2021:YESU A SALUM NINGSANG POI SHANI NA CHYUM LAIKA

YESU A SALUM NINGSANG POI
June 13, 2021
CHYUM MUNGGA DAW 1

Hosea 11:1, 3-4, 8-9

Ya hti na gaw, Hosea a laika hta na rai nga ai.
Madu Karai Kasang a mungga madat la mu: Israela gaw ma kasha naw rai nga yang, ngai shi hpe tsawra nna, ngai sha hpe Egutu mung de na shaga lase ai. Ngai nan Ehprim hpe hkawm sharin nngai; nye alata hte shanhte hpe pawn nngai: rai timung, ngai lanu lahku ai hpe shanhte n dum n chye ma ai. Tsawra matsan dum ai sumri hte ngai shanhte hpe dun woi la nngai. Ma kaji hpe pawn ahpum nna angwi sha lusha jaw ai wa zawn ngai 
rai nga nngai. Nye a kraw kata e matsan dum ai myit hpring tsup nna nye a n gaw n wai ai myit katu nga ai. Ngai naw masin pawt kahtet ai hte maren, n daw dan mayu nngai; Ehprim hpe ngai bai jahten kau na n rai. Hpa majaw nga yang, ngai gaw masha n rai, Karai Kasang rai nga nngai: nanhte a ka-ang e shanu ai Chyoi 
pra htum ai Wa ngai rai nga nngai; ngai gaw nanhte hpe jahten shabya kau na myit n rawng nngai.
Karai Kasang a Mungga rai nga ai.

CHYUM MUNGGA DAW 2

Ehpesu 3:8-12, 14-19

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.
Hpu nau ni e, Ngai gaw chyoi pra ai ni yawng hta kaji htum ai wa rai nga timung, maigan amyu ni hpe Hkristu a galu kaba htum ai sutgan lam tsun shana dan na matu mung, dai sung la ai amu lam gara hku dik wa na ra ai lam, masha yawng hte hpe madun dan na matu mung, ngai hpe dai chyeju jaw ya ni ai. Nga manga hte hpe hpan da sai Karai Kasang hta e, moi chyaloi nhkoi kaw nna, dai sung la ai amu lam makoi magap da sai. Ya e Nawku Hpung a lata hte, Karai Kasang a chyahtum chyalai re ai hpaji byeng-ya hpe, lamu lahta tang e nga ai du magam ni hte ahkang aya lu ai ni kaw, shana dan na ra ai; dai gaw, anhte a Madu Yesu Hkristu hta e shabyin na matu, prat dingsa Karai Kasang yaw shada ai lam hte maren rai nga ai. Anhte a Madu Yesu Hkristu hpe kam sham ai a marang e, nden ja ai myit hte, n hkrit n kang let, Karai Kasang kaw shang wa ai lam anhte lu la ga ai.
Dai lam hpe myit dum let, sumsing lamu hta mung, ginding aga hta mung, kawa ngu shamying ai yawng hte a npawt daju rai nga ai, anhte a Madu Yesu Hkristu a man e ngai lahput hput di let akyu hpyi nga nngai; Dai Kawa gaw, shi a Wenyi a marang e, shi a n tawn tsang ai hpung shingkang hte maren, myit kraw lawang de hkrang lu ai atsam hte, nanhte hpe shadaw shalan ya u ga; Hkristu gaw makam masham a marang e, nanhte a masin salum hta shanu nga lu u ga; Tsawra ai lam hta nanhte ru jung da nna, tsawra ai lam a ntsa e nanhte a nga sat nga sa ai lam a npawt nhpang gaw da lu myit ga; Shing rai, chye chyang ai myit hte n dang chye ai Hkristu a tsawra ai lam, de a nda de, dingdung de, tsawde, sung de, gade wa galu kaba nga ai hpe, Karai Kasanga amyu masha ni yawng hte rau, nanhte chye na lu myit ga; Karai Kasang a hkum tsup ai lam, mahkra hte, nanhte hkum tsup lu mu ga matu, ngai akyu hpyi nga nngai.
Karai Kasang a Mungga rai nga ai.

KABU GARA SHIGA

Yawhan 19:31-37

Ya hti na gaw, Yawhan a laika hta na Kabu Gara Shiga rai nga ai.
Dai shani gaw shachyip ai nhtoi rai nga ai hte, laban nhtoi e wudang hta mang n noi nga u ga, Yuda masha ni gaw jen noi nga ai ni a lagaw kayet daw nna, dai mang ni hpe htawm kau na, Pilatu kaw ahkaw ahkang hpyi ma ai. Dai majaw hpyen la ni sa nna, Yesu hte rau jen da ai yan a lagaw hpe, kayet daw ya mu ai: Yesu kaw du yang, shi si mat sai hpe shanhte mu ma ai majaw, Shi a lagaw hpe n daw ya mu ai. Rai timung, hpyen la langai mi gaw, Yesu a garep hpe ri hte galun waw ya wu ai rai nna, shaloi jang sai hte ntsin lwi pru nga ai. Dai lam, mu ai wa gaw sakse hkam ya ai rai nna, shi a sakse teng man nga lu ai. Nanhte mung kam sham lu myit ga, teng man ai ga shi tsun nga ai gaw, shi nan chye nga ai. Hpa majaw nga yang, dai lam byin ai gaw, ‘Shi a nra langai mi pyi daw na n rai,’ nga nna chyum laika hta ka da ai gaw, dik wa na matu rai nga ai. Bai Laika langai mi hta, Shanhte galun waw kau ai wa hpe shanhte mu lu na ra ai’ nga nna ka da nga ai.
Madu a Kabu Gara shiga rai nga ai.

2021:YESU A CHYOI PRA AI HKUM HTE SAI POI SHANI NA MUNGGA

Mu n mai, jum yu n mai ai Karai Kasang, masha a hkum sai shan sa dagraw la ai mungsung a lam hpe myit dum shangun ai. Hpan Madu gaw hpan da hkrum ai shinggyim hkum shan sai hpe dagraw la nna si mat ai, bai hkrung rawt ai, dai hpang sumsing mungdan de lung mat wa ai. Dai Chyoi Pra Hkum hte Sai hpe lu sha ai ni, dai Madu nga ai shara e htani htana ningngai nga lu na, ngu ai lam hpe kamsham myit mada ga ai. Mau-hpa hkye hkrang la ai chyeju kumhpa n rai a hka?

Dingda Germany, Bavaria (Beer) mungdaw, “Ottobeuren” ngu ai nawku jawng hta dai ni du hkra kyem da ai sumla langai nga ai. Yesu hte Sape 12 hpang jahtum shana daw-sha poi sumla anhte mu man ga ai. Dai nawku jawng e kyem rem da ai sumla hta gaw Sape 12 n re ai, Yesu hte rau lu sha ai marai lahkawng sha_ Martin Luther hte Zwingli (Kahtawlik makam masham kaw na shawng shawng hka mat ai yan). Arau lu sha ai dai marai masum a npu e ning nga ai laika ka da ai_ Yesu tsun ai, “Ndai gaw nye a hkum rai nga ai”; Martin Luther tsun ai, “Ndai gaw ngai a hkum tai wa na ra ai”; Zwingli tsun ai, “Ndai gaw nye a hkum, ngu, sawn la mai ai kumla rai nga ai”.

Ndai gaw nye a hkum! Ndai gaw nye a sai!_ ngu ai hpe Hkristan mungkan hta shai hkat ai hku lachyum htai da ai hkying lam mun lam ru nna nga nga ai. Yesu hkum nan tsun ai ga hpe kamsham hkap la na kun? Shing n rai, kaga hpung-up ni, theology hpaji ninghkrin ni tsun ai ga ni hpe hkap la na kun? Yesu hte arau lu sha taw ai Martin Luther hte Zwingli, Protestan hkrai rai tim lachyum htai n bung ai lam hpe asan sha mu chye shangun ai. Shaning 500 a hpang, shan marai lahkawng kaw na bai hka mat, garan mat ai Hkristan hpung ni hkying lam, mun lam ru nna nga nga ai.

Daw-sha poi de shaga da hkrum nna arau lu sha na ahkaw ahkang lu ninglen, poi madu hpe n gawn n sawn di kau, chyeju n dum chye ai ni, nhtang hku shatan jahpyak chye ai ni nga ma ai lam anhte chye ga ai.

Daw-sha poi de saw shaga ai lachyum gaw, hku hkau mayu ai, jinghku shatai mayu ai majaw re. Yesu gaw muk shalaw jahtam nna masha hkying lam hpe jaw sha lai wa ai; dai hpang, “Sumsing lamu na yu du ai muk, masha e sha nna n si lu ai muk” a lam tsun dan ai. Dai hpang sha, “Ngai gaw sumsing lamu na yu sa ai, ahkrung ai muk” ngu, dingtawk tsun ai. Si hkam na shawng shana e sha, shi hkaw tsun lai wa ai lam ni hpe shatup shagrin na matu, muk hte sabyi chyaru hpe ndai gaw ngai a hkum, ndai gaw ngai a sai, sha mu, lu mu_ ngu, matsun da ai. Yesu shi a sai hta gaw da ai ga-shaka re ai lam tsun ai. Pru mat wa ai Laika hte Hebre Laika e tsun da ai lam ni gaw hkungga nawng jau ai lam hte ga-shaka a lam hpe labau hkai sakse madi madun ai lam rai nga ai. Dai ga-shaka hta lawm ai ni, hkungga shan sha lawm ai ni gaw hkungga shan re ai Yesu hte langai sha tai wa ai. Ga-shaka hta lawm ai tara matsun ni hpe madat mara hkan shatup na lit lu wa ma ai. Ga-shaka a marang e Karai a mungdan, sumsing mungdan na daw-sha poi de shang lawm lu na rai nga ai.

Reng grau dik htum ai lu-sha, htani htana asak jaw ai lu-sha, n htum n wai asak jaw ai lu-sha she rai nga ai. Chyeju dum ai myit hte Chyoi Pra ai Hkum hpe nawku dawjau tsawra lu na lam shakut ra ga ai.

2021:YESU A CHYOI PRA AI HKUM HTE SAI POI SHANI NA CHYUM LAIKA

HKRISTU A CHYOI PRA AI HKUM HTE SAI POI
June 6, 2021
CHYUM MUNGGA DAW 1

Pru mat wa ai Laika 24:3-8

Ya hti na gaw, Pru mat wa ai laika hta na rai nga ai.
Mawshe gaw Madu a ga mahkra hte shi hkang dat ai tara mahkra, amyu masha ni hpe tsun shana wu ai. Amyu masha ni myawng mung, Madu tsun matsun mahkra anhte hkan galaw na ga ai, nga nna lang lata sha htan ma ai. Mawshe gaw Madu a ga mahkra ka da ngut jang, jahgpawt jau jau rawt nna, bum lagaw e tawn hkungri gaw nhtawm, Israela amyu shi lahkawng hkan nna, nlung shadaw shi lahkawng jun da wu ai. Israela a kashu kasha ni hta na shabrang ni hpe shi shangun dat nna, shanhte gaw Madu a matu wan nat hkungga hte mahku hkungga di na usu ni hpe sat nawng ya ma ai.
Mawshe gaw sai ka-ang hkup la nna, jarung hta bang tawn wu ai; ka-ang hkup gaw, tawn hkungri hta lapri bun wu ai. Dai ga shaka laika mung shi la nna, shawa hpawng a man e hti dan wu ai; shanhte mung, Madu tsun matsun mahkra hpe anhte madat let hkan galaw na ga ai, nga nna tsun ma ai. Shaloi Mawshe gaw dai sai la nna, amyu masha ni hpe lapri bun let, Yu mu, sai ndai gaw, ya ngai tsun dan ai Karai Kasang a mungga mahkra hte maren, Madu nanhte hte tawn da ai Ga Shaka a asai rai nga ai, ngu nna tsun wu ai.
Karai Kasang a Mungga rai nga ai.

CHYUM MUNGA DAW 2

Hebre 9:11-15

Ya hti na gaw, Hebre masha ni hpe de shagun dat ai laika hta na rai nga ai.
Hkristu gaw, du na ra ai shaman chyeju lam mahkra a npawt daju Jau tai na matu du sa jang, ndai hpan tawn ai mungkan ga hte n seng nna, masha a lata hte n shachyaw ai, grau kaba ai hte grau hkum tsup ai nawku ginsum hta shi lai sa nu ai. Shing rai, bainam hte dumsu kasha a asai hte n rai, shi hkum nan a asai hte, chyoi pra ai shara de kalang mi sha shang nna, htani htana hkye hkrang la ai lam lu la nu ai. Ya, bainam sai, usu sai hte nga upra a wan wu hte, awu asin hkrum ai ni a ntsa e lapri ya jang, hkum shan san seng hkra shanhte hpe shachyoi shapra ya lu ai teng yang gaw, Karai Kasang kaw nawng ya ai Hkristu a asai gaw, ahkrung nga ai Karai Kasang hpe daw jau lu hkra, nanhte a myit masin hpe si gying ai arawn alai hta na, grau nna shachyoi shapra ya lu na n rai ni? Dai rai nna, Hkristu gaw Ga Shaka Nnan a htinglu htinglai ya ai wa rai nga ai; hpa majaw nga yang, shawng na ga shaka a tawt lai ai amu ni hta na masha ni hpe hkye hkrang la na matu, Hkristu gaw si hkam sai majaw, shaga la hkrum ai ni gaw, Karai Kasang ndat da ai htani htana sali wunli hkam la lu ma ai.
Karai Kasang a Mungga rai nga ai.

KABU GARA SHIGA

Marku 14:12-16, 22-26

Ya hti na gaw, Marku a laika hta na Kabu Gara Shiga rai nga ai.
Matsi n rawng ai muk sha ai poi hta shang ai shani e, Shalai dat ai poi hte seng ai sagu kasha hpe, Yuda masha ni sat nawng ai htung nga ai majaw, Yesu a sape ni gaw, Dai Shalai dat ai poi sha na matu, gara shara hta e na a matu sa shachyip na, nang ra nga n ta? ngu nna shi hpe san mu ai. 13Shaloi sape shi lahkawng hpe shi shangun dat nna, Mare de sa masu; hka dibu hpai ai masha langai mi muna ra ai: shi a hpang e hkan nang nna, shi gara kaw shang timung, dai nta madu hpe, Nye a sape ni hte rau Shalai dat ai poi hpe ngai sha lu na, nye a matu san da ai gawk kanang nga a ta? nga nna Sara gaw san shangun dat mi ai, ngu mu: shaloi, lajang shachyip da ai ntsa gawk kaba shi madun na ra ai; dai yang e anhte a matu jin jin lajang da mu, ngu nna tsun dat mu ai.
Dai sape yan pru wa nna, mare de shang wa mayang, Yesu tsun dat ai hte maren mu ma ai rai nna, Shalai dat ai poi shachyip da ma ai.
Yesu hte shi a sape ni shat sha nga yang, shi muk la nna, shaman nhtawm, ahkyep alep di nna shanhte hpe jaw let, la mu, ndai gaw Nye a Hkum rai nga li ai, ngu mu ai. Bai, gawm hpe mung shi la nna, chyeju dum shakawn ngut jang, shanhte hpe jaw nna, shanhte nlang dai hta na lu ma ai. Shanhte hpe Shi tsun mmu ai gaw: ndai gaw, masha law law a matu ru kau ya ai, dai ga shaka hte seng ai, nye a asai rai nga li ai. Nanhte hpe ngai teng teng tsun made ga: Karai Kasang a mungdan hta e tsabyi chyaru nnan hpe ngai lu lu na nhtoi du hkra, ndai tsabyi chyaru hpe, ngai kalang mi pyi bai n lu na ni ai, ngu nna tsun mu ai. Dai hpang shakawn kungdawn ga mahkawn ngut jang, shanhte gaw Tsanlun Bum de sa wa ma ai.
Madu a Kabu Gara shiga rai nga ai.

2021:CHYOI PRA AI TRINITA POI SHANI NA MUNGGA

Marai masum atai mi re ai Karai Kasang hpe anhte kamsham ga ai. Marai langai hpra san san she rai tim, langai sha tai nga ai Karai Kasang re. Gara hku byin tai nga ai lam lachyum tup chye lu na n mai byin ai. Hkye la Madu Yesu e tsun shapraw dan ai daram sha adaw achyen lu la ga ai. Hpan da ai amu, hkye hkrang la ai amu, asak jaw ai amu, marai masum hte arau jawm galaw ma ai. Dai majaw, anhte nawku shakawn kungdawn akyu hpyi ga yang, marai masum hte a mying gang ga ai. Karai a mungsung lam ni hpe sumsing lamu kaw na yu sa ai,  masha hkum shan dagraw la ai hkye la Madu Yesu hku nna sha chye lu ga ai. Yesu hkum nan “Wa e”, Sumsing lamu na anhte a Wa e”, “Wa gaw ngai hpe shangun dat ai, Shi hpang de ngai bai wa na nngai”, “Wa e, na lata hta ngai a wenyi hpe ap ya nngai”,... dai zawn Chyum Laika hta law law tsun da ai. Bai, “Shalan shabran ya ai wa hpe ngai shangun dat na nngai”, “Chyoi Pra Wenyi hpe hkap la mu”, “Masha Kasha hpe shut ai wa hpe mara dat ya na lam nga tim, Chyoi Pra Wenyi hpe shut ai wa kadai mung mara dat ya hkrum na n rai”, dai zawn, Chyoi Pra Wenyi san san nga ai lam sharin ya ai.

Grau dan san ai hku nna, Karai a kasha majing shatai ai Kashin Kamun jaw yang n tsun n mai ai ga, “Kawa a, Kasha a, Chyoi Pra Wenyi a mying ningsang hta kashin kamun jaw mu!” nga, hkang da ai. Yesu jaw ya ai Chyoi Pra Wenyi a marang e, anhte asak a chyeju kumhpa lu la nna Karai Kasang hpe “Wa e” ngu, tsun lu ga ai, nga ai (Rom 8:15). Marai masum atai mi sha re ai Karai a htinggaw hta dinghku masha ni tai lu na lam, kashin kamun shakramentu a marang e, ahkaw ahkang lu la sa ga ai. Teng sha, Karai Marai Masum hte hpe gumhpawn nna nawku shakawn, chyeju htang ging ga ai. Anhte hkam la lu sai chyeju kumhpa ni, masha tai wa ai, dinghta ga e nga lu ai, n htum n wai asak hkam la na ga ai. Karai Kasang ra sharawng ai gaw dai Madu Karai Kasang hpe shinggyim masha yawng e chye lu nna, langai sha re ai Karai Kasang hpe kamsham nawku lu na, Karai a dinghku hpawng hta yawng shang lawm lu na lam re. Dai majaw, mungkan ting chyam hkra hkawm sa nna hkye hkrang la ai amu hpe hkaw tsun na lam hkang da ai. Tara matsun ni hpe mung hkan shatup na lam matsun da ai. Shani shagu wudang masat galaw ga yang, Marai Masum Atai mi re ai Karai Kasang hpe adum sha rai galaw ga ai kun? Kawa, Kasha, Chyoi Pra Wenyi kaw hkung ga shakawn nga u ga..... tsun ga yang, kaja wa adum sha rai, chyeju dum shakawn ai myit the tsun ga ai kun? Karai a dinghku masha tai wa lu ai hta grau ai arawng sadang naw nga lu na rai kun?

2021:CHYOI PRA AI TRINITA POI SHANI NA CHYUM LAIKA

CHYOI PRA AI TRINITA POI
May 30, 2021
CHYUM MUNGGA DAW 1

Tara jahprang 4:32-34, 39-40

Ya hti na gaw, Tara Jahprang laika hta na rai nga ai.
Da ndai gaw Israela a kashu kasha ni hpe Mawshe tsun ai ga rai nga ai: Ginding aga ntsa e Karai Kasang shinggyim masha ni hpe hpan da ai nhtoi kaw nna, nanhte garai n pra yang na, lai mat sai prat ni mahkra hta ndai lam hpe gawn yu mu: Lamu ga htum ai maga kaw nna maga mi du hkra , ndai daram kaba ai amu byin yu sa ni? 33Karai Kasang wan kata na tsun dat ai nsen hpe nanhte na la nna nang hkrung nga ai zawn, amyu kaga ni na la nna naw hkrung nga ma ni? Nanhte a Madu Karai Kasang gaw, lamik kumla hte mauhpa amu, n-gun ja ai lata ladawn ai lahpum hte nanhte a matu majan gasat ai, hkrit hpa amu hte chyam dinglik yu ai lam amyu myu hpe, Egutu mung hta nanhte man e galaw dan nna, masha amyu ni hta na nanhte hpe, Shi a amyu shatai na matu shaw la nu ai. Dai zawn re ai hku hpara shaje shi a matu masha amyu ni hpe lata la lu sa ni?
Dai rai nna, Madu gaw sumsing lahta tang hte ginding aga ntsa e Karai Kasng langai sha rai nga nna Shi hta kaga Karai shaje n nga sai hpe, dai ni e dum hprang nna, kraw lawang kata e matsing gun la mu law. 40Nang hte na a prat tup a matu nang hpe jaw da ai mungdan hta, nang asak galu nga u ga matu mung, dai ni e, ngai tsun da ai matsun maroi ga hte hkang da ai tara lam ni hpe nanhte hkan shatup lu na rai myit dai, ngu nna Mawshe hkaw tsun da ai rai.
Karai Kasang a Mungga rai nga ai.

CHYUM MUNGGA DAW 2

Roma 8:14-17

Ya hti na gaw, Roma masha ni hpang de San Pawlu shagun dat ai laika hta na rai nga ai.
Hpu nai ni e, Karai Kasang a Wenyi e woi lakawn la hkrum ai ni yawng hte gaw, Karai Kasang a kasha ni rai nga ma ai.Kaning rai nme law, bai hkrit kang na matu mayam a wenyi hpe nanhte hkam la manit dai n rai; Abba, Wa e, nga nna jahtau chye lu hkra, kasha shatai ai wenyi hpe nanhte hkam la manit dai.
Dai Wenyi nan anhte a wenyi hte hkrum nna, anhte Karai Kasang a kasha ni rai nga ga ai hpe, sakse hkam ya ma ai. Shi a kasha ni rai nga yang gaw, sali wunli hkam la ai ni mung rai nga ga ai. Hkristu hte rau hpung shingkang hkam la lu hkra, shi hte rau nni nkri hkrum nga yang gaw, Karai Kasang a sali wunli hkam la ai ni anhte rai nga ga ai.
Karai Kasang a Mungga rai nga ai.

KABU GARA SHIGA

Mahte 28:16-20

Ya hti na gaw, Mahte a laika hta na Kabu Gara Shiga rai nga ai.
Yesu a sape shi langai hte gaw, Shi shanhte hpe hkang da ai hte maren, Galile mung na bum de lung mat wa ma ai.
Shi hpe mu jang, shanhte nawku ma ai; nkau mi mahtang ai n kam ma ai. Yesu shanhte hpang de sit sa wa nna, Sumsing lamu hta e mung, ginding aga hta e mung, up hkang na ahkang nlang hte hpe ngai kaw ap ya ni ai. Dai majaw nanhte pru sa nna, masha amyu baw shagu hpe sape shatai let, Kawa, Kasha, Chyoi Pra ai Wenyi a mying nsang hte, kashin kamun jaw nga mmu; ngai nanhte hpe hkang da mada shanhte hkan shadik lu mu ga, sharin shaga ya mu. Dai hta kaga, lamu ga aprat htum mat hkra, ngai nanhte hte rau dinggrin a nga nga na nngai, ngu nna Yesu Madu Shi a sape ni hpe matsun dat mu ai.
Madu a Kabu Gara Shiga rai nga ai.

2021: CHYOI PRA AI WENYI YU HKRAT WA AI POI SHANI NA MUNGGA

Mungga Madung: Shanhte gaw Wenyi hte hpring wa ai: Wenyi gaw zet let ai, hkum shan gaw gawng kya ai. Wenyi asak n rawng ai masha gaw a’loi sha asum jaw chye ai, htingnut chye ai, manghkang hkrum Yesu sumsing mungdan de lung mat wa ai lam hpe myi chyaw mu la ma sai; mungkan ting de sasana galaw na htet matsun ai ga mung lu la ma nu ai. Rai timung, hpang jahtum hta myit masin gang bang ya na naw ra ai. Yesu ga-sadi jaw da ai the maren, shanhte gawk langai kaw akyu hpyi nna ala nga ma yang, teng sha, Chyoi Pra Wenyi shanhte a ntsa de yu sa ai. Wenyi e shadut ai majaw, gawng kya ai, hkrit tsang ai Kasa ni gaw nden ja marai rawng ai myit the shawa hpawng de pru sa nna Yesu a lam, hkrang hkrang la ai masing hpe gwi gwi hkaw tsun dan ma ai. Dai shani jang masha hkying shadang kamsham hkap la ma ai; Nawku Hpung a shangai nhtoi, ngu nna mung tsun ma ai.

Paska nhtoi hta Chyoi Pra Wenyi hpe shangun dat ya ai: Shaning shagu, Israel amyu sha ni gaw Hpara-o e mayam shatai ai kaw na lawt kaw wa ai lam hpe myit dum let Paska Poi galaw ma ai. Sina-yi Bum e Tara Kanu 10 jaw nna Karai Kasang the Shi a amyu masha ni a lapran ga-shaka jaw hkat ma ai. Sagu dumsu ni a sai hte shagrin da ai. Paska ningnang hta Yesu a asai hte mung, Chyoi Pra Wenyi hta mung, ga- shaka ningnan hpe shagrin da ai. Tara Kanu 10 a malai, TSAWRA AI TARA ningnan (Yn 13: 34) jaw ya ai: masha a myit masin salum hta nan dawk bang ya ai (Ezk 36:27). Pentekos shani e, Israel amyu sha ni gaw nsi naisi law law shu la ai majaw chyeju dum shakawn ai poi mung rai nga ai. Penkos ningnan hta, Chyoi Pra Wenyi a chyeju kumhpa ni n taw n tsang, nhpaw n-ya jaw ya ai lam hpe myit dum shangun ai. Mungkan htum ai shani du hkra, Chyoi Pra Wenyi a chyeju kumhpa ni, rai nga ai tsawra chye ai, dingman dinghpring ai, tara rap-ra ai, myit pyaw kabu gara ai, nden ja magrau grang ai.... chyeju kumhpa ni matut matut nna hkam la lu na ga ai.

Chyoi Pra Wenyi jasu jahprang ai chyeju n lu la ai rai yang, kadai pyi Yesu hpe, “Madu re” ngu, tsun shapraw lu na n rai: Anhte yawng, ra Wenyi n lawm ai sha, makam masham mung n lu mai ai, hpa kaja ai amu mung n galaw lu ai, Yesu hpe mung, Chyum mungga hpe mung, kamsham hkap la lu na n rai. Chyoi Pra Wenyi gaw kaba dik ai atsam rai ninglen, shani shagu akyu hpyi ga yang Chyoi Pra Wenyi hpe myit dum ga ai kun? Nawku shakawn ga ai kun? Chyeju dum ga ai kun? Dingtawk Chyoi Pra Wenyi hpe saw shaga akyu hpyi ai lam galaw ga ai kun?

“Pentecostal movement” ngu ai, Chyoi Pra Wenyi hpe alak kamhpa nna akyu hpyi nawku shakawn ai uhpung uhpawng ni hta laklai ai awng dang lam ni lu la ai lam gaw sakse rai nga ai. Chyoi Pra Wenyi a mying gang nna makam masham lam shadam woi ai ni mung nga ai hpe gaw sadi ra ga ai. Chyoi Pra Wenyi gaw Nawku Hpung a asak: Anhte lang ai shawa akyu hpyi ga ni yawng hta, Chyoi Pra Wenyi lawm ai hpe adan sha mu lu ga ai. Chyoi Pra Wenyi gaw Nawku Hpung hpe myit masin a ninghtoi tai ya ai, shachyoi shapra ai chyeju jaw ya ai, kahkyin gumdin ai chyeju jaw ya ai, makam masham hpe magrau grang nden ja ai hte sakse hkam dan lu na atsam jaw ya ai. Dai majaw, Nawku Hpung a asak hka-hpawk, ngu shamying ai re. Missa hkungga akyu hpyi ga hpe yu yang, Chyoi Pra Wenyi hpe madi ai shara law law hpe mu lu na ga ai. Langai hpra mung dai Chyoi Pra ai Wenyi hpe kamhpa akyu hpyi ai lam law law galaw ra ai lam, ndai poi hku nna shadum ya ai.

2021:CHYOI PRA AI WENYI YU HKRAT WA AI POI SHANI NA CHYUM LAIKA

CHYOI PRA AI WENYI YU HKRAT WA AI POI

May 23, 2021

CHYUM MUNGGA DAW 1

Kasa 2:1-11

Ya hti na gaw, Kasa laika hta na rai nga ai.

1Ya Pentekawste shani du jang, kasa ni yawng shara mi hta rau hpawng nga ma ai. 2Shaloi, nbung laru kaba wa ai zawn, lamu de na nsen akajawng kadu pru nna shanhte rawng nga ai nta, dai nsen hte hpring chyat rai wa ai. 3Wan shinglet zawn re ai baw mung shanhte kaw dan pru nna, bra karan wa nhtawm, langai hte langai a ntsa e jung nga ai. 4Shanhte nlang hte mung Chyoi Pra ai Wenyi hte hpring nna, dai Wenyi shadut mu ai hte maren, ga amyu myu shaga wa ma ai. 5Ya, sumsing lamu a npu e nga ai masha amyu shagu hta na, tara hkan shatup ai Yuda masha ni Yerusalem mare e nga nga ma ai. 6Dai kadu ai nsen   na la jang. Masha unawng uwa hpawng sa nna, sape ni tsun ai ga hpe, tinang nang a ga hku na la lu ma ai.

7Shanhte mak mat ai rai nna, mau mahka let, Yu mu, ya shaga nga ai ndai ni gaw, Galile masha hkrai n rai ma a ni? 8 Dai rai yang gaw, anhte langai langai, tinang nang a dai daw shara na ga hku na la lu ai gaw, kaning re ai i? 9Parhti, Media, Elam mung na ni hte, Mesopotamia mung e nga nga ai ni; Yuda hte Kapodoki mung, Pontu hte Asia, 10Hprugi hte Pamhpuli; Egutu hte Kureni ginwang hkan e nga ai Libia mung na ni; Roma nna wa nga ai ni, Yuda masha ni hte tara nnan hta la ai ni, 11Kreti hte Arabi mung na ni anhte rai nga ga ai; rai ti mung, anhte yawng hte gaw, Karai Kasang a mauhpa amu magam lam shanhte hkai dan ai ga hpe, tinang nang a ga hku na la lu ga hka! nga nna myit kahpra let tsun ma ai.

Karai Kasang a Mungga rai nga ai.

CHYUM MUNGGA DAW 2

1 Korinhtu 12:3-7, 12-13

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, Chyoi Pra ai Wenyi hte sha n rai yang gaw, Yesu gaw Madu rai nga ai, nga nna kadai n tsun lu ai.  Ya, chyeju kumhpa amyu myu nga timung, dai hpe karan jaw ai Wenyi gaw, langai sha rai nga ai. Daw jau ai lam amyu myu nga ti mung, Madu langai sha hpe anhte daw jau nga ga ai. Mauhpa atsam amyu myu nga ti mung, yawng mayawng hta e dai lam mahkra hpe shabyin ai Karai Kasang gaw langai sha rai nga ai. 7Rai ti mung, akyu chyeju lu la u ga she, dai Wenyi langai hte langai hta e, Shi a atsam shapraw shadan dan nga ai.

Masha a hkum hkrang hta daw shan law law rawng nga ti mung, dai ni yawng hte gaw hkum hkrang langai sha jawm tai nga ma ai. Dai hte maren Hkristu mung, daw shan law law lu ai hkum hkrang langai sha rai nga ai. Anhte yawng mayawng, Yuda ni hte Greka ni rai ti mung, mayam ni hte shanglawt ni rai ti mung, hkum hkrang langai sha tai na matu, Wenyi langai sha hta e kashin kamun hkam la saga ai rai nna, anhte yawng jawm lu na matu, dai Wenyi hpe jaw ya mani ai.

Karai Kasang a Mungga rai nga ai.

KABU GARA SHIGA

Yawhan 20:19-23

Ya hti na gaw, Yawhan a laika hta na Kabu Gara Shiga rai nga ai.

Dai laban bat a shawng shani na nsin rim e, Yuda masha ni hpe hkrit ai majaw sape ni hpawng nga ai nta e chyinghka la da sa yang, shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape ni mung dai Madu hpe mu lu jang, kabu gara nga ma ai. Bai, Yesu gaw, Nanhte ngwi pyaw nga myit ga; nye Wa Ngai hpe shangun dat ai hte maren, ngai mung nanhte hpe shangun dat made ai, ngu mu ai. Shing rai nhtawm, sape ni a ntsa e, Shi nsa kawut nna, Chyoi Pra ai Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara hpe rai ti mung, nanhte shagun da yang gaw, dai mara naw nga na ra ai, ngu nna shanhte hpe tsun mu ai.

Madu a Kabu Gara Shiga rai nga ai.

2021:YESU LAMU DE LUNG WA AI POI SHANI NA MUNGGA

“Mungkan ting de pru sa nna yawng mayawng hpe Kabu Gara Shi-ga hkaw dan mu!” Kasa Yawhan ka da ai hta, Wa gaw ngai hpe shangun dat ai hte maren, ngai mung nanhte hpe shangun dat nngai, nga ai. Madu Yesu gaw Kasa ni hpe rai n shangun dat yang, Kasa ni chye la ra ai, mu la, na la ra ai baw yawng hpe sharin ya ai. Grau nna, si ai kaw na bai hkrung rawt ai hpang mabyin ni gaw Kasa ni a makam masham hpe shadaw shangang ya na matu rai nga ai. Madu gaw teng sha bai hkrung sai, myi hte n mu lu ai rai tim, Madu gaw Kari majing, masha majing hku nna kamsham ai ni hte rau a’nga nga ai, ngu ai hpe tup hkra kamsham lu na matu re.

Kup tsup ai makam masham, kuptsup ai myit marai lu la ai hpang, kade yak tim, si n hkrit sakse hkam dan lu na jin jin rai jang sha, Kasa ni hpe shangun dat ai. Kasa ni yawng ngu na daram, si hkam nna sakse hkam dan lai wa ma ai: buga shara n lata, amyu madang n ginghka, Kabu Gara Shi-ga mungkan ting shachyam shabra ra ai. Lit magam dai gaw, dai ni du hkra teng nga ai. Shanhte gaw amyu ga hpan law law shaga lu na ma ai: Moi na maigan masha ni anhte a buga de sasana shang yang, tinang nan gang ai buga amyu masha ni a ga hpe chye hkra sharin la ma ai. Columban jau ni yawng gaw Jinghpaw ga shaga ma ai. Ndai prat na sasana magam gun ai ni mung, tinang nang ang ai buga na amyu masha ni a ga, Lungwo, Lachyid, Zaiwa, Lisu Rawang, Naga,... chye la lu hkra sharin la ang ai. Dai gaw sasana myit majing re.

Kamsham ai ni hte hkan nang na lamik kumla ni: Masha a atsam hte sha n galaw lu ai amu ni hpe galaw lu na lam ga-sadi jaw ai lam re. Machyi masha ni hpe mau-hpa hku shamai ya ai lam ni, mau-hpa hku nna nat shaden kau ai amu ni, mau-hpa hku nna si na hkrit-hpa kaw na lawt lu ai amu ni law law nga ai. Kaga mau-hpa amu ni hpe mung n mai malap ga ai_ laklai ai hku tinang nang a asak aprat hpe ap nawng da lu ai lam, laklai ai nden ja marai rawng ai lam, laklai ai hku tsawra myit madun lu ai lam, laklai ai hku myit dingman ai, tara hkan shatup ai amu ni, tsawra matsan dum garum shingtau ai amu hta shang lawm ai, dz. dz., atsam marai ni gaw shinggyim myit atsam n rai, Karai Kasang e jaw
 
Ehpesu Laika hta tsun da ai, Sutli kumhtaw dagraw hkam la na ni:
Hkum shan hte rai hkrung rawt ai Madu gaw hkum hkrang hte hpawn sumsing mungdan de lung mat wa ai. Karai a hkra maga e hkaw dung nga lu ai. Dai Hkristu hpe kamsham nna Shi a asak hta jawm pawng ai ni yawng mung, Shi hte rau hkrung rawt lu na, sumsing mungdan hta ningngai nga lu na, hpung shingkang arawng aya dagraw hkam la lu na_ dai gaw anhte myit mada ai shagrau kumhpa rai nga ai. Kasa Laika hta tsun da ai, “Nanhte hpa rai lamu de mada nna mau tsap nga mi ta?” Anhte mung, mau tsap nga ga ai kun? Ndai dinghta ga e anhte galaw ra ai amu ni hpe Madu htet matsun da chyalu re. Mungga htawn tsun mu, nga ai. Sakse hkam dan mu, nga ai. Sasana magam hta shang lawm nna, dai Hkristu sharin shaga ai lam ni hpe hkan shatup let matut nna sakse hkam ya ra ga ai.

2021:YESU LAMU DE LUNG WA AI POI SHANI NA CHYUM LAIKA

YESU LAMU DE LUNG WA AI POI

May 16, 2021

CHYUM MUNGGA DAW 1

Kasa 1:1-11

Ya hti na gaw, Kasa laika hta na rai nga ai.

Shawng e ngai ka da ai laika hta, Htawhpilu e, Yesu sumsing lamu de shalum la hkrum ai nhtoi du hkra, shi galaw dan ai amu ni hte sharin shaga ai lam yawng hte hpe ngai ka lajang da se ai. Shi shalun la hkrum ai shani e, Chyoi Pra ai Wenyi a garum ai hte Shi lata la ai kasa ni hpe, ga matsun hkang da nu ai. Yesu si mat ai hpang , dai kasa ni hpe Shi a hkum shadan dan nna, kam ging ai sakse lam law law hte Shi naw hkrung

nga ai hpe madun dan wu ai.

Shing rai shanhte rau hpawng nga ai shaloi Yesu gaw, Yerusalem mare kaw na nanhte n pru ai sha, ngai kaw nna na la ai, Wa a ga ndat hpe ala nga mu, kaning rai nme law, ngai hkum nan nanhte hpe tsun da ai hte maren, Yawhan gaw hka hte kashin kamun jaw ai; nanhte chyawm gaw nhtoi gade n na yang, Chyoi Pra ai Wenyi hte kashin kamun hkam la na marin dai, ngu nna shanhte hpe tsun mu ai. Dai rai nna, Yesu hte rau hpawng nga ai ni gaw, Madu e, dai mundan hpe ya aten e Israela masha ni kaw bai de ya na rai ni? ngu nna san ma ai.

Yesu mahtang gaw, Wa shi a ahkaw ahkang hte daw da ahkying hte aten ladaw hpe, nanhte chye shara n nga ai. Rai timung, Chyoi Rra ai Wenyi nanhte a ntsa e du jang, n-gun atsam lu la na myit dai rai nna, Yerusalem mare hte Yuda mung ting, Samari mung hte lamu ga htum hkra, nanhte nye a sakse ni tai wa na marin dai, ngu nna shanhte hpe tsun wu ai. Ndai ga tsun jang, shanhte yu nga ninglen, Shi hpe ntsa de shalun la ai rai nna, sumwi gaw shanhte a man e shi hpe magap la mat wa ai. Shanhte lamu de naw azi yu nga yang, yu mu, hpraw tu ai hpun palawng bu hpun ai marai lahkawng shanhte a makau e tsap pru nna, Galile masha ni e, htaw lamu de hpa rai azi yu nga myit ta? Nanhte a man na sumsing lamu de shalun la ai wa dai Yesu gaw, nanhte mada yu nga yang, Shi sumsing lamu de lung wa ai zawn, dai hku Shi bai du na ra ai, ngu nna kasa ni hpe tsun mu ai.

Karai Kasang a Mungga rai nga ai.

CHYUM MUNGGA DAW 2

Ehpesu 1:17-23

Ya hti na gaw, Ehpesu masha ni hpang de Kasa Pawlu shagun dat ai laika hta na rai nga ai.

Hpu nau ni e, anhte a Madu Yesu Hkristu a Karai Kasang , hpung shingkang rawng ai Kawa gaw, Shi hkum nan hpe chye chyang lu na matu, nanhte a myit masin hpe hpaji byeng-ya hte myit leng ai chyeju Shi jaw ya u ga, ngu nna ngai hpyi nngai. Karai Kasang shaga la ai a jaw e, myit mada shara gade wa nga ai hpe mung, chyoi pra ai ni gaw hpung shingkang rawng ai sali wunli gade wa hkrum lu na hpe; Shi hpe kam sham ai ni a matu, shi a chyeju atsam gade wa galu kaba nga ai hpe mung, nanhte chye lu na matu, Karai Kasang nanhte a myit masin na myi hpe jahtoi jasan ya malit ga, ngu nna ngai hpyi nga nngai. Karai Kasang gaw, Hkristu hta shabyin da ai amu hpe gawn yu jang, nanhte chye lu na myit dai.

Shi a atsam hte Hkristu hpe si mat ai kaw na sharawt la nna, sumsing lamu hta shi a hkra maga e dung nga shangun da wu ai. Du Magam, Ahkaw Ahkang, Hpung Shingkang hte Up ai Aya lu ai ni nlang hte a ntsa e mung, ndai prat hte htawm hpang na aprat e shamying lu ai amying ahkang mahkra a ntsa e mung, shi hpe shagrau shatsaw da nu ai. Karai Kasang gaw arai baw sumhpa hpe shi a lagaw npu e tawn da nu ai rai nna, yawng mayawng hpe up hkang lu na matu, Nawku Hpung a baw Shi hpe shatai da wu ai. Dai Hpung gaw Hkristu a hkum hkrang rai nga nna, yawng mayawng hpe jahpring shatsup ya ai Hkristu gaw, dai Nawku Hpung a marang e jahkum shatsup ai hkrum wu ai.

Karai Kasang a Mungga rai nga ai.

KABU GARA SHIGA

Marku 16:15-20

Ya hti na gaw, Marku a laika hta na Kabu Gara Shiga rai nga ai.

Yesu gaw kasa shi langai kaw dan pru nna, shi shanhte hpe, Nanhte mungkan ting chyam hkra hkaw dan mu; kam sham nna kashin kamun hkam ai wa gaw hkye hkrang la ai hkrum na ra ai; n kam n sham ai wa chyawm gaw, daw dan ai hkrum na ra ai.Kam sham ai ni madun dan lu na lamik kumla gaw, da ndai ni rai nga ai: Shanhte nye a amying hte nat ni hpe shaden kau lu na mara ai; chyasam ga amyu myu shaga wa na mara ai; 18shanhte a lata hte lapu hpe magra jum lu na hte, gung rawng ai baw hpe lu ti mung, hpa mung n hkrum na ma ai; machyi makaw hkrum ai ni a ntsa e lata mara ya nna, dai ni bran wa na mara ai, ngu nna shanhte hpe matsun dat mu ai. Shing rai, Madu Yesu gaw, shanhte hpe ga tsun da ai hpang, sumsing lamu de shalun la ai hkrum nna, Karai Kasang a hkra maga e dung nga ai. Kasa ni gaw hkawm sa wa nna, shara shagu hkan e hkaw dan ma ai: Madu mung shanhte hpe shingtau nna, galaw dan ai lamik kumla hte Mungga hpe shagrin ya mu ai.

Madu a Kabu Gara Shiga rai nga ai.

2021:PASKA LADAW LABAN (6) NA MUNGGA

Dinghta ga ntsa hta myit ung ang na lam, n tsen hpa law law nga ai. N shut n shai kam mai ai, ung ang hpa n nga ai gaw ndai re: Karai Kasang a n htum n wai tsawra myit, langai hpra hpe kasha shingtai zawn tsawra ai, ngu ai lam re. Wa gaw ngai hpe tsawra ai zawn, ngai mung nanhte hpe tsawra ai; ngai a tsawra myit hta maju jung nga mu! Tinang shangai da ai ma hpe n tsawra ai kadai nga a ta? Ma hkalung a kanu, chyu chyu ai ma hpe malap kau tim pyi, Karai Kasang gaw n malap kau ai, nga ai. Ladu lai n hkru n kaja ai ma hpe kanu kawa pyi n tsawra lu ai. Karai Kasang a tsawra myit kaw na kadai hpe mung n malap kau ai. Kade n kaja ai masha hpe rai tim, Karai Kasang maga, Shi a tsawra myit gaw n htum n wai sha re.

Mungkan ga hpe tsawra ai majaw, Kasha shingtai hpe mungkan masha ni a matu nawng jaw ai, nga ai. Kaja wa mung Yesu gaw wudang ntsa e jen noi si hkam ai du hkra shinggyim masha ni hpe tsawra ai. Tinang a asak hpe ap kau ai du hkra, tsawra ai hta grau ai tsawra myit gaw n nga sai. Shut hpyit mara hta lup nan taw ai mungkan masha ni hpe pyi tsawra ai majaw asak nawng jaw ai Hkristu a tsawra myit gaw Kawa Karai Kasang masha yawng hpe tsawra ai lam a sakse nan rai nga ai. Tsawra myit, ngu ga yang, masha shagu hta tsawra myit rawng ai anhte chye ga ai. Tsawra myit a atsam kaba ai lam hpe mung anhte chye ga ai. Rai timung, kadai hpe gara hku tsawra na, kadai hpe gara madang hku tsawra na, tsawra myit ngu ai a lachyum hkrak n chye ai majaw, TSAWRA ai, a nhkan e byin ai manghkang ni law law nga ai. Tsawra ai nhkan e n ju n dawng ai de mung gale wa lu ai. Sat hkat ai du hkra mung byin wa lu ai. Tsawra myit a lachyum hpe mung, Kaning rai, gara hku tsawra na, ngu ai hpe mung, sharin hkaja la ra ga ai.
   
Dai majaw, kanu kawa ni gaw kasha ni hpe kaji ten kaw nna tsawra chye na lam sharin ya ai rai nga ai. Tinang ra mayu ai, lu mayu ai, tsawra hkam la mayu ai__ tinang a matu sha myit ai tsawra myit hpe sharai ra ai lam sharin ya ai. Tsawra myit a lachyum hpe mung, Kaning rai, gara hku tsawra na, ngu ai hpe si wa ai shani du hkra, yawng gaw sharin, hkaja, shaman shakyang ra ga ai. Kaja dik ai sara gaw Yesu hkum nan rai nga ai. Dai majaw, “Ngai nanhte hpe tsawra ai zawn, nanhte mung shada tsawra mu!” nga, htet da ai rai nga ai.