2022: YESU LAMU DE LUNG WA AI POI SHANI NA MUNGGA

Madu Yesu gaw byin na amu ni a lam law law, sape ni hpe tau nau nna tsun hpaw dan ai. Ahkyak dik ai lam langai gaw Shi sape ni hpe shakram jahka da nna Shi a buga majing re ai sumsing mungdan de lung wa na lam re. Sape ni hpe jahkrai ma ni hpe zawn kau da ai n rai; “Mungkan htum ai shani du hkra ngai nanhte hte a nga nga na n ngai”, nga ai. Madu Shi galaw lai wa ai amu, byin shangun mayu ai lam yawng Kasa ni a lata hta ap ya da ai. Shanhte hpe ding-yang lam matsun jasu jahprang na matu, Chyoi Pra Wenyi hpe shangun dat ya na lam mung ga-sadi jaw da ai. Jahtum e, Bethani e jahpawng da nna, Shi sumsing mungdan de lung wa mahka, shanhte hpe shaman ya ngut ai htawm, lamu de lung mat wa ai. Kasa ni gaw kabu gara let Yerusalem de htang wa nna Nawku Htingnu e n sim n sa nawku shakawn kungdawn ma ai, nga ai.

Kamsham ai ni a jahtum na bangdung, shaga la hkrum ai lam, myit mada ai lam gaw yawng a ntsa e uphkang ai, daru magam hpung shingkang tup hkam la lu ai Hkristu hta kahkyin wa lu na lam re. Baw re ai Hkristu zawn, hkum hkrang re ai Nawk Hpung masha ni mung, hpung shingkang tup hkam la lu na lam re. Kasa 1:8 hta, “Nanhte gaw ngai a sakse ni rai mi ai”, nga ai ga gaw lareng rai nga ai. Yesu tsun ai, galaw ai amu mahkra mu la, na la, sharin hkaja la lu ai Kasa ni gaw, mungkan masha ni, n mu n na yu ai ni hpe htawn jaw, hti jaw ra ma ai. Mungkan ting chyam hkra hkaw tsun sakse hkam ya na lit lu ma ai. Prat ban shagu na masha ni mung, Kasa ni e sakse hkam dan ai lam, sharin shaga ai lam hpe hpang na aprat aban na masha ni hpe hti htawn jaw lu na rai nga ai.

Columban jau hpung gaw Jinghpaw Wunpawng buga kaw na pru mat wa na rai yang, shajin ra ai baw yawng shajin da ya ma ai. Buga Saradaw, buga jau ni, buga Mama ni, buga Nawku Hpung hpe woi awn na shawa hpung masha ni kaw na ningbaw ningla ni hpe shaning law law shalat da ya ma ai. 1979 ning hta Columban jau ni yawng, langai n ngam hkra Wunpawng buga kaw na kalut mat wa ma ai. Buga Nawku Hpung hpe shalat da ya ma ai; tinang lagaw hta jan rai tsap lu ai Nawku Hpung byin tai lu na hte, awm dawm lu ai Nawku Hpung hpe shalat da ya ma ai. Columban ni hpe kalut la kau ai rai tim, prat galu, Wunpawng buga Nawku Hpung hte matut mahkai ding-yang rai nga ai. Shawng ningnan daw hta n kung n kang re ai kumla ni mu mada tim, shaning law law na mahkrum madup ni, ruyak ai, jamjau ai lam ni hte kaga ra rawng ai law law, manghkang ni law law hkrum katut ai hpang, kunghpan ai madang de gaungwi ngwi lahkam htawt sit lung mat wa nga ai gaw adan sha rai nga ai.   

Anhte langai hpra a prat hta mung, tinang hkau man ai masha, shara, bungli, manang ni, nta masha,… hka shakram kau ai kade lang she re. Jahtum chyalai si hka hka ra ga ai. Kade n kam hka tim shakram jahka kau ra ai aten law law rai nga ai. N tat mai, n hka mai rai nna n shingdang da lu ga ai. Ju ai, n ju ai, ra ai n ra ai, hkau ai n hkau ai, …. Aten du jang jahka da ra ga ai. Ning rai hka shakram da ai a marang e, buga ningnan, bungli ningnan, masha ningnan, mabyin ningnan hte hku hkau shaman nna akyu grau jaw lu ai law law lang re ai hpe myit dum mai ga ai. Prat hta tinang n kam tat ai, tinang hpe akyu n jaw ai, myit n pyaw lam, n ju n dawng ai lam, tinang hpe myit shapyaw ya ai rai tim tinang a galu kaba lam hpe shingdang ai akyu n jaw ai baw hpe kau da ra ai lam mung law law rai nga ai. Nden ja ai myit the tawk hprut jahka da nna shara ningnan, masha ningnan, bungli ningnan hte jahkaw shaman la nna ningnan shachyen sa wa ai hku nna sha, kunghpan ai masha tai lu na rai nga ai.

Kasa ni gaw shanhte hkrai ngam nga sai, ngu, myit kaji garen ai lam n nga ma ai. Madu a ga-sadi ni hpe shanhte tup hkrak kamsham ma ai. Shi Madu galaw ai zawn, grau ai amu ni pyi galaw lu na, ngu ai ga-sadi a majaw kabu ma ai. Madu htet matsun da ai ga ni hpe hkan galaw lu, sakse hkam dan lu na re ai majaw kabu ma ai. Madu shi lamu de lung wa ai gaw shanhte a matu nga shara lajang da na matu re ai majaw, kabu ma ai. Kasa ni gaw nden marai ningnan hte Yerusalem de bai wa nna, n sim n sa akyu hpyi let, Chyoi Pra Wenyi du sa na lam hpe kabu gara ai hte ala nga ma ai.

Aprat aban shagu na kamsham ai ni gaw Kasa ni zawn, Madu hpe kamsham kamhpa ai majaw, kabu gara ai myit hte Madu matsun ai ga hpe matut galaw lu na rai nga ai: sakse hkam ai amu. Kasa ni gaw zingri zingrat hkrum ai hte hpawn, shadawn n mai ai sumsing sutgan hpe hkam la shajang ma ai. Kasa Pawlu tsun ai hta, shi gaw mungkan ga na arawng sadang machye machyang yawng hpe maza hku she sawng kau ai, nga ai. Madu Yesu hpe chye chyang lu ai majaw hkam la na shabrai mahtang shadawn n mai ai, nga ai. 

N-gup aga hku hkaw tsun ai hta tatut tinang nga-sa lailen gaw grau nna tang du ai rai nga ai. Mara dat ya ai lam, simsa ai lam, dinghta ga hta n manoi ai lam, myit pyaw myit dik ai lam….hpa lam hta rai tim, hkum nan kamsham hkap la ai hte maren nga sa lu ai gaw tang du dik ai sakse hkam ai lam rai nga ai.

Dinghta ga na prat hta myit hte mu lu ai akyu amyat ni hpe myit mada mai ga ai: bungli awng dang na lam, hkam kaja nga-mu nga-mai na lam, awng padang hkam la na lam, ja hpaga awng na lam, bungli kaja shara kaja lu la na lam, dz., dz. Gara mung grin lu na n rai; yawng hpe shakram jahka da ra ai aten du ra ai. Ehpesu 1:18 hta tsun da ai hte maren, “Anhte a Madu Yesu e saw shaga ai myit mada ai lam, hkik hkam dik ai sutli kumhtaw dagraw hkam la na hpe chye la mu ga….”, nga, San Pawlu shadum ai. Dai gaw n hten n mat lu ai, htani htana agrin nga na akyu ara rai nga ai. Dai hpe hkam la lu na matu, ndai dinghta ga na hpa kaning re ai sut-rai hpe rai tim, arawng aya hpe rai tim, n ja n hpra re ai shara, masha hpe rai tim, dingbai dingna jaw wa ai rai yang, kabu ai myit, nden ja ai myit hte jahka da gwi ra na ga ai.

Anhte nawku hpawng de shagu, moi moi na Yesu a lam myit sumru ga ai, myit dum galaw ga ai n rai, ya, ngu ai aten, dai Hkristu hte hkrum matut lu ai lam rai nga ai. Sumsing mungdan hta shang ningngai sai Hkristu gaw, dinghta ga na masha ni hte grau masan sa ai hku matut mahkai lu ai rai nga ai.

 Akyu hpyi shagu, Hkristu Yesu hte man chyaw jahta shaga lu ai hku hkam sha lu ai kun? Lamu hte aga tsan gang   ai zawn wa hkam sha ai kun?

 Madu Yesu a sharin shaga ai lam, Kasa ni hpe htet matsun ai ga hpe nye a prat hta gara hku sakse hkam ya lai wa sa ta? Sasana amu hta ngai gara hku lawm nga ai kun?

 Myit-ru myit-tsang hkrum ai aten, jamjau ai aten ni hta pyi  kraw kata sung dik ai shara hta myit mada kabu lu hkra gara hku shakut la mai a hka? 

2022: YESU LAMU DE LUNG WA AI POI SHANI NA CHYUM LAIKA

YESU LAMU DE LUNG WA AI POI
May 29, 2022
CHYUM MUNGGA DAW 1

KASA 1:1-11

Ya hti na gaw, Kasa Laika hta na rai nga ai.
Shawng e ngai ka da ai laika hta, Htawhpilu e, Yesu sumsing lamu de shalun la hkrum ai nhtoi du hkra, Shi galaw dan ai amu ni hte sharin shaga ai lam yawng  hte hpe, ngai ka lajang da se ai. Shi shalun la hkrum ai shani e, Chyoi Pra ai Wenyi a garum ai hte Shi lata la ai kasa ni hpe, ga matsun hkang da mu ai. Yesu gaw nni nkri hkrum ai hpang, Shi a hkum chyahkrung hpe, kam ging ai sakse law law hte, shanhte hpe madun dan wu ai; nhtoi mali shi ya laman e, kasa ni kaw dan pru nna, Karai Kasang a mungdan lam shanhte hpe tsun dan wu ai. Shing rai shanhte rau hpawng nga ai shaloi, Yesu gaw, Yerusalem mare kaw na nanhte n pru ai sha, ngai kaw nna na la ai, Wa a ga ndat hpe ala nga mu; kaning rai nme law ngai hkum nanhte hpe tsun dan ai hte maren, Yawhan gaw hka hte kashin kamun jaw ai; nanhte chyawm gaw nhtoi gade n na yang, Chyoi Pra ai Wenyi hta kashin kamun hkam la na marin dai, ngu nna shanhte hpe tsun mu ai. 
Dai rai nna, Shi hte rau hpawng nga ai ni gaw, Madu e, dai mungdan hpe ya aten e Israela masha ni kaw bai de ya na rai ni? ngu nna san ma ai. Shi mahtang gaw, Wa gaw Shi a ahkaw ahkang hte daw da ai ahkying hte aten ladaw hpe nanhte chye shara n nga ai. Rai ti mung, Chyoi Pra ai Wenyi nanhte a ntsa e du jang, n-gun atsam lu la na myit dai rai nna, Yerusalem mare hte Yuda mung ting, Samari mung hte lamu ga htum hkra, nanhte nye a sakse ni tai wa na marin dai, ngu nna shanhte hpe tsun mu ai. Ndai ga tsun jang, shanhte yu nga ninglen, Shi hpe ntsa de shalun la ai rai nna, summwi gaw shanhte a man na Shi hpe magap la mat wa ai. Shanhte lamu de naw azi yu nga yang, yu mu, hpraw tu ai hpun palawng bu hpun ai marai lahkawng shanhte a makau e tsap pru nna, Galile masha ni e, htaw lamu de hpa majaw azi yu nga myit ta? (Nanhte a man na sumsing lamu de shalun la ai wa dai Yesu gaw, nanhte mada yu nga yang, Shi sumsing lamu de lung wa ai zawn, dai hku Shi bai du na ra ai, ngu nna tsun mu ai.)
Karai Kasang a Mungga rai nga ai.

CHYUM MUNGGA DAW 2

EHPESU 1:17-23

Ya hti na gaw, Ehpesu masha ni hpang de San Pawlu shagun dat ai Laika hta na rai nga ai.
Hpu nau ni e, Anhte a Madu Yesu Hkristu a Karai Kasang rai nga ai, hpung shingkang rawng ai Kawa gaw, Shi hkum nan hpe chye chyang lu na matu, nanhte a myit masin hpe hpaji byeng-ya hte myit leng ai chyeju Shi jaw ya u ga ngu nna, ngai hpyi nngai. Karai Kasang a shaga la ai a jaw e, myit mada shara gade wa nga ai hpe mung; Chyoi Pra ai ni gaw hpung shingkang rawng ai sali wunli gade wa hkrum la na hpe mung; Shi hpe kam sham ai ni a matu, Shi a chyeju atsam gade wa galu kaba nga ai hpe mung, nanhte chye lu na matu, Karai Kasang nanhte a myit masin na myi hpe jahtoi jasan ya malit ga, ngu nna mung, ngai hpyi nngai. Karai Kasang gaw Hkristu hta shabyin da ai amu hpe gawn yu jang, Shi a n-gun atsam nachying galu kaba htum rai nga ai hpe, nanhte chye lu na myit dai. Shi a atsam hte Hkristu hpe si mat ai ni kaw na sharawt la nna, sumsing lamu hta hkra maga e dung nga shangun da wu ai. Du Magam, Ahkaw Ahkang, Hpung Shingkang hte Up ai aya lu ai nlang hte a ntsa e mung, ndai prat hte htawm hpang na aprat e shamying lu ai amying ahkang mahkra a ntsa e mung, shi hpe shagrau shatsaw da nu ai. Karai Kasang gaw arai baw sumhpa hpe Shi a lagaw npu e tawn da nu ai rai nna, yawng mayawng hpe up hkang lu na matu, Nawku Hpung a baw Shi hpe shatai da wu ai: Dai Hpung gaw Hkristu a hkum hkrang rai nga nna, Yawng mayawng hpe jahkum shatsup ya ai Hkristu a chyeju, dai hta e hkum hkum rawng nga ai.
Karai Kasang a Mungga rai nga ai.

KABU GARA SHIGA

LUKA 24:46-53

Ya hti na gaw, Luka a Laika hta na Kabu Gara Shiga a jahtum ai daw rai nga ai.
Dai aten hta e, Yesu Shi sape ni hpe tsun mu ai gaw: Chyum laika hta gara hku ka da ai hpe dum chye nga mu: Hkristu gaw nni nkri hkam la nna masum ngu na nhtoi e, si ai ni kaw na bai hkrung rawt na ra ai; bai nna, masha amyu baw shagu hpe mara raw dat ya ai hkrum na matu myit malai lam hpe, Shi a amying nsang hte hkaw tsun dan na ra ai, nga nna ka da nga ai. Yerusalem mare e hkaw tsun hpang mu; nanhte gaw ndai lam ni a sakse ni rai nga myit dai. Yu mu, nye Wa a ga ndat nanhte a ntsa de shangun dat na ring ngai; dai rai nna matsaw ningtsang de na n-gun atsam hpe nanhte dagraw la ai nhtoi du hkra, ndai mare e naw la nga mala, ngu nna shanhte hpe tsun dat mu ai. Dai hpang Shi shanhte hpe Behtani kahtawng a shingnawm de woi sa wa nhtawm, Shi a lata sharawt nna shanhte hpe shaman ya mu ai. Shing rai, shanhte hpe shaman ya nga yang, Shi shanhte kaw na hka mat wa nna, sumsing lamu de woi shalun la ai hkrum wu ai. Shanhte gaw Shi hpe nawku nhtawm, nachying kabu gara let Yerusalem mare de bai wa ma ai; Karai Kasang hpe shakawn kungdawn let, Nawku Htingnu e a nga nga ma ai.
Madu a Kabu Gara Shiga rai nga ai.

2022: PASKA LADAW LABAN (6) NA MUNGGA

“Nanhte a myit masin hta hkum ru-tsang mu, hkum hkrit mu! Ngai wa mat na ni ai, rai tim ngai bai du sa na nngai”, ngu ai ga-yan gaw ninggun lu mai dik ai shalan shabran ga re, nga, Martin Luther tsun yu ai. Dai hta n’ga, Sape (Kasa) ni maga tsap ya, maga ya na Wa, Chyoi Pra Wenyi hpe Yesu shi a mying ningsang hta Kawa Karai e shangun dat ya na. Dai Wenyi gaw Yesu tsun shaga ai lam a lachyum hpe htai dan na; shaloi shanhte dum hprang wa na ma ai lam mung tsun da ai. Hkrung rawt sai Madu hpe bai mu lu lu rai tim, mi moi na zawn aten tup Yesu hte arau nga lu ma ai n rai; mu yu, mat yu re ai majaw, shanhte naw ung ang ma ai. Kau da hkrum ai zawn nga hkam sha na ma ai. 

Yesu a shalan shabran ai ga, kaman n tai ai. Shawng shawng na Nawku Hpung, Kasa ni woi awn ai Nawku Hpung hta jengmang jenghkang nga dara hkat ai amu kaba byin pru ai. Nawku Hpung a shawng shawng na zuphpawng, Yerusalem e rai nga ai. Chyoi Pra Wenyi a jahtoi ya ai chyeju hte, manghkang hpe hparan lu nna, hpung masha yawng hpe simsa ai hku woi awn lu ai lam rai nga ai. Asak jaw ai wenyi tai wa ai Yesu gaw, hkum hkrang hte arau nga lawm ai hta grau ai hku nna, Nawku Hpung hpe garum ya lu ai. Karai a mungdan, Israel htinggaw 12, Kasa 12 ngu ai htingdun hta gawde mare ningnan… shimlum dik ai Karai a mungdan a lam tsun da ai.

Masha tai wa ai kaw nna kaba wa, dum hprang wa magang, myit-ru chye magang rai nga ai. Myit-ru myit-tsang lam kaw na tsepkawp lawt lu na lam n mai byin ai. Ja gumhpraw tam lam, kanbau bungli, kanawn mazum lam, hkamja lam, hpaji mahkrun, dz., dz., myit mada lu nna kabu lu ai zawn, myit mada da ai hte kahprai mat nna nhtang chyung rai hkrat sum ai aten, hpa matut galaw na, …myit-ru ra ai; awng dang ai lam lu la ai hpang e mung, lu da ai gumhpraw, arawng aya, hku-hkau makyit sumri shangang na lam, n sum hkra, n htingnut hkra, matut hkang da, sharen da lu na matu, myit-ru myit-tsang ra ai. Hkrit tsang n ra ai lam, Madu hpe aten shagu, shara shagu e hkrum mai, shaga mai ai lam matut myit yu ga.

Langai ngu na hta, hkrung rawt sai Madu gaw kamsham ai sape ni hte aten shagu, shara shagu e nga nga ai. Dai majaw, shi hpe tup hkrak kamhpa ging ga ai. Dinghta ga e Yesu shi a sape ni hte nga ai aten hta, Yesu gaw aten langai hta shara 2, 3, 4 kalang hta n nga lu ai. Aten langai hta shara langai kaw sha nga lu ai. Bai hkrung rawt sai Yesu hpe hpa e mung n shingdang lu ai; aten/ shara shi hpe shingdang lu ai lam n nga sai. Dai majaw, galoi aten, kaning re shara kaw na rai tim, kamsham ai myit hte shi a amying gang yang shi teng sha garum ya lu ai majaw, shi hpe tup hkrak kamhpa lu ga ai.  

Lahkawng ngu na hta, shi a ga-sadi gaw kam ging ai. Dinghta ga na masha ni, kalang pyi n masu yu ai masha gaw n nga ang ai. Masha shagu shut chye kataw chye ai hkrai re. Tinang a akyu amyat a matu, mara shagun ai kaw na lawt lu daw, lu mayu ra mayu ai hpe lu la daw, pau nna jat nna tsun chye ai; n jaw ai, n teng ai hku tsun chye ai masha hkrai rai ga ai. Dai Hkristu gaw ningpawt ninghpang “Alfa” re ai zawn, yawng mayawng a jahtum nchyan “Omega” mung re ai, nga, Shingran Laika hta tsun da ai. “Ngai hpe kam mu; myit hkum ru mu; simsa nga mi ga” ngu tsun ai wa gaw kam ging ai wa, shut n chye masu n chye ai wa rai nga ai. Shi a ga-sadi ni hpe kamsham ai wa gaw teng sha, hkrit tsang-hpa kaw na shi Madu shalawt dat ya na rai nga ai. Shi hpa galaw ya na shi chye ai majaw hkum myit ru mu, hkum tsang mu, nga, tsun ai rai nga ai.

Masum ngu na hta Yesu shi hkum hpe nan kam ging ai__ Anhte ra kadawn ai chyeju kumhpa yawng, shi kaw na lu la mai ai: “Ngai gaw hkrun lam rai li ai; tengman ai lam hte asak mung rai li ai”, nga, shi tsun da ai. Dai hta grau nna kamhpa ging ai masha kaga n nga sai. Shinggyim masha ni shut hpyit mara hta lup taw nga ai aten, shi hpe tai shai ninghkap nga ai aten hta shi a asak hpe nawng kau nna shinggyim masha hpe hkye hkrang la ai. Kamsham ai masha shagu hkye hkrang la ai du lu ai. Kawa Karai tsun ai hte maren, “Kasha hpe asak nawng kau ai du hkra, shinggyim masha a matu jaw ya kau ai; dai Hkristu hta Kawa e n jaw ya na hpa nga na rai ta?” nga nna, Kawa Karai e nan sakse hkam da ai. 

Masha langai a prat hta myit-ru myit-tsang lam du pru dingyang rai na re. Hkrit-hpa n taw ai hkrum katut ra ga ai. Hpan da Madu, hkye hkrang la ai Madu e, Shi n galaw lu ai hpa nan n nga ai hpe kam ai rai yang, “Mungkan masha ni n jaw lu ai simsa shimlum lam Shi jaw na”, nga ai ga hpe n kam ai nga na kun? Dai hta n-ga, anhte hpe shadaw ya na matu Chyoi Pra Wenyi kumhpa mung jaw ya ai.

Nawku Hpung a labau hpe gawn yu yang, hten bya ayai na lam law law lang hkrum katut lai wa ai. Dai ni du hkra grin nga lu ai Yesu a ga-sadi a majaw n rai a hka? Nawku Hpung hta dangrang hkat na lam, myit n dik na zawn re ai lam ni, manghkang law law matut nna hkrum katut nga na rai nga ai. Chyoi Pra Wenyi a lam matsun, jasu jahprang ai, lam woi ya ai a marang e, n dum n sawn lu ai hku, Nawku Hpung gaw ngang grin ai hta n-ga, prat hte prat, sut htuk ai hku mahtai shapraw nga sa lu ai, rawt jat lu ai lam gaw teng sha, Karai a makawp maga chyeju nan rai nga ai.

Kuptsup ai lam ndai dinghta ga e n mu lu na re. Kuptsup ai Nawku Hpung hte kamsham ai ni langai hpra hta kuptsup ai lam sumsing mungdan hta sha nga ai; dai lam hpe Shingran Laika hku nna praw rai madun dan ai. Myit daw ung ang ai lam n nga ai sha, matut nna Karai a makawp maga ya ai chyeju hpyi la hkam la shajang ga.

 Myit-ru myit-tsang ai aten ni hta Madu Yesu a ga-sadi ni  hpe kamsham ai myit hte gara hku tawt lai lu ai lam  bawngban mai ai.

 Myit mada shara n nga hkra, chyip mak hkam sha ai aten, Karai a lata hta chyip mak kamhpa nawng da lu ga ai kun?

 Chyoi Pra Wenyi a lam matsun ai, jasu jahprang ya ai chyeju hpe ya sha sha akyu hpyi hkam la chye ga ai kun?

2022: PASKA LADAW LABAN (6) NA CHYUM LAIKA

PASKA LADAW HTA LABAN 6
May 22, 2022
CHYUM MUNGGA DAW 1

KASA 15:1-2, 22-29

Ya hti na gaw, Kasa Laika hta na rai nga ai.
Dai nhtoi hte hta e, Yuda mung na ni nkau mi sa du nna, hpu nau ni hpe sharin shaga let, Nanhte Mawshe a htung hte maren, matu gadoi lam n hkan yang gaw, hkye hkrang la ai kaw n du lu na myit dai, nga ma ai. De a majaw, bra na lam pru nna, Pawlu yan Barnaba dai ni hte grai ndang kalang hkat ma ai. Shing rai dai lam hpe jahkrup yu na matu hpu nau ni gaw Pawlu yan Barnaba hte shanhte hta na nkau mi hpe, Yerusalem mare de nga ai kasa ni hte salang ni hpang de shangun dat na san da ma ai. 
Kasa ni hte salang ni gaw, hpung masha nlang hte bawng nna, shanhte hta na masha lata la nhtawm Pawlu yan Barnaba hte rau Antiok de shangun dat na lam myit hkrum ma ai. Dai hte maren hpu nau ni hta na myit su ai salang Banaba ngu ai Yuda hte Sila hpe lata la nna, shan a lata hta ka ya dat mu ai ga gaw: Anhte Kasa ni, Salang ni, Hpu nau ni gaw, Antiok mare hte Suri mung, Kiliki mung hkan e nga nga ai, maigan amyu hpu nau ni hpang de ngwi pyaw ga shana dat ga ai. Anhte kaw na pru wa ai ni nkau mi gaw nanhte hpe ga hte shatsang nna myit gale galau di ya ai hpe anhte na lu saga ai. Dai masha ni anhte kaw na hpa amying ahkang n lu ma ai. Dai majaw anhte nlang bawng nna, malai ni hpe lata la nhtawm anhte a madu Yesu Hkristu a mying ningsang a majaw tinang asak pyi n lahpawt ai, anhte a tsaw ra ai Barnaba yan Pawlu hte rau, dai malai yan hpe nanhte hpang de shangun dat na, myit hkrum ga ai. Dai re ai majaw Yuda yan Sila hpe anhte shangun dat ga ai rai nna, shan a n-gup ga hte nan, laika hta rawng ai lam hte maren tsun dan na mara ai. Nanhte a matu gaw, hpara sumla ni hpe nawng ya ai shahpa hpe mung, asai rawng ai hte, du manat sat ai shan hpe mung, n se n sa ai amu hpe mung, nanhte koi gam lu na rai myit dai. Ndai ahkyak ai lam ni hta jan nna, grau ai lit kaga nanhte hpe n shangun na, nga nna Chyoi Pra ai Wenyi hte anhte myit hkrum ga ai. Dai hte hpe nanhte koi gam nga yang, mai kaja na rai malit dai. Hkam kaja nga myit ga law.
Karai Kasang a Mungga rai nga ai.

CHYUM MUNGGA DAW 2

SHINGRAN 21; 10-14, 22-23

Ya hti na gaw, Yawhan a Shingran Laika hta na rai nga ai.
Lamu kasa ngai hpe wenyi hta woi nawng mat wa ai hte, galu kaba, tsaw la ai bum ntsa de, woi du nna Karai Kasang kaw nna sumsing lamu de na yu hkrat wa ai Chyoi Pra ai Yerusalem Mare ngai hpe madun dan nngai. Dai mare hta Karai Kasang a hpung shingkang dan hkung ai hte de a htoi tu ala ai gaw pat zawn san seng nna hpu la ai lung seng hte bung nga ai. De a bunghku gaw galu kaba ai hte tsaw la nga ai: mare chyinghka shi lahkawng hpaw nga ai rai nna, chyinghka shagu hpe lamu kasa langai mi sin nga ai. Sinpraw maga de mare chyinghka masum, dingdung maga de chyinghka masum, dingda maga de chyinghka masum, sinna maga de chyinghka masum hpaw nga ai. 
Dai mare a bunghku gaw npawt nlung shi lahkawng hta na langai mi a amying shingteng kap da nga ai. Dai mare kata e Nawku Htingnu hpe ngai n mu nngai; kaning rai nme law, chyahtum chyalai n-gun rawng ai Madu Karai Kasang hte Sagu Kasha gaw, dai mare a Nawku Htingnu rai nga ma ai.  Dai mare hpe jahtoi ya na matu ajan mung, shata mung n ra nga ai. Karai Kasang a hpung shingkang dai mare hpe jahtoi ya nna, Sagu Kasha gaw de a pyeng ding rai nga ai. 
Karai Kasang a Mungga rai nga ai.

KABU GARA SHIGA

YAWHAN 14:23-29

Ya hti na gaw, Yawhan a Laika hta na Kabu Gara Shiga rai nga ai.
Dai aten hta Yesu Shi a sape ni hpe tsun ai gaw: Ngai hpe tsaw ra ai wa nye a ga matsun hkan shatup na ra ai: nye Wa mung dai wa hpe tsaw ra na wu ai rai nna an lahkawng gaw dai wa kaw sa nna shi hte rau hpawng de nga na ga ai. Ngai hpe n tsaw n ra ai wa nye  a ga n hkan shatup nga ai. Dai hta kaga, nanhte na la lu ai Mungga gaw nye a ga n rai li ai: ngai hpe shangun dat ai nye Wa a Mungga rai nga lu ai. Ngai nanhte hte rau naw nga nga yang, ga ndai nanhte hpe tsun da ni ai. Nye Wa e nye a amying hte shangun dat na ra ai. Shalan shabran chye ai Chyoi Pra ai Wenyi gaw nanhte hpe tsun da ai ga yawng mayawng, nanhte hpe shadum jahprang ya na ra ai. Nanhte kaw ngwi pyaw ap da ya nngai; nanhte hpe nye a ngwi pyaw jaw ya made ai: mungkan ga na ni n lu jaw ai ngwi pyaw ai gaw nanhte hpe ngai jaw ai kumhpa rai nga ai. Nanhte myit hkum ru mu; hkrit mung hkum hkrit mu. Ngai wa nna nanhte kaw bai sa na ring ngai, nga nna ngai tsun ai ga hpe nanhte na la manit dai. Nanhte ngai hpe tsaw ra myit dai rai yang gaw, Wa hpang de ngai wa ai majaw, nanhte kabu na rai myit dai; kaning rai nme law, Wa gaw ngai hta grau kaba nga ai. Dai amu byin pru wa ai shaloi nanhte kam sham lu myit ga, ya garai n byin pru yang ngai nanhte hpe tsun da made ai.
Madu a Kabu Gara Shiga rai nga ai.

2022: PASKA LADAW LABAN (5) NA MUNGGA

Kasa Laika hta San Pawlu tsun ai,”Karai Kasang a mungdan de rai n du shang shi yang, anhte gaw, nni nkri law law hkam sharang ra ga ai”, nga ai. Madu Yesu mung, rim zingri hkrum maw ai aten e sha, prat a jahtum na daw hpe ning nga ai, “Ya, Masha a Kasha gaw shagrau hkrum sai; ….kade n na yang shi hpe shagrau ya na ra ai”, nga ai. Jahtum chyalai nni nkri shoi-hpa hpe hkam la nna she hpung shingkang hkam la na rai nga ai. San Pawlu mung, Yesu mung, langai sha re ai tengman lam hpe tsun ai: makam masham a majaw, tsawra myit a majaw, kaga masha ni a akyu ara a majaw, zingri zingrat, nni nkri hkrum sha ai rai yang, dai gaw, hpung shingkang dagraw hkam la na matu, Karai e jaw ya ai ahkaw ahkang rai nga ai.“Nanhte hpe tara ningnan jaw de ai: ngai nanhte hpe tsawra ai zawn, nanhte shada tsawra mu!” 

Masha yawng gaw nni nkri, shoi-hpa hpe hkrit ai. N tara ai hku jeyang hkrum na, roi rip hkrum na hpe hkrit ai. Tengman ai maga tsap ai majaw, shawa law law a akyu ara a majaw, rap-ra tara hpe maga ai majaw, tsawra myit a majaw, kaga masha ni a nga-mu nga-mai, akyu ara a majaw tinang zingri hkrum ai, nni nkri hkrum ai rai yang dai gaw, hpung shingkang hkam la na matu Karai e jaw ya ai ahkaw ahkang rai nga ai. Anhte mungdan hta rap-ra tara grawng ja wa na matu, n tara ai hku dip kamyet uphkang ai masa galai wa lu na matu, htawm hpang prat na amyu matu ni shanglawt awm dawm ahkaw ahkang lu na matu, ngu nna, tinang nang a asak hpe n lahpawt ai, asak hpe nawng da, nni nkri hkam la ai ni, htawng rawng hkam ai ni, adup abyen hkam la ai ni, si hkam ai ni law law nga ma ai. Hpung shingkang hkam la na mtu, nni nkri shoi-hpa ni hpe shawng hkam sharang ra ai, nga ai. Dinghta ga na lam hta pyi dai zawn hkam la ra ai rai taw, n htum n wai asak hkam la na matu grau pyi hkam la mai ga ai n rai a hka!

Manu shabrai n jaw ai, salat n hkaw ai, ba n hkam, machyi n hkam ai sha kaning re ai awng dang lam mung n lu la mai ai. Lungseng lauban byin mayu ai kun, Doctor byin mayu ai kun, Engineer byin mayu ai kun, madum sumpyi baw hpan hta kunghpan mayu ai kun, ….awng dang kunghpan ai kaw du lu na matu aten law law jaw nna, pu ba hkam nna sharin hkaja la ra ai. Tinang pu ba salu salat law law hkaw nna sha, awng dang ai madang de du nna masha ni e shakawn shagrau kam hpa ai hpe hkam la lu na rai nga ai.

Madu Yesu sharin ya ai lam gaw, dinghta ga e hpa kaning re ai gam maka mi katut sha ai rai tim, kaning re ai hpyen hpe hkrum ai rai tim, nden ja magrau grang ai hte hkam la chye na ahkyak ai lam sharin ya ai. Dinghta ga e n tara ai hku jeyang hkrum ai, machyi makaw hkrum ai, matsan jamjau hkrum ai, ndai ni gaw jahtum n rai. Yawng hpe jeyang ai wa gaw Karai Kasang re ai hte maren, tinang maga n shut ai hku nga sa ai, hkam la ai rai yang, hpung shingkang hkam la na lam tai wa ai. Shingran Laika hta mung, “Karai Kasang hkum nan shanhte a hkrap mi-prwi hpe katsut kau ya na ra ai” nga tsun da ai. Madu Yesu hta yawng mayawng hpe ningnan hpan shalat ai, ningnan re ai asak aprat hpe myit mada ala nga ra ai lam shadum ninggun jaw ya ai.

Yesu gaw hpa majaw tara ningnan jaw a ta? Hpa kaning re ai lam hta laklai a hka! Moshe a Tara hta, “Na htingbu wa hpe na hkum hte maren tsawra lu na (Ga-shaka Dingsa)”, nga, tsun da ai. Tinang a hkum hpe pyi manu n shadan, n tsawra chye ai ni law law nga ma ai hpe anhte a grup-yin e nga shajang ma ai. Tinang a hkum hpe pyi n chye tsawra ai ni gaw kadai hpe mung hpa n shadu na re. Yesu a tsawra myit gaw kuptsup ai tsawra myit; mara lu ai ni a gawng malai tai si hkam nna mara lu ai ni hpe hkye hkrang la ai tsawra myit rai nga ai.

Yesu a Tara ningnan hpe chye na ai shawng shawng na Hkristan masha ni, Kasa ni gaw masha yawng hkye hkrang la hkrum mu ga, ngu ai tsawra myit a majaw, shanhte a asak hpe n lahpawt ai, Yesu a tsawra myit hpe sakse hkam ma ai; zingri zingrat ai hkam la ma ai, si hkam ai hku nna sakse hkam ma ai. Masha yawng hkye hkrang la ai hkrum lu na lam shakut shaja ma ai. Nawku Hpung uhpung uhpawng ni hta shada tsawra lakawn hkat ai lam adan sha mu lu ga ai. Kasa Laika hta San Pawlu yan Barnaba a shakut shaja ai lam hpe mu lu ga ai. Kasa ni, sape ni, shanhte hta rawng ai laksan shaman chyeju atsam marai ni hpe akyu jashawn nna shada pawn ba, lanu lahku dawjau hkat ma ai. Nawku Hpung hta tsawra kahkyin gumdin nga ai lam gaw “Karai-Kasang-shanhte-hte-nga nga ai”, nga, Shingran Laika hta tsun da ai lam hpe shadum ya ai.

Ndai dinghta ga e n kuptsup ai Nawku Hpung hte hpung masha ni, shada tsawra dawjau shakut ai, zinlum mada mara hkat ai lam ni n kuptsup tim, Karai a mungdan, Yerusalem ningnan de du ai shaloi, ra rawng ai lam n nga na, hkrap ngu hkrap ngoi ai lam n nga na, shalan shabran ai lam tup hkra hkam la shajang na lam, Shingran Laika hta pra pra mu lu ga ai.

 Tinang hkum hpe tsawra ai hta grau ai, “Ngai nanhte hpe tsawra ai zawn shada tsawra mu” nga ai hpa hpa rai ta? 
  Bawngban mai ai.
 Tinang nga ang ai mare kahtawng/ uhpung uhpawng hta shada kade tsawra kahkyin gumdin nga ai kun? Hpa hpa naw ra a ta? 
 Sasana majen je ai amu hta tinang gara hku shang lawm nga a ta?

2022: PASKA LADAW LABAN (5) NA CHYUM LAIKA

PASKA LADAW HTA LABAN 5
May 15, 2022
CHYUM MUNGGA DAW 1

KASA 14:21-27

Ya hti na gaw, Kasa Laika hta na rai nga ai.
Dai nhtoi hte hta e Pawlu yan Barnaba gaw Lustra hte Ikoni mare lam hku hkan nna, Anti-ok de bai wa ma ai. Shan bai wa nga yang, sape ni a myit shangang ya let, makam masham hpe kangka ai hte hkan shatup na matu shadum jahprang ya ma ai. Karai Kasang a mungdan hta garai n shang yang ru tsang ai lam law law hpe hkrum sha ra ga ai, ngu nna sharin da mu ai. Hpung shagu hta mung, hpung up salang lata la nhtawm, akyu hpyi ai hte lusha gam nna shanhte kam sham nga ai Madu a lata hta ap ya da mu ai. Shan gaw Pedisi mung ga sa wa nna, Pamhpuli mung de du ma ai. Dai yang e Perga mare hta mungga tsun dan nhtawm Atali de yu wa ma ai. Ya shan gun hpai lai wa sai amu a matu Karai Kasang a chyeju hta shan hpe ap ya nna, shangun dat ai Anti-ok mare de, shan dai shara kaw na li jawn nhtawm, bai du wa ma ai. Shan du wa jang, hpung masha ni hpe jahpawng tawn nna, Karai Kasang shan a lata hta galaw ai lam yawng mayawng hpe mung, maigan amyu ni hpe makam masham a chyinghka hpaw ya wu ai hpe mung, hkai dan ma ai.
Karai Kasang a Mungga rai nga ai.

CHYUM MUNGGA DAW 2

SHINGRAN 21:1-5

Ya hti na gaw, Yawhan a Shingran Laika hta na rai nga ai.
Ngai Yawhan gaw, sumsing lamu nna, ginding aga nnan hpe ngai mu nngai; shawng na lamu hte shawng na aga lai mat wa sai: nammukdara mung dai kaw e n nga sai. Shaloi chyoi pra ai mare ngu ai Yerusalem nnan gaw, la nnan a matu mawn sumli ai num nnan zawn, Karai Kasang a man kaw nna sumsing lamu de na yu hkrat wa ai hpe ngai mu nngai. Bai, dai tingnyang kata na nsen kaba gaw: ‘Yu mu, Karai Kasang a htingnu shinggyim masha ni hte rau nga nga nna, Shi shanhte kaw sa shanu na hte, shanhte gaw Shi a amyu ni tai na mara ai. Karai Kasang Shi hkum nan shanhte hte rau nga nga nna, shanhte a Karai Kasang tai na ra ai. 
Shi gaw shanhte a myi hta na myi prwi pru mapru katsut kau ya na ra ai; htawm hpang e si hkrung si htan n nga lu na sai; sharung shayawt ai hkrap ngu hkrap ngoi ai, hki si ba si ai mung n nga lu na sai: shawng na lam nga manga hte gaw, lai mat wa sai, nga nna tsun ai hpe ngai na nngai. Shaloi tingnyang hta dung nga ai Wa mung, yu u, yawng mayawng hte hpe, ngai ningnan bai gaw da nngai, nga nna tsun ai.
Karai Kasang a Mungga rai nga ai.

KABU GARA SHIGA

YAWHAN 13:31-35

Ya hti na gaw, Yawhan a Laika hta na Kabu Gara Shiga rai nga ai.
Yuda Iskarut pru mat wa ai hpang, Yesu Shi a sape ni hpe tsun mu ai gaw: Masha Kasha gaw ya hpung shingkang dan hkung nga ai rai nna, Karai Kasang mung Masha Kasha hta hpung shingkang dan hkung nga ai. Karai Kasang Shi hkum nan Masha Kasha hpe shagrau ya na wu ai: rai sa, gade n na yang Shi hpe shagrau ya na ra ai. Ngai sha ni e, ngai nanhte hte hkring mi naw nga na nngai. Nanhte shada da tsaw ra nga mu, ngu nna tara nnan ngai nanhte hpe jaw da made ai: ngai nanhte hpe tsaw ra made ai zawn, nanhte mung shada da tsaw ra nga na rai myit dai. Shing rai nanhte shada da tsaw ra ai myit rawng nga yang gaw, nanhte nye a sape ni rai nga ai hpe masha yawng mayawng chye lu na mara ai.
Madu a Kabu Gara Shiga rai nga ai.

2022: PASKA LADAW LABAN (4) NA MUNGGA

Masha e rem ai dusat ni hta sagu gaw hpyen law dik ai; ninggun kya dik ai, sharaw zawn re, chyahkyawn zawn re ai baw hte hkrum katut jang, shi hkum hpe shi n maga lu ai. Matse labye e aloi sha hpya sha kau lu ai. Uhpung hka nna lam dam mat jang, lam n chye tam la ai; sagu rem ai wa dasang hkan tam la yang sha, sagu hpung de bai du wa lu ai. Dai zawn garum shingtau na ra kadawn dik htum ai dusat hpe makawp maga bausin ai sagu rem kaja a lam, dai gaw Kaja ai Sagu Rem Wa re ai Yesu Hkristu a lam rai nga ai. Mungkan lam hta rai dum lu ai, ninggun ja dum ai masha ni law law nga ma ai; rai tim, wenyi asak mahkrun hta kadai n nga, ninggun kya ai, shut kataw loi ai, lam yit lam dam loi ai shinggyim masha she rai nga ai; ninggun ja dum, rai dum na masha kadai n nga ai. Dai Sagu Rem Kaja Yesu gaw sagu langai hpra a mying hpe chye ai, langai hpra hta ra kadawn ai lam hpe chye ai. Langai hpra mung, dai Sagu Rem Kaja Yesu e lam woi ai hku hkan na, Shi a nsen hpe madat na, tsepkawp dai Madu hpe kamhpa let hkum hkrang myit masin wenyi ap nawng da na ahkyak ai. N htum n wai asak hkam la mayu jang, teng sha, tinang mung sagu kaja tai lu na ahkyak ai.

Israel amyu sha ni a ji-jum ni, Abraham, Isak, Yaku hte aru arat ni gaw bu htawt hkawm nna sagu rem let kanbau amu galaw ai ni rai ma ai. Ningpawt ninghpang kawa Adam a kasha Abel mung sagu rem ai wa re, nga ka da ai. Chyum Laika hta Karai Kasang hpe nan mung Israel amyu masha ni hpe bausin ai Sagu Rem Wa, ngu nna shamying da ai. Kaga, hkawhkam hte amyu sha ni a ningbaw ningla ni hpe mung “Sagu rem wa” ngu shamying ma ai. Ga-shaka Ningnan hta Yesu shi hkum hpe shi, “Sagu Rem Kaja” ngu shamying ai majaw, mau na lam n nga ai. 

Yesu gaw Kawa Karai hte daw hkat ai hku nga jang, sagu kasha, mungkan mara la kau ya ai Karai a sagu kasha rai nga ai. Yesu gaw, shi hpe kamsham hkap la ai sape ni hte daw nna shi gaw Sagu Rem Wa, sape ni mahtang sagu kasha ni rai nga ai. Paska ladaw 4 ngu na Laban shani hpe Sagu Rem Wa Yesu hpe myit dum shagrau ai Laban nhtoi, ngu, masat da ai. Kaja ai sagu rem wa gaw sagu hpung ting hpe chye ai, langai hpra hpe mung amying gra, shaga lu ai. Langai hpra hta gawng kya ai lam ni hpe chye ya ai. Gayaw kashin re ai sagu ni hpe tsi chya ahkyen hkayawp ya ai; lam dam mat ai sagu ni hpe mung mu hkra bai tam la ai. Hkanghkyi/chyahkyawn hpyen ni n kahtep lu hkra aten tup sin maja ai. Ra wa jang matse labye dusat ni hte gasat hkat ra ai. Sagu hpung hpe tsit lali ai wudat shara de woi sa ai; sha-it kanang e nga ai, lwi ai hka kanang hkan nga ai lam sagu rem wa gaw azin ayang chye ai.     

Amyu sha ni a ningbaw ningla ni, makam masham hpa-awn ni hpe mung, sagu rem arawng aya lu ai ni hku nna shamying ai. Rai tim n kangka ai ni law law rai ma ai. Mung shawa masha ni a akyu ara gun hpai ai lit kaba lu ninglen, mung shawa masha ni hpe roi rip dang sha ai ningbaw ningla ni mung law law re ai lam, Chyum Laika hta ka da ai. Karai gaw hkum nan sagu ni hpe bau sin na lam, Dawi a amyu matu kaw na Sagu Rem Kaja san da na lam Yeremiah hte Ezekiah Laika ni hta adan sha ka da ai. Kaja ai Sagu Rem Wa hpe shaang ai Shakawn Kungdawng (23/99) hta adan sha mu lu ga ai.

Anhte a prat hta nan, mung shawa masha ni hpe rem sin na lit lu ai ningbaw ningla ni law law, tinkyeng akyu amyat hkrai tam la ai, mung shawa masha ni hpe punhtau shatai ai ni law law rai ma ai. Makam masham ningbaw ningla kau mi hta mung, n kangka ai ni hpe mu lu na ga ai: gaida jahkrai ma ni hpe hpya lu hpya sha ai ni, nga nna Chyum Laika hta tsun da ai. Makam masham ningbaw ningla Jau/Saradaw ni hta mung n kuptsup ai lam law law mu lu na ga ai. Dai ni na Laban hta shanhte a matu mung akyu hpyi ya na, kaja ai sagu rem ni tai lu na lam akyu hpyi ya ang ai nhtoi rai nga ai.

Kaja ai sagu rem wa gaw tinang a akyu amyat hpe n tam ai; ra wa jang sagu hpung a matu tinang a asak hpe pyi n lahpawat ai, asak ap nawng kau na shajin da ai wa re. Sagu hpung hpe aten tup sin maja ai, sagu ni hkru kat na lam galoi mung myit ya ai. Yesu chyu sha ra n rawng ai wa re. Hkum hkrang daw hten ai ni hpe shamai ya ai; machyi macaw ana ahkya yawng hpe shamai ya ai. Myit ru yawn hkyen ai ni hpe shalan shabran ya ai; mara hta lup taw nga ai masha ni myit malai lu na lam hkaw tsun ai. Shanhte a mara hpe raw ya ai; aprat ningnan hta hkawm sa shangun ai. Kang hta ai ni, shawa num ni, myit malai lu wa ma ai. Wudang ntsa e jen noi ai lagut damya pyi gaw myit malai lu nna mara raw dat ya ai hkrum ai. 

N htum n wai tsawra matsan dum chye ai dai Sagu Rem Wa hpe chyeju dum ging ga ai. Tinang nang mung sagu kaja tai na, madat mara ai sagu tai na ahkyak ai. Shut hpyit lam dam loi ai shinggyim masha ni, dai Sagu Rem Kaja a uphkang gawn reng ai npu e shimlum dum ai myit hte hkan nang na ahkyak ai. Yawhan a Shingran Laika hta mung, Tingnyang ntsa hkaw dung ai Sagu Kasha gaw, sagu ni hpe tsit lali ai wudat shara, hka lwi ding-yang re ai tsingdu pa e sagu ni hpe rem sin na, shanhte a hkrap myi-prwi hpe katsut kau ya na, nga ai. Kade kabu hpa, myit mada hpa, shimlum ai lam tai lu a hka!

 Yesu gaw mungkan mara la kau ya ai Karai a Sagu Kasha re ai zawn, Sagu Rem Wa mung rai nga ai. Anhte langai hpra mung sagu kasha mung rai, sagu rem lit mung lu ga ai. Gara hku nna shada a ntsa e lit lu ga ta?

 Masha shada sagu rem ni, sasana magam hte Hpung woi ningbaw tsang hte tsang, lit lu ai ni hta gawng kya ai lam mu ga yang, shanhte hpe gara hku garum ya lu na ga ta?

 Kun dinghku kanu kawa ni mung, sagu rem aya hta gara hku lit lu ma ta?

2022: PASKA LADAW LABAN (4) NA CHYUM LAIKA

PASKA LADAW HTA LABAN 4
May 8, 2022
CHYUM MUNGGA DAW 1

KASA 13:14, 43-52

Ya hti na gaw, Kasa Laika hta na rai nga ai.
Pawlu yan Barnaba gaw Perge kaw nna rawt sa wa nna, Pesidi mung na Anti -ok mare de du ma ai. Ya, Laban nhtoi e, tara jawng hta shang dung nga ma ai. Tara jawng na bra mat wa jang, Yuda masha ni hte Yuda hpung de kayin wa ai maigan masha ni law law wa, Pawlu yan Barnaba kaw hkan nang ma ai. Shan lahkawng shanhte hpe sharin shaga nna, Karai Kasang shanhte hpe jaw ai chyeju hte maren, kangka rai hkan sa lu na matu shadum jahprang ya mu ai. Hpang na Laban Nhtoi hta, Karai Kasang a Mungga na la na matu, mare ting, ganoi mahkra, wa zup hpawng nga ma ai. Yuda masha ni chyawm gaw, dai shawa hpawng hpe mu jang, manawn ai myit hte hpring chyat nga ma ai rai nna, Pawlu tsun ai lam hpe ndang hkat ai hte aroi ara ngu da mu ai. 
Pawlu yan Barnaba nden ja ai myit hte shanhte hpe htan ya nna, Karai Kasang a Mungga nanhte hpe shawng tsun dan na ra ga ai; rai ti mung, nanhte dai hpe n hkap hta la ai majaw, n htum n wai asak hte n ging n dan ai hku, nanhte nan daw dan la manit dai. Dai rai nna, maigan amyu ni hpang de anhte myi man kayin na saga ai. Kaning rai nme law: Lamu ga htum hkra nye a hkye hkrang la ai lam dep lu hkra, Ngai nang hpe maigan amyu ni a matu nhtoi shatai sade ai, nga nna Shi Madu anhte hpe hkang dat mani ai, ngu nna tsun mu ai. Maigan amyu ni dai na jang, kabu gara nga ai hte, Karai Kasang a mungga hpe shagrau sha-a ma ai, n htum n wai asak lu la na san da ai ni nlang hte mung, kam sham mat ma ai. Shing rai Karai Kasang a mungga gaw dai mung ting pri rai wa sai. 50Yuda masha ni chyawm gaw, tara hkungga nna arawng lu ai num ni hte dai mare na agyi ni hpe shadut nna, Pawlu yan Barnaba hpe zingri zingrat di shangun ai hte, shanhte a lamu ga jarit na shaden kau mu ai. 51Shan gaw tinang a lagaw na nhpu shanhte hpang maga ahpu kau da nna, Ikoni mare de du ma ai; 52sape ni chyawm gaw kabu gara ai hte, Chyoi Pra ai Wenyi hte hpring nga ma ai.
Karai Kasang a Mungga rai nga ai.

CHYUM MUNGGA DAW 2

SHINGRAN 7:9, 14-17

Ya hti na gaw, Yawhan a Shingran Laika hta na rai nga ai.
Tingnyang a man e nga ai Sagu Kasha gaw sagu rem wa zawn shanhte hpe bau sin na rai nna, asak a hka hpawk du hkra shanhte hpe lam woi madun na ra ai. Ngai Yawhan gaw, masha mungdan shagu hta na mung, baw lakung shagu hta na mung, amyu baw shagu hta na mung, ga amyu shagu hta na mung, kadai n dang hti lu ai unawng uwa kaba hpe ngai mu nngai: dai ni gaw hpraw ai hpun palawng bu hpun nna, tinang a lata hta namhtan hpun lakung lang let, tingnyang a man e mung, Sagu Kasha a man e mung tsap nga ma ai. Shaloi salang langai mi ngai hpe tsun ai gaw: Ndai masha ni rutsang kaba kata na hkrang pru wa nna, tinang a hpun palawng hpe Sagu Kasha a asai hta hkrut jahpraw la ai ni rai nga ma ai. Dai re ai majaw shanhte gaw Karai Kasang a tingnyang man e ningngai nga lu ma ai hte, Shi a Nawku Htingnu hta shani shana Shi hpe daw jau nga ma ai: tiingnyang hta dung ai wa mung, shanhte hpe Shi a nta e nga shangun na ra ai. 
Shanhte gaw hpang de galoimung kawsi hpang gara n hkrum na masai; jan shingna mung, hpa kahtet ai mung shanhte hpe hkra lu na n rai: kaning rai nme law, tingnyang ka-ang e nga ai Sagu Kasha gaw sagu rem wa zawn shanhte hpe bau sin na ra ai rai nna, asak a hka hpawk du hkra shanhte hpe lam woi madum dan na ra ai: Karai Kasang mung shanhte a myi hta na myi prwi yawng hpe tsai hkra katsut kau ya na ra ai.
Karai Kasang a Mungga rai nga ai.

KABU GARA SHIGA

YAWHAN 10:27-30

Ya hti na gaw, Yawhan a Laika hta na Kabu Gara Shiga rai nga ai.
Dai aten hta e, Yesu tsun ai gaw: Nye a sagu ni gaw Nye a nsen madat ma ai rai nna, Ngai shanhte hpe chye nngai; shanhte mung Nye a hpang hkan nang ma ai. Ngai shanhte hpe n htum n wai asak jaw da we ai rai nna, shanhte galoi mung hten bya ai hkrum na n rai; Nye a lata na shanhte hpe kadai mung kashun la ya lu na n rai. Shanhte hpe Nye a lata hta ap ya ai Nye a Wa gaw, yawng hta grau kaba nga ai rai nna, kadai mung Wa a lata na shanhte hpe kashun la ya lu na n rai. Ngai hte Nye Wa gaw langai sha rai nga ai.
Madu a Kabu Gara Shiga rai nga ai.

2022: PASKA LADAW LABAN (3) NA MUNGGA

Yawhan a Kabu Gara Shi-ga hte maren nga jang, Yesu gaw sape ni hpe masum ngu na lang shi a hkum hpe shadan dan ai, nga ai. Shawng na lahkawng lang, hkrung rawt sai Yesu hte hkrum katut ai rai tim, sape ni gaw hpa matut galaw na n chye; shanhte a aprat hte makan bungli, asak hkrung mahkrun, adaw achyen rai, ayai agai rai mat ai zawn hkam sha ma ai. Petru gaw kaga sape ni hpe matut woi awn ai, yawng a ningbaw tai ya ai hpe mu lu ai. Myit kaji garen nga ai sape ni hpe Yesu kalang bai kahkyin shabawn ya ai; shanhte hpe bai shadan dan nna shanhte a bungli madung hpa re ai lam sharai shajaw ya ai: shanhte gaw masha hkan hkwi ai ni, hkrung rawt sai Yesu a lam sakse hkam ya na gaw madung rai nga ai. Yesu gaw Petru hpe ningbaw galaw masat ya ai lam adan sha mu lu ga ai; Yesu gaw Sagu Rem Kaja re ai zawn, Petru hpe dai Sagu Rem arawng aya hte lit magam hpe ap ya da ai: “Nye sagu hpung hpe rem sin bau sin nga u”, nga ai. 

Mungkan e amying gumhkawng lai wa ai masha ni, Abraham Lincoln, Mother Theresa, Pope John Paul II,… ya na Sarabyin Francis, lani lana jang e byin tai wa ai n rai, shaning law law mai kaja ai lailen hkaja shaman shakyang nna, dai mai kaja ai lailen ni a majaw gumhkawng ma ai. Shut yu, kataw yu, dumhprut ai law law lang hkrum katut yu ai hpang, jaw ai, kaja ai maga shanang lu, grin lu ai ni rai ma ai. Sape ni gaw myit daw myit kaji nna nga ma ai. Hpa matut galaw na n chye; shanhte a aprat hpe azat kau ya ai zawn nga hkam sha na ma ai. Zingri sat kau hkrum ai Yesu a lam, bai hkrung rawt ai Yesu shanhte hpe madun dan ai lam, shingran mu nga na ma ai. Petru gaw mi shawng e galaw man ai kanbau magam re ai nga hkwi bungli de sa mat ai; kaga ni mung hkan nang ma ai. Shanhte a shaga la ai lam gaw masha hkwi na matu re. Dai majaw, shana tup shakut tim nga” n lu ma ai. Yesu shanhte kaw du nna Yesu a matsun ga hpe madat nna sumgawn jahkrat yang nga” law law lu la ma ai. 

Hkarang kawng e wan wut da nna nga “kakang da ai wa gaw Yesu re ai lam shanhte yu chye ma ai; nga” law law lu la ai mung Yesu a ga madat ai majaw re ai hpe dum ma ai. Yesu gaw sape ni hpa galaw ang ai n chye; ung ang nga ai aten hta, shanhte hpe prat a mahkrun lam matsun ya ai, shanhte shaga la hkrum ai prat mahkrun de sharai matsun ya ai. Sape ni zawn, anhte mung ruyak kyindut hkrum ai aten hta, manghkang kaba hkrum ai aten hta, hpa galaw na n chye, chyip mak nga hkam sha ai aten hkrum katut chye na ga ai. Yesu gaw anhte a asak hkrun lam re ai. Madu e lam matsun madun ai hpe hkam la chye na ahkyak ai. Myit mada shara n nga ai kaw na nga” law law magawn la lu ai sape ni zawn, yakhkak hkrum ai aten ni hta Yesu a matsun madun ya, lam madun ya na lam, akyu hpyi ap nawng chye ra ga ai. 

Sape ni gaw kuptsup ai kaw du lu na matu, myit daw myit hten ai aten, ung ang ai aten, kam shut ai aten, Madu hpe pyi hprawng shakram da, koi yen da ai aten ni nga lai wa ai. Madu bai hkrung rawt sai lam hpe pyi gau-ngwi ngwi sha chye wa, kamsham wa lu ma ai. Kamsham sai, ngu tim hpyen ni hpe hkrit ai majaw makoi nna mayun mayoi rai nga ma ai. Ningbaw, ngu nna san da hkrum ai Petru pyi gaw ung ang ai aten, hkrit gari ai aten, Madu hpe nyet kau ai aten, hpa n chye galaw hkra re ai majaw nga” hkwi sa ai da. Madu gaw sape ni a gawng kya ai lam hpe chye ya ai. Shanhte Shi hpe shut kau ai lam ni hpe mara n shagun ai. Petru hpe mung mara dat ya nna ningbaw shara hta matut shagrin ya ai: “Ngai a sagu hpung hpe bau sin u; sagu ni hpe sha-hpa jaw ua” nga, masum lang tsun ai. Ra n rawng ai hku Madu hpe tsawra ai lam, kangka ai myit hte tsawra na lam, Petru kaw na ga-sadi masum lang hpyi ai. 

Karai Kasang hte hkrum lu ai, hkrum mai ai shara gaw Nawku Jawng hkrai sha n re: kabu ai aten, yawn hkyen ai aten, ung ang ai aten, makan bungli galaw ai shara, pyaw-hpa hpa n mu lu ai shara, hkraw hkun dik ai shara, kaning re ai aten hte shara kaw rai tim, Karai Kasang hte matut mahkai lu ai. Karai Kasang hte hkrum matut lu jang yawng hpe galai shai wa shangun lu ai. Ruyak jamjau lam lama ma, myit daw myit hten hpa lama ma hkrum katut ai aten hta Si- Du hpe awng dang ai hpang a hkrung nga ai Yesu Madu hpe saw shaga na myit dum ga ai kun?

 Hkum hkrang wenyi akyu amyat kaba lama hkam la lu ai hpang, Madu a mai kaja ai lam hpe sakse hkam dan chye ga   ai kun?

 Yesu Madu gaw sape ni a gawng kya ai lam ni hpe chye madat ya ai; myit galu ai hte aten law law jaw nna shanhte hpe sharai ya ai. Anhte shada myit galu hkam sharang chye ga ai kun?

2022: PASKA LADAW LABAN (3) NA CHYUM LAIKA

PASKA LADAW HTA LABAN 3
May 1, 2022
CHYUM MUNGGA DAW 1

KASA 5:27-32, 40-41

Ya hti na gaw, Kasa Laika hta na rai nga ai.
Dai nhtoi hte hta e, hkinjawng agyi wa gaw kasa ni hpe san let, Nanhte hpe amying dai hte hpa mung hkum tsun mu, ngu nna anhte aja awa hkang da saga ai; nanhte mahtang Yerusalem mare ting e nanhte a sharin shaga lam pri di rai nna, dai wa a asai anhte a ntsa e mara ya na maw nga myit dai, ngu nna shanhte hpe tsun wu ai. Shaloi, Petru hte kasa ni htan mu ai gaw: Masha a ga madat na hta, Karai Kasang a ga mahtang grau madat na ga ai. Anhte a ji wa ni a Karai Kasang gaw nanhte wudang hta jen da sat kau ai Yesu hpe jahkrung sharawt dat nu ai. 
Israela amyu hpe myit malai lam hte mara raw ya ai lam hpaw ya na matu, Du Magam hte Hkye Hkrang la ai Madu shatai na nga, Karai Kasang gaw dai wa hpe Shi a hkra lata hte shagrau tawn nu ai. Anhte mung ndai lam mahkra a sakse ni rai nga ga ai; Shi a Mungga madat mara ai ni hpe Karai Kasang jaw ya ai Chyoi Pra ai Wenyi mung, dai hte a sakse rai nga ai, ngu mu ai.  Dai agyi salang hpawng gaw, kasa ni hpe kayet nna, Yesu a mying hte n sharin n shaga lu na lam hkang da nhtawm shanhte hpe dat dat ma ai. Shanhte chyawm gaw, Amying ningsang ndai a majaw, anhte kaya hkrum na ging nga ga ai, ngu nna myit la ma ai rai nna, kabu gara ai myit hte dai salang hpawng kaw na pru wa ma ai.
Karai Kasang a Mungga rai nga ai.

CHYUM MUNGGA DAW 2

SHINGRAN 5:11-14

Ya hti na gaw, Yawhan a Shingran Laika hta na rai nga ai.
Ngai Yawhan gaw shingran mu ai shaloi lamu kasa unawng kaba a nsen hpe ngai na la nngai; ndai ni mung, dusat amyu mali hte salang ni mung tinyang a grup yin e tsap nga ma ai. Dai ni gaw mun mi hta mun mi, hkying mi hta hkying mi lang law nga ma ai rai nna, shanhte gaw: ‘Sat kau hkrum ai Sagu Kasha gaw, hpung dagu, sutgan, hpaji byeng-ya, n-gun lagaw, arawng sadang, hpung shingkang hte shakawn kungdawn ai hpe hkam la na, ging dan nga ai law, nga nna nsen kaba hte tsun shakawn ma ai. 
Dai hta n-ga, lamu lahta tang na mung, ginding aga ntsa na mung, aga lawu na mung, nammukdara kata na mung, hpan da hkrum ai hkrung mahkrung hte gaw, Tingnyang hta dung nga ai wa hte, dai Sagu Kasha gaw, htani htana prat dingsa, shakawn kungdawn ai, arawng sadang hpung shingkang hte daru magam anga nga u ga law, nga nna shanhte tsun ma ai hpe mung ngai na nngai. Shaloi dusat amyu mali gaw, Amen, nga ma ai; salang ni mung dingnyawm nawku ma ai.
Karai Kasang a Mungga rai nga ai.

KABU GARA SHIGA

YAWHAN 21:1-19

Ya hti na gaw, Yawhan a Laika hta na Kabu Gara Shiga rai nga ai.
Yesu gaw Tiberi nawng makau e sape ni hpe Shi ahkum bai madun dan mu ai. Dai shaloi na madun dan ai lam gaw, ning rai nga ai: Simun Petru hte Marun Ma ngu ai Htawma, Galile mung Hkana kahtawng na Nahtanela, Zebedi a kasha yan hte kaga sape lahkawng rau nga ma ai. Shaloi, Simun Petru gaw, Ngai nga sa hkan na nngai, ngu nna shanhte hpe tsun wu ai. Shanhte gaw anhte mung hkan sa na ga ai, nga ma ai; dai shana shanhte gaw langai mi pyi n lu ma ai. Nhtoi htoi wa yang, Yesu gaw nawng hkingau ntsa e tsap nga ai: rai ti mung, sape ni gaw Yesu re ai n chye ma ai. Dai majaw, Yesu gaw, shanhte hpe, Ngai sha ni e, nanhte shahpa lama ma lu myit ni? ngu nna san wu ai; shanhte gaw, N lu ga ai, ngu nna Shi hpe htan mu ai. Shaloi Shi gaw, Dai li a hkra maga de sumgawn jahkat mu, shaloi lu na myit dai, ngu nna shanhte hpe tsun mu ai. Dai hte maren shanhte jahkrat nna, nga law law wa magawn la lu ai majaw, sumgawn pyi n gang lu ma ai. 
Dai rai nna, Yesu a tsaw ra ai sape gaw Madu she rai nga ai, ngu nna Petru hpe tsun wu ai. Simun petru dai hpe na la jang shi palawng lawai nna, nawng de gan shang wa ai. Kaga sape ni chyawm gaw, hkin-gau hte manga shi lam sha gang nga ai majaw nga hte hpring chyat re ai sumgawn garawt let, li kaji hte du wa ma ai. Shanhte gaw hkarang ntsa de du wa yang, nra wan mang hta, nga kakang da ai hte muk tawn da ai hpe mu ma ai. Shaloi, Yesu gaw, Ya nanhte lu la ai nga hta na la wa marit, ngu wu ai. Simun Petru li hta lung nna, nga kaba latsa e manga shi masum ting rawng ai sumgawn hpe, hkarang ntsa de karawt shalun wu ai. Dai hte wa law timung sumgawn gaw n je ai. Shaloi, Yesu gaw, Wa marit, Jahpawt shat wa sha maru, ngu nna shanhte hpe tsun wu ai. Shi Madu rai nga ai hpe sape ni chye mu ai majaw, shanhte hta na kadai mung, Nang kadai rai nta? ngu nna n san wam mu ai. 
Yesu gaw muk la nna sape ni hpe sa jaw mu ai; nga hpe mung dai hte maren sa jaw mu ai. Yesu Shi si ai ni kaw na bai hkrung rat ai hpang, sape ni hpe Shi a hkum madun dan ai hta na, ndai gaw masum lang ngu na rai nga ai. Ya shanhte jahpawt shat sha ngut jang, Yesu gaw Simun Petru hpe, Yawhan a kasha Simun e, ndai ni tsaw ra ai hta, nang Ngai hpe grau tsaw ra nni? ngu nna san wu ai. Shi gaw, Rai sa, Madu e, ngai Nang hpe tsaw ra nga nngai gaw Nang chye nga ndai ngu nna htan wu ai. Shaloi Yesu gaw, Nye a sagu kasha ni hpe bau nga u, ngu nna shi hpe tsun wu ai. Bai lahkawng lang, Yawhan a kasha Simun e, Nang ngai hpe tsaw ra nga nni? Ngu nna shi hpe san wu ai. Shi gaw, Rai sa, Madu e, ngai Nang hpe tsaw ra nga nngai gaw, Nang chye nga ndai ngu nna bai htan wu ai. Yesu gaw, nye a sagu ni hpe rem nga u, ngu wu ai. Bai masum lang, Yawhan a kasha Simun e, nang Ngai hpe tsaw ra nga nni? ngu nna san wu ai. Masum lang du hkra, Nang Ngai hpe tsaw ra nni? Nga nna shi hpe san wu ai majaw Petru myit yawn nna, Madu e, Nang gaw yawng mayawng hpe chye nga ndai, ngai Nang hpe tsaw ra nga nngai gaw, Nang chye nga ndai, ngu nna htan wu ai. Yesu gaw, Nye a sagu ni hpe bau nga u. Nang hpe Ngai kaja wa teng teng tsun de ga. Nang shabrang nga ai hte yang na a hkum hpe nang dai shingkyit kyit nna, sa mayu ai shara shagu de sa lu ndai: rai ti mung, nang dingla jang chyawm gaw, na a lata yan hpe nang lalam nna, masha kaga gaw nang hpe kyit ya nhtawm, nang n ra ai shara de woi sa wa na rin dai, ngu nna shi hpe tsun wu ai. Shing nga tsun ai gaw, Petru gaw kaning re ai si lam hte Karai Kasang a hpung shingkang shapraw lu na hpe, tau nna tsun ai rai nga ai. Ga dai tsun ngut jang, Yesu gaw, Petru hpe, Ngai kaw hkan nang rit, ngu wu ai.
Madu a Kabu Gara Shiga rai nga ai.