2023: KUNGLA SHAMAN POI SHANI NA MUNGGA

Yesu gaw nni nkri hkam la na, si hkam, bai hkrung rawt na matu Yerusalem de shang wa ai. Awng padang hkam hte rai mare de shang wa ai. Byin wa ai amu ni a lam, yaw shada ai lam ni hpe dai aprat na masha ni mung, sape ni mung n chye kau dat ma ai. Hkristu gaw nni nkri hte sat kau hkrum ai hpe hkam la nna sha awng padang hkam la lu na, hkye hkrang la ai amu hpe shăngut shăkre lu na rai nga ai. Padang ninglaw hte rai, lawze jawn nna mare de shang wa ai anhte a ningbaw wa a hpang hkan ai, kamsham ai sape ni gaw Shi hte rau, nni nkri hkam la lawm na hpe mung shăjin da ra ga ai.

Isaiah a Laika hta tsun da ai Karai a shăngun ma gaw teng sha, Yesu hpe shăang ai myihtoi ga rai nga ai. Dai shăngun ma gaw kuptsup ai hku Karai a ga hpe madat ai, Karai a masing re ai nni nkri hkam la nna awng padang hkam la na wa rai nga ai.

Dinghta ga na Hkawhkam ni, hpyen Du ni gaw reng dik ai, ninggun ja ai, kăgat chyang ai, tsawm ai, share ai gumra jawn ma ai. Yesu gaw dusat ni hta shagrit chye dik ai dusat, lit kade shabawn tim ninghkap ai lam n gălaw ai lawze hpe mahtang jawn nna si hkam na matu, Yerusalem Mare de shang wa ai. Yesu a sape majing re ai San Pra ai masha ni yawng gaw shăgrit shănyem ai, madat măra hkam sharang lu dik ai ni rai ma ai. San Pawlu nga yang Yesu a matu măra shi mana tai hkam ai, nga ai. Yawhan Baptista gaw shangai wa ai numsha ni yawng hta grau dik ai wa re, nga, Yesu tsun ai. Rai tim, shi hkum nan yin la ai, “Ngai gaw Shi a kyepdin sumri raw ya na pyi n gingdan nngai”, nga ai. Hpang jahtum shana shat sha ngut ai hpang, Yesu gaw nshang e hpajet hpe kyit nna sape ni a lagaw ni hpe hkan kashin ya ai. Shanhte a lagaw ni hpe hpajet hte hkan katsut ya ai. Dai hpang sape ni hpe tsun ai, “Nanhte mung shada a lagaw ni hpe kashin ya mu”, nga ai. Yesu a sape tai mayu ai ni gaw kaning re ai amu hpe rai tim, kaning re ai shara kaw ang wa ai rai tim, hpa mi gălaw ang tim, shagrit shanyem ai myit hte, Madu a mayam hte shăangun ma tai ra ai lam hpe sharin ya ai.

Yesu gaw Kawa Karai e lăjang da, masing gran da ya ai hpe shatup na matu, dusat ni hta anya dik ai ngu ai lawze hpe shangun lang ai. Yak dik ai amu re ai nni nkri hpe hkam la nna sat kau hkrum ra ai. Dai masing yawng hpe madat măra ai myit tup hkra hte, tsawra dawjau ai myit tup hkra hte, shăgrit shănyem ai myit tup hkra hte hkan galaw ai.

English ga hku ănya dik ai masha hpe “Lawze” ngu shamying ma ai. Rai tim, Yesu gaw hkye hkrang la ai amu shatup na matu shingre ai lawze hpe akyu jashawn lang lai wa ai. Dinghta ga na Du/Hkawhkam ni gaw reng dik ai, tsawm dik ai, ninggun jaw grau ai gumra hpe she lata jawn nna arawng power madun ma ai. Myit tsaw myit dap ai hte masha ni hpe renghkang sha ma ai n rai a hka! Dinghta ga masha ni gaw tsawm ai, pri nyen grau ai, hkik hkam ai, pyaw ai, ja gumhpraw, power, shingre ai lam hpe akyu jashawn nna dinghta arawng aya hpe gawgap ma ai n rai a hka!

Yesu jawn na lawze kadai kam tai a ta? San Pra ai masha ni rai ma ai. Ya ndai prat hta rai tim, galoi rai tim, Yesu jawn na lawze tai kam ai ni sasana magam hta law law ra kadawn nga ai. Dinghta myit n tsai ai sasăna magam gun ni, Nawku Hpung a magam bungli ni hta arawng sadang, lu lawm lam, bungli galaw pyaw ai shara, ruyak jamjau n hkrum ai shara,…shingre ai baw ni hpe lata la mayu shajang ma ai n rai a hka!

Karai a shăngun ma Yesu shi hkum nan Kawa e sing da ya ai maka yawng hpe madat mara ai myit tup, tsawra myit tup hte zingri hkam, sat kau ai hpe hkam la nna hkye hkrang la ai amu hpe galaw shatup ai; shingra, awng padang hpe hkam la ai rai nga ai. Shi a shăgrit shănyem madat mara ai a marang e, Kawa Karai Kasang gaw Shi hpe tsaw dik htum ai arawng aya shagrau ya ai, nga, Hpilipi Laika hta tsun da ai.
Karai a hkye hkrang la ai masing hta shang lawm madi shadaw mayu ai ni yawng, Yesu jawn na lawze tai hkam la na myit jasat rawng ra ai lam hpe shadum ya ai.

Sumru yu mai ai lam_
 Tinang a hkum hpe ningdang nyet kau ai, ngu ai, hpa wa rai ta?
 Yesu jawn na lawze tai ya na rai yang Madu e shangun ai amu, shăang ai amu hta kabu ai myit hte hkam la na jin jin rai lu na kun?
 Tinang a prat hta n chye madat ai mabyin ni, prat a maka ni hpe gara hku htai la na ta?

2023: KUNGLA SHAMAN POI SHANI NA CHYUM LAIKA

KUNGLA SHAMAN AI LABAN
April 2, 2023
Chyum Mungga Daw (1)

Esaia 50:4-7

Ya hti na gaw myihtoi Esaia a laika  hta na rai nga ai.
Hki ba hkrum ai wa hpe shalan shabran ai ga chye tsun lu hkra, Madu gaw sharin achyin hkam la ai sape a shinglet ngai hpe jaw ni ai. Shi a ga na la na matu, jahpawt shagu shi ngai hpe jasu nga ai: sape wa madat la ai zawn ngai mung madat la lu u ga, Madu nye a na hpe hpaw ya ni ai. Ngai mahtang lata kau ai hte kanut mat wa ai nrai. Ngai gaw kayat ai ni hpe nye a shingma, shabyi mun baw ai ni hpe nye a shabyi, ap ya nngai: asawng asang di ai hte, mayen mahtaw bun ai kaw na nye a myiman kayin kau ai nrai. Kaning rai nme law, Madu gaw ngai hpe garum na ra ai; dai majaw asawng asang di ai lam ni gaw ngai hpe myit n jahtum kau nga ai. Ngai kaya kahpa n hkrum lu na ngai chye ai majaw, nye a myiman hpe mung, nhpai lung zawn ngai shatai da nngai.
Karai Kasang a Mungga rai nga ai.

Chyum Mungga Daw (2)

Hpilipi 2:6-11

Ya hti na gaw Hpilipi masha ni hpang de San Pawlu shagun dat ai  laika hta na rai nga ai.
Hpu nau ni e, Hkristu Yesu gaw Karai Kasang nan rai nga timung, Karai Kasang hte maren rai nga na hpe n manoi ai sha, mayam madang hpe hkap la na matu, Karai Kasang a hpung shingkang hpe raw tawn nna, shiggyim masha hte bung hkra tai wa sai. Shing rai masha a hkum shan hku anhte kaw dan pru nhtawm, shi hkum hpe shagrit shanem nna, si ai du hkra madat mara nga ai, gaja wa, Udang hta si ai du hkra madat mara nga ai. Rai timung, Karai Kasang gaw shi hpe shagrau nna, amying yawng mayawng hta grau ai amying shingteng shi hpe jaw da wu ai. Dai re ai majaw, sumsing lamu tang hta, ginding aga tsang hta na hte, lawu na tsang na lahput yawng hte gaw Yesu a amying hte hput di na mara ai.Dai hta n-ga, Kawa Karai Kasang a hpung shingkang a matu mara, Yesu Hkristu gaw Madu rai nga ai, nga nna shinglet yawng mayawng kajai gumhkawng na mara ai.
Karai Kasang a Mungga rai nga ai.

KABU GARA SHIGA

Mahte 27:11-54

Ya hti na gaw Mahte a laika hta na Madu Yesu a nni nkri yubak lam rai nga ai. 
Madu Yesu hpe Roma munggyi wa Puntsiu Pilatu a man de woi jashawn mu ai; dai du kaba gaw, Nang Yuda ni a hkawhkam rai nga nni? ngu nna Shi hpe san wu ai. Yesu gaw, nang tsun ai hte maren rai nga nngai, ngu wu ai. Rai timung, hkinjawng agyi ni hte salang ni Yesu hpe mara shagun yang, shi hpa mung n htan wu ai. Shaloi Pilatu gaw, shanhte na a lam sakse gade wa hkam ya ai hpe n na n ni? ngu nna shi hpe tsun wu ai. Yesu mahtang ga hkaw mi n htan ya ai. Dai rai nna munggyi wa nachying mau nga ai. Dai Poi aten hta e, munggyi wa shawa masha ni ra ai hku hkan nna, htawng rawng ai masha langai ngai hpe dat ya na htung nga ai. Dai shaloi e, Baraba ngu ai, kajai gumhkawng ai bawng dung ai masha langai mi nga ai. Masha law law hpawng nga ai majaw, Pilatu gaw, Nanhte a matu dat ya na, kadai mahtang hpe ra myit ta? Baraba hpe ra myit ni? shing n rai, Hkristu ngu ai Yesu hpe ra myit ni? ngu nna shanhte hpe san wu ai. Kaning rai nme nga yang, manawn masham ai a majaw, shanhte Yesu hpe ap kau ma ai Pilatu chye nga ai.

Ya, tara tingnyang hta e shi dung nga yang, shi a madu jan shi kaw shangun dat nna, dai ding hpring ai wa hpe hpa mung hkum di u; dai ni pyi, yup mang hta e shi a majaw, ngai myit ru tsang grai hkrum ni ai, ngu nna htet dat wu ai. Hkinjawng agyi ni hte salang ni chyawm gaw Baraba hpe hpyi nna, Yesu hpe sat kau na, ngu nna shawa masha ni hpe shadut ma ai. Shaloi dai du kaba shanhte hpe san yu nna, ndai yan hta na nanhte a matu dat ya na, gara mahtang hpe ra myit ta? ngu nna san yang, shanhte gaw, Baraba hpe ra ga ai, ngu nna htan ya ma ai.  Bai Pilatu gaw, Hkristu ngu ai Yesu hpe ngai kaning di na rai ta? ngu nna shanhte hpe tsun mu ai. Shanhte yawng, Udang hta jen da u, ngu mu ai. Bai shi gaw, Hpa majaw dai hku di na i? shi n hkru ai lam hpa galaw sa ta? ngu wu ai. Shanhte chyawm gaw, Udang hta jen da u, nga nna grau jahtau bu ma ai. Pilatu mahtang gaw, gara hku mung n dang lu ai hte, kabrawng kabrang byin wa ai hpe mu yang, hka la nna, shawa masha ni a man e lata kashin let, ndai ding hpring ai wa a asai hkaw kau ya ai gaw, nye a mara n rai sai; nanhte nan dai lit hpe hkap la mu, ngu wu ai.

Dai rai nna, masha yawng hte gaw, shi a asai anhte a ntsa e mung, anhte a shu sha ni a ntsa e mung mara nga u ga, ngu nna htan ma ai. Shaloi jang Pilatu gaw Baraba hpe, shanhte ra ai hte maren dat ya mu ai. Yesu hpe mahtang shi kayat nna, Udang hta jen da ai hkrum u ga, ap kau dat wu ai. Shaloi dai munggyi wa a hpyen ma ni gaw, Yesu hpe htingnu nhku de woi wa nna, dai hpyen dap na ni yawng hte hpe Yesu a man de shaga jahpawng tawn mu ai. Shanhte shi hpun palawng raw kau nna, ahkyeng nsan ai nba lawai ya mu ai; ju kagup mung shanhte hkri la nhtawm, shi a baw hta shagup ya nna, shi hkra lata e mai-aw yan mi jum shagun ma ai. Shaloi Yesu a man e lahput hput di let, shi hpe asawng nna, Yuda ni a hkawhkam wa e, nang galu kaba nga u ga law, ngu mu ai. Bai, shi hpe mayen mahtaw bun nhtawm, dai mai-aw yan hpe shanhte la nna, shi a baw hpe gayat ya mu ai. Shanhte shi hpe asawng asang di ngut jang, hkyeng ai nba hpe raw kau nna, shi a hpun palawng hpe jahpun nhtawm, udang hta jen da na matu woi sa wa ma ai.

Shanhte pru sa wa yang, Simun mying ai Kureni mung masha langai mi hpe shanhte mu hkrup nna, shi hpe Yesu a udang hpai shangun ma ai. Ya Gol-go-hta ngu ai, Baw Pungkum mying ai shara de du jang, hka ai tsi hte hpaw ai tsabyi chyaru shi hpe jaw lu timung, Yesu dai hpe chyim yu nhtawm, n kam lu wu ai. Shi hpe udang hta jen da ngut jang, shanhte shi a hpun palawng hpe hpaida da ai hte jawm karan la ma ai. Shaloi dai yang e dung nga nna, shi hpe sin da mu ai. Shi a baw ntsa e “ndai Wa gaw Yuda ni a Hkawhkam, Yesu rai nga ai,” nga nna shi a mara madun ai laika hpe, shanhte shakap da ma ai. Yesu hte rau damya  lahkawng hpe, hkra maga de langai mi, pai maga de langai mi jen da mu ai. Lam e lai sa wa ai ni mung, shi hpe asawng asang di nna, shanhte a baw hpe kanga let, “Nawku Htingnu hpe jahten sharun kau nna, masum ya laman hta, bai de lu na, nga ai wa e, Na hkum hpe nan hkye la u: nang Karai Kasang a Kasha rai yang gaw, udang hta na yu hkrat wa rit,” ngu mu ai. Hkinjawng agyi ni, tara sara ni hte salang ni mung, “Masha kaga hpe shi hkye la sai; ya, tinang a hkum hpe n hkye la lu a hka! Shi gaw Israela a Hkawhkam rai yang gaw, Udang hta na yu wa u ga; Shaloi anhte shi hpe kam sham na ga ai. Shi gaw Karai Kasang hpe kam hpa nga ai; Karai Kasang Shi hpe ra sharawng ai rai yang, ya shi hpe mawai la u ga: kaning rai nme law, ngai gaw Karai Kasang a Kasha rai nga nngai nga nna shi tsun da ni ai,” ngu nna Yesu hpe asawng let tsun mu ai.

Shi hte rau udang hta jen da hkrum ai damya yan mung, dai hte maren shi hpe aroi arip di mu ai. Ya Jan pungding madi ai kaw nna ahkying masum du hkra, mung ting e nsin chyip rai mat sai. Ahkying masum daram e Yesu gaw nsen kaba hte, Eli, Eli, Lama sabak-htani nga nna jahtau wu ai: dai gaw, nye a Karai Wa e, nye a Karai Wa e, nang ngai hpe hpa rai kau da nga n ta? nga ai, rai lu ai. Dai makau e tsap nga ai ni nkau mi gaw dai hpe na la jang, Shi Elia hpe shaga nga ai, nga ma ai. Shaloi jang shanhte hta na marai langai mi gat sa nna, hka kamu la nhtawm, kumba yan hta shakap nhtawm, lu na matu shi hpe jaw wu ai. Kaga ni mahtang gaw, Naw la u ga: Elia shi hpe sa hkye la na kun, anhte yu yu ga, nga ma ai. Bai Yesu gaw nsen kaba hte bai jahtau wu ai hpang, shi a wenyi hpe jahti kau wu ai. (Ya, yawng hput di let, jahkring mi myit sumru yu ra ai.) Shaloi nawku htingnu na nba grang, ntsa de nna hkren, ka-ang brang ga mat wa ai. Ginding aga mung ashun awam wa nna, lunghkrung ni ga mat wa ai; lup ni mung hpaw mahka wa nna, Chyoi pra ai ni a hkum tsawp law law wa rawt wa nga ma ai. Yesu bai hkrung rawt ai hpang, shanhte lup ni hta na pru wa nhtawm, dai chyoi pra ai mare de shang wa nna, masha law law hpe tinang nang a hkum madun dan ma ai. Hpyen latsa up ai du hte, shi hte rau Yesu hpe sin nga ai ni gaw, dai nnang nawn hte byin mabyin hpe mu jang, shanhte hkrit kahpra nna, kaja wa, ndai wa gaw Karai Kasang a Kasha nan rai nga ai, nga nna tsun ma ai.
Madu a Kabu Gara Shiga rai nga ai.

2023: LUSHA GAM LADAW LABAN (5) NA MUNGGA

Shawng na Laban bat ni hta Yesu gaw asak jaw ai hka, Kaja ai Sagu Rem, mungkan a Ninghtoi, ndai lam ni hpe shădan dan lai wa sai. Yesu shi galaw dan ai mau-hpa amu ni, Karai Kasang a hpung shingkang hpe shădan dan ai amu ni hta, ya, ndai lang, Lazaru hpe jăhkrung shărawt la ai gaw grau dik htum ai amu rai nga ai. Shi hpe kamsham hkap la ai ni teng sha a hkrung nga lu na, ngu ai lam hpe n shut n shai kamsham lu ga ai. Yesu a asak apart, nni nkri, si hkam ai, bai hkrung rawt wa ai hta, anhte hpe tsawra ai Karai Kasang a shaga la ai lam, Yesu hta htani htana asak hpe dagraw hkam la lu na lam sakse rai nga ai.

Babylon e bawng dawng nga ai Israel amyu sha ni gaw “Ngut sa, htum sa” ngu nna, myit mada shara tsep kawp n nga lu sai madang_ Ezekiel gaw dai amyu masha ni tinang buga de htang wa lu nna asak aprat ningnan hta hkawm sa lu na lam shingran jaw ai. Maigan mungdan e, mayam tai nga ai prat, hkraw hkun dik ai lupwa kaw na nra zawn re ai aprat hpe kau da lu na, dai Wenyi a atsam hte asak mahkrun ningnan hta hkawm sa lu na rai nga ai. Prat shagu na shinggyim masha ni, ya anhte a prat na masha ni mung shut hpyit mara a mayam tai shăjang ga ai; ja gumhpraw marin ai, lu mayu su mayu, mungkan arawng sadang, tingkyeng akyu tam ai, pyaw hpa hta len mat ai,…dai zawn mayu ai marin ai, ngu ai a mayam tai ga ai. Shani shagu na myit ru myit tsang lam ni, myit n dik lu ai mungmasa, Nawku Hpung hta shanut taw nga ai uphkrang dawjau masa, bai, kaga myit hpe shanut ya ai lam law law; myit daw hpa law law she rai nga ai. Anhte langai hpra hpe yam sha ai baw ni, tinang hpe gyit hkang da ai n hkru n kaja ai myit jasat akyang lailen ni hpe shingdu maga ngam kau da ra ga ai. Babylon hte lupwa, nra jahkraw, wenyi hta asi n si lu ai lakung lakying ni hpe tsan kau, hpya kau, kabai ngam da ra ga ai n rai a hka?

 Hkristan makam masham anhte hpe shărin ya ai gaw ningsin chyip re ai kaw na, kaga kamhpa shamyet shara n nga, myit mada shara n nga ai kaw na sha ninghtoi hte myit mada shara hpe adan rai mu lu na rai ga ai. Machyi makaw, nni nkri shoi-hpa, ruyak jamjau hkrum ai aten ni hta sha makam masham a atsam hte reng ai mahtai lu la mai ai lam rai nga ai. Tinang hta jahtum chyalai n mai byin sai, ngu ai aten hta, Karai Kasang hta tup hkrak kamsham ap nawng da lu ai lam gaw jet ai makam masham rai nga ai.

Martha hte Maria shannau gaw masha e gălaw ya lu ai atsam htum sai chye ma ai; shannau a myit ru yawn hkyen ai lam Madu hpe tsun dan let, tsepkawp nawng da ma ai. Byin lai mat wa ai ninggam ni hpe myit yu mai ga ai_ 

Yesu gaw Martha, Maria, Lazaru, shannau ni hpe grai tsawra ai; shannau mung Yesu hpe grai tsawra kamhpa ma ai. Lazaru machyi kaba hkrum ai lam Yesu hpe shi-ga shana dat ai. Yesu gaw shi du nga ai kahtawng hta 2 ya matut nga ai, nga ai. Martha hte Maria ala gawm kau ma ai (anhte akyu hpyi nna n lu la ai zawn nga hkam sha ai aten ni hpe dum mai ga ai). Lazaru nsa hti wa mahka na myit ru myit tsang ai lam kaba la na re. Jahtum e Lazaru si mat ai majaw ja ja yawn hkyen hkrum ma ai. Yesu du sa ai aten hta shannau tsun ai, “Madu e, nang nga nga ai rai yang an a kayung n si mat na wa”, ngu, madai dan ma ai. Matut nna Martha tsun ai, “Ya rai tim nang Karai Kasang kaw na hpyi ai mi hpyi jaw na ra ai”, nga ai. Tsawra kamhpa ai myit tup hkra hte Madu hpe tsun ai. Yesu tsun ai, “Ngai gaw asak hte bai hkrung rawt ai lam rai nngai” nga nna, shannau a makam masham hpe shadaw ya ai.

Lup de du yang tsun ai ga, “Madu e, shi (Lazaru) hpe lup makoi da ai 4 ya na mat sai; hpu hkying na sai” nga ai. Bai hkrung rawt lu na myit mada shara n nga sai aten, myit masin wenyi hta sin chyip dik ai aten hta Yesu gaw Kawa Karai Kasang a hpung shingkang arawng sadang a matu rai u ga, nga, akyu hpyi nna Lazaru hpe tsun ai, “Rawt pru wa su” nga ai. Lazaru hkrung rawt wa ai; shi a lagaw gyit hkang da hkrum ai. Yesu tsun ai, “Gyit hkang da ai lai sumri hpe raw dat ya mu” nga ai.

“Htani htana asak hkrung ai” ngu ai ga, hpang na prat hpe sha tsun ai n re ai lam dum ra ga ai. Tinang a asak hpang ai aten kaw na, ya, ngu ai aten, galoi mung ahkrung nga ga ai. Roma Laika hta San Pawlu tsun ai, “Yesu a wenyi n rawng ai wa gaw Yesu hte n seng ai”, nga ai. Kashin kamun a majaw ăhkrung nga lu ai wenyi anhte lu la sa ga ai. Yesu hpe jăhkrung sharawt ai Wa, Shi a wenyi anhte hta rawng nga ai rai yang, n htum n wai hkrung nga lu na, nga ai. Yesu hpe asak majing re, ngu nna kamsham lu sa ga ai rai yang, teng sha anhte shut hpyit mara hte tingkyeng akyu tam ai myit ni hpe jăhka kau ra ga ai. Hkumshan hte seng ai lam ni, marin ai myit, hkum shan a akyu hpe hkrai tam ai myit ni hpe kau da ra ga ai. Tsawra chye ai myit masin hte asak hkrung nga lu na ga ai.

Martha hte Maria yan nau zawn, hpa n tai sai, si mat ai wa a asak n lu mai sai, masha a atsam gaw htum sai, ngu, tinang nang hta kaman tai taw ai aten hta sha, asak hpe adan rai mu lu na rai nga ai. Gumrawng ai myit, myit daw myit hten ai lam, hkumshan e jaw ya lu ai jahtum na mabyin,…ndai ni hpe lup e kau da ai shaloi, tinang hpe shingdang magap da ai, gyit hkang da ai lam ni kaw na ninghtoi de rawt pru wa lu na rai nga ai.

Sumru yu na lam_ 
 N si lu ai asak a chyeju kumhpa hkam la lug a ai majaw kabu chyeju dum, manu shadan chye ga ai kun?
 “Htani htana asak the hkrung nga ai” ngu ai hpa wa rai ta?
 Yawn hkyen shoi-hpa hkrum ai aten, myit mada shara n nga ai aten ni hta gara hku hkap la nna hpa hpa galaw chye ga ta? 

2023: LUSHA GAM LADAW LABAN (5) NA CHYUM LAIKA

LUSHA GAM AI LADAW LABAN (5)
March 26, 2023
Chyum Mungga Daw (1)

Ezekela 37:12-14

Ya hti na gaw myihtoi Ezekela a laika hta na rai nga ai.
Madu Karai Kasang ning nga ai: nye a amyu e, nanhte a lup ni hpe ngai hpaw nna, nanhte hpe sharawt la nhtawm, Israela a mung de nhtang woi wa na nngai. Shing rai, nye a amyu e, nanhte a lup ni hpe ngai hpaw nna, nanhte hpe sharawt la ai shaloi e, ngai gaw Madu Karai Kasang rai nga ai hpe nanhte chye lu na marin dai. Nye a Wenyi hpe nanhte a kraw lawang hta ngai bang ya nna, nanhte asak hkrung nga na myit dai: nanhte a mungdan hta ngai nanhte hpe tawn da nna, ngai Madu nan ndai ga tsun da ai hte shatup nga ai hpe nanhte chye lu na marin dai, nga nna Madu tsun nga ai.
Karai Kasang a Mungga rai nga ai.

Chyum Mungga Daw (2)

Roma 8:8-11

Ya hti na gaw Roma masha ni hpang de San Pawlu shagun dat ai  laika hta na rai nga ai.
Tsaw ra ai hpu nau ni e, Hkum shan myit hkan nang ai ni gaw, Karai Kasang awng sharawng ai ni  tai lu ma ai. Nanhte gaw hkum shan myit n hkan nang myit dai: Karai Kasang a Wenyi nanhte hta e rawng nga ai majaw, Wenyi ra sharawng ai lam hkan nang nga myit dai. Masha langai ngai hta Hkristu a Wenyi n rawng yang, dai wa gaw Hkristu hte n seng nga ai. Hkristu gaw nanhte hta e nga nga yang, hkum hkrang gaw shut hpyit mara a majaw si nga timung, wenyi mahtang ding hpring wa lu ai majaw, a hkrung nga ai. Dai hta kaga si mat ai ni kaw na Yesu hpe hkrung sharawt la ai wa a Wenyi gaw, nanhte hta e rawng nga yang gaw, si mat ai ni kaw na Yesu hpe hkrung sharawt la ai wa gaw, nanhte hta e rawng nga ai shi a Wenyi a lata hte, nanhte a si chye ai hkum hkrang ni hpe mung, asak nnan hte jahkrung ya na marin dai.
Karai Kasang a Mungga rai nga ai.

KABU GARA SHIGA

Yawhan 11:3-7, 17, 20-30, 33-45

Ya hti na gaw Yawhan a laika hta na Kabu Gara Shiga rai nga ai.
Behtani kahtawng na Lazaru ngu ai wa langai mi machyi nga ai. Lazaru a kanau Marhta yan Maria gaw Yesu hpang de masha shangun dat nna, Madu e, nang tsaw ra ai wa gaw machyi nga ai, ngu nna tsun dan mu ai. Yesu gaw dai ga na jang, dai machyi ai gaw si hkra machyi ai baw n rai; Karai Kasang shagrau sha-a hkrum u ga Karai Kasang a hpung shingkang matu byi nga ai, ngu nna tsun wu ai. Yesu chyawm gaw Marhta hpe mung, shi a kanau Maria hte shan a kayung Lazaru hpe mung grai tsaw ra wu ai. Rai timung, Lazaru machyi nga ai lam na jang, Yesu gaw shi nga ai shara e lahkawng ya naw hkring nga ai. Dai hpang shi gaw, anhte Yuda mung de bai sa saga, ngu nna sape ni hpe tsun mu ai. Shing rai shi Behtani kahtawng de du yang, Lazaru gaw lup hta rawng ai mali ya rai sai hpe shi na la wu ai.

Yesu du ra ai hpe Marhta na jang, shi hpe sa tau la na matu sa wa ai; Maria chyawm gaw nta e naw dung nga ai. Shaloi Marhta gaw, Madu e, nang ndai kaw e nga ndai rai taw gaw, ngai yung n si na re ai. Ya rai timung, Karai Kasang kaw nang hpyi ai lam hpa rai timung, shi nang hpe jaw na ra ai, ngai chye nngai, ngu wu ai. Shaloi Yesu gaw, N-yung wa bai rawt na ra ai, ngu wu ai. Marhta gaw, Hpang jahtum na nhtoi e bai hkrung rawt ai hta, shi mung bai rawt na ra ai hpe ngai chye nngai, ngu wu ai. Bai Yesu gaw, ngai gaw bai hkrung rawt ai hte asak hkrung ai lam rai nga nngai: ngai hpe kam sham ai wa kadai mung, si ai galoi mung n hkrum na ra ai, Ga ndai hpe nang kam sham n ni? ngu nna shi hpe tsun wu ai. Shaloi Marhta gaw, rai sa, Madu e, nang gaw mungkan ga de du sa sai, Hkristu ngu ai Karai Kasang a Kasha rai nga ndai hpe ngai kam sham nga nngai, ngu nna shi hpe htan wu ai. Shing nga nhtawm, shi a kanau Maria hpe lagyim shana nna, sara nang de nga nga nna, nang hpe shaga nga ai, ngu wu ai. Maria gaw dai ga na jang, alawan rawt nna Yesu hpang de sa wa ai.

Maria gaw hkrap nga ai hpe mung, shi kaw hkan nang ai Yuda masha ni hkrap ngu hkap ngoi ma ai hpe mung, Yesu mu yang, shi yawn madai ai hte myit law ai rai nna, shi hpe kanang lup da myit ta? ngu nna san wu ai. Shan nau gaw, Madu e, sa yu rit, ngu nna htan mu ai. Yesu mung myi prwi pru nga ai. Dai majaw Yuda masha ni gaw, yu mu, shi gaw dai wa hpe gade tsaw ra nga a hka! Nga ma ai. Bai nkau mi gaw, myi n mu ai wa hpe myi hpaw ya lu ai ndai wa gaw, Lazaru n si u ga, shi hpa n chye di sai i? nga ma ai. Dai majaw, Yesu gaw shi a myit masin hta e yawn madai ai hte dai lup de sa du ai: dai lup gaw lungpu hku rai nga ai rai nna, nlung kaba hte pat da nga ai. Yesu gaw, nlung dai hpe galau kau mu, ngu wu ai. Shaloi si ai wa a kajan Marhta gaw, Madu e, ya gaw manam na sai; shi si ai mali ya rai sai, ngu nna tsun wu ai.

Yesu gaw, nang kam sham yang gaw, Karai Kasang a hpung shingkang hpe mu lu na ra ai. Dai rai nna nlung dai hpe galau kau ma ai. Shaloi Yesu gaw lamu de mada yu nna, Wa e, nang nye a ga madat ya ndai majaw, ngai nang hpe chyeju dum shakawn nngai. Nang nye a ga hpe galoi mung madat ya nga ndai hpe ngai chye nngai; rai timung, nang ngai hpe shangun dat ndai hpe, ndai grup yin nga ai masha ni kam sham lu mu ga, ngai ning nga tsun nngai, nga ai. Shing nga tsun ngut jang, Yesu gaw, Lazaru e, pru wa rit law, nga nna nsen kaba hte jahtau dat wu ai. Shaloi si mat wa sai wa gaw, shi a lagaw lata hta sumpan yan ahkyen nna, myiman e mung hpajet kayawp ai hte pru wa ai. Yesu gaw, shi hpe raw nna dat dat mu, ngu nna shanhte hpe tsun mu ai. Dai re ai majaw, Maria hpe sa shalan ai Yuda masha law law wa, Yesu galaw ai amu hpe mu jang, shi hpe kam sham ma ai. 
Madu a Kabu Gara Shiga rai nga ai.

2023: LUSHA GAM LADAW LABAN (4) NA MUNGGA

Yawhan gaw ninghtoi hte ningsin, ninghtoi a kasha ni hte ningsin a kasha ni a lapran tsang gang hkat ai lam hpe adan sha ginhka dan ai. Tengman ai maga tsap ai ni hte masu magaw ai, n teng n man ai maga tsap ai ni a myit masin arawn alai ni hpe ginhka chye lu na lam, galu kalang shadawn dan ai. Karai Kasang gaw shinggyim masha ni a ntsa lam mu lu ai asam maka ni hpe hkan nna jeyang ai n rai: Dawi hpe lata san da ai lam (Samuel Laika) hta mu lu ai. Kashin Kamun a marang e laksan lăta la hkrum ai ni gaw ninghtoi a kasha ni hku nna asak hkrung ra ai lam, Ehpesu Laika hku nna shadum jahprang ya ai.

II ngu na mungkan majan aten hta John Howard ngu ai hpyenla langai shi a makau e bawm hkrat bun nna myi kyaw mat ai. Majan ngut ai hpang shaning law law myi n mu mat ai. Shi hpe tsawra matsan dum ai numjan langai hte dinghku de ai. Kasha ni mung măyat ai. Shaning law law a hpang lani mi na nhtoi hta a kajawng sha kadang taw nna rawt let myi hpaw yu yang mam mam rai nna mu hpang wa ai. Hpang e gaungwi ngwi myi majing bai lu la ai. Myi lasa sailam pat mat ai kaw na kadang mat ai nhkan e sai-lam a kajawng sha hpaw mat nna mu lu nu ai. Madu jan hte kasha ni hpe shawng na lang myi chyaw mu lu ai majaw kabu ai gaw tsun n ma. 

Yawhan gaw myi kyaw ai shadang sha, shăngai wa ai aten kaw nna myi n mu ai masha a măbyin hpe galu kalang ka da ai. Mungkan ga a ninghtoi re ai Yesu hte hkrum ai a marang e, shămai shătsai hkrum ai. Myi mu lu ai hta lai jan nna makam masham hpe mung lu la nu ai. Dai gaw, hkye hkrang la ai chyeju kumhpa rai nga ai. Ehpesu laika hta tsun da ai_ moi nahte ningsin rai mi ai; rai tim, ya, ninghtoi a kasha ni tai wa mi nit ai (mănit dai) nga ai. Dai gaw, Kashin Kamun hkam la ai shaloi, sau chya hkrum nna laksan lăta la hkrum ai ni tai wa sa ga ai (săga ai). Ga-shaka Dingsa prat hta sau chya hkrum ai ngu ai shaloi, jau, myihtoi, hkahkawm tai na lata la hkrum ai ni hpe sau chya ya ai. Jesse gaw shi a shadang sha marai 7 hpe langai hpang langai, Samuel hpe madun ai. Rai tim, langai mung lata la n hkrum ai. Jahtum e prang ga e sagu rem nga ai kasha hpe shaga la ai; Samuel gaw dai hpundim, Karai e nan layung madi ai wa hpe sau chya ya nna hkawhkam aya tang ya ai.

Kabu Gara Shi-ga hta ka da ai myi kyaw ai masha hpe Yesu shămai ya ai lam gaw “Karai a hpung shingkang hpe shădan shăpraw dan na matu re” nga ai. Shamai shatsai hkrum ai hpang, manghkang byin wa ai. Hparishe ni gaw dai mabyin hpe n kam ma ai. Dai shadang sha a kanu kawa hpe, “Nan a kasha teng ai kun, shăngai ai aten kaw na myi n mu ai gaw teng ai kun?” nga san ma ai. Kanu yan kawa gaw hkrit ai majaw, “Ma hpe mahtang san yu mu, shi kaba sai” ngu, htan ya ma ai. Ma hkum nan hpe ga-san san ma ai. Byin mat wa ai lam ni yawng teng ai lam tsun dan tim, Hparishe ni gaw Yesu gălaw  ai amu hpe n kam lu ma ai. Nau teng ai lam ni hpe tsun yang Hparishe ni gaw Yesu galaw ai amu Karai Kasang kaw na re ai lam hpe n hkap la lu ma ai majaw, myi bai mu ai dai shadang sha hpe mung, Yesu hpe mung, sat kau na she maw wa ma ai.

Myit sawn sumru yu na lam lawu na hte maren rai nga ai_
(1) Shadang sha gaw ningsin chyip re ai kaw na ninghtoi a kasha tai wa nu ai; Yesu galaw ai amu hpe kamsham ai. Hparishe ni n teng ai hku sakse hkam shangun tim, shi gaw, tengman ai mabyin a lam gwi gwi tsun shapraw ai. Tengman ai maga ja ja tsap ai wa rai nga ai.
(2) Shadang sha a kanu hte kawa gaw tengman ai mabyin a lam hkum nan sakse n gwui ma ai; dai majaw, ma hpe mahtang san yu mu, nga, htan ya ma ai.
(3) Tengman ai mabyin hpe sawk sagawn la lu ninglen, tengman ai lam hpe n hkap la lu ai Hparishe ni, myi mu ninglen myit masin wenyi hta sinchyip rai ma ai. Hpa majaw nga yang, Yesu tsun ai hte maren shanhte shut hpyit mara hta lup nan taw nga ma ai. N ju n dawng manawn masham myit gaw shanhte hpe myi shabam da ya ai majaw rai nga ai.
(4) Nang/ngai, kaning re ai maga shănang chye ga ai kun?         

Maga ga shănang ai ni rai na ga ai. Rai tim, kalang lang gaw (1, 2, 3) masum hte kaw ang wa ai aten mung nga chye ga ai n rai a hka? Rai ninglen ningdang kau ai kade lang she rai; tinang a mara măgap shăkut ai kade lang she rai; tinang shut ninglen kaga wa hpe mara shagun kau ai kade lang she rai; tinang lawt daw, jaw ai teng ai wa hpe maga la na hprai kau ai kade lang she rai; nambat 1 hta ang ai, ngu ai gaw tinang chyeju kumhpa hkam la lu ai aten. Shing re ai aten hta pyi Karai Kasang hpe shakawn na malap mali di chye ga ai n rai a hka! 

Myi kyaw ai shadang sha shamai shatsai hkrum ai zawn, anhte Karai a hkye hkrang la ai chyeju kumhpa ni hpe Hkristan prat hta law htam nga ai hpe dum ga ai kun? Karai a hpung shingkang hpe shadan dan na lam re ai, nga, Yesu tsun ai ga hpe myit dum mai ga ai. Hkristan tai wa lu ai, ninghtoi a kasha ni tai wa lu ai ahkaw ahkang, sari sadang kade she kaba a hka! Jawjau ai amyu, myihtoi amyu, uphkang ai hkawhkam amyu tai wa ai, nga ai majoi n rai nga ai. Dawi zawn, Karai sharawng awng ai hku nna Karai e gran da ya ai prat hkrun lam masing hpe hkan shatup lu na, ngu ai sasana lit lu ga ai.

Ehpesu Laika hta San Pawlu shadum ya ai lam ni gaw dai sasana magam hte lit rai nga ai. “Ninghtoi gaw mai kaja ai amu bawhpan shagu, tengman ai lam hte tara rap-ra ai amu ni hpe shapraw ya ai”, nga ai. Ningsin a bungli ni, shut hpyit mara kaw na lămat pru mu, shaloi Hkristu gaw ninghtoi jaw ya na ra ai, nga, San Pawlu shadum ya ai.

2023: LUSHA GAM LADAW LABAN (4) NA CHYUM LAIKA

LUSHA GAM AI LADAW LABAN (4)
March19, 2023
Chyum Mungga Daw (1)

1Samuela 16:1, 6-7, 10-13

Ya hti na gaw Samuela a laika langai hta na rai nga ai.
Madu gaw Samuela hpe tsun ai gaw: Na a ndum hta sau bang jahpring nna, sa wa su; nye a hkawhkam tai na matu, Betlehem masha Yesu a kasha ni hta na ngai langai mi hpe san da sai majaw, shi hpang de ngai nang hpe shangun dat nngai, ngu wu ai. Samuela mung, Madu tsun ai hte maren galaw nna, Betlehem mare de sa du ai. Yese hte shi a kasha ni hpe, hkungga jaw ai poi de shi shaga mu ai. Ya shanhte du jang, Samuela gaw Eliaya hpe hkap yu nna, gaja wa, Madu e sau chya ya hkam na wa gaw, shi a man e tsap nga ai, nga nna myit lu ai. Madu chyawm gaw, shi a myiman hte shi a hkum shingyan hpe hkum yu et; ngai shi hpe n la we ai, masha yu yu ai hte maren Karai Kasang yu yu ai n rai; masha gaw ahpraw nsam sha yu chye nga ai; Karai Kasang chyawm gaw, myit masin she yu nga ai, ngu nna Samuela hpe tsun wu ai.
Shing rai Yese gaw shi a kasha sanit, langai hpang langai hpe, Samuela a man de tsap pru shangun timung, Samuela gaw, ndai ni hpe Madu n la wu ai, ngu wu ai. Bai Samuela gaw, na nsha ni ndai hte sha rai ni? ngu nna Yese hpe san wu yang shi gaw, hpungdim shadoi langai mi gaw naw nga ai; shi gaw sagu rem nga ai, ngu nna tsun dan wu ai. Shaloi Samuela gaw, shi hpe shaga la na shangun dat u; shi garai n du yang, poi de shang dung na ga ai n rai, ngu nna Yese hpe tsun wu ai. Shing rai, dai kasha hpungdim hpe shaga la ma ai. Shi gaw myiman hkyeng nna, ahpraw tsawm ai shabrang wa hte hkum hkrang hking ai wa rai nga ai. Madu gaw, ndai wa re ai; rawt nna shi hpe sau chya ya u, ngu wu ai. Samuela mung, shi a sau ndum la nna, shi hpe sau chya ya wu ai: dai shani kaw nna Madu a wenyi gaw Dawi a ntsa e dung nga ai.
Karai Kasang a Mungga rai nga ai.

Chyum Mungga Daw (2)

Ehpesu 5:8-14

Ya hti na gaw Ehpesu masha ni hpang de San Pawlu shagun dat ai  laika hta na rai nga ai.
Hpu nau ni e, nanhte shawng e nsin rai nga myit dai; ya gaw Madu hta nhtoi rai nga myit dai. Dai rai nna, nhtoi a kashu kasha ni zawn hkawm nga mu; kaning rai nme law, nhtoi hta hkawm ai ni gaw, mai kaja ai, ding hpring ai hte teng man ai lam hkrai hkan galaw nga ma ai. Madu ra sharawng ai lam hpa rai nga ai hpe hkrak sagawn yu nna, nsin hte seng ai, kaman lila re ai amu ni hpe n hkan galaw ai sha n-ga, dai amu ni gade wa n hkru a kaja rai nga ai hpe shadan dan mu. Kaning rai nme law, masha ni mayun mayaw e galaw ai lam ni gaw, ga hte tsun na pyi kaya kahpa lam rai nga ai. Rai timung, nhtoi hte shadan dan ai yawng hte gaw, dan dan leng leng mu lu ai rai nna, dan dan leng leng mu lu ai baw nhtoi tai nga lu ai. Dai majaw, “Yup pyaw ai wa e, rawt u; si ai kaw na bai rawt wa nu: shaloi Hkristu nang hpe jahtoi na ra ai,” nga nna tsun ai.
Karai Kasang a Mungga rai nga ai.

KABU GARA SHIGA

Yawhan 9:1, 6-9, 13-17, 34-38

Ya hti na gaw Yawhan a laika hta na Kabu Gara Shiga rai nga ai.
Lani mi hta Yesu hkawm sa wa nga yang, hkritung kaw nna myi kyaw ai wa langai mi hpe mu wu ai. Yesu gaw ga hta mayen prat bang nna, hkumpup galaw la nhtawm, dai wa a myi hta chya ya nna, Silum hka lawng hta sa kashin su, ngu nna shi hpe tsun dat wu ai: dai hte maren myi kyaw ai wa sa kashin nna, myi mu lu ai hte bai wa ai: (Silum ngu ai a ga lachyum, shangun dat ai, ngu ai rai.)  Dai rai nna, shi a htingbu ni hte, shawng e shi hpyi sha ai shaloi mu yu ai ni gaw, ndai wa gaw nang e dung nga nna, hpyi sha ai wa n rai ni? nga ma ai. Nkau mi gaw, dai wa nan rai ai nga ma ai. Bai kaga nkau mi gaw dai wa n rai shi hte bung ai wa rai nga ai, nga ma ai. Dai wa chyawm gaw, ngai nan dai wa rai nga nngai, ngu nna tsun wu ai.
Dai rai nna shanhte  gaw, shawng de myi n mu ai wa hpe Hparishe ni hpang de woi sa mu ai. Yesu hkumpup galaw la nna dai wa myi hpaw ya ai shani Laban nhtoi rai nga ai majaw, Hparishe ni gaw dai wa hpe, shi a myi kaning rai mu lu ai lam san ma ai. Dai wa gaw, Yesu ngu ai wa nye a myi hta hkumpup chya ya nna, ngai kashin kau jang mu wa ni ai, ngu nna shanhte hpe htan mu ai. Shaloi Hparishe nkau mi gaw dai Yesu gaw Laban  nhtoi hpe tawt lai ai majaw, Karai Kasang kaw na du sa ai wa nrai, nga ma ai. Bai, nkau mi gaw, mara lu ai masha gaw, ning re ai lamik kumla kaning rai galaw lu na a ta? nga ma ai. Shing nga na myit nhkrum ma ai. Dai rai nna, shanhte gaw myi n mu ai wa hpe, na myi shi hpaw ya ai majaw, shi a lam nang kaning ngu da a ta? ngu nna bai tsan yang, shi gaw, dai wa gaw myihtoi rai nga ai, ngu nna bai htan wu ai.
Shaloi shanhte gaw, nang wa mi anhte hpe sharin ya nni? Nang gaw shangai wa kaw na shut hpyit mara hte hpring chyat nga ndai, ngu nna jawm htan nhtawm, dai wa hpe kanawng shapraw kau mu ai. Dai wa hpe shapraw kau ai lam Yesu na wu ai rai nna, shi hpe mu tam jang, Masha Kasha hpe nang kam sham nni? ngu nna san wu ai. Dai wa gaw, Madu e, dai Masha Kasha hpe ngai kam sham lu na matu, shi kadai re ai ngai hpe tsun dan rit ngu wu ai. Yesu gaw, dai Masha Kasha hpe nang mu yu nit dai hta n-ga, ya nang hpe shaga ai gaw dai wa nan rai nga ai, ngu nna shi hpe htan wu ai. Shaloi dai wa gaw, Madu e, ngai kam sham nga nngai, ngu nna Yesu hpe nawku wu ai.
Madu a Kabu Gara Shiga rai nga ai.

2023: LUSHA GAM LADAW LABAN (3) NA MUNGGA

“Hka ndai lu ai wa kadai mung bai hpang gara na n rai; …. Ngai jaw ai lu-hka gaw dai wa a kăta hta hka-hpawk tai wa nna, htani htana asak hpring kăbrat wa lu na rai nga ai”.

Asak hkrung na matu sha-hpa lu-hpa gaw ra madung rai nga ai. Sha-hpa n sha ai nhtoi ram ram na hkra hkrung lu tim lu-hka n lu ai sha kade ya mi n hkrung lu ai. Asak a chyeju kumhpa ni hta sha-hpa lu-hpa hta lai nna, tengman ai lam, tara rap-ra lam, shimlum lam, simsa ai lam, tsawra myit, awmdawm, dz., dz., tup wa dik wa na lam, kraw kata hta ja ja ra sharawng  ga ai. Jum yu lu ai, myi hte mu lu ai arung arai sutgan ni hta dai asak jaw ai chyeju kumhpa ni gaw myit masin wenyi hte seng ai akyu ara ni rai nga ai. Chyum laika hta asak a chyeju kumhpa ni a lam kumla shatai lang ai muk, sabyi chyaru, sau, ninghtoi, ndai ni hpe lang ai. Ya, asak hka-hpawk a lam, asak jaw ai a hkrung nga ai hka a kumla hpe kumla shatai nna sharin ya ai.

Yesu hte hkrum ai Samaria numjan gaw shi a prat hpe myit n dik lu ai: la marai (5) hte măzum nga lai wa nna hka bra mat ai. Ya, kru ngu na la hte tara n shang ai hku kanawn mazum nga ai. La ni hta ra rawng ai lam mi rai rai, shi hta ra rawng ai lam a majaw mi rai rai, myit pyaw myit dik ai lam n lu ai: tara rap-ra lam, tsawra lakawn hkrum na lam, shi hpe chye na mara dat ya lu ai lam, makam masham hte htunghking tara e masat hkap la ya ai lam, ….ndai zawn rai wenyi hta ja ja hpang gara taw nga ai numjan rai nga ai. Shi a sung la ai kraw lawang na dai wenyi a chyeju kumhpa ni hpe hkam la mayu nga ai. Sung ai hka-htung hte bung nga ai. Yesu jaw ya na asak jaw ai lu-hka hpe hpang gara taw nga ai.

Yesu gaw myi hte mu lu ai, jum yu chyim yu mai ai lu-hka a lam tsun hpang ai. Dai hpang, shi a sung la ai kraw kata na hpang gara ai lam ni hpe manaw shapraw ya ai. “Nang tsun ai la n lu nngai, nga ai ga, teng ai; nang marai manga hte kănawn lai wa nit dai; ya, kru ngu na la mung hkungran la n re ai”, ngu madi dat yang, dai numjan hprang wa nna Yesu hpe myihtoi hku chye na hkap la wa ai. Mi shawng e gaw amyu n bung ai tsăsam amyu la sha langai hku sha mu ai. Ya, myihtoi hku mu nu ai. Yesu gaw dai numjan hpe mara shagun ga n tsun ai. Shi ra kadawn ai wenyi a hpang gara ai lam, wenyi hte seng ai chyeju kumhpa ni a lam tsun dan ngut ai hpang, Yesu shi hkum nan asak a lu-hka, a hkrung nga ai hka re ai lam tsun dan ai; shi hkum nan Messiah re ai lam tsun shăpraw dan ai.

Mawshe gaw hpang gara shajang ai Israel masha ni a matu lung rawk hpe dawhkrawng hte kayet dat yang hka lwi pru wa ai. Yesu a sinlum (salum/ lum lum re ai sin) ningri hte galun waw hkrum ai shaloi, hka hte sai pru wa ai. Kashin Kamun hte kaga Sakramentu chyeju ni lwui pru ai, asak a hka-hpawk rai nga ai. Yesu gaw nlung zawn ja ai (mara n yin hkraw, mara magawp da ai jan) Samaria numjan a sinlum hpe ahkawk ya ai. Yesu tsun ai, “Karai Kasang gaw wenyi rai nga ai”, nga ai. Yerusalem kaw sha n rai, Karai Kasang hpe tam ai ni, Karai Kasang hpe gara shara kaw na rai tim Shi hpe tam lu, nawku lu ai, nga ai. Yesu gaw, wenyi hta hpang gara taw nga ai Samaria numjan a sinlum hta, kraw hta nga nga ai. Israel myu sha ni gaw zaibru jang e ning ngu madai ma ai, “Karai Kasang gaw anhte hte rau gaw nga nga ai kun?” ngu ma ai. Anhte mung, shani shagu na ruyak kyindut ni, ra kadawn ai lam law law hta Karai Kasang hpe n tsen ai, n hten ai lam ni byin chye ga ai. Karai gaw mu mada nga ai kun?

Asak a lu-hka jaw ai Yesu gaw Chyum Mungga hta, Sakramentu ni hta, teng sha nga nga ai. Ja Chyum mungga hpe hti sumru ai hta, akyu hpyi ai hta, Sakramentu ni hpe hkam la ai hta, Shi hte jahta hkat lu nna asak a lu-hka hpe hkam la mai ga ai. Shinggyim masha ni hta ra marin hpa, ra kadawn dik ai myit masin wenyi a chyeju kumhpa ni hpe Yesu hta lai nna kaga kaw hkan tam ga yang, panglai jum nstin ja lu ai hte bung na rai nga ai. Tsawra chye ai, chye madat ya ai, mara raw ya chye ai, kamhpa mai ai, tara rap-ra lam, dinghpring ai lam….ndai ni hpe hpang gara ai rai yang teng sha, Madu Yesu hpe tam ra ga ai. Shi mung a ni sha nga nga ai, tinang a kraw hta sha rawng nga ai. Ja gumhpraw sut su ai hte pyaw-hpa lu-hpa sha-hpa kaw na simsa shimlum lam majing hpe n lu la mai ai.

Dai asak hka-hpawk hpe mu tam la ai wa gaw shi a matu chyu sha, ngu nna kyem da lu na n rai. Mahkrun n mu ai ni hpe teng sha, shi hkam la lu ai chyeju kumhpa ni hpe gam garan ya na rai nga ai. Samaria numjan gaw Yesu hpe Messiah hku nna hkap la lu ai hte rau, arai yawng tat da nna mare de bai htang wa ai. Mare masha ni hpe wa shana ya ai majaw, masha law law hka-htung de hkan sa nna Yesu hpe sa jahkrum ma ai. Dai numjan a sinlum kraw kata hta asak hka-hpawk prut kabrat pru wa ai majaw, Yesu a sasana magam hta shang lawm madi shadaw lawm ai numjan tai wa ai.

Roma Laika hta San Pawlu tsun da ai, “Karai Kasang a tsawra myit anhte hta e ru bang da ya ai majaw, myit daw shara hpa n nga ai, mada ai lam galoi mung nga nga ai”, nga ai. Mara hta lup taw nga ai aten hta Hkristu e shinggyim amyu sha a matu si hkam ai lam gaw, Karai Kasang anhte hpe tsawra matsan dum ai sakse rai nga ai, nga ai.   
 
Myit sumru na lam_
 Yesu zawn, amyu htung hking/ makam masham n bung ai ni the hku hkau lam tam, jahta shaga hkat shakut ga ai kun? Shanhte hpe jet ai tsawra myit hte jahta bawngban na shakut ga ai kun?
 Shut hpyit lam dam ai ni hpe gara hku mu mada ga ta? Shanhte hpe matsan dum myit hte bawp la jahta shaga na shakut ga ai kun?
 Tinang lu la hkam la lu ai wenyi a akyu chyeju ni hpe gara hku gam garan nna sasana bungli hta shang lawm ga ai kun?

2023: LUSHA GAM LADAW LABAN (3) NA CHYUM LAIKA

LUSHA GAM AI LADAW LABAN (3)
March 12, 2023
Chyum Mungga Daw (1)

Pru mat wa ai laika 17:3-7

Ya hti na gaw Pru Mat Wa ai  laika hta na rai nga ai.
Israela a shawa hpung ting, Egutu mung de nna pru mat wa ai hpang, Re-hpi-dim e but nga ma ai; dai kaw e amyu masha ni hpang gara nna, Mawshe hpe aput let tsun mu ai gaw, anhte hte anhte a kashu kasha ni mung, anhte a yam nga ni mung, hpang gara ai hte si na matu, Egutu mung de na anhte hpe woi wa sa ni? ngu mu ai. Shaloi Mawshe gaw Madu hpe hpyi nem let, ndai amyu hpe ngai kaning di woi awn lu na rai ta? Ngai hpe nlung hte kabai sat kau na maw nga ma ai, ngu mu ai. Dai rai nna Madu gaw Mawshe hpe, Israela a agyi salang nkau mi hpe woi nna, dai amyu masha ni a shawng e sa wa su; dai hkanu hpe kayat ai dawhkrawng lang let sa wa su. Horeb bum na lunghkrung ntsa hta ngai na a man e tsap nga na ring ngai. Dai nlung hpe nang kayat na wu ai rai nna, amyu masha ni lu na matu, dai hta na hka lwi pru na ra ai  ngu nna Madu tsun wu ai. Mawshe mung Israela a agyi salang ni a man e shing di galaw wu ai. Dai shara kaw e, Israela amyu masha ni gaw, Madu anhte hte rau nga nga ai kun, n nga nga ai kun, nga nna Madu hpe chyam dinglik yu ai majaw mung, Mawshe hpe aput nna ndang kalang hkat ai lam a majaw mung, shara dai hpe, Massah hte Moriba ngu ai amying lahkawng hte shamying ya mu ai.
Karai Kasang a Mungga rai nga ai.

Chyum Mungga Daw (2)

Roma 5:1-2, 5-8

Ya hti na gaw Roma masha ni hpang de San Pawlu shagun dat ai laika hta na rai nga ai.
Hpu nau ni e, anhte a Madu Yesu Hkristu a marang e, kam sham ai hte ding hpring wa lu sa ga ai majaw, Karai Kasang hte hku hkau nga ga ai. Yesu Madu a marang e, anhte kam sham ai hte chyeju ningsang a prat hta shang lu sa ga ai; shing rai, Karai Kasang a hpung shingkang hpe myit mada nga ga ai majaw, nachying kabu sharawng awng nga ga ai. Dai myit mada ai gaw kaman lila n rai nga ai; kaning rai nme nga yang, anhte hpe jaw ya sai Chyoi pra ai Wenyi gaw, Karai Kasang a tsaw ra ai myit, anhte a masin salum hta e ru bang ya mani ai. Anhte hpa n byin lu ai shaloi, Karai Kasang lajang da ai aten hta, Hkristu gaw shut hpyit ai masha ni a matu si hkam sai. Gaja wa, ding hpring ai masha a matu si hkan na, ai n kam nga ga ai; mai kaja ai masha a matu, chyawm gaw, si hkam gwi na masha langai ngai nga nhten; rai timung, anhte mara kap nga ninglen, Hkristu anhte a matu si hkam ya ai gaw, Karai Kasang anhte hpe tsaw ra nga ai lam a sakse rai nga ai. 
Karai Kasang a Mungga rai nga ai.

KABU GARA SHIGA

Yawhan 4:5-15, 19-26, 39-42

Ya hti na gaw Yawhan a laika hta na Kabu Gara Shiga rai nga ai. 
Yesu gaw, Yaku e shi a kasha Yosep hpe jaw ai ga dachyawk makau na, Suhka nga ai, Samari mung na mare langai mi de du wu ai: dai yang e Yaku a hka htung nga nga ai. Yesu gaw lam hkawm ba ai majaw, hka htung makau e dung nga ai. Dai aten gaw shani ka-ang ahkying shi lahkawng daram rai nga ai. Shaloi Samari numsha langai mi hka ja na pru sa ai. Yesu gaw, Ngai hpe hka jaw lu e, ngu nna shi hpe hpyi ai: shi a sape ni chyawm gaw shahpa mari na matu mare de sa mat ma ai. Dai Samari numsha gaw, Nang Yuda masha rai nga ndai; ngai Samari numsha hpe hpa majaw lu na hka hpyi n ta? ngu nna shi hpe tsun wu ai, kaning rai nme nga yang, Yuda hte Samari masha ni shada da n hku n hkau nga ma ai. Shaloi Yesu gaw, Karai Kasang a kumhpa hte, Ngai hpe hka jaw lu e nga nna nang kaw hpyi ai wa, kadai re hpe nang chye taw gaw, nang shi  kaw hpyi nna, shi gaw nang hpe hkrung ai ntsin jaw na nit dai, ngu nna Yesu htan wu ai. Dai numsha mung, Madu e, Nang hka ja na rai hpa mung n lu ndai; hka htung mung sung nga ai; dai rai nna, dai hkrung ai ntsin hpe kanang na lu la n ta? Anhte a nji nwa Yaku gaw ndai hka htung anhte hpe jaw da mani ai rai nna, shi hkum nan hte shi a kashu kasha ni, shi a yam nga ni ndai hta na lu ma sai: nang gaw shi hta grau kaba n ni? ngu nna tsun wu ai. Shaloi Yesu gaw, ndai hka lu ai wa kadai mung, hpang bai gara na ra ai; ngai jaw ai hka lu ai wa chyawm gaw galoi mung hpang gara na n rai: dai ngai jaw ai hka gaw, htani htana asak lu na matu, dai wa hta e lwi pru ai hka hpawk tai na ra ai, ngu nna Yesu htan wu ai. Shaloi dai numsha gaw, ngai galoi mung hpang gara bai n hkrum na hte, nang de mung hka n sa ja ra u ga, hka dai ngai hpe jaw rit law.
Nang gaw myihtoi rai nga ndai hpe ngai dum se ai: anhte a ji wa ni gaw ndai bum ntsa e nawku masai; nanhte Yuda masha ni  chyawm gaw, Yerusalem mare e chyu sha Karai Kasang hpe nawku mai ai, nga nna tsun myit dai, ngu wu ai. Yesu gaw, numsha e, nye a ga hpe kam sham u: ndai bum e mung n rai; Yerusalem mare e mung n re ai, Wa hpe nawku na aten du na ra ai. Nanhte Samari masha ni gaw tinang nchye na ai hpe nawku myit dai; anhte chyawm gaw tinang chye ai hpe nawku ga ai: kaning rai nme law, hkye hkrang la ai lam Yuda amyu hta na pru ra ai. Rai timung, ding man ai hku nawku ai ni gaw, wenyi hta mung, teng man ai hta mung, Wa hpe nawku na aten du wa ra ai rai nna, ya e pyi rai nga ai: Wa gaw shing rai nawku ai ni hpe tam nga ai. Karai Kasang gaw wenyi rai nga ai: shi hpe nawku ai ni gaw wenyi hta mung, teng man ai hta mung, nawku lu na rai nga ai ngu nna shi hpe tsun wu ai. Dai numsha gaw, Hkristu ngu ai Karai Kasang san da ai wa du na ra ai hpe ngai chye nngai; dai wa du jang, shi anhte hpe lam magup tsun madun na ra ai, ngu wu ai. Shaloi Yesu gaw, nang hte ga tsun nga ai, ngai gaw dai wa nan rai nga ai, ngu nna shi hpe tsun wu ai.
Dai rai nna dai numsha gaw, shi a ntsin di bu tawn kau da nna mare de bai wa nhtawm, mare masha ni hpe, ngai galaw ai lam yawng ngai hpe tsun dan ya ai wa hpe sa yu marit; dai wa gaw Hkristu rai na kun, ngu nna wa tsun mu ai. Dai mare na Samari masha law law wa, dai numsha sakse hkam ya ai ga a majaw, Yesu hpe kam sham ma ai. Dai rai nna Samari masha ni Yesu hpang de du jang, shanhte hte nga nga na hpyi ma ai majaw, dai yang e lahkawng ya shi hkring nga ai. Yesu nan tsun ai ga a majaw mung kam sham ai ni grau law jat wa ma ai. Dai ni gaw dai numsha hpe, ya gaw, na a ga majaw chyu sha kam sham ai n rai sa ga ai: anhte nan na lu nna, ndai wa gaw, mungkan ga a hkye hkrang la ai Madu teng teng rai nga ai hpe anhte chye saga ai, ngu mu ai.
Madu a Kabu Gara Shiga rai nga ai.

2023: LUSHA GAM LADAW LABAN (2) NA MUNGGA

Yesu gaw sape marai masum hpang de sa nna shi a lata hte shanhte hpe ahtawk nna tsun ai, “Rawt mu! Hkum hkrit mi!” nga ai. Shanhte mada yu yang, Yesu hta lai nna kadai hpe mung n mu ma ai.

Yesu a ăsam galai nna tu htoi kabrim wa ai hpe mu la ma ai; lamu kaw na nsen na lu ai mung, “Ndai gaw ngai tsawra ai Kasha; shi a ga madat mu” nga ai nsen rai nga ai. Kabu n ma re ai sape ni, chyahkring mi sha praw rai, shingran zawn yupmang zawn, chyahkring pyaw lu ma ai. Ndai dinghta ga ntsa hta myit hkyi lit li ai aten law law nga ai zawn, kabu lu ai aten ni mung law law nga ai. Yawng gaw lai lai, rai nna byin ai. Sape ni gaw, Yesu hta lai nna kăga yu mada na, madat mara lu na n nga sai.

Dinghta ga ntsa myit ru myit tsang ai, yawn hkyen ai, myit măchyi ai, kabu ai, pyaw ai, jahpoi hkrum ai, shakawn hkrum ai…kăhti gălai she rai nga ai. Grin ai hpa mung n nga ai. Sape marai masum gaw laklai dik ai mabyin, shanhte a sara hte madu, Yesu asam galai nna tu kabrim wa ai, Tara jaw ai wa Moshe hte myihtoi ni a myihtoi re ai Eliya hte jahta shăga hkat ai hpe mu ai majaw ja ja kabu lu ma ai. Yesu gaw arawng aya kaba dik ai wa re ai lam hpe chye la lu ma ai. Shanhte a sara hte madu a jaw e ja ja arawng lu dum ma ai. Rai tim chyahkring mi sha hkam sha lu ma ai. Dap mada yu yang Yesu hta lai nna kaga kadai hpe mung n mu ma ai. Karai e matsun ai ga, “Shi a ga madat mu” nga ai.

Lu-sha jăhkran ai, gam ai ladaw hta shădawn sharam nna lu sha ai; pyaw hpa ni hpe byin mai ai daram koi shăkut ga ai; sharam jai nna lu mahkawng ai hpe gam jaw gam ya ai amu hta sak jaw akyu galaw ga ai. Lani mi hta anhte lu sha pyaw dum ai lam ni, lu da madu da ai sutgan ni yawng hte hka mat ra ga ai, kau da ra ga ai, ngu ai lam hpe myit dum shangun ai rai nga ai. Lu-sha jăhkran ai, pyaw hpa ni hpe sharam ai, n lu n lawm ai ni hpe garum ya ai amu ni galaw ai, akyu hpyi shăja ai, ndai zawn re ai amu ni a marang e, tinang nang a myit masin wenyi hpe shachyoi shapra la lu ai. Dinghta prat a jahtum e, Yesu hkam la ai hpung shingkang, tu kabrim hpraw tsawm ai arawng sadang hkam la lu na n shut n shai, myit mada lu ga ai.

Shinggyim hkum shan hte re ai Yesu hkum nan mung, shi a sape ni mung, Karai a shălan shăbran, myit mada lu ai shabrai kumhpa hpe mu mada hkam sha yu ra ma ai. Yesu gaw shi hte rau, sape ni hpe dai hpung shingkang woi hkam sha shangun ai. Ruyak kyindut ni hte myit ru myit tsang ai amyu myu a lăpran, anhte hkam la lu ai shalan shabran chyeju ni, lawt lu ai mahkrum madup ni, awng dang ai chyeju hte shakawn shagrau hkrum ai chyeju ni kade law ai hpe htang sumru let chyeju dum mai ga ai. Manghkang gaw myit n dik chye ai shinggyim masha ni, ra kadawn dum ai hkrai hkrai myit dum nna magawn hkrai magawn la mayu ai myit wa rai nga ai.

Tinang ra mayu ai, lu mayu ai hkrai sha myit ai ni Abraham a kasi hpe yu la mai ai. Karai e jaw ya na shăgrau kumhpa hpe chyip mak kamsham ai. Dai majaw, shi shingdu e kau da ra ai buga hte man nga ai kanbau bungli, hku hkau ai jinghku ni hpe kau da nna Karai e shangun ai buga de htawt sit hkawm ra ai. Sutgan law law hpe mung kau da ra ai. Hpang e chyam dinglik ai lam law law hpe hkam la ra ai. Madat mara ai lam hpe tup hkra hkan galaw wu ai.

Adam lu da ai hpe myit n dik nna grau mayu ai a majaw, madat mara lam hpe tawt kau ai. Ding-nye a ningpawat tai wa ai. Yesu gaw madat mara ai lam hpe tup hkra hkan galaw ai. Gawng kya ai shinggyim masha ni Yesu hta lai nna yu la na, ninggun la na masha kaga n nga sai. Anhte hkam la lu ai kabu gara awng dang ai lam ni mung n grin ai. Karai Kasang hpe mung, Shi shagrau ya na hpung shingkang hpe mung n mu lu, n hkam sha lu ai rai tim, Yesu tsun ai, galaw ai, sharin shaga ai lam yawng hpe yu la kamsham nna shi a ga hpe madat la hkan shatup ra ga ai. Madat mara ai, ngu ai gaw, machyi hkam, asum hkam, tinang ra sharawng ai lam ni law law hpe nyet kau, asum hkam ra ai.

Timoti hpe San Pawlu shadum ai lam hta mung, “Kabu Gara Shi-ga a jaw e hkam la ra ai ruyak jamjau lam ni hpe hkam sharang u” nga ai. Dinghpring chyoi pra na matu shaga da hkrum ai kamsham ai masha ni gaw teng sha, machyi hkam asum hkam ra ai lam ni law law nga ai. Myi hte n mu lu ai, myit hte pyi n hkawn lu ai, hpang na prat e shăgrau hkam la na hpung shingkang arawng sadang hpe hkam jan lu na lam langai sha nga ai: Yesu hta n di n hka, langai sha tai nna shi a matsun ga ni hkan shatup lu na rai nga ai”.

Sumru na matu
 Myit ru myit tsang ai lam ni hta myit hpyau ai kun, hkam la lu ai shabran shabran chyeju ni, gara hku tawt lai lu ai, ngu ai lam ni hpe htang sumru na.
 Karai a mungga hpe madat mara na kade ahkyak a ta?
 Rut sang hkrum ai aten ni hta gara kaw na mahtai tam grau ga ta?

2023: LUSHA GAM LADAW LABAN (2) NA CHYUM LAIKA

LUSHA GAM AI LADAW LABAN (2)
March 5, 2023
CHYUM MUNGGA DAW 1

Npawt Nhpang 12:1-4

Ya hti na gaw Npawt Nhpang laika hta na rai nga ai.
Madu gaw Abram hpe, tsun wu ai gaw: Na a bu ga hte na a amyu na nwa a nta de nna pru nhtawm, ngai nang hpe madun dan na mung de sa wa su. Ngai nang hpe amyu kaba shatai na de ai: nang hpe ngai shaman ya de ai hte, na a amying hpe ngai galu kaba shangun na rai nna, shaman chyeju lu la na matu, masha ni na a amying hpe gang la na mara ai. Nang hpe shaman ai wa hpe ngai shaman ya na we ai; nang hpe n gawn n sawn di kau ai wa hpe, ngai dagam kau na nngai. Ga ntsa na amyu baw shagu gaw na a marang e gumring gumrat ai chyeju hkam la na ma ra ai, ngu nna Madu gaw Abram hpe shaga la wu ai. Dai rai nna, Abram gaw, Madu shaga wu ai hte maren, pru sa wa ai.
Karai Kasang a Mungga rai nga ai.

Chyum Mungga Daw (2)

2 Timohti 1:8-10

Ya hti na gaw Saradaw Timohti hpe San Pawlu shagun dat ai laika lahkawng hta na rai nga ai.
Hkristu Yesu a kasa rai nga ai, ngai Pawlu gaw, ngai sha Timohti hpe ga shana dat nngai. Karai Kasang jaw ai n-gun atsam hpe kam hpa let, Kabu Gara Shiga a majaw nang hkrum ang ai ru tsang ai hpe hkam sharang la u. Karai Kasang gaw, anhte a magam bungli a majaw n rai, shi yaw shada ai hte maren, shi a chyeju hte anhte hpe hkye hkrang la nna, chyoi pra ai ni tai wa lu na matu, shi anhte hpe shaga la nna, chyoi pra  ai ni tai wa lu na matu, shi anhte hpe shaga da ma ni ai. Dai chyeju lam, moi chyaloi nhkoi kaw nna Hkristu Yesu hta e shi anhte hpe jaw da mani ai; rai timung, anhte a Hkye la Madu Yesu Hkristu ga ntsa e paw pru ai majaw, ya e shadan shaleng dat nu ai. Kaning rai nme law, Yesu Madu gaw si hkrung si htan a atsam hpe jahten kau ya nna, dai Kabu Gara Shiga a marang e asak hkrung ai lam hpe mung, htani htana nhten n bya re ai lam hpe mung, shi shadan dan nu ai.
Karai Kasang a Mungga rai nga ai.

KABU GARA SHIGA

Mahte 17:1-9

Ya hti na gaw Mahte a laika hta na Kabu Gara Shiga rai nga ai. 
Yesu gaw, Petru, Yaku hte shi a kanau Yawhan hpe shaga la nna, tsaw ai bum ntsa de shanhte hpe hkrai woi lung mu ai. Shaloi shanhte a man e shi a hpraw nsam galai mat nna, shi a myiman jan zawn htoi kabrin ai hte, shi a hpun palawng hkyen zawn hpraw tu wa ai. Dai hta n-ga, Mawshe yan Elia mung, Yesu hte ga shaga ai hpe shanhte dan mu lu ma ai. Shing rai Petru gaw, Madu e, ndai yang e anhte nga nga na, gade pyaw la a hka! Nang hkraw n yang gaw, nang e ginsum masum, na a matu langai mi, Mawshe a matu langai mi, Elia a matu langai mi, anhte gap sa ga, ngu nna Yesu hpe tsun wu ai. Petru gaw dai ga naw tsun nga yang, htoi tu sumwi shanhte hpe ka-up nga ai hte, dai sumwi hta na nsen ngoi pru nna, ndai wa gaw, ngai sharawng awng ai, nye a tsaw ra ai Kasha rai nga ai; shi hpe madat mara nga mu, nga ai. Sape ni dai ga hpe na jang, ga de dingyawm dagup nna, nachying hkrit gari nga ma ai. Shaloi Yesu gaw shanhte hpe sa ahtawk nna, rawt mu, hkum hkrit nga myit, ngu mu ai. Shanhte mada yu jang, Yesu hta kaga kadai hpe mung n mu lu ma ai. Ya dai bum de nna shanhte yu hkrat wa nga yang, Yesu gaw, Masha Kasha si ai ni kaw na garai n hkrung rawt yang, ndai shingran hpe kadai hpe mung hkum tsun dan mu, ngu nna shanhte hpe hkang dat mu ai. 
Madu a Kabu Gara Shiga rai nga ai.