2019:LUSHA GAM LADAW LABAN (3) NA CHYUM LAIKA

LUSHA GAM AI LADAW HTA LABAN 3

24th March, 2019

CHYUM MUNGGA DAW 1

PRU MAT WA AI. 3:1-8a. 13-15

Ya hti na gaw, Pru Mat Wa Ai Laika hta na rai nga ai.

Dai aten hta e, Mawshe gaw shi a katsa Yehtru ngu ai Midian hkinjawng a sagu bainam hpung hpe rem nna nga nga ai. Dai hpung ni hpe nam mali jahtum de shi gawt sa wa ai rai nna, Horeb ngu ai Karai Kasang a bum de sa du ai Shaloi Karai Kasang a lamu kasa gaw singwum hta shi kaw dan pru ai: dai hpe shi yu yu yang, wan grung nga timung singwum gaw n hkru mat nga ai. Dai rai nna, Mawshe gaw, Singwum hpa rai n hkru mat ai kun? Mauhpa lam kaba wora hpe ngai sa yu se ga, nga ai.

Shi sit sa wa ai hpe madu mu yang, Karai Kasang gaw, Mawshe e, Mawshe e, nga nna dai singwum kata na shi hpe shaga ai: shi gaw, Nang e rai nga nngai, ngu nna htan wu ai. Shaloi Karai Kasang gaw, Nang de hkum sit nit; na a kyepdin raw kau u; dai nang kabye ai ga gaw chyoi pra ai ga rai nga ai, nga nna mung; Ngai gaw na nwa a Karai Kasang, Abraham a Karai Kasang, Isak a Karai Kasang, Yuku a Karai Kasang rai nga nngai, nga nna mung tsun wu ai. Dai rai nna, Mawshe gaw Karai Kasang hpe yu na hkrit wu ai majaw, shi a myiman magap da wu ai.

Bai Madu gaw, Egutu mung e nye a amyu hkrum ai ru tsang lam hpe ngai mu se ai rai nna, shanhte a hpareng ni a majaw hkrap sharing ai nsen hpe ngai na ya mase ai: shanhte hkrum ai nni nkri hpe ngai chye nga nngai: shanhte hpe Egutu masha ni a lata na hkye hkrang la na hte, dai mung kaw nna ja kat ai hte kaba nga ai, nga chyu hte lagat jahku lwi ai mung de woi wa na, ngai yu sa ring ngai.

Shaloi, Mawshe gaw, Yu u, Israela a kashu kasha ni hpang de ngai sa du nna, Nanhte a nji nwoi ni a Karai Kasang gaw ngai hpe nanhte hpang de shangun dat nngai, ngu mawe yang, shanhte mung, Dai Karai Wa a mying ningsang kaning nga lu ta? Nga nna san yang, ngai kaning ngu bai htan na rai ta? ngu nna Karai Kasang hpe sun wu ai. Shaloi Karai Kasang gaw, NGAI RAI NGA NNGAI; dai wa nan ngai rai nga nngai. NGAI WA RAI NGA NNGAI nga ai wa gaw nanhte hpang de ngai hpe shangun dat ni ai, ngu nna Israela a kashu kasha ni hpe nang tsun na rin ndai, ngu nna Mawshe hpe tsun wu ai.

Bai Karai Kasang gaw Mawshe hpe, Nanhte a nji nwoi ni a Karai Kasang, Abraham a Karai Kasang Isak a Karai Kasang, Yaku a Karai Kasang ngu ai Madu gaw, ngai hpe nanhte hpang de shangun dat ni ai, ngu nna Israela a kashu kasha ni hpe nang tsun na rai ndai: dai gaw htani htana nye a amying rai nga na li ai; dai gaw prat mi hte prat mi na nye a masat dingsat mying rai nga na lit ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 10:1-6, 10-12

Ya hti na gaw Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Ndai lam langai mi hpe nanhte n chye n mai ai ngu nna, shadum dat nngai. Ngai tsun mayu ai lam gaw: Anhte a ji wa ni yawng gaw dai sumwi npu e gawp ma ai hte, nawng lapran hku rap sa wa ma ai. Shing rai, yawng hte gaw dai sumwi hte nawng hta e, Mawshe hte matut mahkai ai hkrum lu hkra kashin kamun hkam la ma ai. Shanhte yawng hte gaw dai mauhpa shahpa maren sha nna, dai mauhpa luhpa mung maren lu ma ai. Kaning rai nme law, shanhte kaw hkan nang ai mauhpa lunghkrung hta na shanhte lu ma ai rai nna, dai lunghkrung gaw Hkristu rai nga ai. Rai ti mung, shanhte hta na malaw maga hte hpe Karai Kasang n sharawng da mu ai rai nna, shanhte dai nam mali hkan e run byak mat ai hkrum ma ai.

Anhte a ji wa ni gaw n kaja ai arai hpe myit marin nga ma ai zawn, anhte n marin u ga she, dai lam hte gaw anhte a matu shari tai wa masai. Shanhte nkau mi aput angun nga ma ai zawn, nanhte gaw aput angun hkum rai myit; dai ni gaw Jahten ai Wa a lata e hten byak ai hkrum manu ai. Dai lam yawng hte gaw shari tai u ga, shanhte hta byin wa sai rai nna, anhte hpe sharin achyin ya na matu ka da nga ai; kaning rai nme law, anhte a aprat hta e dai ahtik labau ni dik wa sai rai. 12Dai rai nna, marai langai ngai gaw jan rai tsap nga nngai, nga nna myit yang gaw, shi n kadawng u ga sadi ra ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 13:1-9

Ya hti na gaw, Luka a Laika hta na Kabu Gara Shiga rai nga ai.

Dai aten hta e, masha nkau mi Yesu kaw sa du nna, Pilatu gaw Galile masha nkau mi a asai hpe, shanhte nawng ya ai hkungga asai hte kayau kau ai lam, Shi hpe tsun dan mu ai. Shi shanhte hpe, Dai Galile masha ni shing re ai hkrum ma ai majaw, Galile masha yawng hta mara grau law ai ngu nna nanhte myit da mu ni? Dai nrai; ngai nanhte hpe tsun de ga: nanhte mung myit malai n lu yang gaw, nanhte nlang dai hte maren hten bya mat na marin dai.

Ndai ga shadawn mung Shi tsun wu ai gaw: Masha langai mi shi a tsabyi sun hta hkai da ai maihpang hpun langai mi tu lu ai rai nna, dai hta  na asi sa tam yang, n mu wu ai. Dai rai nna shi gaw, Ngai masum ning tup dai maihpang hpun hta na asi sa tam ti mung, n mu we ai; dai hpe kran kau u; hpa rai ga lahpawt tu nga na a ta? Ngu nna sun lajang ai wa hpe tsun wu ai. Dai wa gaw, Madu e, dai ning sha gaw naw tu nga yu u ga; de a nhpang grup e ngai htu kapun nna hpun apawm na we ai: dai hpang asi si yang gaw tu nga u ga: asi n si yang gaw nang kran kau na rai nga ai, ngu nna madu hpe htan wu ai.

Ya hti ai gaw Madu a Kabu Gara Shiga rai nga ai.

2019:LUSHA GAM LADAW LABAN (2) NA MUNGGA

Madu Yesu gaw Petru, Yawhan, Yaku hte hpe woi nna, akyu hpyi na nga, dai bum de lung wa ai. Shi akyu hpyi nga yang shi a myiman gaw ahpraw asam lai nna, shi a hpun palawng mung hpraw tu ai hte kabrim kabram rai wa lu ai. Madu Yesu gaw shi a ahpraw asam galai ai a marang e shi gaw kadai re ai hpe shi a sape ni hpe asan sha chye na tsun mayu ai lam re nga ai. Bai, Shi gaw anhte masha ni hpe hkye la na matu nni nhkri mung Shi hkam la ra na rai nga. Raitim Shi gaw sat kau hkrum ai hpang masum ya nhtoi hta bai hkrung rawt wa na re ai lam hpe shi a sape ni hpe chye na shangun mayu ai rai nga ai. Dai majaw anhte mung prat hta e hkrum ai lam mahkra hpe Madu Yesu hta manoi nna shi a mungga hpe madat la nna kamsham myit kaba hte hkawn sa na matu sharing ya nga ai. Anhte a prat hta e kamsham ai myit hpe shangan ya na matu hpyi la ga. Shi a mungga hta sak hkrung hkawn sa nna prat hpe gaw gap ga.

Sawn sum ru mai ai lam: Karai Kasang a hpung shingkang hta ngai gara hku nga sa nna sakse hkam madun dan na rai?

2019:LUSHA GAM LADAW LABAN (2) NA CHYUM LAIKA

LUSHA GAM AI LADAW HTA LABAN 2

17 March, 2019

CHYUM MUGGA DAW 1

NPAWT NHPANG 15:5-12, 17-18

Ya hti na gaw, Npawt Nhpang Laika hta na rai nga ai.

Dai nhtoi hte hta e, Karai Kasang gaw Abram hpe shinggan de woi shapraw nna, Sumsing lamu de mada yu u; dai shagan ni hpe nang dang hti yang gaw hti yu u: na a myu matu ni dai hte maren rai na mara ai, ngu nna shi hpe tsun wu ai. Abram mung Madu hpe kam sham wu ai rai nna, dai gaw shi a ding hpring ai lam ngu nna Madu sawn la ya wu ai. Bai Shi tsun wu ai gaw, Ndai mung hpe na a sali wunli shatai na matu, ngai nang hpe jaw sana nga nna, Hkaladea masha ni nga ai Ura mare kaw nna nang hpe shaga woi wa ai Madu ngai rai nga nngai, ngu wu ai.

Shaloi Abram gaw, Madu e, dai mung nye a Sali wunli tai na gaw, ngai kaning di chye lu na rai ta? Ngu nna san wu ai. Madu gaw, Masum ning du ai dumsu upra langai mi, masum ning du ai bai nam yi langai mi, masum ning du ai sagu la langai mi hte u hkru du langai mi, ura kasha langai mi nye a matu la tawn u, ngu wu ai, Dai hte maren dai ni nlang hte hpe shi la tawn nna, hkum shagu hpe ka-ang brang brang di ga nhtawm, maga mi de chyen chyen di nna jahka tawn wu ai: u yan hpe chyawm gaw shi n ga wu ai, U matse ni dai mang de pyen hkrat ma timung, Abram dai ni hpe hkap gawn kau wu ai.

Jan du wa jang, Abram gaw yup sha-up hkrum nna, ja htat ai nsin hta hkrit gari mat wa ai. Jan shang mat nna, nsin htat nga ai shaloi, wan hkut hku ai wan mang hte, wan tu ai shanan paw pru nna, shan chyen ni a lapran hku lai mat wa ai. Dai shani e Madu gaw Abram hte ga shaka tawm da nna, Egutu hka nu kaw nna Uhprat hka nu kaba du hkra dam ai lamu ga hpe, na a amyu matu ni hpe ngai jaw da se ai, ngu nna tsun wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

HPILIPI 3:17-21, 4:1

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai.

Hpu nau ni e, Nanhte hpawm nna, ngai madun dan ai kasi hte maren hkan galaw nga mu. Anhte gaw nanhte a kasi ningli tai saga ai rai nna, dai zawn hkan nang ai ni hpe yu matsing nga mu. Kaning rai nme law, shawng e ngai nanhte hpe law law lang tsun dan nna, ya e hkrap let nanhte hpe tsun dan ai hte maren, Hkristu a Udang hte nhtan shai ai hku hkan galaw ai ni law law nga ma ai. Shanhte a chyahtum ai gaw hten byak ai rai nga ai; shanhte a Karai Kasang gaw tinang a kan rai nga ai; tinang a kaya kahpa hta gumrawng nga ma ai; dinghta ga na arai ni hpe hkrai myit tsang nga ma ai.

Anhte a buga chyawm gaw sumsing lamu hta e rai nga ai; dai yang nna Madu Yesu Hkrsitu ngu ai Hkye Hkrang La ai Wa hpe anhte ala nga ga ai. Shi gaw arai yawng mayawng hpe Shi a npu e tawn da lu na atsam a marang e, anhte a grit nem ai hkum hkrang hpe ningnan galai nna, Shi a hpung shingkang rawng ai hkum hkrang hte bung hkra, shachyaw jahtap na ra ai. Dai rai nna, ngai tsaw rai ai hte sharawng awng nna, nye a kabu gara shara hte janmau rai nga ai, jinghku ni e, dai Madu hta dakan dakring rai nna tsap nga mu, ngai tsaw ra ai ni e.

Ya hti ai gaw Karai Kasang a mungga rai nga ai.

KABU GARA SHIGA

LUKA 9:28b-36

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Yesu gaw Petru, Yawhan, Yaku hte hpe woi wa nna, akyu hpyi na nga bum ntsa de lung wa ai. Akyu hpyi nga yang, Shi a myiman gaw ahpraw nsam galai mat nna, Shi a hpun palawng mung hpraw tu ai hte, kabrim kabram rai wa lu ai. Shaloi, Mawshe yan Elia ngu ai masha lahkawng, hpung shingkang hte dan pru nna, Yerusalem mare e shatup na ra ai, Shi lai wa na lam Shi hte ga tsun nga ma ai.

Petru hte shi a manang yan gaw yup shamwi nga ma ai; raitimung, n yup ai sharang nna, Shi a hpung shingkang hte Shi hte rau tsap nga ai hpe mu ma ai. Dai yan gaw Yesu kaw na wa magang yang, Petru gaw, Madu e, ndai yang e nga na anhte a matu mai nga ai; nang e Na a matu langai mi, Mawshe a matu langai mi, Elia a matu langai mi, sum masum, anhte gap saga nga nna Yesu hpe tsun wu ai; rai ti mung, shi hpa tsun ai n chye wu ai.

Dai ga tsun nga yang, sumwi du nna shanhte hpe ka-up wa nga ai: dai sumwi kata de shang lawm wa yang, shanhte hkrit nga ma ai. Dai sumwi hta na nsen ngoi pru wa nna, Ndai wa gaw, ngai Sha, ngai lata la ai Wa rai nga ai: Shi a ga madat mara mu, nga ai. Dai nsen ngoi pru wa ai hpang, Yesu shi hkrai nga ai hpe mu ma ai; sape ni mung atsin sha nga nna, shanhte mu ai lam ni hpe, dai aten hta kadai hpe mung n tsun dan ma ai.

Ya hti ai gaw Madu a Kabu Gara Shiga rai nga ai.

MADU HTE RAU RAI YANG

Daini na hti ai chyum Mungga hta e, “Madu Yesu gaw chyoi pra ai Wenyi hte hpring let, Yawdan hka na bai wa yang, dai Wenyi e nam mali de nhtoi mali shi ya tup woi hkawm wu ai rai nna, Nat e gunglau ai hkrum wu ai lam, dai nhtoi hte laman e shi hpa mung nsha ai rai nna, dai hte ya lai jang kawsi wu ai.” Agung alau ngu ai gaw prat hta e du nan du na re, hpa majaw i nga jang, Madu Yesu pi hkrum ai lam hpe anhte dai ni na Mungga hta e mu lu nga ga ai. Madu Yesu gaw dai zawn re ai agung alau hkrum wa ai ten gara hku hparan ra na lam hpe anhte hpe madun sharing ya nga ai. Agung alau hta na hpan langai mi gaw hkum hkrang myit dik na lam tam ai a marang e du pru ai lam rai nga ai. 

Daini hti ai chyum Mungga hta e Madu Yesu hpe hkum hkrang hta ra ai malu masha hku nna Madu Yesu hpe gung lau ai nga ai. Dai hpe e Madu Yesu gaw “ Masha gaw muk hte sha hkrung nga lu na nrai, nga nna ka da nga ai”, ngu nna dai hpe dang kau nga ai. Lahkawng ngu na gunglau ai hpang gaw kajai gum hkawng ai lam hte seng nna rai nga ai. Satan wa Madu Yesu hpe “mungkan ga na mungdan nlang hpe myi grip mi hta sha madun dan nna” shi hpe nawku jang jaw ya na, nga nna tsun wu ai. Shaloi Yesu gaw, dai Madu na a Karai Kasang hpe nang nawku lu na rai nna, shi hpe hkrai dawjau lu na ndai, nga nna ka da nga ai, ngu nna shi hpe htan wu ai. Masum ngu na hta agung alau gaw arung arai hte ahkang aya hta myit ngwi myit pyaw lam tam ai hku nna du chye nga ai. Anhte a prat hta e anhte gaw gumhpraw, arung arai, ahkang aya gaw ahkyak dik hku nna nga ai shaloi anhte gaw Karai Kasang a lam de nre sha Satan a lam de hkan wa nga ai. Dai majaw anhte gaw hten mat chye ai hta nre, hten mat nchye ai, Karai Kasang hta e rau hkawm sa nga ga.

Sawn sum ru mai ai lam: Anhte a prat hta Madu Yesu zawn gunglau ai lam hkrum ai shaloi gara hku bai hkawm sa na kun? Madu hte rau hkawm sa lu hkra shakut nga ga.

2019:LUSHA GAM LADAW LABAN (1) NA CHYUM LAIKA

LUSHA GAM AI LADAW HTA LABAN 1

10th March, 2019

CHYUM MUNGGA DAW 1

TARA JAHPRANG 26:4-10

Ya hti na gaw, Tara Jahprang Laika hta na rai nga ai.

Israela masha ni yawng hte hpe Mawshe ning nga ai: Hkinjawng agyi wa gaw shawng myin ai nsi naisi amyu shagu hpe na a lata na la nna, na a Madu Karai Kasang a tawn hkungri a man e tawn da na rai wu ai. Shaloi na a Madu Karai Kasang a man e nang tsun na gaw: Nye wa gaw brak hkawm ai Arame masha rai nga ai; shi gaw n law n htam ai masha ni hte rau Egutu mung de yu wa nna, galu kaba ai hte atsam rawng nna law htam ai amyu tai wa lu hkra, dai yang e shingbyi nga ai. Egutu masha ni chyawm gaw anhte hpe n htum nni zingri zingrat ai hte, aja awa yam sha kau mi ai. Shaloi anhte a ji wa ni a Madu Karai Kasang hpang de anhte hpyi jahtau saga ai rai nna, Madu anhte a nsen madat mara ya ai hte, anhte hkrum ai bungli lit hte nni nkri hpe yu ya mi ai. Dai rai nna, Madu gaw n-gun ja ai lata hte ladawn dat ai lahpum, hkrithpa lam law law hte lamik kumla mauhpa amu madun nna, Egutu mung na anhte hpe shaw woi wa nhtawm, nga chyu hte lagat jahku lwi ai ndai mungdan hta woi shawn tawn da mani ai. Ya, Madu e, Nang ngai hpe jaw ai yi hkauna a shawng myin ai nsi naisi ngai la sa ring ngai, ngu nna na a Madu Karai Kasang a man e nawng let, Shi hpe dingnyawm nawku na rai ndai.

Ya hti ai gaw Karai Kasang a mungga rai nga ai.

CHYUM MUNGGA DAW 2

ROMA 10:8-13

Ya hti na gaw, Roma masha ni hpang de San Pawlu shagun dat ai Laika hta na rai nga ai.

Hpu nau ni e, Chyum Laika hpa tsun a ta? ‘Dai mungga gaw nang hte htep rai nga ai; na a n-gup hte kraw lawang hta e rawng nga ai,’-dai gaw anhte hkaw tsun dan ai makam masham rai nga ai. Shingrai, ‘Yesu gaw Madu rai nga ai,’ nga nna na a n-gup ga hte hkap hta la nna, Karai Kasang si mat ai ni kaw na Shi hpe hkrung sharawt la ai hpe, na a myit masin htakam sham yang gaw, nang hkye hkrang la ai hkrum na rin dai. Kaning rai nme law, myit masin mahkra hte kam sham yang gaw, ding hpring ai lu la na ra ai; n-gup ga hte dai makam masham hpe hkap hta la yang gaw hkye hkrang la ai hkrum na ra ai.

Chyum Laika gaw Shi hpe kam sham ai ni yawng mayawng hte gaw kaya kahpa n hkrum na ra ai, nga nna tsun ai shaloi, Yuda ni hte Greak masha ni hpe n ginhka nga ai: dai Madu gaw yawng mayawng a ntsa na Madu langai sha rai nga ai; Shi hpe shaga ai ni yawng mayawng hpe garum na matu, Shi chyeju sutgan hte hpring nga ai. Shingrai, Madu a mying ningsang hpe shaga ai masha kadai mung hkye hkrang la ai kaw du lu na ra ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 4:1-13

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Yesu gaw Chyoi Pra ai Wenyi hte hpring let, Yawdan hka nna bai wa yang, dai Wenyi e nam mali de nhtoi mali shi ya tup woi hkawm wu ai rai nna, nat e gunglau ai hkrum wu ai. Dai nhtoi mahkra a laman e Shi hpa mung n sha ai rai nna, jahtum ai de kraw si wu ai. Dai rai nna Nat gaw, Nang Karai Kasang a Kasha rai yang gaw, ndai nlung hpe muk tai u ga tsun u, ngu nna Shi hpe tsun wu ai. Yesu htan let, Masha gaw muk hte sha hkrung nga lu na n rai, nga nna ka da nga ai, ngu wu ai. Bai, Nat gaw Shi hpe tsaw ai shara de woi lung nna, mungkan ga na mungdan nlang hpe myi grip mi hta madun dan nna, Ndai ahkang aya mahkra hte, dai mungdan ni a hpung shingkang hpe ngai nang hpe jaw na de ai: dai gaw ngai hpe ap ya ni ai rai nna, ngai jaw mayu ai wa kadai hpe mung jaw lu nngai. Dai re ai majaw, nye a man e nang nawku yang gaw, ndai yawng mayawng na a tai na ra ai, ngu nna Shi hpe tsun wu ai. Shaloi Yesu gaw, Dai Madu na a Karai Kasang hpe nang nawku lu na rai nna, Shi hpe hkrai daw jau lu na ndai, nga nna ka da nga ai, ngu nna htan wu ai. Bai, Nat gaw Yerusalem mare de Shi hpe woi sa nna, Nawku Htingnu a nchyun e shadun tawn nhtawm, Nang Karai Kasang a Kasha rai yang gaw, Na a hkum hpe nang de nna le ra de jahkrat dat u; kaning rai nme law, Nang hpe bau sin na, Na a matu Shi a lamu kasa ni hpe Shi hkang da nu ai; Bai, Nlung hta Na a lagaw n ahtu u ga, shanhte a lata hta Nang hpe pawn la na mara ai, nga nna ka da nga ai, ngu wu ai. Yesu gaw, Dai Madu na a Karai Kasang hpe nang chyam yu lu na n rai, nga nna rawng ai, ngu nna htan wu ai. Nat gaw agung alau lam mahkra shatup ngut jang, bai sa ang ai aten du hkra Shi kaw na pru wa ai.

Ya hti ai gaw Madu a Kabu Gara Shiga rai nga ai.

N JE YANG GA

Masha a myi hta rawng ai nbun hpe mu na she loi nga timung, tinang a myi hta e rawng ai hpuntawng hpe mu na gaw yak la nga ai. Masha ni a nkaja ai hpe mu ai, masha ni hpe mara shangun ai, lam dai ni gaw anhte masha ni lang nga ai (defense mechanism) ngu ai tinang hkum tinang makawp maga ai ladat rai nga ai. Ti nang a myitkraw kata kaw byin ai hpe gaw man hkrum sanglang jahpra ai lam nnga ai. Shinggan na hpyen hpe jum lang na gaw loi ai, raitim kata na hpe gaw jum lang na yak la nga ai. Masha langai hpe tara jeyang ai gaw dai masha wa kadai rai nga, ngu hpe lachyum hpaw ya ai nrai nga ai. Dai jeyang ai wa kadai re ngu ai lachyum hpe hpaw ya ai she rai nga ai.

Dai re ai majaw, Madu Yesu gaw anhte hpe masha ni hpe tara jeyang ai lam, laga masha a shut ai lam ni hpe koi gam ra ai lam shadum sharing ya nga ai. Anhte ni gaw masha ni a yaw shada lam jeyang lu na matu yak la nga ai. Dai re majaw anhte gaw Karai Kasang a lata hta e ap da ra nga ga ai. Teng sha yu dat ga nga jang anhte kaja jang, masha ni a mai kaja ai lam hpe lu mu na lam hta lawan nga ai hpe mu lu ga ai. Hpun kaja gaw asi kaja hpe jaw ya nga ai. Anhte nhkru ai hku mu ai shaloi, nhkru ai hpe sha mu nga ai. Hkrum katut ai mahkra hpe shatan ai, masha wa a nkaja lam tsun jahta ai ten hta e anhte a myit kata de shang yu ra nga ai. Masha ni a mai kaja hpe sha yu nna, masha ni hpe shanhte a mai kaja ai hpe n-gun shaja ya ga. Masha shagu hta galoi ten hta raitim mai kaja ai lam gaw galoi mung nga nga ai. Dai majaw mai kaja ai lam hpe sha tam yu ga, shaloi mai kaja ai hpe sha mu na ra ai.

Sawn sum ru mai ai lam: Ngai na prat hta Masha ni hpe kaja ai hku tsun shaga wa sai kun? Kaja ai de lam woi wa ra sai kun?

2019:PRANWAN LADAW LABAN (8) NA CHYUM LAIKA

PRANWAN LADAW HTA LABAN 8

3rd March, 2019

CHYUM MUNGGA DAW 1

SIRAK 27:4-7

Ya hti na gaw, Sirak a Laika hta na rai nga ai.

Mam hpe hking hta hking ai shaloi, nsan dawng pru ai hte maren, ga tsun hkat ai shaloi, masha a mara dan pru nga ai. Di bu sama gaw shi galaw ai di bu ni hpe wan hta chyam yu ai zawn, masha kaja ai, n kaja ai kun, shi ga tsun ai shaloi chye lu ga ai. Sun hta hkai tawn ai hpun hta na namsi hpe yu nna, dai sun kaja ai n kaja ai chye lu ai hte maren, masha tsun ai ga a majaw, shi kraw lawang na myit mang ai lam hpe chye lu nga ai. Masha hpe shakawn mayu yang, shi ga garai n tsun yang hkum shakawn nga mu; kaning rai nme law, shi tsun ai ga a majaw, shi a lam hpe chye lu ga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 15:54-58

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai. 

Hpu nau ni e, Ndai hten mat chye ai hkum hkrang gaw n hten n mat chye ai hpe dagraw nga ai hpe, ndai si mat chye ai mung, n si n mat chye ai hpe dagraw ngut jang she, ‘Si hkrung si htan gaw mayu kau ai hkrum nu ai; awng dang lu saga ai’ nga nna, Chyum Laika hta ka da ai ga dik wa na ra ai. Si hkrung si htan e, na a padang ninghkaw kanang nga nga a ta? Si hkrung si htan e, na a balen kanang nga nga a ta? Si hkrung si htan a balen gaw shut hpyit mara rai nga ai; shut hpyit mara a n-gun atsam chyawm gaw dai jep ai tara kaw na rai nga ai. Rai ti mung, Karai Kasang gaw, anhte a Madu Yesu Hkristu a marang e anhte hpe awng dang shangun ai majaw, Shi hpe chyeju dum shakawn nga ga. Dai re ai majaw, ngai tsaw ra ai hpu nau ni e, dakring dalang nga nga mu; myit hkum htum mu; nanhte gun hpai ai amu gaw, Madu hta e kaman lila n rai nga ai dum chye nna, dai Madu a bungli hpe tut nawng e shakut sharing let galaw nga mu.

Ya hti ai gaw Karai Kasang a mungga rai nga ai.

KABU GARA SHIGA 

Luka 6:39-45

Ya hti na gaw, Luka a Laika hta na Kabu Gara Shiga rai nga ai.

Dai aten hta Yesu Shi a sape ni hpe ga shadawn tsun mu ai gaw: Myi kyaw ai wa gaw myi kyaw ai wa hpe lam woi madun lu a ni? Shan lahkawng nhkun hta hkrat na ma ai, n rai ni? Sape ni gaw sara hta grau ai n rai; hkum hkra sharin la sai sape kadai mung shi a sara zawn rai na ra ai. Tinang a myi hta rawng ai hpuntawng hpe n myit yu ai mi, na a nhpu nnau a myi hta rawng ai nbun hpe, hpa rai yu nga nta? Tinang myi hta rawng ai hpuntawng hpe pyi n mu ai wa mi, Hpu nau wa e, na myi hta rawng ai nbun hpe ngai naw lai kau ya de ga, nga nna nhpu nnau wa hpe kaning rai tsun lu n ta? Hpyi hpun ai wa e, Na a myi hta na hpuntawng hpe shawng lai kau u; dai hpang, na nhpu nnau wa a myi hta rawng ai nbun hpe lai kau ya na, nang asan sha mu na rin dai.

Kaja ai namsi hpun gaw n kaja ai asi galoimung n si ai; kaja ai asi si ai hpundaw mung n nga ai. Dai rai nna, hpun shagu hpe tinang a asi yu nna chye ginhka lu nga ai: 44ju hpun hta na maihpang si kadai n di la lu ai; ju singwum hta na mung tsabyi si hpe kadai n di la lu ai. Kaja ai wa gaw, shi a kraw lawang hta mahkawng da ai kaja ai lam ni hta na, kaja ai hpe shapraw dan ai; n kaja ai wa chyawm gaw, shi mahkawng da ai n kaja ai hta na, n kaja ai lam hpe shapraw dan ai: kaning rai nme law, myit masin hta hpring chyat nga ai kaw na, n-gup hte tsun pru nga ai.

Ya hti ai gaw Madu a Kabu Gara Shiga rai nga ai.

MARA DAT YA NGA GA

Lani mi hta Mother Teresa gaw Calcutta kaw na maza mala sumpum langai mi hta gari gawa re ai garum na masha n nga ai, matsan mayan rai taw nga ai num langai mi hpe mu ai. Mother Teresa gaw dai num hpang de sit sa nna shi a makau e nga ai gwi ni hpe gau kau ya ai hte shi hpe pawn la ai. Shi gaw machyi ai majaw hkum grai kahtet nga ai. Mother Teresa gaw nta de woi wa nna tsi tsi ya ai hte yu lajang wu ai.

Dai num jan kaw kasha la kasha langai mi nga ai. Shi a kasha hkum nan shi hpe dai maza sumpum kaw sa kabai da ai. Shi a kasha shingtai a n hkru ai, n kaja galaw ai lam gaw machyi ai hta shi hpe grau hkamsha shangun ai. Dai zawn galaw ai hpe shi gara hku malap lu na rai ta? Gara hku mara raw ya lu na i? gara hku matsan n dum ai sha nga lu na? Mother Teresa gaw Karai Kasang gaw anhte hpe hpan da ai, tsawra ai, chyeju ni hpe galoi mung shaman ya nga ai lam tsun dan let shi hpe myit shalan shabran ya ai. Karai Kasang hpe anhte law law lang shut kau ai, Shi myitra lam ni hpe n galaw ai, mara ni law law galaw ai. Raitim, Karai Kasang anhte hpe galoi mung mara raw ya, matsan dum ai, tsawra nga ai. Dai lam ni hpe jahkring mi myit yu nna nang mung nang hpe shut shai ai ni hpe tsawra matsan dum ra ai. Grau nna na a kasha hpe matsan dum tsawra, mara raw ya ra ai, matsa na malai shaman ga tsun ra ai lam Mother Teresa gaw shi hpe hpaji jaw, tsun dan ai.

Shi a matu, shi hte rau akyu hpyi ai. Shi a ja la ai myit masin gaw hpa-yawng-deng zawn kya mat ai. Shi a mara ni yawng a matu myit malai ai hte myi prwi pru wa ai. Bai shi a myit masin salum kaw na shi a n kaja ai kasha hpe mara dat ya ai. Shi a myit man hta mani sumsai, myit pyaw myitdik ai,  “chyeju kaba sai” nga tsun nhtawm Mother Teresa a lata hta nsa hti mat ai. Samuela laika hta Dawi a laklai ai myit masa hpe mu lu ai. Zihpa gaw nam mali de Dawi hpe sat na matu masha hking masum hte rau Shawlu sa wa ai. Shi gaw dap a ka-ang e yup nga ai. Abna hte shi masha ni gaw Shawlu a grup yin e yup nga ma ai. Dawi hte Abishai yan gaw shana e sa nna, Abishai gaw Shawlu hpe nri hte galun sat kau na matu Dawi hpe hpyi wu ai. Dawi gaw Karai Kasang a namman jaw hkam ai wa hpe kadai mung nhkra lu ai ngu nna Abishai hpe daru ai. Dawi gaw shi a hpyen wa hpe mara raw dat ya ai.

Dai ni na Kabu Gara shiga hta, tinang a hpyen wa hpe mara raw, tsawra ra ai lam Madu Yesu sharing ya ai. Matai htang n mai ai. Dum nta masha jinghku jingyu, manaw manang, makau grup yin na masha ni, tinang a hpyen ni hpe tsawra ra ai. “Nanhte hpe ndawng n-yawt ai ni hpe kaja ai hku galaw mu, Nanhte hpe dagam dala matsa ai ni hpe shaman ya mu, Nanhte hpe aroi arip di ai ni a matu akyu hpyi ya mu, Na a shabyi maga mi bye ai wa hpe maga mi naw jaw ya u. Na a palawng galu la kau ya ai wa hpe na a lawnghkoi mung hkum n dang kau u, Na a arung arai la kau ya ai wa kaw bai hkum hpyi myit.”N kaja ai lam hpe n kaja ai hku mahtai htang n mai ai. Ndai lam hkan sa na matu yak na re. Raitim Madu Yesu sharin ya ai tsawra ai tara rai nga ai.

Masha ni nanhte hpe hkan galaw na, nanhte tsaw myit dai hte maren, nanhte mung dai zawn shanhte hpe hkan galaw mu. Nanhte a Kawa matsan dum chye ai hte maren nahte mung matsan dum mu. N jeyang ai n dawdan ai nga mu, mara raw ya mu.

Myit sumru yu mai ai lam: Ndai Chyum Laika gaw nang a matu hkap la na yak ai kun? Hkap la lu hkra shakut na kun?

2019:PRANWAN LADAW LABAN (7) NA CHYUM LAIKA

Pranwan Ladaw hta Laban 7

24th Febuary 2019

CHYUM MUNGGA DAW 1

1SAMUELA 26:2, 7-9, 12-13, 22-23

Ya hti na gaw, Samuela a Laika langai hta na rai nga ai.

Sawlu rawt nna, san da ai Israela masha hkying masum hte rau, Zihpa nam de Dawi hpe tam na nga yu wa ma ai. Shing rai Dawi yan Abisai gaw shanhte a dap de shana e sa wa ma ai; shaloi Sawlu dap ka-ang e yup nga Nawku nna, shi a ri gaw baw nhtung e ga hta jung da ai hpe mu hkrup ma ai; Abna hte shi a hpyen la ni grup yin e yup nga ma ai. Shaloi, Abisai gaw, Karai Kasang na a hpyen wa hpe dai ni na a lata hta ap ya ra ai. Dai rai nna aga de hkrang hkra ngai dai ri hte kalang mi sha shi hpe galun htinggrang kau we ga; lahkawng lang pyi n kahtap ra nngai, ngu nna Dawi hpe hpyi wu ai. Dawi chyawm gaw, shi hpe hkum sat u; Madu a namman chya hkam ai wa hpe, kadai wa mi mara n kap ai hku hkra lu na rai ta? ngu nna Abisai hpe daru kau wu ai. Shaloi Dawi gaw Sawlu a baw nhpang na ri hte ntsin namtau hpe la nna, shan lahkawng wa ma ai. Kadai mung n mu n na dat mu ai; kadai sha mung n dum ma ai; kaning rai nme law, Madu gaw shanhte hpe yup kaba hte shayup mu ai majaw, shanhte yawng yup pyaw nga ma ai. Dawi gaw hkaraw wora hkran de rap nhtawm, tsawmra mi san ai bum pungding e tsap da nna, Sawlu hpe jahtau shaga wu ai. Dawi gaw, Hkawhkam wa a ari nang e rai nga ai; ma langai mi hpe sa la shangun u. Madu gaw kadai hpe rai timung, tinang a ding hpring ai hte kangka ai lam hpe hkan nna, akyu htang jaw na ra ai. Dai ni e, Madu gaw nang hpe nye a lata hta ap kau nit dai, rai timung, Shi a namman chya hkam ai wa hpe ngai n hkra nngai, ngu nna tsun wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 15:45-49

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Shawng na masha Adam gaw asak hkrung ai shinggyim masha tai wa ai, nga nna ka da nga ai; hpang jahtum na Adam chyawm gaw asak jahkrung ya ai wenyi rai nga ai. Jahkrung ya ai wenyi lu ai wa gaw shawng nga ai n rai; dinghta hkum tsawp lu ai wa mahtang shawng nga nga ai; dai hpang e jahkrung ya ai wenyi bai nga ai. Shawng na masha gaw ga nhpu hte galaw sai majaw, dainghta ahpraw nsam hpe dagraw la sai. Hpang na masha chyawm gaw sumsing lamu na rai nga ai. Anhte ga ntsa e nga ai shaloi, dai dinghta masha hte maren rai nga ga ai; sumsing lamu hta e nga ai shaloi, sumsing lamu na masha hte maren rai nga ga ai. Dai rai nna, dinghta masha a ahpraw nsam hpe anhte dagraw la sai hte maren, sumsing lamu na masha a ahpraw nsam hpe mung anhte dagraw la na ra ga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 6:27-38

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Yesu Shi a sape ni hpe tsun mu ai gaw: Nanhte madat mara la ai ni hpe ngai tsun made ga, Nanhte a hpyen ni hpe tsaw ra mu; nanhte hpe n dawng n yawt ai ni hpe kaja ai hku galaw mu; nanhte hpe dagam ai ni hpe kaja ai hku galaw mu; nanhte hpe dagam ai ni hpe shaman ya mu; nanhte hpe aroi arip di ai ni a matu akyu hpyi mu. Na a shabyi maga mi bye ai wa hpe maga mi naw ja ya u; na a palawng galu la kau ai wa hpe, na a lawnghkoi mung hkum ndang u. Nang kaw hpyi ai wa kadai hpe mung jaw u; na a arung arai la kau ya ai wa kaw bai hkum hpyi nu. Masha ni nanhte hpe hkan galaw na, nanhte ra ai hte maren, nanhte mung dai zawn shanhte hpe hkan galaw mu. Nanhte hpe tsaw ra ai ni hpe sha tsaw ra yang gaw, nanhte a matu hpa akyu nga a ta? mara kap ai ni mung tinang hpe tsaw ra ai ni hpe tsaw ra ma ai. Nanhte hpe kaja ai hku galaw ai ni hpe sha, kaja ai hku galaw htang yang gaw, nanhte a matu hpa akyu nga a ta? mara kap ai ni mung dai zawn galaw ma ai.

Bai htang lu na zawn re ai ni hpe sha hkoi shap ya yang gaw, nanhte a matu hpa akyu nga a ta? Mara kap ai ni pyi, hkoi ya ai made bai lu la hkra mara kap ai ni hpe hkoi shap ya na ai. Dai rai nna, nanhte gaw, nanhte a hpyen ni hpe tsaw ra mu; shanhte hpe kaja ai hku galaw mu; myit hpa mung n ru ai sha hkoi shap ya mu; shing rai jang nanhte e shabrai kaba wa na hte, Tsaw Htum ai Wa a kasha ni mung nanhte tai na marin dai; kaning rai nme law, shi gaw chyeju malap kau ai ni hte, n hkru n hkra re ai ni hpe malawm magawm di mu ai. Nanhte a Kawa matsan dum chye ai hte maren, nanhte mung matsan chye dum mu. N jeyang ai nga mu; shing rai jang, nanhte jeyang ai n hkrum na myit dai: n daw dan ai nga mu, shing rai jang nanhte daw dan ai n hkrum na madai: mara dat kau mu; shing rai jang nanhte dat kau ai hkrum na myit dai. Jaw mu; shingrai jang nanhte hpe jaw na marin dai: hpring kabrat hkra anin garin, man ai dang hte nanhte a lahpyen e shanhte jaw na mara ai: kaning rai nme law, nanhte hteng ya ai dang hte, nanhte hpe bai hteng ya na marin dai.

Ya hti ai gaw Madu a Kabu Gara Shiga rai nga ai.

FEBRUARY 22, 2019 BAT MANGA YA

Bat Manga, February 22, 2019

(Hti na matu)

Daw Langai: 1 Petaru 5:1-4

Daw Lahkawng: Mahte 16:13-19

You are Peter, and upon this rock I will build my Church. (Mt 16:18)

Kasa Petaru a prat hta Madu Yesu hpe nyet kau ai lam ni, kam shut ai lam ni, myit katu nna tsun shut ai lam ni law law nga lai wa sai. Raitim, Madu Yesu gaw Kasa Petaru a ntsa myit daw myit hten ai lam nnga ai, kam shut ai lam mung nnga ai, grau grau nna lam woi madun la ai, sharin achyin ya ai. Shi a Nawku hpung hpe gaw de da nna, dai Nawku hpung hpe woi awn lu ai ningbaw langai byin hkra sharin ya lai wa ai hpe anhte mu lu ga ai.

Anhte hpe mung Madu Karai Kasang gaw galoi mung myit daw myit hten mat ai lam nnga ai hpe dum ra nga ga ai. Madu Karai Kasang gaw Kasa Petaru hpe Shi a Nawku hpung hpe woi awn lu ai ningbaw ningla langai byin wa hkra lam woi madun, sharin ya lai wa ai zawn, daini anhte marai hkum shagu hpe mung Ja Chyum Mungga hku nna, hpung woi magam gun ni hku nna, Shi lam woi madun sharin ya nga ai re. Dai majaw anhte marai hkum ngau shagu Kasa Petaru zawn Madu Yesu sharin shaga ai hpe htep lahti hkan nang hkang sa ai rai yang anhte a prat hta mung myit ngwi sim sa ai, nga mu nga mai ai shaman chyeju ni kaja nan hkam la lu rai nga ga ai law.

Kyuhpyi Ga: Madu e, Na a hpang hkan kaja tai lu na matu ngai hpe lam woi madun sharin ya rit law.