2021:PASKA LADAW LABAN (6) NA MUNGGA

Dinghta ga ntsa hta myit ung ang na lam, n tsen hpa law law nga ai. N shut n shai kam mai ai, ung ang hpa n nga ai gaw ndai re: Karai Kasang a n htum n wai tsawra myit, langai hpra hpe kasha shingtai zawn tsawra ai, ngu ai lam re. Wa gaw ngai hpe tsawra ai zawn, ngai mung nanhte hpe tsawra ai; ngai a tsawra myit hta maju jung nga mu! Tinang shangai da ai ma hpe n tsawra ai kadai nga a ta? Ma hkalung a kanu, chyu chyu ai ma hpe malap kau tim pyi, Karai Kasang gaw n malap kau ai, nga ai. Ladu lai n hkru n kaja ai ma hpe kanu kawa pyi n tsawra lu ai. Karai Kasang a tsawra myit kaw na kadai hpe mung n malap kau ai. Kade n kaja ai masha hpe rai tim, Karai Kasang maga, Shi a tsawra myit gaw n htum n wai sha re.

Mungkan ga hpe tsawra ai majaw, Kasha shingtai hpe mungkan masha ni a matu nawng jaw ai, nga ai. Kaja wa mung Yesu gaw wudang ntsa e jen noi si hkam ai du hkra shinggyim masha ni hpe tsawra ai. Tinang a asak hpe ap kau ai du hkra, tsawra ai hta grau ai tsawra myit gaw n nga sai. Shut hpyit mara hta lup nan taw ai mungkan masha ni hpe pyi tsawra ai majaw asak nawng jaw ai Hkristu a tsawra myit gaw Kawa Karai Kasang masha yawng hpe tsawra ai lam a sakse nan rai nga ai. Tsawra myit, ngu ga yang, masha shagu hta tsawra myit rawng ai anhte chye ga ai. Tsawra myit a atsam kaba ai lam hpe mung anhte chye ga ai. Rai timung, kadai hpe gara hku tsawra na, kadai hpe gara madang hku tsawra na, tsawra myit ngu ai a lachyum hkrak n chye ai majaw, TSAWRA ai, a nhkan e byin ai manghkang ni law law nga ai. Tsawra ai nhkan e n ju n dawng ai de mung gale wa lu ai. Sat hkat ai du hkra mung byin wa lu ai. Tsawra myit a lachyum hpe mung, Kaning rai, gara hku tsawra na, ngu ai hpe mung, sharin hkaja la ra ga ai.
   
Dai majaw, kanu kawa ni gaw kasha ni hpe kaji ten kaw nna tsawra chye na lam sharin ya ai rai nga ai. Tinang ra mayu ai, lu mayu ai, tsawra hkam la mayu ai__ tinang a matu sha myit ai tsawra myit hpe sharai ra ai lam sharin ya ai. Tsawra myit a lachyum hpe mung, Kaning rai, gara hku tsawra na, ngu ai hpe si wa ai shani du hkra, yawng gaw sharin, hkaja, shaman shakyang ra ga ai. Kaja dik ai sara gaw Yesu hkum nan rai nga ai. Dai majaw, “Ngai nanhte hpe tsawra ai zawn, nanhte mung shada tsawra mu!” nga, htet da ai rai nga ai.