Sape ni gaw Madu e galaw dan ai mau-hpa amu ni law law hpe mu yu sai ni rai ma ai; rai tim, “Anhte a makam masham hpe shalaw jahtam ya rit," ngu, hpyi ma ai. Anhte shaman chyeju magup sumhpa hpyi ga ai; “Madu e, ngai a makam masham hpe shalaw jahtam ya rit”, ngu nna kade lang akyu hpyi yu ga ta?
Karai Kasang gaw Sawlomon hpe, “Nang hpyi mayu ai hpa raitim hpyi u”, nga ai shaloi Sawlomon gaw kaga hpa mung n hpyi ai; mungdan hpe up hkang chye ai hpaji kumhpa mahtang hpyi ai. Jaw dik sai; mungdan up hkang chye ai majaw ja gumhpraw, arawng aya hte kaga ra mayu ai baw yawng hkang nang ai. Anhte mung akyu hpyi ga yang tinang ra kadawn dum ai, byin mayu ai, lu mayu ai baw ni hpe hpyi chye ga timung ra madung hpe n hpyi chye ai, tinang a kanu kawa kaw na muk jahpu hpyi, bu hpun palawng hpyi ai hte bung chye ga ai. Kanu kawa hte hka mat ai shani tinang a prat hpe tinang gawgap lu hkra ra kadawn ai machye machyang hpaji ni hte atsam marai baw hpan ni hpe n chye hpyi la hkam la ai hte bung chye ai.
Karai Kasang gaw mai kaja dik ai Kawa, tsawra myit hte hpring ai kawa rai nga ai (I Yh. 4:16). Anhte gaw Karai a matu hpa gingdan ai ni n rai ga ai; anhte lu ai, byin ai, ngu ai lam ni gaw Karai a matu hpa n rai nga ai. Rai tim, Shi a tsawra myit san san hte anhte langai hpra hpe Shi hpan da ai, asak a chyeju kumhpa ni hpe jaw da ai, makawp maga bau sin ya ai. Anhte kade chyeju n dum chye ga tim, kade lang she shut kataw ga tim, Shi a tsawra myit gaw nannan a’grin nga ai (Shakawn Kungdawn 89,100,118,136, dz., dz.,). San Augustine tsun ai, “Anhte langai hpra hpe Karai tsawra ai gaw, kaga tsawra na hpa n nga ai, kadai n nga ai, ‘nang/ngai’ ngu ai langai sha nga ai hku nan tsaw ra ai” nga ai.
Dai zawn re ai tsawra myit rawng ai Karai Kasang gaw Shi n jaw kam ai hpa nga na rai ta? Shi n jaw nna lu ai hpa baw nga a ta? Dai tsawra myit hpe anhte gara hku htang nga ga ta? Anhte langai hpra Karai e jaw da ya ai atsam marai chyeju kumhpa ni hpe akyu jashawn nna Karai Kasang hpe chyeju htang ai lam kade galaw ga a ta? Tinang a matu, kaga masha ni a matu anhte galaw ya ai, dawjau amu ni law law re ai. Karai a matu, Shi a hpung shingkang arawng sadang a matu adum sha rai kade galaw lu ga ta? Karai a myiman tau let anhte galaw ai amu ni law law rai na sai; dai amu ni a majaw Karai Kasang kaw na hka ji na lam hpa nga a ta? Jahtum e anhte tsun ra na gaw, “Anhte hpa n rai nga ai; tinang nang galaw ra ai, galaw ang ai hte hpe she galaw nga a hka” ngu, tsun ra na sha rai nga ai. Anhte kaning rai hkikhkam ai amu galaw ga timung, kuptsup nga chyalu Karai hpe hpa mi jat ya lu ai n rai. Chyeju dum chye ai myit, Karai a tsawra myit hpe htang ya chye na sha Karai Kasang myit mada ai. Shing rai lu na matu makam masham gaw ahkyak dik ai. Makam masham hpring ga yang, kaga mai kaja ai baw law law hpe anhte galaw lu na ga ai.
Myit sumru na lam: Hpan da Madu, asak Madu, kangka ai myit hte tsawra ai Karai Kasang hpe bai htang tsawra lu na hte, langai hpra a matu Karai e sing da ya ai maka hkan nna asak hkrung lu na lam, makam masham chyeju hpring ga yang kaga mai kaja ai amu law law galaw lu na, hkam la lu na rai nga ai. Dai ni Chyum Laika Laban nhtoi re ai hte maren, dai ni hta la lu ai Laban alu yawng Chyum Mungga Sasana Magam Dap de shagun ya ra ai.
No comments:
Post a Comment