Karai Kasang a mau hpa lamik kumla anhte a prat hta byin pru wa na matu gaw anhte shinggyim masha a myit hkrum ai lam lawm ra na re. Kasa Petru gaw shana ting nga hkan ai rai tim nlu nna myit daw hten taw nga ai aten hta Madu Yesu hpe mu hkrum ai re. Madu Yesu gaw Patru hpe “sung ai de sit nna singgawn hpe jahkrat u” ngu ai hte maren hkan galaw nna mau hpa lamik kumla byin pru wa ai re.
Madu Yesu gaw Petru a shang lawm ai lam nnga ai sha nga law law hpe lamik kumla kaba hku nna jaw ya mai ai rai tim mung n-galaw ai sha Petru shi hkum nan sung ai de sit sa nna nga hkan na matu shawng saw shaga galaw sha-ngun ai hpang she nga law law hpe lu hkan la sai re.
Anhte a asak aprat hta grau nna myit daw hten ai ahkying aten hta lamik kumla kaba byin pru lu na matu gaw tinang myit shatawng shada ai, chye na lu ai lam hpe tawn da nna Karai Kasang hpe kam sham ai hte Shi Madu matsun madun ai hpe hkan shatup lu na matu ahkyak nga ai.
Kam sham ai myit kaba hte Karai Kasang matsun madun ai hpe hkan shatup galaw sa ai a marang e anhte a asak aprat hta mauhpa chyeju sut gan ni hpe Karai Kasang kaw nna hkam la lu u ga.
No comments:
Post a Comment