MADU SHARAWNG AWNG AI LAM HTE RAWT JAT GALU KABA WA GA

Lusha gam ladaw nhtoi (40) ya hta, Chyoipra ai Wenyi Karai Kasang, nang hpe kaning rai garum ya na ra sharawng nga a ta?

Kabu gara shiga anhte hpe tsun dan ai hta, Yawdan hka e Madu Yesu kashin kamun hkam la ngut ai hpang, Chyoipra ai Wenyi a atsam hte hpring wa nna, Judea a nam mali kata, simsa ai shara, tinang hkrai sha nga na matu, mare de na ngoi garu ai n sen hte tsan ai de woi len mat wa sai. Madu Yesu, shi hkrai sha, nhtoi (40) ya tup, dinghku masha, manaw manang ni kadai hte mung matut mahkai ai lam n nga ai sha, sa nga nga sai. Judea nam mali gaw; dam lada la ai zai bru jang, lung rawk ni, bum marawn ni, hte sung la ai hkaraw n hkap ni deng law law matut manoi rai nga ai shara rai nga ai. Mungkan ntsa hta na hkai sha n mai ai bum shakrin ni hte hpring tup ai, shara langai mi rai nga ai. Shawlu a man kaw nna David hprawng hkawm let Yuda nam maling hkan nga hkawm ai shaloi; “hka n rawng ai hkraw ai hte krin ai prang hta e”, (shk 63:1) nga dai lamu ga hpe tsun lai wa sai. 

Kawa Karai e, Madu Yesu hpe Hkyela Madu tai na Sasana magam lit jaw ai hpang kalang ta ngu na ten hta, hpa majaw wenyi gaw, dai zawn re ai machyi shim ai shara de Yesu hpe woi mat wa ai rai?

Karai Kasang hte hkrum shaga na matu Mawshe yan Elia n’htoi (40) ya tup akyu hpyi ai, lu sha gam ai zawn sha Madu Yesu mung hkan galaw nang ai rai sai. Karai Kasang gaw Mawshe yan Elia hpe, shi a Mungga htawn shana na, myihtoi magam, dingman kang ka ai hte Karai Kasang hpe tsawra na hte htingbu wa hpe tsawra chye na lam de woi sa wa na magam bungli gun hpai lu na kun chyam yu ai rai sai. Sinai bum a nam maling kata e Mawshe, Elia lu sha gam akyu hpyi nga ai ten hta, Karai Kasang gaw shan lahkawng hpe Shi a sak hkrung Mungga hte jahkru shakat ya sai. Karai Kasang hte rau lak san machyi shim ai aten lu la ai marang e, Karai Kasang shan hpe jaw da ai lit hpe kam sham, myit mada tsawra ai hte galaw lu na n-gun ban la lu sai. Dai hte maren, Madu Yesu mung, Shi hta ap tawn da sai Sasana Magam bungli hpe gun hpai lu na matu, Sumsing Lamu na Kawa Karai hte mali shi ya, mali shi na tup akyu hpyi nna machyi shim ai shara hta rau sha sa nga let n-gun ban la sai. 

Madu Yesu, shawng na lang, gung lau hkrum ai gaw, malu masha hta rai nga ai. Tim, Madu gaw, Chyum Mungga hta na ga; ‘masha gaw Muk hte sha asak hkrung lu ai nrai, Karai Kasang a n-gup hta na pru ai mungga nlang hte hte hkrung nga lu na ra ai’ (Tra 8:3, Mt 4:4) ngu htan ya let, Satan hpe dang kau sai.                                                    

Lahkawng lang na agung alau gaw, Mungkan ga na arawng aya, sutsu nga pyaw lam ni hpe Satan hpe nawku let, lu la na matu tsun hkrum ai rai sai. Tim, ‘na a Madu Karai Kasang hpe nang nawku lu na rai nna, Shi hpe hkrai daw jau lu na ndai’ (Tra 6:13) nga ai mungga hte htan ya let, Satan hpe dang kau lu sai. 

Masum lang ngu na agung alau gaw, Madu Yesu, Karai Kasang a Kasha rai nga ai hpe chye nga ning len, dai lam hpe madun lu na, Karai Kasang hpe chyam na matu nat satan shangun ai rai sai. Rai tim, anhte hti lu sai hte maren, Madu Yesu gaw, ‘dai Madu na a Karai Kasang hpe nang chyam yu lu na n rai,’ (Tra 6:16) nga ai mungga hpe madi let satan hpe dang kau lu sai. 

Rai yang, nam mali e Madu Yesu agung alau hkrum ai mabyin kaw nna, anhte hpa hpe sharin hkam la lu sai kun? Tinang a prat hta du wa na re ai mara/agung alau ni hpe adawt kau lu na myit mada shara lu la sai kun? Madu Yesu nam mali e, nat a agung alau hkrum ai shaloi, Shi hpe Chyoipra ai Wenyi e woi len ai. Madu Yesu Shi hkum shi a atsam hpe kam nna sa ai gaw n rai ai. Chyoipra ai wenyi hta kam shamyet nga ai rai nna n-gun atsam, nyan hpaji, nden marai, hte tinang hkum hkang dang lu na chyeju lu la sai. Agung alau hpe tinang chyu dang kau lu na nre ai lam Madu chye nga ai. Chyoipra ai wenyi a atsam, garum ya na chyeju, anhte ra kadawn nga ai. 

Madu Yesu gaw, Shi a Wenyi hpe anhte a gawng kya ai lam a matu jaw da ya sai hte yak hkak hkrum wa ai ten hta anhte hpe lam woi atsam jaw ya na matu rai nga ai. Shi Madu hta shagrit shanem ai hte kam shamyet nga ai ni hpe, satan gasat ai kaw nna hkam manga kau lu na chyeju atsam Madu Yesu jaw nga ai. “Dai makam masham hte seng ai mai kaja ai gasat gala ai hpe a gasat nga na’ (1 Tim 6:12)Karai Kasang ra sharawng nga ai hte atsam marai hpe Chyoipra ai wenyi jaw ya na rai nga ai. Shut hpyit mara galaw ang na lam kaw nna lawt lu na matu, Karai Kasang a hpaji atsam hte lam madun ya na hpe nang tam nga ai kun? 

Nhtoi (40) ya lu sha gam ladaw ndai gaw, nam mali e Madu Yesu (40) ya lu sha gam akyu hpyi ai hpe hkan galaw ai rai nna, Karai Kasang a amyu masha ni anhte a matu shaning shagu galaw ai lusha gam akyu hpyi ai lamang rai nga ai. Madu Yesu hte rau hkawm sa let, akyu hpyi ai, lu sha gam ai, gam jaw gam ya ai, myit malai lu ai, hte tinang hkum hpe bai gram lajang da nna, Hkristan ni a ‘shalai wa ai Poi’ rai nga ai, “Paska’ poi a matu lajang shachyip da ga. Madu Yesu gaw, wenyi nshat, laklai atsam anhte hpe jaw ya ai marang e, agung alau hpe dang kau lu nna Shi Madu a myiman hpe mu mada lu na rai nga ai. Hkristu a nni nkri hkam ai lam hta anhte mung hkawm sa ai marang e, Shi Madu a bai hkrung rawt ai awng dang lam hta mung anhte shang lawm lu na rai nga ai.

Ndai lajang shachyip ai hte ningja jat la ai ladaw hta, Madu a wenyi hte kamsham, myit mada, tsawra ai lam hta anhte galu kaba wa nna, anhte a prat hta mung Madu a sharawng awng ai lam hpe grau nna hkap la lu na matu, Madu Yesu kaw akyu hpyi ga!

LUSHA GAM LADAW LABAN (1) N A CHYUM LAIKA

14^th February, 2016

CHYUM MUNGGA DAW 1

TARA JAHPRANG 26: 4-10

Ya hti na gaw, Tara Jahprang Laika hta na rai nga ai.

Israela masha ni yawng hte hpe Mawshe ning nga ai: Hkinjawng agyi wa gaw shawng myin ai nsi naisi amyu shagu hpe na a lata na la nna, na a Madu Karai Kasang a tawn hkungri a man e tawn da na rai wu ai.

Shaloi na a Madu Karai Kasang a man e nang tsun na gaw: Nye wa gaw brak hkawm ai Arame masha rai nga ai; shi gaw n law n htam ai masha ni hte rau Egutu mung de yu wa nna, galu kaba ai hte atsam rawng nna law htam ai amyu tai wa lu hkra, dai yang e shingbyi nga ai.

Egutu masha ni chyawm gaw anhte hpe n htum nni zingri zingrat ai hte, aja  awa yam sha kau mi ai. Shaloi anhte a ji wa ni a Madu Karai Kasang hpang de anhte hpyi jahtau saga ai rai nna, Madu anhte a nsen madat mara ya ai hte, anhte hkrum ai bungli lit hte nni nkri hpe yu ya mi ai.

Dai rai nna, Madu gaw n-gun ja ai lata hte ladawn dat ai lahpum, hkrithpa lam law law hte lamik kumla mauhpa amu madun nna,  Egutu mung na anhte hpe shaw woi wa nhtawm, nga chyu hte lagat ntsin lwi ai ndai mungdan hta woi shawn tawn da mani ai.

Ya, Madu e, Nang ngai hpe jaw ai yi hkauna a shawng myin ai nsi naisi ngai la sa ring ngai, ngu nna na a Madu Karai Kasang a man e nawng let, Shi hpe dingnyawm nawku na rai ndai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Roma 10: 8-13

Ya hti na gaw, Roma masha ni hpang de San Pawlu shagun dat ai Laika hta na rai nga ai.

Hpu nau ni e, Chyum Laika hpa tsun a ta ? ‘Dai mungga gaw nang hte htep rai nga ai;  na a n-gup hte kraw lawang hta e rawng nga ai,’-dai gaw anhte hkaw tsun dan ai makam masham rai nga ai. Shingrai, ‘Yesu gaw Madu rai nga ai,’ nga nna na a n-gup ga hte hkap hta la nna, Karai Kasang si mat ai ni kaw na Shi hpe hkrung sharawt la ai hpe, na a myit masin hta kam sham yang gaw, nang hkye hkrang la ai hkrum na rin dai. Kaning rai nme law, myit masin mahkra hte kam sham yang gaw, ding hpring ai lu la na ra ai; n-gup ga hte dai makam masham hpe hkap hta la yang gaw hkye hkrang la ai hkrum na ra ai.

Chyum Laika gaw Shi hpe kam sham ai ni yawng mayawng hte gaw kaya kahpa n hkrum na ra ai, nga nna tsun ai shaloi, Yuda ni hte Greka masha ni hpe n ginhka nga ai: dai Madu gaw yawng mayawng a ntsa na Madu langai sha rai nga ai; Shi hpe shaga ai ni yawng mayawng hpe garum na matu, Shi chyeju sutgan hte hpring nga ai. Shingrai, Madu a mying ningsang hpe shaga ai masha kadai mung hkye hkrang la ai kaw du lu na ra ai.Ya hti ai gaw, Karai Kasang a mungga rai nga ai.

KABU GARA SHIGA

LUKA 4: 1-13.

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Yesu gaw Chyoi Pra ai Wenyi hte hpring let, Yawdan hka nna bai wa yang, dai Wenyi e nam mali de nhtoi mali shi ya tup woi hkawm wu ai rai nna, nat e gunglau ai hkrum wu ai. Dai nhtoi mahkra a laman e Shi hpa mung n sha ai rai nna, jahtum ai de kaw si wu ai.

Dai rai nna Nat gaw, Nang Karai Kasang a Kasha rai yang gaw, ndai nlung hpe muk tai u ga tsun u, ngu nna Shi hpe tsun wu ai. Yesu htan let, Masha gaw muk hte sha hkrung nga lu na n rai, nga nna ka da nga ai, ngu wu ai.

Bai, Nat gaw Shi hpe tsaw ai shara de woi lung nna, mungkan ga na mungdan nlang hpe myi grip mi hta madun dan nna, Ndai ahkang aya mahkra hte, dai mungdan ni a hpung  shingkang hpe ngai nang hpe jaw na de ai: dai gaw ngai hpe ap ya ni ai rai nna, ngai jaw mayu ai wa kadai hpe mung jaw lu nngai. Dai re ai majaw, nye a man e nang nawku yang gaw, ndai yawng mayawng na a tai na ra ai, ngu nna Shi hpe tsun wu ai. Shaloi Yesu gaw, Dai Madu na a Karai Kasang hpe nang nawku lu na rai nna, Shi hpe hkrai daw jau lu na ndai, nga nna ka da nga ai, ngu nna htan wu ai.

Bai, Nat gaw Yerusalem mare de Shi hpe woi sa nna, Nawku Htingnu a nchyun e shadun tawn nhtawm, Nang Karai Kasang a Kasha rai yang gaw, Na a hkum hpe nang de nna le ra de jahkrat dat u; kaning rai nme law, Nang hpe bau sin na, Na a matu Shi a lamu kasa ni hpe Shi hkang da nu ai; Bai, Nlung hta Na a lagaw n ahtu u ga, shanhte a lata hta Nang hpe pawn la na mara ai, nga nna ka da nga ai, ngu wu ai. Yesu gaw, Dai Madu na a Karai Kasang hpe nang chyam yu lu na n rai, nga nna rawng ai, ngu nna htan wu ai.

Nat gaw agung alau lam mahkra shatup ngut jang, bai sa ang ai aten du hkra Shi kaw na pru wa ai.

Ya hti ai gaw, Madu a Kabu Gara Shiga rai nga ai.

PRANWAN LADAW LABAN (5) MUNGGA

Karai Kasang a mau hpa lamik kumla anhte a prat hta byin pru wa na matu gaw anhte shinggyim masha a myit hkrum ai lam lawm ra na re. Kasa Petru gaw shana ting nga hkan ai rai tim nlu nna myit daw hten taw nga ai aten hta Madu Yesu hpe mu hkrum ai re. Madu Yesu gaw Patru hpe “sung ai de sit nna singgawn hpe jahkrat u” ngu ai hte maren hkan galaw nna mau hpa lamik kumla byin pru wa ai re.

Madu Yesu gaw Petru a shang lawm ai lam nnga ai sha nga law law hpe lamik kumla kaba hku nna jaw ya mai ai rai tim mung n-galaw ai sha Petru shi hkum nan sung ai de sit sa nna nga hkan na matu shawng saw shaga galaw sha-ngun ai hpang she nga law law hpe lu hkan la sai re.

Anhte a asak aprat hta grau nna myit daw hten ai ahkying aten hta lamik kumla kaba byin pru lu na matu gaw tinang myit shatawng shada ai, chye na lu ai lam hpe tawn da nna Karai Kasang hpe kam sham ai hte Shi Madu matsun madun ai hpe hkan shatup lu na matu ahkyak nga ai. 

Kam sham ai myit kaba hte Karai Kasang matsun madun ai hpe hkan shatup galaw sa ai a marang e anhte a asak aprat hta mauhpa chyeju sut gan ni hpe Karai Kasang kaw nna hkam la lu u ga. 

KARAI KASANG HPE HPANG GARA AI NI TAI NGA GA

‘Nga’ law law hpe rim la lu ai lamik kumla hpe Madu Yesu hpa majaw galaw dan sai kun? Ndai lamik kumla a majaw, Madu Yesu kaw katut bang sa wa ai shawa masha ni hta lama ma byin na sai. Shanhte gaw Karai Kasang hpe hpang gara nga ai hte Shi a mungga hpe mung madat la mayu nga ai. Ndai mabyin hpe mahta nna, Madu Yesu gaw sape ni hpe ahkyak ai lam sharin ya mayu nga ai. Simon Petru mung shana tup grai shakut let hpa nlu la sai rai tim, Madu Yesu hte shawa masha ni hpe yu let, Madu a Mungga hpe madat la sai. Na a mungga hte maren, ngai singgawn jahkrat na nngai. Nang mung Simon Petru zawn rai, hkrat sum ai, jam jau ai ten hta, Madu a mungga hpe hkap la madat na myit nga ai kun?

  

Ndai mabyin masa hpe yu la nna, Karai Kasang gaw Shi a hpung shingkang a matu kaning rai bungli galaw ai, ngu ai ahkyak ai tengman ai lam hpe chye la lu sai. Anhte hkum nan galaw lu ai hta grau kaba ai lam hpe Karai Kasang myit mada da nu ai. Karai Kasang a mungga hpe madat lu nna hkan galaw ai marang e, anhte dang di lu ai hta grau law la ai magam hpe shangut shakre la lu ai.

“Madu Yesu hta n chye na lu na daram anhte hpe tsawra ai lam nga nna, Wenyi hkye hkrang la na lam hta anhte hpe mung saw shaga nga ai. Anhte n lawm ai sha, Madu hpa mung n-galaw nga ai. Kaga masha ni a Wenyi hpe hkye hkrang la na matu, mungkan ting hpe hpan da ai Madu gaw, matsan mayan, kaji kadun la ai wenyi akyu hpyi nsen hpe ala nga ai. {Lisieux na San Therese}. 

Karai Kasang a mungga hpe htawn shana ai shaloi, Shi a Mungdan lam shaleng dan nna Shi a Atsam pru wa sai. Karai Kasang a mungga hpe shinggyim masha ni kam sham ai hte madat mara ai shaloi, shanhte gaw Hkristu hta ‘ningnan hpan da ai’ hkrum sai. Karai Kasang gaw nang/ngai zawn re ai yu maya shinggyim masha ni hpe lata la let Shi a kasa shatai nhtawm, anhte a shani shagu na amu bungli hta jai lang let masha kaga ni hpe Shi a mungdan de shaga la shangun sai.

Dai ni, Madu Yesu, ‘masha hpe hkan hkwi na masha’ tai na anhte hpe saw shaga nga ai. Shi Madu a ninghtoi anhte hta htoi kabrim na matu ahkang jaw ra na re. Kabu gara shiga a kabu pyaw hpa lam hpe anhte nga sa, tsun shaga ai hta Hkristu a ninghtoi hpe masha kaga ni mu lu na matu Karai Kasang ra sharawng nga ai. ‘anhte hpe Hkristu hta tut nawng e padang manau hta n law shangun nna, shi a chye chyang ai manam pyaw bat anhte a lata hte shara shagu hkan e shapraw shadan ai Karai Kasang gaw, a nga u ga law: kaning rai n me law, anhte gaw hkyehkrang la hkrum ai ni hta mung, sum mat hkrum ai ni hta mung, Karai Kasang a man e Hkristu hta ngwi pyaw bai rai nga ga ai” (2kor 2:14-15).

Kabu gara shiga a kabu pyaw ai lam hpe na a makau mayang e nga ai ni hpe sakse hkam nga ai kun? Madu Yesu hpe, htingbu ni, magam gun manang ni, jinghku jingyu ni, chye chyang tsawra wa lu u ga, shanhte a matu nang akyu hpyi ya nga ai kun?

Madu Yesu e, Nang hpe n chye ai ni, na a hpang n hkan nang ai ni a matu, ngai a salum hpe matsan dum tsawra myit hta jahpring ya rit; ngai a kun dinghku, manaw manang ni, hte magam gun manaw manang ni a matu, Nang Madu a hkye hkrang la lam a sakse kaja ngai tai wa lu u ga law, AMEN!!!

PRANWAN LADAW LABAN (5) NA CHYUM LAIKA

7^th February, 2016

CHYUM MUNGGA DAW 1

ESAIA 6:1-8.

‘Ngai nang nga ai law; ngai hpe shangun dat rit.’

Ya hti na gaw, myihtoi Esaia a Laika hta na rai nga ai.

Hkawhkam Uzziah si ai shaning hta, Madu gaw galu kaba nna tsaw htum ai tingnyang hta dung nga ai hpe ngai mu nngai; Shi lawai ai hpun nba Nawku Htingnu ting hpring nga ai. Shi a ntsa e Serahpin tsap nga ma ai: langai hte langai singkaw kru kru tu nga ma ai. Langai wa mi hpe, ‘Zawnawng zawwa up ai Madu gaw, San Pra, San Pra, San Pra rai nga ai. Ginding aga ting Shi a hpung shingkang hte hpring nga ai law.’ nga nna tsun ma ai. Shing nga tsun jahtau ai wa a nsen majaw chyinghka hkinbawng ni  ashum awam nga nna, nta ting wan hkut hte hpring nga ai. 

Dai rai nna ngai gaw, ‘Ngai wa tsinyam hkrum lu nngai; ngai htum mat ni ai; ngai n san n seng ai nga nga nngai; rai ti mung, zawnawng zawwa up ai Madu dai Hkawhkam wa hpe, nye myi hte nan mu lu se hka’. ngu nna tsun nngai.

Shaloi, Serahpim langai mi gaw tawn kungri ntsa na, lakap hte matep la ai wan n-ga, shi a lata hte lang let ngai hpang de pyen sa wa ai. Dai wa nye a n-gup hpe ahtawk let, ‘Yu u, dai gaw na a nten hpe hkra sai; Na a mara hpe yeng seng kau sai; Nang shut hpyit ai hpe mung raw dat kau nu ai.’ nga ai.

Bai, ‘Ngai kadai hpe shangun dat na i? Anhte a matu kadai wa sana i? nga nna Madu san ai nsen hpe ngai na nngai. Dai rai nna, ngai gaw, ‘Ngai nang e nga ai law, ngai hpe shangun dat rit.’ ngu nna htan we ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 15: 1-11.

‘Shanhte hkaw dan ai mungga hpe ngai mung hkaw dan nga ai; dai hpe nan nanhte kam sham manit dai.’

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Ngai nanhte hpe hkaw tsun dan nna nanhte mung hkam la sai hte, naw hkan nang yu ai, Kabu Gara Shiga a lam hpe, nanhte naw myit dum la na matu, ngai bai shapraw shadan de ai. Ngai nanhte hpe tsun dan yu ai mungga hpe, nanhte manat nga yang gaw, de a marang e hkye hkrang la ai hkrum lu na myit dai; dai hku n rai yang gaw nanhte a makam masham li la rai nga ai.

Ngai hkam la sai grau ahkyak ai lam hpe, ngai shawng nnan e nanhte hpe ap ya sade ai: dai gaw, chyum laika ni tsun ai hte maren, Hkristu gaw anhte a shut hpyit mara a matu si hkam sai; lup makoi ai shi hkrum nhtawm masum ya nhtoi hta e, bai hkrung rawt wa sai. Shi gaw Kehpa kaw dan pru wa ai; dai hpang kasa shi lahkawng kaw dan pru mu ai; dai hpang lang lata sha, hpu nau manga tsa jan Shi hpe mu dat ma ai: Shanhte hta na malawng maga ya du hkra nga shajang ma ai; nkau mi chyawm gaw yup pyaw mat masai. Dai hpang Yaku kaw mung, kasa ni yawng kaw mung, Shi dan pru mu ai. Hpang jahtum e, ngai nhtoi n gu ai ma zawn re ai wa kaw Shi dan pru ni ai.

Kaning rai nme law, kasa ni hta kaji htum ai wa ngai rai nga nngai; Karai Kasang a Nawku Hpung hpe ngai zingri zingrat di kau sai majaw, kasa ngu na pyi ngai n ging n dan nngai. Rai ti mung, Karai Kasang a 

chyeju majaw, ngai ndai hku byin lu nngai rai nga ai; Shi ngai hpe madun dan ai chyeju mung, ngai hta e kaman lila n rai mat ni ai. Shanhte yawng hta ngai grau nna bungli gunhpai nngai; dai gaw ngai n rai, ngai  hte rau a nga nga ai Karai Kasang a chyeju sha rai nga ai; rai ti mung, ahkyak ai lam gaw, shanhte hkaw dan ai mungga hpe, ngai mung hkaw dan nga ai; dai hpe nan nanhte kam sham manit dai.

Ya hti ai gaw Karai Kasang a mungga rai nga ai.

KABU GARA SHIGA

LUKA 5: 1-11

‘Shanhte arai mahkra hpe kau da nna, Shi kaw hkan nang ma ai.’

Ya hti na gaw, Luka a Laika hta na Kabu Gara Shiga rai nga ai.

Dai aten hta e, masha wunawng wuwa Karai Kasang a mungga madat la na matu, Yesu kaw ginjup sa wa ma yang, Genesaret nawng makau e Shi tsap nga ai rai nna, hka hkin gau de nna loi mi sit sa wa na matu shi hpe hpyi wu ai rai nna, dai li hta dung let, dai kaw nna shawa masha ni hpe sharin shaga wu ai.

Shi ga tsun ngut jang, hka sung ai de sit sa nna, nga magawn la na matu, sumgawn ni hpe jahkrat dat mu, ngu nna Simun hpe tsun ai. Simun mahtang gaw, Madu e, mana tup anhte shakut ti mung, hpa n lu ga ai; rai ti mung, Na a ga a majaw sumgawn jahkrat na we ai, ngu nna htan wu ai. Shing rai jahkrat jang, shanhte gaw nga unawng kaba magawn hkrup lu ma ai; shanhte a sumgawn ni je wa malu ai rai nna, li kaga hta nga ai manang ni hpe sa garum na matu, dingsi shaga la ma ai. Shanhte sa garum nna,  li lahkawng yan lup wa  mangang hkra, bang jahpring mu ai.

Simun Petru gaw dai hpe mu jang, Yesu a lagaw nhpang e hput di nna, Madu e, ngai hte hka mat wa su; ngai gaw mara kap ai masha rai nga nngai, ngu wu ai. Kaning rai nme law, shing rai nga magawn la lu ai majaw, shi mung, mau mahka nga ma ai; Simun a manang yan, Zebedi a kasha Yaku hte Yawhan mung, dai zawn mau mat ma ai.

Shaloi, Yesu gaw Simun hpe, Hkum hkrit et; ya kaw nna masha hpe hkan hkwi na rin dai, ngu wu ai. Shanhte a li yan hpe danam e sek da nhtawm, arai mahkra kau da nna, Shi kaw hkan nang ma ai.

Ya hti ai gaw Madu a Kabu Gara Shiga rai nga ai.

PRANWAN LADAW LABAN (4) MUNGGA

Shinggyim masha gaw wuhpung wuhpawng hte nga sa ra ai re majaw anhte shada da matu mung lit la ra nga ai. Dai rai yang tinang a htingbu wa mai kaja na matu garum ya na gaw tinang a lit rai nga ai. Grau nna manang wa shut shai wa ai aten ahkying hta shadum jahprang ya ra ai.

Karai Kasang a dat kasa ni rai nga ai myi htoi ni gaw tengman ai lam hpe hkan shatup nna, manang ni hpe mung tsun shadum ai lam ni galaw lai wa sai. Dai re ai majaw manang ni a ndawng nyawt ai hpe mung mu hkrum lai mat wa sai. Madu Yesu Hkristu a asak aprat hta Kawa Karai Kasang a ra sharawng ai hpe shi hkum nan hkan shatup ai sha n-ga manang ni hpe mung tsun shadum lai wa sai. 

Dai rai yang manang wa mai kaja na matu tinang lit la ra ai lam hta tsun shadum ra ai lam hpe grai n-galaw shi yang tinang shawng hkan shatup ra na re. Myi htoi ni gaw tengman ai lam hpe tsun shaga ai hte maren dai tengman ai lam hta hkawm sa ai ni rai nga ai. Tinang a ra rawng ai lam hpe tinang shawng dum shai nna, shading sharai let manang wa a matu tengman ai lam hpe shadum jahprang ya ai Kashin Kamun sakramentu hta hkam la sai Myi Htoi aya hpe tatut hkan shatup lu u ga.

YESU A LAMIK KUMLA A MAJAW KAMSHAM AI NI TAI NGA GA AI KUN?

Nanhte a mare kahtawng na nawku daw jau ai lamang hta ndai shiga ni hpe Madu Yesu tsun ai shaloi, nang kaning rai bai htang na rai ta? 

Laban n’htoi, Tara jawng hta Madu Yesu shang let Chyum Laika hti, mungga hkaw ai shaloi, Shi a mare buga masha ni gaw grai sadi maja let madat nga ma ai. Shanhte ni gaw kaga buga kahtawng hkan e Yesu lamik kumla galaw ai hpe na yu sai majaw rai nga ai. Shi a kahtawng hta kaning re ai lamik kumla Shi galaw na rai kun? Kadai myihtoi ni mung tinang a buga hta arawng aya n lu ma ai, nga shanhte hpe tsun masai. Israela; ‘lata la hkrum ai amyu masha’ ni hta, tara maigan masha ni mahtang grau kam sham ai lam nga ai majaw, shanhte hpe masin pawt wu ai. Tara maigan masha ni hpe gaw ‘ngarai wan shagrung ya na sau’ nga nna Israela ni hkap la ma ai. ‘shinggan masha’ ni hpe shagrau ai majaw, Madu Yesu hpe grau pawt sin dawng ma ai. Shanhte mahtang, Karai Kasang a tsawra matsan dum ai hpe n mu ai hte amyu masha yawng hpe hkye hkrang la na Karai Kasang a yaw sing lam hpe mung n chye na lu ai. 

“Madu Yesu e, Nang gaw, anhte a myit mada shara hte sharawng awng ai lam rai nga ai."

PRANWAN LADAW LABAN (4) NA CHYUM LAIKA

31^stJanuary, 2016

CHYUM MUNGGA DAW 1

YAREMIA 1:4-5. 17-19.

‘Masha amyu ni a myihtoi tai na, Ngai nang hpe aya dang da ni ai.’

Ya hti na gaw, myihtoi Yeremia a Laika hta na rai nga ai.

Yuda hkawhkam Yoshia a lakhtak e Madu a mungga ngai hpe tsun dan ni ai: Ngai nang hpe nnu a hkritung e garai n shachyaw yang pyi, nang hpe chye nngai: masha amyu ni a myihtoi tai na, ngai nang hpe aya dang da ni ai. Dai re majaw, nang gaw shingkyit kyit nna rawt u; ngai nang hpe hkang da mada, shanhte hpe tsun dan u; shanhte a man e ngai nang hpe n jahkrit shama kau u ga, shanhte hpe hkum hkrit et.

Yu u, mungdan ting a man e mung, Yuda hkawhkam ni, de a du salang ni, de a hkinjawng ni hte mung masha ni a man e mung, Ngai nang hpe dai ni jang, bunghku kum ai mare, hpri shadaw hte magri shakum zawn n-gun shaja na de ai. Shanhte nang hpe hkap gasat ti mung, dang kau lu na n rai; kaning rai nme law nang hpe mawai la na matu, Ngai nang hte rau nga nga nngai, ngu nna Madu nan tsun nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 12:31;13:1-13

‘Kam sham ai, Myit Mada ai, Tsaw ra ai, ngu ai lam masum dinggrin a nga nga na ra ai; rai ti mung dai ni hta na grau htum ai gaw, tsaw ra ai lam rai nga ai.’

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Grau kaja ai chyeju kumhpa ni hpe lu la hkra shakut nga mu. Dai rai nna grau htum ai lam langai mi, ngai nanhte hpe naw madun dan na made ai.

Ngai gaw masha a ga hte lamu kasa ni a ga amyu myu hpe chye tsun ti mung, tsaw ra ai myit n rawng yang gaw, mahku rawng ai bau hte, ngoi gara ai shup sheng ngai tai nga nngai. Ngai myihtoi chye htoi ai hte, mung sung ga sung yawng mayawng hte, hpaji amyu hkum sumhpa chye chyang nga nna, bum ni hpe sit shangun lu hkra makam masham rawng nga ti mung, tsaw ra ai myit n rawng yang gaw, ngai hpa n rai nga nngai. Nye a arai mahkra hpe ngai gam kau nna, nye a hkum hpe pyi nat kau na matu ap kau ya ti mung, tsaw ra ai myit n rawng yang gaw, hpa akyu nga na n rai.

Tsaw ra ai lam gaw, myit galu nga ai; sumnung shingdi nga ai; tsaw ra ai lam gaw manawn masham n nga ai; tinang a hkum hpe shagrau ai ga n tsun ai; gumrawng gumtawng n rawng ai; n sun n ang ai hku n galaw ai; tinang a akyu n tam ai; masin pawt wa ai n rai; mara n tam nga ai; n ding n man ai lam hta n kabu ai sha, teng man ai hte rau kabu gara nga ai. Tsaw ra ai lam gaw, tut nawng e masha a n-gun kya ai hpe magap da nga ai; tut nawng e htingbu wa hpe kam nga ai; tut nawng e shi a lam hpe myit mada nga ai; tut nawng e hkrum ang ai tsinyam hpe hkam sharang nga ai.

Myihtoi htoi ai lam hkoi mat na ra ai; ga amyu myu chye tsun ai lam htum mat na ra ai; chye chyang ai lam mung hkoi mat na ra ai; tsaw ra ai lam chyawm gaw, htum mat chye ai n rai. Kaning rai nme law, daw chyen mi sha chye chyang nga ga ai; daw chyen mi sha myihtoi htoi ga ai; rai ti mung, hkum tsup ai lam du jang n hkum n tsup ai daw chyen hkoi mat na ra ai.

Ngai ma kaji naw rai nga yang, ma ga ngai ga ai hte ma myit rawng nna, ma a myit yu ai hku ngai hkan nga nngai: ya ngai salang wa jang she, ma a lam hpe ngai tawn kau se ai. 

Ya gaw, n dan n leng ai hku jamna shingna hpe sha anhte naw mu nga ga ai; rai ti mung, dai shaloi e, myi man yawng let mu na ra ga ai. Ya gaw daw chyen mi sha ngai chye nngai; dai shaloi e, Karai Kasang ngai hpe chye chyang ai zawn, ngai mung chye na we ai. Ya, kam sham ai, myit mada ai hte, tsaw ra ai ngu ai lam masum dinggrin a nga nga na ra ai; rai ti mung, dai ni hta na grau kaba ai gaw, tsaw ra ai lam rai nga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 4: 21-30

‘Elia yan Elisha hpe zawn, Yesu hpe mung Yuda masha ni hpang de chyu sha shangun dat ai n rai’

Ya hti na gaw, Luka a Laika hta na Kabu Gara Shiga rai nga ai.

Dai aten hta e Yesu gaw, tara jawng hta e ga tsun hpaw nna, Dai ni nan nanhte madat nga yang, ndai ka da ai ga dik wa sai, ngu nna shanhte hpe tsun mu ai. Madat la ai ni yawng hte gaw, Shi a ga hpe ra sharawng nna, Shi a n-gup hta na pru ai chyeju ga a majaw mau nga ma ai. Shanhte gaw, Ndai wa gaw, Yosep a kasha n rai nga a ni? tsun shajang ma ai.

Dai rai nna Shi gaw, Nanhte mahtang, ‘Tsi sara e, tinang hkum dai hpe shamai la u, nga nna ga shagawp hku ngai hpe tsun nhtawm, Anhte na ai hte maren, Kaperna-um mare e shabyin ai amu hpe zawn, Nang na a buga e mung galaw dan u, nga nna ngai hpe tsun na marin dai. Shi gaw, Nanhte hpe ngai teng teng tsun made ga:

Kadai myihtoi rai ti mung tinang a buga e arawng n lu nga ai. Elia a aprat e, masum ning shata kru tup marang n htu ai hte jan ja nna, dai mung ting hkan e nachying hku hku hpang gara rai wa yang, Israela a amyu hta gaida law law nga ma ai: rai ti mung, shanhte hta na langai mi hpang de pyi Elia hpe n shangun dat wu ai; Sidun mung Zarehpa mare na gaida jan langai mi hpang de she shangun dat wu ai.

Myihtoi Eslisha a aprat e mung, Israela amyu hta manggang kap ai masha law law nga ai, rai ti mung, shanhte hta na langai mi pyi san pra wa lu ai n rai; Siria masha Naman ngu ai wa chyu sha san pra wa lu ai, ngu nna shanhte hpe tsun mu ai.

Dai tara jawng na ni yawng hte gaw dai lam na la jang, masin pawt bu ma ai. Shanhte rawt nna, mare shinggan de shi hpe shapraw nhtawm, dai mare de ai bum pungding de woi sa nna, n-gam mahka kaw nna Shi hpe kanawng jahkrat kau na maw ai. Shi chyawm gaw shanhte a ka-ang hku ga pru nna, sa mat wa ai.

Ya hti ai gaw Madu a Kabu Gara Shiga rai nga ai.

PRANWAN LADAW LABAN (3) MUNGGA

Dai ni na kabau gara shiga hta Madu Yesu gaw nawku htingnu kata de shang nna shi galaw sa wa an amu magam lam ni hpe tsun ndau let Shi a amu bungli ni hpe galaw hpang wa sai re. 

Matsan masha ni a matu, htawng rawng ai ni a matu, myi nmu ai ni a matu, dip sha hkrum ai ni a matu Madu Yesu gaw kabu gara shiga byin tai wa sai re. Shi ndau shana ai hte maren shi galaw sa wa ai amu magam ni gaw manang wa a matu mai kaja ai amu bungli rai nga ai.  

Madu Yesu jaw ya ai shaman chyeju ni hpe hkam la lu sai anhte ni gaw Madu Yesu a kabu gara ai shiga hpe matut nna htawn shana na matu lit nga ai rai nga ai. Anhte galaw sa wa ai amu bungli ni hte tsun shaga ai ga ni gaw manang ni a matu kabu gara shiga byin tai wa u ga.

MYIT MADA LAM JAW YA AI JA CHYUM MUNGGA

Karai Kasang a tengman ai hte mai kaja lam a machye machyang hte hpring tup wa lu na matu nang kaning di lu na ta? 

Kabu gara ai shiga laika (4) hte gaw, Madu Yesu Hkristu hta dai tengman ai lam madung hpe madi madun ma ai. Luka a kabu gara ai shiga hta, nnan hpang wa ai shara kaw nan laklai shai ai lam hpe anhte mu lu ga ai. Kasa Luka gaw shi hkum nan maga kaw nna laika ka da sai. ‘Theophilus’; (Karai Kasang a tsawra hkrum ai wa) ngu ai, shi a manang wa hpang de made da nu ai. Shinggyim labau hta laklai shai dik ai mabyin hpe, ngai, nang hpang de ka ya dat nngai, ngu ka da nga ai. Bai nna, ndai mabyin a lam hpe, Madu Yesu hte rau hkum nan nga lai wa nna, shi a Mungga hpe tinang a na hte nan na yu sai ni, lamik kumla hpe myi hte chyaw mu yu sai ni, Shi Madu a si hkam ai hte bai hkrung rawt sai lam hpe sakse tai lu ai ni kaw nna, na la lu ai rai nna n kam shara gaw n nga ai hpe shi chye la ai. ‘Gospel’ ngu ai lachyum gaw; ‘kabu mai ai shiga/ kabu gara shiga’ ngu ai re. 

Dai gaw, Madu Yesu a kabu gara ai shiga rai nna Shi Madu a si hkam ai hte bai hkrung rawt ai lam a marang e lu tawn da ai, ‘Awm dawm ahkang aya’ rai nga ai. Kabu gara ai shiga gaw, dai ni na anhte a matu Karai Kasang a mungga rai nga ai. Dai hpe ta tut hkap la kam sham ai ni a matu, shamai shatsai ya ai, shalawt dat ai, galai shai ya lu ai atsam rawng ai, asak hkrung ai mungga rai nga ai. Karai Kasang a ahkrung nga ai mungga hte na a prat galai shai wa lu na matu nang ra sharawng nga ai kun? Karai Kasang a kasha hpe madat mara na hte Shi Madu a mungga hpe hkap la kam sham na ra nga ai.

Kasa Luka tsun dan ai hta, Madu Yesu gaw, Shi a Sasana amu magam hpe, Shi nga kaba wa ai Galilee buga hta nnan hpang wa ai, nga ai. Tara Jawng hta na Madu Yesu a mungga hpe shawng nnan na la ai nta masha ni hte mare masha ni gaw, mau kajawng ma ai. Tara jawng a ningbaw wa hku nna, laban bat shagu, marai rai hpe Chyum Laika hti let lama ma tsun na saw shaga ai gaw, htung lai rai nga ai. Madu Yesu hti ang ai gaw, myihtoi Esaia laika hta na rai nna, shut hpyit mara hta nga ai ni hpe shalawt la na matu, Hkyela Madu gaw Chyoipra ai Wenyi a marang e du sa wa na lam rai nga ai. Dai hta e, Madu Yesu gaw, dai myihtoi ga gaw shi hta e hpring tup wa na re lam shawa masha ni hpe tsun dat nu ai. Hkyela Madu (snr) mana ai wa chyu sha dai zawn tsun gwi na re. Shawa masha ni myit yu na sha, Shi galaw dat ai nrai, Karai Kasang amyu masha ni hpe jaw da ai Gasadi hpe myit mada shara nnan byin shangun ai lam rai sai. Shawa masha ni Madu Yesu a mungga hpe sharawng awng ai hte hkap la nna, dai ‘Yosep a kasha’ kadai rai na hpe mau nga ma ai. Madu Yesu a magam bungli hta Karai Kasang a shaman chyeju hte Atsam hpe anhte mu lu ga ai. Shi hpe hkap la na jin jin rai nga ai ni a matu, Madu a chyeju hte hpring ai mungga gaw, kabu pyaw ai hte myit mada shara jaw ya nga ai. Karai Kasang a mungga hpe nang hpang gara nga ai kun? 

Madu Yesu gaw anhte hte anhte a hkye hkrang la lam a matu du sa wa ai rai nga ai. Shut hpyit mara a mayam prat; si hkrung si htan, hkum hkrang hte wenyi prat tup hten za mat na kaw nna, hkye sharawt la na matu du sa wa ai rai sai. Anhte myit htum mat ai, hkrit kajawng ai, wenyi hta, hten za ai, myit ru yawn hkyen ai lam ni kaw nna Karai Kasang a atsam chyu sha, anhte hpe hkye hkrang la lu na re. Hkye hkrang la lam a kabu gara shiga gaw, dai ni anhte ni yawng a matu, ‘kabu mai ai shiga’ rai na sai. Kabu gara shiga a kabu pyaw ai lam hte ndut ndang ahkang hpe nang chye nga ai kun?

“Madu Yesu e, Nang gaw, anhte a myit mada shara hte shingran ni yawng hpe hpring tsup ya lu ai wa rai nga ai. Nang Madu a Chyoipra ai Wenyi chyeju a marang e, Tengman ai, Asak hte Awm dawm ahkaw ahkang, Nang anhte hpe jaw ya nit dai. Kabu gara shiga a kabu pyaw ai lam hte ngai hpe jahpring ya nna, Nang hpe tsawra lu na hte Na a mungga hpe hpang gara nga na ngai a salum hpe wan shagrung ya rit law. Amen"