2024: LUSHAGAM LADAW LABAN (1) NA MUNGGA

“Dai Wenyi gaw Shi hpe masha n nga ai shara, zaibru jang de pru sa na lam shadut wu ai. Shi gaw zai-bru jang e nhtoi mali-shi ya nga nga ai rai nna, Satan e gunglau ai hkrum wu ai. Shi gaw matse labye dusat ni a lapran e nga nga ai rai nna, lamu kasa ni Shi hpe yu gawn ma ai” (Mk 1:12-13).

Kalang mi na aten (30 ning jan) hta, BBC Myanmar program kaw nna America e nga ai sehkam (Yate) ni a lam tsun pru wa ai. Pyaw hpa hkum sumhpa law la ai American masha ni a lapran, pyaw hpa ni hpe kau da nna, dinghku n de ai prat, atsin sha nga nna akyu hpyi shaja ai, myit sumru ai, lu-sha gam shaja ai, bungli galaw ai, ra kadawn ai ni hpe garum ai/ lakawn ai, dai zawn re ai aprat hpe lata la nga shăman ai ni law law a lam, mau n ma re ai hku hkai dan ai. Mungkan pyaw hpa ni hpe jin mat ai ni, lu su nga mai ai ni, hpaji madang nga ai ni mung lawm ma ai. Shanhte hpa majaw shing re ai aprat hpe lăta la ma hka? Shing re ai aprat hpe lata la ai ni gaw tinang myit ra ai hku, kam ai hku nga lu ma ai n rai. Uhpung hku nga ma ai; jahkrat da ya ai tara matsun ni hpe hkan ra ma ai; shada tsang hte tsang madat mara ra ma ai. Shinggan e nga ai masha ni tinghkrai awm dawm ahkaw ahkang nga, lu su nga-mai lam nga, pyaw hpa nga, awng dang ai prat de, nga nna tam shakut nga ma ai. Shing re ai baw ni hpe kau da nna hpa majaw yate/sehkam prat hpe lata la ma ai rai ta?

Teng sha, Wenyi e shădut ya ai chyeju lu la ai ni rai ma ai. Shanhte gaw jet ai, grin ai, grau reng ai sumsing sutgan hpe hkam la lu na lam tam ai ni rai ma ai. BBC Radio report hta tsun da ai lam ni gaw, shawng sawk săgawn ngut ai hpang masha ni hpe machye machyang hti ya, gam garan ya ai rai nga ai. Hkristan makam masham a ningpawt daw maga gawn yu yang, Madu Yesu a kasi hpe yu la nna zaibru jang de du mat ai ni law law, yate/sehkam jawng ni law law nga lai wa ai. Dai ni na prat du hkra shara law law e naw nga ai.

Lu-sha gam ai/ jahkran ai ladaw hta anhte hkum nan zaibru jang de, n sa nga ai rai tim, dinghta ga na aprat hpe n kau da ai rai tim, Madu Yesu hte, sehkam ni hte bung ai hku hkan galaw lu ai lam law law nga ai. Lu-sha gam ladaw hta, tinang nang a sung la ai kraw kata e kawsi hpang gara ai lam ni hpe hkan tam na aten ladaw rai nga ai. Dinghta ga na myit ru myit tsang lam ni, hkum shan a ra marin ai myit, lawhpa ai myit, gumrawng gumtawng ai myit, madat măra shăgrit shănyem n kam ai myit, ndai zawn re ai ni a marang e khi ba hkrum ai lam ni hpe myit sumru yu mai ga ai.

Tinang nang a myit masin wenyi hpe shăchyoi shăpra la ai aten rai nga ai. Yesu a makau grup grup, matse labye ni nga ai, nga ai. Dinghta prat hta agung alau hpyen ni hte shinggrup da ai. Dinghta ga na agung alau ni hpe dang kau lu hkra akyu hpyi shaja ai aten rai nga ai. Masha hkumshan hte re ai Karai a Kasha pyi lamu kasa ni a yu gawn ai hpe hkam la ra ai. Wenyi hkrun lam hta teng sha, Karai a madi shadaw ya ai chyeju hkam la ra ga ai.
Makam masham hpung kaba ni yawng hta, lu-sha jahkran ai ladaw nga ai zawn, sehkam ni/ sehkam ni bung ai hku nga sa ai uhpung ni nga ma ai. Dinghku de ai Muslim ni pyi lu-sha gam ladaw hpe ja ja manu shadan hkan shădik ma ai. Kadun dik ai hku mahtai jaw ga nga yang, tinang nang a myit masin hpe renghkang lu na matu, Karai a man e shăgrit shănyem lu na matu, si chye ai amyu re ai lam hpe myit dum let, hpang na prat e hkam la lu na grau ai shăgrau kumhpa ni hpe myit mada let, myit masin wenyi hpe shăchyoi shăpra la lu na matu rai nga ai.

Sumru yu na matu:
 Tinang hta gawng kya grau dik ai, kăhtap shut shut re ai hpa hpa nga a ta? Dai gawng kya ai lam ni hpe shărai lu hkra tatut hpa hpa galaw na ta?
 Kahin kamun hta jaw da ai ga-shaka ni hpe ya sha sha myit dum ga ai kun? Nat Satan hte shi a amu yawng, shut hpyit mara hpe kau da ai ga-sadi, Karai a tara hpe hkan shatup na ga-sadi, dai ni hpe jaw da ga ai n rai a hka!

2024: LUSHAGAM LADAW LABAN (1) NA CHYUM LAIKA

LUSHAGAM AI LADAW HTA LABAN (1)
February 18, 2024
CHYUM MUNGGA DAW 1

Npawt Nhpang 9:8-15

Ya hti na gaw, Npawt Nhpang a laika hta na rai nga ai.
Karai Kasang gaw Noa hte shi a shadang sha ni hpe tsun wu ai gaw: Yu mu, nanhte hte nanhte a kashu kasha ni hpe mung nye a ga shaka ngai tawn da nga nngai; nanhte hte rau sanghpawli na pru wa nna, ga ntsa e nanhte hte rau nga ai. a-u, yam nga, ashu ashan hte hkrung nga ai amyu baw sumhpa hpe mung, dai ga shaka ngai tawn da nngai. Nanhte hte ngai tawn da ai ga shaka gaw, ga ndai rai nga ai: Htawm hpawng de sha-u ing ai hka hte hkrung mahkrung hte hpe ngai n jahtum kau na we ai; lamu ga hpe jahten kau na matu mung, sha-u bai n sha-ing na ni ai. Bai, Karai Kasang tsun ai gaw: Ngai nanhte a lapran e mung, shu mashi shu masha prat dingsa ngai tawn da ai ga shaka a kumla gaw, Nye a n-goilatum sumwi hta ngai tawn sa se ai; dai gaw, ngai hte ginding aga a lapran e tawn da ai ga shaka hpe, myit dum lu na matu kumla tai na ra ai. Dai re ai majaw, ga ntsa e ngai lamu mu shangun ai shaloi, dai n-goilatum gaw sumwi hta dan pru na ra ai. Shaloi ngai hte nanhte a lapran e mung, hkrung mahkrung a lapran e mung, ngai tawn da ai ga shaka hpe myit dum na ra ai.Shing rai, hkrung nga ai baw sumhpa hpe jahten kau na matu, htawm hpang de sha-u hka bai n sha-ing na ni ai.
Karai Kasang a Mungga rai nga ai.

CHYUM MUMGGA DAW 2

1 Petru 3: 18-22

Ya hti na gaw, Kasa Petru shagun dat ai laika langai hta na rai nga ai.
Hpu nau ni e, Hkristu gaw, shut hpyit mara a majaw, kalang sha mi si hkam nu ai; Karai Kasang hpang de anhte hpe woi wa lu hkra, shi ding hpring ai wa nan, n ding n hpring ai ni a matu nni nkri hkam la nu ai. Dai Hkristu gaw hkum shan hta sat kau hkrum ti mung, wenyi hta jahkrung sharawt la ai hkrum nu ai; dai wenyi hte nan pru wa yang, htawng hta rawng nga ai wenyi ni hpe shi a lam tsun shana dan nu ai. Dai wenyi ni gaw, moi shawng na Noa a prat e sanghpawli hpe naw shachyaw nga ai shaloi, Karai Kasang myit galu ai hte la nga ti mung n madat mara ai ni rai nga ma ai.Dai sanghpawli hta jawn ai ni marai matsat chyu sha, hka hku nna, hkye mawai la ai hkrum lu ma ai.
Dai hka gaw Kashin Kamun a kumla rai nga ai; kaning rai nme law, ya e nanhte mung kashin kamun hka hku rap nna, hkye hkrang la ai ni hkrum nga manit dai. Kashin Kamun dai gaw hkum shan hta kap ai hkagrwi hpe shatsai kau ya ai lam n rai; ding hpring ai myit kaw nna Karai Kasang hpe ga sadi jaw ai lam rai nga ai. Shing rai,Yesu Hkristu bai hkrung rawt ai a marang e, Kashin Kamun gaw nanhte hpe hkye hkrang la nga ai. Yesu Hkristu mahtang gaw sumsing lamu de shang wa n htawm, Karai Kasang a hkra maga e dung nga ai rai nna, lamu kasa ni, ahkaw ahkang lu ai ni hte, hpung shingkang rawng ai ni gaw, shi hpe madat mara nga ma ai.
Karai Kasang a Mungga rai nga ai.

KABU GARA SHIGA

Marku 1:12-15

Ya hti na gaw, Marku a laika hta na Kabu Gara Shiga rai nga ai.
Dai aten hta Wenyi gaw nam mali hkan de Yesu hpe woi shadut ai. Satan e gung lau ai; matse labye ni the rau nga nga nna, lamu kasa ni shi hpe galaw daw mu ai. Yawhan hpe rim la ai hpang, Yesu gaw Galile mung de sa du nna, Karai Kasang a kabu gara shiga hpe tsun shana wu ai. Shi gaw, aten ladaw dik wa ai hte, Karai Kasang a mungdan ni wa magang ra ai; myit malai lu nna, kabu gara shiga hpe kam sham nga mu, ngu nna hkaw dan mu ai.
Madu a Kabu Gara Shiga rai nga ai.

2024: PRAN WAN LADAW LABAN (6) NA MUNGGA

Manggang kap ai masha langai mi Shi kaw du sa nna, lahput hput di let, hpyi lajin ai, “Nang hkraw ai rai yang, nang ngai hpe shamai ya lu na lit dai,” ngu wu ai. 41 Yesu gaw matsan yu dum ai myit hte, Shi a lata ladawn nna, shi hpe ahtawk ya let tsun ai, “Ngai kaja wa hkraw ya nngai, mai tsai nit ga,” ngu wu ai. (Mk 1:40-41) Manggang kap ai masha ni gaw Moshe a tara hte maren, dum nta masha ni hte mung, mare masha ni hte mung hka nna, mare shingnawm e nga ra ai. Lai sa lai wa re ai masha ni hpe mu jang, “N san n seng ai wa, n san n seng ai wa” ngu nna masha ni hpe sadi jaw ra ai. Manggang kap ai masha gaw hkum hkrang n san n seng ai hta n-ga, wenyi hta mung awu asin re ai masha, dingnye lu ai masha hku nna yawng e sawn la ma ai. Dai daram myit kaji hpa, kaga hpa naw nga na rai ta?

Marku gaw Yesu hpe matsan dum ai myit hte hpring ai wa hku nna mu mada shăngun măyu ai. Manggang kap ai masha a maga myit yu ga: kanu kawa, kahpu kanau ni a tsawra matsan dum myit hte mung tsan gang mat ra ai. Hku hkau ai manang ni hte mung hka ra mat ai. Ahpye alam re ai, yu matsat na zawn re ai kaga manggang kap ai ni hte sha manang shatai mai ai. Hpyi sha nna sha asak hkrung lu na rai nga ai. Shanhte a matu kabu hpa, pyaw hpa ngu nna hpa n nga ai. Gaya ai, kaprep ai, ga-ut machyi ai, hpu hkying ai…. Hka shin shara n lu, tsi tsi ya na kadai n nga.

Shing re ai masha, Yesu lai wa ai mu jang ding-nyawm dagup, lahput hput di let shi hpe shamai ya na lam Yesu kaw hpyi nem ai. Kaga masha ni kade matsan dum tim, manggang kap ai masha a makau de kadai n kahtep sa ai. Yesu mahtang shi a lata ladawn nna, shi hpe ahtawk ya let shamai ya ai. Fransik myu sha St. Damien gaw Yesu a matsan dum chye ai myit hpe kasi hta la nna, manggang masha ni hkrai nga ai zunlawng langai de, sasana sa ai; shanhte hpe yu lakawn na matu rai nga ai. Shanhte hte ni ni htep htep nga nna shanhte sha ai zawn lu sha ai, shanhte zawn nga ai. Jahtum e shi mung manggang ana kap la ai. Shi si wa ai aten du hkra, manggang ana lu ai ni hpe tsawra myit tup hkra madun dan let, shanhte hpe yu lăkawn lai wa ai. Yesu hte San Pra ai masha ni a tsawra matsan dum ai myit hpe kasi yu la nna, manggang ana kap ai ni hpe yu lăkawn ai shara ni, ap nawng dawjau ai Jau Mama ni, shawa hpung masha ni, mungkan ting shara law law e nga ai. Yu matsat na zawn re masha ni hte nga nna shanhte hpe lakawn ai amu nang/ngai galaw gwi na kun? Hkum hkrang ana, manggang ana kap ai masha, Yesu e shamai hkrum ai masha, tinang wa she rai taw yang gaw??? Manggang hta grau ai wenyi hta kap ai shut hpyit mara, awu asin, agang chyalang, kade grau hkrit hpa n rai kun? Shut hpyit mara a majaw myit malai lu ai masha langai, Karai e mara raw dat ya ai rai tim, “Jau hpe sa madun su”, nga, Yesu a mătsun ga gaw teng sha mara raw sakramentu hpe shăang tsun ai rai nga ai.

Shămai shătsai hkrum ai hpang ”hkungga nawng ya su”, nga ai. Karai Kasang kaw na hkam la lu ai hkum hkrang mai hkam kaja lam, wenyi a shaman chyeju ni a matu gara hku chyeju htang, kaning re ai hkungga nawng jaw ga ta?

Myit sumru yu na matu:
 Ruyak jamjau hkrum ai aten ni hta pyet pyet taw nna akyu hpyi yu sai kun?
 Matsan dum chye ai myit grau grau madun lu hkra, shaman shakyang ga ai kun?
 Shut hpyit mara kaba lu shagu, manggang kap ai masha zawn tai ai lam hpe myit yu mai ga ai n rai kun?

2024: PRAN WAN LADAW LABAN (6) NA CHYUM LAIKA

 Pranwan Ladaw Laban (6)
February 11, 2024
CHYUM MUNGGA DAW 1

Jaw Jau Laika 13:1-2, 45-46

Ya hti na gaw, Jaw Jau laika hta na rai nga ai.
Madu Karai Kasang gaw Mawshe yan Arun hpe tsun wu ai gaw: Masha a hkum hta akawng ai, gyigu gu ai, pang rai hpraw ai byin yang gaw, dai wa hta manggang kap ai kumla rai nga ai. Dai wa a nma hpe yu ya na matu, hkinjawng Arun hpang de, shing n rai, shi a shadang sha hkinjawng langai ngai hpang de dai masha hpe woi sa lu na rai nga ai. Mangang kap ai wa gaw, je ai hpun palawng bu hpun let, kara hpyan ayai kau ra ai; lahta nten hpe shi magap kau nhtawm, n san n seng ai, n san n seng ai, ngu nna jahtau na rai wu ai. Ana dai garai n mai yang, shi hta awu asin a rai nga ai; shi gaw n san n seng ai rai nga nna, shi hkrai nga nga na ra ai: shi a nga shara gaw dap shinggan e rai na rai nga ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 10:31-11:1

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Tsawra ai hpu nau ni e, nanhte sha ti mung, lu ti mung, hpa galaw ti mung, Karai Kasang a hpung shingkang hpe tam let yawng mayawng hpe galaw nga mu. Masha yawng mayawng hkye hkrang la ai hkrum lu mu ga, ngai nye a akyu n tam ai sha, malaw maga a akyu tam nga let, lam shagu hta nlang hte hpe myit shapyaw ya na matu ngai shakut nga nngai. Dai hte maren nanhte mung Yuda ni a matu raitim, Greka ni a matu raitim, Karai Kasang a Nawku Hpung a matu raitim, myit kataw shara galoi mung hkum tai nga myit. Ngai gaw Hkristu a kasi hpe yu la ai zawn, nanhte mung nye a kasi hpe yu la nna, hkan galaw ai ni tai nga mu.
Karai Kasang a Mungga rai nga ai.

KABU GARA SHIGA

Marku 1:40- 45

Ya hti na gaw Marku a laika hta na Kabu Gara Shiga rai nga ai.
Manggang kap ai masha marai mi mung Yesu hpang de sa ai rai nna, lahput hput di let, Nang hkraw n yang gaw, ngai hpe shapra ya lu na rai nga ndai, ngu nna hpyi nem wu ai. Yesu gaw matsan dum ai hte Shi a lata ladawn let, shi hpe ahtawk nna, Ngai hkraw nga nngai, san pra wa nu, ngu wu ai. Shaloi jang dai manggang shi kaw nna prai mat nna, shi san pra mat ai. Shaloi Yesu gaw, de a lam kadai hpe mung, ga hkaw mi pyi nang n tsun u ga, sadi nga u; pru wa nna hkinjawng wa hpe na a hkum madun dan nhtawm, shanhte a matu sakse tai u ga, nang san pra ai a matu, Mawshe tawn da ai hte maren, hkungga wa nawng ya u, ngu nna dai wa hpe ginhtim da nhtawm tin tin shabawn dat wu ai. Shi mahtang pru wa nna dai hpe aja awa hkai dan ai hte dai lam hpe kajai gum hkawng dat wu ai. shingrai Yesu gaw, mare kata de leng leng n shang lu ai rai nna, nam mali hkan e a nga nga ai. shara magup hkan na ni mung, Shi hpang de sa du ma ai.
Madu a Kabu Gara Shiga rai nga ai.

2024: PRAN WAN LADAW LABAN (5) NA MUNGGA

“Yesu gaw ana ahkya amyu myu hpe shămai shătsai ya ai hte, nat ni hpe gawt shăden kau ya ai” (Mk 1:34). Shing rai, Karai a mungdan du ra ai lam, bai, Kawa Karai a atsam hte hpung shingkang hpe madun dan wu ai. Yesu galaw ai amu yawng, atsam marai a ningpawt gaw Kawa Karai Kasang re ai lam hpe madun dan ai”.

Shawng na chyum mungga hta Yoba gaw dinghta ga na aprat, hki ba la ai, matsan jamjau ai, asak hkrung nga ai hpa lachyum n nga ai zawn, shi hkam sha ai lam hpe ka da ai. Shi hkum nan hkrum sha ai machyi shoi chyum ai mahkrum madup kaw na mahtai shapraw da ai. Asin chyip re ai dinghta ga na asak aprat, myit mada na hpa n nga ai hku, shi a shoi chyum ai lam hpe tsun dan ai (prat a jahtum daw hta sha mahtai kaja lu la ai). Yesu Madu du sa ai aten hta sha, dinghta ga na asak aprat a lachyum hte hkye hkrang la ai chyeju a lam chye la lu ga ai.

Dinhta ga aprat, teng sha ruyak hki ba jamjau ai lam amyu myu hkrum ga ai. Karai a mungdan dinghta ga de du sai rai tim, dinghta ga kaw na machyi makaw, matsan mayan, ruyak shoi-hpa ni hpe atsai ye kabai kau na matu du sa ai n re. Nni nkri hte shoi-hpa yawng a ru pawt hpe shămai ya na matu Yesu du sa ai rai nga ai. Shi hte hkrum katut ai ni shamai shatsai ai chyeju hkam la lu ma ai. Yesu gaw ana ahkya hpan hkum hkra hpe shămai ya ai rai tim, dinghta ga kaw na ana ahkya yawng hpe shămat kau ya na matu du sa ai n rai. Shămaishătsai hkrum na matu Shi hte hkrum kătut ra ga ai. Tinang a makam masham hta hkan nna gingdan ai hte hpe teng sha lu la mai ai. Mungdan ting tsirung, tsi-gawk ni law law nga ai. Tsi hpaji mung madang tsaw wa ding-yang, mau n ma re ai tsi tsi ladat ni nga nga ai rai tim, tsirung tsi-gawk ni hta masha galoi mung hpring nga na re. N si tsi mung galoi n lu shăpraw na re. Masha gaw si wa ra ai. Machyi makaw ana ahkya law law a ningpawt gaw machye machyang n nga ai lam mi, hkum nan hkamja tara n khan kam ai lam mi, masha shada tsawra matsan dum myit n rawng ai majaw lam mi, hkamja lam hkam sha na ahkaw ahkang hpe makawp maga ai tara upade hta ra rawng ai lam mi, ndai zawn ru-pawt hkinjang law law nga ai hpe dum mai ga ai. Masha law law mung tinang a hkamja lam hpe manu n shadan,hkum nan jahten la ai ni mung law law nga ma ai.

Shada tsawra dawjau, gărum shingtau hkat na hpe Karai Kasang ra shărawng ai. Shing rai, makam masham hpung ni kaw na hpaw da ai tsi-rung tsi jaw gawk ni gaw dan san ai kumla langai rai nga ai. Petru a kani, shămai shătsai hkrum ai hte rau, shi gaw dawjau ai amu hpe galaw ai, nga, ka da ai. Asak hkrung nga dingsa, shada tsawra dawjau ai amu, shada lakawn hkat ai amu galaw na Karai e ra sharawng ai.

Machyi makaw hte tsin-yam tsin-dam gaw masha atai, masha tai ai lam a adaw achyen rai nga ai. Machyi masha law law Yesu hpe ala nga ma ai rai tim, Yesu tsun ai, “Anhte kaga mare kahtawng ni de htawt ga, dai mare kahtawng ni hkan mung Kabu Gara Shi-ga htawn tsun lu na” nga ai. Yesu hte hkrum kătut ai ni, hkum hkrang, myit masin wenyi a shămai shătsai ai chyeju hkam la lu ma ai hte, shălan shăbran ai chyeju hkam la lu ma ai.

Akyu hpyi ai ahkyak ai lam hpe mung sharin ya ai. Yesu gaw shani tup pu ba ai rai tim, shi hkrai atsin sha, shana tup Kawa Karai kaw akyu hpyi ai. Atsam marai a ningpawt Kawa Karai re ai lam hpe madun dan ai.

Sumru yu na matu:
. Machyi makaw ana ahkya ni kaw na lawt lu na matu, tinang hkum hpe tinang shawng gawn ra ai n rai a hka!
. Machyi makaw hte kaga tsin-yam shoi-hpa hkrum katut ai aten hta, dai mabyin gaw tinang hpe Karai Kasang hte grau ni htep shăngun ai kun?
. Tinang mai hkam kaja ai, myit pyaw lu ai aten hta masha ni hpe tsawra dawjau na matu Karai e jaw da ai ahkaw ahkang n rai a hka?

2024: PRAN WAN LADAW LABAN (5) NA CHYUM LAIKA

Pranwan ladaw laban (5)
February 4, 2024
CHYUM MUNGGA DAW 1

Yoba 7:1-4, 6-7

Ya hti na gaw, Yoba a laika hta na rai nga ai.
Yoba gaw shi a jinghku ni hpe htan nna tsun ai gaw: Dinghta ntsa na masha a prat gaw, majan pa na ruyak shoihpa prat, n rai nga a hka i? Masha a nhtoi ni gaw nchyang wa a nhtoi ni zawn rai nga ai, n rai ni? Mayam wa gaw shingnip hpe ndawt la ai hte, shabrai sha ai wa gaw shabrai la na aten hpe myit mada nga ai zawn, ngai gaw shata law law wa ru yak hkrum sha nngai; nji nmu hpring ai shana gaw, nye a matu san da nga ai. “Galoi wa me shana lai nna, ngai yup rawt lu na i?” nga nna yup kaleng let ngai tsun nga nngai. “Shana aten bai du na, gade lanyan nga a hka!” nga nna yup rawt ai hpang ngai tsun nga nngai. Shani tup nsin sin wa ai ahkying du hkra, ngai gale galau hkrai rai nga nngai. Nye a nhtoi ni gaw da danghkyam hta grau lawan nna, nye a matu myit mada shara n tawn da ai sha lai mat wa sai. Nye a asak gaw nbung rai nga ai hpe dum nga u; nye a myi gaw mai kaja ai hpe bai mu sana n rai.
Karai Kasang a Mungga rai nga ai.

CHYUM MUNGGA DAW 2

1 Korinhtu 9:16-19, 22-23

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, Kabu Gara ai Shiga hpe ngai hkaw dan ai majaw, nye a matu arawng mala shara n nga ai: kaning rai nme law, dai hpe hkaw dan ai gaw ngai galaw ang ai amu rai nga li ai: ngai n hkaw dan yang gaw, ari hkrum ging ai wa tai nga nngai. Dai amu hpe nye a myit hte ngai galaw sa yang gaw, ngai shabrai hpyi lu nngai; rai ti mung, nye a myit hte dai lit hpe n hkam la ai majaw, nye a lata hta ap ya sai amu hpe hkan galaw ai sha rai nga nngai. Dai rai jang, nye a shabrai gaw hpa rai nga a ta? Ngai hkaw dan ai shaloi, jahpu n hpyi ai sha Kabu Gara Shiga hpe hkaw sharin na gaw nye a shabrai rai nga li ai: dai Kabu Gara Shiga hkaw dan ai majaw, ngai lu la ang ai shabrai hpe n hkap la nngai. Shing rai, ngai gaw kadai wa a shangun ma n rai ti mung, dang lu ai daram masha law law hpe woi bang la lu hkra, yawng mayawng a shangun ma ngai tai nga nngai. N-gun kya ai ni a matu n-gun kya ai wa zawn ngai tai nga nngai. Nkau mi hpe lam langai hte hkye hkrang la lu hkra, masha yawng mayawng hta lam yawng hpe ngai hkan shatup nngai. Dai Kabu Gara Shiga a matu ndai lam yawng hte hpe ngai naw hkan galaw nga nngai.
Karai Kasang a Mungga rai nga ai.

KABU GARA SHIGA

Marku 1:29-39

Ya hti na gaw Marku a laika hta na Kabu Gara Shiga rai nga ai.
Shaloi jang dai tara jawng hta na pru wa nhtawm, shanhte gaw Yaku yan Yawhan hte rau Simun yan Andre a nta de shang wa ma ai. Ya Simun a kani hkali bu nna kaleng taw nga ai; shaloi jang shanhte gaw shi a lam Yesu hpe tsun dan mu ai. Shaloi Yesu sit sa nna, Shi a lata jum let shi hpe sharawt wu ai. Dai hkali mung kawp mat nna, shi shanhte hpe galaw daw mu ai. Ya, jan shang nna shana ahkying du jang, shanhte gaw machyi makaw hkrum ai ni hte nat kap ai ni nga manga hte hpe, Shi hpang de sa hpai tawn mu ai. Dai rai nna mare ting, dai chyinghka lam makau e sa zup hpawng nga ma ai. Shing rai ana ahkya amyu myu hte machyi ai masha law law hpe Shi shamai shatsai ya nna, nat law law hpe mung shaden kau mu ai; Shi gaw Hkristu rai nga ai hpe, nat ni chye nga ma ai majaw, Shi shanhte hpe ga tsun na ahkang n jaw mu ai.
Jahpawt manap jau jau e, nhtoi grai nhtoi yang, Shi rawt pru nna, nam na machyi shim ai shara de sa wa nhtawm, dai yang e akyu hpyi nga ai. Shaloi Simun hte shi hte rau nga ai ni Shi hpe hkan tam nga ma ai: shanhte Shi hpe hkrum nna, nlang hte gaw nang hpe tam nga ma ai, ngu nna Shi hpe tsun mu ai. Yesu gaw, grup yin hkan na mare kahtawng ni hta e ngai hkaw dan lu u ga, shara kaga de anhte sa wa sa ga; dai lam majaw ngai sa du nngai, ngu nna shanhte hpe tsun mu ai. Shaloi, Galile mung ting na shanhte a tara jawng ni hta e, Shi sa hkaw dan nna, nat ni hpe shaden kau mu ai.
Madu a Kabu Gara Shiga rai nga ai.

2024: PRAN WAN LADAW LABAN (4) NA MUNGGA

Karai a mungdan du magang ra ai, ngu, hkaw tsun sharin shaga ai Yesu gaw hkum hkrang, myit masin wenyi hta gyit hkang shăren da hkrum ai masha langai hpe shămai dat ya ai hta, Karai a mungdan du ra ai lam madun dan ai. Yesu a sasana magam hta Nat Satan a n hkru n kaja ai amu ni hpe shamyit kau nna, kabu gara ai lam, simsa ai lam, mai hkam kaja ai lam hpe jaw ya ai. Yesu a mying ningsang hta n hkru n kaja ai amu yawng hpe dang kau lu ai. Hpungtang hpaji tsaw jat wa ai prat hta, hpaji kunghpan nga sai masha ni a lapran, galu kaba nga sai mungdan ni hta, nat, wenyi, numla, ndai lam hpe kajai pyi n kam ma ai. Rai tim, ningdang nyet kau n mai ai. Sinpraw mungdan masha ni a matu, nat a amu ni, wenyi shadam, numla shadam ni nga ai lam, teng ai hku nna hkap la nga ma ai.

Nat Satan nga ai lam, wenyi mungkan nga ai lam, Hkristan makam masham e hkap la ai. Nat Satan hte jahten sharun ai amu ni teng sha nga ai lam hpe kam ga ai. Nat Satan a jahten sharun ai amu ni gaw hkrang asam law law rai nga ai; masha a hkum hkrang hpe pyi hten bya shangun lu ai rai nga ai. Machyi sawng ai majaw rai rai, myit daw myit htum ai majaw rai rai, mana mat ai zawn, nat shung ai zawn re ai kumla ni byin chye ai. Kalang lang mung gaw nat shung ai lam teng sha byin chye ai. Ginhka dawdan chye na gaw ahkyak ai.

Madu Yesu a hkaw tsun sharin shaga ai lam gaw ahkaw ahkang lu ai masha langai hku nna tsun shaga ai. Moshe hte kaga myihtoi ni gaw, “Karai Kasang ning nga ai/ shing nga tsun shăngun ai” ngu nna tsun ma ai; Yesu gaw tara a madu hku nna tsun shaga sharin shaga ai hpe masha ni mau shakawn ma ai. “N san seng ai numla ni pyi Shi daru kajet yang Shi a ga hpe madat ma ai” nga ai. Yesu gaw n-gup aga hku hkaw tsun ai sha n rai, nat mungkan, wenyi mungkan hpe dang ai wa hku nna Kasa Marku hkai dan ai.

Dinghta ga ntsa, grau nna hpaji baw hpan law law kunghpan shajang ai prat hta laklai ai hku hkaw tsun ni law law nga ma ai; lata la mai ai hpaji law law nga ai prat re. Yesu hpe laklai ai hku myit sumru yu ga ai kun? Shi a mau-hpa sharin shaga ai lam ni, chyum mungga ni hpe hti sumru ai aten ni hta, madat la ai aten ni hta, ningnan re ai ai hku hkam sha yu ga ai kun? Shi a mau-hpa atsam hpe laklai ai hku hkam sha yu ga ai kun?

Nat Satan gaw masha kaw shang lu ai, nawku jawng hta mung nga lu ai, chyum laika hpe mung lakap nna tsun chye ai lam hpe myit ga ai kun? Jăhkrit shama ai ladat hta grau nna sumnung shingdi ai alai hku, pyaw hpa ni hku gunglau ai, shada n tsen shăngun ai, n ju n dawng shăngun ai, ndai zawn agung alau hpan law law hku nna masha ni hpe jahten sharun ai malawng re ai hpe dum mai ga ai.

Sumru yu na matu:
 Nat a ginshan yaw ai lam ni kaw na lawt lu na matu shani shagu akyu hpyi ga ai kun?
 Yesu gaw ahkaw ahkang hte rai sharin shaga ai; hkye hkrang la ai kaw du lu ai lam kamsham ga ai kun?

2024: PRAN WAN LADAW LABAN (4) NA CHYUM LAIKA

Pranwan Ladaw Laban (4)
Jananuary 28, 2024
CHYUM MUNGGA DAW 1

Tara Jahprang 18:15-20.

Ya hti na gaw, Tara Jahprang laika hta na rai nga ai.
Israela a kashu kasha ni hpe Mawshe tsun ai gaw: Na a Madu Karai Kasang gaw, na a hpu nau ni hta na, ngai zawn re ai myihtoi langai mi hpe, na a matu paw pru shangun na ra ai: dai wa a ga hpe nanhte madat lu na rai myit dai. Horeb bum e hpawng ai shani e, nang gaw na Madu Karai Kasang hpe hpyi nem let, Ngai n si n ga, ya hpang de nye a Karai Kasang a nsen ngai bai n na lu ni ga; dai wan kaba hpe mung ngai bai n mu ni ga, nga nna nang tsun nit dai. Shaloi Karai Kasang ngai hpe htan nna, Israela amyu masha ni tsun ai ga mahkra htap htuk nga malu ai.
Shanhte a kahpu kanau ni hta na nang zawn re ai myihtoi langai mi hpe, shanhte a matu ngai paw pru shangun na we ai rai nna, dai wa a n-gup hta nye a ga ngai hti bang na hte, ngai hkang da mada hte maren, shi shanhte hpe htawn tsun na ra ai. Nye a mying nsang hte shi htawn tsun ai nye a ga hpe, kadai wa n madat yang, dai wa hpe ngai deng na we ai. Rai ti mung, ngai n hkang da ai ga hpe, nye a amying gang nna tsun pru gwi ai myihtoi mung, hpara shaje a amying hte tsun pru ai myihtoi mung, si lu na rai nga ai, nga nna Madu Karai Kasang gaw ngai Mawshe hpe tsun nu ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 7:32-35

Ya hti na gaw, Korinhtu masha ni hpang de San Pawlu shangun dat ai laika langai hta na rai nga ai.
Hpu nau ni e, nanhte gaw myit ru myit tsang n nga myit ga ngai ra nga nngai. Num n la ai wa gaw, Madu Karai Kasang hpe myit shapyaw ya na lam chyu sha tsang nga ai majaw, Madu a lam hta htep lahti hkan galaw shakut lu ai; 33num la ai wa chyawm gaw, mungkan lam ni hpe tsang nga ai hte, shi a madu jan hpe myit shapyaw ya na lam hkan galaw shakut ra ai majaw, myit kabrang nga lu ai. Dai hte maren, num n wa ai jan gaw, mahkawn hkawn ji zawn, shi a hkum hte wenyi chyoi pra lu na lam hpe chyu sha tsang nga ai majaw, Madu a lam hta htep lahti hkan galaw shakut lu ai. Num wa ai jan chyawm gaw mungkan lam ni hpe myit tsang nga ai hte, shi a madu wa hpe myit shapyaw ya na matu, htep lahti hkan galaw shakut ra ai. Ngai ning ngu tsun ai gaw, nanhte hpe lashoi hte zawn shingdang da ai lam n rai, garum ai lam she rai nga ai: nanhte htap htuk jaw nga ai lam madun dan nna, Madu hpe n dut n dang daw jau lu myit ga tsun nga nngai.
Karai Kasang a Mungga rai nga ai.

KABU GARA SHIGA

Marku 1:21-28

Ya hti na gaw Marku a laika hta na Kabu Gara Shiga rai nga ai.
Yesu hte Shi a sape ni gaw Kaperna-um mare de shang ma ai. Shaloi jang laban nhtoi e shi shanhte a tara jawng hta shang nna sharin shaga nga ai. Shi sharin shaga ai lam hpe shanhte mau mat nga ma ai; kaning rai nme law, laika ka ai sara ni zawn nrai, daru magam ahkang lu ai wa zawn Shi shanhte hpe sharin shaga ya mu ai. Shaloi jang, shanhte a tara jawng hta e n san n seng nat kap ai masha marai mi lawm nga ai. Dai n seng ai nat jahtau nna, Nazaret na wa Yesu e, anhte nang hte hpa seng ga ta? anhte hpe jahten na nang sa du nni? nang kadai re ai ngai chye nga n ngai, ngu wu ai. Shaloi jang Yesu gaw, Atsim sha nga u; shi kaw nna pru wa u, ngu nna shi hpe daru kau wu ai. Dai rai nna, dai n seng ai nat gaw shi hpe bu kashan shangun nna, nsen kaba hte jahtau let shi kaw nna pru mat wa ai. Shaloi yawng hte gaw mau mahka nga nna, ndai gaw hpa rai nga a ta? ning nan sharin shaga ai lam rai I? daru magam ahkang hte n seng ai nat ni hpe pyi shi htet da nna, shanhte madat mara nga ma ai, nga nna shada da tsun hkat ma ai. Shaloi jang Galile mung ting na shara shagu hkan e, Shi a lam kajai gara gumhkawng pri rai wa sai.
Madu a Kabu Gara Shiga rai nga ai.

2024: PRAN WAN LADAW LABAN (3) NA MUNGGA

Tinang a prat hkrun lam, Karai e shaga la ai lam hpe chye na hkap la na yakhkak ai rai tim, kamsham ai myit hte hkap la hkan gălaw ai rai yang, Karai e byin shăngun mayu ai masing hpe tinang a prat hkrun lam hku nna shadik ya lu na rai nga ai. Karai Kasang gaw amyu ru sai n lăta, yawng hpe tsawra matsan dum ai.

Masha amyu shagu hkye hkrang la hkrum na lam hpe ra shărawng ai.Yona gaw Karai a masing hpe hkrang shăpraw ya na shaga la hkrum ai: hpyen amyu masha ni, ngu, sawn da ai Ninewe masha ni myit malai lu na lam sa hkaw tsun ra ai. Shawng e shi ningdang kau ai. Hkum nan myit malai lu nna, Karai a amyu masha ni hpe zingri lai wa ai Ninewe amyu masha ni maga de, myit malai lu na lam sa hkaw tsun ai. Hkawhkam kaw nna hpang ai kaji kaba yawng lu-sha gam tawngban ai majaw, Karai a ari dan kaw na lawt lu ma ai. Babylon e bawng dung hkrum ai Karai a amyu masha ni Palestine de bai htang wa lu ma ai. Babylon amyu masha ni hpe masin n si, tai htang mayu ai myit rawng ma ai. Israel amyu sha ni hta lai nna, kaga amyu masha ni a matu hkye hkrang la hkrum na myit mada shara n nga ai, ngu, myit la ai ni hpe sharin shaga ya ai sumrai laika rai nga ai. Yesu a sasana magam hpang wa ai aten hta Yona tsun ai zawn sha, “Karai a mungdan ni htep magang ra ai; myit malai lu mu” nga ai.

Yesu shi a sasana magam hpe mungkan htum ai shani du hkra hkaw tsun na matu, sape ni hpe saw shăga ai lam, Kabu Gara Shi-ga hta mu lu ai. Shut hpyi mara kaw na n lawt lu ai shinggyim amyu, Hkristan ni gaw kashin kamun ga-sadi re ai ai nat satan hte shut hpyit mara hpe kau da ai ga-sadi jaw da ga tim, shut hpyit ding-yang rai ga ai. Prat shagu na Hkristan masha ni hpe, “Myit malai lu nna nanhte a prat hpe garam mu” nga, Madu e saw shaga ding-yang rai nga ai.

Kyang lailen hten bya nga ai ni hpe yu ai shaloi, sharin shaga shadum jahprang n hkrum ai ni law law nga ai zawn, shadum jahprang sharin shaga ai masha n law ai; shing n rai, sharin shaga shadum jăhprang ai ladat hta ra rawng gawng kya ai lam mung nga na re.

Kanu kawa kau mi, hten bya nga ai ma ni hpe sharin ya n chye ai, ladat n jaw ai, dai mung mai byin ai. Tsawra myit hte, myit galu ai hte, ladat jaw jaw shădum jăhprang tim myit malai n lu ai ni mung nga ma ai.

Anhte a prat, anhte a mare buga hta, hten bya nga ai masha ni law law nga nga ai hpe myit dum ra ga ai. Laksan hkaw tsun sharin shaga na jau/mama/sara/sarama ni galoi mung law n hkraw na re. Shărin shaga shadum jahprang ai ladat hpe mung prat madang hkan nna jahtuk shajaw ra na re. Karai a n htum n wai ai tsawra matsan dum myit hpe lashum tek nna hkaw tsun sharin achyin ra ga ai.

Myit malai ai, ngu ai lam hte seng nna tatut hkan galaw mai ai lam hpe San Pawlu gaw Korintu masha ni hpe lam matsun ya ai. Lu ai ni mung n lu ai hku, pyaw nga ai ni mung pyaw hpa n nga ai zawn, du na ra ai Karai a mungdan hpe a la nga ai ni a myit masa hpe hpunda shatai na matsun ya ai.

Sumru yu na matu:
 Grup-yin e hten bya nga ai ni myit malai lu na lam langai hpra hku nna mung, shawa hku nna mung, ladat shaw garum shingtau lawm ga ai kun?
 Kashin kamun ga-sadi hpe kalang lang sha pyi myit dum ga ai kun?
 Tinang a nga-sa lailen kaja, kasi kaja madu ai hku nna sakse hkam ai gaw sasana amu re, ngu, gara hku tsun lu a ta?

2024: PRAN WAN LADAW LABAN (3) NA CHYUM LAIKA

Pranwan Ladaw Laban (3)
January 21, 2024
CHYUM MUNGGA DAW 1

Yona 3:1-5,10

Ya hti na gaw, myihtoi Yona a laika hta na rai nga ai.
Lahkawng lang ngu na hta Madu gaw Yona hpe shi a mungga tsun dan wu ai. Madu gaw, Rawt u; kaba la ai Niniwe mare de sa nna, ngai nang hpe hkang da ni ai hte maren hkaw dan su, ngu wu ai. Shing rai Yona gaw Madu a ga hpe madat la nna, Niniwe mare de rawt sa wa sai. Ya Niniwe mare gaw nhtoi masum ya sat dam lada nna, nachying kaba la ai mare rai nga ai. Yona gaw dai mare hta e lani sat hkawm nna, Nhtoi mali shi ya lai jang, Niniwe masha ni hten mat na ra ai, ngu nna jahtau tsun wu ai. Niniwe masha ni gaw Karai Kasang hpe kam sham ma ai rai nna, lusha gam na ladaw tawn da ma ai hte, kaji ai ni kaw nna kaba ai ni du hkra, lachyit nba bu hpun ma ai. Ya dai mare na ni gaw tinang a n hkru ai lam koi kau ai amu hpe, Karai Kasang mu wu ai rai nna, shanhte hpe ari jaw na lam, shi matsan dum ai hte tawn kau nna hpa n di mu ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 7:29-31

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, ngai tsun mayu ai lam gaw: ahkying ladaw gying mat wa sai. Dai rai nna, num lu ai ni gaw n lu ai zawn rai wa manu ga. Hkrap ngu hkrap ngoi ai ni mung, yawn hkyen ai lam n nga ai zawn; kabu gara ai ni gaw kabu hpa lam n nga ai zawn; hpaga ga ai ni gaw tinang nan hpa n madu lu ai ni zawn rai wa manu ga. Bai nna, ndai mungkan ga a ja sutgan hpe jum lang ai ni gaw, dai hta myit hkum manoi nga mu ga. Kaning rai nme law, ya anhte mu chye ai ndai mungkan ga gaw lai mat wa nga ai.
Karai Kasang a Mungga rai nga ai.

KABU GARA SHIGA 

Marku 1:14-20

Ya hti na gaw Marku a laika hta na Kabu Gara Shiga rai nga ai.
Yawhan gaw ap kau hkrum ai hpang, Yesu gaw Galile mung de sa du nna, dai aten ladaw dik wa ai hte, Karai Kasang a mung dan gaw ni wa magang ra ai: myit malai lu nna, dai kabu gara shiga hpe kam sham nga mu, ngu nna Karai Kasang a kabu gara shiga hpe hkaw dan mu ai. Galile nawng makau e garet hkawm nga yang, Simun hte Andre yan nau gaw, nawng hta e sumgawn kabai bang nga ai hpe, shi mu hkrup wu ai. kaning rai nme law, shan gaw nga hkan sha ai masha rai nga ai. Shaloi Yesu gaw, Ngai kaw hkan marit, masha hpe hkan hkwi na masha, ngai nan hpe shatai na made ai, ngu nna shan hpe tsun mu ai. Shaloi jang shan gaw dai sumgawn ni hpe kau da nna, Shi kaw hkan nang ma ai. Bai, loi mi hkawm sa wa yang, Zebedi a kasha Yaku hte shi a kanau Yawhan yan hpe Shi mu hkrup mu ai; shan gaw dai li hta e tinang a sumgawn ni hpe kapa nna nga nga ma la ai. Shaloi jang Yesu gaw shan hpe shaga mu ai; dai rai nna shan gaw. Shan a kawa Zebedi hpe nchyang ni hte rau, dai li hta e jahti da nna shi kaw hkan nang ma ai.
Madu a Kabu Gara Shiga rai nga ai.