2020:PRANWAN LADAW (18) LABAN SHANI NA MUNGGA

Anhte a hkum hkrang hpe zawn, Wenyi hpe mung malu masha jaw sha ra ai. Anhte hkum hkrang a matu ra kadawn ai malu masha hkam la lu sai rai tim, myit n-dik shi ai zawn nga, hkam sha chye ga ai. Masha myit gaw kabu pyaw lam hpe marin ai. Sut gan arung arai kade lu su ai rai tim, lu sha mayu ai myit hpe sha-zim kau lu na nre. Nta masha ni, sut gan arung arai ni, hte masha a tsaw ra myit ni gaw anhte myit mada, ra marin ai hpe shadawn shadang nga ai jahkum shatsup ai lam langai sha re.

Anhte wenyi lam hta hpang gara ai hpe hkru kat hkra jahpring ya lu ai gaw Karai Kasang sha rai nga ai. San Augustine gaw shi asak 35 ning tup du hkra shi hpe kabu pyaw lam jaw ai magam bungli yawng hkan galaw ai wa rai nga ai. Hpaji, Arawng aya (yahtu), bungli ni kaja lu nna, ja sutgan lu-su ai rai tim, dai lam ni shi hpe myit dik myit pyaw lam na na njaw ya lu ai. Hpang daw de Hkristan hpung masha prat kaw na Jau prat de gale wa nna, Saradaw tai wa ai. Shi a labau mabyin ni hte seng ai “San Augustine a yin la ai lam ni” (THE CONFESSIONS OF SAINT AUGUSTINE) ngu ai laika buk hpe ka lajang da ai. Dai laika buk hta shi a mahkrum matup hpe lakap nna, yin la lu wa ai akyu hpyi ga langai nga ai. “Wa Karai Kasang e, Nang Madu gaw anhte hpe, nang Madu a matu hpang da ndai. Anhte a masin salum gaw Nang Madu hta shanu shingbyin lu ai ten du hkra myit dik ai lam hkam la n’lu ga ai,” ngu ai rai nga ai. San Augustine a yin la ai akyu hpyi ga gaw anhte hta mung teng sha hkra nga ai. Anhte mungkan ga ntsa kaw pyaw hpa lam ni kade lu ai rai tim, myit dik ai lam n’lu ai. Anhte Karai kasang hta shanu shingbyi ai rai yang, anhte nga lu ai prat madang hta nan myit dik myit pyaw nga ai.

Israel myusha ni Wenyi lam hta hpang gara ai hpe Chyum mungga daw 1, Myihtoi Isaiah laika hta tsun da ai. Shanhte ni Karai Kasang hpe ga sadi ndung ma ai majaw, hpyen ni a mungdan de rim la ai hkrum ma ai. Raitim Karai Kasang gaw shanhte hpe n malap kau ai; shanhte hpe n’kau da ai. Myihtoi ni hku, shanhte hpe matut mahkai hkrum shaga nga ai. Myihtoi Ezekiel hte Danial nga yang tara maigan mung dan hta mayam prat hku nga taw ai shanhte hte rau hkan nga lawm ma ai. Shanhte rim la hkrum ai n-nan daw hta malu masha hte dinghku arung arai ni grai matsan ma ai. Raitim, dai lam ni gawng ngwi ngwi rai bai hkum tsup wa ma ai. Shaning na wa ai hte maren, Wenyi lam hta hpang gara lam grau grau sawng wa ma ai. Dai zawn byin ai mung shanhte shut ai a majaw, rai nga ai. Shanhte ni hte ga shaka tawn da ai Karai Kasang hpe kau da na, hpara sumla naw ai ni tai mat ma ai. Isaiah Laika hta tsun da ai laklai ai lam langai mi hpe sumru yu ga. Dai gaw Karai Kasang a, myit kahpra na zawn re ai, hpyi shawn ga hpe shadan dan ai. Shi hpang de bai wa na matu hpyi nem ai lam rai nga ai. Dai gaw shat nsha hkraw ai ma hpe si wa na tsang ya ai kanu, shing nrai, kawa a asang la ai nseng zawn rai nga ai.

Karai Kasang gaw shi a myusha ni hpe daw jau na matu nam chyim nga dik, n-gun  tai dik, tsi tai dik ai malu masha ni hte daw jaw daw ya ai hpe hkam la na matu shaw shaga ai rai nga ai. Shanhte a jiwoi jiwa ni hte Mawshe a marang e ga shaka tawn da ai hta grau hkum tsup ai ga shaka ningnan bai tawn da ai shagrin masat lam rai nga ai.

Dai hpang kade nna yang, Yuda masha ni Yerusalem de bai n htang du wa ma wa ai. Myihtoi Isaiah a myihtoi ga gaw Yerusalem Htingnu bai gaw gap ai hta hkum tsup shangun ai rai nga ai. Dai shaloi shanhte Karai Kasang hpe nawku dawjau lu ma ai rai nna, shanhte a wenyi lam woi ningshawng kaja ni hpe bai hkam la lu ma ai. Shanhte hpe Mawshe a tara hte maren sharing shaga lam woi nna, Chyum mungga hte akyu hpyi ai a marang e, wenyi n gun atsam hpring tup wa shangun ai.

Myihtoi Isaiah Laika hta laklai grau htum ai lam langai gaw Messiah ngu ai Hkyela Madu a lam rai nga ai. Dai hta grau ai myihtoi ga shi hta n-nga sai. Messiah du sa ai shaloi gun sa ya na hkum tsup lam gaw yawng mayawng a matu rai nga ai. Yesu Madu dai lam ni hpe Kabu Gara Shiga hta bai tsun da nga ai. Yawhan 6:51 hta “Sumsing mungdan yu hkrat wa ai asak muk”; Yawhan 4:10, 14 hta, “Lu sha yang hpang de galoi mung hpang gara ngu n’nga ai asak hka hpawk” ngu tsun da ai.

Muk hte nga hpe law htam shangun ai lamyit kumla gaw Yesu a sak prat hta ahkyak madung rai nga ai majaw Kabu Gara Shiga laika 4 hte kaw dawn dawng ai hku kata lam nan tsun shalen da ma ai. 

San Yawhan ka da ai hta Yesu Madu muk hte nga hpe shalaw ai lamyit kumla madun ai gaw, masha law law hpe lu sha jaw na san san sha n’rai nga ai. Sape ni hte shawa masha ni hpe, du wa na shani Carpernaum kaw, shi hkaw tsun na lam hpe chye na na matu tau nau hkyen da ai lam mung rai nga ai. Dai gaw, shi hkum nan, makam masham, sharing shaga lam ni hte, grau nna, Chyoi Pra Hkum Chyeju Kumla hte shinggyim masha ni a matu malu masha rai nga ai lam rai nga ai.

Mahte a Kabu Gara Shiga hta Yesu Madu a tsawra matsan dum lama myit gaw shi a hkum hkrang pu ba ai lam hpe dang kau sai ngu tsun da nga ai. Shi kaw sa du ai ni hpe Mungga htawn tsun ya ai hte machyi ai ni hpe yu lakawn tsi shamai ya ai lam ni shi du hkawm ai shara shagu kaw galaw ai. Masha ni hpe malu masha jaw na matu Yesu Madu kasa ni hpe hkang dat ai. Kasa ni ta tut hkrang shapraw jaw sha lu na masa hta n’nga ai. Dai majaw shi hpe masa lam tsun dan ma ai. Yesu Madu gaw shi a hpang hkan ai sape ni hta shi hkum nan nlawm ai rai yang hpa mung n mai bying ai hpe chye shangun mayu ai rai nga ai. Dai hpe, hpang jahtum daw sha poi hta “Ngai hte hka jang, nanhte hpa mung n galaw lu myit dai” ngu Yawhan 15:5 hta tsun da ai.

Kabu Gara Shiga laika 4 hte kaw masha ni sha lu ai daram sha ma ai hte hkru hkru kat kat rai ma ai hpang ngam ai lam hpe ka da ma ai. Dai gaw, Yesu Madu a shawang myit kaba ai lam hpe shadan shadawng ai rai nga ai. Wenyi lam hta mung dai zawn anhte hpe shawang tsawra myit kaba hte hkru hkru kat kat jaw sha nga ai. Sumsing lu sha hpe manu jahpu n jaw ra ai sha anhte hpe shawang tsawra myit kaba hte daw jau nga ai. Anhte dai lu sha hpe n’hkam la ai rai jang kaman sha tai mat na (Yawhan 6:53).

Muk hpe shalaw jahtam ai lamyit kumla gaw Hkristan Nawku hpung hta matut taw ai kumla ningnan rai nga ai. San Mahte Kabu Gara Shiga hpe du na ra ai prat ni hta na masha yawng a matu ka da ai rai nga ai. Raitim, shi a madung yaw shada ai masha ni gaw Hkristan masha ni rai nga ai. Misa Hkungga hte Chyoi Pra Hkum Chyeju kumla hte seng ai poi ni galaw shagu dai lamyit kumla hpe bai madun dan ai re hpe Hkristan masha ni hta chye na shangun nga ai.

Mahte 14:19 hta, “Shaloi dai muk tawng manga hte nga lahkawng hpe shi la nna, lamu de mada yu let, Karai Kasang kaw chyeju shakawn nhtawm ahkyep alep di nna sape ni hpe jaw dat wu ai; sape ni mung shwa masha ni hpe gam jaw ma ai.” Bai Mt 26:26 hta, “Ya shana shat sha nga ma yang, muk langai mi la nna shaman ya nhtawm ahkyep alep di nna sape ni hpe jaw let, la sha mu, ndai gaw nye a hkum rai nga li ai, ngu mu ai.” Bai, Yesu Madu gaw shawa masha ni hpe hpung dagu madun dan ai zawn, anhte hpe mung madun dan ai hpe chye shangun mayu na rai nga ai.

Anhte a Nawku daw jau lamang ni hpe sumru yu ga. (1) Yesu Madu anhte a mara ni hpe raw dat ya ai hte anhte a ana zingli mahkra hpe mung tsi shamai kau ya ai. Misa hkungga hta rai tim, jau ni n’nga ai shara na laban nawku daw jau ai hta rai tim, n-nan hpang wa ai shaloi mara tawng ban ga ai hte hpang ga ai. (2) Bai, Yesu Madu gaw, anhte hpe shi a mungga hte wenyi lu sha jaw sha ai. Yesu Madu gaw ndai mungga hpe madat nga ai ni hpe ndai aten hta nan ga shaga nga ai. Karai Maungga hte Misa Hkungga gaw rau rai nga ra ai. Anhte gaw hkum hkrang lu sha hte wenyi lu sha lahkawng yan hpe ra kadawn nga ga ai re. Amyu mi hpe hkam la nna, amyu mi hpe n hkam la ai rai yang anhte a wenyi lam hta myit dik ai lam nga na n’re. (3) Dai hpang alu hkungga hpe la sa hkungga nawng jau ai. Muk hte tsabyin rau la sa ai sak jaw alu hkungga manu n’dan ai rai tim, Karai Kasang anhte hpe bai jaw ai akyu chyeju kaba ni hpe bai hkam la lu ai sak jau alu hkungga ni rai nga ai. Dai majaw anhte sak jaw ai alu gaw manu dan ai, n’dan ai hte nseng ai; anhte a myit masin kaw na sak jaw mayu ai myit sha ahkyak madung rai nga ai.

Yesu madu gaw shinggyim masha ni sha na matu malu masha hpe, kaman re ai hpa n’nga ai kaw na, hpan dat lu ai rai nga ai. Raitim, Ma kasha jaw ai muk tawng manga hte nga lahkawng hpe la nna, hpan shalaw dat ai.

Mu mada ai alu hkungga ni hte n’mu madu lu ai anhte a myit kata kaw na la sa wa ai hkungga ni, shawang tsawra myit hte kamsham kamhpa myit ni hpe manu dan sutgan hte galai jaw da ya ai rai nga ai. Dai alu ni gaw anhte htani htana asak lu la na matu madi shadaw rai ni rai nga ai.

Yesu Madu gaw shi a kasa ni rai nga ai hkingjawng “Jau” ni hpe sak jaw ai muk, yawng hpe garan jaw sha na matu hkang da ai. Dai muk hpe sha lawm na matu anhte hpe hkang da ai. Hpa majaw nga yang anhte a matu si hkrung si htan daram nan ahkyak ai majaw rai nga ai. Raitim, hkristan masha law law dai hpe n hkam la ma ai majaw wenyi lam hta chyasi tai nga ma ai (1Kor 12:20).

Hkristu anhte a matu tawn da ai tsawra myit hte anhte Hkristu hta tawn da ai tsaw ra myit.

Yesu Madu gaw Hkristan hpung masha ni hpe bat hte bat, shani shagu, malu masha hkam la na matu, n taw n tsang jaw da ai. Dai gaw anhte hpe tsawra ai myit kaba la ai majaw rai nga ai. Chyum Mungga daw 2 hta San Pawlu Roma hpung masha ni kaw shagun dat ai laika hta anhte ni Yesu Madu hpe gara masa hku bai htang ga ai rai tim, shi anhte hpe tsaw ra ai lam galai shai mat wa na nre, ngu ai tsun da ai.

Hkristu hta tawn da ai anhte a tsawra myit hte hka mat shangun ai lam anhte hta nga nga ai kun? Jahkrit shama ai lam raitim, zingri zingrat ai lam raitim, si hkrung si htan lam rai tim, kadai mung, gara hku mung, shi hpe Hkristu hte hka mat na lam n’lu bying shangun ai. Hka mat na lam n’mai bying sai ngu San Pawlu sakse hkam da ai. San pawlu gaw Yesu Madu a tsawra myit hpe sung dik ai hku hkam sha yu sai wa rai nna, shi a prat hkrun lam hta Hkristu Madu shi a ntsa tawn da ai tsawra myit hpe galoi mung sumru la ai re majaw shi a sakse gaw ngang kang ai. Anhte gaw Hkristu anhte hpe tsaw ai hpe n’chye na ai majaw ga sadi run chye ga ai. Karai Kasang anhte a ntsa tawn da ai tsawra myit hpe sumru let anhte bai nhtang tsawra ra ai hpe hkring hkring sumru na n gun awai la nga ga.

2020:PRANWAN LADAW (18) LABAN SHANI NA CHYUM LAIKA

PRAN WAN LADAW HTA LABAN (18)

August 2, 2020

Chyum Mungga Daw 1

Esaia 55:1-3

Ya hti na gaw myihtoi Esaia a laika hta na rai nga ai.

Hpang gara hkrum ai ni yawng hte e, ntsin nga ai de sa marit. Gumhpraw n lu ai ni e sa marit, mari nna lu sha mu. Kaja wa sa marit. Gumhpraw mung, manu jahpu mung n hkrat ai sha, tsabyi jahku hte nga chyau hpe mari la mi. Sha hpa nre ai n matu, tinang gumhpraw hpe, hkru kat n chye ai arai a matu tinang n-gun hpe, hpa rai shagram kau myit ta? Nye a ga atsawm madat mara let, mai kaja sha lu nna, sau hpum ai hta nanhte sharawng awng nga mu ga. Na la nna Ngai hpang de sa marit Madat mara mu. Nanhte a myit masin hkrung nga na ra ai. Ngai mung nanhte hta htani htana ga shaka tawn da nna, DAwi hta grin nga ai chyeju hpe nanhte shagrin da na nngai.

Ya hti ai gaw Karai Kasang a mungga rai nga ai.

Chyum Mungga Daw 2

Roma 8:35-39

Ya hti na gaw Roma ni kaw San Pawlu shagun dat ai laika hta na rai nga ai.

Hkristu a tsawra ai hta, anhte hpe kadai wa j!ahka kau lu na ta? Na a jaw e, anhte shani shagu sat kau hkrum ga ai. sAt na shagu hpe zawn, anhte hpe nawn da mi ai. nga ai hte maren, atsu atsam, tsinyam, zingri zingrat, hku hku hpang gara, singgu krin ai, hkiba shoihpa, ri nhtu hkrum yang she jahka kau lu na mi ni? N rai Anhte hpe tsawra ai wa a majaw, ndai yawng hpe anhte grau nna hkap dang kau lu ai ni rai ga ai. Si tim prawn tim, lamu kasa wa rai, du hkawhkam wa rai, ya nga ai baw htawm hpang paw ai baw, hpa hpung atsam raitim, lahta tsang na, lawu tsang na, hpan da sai hpa lama rai rai, anhte Madu Hkristu hta e, Karai Kasang a tsawra ai hta na, anhte hpe n jahka kau lu na mi ai, ngu nna ngai myit hkut nga nngai.

Ya hti ai gaw Karai Kasang a mungga rai nga ai.

Kabu Gara Shiga

Mahte14:13-21

Ya hti na gaw Mahte a laika hta na Kabu Gara Shiga rai nga ai.

Yesu gaw, Yawhan Baptista si mat ai lam na jang, li jawn nna dai yang na pru mat wa ai. Shingran katsi ai shara de lagyim sa wa ai. Shawa masha ni dai mu yang, mare shagu hkan na ni, hkarang hku shi hpang de hkan nang ma ai.

Pru wa yang masha unawng kaba hpe mu nna, matsan yu dum ai hte, machyi makaw hkrum ai ni hpe shamai shatsai ya wu ai.

Shana de du yang, sape ni shi kaw sit sa nna, Ndai shara nam mali rai nga ai. Ahkying mung lai wa sai. Kahtawng hkan sha hpa tam mari sha na matu shawa gaw, shanhte hpe shabawn dat ra na sai, ngu mu ai. Yesu gaw, shanhte hpe shabawn dat shara nnga ai. Shanhte hpe nanhte jaw sha mu, ngu sape ni hpe tsun mu ai. Sape ni gaw, anhte muk manga hte nga lahkawng sha lu ga ai ngu mu ai. Yesu gaw, dai ngai hpang de la wa marit ngu wu ai. Shawa masha ni hpe mung tsindu hkan hkrawn taw nga na matu shi hkang da wu ai.

Shaloi shi muk manga hte nga lahkawng hpe la ai. Lamu de mada yu nna, dai hpe shaman ya mu ai. Ahkyep alep di nna dai muk hpe sape ni e jaw dat wu ai. Sape ni mung shawa masha ni hpe gam jaw mu ai. Shanhte yawng sha nna hkru kat nga ma ai. Ngam ai adaw ahkyep ni lahkawn la yang, ka shi lahkawng hpring dem naw rai nga ai. Sha ai ni numsha hte ma kaji ni hpe nhti ai, la sha hkrai hkying manga daram ra nga ai.

Ya hti ai gaw Madu a Kabu Gara Shiga rai nga ai.

2020:PRANWAN LADAW (17) LABAN SHANI NA MUNGGA

Masha hkum shagu gaw tinang hta rawng ai atsam marai yawng hpe jai lang na matu yak hkak nga ai. Dai rai yang tinang hta rawng ai atsam marai kau chyen mi hpe sha asung jashawn chye nga ai. Hpa majaw nga yang tinang galaw ai amu magam ni hta myit maju jung ai lam nnga ai majaw re.

Lama wa na tinang galaw ai lam hpe ra sharawng ai, myit lawm ai rai yang gaw n-yup n-sha, nbyin nmai ngu ai myit hte shakut shaja na gaw teng sha rai nga ai. Tinang a myit masin yawng n-gun mahkra hpe jai lang nna galaw ai wa gaw teng sha awngdang ai hpe lu la na re.

Dai re ai majaw, tinang a matu gara gaw ahkyak ai n-ahkyak ai hpe chye ginghka na matu hte ahkyak ai amu bungli ni hta nna, ahkyak dik htum ngu ai hpe lata la let ra sharawng ai myit hpe bang da nna, tinang a myit masin yawng n-gun mahkra hpe jai lang let awngdang ai hte galaw sa wa lu na matu Karai Kasang hpang de akyu hpi let shakut shaja sa wa ga.

2020:PRANWAN LADAW (17) LABAN SHANI NA CHYUM LAIKA

PRANWAN LADAW HTA LABAN (17) 

July 26, 2020

CHYUM MUNGGA DAW 1 

1 Hkawhkam 3:5.7-12 

Ya hti na gaw Hkawhkam laika hta na rai nga ai. 

Gribeon shara e, Madu Karai Kasang gaw yupmang hta, Shawlumon kaw dan pru nna tsun ai, Ngai nang hpe hpa jaw na hpyi e, ngu wu ai. Shawlumon tsun ai, ya chyawm gaw, nye Karai Kasang Madu e, Nang gaw nye wa Dawi a malai, Na a mayam wa hpe hkawhkam shatai ndai. Ngai mahtang ma kaji naw rai nga nna, shang wa, pru wa, lam n chye nngai. Nang lata la ai, n dang hti lu ai, law la ai, myit sawn n hkap lu ai, Na amyu kaba hta, Na a mayam wa lawm nga nngai.

Kaja ai hte n kaja ai hpe ngai chye ginhka lu nna, na a amyu masha hpe chye jeyang na, hpaji byeng-ya rawng ai myit, na a mayam wa hpe jaw ya e law! Ndai galu kaba ai Na a amyu hpe kadai jeyang lu na rai ta? ngu hpyi wu ai. 

Shawlumon dai lam hpyi ai majaw shi ga Madu man e mai kaja nga lu ai. Karai Kasang gaw, ndai lam nang hpyi nga ai rai nna, asak galu ai, sut su sut lu ai, na a hpyen ni hpe sat kau lu na lam nang n hpyi ndai, tara daw dan lu na lam chye ginhka lu hkra hpaji byeng-ya hpyi ndai majaw, nang hpyi ai hte maren ngai jaw sade ai. Ngai nang hpe hpaji byeng-ya rawng ai hte chye chyang ai myit jaw ni ai. Nang zawn hpaji rawng ai, na a shawng e kadai n nga, na a hpang e kadai n pra na ra ai. 

Ya hti ai gaw Karai Kasang a mungga rai nga ai.

CHYUM MUNGGA DAW 2 

Roma 8:28-30 

Ya hti na gaw Roma ni kaw San Pawlu shagun dat ai laika hta na rai nga ai. 

Shakyet da sai hte maren, shaga la sai, Karai Kasang hpe tsawra ai ni a matu, yawng mayawng mai kaja hkra jawm byin wa sai, anhte chye ga ai. 

Tinang a kasha gaw kahpu kanau lanlak hta e, alat ningshawng tai u ga, mi moi na htang da sai ni hpe, shi a Kasha a gawng shingyan hte bung na matu, shi anhte hpe san da chyalu rai sai. San da chyalu ni hpe shaga mu ai. Shaga la sai ni hpe dinghpring shangun ya mu ai. 

Ya hti ai gaw Karai Kasang a mungga rai nga ai.

KABU GARA SHIGA 

Mahte 13:44-46 

Ya hti na gaw Mahte a laika hta na Kabu Gara Shiga rai nga ai. 

Lamu mungdan gaw, ga dachyawk hta makoi da nna, masha mu hkrup ai hte bai makoi da ai sutgan hte bung nga ai. Kabu gara wa nna, shi lu malu hpe dut kau nhtawm dai ga dachyawk hpe mari la wu a i.

Bai lamu mungdan gaw kaja reng ai kachyi hpe tam ai hpaga la hte bung ai. Manu kaba ai kachyi langai mi hpe mu jang, nhtang wa nna tinang lu malu dut kau nhtawm, dai hpe mari la ai. 

Ya hti ai gaw Madu a Kabu Gara shiga rai nga ai.

2020:PRAN WAN LADAW LABAN (16) NA MUNGGA

Anhte a sakhkrung hkawm sa lam,  nawku makam masham lam, kanbau magam bungli ni galaw sa wa ai lam shagu hta anhte hkum anhte tengman ai hte grai shakut galaw dum saga ai raitim, n awngdang ai lam ni, hkrat sum ai lam ni hpe hkrum katut ga na ga ai. Nang hpe tsawra ai ni a majaw myit ru myit tsang ra ai lam ni nga ai zawn, n ju ndawng ai ni a majaw mung myit daw myit hten ai aten ni nga chye ga ai. 

Anhte hkum anhte kade mi kaja ai hku galaw dum ga ai raitim, kaja ai mahtai npru ai ten ni law law lang rai nga ga ai. Ndai zawn re lam ni gara hku mi byin pru wa ai raitim, tinang hku nna myit daw myit hten ai lam n nga, pawt singdawng ai lam nnga ai sha tinang galaw ai magam bungli ni hta n shut n hprai, myit daw myit hten n rai ai sha matut galaw sa wa na gaw ahkyak rai nga ai. 

Dai ni na kabu gara shiga hta Madu Yesu anhte hpe tsun shadum ai hte maren, anhte kaja ai magam bungli ni hpe gun hpai galaw sa wa ai rai yang, anhte hpe n ju ndawng ai ni, manawn masham ai ni grau grau law wa na gaw teng sha rai nga ai. Dai zawn re lam ni hpe hkam sharang let, tinang galaw sa wa ra ai lam ni hpe ding ding man man hte matut galaw sa wa na gaw ahkyak rai nga ai. Mayam ni gaw mam ni hte hte tu kaba wa ai tsing ni hpe magan kau na lam tsun tim shanhte a sahti wa gaw ahkang n jaw ai hpe anhte na la lu nga ai. Ngu mayu ai gaw lahta kaw tsun lai mat wa sai hte maren anhte a prat hta mai kaja ai magam bungli ni hpe galaw sa wa ai hte tinang galaw ai hpe kaja ai hku n mu ai, amyu myu tsun shatan asawng jahpoi ai lam ni hpe matai dawp ai lam nre sha hpaji hparan la chye na matu sharin ya ai lam ni rai nga ai.

Ahkyak dik htum gaw anhte hku nna nli tum kaja hpe ga sau nam hpun kaja ai shara kaw hkai jahkrat chye na sha madung rai nga mali ai law.

2020:PRAN WAN LADAW LABAN (16) NA CHYUM LAIKA

PRANWAN LADAW  16

July 19, 2020

Chyum Mungga Daw I

Byeng-ya Laika 12:13, 16-19

Yahti na gaw Byeng-ya laika hta na rai nga ai.

Madu e, nang hta lai nna, masha mahkra hpe lanu ya ai Karai kaga nnga ai. Nang dawdan ai hpe n tara ai kadai nga na n rai.

Na a atsam mahtang ding hpring ai lam, a npawt rai nga ai. Nang gaw mahkra a ntsa e up nga ndai majaw, nlang hte hpe hkyamsa ya hkraw nga ndai. Na a kup tsup ai atsam hpe n kam sham, Nang hpe chye ai ni n gawn nsawn rai, shaloi sha, Nang n-gun madun ga ndai. Tinang ra ai made n-gun hpe galoi mung shapraw lu dum ai hte daw dan nga ndai.Hkyamsa ai hku shanhte hpe up hkang nga ndai. Dinghpring ai ni sumnung ra ai lam, ndai amu ni a marang e, Na amyu masha ni hpe Nang sharin ya ndai.

Shingrai, shanhte a shut hpyit mara ni a matu myit malai lu na aten jaw nga ai, ngu nna myit mada lu ai lam Na a kasha ni hpe kaja wa jaw ya nit dai.

Ya hti ai gaw Karai Kasang a mungga rai nga ai.

Chyum Mungga Daw II

Roma 8:26-27

Ya hti na gaw Roma hpung masha ni hpang de shagun dat ai laika hta na rai nga ai.

Dai hte maren, dai Wenyi mung anhte a gawng run gawng tsang ai hpe lanu lahku ya nga ai: kaning rai nme law, akyu hpyi mai ai hte maren anhte n chye hpyi nga ga ti mung, dai Wenyi nan n-gup n hkawn lu ai kraw madai ai hte, anhte a matu hpyi htinglu ya mi ai; kraw lawang e sawk yu ai wa chyawm gaw, Wenyi a myit hpa rai nga ai gaw chye ya nga ai: kaning rai nme law, Karai Kasang ra ai hte maren, chyoi pra ai ni a matu mara shi hpyi htinglu ya nga ai.

Ya hti ai gaw Karai Kasang a Mungga rai nga ai.

Kabu Gara Shiga

Mahte 13:24-30

Ya hti na gaw Kasa Mahte ka da ai Kabu Gara shiga hta na rai nga ai.

Yesu tsun ai, Sumsing lamu a mungdan, hkauna hta nli kaja gat ai wa hte bung nga ai. Masha ni yup pyaw nga yang, gumlau ai wa gaw sa nna, dai mam hta e tsing tum gat bang, nhtawm pru mat wa ai. Ya dai mam maku tu wa nna asi si jang, tsing mung dan pru wa ai. Shaloi nta madu a mayam ni sa du nna, Madu e, na a hkauna hta e nli kaja ai nang gat nu ai n rai ni? rai taw gaw, hpa rai nme tsing tu a ta? ngu mu ai. Shi gaw, Gumlau wa dai hpe galaw nu ai, ngu nna shanhte hpe tsun mu ai. Dai rai nna shanhte gaw, Anhte dai hpe magang kau na, nang hkraw nga n ni? shi hpe ngu mu ai. Shi mahtang, N rai, nanhte tsing hpe baw kau yang gaw, mam hte nawng n baw lawm u ga, dai a nga nga u ga. Dai lahkawng yan nmut ta du hkra, rau tu kaba wa mu ga: nmut ta du jang, tsing hpe shawng dan mahkawng nna, nhtan nhtawm wan hta nat kau mu; dai mam hpe chyawm gaw, nye a dum hta e mahkawng da mu, ngu nna mam dan ai ni hpe ngai tsun na ma we ai, ngu mu ai.

Ya hti ai gaw Karai Kasang a mungga rai nga ai.

2020:PRAN WAN LADAW LABAN (15) NA MUNGGA

Mungkan hta lu su dik htum ngu masat da hkrum ai Bill Gates hpe anhte yawng na yu na ga ai. Bill Gates gaw lama wa lam hkawm let shi a gumhpraw dollar 100 je jahkrat kau ai rai yang, dai shi jahkrat kau ai gumhpraw dollar 100 hpe bai hta la na aten lu jaw ai da. Hpa majaw nga yang shi a shang gumhpraw gaw second mi hta dollar 300 shang taw ai majaw re. Jahkrat kau ai dollar 100 hpe hta la na matu nlaw htum aten second 3 dang aten jaw ra nna, dai second 3 re aten hpe shama kau ai rai yang shi a shang gumhpraw dollar 900 sum mat na majaw rai nga ai.

Dai ni na aten Mungkan Mungdan law law wa hta lu su, matsan shai hkat ai madang gaw nau law wa ai majaw mahkang law law wa byin nga ai lam shiga ni hta jahkring hkring mu lu, hti lu na ga ai. Hpa majaw lu su ai ni gaw grau grau lu su wa nna, matsan ai ni gaw grau grau matsan jat wa ai kun? anhte myit yu mai nga ai.

Lu su ai ni gaw shanhte a lu da ai ja sutgan ni hpe grau grau law jat wa hkra nga arang law law bang nna, nhkring nsa bungli galaw shakut nga ma ai. Shanhte a matu aten shajan ngu ai gaw n nga ai daram rai nga ai. Bai matsan ai ni gaw lu tawn da ai made hte myit dik nna nga chye ga ai. Lama, lu da ai hte hpe arang shatai nna bungli galaw yang sum kau na hpe hkrit chye ai majaw rai nga ai. Lu tawn da ai hpe grau law jat wa hkra galaw ai lam nnga ai sha n-ga, dai lu da ai hpe myit mu myit dik let jai sha shama kau chye nga ga ai.

America Mungdan a Shanglawt lu ai July 4 ya shana hta ma hkan nau ni hpe mawdaw hta htaw let wan shanan (fire works) gap kapaw ai lam hpe hkan woi yu hkawm nngai. Dai shaloi hpa baw mu lu ai i nga yang, wan shanan (fire works) gap kapaw pyaw chayi ai lam hpe matsan masha ni nga ai lawk ni hta grau mu mada nna, lu su sahti ni nga ai lawk hkan gaw pi n mu lu ai daram re.

Dai ni na kabu gara shiga hta Madu Yesu gaw, lu ai wa kadai hpe mung naw jat jaw nna, n lu ai wa kaw na shi naw la kau ya na lam tsun da nga ai. Anhte a prat hta Madu Karai Kasang bai jat jaw mayu ai ni rai nga ga ai kun? anhte lu ai hte kaw na Madu Karai bai la kau ya hkrum ai ni rai nga ga ai kun? myit yu hpa rai nga ai. Madu Karai Kasang grau nna jat jaw mayu ai ni byin tai lu hkra ga sau kaja ai kaw hkrat ai nli tum ni byin tai lu hkra matut shakut sa wa nga ga law.

2020:PRAN WAN LADAW LABAN (15) NA CHYUM LAIKA

PRANWAN LADAW  15

July 12, 2020

Chyum Mungga Daw I

Esaia 55:10-11

Ya hti na gaw Myihtoi Esaia laika hta na rai nga ai.

Kaning rai nme law, marang hte ahkyen gaw, lamu de na htu hkrat nna, dai de bai n wa ai sha, nli gat ai wa hpe nli, makan galaw ai wa hpe shahpa jaw lu hkra aga hpe madit let, matsun hte maku shaprut nna, asi si shangun ai zawn, nye n-gup kaw na pru ai mungga mung dai hte maren tai na ra ai, dai gaw ngai hpang de kaman nhtang wa na nrai, ngai ra ai hku shadik ya na ra ai, ngai shangun ai amu hta awng wa na ra ai.

Ya hti ai gaw Karai Kasang a mungga rai nga ai.

Chyum Mungga Daw II

Roma 8:18-23

Ya hti ai gaw Roma ni hpang de shagun dat ai laika hta na rai nga ai.

Kaning rai nme law, ndai aprat na tsin-yam tsindam gaw, anhte kaw e shadan shapraw na ra ai hpung shingkang hte shadawn n ging nga ai, ngai myit nga nngai. Nga yawng nga pra mung myit ndawt ai hte, Karai Kasnag a kashu kasha ni a paw pru na ra ai hpe ala nga ma ai. Dai nga yawng nga pra chyawm gaw, hten run lam npu e shagrit kau ai hkrum rai ti mung, tinang ra ai hku n re ai sha, nga yawng nga pra nan lala sharen da ngu ai hten mat ai kaw na shalawt dat ai hkrum nna, Karai Kasang a kashu kasha ni a pru lawt wa ngu ai hpung shingkang hta shang lu na, myit mada nga nna, dai hpe shagrit kau ai wa a majaw, shagrit kau ai hkam nga ai. Dai hta kaga, nga yawng nga pra ting gaw ya du hkra rau madai nga nna, gadau gadap rai nga ma ai hpe, anhte chye ga ai. Dai hta n-ga, Wenyi a chyeju nloi hpe hkam la sai ni anhte mung,anhte a kraw lawang hta e, anhte nan madai nga nna, anhte a hkum hkrang a htingrai htingrat ai lam ngu ai, kasha yin la na chyeju hpe, a la nga ga ai. 

Ya hti ai gaw Karai Kasang a mungga rai nga ai.

Kabu Gara Shiga

Mahte 13:1-23 (Sh) Mahte 13:1-9

Ya hti na gaw Kasa Mahte ka da ai Kabu Gara Shiga hta na rai nga ai.

Dai shani jang, Yesu gaw dai nta na pru nhtawm, nawng makau e sa dung nga ai. Masha wunawng wuwa shi hpang de zup hpawng sa wa ma ai majaw, li langai mi hta shi shang dung nga ai rai nna, shawa masha ni mahkra gaw hkingau hta e tsap nga ma ai. Shaloi, lam law law wa ga shadawn hku hte shi shanhte hpe tsun mu ai gaw, Nli gat ai wa gaw nli gat na pru sa wa ai. Gat dat wu yang nkau mi gaw lam makau e hkrat nna, u ni dai hpe sa hta sha kau mu ai. Nkau mi gaw, ga n law ai lung rawk hta e hkrat wa nna, ga n htat ai majaw, ya jang tu pru ti mung, jan pru katen jang krau mat wa ai rai nna, ru n jung lu ai majaw hkraw mat wa ai. Nkau mi gaw ju hpun nhpang e hkrat nna, ju hpun ni tu kaba wa ai hte, dai hpe lim kau mu ai. Nkau mi gaw ga kaja hta hkrat wa nna, asi si wa ai: nkau mi dang latsa, nkau mi kru shi, nkau mi sumshi si mayat wa ai: na tu ai wa gaw na la u ga, ngu mu ai. Shaloi shi a sape ni sit wa nna, Ndai ni hpe hpa rai ga shadawn hte tsundan mu ta? ngu nna shi hpe san mu ai.

Shi htan nna, Sumsing lamu a mungdan a sung htum ai lam ni hpe chye na shara, nanhte a matu hku nga ma lit dai; wora ni a matu chye na shara n hku ma lu ai. Kaning rai nme law, lu ai wa kadai hpe mung naw jat jaw na rai nna, shi law wa na ra ai; n lu ai wa kaw na pyi shi lu ai hpe naw shaw la na ra ai. Dai rai nna, shanhte mu lamu n mu ai hte, na lana n na la nna, n chye na ma ai majaw, ga shadawn hku ngai shanhte hpe tsun dan ma we ai. Shing rai, Esaia tsun ai myihtoi ga gaw shanhte hta dik ang wa sai. Shi gaw, Nanhte na lana n chye na la na mu ai, Yu layu e n mu na mu ai, Kaning rai nme law, ndai amyu gaw, Tinang myi hte n mu lu na hte Na hte n na lu nna, Myit hte n chye na lu mu ga she, Shanhte myit n kayin lu nna, Ngai shanhte hpe n shamai mai lu hkra Shanhte a myit mak nga nna, Shanhte a na lahpang nga ai hte, Shanhte a myi pat nga ma lu ai, nga ai. 

Nanhte a myi mu lu ai hte, nanhte a na, na lu nga ma lit dai majaw, a nga myit dai. Nanhte hpe ngai teng teng tsun ma de ga, nanhte mu lu ai arai ni hpe myihtoi hte ding hpring ai masha law law wa, mu mayu ti mung, n mu ma ai; nanhte na lu ai lam ni hpe mung, na mayu ti mung, n na lu ma ai. Dai rai nna dai nli gat ai ga shadawn hpe madat la mu. 

Kadai mung, dai mungdan lam hpe na ninglen n chye la yang gaw, dai n hkru ai wa sa du nna, shi a myit hta gat ai nli hpe shaw la kau wu ai: dai gaw lam makau e gat ai nli hpe rai nga ai. Lung rawk hta gat ai nli a lam gaw, dai ga hpe na nna, shaloi jang kabu gara ai myit hte hta la wu ti mung, kraw hta e ru n jung ai majaw, ladaw mi sha nga nga nhtawm, dai mungga a majaw ru tsang ai hte zingri zingrat hkrum jang, shaloi e myit kataw re ai wa hpe rai nga ai. Ju hpun hta gat ai nli a lam gaw, dai ga hpe na la ti mung, ndai prat na myit tsang ai hte hkalem kau ai sut gan gaw, dai mungga hpe lim kau nna, asi n si lu ai wa hpe rai nga ai. Ga kaja hta gat ai nli a lam chyawm gaw, dai ga hpe na la nna hta la nu ai hte, gaja wa teng teng asi si nna,nkau mi dang latsa, nkau mi kru shi, nkau mi sumshi jat wa ai wa hpe, rai nga ai, ngu wu ai.

Ya hti ai gaw Madu a Kabu Gara Shiga rai nga ai.

2020:PRAN WAN LADAW LABAN (14) NA MUNGGA

Anhte a sakhkrung hkawm sa lam hta shini shagu na kan bau magam lam ni hta sha bungli kyin chye nga ga ai. Shani shagu ndai zawn re magam bungli ni a majaw anhte hta myit ba, hkum ba byin chye nga ga ai. Kalang lang shani shagu na magam bungli ni a majaw hkiba lit li ai hte myit htum, myit daw ai lam ni mung byin chye nga ga ai. Dai zawn byin wa ai shaloi anhte hta pawt singdawng ai lam ni, n ju ndawng ai lam ni, mara tam ai lam ni byin pru chye ga ai. Grau nna Karai Kasang hpang de sit shang na, akyu hpyi na pi n kam wa chye ga ai.

Dai ni na Kabu Gara Shiga hta Madu Yesu gaw, "Hki ba la nna lit li gun ai ni yawng hte e, ngai kaw wa ma rit; ngai nanhte hpe ban sa shangun na ma de ai." nga nna anhte ga sadi jaw da nga ai. Laga makam masham ni hpe hka ja yu ai shaloi, Madu Yesu zawn hpang hkan ai ni hpe ndai zawn ga sadi jaw ai lam ni hpe n mu lu ga ai. Anhte hkap la kamsham ai Madu Yesu gaw kaja wa teng teng Karai Kasang rai nga ai sha n-ga, dai ni na aten du hkra sakhkrung let anhte hte rau nga nga ai hkrung ai Karai Kasang rai nga ai hpe anhte myit dum ra nga ga ai. Dai zawn asak hkrung ai Karai Kasang hpe lu da nga ninglen, anhte Shi hpe malap mali rai tawn da chye nga ga ai. Mungkan ga a ru yak lam ni a majaw sha Karai Kasang hpe shingdu tawn da kau chye nga ga ai.

Anhte a shani shagu na ru yak jam jau lam ni, hki ba lit li ai lam ni ma hkra hpe dai asak hkrung ai Karai Yesu hta e ap da ai rai yang shani shagu myit ngwi simsa ai shaman chyeju hpe hkam la lu na ga ai. Anhte hkum hpe san ra ai lam gaw, anhte a shani shagu na sakhkrung hkawm sa lam hta hkrum katut nga ai ru yak kindut, tsim yam tsim dam lam ni hpe Madu Yesu hta ap da ga sai kun ngu ai rai nga ai. Madu Yesu ga sadi jaw da ai hte maren na a prat hta hki ba lit li ai ten ni hta Madu Yesu hpang de sit shang garum hpyi ai rai yang kaja wa na a hki ba ai lam ni, myit ru myit tsang lam ni ma hkra hkoi mat nna Madu Yesu kaw na sim sa ai shaman chyeju hpe teng sha lu la na rai nga ai law.

2020:PRAN WAN LADAW LABAN (14) NA CHYUM LAIKA

PRANWAN LADAW  14

July 5, 2020

Chyum Mungga Daw I

Zehkaria 9:9-10

Ya hti ai gaw Myihtoi Zehkaria a laika hta na rai nga ai.

Ziun shayi sha e, nachying kabu gara nga u, Yerusalem shayi sha e, garu jahtau u, yu u, na a hkawhkam wa nang hpang de du ra ai: Shi gaw ding hpring nga nna, hkye hkrang la ai lam shapraw nu ai; Shi gaw sumnung ai myit rawng nna, lawze a ntsa e, rai sa, lawze kanu a kasha ntsa e jawn nga ai. Ngai gaw Ehprim a hpyen leng ni hte Yerusalem a gumra ni hpe jahtum kau na nngai; hpyen ndan mung agrawp kau ai hkrum na ra ai. Shi gaw maigan amyu ni hpe ngwi pyaw lam tsun dan nna, nammukdara kaw nna, nammukdara du hkra, Uhprat hka nu kaw nna, lamu ga htum hkra up nga na ra ai.

Ya hti ai gaw Karai Kasang a mungga rai nga ai.

Chyum Mungga Daw II

Roma 8:9, 11-13

Ya hti ai gaw Roma ni hpang de shagun dat ai laika hta na rai nga ai.

Nanhte hta e chyawm gaw Karai Kasang a Wenyi rawng nga myit yang gaw, nanhte hkum shan myit hta e n rai, Wenyi hta e nan rawng nga myit dai. Langai ngai gaw Hkristu a Wenyi n rawng yang dai wa shi hte n seng nga ai. Dai hta kaga, si mat ai ni kaw na Yesu hpe hkrung sharawt la ai wa a Wenyi gaw, nanhte hta e rawng nga a yang gaw, si mat ai ni kaw na Hkristu Yesu hpe hkrung sharawt la ai wa gaw, nanhte hta e rawng nga ai shi a Wenyi a lata hte nanhte a si chye ai hkum hkrang ni hpe mung, jahkrung ya na ma rin dai. Dai re ai majaw, hpu nau ni e, hkum shan a myit hkan nang na matu, hkum shan a hka kap ai ni anhte rai nga ga ai n rai; kaning rai nme law, hkum shan hte seng ai asak sha hkrung nga myit yang gaw, nanhte si na rai nga myit dai; rai ti mung, Wenyi hte hkum hkrang a arawn alai ni hpe nanhte sat kau myit yang gaw, nanhte hkrung nga na ma rin dai. 

Ya hti ai gaw Karai Kasang a mungga rai nga ai.

Kabu Gara Shiga

Mahte 11:25-30

Ya hti na gaw Kasa Mahte ka da ai Kabu Gara Shiga hta na ria nga ai.

Dai aten hte hta Yesu gaw ga hpaw nna, Sumsing lamu hte ginding aga a Madu, Wa e; hpaji byeng-ya rawng ai ni hte myit kung hpan ai ni kaw na ndai lam nang makoi magap da nhtawm, ma kaji ni hpe madun dan ndai majaw, ngai nang hpe shakawn kungdawn nngai: rai sa, Wa e, nang tsaw ai hku, ndai rai nga lit dai. Nye Wa gaw arai yawng mayawng ngai hpe ap ya ni ai; Wa hta kaga, dai kasha hpe kadai mung nchye lu ai: dai Kasha hte, dai Kasha jahtoi ya mayu ai masha hta kaga, Wa hpe mung, kadai n chye lu ai. Hki ba la nna lit li gun ai ni yawng hte e, ngai kaw wa ma rit; ngai nanhte hpe ban sa shangun na ma de ai. Ngai gaw myit sumnung ai hte myit gyip nga nngai rai nna nye a kandang hpe hpai mu, nye a lam sharin la mu: dai rai yang nanhte a myit masin ban sa ai hkrum na ma lit dai: kaning rai nme law, nye a kandang hpai loi ai hte, nye a lit mung tsang nga li ai, ngu mu ai.

Ya hti ai gaw Madu a Kabu Gara Shiga rai nga ai.