2021:YESU A SALUM NINGSANG POI SHANI NA MUNGGA

Yam tawt ai, gam maka htai na matu u-baw yu ai zawn, wa-sin a asam hpe yu ai ni mung nga ma ai. Sin tsawm ai, sin hta dun ai tsawra myit, masin kaja ai, masin pawt ai, masin ja ai,… ngu, tsun lang ga ai. Anhte Wunpawng hpan gaw salum hte n shadawn ai, sin hte mahtang shadawn tsun lang ga ai. Dai majaw, kup kup tsun mayu jang Yesu a masin salum, ngu yang tup hkrak rai na re.

Hka-shi Hka-nu langai byin hpang ai shara tam yang, hka hku maga lung tam ra ai; jahtum e hka hpaw ai, lwi hkrat hpang ai shara hpe mu na rai nga ai. Dai hte maren, Tsawra myit a nhpang gawn jang (masin) salum kaw du ai rai nga ai. Anhte shagrau ai Yesu a Salum ningsan Poi, ngu tim, kaja wa gaw Yesu a n htum n wai, n hkyet lu ai tsawra myit hpe myit dum shagrau ai mahtang she rai nga ai.

Hosea Laika gaw Israel amyu sha ni a ntsa Karai a tsawra myit kade kaba ai lam, tsawm dik ai hku ka da ai. Karai a maga kade tsawra ai rai tim, dai hkringsan da hkrum ai Israel gaw chyeju n dum chye ai, shut hpyit mara hta shanang nna nga lai wa ai. Ga-shaka a tara matsun ni hpe tawt ai majaw, Israel amyu masha ni hpe jahten agrawp kau ging ai; SodomGomorra hte arau wan nat kau hkrum ai Adma hte Zibo-im hpe shingran mu nna Israel hpe n jahten na ni ai, nga_ ..Ngai Karai Kasang she rai, masha n rai n ngai, nga ai. Shinggyim masha ni a tsawra myit mahtang shadawn shadang, rit masat nga ai. Karai Kasang a tsawra matsan dum myit mahtang, sawn shen rit masat n nga ai lam hpe tsun ai.

Hosea a Laika hta chyeju n dum chye ai shinggyim masha ni a lam hpe adan sha chye la lu ga ai. Kasa Yawhan mung, chyeju n dum chye ai, gumrawng gumtawng ai shinggyim masha, dai tsawra myit a ningpawt ninghpang, Yesu a salum hpe galun waw kau ai lam hta hkrang shapraw dan ai. Sai hte hka pru wa ai lam, hkye hkrang la ai chyeju, Sakramentu chyeju kumhpa ni lwi hkrat ai nhpang re ai lam tsun ai. Shinggyim masha ni n hkru ai daram, Madu Yesu a tsawra myit gaw galun waw ai hpe hkam la ai, si hkam ai du hkra masha ni hpe tsawra ai.

Dai majaw, Ehpesu Laika hta San Pawlu sharin matsun ai hta, Hkristu Yesu a tsawra myit hpe sung sung chye na hkap la nna, tsawra myit hta gaw sharawt ai asak a prat sha manu dan ai lam, Yesu a Salum gaw ja maw, lungseng maw hta grau reng ai sutgan maw re ai lam tsun ai. 

Ja lungseng htu ai zawn, tsawra myit hte hpring ai sutgan maw, Yesu a tsawra myit hpe chye chyang lu na matu sung de, dam de, tsaw de, htu akrawk alai yu nna sha chye la lu na rai nga ai. Hkaja yu, hkam sha yu, rai nna sha chye lu na rai nga ai. Prat tup sharin hkaja tim sharin la n ma ai. Dai Chyoi Pra dik ai Salum kaw na lwi pru ai tsawra myit hpe ja lu nna asak krung ra ai lam hpe sharin ya ai.