga mayu ga ai, mai kaja ai amu ni law law galaw mayu ga ai. Rai tim, mungkan a agung alau mung kaba la ai majaw, anhte shut kataw ai, lamshe shang ai aten mung law law re ai majaw, n hkru n kaja ai baw kaw nna tsep kawp shălawt dat ya na lam hpe sung ai kraw lawang hta madai let ala nga shajang ga ai, nga ai. Ndai hkum shan e gyit hkang da ai lam ni kaw na lawt lu na nhtoi gaw hkum hkrang hpe kau da ai shani e sha byin lu na lam shadum ya ai. Makam masham amu hta n sim nsa shakut ai hte, Karai e nan shălawt dat ai nhtoi hpe akyu hpyi maja let a la nga ra ai lam hpe shadum ya ai.

Sumru yu na matu:
• Ga-sau gaw tinang a sinlum re, nga ai. Dai ga-sau grau grau kaja nna asi grau si wa lu hkra, myit masin hpe gara hku hkyen lajang ga ta?
• Karai a mungga anhte hpe gara hku asak jaw a ta?
• Mungga gaw masha tai wa ai, nga ai. Karai a mungga hpe tinang a ashan asai tai wa hkra gara hku hkan galaw mai a ta?

2023: PRANWAN LADAW LABAN (15) NA CHYUM LAIKA

PRANWAN LADAW HTA LABAN 15 
July 16, 2023
CHYUM MUNGGA DAW  1

Esaia 55:10-11

Ya hti na gaw myihtoi Esaia a laika hta rai nga ai.
Marang hte hkyen gaw, lamu de na htu hkrat nna, dai de bai nwa ai sha, nli gat ai wa hpe nli, makan galaw ai wa hpe sha hpa jaw lu hkra ga hpe madit let, matsun maku shaprut nna asi si shangun ai zawn, nye mungga mung dai hte maren tai na ra ai. Dai ngai hpang de kaman nhtang wa na nrai. Ngai ra ai hku shadik ya na ra ai.
Karai Kasang a Mungga rai nga ai.

CHYUM MUNGGA DAW 2

Roma 8:18-23

Ya hti na gaw Roma ni kaw San Pawlu shagun dat ai laika hta na rai nga ai.
Ndai prat na tsinyam tsindam gaw, anhte kaw e shadan shapraw ra ai hpung shingkang hte shadawn n ding nga ai, ngai myit nngai. Hpan da sai yawng myit ndawt ai hte Karai Kasang a kashu kasha ni paw pru na ra ai hpe ala nga ma ai. Hpan da sai nlang chyawm gaw, hten bya lam npu e, shagrit kau ai hkrum sai. Tinang ngu ai hku chyawm nrai, raitim, hten bya lam de sharen da hkrum ai kaw na, shalawt hkam nhtawm, Karai Kasang a kashu kasha ni a pru lawt ai hpung shingkang hta shang lu na myit mada nga nna, shagrit kau ya ai wa a majaw dai hpe hkam nga ai. Hpan da sai nlang, ya du hkra madai nna gadau gadap rai nga ai hpe anhte chye ga ai. Wenyi a chyeju hkam la ai anhte mung, tinang a kraw lawang hta madai nga nna, hkum hkrang a htingrai htingrat ai lam, kasha yin la ai chyeju hpe ala nga ga ai.
Karai Kasang a Mungga rai nga ai.

KABU GARA SHIGA

Mahte 13:1-23

Ya hti na gaw Mahte a laika hta na Kabu Gara shiga rai nga ai.
Yesu nawng makau e sa dung nga ai. Masha unawng shi hpang de zuphpawng sa wa ma ai. Li langai mi hta Yesu shang dung nga ai. Shawa masha ni mahkra gaw hkyingau hta e tsap nga ma ai. Ga shadawn law law hte shanhte hpe tsun mu ai gaw, Nli gat ai wa gaw nli gat na pru sa wa ai. Gat dat wu yang, nkau mi lam makau e hkrat nna, u ni hta sha kau mu ai. Nkau mi ga nlaw ai lung-rawk kaw hkrt nna, ga nhtat ai majaw, ya jang tu pru timung, jan katen jang krau mat nna ru njung lu ai majaw hkraw si mat ai. Nkau mi ju hpun nhpang e hkrat nna, ju hpun ni tu kaba wa ai hte lim kau mu ai. Nkau mi ga kaja hta hkrat nna, asi si wa ai. Nkau mi dang latsa, nkau mi kru shi, nkau mi sumshi si mayat wa ai. Na tu ai wa gaw na la u ga, ngu mu ai. Shaloi shi a sape ni sit sa wa nna, Ndai ni hpe hpa rai ga shadawn hte tsun dan mu ta? Ngu nna shi hpe san mu ai. Shi htan nna, Sumsing lamu a mungdan a sung htum ai lam ni hpe chye na shara, nanhte a matu hku nga malit dai; wora ni a matu chye na shara n hku malu ai. Kaning rai n me law, lu ai wa kadai hpe mung naw jat jaw na rai nna, shi law wa na ra ai; n lu ai wa kaw na pyi shi lu ai hpe naw shaw la na ra ai.

Dai rai nna shanhte mu lamu n mu ai hte, na lana n na la nna, n chye na ma ai majaw, ga shadawn hku ngai shanhte hpe tsun dan mawe ai. Shing rai, Esaia tsun ai myihtoi ga gaw shanhte hta dik ang wa sai. Shi gaw, Nanhte na lana n chye na la na mu ai, Yu layu e n mu na mu ai, Kaning rai n me law, ndai amyu gaw, Tinang myi hte n mu lu na hte Na hte n na lu nna, Myit hte n chye na lu mu ga she, Shanhte myit n kayin lu nna, Ngai shanhte hpe n shamai mai lu hkra Shanhte a myit mak nga nna, Shanhte a myi pat nga malu ai, nga ai. Nanhte a myi mu lu ai hte, nanhte a na, na lu nga malit dai majaw, a nga myit dai. Nanhte hpe ngai teng teng tsun made ga, nanhte mu lu ai arai ni hpe, myihtoi hte dinghpring ai masha law law wa, mu mayu timung, n mu ma ai; nanhte na lu ai lam ni hpe mung, na mayu timung,  n na lu ma ai.

Dai rai nna dai nli gat ai ga  shadawn hpe madat la mu. Kadai mung, dai mungdan lam hpe na ninglen n chye la yang gaw, dai n hkru ai wa sa du nna, shi a myit hta gat ai nli hpe shaw la kau wu ai: dai gaw lam makau e gat ai nli a lam gaw, dai ga hpe na nna, shaloi jang kabu gara ai myit hte hta la wu timung, kraw hta e ru n jung ai majaw, ladaw mi sha nga nga nhtawm, dai mungga a majaw ru tsang ai hte zingri zingrat hkrum jang, shaloi e myit kataw re ai wa hpe rai nga ai. Ju hpun hta gat ai nli a lam gaw, dai ga hpe na la ti mung, ndai prat na myit tsang ai hte hkalem kau ai sut gan gaw  dai mungga hpe lim kau nna, asi n si lu ai wa hpe rai nga ai. Ga kaja hta gat ai nli a lam chyawm gaw, dai ga hpe na la nna hta la nu ai hte, gaja wa teng teng asi si nna, nkau mi dang latsa, nkau mi kru shi, nkau mi sumshi jat wa ai wa hpe, rai nga ai, ngu wu ai.
Madu a Kabu Gara shiga rai nga ai.

2023: PRANWAN LADAW LABAN (14) NA MUNGGA

Myit masin wenyi hta shagrit shanyem lu ai ni chyu sha, Karai Kasang a mungsung, Karai a mungdan a lam hpe chye la lu na rai nga ai. Myit tsaw myit dap ai ni, tinang a atsam, machye machyang, ja gumhpraw, arawng power hpe kam ai ni, Karai e tsun hpaw dan mayu ai, sharin ya mayu ai lam ni hpe chye na hkap la na n loi ai, shanhte chye dum, lu dum ai majaw rai ma ai. Sumsing mungdan het seng ai lam ni hpe hkaja tam la lu na matu, grit nyem ai myit masin teng sha rawng ra ai lam hpe matsun ya ai. Hkum shan a marin ai myit hta len mat ai ni gaw si lu na rai nga ai; dai Wenyi chyeju atsam hte hkum shan a marin ai myit hpe kau da nna, wenyi asak mahkrun hta hkawm sa ai rai yang hkrung nga lu na, nga, San Pawlu sharin ya ai.

“IP Man” ngu ai sumla hkrung series mu yu ai ni nga na ma ai. Mying gumhkawng dik ai hkyen hpaji ninghkrin Bruce Li a sara rai nga ai. Sumla hkrung mabyin hta, IP Man gaw Foshan mare buga masha; shi gaw II ngu na mungkan majan prat hta, sut masa yak ai majaw gumhpraw chyai ai Hong Kong de htawt nga ai. Shi gaw hkyen hpaji sharin jawng hpaw hpang wa ai aten hta Hong Kong na kaga sara ni ninghkap ma ai. Matsan ai buga na masha wa lu su nga mai dik ai Hong Kong masha ni hpe hpa manu dan grau ai sharin ya lu na kun, ngu ma ai. IP Man gaw grai si mani ai. Shi hpe sa shingjawng hpaji chyam ai ni hpe mung laja lana n di ai, dang daw, akya kya sha di dang la ai ladat hte sharin shaga dat dat di ai. Marai kade sa chyam tim shi hpe dang lu ai masha n nga ai. Galu ai hku kaga lam ni hpe n tsun sai. Hkyen hpaji yawng hta kungkyang grau dik ai lam hpe chye ya ai brang lawn langai gaw Bruce Li re; shi shăgrit shănyem lu ai, kamhpa ai myit hte sharin la ai. Jahtum e awng dang kungkyang dik ai hkyen hpaji ninghkrin tai wa ai. Shăgrit shănyem n lu ai kaga hkyen chye dum ai ni law law, IP Man kaw na sung dik dam dik ai hkyen hpaji, n lu la ma ai. Bruce Li chyu sha sara kaw na hkringhtawng dăgraw la lu nu ai.

Sumsing mungdan kaw na yu sa ai wa, Yesu, shi chyu sha matsaw lahta tsang mungdan, Karai a mungdan a lam chye dik htum ai wa rai nga ai. Shi kaw na sharin la na lam, yawng hpe saw shăga ai. Shi hkum nan Karai a Kasha rai ninglen, shăgrit shănyem dik ai wa, sumnung shingdi ai wa re ai majaw, shi kaw na sharin hkam la mu, nga ai. Sharin achyin hkam la ai ni hpe bansa shăngun na, nga, saw shaga ai.  Dingman ai Hkye La Madu Messiah du sa ai shaloi, shi gaw, lawze jawn nna Yerusalem de du  shang wa na lam, myihtoi Zakariah tsun da ai. Awng padang ninglaw lu ai wa, kaga hpyen ninggun ja dum ai ni yawng hpe dang kau na wa gaw lawze sha jawn na re, nga ai. Shi gaw sumnung shingdi ai wa re, nga nna tau tsun da ai. Hpyen găsat gumra n jawn ai; lachyum gaw, găsat laknak ni hte, hpyen ninggun hte rai nna hpyen ni hpe shădang la na n rai. Shi a sumnung shingdi ai alai, tara rap-ra ai alai, hpyen ni hpe matai n dawp ai ladat, …shing re ai hku nna awng padang hkam la na wa re ai lam, myihtoi ga rai nga ai. Kungla shaman poi nhtoi na mabyin/mungga hte shadawn yu mai ai. Yesu gaw Pilatu a tara rung e tsun ai ga, “Ngai a mungdan ndai dinghta ga hte n seng ai” nga ai. Myi hte n mu lu ai, myit hte n hkawn lu ai sumsing mungdan a lam chye na hkap la lu na matu, Karai e n lau la yang, Karai e jahtoi ya ai n rai yang chye lu na n mai byin ai, ngu, shawng hkam la ra ga ai. Dai hta shăgrit shănyem ai lam rai nga ai.

Yesu gaw Kawa hpe chyeju shakawn ai hta, ma kaji zawn hkam măna madat kam ai ni hpe sha sumsing mungdan a sung dik ai lam ni hpe hpaw madun dan ai, nga ai. Bai, kaga shara hta tsun da ai, ma kaji zawn n tai lu ai kadai mung, Karai a mungdan de n shang lu na, nga ai. Masha a sung dik ai kraw kata na hpang găra ai lam ni hpe dinghta ga na hpaji machye machyang, ja sutgan ni e n jaw ya lu ai. Yesu gaw mungkan ga na n hkru n kaja ai lam ni hpe hpyen găsat ladat hku adip arip di nna shadang la ai n rai. Tsawra dinghpring ai, sumnung ai alai, mara dat ya ai alai, matsan dum chye ai alai, dai zawn, wenyi hte seng ai atsam marai hte shădang la ai wa rai nga ai.

Yesu shi jaw ya na bansa ai lam, ngu ai gaw, myit masin wenyi a sung dik ai kaw na hpang gara ai baw ni hpe jaw ya ai lam re. Yesu kaw n sit sa ai, shi kaw na n sharin la ai sha, dinghta ga na masha a nyan, hpaji, atsam hte kabu myit dik lu ai lam hpe tam ai gaw, li la ai lit gun da ai hte bung ai; hkiba la na re. Myit masin wenyi a matu ra kadawn dik ai chyeju kumhpa ni hpe hkam la lu ai gaw bansa ai lam majing rai nga ai.  
Sumru yu na matu:
• Yesu tsun ai ma kaji ni, nga ai gaw kadai kaning re ai ni rai ma ta?
• Lit-li gun ai ngu ai hpa hpa hpe ngu măyu ai kun? Tinang gun da ai, n jahkrat kau lu ai lit ni hpa hpa rai ta?
• Yesu shi bansa jaw na, nga ai; prat hta gara hku kade lang hkam sha lai wa sai kun? Tsun dan hkat mai ai.

2023: PRANWAN LADAW LABAN (14) NA CHYUM LAIKA

PRANWAN LADAW LABAN 14
July 9, 2023
CHYUM MUNGGA DAW 1

Zahkaria 9:9-10

Ya hti na gaw myihtoi Zahkaria a laika hta na rai nga.
Ziun shayi sha e nachying kabu gara nga u, Yerusalem shayi sha e garu jahtau u! Na a hkawhkam wa nang hpang de du na ra ai. Shi gaw dinghpring nga nna hkye hkrang la ai lam shapraw nu ai. Shi gaw sumnung myit rawng nna, lawze ntsa e, rai sa, lawze kanu a kasha ntsa e, jawn nga ai. Ngai gaw Ehprim a hpyenleng ni hpe, Yerusalem a gumra ni hpe, jahtum kau na nngai. Hpyen ndan mung agrawp kau hkrum na ra ai. Shi gaw maigan amyu ni hpe ngwi pyaw lam tsun dan nna, namukdara kaw nna, namudara du hkra, Uhprat hkanu kaw nna, lamu ga htum hkra up nga na ra ai.
Karai Kasang a Mungga rai nga ai.

CHYUM MUNGGA DAW 2

Roma 8:9,11-13

Ya hti na gaw Roma masha ni hpang de San Pawlu shagun dat ai laika hta na rai nga ai.
Nanhte hta Karai Kasang a Wenyi rawng nga yang gaw, nanhte hkum shan hta n rai, Wenyi hta nan rawng nga myit dai. Langai ngai gaw Hkristu a Wenyi n rawng yang dai wa shi hte n seng nga ai. Dai hta kaga, si mat ai ni kaw Yesu hpe hkrung sharawt la ai wa Wenyi gaw, nanhte hta e rawng nga a yang gaw, si mat ai ni kaw na Hkristu Yesu hpe hkrung sharawt la ai wa gaw, nanhte hta mung rawng nga ai Wenyi a lata hte nanhte a si chye ai hkum hkrang ni hpe mung, jahkrung ya na marin dai. Hpu nau ni e, hkum shan a myit hkan na matu, hkum shan a hka kap ai ni rai nga ga ai n rai, Hkum hkrang hte seng ai asak sha hkrung nga myit yang, nanhte sin a rai nga myit dai. Hkum hkrang shan a arawn alai hpe Wenyi hte sat kau myit nanhte hkrung nga na marin dai.
Karai Kasang a Mungga rai nga ai.

KABU GARA SHIGA

Mahte 11:25-30

Ya hti na gaw Mahte a laika hta na Kabu Gara shiga rai nga ai.
Yesu tsun ai, lamu hte ga a Madu, Wa e, hpaji bengya rawng ai ni hte myit kunghpan ai ni kaw na, ndai lam nang makoi magap da nhtawm ma kaji ni hpe madun dan ai majaw, ngai nang hpe shakawn kungdawn nngai. Ndai Wa e, Nang tsaw ai hku rai nga lit dai. Nye Wa ngai hpe arai yawng mayawng ap ya ni ai. Wa hta kaga dai kasha hpe kadai n chye lu ai. Dai kasha hte dai kasha jahtoi ya mayu ai masha hta kaga, Wa hpe mung kadai n chye lu ai. Hki ba nna lit li gun ai ni yawng hte e, ngai kaw wa marit! Ngai nanhte hpe bansa shangun na made ai.  Ngai sumnung ai hte myit gyip nga nngai.  Nye a lam sharin la mu. Nanhte a myit masin bansa ai hkrum na malit dai. Nye a kandang hpai loi ai hte, nye a lit mung tsang nga li ai, ngu mu ai.
Madu a Kabu Gara shiga rai nga ai.

2023: PRANWAN LADAW LABAN (13) NA MUNGGA

“Ndai kaji dik ai ni hta na marai mi, ngai a sape re ai majaw, shi hpe lu-hka htingkap mi jaw ai wa gaw teng sha, shabrai kumhpa n lu la ai n nga na ra ai”.

Anhte masha shada garum hkat ai ngu ai shaloi, jinghku daw ai shing n rai tinang chye ai hte hku hkau ai masha, arawng aya lu ai masha, tinang hpe akyu bai htang jaw lu ai masha, shing re ai ni a myi-man tau nna garum chye ai malawng maga n rai a hka! Kaning re ai masha hpe rai tim, ra kadawn nga ai masha langai mi hpe garum ya ai majaw, Yesu shi kaw na shagrau kumhpa n lu la ai n nga na, nga, Madu hkum nan ga-sadi jaw ai. Yesu gaw masha yawng a matu si hkam nu ai; dai majaw anhte hkrung nga ai lam gaw Yesu hta ru jung nna asak hkrung nga ra ai, Chyum mungga hku nna sharin ya ai.

Kalang mi na aten hta (1980 a hpang) Dominican mungdan e nnang nawn kaba byin ai majaw nta law law daw ăgrawp mat ai hte masha law law si mat ai. Asak lawt ai ni hta John, ngu ai la kasha langai mung lawm ai. Kanu yan kawa hpe tam n mu ma ai majaw, shan hpe si ai/mat ai jahpan de bang kau ai. John gaw jahkrai ma tai mat ai; kawa e du kaw gali ya da ai magri pa chyen mi sha noi ngam la lu ai. Jinghku ni mung jamjau hkrum mat ai majaw John hpe bau kaba na n mai byin ai majaw, shi hpe jahkrai ma bau ai jawng de ap ya kau ma ai. John gaw gam kaja ai; jahkrai jawng kaw grai na hkra n nga ra ai; America kaw na lu su ai htinggaw shi hpe bau la na matu America de woi mat wa ai. Kasha majing zawn tsawra hkrum ai; bau kanu kawa gaw John ra ai mahkra jaw ai. Dai  majaw shi gaw hpaji atsawm rai sharin la lu nu ai.

John gaw lu su ai htinggaw masha tai wa ai majaw, matsan masha ni a yakhkak jamjau ai lam hpe n chye ai sha kaba wa ai. Matsan masha ma manang ni hte n chye hkau ai; lam kau hkan hpyi sha ai mawhpyi ni hpe mung akyu n rawng ai, kadai hpe hpa akyu n jaw ai ni, ngu, sawn la ai wa re. Hpaji janmau gup la ngut ai htawm, shi a shangai dai-daw buga Dominica de sa chyai na myit lu ai. Shi a sumtsaw jan hte rau rai Dominica de sa mat wa ai. Shi loi pyi n myit mada ai mabyin hkrum katut nu ai: lam makau e n tsawm la ai mawhpyi dingla langai hpe mu hkrup ai. Mawhpyi dingla wa a du e gali da ai magri pa achyen hte shi a du e găli da ai magri pa chyen gaw raw sha bung ai hpe mu hkrup ai. Magri pa achyen a lam dingla wa hpe san yu yang John shi a labau nhpang hte mabyin hpe chye la ai hta, kawa majing re ai lam chye la nu ai. Mau n ma, hkap la na yak yak re ai mabyin. Sumtsaw jan a man e kawa re ai lam yin la n gui ai. Dai majaw dingla wa hpe Dollar tingsen loi sha jaw da nna America de htang wa mat ai.Matsan masha ni hpe matsan n dum chye ai John, mawhpyi ni hpe akyu n rawng ai masha ni, ngu, yu mătsat ai John, shi mu da ai mawhpyi gaw kawa majing re ai hpe sa mu hkrup ai majaw yawn hkyen kaba hkrum nu ai. Mu hkrum ninglen kawa majing hpe “Wa e” ngu n tsun da lu ai. Myit yu magang n rai dum magang re ai majaw, kawa hpe kalang bai sa hkrum na dawdan nu ai. Dai lang sumtsaw jan n lawm ai shi hkrai sa mat wa ai. Kawa mawhpyi hpyi sha ga ai lam-yan hkan tam hkawm ai; n mu ai jahtum grup yin masa chye ai masha langai hpe san yu yang lai sai shata hta mawdaw adawt hkrum nna si mat sai lam tsun dan ai. Yawn n ma; hkrap myi-prwi si ra rai hkrap kau nu ai. Amyu n daw, madang n bung re ai masha ni hpe n tsawra lu ai, yu matsat ai masha, kawa nan mawhpyi tai let si mat ai. Yesu a myi-man tau nna chye tsawra ai, matsan dum garum chye taw gaw!

Hkawhkam labau hta myihtoi Eliya hpe hkung ga hkap bawp la ai Shunem amyu shayi hpe Eliya chyeju htang ai; maudung re ai numjan hpe shăman ya ai majaw shadang sha lu na ga-sadi lu la nu ai. Myihtoi hpe hkap la ai majaw myihtoi kaw na shabrai kumhpa lu la ai. Yesu e sharin ya ai hku rai yang, lu su ai masha a myi-man tau nna, arawng aya lu ai Du magam a myi-man tau nna, jinghku daw ai/ hku hkau ai majaw shanhte a myi-man tau nna hkap jaw garum ya ai rai yang, shanhte kaw na shabrai kumhpa hkam la lu na, nga ai. Shawng e tsun dan ai John a lam, shi gaw kawa e shăman ya lu ai hpa chyeju kumhpa mung n hkam la lu ai; Yesu a myi-man hpe mung n tau ai. Hpa kaning re ai shăman chyeju mung n lu la ai. Yawn hkyen myit n dik ai lam sha lu la nu ai.

Yesu a myi-man tau nna jinghku n daw tim, n chye n hkau ai rai tim, ra kadawn jamjau hkrum ai wa hpe hkap bawp garum ya ai amu a majaw Madu shi kaw na shabrai kumhpa n lu la ai n nga na, nga ai. Madu shi jaw ya na chyeju kumhpa mahtang kade she grau na hpe myit yu mai ga ai.

San Pawlu shadum ya ai hta, yawng mayawng gaw Hkristu a hkye hkrang la ai chyeju kumhpa hkam la lu sai majaw, Yesu a myit masa hta jawm pawng let Karai Kasang a hpung shingkang a matu mara asak hkrung nga ra ai lam, sharin ya ai. Kashin kamun a marang e, anhte gaw Hkristu si ai hte bai hkrung rawt ai asak hta jawm pawng ga ai majaw, asak ningnan hta hkrung nga ra ga ai, nga ai. Amyu, madang ginhka ai myit hpe hprang kau nna yawng hpe tsawra hkap la chye ai myit hpe ban bang jat la ra ga ai. 
Sumru yu na matu:

•Tinang galaw ai matsan dum amu, mai kaja ai amu, garum jaw sak jaw ai amu, …ndai amu ni hta Karai a myi-man tau nna galaw ai kun, masha myiman tau ai malawng kun?
•Myu tsaw, jinghku maga, tinang a makam masham hpe maga, shing re ai amu ni hta hpyau mat jang byin chye ai manghkang ni hpa hpa rai kun? Yesu a myi-man tau nna galaw dat ai amu ni a shabrai kumhpa hkam la yu ai lam alak tsun dan na hpa hpa nga ai kun?

2023: PRANWAN LADAW LABAN (13) NA CHYUM LAIKA

PRANWAN LADAW LABAN 13 
July 2, 2023
CHYUM MUNGGA DAW 1

2 Hkawhkam 4:8-11, 14-16

Ya hti na gaw Hkawhkam laika lahkawng hta na rai nga ai.
Lani mi, Elisha gaw Shunem mare de lai sa wa sai. Dai yang arawng lu ai numsha langai mi nga ai. Shi Elisha hpe hkap galaw daw wu ai. Elisha galoi mung dai lam hku lai wa yang, dai nta hta shang manam nga ga ai. Dai num madu wa hpe tsun ai. Ndai hku lai lai re ai wa gaw Karai Kasang a chyoi pra ai masha rai nga ai hpe ngai dum she ai. Ntsa htap hta gawk kaji langai galaw nna, shi a matu yupku, shaku, lahkum hte pyending ni tawn da ga. Shi an kaw shang manam yang, dai gawk hta shang yup mai ai, ngu wu ai. Kaja wa dai lam hku bai lai ai shani e, shi dai gawk hta shang nna yup nga ai. 
Dai rai Elisha gaw, shangun ma Gehazi hpe, shi a matu hpa galaw shana ga ta? ngu wu ai. Gehazi gaw, shi kasha n lu nga ai. Madu wa mung dingla wa sai, ngu wu ai. Shaloi Elisha gaw, bai shaga u, ngu wu yang, num jan gaw chyinghka lam e tsap nga ai. Myihtoi wa gaw, nang htaning ndai aten hta e, shading sha ba na rin dai, ngu wu ai. Numsha gaw nye madu, Karai Kasang a masha wa e, na nchyang jan hpe mashu ga kum tsun et, ngu wu ai. Dai num sha na-um na-sin wa nna, ladu hkrum jang, Elisha tsun ai hte maren shadang sha shangai wu ai.
Karai Kasang a Mungga rai nga ai.

CHYUM MUNGGA DAW 2

Roma 6:3-4, 8-11

Ya hti na gaw Roma ni kaw San Pawlu shagun dat ai laika hta na rai nga ai.  
Yesu Hkristu hta kashin kamun hkam la ai anhte nlang hte gaw, shi a si hkam ai hta kashin kamun hkam nga ga ai hpe, nanhte n chye nga myit ni? Dai rai, Hkristu gaw Kawa a hpung shingkang hte si ai ni kaw na hkrung sharawt la hkrum wu ai zawn, anhte mung asak nnan hta e rawt hkawm wa lu hkra, dai kashin kamun hkam ai hta e, anhte si hkam nna shi hte rau lup makoi ai hkrum saga ai. Si ai ni kaw na hkrung sharawt la hkrum ai Hkristu gaw, galoi bai n si lu na hte, si hkrung si htan shi hpe galoi n madu lu na nu ai, anhte chye ga ai. Hkristu hte rau si hkam yang gaw anhte shi hte rau mung hkrung nga lu na ga ai, ngu nna anhte kam sham nga ga ai. Shi a si hkam ai gaw mara a matu kalang sha mi si hkam ai rai nga ai, Bai hkrung rawt ai chyawm gaw, Karai Kasang rau hkrung nga ai lam rai nga ai. Nanhte mung mara hte si hka mat ai ni rai nga manit dai rai nna, Hkristu Yesu hta e, Karai Kasang a man e hkrung nga ai ni rai nga ga ai, ngu nna myit la mu.
Karai Kasang a Mungga rai nga ai.

KABU GARA SHIGA

Mahte 10:37-42

Ya hti na gaw Mahte a laika hta na Kabu Gara Shiga rai nga ai.
Kadai mung ngai hpe tsaw ra ai hta, kanu kawa hpe grau nna tsaw ra ai wa gaw, ngai hte n ging dan nga ai. Ngai hpe tsaw ra ai hta, shayi shading sha hpe grau tsaw ra ai wa mung, ngai hte n ging dan nga ai. Tinang udang hpai let Nye a hpang  n hkan nang ai wa gaw, ngai hte n ging dan nga ai. Tinang asak lahpawt dum ai wa asak sum na ra ai. Nye a majaw asak jasum ai wa chyawm gaw asak mu lu na ru ai. Nanhte hpe hkap hkalum la ai wa, ngai hpe hkap hkalum la ai. Ngai hpe hkap hkalum la ai wa mung, ngai hpe shagun dat ai wa hpe hkap hkalum la ai rai nga ai. Myihtoi a myiman hpe tau yu nna, myihtoi hpe hkap hkalum la ai wa gaw myihtoi a shabrai lu la na ru ai. Dinghpring ai wa a myiman hpe tau nna, dinghpring ai wa hpe hkap hkalum la ai wa gaw, dinghpring ai wa a shabrai lu la na ru ai. Masha langai ngai gaw shapre a myiman hpe tau nna, ndai ma kaji langai ngai hpe ntsin kasi dinggap mi sha jaw wu yang, dai wa shi a shabrai nlu la na nrai, nga nna ngai nanhte hpe teng teng tsun nngai, ngu mu ai.
Madu a Kabu Gara shiga rai nga ai.