2022: PRAN WAN LADAW LABAN (28) NA MUNGGA

Israel a hpyen amyu re ai Ahram amyu masha, hpyen-Du kaba gaw manggang ana kaw na shamai shatsai hkrum jang, shamai ya ai Elisha hpe mung, Karai Kasang hpe mung chyeju dum ai kumla madun dan ai. Dai majaw, grau ai chyeju, makam masham hte wenyi san pra wa lu ai chyeju kahtap hkam la lu nu ai. Luka a Laika kaw na manggang ana kap ai masha marai 10 shamai shatsai chyeju hkam la lu tim, Samaria amyu sha langai sha, chyeju kumhpa jaw ai wa Yesu hpe chyeju dum chye ai. Shi hpe Yesu tsun ai, “Na a makam masham nang hpe hkye la nit dai; dinghpring ai lam hta matut hkawm sa su” ngu nna kahtap shaman ya ai. Law law lang, anhte mung tinang hta ra kadawn ai lam law law a matu akyu hpyi chye nna, hkam la lu sai chyeju ni a matu chyeju dum shăkawn na mălap măli di chye ga ai.

San Pawlu a matu Kabu Gara Shi-ga, ngu ai gaw, “Chyăsi kaw na bai hkrung rawt ai Hkristu” a lam rai nga ai. Dai Hkristu hpe chye chyang kamsham lu ai gaw reng dik ai chyeju kumhpa re ai lam tsun ai. Dai Hkristu hta jung noi ai wa gaw asak a chyeju kumhpa ni hpe hkam la lu na rai nga ai.

Nahman gaw Du kaba she rai tim n myit mada ai manggang ana kap wa ai. Dai prat hta tsi shamai la na lam myit mada shara n nga ai. Myit mada shara n nga tim, mayam numsha e tsun ai ga hpe hkap la ai. Dai numsha gaw Israel amyu shayi re; Karai a masha Elisha hpang de sa su, ngu, hpaji jaw ai majaw, mahkoi shamai lu kun, ngu, myit la ai rai nga ai. Kaja wa mai tsai wa jang, dai gaw, Karai Kasang kaw na re. Israel amyu sha ni nawku ai Karai Kasang gaw tengman ai Karai Kasang re ai lam hpe chye la nu ai. Shi a chyeju dum chye ai myit a majaw rai nga ai. Elisha gaw Nahman chyeju htang ai hku htawsa ai ja gumhpraw hte reng ai hpun nba ni hpe n hkap la ya tim, Israel buga kaw na gasau Syria de htaw wa na ahkang jaw wu ai. Kabu Gara Shi-ga hta shamai hkrum ai marai 10 hta na Samaria amyu sha langai sha, Yesu hpang de htang wa nna “chyeju kaba sai” ngu tsun chye ai. Chyeju htang chye ai masha dai ni gaw, hkum hkrang shamai shatsai hkrum ai hta grau ai shaman chyeju ni hpe kahtap nna hkam la lu ma ai: wenyi hta shamai shatsai ai chyeju  hkye hkrang la ai chyeju kumhpa rai nga ai.

Myit masa galu kaba ai amyu sha ni hpe yu ai shaloi, “Chyeju kaba sai”, ngu ai ga-si lu shajang ma ai. Kaji kadun ai amyu sha law law hta, “Chyeju kaba sai” ngu ai ga-si n lu ma ai lam chye lu ai. Anhte Wunpawng myu sha hta mung, dai manu dan ai ga-si n nga ai hpe chye lu ai. Anhte lang nga ai ga, “Chyeju/chyeju kaba”, hkoi shap lang nga ai ga-si she rai nga ai. Hkristan makam masham a jaw e sha, chyeju htang chye ra ai lam dum hprang wa ai amyu tai wa ai, ngu tim n shut ang ai. Kaja wa rai jang masha yawng hta chyeju dum chye ai myit rawng ga ai. Ahkyak ai gaw kaja wa chyeju dum ga ai kun, dum chye yang shadan shapra dan lu ai kun, ngu ai mung ahkyak ai.

Chyeju dum chye ai wa hpe gaw chyeju jaw ai wa mung kahtap kahtap nna chyeju jaw mayu ai. Chyeju kumhpa lama ma hkam la lu tim, chyeju kaba sa, ngu, n chye tsun ai, n chye madun ai ni gaw, chyeju galaw ai wa hpe n gawn n sawn di ai hte bung ai.

Shat ma mi sha lu na matu, masha hkying, mun, sen shadang ru nna shang lawm ai majaw byin tai wa ai n rai a hka! Yawng mayawng a chyeju ningpawt Karai Kasang n rai a hka! Lamu ga ting Madu a chyeju hte hpring nga ai n rai a hka! Anhte n hpyi tim Karai e jaw da ai asak a chyeju kumhpa baw hpan ni kade she law, kadai hti dang na rai a hka! Grau dik htum ai gaw wenyi hte seng ai shaman chyeju, hkye hkrang la ai chyeju n rai a hka? Karai Kasang hpe chyeju dum chye ai masha langai a matu, tinang kaning re ai madang kaw du mat tim, kaning re ai gam maka hkrum tim, machyi ai maga asum maga de yawng wa tim, aput a-ngun n galaw ai, lu la hkam la ai chyeju ni hpe chyeju dum shakawn nna myit dik chye na rai nga ai.
 
Aput a-ngun tsun shaja ai ni, myit pyaw myit dik ai lam n lu ai ni, ra kadawn ai hkrai hkrai sha mu ai ni gaw hti n dang hkra re ai Karai a chyeju kumhpa ni hpe n sawn yu, n mu mada chye ai ni rai ma ai. Pyaw ai nhtoi awng dang ai nhtoi ni a majaw kabu chyeju dum ai zawn, machyi hkrum asum katut ai nhtoi ni hta mung, Karai a chyeju hpe dum chye hkap la chye ra ga ai. Sum machyi ai lama ma kaw na pyi grau reng ai chyeju kumhpa ni hpe hkam la lu na hkinjang tai wa lu ai. Nahman hte Yesu hpang de htang wa chyeju htang ai, shan lahkawng yan gaw grau ai chyeju hpe naw kahtap hkam la lu ma ai.

Daw hten ai, hkum n tai mat ai ni machyu shara, hpaji sharin shara hkan na masha ni hpe mu yu ai ni chye na re. Hkum hkrang a dawchyen myi hte ana, lagaw hte lata,…lama ma dumhprut mat ai ni, masha kaja ni hta pyi grau ai atsam sharin hkaja la lu nna mau hpa atsam ni madun lu ma ai. Lagaw lata myi na gum ai ni hta grau madang tsaw ai hku nga lu ma ai, ahkaw ahkang ni mung grau lu ma ai. Lagaw lata myi na gum ai ni hta pyi grau ai hku bungli galaw lu ma ai. Dai hten mat tum mat ai majaw myit htum shara n nga ai; grau ai kaga chyeju kumhpa ni law law shanhte hkam la lu ma ai. Karai chyeju hpe kahtap shadan shadawng chyeju shakawn lu na lam tai wa lu ai hpe mu chye lu ai.

Akyu hpyi nawku shagu, chyeju htang ai amu lawm ra ai hpe sharin la ra ga ai. Missa hkungga nawngjau ga yang, Karai a chyeju hpe shakawn ai daw law law lawm ai hpe myit dum mai ga ai. Kaja wa tinang a myit masin kaw na prut pru ai chyeju dum ai lam gaw teng ga ai kun?

Kasa Pawlu gaw shi hkam la lu ai hkye hkrang la ai chyeju hpe dum ai majaw, kaja dik ai chyeju htang ai lam gaw shi hkam la lu ai chyeju kumhpa ni hpe gam garan ya shakut ai amu rai nga ai. Shi a hkum hkrang myit masin ting nawng, dai Kabu Gara Shi-ga a jaw e zingri zingrat hkrum ai, htawng e sharen da hkrum ai, nni nkri hkam la ai lam rai nga ai. Chyeju dum chye ai, ngu ai hta, San Pawlu gaw kaja dik ai kasi tai wa ai.

2022: PRAN WAN LADAW LABAN (28) NA CHYUM LAIKA

PRANWAN LADAW HTA LABAN 28
October 9, 2022
CHYUM MUNGGA DAW 1

2 HKAWHKAM 5:14-17

Ya hti na gaw, Hkawhkam laika lahkawng hta na rai nga ai.
Manggang kap ai Naman gaw, Karai Kasang a masha wa Elisha tsun ai hte maren, Yawdan hka de yu wa nna, shi hkum hpe sanit lang kapruk jang, shi a hkum shan gaw, ma kaji a hkum shan zawn san pra wa ai. Dai rai nna, shi gaw shi a ali ama ni hte rau, Karai Kasang a masha wa hpang de bai sa nna, shi a man e tsap let, Yu u, Israela mungdan hta kaga, ga ningtsa ting hta e Karai Kasang shaje n nga ai gaw, ya ngai chye se ai: dai rai nna na a mayam wa a kumhpaw kumhpa hpe hkap la u, ngu wu ai. Myihtoi wa chyawm gaw, Ngai daw jau nga ai Madu hkrung nga ai hte maren, ngai n hkap la na nngai, ngu wu ai. Naman shadut ti mung, shi n hkap la hkraw wu ai. Bai Naman gaw, Nang n la ti mung, na a mayam wa hpe lawze lahkawng htaw dang ai ga htingbut jaw dat rit; na a mayam wa gaw ya kaw nna, wan nat hkungga rai ti mung, hkungga amyu kaga rai ti mung, Madu hta kaga, hpara shaje hpe nawng ya na n rai, ngu nna myihtoi wa hpe tsun wu ai.
Karai Kasang a Mungga rai nga ai.

CHYUM MUNGGA DAW 2

2 TIMOHTI 2:8-13

Ya hti na gaw, Timohti hpang de San Pawlu shagun dat ai laika lahkawng hta na rai nga ai.
Dawi a aru arat rai nga ai Yesu Hkristu gaw, si mat ai ni kaw na bai hkrung rawt sai, nga nna ngai hkaw tsun ai Kabu Gara Shiga hpe adum nga u. Dai Kabu Gara Shiga a jaw e, n hkru ai wa zawn bawng dung hkra, ru yak ai hkrum nngai, rai ti mung, Karai Kasang a mungga gaw sharen da ai hkrum lu ai n rai. Dai re ai majaw, Karai Kasang e lata la hkrum ai ni gaw, Hkristu Yesu hta e hkye hkrang la ai hkrum nna, htani htana na hpung shingkang hpe hkam la lu mu ga, shanhte a matu mara ndai ru yak ai lam mahkra hpe hkam sharang nga nngai. Ga ndai gaw kangka re ai ga rai nga ai: Anhte Shi hte rau si sayang gaw, shi hte rau hkrung lu na ra ga ai. Anhte myit n htum ai sha shakut sharang yang gaw, shi hte rau up lu na ra ga ai. Anhte shi hpe nyet kau yang gaw, shi mung anhte hpe nyet kau na ra ai. Anhte kangka n rai nga ti mung, shi gaw kangka rai nga ai: kaning rai nme law, shi hkum nan hpe n nyet kau lu ai.
Karai Kasang a Mungga rai nga ai.

KABU GARA SHIGA

LUKA 17:11-19

Ya hti na gaw, Luka a laika hta na Kabu Gara Shiga rai nga ai.
Yesu gaw Yerusalem mare de lung wa nga yang, Samari hte Galile mung lapran hku lai sa wa ai. Kahtawng langai mi de shang yang, manggang kap ai masha marai shi Yesu hpe hkap mu nna, tsan ai kaw tsap nga let, Yesu e, Madu e, anhte hpe matsan dum la mi law, ngu nna jahtau ma ai. Yesu shanhte hpe mu jang, Nanhte a hkum hkinjawng ni kaw wa madun dan mu, ngu dat mu ai rai nna, shanhte sa wa nga yang, san pra mat ma ai. Shanhte hta na marai langai mi gaw, shi a hkum san pra mat ai hpe mu chye jang, bai nhtang sa nna, nsen kaba hte Karai Kasang hpe shagrau sha-a nga ai.
Yesu a lagaw nhpang e dingnyawm dagup nna, Madu hpe chyeju dum wu ai: dai wa gaw Samari masha rai nga ai. Dai rai nna Yesu gaw, Marai shi San Pra mat masai, n rai ni? Marai jahku gaw kanang rai wa ma ta? Ndai tsasam masha hta kaga, Karai Kasang hpe shagrau sha-a na matu, bai nhtang sa ai masha langai mi mung n nga a ni? ngu nna tsun nhtawm, dai wa hpe, Rawt nna nta de wa nu; na a kam sham ai gaw nang hpe hkye la nit dai, ngu nna shi hpe tsun dat wu ai.
Madu a Kabu Gara Shiga rai nga ai.

2022: PRAN WAN LADAW LABAN (27) NA MUNGGA

Dinghta ga e byin nga ai mabyin ni hpe anhte sawn dinglik yu nna n chye lu ai lam law law nga ai. Hpungtang hpaji masat tara hkan nna sawn yu ninglen, computer hte sawn yu maram ninglen, mahtai kaga ga byin pru wa ai lam ni law law, hkrup mi ra byin nga ai lam ni law law nga ai. N shut lu ai tara masa (principle) hte maren sawn shen ai hpang mahtai shapraw tim, n htang chyaw re ai mahtai sha pru ai lam ni law law nga ai hpe yin la ra ga ai. Makam masham myit hte sha, Karai a masing hpe chye na hkra tam la ra ai lam, dinghta ga na măbyin ni a măhtai hpe Karai a chyeju hte sha htai lu ai lam, Habakuk a Laika kaw na sharin la lu ga ai. Tinang chye na hkap la lu ai jan nna shai wa ai lam mahkra hpe makam masham hku hkap la asak hkrung ra ai lam, Chyum Laika e sharin ya ai. Luka Laika kaw tsun da ai zawn, “Madu e, anhte a makam masham hpe shalaw ya e”, ngu, akyu hpyi ra ga ai.

Dai ni, Chyum Laika Laban hta hti ai mungga masum hte, Karai a Mungga kade ahkyak ai lam hpe shadum ya ai: dinghta ga na mabyin ni yawng a mahtai (Habbakuk), kaning di asak hkrung ra ai lam, greng grau dik ai sutgan a lam (II Tim), makam masham a atsam, dai atsam lu la hkra akyu hpyi ra ai lam (Luka), Chyum mungga masum hte madi madun dan ai.

Hkristan Chyum Laika hpe shawng shabawn găle ai San Jerome gaw Chyum Laika hte daw (seng) nna ning nga tsun da ai, “Ndai Laika buk daram chyoi pra ai mungsung ni a lam kaga kanang e mu lu na a ta? Chyum Laika hti ai a marang e hkam la lu ai kabu hpa hta grau ai kanang kaw na lu la mai a ta?” nga ai. San Ignatius Js., a lam: hpyenla prat hkăla hkrum nna tsirung rawng nga ai aten, mungkan dinghta ga na lam labau maumwi ni, maumi laika ni, sumroi laika ni langai hpang langai hti nna myit shapyaw la ai. Gara mung aten gălu myit pyaw myit dik ai lam n jaw lu ai hpe dum wa ai. Hti na laika htum mat ai hpang, jahtum e Chyum Laika buk hpaw hti ai shaloi, “Masha gaw mungkan ga hpe madu la lu tim tinang a wenyi sum mat ai rai yang hpa akyu nga a ta?” nga ai ga-yan hpe hti hkrup nna kajawng hprang wa nu ai. Shi a prat, gumhpraw hte arawng aya, gumhkawng ai lam hte shi a marin ai lam hpe tam lai wa ai. Chyum Laika hti nna myit malai lu ai hpang, shakut shaja ai hte San Pra ai masha pyi tai wa ai; Jesuit jau hpung hta manu dan dik ai jau tai wa ai.

Israel amyu sha ni hpe shaning law law dip sha dang sha ai Assyrian Empire a kajawng sha hten bya mat ai majaw, Nahum gaw shi a amyu masha ni hpe woi kabu awlaw ai. B.C 616 hta Yerusalem e hkaw dung ai wa gaw Hkawhkam Josiah; shi gaw dai mabyin hpe akyu jashawn nna makam masham hte amyu htung hking lailen ni hpe jasan jaseng ai amu ni ja ja galaw woi ai. Yerusalem Nawku Htingnu hpe jăsan jăseng nna Karai kaw bai ap nawng ya ai.

Rai tim Babylon shingkang shingwang a kajawng sha rawt ja wa ai. Josiah gaw Egyipt mung hkawhkam e shingna (ayeik/Myen hku) htan wa na hpe mung tsang ra, Babylon a shingkang jan ninghkawng Yuda mung e htoi ja wa na hpe mung tsang. Hpyen man lahkawng a lapran e shi nan woi awn ai majan hta asak sum mat ai. Babylon hkawhkam a kasha Nebukadneza gaw B.C 602 hta Palestine de hpyen man yawng nna, Yerusalem hpe amai sha gasat la lu ai (2Hkm. 24: 1). Tara Jăhprang hta rawng ai tara matsun ni hpe hkan shatup ai, dinghpring ai hkawhkam Josiah majan mung sum, hkum nan mung si mat re ai majaw, masha ni a myit hta Karai Kasang hpe kam sham ai myit ung ang wa ai. Dai hta n-ga, ya ningnan re ai hpyen Babylon a npu e taw mat ai. Assyria dăram n matse tim n hkru ai, n tara ai hku lamu ga hkan kashun ai Babylon gaw majan awng nna Karai a amyu hpa majaw majan sum ai kun (Hab. 1:11, 13)? Josiah a ban hta makam masham jasan jaseng ai amu ni galaw sai, dinghpring ai hkawhkam hkum nan mung si mat, Karai Kasang gaw hpa majaw n hkru n kaja ai ni hpe awng dang na ahkaw ahkang jaw a ta? Habakuk dai mabyin ni hpe kade gara hku sawn yu tim mahtai kaja n lu ai.

Jahtum e Karai Kasang shi hpe mahtai jaw ai: Karai Kasang a masing kaba hkrak awng dang na lam, labau hta byin nan byin wa na lam, ya jang n mu lu tim myit galu ai hte ăla nga ra ai lam, dinghpring ai ni gaw kamsham myit hte asak hkrung nga ra ai lam, Karai Kasang kaw na mahtai lu la nu ai.

Htawm hpang e San Pawlu gaw dai hpe lakap nna grau kuptsup ai hku sharin ya ai (Rom 1:17). Karai Kasang hpe manoi ai, kam sham kam hpa ai ni gaw masha a labau na mabyin ni hpe n chye ya lu ai shaloi, Habakuk zawn, “hpa majaw ta?” “galoi aten du hkra rai na kun?“ ngu ga- san san na ma ai. Shing re ai aten hta Karai Kasang a “jeyang ai amu, hpăran ai lădat hpe n chye sawng, chyipmak rai nga tim, Karai Kasang hta matut kamhpa ra ai. Dinghpring ai ni roi rip zingri zingrat hkrum ai lam a mahtai hpe si wa ai aten du hkra n chye madat kun, mahtai n lu kun rai na re. Rai tim jahtum du hkra, hpa mahtai n lu tim Karai Kasang a atsam, Shi a hkye hkrang la ai lam hpe myit mada kamhpa ăla nga ra ai lam: “dinghpring ai ni gaw kangka ai kam sham myit hte hkrung nga lu na”, nga ai.

Karai a Kasha Yesu hte ni htep dik ai sape ni pyi gaw shanhte n chye madat ai lam law law nga ai hpe dum ma ai. Dai majaw, “Madu e, anhte a makam masham hpe shalaw jahtam ya e” ngu nna hpyi ma ai. Ndai mabyin ni yawng, Karai a mungga kade ahkyak ai, masha shăgu hti sumru ninggun la ra ai lam hpe shadum ya ai.

Kasa Pawlu gaw shi a sape Timoti hpe tsun ai, “Ngai kaw na nang na la, sharin la lu ai mungga/sutgan (Karai Kasang a mungga) hpe Chyoi Pra Wenyi a chyeju hte rem kyem da u” nga ai. Matut nna tsun ai hta, Dai Hkristu a lam hpe sakse hkam na lam, Pawlu shi zawn, nni nkri hkam sharang let Kabu Gara Shi-ga hpe shăchyam shăbra na lam matsun ya ai. Yawng mung, Chyum mungga shăchyam shăbra ai amu, Karai a mau-hpa amu ni, hkye hkrang la ai amu hpe htawn tsun sakse hkam nna shăman chyeju hkam la ga.

2022: PRAN WAN LADAW LABAN (27) NA CHYUM LAIKA

PRANWAN LADAW HTA LABAN 27
October 2, 2022
CHYUM MUNGGA DAW 1

HABAKU 1:2-3, 2:2-4

Ya hti na gaw, myihtoi Habaku a laika hta na rai nga ai.
Madu e, Nang n madat ya ai; ngai galoi ten du hkra hpyi jahtau na rai ta? Kashun kashe hkrum ai majaw, ngai nang hpe marawn jahtau ti mung, nang garum la ai n rai. Nang hpa majaw n ding n man ai amu ngai a man e madun dan nna, adip ahkrip rai galaw ai amu hpe, nang hpa rai nna tsap yu nga nta? Kashun kashe hkrum ai majaw, ngai nang hpe marawn jahtau ti mung, nang garum la ai n rai. Nang hpa majaw n ding n man ai amu ngai a man e madun dan nna, adip ahkrip rai galaw ai amu hpe, nang hpa rai nna tsap yu nga nta? Hten byak ai hte kashun kashe nye a man e rai nga nna, ndang kalang hkat ai hte ga law ga la ai law htam nga ai.
Shaloi Madu ngai hpe htan ya nna, Shingran ga hpe ka da u; hti ai wa gaw ndai hpe hti loi na matu, lung pa hta dan dan pra pra ka da u. Kaning rai nme law ndai shingran gaw, ndat da ai aten hte seng nna, dik wa na matu sharawng nga ai majaw, masu hkalem na n rai. Dai gaw lau n du ti mung, ala nga u; hpa majaw nga yang, dai shingran ga teng teng dik wa na ra ai. Myit n malang ai wa gaw, hten byak wa ai hpe yu yu u; ding hpring ai wa chyawm gaw shi a kam sham ai hte hkrung nga lu na ra ai.
Karai Kasang a Mungga rai nga ai.

CHYUM MUNGGA DAW 2

2 TIMOHTI 1:6-8, 13-14

Ya hti na gaw, Timohti hpang de San Pawlu shagun dat ai laika lahkawng hta na rai nga ai.
Ngai na a ntsa e lata mara ya ai shaloi, Karai Kasang nang hpe jaw ai chyeju kumhpa hpe wut shagrung dat na, ngai nang hpe shadum dat de ai. Karai Kasang jaw ai kumhpa gaw, hkrit chye ai myit n rai; n-gun atsam rawng ai myit, tsaw ra chye ai myit, tinang a hkum hpe hkang dang ai myit mahtang she rai nga ai. Dai rai nna, Madu Yesu a matu sakse hkam ya ai hta mung, shi a bawng dung ai wa ngai rai nga ai majaw mung, nang galoi mung hkum kaya et; Karai Kasang jaw ai n-gun atsam hpe kam hpa let, Kabu Gara Shiga a matu ru yak ai lam ni hpe mahtang, ngai hte rau hkam sharang nga u.
Ngai kaw na nang na la sai san seng ai mungga jet hpe, na a kasi ningli shatai nna, Hkristu Yesu hta e kam sham tsaw ra ai myit hte manoi manat nga u. Grai manu dan ai sut nang hpe ap ya da sai rai nna, anhte hta rawng nga ai Chyoi Pra ai Wenyi a garum ai hte, dai hpe sin makawp maga da u.
Karai Kasang a Mungga rai nga ai.

KABU GARA SHIGA

LUKA 17:5-10

Ya hti na gaw, Luka a laika hta na Kabu Gara Shiga rai nga ai.
Lang mi na kasa ni gaw. Anhte a kam sham myit shalaw ya mi, ngu nna Yesu Madu hpe hpyi ma ai. Shaloi Yesu gaw shanhte hpe htan ya ai gaw: Nanhte hta kam sham ai myit chying hkrang tum daram rawng yang gaw, ndai labyi hpun hpe, hpun e, aru hte nawng baw nna, nammukdara e sa tu nga u law, ngu yang nanhte a ga madat na ra ai. Hkauna galau ai, shing n rai sagu bainam rem ai, na a shangun ma gaw hkauna pa de na du wa yang, dai wa hpe, Alawan wa dung nna, shat sha ru, nga nna tsun na, nanhte hta kadai rai ta?
Shing n nga ai sha, na a shangun ma hpe, Ngai sha na shana shat lajang tawn u; ngai lu sha ngut hkra, na a hkum shajin nna ngai hpe galaw jaw rit; dai ngut jang she nang lu sha lu na ndai, ngu na wu ai n rai ni? Dai shangun ma gaw hkang da ai ga mahkra hpe shatup ai majaw, shi a madu shi hpe chyeju htang ai ga tsun ra a ni? Dai hte maren nanhte mung, hkang da mada yawng hpe hkan shatup ngut jang, Anhte gaw akyu n rawng ai shangun ma ni rai nga ga ai; galaw ang ai bungli hpe sha anhte shatup sa ga ai, ngu mu, ngu nna Madu Yesu shi a kasa ni hpe tsun mu ai.
Madu a Kabu Gara Shiga rai nga ai.

2022: PRAN WAN LADAW LABAN (26) NA MUNGGA

Ziun Mare na lu su nga-mu nga-mai ai ni  reng dik ai hpun palawng bu hpun, magwi kawng yup-ku hta galeng, apyaw sha rai lăgaw lătsawn, hpum sau ai sagu bainam sat sha, tsa hkru hkru tit tit lu, pyaw ai music madat, manam pyaw ai bawsau chya, rai nna nga ai lu su masha ni, shim lum dum nga ma ai. Rai tim, shanhte gaw tinang a amyu masha ni matsan jamjau hkrap ngu hkrap ngoi jawng ai hpe n mada mu ya ma ai; hpa n matang ya ma ai. Shanhte ni ding- nye lu ma ai; hpyen ni du ai aten hta bawng masha hku shawng woi la hkrum na ni rai ma ai, nga, Amo shadum sadi jaw ai. Luka ka da ai maumi hta lu su ai masha wa kadai hpe hpa shut ai lam n tsun da ai; shi a mara gaw matsan jamjau ai Lazaru hpe matsan dum n chye ai, n gawn n sawn di kau ai mara rai nga ai. Mungkan sutgan, dinghta ga na nga-mu nga-mai lam hpe sha manoi nna hpang na prat a matu hkyen lajang da ai lam n galaw, sumsing sutgan n mahkawng da ai ni hkrum katut na gam maka a lam rai nga ai.

Ga-shaka lu ai Karai Kasang a amyu masha, Israel amyu sha ni yawng shada kahpu kanau myit masin rawng ra ma ai. Shada zinlum mada mara, makawp maga hkat na lit lu ma ai. Rai tim sut lu nga-mai ai masha ni, matsan masha ni hpe hpa n nawn, shanhte kawsi hpang gara ai, lum palawng nba n lu ai majaw kashung ma ai, ra kadawn ai law law a majaw hkrap ngu hkrap ngoi ai nsen hpe n madat ya ma ai. Dai ni gaw ding-nye lu ma ai, nga ai. Mungdan shagu hta lu su masha ni hte matsan masha ni a lapran, tsan gang hkat ai lam dam lada la ai; sawng grau wa nga ai. Mungkan ga gaw mungkan ting na masha ni a matu sha-hpa law hkra shăpraw ya nga tim, kawsi hpang găra let
 
yup-ra shang ra ai masha ni sen kaba, wan kaba ru nna nga ma ai. Karai Kasang gaw shinggyim masha yawng law lang daw tsi-hkrung tsi- nan ni hpe hpan shălat da ya ai; tsi n tsi la lu ai majaw si mat ai ni shani shagu mun sen hti nna si mat ma ai. Htinggaw shagu shimlum ai hku rawng na nta shara nga nga tim, masha sen wan kaba, lam makau hkan, mahkrai npu e, yi-hkyap zawn re nta e machyu shingbyi ai ni sen kaba wan kaba ru nna nga ma ai. Hpan Madu Karai a ra rawng ai lam n rai; shinggyim masha ni hta tsawra matsan dum myit n rawng ai, n tara ai, tingkyeng myit hpyau ai majaw n rai a hka!

Miwa ni seng dung lu sha ai ladat, shada daw jaw hkat ai ladat hpe sha pyi shingran mu yu ga_ lu sha n ma hkra, jan hkra htet sumpum da ai alai nga ma ai. Jan ai hte hpe mung n hta wa ai, majoi ngam sumpum da nna kade jan sumpum da lu ai hpe arawng la ma ai. Miwa mung ting, lani mi na jan ngam ai lu-sha hte kawsi hpang găra ai mungdan langai na masha ni hpe shaning tup bau lu na daram she rai nga ai. Rai tim Miwa mungdan shing di nna matsan jamjam hkrum ai masha ni hpe gam jaw gam ya ai lam hta shakut ai asam maka n mu lu ai lam hpe chye lu ai. Nang/ngai gaw gara hku kun?

Lauban wa gaw Lazaru hpe dăru kajet ai n rai; pawt matsa ai lam n galaw ai; anu ajin di ai n rai. Shi hta sha-hpa lai jan hkra lu ninglen, dai kawsi hkrum ai Lazaru hpe sha-hpa garan gam jaw na n myit ai. Shi hkrai lu sha pyaw nna Lazaru hpe n mada yu ai, hpa n matang ai, n gawn ai. Hpang na prat a matu akyu la sutgan mahkawng la lu na ahkaw ahkang hpe tat sum kau nu ai. Ndai maumi hku nna hpang na prat, ngu ai, htani htana grin ai aprat nga ai lam hpe shadum ya ai.

Mungga madat la ai ni yawng gaw lu-sha hpung nba, ja gumhpraw jan hkra lu ai hkrai n rai na re. Jan hkra n lu ai majaw gam jaw gam ya ai amu, matsan dum garum hkat ai amu n gălaw ra ai kun? Kade n lu n lawm ai wa rai tim, tsawra matsan dum gam jaw gam ya ai amu hpe galaw lu na ahkaw ahkang lu na sha re. Ja gumhpraw sut rai hku mi n rai tim, shalan shabran ninggun jaw, jaw ai lam hpe matsun ya, hkum nan aten jaw garum shingtau ai zawn re ai baw ni hpe galaw lu ai ahkaw ahkang n taw na re. Shawa hte seng ai mai kaja ai amu ni hta shang lawm lu ai ahkaw ahkang n taw na re.

Myihtoi Amo a shadum ga labau hta dik wa ai: BC 587 ning Ziun Mare (Yerusalem) hpya run kau hkrum ai aten hta, arawng aya lu ai ni, lu su nga-mai ai ni, hpaji chye ai ni yawng hpe bawng masha shătai, Babylon de gau la kau hkrum ma ai. Matsan masha ni, n byin n tai ai ni hpe gaw ngam da ai lam chye lu ai. Dai măbyin hte Lazaru maumi hku nna prat shagu na masha ni hpe shadum ya ai.

Kaga maumi langai hta lu su nga-mai ai masha langai si mat ai hpang lamu Kasa gaw shi hpe lam woi nna sumsing mungdan e shi nga na shara de woi sa ai da. Grai hkrak grai htuk ai shara ni hpe tawt lai woi nna matsan mayan re ai nga shara shi hpe madun ai, “Ndai nang nga na shara re” ngu, madun ya ai da. Masha dai gaw myit n dik ai majaw grau kaja ai shara she madun rit, ngu ai shaloi lamu Kasa tsun ai, “Nang dinghta ga kaw na shalun dat ai arung arai ni hte ndai daram re ai nta sha gawgap lu ai, myit dik nu” ngu ai da.

Ndai prat hta tsawra matsan dum ai amu, gam jaw gam ya ai amu, shada garum shingtau hkat ai amu ni gaw teng sha hpang na prat hta tinang hte gingdan ai shara lu la na matu mahkawng da ai sutgan tai wa ai lam hpe shadum ya ai.

2022: PRAN WAN LADAW LABAN (26) NA CHYUM LAIKA

PRANWAN LADAW HTA LABAN 26
September 25, 2022
CHYUM MUNGGA DAW 1

AMO 6:1,4-7

Ya hti na gaw, myihtoi Amo a laika hta na rai nga ai.
Mahkra dang chye ai Karai Kasang ning nga ai: Zium bum ntsa e ngwi pyaw nga nna, Samari bum ntsa e hkrithpa n dum nga ai ni a matu, tsang shara nga malu ai. Magwi kawng yup ku hta shanhte kaleng tawn nga nna, panep ni hta gumkan taw nga ma ai. Shanhte gaw sagu hpung na sagu kasha hpe mung, dumsu ulawng na dumsu kasha hpe mung, sha ma ai: tingse dum let, nchyun chyun nna, Dawi zawn dum ai baw amyu myu hpe tinang a matu galaw ma ai: tsabyi chyaru hpe lu lai nna, kaja htum ai sau hte tinang a hkum hpe chya ma ai. Rai ti mung, Yosep hten byak ai lam hpe n tsang ma ai. Dai re ai majaw, tsasam mung de bawng dung na matu, shanhte hpe shawng woi wa na mara ai. Shing rai, gumkan taw ai ni a pyaw daw kadaw ai lam htum mat na ra ai.
Karai Kasang a Mungga rai nga ai.

CHYUM MUNGGA DAW 2

1 TIMOHTI 6:11-16

Ya hti na gaw, Timohti hpang de San Pawlu shagun dat ai laika langai hta na rai nga ai.
Nang gaw Karai Kasang a masha wa rai nga ndai majaw, ding hpring ai, tara hkungga ai, kam sham ai, tsaw ra ai, shakut sharang ai hte, sumnung ai myit hpe hkan shachyut nga u. Htani htana asak hpe nang hkam la lu na matu, makam masham hte seng ai, mai kaja ai gasat gala ai hpe a gasat nga u: dai hpe hkam la na matu nang hpe shaga la nna, sakse law law a man e teng man ai a matu nang sakse hkam ya nit dai. Yawng mayawng hpe asak jahkrung ya ai Karai Kasang a man e mung, Puntsiu Pilatu a man e teng man ai a matu sakse hkam ya ai. Yesu Hkristu a man e mung, ngai nang hpe shadum dat ai gaw: Anhte a Madu a Madu Yesu Hkristu paw pru ai nhtoi du hkra, nang hpe hkang da ai ga mahkra hpe, mara n kap ai sha ding ding man hkan galaw shatup nga u, ngu nna nang galaw ra ai magam hpe madun dat nngai.
Karai Kasang gaw, ahkying aten ang wa yang, dai Yesu Hkristu paw pru shangun na ra ai. Madu Karai Kasang htani htana ngwi pyaw ai hta anga nga nna, yawng mayawng hte hpe up nga ai Madu langai sha rai nga ai. Shi gaw hkawhkam ni a Hkawhkam, madu ni a Madu rai nga ai rai nna, Shi chyu sha htani htana asak a rawng nga ai hte, anhte a n dep lu ai nhtoi hta a nga nga ai. Masha kadai mung Shi hpe n mu yu ai hte, n mu lu nga ai: Shi kaw htani htana arawng sadang hte hpung shingkang anga nga u ga law. Amen.
Karai Kasang a Mungga rai nga ai.

KABU GARA SHIGA

LUKA 16:19-31

Ya hti na gaw, Luka a laika hta na Kabu Gara Shiga rai nga ai.
Yesu gaw Hparishe ni hpe tsun mu ai gaw: Lang mi na sahti langai mi gaw reng htum ai hte kya mani ai hpun palawng bu hpun sumli nna, shani shanang pyaw pyaw ningngai ga ai. Hkum ting kahpraw hpye ai Lazaru ngu ai hpyi sha ai wa langai mi hpe mung, dai sahti wa sha ku hta na hkrat ai adaw ahkyep hta sha mayu nna, shi a chyinghka makau e sa tawn da mu ai: gwi ni mung shi a nma sa mata ya ma ai. Shaloi, dai hpyi sha ai wa si mat nna, lamu kasa ni gaw shi hpe Abraham a lahpyen hta woi bang da mu ai: sahti wa mung si wa nna, makoi mayang di dat mu ai. Katsan ga e nachying nni hkri hkrum let shi mada yu nna, Abraham hpe mung, shi a lahpyen hta rawng ai Lazaru hpe mung mu wu ai.
Shaloi, shi gaw Wa Abraham e, ngai hpe matsan dum la e; ngai gaw ndai wan grung ai hta, n ji n mu hkrum nga nngai majaw, Lazaru gaw shi a lata ndung hte ntsin kapruk sa nna, nye a shinglet madit katsi ya li ga, ngai hpang de shangun dat ru law, ngu nna hpyi jahtau wu ai. Shaloi, Abraham gaw, Sha e, nang gaw naw hkrung nga ai hte yang, na a ngamu ngamai lu la nit dai mung, Lazaru gaw dai hte yang tsin yam tsindam hkrum nga ai mung, dum nga u: ya chyawm gaw shi nang e pyaw nga sai, nang mahtang gaw n ji n mu hkrum nga nit dai. Dai hta kaga, ndai yang nna, nanhte gaw n ji n mu hkrum nga nit dai. dai hta kaga, ndai yang nna, nanhte hpang de rap sa mayu ai ni, n rap lu mu ga mung, dai yang nna, anhte hpang de kadai n rap wa lu mu ga mung, anhte hte nanhte a lapran e sung la ai krung sinwa din nga ai, ngu nna htan wu ai.
Bai, sahti wa gaw, Wa e, dai rai yang gaw, ngai nang hpe hpyi de ga, ngai nau manga naw nga ma ai majaw, shanhte mung ndai nni nkri hkrum ai shara de, n du mu ga, shanhte hpe wa shadum shahprang na, Lazaru hpe nye wa nta de shangun dat ya e law, ngu nna hpyi wu ai. Abraham gaw, shanhte kaw Mawshe hte myihtoi ni nga ma ai: dai ni a ga madat mu ga, ngu wu ai. Sahti wa gaw, N rai, Wa Abraham e, si ai ni hta na, langai mi shanhte kaw bai wa yang gaw, shanhte myit malai lu na ma ai, ngu wu ai. Abraham gaw Mawshe hte myihtoi ni a ga shanhte n madat ma yang gaw, si ai ni hta na langai mi bai hkrung rawt wa rai ti mung, madat kam na ma ai n rai, ngu nna shi hpe htan wu ai.
Madu a Kabu Gara Shiga rai nga ai.

2022: PRAN WAN LADAW LABAN (25) NA MUNGGA

Shinggyim masha ni rap-ra tara hkan shatup na lam, shada matsan dum myit hte kanawn mazum na lam, Karai Kasang ra sharawng ai. Masha amyu baw yawng, hkye hkrang la hkrum ai kaw du na lam, Karai Kasang ra sharawng ai. N tara ai amu, masu magaw lailen hte hpring ai dinghta ga ntsa e asak hkrung nga ga yang, zet let ai myit, htauli htaula myit rawng nna, tinang lu mi lu ahkaw ahkang hpe hkye hkrang la ai kaw du na matu akyu jashawn chye ra ai lam, Madu sharin ya ai.

Russia mung Gumsan Măgam Putin gaw shi a mungdan na hpyen ninggun hpe kam nna, hpyen ninggun nun grau ai, kaji grau ai htingbu mungdan Ukraine hpe roi chyăhkoi rai, mara kata, zăhte tam shang htim gasat ai. Putin gaw shi gaw da ai tăra grai dinghpring ai zawn nga, grai tăra ai zawn nga hkaw tsun ndau ai. Ukraine hpe u-nyem roi hku roi ai; mungdan ting hpe dap shătai nna lamu ga găshun la lu na shakut ai. Ukraine mungdan ting hpe shani shana, shata hti nna bawm shărut bun ai: mung shawa masha, dum nta, dusat yam nga, hkai sun, hkrup mi ra sat nat hpya run ai lădat lang ai. N tăra ai gaw ladu lai she rai nga ai. Miwa mung, mungkan ting hpe up lu na shakut nga ding-yang. Putin daram n sawng ai rai tim, mungkan ting hta n tara ai amu, kaji kadun ai ni hpe, n tai n mai ai ni hpe, amyu shayi ni hte ma kaji ni hpe, roi rip amyat htuk ai amu kade law la ai hpe dum mai ga ai. Num ma law law dut sha kau hkrum ma ai. Ma kaji ni hpe shabrai loi sha jaw nna bungli shangun sha ai. Masu magaw ai lădat hte mari/dut hpăga ga nga ma ai.

Gumhpraw arang lu ai ni gaw matsan masha ni kaw na arung arai ni hpe manu hpa hpa hte mari la, lai jan ai manu hte dut la ai majaw, lauban tai ma ai. Matsan ai ni gaw grau matsan mat wa ai. Amo tsun ai hte maren, matsan masha ni hpe gumhpraw hte mari la kau ai, masha langai hpe kyepdin man mi hte mănu dawdan ai, mari ai shaloi mam hteng shingnoi hpe kaba jat, dut jang shingnoi hpe kaji jau di, manu sharawt kau ai, joi jang mawp ai, Laban ban nhtoi galoi mi lai lai, ngu, ala nga ma ai, nga, shingran pra pra mu shăngun ai. Karai Kasang gaw rap-ra ai, tara ai Wa re ai majaw, n tara ai amu, matsan dum myit n rawng ai amu tawt lai ai ni hpe majoi yu shalai kau na n re ai lam, myihtoi Amo shadum ya ai.

Kabu Gara Shi-ga hta mung, myit magaw ai manager gaw shi maw sha ai amu hpe bungli madu lauban wa chye kau ai lam dum ai. Bungli kaw na shapraw kau hkrum jang masha ni shi hpe hkap la lu hkra, gumhpraw jahpan hpe manai makai di shanut kau da ai; lauban wa hpe hka kap ai ni kaw na shi myi-man tam ai. Lauban wa gaw manager a măsu măgaw ai lailen hpe matsat ai rai tim, manager shi matut nna nga-mu nga-mai lam, lu ai ahkaw ahkang hpe akyu jashawn amyat htuk chye ai zai nyan hpe shakawn ai. Ndai măbyin kaw na Yesu sharin ya mayu ai lam gaw ndai re: tinang lu da ai ja gumhpraw, sutgan, arawng aya, machye machyang,… hpa mi rai rai, dai hpe akyu jashawn nna sumsing mungdan shang lu hkra galaw la chye ra ai lam, shadum ya ai.

Shing nga ai majaw, măsu măgaw dip sha maw sha ai kaw na lu la ai gumhpraw hpe alu bang shaja let sumsing mungdan shang lekmat mari la mu, ngu ai n rai. Dai myit masa gaw n jaw ai. Măsu măgaw roi rip ai amu langai hpe pyi Karai Kasang n yu shalai kau na lam, matsing da ai lam, myihtoi Amo shadum ya ai. Zake-u gaw Yesu hpe tsun ai, “Ngai marai langai ngai hpe mawp sha kau ai rai yang, htam 4 mara hka wa na nngai”, ngu ai baw myit masa mahtang myit malai ai kumla, lu da ai sut-rai hpe akyu jashawn nna marawng raw ai amu tai wa lu ai; dai hpe gaw shakawn ging ai.

Anhte a lata de shang wa ai ja gumhpraw, alu, ni masha law law e jai lang lai wa ai hpe dum ra ga ai: lata chyang ai, lata hkyeng ai, lata tsit ai, lata htoi ai san ai, lata law law kaw na lai wa ai. Tinang a lata kade hpraw san tim n san seng ai lata law law kaw na lai du wa ai rai nga ai. Dai zawn matsat hpa kap ai gumhpraw hpe pyi kaja ai maga, matsan dum hkye mawoi la ai amu ni hta akyu jashawn nna, sumsing mungdan de du shang lu na lam tam chye ra ai, ngu ai lachyum rai nga ai.

N san n seng ai hku gumhpraw tam la lu ai hpang, mai kaja ai lam hpa hta mung n jai, matsan dum hkye mawoi ai amu hta mung n chye lang, alu atan mung n chye bang rai nna tinang htingkyeng a matu hkrai lu lu sha sha rai jai lang kau ai rai yang, hpang na prat a matu hpa mi myit mada shara nga na rai ta?

Mungmasa gyin ai ni, mung-up du hkawhkam ni kaja yang kaja ai hku, mungdan ngwi pyaw simsa na rai nga ai. N jaw ai mungmasa, gawda ai tara n jaw jang, dinghpring ai masha ni du hkra matsan jamjau hkrum lu ai. Dai majaw, shanhte a matu akyu hpyi ya ra ai lam, Timoti Laika hta tsun da ai. Anhte tinang hkum nan n dep n hkap, n hkan galaw, n hkan sharai lu ai lam law law, n jaw n tara ai amu ni law law nga nga ai lapran, anhte galaw lu ai lam mi gaw akyu hpyi htinglu ya ai amu re ai hpe dum mai ga ai.

2022: PRAN WAN LADAW LABAN (25) NA CHYUM LAIKA

PRANWAN LADAW HTA LABAN 25
September 18, 2022
CHYUM MUNGGA DAW 1

AMO 8:4-7

Ya hti na gaw, myihtoi Amo a laika hta na rai nga ai.
Hpa n lu ai ni hpe shagrit kau ai hte, n dai mung na matsan mayan ni hpe dip sha ai ni e, ndai ga hpe madat mara mu: Nanhte gaw, Anhte mam dut lu na, shata praw, hkaulan mam hpe dut lu na, laban nhtoi lau lai u ga. Shaloi dang hpe kaji, gumhpraw shen na joi hpe kaba shangun nna, maw sha map sha let, matsan mayan ni hpe gumhpraw hte, hpa n lu ai ni hpe kyepdin man mi hte mari la lu na ga ai; hkaulan mam shingyun hpe pyi dut kau lu na ga ai, nga nna tsun nga myit dai. Madu gaw Yaku a arawng sadang hpe myit dum let, Gaja wa, nanhte a amu bungli mahkra hpe, ngai galoimung malap mali kau na n rai, ngu nna dagam da nu ai.
Karai Kasang a Mungga rai nga ai.
 
CHYUM MUNGGA DAW 2

1 TIMOHTI 2:1-8

Ya hti na gaw, Timohti hpang de San Pawlu shagun dat ai laika langai hta na rai nga ai.
Shinggyim masha ni yawng a matu hpyi nem ai, akyu hpyi ai, hpyi htinglu ya ai hte, chyeju dum shakawn ai lam ni hpe, kaga lam ni mahkra a shawng e galaw na sut la ai, ngu nna shadum jahprang dat nngai. Tara hkungga nna, htap htuk ai lam amyu myu hpe hkan galaw shatup let, ngwi pyaw simsa ai hte anhte nga sa lu na matu, hkawhkam ni hte ahkang aya jum ai ni a matu mung akyu hpyi ra ai. Dai gaw, anhte a hkye hkrang la ai madu Karai Kasang a man e mai kaja ai hte sharawng awng ai lam rai nga ai: masha yawng mayawng hkye hkrang la ai hkrum na hte, teng man ai lam hpe chye chyang wa na hpe Shi Madu ra nga ai. Kaning rai nme law, Karai Kasang langai sha nga ai; dai Karai Kasang hte shinggyim masha a lapran e, shinggyim masha rai nga ai, Hkristu Yesu ngu ai htinglu htinglai ya ai wa langai sha nga ai.
Shi gaw yawng mayawng a matu shi hkum nan hpe gawng malai hkungga di nna ap kau nu ai. Shing rai, daw da ai ahkying aten hta Hkristu Yesu sa du nna, Karai Kasang dai hku myit ra ai hpe Shi sakse hkam ya nu ai. Ndai lam hpe tsun shana na hte, de a kasa wa tai na matu, ngai hpe san tawn da ai ni rai nna, teng man ai makam masham hta maigan amyu ni hpe sharin shaga ai wa ngai rai nga nngai: ngai ning nga tsun ai gaw, teng man ai ga tsun nngai, ngai n masu ai law. dai re ai majaw, masin n pawt ai hte, ndang kalang n re ai sha, lasha ni gaw hkungga lara ai hte lata sharawt let, shara shagu hkan e akyu hpyi nga na hpe ngai ra nngai.
Karai Kasang a Mungga rai nga ai.

KABU GARA SHIGA

LUKA 16:1-13

Ya hti na gaw, Luka a Laika hta na Kabu Gara Shiga rai nga ai.
Dai aten hta Yesu Shi a sape ni hpe tsun mu ai gaw: Sahti langai mi kaw kunhting wa langai mi nga ai; dai kunhting wa gaw shi a madu a arai jai shamat kau ai rai nna, madu a man e mara sa shagun da mu ai. Shaloi sahti wa gaw shi hpe shaga la nna, Na a lam hta ngai na la ai gaw, kaning re ai rai ta? Nang jum ai gumhpraw jahpan laika dan yu rit; ya kaw nna kunhting amu n galaw lu na ndai, ngu wu ai. Dai rai nna dai kunhting wa gaw, Nye madu ngai hpe kunhting amu na jahkrat kau ni ai majaw, ngai kaning di na i? Ga htu ga chye na mung ngai n-gun n rawng nngai; hpyi sha na mung ngai kaya nngai. Ngai hpe shapraw kau jang, masha ni ngai hpe tinang a nta hta hkap la ra hkra, ngai galaw ra ai lam, ya ngai chye se ai, nga nna shi a kraw hta myit la wu ai.
Dai rai nna shi a madu kaw hka kap ai ni langai hte langai hpe shaga la nna, shawng na wa hpe, Nye a madu hpe hka gade daram wa ra nta? Ngu nna san yang, dai wa gaw, Namman joi hkying mi wa ra nngai, ngu wu ai. Shaloi kunhting wa gaw, Na a jahpan laika la nna, dung let manga tsa ka da u; lawan di u, ngu wu ai. Bai kaga wa hpe, Nang mung gade wa ra nta? ngu nna san yang, dai wa gaw, Hkaulan mam dang hkying mi wa ra nngai, ngu wu ai. Kunhting wa gaw, Na a jahpan laika la nna, matsat tsa ka da u, ngu wu ai. Dai n tara ai kunhting wa hpaji hte chye galaw ai majaw, shi a madu shi hpe shakawn wu ai; kaning rai nme law, ndai mungkan ga a kashu kasha ni gaw, tinang a lam hta e, nhtoi a kashu kasha ni hta rau nna hpaji rawng ma ai.
Dai rai nna ngai nanhte hpe tsun made ga: Nanhte a mungkan sutgan hte tinang a matu jinghku ni hpe tam nga mu; shaloi dai hpe kau da na aten du jang, shanhte gaw dinggrin a nga nga ai nta de nanhte hpe hkap la na mara ai. Amu kaji hta kangka re ai wa gaw amu kaba hta mung kangka rai na ra ai. amu kaji hta n ding n man ai wa gaw, amu kaba hta n ding n man nga na ra ai. Ndai mungkan ga na sutgan hte pyi nanhte kangka n rai lu yang gaw, reng htum ai sutgan majing hpe nanhte kaw kadai mi kam ap ya na a ta? Masha kaga a sut rai hte nanhte kangka n rai lu yang gaw, nanhte madu ang ai sut rai hpe nanhte hpe kadai mi ap ya na rai ta? Kadai shangun ma rai ti mung, madu lahkawng a amu gun hpai lu ai n rai; langai wa hpe shi n dawng n yawt nna, langai wa hpe tsaw ra na wu ai: Shing n rai, langai wa hta machyu nna, langai wa hpe n kaw n law di na wu ai: nanhte gaw Karai Kasang hpe mung, mungkan a sutgan hpe mung rau daw jau lu na myit dai n rai.
Madu a Kabu Gara Shiga rai nga ai.

2022: PRAN WAN LADAW LABAN (24) NA MUNGGA

Karai a n htum n wai ai tsawra matsan dum myit hte mara raw dat ya ai lam rai nga ai. Kade daram mara kaba ai rai tim, Karai e n dat ya lu ai mara n nga ai. Ahkyak dik ai gaw myit malai majing lu nna, Kawa Karai hpang de sit shang wa na lam langai sha nga ai. Shinggyim masha gaw gawng kya ai amyu re ai lam hpe Pru Mat wa ai Laika hta tsun da ai. Pawlu mung, shi daram mara kaba ai wa hpe Karai Kasang e matsan dum ya ai lam; shi hkam la lu ai chyeju hta, Yesu Hkristu a n htum n wai myit galu kaba ai, matsan dum mara dat ya ai lam dan san dik ai sakse tai wa ai, nga ai.

Anhte myit galu hkam sharang ya na yak dik htum ai masha jahpan hta tsa ya kaba, kani ya, 4-ya ni teng sha lawm ai. Kăga baw yin lu ya lu ai ni hpe hkam sharang ya na mung n loi la nga ai. Tsa, kanni hte kaga nanghpam baw lu lang ai ni hpe tsi ya ai dawn dabang hkan na mabyin ni hpe yu jang myit daw hpa nan rai nga ai. Kade madang tsaw ai, kaja dik ai dawn dabang hkan e rai tim, nanghpam a mayam tai ai kaw na tsep kawp lawt lu ai, awng dang ai masha shau la ai (n law la ai); marai 100 hta marai 4-5 daram sha re ai lam hpe chye lu ai.
 
Nta dinghku masha ni, alu jaw madi shadaw ai ni, sharin achyin ya ai ni…yawng a matu myit daw hpa n rai a hka?

Kanu kawa ni, hkrap myi-prwi hkaw ai kade lang ngu ai she rai na ma ai. Chyu rum kahpu kanau kana ni kade lang myit daw ga shaga kau na she rai ma hka! Dum nta e shimlum lam n nga mat ai, dinghku sut ring jat lu ai lam n nga ai, mare kahtawng hta mung shimlum lam n nga mat ai. Kade daram yawn hpa she rai a hka! Nanghpam a mayam tai mat ai masha ni a gam maka anhte yawng chye ga ai. Shanhte hpe yawng e yu matsat kau na ma ai.

Nanghpam a mayam tai ai ni sha n rai; kaga baw n kaja ai lailen hte hten byak nga ai masha ni hpe hkam sharang ya na mung n loi la ai. Shinggyim masha shăda hkamjan n lu, sharin ya n lu, mara dat ya n lu, re ai mabyin ni hta Karai a n htum n wai tsawra matsan dum myit hpe dum mai ga ai. Mungmasa sut-masa hkrat sum taw nga ai ladaw, ruyak jamjau ai lam lăja lăna hkam sha nga ai aten hta n shawp n hkap ai, matse lăbye hkrit hpa matsat hpa ni a lăpran e asak hkrung nga ga yang, Karai a n htum n wai tsawra matsan dum myit hpe myit dum nna hkamjan lu na chyeju hpyi la mai ga ai.

Sainai (Sinna) Bum lagaw e Karai hte ga-shaka jaw hkat ngut ai n na yang, Karai a amyu masha gaw hpăra shăje hpe nawku jawjau ma ai. Karai a pawt sindawng ai hte shanhte hpe arip kau na maw tim, Karai Kasang măhtang myit malai nna shut hpyit ai masha ni hpe hkyamsa jaw ai, mau hpa n rai a hka! Nhtang hku myit malai lu ai, ngu ai gaw mau hpa nan n rai a hka! Tinang hpe shut ai ni a ntsa, kanawn n kam ai wa a ntsa gade myit galu hkam sharang ya lu ga ta?

Moshe gaw Karai Kasang hte ni htep hku-hkau ai majaw, pawt sindawng ai Karai Kasang kaw pyi sit sa hpyi nem gwi ai. Amyu masha yawng a matu tawngban hpyi htinglu ya lu ai. Karai Kasang hte ni htep hku-hkau ai lam kade daram ahkyak ai, ndai lam hpe sharin la lu ga ai. Karai Kasang hte ni htep hku-hkau lu na matu, shani shagu akyu hpyi ai hte Karai a ra sharawng ai lam hpe hkan shatup lu na shakut ra ai n rai a hka! Shut hpyit lam dam ai ni myit malai shajang na lam man man akyu
 
hpyi htinglu ya ai gaw tsawra matsam dum ai amu kaba rai nga ai.
Myit malai lu ai marai langai a majaw, sumsing mungdan na masha ja ja kabu ma ai, nga ai; anhte akyu hpyi shaja ai a marang e, myit malai lu shajang ai masha marai kade re ai hpe anhte n chye ga ai. Karai Kasang chye ai.

Sawlu hpe madun dan ai Karai a tsawra matsan dum lăma gaw yawng hpe sakse tai ya ai, nga ai. Shi daram Yesu a sape ni hpe mara tam, hkan rim, htawng sharawng rai zingri zingrat ai wa hpe pyi Karai Kasang matsan dum lama madun ai, nga ai. San Stephen nlung hte kabai sat hkrum na, si maw ai aten hta akyu hpyi da ya ai majaw n rai a hka! Shut hpyit lam dam ai ni, mara hta lup taw nga ai ni myit malai lu na lam akyu hpyi htinglu ya ai a marang e mai kaja wa lu ai masha marai kade re anhte n chye ga ai; Karai Kasang chye ai. Tinang chye ai masha ni, n chye ai masha ni a matu, matut matut nna akyu hpyit htinglu ya mai ga ai.

2022: PRAN WAN LADAW LABAN (24) NA CHYUM LAIKA

PRANWAN LADAW HTA LABAN 24
September 11, 2022
CHYUM MUNGGA DAW 1

PRU MAT WA AI 32:7-11, 13-14

Ya hti na gaw, Pru Mat Wa ai laika hta na rai nga ai.
Madu gaw Mawshe hpe tsun ai gaw: Nang yu wa sit; Egutu mung de na nang shaw wa ai, na a masha ni gaw htak masai. Ngai hkang da ai lam hta na shanhte alawan dam mat masai; dumsu sumla jaw nhtawm shanhte gaw, Israela e, hpara ndai gaw Egutu mung de nna nang hpe shaw wa ai na a hpara rai nga ai, nga nna tsun let, dai sumla a man e nawku nna, hkungga nawng nga masai, ngu nna Madu tsun wu ai. Dai hta kaga, Madu gaw Mawshe hpe, Ndai amyu gaw gade wa myit ja ai hpe ngai ya e chye se ai. Dai rai nna, nang ngai kaw nna pru mat wa sanu; nye a pawt sindawng ai kahtet nga nna, ngai shanhte hpe atsai awai di kau na nngai; nang hpe chyu sha amyu kaba shatai na de ai, ngu nna tsun wu ai. Mawshe chyawm gaw dai Madu shi a Karai Kasang hpe, Madu e, atsam kaba hte n-gun rawng ai lata hte Egutu mung na nang shaw wa ai, Na a amyu hpe hpa rai pawt bu nga nta? Na a ali ama ni Abraham, Isak hte Yaku hpe myit dum nga u.
Nang shanhte hpe tsun ndai hte maren, Nanhte a amyu matu hpe sumsing lamu na shagan ni zawn ngai shalaw na made ai; ngai ndat da ai mungdan ting, nanhte a amyu matu ni hpe ngai jaw nna, dai hpe prat dingsa shanhte madu nga lu na mara ai nga nna, nang hkum dai hta dagam let, shanhte hpe ga ndat da nit dai, ngu nna Mawshe hpyi nem wu ai. Madu mung Shi a amyu hpe ari jaw na lam tawn da ai myit dawm la kau wu ai.
Karai Kasang a Mungga rai nga ai.

CHYUM MUNGGA DAW 2

1 TIMOHTI 1:12-17

Ya hti na gaw, Timohti hpang de San Pawlu shagun dat ai laika langai hta na rai nga ai.
Ngai hpe n-gun shaja ai anhte a Madu Hkristu Yesu hpe chyeju dum shakawn nngai. Ngai shawng e Shi hpe shatan nhkan ai, zingri zingrat ai hte, asawng asang di kau ti mung, Shi ngai hpe kangka re ai wa nawn nna, Shi a amu magam gun hpai na ngai hpe shaga la ni ai majaw, Shi hpe chyeju dum shakawn nngai. Kam sham ai chyeju hpe ngai garai n lu yang, n chye n chyang ai hte dai hpe galaw ni ai majaw, matsan dum la ai hkrum nngai. Anhte a Madu a chyeju ngai hpe laklai ai hku jaw da nna, Hkristu Yesu hta e anhte lu la ai, makam masham hte tsaw ra ai chyeju, ngai hta e law wa sai.
Shut hpyit ai ni hpe hkye hkrang la na matu, Hkristu Yesu mungkan ga de du sa ai, nga ai ga gaw, kam ging ai ga rai nga nna, nanhte yawng myit jung ai hte dai hpe hkam la na ra ai. Dai shut hpyit ai ni hta na ngai mahtang kaba htum ai wa rai nga nngai. Rai ti mung, htani htana asak lu la hkra, hpang de Hkristu Yesu hpe kam sham ai ni gaw, Madu a matsan dum ai myit gade wa galu kaba nga ai hpe shanhte chye lu na matu, ngai hkum nan hpe dai matsan dum la ai chyeju madun dan ni ai. Ya, htani htana e nga nga nna, n hten n mat chye ai myi e n mu lu ai Hkawhkam ngu ai, Karai Kasang langai sha kaw, arawng sadang hte hpung shingkang, htani htana prat dingsa e anga nga u ga law. Amen.
Karai Kasang a Mungga rai nga ai.

KABU GARA SHIGA

LUKA 15:1-32

Ya hti na gaw, Luka a laika hta na Kabu Gara Shiga rai nga ai.
Kang hta ai ni hte mara kap ai ni nlang hte gaw, shi a ga madat la na matu Yesu hpang de sa ma ai. Dai rai nna, Hparishe ni hte tara sara ni gaw, Ndai wa gaw mara kap ai ni hpe hkap la nna, shanhte hte rau lu sha nga ai, nga nna aput apai tsun ma ai. Shaloi dai ni hpe ndai ga shadawn Yesu tsun mu ai gaw: Nanhte hta sagu latsa lu nna langai mi mat yang, dai jahku shi jahku hpe nam e tawn da nhtam, mat ai sagu hpe mu la hkra n hkan tam ai, kadai wa nga na rai ta? Dai hpe mu la jang mung, kabu gara ai myit hte kahpa hta mara hpai nna, nta de du wa jang, jinghku jingyu ni hte htingbu htingbyen ni hpe shaga nna, Ngai hte rau kabu gara nga ga; nye a mat ai sagu hpe ngai bai mu la se ai, nga nna tsun na ra ai.
Ngai nanhte hpe tsun made ga: Dai hte maren, myit n malai ra ai ding hpring ai masha jahku shi jahku a majaw kabu gara ai hte, myit malai lu da ai, mara kap ai masha langai mi a majaw, sumsing lamu hta e grau nna kabu rai na ra ai. Bai lam mi gaw, Numsha langai ngai gaw gumhpraw lap shi lu ai hta na, lap mi mat yang, pyengding shatu nhtawm, nta ting ye kau nna, dai lap mi hpe mu la hkra, azin ayang hkan sawk yu ai, n rai ni? Dai hpe mu la jang mung, Shi a jinghku jingyu ni hte htingbu htingbyen ni hpe shaga nna, Ngai hte rau kabu gara nga ga; mat ai gumhpraw hpe ngai bai mu la se ai, nga na ra ai. Ngai nanhte hpe tsun made ga: Dai hte maren, mara kap ai masha langai mi myit malai lu ai majaw, Karai Kasang a lamu kasa ni a man e kabu gara shara rai nga ai, ngu mu ai.

(Luka 15: 11-32 du hkra tsun matut lu ai.)
Bai Yesu gaw, Masha langai mi shadang sha lahkawng lu ai. Dai yan hta kasha kaji mahtang gaw kawa hpe, Wa e, ngai la ang ai sali wunli ngai hpe karan ya e, ngu nna hpyi yang, kawa mung shan hpe sali wunli karan ya wu ai. Dai hpang nhtoi gade ya n na yang, kasha kaji gaw arai mahkra shinggyin la nhtawm, tsan ai mung de sa wa nna, dai shara e pyaw daw kadaw hkawm nga ai hte, shi a sut rai ginlut shamat kau wu ai. Shing rai lu malu shamat kau ma jang, dai mung e hku wa kaba hku wa ai rai nna, shi matsan chyaren hkrum magang nga ai. Shaloi dai mung na masha langai mi kaw shi sa shingbyi nga ai; dai wa mung shi a prang ga de, shi hpe wa rem shangun dat wu ai.
Shaloi shi gaw, wa ni sha ai shapre kawp hte pyi, shi a kan jahkru mayu ti mung, kadai mung n jaw sha mu ai. Shing rai shi myit dum yang, Nye Wa a shabrai sha ai ni gade wa n taw n tsang muk sha lu na ma hka! ngai wa gaw ndai yang e kawsi kyet ai hte hten bya magang wa nga nngai. Ngai rawt nna nye wa kaw wa nhtawm, Wa e, sumsing lamu a man e mung, na a man e mung, ngai n ging n dan nngai: na a shabrai sha ai masha langai mi zawn ngai hpe tawn da e law, ngu na we ai, nga nna myit lu ai. Shing ria shi rawt wa nna, kawa kaw du wa ai. Shi tsan tsan naw rai nga yang, kawa gaw shi hpe hkap mu ai hte, matsan yu dum nna, gat sa nhtawm, kasha a du hta noi ginshum let shi hpe a pup wu ai. Shaloi kasha gaw, Wa e, sumsing lamu a man e mung, na a man e mung, ngai shut ni ai: ya kaw nna na nsha ngu na ngai n ging n dan nngai; na a shabrai sha ai masha langai mi zawn ngai hpe tawn da ya e, ngu nna kawa hpe tsun nem wu ai. Kawa chyawm gaw shi a mayam ni hpe, Reng htum ai hpun palawng alawan la sa nna, shi hpe jahpun ya maru; shi a lata hta lachyawp chyawp ya maru; lagaw hta kyepdin din ya maru; kawn tawn ai dumsu kasha mung la sat mu; shing rai anhte kabu gara ai hte lu sha nga ga: hpa majaw nga yang, ndai ngai sha gaw si mat sai, ya bai hkrung sali ai; mat mat sai mung, ya bai mu la se ai, ngu mu ai. Shing rai shanhte pyaw pyaw rai nga ma ai. Kasha kaba wa chyawm gaw yi e nga nga ai; dai de na bai wa nna nta du magang yang, chying bau dum ai hte ka manawt ai nsen na wu ai; dai rai nna ma langai mi shaga la nhtawm, dai kaning re ai rai nga ai, san yu wu ai.
Dai ma gaw, Na nnau bai wa ra ai rai nna, nwa mung shi hpe a hkam a kaja sha hkap la lu ai majaw, kawn tawn ai dumsu kasha sat nu ai, ngu nna shi hpe tsun dan wu ai. Dai hpe na jang, shi masin pawt nna, nhku de n shang wa hkraw ai. Shaloi shi a kawa pru sa nna, shi hpe sa nem wu ai. Dai kasha chyawm gaw, Yu u, nde nlaw ning tup na a nchyang amu ngai galaw nna, nang tawn da ai hku ngai galoimung n lai nngai: rai ti mung, nye a jinghku ni hte pyaw pyaw rai nga na, nang kalang mi bainam kasha langai mi pyi, ngai hpe n jaw yu ndai: shawa num ni hte kanawn nna, na a sut rai ginlut shamat kau ai; ndai na nsha wa bai wa jang chyawm gaw, kawn tawn ai dumsu kasha shi a matu nang sat nit hka, ngu nna shi a kawa hpe htan wu ai. Kawa gaw, Ngai sha e, nang gaw ngai hte rau tut nawng a nga nga ndai; nye a sut rai nga manga gaw, na a hkrai rai nga ai. Rai ti mung, pyaw pyaw rai kabu gara mai nga ai; hpa majaw nga yang, ndai na nnau gaw si mat sai, ya bai hkrung ra ai; mat mat sai mung, ya bai mu la saga ai, ngu nna shi hpe nem wu ai.
Madu a Kabu Gara Shiga rai nga ai.