2020:CHYOIPRA AI WENYI YU HKRAT WA AI POI SHANI NA MUNGGA

2020:CHYOIPRA AI WENYI YU HKRAT WA AI POI SHANI NA CHYUM LAIKA

Chyum Mungga Daw Langai

Kasa Laika 2:1-11

Ya Pentekoti shani du jang, shanhte nlang shara sha hta rau hpawng nga ma ai. Shaloi lamu de nna nbung laru kaba wa ai zawn, akajawng sha kadu pru nna, shanhte rawng nga ai nta ting hpring chyat rai wa ai. Bra karan ai wan shinglet zawn re ai mung, shanhte kaw danpru nna, langai hte langai a ntsa e jung nga ai. Shanhte nlang hte mung, Chyoi pra ai Wenyi hpring shajang nna, Wenyi e shadut mu ai hte maren, ga amyu kaga ga hku shaga wa ma ai. Dai shaloi e sumsing lamu a npu e nga ai masha amyu shagu hta na, tara hkungga ai Yuda masha, Yerusalem mare e nga nga ma ai. Dai kadu ai nsen na ma yang, masha wunawng hpawng sa nna, langai hte langai tinang nang a buga ga hku chye na la ma ai majaw, shanhte mak mat ai rai nna, mau mahka let, Yu mu, Ya shaga nga ai ndai ni yawng Galile masha hkrai n rai ma ni? Dai rai yang gaw, anhte langai hte langai tinang nang a buga ga hku na la lu ai gaw, kaning re ai i? Parhti, Medi, Elam mung na ni hte Mesopotamia mung e nga nga ai ni, Yuda hte Kapadokia mung, Pontu hte Asi, Hprugi hte Pamhpuli, Egutu hte Kureni ginwang hkan e nga ai Lebu mung na ni, Roma nna wa nga ai ni, ngu ai, Yuda masha hte proselutu, Kreti hte Arabi mung na ni, anhte gaw, Karai Kasang a mauhpa amu magam lam shanhte hkai dan ai ga hpe, tinang a buga ga hku na la lu nga ga hka, nga nna myit kahpra rai tsun ma ai. 

Chyum Mungga Daw Lahkawng

1 Korinthu 12:3-7, 12-13

Dai rai nna, Karai Kasang a Wenyi hte tsun ai wa kadai raitimung, Yesu gaw ga sangam hkrum sha u ga, nga nna n tsun lu ai hte, Chyoi pra ai Wenyi e sha n rai yang gaw, Yesu gaw Madu rai nga ai, kadai mung n tsun lu ai gaw, ngai nanhte hpe shachye shachyang made ai. Ya, chyeju kumhpa amyu myu nga timung, dai Wenyi gaw langai sha rai nga ai; gunhpai na bungli lam amyu myu nga nna, dai Madu gaw langai sha rai nga ai; magam atsam shapraw na lam amyu myu nga timung, yawng mayawng hta e arai yawng mayawng hpe shabyin ai Karai Kasang gaw langai sha rai nga ai. Shingrai Chyeju akyu pru u ga she, langai hte langai hpe Wenyi a shapraw shadan ai lam jaw shajang manu ai. 

Dai hta kaga, dai hkum hkrang gaw langai sha rai nga nna, daw shan law law lu ai hte, dai hkum hkrang a daw shan ni yawng hte gaw law law rai nga timung, hkum hkrang langai sha tai nga ai hte maren, Hkristu mung dai zawn rai nga ai. Kaning rai nme law anhte yawng mayawng, Yuda ni hte Heleni ni raitimung, mayam ni hte shanglawt ni raitimung, hkum hkrang langai sha tai na matu, Wenyi langai sha hta e baptisma hkam saga ai rai nna, nlang hte gaw Wenyi langai hta sha jawm dagrawng saga ai. 

Kabu Gara Shiga

Yawhan 20:19-23

Dai re ai majaw, dai nhtoi bat shawng shani na nsin rim e, Yuda masha ni hpe hkrit ma ai majaw, sape ni nga ai nta e chyinghka ni la kau ma sayang, Yesu sa du nna shanhte hpe a ka-ang e tsap let, Nanhte ngai pyaw nga myit ga, ngu nna shanhte hpe tsun wu ai. Shing nga ngut jang, shi shanhte hpe shi a lata hte garep madun wu ai. Sape ni mung dai Madu hpe mu lu yang, kabu gara nga ma ai. Bai Yesu gaw, Nanhte ngwi pyaw nga myit ga; nye Wa ngai hpe shangun dat nngai hte maren, ngai mung nanhte hpe shangun dat made ai, ngu nna shanhte hpe tsun mu ai. Shing nga nhtawm, sape ni a ntsa e shi kawut nna, Chyoi pra ai Wenyi hkap la mu: gade a yubak mara hpe raitimung, nanhte raw dat myit yang gaw, raw mat na ra ai; gade a yubak mara hpe raitimung, nanhte shagun da myit yang gaw, mara nga na ra ai, ngu nna shanhte hpe tsun wu ai. 

2020:YESU LAMU DE LUNG WA AI POI SHANI NA MUNGGA

Kasa Pawlu tsun ai, “Nanhte shaga la hkrum ai lam a myit mada lu ai lam_ Nawku Hpung masha ni hkam la lu na sutli kumhtaw, Shi a htoi kabrim ai hpung shingkang hte, kamsham ai ni hta rawng ai shadawn n dang n nga ai atsam marai”, ndai lam hpe asan rai chye lu mi ga, Kawa Karai Kasang nanhte a myit masin hpe hpaji jaw ya u ga”, nga, tsun ai. Masha kau mi a matu asak hkrung ai lam gaw ndai dinghta ga a matu chyu sha, “Sumsing mungdan” ngu ai hpe n sawn shalawm sawng. Kau mi a matu asak hkrung ai lam gaw, “Sumsing mungdan” mahtang ahkyak dik htum rai nna ndai dinghta ga hta asak hkrung ai lam ahkyak n rai. Si mat ai hpang hkam la lu na shabrai kumhpa sha ahkyak ai, ngu nna kaga masha ni a nga-mu nga-mai lam hpe n mada yu ai, tinang lawt daw sha tam ai ni nga na ma ai. 

Kaga baw hpan ni mung naw nga ai. Shanhte a matu, tsawra kamsham myit hta, “Sumsing mungdan” ngu ai, ndai dinghta ga kaw nan hpang nga sai ngu hkam la ma ai. Dai baw hpan masum hta tinang gaw gara baw hpan kaw lawm ai kun, myit yu mai ai. 

Karai Kasang a mungdan ngu ai moi prat, ya ndai prat, hpang na prat, galoi mung a’nga nga ai. Hpa majaw Yesu gaw Karai Kasang a mungdan du ra ai, Karai a mungdan gawgap na matu du sa ai, ngu ai rai ta? Myit yu mai ai ga-san rai nga ai. Loi dik ai hku htan ya ga, nga jang, Karai a mungdan hte ndai dinghta ga e lang ai mungdan, lachyum n bung hkat ai lam law nga ai. Karai a mungdan e nga-mu nga-mai ai zawn, ndai dinghta ga e mung nga-mu nga-mai na Karai Kasang ra sharawng ai. 

Kasa ni gaw Hkristu shangun ai, htet matsun ai hte maren, mungkan a jahtum du hkra Karai a mungdan a lam hkaw tsun dan na, Yesu a sape ni shatai na lit lu ma ai. Shinggyim masha ni a man e shanhte gaw arawng aya lu ai ni n rai, mungkan hpaji alak rai chye ai ni n rai, sasana galaw na gumhpraw lu ai ni n rai; rai tim, shanhte gaw matsaw tsang kaw na lu la ai myit masin nyan hpaji atsam lu ma ai. Dai gaw, Chyoi Pra Wenyi kaw na atsam marai ni rai nga ai. 

Dam lada la ai, kaba la ai lit, Madu Yesu gaw Nawku Hpung hpe ap ya da ai; shanhte hpe n kau da ai; mungkan htum ai shani du hkra Shi shanhte hte a’nga nga na lam ga-sadi jaw da ai. Matsaw tsang kaw na chyeju kumhpa ni hpe hkam la lu ai ni gaw kamsham ai ni sha re. Madu Yesu gaw ja gumhpraw arang, hpungtang hpaji arang hte kaga hpaji arang ni n jaw da ai; rai tim mungkan ting hpe madu la lu na lam lit shatsam da ai. Kasa ni hpe jaw da ai lit hte shanhte hpe jaw da ai atsam marai ni, anhte yawng, kamsham ai ni yawng hpe mung jaw da ai. Karai Kasang a mungdan gaw ya, ngu ai, ndai dinghta ga kaw nna nan hpang ai. Masha hkum shan hte nawng, Yesu gaw sumsing mung¬dan de du shang nna hpung shingkan hpe hkam la lu ai zawn, shi hpe kamsham ai ni mung, Shi du nga ai shara de hkan du na lam teng sha myit mada lu ga ai. 

Sumru yu mai ai lam: 

- Hkristan makam masham lu la ai majaw, matsaw tsang kaw na jaw ya ai myit masin wenyi a chyeju kumhpa, atsam marai ni a majaw Karai hpe chyeju dum shakawng ga ai kun? 

- Dinghta e pyaw-hpa, kabu-hpa, yawn-hpa, awng dang ai aten, hkrat sum ai aten,.. ndai mahkrum madup ni hpe gara hku hkap la ga ai kun? 

- Sasana majen je ai amu hta hkum nan gara hku shang lawm madi shadaw lawm nga ga ai kun? 

2020:YESU LAMU DE LUNG WA AI POI SHANI NA CHYUM LAIKA

YESU LAMU DE LUNG WA AI POI

May 24, 2020 

CHYUM MUNGGA DAW 1

Kasa 1:1-11

Ya hti na gaw, Kasa laika hta na rai nga ai. 

Shawng e ngai ka da ai laika hta, Htawhpilu e, Yesu Sumsing lamu de shalun la hkrum ai nhtoi du hkra, shi galaw dan ai amu ni hte sharin shaga ai lam yawng hte hpe ngai ka lajang da se ai. Shi shalun la hkrum ai shani e, Chyoi Pra ai Wenyi a garum ai hte shi lata la ai kasa ni ga matsun hkang da nu ai. Yesu si mat ai hpang, dai kasa ni hpe shi a hkum shadan dan nna, kam ging ai sakse lam law law hte shi naw hkrung nga ai hpe madun da wu ai. Shing rai shanhte rau hpawng nga ai shaloi Yesu gaw, Yerusalem mare kaw na nanhte n pru ai sha, ngai kaw nna na la ai, Wa a ga ndat hpe ala nga mu; kaning rai nme law, ngai hkum nan nanhte hpe tsun da ai hte maren, Yawhan gaw hka hte kashin kamun jaw ai; nanhte chyawm gaw nhtoi gade n na yang, Chyoi Pra ai Wenyi hte kashin kamun hkam la na marin dai ngu nna shanhte hpe tsun mu ai. Dai rai nna, Yesu hte rau hpawng nga ai ni gaw, Madu e, dai mungdan hpe ya aten e Isaraela masha ni kaw bai de ya na rai ni? ngu nna san ma ai. 

Yesu mahtang gaw, Wa shi a ahkaw ahkang hte daw da ahkying hte aten ladaw hpe, nanhte chye shara n nga ai. Rai ti mung, Chyoi Pra ai Wenyi nanhte a ntsa e du jang, n-gun atsam lu la na myit dai rai nna, Yerusalem mare hte Yuda mung ting, Samari mung hte lamu ga htum hkra, nanhte nye a sakse ni tai wa na marin dai, ngu nna shanhte hpe tsun wu ai. Ndai ga tsun jang, shanhte yu nga ning len, shi hpe ntsa de shalun la ai rai nna, sumwi gaw shanhte a man e shi hpe magap la mat wa ai. Shanhte lamu de naw azi yu nga yang, yu mu, hpraw tu ai hpun palawng bu hpun ai marai lahkawng shanhte a makau e tsap pru nna, Galile masha ni e, htaw lamu de hpa rai azi yu nga myit ta? Nanhte a man na Sumsing lamu de shalun la ai wa dai Yesu gaw, nan¬hte mada yu nga yang, shi Sumsing lamu de lung wa ai zawn, dai hku shi bai du na ra ai. ngu nna kasa ni hpe tsun mu ai. 

Ya hti ai gaw, Karai Kasang a mungga rai nga ai. 

CHYUM MUNGGA DAW 2

Ehpesu 1:17-23

Ya hti na gaw, Ehpesu masha ni hpang de Kasa Pawlu shagun dat ai laika hta na rai nga ai. 

Hpu nau ni e, anhte a Madu Yesu Hkristu a Karai Kasang hpung shingkang rawng ai Kawa gaw, shi hkum nan hpe chye chyang lu na matu, nanhte a myit masin hpe hpaji byeng ya hte myit leng ai chyeju shi jaw ya u ga, ngu nna ngai hpyi nngai. Karai Kasang shaga la ai a jaw e, myit mada shara gade wa nga ai hpe mung, Chyoi pra ai ni gaw hpung shingkang rawng ai Sali wunli gade wa hkrum lu na hpe mung; shi hpe kam sham ai ni a matu, shi a chyeju atsam gade wa galu kaba nga ai hpe mung, nanhte chye lu na matu, Karai Kasang nanhte a myit masin na myi hpe jahtoi jasan ya malit ga, ngu nna ngai hpyi nga nngai. Karai Kasang gaw, Hkristu hta shabyin da ai amu hpe gawn yu jang, nanhte chye lu na myit dai. 

Shi a atsam hte Hkristu hpe si mat ai kaw na sharawt la nna, Sumsing lamu hta shi a hkra maga e dung nga shangun da wu ai. Du magam, ahkaw ahkang, hpung shingkang hte up ai aya lu ai ni nlang hte a tsa e mung, ndai prat hte htawm hpang na aprat e shamying lu ai amying ahkang mahkra a ntsa e mung, shi hpe shagrau shatsaw da nu ai. Karai Kasang gaw arai baw sumhpa hpe shi a lagaw n-pu e tawn da nu ai rai nna, yawng mayawng hpe up hkang lu na matu, nawku hpung a baw shi hpe shatai da wu ai. Dai hpung gaw Hkristu a hkum hkrang rai nga nna, yawng mayawng hpe jahpring shatsup ya ai Hkristu gaw, dai nawku hpung a marang e jahkum shatsup ai hkrum wu ai. 

Ya hti ai gaw, Karai Kasang a mungga rai nga ai.

KABU GARA SHIGA

Mahte 28:16-20 

Ya hti na gaw Mahte a laika hta na Kabu Gara Shiga rai nga ai. 

Yesu a sape shi langai hte gaw, shi shanhte hpe hkang da ai hte maren, Galile mung na bum de lung mat wa ma ai. Yesu hpe mu jang shanhte nawku ma ai; nkau mi mahtang n kam ma ai. Yesu shanhte hpang de sit sa wa nna, Sumsing lamu hta e mung, ginding aga hta e mung, up hkang na ahkang nlang hte hpe ngai kaw ap ya ai. Dai ma¬jaw, nanhte pru saw a nna, masha amyu baw shagu hpe sape shatai let Kawa, Kasha, Chyoi pra ai Wenyi a mying ningsang hte, shanhte hpe kashin kamun jaw nga mu; ngai nanhte hpe hkang da mada shanhte hkan shadik lu mu ga, sharin shaga ya mu. Dai hta kaga lamu ga apart htum mat hkra, ngai nanhte hte rau dinggrin a nga nga na nngai, ngu nna Yesu Madu shi a sape ni hpe matsun dat mu ai. 

Ya hti ai gaw Madu a Kabu Gara Shiga rai nga ai. 

2020:PASKA LADAW LABAN (6) NA MUNGGA

“Nanhte ngai hpe tsawra ai rai mi yang, ngai a matsun ga ni hpe madat na mi ai; nanhte hte galoi mung a’nga nga na matu, Shalan Shabran ai Wa, ngu ai, Tengman ai lam a Wenyi hpe shangun dat ya na we ai...Shi gaw ngai a lam nanhte hpe hpaw dan, hpyan yan dan na ra ai.” Hpang na Laban, Pentekoste ngu ai, Chyoi Pra Wenyi Kasa ni a ntsa de yu sa ai poi rai nga ai. Kasa ni gaw Chyoi Pra Wenyi shanhte a ntsa de rai n du sa shi ai laman myit masin wenyi, hkap la lu na lam, hkyen lajang da ra ma ai. Anhte mung maren rai hkyen nga a’la nga ra ga ai.

Kanu kawa ji jum ni, asak kaba ai ni si wa mahka e kashu kasha ni hpe manu dan dik ai matsun ga ni htet da chye ma ai. Dinghku masha ni n malap ai hkan shatup na matu htet ai ga rai nga ai. Yesu mung, sape ni hpe jahka da ai aten du ni wa ai shaloi sape ni hpe htet matsun ai, “Nanhte ngai hpe tsawra mi ai rai yang, ngai a tara matsun ni hpe madat ya hkan shatup na mi ai”, nga ai. Yesu shi myit mada da ai mungkan, Karai a mungdan hpe gawde na matu, shi a ningmu hpe shingran mu lawm ai sape ni rai ra ma ai. Shi jaw ai tara matsun, hkang da ai ga ni hpe madat ya ai rai yang sha, shi myit mada ai mungkan/ mungdan gawde lu na rai nga ai.

Tara matsun ni, hkang da ai ga ni hpe madat ai, ngu ai hta lachyum hpe chye ya nna, tara matsun jaw ai wa hpe nan tsawra ai rai yang sha, tara hkan ai lam lachyum pru na rai nga ai. Ndai dinghta ga e anhte hkan shatup ra ai tara matsun ni mung law law nga ai. Tara matsun ni a yaw shada ai lam hpe n chye na ai rai yang, shawa yawng a matu akyu ara re ai lam hpe n chye hkap la ai rai yang, dai tara matsun ni hpe li la ai lit magun hku she mu mada na ga ai. Ndai prat ramma ni law law, tara matsun ni hpe li ai lit magun hku mu ma ai majaw, tara tawt lai ai ni law law nga ma ai.

Tinang atsawm n chye ai masha langai, hku hkau ai lam n nga ai wa hpe tsawra lu na n mai byin ai. Dai majaw, tara matsun yawng hpe shabawn ai matsun ga, “Karai Kasang hte tinang a htingbu wa hpe tsawra lu na”, nga, ndai lahkawng hta gumhpawn da ai. Myi hte mu lu ai masha, myi hte mu lu ai Yesu shi hpe tsawra nna sha n mu lu ai Karai Kasang hpe tsawra lu na re ai majaw, “Nanhte ngai hpe tsawra ai rai mi yang”, nga ai.

Sape ni gaw Yesu hpe myi hte mu da ma ai; hpang na, prat shagu na kamsham ai masha ni gaw Yesu hpe myi chyaw n mu lu na re ai majaw, myit masin wenyi hte mu lu ai atsam lu ra ai. Dai majaw, Chyoi Pra Wenyi hpe jaw ya na, nga nna Yesu ga-sadi jaw ai. Dai Wenyi gaw anhte a myit masin kraw kata hta jaw bang ya ai majaw, wenyi mungkan hpe mu lu na ga ai. Yesu gawde mayu ai mungkan/mungdan shingran hpe mu lawm lu na rai nga ai. Masha a atsam hte n byin lu ai lam hpe dai Wenyi shadut ya ai, lam matsun ninggun jaw ai a marang e, tsawra madat mara ai ni, tinang a akyu amyat hpe n yu ai, shawang tsawra myit hte tinang nang a asak aprat hpe nawng ya kau ai ni kade she nga ai hpe myit dum mai ga ai. Kasa ni yawng ngu na daram, Yesu hpe tsawra ai majaw, shawang tsawra myit a majaw, si hkam ai hkunna, shanhte a tsawra myit hpe sakse hkam da ma ai. Shangun da ai lit magam ni hpe mung tawng hkra galaw da lu ma ai.

Asuya magam gun ni, hpung magam gun ni, hpyen magam gun ni, gyit hkang da ai tara a majaw hta lai jan nna, tinang a asak hpe n lahpawt ai sha, kaga masha ni a asak hte akyu ara a matu tinang a asak hpe dan nna ap nawng ai ni law law mung nga ma ai. Virus chyam bra ai kade sawng ai rai tim, Doctor ni gaw tsirung kaw na n hprawng yen ma ai; hpyen-la ni mung order hpe hkrit ai majaw hta jan nna, kaga manang ni law law asak lawt lu na matu, kaduk kaw na n hprawng yen ai gasat noi let si hkam ma ai. Dai gaw, tara hte matsun ga a majaw hta tsawra myit kaba ai majaw, ngu tsun mai nga ai.

Anhte gawng kya ai hta, n dep n hkap lu ai lam ni hta, hkrit tsang ai aten ni hta, Madu Shi matsun ai ga ni hpe hkap la hkan sa lu hkra, Chyoi Pra Wenyi a atsam teng sha hkam la ra ga ai.

Sumru yu na lam ni:

- Yesu sharin ya ai tara matsun ni hpe chye na hkra, lachyum chye lu hkra, kade shakut ga ai kun?

- Tinang chyoi pra dinghpring lu hkra shakut ai gaw hpa hpa galaw na matu rai ta? Tara matsun ni hkan shatup ai gaw tinang a akyu na matu sha rai kun?

- Chyoi Pra Wenyi kaw ading tawk akyu hpyi shaman ga ai kun?

2020:PASKA LADAW LABAN (6) NA CHYUM LAIKA

PASKA LADAW HTA LABAN (6)

May 17, 2020.

Chyum Mungga Daw (1)

Kasa Laika 8:5-8, 14-17

Ya hti na gaw Kasa laika hta na rai nga ai.

Hpilip gaw Samari mare de sa wa na, Hkristu a lam hkaw tsun dan wu ai. Shi tsun dan ai lam na la ai hte, shi madun ai lamik kumla mu ma yang, masha unawng uwa myit langai sha hte, Hpilip a ga madat mara nga ma ai. Kaning rai nme nga yang, nat kap ai ni law law hta na, n seng ai nat ni jahtau marawn let pru mat shajang ma ai; hkum katsing si ai ni hte lagaw hten ai ni law law mung, mai mat shajang ma ai.

Dai rai nna, dai mare na masha ni nachying kabu gara nga ma ai. Samari masha ni, Karai Kasang a mungga hta la ma ai hpe, Yerusalem e nga ai kasa ni na ma yang, shanhte gaw Petru yan Yawhan hpe shangun dat mu ai: shan mung du jang, dai masha ni Chyoi pra ai Wenyi lu la na matu akyu hpyi ya ma ai; hpa majaw nga yang, dai Chyoi pra ai Wenyi gaw, shanhte hta na kadai a ntsa e mung garai n yu wa ai; Madu Yesu a amying hte kashin kamun hkam ai sha, naw rai nga ma ai. Dai rai nna, kasa Petru yan Yawhan shanhte a ntsa e lata mara ya jang, dai Chyoi pra ai Wenyi hpe hkam la ma ai.

Ya hti ai gaw Karai Kasang a mungga rai nga ai.

Chyum Mungga Daw (2)

1 Petru 3:15-18

Ya hti na gaw Kasa Petru shagun dat ai laika langai hta na rai nga ai.

Hpu nau ni e, Nanhte a myit masin hta e Madu Hkristu hpe hkrit hkungga nga mu: dai Hkristu hpa majaw myit mada nga myit ta? nga nna masha langai ngai nanhte hpe san yu jang, lachyum tsun dan na matu tut nawng e jin jin rai nga mu; rai ti mung, sumnung ai hte hkungga ai myit hte ga htan ya mu. Nanhte myit asan sha rai nga ai hte amu mahkra hpe galaw nga mu; shaloi nanhte hkan ai Hkristu a nga sat nga sa ai lam a majaw, aroi arip hkrum yang, nanhte hpe shatan nhkan ai ni, n teng n man ai hku mara shagun ma ai hpe, masha yawng chye lu na mara ai. Dai rai nna, Karai Kasang dai hku hkraw nga yang, n kaja ai amu galaw ai majaw nni nkri hkrum ai gaw, grau nna kaja nga ai, kaning rai nme law, Hkristu gaw shut hpyit mara a majaw, kalang mi sha si hkam nu ai: Karai Kasang hpang de anhte hpe woi wa lu hkra, ding hpring ai wa Hkristu gaw, n ding n hpring ai ni a matu nni nkri hkam la nu ai: Shi gaw hkum tsawp hta sat kau hkrum ti mung, nsa wenyi hta jahkrung sharawt la ai hkrum nu ai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 14:15-21

Ya hti na gaw Kasa Yawhan a laika hta na Kabu Gara Shiga rai nga ai.

Yesu Shi a sape ni hpe tsun mu ai gaw: Nanhte ngai hpe tsaw ra ai rai yang gaw, nye a ga matsun hkan shatup na myit dai. Ngai mung ngai Wa kaw hpyi nna, Shi gaw, nanhte hte prat tup rau nga na matu, teng man ai hte seng ai Wenyi ngu ai, shalan shabran ai Wa kaga, nanhte hpang de shangun dat ya na ra ai. Mungkan ga gaw dai Chyoi pra ai Wenyi hpe nmu nchye ai majaw, nhkap la lu ma ai. Nanhte chyawm gaw dai Wenyi hpe chye nga myit dai; kaning rai nme law, shi gaw nanhte hte rau nga nga ai rai nna, nanhte hta mung rawng nga na ra ai.

Nanhte hpe jahkrai zawn ngai kau da na n rai: nanhte hpang de ngai bai sa na ring ngai. Loi hkring mi rai jang, mungkan ga ngai hpe n mu dat na nu ai; nanhte chyawm gaw naw mu lu na ma rin dai: kaning rai nme law, ngai ahkrung nga nngai majaw, nanhte mung a hkrung nga na marin dai. Ngai gaw nye Wa hta nga nga ai mung, nanhte ngai hta nga nga myit dai mung, ngai nanhte hta nga nga nngai mung, dai shani e nanhte chye lu na marin dai. Nye a ga matsun lu la nna, hkan shatup ai wa gaw, ngai hpe tsaw ra ai wa rai nga ai: ngai hpe tsaw ra ai wa hpe nye Wa mung tsaw ra na wu ai: ngai mung dai wa hpe tsaw ra ai hte, ngai hkum nan shi hpe shadan dan na we ai.

Ya hti ai gaw Madu a Kabu Gara Shiga rai nga ai.

2020:PASKA LADAW LABAN (5) NA MUNGGA

“Ngai gaw lam rai li ai, tengman ai hte asak mung rai li ai”. Lam n hkrang jang du mayu ai shara de n du lu ai; lam ntsa e pyi hkawm nga sai ngu tim, tinang lata la ai lam shut mat jang mung du mayu ai shara de n du lu ai. Hpang jahtum tinang du mayu ai shara de du mat ai shaloi, masu katut ai majaw, n teng n man ai ga hpe madat hkrup ai majaw bai htang wa n mai sai, aprat sum mat na rai sai, mayam tai ra mat ni ai, ngu nna myit malai hpang hkrat mat ai ni law law nga ma ai. Jahtum e tinang du mayu ai shara gaw kaja wa tinang hpe akyu jaw ai baw, grin ai akyu hkam sha lu ai lam rai ra ai.

N jaw ai ladat a majaw, n jaw n kaja ai akyang lailen a majaw, masu ai wa hpe kam shut ai majaw, tinang sawn la shut ai majaw, ning re ai majaw ni a nhkan e hten bya ai kaw du mat ai, hka hkrum ai, matsan mat ai, asak kadun mat ai, asak sum mat ai ni law law nga ma ai. N shut chye ai masha, lata la n shut, dawdan n shut re ai masha mung n nga ai. Masu magaw n shawp n hkap, n tara ai hku lam matsun ai, sharin shaga ai ni ndai mungkan hta kade she law. Mabyin langai a lam tsun ai, ka ai, sharin shaga ai masha marai (10) gaw n bung hkat ai, shai hkat ai hku nna tinang na mahtang she jaw ai, kaga marai (9) shut ai, ngu hkat ai ndai mungkan na mabyin hta nang/ngai gara hku jen ginhka nna kadai a ga hpe madat na rai ta?

N shut n shai kam ging ai wa, galoi prat hta rai tim jaw nga na sharin shaga ai lam, galoi mung masha yawng hpe akyu jaw lu ai tara matsun ni hpe jaw ya lu ai gaw teng sha, Madu Yesu Shi hkum nan rai nga ai. Yesu hpe kamsham hkap la ai rai yang, Shi a tara matsun yawng hpe hkap la na rai nga ai. Shi a hkrun lam gaw wudang hkrun lam rai nga ai. Shi woi sa ai shara, anhte du mayu ai shara gaw tsit lali ai wudat shara, n hkyet lu ai asak a hka-hpawk, jahtum e n htum n wai asak rai nga ai. Lahkawng ngu na Chyum Mungga hta Petru tsun ai,

“Nanhte gaw hkringsan da (lata la) hkrum ai amyu, jau amyu, hkawhkam amyu, chyoi pra ai amyu, Karai a amyu...ningsin kaw na hpung shingkang ninghtoi de woi la hkrum ai amyu” nga ai. Bai, “Hkrung nga ai nlung, Karai a mauhpa amu ni hpe sakse hkam tsun shabrawng dan na matu hkringsan da hkrum ai ni” nga ai. Yesu Hkristu hpe kamsham hkap la nna, sharin shaga ai lam yawng hpe kamsham hkan galaw ai rai yang, lahta e tsun mat wa ai lam ni gaw shaga la ai lam majing rai nga ai. Hkristu hte langai sha tai wa ai majaw, Yesu Shi galaw ai amu yawng hpe mung galaw lu ai hte, Shi a arawng aya, arawng sadang hkam la lu ai ni rai nga ai. Dai gaw asak majing hpe lu la ai lam rai nga ai.

Hkrung nga ai, ngu ai gaw Hkristu hta hkrung nga ai hpe tsun ai. Dai majaw, Yesu sharin ya ai tara hte matsun ga ni hpe manoi manat nna, Karai Kasang langai hpra hpe jaw da ai myit masin atsam marai ni, hkum-hkrang a atsam marai ni_lagaw lata myi na yawng hpe lachyum pru dik ai hku akyu jashawn ai, tsawra matsan dum chye ai, hkye la je la ai amu, shawang amu ni hta shang lawm ai, dai ni rai nga ai. Hkrung nga ai a lachyum gaw sharin hkam la ai dingyang, shut ai dum jang sharai dingyang, n hkring n sa shamu shamawt nga ai hpe tsun ai.

“Hkum hkrit mi” “Karai Kasang hpe mung, Ngai hpe mung kam mu” nga ai. Hkrit tsang hpa, myit-ru hpa galoi mung nga na mungkan re.

Masha a atsam hte n shingdang lu ai, n byin mai ai lam ni law law nga ai. Shi Madu anhte hte nga nga ai, anhte hpe atsam jaw ai, myit nyan ninghtoi jaw ya ai, ngu ai hpe kam ga yang, kaja wa hpa kadai hpe hkrit ra na ga ta? Masha a atsam n dep lu ai lam hta sumsing lamu, lahta tsang na atsam hpe kam ra ga ai; dai hpe akyu hpyi ai hku nna sha lu mai ga ai. Kasa Laika hta akyu hpyi ai amu ahkyak dik ai majaw, Kasa ni gaw lu-sha bu hpun palawng manghkang hparan ai amu hpe kau da nna, “Anhte gaw akyu hpyi ai hte Karai a Mungga htawn tsun ai amu hta nawng da lu na ga ai, nga, Petru tsun ai.

Myit yu mai ai lam:

- Yesu hte matut mahkai ai lam, Shi hta jung noi ai lam n nga ai

rai yang, Karai Kasang hpe mung, Karai a mungdan a lam mung chye lu na n rai.

- Yesu Shi hpe kam ai rai yang, Yesu galaw ai amu ni hpe galaw lu na ma ai hte, grau ai mau-hpa amu ni hpe mung galaw lu na ma ai, nga ai.

2020:PASKA LADAW LABAN (5) NA CHYUM LAIKA

PASKA LADAW HTA LABAN (5)

May 10, 2020

Chyum Mungga Daw (1)

Kasa laika 6:1-7

Ya hti na gaw Kasa laika hta na rai nga ai.

Ya, sape ni law htam wa ai nhtoi hta e, Greak ga shaga ai ni gaw, Hebre ga shaga ai ni hte myit n hkrum ai lam pru sai; gaida jan ni hpe shani shagu galaw lu galaw sha ai amu hta, shanhte a gaida ni hpe, jaw ang ai made n karan jaw ma ai, nga nna Greak ga shaga ai ni Hebre ni hpe aput angun nga ma ai.

Shaloi Kasa shi lahkawng gaw sape hpung ting hpe shaga la nna, Anhte gaw Karai Kasang a mungga hpe kau da rap rai nna, shahpa daw jaw ai amu hta shakut yang n htuk nga ai. Dai majaw, hpu nau ni e, nanhte hta na, akyang lailen kaja rawng nna, Chyoi pra ai Wenyi hte hpring ai, myit su ai masha marai sanit hpe lata la mu; dai ni hpe ndai amu madu shangun na matu, anhte san da na ga ai; anhte chyawm gaw akyu hpyi ai amu hte, mungga hkaw dan ai amu hpe, htep lahti hkan shatup na ga ai, ngu nna tsun mu ai.

Ga dai hpe salang hpawng ting na ra ai majaw, makam masham kup tsup ai hte, Chyoi pra ai Wenyi hpring ai Stephen ngu ai wa hte, Hpilip, Prokoru, Nekanora, Timun, Parmena hte Anti-ok mare na, shawng e Yuda tara htung de kayin shang wa sai Nikora hte hpe lata la nna, Kasa ni a man e tsap shangun da mu ai. Kasa ni akyu hpyi ngut jang, shanhte hpe lata mara jaw da mu ai. Karai Kasang a mungga mung, lani hte lani grau nna maden jat wa nna, Yerusalem mare hta sape ni law law htam wa ai hte, hkinjawng ni law law wa dai makam masham lam hpe madat mara nga ma ai.

Ya hti ai gaw Karai Kasang a mungga rai nga ai.

Chyum Mungga Daw (2)

1 Petru 2:4-9

Ya hti na gaw Kasa Petru shagun dat ai laika langai hta na rai nga ai.

Hpu nau ni e, Madu hpang de sit sa marit; Shi gaw ahkrung nga ai nlung rai nga ai: masha ni dai hpe kau da ti mung, Karai Kasang a man e lata la ai hte hpu ging la ai nlung rai nga ai. Nanhte mung, ahkrung nga ai nlung ni tai wa nna, wenyi hte seng ai nawku htingnu hpe nanhte gaw shachyaw da lu na matu, Madu hpang de sit sa marit. Shing rai Yesu Hkristu a marang e, Karai Kasang sharawng awng ai, nsa wenyi hte seng ai hkungga hpe, Wa Karai kaw nanhte ap ya lu na matu, chyoi pra ai jaw jau ai amyu tai wa na marin dai. Kaning rai nme law, Ngai lata la ai hte hpu ging la ai, ningjut jahtum na nlung hpe, Ziun hta e ngai gaw da se ai rai nna, dai hpe kam sham ai wa gaw dakan dakring tsap lu na ra ai, nga nna Chyum Laika hta rawng nga ai.

Nanhte kam sham ai ni a matu dai nlung gaw hpu ging la ai baw rai nga malit dai. Rai ti mung, n kam n sham ai ni a matu mara, Wahpang gaw ai ni lata kau ai nlung gaw, ningjut jahtum na nlung tai sai rai nna,8 ahtu kataw shara hte, myit kataw shangun ai lunghkrung mung tai wa sai. Karai Kasang a mungga hpe n kam n sham nga ma ai majaw, shanhte kataw hkrat wa ma ai; shing rai shanhte hkrum na matu, moi chyaloi nhkoi kaw nna lajang da ngut sai. Nanhte chyawm gaw, lata la ai amyu, hkungga nawng ai hkawhkam amyu ni, chyoi pra ai amyu baw hte, nsin kata de nna shi a mauhpa nhtoi de nanhte hpe shaga la ai wa a magam amu ni hpe shana shabra dat ya na matu, Karai Kasang e san da hkrum ai ni rai nga myit dai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 14:1-12

Ya hti na gaw Kasa Yawhan a laika hta na Kabu Gara Shiga rai nga ai.

Yesu shi a sape ni hpe tsun mu ai gaw: Nanhte myit hkum ru mu; Karai Kasang hpe kam sham mu, ngai hpe mung kam nga mu. Nye Wa a nta e nga shara law law nga ai; dai n nga yang, ngai nanhte hpe tsun dan ang sai; kaning rai nme law, nanhte a matu nga shara lajang na she, ngai wa na nngai.

Shing rai ngai wa nna, nanhte a matu nga shara lajang da nhtawm, ngai nga nga ai shara e nanhte mung nga lu hkra, ngai bai sa nna, nanhte hpe ngai hpang de woi la na made ai. Ngai sa wa ai shara de du ai lam nanhte chye nga myit dai. Shaloi Htawma gaw, Madu e, Nang gade sa wa na pyi anhte n chye ga ai mi, lam kaning rai chye na ga ta? ngu nna Yesu hpe tsun wu ai. Yesu gaw, Lam gaw ngai rai nga nngai, teng man ai hte asak mung ngai rai nga nngai: ngai hta nna n rai yang gaw, kadai mung Nye Wa kaw n du wa lu ai. Nanhte ngai hpe chye sai rai yang gaw, Nye Wa hpe mung chye na manit dai. Ya kaw nna shi hpe chye nga myit dai, mu mung mu yu manit dai, ngu nna Htawma hpe htan ya ai.

Hpilip mung, Madu e, Wa hpe anhte hpe madun mu, shaloi anhte myit dik na ga ai, ngu wu ai. Yesu gaw, Hpilip e, ngai nanhte hte nde nlaw na hkra nga nga ti mung nang ngai hpe n chye n ni? Ngai hpe mu yu sai wa gaw Wa hpe mu yu nu ai: dai re ai mi, Wa hpe anhte hpe madun mi, nga nna hpa rai tsun n ta? Ngai gaw Wa hta nga nga nngai mung, Wa gaw ngai hta nga nga ai mung, nang n kam n ni? Ngai nanhte hpe tsun ai ga gaw, nye a myit hte ngai tsun ai n rai; ngai hta rawng nga ai nye Wa gaw Shi a amu hpe galaw nga ai. Ngai gaw Wa hta nga nngai mung, Wa gaw ngai hta nga nga ai mung, kam sham ra ai: dai n rai yang gaw, galaw dan ai amu ni dai hpe tau yu nna, kam sham nga u. Nanhte hpe ngai kaja wa teng teng tsun made ai gaw, ngai hpe kam sham ai wa gaw, ngai galaw ai amu lu galaw na ra ai; dai hta grau kaba ai amu lu galaw na ra ai; kaning rai nme law, ngai gaw Wa hpang de wa na nngai.

Ya hti ai gaw Madu a Kabu Gara Shiga rai nga ai.