2022: PRAN WAN LADAW LABAN (30) NA CHYUM LAIKA

PRANWAN LADAW HTA LABAN 30
October 23, 2022
CHYUM MUNGGA DAW 1

SIRAK 35: 12-14, 16-18

Ya hti na gaw, Myihtoi Sirak a Laika na rai nga ai.
Madu gaw myiman n lata ai tara agyi wa rai nga ai. Shi gaw matsan mayan wa hpe n gawn n sawn di kau nna masha hpe myiman lata na n rai. Shut hkrum ai wa hpyi shawn ai ga hpe Madu madat ya nga ai. Jahkrai nmai ni hpyi jahtau ai shaloi, Madu gaw shi a myiman kayin kau ai n rai; gaida jan shi a lam aput apai nga tsun dan ai shaloi, shi hpe gawt kau na n rai. Shi a myit masin mahkra hte Madu hpe daw jau ai wa gaw, Karai Kasang a man e myiman pa nna, dai wa hpyi nem ai sumwi du hkra lung wa na ra ai. Myit grit nem ai wa a akyu hpyi ai nsen gaw, sumsing lamu de hkrang wa na ra ai. Madu htan ya ai ga garai n du yang, shi shalan shabran ai n hkrum lu ai rai nna, Tsaw Htum ai Wa shi hpe garai n mada yu jang, shi hpyi nem ai lam n hkring na ra ai. Madu gaw lanyan nga na n rai; Shi gaw ding man ai ni hpe shalawt nna, shanhte a hpang maga de tara dara ya na ra ai.
Karai Kasang a Mungga rai nga ai.

CHYUM MUNGGA DAW 2

2 TIMOHTI 4:6-8, 16-18

Ya hti na gaw, Timohti hpang de San Pawlu shagun dat ai laika lahkawng hta na rai nga ai.
Ya e pyi, nawku tawn ntsa de luhpa ru jaw ai zawn, nye a asak ru kau ai hkrum nna, ngai pru lai mat wa na aten du magang ra ai. Ngai gaw kaja ai gasat gala gasat ngut se ai: gat shingjanwng ai lam htum hkra gat shadu se ai; makam masham hpe a manoi nga ni ai. Ya e lam langai sha ra ai. Ding hpring ai tara agyi wa ngu ai Madu gaw, dai Nhtoi Kaba hta, ding hpring ai a ja janmau ngai hpe ap ya na ra ai; ngai hpe sha n rai, Shi a dan pru na lam hpe sharawng awng ai ni yawng hte hpe ap ya na ra ai. Nye a amu hpe shawng lang tsun ai shaloi, ngai hpe garum ai sakse langai mi n pru ai; yawng hte gaw ngai hpe kau da mani ai; dai gaw shanhte a ntsa e mara n tai u ga. Rai ti mung, nye a marang e Kabu Gara Shiga hpe, maigan amyu ni mahkra na la lu hkra, hkaw shadan dan lu na matu, Madu gaw ngai a hpang manga de lawm nna, ngai hpe n-gun hta na mawai la ai ngai hkrum ni ai. Madu gaw n hkru n hkra ai lam yawng hta na ngai hpe mawai la nna, sumsing lamu na Shi a mungdan du hkra ngai hpe makawp maga la na ra ai. Shi gaw htani htana prat dingsa hpung shingkang a nga nga u ga law. Amen.
Karai Kasang a Mungga rai nga ai.

KABU GARA SHIGA

LUKA 18:9-14

Ya hti na gaw, Luka a laika hta na Kabu Gara Shiga rai nga ai.
Dai aten hta e Yesu gaw, tinang a hkum hpe ding man dum nna, masha kaga hpe n gawn n sawn di kau ai ni hpe, ndai ga shadawn tsun mu ai gaw: Masha lahkawng akyu hpyi na matu nawku htingnu de lung wa ma ai; langai mi gaw Hparishe masha, langai mi gaw kang hta ai wa rai nga ma ai. Hparishe wa gaw tsap nga nna, Karai Kasang e, lagu lagan, n ding n man ai, num shaw ai amu galaw ai masha gale ni hte, ngai n bung nngai hta n-ga, ndai kang hta ai wa zawn pyi n rai nngai majaw, ngai nang hpe chyeju dum nngai.
Ngai mahtang bat mi hta lahkawng lang lusha gam nga nngai; ngai lu malu hta na htam shi hta htam mi alu jaw nga nngai, nga nna shi a kraw lawang hta tsun wu ai. Kang hta ai wa chyawm gaw, tsan ai kaw tsap nna, lamu de pyi n mada yu ai sha, sinda adup nga let, Karai Kasang e, mara kap ai wa ngai hpe matsan dum rit law, ngu nna hpyi wu ai. Ngai nanhte hpe tsun made ga: Kang hta ai wa gaw, Hparishe wa hta Karai Kasang a chyeju grau lu la nna ,shi a nta de wa mat nga ai. Kaning rai nme law, tinang a hkum hpe shagrau ai wa kadai mung, shagrit shanem ai hkrum na ra ai; tinang hkum hpe shagrit ai wa chyawm gaw shagrau ai hkrum na ra ai.
Madu a Kabu Gara Shiga rai nga ai.

2022: PRAN WAN LADAW LABAN (29) NA MUNGGA

Akyu hpyi ai, ngu ai gaw Hkristan masha langai a matu shăni shăgu gălaw ra ai bungli langai, lit magam langai rai nga ai. “Madu a akyu hpyi ga” tsun ga yang, shani shagu anhte ra kădawn ai lu sha, anhte hpe jaw rit, ngu nna akyu hpyi ga ai. Karai a shăman chyeju, măkawp măga ai chyeju, asak a chyeju kumhpa ni n hkam la ra ai, n kadawn ai shani n nga ai hpe dum ra ga ai. Ya hpyi ya lu, re ai n byin wa timung, Karai Kasang gaw n jaw ai n nga na, grau ra ai hpe mahtang lu la na, ngu ai hpe kam let, myit n daw ai akyu hpyi ra ai lam shărin ya ai.

Prat hta awng dang dik htum ai masha langai_ nam kahtawng e nga ai majaw matsan ai, jawng n lu lung ai. Jawng kaji sha lung da lu ai. Rai tim n sim n sa laika hti, hpaji hkaja ai. Mare kaba de htawt nna hpaji matut hkaja ai. Shawng na lang rung bungli shawk ai, lăta la n hkrum ai. Mung-shăwa rapdaw ra lăta poi langai hta shang shingjawng ai; sum ai. Dai hpang, lamu ga gawn rung langai kaw bungli shawk ai; lata la n hkrum ai. Ningtau Gumsan măgam ra lata poi hta shang shingjawng ai; sum mat ai. Shi tsawra dik ai sumtsaw jan n myit mada ai si mat ai. Shi hkum nan grai n tsawm ai la re. Dai hpang mungshăwa rapdaw ra lăta poi hta shăra langai lu hkra shingjawng ai, sum ai. Hpang lahkawng ning na ai hpang bai shingjawng ai shaloi mungshawa dat kasa lăta la hkrum ai. Jahtum na awng padang gaw Gumsan magam lata la hkrum ai; mying gumhkrawng dik ai American Gumsan Magam Abraham Linkun (Lincoln) rai nga ai. Shi prat hta dai dăram hkam sharang shăkut shăja lu ai, myit n daw ai sha awng dang ai prat de du lu ai gaw akyu hpyi shaja ai majaw rai nga ai.

Pru Mat wa ai Laika hta Moshe lata shărawt lamu madi akyu hpyi nga dingsang, Israel dap gaw hpyen Ameleki hpe dang ai; Moshe lata tsu nna lata jahkrat jang Israel dap sum htingnut wa ai. Moshe a pai hkra marai lahkawng, shi a lata n hkrat hkra madi shadaw ya ma ai majaw, hpyen amyu Ameleki hpe dang kau lu ai, nga ai. Akyu hpyi nga dingngam, shaman chyeju hpe jang jang e, myi hte mu lu ai hku chyeju lu la ai.

Luka a Laika hta rai jang, matsan mayan re ai numjan myit n daw n hten ai sha law law lang hpyi lajin ai jahtum e she shi ra mayu ai hpe lu la ai lam tsun da ai. N sim n sa Karai Kasang kaw akyu hpyi ai tsawra kasha ni a hpyi jahtau ai nsen hpe, Karai Kasang n madat la ya ai nga na kun, nga ai. Jang jang e n jaw ai rai tim pyi n jaw ai n nga na lam tsun da ai.
Lahkawng yan na mabyin ni hta shaman chyeju jaw ai gaw Karai Kasang sha re. Karai Kasang gaw maji ai wa n rai, na maza hkra hpyi jang she jaw ai Karai Kasang n rai. Hkrup mi ra, jaw kam jang jaw n jaw

kam jang n jaw re ai Karai Kasang n rai. Ra ai hta hkan nna jaw ai; hpyi ai ni a kamsham myit hta hkan nna jaw ai; myit n daw ai sha, myit galu ai hte hpyi jang n lu ai n nga na, ngu ai lam hpe sharin ya ai lam re.

Israel masha ni hpyen găsat nga ai aten, jang jang e ra kădawn nga ai hte maren, Moshe n sim n sa hpyi htinglu ya ai. Shăman chyeju jang jang e ra ai hte maren, jang jang e jaw ya ai. Moshe gaw Karai Kasang hte hku-hkau ai wa rai nga ai; dai zawn Karai Kasang hte hku- hkau lu na matu shi kade hkam sharang ra ai, kade lang pyet pyet taw nna Karai a ga hpe madat ai, kade wa nni nhkri hkam sharang lai wa sai, ngu ai hpe mung myit dum mai ga ai.

Myit su ai kanu kawa ni gaw kasha ni hpyi shăgu n jaw ai; ra ai yawng yawng mung n galaw ya ma ai. Ma ni, shanhte hta rawng ai atsam ni hpe mu chye wa hkra, shanhte hta rawng ai atsam hpe shăngun lang nna manghkang ni, dut dang ai lam ni hpe shanhte hkum nan hpăran chye hkra garum ya ai lam rai nga ai. Kanu kawa kau mi, ma ni hpyi shagu jaw, ra kadawn ai lam yawng yawng hpe hkan galaw ya, manghkang shagu hpe hkan hpăran ya ai a majaw, ma dai ni gaw tinang lăgaw hta tinang tsap n chye wa ai. Ma ni hpe jăhten kau ai mahtang tai wa ai n rai a hka!

Hkum hkrang hta mung, wenyi mahkrun hta mung, ru ai yak ai, kadawn ai lam law law hpe hkrum sha yu ai ni mahtang, hkum hkrang myit masin wenyi grau kunghpan wa lu ai rai nga ai. Ruyak jamjau n hkrum yu ai ni gaw prat hta shingjawng saw ai lam law law hkrum katut jang ămai sha asum jaw chye ma ai. Myit daw loi ma ai.

Tsawra dik ai Kawa Karai Kasang mung, hpyi shagu n jaw ai; aten sharen da ai lam nga tim n jaw ai n nga na hpe hkrak kam ging ai lam, Madu e sharin ya ai.

Timoti Laika hta Kasa Pawlu gaw shi a sape timoti hpe tsun ai, lam shagu hpe hkamjan lu ai gaw makam masham a jaw re re ai lam, dai Kabu Gara Shi-ga hpe htawn tsun shana ai amu hta, awng dang ai aten nga ai zawn, yakhkak jamjau hkrum ai, dut dang ai lam ni mung hkrum na. Myit n daw ai sha, myit galu hkam sharang let hkaw tsun shaja na lam, ninggun jaw ya ai. Myit n galu, n hkam sharang lu ai ni awng dang ai bandung de n du lu ai. Hkam sharang hkamjan ai akyu law la ai lam hpe hkaja la lu ga ai.

Shing n-rai; Makam Masham Shachyam Shabra Laban
(Is 60:1-6; Rom 10:9-18; Mt 28:16-20)
 
Yesu gaw săpe marai (11) hpe tsun ai, “Nanhte pru sa nna masha amyu shăgu hpe ngai a sape shătai mu; Kawa a, Kasha a, Chyoi Pra Wenyi a mying ningsang hta shanhte hpe kashin kamun jaw mu”, nga ai.
Pru sa na matu, Yesu gaw sape marai 12 hpe shăga la ai; shanhte chye ra ai baw yawng tsun dan, sharin dan ai. “12” ngu ai kuptsup ai nambat re. Marai 12 tup hkra hpe shăngun dat ra ai rai tim, Yesu hkum nan, dai kuptsup ai nambat gu hkra n lu shăngun dat ai. Marai 11 hpe sha shangun dat lu ai. Hpang e Kasa ni gaw marai mi hpe lata la nna nambat 12 hpe shatup la lu ma ai. Hpa hpe shadum ya a ta?

Sasăna bungli hta masha law hkra, ra n rawng ai hku shăngun dat na masha galoi mung n law na re. Shawng shawng e mung Madu tsun ai, “Mam dan masha n law ai; dan la na mam law wa myin nga ai” nga ai. Nawku Hpung hta, sasăna bungli hta magam gun masha dumhprut ai majaw myit n daw mai ga ai. Yesu pyi gaw marai 12 hpe shăngun dat mayu tim marai 11 hpe sha shangun dat lu ai n rai a hka? Nambat 12 tup lu hkra jahpring ya na gaw nang/ngai a lit n rai a hka?

Anhte Wunpawng myu sha ni a ginra ginsa, ru-pawt a lam săgawn dat yang, moi moi na masha ni gaw ri-da măka laklai ai măchye măchyang hte atsam lu ma ai; nhtu/sinat hte kaga laknak ni hpe madang tsaw ai hku galaw lang chye ma ai; hpri/gumhpraw/magri_ ndup hpaji mădang tsaw ai; hkyen hpaji kunghpan ma ai,…ndai zawn kăga atsam law law lu ma ai rai tim, ban hte ban hti htawn shalai, hkringhtawng matut shalai ai lădat hta ningra ai majaw, laili laika n chye ai majaw, ta maka hte kăga machye machyang hpan law law shămat kau ai lam hpe chye lu ai.

Hpa majaw Wunpawng myu sha ni ji woi ji wa prat na manu dan dik ai hpaji machye machyang amyu myu tat sum kau, shamat kau a ta? Shada prat hte prat, ban hte ban, hti htawn shălai ai lădat ninggun kya ai majaw rai nga ai. Anhte ji jum ji woi ni a lata hpaji machye machyang hpe kăga amyu ni hkaja sharin la nna shanhte a hpăga rai shătai kau ma nu ai. Dai ni na prat, anhte nhtang hku mări lang ra taw nga sai n rai a hka?

Galu kaba chying ring ai amyu, labau ngang kang ai amyu tai lu na matu, “tinang a” ngu makam masham htung lailen hte kaga hpaji ni hpe sharin ya ai, arawng la ai hte rem kyem hti htawn jaw na mung ahkyak nga ai. Moi na masha ni kaja dik, reng dik ai tsi hkrung tsi-nan lang lai wa tim, ban hte ban matut shălai htawn jaw hkat ai lam n galaw lu ai majaw, hpaji machye machyang hpe makoi da yip da ai majaw, shamat kau ai mahtang tai ai. Dai zawn sha, Hkristan makam masham hpe mung tinang hkrak shareng ai rai yang, rem kyem ra ai hta n-ga, kaga masha ni hpe hti jaw htawn ya ai rai yang sha, Hkristan makam masham gaw greng ja manu dan na rai nga ai.

Yesu hpe chye chyang tsawra kamhpa lu ai masha langai gaw Yesu a mai kaja ai lam, shi a tsawra myit hte atsam marai, shi a tara hte sharin shaga ai lam ni, kaga masha ni hpe n htawn jaw n garan jaw ai n nga lu na sha rai nga ai. Shing di gam garan ya ai a marang e, tinang a makam masham mung grau greng ja grawng rawt wa na rai nga ai.

Vietnam mungdan na mama ni gaw shinggan e mungshawa masha hpe dawjau ai tara shang bungli hpan law law e magam gun shajang ma ai da: gumhpraw dum, shopping mall-gat dut, rai chywi, nursing, machyi masha gawn, jak-rung amu, dz., dz., lu mai ai, ang ai shara magup shang lawm nna bungli run kaga manang ni hpe makam masham lailen, mai kaja ai, sumnung shingdi ai, dingman ai, tsawra lakawn chye ai,… Dai zawn shanhte kasi kaja madun ai ladat hte makam masham hpe sakse hkam dan ma ai da.

Makam masham sakse hkam ai, sasăna măgam hta hpan amyu myu, ladat amyu myu hku shang lawm mai ai lam hpe shadum ya ai. Makam masham hpe sakse hkam ai, sasăna măgam hta shang lawm madi shadaw ai gaw lit re ai hte maren, ahkaw ahkang (privilege) mung re ai hpe dum mai ga ai.

2022: PRAN WAN LADAW LABAN (29) NA CHYUM LAIKA

PRANWAN LADAW HTA LABAN 29
October 16, 2022
CHYUM MUNGGA DAW 1

PRU MAT WA AI 17:8-13

Ya hti na gaw, Pru Mat Wa Ai laika hta na rai nga ai.
Dai aten hta e, Amalek masha ni sa pru nna, Rehpidim ngu ai shara e, Israela amyu hpe sa gasat ma ai. Dai majaw Mawshe gaw Yawshu hpe, Masha lata la nna, Amalek ni hpe gasat na pru su; hpawt de, Karai Kasang a dawhkrawng lang nna, dai kawng pungding e ngai tsap nga na ring ngai, ngu nna tsun wu ai. Shing rai Mawshe hkang dat ai hte maren Yawshu galaw nna, Amalek ni hpe gasat wu ai; Mawshe, Arun hte Hura gaw kawng pungding de lung wa ma ai.
Ya Mawshe gaw shi a lata sharawt yang, Israela masha ni dang wa ma ai; shi a lata jahkrat yang gaw, Amalek ni dang wa ma ai. Rai ti mung, Mawshe a lata tsu wa lu ai rai nna, Arun yan Hura nlung langai mi la nhtawm, dai hta shi hpe dung shangun wu ai. Shing rai Arun yan Hura gaw, maga mi de langai ngai nga nna, Mawshe a lata pawn shadaw ya mu ai: dai rai nna jan du hkra shi a lata sharawt dingyang rai nga lu ai. Yawshu mung Amalek du wa hte shi a masha ni hpe, nhtu hte gasat dang kau wu ai.
Karai Kasang a Mungga rai nga ai.

CHYUM MUNGGA DAW 2

2 TIMOHTI 3:14 - 4:2

Ya hti na gaw, Timohti hpang de San Pawlu shagun dat ai laika lahkawng hta na rai nga ai.
Nang sharin la sai mungga teng man rai nga ai hpe myit hkut da nit dai majaw, dai hpe myit jung ai hte manoi manat ra ai. Nang hpe sharin ya ai sara ni kadai re ai myit dum nna, ma kaji aprat kaw nna Chyoi Pra ai Chyum laika ni hpe chye nga nit dai hpe a dum nga u. Dai Chyum laika ni gaw, Hkristu Yesu hpe kam sham ai a marang e hkye hkrang la ai hkrum lu hkra, chye ra ai hpaji byeng- ya nang hpe jaw lu ai. Chyum Laika shagu gaw, Karai Kasang a myit jahtoi ya ai hte ka da nga ai. Dai rai nna, sharin shaga ya na, n teng n man ai lam hpe nhtang madun na, masha a arawn alai hpe shading ya na hte, Chyoi Pra ai lam hpe sharin achyin ya na matu, Chyum Laika ni akyu rawng nga ai.
Karai Kasang a masha wa gaw dai hku hkan galaw yang, hkum hkum tsup tsup rai wa nna, mai kaja ai magam bungli shagu a matu chyip chyip rai na ra ai. Karai Kasang a man e mung, hkrung nga ai ni hte si ai ni hpe jeyang daw dan na ra ai, Yesu Hkristu a man e mung ngai nga nna, Yesu a dan pru na lam hte, shi a mungdan a amying hte, ngai nang hpe shadut dat de ai gaw: Dai shiga a lam hpe hkaw dan nga u; na ra ti mung, n na ra ti mung, shakut sharang ai hte tsun shana ya u. Daru sharin u; kam shut ai lam hpe madun dan u; mai kaja lam de woi len la u; rai ti mung, sharin shaga ya na myit rawng nga nna, myit galu kaba ai hte dai lam yawng hpe hkan galaw nga u.
Karai Kasang a Mungga rai nga ai.

KABU GARA SHIGA

LUKA 18:1-8

Ya hti na gaw, Luka a laika hta na Kabu Gara Shiga rai nga ai.
Tut nawng e akyu a hpyi nga mu ga hte, myit n hten mat mu ga, Yesu shi a sape ni hpe ga shadawn tsun mu ai gaw: Mare langai mi hta Karai Kasang hpe mung n hkrit, masha hpe mung hpa n shadu ai tara agyi langai mi nga ai. Dai mare hta gaida jan langai mi mung nga ai. Shi gaw dai tara agyi wa kaw sa nna, Ngai hte amu byin ai wa hpe, ding man ai hku daw dan ya rit, nga nna a tsun nga ai. Rai ti mung, nhtoi ram ram na hkra dai tara agyi wa n jeyang ya hkraw ai. Dai hpang shi gaw, Karai Kasnag hpe n hkrit, masha hpe hpa n shadu nngai, rai ti mung, ndai gaida jan ngai hpe a tsun shatsang nga ai majaw, shi hpang maga ngai tara dara ya na nngai; dai n rai yang, shi ya sha ya sha sa sa rai nna, ngai hpe n sim n sa sharu shatsang na ra ai, nga nna shi a kraw hta myit la wu ai, ngu nna Yesu ga shadawn hkai dan wu ai.
Shaloi Madu Yesu gaw, N ding n man ai tara agyi wa tsun ai ga hpe myit la mu: Karai Kasang gaw matsan dum lama nga ai rai nna, shi a shani shana hpyi jahtau nga ai, shi a lata la ai ni a hpang maga de, tara n dara ya ai, nga na a ni? Nanhte hpe ngai tsun made ga, Shanhte hpang maga alawan tara dara ya na ra ai. Rai ti mung, Masha Kasha du sa ai nhtoi hta, ndai mungkan ga ntsa e makam masham nga nga ai gaw mu lu na a ni? ngu nna sape ni hpe tsun mu ai.
Madu a Kabu Gara Shiga rai nga ai.

2022: PRAN WAN LADAW LABAN (28) NA MUNGGA

Israel a hpyen amyu re ai Ahram amyu masha, hpyen-Du kaba gaw manggang ana kaw na shamai shatsai hkrum jang, shamai ya ai Elisha hpe mung, Karai Kasang hpe mung chyeju dum ai kumla madun dan ai. Dai majaw, grau ai chyeju, makam masham hte wenyi san pra wa lu ai chyeju kahtap hkam la lu nu ai. Luka a Laika kaw na manggang ana kap ai masha marai 10 shamai shatsai chyeju hkam la lu tim, Samaria amyu sha langai sha, chyeju kumhpa jaw ai wa Yesu hpe chyeju dum chye ai. Shi hpe Yesu tsun ai, “Na a makam masham nang hpe hkye la nit dai; dinghpring ai lam hta matut hkawm sa su” ngu nna kahtap shaman ya ai. Law law lang, anhte mung tinang hta ra kadawn ai lam law law a matu akyu hpyi chye nna, hkam la lu sai chyeju ni a matu chyeju dum shăkawn na mălap măli di chye ga ai.

San Pawlu a matu Kabu Gara Shi-ga, ngu ai gaw, “Chyăsi kaw na bai hkrung rawt ai Hkristu” a lam rai nga ai. Dai Hkristu hpe chye chyang kamsham lu ai gaw reng dik ai chyeju kumhpa re ai lam tsun ai. Dai Hkristu hta jung noi ai wa gaw asak a chyeju kumhpa ni hpe hkam la lu na rai nga ai.

Nahman gaw Du kaba she rai tim n myit mada ai manggang ana kap wa ai. Dai prat hta tsi shamai la na lam myit mada shara n nga ai. Myit mada shara n nga tim, mayam numsha e tsun ai ga hpe hkap la ai. Dai numsha gaw Israel amyu shayi re; Karai a masha Elisha hpang de sa su, ngu, hpaji jaw ai majaw, mahkoi shamai lu kun, ngu, myit la ai rai nga ai. Kaja wa mai tsai wa jang, dai gaw, Karai Kasang kaw na re. Israel amyu sha ni nawku ai Karai Kasang gaw tengman ai Karai Kasang re ai lam hpe chye la nu ai. Shi a chyeju dum chye ai myit a majaw rai nga ai. Elisha gaw Nahman chyeju htang ai hku htawsa ai ja gumhpraw hte reng ai hpun nba ni hpe n hkap la ya tim, Israel buga kaw na gasau Syria de htaw wa na ahkang jaw wu ai. Kabu Gara Shi-ga hta shamai hkrum ai marai 10 hta na Samaria amyu sha langai sha, Yesu hpang de htang wa nna “chyeju kaba sai” ngu tsun chye ai. Chyeju htang chye ai masha dai ni gaw, hkum hkrang shamai shatsai hkrum ai hta grau ai shaman chyeju ni hpe kahtap nna hkam la lu ma ai: wenyi hta shamai shatsai ai chyeju  hkye hkrang la ai chyeju kumhpa rai nga ai.

Myit masa galu kaba ai amyu sha ni hpe yu ai shaloi, “Chyeju kaba sai”, ngu ai ga-si lu shajang ma ai. Kaji kadun ai amyu sha law law hta, “Chyeju kaba sai” ngu ai ga-si n lu ma ai lam chye lu ai. Anhte Wunpawng myu sha hta mung, dai manu dan ai ga-si n nga ai hpe chye lu ai. Anhte lang nga ai ga, “Chyeju/chyeju kaba”, hkoi shap lang nga ai ga-si she rai nga ai. Hkristan makam masham a jaw e sha, chyeju htang chye ra ai lam dum hprang wa ai amyu tai wa ai, ngu tim n shut ang ai. Kaja wa rai jang masha yawng hta chyeju dum chye ai myit rawng ga ai. Ahkyak ai gaw kaja wa chyeju dum ga ai kun, dum chye yang shadan shapra dan lu ai kun, ngu ai mung ahkyak ai.

Chyeju dum chye ai wa hpe gaw chyeju jaw ai wa mung kahtap kahtap nna chyeju jaw mayu ai. Chyeju kumhpa lama ma hkam la lu tim, chyeju kaba sa, ngu, n chye tsun ai, n chye madun ai ni gaw, chyeju galaw ai wa hpe n gawn n sawn di ai hte bung ai.

Shat ma mi sha lu na matu, masha hkying, mun, sen shadang ru nna shang lawm ai majaw byin tai wa ai n rai a hka! Yawng mayawng a chyeju ningpawt Karai Kasang n rai a hka! Lamu ga ting Madu a chyeju hte hpring nga ai n rai a hka! Anhte n hpyi tim Karai e jaw da ai asak a chyeju kumhpa baw hpan ni kade she law, kadai hti dang na rai a hka! Grau dik htum ai gaw wenyi hte seng ai shaman chyeju, hkye hkrang la ai chyeju n rai a hka? Karai Kasang hpe chyeju dum chye ai masha langai a matu, tinang kaning re ai madang kaw du mat tim, kaning re ai gam maka hkrum tim, machyi ai maga asum maga de yawng wa tim, aput a-ngun n galaw ai, lu la hkam la ai chyeju ni hpe chyeju dum shakawn nna myit dik chye na rai nga ai.
 
Aput a-ngun tsun shaja ai ni, myit pyaw myit dik ai lam n lu ai ni, ra kadawn ai hkrai hkrai sha mu ai ni gaw hti n dang hkra re ai Karai a chyeju kumhpa ni hpe n sawn yu, n mu mada chye ai ni rai ma ai. Pyaw ai nhtoi awng dang ai nhtoi ni a majaw kabu chyeju dum ai zawn, machyi hkrum asum katut ai nhtoi ni hta mung, Karai a chyeju hpe dum chye hkap la chye ra ga ai. Sum machyi ai lama ma kaw na pyi grau reng ai chyeju kumhpa ni hpe hkam la lu na hkinjang tai wa lu ai. Nahman hte Yesu hpang de htang wa chyeju htang ai, shan lahkawng yan gaw grau ai chyeju hpe naw kahtap hkam la lu ma ai.

Daw hten ai, hkum n tai mat ai ni machyu shara, hpaji sharin shara hkan na masha ni hpe mu yu ai ni chye na re. Hkum hkrang a dawchyen myi hte ana, lagaw hte lata,…lama ma dumhprut mat ai ni, masha kaja ni hta pyi grau ai atsam sharin hkaja la lu nna mau hpa atsam ni madun lu ma ai. Lagaw lata myi na gum ai ni hta grau madang tsaw ai hku nga lu ma ai, ahkaw ahkang ni mung grau lu ma ai. Lagaw lata myi na gum ai ni hta pyi grau ai hku bungli galaw lu ma ai. Dai hten mat tum mat ai majaw myit htum shara n nga ai; grau ai kaga chyeju kumhpa ni law law shanhte hkam la lu ma ai. Karai chyeju hpe kahtap shadan shadawng chyeju shakawn lu na lam tai wa lu ai hpe mu chye lu ai.

Akyu hpyi nawku shagu, chyeju htang ai amu lawm ra ai hpe sharin la ra ga ai. Missa hkungga nawngjau ga yang, Karai a chyeju hpe shakawn ai daw law law lawm ai hpe myit dum mai ga ai. Kaja wa tinang a myit masin kaw na prut pru ai chyeju dum ai lam gaw teng ga ai kun?

Kasa Pawlu gaw shi hkam la lu ai hkye hkrang la ai chyeju hpe dum ai majaw, kaja dik ai chyeju htang ai lam gaw shi hkam la lu ai chyeju kumhpa ni hpe gam garan ya shakut ai amu rai nga ai. Shi a hkum hkrang myit masin ting nawng, dai Kabu Gara Shi-ga a jaw e zingri zingrat hkrum ai, htawng e sharen da hkrum ai, nni nkri hkam la ai lam rai nga ai. Chyeju dum chye ai, ngu ai hta, San Pawlu gaw kaja dik ai kasi tai wa ai.

2022: PRAN WAN LADAW LABAN (28) NA CHYUM LAIKA

PRANWAN LADAW HTA LABAN 28
October 9, 2022
CHYUM MUNGGA DAW 1

2 HKAWHKAM 5:14-17

Ya hti na gaw, Hkawhkam laika lahkawng hta na rai nga ai.
Manggang kap ai Naman gaw, Karai Kasang a masha wa Elisha tsun ai hte maren, Yawdan hka de yu wa nna, shi hkum hpe sanit lang kapruk jang, shi a hkum shan gaw, ma kaji a hkum shan zawn san pra wa ai. Dai rai nna, shi gaw shi a ali ama ni hte rau, Karai Kasang a masha wa hpang de bai sa nna, shi a man e tsap let, Yu u, Israela mungdan hta kaga, ga ningtsa ting hta e Karai Kasang shaje n nga ai gaw, ya ngai chye se ai: dai rai nna na a mayam wa a kumhpaw kumhpa hpe hkap la u, ngu wu ai. Myihtoi wa chyawm gaw, Ngai daw jau nga ai Madu hkrung nga ai hte maren, ngai n hkap la na nngai, ngu wu ai. Naman shadut ti mung, shi n hkap la hkraw wu ai. Bai Naman gaw, Nang n la ti mung, na a mayam wa hpe lawze lahkawng htaw dang ai ga htingbut jaw dat rit; na a mayam wa gaw ya kaw nna, wan nat hkungga rai ti mung, hkungga amyu kaga rai ti mung, Madu hta kaga, hpara shaje hpe nawng ya na n rai, ngu nna myihtoi wa hpe tsun wu ai.
Karai Kasang a Mungga rai nga ai.

CHYUM MUNGGA DAW 2

2 TIMOHTI 2:8-13

Ya hti na gaw, Timohti hpang de San Pawlu shagun dat ai laika lahkawng hta na rai nga ai.
Dawi a aru arat rai nga ai Yesu Hkristu gaw, si mat ai ni kaw na bai hkrung rawt sai, nga nna ngai hkaw tsun ai Kabu Gara Shiga hpe adum nga u. Dai Kabu Gara Shiga a jaw e, n hkru ai wa zawn bawng dung hkra, ru yak ai hkrum nngai, rai ti mung, Karai Kasang a mungga gaw sharen da ai hkrum lu ai n rai. Dai re ai majaw, Karai Kasang e lata la hkrum ai ni gaw, Hkristu Yesu hta e hkye hkrang la ai hkrum nna, htani htana na hpung shingkang hpe hkam la lu mu ga, shanhte a matu mara ndai ru yak ai lam mahkra hpe hkam sharang nga nngai. Ga ndai gaw kangka re ai ga rai nga ai: Anhte Shi hte rau si sayang gaw, shi hte rau hkrung lu na ra ga ai. Anhte myit n htum ai sha shakut sharang yang gaw, shi hte rau up lu na ra ga ai. Anhte shi hpe nyet kau yang gaw, shi mung anhte hpe nyet kau na ra ai. Anhte kangka n rai nga ti mung, shi gaw kangka rai nga ai: kaning rai nme law, shi hkum nan hpe n nyet kau lu ai.
Karai Kasang a Mungga rai nga ai.

KABU GARA SHIGA

LUKA 17:11-19

Ya hti na gaw, Luka a laika hta na Kabu Gara Shiga rai nga ai.
Yesu gaw Yerusalem mare de lung wa nga yang, Samari hte Galile mung lapran hku lai sa wa ai. Kahtawng langai mi de shang yang, manggang kap ai masha marai shi Yesu hpe hkap mu nna, tsan ai kaw tsap nga let, Yesu e, Madu e, anhte hpe matsan dum la mi law, ngu nna jahtau ma ai. Yesu shanhte hpe mu jang, Nanhte a hkum hkinjawng ni kaw wa madun dan mu, ngu dat mu ai rai nna, shanhte sa wa nga yang, san pra mat ma ai. Shanhte hta na marai langai mi gaw, shi a hkum san pra mat ai hpe mu chye jang, bai nhtang sa nna, nsen kaba hte Karai Kasang hpe shagrau sha-a nga ai.
Yesu a lagaw nhpang e dingnyawm dagup nna, Madu hpe chyeju dum wu ai: dai wa gaw Samari masha rai nga ai. Dai rai nna Yesu gaw, Marai shi San Pra mat masai, n rai ni? Marai jahku gaw kanang rai wa ma ta? Ndai tsasam masha hta kaga, Karai Kasang hpe shagrau sha-a na matu, bai nhtang sa ai masha langai mi mung n nga a ni? ngu nna tsun nhtawm, dai wa hpe, Rawt nna nta de wa nu; na a kam sham ai gaw nang hpe hkye la nit dai, ngu nna shi hpe tsun dat wu ai.
Madu a Kabu Gara Shiga rai nga ai.

2022: PRAN WAN LADAW LABAN (27) NA MUNGGA

Dinghta ga e byin nga ai mabyin ni hpe anhte sawn dinglik yu nna n chye lu ai lam law law nga ai. Hpungtang hpaji masat tara hkan nna sawn yu ninglen, computer hte sawn yu maram ninglen, mahtai kaga ga byin pru wa ai lam ni law law, hkrup mi ra byin nga ai lam ni law law nga ai. N shut lu ai tara masa (principle) hte maren sawn shen ai hpang mahtai shapraw tim, n htang chyaw re ai mahtai sha pru ai lam ni law law nga ai hpe yin la ra ga ai. Makam masham myit hte sha, Karai a masing hpe chye na hkra tam la ra ai lam, dinghta ga na măbyin ni a măhtai hpe Karai a chyeju hte sha htai lu ai lam, Habakuk a Laika kaw na sharin la lu ga ai. Tinang chye na hkap la lu ai jan nna shai wa ai lam mahkra hpe makam masham hku hkap la asak hkrung ra ai lam, Chyum Laika e sharin ya ai. Luka Laika kaw tsun da ai zawn, “Madu e, anhte a makam masham hpe shalaw ya e”, ngu, akyu hpyi ra ga ai.

Dai ni, Chyum Laika Laban hta hti ai mungga masum hte, Karai a Mungga kade ahkyak ai lam hpe shadum ya ai: dinghta ga na mabyin ni yawng a mahtai (Habbakuk), kaning di asak hkrung ra ai lam, greng grau dik ai sutgan a lam (II Tim), makam masham a atsam, dai atsam lu la hkra akyu hpyi ra ai lam (Luka), Chyum mungga masum hte madi madun dan ai.

Hkristan Chyum Laika hpe shawng shabawn găle ai San Jerome gaw Chyum Laika hte daw (seng) nna ning nga tsun da ai, “Ndai Laika buk daram chyoi pra ai mungsung ni a lam kaga kanang e mu lu na a ta? Chyum Laika hti ai a marang e hkam la lu ai kabu hpa hta grau ai kanang kaw na lu la mai a ta?” nga ai. San Ignatius Js., a lam: hpyenla prat hkăla hkrum nna tsirung rawng nga ai aten, mungkan dinghta ga na lam labau maumwi ni, maumi laika ni, sumroi laika ni langai hpang langai hti nna myit shapyaw la ai. Gara mung aten gălu myit pyaw myit dik ai lam n jaw lu ai hpe dum wa ai. Hti na laika htum mat ai hpang, jahtum e Chyum Laika buk hpaw hti ai shaloi, “Masha gaw mungkan ga hpe madu la lu tim tinang a wenyi sum mat ai rai yang hpa akyu nga a ta?” nga ai ga-yan hpe hti hkrup nna kajawng hprang wa nu ai. Shi a prat, gumhpraw hte arawng aya, gumhkawng ai lam hte shi a marin ai lam hpe tam lai wa ai. Chyum Laika hti nna myit malai lu ai hpang, shakut shaja ai hte San Pra ai masha pyi tai wa ai; Jesuit jau hpung hta manu dan dik ai jau tai wa ai.

Israel amyu sha ni hpe shaning law law dip sha dang sha ai Assyrian Empire a kajawng sha hten bya mat ai majaw, Nahum gaw shi a amyu masha ni hpe woi kabu awlaw ai. B.C 616 hta Yerusalem e hkaw dung ai wa gaw Hkawhkam Josiah; shi gaw dai mabyin hpe akyu jashawn nna makam masham hte amyu htung hking lailen ni hpe jasan jaseng ai amu ni ja ja galaw woi ai. Yerusalem Nawku Htingnu hpe jăsan jăseng nna Karai kaw bai ap nawng ya ai.

Rai tim Babylon shingkang shingwang a kajawng sha rawt ja wa ai. Josiah gaw Egyipt mung hkawhkam e shingna (ayeik/Myen hku) htan wa na hpe mung tsang ra, Babylon a shingkang jan ninghkawng Yuda mung e htoi ja wa na hpe mung tsang. Hpyen man lahkawng a lapran e shi nan woi awn ai majan hta asak sum mat ai. Babylon hkawhkam a kasha Nebukadneza gaw B.C 602 hta Palestine de hpyen man yawng nna, Yerusalem hpe amai sha gasat la lu ai (2Hkm. 24: 1). Tara Jăhprang hta rawng ai tara matsun ni hpe hkan shatup ai, dinghpring ai hkawhkam Josiah majan mung sum, hkum nan mung si mat re ai majaw, masha ni a myit hta Karai Kasang hpe kam sham ai myit ung ang wa ai. Dai hta n-ga, ya ningnan re ai hpyen Babylon a npu e taw mat ai. Assyria dăram n matse tim n hkru ai, n tara ai hku lamu ga hkan kashun ai Babylon gaw majan awng nna Karai a amyu hpa majaw majan sum ai kun (Hab. 1:11, 13)? Josiah a ban hta makam masham jasan jaseng ai amu ni galaw sai, dinghpring ai hkawhkam hkum nan mung si mat, Karai Kasang gaw hpa majaw n hkru n kaja ai ni hpe awng dang na ahkaw ahkang jaw a ta? Habakuk dai mabyin ni hpe kade gara hku sawn yu tim mahtai kaja n lu ai.

Jahtum e Karai Kasang shi hpe mahtai jaw ai: Karai Kasang a masing kaba hkrak awng dang na lam, labau hta byin nan byin wa na lam, ya jang n mu lu tim myit galu ai hte ăla nga ra ai lam, dinghpring ai ni gaw kamsham myit hte asak hkrung nga ra ai lam, Karai Kasang kaw na mahtai lu la nu ai.

Htawm hpang e San Pawlu gaw dai hpe lakap nna grau kuptsup ai hku sharin ya ai (Rom 1:17). Karai Kasang hpe manoi ai, kam sham kam hpa ai ni gaw masha a labau na mabyin ni hpe n chye ya lu ai shaloi, Habakuk zawn, “hpa majaw ta?” “galoi aten du hkra rai na kun?“ ngu ga- san san na ma ai. Shing re ai aten hta Karai Kasang a “jeyang ai amu, hpăran ai lădat hpe n chye sawng, chyipmak rai nga tim, Karai Kasang hta matut kamhpa ra ai. Dinghpring ai ni roi rip zingri zingrat hkrum ai lam a mahtai hpe si wa ai aten du hkra n chye madat kun, mahtai n lu kun rai na re. Rai tim jahtum du hkra, hpa mahtai n lu tim Karai Kasang a atsam, Shi a hkye hkrang la ai lam hpe myit mada kamhpa ăla nga ra ai lam: “dinghpring ai ni gaw kangka ai kam sham myit hte hkrung nga lu na”, nga ai.

Karai a Kasha Yesu hte ni htep dik ai sape ni pyi gaw shanhte n chye madat ai lam law law nga ai hpe dum ma ai. Dai majaw, “Madu e, anhte a makam masham hpe shalaw jahtam ya e” ngu nna hpyi ma ai. Ndai mabyin ni yawng, Karai a mungga kade ahkyak ai, masha shăgu hti sumru ninggun la ra ai lam hpe shadum ya ai.

Kasa Pawlu gaw shi a sape Timoti hpe tsun ai, “Ngai kaw na nang na la, sharin la lu ai mungga/sutgan (Karai Kasang a mungga) hpe Chyoi Pra Wenyi a chyeju hte rem kyem da u” nga ai. Matut nna tsun ai hta, Dai Hkristu a lam hpe sakse hkam na lam, Pawlu shi zawn, nni nkri hkam sharang let Kabu Gara Shi-ga hpe shăchyam shăbra na lam matsun ya ai. Yawng mung, Chyum mungga shăchyam shăbra ai amu, Karai a mau-hpa amu ni, hkye hkrang la ai amu hpe htawn tsun sakse hkam nna shăman chyeju hkam la ga.

2022: PRAN WAN LADAW LABAN (27) NA CHYUM LAIKA

PRANWAN LADAW HTA LABAN 27
October 2, 2022
CHYUM MUNGGA DAW 1

HABAKU 1:2-3, 2:2-4

Ya hti na gaw, myihtoi Habaku a laika hta na rai nga ai.
Madu e, Nang n madat ya ai; ngai galoi ten du hkra hpyi jahtau na rai ta? Kashun kashe hkrum ai majaw, ngai nang hpe marawn jahtau ti mung, nang garum la ai n rai. Nang hpa majaw n ding n man ai amu ngai a man e madun dan nna, adip ahkrip rai galaw ai amu hpe, nang hpa rai nna tsap yu nga nta? Kashun kashe hkrum ai majaw, ngai nang hpe marawn jahtau ti mung, nang garum la ai n rai. Nang hpa majaw n ding n man ai amu ngai a man e madun dan nna, adip ahkrip rai galaw ai amu hpe, nang hpa rai nna tsap yu nga nta? Hten byak ai hte kashun kashe nye a man e rai nga nna, ndang kalang hkat ai hte ga law ga la ai law htam nga ai.
Shaloi Madu ngai hpe htan ya nna, Shingran ga hpe ka da u; hti ai wa gaw ndai hpe hti loi na matu, lung pa hta dan dan pra pra ka da u. Kaning rai nme law ndai shingran gaw, ndat da ai aten hte seng nna, dik wa na matu sharawng nga ai majaw, masu hkalem na n rai. Dai gaw lau n du ti mung, ala nga u; hpa majaw nga yang, dai shingran ga teng teng dik wa na ra ai. Myit n malang ai wa gaw, hten byak wa ai hpe yu yu u; ding hpring ai wa chyawm gaw shi a kam sham ai hte hkrung nga lu na ra ai.
Karai Kasang a Mungga rai nga ai.

CHYUM MUNGGA DAW 2

2 TIMOHTI 1:6-8, 13-14

Ya hti na gaw, Timohti hpang de San Pawlu shagun dat ai laika lahkawng hta na rai nga ai.
Ngai na a ntsa e lata mara ya ai shaloi, Karai Kasang nang hpe jaw ai chyeju kumhpa hpe wut shagrung dat na, ngai nang hpe shadum dat de ai. Karai Kasang jaw ai kumhpa gaw, hkrit chye ai myit n rai; n-gun atsam rawng ai myit, tsaw ra chye ai myit, tinang a hkum hpe hkang dang ai myit mahtang she rai nga ai. Dai rai nna, Madu Yesu a matu sakse hkam ya ai hta mung, shi a bawng dung ai wa ngai rai nga ai majaw mung, nang galoi mung hkum kaya et; Karai Kasang jaw ai n-gun atsam hpe kam hpa let, Kabu Gara Shiga a matu ru yak ai lam ni hpe mahtang, ngai hte rau hkam sharang nga u.
Ngai kaw na nang na la sai san seng ai mungga jet hpe, na a kasi ningli shatai nna, Hkristu Yesu hta e kam sham tsaw ra ai myit hte manoi manat nga u. Grai manu dan ai sut nang hpe ap ya da sai rai nna, anhte hta rawng nga ai Chyoi Pra ai Wenyi a garum ai hte, dai hpe sin makawp maga da u.
Karai Kasang a Mungga rai nga ai.

KABU GARA SHIGA

LUKA 17:5-10

Ya hti na gaw, Luka a laika hta na Kabu Gara Shiga rai nga ai.
Lang mi na kasa ni gaw. Anhte a kam sham myit shalaw ya mi, ngu nna Yesu Madu hpe hpyi ma ai. Shaloi Yesu gaw shanhte hpe htan ya ai gaw: Nanhte hta kam sham ai myit chying hkrang tum daram rawng yang gaw, ndai labyi hpun hpe, hpun e, aru hte nawng baw nna, nammukdara e sa tu nga u law, ngu yang nanhte a ga madat na ra ai. Hkauna galau ai, shing n rai sagu bainam rem ai, na a shangun ma gaw hkauna pa de na du wa yang, dai wa hpe, Alawan wa dung nna, shat sha ru, nga nna tsun na, nanhte hta kadai rai ta?
Shing n nga ai sha, na a shangun ma hpe, Ngai sha na shana shat lajang tawn u; ngai lu sha ngut hkra, na a hkum shajin nna ngai hpe galaw jaw rit; dai ngut jang she nang lu sha lu na ndai, ngu na wu ai n rai ni? Dai shangun ma gaw hkang da ai ga mahkra hpe shatup ai majaw, shi a madu shi hpe chyeju htang ai ga tsun ra a ni? Dai hte maren nanhte mung, hkang da mada yawng hpe hkan shatup ngut jang, Anhte gaw akyu n rawng ai shangun ma ni rai nga ga ai; galaw ang ai bungli hpe sha anhte shatup sa ga ai, ngu mu, ngu nna Madu Yesu shi a kasa ni hpe tsun mu ai.
Madu a Kabu Gara Shiga rai nga ai.

2022: PRAN WAN LADAW LABAN (26) NA MUNGGA

Ziun Mare na lu su nga-mu nga-mai ai ni  reng dik ai hpun palawng bu hpun, magwi kawng yup-ku hta galeng, apyaw sha rai lăgaw lătsawn, hpum sau ai sagu bainam sat sha, tsa hkru hkru tit tit lu, pyaw ai music madat, manam pyaw ai bawsau chya, rai nna nga ai lu su masha ni, shim lum dum nga ma ai. Rai tim, shanhte gaw tinang a amyu masha ni matsan jamjau hkrap ngu hkrap ngoi jawng ai hpe n mada mu ya ma ai; hpa n matang ya ma ai. Shanhte ni ding- nye lu ma ai; hpyen ni du ai aten hta bawng masha hku shawng woi la hkrum na ni rai ma ai, nga, Amo shadum sadi jaw ai. Luka ka da ai maumi hta lu su ai masha wa kadai hpe hpa shut ai lam n tsun da ai; shi a mara gaw matsan jamjau ai Lazaru hpe matsan dum n chye ai, n gawn n sawn di kau ai mara rai nga ai. Mungkan sutgan, dinghta ga na nga-mu nga-mai lam hpe sha manoi nna hpang na prat a matu hkyen lajang da ai lam n galaw, sumsing sutgan n mahkawng da ai ni hkrum katut na gam maka a lam rai nga ai.

Ga-shaka lu ai Karai Kasang a amyu masha, Israel amyu sha ni yawng shada kahpu kanau myit masin rawng ra ma ai. Shada zinlum mada mara, makawp maga hkat na lit lu ma ai. Rai tim sut lu nga-mai ai masha ni, matsan masha ni hpe hpa n nawn, shanhte kawsi hpang gara ai, lum palawng nba n lu ai majaw kashung ma ai, ra kadawn ai law law a majaw hkrap ngu hkrap ngoi ai nsen hpe n madat ya ma ai. Dai ni gaw ding-nye lu ma ai, nga ai. Mungdan shagu hta lu su masha ni hte matsan masha ni a lapran, tsan gang hkat ai lam dam lada la ai; sawng grau wa nga ai. Mungkan ga gaw mungkan ting na masha ni a matu sha-hpa law hkra shăpraw ya nga tim, kawsi hpang găra let
 
yup-ra shang ra ai masha ni sen kaba, wan kaba ru nna nga ma ai. Karai Kasang gaw shinggyim masha yawng law lang daw tsi-hkrung tsi- nan ni hpe hpan shălat da ya ai; tsi n tsi la lu ai majaw si mat ai ni shani shagu mun sen hti nna si mat ma ai. Htinggaw shagu shimlum ai hku rawng na nta shara nga nga tim, masha sen wan kaba, lam makau hkan, mahkrai npu e, yi-hkyap zawn re nta e machyu shingbyi ai ni sen kaba wan kaba ru nna nga ma ai. Hpan Madu Karai a ra rawng ai lam n rai; shinggyim masha ni hta tsawra matsan dum myit n rawng ai, n tara ai, tingkyeng myit hpyau ai majaw n rai a hka!

Miwa ni seng dung lu sha ai ladat, shada daw jaw hkat ai ladat hpe sha pyi shingran mu yu ga_ lu sha n ma hkra, jan hkra htet sumpum da ai alai nga ma ai. Jan ai hte hpe mung n hta wa ai, majoi ngam sumpum da nna kade jan sumpum da lu ai hpe arawng la ma ai. Miwa mung ting, lani mi na jan ngam ai lu-sha hte kawsi hpang găra ai mungdan langai na masha ni hpe shaning tup bau lu na daram she rai nga ai. Rai tim Miwa mungdan shing di nna matsan jamjam hkrum ai masha ni hpe gam jaw gam ya ai lam hta shakut ai asam maka n mu lu ai lam hpe chye lu ai. Nang/ngai gaw gara hku kun?

Lauban wa gaw Lazaru hpe dăru kajet ai n rai; pawt matsa ai lam n galaw ai; anu ajin di ai n rai. Shi hta sha-hpa lai jan hkra lu ninglen, dai kawsi hkrum ai Lazaru hpe sha-hpa garan gam jaw na n myit ai. Shi hkrai lu sha pyaw nna Lazaru hpe n mada yu ai, hpa n matang ai, n gawn ai. Hpang na prat a matu akyu la sutgan mahkawng la lu na ahkaw ahkang hpe tat sum kau nu ai. Ndai maumi hku nna hpang na prat, ngu ai, htani htana grin ai aprat nga ai lam hpe shadum ya ai.

Mungga madat la ai ni yawng gaw lu-sha hpung nba, ja gumhpraw jan hkra lu ai hkrai n rai na re. Jan hkra n lu ai majaw gam jaw gam ya ai amu, matsan dum garum hkat ai amu n gălaw ra ai kun? Kade n lu n lawm ai wa rai tim, tsawra matsan dum gam jaw gam ya ai amu hpe galaw lu na ahkaw ahkang lu na sha re. Ja gumhpraw sut rai hku mi n rai tim, shalan shabran ninggun jaw, jaw ai lam hpe matsun ya, hkum nan aten jaw garum shingtau ai zawn re ai baw ni hpe galaw lu ai ahkaw ahkang n taw na re. Shawa hte seng ai mai kaja ai amu ni hta shang lawm lu ai ahkaw ahkang n taw na re.

Myihtoi Amo a shadum ga labau hta dik wa ai: BC 587 ning Ziun Mare (Yerusalem) hpya run kau hkrum ai aten hta, arawng aya lu ai ni, lu su nga-mai ai ni, hpaji chye ai ni yawng hpe bawng masha shătai, Babylon de gau la kau hkrum ma ai. Matsan masha ni, n byin n tai ai ni hpe gaw ngam da ai lam chye lu ai. Dai măbyin hte Lazaru maumi hku nna prat shagu na masha ni hpe shadum ya ai.

Kaga maumi langai hta lu su nga-mai ai masha langai si mat ai hpang lamu Kasa gaw shi hpe lam woi nna sumsing mungdan e shi nga na shara de woi sa ai da. Grai hkrak grai htuk ai shara ni hpe tawt lai woi nna matsan mayan re ai nga shara shi hpe madun ai, “Ndai nang nga na shara re” ngu, madun ya ai da. Masha dai gaw myit n dik ai majaw grau kaja ai shara she madun rit, ngu ai shaloi lamu Kasa tsun ai, “Nang dinghta ga kaw na shalun dat ai arung arai ni hte ndai daram re ai nta sha gawgap lu ai, myit dik nu” ngu ai da.

Ndai prat hta tsawra matsan dum ai amu, gam jaw gam ya ai amu, shada garum shingtau hkat ai amu ni gaw teng sha hpang na prat hta tinang hte gingdan ai shara lu la na matu mahkawng da ai sutgan tai wa ai lam hpe shadum ya ai.

2022: PRAN WAN LADAW LABAN (26) NA CHYUM LAIKA

PRANWAN LADAW HTA LABAN 26
September 25, 2022
CHYUM MUNGGA DAW 1

AMO 6:1,4-7

Ya hti na gaw, myihtoi Amo a laika hta na rai nga ai.
Mahkra dang chye ai Karai Kasang ning nga ai: Zium bum ntsa e ngwi pyaw nga nna, Samari bum ntsa e hkrithpa n dum nga ai ni a matu, tsang shara nga malu ai. Magwi kawng yup ku hta shanhte kaleng tawn nga nna, panep ni hta gumkan taw nga ma ai. Shanhte gaw sagu hpung na sagu kasha hpe mung, dumsu ulawng na dumsu kasha hpe mung, sha ma ai: tingse dum let, nchyun chyun nna, Dawi zawn dum ai baw amyu myu hpe tinang a matu galaw ma ai: tsabyi chyaru hpe lu lai nna, kaja htum ai sau hte tinang a hkum hpe chya ma ai. Rai ti mung, Yosep hten byak ai lam hpe n tsang ma ai. Dai re ai majaw, tsasam mung de bawng dung na matu, shanhte hpe shawng woi wa na mara ai. Shing rai, gumkan taw ai ni a pyaw daw kadaw ai lam htum mat na ra ai.
Karai Kasang a Mungga rai nga ai.

CHYUM MUNGGA DAW 2

1 TIMOHTI 6:11-16

Ya hti na gaw, Timohti hpang de San Pawlu shagun dat ai laika langai hta na rai nga ai.
Nang gaw Karai Kasang a masha wa rai nga ndai majaw, ding hpring ai, tara hkungga ai, kam sham ai, tsaw ra ai, shakut sharang ai hte, sumnung ai myit hpe hkan shachyut nga u. Htani htana asak hpe nang hkam la lu na matu, makam masham hte seng ai, mai kaja ai gasat gala ai hpe a gasat nga u: dai hpe hkam la na matu nang hpe shaga la nna, sakse law law a man e teng man ai a matu nang sakse hkam ya nit dai. Yawng mayawng hpe asak jahkrung ya ai Karai Kasang a man e mung, Puntsiu Pilatu a man e teng man ai a matu sakse hkam ya ai. Yesu Hkristu a man e mung, ngai nang hpe shadum dat ai gaw: Anhte a Madu a Madu Yesu Hkristu paw pru ai nhtoi du hkra, nang hpe hkang da ai ga mahkra hpe, mara n kap ai sha ding ding man hkan galaw shatup nga u, ngu nna nang galaw ra ai magam hpe madun dat nngai.
Karai Kasang gaw, ahkying aten ang wa yang, dai Yesu Hkristu paw pru shangun na ra ai. Madu Karai Kasang htani htana ngwi pyaw ai hta anga nga nna, yawng mayawng hte hpe up nga ai Madu langai sha rai nga ai. Shi gaw hkawhkam ni a Hkawhkam, madu ni a Madu rai nga ai rai nna, Shi chyu sha htani htana asak a rawng nga ai hte, anhte a n dep lu ai nhtoi hta a nga nga ai. Masha kadai mung Shi hpe n mu yu ai hte, n mu lu nga ai: Shi kaw htani htana arawng sadang hte hpung shingkang anga nga u ga law. Amen.
Karai Kasang a Mungga rai nga ai.

KABU GARA SHIGA

LUKA 16:19-31

Ya hti na gaw, Luka a laika hta na Kabu Gara Shiga rai nga ai.
Yesu gaw Hparishe ni hpe tsun mu ai gaw: Lang mi na sahti langai mi gaw reng htum ai hte kya mani ai hpun palawng bu hpun sumli nna, shani shanang pyaw pyaw ningngai ga ai. Hkum ting kahpraw hpye ai Lazaru ngu ai hpyi sha ai wa langai mi hpe mung, dai sahti wa sha ku hta na hkrat ai adaw ahkyep hta sha mayu nna, shi a chyinghka makau e sa tawn da mu ai: gwi ni mung shi a nma sa mata ya ma ai. Shaloi, dai hpyi sha ai wa si mat nna, lamu kasa ni gaw shi hpe Abraham a lahpyen hta woi bang da mu ai: sahti wa mung si wa nna, makoi mayang di dat mu ai. Katsan ga e nachying nni hkri hkrum let shi mada yu nna, Abraham hpe mung, shi a lahpyen hta rawng ai Lazaru hpe mung mu wu ai.
Shaloi, shi gaw Wa Abraham e, ngai hpe matsan dum la e; ngai gaw ndai wan grung ai hta, n ji n mu hkrum nga nngai majaw, Lazaru gaw shi a lata ndung hte ntsin kapruk sa nna, nye a shinglet madit katsi ya li ga, ngai hpang de shangun dat ru law, ngu nna hpyi jahtau wu ai. Shaloi, Abraham gaw, Sha e, nang gaw naw hkrung nga ai hte yang, na a ngamu ngamai lu la nit dai mung, Lazaru gaw dai hte yang tsin yam tsindam hkrum nga ai mung, dum nga u: ya chyawm gaw shi nang e pyaw nga sai, nang mahtang gaw n ji n mu hkrum nga nit dai. Dai hta kaga, ndai yang nna, nanhte gaw n ji n mu hkrum nga nit dai. dai hta kaga, ndai yang nna, nanhte hpang de rap sa mayu ai ni, n rap lu mu ga mung, dai yang nna, anhte hpang de kadai n rap wa lu mu ga mung, anhte hte nanhte a lapran e sung la ai krung sinwa din nga ai, ngu nna htan wu ai.
Bai, sahti wa gaw, Wa e, dai rai yang gaw, ngai nang hpe hpyi de ga, ngai nau manga naw nga ma ai majaw, shanhte mung ndai nni nkri hkrum ai shara de, n du mu ga, shanhte hpe wa shadum shahprang na, Lazaru hpe nye wa nta de shangun dat ya e law, ngu nna hpyi wu ai. Abraham gaw, shanhte kaw Mawshe hte myihtoi ni nga ma ai: dai ni a ga madat mu ga, ngu wu ai. Sahti wa gaw, N rai, Wa Abraham e, si ai ni hta na, langai mi shanhte kaw bai wa yang gaw, shanhte myit malai lu na ma ai, ngu wu ai. Abraham gaw Mawshe hte myihtoi ni a ga shanhte n madat ma yang gaw, si ai ni hta na langai mi bai hkrung rawt wa rai ti mung, madat kam na ma ai n rai, ngu nna shi hpe htan wu ai.
Madu a Kabu Gara Shiga rai nga ai.

2022: PRAN WAN LADAW LABAN (25) NA MUNGGA

Shinggyim masha ni rap-ra tara hkan shatup na lam, shada matsan dum myit hte kanawn mazum na lam, Karai Kasang ra sharawng ai. Masha amyu baw yawng, hkye hkrang la hkrum ai kaw du na lam, Karai Kasang ra sharawng ai. N tara ai amu, masu magaw lailen hte hpring ai dinghta ga ntsa e asak hkrung nga ga yang, zet let ai myit, htauli htaula myit rawng nna, tinang lu mi lu ahkaw ahkang hpe hkye hkrang la ai kaw du na matu akyu jashawn chye ra ai lam, Madu sharin ya ai.

Russia mung Gumsan Măgam Putin gaw shi a mungdan na hpyen ninggun hpe kam nna, hpyen ninggun nun grau ai, kaji grau ai htingbu mungdan Ukraine hpe roi chyăhkoi rai, mara kata, zăhte tam shang htim gasat ai. Putin gaw shi gaw da ai tăra grai dinghpring ai zawn nga, grai tăra ai zawn nga hkaw tsun ndau ai. Ukraine hpe u-nyem roi hku roi ai; mungdan ting hpe dap shătai nna lamu ga găshun la lu na shakut ai. Ukraine mungdan ting hpe shani shana, shata hti nna bawm shărut bun ai: mung shawa masha, dum nta, dusat yam nga, hkai sun, hkrup mi ra sat nat hpya run ai lădat lang ai. N tăra ai gaw ladu lai she rai nga ai. Miwa mung, mungkan ting hpe up lu na shakut nga ding-yang. Putin daram n sawng ai rai tim, mungkan ting hta n tara ai amu, kaji kadun ai ni hpe, n tai n mai ai ni hpe, amyu shayi ni hte ma kaji ni hpe, roi rip amyat htuk ai amu kade law la ai hpe dum mai ga ai. Num ma law law dut sha kau hkrum ma ai. Ma kaji ni hpe shabrai loi sha jaw nna bungli shangun sha ai. Masu magaw ai lădat hte mari/dut hpăga ga nga ma ai.

Gumhpraw arang lu ai ni gaw matsan masha ni kaw na arung arai ni hpe manu hpa hpa hte mari la, lai jan ai manu hte dut la ai majaw, lauban tai ma ai. Matsan ai ni gaw grau matsan mat wa ai. Amo tsun ai hte maren, matsan masha ni hpe gumhpraw hte mari la kau ai, masha langai hpe kyepdin man mi hte mănu dawdan ai, mari ai shaloi mam hteng shingnoi hpe kaba jat, dut jang shingnoi hpe kaji jau di, manu sharawt kau ai, joi jang mawp ai, Laban ban nhtoi galoi mi lai lai, ngu, ala nga ma ai, nga, shingran pra pra mu shăngun ai. Karai Kasang gaw rap-ra ai, tara ai Wa re ai majaw, n tara ai amu, matsan dum myit n rawng ai amu tawt lai ai ni hpe majoi yu shalai kau na n re ai lam, myihtoi Amo shadum ya ai.

Kabu Gara Shi-ga hta mung, myit magaw ai manager gaw shi maw sha ai amu hpe bungli madu lauban wa chye kau ai lam dum ai. Bungli kaw na shapraw kau hkrum jang masha ni shi hpe hkap la lu hkra, gumhpraw jahpan hpe manai makai di shanut kau da ai; lauban wa hpe hka kap ai ni kaw na shi myi-man tam ai. Lauban wa gaw manager a măsu măgaw ai lailen hpe matsat ai rai tim, manager shi matut nna nga-mu nga-mai lam, lu ai ahkaw ahkang hpe akyu jashawn amyat htuk chye ai zai nyan hpe shakawn ai. Ndai măbyin kaw na Yesu sharin ya mayu ai lam gaw ndai re: tinang lu da ai ja gumhpraw, sutgan, arawng aya, machye machyang,… hpa mi rai rai, dai hpe akyu jashawn nna sumsing mungdan shang lu hkra galaw la chye ra ai lam, shadum ya ai.

Shing nga ai majaw, măsu măgaw dip sha maw sha ai kaw na lu la ai gumhpraw hpe alu bang shaja let sumsing mungdan shang lekmat mari la mu, ngu ai n rai. Dai myit masa gaw n jaw ai. Măsu măgaw roi rip ai amu langai hpe pyi Karai Kasang n yu shalai kau na lam, matsing da ai lam, myihtoi Amo shadum ya ai. Zake-u gaw Yesu hpe tsun ai, “Ngai marai langai ngai hpe mawp sha kau ai rai yang, htam 4 mara hka wa na nngai”, ngu ai baw myit masa mahtang myit malai ai kumla, lu da ai sut-rai hpe akyu jashawn nna marawng raw ai amu tai wa lu ai; dai hpe gaw shakawn ging ai.

Anhte a lata de shang wa ai ja gumhpraw, alu, ni masha law law e jai lang lai wa ai hpe dum ra ga ai: lata chyang ai, lata hkyeng ai, lata tsit ai, lata htoi ai san ai, lata law law kaw na lai wa ai. Tinang a lata kade hpraw san tim n san seng ai lata law law kaw na lai du wa ai rai nga ai. Dai zawn matsat hpa kap ai gumhpraw hpe pyi kaja ai maga, matsan dum hkye mawoi la ai amu ni hta akyu jashawn nna, sumsing mungdan de du shang lu na lam tam chye ra ai, ngu ai lachyum rai nga ai.

N san n seng ai hku gumhpraw tam la lu ai hpang, mai kaja ai lam hpa hta mung n jai, matsan dum hkye mawoi ai amu hta mung n chye lang, alu atan mung n chye bang rai nna tinang htingkyeng a matu hkrai lu lu sha sha rai jai lang kau ai rai yang, hpang na prat a matu hpa mi myit mada shara nga na rai ta?

Mungmasa gyin ai ni, mung-up du hkawhkam ni kaja yang kaja ai hku, mungdan ngwi pyaw simsa na rai nga ai. N jaw ai mungmasa, gawda ai tara n jaw jang, dinghpring ai masha ni du hkra matsan jamjau hkrum lu ai. Dai majaw, shanhte a matu akyu hpyi ya ra ai lam, Timoti Laika hta tsun da ai. Anhte tinang hkum nan n dep n hkap, n hkan galaw, n hkan sharai lu ai lam law law, n jaw n tara ai amu ni law law nga nga ai lapran, anhte galaw lu ai lam mi gaw akyu hpyi htinglu ya ai amu re ai hpe dum mai ga ai.