2020:CHYOIPRA AI WENYI YU HKRAT WA AI POI SHANI NA MUNGGA

Anhte a sakhkrung lam hta myitru tsangpu ai, hkrit ai myit ni hte sha sakhkrung hkawm sa nga ga ai. Hpa mi galaw na raitim, rai n-galaw shi ai kaw na, hkrat sum na, n awngdang mat na lam ni hpe shawng myit nna tsang chye nga ga ai.

Dai ni na Kasa laika hta Madu Yesu a Kasa ni gaw, Madu Yesu tawn kau da ai majaw myitru tsangpu ai, Yesu hpe zawn masha ni rim adup zingri sat kau na hpe hkrit ai majaw nta kata hpawng chyawm nga ai. Pru hkawm na hkrit tsang ai. Madu Yesu a lam hpe hkaw tsun sakse hkam na hpe hkrit ai. Hpa mung n-galaw gwi ma ai. Dai zawn hkrit tsang nna hpawng chyawm nga ai ten, Chyoipra ai Wenyi shanhte a ntsa wan shinglet zawn yu hkrat wa ai, Chyoipra ai Wenyi shanhte hpe jahtoi ya ai, n-gun shajat ya ai a marang e, hkrit tsang ai lam ni yawng shanhte kaw nna hkoi mat nna, Madu Yesu a Kabu Gara Shiga hpe nhkrit ntsang hkaw tsun sakse hkam mat wa ma ai. Sha n-ga, ga hpan amyu myu hpe mung tsun shaga wa ai lam anhte na la saga ai.

Yawhan a Kabu Gara Shiga hta mung, Yesu gaw hkrit tsang nga ai Shi a sape ni a ntsa Chyoipra ai Wenyi hpe ga-wut bang ya ai a majaw, Shi a sape ni hta hkrit ai myit ni hkoi mat nna, nden ja ai atsam marai ni hte hpring wa nna, shanhte galaw ra ai sasana magam lam ni hpe hkrit tsang ai lam nnga, galaw shakut sa wa ma ai.

Anhte a sakhkrung hkawm sa lam hta na, hkrit tsang ai myit ni, n-gwi ai lam ni hkoi mat na matu Madu Yesu hte rau sakhkrung hkawm sa ra nga ga ai. Chyoipra ai Wenyi n-gun shaja ya ai rai yang, anhte a prat hta na, hkrit ai myit, tsang ai myit, n-gwi ai myit ni koi mat na rai nga ai.

Dai majaw, tsara ai Nu Wa Hpunau ni e anhte a sakhkrung hkawm sa lam hta, galaw sa wa na magam bungli ni hpe hkrit tsang ai lam nnga, myitsu myit tsang ai lam nnga galaw sa wa u na matu gaw Madu Yesu hta machyu jung nna, Chyoipra ai Wenyi hpe kam hpa nna garum hpyi la ai rai yang teng sha awngdang ai lam ni hpe hkam la lu na rai nga ai law.