2021:PRAN WAN LADAW LABAN (18) NA CHYUM LAIKA

PRAN WAN LADAW HTA LABAN 18

August 1, 2021

CHYUM MUNGGA DAW 1

Pru Mat Wa ai Laika 16:2-4, 12-15

Ya hti na gaw, Pru Mat Wa ai laika hta na rai nga ai.

Israela kashu kasha ni Egutu mung de nna pru wa ai hpang, lahkawng ngu na shata hta, Sin ngu ai nam mali de du shang wa ai shaloi, dai shawa hpung nlang hte gaw Mawshe yan Arun hpe aput nga ma ai.

Shanhte gaw, Egutu mung e, shat di ni makau e anhte dung nga nna, hkru hkru kat kat muk sha lu nga yang, madu a lata hte si mat yang grau mai ai. Nan chyawm gaw, ndai shawa hpung ting hpe kaw si ai hte sat kau na matu, ndai nam mali de anhte hpe woi wa myit hka, nga nna Mawshe yan Arun hpe tsun ma ai.

Dai rai nna, Madu gaw Mawshe hpe, ngai nanhte a matu lamu de na muk jahtu ya na made ai. Shani shagu shawa masha ni pru sa nna, lani mi sha na matu hkrak hta la na rai ma ai; shing rai, nye a tara hpe shanhte hkan nang na kun, n hkan nang na kun, ngai chyam yu na we ai. Ngai Madu gaw Israela kashu kasha ni aput ai ga hpe na la se ai. Shanhte hpe ning nga nna tsun mu; shana de nanhte sha lu na marin dai. Shaloi ngai nanhte a Madu Karai Kasang rai nga nngai gaw, nanhte chye lu na marin dai, ngu nna, Mawshe hpe tsun wu ai. Madu tsun ai hte maren, shana de u preng ni hkrat nna, dai dap ting hpe ka-up da ma ai. Jahpawt e mung, dai dap grup yin e mari hkrat nga ai.

Dai mari hkoi mat jang, yu mu, dai zaibru jang a ntsa e, hkyen ni zawn dindin re ai baw taw nga ai. Israela masha ni dai hpe mu jang, ndai hpa baw rai nga a ta? nga nna shada da san ma ai, hpa majaw nga yang, dai hpa baw re ai hpe garai n chye ma ai. Dai rai nna Mawshe gaw, Nanhte sha na matu, Madu jaw ai muk gaw ndai rai nga ai, ngu nna shanhte hpe tsun dan mu ai.

Karai Kasang a Mungga rai nga ai.

CHYUM MUNGGA DAW 2

Ehpesu 4:17, 20-24

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, Madu a amying ahkang hte ngai nanhte hpe shadum jahprang ya let, tsun mayu ai gaw; Tara maigan ni zawn, akyu n rawng ai, n sut n ang ai lam ni hta, nanhte ya kaw nna hkum hkawm nga mu. 20Nanhte gaw Hkristu a lam hpe shing rai sharin la yu manit dai n rai. Yesu hta e teng man ai lam nga nga ai hte maren, Shi a nga sat nga sa ai lam hpe nanhte atsawm sha sharin la manit dai, n rai ni? Dai rai jang, shawng na nga sat nga sa ai lam dingsa hpe kau da ra myit dai; marin marit ai lam ni a majaw hkalem hkalau ai hkrum nna, hten magang ra ai gawng shing-yan ding sa hpe raw kau nhtawm, nanhte myit mang ai lam hta masha nnan tai wa ra ai. Ding hpring ai hte chyoi pra ai myit, Karai Kasang a tengman ai kaw nna byin pru wa ai majaw, Madu Karai Kasang, shi ra ai hku hpan tawn da ai gawng shingyan nnan hpe, nanhte hkan dagraw la na marin dai.

Karai Kasang a Mungga rai nga ai.

KABU GARA SHIGA

Yawhan 6:24-35

Ya hti na gaw, Yawhan a laika hta na Kabu Gara Shiga rai nga ai.

Shawa masha ni gaw, Yesu hte Shi a sape ni dai kaw n nga sai hpe chye jang, shanhte mung li ni hta jawn nna, Yesu hpe tam let Kaperna-um mare de hkan du ma ai. Shing rai, dai nawng wora hkran e Shi hpe mu yang, shanhte gaw, Rabai e, nang de galoi du nit ta? ngu nna san mu ai. Yesu gaw, Ngai nanhte hpe gaja wa teng teng tsun made ga, lamik kumla mu ai majaw, nanhte ngai hpe tam ai n rai; muk lu sha nna hkru kat ai majaw sha tam nga myit dai. Hten bya chye ai lusha a matu hkum shaja myit; Masha kasha nanhte hpe jaw lu ai, htani htana asak a matu grin nga ai lusha lu sha na she shaja mu; kaning rai nme law, dai wa gaw Karai Kasang a dazik kap ai wa rai nga ai, ngu nna htan mu ai. Dai majaw shawa masha ni gaw, Karai Kasang myit ra ai hte maren amu bungli galaw lu na matu, anhte gara hku hkan galaw ra a ta? ngu nna shi hpe san yang, Yesu gaw, Karai Kasang myit ra ai hte maren galaw ra ai amu gaw, Shi a shangun dat ai wa hpe kamsham ai lam rai nga ai, ngu nna shanhte hpe htan mu ai. Dai re majaw shawa masha ni gaw, anhte mu lu nna, Nang hpe kamsham na matu, Nang hpa lamik kumla madun dan lu n ta?

Nang hpa amu magam galaw n ta? Shi gaw shanhte sha na matu, sumsing lamu de nna muk jaw mu ai, nga nna chyum laika hta ka da ai hte maren, anhte a ji wa ni gaw nam mali hkan e mana muk lu sha ma ai, ngu nna Yesu hpe tsun mu ai. Shaloi Yesu htan ya ai gaw; Ngai nanhte hpe gaja wa teng teng tsun made ga, Nanhte hpe sumsing lamu de na muk jaw ai gaw Mawshe n rai, Nye Wa she sumsing lamu de na dai kup tsup ai muk nanhte hpe jaw myit dai. Kaning rai nme law, Karai Kasang a muk ngu ai gaw, sumsing lamu de na yu wa nna, mungkan ga hpe asak jaw ai muk rai nga ai, ngu nna shanhte hpe tsun mu ai. Dai rai nna shanhte gaw, Madu e, dai muk anhte hpe galoimung jaw nga mi, ngu mu ai. Yesu gaw, asak jaw ai muk gaw ngai nan rai nga nngai. Ngai hpang de sa ai wa gaw kawsi hkrum na n rai; ngai hpe kam sham ai wa mung, galoimung hpang gara hkrum na n rai. 

Madu a Kabu Gara ai shiga rai nga ai.

x

2021:PRAN WAN LADAW LABAN (18) NA MUNGGA

Zaibru jang e shaning 40 bu hkawm ai Israel amyu masha ni hpe Karai Kasang gaw lamu kaw na manna muk hpe htu jahkrat ya ai; shanhte a matu upreng ni hpe dat da ya ai. Karai Kasang kaw na mau-hpa makawp maga bausin ai lam hpe amyu masha ni lu la ninglen, Karai a hkye hkrang la ai atsam hpe n chye hkap la ma ai. Karai a mai kaja ai lam hpe kamhpa na malai, kawsi hpang gara hkrum ai aten hta Moshe hte Karai Kasang hpe aput a-ngun ngu ma ai. Anhte ni mung maren sha, yakhkak hkrum ai aten hta atsin sha ngu Karai a bausin lanu lahku ai lam hpe kamhpa na malai, madai aput nna aten jahtum kau chye ga ai.

Muk hpe shalaw jahtam nna jahkru shakat la lu ai masha ni mung, ntsa lam, hkum hkrang a akyu ara na matu sha myit dum nna, Yesu hpe hkye hkrang la ai madu hku n chye hkap la ma ai. Hkum hkrang a matu mau-hpa hku sha-hpa jaw ya ngut ai hpang, shawa masha ni hpe wenyi lam de gaungwi ngwi sit sa woi ai Yesu hpe masha ni gaw shanhte myit mada ra sharawng ai ningbaw shatai mayu ma ai. Hpyen gasat jaubu shatai mayu ma ai. Yesu gaw dai mahkam kaw na hprawng yen mat ai. Shawa masha ni Yesu hpe hkan tam mu ai aten hta Yesu shanhte hpe tsun ai, “Nanhte gaw lamik kumla hpe mu ai majaw ngai hpe tam ai n rai; kan hkru lu ai majaw sha ngai hpe tam mi ai”, nga ai. Dai majaw Yesu tsun ai, “tsu mat yat mat lu ai sha-hpa hpe hkum tam mu; sha nna n si lu ai, Masha Kasha e jaw ya na asak muk hpe mahtang tam mu” nga ai.

Anhte mung maren sha, Karai Kasang hte matut mahkai jinghku hku ai lam hta, wenyi a apu asi law law si wa lu na matu akyu hpyi na malai, ja lungseng awng mayu ai, hpaga awng mayu ai, machyi makaw hte manghkang ni kaw na lawt lu na lam, hkum hkrang a akyu ara a matu mahtang malawng akyu hpyi chye ga ai. Lu la ai, ngu, n hkam sha jang aput angun mahtang tsun chye ga ai n rai a hka! Makam masham bungli hta Karai Kasang hte hpaga ga ai myit masa hpe kau da nna, Karai Kasang grau chye chyang tsawra lu na lam; myit masin wenyi a atsam ningja ni prut ja wa nna, masha law law hpe akyu jaw lu na lam mahtang grau akyu hpyi shaja ra ga ai n rai a hka!

“Kawa Karai e jaw ai sha-hpa majing, sumsing lamu na yu hkrat ai muk, ask jaw ai muk” a lam na la ai shawa masha ni gaw, “Muk dai anhte hpe jaw rit” ngu, hpyi ma ai. Shaloi Yesu htan tsun ai, “Ngai gaw asak muk rai li ai; ngai kaw du sa ai masha kawsi ai galoi n hkrum na, ngai hpe kamsham ai wa hpang gara ai galoi n hkrum na” nga ai. Shawa masha ni gaw hkum hkrang a matu, ndai dinghta prat na akyu amyat na matu sha hpyi ma ai. Yesu shi jaw ai muk gaw shi a hkum nan rai nga ai.

Yesu gaw kamsham ai ni hpe shi a hkum sai shan hte nan jaw sha ai, bau ya ai. Shi jaw ai sha-hpa majing hte lu-hpa majing hpe lu sha mai hkra lajang da ai gaw Chyoi Pra Hkum Sakramentu rai nga ai. Chyoi Pra Hkum hku nna mung, shi a mungga hku nna mung, kamsham ai ni hpe wenyi a lu-sha jaw ya ai. Hkum shan a sha-hpa sha dat yang, dai sha-hpa gaw sha ai wa a hkum sai shan tai wa ai. Yesu jaw ai sha-hpa hpe hkap sha ai ni hta Yesu hpe anhte a adaw ashan shatai la ai n rai; sha ai wa hpe mahtang, Yesu a adaw ashan tai wa ai, mau-hpa sha-hpa n rai a hka! San Pawlu mung, “asak ningnan” ngu ai hpa hpe tsun ai lam mahtai jaw ya ai. Hkristu Yesu a adaw ashan tai wa ai masha gaw asak ningnan lu la ai majaw, masha ningnan, myit masin ningnan tai ra ai; mara hte hka mat nna Karai e chyaloi nhkoi kaw na sing da ya ai, chyoi pra san seng ai, mai kaja ai lailen hte hpring ai asak aprat gawgap ra ai lam shadum jahprang ya ai.

2021:PRAN WAN LADAW LABAN (17) NA MUNGGA

Dinghta ga ntsa, malu masha jan hkra lu sha ai ni nga ai zawn, kade shakut nna makan bungli galaw tim, kawsi hpang gara hkrum ai ni law la nga ma ai. Hpaji madang kade rawt jat wa tim, mungkan masha ni a matsan mayan kawsi hpang gara ai manghkang hpe tang du hkra n hparan ya lu ai. Kaja wa gaw mungkan masha ni hkru kat daw malu masha galoi mung nga ai. Shada gam garan sha ai ladat n jaw ai, marin lawhpa myit, gam garan jaw hkat n kam ai majaw kawsi hkrum ai ni law hta law grau wa nga ai mungkan she rai nga ai. Chyum Laika hta muk shalaw jaw ai; muk sha ai ni hkru kat lu ma ai, ngu ai gaw Messiah du sa ai ladaw a kumla rai nga ai. Myihtoi kaba Eliya a bungli hpe shachyaw gun hpai ai myihtoi Elisha gaw muk tawng 20 hte masha marai 100 hpe hkru kat hkra jaw sha lu ai. Hkye La Madu Messiah e galaw na, lu sha grung ai aten du na lam hpe tau nau madun dan ai kumla rai nga ai.

Yesu muk hpe shalaw jahtam ai hta, Shi gaw myihtoi ni tau nau tsun da ai, sha-hpa n taw n tsang lu mai ai ladaw, shi hkum nan Messiah re ai lam hkrang shapraw dan ai rai nga ai. Yesu muk shalaw nna mungga madat ai ni hpe hkru kat hkra jaw sha na kadai n myit mada ai; kadai e mung n hpyi shawn ai. Mungga madat ai ni kawsi na ma ai, ngu, Yesu shi myit dum ya, tsang ya ai majaw re. Hkrum hkrang a matu sha-hpa jaw ya ai hpang, wenyi a matu sha-hpa majing hpe chye madat hkap la lu na lam hkyen lajang ai lam re.

Muk shalaw ya ai lam gaw kaman, hpa n nga ai kaw na muk hpan ya ai n rai; lu mai ai, nga ai muk tawng (5) hte nga (2) hpe akyu jashawn nna shaman dat ai shaloi, masha hkying lam sha hkru daw shalaw jahtam ya ai. “Shani shanang anhte hta ra ai lu-sha, dai ni anhte hpe jaw rit” ngu, akyu hpyi ga yang, lamu kaw na manna muk marang htu jahkrat ya ai zawn di ai n rai. Karai a mau-hpa hku nna shaman ya ai_ akyu hpyi ai wa hpe myit masin wenyi hkam kaja ai chyeju, sawn shen lu ai myit a atsam, galaw gwi dawdan gwi ai, hkamjan lu ai nden ja myit, tinang shakut nga ai hta garum madi shadaw lu ai manang kaja shangun dat ya ai, ...ndai zawn hti n dang hkra law la ai atsam marai hte mabyin ni hpe Karai e shaman ya ai a marang e, awng dang ai kaw du lu ai rai nga ai.

Elisha mung, Yesu mung, kawsi hkrum ai ni hpe “Nanhte hkum nan garan jaw gam jaw mu” nga ai. Dinghta ga e, grup-yin e kawsi hpang gara hkrum ai ni galoi mung nga nga na re. Anhte hta sutgan jan hkra lu sai, sha-hpa jan hkra mahkawng da sa ga ai, ngu kadai n tsun na ma ai. Rai tim, ra kadawn ai ni a hkrap madai nsen hpe na ai majaw jawm garum ga yang, tinang pyi n lu n lawm hkrit tsang dum nga ai kaw na lu ai, byin mai ai daram gam jaw dat ai. Rai tim tinang hta hkang n hkang ai lam dum na ga ai. Gam jaw alu jaw ai ni gaw jaw na galoi mung byin mai nga ai. N lu ai, ngu nna alu n bang, gam jaw garum ya n kam ai ni a matu, gam jaw na gambum galoi n lu na re. Shing rai n gam jaw gwi ai ni hta jan hkra mahkawng lu ai lam mung n nga na re. Muk tawng (5) hte nga lahkawng sha lu ai ma kasha gaw Andrew shi kaw na hpyi ai shaloi yawng hkra jaw kau ai. Dai hpe Madu e shaman dat ai shaloi sha n ma hkra law htam wa ai. Ma kasha dai n hkraw ya ai rai yang, Yesu gaw dai mau-hpa muk shalaw jaw ai amu n galaw byin na re.

San Pawlu mung ning nga shadum ai: “Tingkyeng akyu tam ai myit hpe kau da nna, shada n-hpaw n-ya gam jaw gam ya hkat mu” nga ai. Langai sha re muk tawng jawm sha ai ni gaw Hkristu hta langai sha tai wa ai; langai sha re ai makam masham hte langai sha re ai myit mada lam hpe lu la ga ai, nga ai. Ndai dinghta ga na akyu amyat, hpang na prat a matu hpa akyu n rawng nga ai. Langai sha re ai myit mada lu ai lam gaw hpang na prat hta n htum n wai, hkrap madai nsen n nga ai, kuptsup ai tsawra myit hta hpawng de nga lu ai asak aprat hpe myit mada ai lam rai nga ai. Tsawra matsan dum hkat chye ai, garum shingtau hkat chye ai lam gaw jet ai Hkristan nga-sa lailen, shaga la hkrum ai lam a aprat mahkrun re ai lam, San Pawlu matsun ya ai.

2021:PRAN WAN LADAW LABAN (17) NA CHYUM LAIKA

PRAN WAN LADAW HTA LABAN 17

July 25, 2021

CHYUM MUNGGA DAW 1

2 Hkawhkam 4:42-44

Ya hti na gaw, Hkawhkam laika lahkawng hta na rai nga ai.

Bala-shalisha kaw nna masha langai mi gaw, Karai Kasang a masha wa Elisha hpang de sa du nna, shawng ngai ai muk-yaw mam hte galaw ai muk tawng hkun hte, nlung nnan sa jaw wu ai. Shaloi Elisha gaw, shawa masha ni hpe karan jaw mu, ngu wu ai. Shi a ali ama chyawm gaw, ndai gaw ngai masha latsa hpe kaning di karan jaw lu na rai ta? ngu nna htan yang, Elisha gaw, She karan jaw mu; Madu Karai Kasang Wa tsun ai: shanhte sha lu nna, naw ngam nga na ra ai, ngu nna dai ali ama hpe tsun wu ai. Shaloi dai ali ama gaw masha ni a man e karan tawn nna, shanhte sha ngut jang, Madu a ga hte maren shahpa naw ngam nga ai.

Karai Kasang a Mungga rai nga ai.

CHYUM MUNGGA DAW 2

Ehpesu 4:1-6

Ya hti na gaw, Ehpesu masha ni hpang de San Pawlu shagu dat ai laika hta na rai nga ai.

Karai Kasang nanhte hpe shaga la manit dai hte maren, Shi ra sharawng ai lam hta nanhte gingdan ai hte hkawm sa lu na matu, Hkristu Madu a jaw e ngai bawng dung ai wa Pawlu gaw, nanhte hpe shadut jahkat made ai.

Dai rai nna, myit grit nem ai hte sumnung shingdi ai lam hpe shatup nga mu; myit galu kaba nga nna, shada da a n-gun kya ai hpe tsawra ai myit hte hkam sharang la mu. Chyoi Pra ai Wenyi jaw ya ai myit hkrum myit ra ai lam hpe, ngwi pyaw simsa ai makyit sumri hte shangang shakang na matu shakut shaja nga mu.

Nanhte hpe shaga la ai shaloi,myit mada shara langai sha de shaga la manit dai hte maren, hkum hkrang langai sha hte Wenyi langai sha, kashin kamun lam langai sha rai nga ai; yawng mayawng a Kawa ngu ai Karai Kasang mung, langai sha rai nga ai. Shi gaw yawng mayawng a ntsa e up nga nna, yawng mayawng hta chyam wa ai hte lanu lahku ya nga ai.

Karai Kasang a Mungga rai nga ai.

KABU GARA SHIGA

Yawhan 6:1-15

Ya hti na gaw, Yawhan a laika hta na Kabu Gara Shiga rai nga ai.

Yesu gaw Tiberi ngu ai Galile nawng wora hkran de rap sa wa ai. Machyi makaw hkrum ai ni hta shi galaw dan ai lamik kumla ni hpe mu ai majaw masha wunawng kaba shi kaw hkan nang ma ai. Shaloi Yesu gaw bum de lung wa nna, Shi a sape ni hte rau dung nga ai. Dai aten hta Yuda masha ni a Shalai Dat ai poi ni wa sai. 

Yesu mada yu nna, masha wunawng kaba Shi kaw sa  wa ai hpe mu yang, Shi gaw Hpilip hpe, ndai ni sha na muk anhte kanang na sa mari na i? ngu nna san wu ai. Shing nga san ai gaw, Hpilip hpe chyam yu na matu rai nga ai. Hpilip gaw, gumhpraw lahkawng tsa a matu mari timung, masha hkum shagu, kachyi mi hpra, sha na pyi law na n rai, ngu nna htan wu ai. Shaloi, Shi a sape ni hta na Simun Petru a kanau Andre gaw, muk-yaw mam hte galaw ai muk tawng manga hte, ‘nga’ lahkawng lu ai lasha ma langai mi nang e nga ai; rai timung, ndai daram law ai masha ni a matu, kanang dang law na rai ta? ngu nna tsun dan wu ai.

Yesu gaw, masha ni hpe dung nga shangun mu, ngu mu ai. Dai yang e, tsingdu mung htat nga ai. Shingrai lasha hkying manga daram dung nga ma ai. Shaloi Yesu gaw, dai muk tawng ni hpe la nna, shakawn kungdawn nhtawm, dung nga ai ni hpe karan jaw wu ai; dai hte maren, nga hpe mung shanhte ra ai daram karan jaw mu ai. Shanhte sha hkru jang, Yesu gaw, Hpa mung n mat u ga, ngam ai ahkyep alep ni hpe hkan hta la mu, ngu nna, Shi a sape ni hpe tsun mu ai. Sape ni hkan hta la nna, dai muk tawng manga hta na, sha ai ni ngam ai ahkyep alep, mung shi lahkawng hpring tup lu la ma ai. Dai re ai majaw, Yesu madun ai lamik kumla hpe shawa masha ni mu jang shanhte gaw, gaja wa teng teng ndai wa gaw mungkan ga de du sa ai myihtoi rai nga ai, nga ma ai. Dai masha ni gaw, Shi hpe adip la nna, hkawhkam shatai na maw nga ai hpe, Yesu chye ai majaw, Shi hkrai sha dai bum de hprawng lung mat wa ai.

Madu a Kabu Gara shaga rai nga ai.

2021:PRAN WAN LADAW LABAN (16) NA MUNGGA

Amyu masha langai, mungdan langai rawt jat galu kaba wa na matu, “ningbaw kaja” ngu ai teng sha ra ahkyak ai. Kade kaja ai htung tara masat maka nga ai rai tim, ningbaw kaja n lu jang dai amyu masha ni, dai mungdan masha ni hta kawsi hpang gara ai masha ni law na, machyi makaw law na, hkawm sa hkawm wa matut mahkai yak na, majan hte mya lu mya sha ai, lagu lagan ai ni law na rai nga ai. Anhte a mungdan na yakhkak ai lam ni hpe yu nna kaja ai mung-up Du/ningbaw kaja kade ra ahkyak ai lam hpe dum ga ai.

Israel amyu sha/mungdan hpe woi awn ai ningbaw gaw hkawhkam rai nga ai. Dai majaw, Hkawhkam hpe “Sagu-rem hkawhkam” ngu ai rai nga ai. Hkawhkam hta lai nna amyu masha/mungdan masha ni a ntsa e gawn reng ai, ahkaw ahkang kaba ai ni gaw jau ni rai ma ai. Mung Du hkawhkam hte jau ni gaw tinang nang a lu lawm lam, nga pyaw lam hpe sha tam nna mungchying sha ni a hkrap ngu hkrap ngoi madai ai nsen hpe n madat ya ma ai majaw, Yeremiah gaw dai sagu rem ni hpe daru sharin ai. Shanhte hpe Karai e kau da nna Karai e myit dik ai sagu-rem kaja, kuptsup ra n rawng ai sagu-rem kaja hpe jaw ya na lam, myihtoi htoi ai rai nga ai.

Dai kuptsup ra n rawng ai sagu-rem kaja gaw Hkawhkam Dawi a amyu matu kaw na prut pru na lam, Yeremiah myihtoi htoi da ai ga, Yesu hta dik wa tup wa ai lam, Kasa Marku madi madun ai. Yesu gaw shawa masha ni, kau da hkrum ai ni, matsan masha ni, machyi makaw hkrum ai ni, nat shung ai masha ni, mara hta lup taw ai ni, ndai zawn, daw hten ai, wun-ma kap ai, jung ai chyana ai sagu ni hpe lakawn ai, alak rai matsan dum lanu lahku ai wa rai nga ai. Sape Shi-lahkawng hpe mung, Yesu shi a myit masa bang ya nna grau kaji kadun ai ni hpang de shangun dat ai. Tinang a akyu amyat a matu n rai; ra kadawn ai ni a akyu amyat a matu shangun dat hkrum ma ai.

Karai Kasang gaw, Ga-shaka Dingsa kaw na sagu-rem aya lu ai Du/ Hkawhkam/ Jau ni hpe Nawku Htingnu hte rau hpya run kau nna, Ga-shaka Ningnan a sagu-rem ni hpe lata san da ai. Petru lunghkrung hta gawde da ai Nawku Hpung na sagu-rem ni rai ma ai. Dai majaw, jau/sara ni, Karai a magam gun ai ni gaw tinang a akyu amyat tam ai ni n rai; tinang dawjau ai hpung masha ni a akyu ara, shanhte hpe tsawra matsan dum chye ai ni rai ra ma ai. Tinang a akyu amyat a matu baw nawng ai ni, hpung masha ni a matsan mayan hkrap ngu hkrap ngoi ai nsen hpe n madat ai hpung woi hpung awn ai ni gaw Yeremiah e sadi jaw ai hkrum ai ningbaw ni hpa tai wa na rai ma ai.

Kaja ai sagu-rem wa gaw tinang a akyu amyat hpe n tam ai; sagu hpung a matu salat hkaw sai htaw nna asak nawng kau ai Hkristu Yesu nan re ai lam, San Pawlu madi madun ai. Tinang machyi hkam asum hkam nna sha, hka bra nga ai shinggyim masha ni hpe kahkyin la lu ai, simsa ai lam majing jaw ya lu ai, nga ai. Shinggyim uhpung uhpawng ni hta shai hkat gang hkran hkat ai lam hti n dang hkra law la ai_ amyu ga, myit jasat, makam, lu su matsan, ...kade she shai hkat. Hkristu hta sha kahkyin gumdin mai ai rai nga ai. Dai majaw, Yesu gaw yawng a “simsa lam” rai nga ai.

2021:PRAN WAN LADAW LABAN (16) NA CHYUM LAIKA

PRAN WAN LADAW HTA LABAN 16

July 18, 2021

CHYUM MUNGGA DAW 1

Yeremia 23:1-6

Ya hti na gaw, myihtoi Yeremia a laika hta narai nga ai.

Nye a udat shara hta sha nga ai sagu hpung ni hpe jahten shabra kau ai sagu rem ni gaw katut sha na mara ai, nga nna Madu tsun ai. Dai Majaw, Israela a Madu Karai Kasang gaw, nye a amyu masha ni bau nga ai sagu rem ni hpe sha-ang nna, ning nga ai; Nanhte gaw nye a sagu hpung hpe atsawm sha n woi awn ai hte shanhte hpe shabra kau nna, shaden kau mu ai majaw, nanhte a n hkru ai amu hte maren, ngai nanhte hpe teng teng ari dan jaw na ra ai, nga nna Madu Karai Kasang Wa tsun ai.

Rai timung, ngai mungdan kaga de shaden kau ai, nye a sagu ni naw ngam nga ma ai; dai ni hpe ngai shinggyin la nna, tinang a udat shara de bai woi wa na nngai: dai yang e shanhte mayat maya wa nna, law htam wa na mara ai. Shanhte hpe bau sin na sagu rem ni, ngai shanhte a ntsa tawn da nna, shanhte htawm hpang de hkrit kajawng nna mak mat na nrai; langai mi pyi mat mat na n rai; nga nna Madu tsun nga ai.

Madu Karai Kasang ning nga ai; Yu u, Dawi a matu ‘Ding hpring ai makrung, ngai shatut na aten du na ra ai, dai wa gaw hkawhkam tai nga nna, hpaji byeng-ya hte uphkang na hte, dai mungdan hta e ding hpring ai hku dawdan na ra ai. Shi a prat hta Yuda mung hkye hkrang la ai hkrum nna, Israela gaw asim sha nga lu na raai. Dai wa hpe anhte a Ding Hpring Madu, ngu nna shamying ya na mara ai.

Karai Kasang a Mungga rai nga ai.

CHYUM MUNGGA DAW 2

Ehpesu 2:13-18

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, shawng e nanhte maigan ngu ai ni gaw, Karai Kasang a mungdan hte tsan gang nga myit dai. Ya chyawm gaw, Hkristu Yesu hte matut mahkai hkrum nna, Shi a asai a marang e, nanhte ni wa manit dai. Dai Hkristu Madu gaw anhte a ngwi pyaw simsa ai lam rai nga ai; kaning rai nme law, Tara maigan masha ni hte Yuda masha ni, ndai amyu lahkawng hpe langai sha shatai let, an lahkawng hpe madin zawn jahka kau ai n dawng n yawt ai lam hpe Hkristu gaw sharun kau nu ai. Jep ai tara a matsun maroi hte htet da ai upadi ni hpe, shi a hkum shanhte shi htawm kau sai. Shingrai, shawng e amyu lahkawng rai nga ai ni hta na, masha langai sha hpe shi hpan tawn da nna, ngwipyaw simsa ai hpe shabyin da nu ai. Dai Hkristu gaw udang ntsa e n dawng n yawt ai lam hpe shaza kau ya nna, amyu lahkawng hpe Karai Kasang a matu hkum hkrang langai sha shatai da ai hte, Karai Kasang hte an lahkawng hpe htinglu htinglai ya wu ai. Shingrai, Hkristu Madu sa du nna, tsan gang nga ai nanhte hpe mung, ni nga ai ni hpe mung, ngwi pyaw simsa ai lam a kabu gara shiga hkaw tsun dan mi ai. An lahkawng gaw dai Hkristu a marang e , Wenyi langai sha hta e, Kawa hpang de shang wa na lam lu la saga ai.

Karai Kasang a Mungga rai nga ai.

KABU GARA SHIGA

Marku 6:30-34

Ya hti na gaw, Marku a laika hta na Kabu Gara Shiga rai nga ai.

Kasa shi lahkawng hte gaw, Yesu kaw bai du wa nna, shanhte galaw sai lam mahkra hte sharin shaga ai lam yawng, shi hpe tsun dan mu ai. Dai rai nna, Yesu gaw, Nam mali kata na machyi shi mai shara de nanhte hkrai sa nna, loi mi ban sa la mu, ngu nna shanhte hpe tsun mu ai. Kaning rai nme law, sa sa wa wa rai nga ai ni gaw law la ma ai majaw Yesu hte shi a kasa ni, shat sha na ahkying pyi n lu ma ai. Dai rai nna, shanhte gaw nam mali na machyi shim ai shara de li hte sa wa ma ai. Rai timung, masha ni gaw shanhte pru sa wa ai hpe mu mada ai majaw, law law wa shanhte sa wa ai shara hpe chye wa ma ai. Dai majaw, mare shagu hkan na ni hkarang lam hku e gat sa wa nna, Yesu hte Shi a kasa ni a shawng e sa du ma ai. Shingrai, dai li kaw nna Yesu pru ai shaloi masha wunawng kaba hpe Shi mu mada lu ai. Shanhte gaw, sagu rem wa n lawm ai sagu hpung ni hte bung nga ma ai majaw, Shi shanhte hpe matsan dum nna, law law wa sharin shaga ya mu ai.

Madu a Kabu Gara Shiga rai nga ai.

2021:PRAN WAN LADAW LABAN (15) NA MUNGGA

Karai a magam gun ni (jau/sara ni), kaning re ai myit jasat hte magam gun ra ai lam myit yu shangun ai. Dingdung mungdan masha Amo gaw sagu rem amu hte labri hpun hkai nna kanbau makan galaw sha nga ai masha; Karai Kasang e shi hpe shaga la nna Dingda mungdan (Samaria) maga de sa myihtoi htoi shangun dat hkrum ai. Shi hkum nan kam tim n kam tim, bai, shi a mungga madat la na masha ni na ra tim n ra tim, Amo gaw hkaw tsun shadum jahprang ra ai. Dingdung mundan na masha ni gaw sut lu nga mai ai aten re ai majaw, Karai Kasang hpe malap mali di kau ma ai. Shada dip lu dip sha ai, matsan masha ni hpe n gawn n sawn di ai; nat-tawn nat-ra ni law wa ai. Ndai zawn makam masham hte akyang lailen htenza nga ai ni hpe chyasam masha re ai Amo gaw sa hkaw tsun ra ai. Amo hpe ja ja ninghkap ai ni gaw Betel mare na jau ni rai ma ai. Amo hkaw tsun ai majaw masha ni myit malai shajang ai rai yang, Betel mare nawku htingnu e jawjau ai jau ni lu lawm lam, shang gumhpraw yawm mat na rai nga ai. Dai jau ni gaw Karai hpe nawngjau ai rai tim, shara law law e nat hpara shaje ni hpe jawjau ai alai hpe hpa n nawn ya ma ai. Dai majaw Amaziah gaw, Amo hpe gawt shingtsang ai rai nga ai.

Kabu Gara Shi-ga hta, Sape 12 hpe Yesu shangun dat ai; Karai a mungdan du magang sai lam, myit malai lu nna dai Kabu Gara Shi-ga hpe hkap la na sape ni hkaw tsun ra ma ai. Sakse tai na matu, machyi masha ni hpe shamai lu ai atsam, nat ni hpe shaden kau lu ai atsam shanhte hpe jaw dat ai. Sape ni gaw shangun dat hkrum ai ni rai ma ai. Tinang nang a akyu amyat hkam sha na lam n rai; kanbau bungli galaw sha na matu shangun dat ai n rai. Ja gumhpraw hte kaga arung arai ni hpe madung kamhpa ai lam n galaw mu ga, Yesu shanhte hpe ginhtim da ai. Gumhpraw jan n gun na lam, a’tsang a’wang hkawm sa ra ai lam; shanhte lu sha na hte lang ra ai baw hpan ni hpe masha ni e hkap jaw madi shadaw ya ra na lam, matsun dat ai.

Karai magam gun ai ni kadai n nga, kanbau bungli galaw sha ai myit n mai rawng ai lam sharin ya ai. Mungga madat la ai ni gaw Karai magam gun ai ni hpe daw jaw, hkap tau garum ya ra ma ai. Ja gumhpraw atsam hpe madung n shatai ai, Karai e jaw ya ai bausin makawp maga cheju hte wenyi hte seng ai atsam ningja ni hpe madung kamhpa nna sasana amu galaw ra ai lam shadum ya ai.

Karai a magam gun ni gaw machyi masha ni, nat e yubak jaw hkrum ai ni hpe shalawt dat, shamai shatsai ai amu hpe galaw nan galaw ra ai lam shadum ya ai.

2021:PRAN WAN LADAW LABAN (15) NA CHYUM LAIKA

PRAN WAN LADAW HTA LABAN 15

July 11, 2021

CHYUM MUNGGA DAW 1

Amo 7:12-15

Ya hti na gaw, Myihtoi Amo a laika hta na rai nga ai.

Hkinjawng wa Amazi gaw Amo hpe tsun ai gaw; Myihtoi wa e, Yuda mung de hprawng wa nu; dai yang e myihtoi htoi nna, asak bau nga u. Bahtela shara hta chyawm gaw, myihtoi hkum htoi et; dai gaw hkawhkam wa a chyoi pra ai shara hte, wunpawng htunghking rai nga ai, ngu nna tsun wu ai. Dai rai nna, Amo shi hpe htan ya ai gaw; Ngai gaw myihtoi wa n rai nngai; myihtoi kasha mung n rai nngai; yam nga rem nna, lakum si lajang ai wa rai nga nngai. Madu Karai Kasang mahtang, sagu hpung de nna ngai hpe lata nna, sa su; nye a amyu Israela hpe myihtoi htoi u nga nna ngai hpe hkang dat ai.

Karai Kasang a Mungga rai nga ai.

CHYUM MUNGGA DAW 2

Ehpesu 1:3-14. (3:1-10)

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, anhte a Madu Yesu Hkristu a Kawa rai nga ai Karai Kasang kaw hkungga shakawn a nga nga u ga: Shi gaw sumsing lamu lahta tang e, nsa wenyi hte seng ai shaman ya ai lam amyu myu hte, Hkristu hta e anhte hpe shaman ya mi ai.

Anhte gaw tsawra ai hte hpring tsup let, shi a man e chyoi pra ai ni hte maren rawng ai ni tai lu hkra, ginding aga garai n lat kaw nna, Shi anhte hpe Hkristu hta e lata la mani ai.

Shi a tsawra htum ai kasha hta e, anhte hpe jaw dat mi ai chyeju ningsang a lam hpe, anhte yawng shakawn kungdawn u ga, shi a shawang myit sharawng awng nga ai hte maren, Yesu Hkristu a marang e Shi a kasha ni tai lu hkra, Shi anhte hpe shawng nnan e san da mmani ai.

Dai Hkristu Yesu hta e anhte hkye hkrang la ai hkrum nna, Shi a asai hkaw kau ya ai a marang e anhte a shut hpyit mara raw dat kau ya ai akyu hpe lu la saga ai: dai daram Karai Kasang gaw shadawn n dang ai hku chyeju n hpaw n-ya anhte hpe karan jaw ya mani ai.

Karai Kasang gaw shawng npawt kaw nna, Shi a tsawra shawang myit hte Hkristu hta e yaw shada ai hte, madat ai aten du wa yang dik wa na ra ai, Shi a mungsung lam hpe anhte chye chyang wa lu na matu, Shi hpaji ningsang anhte hpe jaw ya mani ai. 10Dai mungsung lam chyawm gaw sumsing lamu tang na lam ni hpe mung, ginding aga na lam ni hpe, nga manga hte hpe, Hkristu hta e langai sha tai hkra gumhpawn tawn da na ra ai lam rai nga ai.

*(Grau galu ai hku hti jang, lawu na tsun matut na)

Kaja wa, dai Hkristu hta e anhte lata la ai hkrum nna, Karai Kasang a sali wunli amyu tai wa saga ai. Kaning rai nme law, Shi a shawang myit bawng hkut da ai hte maren, yawng mayawng a ntsa e up hkang nga nna lam mahkra hpe lajang da nga ai Karai Wa gaw, anhte a amyu hpe lata la mani ai. Dai rai nna, Shi myit ra ai hte maren, Hkristu garai n du yang, shi hpe shawng myit mada nga ai ni, anhte tai wa nna, Karai Kasang a hpung shingkang hpe shakawn kungdawn nga lu u ga, shi shawng nnan e anhte hpe san da mani ai. Nanhte mung dai Hkristu hta e lata la ai hkrum manit dai. Nanhte gaw hkye hkrang la ai lam a kabu gara shiga ngu ai, teng man ai mungga hpe na yu nna, kamsham manit dai shaloi e, Karai Kasang n dat da ai ChyoiPra ai Wenyi hte dazik shakap da ai hkrum manit dai. Dai Wenyi chyawm gaw, Karai Kasang a hpung shingkang arawng sadang law htam wa u ga matu, Madu Karai Kasang Shi a amyu masha ni hpe hkye mawai la ngut ai shaloi e Shi a sali wunli anhte lu la na lam a masat dingsat rai nga ai.

Karai Kasang a Mungga rai nga ai.

KABU GARA SHIGA

Marku 6:7-13

Ya hti na gaw, Marku a laika hta na Kabu Gara Shiga rai nga ai.

Yesu gaw, Shi a sape shi lahkawng hpe shaga la nhtawm, marai lahkawng yep yep di nna shangun dat mu ai hte, n san n seng ai nat ni hpe dang kau lu na ahkaw ahkang, Shi shanhte hpe jaw dat mu ai. 

Yesu gaw, dai sape ni hpe shadum jahprang let, Daw hkrawng hta kaga, hkrun lam a matu, sha hpa mung, htingba mung, shingkyit hta gumhpraw mung hkum lang mu. Nanhte mgaw hkyepdin din mai ai, rai timung, galai na matu palawng kaga hkum gun myit, ngu nna shanhte hpe shadum dat mu ai.

Dai hta n-ga, Yesu gaw, gara nta hta rai timung, nanhte shang yang, dai mare na pru wa ai nhtoi du hkra, dai nta hta e a nga nga mu. Gara shara hta e rai timung, nanhte hpe n hkap la nna, nanhte hpe n madat mara yang gaw, dai yang na pru wa let, shanhte hpang maga de sakse tai u ga, nanhte a lagaw lahpan hta kap ai ga nhpu hpe, ahpu sharun kau da mu, ngu nna sape ni hpe Yesu tsun damu ai. Shaloi shanhte pru wa nna, masha ni hpe myit malai lu na lam, hkaw dan ma ai; nat ni law law hte hpe shanhte sha den kau mu ai hte, machyi makaw hkrum ai ni law law hpe namman chya ya nna, shamai shatsai ya dat mu ai.

Madu a Kabu Gara Shiga rai nga ai.

2021:PRAN WAN LADAW LABAN (14) NA MUNGGA

Yesu gaw hkye hkrang la ai wa, tinang hpe hkye hkrang la lu ai asak Madu, ngu, hkap la ai kun n hkap la ai kun, ngu ai lam hte seng ai Chyum mungga ni rai nga ai. Karai Kasang hpe kamsham hkap la nawku ai, ngu ai, Israel amyu masha ni gaw tara hte nhtan shai nna mara hta lup nan taw ma ai. Myit malai n hkraw ma ai, gumlau ai; dai gumlau amyu masha hpe Ezekiel hkaw tsun shadum jahprang ai. Shanhte myit malai n lu hkraw ai jahtum hta Yerusalem jahten kau hkrum ai; amyu masha ni mung Babylon de mayam tai na matu woi la hkrum ma ai.

Yesu hkum nan shi a amyu masha ni kaw na praw pru ai, amyu bung ai shada hpe shawng myit malai mungga, Kabu Gara Shiga hkaw tsun ai. Karpena-um hte grup-yin e daju shatai nna hkye hkrang la ai amu galaw hpang ai. Tawng marang mi na ai hpang, shi a buga Nazareth de htang wa ai. Shi a mare buga masha ni hkum nan Yesu hpe n hkap la ma ai_ dai laksama wa a kasha, chyum jawng n lung yu ai masha, madang tsaw hpaji hpa n sharin la yu ai masha, lawu lahta kahpu kanau ni mung hpa mi n laklai ai ni rai ma ai, ... ngu ai hku, Yesu hpe hkye hkrang la ai Madu, Messiah hku n hkap la lu ma ai. Yesu hpe hkye la Madu Messiah hku n hkap la ai ni kadai dai rai ma ta?

Nazareth masha ni zawn, gumrawng gumtawng ai ni, mauhpa lamik kumla ni hpe mu yu na yu ninglen n kamsham ai ni, Mungkan hpaji chye dum ai ni, Chum Laika chye ai, ngu, rai dum ai ni; tara sara ni: shanhte gaw tinang sawn sumri shadawn yu mai ai baw hta lai jan ai wenyi mungkan a lam hpe n kam lu ai ni rai ma ai.

Hkungga nawng jau ai jau ni, tara shadik dum ai hparishe ni: Karai Kasang hte grai ni dum, chyoi pra dum ai ni rai ma ai. Jau mama ni, tara hkaw sara/sarama ni, makam masham uhpung uhpawng hpe woi awn ai ni, ja ja sadi ra ma ai. Mung-up hkawhkam Herod, Pilatu, Du/agyi salang ni: arawng aya lu nna kaga masha ni hpe reng sha ai ni, kadai hpe hpa n nawn, tinang a arawng aya hpe maga mayu ai ni, mungkan sutgan hta manoi ai ni rai ma ai. Yesu hpe Hkye La Madu Messiah hku hkap la ai ni kadai kaning re ai ni rai ma ta?

Sagu rem ai matsan masha ni Yesu shangai wa ai lam hpe shawng chye la sa nawku ai ni rai ma ai. Nga hkwi sha ai ni hte sun hkauna galaw sha ai ni: Malawng gaw matsan masha ni rai ma ai, Sape 12 mung lawm ma ai. Hpaji ninghkring marai masum Messiah hpe hkan tam nna mu la ma ai: hpaji chye ninglen, grau ai mabyin hte grau ai wa hpe hkan tam ma ai. Asuya magam gun kang hta masha Zake-u hte Mahte: makan bungli a majaw shang gumhpraw mahkrun kaja lu ma timung, reng grau ai sutgan, jet ai asak a kumhpa hpe tam ai ni, tinang a arawng aya, lu lawm lam ni hpe asum hkam gwi ai ni rai ma ai. Nikodemus hte Arimathia buga masha Joseph_ amyu htunghking makam masham a rapdaw salang yan rai ma ai: Yesu hpe hkap la ai majaw, kaga rapdaw salang ni, jau ni a n ju n dawng ai lam hpe hkrum na chyalu. Rai tim, Yesu maga tsap ya ding-yang, jahtum du hkra Yesu maga tsap ya ma ai.

Karai Kasang hpe kamsham ai, Hkye La Madu hpe hkap la sai rai tim, jahtum du hkra kangka ai hku hkan nang na matu Karai a atsam chyeju ra ai. Dai Madu hpe hkap la sai, ngu tim, shani shagu na sak hkrung mahkrun hta jaw ai, teng ai, dinghpring ai, tara ai, chyoi pra ai hte n jaw ai, n tara ai, masu magaw ai... ninghtoi amu hte ningsin amu gara hpe lata la na? Dawdan ai lam galaw ra ai. Law law lang, tinang a akyu amyat, pyaw ngawn mayu ai, lu lawm mayu ai nhkan e, kadun ai hku, shut hpyit mara hpe lata la ai; dai gaw Madu hpe nyet kau ai lam rai nga ai. Gawng kya ai shinggyim masha ni, kangka ai hku jahtum du hkra sadi dung na matu, Karai kaw na shaman chyeju, Karai a atsam hkam la ra ai lam, lahkawng ngu na Chyum mungga hta San Pawlu sharin ya ai.

2021:PRAN WAN LADAW LABAN (14) NA CHYUM LAIKA

PRAN WAN LADAW HTA LABAN 14

July 4, 2021

CHYUM MUNGGA DAW 1

Ezekela 2:2-5

Ya hti na gaw, Ezekela a laika hta na rai nga ai.

Dai Wenyi gaw, ngai hta shang nna, shi ngai hpe tsap shangun nngai. Shaloi Madu tsun ai ga hpe, ngai na la se ai. Madu tsun ai gaw; Masha Kasha e, ngai hpe gumlau ai Israela a kashu kasha ni hpang de ngai nang hpe shangun dat nngai. Shanhte gaw, dai ni du hkra, kaji kawa ni hte hpawn, ngai hpe tut nawng e gumlau nna, shut hpyit nga ma ai.

Shanhte a kashu kasha ni mung, myit ja ai hte ngai hpe n kaw n law di ni ai rai nga ma ai. Ngai nang hpe shanhte hpang de shangun nna, nang gaw, Madu ning nga ai, ngu nna shanhte hpe tsun u. Shanhte gaw gumlau ai amyu rai nga nna, madat timung, n madat timung, shanhte hta e myihtoi nga nga ai hpe shanhte chye lu na mara ai.

Karai Kasang a Mungga rai nga ai.

CHYUM MUNGGA DAW 2

2 Korinhtu 12:7-10

Ya hti na gaw, Korinhtu masha ni hpang de San Pawlu shagun dat ai laika lahkawng hta na rai nga ai.

Karai Kasang ngai Pawlu hpe madun dan ai, kaba dik htum shingran lam a majaw, ngai nau wa n gumrawng u ga, ngai hpe abyen na matu, satan a salung sala ngu ai, nye a hkum shan hta ju ai aju ngai hkrum nga nngai; shing rai, ngai, nau wa myit n kaba nngai. Ngai gaw dai hta na lawt lu na matu, Madu hpe masum lang akyu hpyi nga nngai.

Dai rai nna Shi gaw, Nye a chyeju gaw, na a matu ram nga ai; kaning rai nme law, masha n-gun gaw kya ai hte nye a n-gun atsam hkum tsup nga ai, nga nna Madu ngai mhpe tsun ni ai. Dai re ai majaw, Hkristu a n-gun atsam, nye a ntsa e, a up nga u ga, nye a n-gun kya ai lam hta ngai grau nna shakawng nga nngai. Dai rai nna, Hkristu a jaw e hkam sharang ai, nye a n-gun kya ai, asawng asang ai, kyin dut ai, zingri zingrat ai hte, nni nhkri re ai lam ni hta ngai kabu nga nngai. Kaning rai nme law, ngai n-gun kya nga yang, n-gun atsam rawng nga nngai.

Karai Kasang a Mungga rai nga ai.

KABU GARA SHIGA

Marku 6:1-6

Ya hti na gaw, Marku a laika hta na Kabu Gara Shiga rai nga ai.

Yesu gaw Shi a buga de du wa ai; Shi a sape ni mung Shi kaw hkan nang ma ai.

Laban nhtoi du jang, tara jawng hta e shi sharin shaga hpang nga ai. Yesu a ga madat la ai ni malawng maga gaw, myit na kahpra ma ai. Shanhte gaw, Ndai wa gaw dai lam mahkra hpe kanang na lu la a ta? Shi lu la ai hpaji byengya gaw hpa baw rai nga a ta? Shi gaw anhte a laksama wa chyu sha rai nga ai; Maria a kasha hte, Yaku, Yosep, Yuda hte Simun a kahpu kanau mung rai nga ai, n rai ni? Shi a kanu kanau ni mung anhte hte rau nang e nga nga ma ai n rai ni? Nga nna Shi a lam hta myit kataw wa ma ai.

Yesu mahtang, Myihtoi gaw tinang a buga hta, tinang a mayu dama ni hte, tinang a nta hta n rai jang she, arawng lu nga ai, ngu nna shanhte hpe tsun mu ai. Machyi makaw hkrum ai n kau mi a ntsa e lata mara nna shamai ya ai hta kaga, dai yang e hpa magam amu hpe mung, shi n galaw lu ai. Shanhte a n kam n sham ai myit a majaw shi mau nga ai.

Madu a Kabu Gara Shiga rai nga ai.