Tinang a hkum hpe “shagrit shanem ai masha” ngu nna tinang tsun ai wa gaw gumrawng gumtawng ai hte shakawng ai masha langai mi teng sha rai na re. Hpa majaw nga yang shagrit shanem ai ngu ai gaw tinang a n-gup aga hte tsun dan nmai ai sha amu bungli hte manang ni hpe madun dan sha mai nga ai.
Dai ni na Kabu Gara Shiga hta Madu Yesu gaw masha ni hpe shagrit shanem ai myit rawng nna nga sa ai a marang e tinang hte gingdan ai hpe manang ni jaw ya na re ngu nna tsun da nga ai. Tinang a myit masa lam kade daram madang nga ai gaw tinang dawdan la nmai nna manang ni masat ya ai hpe sha hkam la mai nga ai.
Shagrit shanem ai ngu ai gaw manang ni mu lu na matu mung galaw sa nmai nga ai. Karai Kasang a tara Mungga ni hpe hkan shatup nna Karai Kasang a man hta shagrit shanem ai hte nga sa ra na re. Karai Kasang a man hta shagrit shanem let nga sa ai wa gaw arawng aya ni hpe nmyit ai sha myit masin simsa ai hte nga sa lu na re. Myit masin hta simsa ai gaw manang ni tinang hpe shagrit shanem chye ai wa re ngu ai shakawn ga hta grau kaba nga ai. Ndai masha ni gaw tinang a hkum hpe shakawn shagrau na, manang ni a shakawn ai hpe hkam la na matu shanhte a prat hta n-ahkyak nga ai.
Karai Kasang a Tara Mungga ni hpe hkan shatup let Karai Kasang a man hta shagrit shanem chye nna nhtum nwai ai myit masin a simsa lam hpe anhte ni yawng hkam la lu u ga.
Chyeju kaba sai. Karai Kasang a sak hkrung mungga hpe garan gachyan ya ai majaw.
ReplyDelete