“Tinang sha ai zawn tinang byin wa na re” ngu ai English ga malai nga ai. Tsun mayu ai gaw shinggyim masha asak hkrung na matu malu masha ni hpe sha ai shaloi tinang sha kam hpe lata la nna sha ga ai. Dai rai yang, lata nna sha ai malu masha ni gaw tinang a hkum hkrang hpe akyu jaw ai shing nrai dingbai dingna jaw mai nga ai.
Dai ni na prat a nga sa lam ni hta byin pru wa ai ana ahkya law law hpe sawk sagawn yu ai shaloi malu masha hpe sha shut, lu shut nna byin pru wa ai law nga ai. Dai rai yang, myit hte hkum hkrang mai hkam kaja na malu masha ni hpe lata la nna lu sha ai rai yang mai hkam kaja ai akyu ara hpe lu la mai nga ai. Hpa majaw nga yang “Tinang sha ai zawn tinang byin wa na re”.
Dai ni na Kabu Gara Shiga hta Madu Yesus gaw “Ngai gaw a sak jaw ai muk rai nga nngai. Ndai muk sha ai wa kadai mung htani htana a hkrung nga na ra ai” ngu nna tsun da wu ai. Htani htana a hkrung nga ai Madu Yesu a hkum hte sai hpe hkam la lu ai ni gaw teng sha Madu Yesu a hkum shan tai wa na re. “Tinang sha a zawn tinang byin wa na re.”
Htani htana ahkrung nga ai Madu Yesu a Chyoi Pra ai hkum hpe hkam la ai ni anhte gaw Karai Kasang a hkum shan ni tai wa nna Shi Madu hta sak hkrung nga sa lu let hkum hkrang a mai hkam kaja ai hte myit masin a ngwi pyaw ai hpe ndai part hta lu la nna htani htana asak hpe mung lu la u ga.
Fr. Philip Aung
No comments:
Post a Comment