2019:CHYOI PRA AI HTINGGAW POI SHANI NA MUNGGA

Kun dinghku a manu dan ai lam hpe amyu htunghking shagu hta mu lu ai. Dinghku langai grin nga ra ai lam, grin ra ai lam amyu htunghking shagu hkap la ai. Dinghku, ngu ai shaloi chyoi pra ai alai maka amyu htunghking shagu hta mu lu ai. Rai tim, gara amyu htunghking sharin shaga ai lam hta mung kuptsup ai lam n nga ai. Ra n rawng, kuptsup ai dinghku, amyu htunghking shagu e hkap la kasi yu la na matu, Karai e shabyin ai amu_ “Yosep, Maria, Yesu” dai htinggaw gaw dinghpring ai lam hta kuptsup ai majaw, “Chyoi pra ai htinggaw” ngu nna masat hkap la let, dai htingaw hpe shagrau ga ai re.

Yosep hte Maria kun dinghku de ai lam gaw Karai e lam matsun ai amu re hpe shan chye na hkap la ma ai. Shan hpe lam matsun lam woi ya ai gaw makam masham re. Yosep hte Maria gaw kaga masha ni hkum shan ganawn mazum ai lam hte n bung ai: madu wa madu jan she nga tim san seng dik ai hku nga lai wa ma ai. Yosep gaw shi a sai shan n lawm ai sha, Maria gaw Karai a Kasha Yesu hpe shangai ya na lam, Karai e lajang ai Hkye La Madu re ai lam hpe shi tup hkra n chye ai rai tim, Karai e shabyin ai masing re ai mlam hpe tsup hkrak kamsham hkap la ai. Maria mung shi hta byin wa ai amu ni hpe tup hkrak n chye ai rai tim, Karai e sing ya ai maka ni re ai lam tup hkrak kamsham hkap la ai.

Dinghku de ai prat hta makam masham kade ahkyak ai, ngu ai lam hpe shadum ya ai. Karai a Kasha hpe jawm bau sin makawp maga ai yan, Yosep hte Maria gaw matsan mayan re ai prat hpe hkap la ma ai; grup-yin na matsan masha ni zawn sha, hpa mi laklai ai arawng aya n lu ma ai. Makan bungli galaw sha ra ma ai. Yuda amyu sha ni a amyu htunghking hte makam masham alai ahtung ni hpe hkan shatup ma ai. Masha yawng hpe hkye hkrang la na wa, ma Yesu gaw sat kau hkrum na tsang ra wa ai majaw, kanu kawa hte rau Egyip mung de hprawng shingbyi ra ai. Chyum Laika e tau tsun da ai ga dik wa na lam, Karai e sing da ai amu dik wa na lam rai nga ai. Hpyen majan yen nna IDP de du nga ai anhte a hpu-nau jinghku jing-yu ni hpe myit dum mai ga ai.

Yosep daram hkik hkam ai masha a lam Chyum Laika hta law law wa ka shagrau da n hkrum ai. Shinggyim masha ni a man, shinggyim labau hta hpa mi alak rai sharau n hkrum ai. Gara hku si wa ai mung kadai n chye dat ai. Hkye La Madu hpe shangai chyinghkai ya ai kanu mung, shi a lam Chyum Laika hta law wa n ka da ai (mungsung a lam Luka hte Yawhan sha law grau nna ka da ma ai).

Gaida jan a aprat hpe hkam la ra ai. Kasha wudang ntsa e jen da hkrum ai aten, kaba dik ai hku makam masham chyam dinglik yu ai hkam hpe hkam la nu ai. Anhte mung, makam masham lu ninglen, ndai prat hta matsan mayen ai ni hkrum na, myit ru myit tsang hkrum na, hka hkrum na, shoi chyum amyu myu hkrum na ga ai. Shawa masha a man alak shagrau n hkrum tim, arawng aya n lu tim, San Paulu tsun ai zawn, “Dinghpring ai ni gaw kamsham myit hte asak hkrung nga lu na” nga ai.

Kanu kawa hpe hkung ga lara di ai ni shaman chyeju wunli wungau hkam la lu na lam Sirak Laika hku nna kasha ni hpe shadum ya ai. Amyu htunghking shagu hta mung, mkanu kawa hpe hkung ga lara di ra ai lam, manu dan ai lailen ni hpe sharin ya ai. Gara mung kuptsup ai lam n nga ai. Masha a myit masin hpe gyit hkang lu ai gaw Karai a Tara, Chyum Mungga matsun ni hpe kamsham ai myit sha myit masin hpe gyit hkang lu ai. Chyum Mungga daw I hte daw II gaw kun dinghku hta nga ra ai myit jasat, makam mmasham mahkrun lailen ni hpe sharin ya ai. Dai makam masham lailen ni hpe n sharin la mlu ai majaw rai rai, n hkan shatup ai majaw rai rai, htak mat byak mat ai dinghku ni law law nga ma ai. Dinghku langai na masha ni shada hpyen tai hkat ai kaw du wa lu ai. Hten mat ai dinghku ni, hten bya nga ai kashu kasha ni a matu alak myit dum akyu hpyi ya mai ga ai.

2019:CHYOI PRA AI HTINGGAW POI SHANI NA CHYUM LAIKA

CHYOI PRA AI HTINGGAW POI

December 29, 2019

CHYUM MUNGGA DAW 1

Sirak 3:3-7, 14-17a

Ya hti na gaw Sirak a laika hta na rai nga ai.

Kashu Kasha ni tinang a kawa hpe hkungga lara na lam, Karai Kasang hkang da nu ai; kanu gaw shi a shadang sha ni a ntsa e up hkang na ahkaw ahkang hpe Madu nan jaw da ni ai. Tinang a kawa hpe hkungga lara di ai wa gaw, shut hpyit mara shaprai kau ai amu hpe galaw nga ai; tinang a kanu hpe akaw alaw di ai wa mung, sutgan law law mahkawng da ai wa hte bung nga ai.

Tinang a kawa hpe hkungga ai wa gaw asak galu na ra ai; kanu a myit shadik shapyaw ai wa mung, Madu hpe madat mara nga ai. Ngai sha e, na nwa asak kaba wa ai shaloi, shi hpe bau garum nga u; shi hkrung nga ai nhtoi mahkra hta, shi a matu yawn hkyen shara hkum tai et. Shi myit n gring wa timung, nang hkam kaja ai hte n-gun rawng ai wa gaw, nwa a myit n-gun kya ai hpe hkam sharang nna, shi hpe n gawn n sawn hkum di u; kaning rai nme law, nwa hpe sumnung shingdi ai hte galaw ya ai lam hpe, galoi mung malap kau ya na n rai; na a mara raw dat ya na lam tai na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Kolose 3:12-21

Ya hti na gaw Kolose masha ni hpang de San Pawlu shagun dat ai laika hta na rai nga ai.

Hpu nau ni e, nanhte gaw Karai Kasang lata la ai amyu rai nna, chyoi pra ai ni hte tsawra hkrum ai ni rai nga myit dai. Dai re ai majaw, matsan dum chye ai, mai kaja ai, myit nem ai, sumnung shingdi ai, myit galu kaba ai dagraw nga mu; nanhte a n-gun kya ai hpe shada da hkam sharang nna, mara langai ngai nga yang gaw, shada raw dat hkat nga mu. Madu gaw nanhte a mara raw dat kau ai hte maren, nanhte mung shada da raw dat ya mu. Hpang jahtum e, dai yawng hte hpe matut da na hte jahkum shatsup ya na matu, tsawra ai myit hpe dagraw hpun nga mu.

Nanhte a myit masin hta e mung, Hkristu a ngwi pyaw ai lam a up nga u ga; kaning rai nme law, hkum hkrang langai sha a daw shan ni tai lu hkra, nanhte hpe shaga la manit dai. Dai hta n-ga, chyeju dum ai myit nanhte hta e arawng nga mu. Hkristu a mungga gaw nanhte hta n taw n tsang a shanu nga u ga; Hpaji byeng-ya amyu myu hte nanhte shada da sharin shaga nna, shadum jahprang ya mu. Nanhte a kraw lawang hta e Karai Kasang hpe chyeju dum let, shakawn kungdawn ga, mahkawn mangoi ga, wenyi hte seng ai laka ga hpe mahkawn mangoi nga mu.

Nanhte hpa lam galaw myit yang, ga hte rai timung, amu hte rai timung, Madu Yesu a mying ningsang hta galaw nga nna, shi a marang e Kawa Karai Kasang hpe chyeju dum nga mu. Numsha ni e, tinang a madu wa hkang ai hku hkan nga mu; dai gaw Madu a man e sut nga ai, La ni e, madu jan ni hpe tsawra nga nna, shanhte hpe sumnung shingdi ai hku galaw mu. Ma ni e, kanu , kawa ni hpe lam shagu hta madat mara nga mu; dai gaw, Madu a man e sharawng awng ai lam rai nga ai. Kanu kawa ni e, nanhte a ma ni myit n kaji u ga, shanhte hpe ladu lai nna hkum ahkre nga mu.

Ya hti ai gaw Karai Kasang a mungga rai nga ai.

KABU GARA SHIGA

Mahte 2:13-15, 19-23

Ya hti na gaw Mahte a laika hta na Kabu Gara Shiga rai nga ai.

Ya, hpaji rawng ai ni wa mat ai hpang, Madu a lamu kasa langai mi yup mang hta Yosep kaw dan pru nna, rawt u, dai ma kaji hte shi a kanu hpe woi la nna, Egutu mung de hprawng sa su; ngai nang hpe bai shaga ai aten du hkra, dai yang e nga nga su; kaning rai nme law, dai ma kaji hpe sat kau na matu Herawt tam magang ra ai, ngu wu ai. Shaloi jang Yosep rawt nna, dai ma kaji hte shi a kanu hpe, shana aten e woi la nna, Egutu mung de htawt wa ai hte, Herawt si mat ai aten du hkra, dai yang e nga nga ai. Dai gaw, Ngai Sha hpe mEgutu mung na ngai shaga la se ai, nga nna myihtoi a n-gup hte Madu tsun ai ga gaw dik wa na matu byin wa sai.

Ya, Herawt nsa hkyet mat ai hpang, Madu a lamu kasa langai mi, Egutu mung hta e, yup mang hta Yosep kaw dan pru nna, rawt u, dai ma kaji hte shi a kanu hpe woi la nna, Israela a mung de wa su; dai ma asak hpe tam ai ni si mat masai, nga ai. Shaloi jang Yosep rawt nna, dai ma kaji hte shi a kanu hpe woi la nhtawm, Israela a mung de bai wa ai. Rai timung, Arkela-u, shi a kawa Herawt a malai, Yuda mung hta e hkawhkam tai nga ai hpe shi na wu ai shaloi, dai mung de shang na shi hkrit nga ai: dai hta kaga, yup mang hta shi hpe bai madun dan ai majaw, Yosep gaw Galile mung de bai htawt nna, Nazaret ngu ai mare hta nga nga ai. Dai rai nna, Nazaretwa shi hpe ngu na mara ai, nga nna myihtoi ni tsun ai ga dik wa sai rai.

Ya hti ai gaw Madu a Kabu Gara shiga rai nga ai.

2019:HKRISMAT POI SHANI NA MUNGGA

“Mungkan a jahtum maga na ni Karai Kasang a hkye hkrang la ai amu hpe mu lu ma sai”, nga nna Isaiah tsun ai.

Masha a hkum shan sa dagraw la nna shangai chyinghkai wa ai Hkristu Yesu gaw,  Karai Kasang hte galoi mung a’nga nga ai “Mungga” re ai lam, dai Mungga gaw Karai Kasang re ai lam, ningpawt ninghpang kaw nna nan dai Mungga gaw hpan da ai amu hta galaw lawm ai lam, galu kalang tsun da ai.

Dai Hkristu gaw teng sha Karai Kasang re ai lam, masha majing re ai lam, Yawhan sakse hkam ya ai. Dai hta n’ga, Yawhan Baptista mung dai Hkristu a lam sakse hkam ya ai, nga ai.

Hebre Laika kaw mung, masha tai wa ai dai Hkristu gaw Karai a Kasha majing re ai lam, hpan da ai amu hpang wa ai aten hta, shawng ningnan la ai masha hpe tsun ai, “Karai a Lamu Kasa ni yawng Shi hpe nawku mu”, nga tsun da ai lam madi madun ai. Teng sha Dai shangai chyinghkai wa ai Hkristu Yesu gaw Karai Kasang re ai lam, Hebre Laika mungsakse hkam dan ai.

Hkristmat poi gaw Karai hte shinggyim masha a lapran, Hkristu Yesu a marang ai htinglu htinglai hkat lu ai lam, Karai the shinggyim masha amyu grau ni htep wa lu ai lam rai nga ai.

Karai Kasang gaw shinggyim masha a lapran tut a’nga nga nna anhte hpe hkye la mayu ai. Shinggyim amyu masha ni chyeju dum ai myit hte, kabu gara hkap la nna mungkan hpe ningnan garam lajang ai amu hta shang lawm shajang ga.

2019:HKRISMAT POI SHANI NA CHYUM LAIKA

HKRISMAT POI

December 25, 2019

CHYUM MUNGGA DAW 1

Esaia 52:7-10

Ya hti na gaw myihtoi Esaia a laika hta na rai nga ai.

Kabu gara ai shiga gun nna, ngwi pyaw ai lam shana ai wa a lagaw, gade tsawm htap nga a hka! Kaja ai shiga kajai gumhkawng ai hte, hkye hkrang la ai lam shana ya let, na a Karai Kasang up nga ai, nga nna Ziun hpe tsun shana ai wa a lagaw gaw, bum lang ntsa e gade tsawm htap nga a hka! Na a sin langa ni a nsen madat: shanhte nsen sharawt nna, kabu gara ai hte rau garu ma ai: kaning rai nme law, Madu gaw Ziun mare de nhtang wa ai hpe, tinang nan myi chyaw mu lu na ma ai. Yerusalem mare na katsi katsang shara ni e, mahkawn mangoi let rau garu mu: Madu gaw shi a amyu hpe shalan shabran ai hte, Yerusalem mare hpe hkye mawai la wu ai. Madu gaw, masha amyu baw ni mahkra a man e shi a chyoi pra ai lahpum ladawn dan nna, anhte a Karai Kasang a hkye hkrang la ai lam gaw, lamu ga htum hkra dan leng wa sai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Hebre 1:1-6

Ya hti na gaw Hebre masha ni hpang de shagun dat ai laika hta na rai nga ai.

Hpu nau ni e, Karai Kasang gaw moi na lakhtak e, prat mi hte prat mi lam amyu myu hku nna, myihtoi ni a n-gup hte ji wa ni hpe ga tsun da nu ai. Ndai hpang jahtum na aten ladaw hta shi a Kasha a n-gup hte anhte hpe ga matsun jaw da mani ai. Dai kasha hpe, sali wunli mahkra la na matu, Karai Kasang san da sai rai nna, shi a marang e ndai mungkan ga hpe hpan tawn da nu ai. Dai Kasha gaw Karai Kasang a hpung shingkang tu kabrim ai ahtoi rai nga ai hte, Karai a atai a hkrang sumla rai nga nna, shi hkang da ai mungga a atsam hte, shi yawng mayawng hte hpe bau sin nga ai. Ya, shut hpyit mara shatsai kau ya nna, matsaw ningtsang na daru magam a hkra maga de shi dung nga nna, lamu kasa ni hta shi grau reng ai amying hkam la sai hte maren, shanhte hta grau  reng ai wa tai nga ai. Kaning rai nme law, “Ngai sha Nang rai nga ndai; dai ni e ngai nang hpe shaprat sade ai;” bai nna, “Ngai gaw shi a Kawa tai nna, shi gaw Ngai sha rai na ra ai,” nga nna Karai Kasang tsun ai ga hpe, gara lamu kasa hpe shi tsun yu a ta? Dai hta kaga, shi a Kasha alat hpe mungkan ga de jashawn dat ai shaloi, Karai Kasang a lamu kasa ni yawng shi hpe nawku mu ga, nga nna tsun wu ai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 1:1-5, 9-14

Ya hti na gaw Yawhan a laika hta na Kabu Gara Shiga rai nga ai.

Shawng npawt e Mungga nga nga ai; dai Mungga gaw Karai Kasang hte rau nga nga nna, dai Mungga nan Karai Kasang rai nga ai. Dai Mungga gaw shawng npawt e Karai Kasang hte rau nga nga ai. Arai yawng mayawng hte gaw shi a marang e tai wa ai rai nna, shi n galaw lawm ai gaw langai mi pyi n nga ai. Shi hta e asak daju rawng nga ai rai nna, dai asak gaw, masha ni a nhtoi rai nga ai. mDai nhtoi gaw nsin hta htoi nga nna, nsin mahtang dai hpe n dang kau lu ai.

Mungkan ga e shangai wa ai masha yawng hte hpe jahtoi ya ai nhtoi nga nga sai: shi gaw nhtoi majing rai nga ai. Shi gaw mungkan ga e nga nga ai hte, mungkan ga mung shi a marang e tai wa sai; rai timung, mungkan ga gaw shi hpe n chye wu ai. Shi gaw shi a buga de du sa timung, shi a baw sang ni shi hpe n hkap la ma ai. Shi a mying ningsang hpe kam sham nna, shi hpe hkap la ai ni yawng hte hpe chyawm gaw, asai hte shaprat ai ni n rai, hkum shan a myit hte mung n rai, Karai Kasang e shaprat ai ni she rai nga ma ai. Mungga gaw masha tai wa nna, anhte hte rau nga nga sai. Dai rai nna, Kawa hta na prat wa ai Kasha shingtai a hpung shingkang zawn, shi a hpung shingkang hpe anhte mu lu saga ai.

Ya hti ai gaw Madu a Kabu Gara shiga rai nga ai.

2019:DU SA LADAW LABAN (4) NA MUNGGA

Yuda (Judea), shing n rai, Dingda mungdan hpe up ai hkawhkam gaw Ahaz; Israel (Dingdung mungdan) hpe up hkang ai hkawhkam gaw Pekah. Pekah gaw htingbu Syria mungdan na hkawhkam hte ninggun galung nna Yuda mung hpe agrawp kau na matu wang da ai. Ahaz gaw hkawhkam she nga tim, brang lawn sha naw re. Mungdan lahkawng e jawm wang da hkrum ai majaw hpyen masa hku tai htang na n byin mai ai.

Asum jaw mung n mai. Shi hte mung shawa shawa masha yawng nachying hkrit tsang nga ma ai. Ahaz gaw nau myit htum ai majaw, grup-yin na maigan masha ni a nat-jaw lailen hte maren, shi a shadang sha langai hpe sat nat hkungga nawng kau ai. Hpa mi laklai wa ai lam n nga.

Ndai zawn rai myit htum myit daw ai nga ai aten hta myihtoi Isaiah gaw Ahaz hpe shadum ai: “Karai Kasang hpe sha kam u; shaloi Yerusalem lawt lu na. Hpyen ni htingnut mat na ma ai,” nga ai. Ahaz gaw myihtoi a ga hpe n kam ai majaw, “Ngai Karai hpe n chyam yu na nngai” nga htan ya ai. Ahaz gaw mai-gan mung, Assyria hpyen ni a npu taw hkam kau yang tsamai na kun, nga myit wa ai. Ahaz kamsham myit n rawng ai rai tim, Isaiah gaw kumla jaw ai: “Mahkawn ma gaw shadang sha shangai na ra ai… Emanuel.” nga ai. Lachyum gaw ndai re: Karai Kasang gaw Shi a amyu masha ni hpe matut nna lam madun ya na, shanhte hte a’nga nga na, shanhte hpe n kau da na, ngu ai re.

Isaiah tsun ai ga hpe kadai wa kam lu na rai ta? Mahkawn ma (hkawnzin/hkawnsek) gaw shadang sha shangai na, nga ai. Shawng de kadai hta mung n byin yu ai amu. Myihtoi ni langai hpang langai, dai Hkye Madu Messiah du sa na lam hkaw tsun ma ai; shanhte tsun ai lam ni shada tai shai hkat ai lam n nga ai. Rai tim, Chyum Laika chye dum ai ni, mung-up Du Hkawhkam ni n kam ya ma ai; myit malai n hkraw ma ai. Dai majaw, labau hta, Isaiah gaw Ahaz hpe shadum ai ga tsun ai hpang shaning 800 ning na ai hpang she Messiah du sa ai.

Kabu Gara Shi-ga hta, Lamu Kasa gaw Yosep hpe yupmang hta sa tsun ai, dai hkawnzin shayi gaw Chyoi Pra Wenyi a atsam the hkriwang hta ma kap wa ai; hkrit myit n rawng ai sha dai shayi hpe woi la na tsun ai. Yosep gaw Ahaz hte n bung ai: Lamu Kasa tsun ai ga hpe kam ya ai. Kamsham ai myit gaw shi hta ung ang ai lam yawng hpe jahkoi kau ya ai. Shingra tara maka hta n byin mai ai lam hpe Yosep gaw makam masham a majaw, shi myit hta n hkawn hkrang lu ai rai tim, hkap la nu ai.

Myit ru ung ang ai aten ni hta anhte hpa galaw ra na ga ta? Ahaz hpe myihtoi wa sa shadum ai zawn, Yosep hpe yupmang hta Lamu Kasa sa shadum ai zawn, laklai ai kumla anhte n mu lu, n hkam la lu ai she law na re. Ung ang ai aten ni hta kumla hkrai myit mada nga nga kun? Myihtoi sa shadum ai she a’la nga na kun? Chyum Laika na mabyin ni gaw kam ging ai sakse ni rai nga ai; Chyum Mungga htawn tsun ai ni gaw myihtoi a shara e nga ai, gawng malai ni ni rai ma ai.

“Emanuel/ Karai Kasang anhte hte nga nga ai” ngu ai ga, galoi mung teng nga na re. Anhte n mu n ma ai rai tim, Karai Kasang gaw anhte the a’nga nga ai. Kasa Pawlu shadum ai the maren, dai Emanual/ dai Hkristu gaw anhte a madu… Shi Madu hta shaga la hkrum ai ni gaw chyoi pra ai asak aprat gawgap ra ai lam shadum ya ai.

2019:DU SA LADAW LABAN (4) NA CHYUM LAIKA

DU SA AI LADAW HTA LABAN 4

December 22, 2019

CHYUM MUNGGA DAW 1

Esaia 7:10-14

Ya hti na gaw myihtoi Esaia a laika hta na rai nga ai.

Madu gaw Yuda ni a hkawhkam Ahaza hpe, Na Madu Karai Kasang kaw lamik kumla hpyi u; sung ai shara e rai timung, matsaw lahta tang e rai timung, hpyi u, ngu nna tsun wu ai. Ahaza chyawm gaw, Ngai n hpyi na; Madu hpe n chyam yu na nngai, ngu nna htan wu ai. Shaloi Madu gaw, Dawi amyu ni e, madat la marit; nanhte gaw masha hpe n kaw n law di na hpa n nawn ai hta n-ga, nye a Karai Kasang hpe mung n kaw n law di na myit ni? Dai re majaw, Madu shi nan nanhte hpe lamik kumla madun na ra ai: yu mu, shayi hkawnsek naum nasin rai wa nna, shadang sha shangai na ra ai; shi a mying hpe Emanuela ngu nna shamying ya na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 1:1-7

Ya hti na gaw Roma masha ni hpang de San Pawlu shagun dat ai laika hta na rai nga ai.

Tsawra ai hpu nau ni e, Hkristu Yesu a ali ama, Kasa aya hta dang da nna, kabu gara shiga hkaw tsun na matu, Karai Kasang e san da hkrum ai ngai Pawlu  gaw, 3Karai Kasang a tsawra ai ni hte, chyoi pra ai masha tai wa mu ga shaga la hkrum ai ni, Roma mare na yawng hte hpe ga shana dat nngai. Karai Kasang gaw dai kabu gara shiga hpe, moi moi shi a myihtoi ni a n-gup hte Chyum Laika hta ndat da nu ai. Dai shiga gaw, Karai Kasang a Kasha a lam tsun dan nga ai: Masha a hkum shan hku nna shi gaw Dawi a aru arat rai nga ai; shi hta rawng ai san pra htum ai wenyi a lam hku nna rai jang, si mat ai ni kaw nna bai hkrung rawt wa ai majaw, mahkra dang chye ai, Karai Kasang a Kasha rai nga ai hpe shi madun dan ya ai. Dai wa gaw, anhte a Madu Yesu Hkristu nan rai nga ai.

Shi a mying ningsang hpe shagrau sha-a na matu, masha amyu baw shagu dai kam sham ai lam hpe madat mara mu ga, shi a marang e, shi a chyeju hte, Kasa aya anhte hkam la saga ai. Nanhte mung, Yesu Hkristu e shaga la ai ni rai nga myit dai majaw, dai amyu masha ni hte rau, Hkristu hte seng ai ni tai wa marit dai. Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw nanhte hta e a nga nga malit ga law.

Ya hti ai gaw Karai Kasang a mungga rai nga ai.

KABU GARA SHIGA

Mahte 1:18-24

Ya hti na gaw Mahte a laika hta na Kabu Gara Shiga rai nga ai.

Ya, Yesu Hkristu shangai wa ai lam ning rai nga ai: Shi a Kanu Maria gaw, Yosep e mahtan da sai rai nna, shan shada da garai n kanawn yang, shi gaw Chyoi Pra ai Wenyi a majaw na-um nasin rai wa sai. Shi a madu wa Yosep chyawm gaw ding man nga ai rai nna, shi a lam n shabrawng mayu ai majaw, lagyim dat kau na maw nga ai. Ndai lam ni hpe myit aru yu nga yang, Madu a Lamu Kasa langai mi yup mang hta shi kaw dan pru nna, Dawi a kasha Yosep e, na a madu jan Maria hpe la na hkum myit ru et; shi a na-um nasin gaw Chyoi Pra ai Wenyi kaw na rai nga ai; shi gaw shadang sha shangai na ru ai rai nna, nang shi a mying hpe Yesu ngu nna, shamying lu na rai nga ai. Kaning rai nme law, shi a amyu hpe tinang a shut hpyit mara kaw na hkye hkrang la ai wa shi rai nga ai, ngu wu ai.

De a lam yawng hte gaw, Madu shi a myihtoi a n-gup hte tsun ai ga dik wa u ga matu byin wa sai. Dai myihtoi wa gaw, yu u, shayi hkawnsek na-um nasin rai wa na rai nna, shadang sha shangai na ra ai. Shi a amying, Emanuela shamying ya na mara ai: de a ga lachyum, Karai Kasang anhte hte rau nga nga ai, ngu ai rai. Yosep yup pyaw kaw na rawt wa nhtawm, Madu a Lamu Kasa shi hpe hkang da ai hte maren galaw wu ai rai nna, Maria hpe shi a madu jan hku nna shi a nta de woi la nu ai.

Ya hti ai gaw Madu a Kabu Gara shiga rai nga ai.

2019:DU SA LADAW LABAN (3) NA MUNGGA

Matut nna Isaiah gaw myit daw hpa, myit kaji garen nga ai Karai a amyu masha ni hpe shalan shabran ya ai: “Dai Madu” du sa ai aten ladaw hta byin wa na amu ni a lam tsun ai. Teng sha Christu Madu du sa ai aten hta shinggyim masha ni hkam la lu na akyu ara ni a lam hpe sha’ang nna tsun da ai rai nga ai. Chyum Mungga madat la ai “Nang/ngai” a matu akyu hkam sha na lam tai lu na kun? Kamsham ai hte myit mada ala nga let, myit masin wenyi hkyen lajang da ai ni a matu sha rai na re.

Yawhan a Kabu Gara Shi-ga hta rai jang Yawhan Baptista gaw Yesu kadai re ai lam hkum nan chye la nna sape ni ning nga tsun nna Yesu a lam shachyen ya ai, “Mungkan mara la kau ya ai Karai a Sagu Kasha hpe yu mu!” nga ai.

Mahte ka da ai 11:2-11 hta rai jang bawng masha tai nga ai Yawhan Baptista gaw Yesu kadai re hkrak n chye ai zawn ka da ai. Mahte a yaw shada ai lam madung gaw ndai re: shawng shawng na daw ni hta Yesu madun dan ai lamik kumla ni gaw Hkye La Madu re ai lam hpe shadan dan ai re ai lam; grau nna shawng na Chyum Mungga Isaiah 35:1-6a, 10 e tsun da ai, dai Madu gaw Yesu Shi nan re ai lam hpe grau shadan ya mayu ai majaw re, ngu tsun lu ai.

Yawhan shi zaibru jang e mungga hkaw tsun ai shara de shara magup kaw na masha ni, hpung/ hpawng amyu myu na masha ni du sa madat la ma ai. Kamsham hkap la ai ni, myit malai lu ai ni shamai shatsai ai chyeju hkam la shajang ma ai. Karai a mungdan hpe hkap la lu ma ai. Tinang nang a shut hpyit mara ni hpe n yin la lu ai ni, hpaji chye dum ai ni, chyoi pra dinghpring dum ai ni gaw Hkye La Madu hkum nan hte hkrum katut ma ai rai tim, hkye hkrang la ai chyeju kumhpa ni hpe n hkam la lu ma ai. Bai, myit yu mai ai lam langai gaw Yawhan Baptista shi daram dinghpring ai masha, shangai wa ai ni yawng hta grau htum ai wa re, nga Yesu tsun ai. Dai daram hkik hkam ai masha pyi Hkye La Madu hpe tam sagawn la ra ai: “Nang gaw dai du sa maw ai Wa rai kun, shing n rai, anhte gaw kaga wa hpe naw a’ la nga ra ai baw rai kun?, nga ai. Anhte n ding n hpring ai ni gaw dai Hkye La Madu hpe kade atsam dat nna tam shakut ra ga ai, ngu ai lam re.

Dinghpring dik ai myihtoi kaba hkum nan pyi gaw Herod e rim sharen da ai kaw na n lawt lu ai, jahtum e baw htau sat kau hkrum ai. Hkye La Madu hkye shalawt dat ai chyeju n hkam la lu ai sha si mat ai rai kun? Anhte mung ru-yak kyindut amyu my hkrum ga yang, akyu hpyi mung shakut ga ai rai tim, tinang hpyi ai hku n lu la ai, Kaman tai mat ai, ngu nna hkam sha chye na ga ai.

Yawhan gaw jahtum aten du hkra, Karai e jaw ai magam_ sakse hkam ya ai amu hpe si hkam ai hku nna kangka ai hku gun hpai lai wa ai. Dai gaw kaba dik ai hku nna Karai Kasang shi hpe shagrau ya ai lam rai nga ai. Dai majaw, kaga Yesu a sape ni, kasa ni mung yawng ngu na daram mung, dinghta ga a du hkawhkam aya n hkam la ai, si hkam ai kaw prat jahtum ma ai.

Roma masha ni hpang de ka dat ai Kasa Pawlu a shagun laika hta ning nga ai: Madu rai n du sa ai ladaw laman hta myit galu hkam sharang nga mu, kamsham myit ngangkang ai hte a’la maja nga mu, nga ai. Anhte a shawng shawng e sakse hkam ya lai wa ai myihtoi ni, makam masham share shagan ni hkam jan ai kasi ningli ni hpe yu la na lam, shadum ninggun jaw ai.

2019:DU SA LADAW LABAN (3) NA CHYUM LAIKA

DU SA AI LADAW HTA LABAN 3

December 15, 2019

CHYUM MUNGGA DAW 1

Esaia 35:1-6, 10

Ya hti na gaw myihtoi Esaia a laika hta na rai nga ai.

Nam mali hte hkraw hkun ai shara gaw kabu gara na ra ai; Zaibru jang mung awng sharawng nna, mari pan zawn pu na ra ai; dai gaw grai wa pu an nna, sharawng let, kabu gara ai hte mahkawn mangwi na ra ai. Lebanon a arawng sadang, Hkamela hte Sharon a hpung shingkang, shanhte hpe jaw na ra ai; shanhte gaw Madu a arawng sadang, anhte a Karai Kasang a hpung shingkang hpe mu lu na ra ai. N-gun kya ai lata hpe n-gun shaja mu; gari ai lahput ni hpe shangang mu; da ting mu; hkum hkrit myit, nga nna myit kaji ai ni hpe tsun mu. Yu mu, nanhte a Karai Kasang gaw matai htang na matu du na ra ai; nanhte hpe hkye hkrang la na matu, shi nan shabrai kumhpa lang let du sa na ra ai.

Dai shani e, myi hten ai ni myi mu lu nna, na n na ai ni na lu na mara ai. Lagaw hten ai wa gaw shan nga zawn gumtawng lu nna, ma-a ai wa a shinglet mahkawn mangwi na ra ai; kaning rai nme law, hkraw hkun ai shara e hka hpawk hpaw nna, zaibru jang e lwi na ra ai. Madu a majaw hkye hkrang la hkrum ai ni gaw nhtang wa nna, mahkawn mangoi let Ziun bum de du na mara ai; shanhte a myiman htani htana kabu gara ai dan hkung na ra ai. Shanhte gaw awng sharawng let kabu gara nga nna, yawn hkyen ai hte madai ai gaw sim mat na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Yaku 5:7-10

Ya hti na gaw Yaku a shagun dat ai laika hta na rai nga ai.

Hpu nau ni e, Madu bai du sa ai nhtoi du hkra shakut sharang nga mu law. Yu mu, sun galaw ai wa gaw, ga a asau asi hpe ala nga ai rai nna, marang nhpaw hte hpang shaloi na marang dai ga hta e, htu shaya ai du hkra, myit galu ai hte shakut sharing nga ai. Nanhte mung shakut nga mu; Madu bai du sa na gaw ni magang ra ai majaw, myit hkum kaji nga mu. Hpu nau ni e, nanhte daw da ai n hkrum myit ga, shada da hkum aput angun nga mu; yu mu, tara agyi wa gaw chyinghka makau e tsap nga ai. Hpu nau ni e, ruyak kyindut hkrum ai shaloi, nanhte gara hku shakut sharang ra ai hpe sharin la na matu, Madu a amying ningsang hta hkaw dan ai myihtoi ni gaw, nanhte a kasi ningli tai wa malit ga.

Ya hti ai gaw Karai Kasang a mungga rai nga ai.

KABU GARA SHIGA

Mahte 11:2-11

Ya hti na gaw Mahte a laika hta na Kabu Gara Shiga rai nga ai.

Hkristu e galaw da ai magam amu ni a lam hpe Yawhan gaw htawng hta e na la jang, shi a sape nkau mi hpe shangun dat nna, Nang gaw, “ DAI DU SA NA RA AI WA” , rai nga nni? Shing nrai, kaga hpe anhte naw ala ra a ni? nga nna Yesu hpe san dat mu ai. Yesu htan let shanhte hpe tsun mu ai gaw, Nanhte na la ai hte mu la ai lam mahkra, Yawhan hpe wa tsun dan mu; myi kyaw ai ni myi mu lu ma ai; lagaw hten ai ni hkawm sa lu ai; mang gang kap ai ni san pra lu ma ai; na lahpang ai ni, na lu ma ai; si mat ai ni bai hkrung rawt ma ai hte, matsan mayan ni hpe kabu gara shiga hkaw dan nga ai; ngai a majaw myit n kataw ai wa gaw a lu nga ai, ngu nna htan ya wu ai.

Ya, dai dat kasa ni wa mat nga ai shaloi, Yesu gaw Yawhan a lam hpe lakap nna, shawa masha ni hpe tsun shadum ai gaw: Nanhte hpa hpe yu na matu nam mali de pru sa wa myit ta? Nbung e kanga ai mai-aw hpa rai ni? Dai nrai yang, hpa hpe yu na sa myit ta? Kya mani ai lai sumpan bu hpun ai wa rai ni? N rai law. Reng htum ai bu hpun palawng bu hpun ai ni hkawhkam ni a htingnu hta tam ra myit dai. Dai nrai yang, hpa majaw sa pru myit ta? Myihtoi langai ngai hpe sa yu na rai myit ni? Kaja wa, dai a majaw rai sai; nanhte hpe ngai tsun made ga: myihtoi hta grau kaba ai wa mung rai nga ai.

Kaning rai nme law, na a man e, na a lam lajang magang na matu, nye a Kasa hpe na a shawng de ngai shangun dat na we ai, nga nna Chyum Laika hta ka da ai gaw, Yawhan hpe nan shaang ka da nga ai. Nanhte hpe ngai teng teng tsun made ga: Numsha kaw na shangai ai ni yawng hta na, kashin kamun jaw ai Yawhan hta grau kaba ai marai langai mi pyi n paw pru ai: rai timung, sumsing lamu mungdan hta kaji htum ai wa gaw Yawhan hta grau kaba nga ai.

Ya hti ai gaw Madu a Kabu Gara shiga rai nga ai.

2019:DU SA LADAW LABAN (2) NA MUNGGA

Shawng na Chyum mungga, Isaiah Laika na labau pinra hpe shawng mada yu ga. BC. 587 ning hta Yerusalem hten bya mat ai. Hpyen ni gaw Israel/Juda masha hkying lam hpe Babylon de woi mat wa ai; shanhte hpe mayam shatai ai aten ladaw; Israel amyu sha ni Babylon e bawng dung nga ai hte lawt lu na lam myit mada shara n nga mat sai ladaw.

Isaiah gaw dai myit htum nga ai Karai a amyu masha hpe shalan shabran ninggun jaw ai hte myit mada lu ai lam jaw ya ai. Karai a Mungga gaw Israel masha ni amyu, htunghking, makam masham n mat hkra makawp maga ya lai wa ai.

Anhte amyu sha ni marai 100,000 mi jan, camp law law e machyu nga ma ai; Babylone e bawng masha hku nga lai wa ai Israel masha ni hte raw bung ai n rai tim, bung ai lam ni ram daw nga ai hpe myit dum mai ga ai. “Wunpawng Hkanan” ngu ai gabaw hte sha pyi masha law law hpe myit shapyaw myit rawt shangun lu ai lam dum na mi ai. “Wunpawng Hkanan”_ teng wa lu ai baw gaw rai kun? Camp masha ni gaw teng sha lawt mayu shajang ma ai; tinang nang a mare buga de wa mayu ma ai; tinang a salu salat hte shat tam sha mayu ma ai, dz., dz. Isaiah a mungga hta, “Yesse a hpundu kaw nna nnaw bai rawt na”…hpyen tai hkat ai ni shada htingram hkat lu na, simsa ai lam majing nga wa na lam tsun da ai. Dai Hkye La Madu du sa ai shaloi (labau hta du lai wa sai), dinghta ga ntsa e Isaiah tsun ai hte maren raw byin na kun? Byin nga sai kun? Hten za ai lam ni, n hkru n kaja ai lam ni, n ju n dawng tai hkat ai lam ni galoi e mung sha a mu nga na re. Myit mada shara n nga mat sai, hkraw si mat sai Yesse hpundu zawn rai hkam sha ai ni nga na ma ai; myit n daw ai ni a matu Karai Kasang gaw mau-hpa amu shabyin ya lu ai, ga-sadi nga ai.

Kamsham ai ni hpa galaw ra a ta? Kabu Gara Shi-ga e Yawhan Baptista tsun ai zawn, “Myit malai mu!, nga ai. Karai Kasang gaw lam kau e taw ai nlung tawng ni hpe pyi Shi a kasha ni shabyin shatai lu ai, nga ai. N kam sham ai ni _ myit malai n lu chye ai ni jahtum e lachyum n pru ai hpun zawn kran kau hkrum na; maza zawn wan nat kau hkrum na, nga ai.

Kasa Pawlu mung kamsham ai ni hpe shadum ya ai: myit galu hkam sharang ai a marang e, Chyum Laika gaw myit mada ai lam jaw ya ai, nga ai. Shada hkap bawp la nna tsawra matsan dum amu ni galaw ai a marang e, Isaiah tsun da ai ga, Karai a mungdan gaw shut  hpyit mara hte hpring ai dinghta ga e teng sha prut ja wa lu na rai nga ai.

2019:DU SA LADAW LABAN (2) NA CHYUM LAIKA

DU SA AI LADAW HTA LABAN 2

December 8, 2019

CHYUM MUNGGA DAW 1

Esaia 11:1-10

Ya hti na gaw myihtoi Esaia laika hta na rai nga ai.

Yese amyu a ndu hta nnaw rawt nna, shi a aru ni hta na makrung gaw asi si na ra ai. Madu a wenyi shi kaw sa nga nga na ra ai: hpaji byeng-ya hte shaleng ya ai, myit jaw ai wenyi, myitsu ai hte nden ja ai myit jaw ai wenyi chye chyang ai hte Madu hpe hkrit hkungga ai myit jaw ai wenyi shi hta e rawng nga na ra ai rai nna, shi gaw Madu hpe hkrit hkungga ai hta awng sharawng nga na ra ai. Shi mu hkrup ai hte maren, n daw dan ai hte, na hkrup ai hte maren n jeyang na ra ai: ding man ai hku hkan let shi matsan mayan ni hpe tara dara nna, myit malang ai hku hkan let, ahkaw ahkang n lu ai ni a hpang maga de daw dan na ra ai. Shi a n-gup ga ngu ai shingna hte, tinang ra ai hku shabyin na matu, nhtum nni di kau ai ni hpe kayat sharin ya nna, shi nten na pru ai nsoi  nsa hte tara nlang ai ni hpe sat kau na ra ai. Ding hpring ai gaw shi nshang a shingkyit, kangka re ai gaw shi hkum hkrang a shingkyit rai nga ai.

Shing rai, chyahkyawn gaw sagu kasha a manang tai nga nna, rawng gawk gaw bainam kasha hta rau hpum nga na ra ai; dumsu kasha hte hkanghkyi hkalung rau hkawm sa nna, ma kaji shan hpe dun woi na ra ai. Dumsu hte tsap rau ushat sha nna, de a hkalung ni rau hpum nga na mara ai; hkanghkyi gaw dumsu zawn yi hku sha na ra ai. Chyu chyu ai ma gaw pu htum a tsip ntsa e ginsup lu nna, chyu hka ai ma gaw pu hkram hku hta shi a lata manaw bang lu na ra ai. Nye a chyoi pra ai bum ting hta, shada da zingri ai hte, jahten shaza hkat na nrai, hpa majaw nga yang, nammukdara hka gaw shi a shara hpe lim kau ai zawn, Madu hpe chye chyang ai lam mungkan ting pri rai na ra ai. Dai aten e, Yese a aru gaw, masha amyu baw ni a matu dan hkung ai kumla tai na ra ai; shi shanu nga ai shara gaw, hpung shingkang rawng na ra ai majaw, maigan amyu ni shi hpe hkan tam na mara ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 15:4-9

Ya hti na gaw Roma masha ni hpang de Kasa Pawlu shagun dat ai laika hta na rai nga ai.

Hpu nau ni e, myit n htum ai sha, shakut sharang ai ni hpe, Karai Kasang shalan shabran garum ya ai lam, Chyum laika hta hti lu ai majaw, anhte myit mada shara nga lu u ga, shawng e ka da ai lam shagu gaw, anhte hpe sharin achyin ya na matu ka da nga sai. Ya anhte a Madu Yesu Hkristu a Kawa rai nga ai Karai Kasang hpe, nanhte myit mang langai sha hte, n-gup ga langai sha hte shakawn kungdawn nga lu myit ga, Hkristu Yesu a kasi ningli hpe hkan nna, nanhte shada da myit mang ara sha rai nga lu na matu, shakut sharang ai hte, shalan shabran ai lam mahkra a npawt daju Karai Kasang gaw, nanhte yawng hpe awng nga u ga law.

Dai rai nna, Karai Kasang a hpung shingkang a matu mara, Hkristu gaw nanhte hpe hkap hkalum la sai hte maren, nanhte shada da hkap hkalum la mu.

Ngai tsun nngai gaw: Ji wa ni kaw jaw da ai ga ndat hpe kangka ai hte shadik na matu chyu sha nrai, maigan amyu ni mung Karai Kasang a matsan dum ai chyeju a majaw, shi hpe shagrau sha-a lu mu ga, Hkristu gaw Yuda masha ni a ali ama tai wa sai. Shing rai, “Maigan amyu ni a ka-ang e, ngai nang hpe shakawn na nngai; Na a mying ningsang hpe mahkawn mangwi na nngai,” nga nna Chyum Laika hta ka da nga ai.

Ya hti ai gaw Karai Kasang a mungga rai nga ai.

KABU GARA SHIGA

Mahte 3:1-12

Ya hti na gaw Mahte a laika hta na Kabu Gara Shiga rai nga ai.

Kashin Kamun jaw ai Yawhan paw pru ai shaloi, shi Yuda nam mali hkan e tara hkaw nna, Sumsing lamu a mungdan du magang ra ai majaw, myit malai lu mu, nga nna tsun shana wu ai. Shing rai, myihtoi Esaia gaw, Nam mali kata e nsen jahtau tsun nga ai: Madu a lam lajang da mu, shi a lam masun ni hpe shading mu, nga nna Yawhan hpe sha-ang let tsun wu ai. Yawhan gaw gawla-u mun hte da ai nba bu hpun nna, shi a nshang e shan hpyi shingkyit kyit nga ai. Shi a shahpa mung, dinggam-yaw hte nam na lagat jahku rai nga lu ai. Dai shaloi e, Yerusalem na ni, Yuda mung ting na ni hte, Yawdan hka ginwang shara magup hkan na ni, Yawhan hpang de pru sa wa ma ai rai nna, tinang a shut hpyit mara hpe shapraw dan let, shi a lata hte Yawdan hka hta e Kashin Kamun hkam la ma ai.

Ya, Hparishe hte Saduke masha ni law law wa Kashin Kamun hkam la na nga, sa ma ai hpe Yawhan mu jang, shanhte hpe shi tsun mu ai gaw: Pu htum amyu ni e, du magang ra ai ari dan hta na hprawng wa lu myit ga, nanhte hpe kadai shadum myit ta? Dai majaw, nanhte teng teng myit malai lu da ai rai yang gaw, htap htuk ai asi si mu. Abraham gaw anhte a Wa rai nga mali ai, nga nna gumrawng ai hte nanhte a kraw e hkum tsun mu. Nanhte hpe ngai tsun made ga: Karai Kasang gaw ndai nlung ni hta na, Abraham a matu kasha ni hpe hpan shapraw da lu ai.

Ya e pyi, dai dingwa gaw hpun npawt nhpang hkan e tawn da nga ai. Dai rai nna, asi kaja n si ai hpun mahkra hpe kran daw kau nna, wan hta kabai bang kau nga ai. Ngai gaw, myit malai lu myit ga, hka hta nanhte hpe kashin kamun jaw made ai, rai timung, nye a hpang e du sa ai wa mahtang gaw, ngai hta n-gun grau ja ai wa rai nga nna, shi a hkyepdin gun na pyi ngai n ging n dan nngai. Dai wa gaw, Chyoi Pra ai Wenyi hte mung, wan hte mung, nanhte hpe kashin kamun jaw ya na ra ai. Shi a lata hta hkuwawn lang nga nna, shi a mam chyarang hpe shi yit jasan nhtawm, shi a mam hpe dum hta shinggyin bang da nna, mam nsan hpe chyawm gaw n sat lu ai wan hta nat kau na ra ai.

Ya hti ai gaw Madu a Kabu Gara shiga rai nga ai.

2019:DU SA LADAW LABAN (1) NA MUNGGA

Anhte mu man, na man ai ga-si, “Du Sa Ladaw,” ngu ai gaw kaja wa nga yang, “N du shi ai, n sa shi ai ladaw; du na maw ai wa hpe myit mada a la nga ai ladaw, maw mawn ai ladaw she re.

Sanpoi atsawm sha htai da lu ai jawng-ma gaw “D” kade lawm na kun, marks kade lu na kun, nga nna result shapraw ya ai nhtoi hpe a la nga ai wa zawn, yi mam asi ja tsawm ai majaw, myin wa na nhtoi, dan la shu la na nhtoi hpe a la nga nna kabu myit pyaw ai zawn, dai Hkye La Madu du sa na nhtoi hpe a la nga let, anhte mung kabu gara myit pyaw ai hte, Shi Madu hpe gingdan ai hku hkap bawp hkalum lu na matu hkyen lajang ang ga ai.

Dai “Myit mada ai” ngu ai ga-si a lachyum hpe ai rai n chye madat jang makam masham lam dam chye wa lu ai; myit daw chye na ga ai. Shawng na Chyum Mungga daw, Isaiah Laika hta tsun da ai lam ni galoi mi n teng wa ai, mungkan na mabyin ni galoi mung maren, grau kaja wa ai mi n mu ai; n tara ai ni dang sha ai masa nan nan, mungdan ni mung hpyen majan laknak grau grau shagreng shingjawng nga ma ai sha re, ngu, dz. dz., (dai zawn dai zawn) hkam sha chye na ga ai.

Dai zawn lachyum htai shut ai ni a matu gaw hpa mung hpa myit daw ai lam ni hkrai rai wa lu ai. Dai majaw, makam masham ru n jung ai ni masha ni gaw, dinghta e jaw ai baw mahtai ni hpe tam nna, chyahkring chyahkra shapyaw ya lu ai baw, myit-ru-hpa ni hpe gan shazim kau ya lu ai baw ni hte myit shadik la ai a marang e, hten bya nga ai ni law law nga ma ai. Tingkren machyu myit grau sawng wa lu ai hte, kadai a ntsa ai mung lit n la ai; sadi n dung lu, n ap nawng lu, manu n shadan lu, lachyum pru ai kanawn mazum lam mung n galaw lu, re ai prat de du mat lu ai rai nga ai.

Kabu Gara Shi-ga e shadum ai lam gaw ndai re: n mu lu ai, n masawp hkra yu lu ai rai tim teng sha galoi mung jaw nga na lam, grin ai tengman lam hpe manoi manat lu na lam re_ shada tsawra lakawn hkat ai lam, tsawra chye ai myit masin, gam jaw gam ya chye ai hta kabu lu ai lam, mara raw dat hkat ai lam a marang e myit simsa ai majing lu la mai ai lam, ndai zawn re ai ningli ningja ni hpe madung shatai ra ai lam re.

Grup-yin kaw na mu lu ai, na lu ai, byin nga ai hpa mi rai rai, Madu Shi du sa na gaw n shut n shai re. Gara nhtoi, galoi aten, ngu ai hpe kadai n chye lu ai rai tim, dai Madu du sa na hpe kam shut ai lam n nga ai sha, kam sham myit shagreng let, myit mada dingyang, tsawra matsan dum chye ai myit masin hta maju jung nna asak hkrung ga ai rai yang, kade kaning re ai hkrit-hpa tsang-hpa hpe rai tim tawt lai lu na ga ai.

2019:DU SA LADAW LABAN (1) NA CHYUM LAIKA

DU SA AI LADAW HTA LABAN 1

Decembrt 1, 2019

CHYUM MUNGGA DAW 1

Esaia 2:1-5

Ya hti na gaw myihtoi Esaia laika hta na rai nga ai.

Ndai gaw, Yuda mung hte Yerusalem mare a lam hte seng nna, Amot a kasha Esaia mu ai shingran rai nga ai. Du na ra ai prat hta e, Madu a nawku htingnu nga ai bum gaw, bum kaga ni a baw tai wa nna, kawng ni hta grau tsaw wa na ra ai; amyu baw mahkra dai de yan bang na mara ai; masha amyu law law wa sa du nna, sa marit, Karai Kasang gaw shi a lam anhte hpe sharin ya nna, shi a lam hku anhte hkan sa lu na matu, Madu a bum, Yaku a Karai Kasang a nawku htingnu de lung wa sa ga; kaning rai nme law, Ziun bum de na tara lam ni, Yerusalem mare na Madu a mungga pru na ra ai, nga nna tsun gara na ma ai. Madu gaw amyu ni a lam e tara dara nna, masha amyu law law hpe jeyang na ra ai; shanhte gaw tinang a nhtu hpe najawn, tinang a ri ni hpe nhkyau dup kau na mara ai; amyu mi gaw amyu mi hpe nhtu n shaw na hte, htawm hpang de hpyen majan sharin sa na n rai. Yaku a dap ni e, sa marit; Madu a nhtoi hta anhte hkan hkawm sa ga.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Roma 13:11-14

Ya hti na gaw Roma masha ni hpang de Kasa Pawlu shagun dat ai laika hta na rai nga ai.

Hpu nau ni e, Ndai aten gaw Karai Kasang lajang da ai chyeju prat re hpe nanhte chye nga myit dai majaw, nanhte ya e yup hprang wa na ra ai; kaning rai nme law, anhte shawng nnan kam sham sa ga ai hta, dai hkye hkrang la ai gaw anhte hta grau nna ni wa sai. Shana ahkying lai magang wa nna, shani nhtoi du magang ra ai. Dai re ai majaw, nsin hte seng ai amu mahkra hpe kau da nna, nhtoi a hpyen hkying hpe dagraw nga ga. Tangpyaw shalat ai hte chyaru nang ai, hkum shan kayut ai hte nse nsa galaw ai, ga li ga law ai hte manawn masham ai hpe, n hkan tam ai sha, shani chyingtung e masha ni sadi sahka ai hte hkawm nga ai zawn, anhte mung htap htuk ai hte a hkawm sa wa ga.Dai hta n-ga Madu Yesu Hkristu hpe bu hpun dagraw nga mu: hkum shan a marin marit ai hpe shadik na matu hkum maw hkum galaw myit.

Ya hti ai gaw Karai Kasang a mungga rai nga ai.

KABU GARA SHIGA

Mahte 24:37-44

Ya hti na gaw Mahte a laika hta na Kabu Gara Shiga rai nga ai.

Yesu shi a Sape ni hpe tsun mu ai gaw: No-a a prat e byin ai hte maren, Masha kasha bai du sa ai shaloi e mung bai byin na ra ai. Kaning rai nme law, dai sha-u garai n ing yang na masha ni gaw, No-a sanghpawli kata de shang wa ai nhtoi du hkra, lu lu sha sha, num la num ya rai nga ma ai rai nna, dai sha-u ing wa ai hte, yawng hte hpe magawn mat wa ai du hkra, 39shanhte ndum shami rai nga ma ai. Masha Kasha bai du sa ai shaloi mung, dai hku byin wa na ra ai.

Dai shaloi e, marai lahkawng hkauna pa e rau nga ai rai nna, langai mi gaw woi la ai hkrum ai hte, langai mi hti nga mat lu na ra ai; numsha lahkawng htumrin hta rau rin nga ma ai rai nna, langai mi gaw woi la ai hkrum na ra ai, langai mi hti nga mat lu na ra ai. Dai rai nna, nanhte a Madu gara shani e du wa na hpe nanhte n chye myit dai majaw, a maja nga mu. Nta madu gaw, lagut sa na ahkying hpe chye lu yang, shi a nta hpe n tawk waw u ga, shi dai hpe sin nga na ra ai dum nga mu. Dai rai nna, nanhte mung jin jin rai nga mu; kaning rai nme law, nanhte n dum shami re ai ahkying hta Masha Kasha du wa na ra ai.

Ya hti ai gaw Karai Kasang a mungga rai nga ai.

2019:HKRISTU HKAWHKAM POI SHANI NA MUNGGA

Hkristu Madu gaw hpan da hkrum ai baw yawng hpe uphkang na akang aya Karai Kasang gaw shi a lata hta ap da ya ai lam kamsham lu ga ai kun? Shi gaw amyubawsang shagu, mungdan shagu hpe Karai Kasang a mungdan gawde na matu, Karai Kasang e shi hpe lata san da sai. Dai lam hpe sakse hkam na matu dinghta ga de du sa nu ai; Shi gaw hkawhkam re ai lam tsun hpaw dan ai majaw, wudang ntsa e jen sat kau hkrum wu ai (Yn 18:37; Lk 23:38).

Karai Kasang gaw nga mi nga, hkrung mi hkrung hpe uphkang ai hkawhkam nan rai nga ai: Israel labau hta shawng shawng na daw hta hkawhkam n lu ma ai. Hpa majaw nga yang Karai Kasang hkum nan shanhte a hkawhkam rai nga ai. Dai lam hpe myihtoi Samuel shadum ya ai; rai tim, dai amyu masha myit ja ai majaw, shawng shawng na Sawlu gaw shawng shawng na hkawhkam tai wa ai. Myit dik hpa n tai lu ai. Karai Kasang gaw David hpe hkum nan lata san da ai; shi hta ru dun nna hkrawn hkrat ai marai langai hpe Karai e san da ai. Dai hkawhkam wa a tignyang tut tut a grin nga lu na lam, Karai gaw David hpe ga-sadi jaw ai (Shakawn Kungdawn 89:29). 

Israel amyu masha ni la dingda nga ai dai hkawhkam, Mesiah gaw dinghta ga na arawng sadang hte hpring ai, kaga amyu ni yawng e hkrit hkung ga ai hkawhkam, hkawhkawm David gawde da ai mungdan hta dam lada grau ai, hpyen yawng hpe awng dang lu ai hkawhkam rai na shadu ma ai. Yesu du sa ai aten hta shanhte n ju dik ai, shanhte hpe uphkang dip sha ai Roman amyu hpe gumlau woi ai share shagan baw hpan Mesiah hkawhkam hpe ala nga ma ai. Yesu gaw sape ni hpe hpaw tsun dan ai shaloi, “Masha Kasha gaw uphkang reng sha na matu n rai, dawjau ai amu galaw na matu du sa ai, nga ai. Du/ hkawhkam/ ningbaw ningla tai ai ngu ai gaw yawng a mayam rai lu na lam sape ni hpe sharin ya ai. Dai hta n’ga, jahtum e wudang ntsa e jen sat kau hkrum ai hku nna sha, Karai a mungdan hpe gaw sharawt lu na lam tsun ai. Hkristu gaw mungkan masha ni uphkang sha ai hkawhkam masa n rai; yawng a salum hpe uphkang ai hkawhkam she rai nga ai. Adip arip re ai ladat n rai; Shi Madu uphkang ai lam hpe n hkap la ai ni a salum hpe n up ai; hkap la kam ai ni hpe sha shi uphkang ai hkawhkam re. Nang/ ngai_ shi a uphkang ai hpe n ra sharawng jang daihkawhkam gaw adip arip di nna uphkang na n rai. Nang/ngai_ Shi a uphkang masa, tara ni hpe ra sharawng hkap la ai wa a masin salum hpe sha Shi uphkang na rai nga ai.

Moshe gaw magri hte shachyaw ai lapu hpe sharawt da ai shaloi, dap mada ai ni yawng lapu a chye hkang mai tsai mat ai zawn, Masha Kasha mung sharawt da ai hkrum na lam, wudang ntsa sat kau hkrum ai kaw na bai hkrung rawt ai hpang, amyu baw shagu hpe shi kahkyin gumdin lu na lam, dai wudang hta si hkam nna bai hkrung rawt ai wa gaw hkawhkam majing re ai hte, kamsham ai ni yawng hkye hkrang la hkrum na lam tsun ai.

Myit sumru na lam:

 Wenyi asak hte seng nna wenyi lam hku myit yu yang sha Yesu tsun ai mungga ni hpe chye na hkap la lu na rai nga ai.

 Anhte hpe uphkang ai ni, Du, agyi, salang, tsang hte tsang law law rai nga ma ai. Dai hta n’ga, nammak lawhpa myit, marin ai myit, ja gumhpraw, dinghta ga na arawng aya, dz., d., lu mayu byin mayu ai majaw dai baw hpan ni a uphkang reng hkang ai hpe mahtang hkam la ai kumla, Hkristu hpe n kam uphkang shangun mayu ai kumla ni, anhte kadai mung n lawt lu ga ai.

Lam shagu hta Hkristu Yesu hpe yawng hta grau ai wa hku nna tinang nang hpe uphkang reng hkang na ahkaw ahkang jaw ga ai kun?

Nang/ ngai_ ahkaw ahkang jaw jang sha Hkristu gaw na matu/ngai a matu hkawhkam teng na rai nga ai.

Nang/ ngai_ lu la ai ahkng aya, arawng aya hpe gara hku akyu jashawn ga ai kun? Dang sha na matu, shing n rai, dawjau na matu rai kun?

2019:HKRISTU HKAWHKAM POI SHANI NA CHYUM LAIKA

PRANWAN LADAW HTA LABAN 34

November 24, 2019

HKRISTU HKAWHKAM WA A POI

CHYUM MUNGGA DAW 1

2 SAMUELA 5:1-3

Ya hti na gaw, myihtoi Samuela a laika lahkawng hta na rai nga ai.

Israela amyu lakung ni yawng hte gaw, Hebron mare de Dawi kaw sa nna, Yu u, anhte gaw na a nrut nra, na a hkum shan rai nga ga ai. Moi shawng de anhte a ntsa e Sawlu gaw naw up nga yang, nang hkum nan Israela amyu hpe woi pru woi shang ai wa rai nga nit dai: Madu mung Nang gaw nye a amyu Israela hpe woi rem na wa hte, nye a amyu Israela a ntsa e Du Magam nang tai lu na ndai, nga nna Dawi hpe tsun ma ai. Shing rai Israela agyi salang ni yawng, Hebron mare de hkawhkam wa kaw sa du ma ai; Dawi hkawhkam mung, dai Hebron mare hta Madu a man e shanhte hte ga shaka tawn da wu ai rai nna, shanhte mung Dawi hpe namman chya ya nna, Israela a hkawhkam shatai damu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

KOLOSE 1:12-20

Ya hti na gaw, Kolose masha ni hpang de San Pawlu shagun dat ai laika hta na rai nga ai.

Nhtoi a mungdan hta e Chyoi Pra ai ni hte rau Sali wunli hpe jawm hkam la lu hkra, Kawa Karai Kasang nanhte hpe shaging shadan ai majaw, anhte Shi hpe chyeju dum shakawn nga ga ai. Kawa gaw nsin a ahkang aya kaw na anhte hpe mawai la nna, Shi a tsaw ra ai Kasha a mungdan hta jashawn ya mi ai. Dai kasha hta e shalawt dat ya ai hkrum nna, mara raw dat ya na akyu hpe anhte lu la saga ai. Kasha gaw myi e n mu lu ai Karai Kasang a hkrang sumla rai nga ai hte, hpan da ai baw yawng mayawng hta na alat ningshawng rai nga ai.

Sumsing lamu hte ginding aga hta nga ai yawng mayawng hte gaw, Kasha hta e hpan tawn da nga sai: mu lu ai baw sha n-ga, anhte n mu lu ai, hkawhkam tingnyang hta dung ai ni, ahkaw ahkang lu ai ni, up hkang na ahkang aya lu ai ni hte, hpung dagu rawng ai ni nlang hte gaw, Kasha a marang e, Shi a matu mara, hpan tawn da nga sai; hpa mung garai n hpan da yang, Shi nga nga sai hte, yawng mayawng gaw Shi a majaw grin nga ai. Nawku Hpung gaw Hkristu a hkum hkrang rai nga nna, Shi mahtang de a abaw rai nga ai. Shi gaw lam shagu hta kaba htum ai ningbaw ningla tai u ga, dai Hpung a npawt nhpang rai nga ai hte, si mat ai ni kaw na alat ningshawng wa rai nga ai.

Kaning rai nme law, Kawa myit ra ai majaw, Hkristu hta e Karai Kasang a atai hkum hkum tsup tsup rawng nga sai. Yesu Hkristu udang hta si hkam nna htingrai htingrat ya ai shaloi, Karai Kasang gaw yawng mayawng hpe Shi hkum hte htinglu htinglai ya nga ai: rai sa, sumsing lamu e nga ai hte hpe rai ti mung, ginding aga e nga ai hte hpe rai ti mung, Hkristu a lata e htinglu htinglai ya nga ai hpe Karai Kasang lajang da wu ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 23:35-43

Ya hti na gaw, Luka a laika hta na Kabu Gara Shiga rai nga ai.

Mung masha ni gaw Yesu hpe mada yu let tsap nga ma ai. Du aya lu ai ni mung shi hpe asawng asang nga nna, Masha kaga hpe shi hkye la ai; ndai wa gaw Karai Kasang a Hkristu ngu ai, Karai Kasang lata ai wa rai yang gaw, shi hkum nan hpe shi hkye la u ga, nga ma ai. Hpyen la ni mung sit sa nna hkri ai tsabyi chyaru ladawn jaw nhtawm, Nang Yuda ni a hkawhkam rai yang gaw, na hkum hpe nang nan hkye la u, nga nna shi hpe roi ma ai. Shi a ntsa e mung, Ndai wa gaw Yuda ni a hkawhkam rai nga ai, ngu ai laika shakap da nga ai.

Wudang hta noi nga ai damya langai mung, Nang gaw Hkristu n rai nni? Na a hkum hte an hpe mung hkye la mi, ngu nna shi hpe roi wu ai. Langai wa mi chyawm gaw, Karai Kasang hpe pyi n hkrit nni? An gaw an a mara majaw hkrum ging ai hte maren, daw dan ai hkrum saga ai: ndai wa chyawm gaw n hkru n kaja ai hpa mung galaw wu ai n rai, nga nna dai wa hpe daru let htan wu ai. Shing nga nhtawm dai damya gaw, Yesu e, Nang na a mungdan hta du wa yang, ngai hpe dum rit law, ngu nna hpyi wu ai. Shaloi Yesu gaw, Ngai nang hpe teng teng tsun de ga, Dai ni jang nang ngai hte Hparadisu e nga na rin dai, ngu nna shi hpe htan wu ai.

Ya hti ai gaw Madu a Kabu Gara Shiga rai nga ai.

2019:PRANWAN LADAW HTA LABAN (33) MUNGGA

English ga hku, “Do not lead us into temptation/ test”, ngu ai gaw, Jinghpaw ga hku "agung alau de anhte hpe hkum du shangun e" (anhte hpe n du shangun ai sha), nga ai hpe ya na Wa Sarabyin Francis gaw, “Anhte agung alau de du bang na ahkang hkum jaw e (hkum hkraw ya e)”, ngu galai lang na ra sharawng ai. Italian Bishops’ Conference (Saradaw Hpung Rapdaw) hku nna gaw dai hku galai lang na lam hpe hkap la sai lam chye lu ai; dai majaw, English hku, “Do not lead us into temptation”, ngu ai hpe, “Do not allow us to fall into temptation” ngu galai lang ai (Universal madang n rai shi ai) lam chye lu ai.

Mai kaja dik ai Kawa Karai Kasang gaw Shi a kasha ni hpe agung alau de kanawng bang na, du shangun na gaw n mai byin ai. Ndai dinghta ga ntsa e agung alau ngu ai gaw galoi mung, kanang e mung nga nga ai, koi yen shaja na lam sha mai byin ai. Dai majaw, Wa Sarabyin Francis ra sharawng ai mahtang grai hkrak dum ai. Dinghta ga e agung alau kade law htam timung, gunglau n katut na lam, Karai e ahkang n jaw, n hkraw ya na lam akyu hpyi ra ga ai re.

Chyum laika sara San Jerome a commentary (shi htai ai) hta rai jang dai agung alau ngu ai gaw “Test” /chyam dinglik hkrum ai hpe tsun ai, hpang jahtum na tara jeyang hkrum ai aten na hkrit-hpa hpe sha’ang tsun ai, nga ai. Kaja wa Yesu gaw dai akyu hpyi ga sharin ya ai shaloi, Yerusalem hten bya na lam hpe tau nau shadum let, nachying ruyak shoi-hpa hkrum shajang na lam tsun shadum ai. Dai du maw ai shoihpa hkrit-hpa hpe tinang nang n katut sha na matu, koi lu na matu akyu hpyi shangun ai rai nga ai.

Yerusalem hten bya ai shani, mare kaw na hprawng lawt lu na lam mare chyinghka langai nga ai. Dai chyinghka gaw gyip ai: masha law law kalang ta yan htaw pru lawt na n mai byin ai. Yesu shi hkum hpe shi tsun ai, “Ngai gaw pru/shang chyinghka rai li ai; dai chyinghka hku shang wa ai wa gaw shim lum lam lu la nna, dai chyinghka hku pru sa ai wa gaw tsit lali ai wudat shara de du na ra ai” nga ai (Yn 10:9). Bai, gyip ai chyinghka hku shang mu, nga nna mung sape ni hpe matsun ai. Madu Yesu shi sharin ya ai, tsun shadum ai ga ni hpe kamsham madat mara ai ni gaw asak lawt lu ai hte asak a chyeju n-hpaw n-ya hkam la lu na rai ma ai.

Shani shagu, “Madu a akyu hpyi ga” tsun ga yang, hkrit tsang-hpa, shut hpyit mara de hkrat bang na tsang-hpa, myit daw lu ai hkrat sum lam, n dang sharang na daram re ai shoi-chyum hpa ni hpe n hkrum na lam, koi yen lu na lam akyu hpyi ga ai re. Recruit lung ai, hpyenla tai na matu sharin hkam la ai aten hta, hkrit tsang-hpa dut dang ai baw hpan law law, mahkam law law jahkrat da ya ai. Yawng hpe tawt lai lu hkra shaman ra ai; n myit mada ai kajawng kaja byin wa chye ai baw ni hpe gara hku hkap tai htang na, lawt lu hkra gara hku maja ra ai, ngu ai baw ni hpe sharin shaman ya ai. Wenyi lam hta mung dai hte bung ai; agung alau ni law law nga ai rai tim, tawt lai lu na lam, koi yen lu na lam, dingrun akyu hpyi let maja nga ra ga ai.

Ndai dinghta ga e sum yu, dang yu rai ga ai. Ahkyak dik ai gaw tinang a prat jahtum e awng padang lu la na ahkyak ai. Dai awng padang lu la na matu shani shagu akyu hpyi ra ga ai. Dinghta prat hta tara jeyang ai lam kaw na lawt lu ai ni law law nga ma ai. Rai tim, jahtum na aten, yawng hpe Madu Yesu shi jeyang ai aten du na ra ai. Dai jeyang dawdan ari dam jaw ai hpe n hkrum n katut na lam (San Jerome htai ai zawn) dingrun akyu hpyi ra ga ai.

Myit sumru na lam:

 Hten bya ai de du mat ai, ngu ai gaw kalang ta hten za mat ai n rai; gau ngwi ngwi rai, aten galu shaman ai majaw, myit ja hta ja rai nna sharai la n mai ai kaw du mat wa ai re.

 Dai hte maren, mai kaja ai, sari sadang hte hpring ai madang de du na matu mung gau-ngwi ngwi aten galu shaman nna sha lu la mai ai baw re.

 Kalang ta hten mat ga ai n rai, kalang ta masha kaja tai wa lu ai n rai. Masha kaja tai na matu, ruyak shoi-hpa ni hte kaga agun alau ni hpe dang kau na matu, hkam jan lu na matu, tinang nang a atsam hte hkrai sha n byin mai ai. Karai Kasang a shaman chyeju, hkam jan awng dang lu ai chyeju kade she ra a hka?

2019:PRANWAN LADAW HTA LABAN (33) NA CHYUM LAIKA

PRANWAN LADAW HTA LABAN 33

November 17, 2019

CHYUM MUNGGA DAW 1

MALIHKI 4:1-2

Ya hti na gaw, myihtoi Malihki a laika hta na rai nga ai.

Dai Nhtoi du ra ai; dai gaw wan mang zawn grung kahtet nga ai: gumrawng gumtawng ai ni hte, tara n lang ai amu galaw ai ni yawng, yi hku ndu tai na mara ai. Du ra ai nhtoi gaw, npawt ndung n ngam hkra, shanhte hpe hkru kau na ra ai, nga nna Zaw nawng Zaw wa up ai Madu tsun ai. Nye a amying hpe hkrit hkungga ai ni a ntsa e chyawm gaw, ding hpring shangun ai ajan gaw, shamai shatsai ai atsam hte du pru na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

2 HTESALONI 3:7-12

Ya hti na gaw, Htesaloni masha ni hpang de San Pawlu shagun dat ai laika lahkawng hta na rai nga ai.

Anhte kasi ningli hte maren gara hku hkan sa galaw ra ai lam hpe nanhte nan chye nga ndai. Anhte gaw nanhte hte rau nga ai shaloi, lagawn lamawn rai nna kaman nga nga ai n rai; manu n ya ai sha, kadai wa a lusha hpe mung anhte n sha saga ai. Nanhte hta na langai a ntsa de lit li ai n shangun u ga, amu magam hte ru yak ai hta, anhte shani shana bungli galaw saga ai. Shing rai galaw ai gaw, nanhte anhte hpe n bau ra ai majaw n rai; anhte galaw ai hte maren, nanhte hkan galaw lu na matu, nanhte a matu kasi ningli tai saga ai.

Nanhte hte rau naw nga nga yang, Amu bungli n kam galaw ai wa gaw shat mung n sha u ga, ngu nna nanhte hpe htet da ga ai. Nanhte hta lawm nga ai ni nkau mi gaw lagawn lamawm rai nna, hpa amu bungli n galaw ai sha, tinang hte n seng ai hta hkan kajam nga ma ai hpe, anhte na la saga ai. Shing rai galaw nga ai ni gaw, ti nang a asak bau ya na matu, amu bungli hpe atsawm sha hkan galaw mu ga, ngu nna anhte hkang dat ai hte shadum jahprang ya nga ga ai.

Ya hti ai gaw Karai Kasang a mungga rai nga ai.

GABU GARA SHIGA

LUKA 21:5-19

Ya hti na gaw, Luka a laika hta na Kabu Gara Shiga rai nga ai.

Dai nawku htingnu gaw reng hkik ai nlung hte mung, alu kumhpa ni hte mung, mawn sumli da ai rai nga ai, nga nna nkau mi tsun yang, Yesu gaw, Nanhte mu nga ai arai ni gaw, nlung langai mi a ntsa e langai mi n mara hkra, mahkra hten bya ai nhtoi du na ra ai, ngu mu ai. Shing nga jang shanhte gaw, Sara e, dai zawn galoi byin wa na rai ta? Dai byin na ni wa magang jang, hpa kumla dan pru na ra ta? ngu nna Yesu hpe san mu ai. Shaloi shi gaw, Nanhte hkalem kau ai n hkrum myit ga, sadi nga mu; kaning rai nme law, masha law law wa nye a amying hte paw pru nna, Ngai gaw dai wa rai nga nngai, ahkying mung du ra ai, nga nna tsun na mara ai: shanhte a hpang hkum hkan nang nga myit. 

Hpyen gasat ai hte gumlau rawt ai lam na yang, hkum hkrit myit: dai lam ni gaw shawng byin wa na ra ai: rai ti mung, jahtum ai gaw, dai shaloi jang, rai na n rai, ngu mu ai. Bai Yesu gaw shanhte hpe tsun mu ai gaw: Amyu mi hte amyu mi, mung mi hte mung mi shada da gasat hkat na mara ai; nnang nawn kaba wa ai mung, shara kaga ga hta ana zinli hte hku hku ai byin wa na ra ai: sumsing lamu de na hkrit hpa hte lamik kumla kaba mung dan pru na ra ai. Rai ti mung, dai lam yawng garai n byin yang, masha ni gaw nanhte hpe rim la nna, zingri zingrat di nhtawm, tara jawng ni hte htawng ni hta ap kau na myit dai; nye a amying majaw hkawhkam ni hte du ni a man de nanhte hpe sa bang kau na mara ai. Dai shaloi e, nanhte nye a matu sakse hkam ya na aten rai nga ai.

Dai re ai majaw, nanhte kaning ngu nna hkap tsun htan na, n tsang ra sai: kaning rai nme law, nanhte a hpyen ni nlang, n hkap htang lu hkra, ngai nanhte hpe n-gup ga hte hpaji jaw na made ai. Nanhte gaw kanu kawa ni kahpu kanau ni, mayu dama ni hte jinghku jingyu ni e pyi, ap kau ai hkrum na marin dai: shanhte gaw nanhte hta na nkau mi hpe sat kau shangun na mara ai: nye a amying majaw masha yawng mayawng nanhte hpe n dawng n yawt na mara ai. 18Rai ti mung, nanhte a kara singgawng langai mi pyi, hten lu na n rai. Nanhte hkam sharang yang gaw, tinang a matu asak hpe lu la na marin dai.

Ya hti ai gaw Madu a Kabu Gara Shiga rai nga ai.

2019:PRANWAN LADAW HTA LABAN (32) MUNGGA

Tara Jahprang 25:5-6, Moshe a tara matsun hta shadang sha langai gaw hkungran ngut ai hpang kasha n lu ai si mat ai rai yang, kanau wa mahtang kahpu a gaida jan hpe kahkyin la nna amyu matu mara shalat ya ra ai htung nga ai. Dai majaw, bai hkrung rawt ai lam hpe n kamsham ai Saduke ni gaw Yesu hpe hkap shama na matu ga-san san ma ai. Dai zawn kahpu kanau ni marai sanit gaw numjan langai hte sha kanawn lai wa ma ai hpang, aten du jang yawng si mat ai. Bai hkrung rawt ai shani dai numjan a madu wa ngu na kadai mahtang rai lu na, ngu san ma ai. Madu Yesu htan ya ai gaw_ hpang na prat hta num la num ya, dinghku de ai ngu nna n nga ai lam, yawng gaw lamu kasa ni zawn sha rai na lam tsun ai.

Madu Yesu gaw Chyum Laika hpe madi madun ai, Saduke ni Moshe labau hpe chye ai, hkap la ai ni rai ma ai. Wan chyi nga tim n hkru krawp mat ai sumwuma lam, Karai Kasang Moshe hpe tsun ai ga hta, “Karai Kasang gaw Abraham a Karai Kasang, Isak a Karai Kasang, Yaku a Karai Kasang re ai lam” tsun ai. Dai hta Karai gaw htani htana ahkrung ai wa, hkrung nga ai ni a Karai Kasang re ai lam tsun ai. Si mat ai ni bai hkrung rawt na lam hpe madi madun ai: Karai Kasang gaw chyasi ni a Karai Kasang n rai, ahkrung nga ai ni a Karai Kasang rai nga ai.

Makam masham shagu hta wenyi mungkan nga ai, hpang na prat nga ai, ngu ai lam hpe kam ai; laklai ai lam gaw Yesu chyu sha si mat ai masha ni bai hkrung rawt na lam tsun ai.

“Lamu Kasa ni zawn…” ngu ai hta shut kataw n chye ai, htani htana ahkrung nga ai, yawn hkyen ai lam n nga ai, tutnawng dinggrin pyaw nga lu ai, dz., dz., ra kadawn ai lam n nga, nga-mu nga-mai ai lam rai nga ai. Dinghta ga e pyaw ai, ngu ai baw sumsing mungdan hta hpa n rai mat ai.

“Num jaw num la ai lam n nga ai” ngu ai hta Karai a asak hta jawm pawng ai lam, Karai a asak hte bung ai lam rai nga ai. Makam masham a majaw ndai prat hta dinghku n de ai ni law law nga ma ai. Dai gaw, makam masham hpe tup hkrak kamsham ai lam sakse hkam ya ai amu re.

Myit sumru na lam:

 Htawm hpang prat, Lamu Kasa ni hte bung ai hku nga lu na, ngu ai lam hpe kade manu shadan chye ga ta?

 Bai hkrung rawt na re ai tinang a hkum shan hpe manu shadan chye ga ai kun?

 Ndai dinghta ga na pyaw hpa ni hpe sumsing mungdan na asak a chyeju kumhpa ni hte shadawn n mai ai lam kam ga ai rai yang, dinghta ga e hpa mi marin shajang nga na ga ta?

 Jau, Mama ni dinghku n de ai lam gaw hpa a majaw ta?

2019:PRANWAN LADAW HTA LABAN (32) NA CHYUM LAIKA

PRANWAN LADAW HTA LABAN 32

November 10, 2019

CHYUM MUNGGA DAW 1

2 MAHKABI 7:1-2, 9-14

Ya hti na gaw, Mahkabi a laika lahkawng hta na rai nga ai,

Dai aten hta e hkawhkam Antioku gaw Yuda amyu na kanu langai mi hte, shi a shadang sha sanit hpe rim la mu ai. Hkawhkam wa gaw shanhte hpe, tara jep da ai hte maren wa shan sha shagwi na matu, aja awa anu kayet da mu ai. Shaloi dai kasha ni hta na kaba htum ai mahtang gaw, Anhte kaw na hpa baw tam nga nta? Anhte a ji woi ji wa ni a tara nsang hpe tawt lai ai hta, si hkam na grau nna mai nga ai, ngu nna tsun wu ai.

Dai hpang lahkawng re ai kasha gaw nsa hti wa ai shaloi, N hkru n kaja ai wa e, nang gaw ndai prat kaw nna anhte a asak hpe jahtum kau ya lu ndai; rai ti mung, nga yawng nga pra a Hkawhkam wa gaw, shi a tara a majaw si hkam ai anhte ni hpe bai jahkrung ya na hte, n htum n wai ai asak anhte hpe jaw na ra ai, ngu nna hkawhkam wa hpe tsun wu ai. Dai hpang, masum re ai kasha hpe zingri zingrat di kau ma ai. Shanhte shi a shinglet shaw shangun yang, shi shinglet shaw nna, lata hpe mung ladawn ya ai hte, Ndai ni hpe Karai Kasang kaw nna ngai lu la ni ai; Karai Kasang a tara lam ni a majaw, ngai ndai daw shan ni hpe manu n shadan nngai; hpa majaw nga yang, htawm hpang de Karai Kasang bai jaw na ra ai hpe ngai myit nga nngai, ngu nna tsun wu ai.

Dai shabrang wa a nden ja ai myit a majaw mung, shi yubak nni nkri hpe hpa zawn n nawn ai majaw mung, hkawhkam hte shi a ali ama ni mau mat nga ma ai. Masum re ai kasha si mat ai hpang, dai hte maren Ma Tu hpe mung, zingri zingrat di ma ai. Dai kasha gaw nsa hti wa maw ai shaloi, Anhte lata la ai lam grau kaja nga ai: masha a lata e anhte si hkam ra ai, rai ti mung, Karai Kasang ga ndat ai hte maren, anhte bai hkrung rawt wa na ra ga ai. Nanhte mahtang gaw, bai hkrung rawt wa na hte, asak nnan lu la na matu, hpa myit mada shara n lu ai, ngu nna jahtau tsun wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

2 HTESALONI 2:16-17, 3:1-5

Ya hti na gaw, Htesaloni masha ni hpang de SanPawlu shagun dat ai laika lahkawng hta na rai nga ai.

Ya, anhte hpe tsaw ra nga nna, Shi a chyeju marang e, ra ai lam shagu hta anhte hpe shalan shabran ya ai hte, mai kaja ai myit mada shara jaw ya ai, anhte a Wa Karai Kasang hte anhte a Madu Yesu Hkristu nan, nanhte a myit masin hpe shalan shabran ya nna, mai kaja ai amu bungli hte ga sumtu amyu myu hta, nanhte hpe naw shangang shakang ya u ga law.

Bai, lam mi gaw, hpu nau ni e, anhte a matu mara akyu hpyi nga mu. Madu a mungga gaw anhte hta chyam wa ai zawn, shara shagu hkan e alawan maden jat wa nna, masha ni hkungga lara ai hte dai hpe hkap la lu mu ga, akyu hpyi nga mu. Bai nna, myit n galai hkraw ai ni hte, n hkru n hkra ai masha ni kajam galam ai hta na; anhte mawai la ai hkrum lu u ga, akyu hpyi ya mi: kaning rai nme law, masha shagu wa makam masham kumhpa lu la ai n rai.

Dai Madu chyawm gaw kangka nga ai rai nna, Shi nanhte hpe shangang shakang ya nna, n hkru n kaja ai wa kaw na sin makawp maga na marin dai.

Anhte htet da mada hte hpe nanhte galaw nga nna, naw a galaw nga na marin dai, ngu nna Madu hta e nanhte a lam kam hpa nga ga ai. Karai Kasang a tsaw ra ai hte Hkristu a shakut sharang ai de, dai Madu nan, nanhte a myit masin hpe

yawng shangun dat u ga law.

Ya hti ai gaw Karai Kasang a mungga rai nga ai.

KABU GARA SHIGA

LUKA 20:27-38

Ya hti na gaw, Luka a laika hta na Kabu Gara Shiga rai nga ai.

Bai hkrung rawt wa na lam n nga ai, nga nna tsun sharin ai Saduke hpung hta na nkau mi gaw, Yesu kaw sa du nna, Sara e, num lu ai kahpu wa, kashu kasha n kap ai si mat yang gaw, kahpu a gaida hpe kanau wa hta la nna, kahpu a matu kashu kasha shaprat u ga, nga nna Mawshe gaw anhte hpe ka da ya mani ai. Ning re ai shan nau ni marai sanit rai nga ma ai; shawng na wa gaw num la nna, kashu kasha n kap ai, si mat wa ai. Hpang na wa mung, masum ngu na wa mung, dai kahpu a gaida hpe hta ma ai: hpang jahtum e dai numsha mung si mat wa ai.

Dai rai nna, bai hkrung rawt ai hta, dai numsha gaw shan nau ni hta na gade a madu jan mahtang tai na ra ta? Kaning rai nme law, marai sanit a madu jan shi tai yu sai, ngu nna Yesu hpe san mu ai. Shaloi Yesu gaw, Ndai dinghta masha ni gaw, num la num ya galaw nga ma ai: hpang na prat hte, si ai kaw na bai hkrung rawt wa ai de du ging ai ni chyawm gaw, num la num ya ngu ai n nga ma ai. Dai ni gaw htawm hpang e si hkrung si htan n hkrum lu masai rai nna, lamu kasa ni zawn rai nga ma ai. Shanhte gaw bai hkrung rawt ai a kashu kasha ni rai ma ai majaw, Karai Kasang a kasha ni rai nga ma ai.

Mawshe gaw wan grung ai singwum a lam hpe hkai dan ai shaloi, si ai ni bai hkrung rawt wa ai lam hpe madun dan nu ai. Hpa majaw nga yang, Mawshe gaw dai Madu hpe ga tsun ai shaloi, Abraham a Karai Kasang, Isak a Karai Kasang, Yaku a Karai Kasang ngu nna tsun wu ai. Ya, Karai Kasang gaw si ai ni a Karai Kasang n rai, hkrung nga ai ni a Karai Kasang she rai nga ai: yawng mayawng hte gaw Shi a man e hkrung nga ma ai, ngu nna dai Saduke ni hpe Yesu htai ya mu ai.

Ya hti ai gaw Madu a Kabu Gara Shiga rai nga ai.

2019:SAN PRA AI NI YAWNG MAYAWNG A POI SHANI NA MUNGGA

“Kabu gara nga mu! Sumsing Mungdan e nanhte hkam la na shabrai kumhpa mahtang kaba la ai” Ndai dinghta ga e myit pyaw myit dik ai lam n mai byin ai, ngu tsun shajang na ma ai. Kabu Gara Shi-ga mahtang byin mai ai lam tsun ai. Madu Yesu bum ntsa e hkaw tsun ai mungga hta, mungga madat ai ni hpe tsun ai, “Kabu gara myit pyaw myit dik mu….” nga ai. Ndai dinghta ga e myit pyaw myit dik lu ai lam, byin mai ai lam, Sanpra ai masha law law sakse hkam da ma ai.

Budda Gawdama gaw hkawhkam kasha, ra n rawng hkra lu su nga mai ai rai tim, kabu gara myit pyaw myit dik ai lam hpe jaw lu ai machye machyang hkan tam ai; tara hpe mu la ai: tinang hkum hte hpawn, yawng mayawng hpe kau da nyet kau ai majaw, mayu ai, marin ai myit tsepkawp n rawng sai, nga ai madang hta myit pyaw myit dik lu ai, nga ai. Sanpra ai masha ni mung dai zawn shaman shakyang nna myit pyaw myit dik ai prat hpe lu la ma ai.

Gawdama hte Sanpra ai masha ni hta shai hkat ai lam gaw ndai re; _ Gawdama gaw tara hpe tam la ra ai; Sanpra ai masha ni gaw tam hkawm n ra ai. Kuptsup ai prat kaw du lu ai lam Madu Yesu gaw ra n rawng ai hku sharin da ya sai. Dai hta n’ga, “Ngai gaw lam rai li ai; tengman ai lam hte asak mung rai li ai”, nga ai.

Kuptsup ai prat kaw du lu ai lam mahkrun gaw Yesu shi hkum nan rai nga ai; shi sharin ya ai, matsun ai lam ni gaw yawng jaw ai, kam shut na lam hpa n nga ai; kuptsup ai, ra n rawng ai hku hkrung nga lu ai asak shi hkum nan rai nga ai. Kuptsup ai asak hkrung lam, myit pyaw myit dik ai lam hpe jaw ya lu ai tara matsun gaw dai ni na Kabu Gara Shi-ga hte maren, kuptsup ai wunli hkam la lu ai mahkrun, lam-yan (8) she rai nga ai. Sanpra ai masha ni gaw dai reng dik ai tara lam-yan matsat hpe hkan shadik lai wa ma ai: tinang a akyu amyat n tam ai, masha yawng hpe kahpu kanau majing hku tsawra ai; lu mi lu, ja gumhpraw, dum nta, sun hkau-na, yawng hpe kau da ma ai; mungkan e jaw lu ai pyaw-hpa yawng hpe kau da ma ai; kadun dik ai hku ngu jang Karai Kasang hta asak hkrung nga lu jang kaga hpa n ra sai, ngu ai hkam la ma ai.

St. Theresa of Avila ning nga tsun da ai, “… yawng mayawng hten bya mat lu ai; Karai Kasang chyu sha galai shai ai lam n nga ai, tut a grin nga ai. Karai Kasang hpe lu ai wa, hku hkau nga lu ai wa hta ra kadawn ai lam hpa n nga ai, kuptsup sai” nga ai. Kuptsup ai wunli wun-gau hkam la na matu, Madu Yesu matsun ai mahkrun lam-yan (8) gaw mungkan ga/ dinghta ga e jaw lu ai pyaw-hpa lam ni hte shai hkat ai: Matsan mayan ai ni, kawsi hpang gara ai ni, yawn hkyen ai ni, zingri hkrum ai ni, dz., dz., kadai wa pyaw lu na rai ta? Dinghta ga na masha ni a matu dai baw ni gaw dingnye she rai nga ai.

Tinang hkum hpe pyi n kam lu sai ngu ai aten hta; kam shamyet mai ai masha kadai n nga sai, kadai masha e mung n garum lu sai, ngu ai aten hta; n tara ai hku jeyang mara shagun ai hkrum tim kadai e mung je la hkye la na hkinjang n nga sai, ngu ai aten hta, masha gaw Karai Kasang hpe tam ai. Grau nna tinang a shut hpyit mara ni hpe ja ja myit dum ai aten hta kadai wa mara raw ya lu na ta? San Thomas Aquinas tsun ai, “Kabu-hpa, pyaw-hpa n lawm ai sha kadai mung n hkrung lu ai. Tinang a sung dik ai kraw kata na hpang gara ai lam, myit dik lu ai lam hpe n hkam la lu ai ni gaw hten bya lu ai, n grin lu ai dinghta ga na pyaw-hpa ni hpe tam ma ai”, nga ai.

Myit sumru na lam:

Kuptsup ai myit pyaw myit dik lam ngu timung, ndai prat e lu la mai ai daram hpe tsun ai; htawm hpang prat e hkam la lu na kuptsup ai ngwi pyaw lam sha n mai byin ai. Sumsing mungdan hta hkam la lu na kuptsup ai ngwi pyaw myit dik lam hpe ndai dinghta ga e chyim yu hpang ai lam gaw mai byin ai.

Tinang a sung dik ai kraw kata na hpang gara ai lam ni hpa hpa rai ta?

Hkrat sum ai, hpaga sum ai, san poi hkrat ai, myit kaji karen ai, machyi makaw hkrum ai, … dai zawn gying kya nga ai aten ni hta tinang gara hku hparan nga a ta?

2019:PRANWAN LADAW HTA LABAN (31) NA CHYUM LAIKA

PRANWAN LADAW HTA LABAN 31

SAN PRA AI NI YAWNG MAYAWNG A POI SHANI

November 3, 2019

CHYUM MUNGGA DAW 1

SHINGRAN 7:2-4, 9-14

Ya hti na gaw, Yawhan a Shingran laika hta na rai nga ai.

Jan praw maga de na pru lung wa nna, ahkrung nga ai Karai Kasang a dazik lang ai lamu kasa hpe ngai Yawhan mu nngai. Dai lamu kasa gaw, Anhte a Karai Kasang a shangun ma ni hpe, kahtan e dazik garai n shakap yang, aga hpe mung, nammukdara hpe mung, hpun ni hpe mung hkum jahten kau mu, nga nna lamu ga hte nammukdara hpe jahten shabya kau na ahkang lu ai lamu kasa mali hpe, nsen kaba hte jahtau wu ai. Shaloi dasik shakap hkam la ai ni hpe hti ai jahpan ngai na nngai: Israela kashu kasha ni a amyu yawng hta na, sen mi mun mali e hkying mali dazik shakap ai hkam la ma sai.

Dai hpang, yu u, mungdan shagu hta na mung, baw lakung shagu hta namung, amyu baw shagu hta na mung, ga amyu shagu hta na mung, kadai n dang hti lu ai masha unawng kaba hpe ngai mu nngai. Ndai ni gaw hpraw ai hpun palawng bu hpun nna, tinang a lata hta namhtan hpun lakung lang let, Tingnyang a man e mung, Sagu Kasha a man e mung tsap nga ma ai. Shanhte gaw nsen kaba hte jahtau let, Tingnyang hta dung nga ai anhte a Karai Kasang hte Sagu Kasha gaw, awng dang u ga law, nga ma ai. Bai, dai tingnyang hte salang ni hte dusat amyu mali a grup yin e, lamu kasa yawng hte gaw kawan tsap nga ma ai. Shaloi shanhte gaw tingnyang a man e dingnyawm dagup nna Karai Kasang hpe nawku, let, Amen Shakawn kungdawn ai, Hpung shingkang, Hpaji byeng-ya, Chyeju dum ya ai, Arawng sadang, Ahkang aya hta N-gun atsam gaw, htani htana prat dingsa e, anhte a Karai Kasang kaw a nga nga u ga law Amen, nga nna tsun ma ai.

Shaloi salang ni hta na langai mi, Hpun-palawng ahpraw bu hpun ai ndai ni gaw, kadai ni rai nga ma ta? Kanang na pru wa ma ta? nga nna ngai hpe hkap san nngai. Ngai gaw, Nye a Madu e, nang chye nga ndai, ngu nna Shi hpe htan we ai. Shaloi shi tsun ai gaw: Ndai ni gaw, zingri zingrat kaba hpe hkam sharing ngut nna, tinang a hpun palawng hpe Sagu Kasha a asai hta hkrut jahpraw la ai ni rai nga ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 YAWHAN 3:1-3

Ya hti na gaw, Yawhan shagun dat ai laika langai hta na rai nga ai.

Karai Kasang a kashu kasha ni anhte hpe ngu shamying mi ai majaw, Kawa gaw anhte hpe gade wa tsaw ra da mi hka: Shi a kashu kasha ni nan anhte rai nga ga ai. Dai rai nna, mungkan ga gaw Shi hpe n chye wu ai majaw, anhte hpe mung n chye n hkap la ma ai. Tsaw ra ai ni e, Karai Kasang a kashu kasha ni, anhte ya e rai nga ga ai; hpang e anhte hpa tai na, garai n shadan dan nga ai. Dai hpe shadan dan ai shaloi anhte shi hte maren n bung na ga ai lam hpe anhte chye nga ga ai; kaning rai nme law, Shi hkum nan nga nga ai hte maren, anhte Shi hpe mu lu na ga ai. Ndai lam hpe myit mada ai masha yawng hte gaw, Hkristu Madu Chyoi Pra nga ai hte maren, tinang a hkum hpe shachyoi shapra ya ra ai.

Ya hti ai gaw Karai Kasang a mungga rai nga ai.

KABU GARA SHIGA

MAHTE 5:1-12

Ya hti na gaw, Mahte a laika hta na Kabu Gara Shiga rai nga ai.

Yesu gaw masha wunawng wuwa hpe mu jang, bum ntsa de lung wa ai; dai yang e Shi dung nga yang, shi a sape ni shi a makau de sit sa wa ma ai. Shaloi Shi shanhte hpe sharin shaga let tsun wu ai gaw: Myit masin hta matsan mayan ai ni gaw, a lu ma ai; lamu mungdan gaw shanhte a mungdan rai nga malu ai. Myit sumnung ai ni gaw a lu ma ai; shanhte mungkan ga hpe madu lu na mara ai. Yawn hkyen hkrum ai ni gaw a lu ma ai; shanhte shalan shabran ai hkrum na mara ai. Ding hpring ai hte kawsi hpang gara ai ni gaw a lu ma ai; shanhte hkru kat wa na mara ai. Matsan dum chye ai ni gaw a lu ma ai; shanhte matsan dum la ai hkrum na mara ai. Myit san seng ai ni gaw a lu ma ai; shanhte gaw Karai Kasang hpe mu lu na mara ai.

Ngwi pyaw simsa ai hpe shabyin ai ni gaw a lu ma ai; shanhte hpe Karai a kasha ni ngu shamying na mara ai; Dingman ai lam a majaw zingri zingrat hkrum ai ni gaw a lu ma ai; lamu mungdan gaw shanhte a mungdan rai nga malu ai. Nye a amying majaw masha ni nanhte hpe asawng asang zingri zingrat di ai hte, n teng n man ai hku mara amyu myu shagun da ai shaloi nanhte a lu myit dai: lamu mungdan hta nanhte a kumhpa kaba nga malit dai majaw, kabu gara nna ngwi pyaw nga mu.

Ya hti ai gaw Madu a Kabu Gara Shiga rai nga ai.

2019:PRANWAN LADAW HTA LABAN (30) MUNGGA

British hkringmang daju Winston Churchill tsun yu ai ga: “Gwi gaw npu de na ngai hpe dap mada ai; nyau gaw ngai hpe ntsa de na gum yu (ngai hpe yu kaji) ai majaw ngai grai n ju ai, wa gaw ngai hpe madang maren hku hkap yu ai, dai majaw wa hpe grau tsawra ai” nga ai, Htai la na lachyum nga ai.

Akyu sa hpyi ai hparishe gaw Karai Kasang hpe gara maga hku yu ai kun? Kang hta ai masha hpe gara maga de na yu ai kun? Teng sha, shi gaw Churchill hpe mada yu ai wa zawn Karai Kasang hte madang shabung nna mada yu nu ai. Shi a dingman dinghpring dum ai lam, sanseng sanpra dum ai lam, mara n kap dum ai lam dz., dz., (dai zawn, dai zawn) dai gaw_ Karai Kasang hte shabung nna shi hkum hpe shi shagrau la ai ga tsun ai. Dai akyu hpyi ai rai kun? Bai, kang hta ai masha, shawa masha ni yu matsat ai masha hpe gara maga de na mada yu ai kun? Ntsa de na Churchill hpe gum yu ai nyau hte n bung ai kun? Kang hta ai masha (mara htat ai, ngu, masha ni e shadu ai) akyu sa hpyi yang shi hpe yu kaji ai, jahpoi ai, madang n shabung lu ai hku Karai a man e tsun dan ai.

Karai Kasang a man e shinggyim masha yawng gaw madang maren sha rai nga ai. Maren ngu ai hta, anhte yawng mara kap ga ai; n shut yu ai masha mung n nga ai. Tinang nang a myit masin kraw lawang kaw na nan, n shawp n hkap, nse nsa, n-ju n-dawng, manawn masham, lai jan nna byin mayu lu mayu ai marin myit, matai htang mayu ai myit, dz., dz..., prut pru dingyang rai nga ai. Karai a man e, shinggyim masha shada a man e, hpa mi gumrawng hpa rai a hka? Tinang nang a atsam hte sha kadai wa mi dinghpring lu a ta?

“Karai Kasang gaw gumrawng gumtawng ai masha hpe yu matsat ai raitim, shagrit shanyem ai masha wa hpe chyeju kumhpa shagrau ya ai”, nga ai (Yaku 4:6; Ga-shagawp 3:34 hte Shakawn Kungdawn hta law law ka da ai). Bai Esiah Laika hta ning nga naw tsun da ai: “Ngai gaw matsaw tsang e nga nga ai. Shagrit shanyem ai hte tinang a mara hpe myit dum yawn hkyen chye ai sumlum hta mung Ngai nga nga ai”, nga ai (Esiah 57:15).

Hparishe gaw akyu sa hpyi tim hpa n lu ai kaman sha wa mat ai; kang hta ai masha gaw Karai a matsan dum ai hpe hkam la nna kumhpa hkam la let Nawku Htingnu na pru mat wa ai.

Myit sumru na lam:

Nu Maria a akyu hpyi nsen_ Lk. 1:53, “Lu su sut su ai ni hpe Kaman datdat nna kawsi hpang gara ai ni hpe mai kaja ai baw hte jahkru shakat ya nu ai”.

Masha shada rai jang dusat wa zawn, Karai a man e madang bung ai hku yu hkat mai nga ai. Karai a man e du jang gwi zawn, npu de na ntsa de mada yu mai nga ai.

“Nang/ ngai” kaning re ai myit jasat hte akyu hpyi hpyi re ai kun?