2019:PASKA LADAW LABAN (2) NA MUNGGA

Chyum Mungga daw langai hta, moi shawng kaw nna nawku hpung hta hkristan masha ni a myit mang jawm pawng ai hpe shadan shaleng ya ai sha n ga, shanhte rau myit hkrum rapra let Madu Yesu a kasa ni hkaw tsu ai hpe kamsham ai hte shada kahpu, kanau tsawra myit, salum n-gin hka ai sha jawm pawng nga nna, san seng sanpra ai uhpung uhpawng langai zawn tinggyeng myit nrawng ai, rau jawm tara shadik nna rau lu, rau sha, rau kyuhpyi let pyaw pyaw zuphpawng nga lai wa sai hpe mung chye lu ai. Shawng na hkristan masha ni a lai akyang hpe yu nna, anhte hpe Hkristu hta sha madung da let kun dinghku hta mung, uhpung uhpawng hta mung, gara hku nga sa ra ai hpe sharin ya ai Mungga mung rai nga ai, Myit hkrum myitra ai lam hta sha Karai a hpung shingkang shadan shaleng lu nga ai. Madu Yesu a kasa ni mung yak hkak ai lam amyu myu a lapran, Karai Kasang a namik kumla amyu myu hte mauhpa amu ni hpe matut manoi shdan dan ma ai.

Yesu gaw Shi bai hkrung rawt na kasa ni a lapran dan dan ai shloi, ngwi pyaw simsa lam Shi jaw ya sai hte maren anhte a kaang e mung, Shi hpe nmu lu ai raitim kamsham ai myit a marang e Shi a simsa lam anhte lu la saga ai. Nmu lu tim kamsham ai gaw alu ma ai nga nna Madu Yesu tsun da sai. Anhte gaw Karai a Chyum Mungga ni mung jahkring hkring na la lu sai, nawku hpung a sharin ya ai makam masham tara ga ni mung sharin hkam la lu sai. Madu Yesu a hkum hte Sai hpe mung Chyoi Pra ai Sacramentu a marang e hkam la lu sai ni rai ga ai majaw kamsham ai lam hta nmai ningra nga ai. Madu Yesu hte rau rai sai ni re majaw lu la sai makam masham hpe n gun atsam hte sakse hkam ai rai ra sai. Madu Yesu hkrung rawt ai gaw anhte a mayak mahkak, jam jau lam ni hpe jahkoi kau, jasim kau ya na matu nre nga ai. Anhte a jamjau ai mayak lam ni gaw makam masham hku yu ga nga yang san seng wa na matu jasan jaseng ya ai lam re sha n ga Karai Kasang ga ndat da ai Sumsing hta myit mada nga na matu rai nga ai.

Si ai kaw nna hkrung rawt sai htani htanaa asak daju Madu Yesu gaw Shi a ahkang aya hpe kasa ni hpe jaw da sai hte maren, kasa ni kaw nna pra hkrat wa sai sape ni hku nna mung, Karai a Mungdan lam hpe n-gup aga hku, amu magam hku mung, shadan shaleng madun ya sai majaw kamsham ai hpung masha ni grau law wa sai. Dai ni anhte ni mung, Kashin Kamun sacramentu hkam la ai shaloi lu da sai ahkang aya hte maren Karai Kasang a Mungdan lam hpe anhte n-gup aga, magam bungli hku, shadan shaleng na lit nga ga ai ni re.

Sawn sum ru mai ai lam: Ngai hkam la lu sai Makam Masham hpe gara hku sakse hkam nga ai kun?

2019:PASKA LADAW LABAN (2) NA CHYUM LAIKA

PASKA LADAW HTA LABAN 2

28 April, 2019

CHYUM MUNGGA DAW

1 KASA 5: 12-16

Ya hti na gaw, Kasa Laika hta na rai nga ai.

Kam sham ai masha nlang hte gaw, myit langai sha hte Sawlumon mying ai jarawp hta zuphpawng nga ai. Masha gale kadai mung shanhte a zuphpawng hta n lawm wam ma ai; mung masha ni chyawm gaw shanhte hpe sha-a ma ai rai nna, kam sham ai numsha lasha hpung kaba, Madu kaw jat bang wa ma ai. Ya, Kasa ni a lata hta lamik kumla hte mauhpa amu law law wa, mung masha ni a man e byin dan nga ai. Dai rai nna, Petru lai sa wa yang, langai ngai a ntsa e shi a shingnip sha pyi hkra u ga nga nna, machyi makaw hkrum ai ni hpe mare lam makau de hpai shapraw, yup ku ni hte panep ni hta tawn da shajang ma ai. Dai hta kaga, Yerusalem grup yin ginwang hkan na mare ni kaw nna mung, masha law law wa machyi ai ni hte nat shang zingri ai ni hpe woi nna, du sa shajang ma ai: dai ni yawng hte gaw shamai shatsai ai hkrum ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

SHINGRAN 1:9-11a. 12-13. 17-19

Ya hti na gaw, Yawhan a Shingran Laika hta na rai nga ai.

Anhte nlang Yesu hte matut mahkai ai hkrum nga ga ai rai nna, ngai Yawhan gaw nanhte a hpu nau wa rai nga nngai: shing rai nanhte a nni nkri, nanhte a mungdan, nanhte shakut sharang ai lam hta mung, ngai hkan lawm nga nngai. Ngai gaw Karai Kasang a mungga hkaw dan ai hte Yesu a matu sakse hkam ya ai majaw, Patmu ngu ai zunlawng hta nga nga nngai. Madu a nhtoi langai mi hta Wenyi a jaw e ngai nawng mat wa ai rai nna, nang mu ai hte maren laika hta ka da u nga nna, nye a shingdu de pahtau zawn ngoi ai nsen hpe ngai na la se ai. Dai ngai hte shaga ai nsen hpe mu lu hkra, ngai kayin yu nngai. Shingrai kayin yu yang ja pyengding sanit hte dai pyengding ni a ka-ang e Masha Kasha zawn san ai wa langai mi hpe ngai mu nngai: dai wa gaw lahkre du ai palawng galu bu hpun nna, sinda hta ja shingkyit kyit nga ai.

Dai wa hpe mu jang, Shi a lagaw nhpang e si ai wa zawn ngai kadawng taw mat nngai. Shi gaw Shi a hkra lata nye a ntsa e mara ya nna, ngai hpe tsun ai gaw: Hkum hkrit et; Ngai gaw Ningshawng Wa mung, Jahtum Wa mung rai nga ai hte, Ahkrung nga ai Wa rai nga nngai. Ngai si mat wa sai rai ti mung, ya e htani htana prat dingsa ngai a hkrung nga nngai: si hkrung si htan mungdan a sumsaw hte katsan ga na sumsaw hpe ngai lang nngai. Dai re ai majaw nang mu lu sai hpe mung, ya byin nga ai hpe mung, htawm hpang de du na ra ai lam hte hpe mung, ka da u, nga ngai hpe tsun ni ai.

Ya hti ai gaw Karai Kasang a mungga rai nga ai.

KABU GARA SHIGA

YAWHAN 20: 19-31

Ya hti na gaw, Yawhan a Laika hta na Kabu Gara Shiga rai nga ai.

Dai laban bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sayang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape ni mung, Madu hpe mu lu yang, kabu gara nga ma ai. Bai, Yesu gaw, Nanhte ngwi pyaw nga myit ga; Nye Wa Ngai hpe shangun dat ai hte maren, Ngai mung nanhte hpe shangun dat made ai, ngu mu ai. Shing nga nhtawm sape ni a ntsa e Shi a nsa kawut nna, Chyoi pra ai. Wenyi hpe hkap la mu; 23kadai a shut hpyit mara hpe raitimung, nanhte raw dat yang gaw, raw mat na ra ai; kadai a shut hpyit mara rai timung, nanhte shagun da yang gaw, dai mara naw nga na ra ai ngu nna shanhte hpe tsun mu ai.

Shing rai Yesu sa du ai shaloi, kasa shi lahkawng hta lawm ai marun ma ngu ai Htawma gaw, shanhte rau n nga ang ai. Dai rai nna kaga sape ni Shi hpe, Anhte gaw madu hpe mu lu saga ai, ngu nna tsun dan mu ai. Shi chyawm gaw, Shi a lata hta hpri hkang hpe ngai n mu, dai hpri hkang hta nye a layung ngai n shawn yu, Shi a garep hta nye a lata n bang yu yang gaw, ngai n kam n sham na nngai, ngu nna shanhte hpe tsun wu ai. Dai hpang matsat ya du jang, shi a sape ni nhku e bai hpawng nga ma ai rai nna, Htawma mung shanhte hte rau lawm nga ai. Chyinghka la da ti mung, Yesu sa du nna, shanhte a ka-ang e tsap let, nanhte ngwi pyaw nga myit ga law, ngu wu ai. Shaloi, shi gaw Htawma hpe, Na a layung nang de ladawn nna, Nye a lata hpe yu yu u; na a lata ladawn nna, nye a garep hta bang yu u; n kam n sham ai myit hpe kau da nna, kam sham nga u, ngu wu ai. Dai rai nna, Htawm gaw, nye a Madu, nye a Karai Kasang rai nga ndai, ngu nna Shi hpe htan wu ai. Yesu gaw, Htawma, nang Ngai hpe mu lu ai majaw kam sham nit dai; n mu lu ti mung kam sham ai ni gaw a lu ma ai, ngu nna shi hpe tsun wu ai. Ndai laika hta n ka da ai lamik kumla kaga law law mung, Yesu gaw Shi a sape ni a man e galaw dan nu ai; rai ti mung, Yesu gaw Karai Kasang a Kasha Hkristu rai nga ai hpe anhte kam sham nna Shi a amying ningsang a marang e asak hkrung ai lu la myit ga, nga nna, ndai hte wa ka tawn nga ai.

Ya hti ai gaw Madu a Kabu Gara Shiga rai nga ai.

2019:PASKA POI SHANI NA MUNGGA

Madu Yesu si ai kaw nna bai hkrung rawt sai kabu gara shiga gaw Maria Madalena hte Kasa ni shawng nnan mu hkrup ai Kaman re ai lup lawng a marang e htawn tsun ai shiga a majaw sha nrai nga ai. Raitim, dai mahkrum madup a marang e anhte Nawku hpung a makam masham gaw dai hta e rau bai hkrung rawt wa sai rai nga ai. Dai ni na kabu gara shiga gaw, Madu Yesu hkrung rawt ai hpang na mabyin hpe e grau shadan shaleng ya nga ai. Madu Yesu a hkrung rawt ai lam gaw nawku hpung, nawku daw jau lam a mungsung gasung sha nrai nga ai, Anhte yawng a matu hkrung rawt sai asak nnan mung rai nga ai.

Dai Madu a nni nhkri lam, si hkam ai lam, hkrung rawt ai lam hpe myit dum let shi hte rau sak hkrung ai, dai sak hkrung lam hpe masha ni hpe bai sakse hkam ya lu ai ni rai ra ai. Anhte lu la sai makam masham hpe garan kachyan ai lam nnga yang Karai Kasang a asak nnan hta hkrung rawt ai ni nrai na ga ai, Shinggim masha myit hte shi madu a hkrung rawt ai lam mungsung gasung hpe hkrak tup nchye na lu raitim, shi a kasa ni hpe bai yu dat yu ga, Kasa ni hkrit tsang myit kaba hte ala nga ten Madu Yesu a hkrung rawt sai hpungshing kang gaw shanhte a myit hten ai lam mahkra hpe shazim kau ya nna, simsa lam hte nhtoi nnan de kayin wa shangun ai kup sup ai lam byin wa sai. Madu Yesu si du hpe dang kau ai awng padang gaw anhte a matu hkum zup ai npawt madung makam masham hpe jaw ya ai sha n ga, mara ningsin htawng chyinghka hpe hpaw kau ya nna asak nnan de bai shangai chyinghkai ya ai chyeju hpe mung lu la saga ai. Yesu a hkrung rawt wa ai lam gaw anhte hkum anhte mung nnan bai hkrung rawt lu hkra shi Madu woi sa nga ai sha n ga, dai Madu a Chyoi Pra ai Karai a asak hta bai shang lawm lu ai ahkaw ahkang lu ai ni mung rai nga saga ai. Dai hkrung rawt ai lam gaw anhte a manu shadan ai lam hpe grau madang tsaw ai de sit shang shangun nga ai. Ga shadawn, shani shagu anhte galaw ai magam bungli hta myit lawm, hkum lawm tsawra myit bang let ap nawng ai lam mung rai nga ai.

Daini na Kabu Gara shiga hta na maria Madalena a Madu Yesu hpe tsawra kamsham ai hpe myit sumru yu yang, anhte prat hta mung Madu Yesu hpe tsawra kam sham myit nrawng yang, anhte a kamsham myit ningra wa yang, Madu Yesu a hkrung rawt lam hpe (Maria Madalena) zawn anhte sakse hkam lu na n re, lachyum n nga ai sakse sha rai wa na. Madu Yesu a sape ni hkum nan Shi Madu a hkrung rawt ai lam hpe myit ug ang lai wa sai. Madu Yesu a chyeju nhtoi a marang, aten ladaw lai hpang she chye na kamsham wa ma ai. Dai re majaw anhte a kamsham tsawra myit gaw Madu Yesu a mungsung gasung ni hta shang lawm lu ai.

Paska poi ngu ai gaw, moi Egudu mung mayam prat na lawt pru wa zawn, myit nhkrum nra hte shada chye na shut ai lam, myit daw myit hten let myit mada lam nnga mat ai, anhte a myit tsang lam ni a majaw Karai Kasang hte tsan gang mat sai shingim masha ni hpe Karai Kasang hte bai mahkru mara lam n-nan jaw ya sai makam masham poi mung rai ai hte maren, mara mayam prat na lawt pru wa sai anhte ni hpe laikyang dingsa de galoi bai n-hkayin lu ai Karai Kasang a chyeju asak nnan hta hkrung rawt sai ni mung rai ga ai. Misa hkungga hta shang lawm sai ni anhte yawng gaw Chyoi Pra Hkum a marang e, Madu Yesu a hkrung rawt sai mungsung gasung hta shang lawm ai rai ga ai.

Dai re majaw, anhte nawku hpung gaw Paska Poi hpe ahkyak dik ai makam masham a npawt madung awng padang poi kaba hku ahkyak la, nawku daw jau ai. Anhte a makam masham hpe Yesu si ai kaw na bai hkrung rawt ai lam nlawm yang lachyum shapraw sakse hkam nmai ga ai. Paska a Kabu Gara, myit mada, simsa ai hte asak n-nan, nhtoi n-nan gaw shinggim masha yawng a matu rai sai.

Sawn sum ru mai ai lam: Karai Kasang gaw Na a prat hta Paska a Kabu Gara ai hpe lu la na ra sharawng ai hpe chye nga u. Nang lu la ai Kabu Gara lam manang ni hpe gam garan nga ai kun? Myit yu ga.

2019:PASKA POI SHANI NA CHYUM LAIKA

PASKA POI SHANI

21st April, 2019

CHYUM MUNGGA DAW 1

KASA LAIKA 10:34a, 37-43

Ya hti na gaw, Kasa Laika hta na rai nga ai.

Dai aten hta e, Petru ga hpaw nna, shanhte hpe hkaw tsun dan mu ai gaw. Yawhan kashin kamun lam hkaw dan ai hpang, Galile mung kaw nna, Yuda mung ting kajai gara wa ai lam hpe, nanhte nan chye nga myit dai: dai gaw, Nazaret na Yesu a lam rai nga ai. Karai Kasang gaw, Chyoi Pra ai Wenyi hte mung, n-gun atsam hte mung, Shi hpe chya ya u ai; Karai Kasang shi hte rau nga nga ai majaw, mai kaja ai amu ni Shi galaw nna, nat gumlau e zingri zingrat hkrum ai ni yawng mayawng hpe shamai ya let kawan katsan hkawm nga ai. Shing rai, Yuda masha ni a mung hta e mung, Yerusalem mare hta mung, shi galaw ai amu yawng mayawng a sakse ni anhte rai nga ga ai: dai wa hpe nan shanhte hpun hta jen sat kau mu ai; Karai Kasang chyawm gaw masum ya nhtoi hta Shi hpe jahkrung sharawt la wu ai rai nna, mung masha yawng a man e n rai, Karai Kasang shawng e lata san da sai sakse ni a man e sha, dai wa hpe dan pru shangun wu ai.

Dai sakse ni gaw, si ai kaw na Shi bai hkrung rawt ai hpang e, Shi hte rau lu sha ai ni anhte nan rai nga ga ai. Shi Madu nan mung, Hkrung ai ni hte si sai ni a tara agyi tai na, Karai Kasang san da ai wa rai nga sai lam, mung masha ni hpe tsun dan let sakse hkam ya na matu, Shi anhte hpe hkang da mani ai. Myihtoi mahkra mung Shi a mying ningsang a marang e, mara raw dat kau ya ai hkrum na mara ai, nga nna tsun dan ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

KOLOSE 3:1-4

Ya hti na gaw, Kolose masha ni hpang de San Pawlu shagun dat ai Laika hta na rai nga ai.

Hpu nau ni e, Nanhte Hkristu hte rau teng man ai asak de bai rawt wa manit dai majaw, Hkristu gaw, Karai Kasang a hkra maga e dung nga ai lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu.

Kaning rai nme law, nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung Shi hte rau hpung shingkang hta dan pru na marin dai.

Ya hti ai gaw Karai Kasang a mungga rai nga ai.

KABU GARA SHIGA

YAWHAN 20:1-9

Ya hti na gaw, Yawhan a Laika hta na Kabu Gara Shiga rai nga ai.

Dai laban bat a shawng shani e, nhtoi garai n htoi yang, Maria Magdalena jau jau e lup de sa wa ai rai nna, lup chyinghka la ai nlung sit mat nga ai hpe mu wu ai. Dai majaw shi gaw Simun Petru yan Yesu tsaw ra ai sape hpang de gat wa nhtawm, Madu hpe lup de na shanhte la nna, kanang e tawn da mu ai hpe anhte n chye ga ai, ngu nna, shanhte hpe tsun mu ai. Dai majaw Petru yan kaga sape pru nna, lup de sa wa ma ai. Shan rau gat sa wa yang, kaga sape gaw Petru hpe gat lai kau da nna, lup de shawng sa du ai: shaloi shi gum yu wu yang, sumpan gin-yan taw nga ai sha mu wu ai; rai ti mung, shi kata de n shang ai.

Simun Petru chyawm gaw shi a hpang e hkan gat nang nna, dai dedu jang, kata de shang yu wu ai. Sumpan gin-yan taw nga ai mung, baw na hpajet gaw sumpan hte rau n re ai, kaga ga rai nna katsu taw nga ai mung, shi mu wu ai. Dai majaw, lup de shawng du ai, kaga sape mung hkan shang wa nna, mu lu ai hte kam sham wu ai. Kaning rai nme law, Yesu gaw si ai ni kaw na bai hkrung rawt wa na ra ai nga nna, Chyum laika hta rawng nga ai hpe ndai ahkying du hkra, shanhte n chye madat ma ai.

Ya hti ai gaw Madu a Kabu Gara Shiga rai nga ai.

2019:KUNGLA SHAMAN POI SHANI NA MUNGGA

Ndai bat lapran gaw chyoipra ai bat lapran rai nga ai. Madu Yesu hpung shingkan hte Yerusalem de shang wa ai, nni nkri tsin yam yubak hkan na hte hpung shingkan hte bai hkrung rawt ai poi kaba galaw na mawn nga ga ai. 

Yerusalem de Madu shang wa shaloi kungla lap ni lang let Madu hpe hkap tau la ai. Kungla lap gaw awng padang a lachyum rai nga ai. Anhte ni na la sai hte maren, ningbaw ningla ni, hkyinjawng agyi ni, hparishe ni, tara sara ni gaw Madu hpe rim na matu ala nga ma ai. Anhte ni mung dai ni kaw nna langai mi re taw ai kun? myityu ga. Yuda Isacariot gaw Madu hpe gumhpraw lap sumshi hte sha dut sha kau ai zawn, anhte bung taw ai kun myityu ga. Madu Yesu nni nhkri hkam sha nga ai ten hta yup nga ai Kasa ni zawn, nye prat wa yup pyaw nga ai kun?. Ngai gumle ai wa rai kun? Pilatu zawn tinang galaw ra ai magam bungli hpe ngai hte nsen ai ngu, lata kashin let koi ai hta lawm nga ai kun?

Mayen mahtaw ai hpyenla ni zawn bung nga ai kun? Cyrini mung na Simon zawn tinang a magam bungli ni hpe rai di nna Madu a Udang hpai garum wa zawn ngai re nga ai kun? Gumlau wa Baraba hpe dat ya na matu hpyi jahtaw ai shawa masha zawn rai nga ai kun?

Sawn sum ru mai ai lam: Nye salum gaw gra kaw rai ta? Ngai kadai hte wa bung taw nga kun? Ndai ga san ni hpe tinang hkun nan hpe ndai laban bat lapran san jep let chyoi pra ai bat magam hpe lai di sa wa ga.

2019:KUNGLA SHAMAN POI SHANI NA CHYUM LAIKA

KUNGLA SHAMAN POI

14th April, 2019

CHYUM MUNGGA DAW 1

ESAIA 50:4-7

Ya hti na gaw, myihtoi Esaia a Laika hta na rai nga ai.

Hki ba ai wa hpe shalan shabran na chye wa lu hkra, Madu gaw sharin achyin hkam la ai ni a shinglet, ngai hpe jaw ni ai; jahpawt shagu Shi ngai hpe jasu nga ai: sharin achyin hkam la ai ni, na la lu ai zawn, Shi nye a ana hpe jasu ya nga ai. Madu gaw, nye a na hpe hpaw ya nna, ngai mung lale kau ai hte kanut mat wa ai n rai. Ngai gaw kayet ai ni hpe nye a shingma, shabyi mun baw ai ni hpe nye a shabyi ap ya nngai: kaya jahkrum ai hte mayen mahtaw bun ai kaw na nye a myiman kayin kau ai n rai. Madu gaw ngai hpe garum na ra ai; dai re ai majaw ngai mak mat ai n rai; nye a myiman mung nhpai lung zawn ngai shatai nna, ngai kaya kahpa n hkrum na, ngai chye nngai.

Ya hti ai gaw Karai Kasang a mungga rai nga ai.

CHYUM MUNGGA DAW 2

HPILIPI 2:6-11

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai.

Yesu Hkristu gaw Karai Kasang a ahpraw asam hta pra nga ti mung, Karai Kasang hte maren rai nga na shingjawng kashun ai hku n nawn ai sha, tinang dai shagawm kau nna, mayam a ahpraw asam dagraw let, shinggyim masha hte bung hkra tai wa sai: Shingrai masha a gawng shing-yan lang let Shi hkum hpe Shi shagrit kau nna, si ai du hkra madat mara nga ai, gaja wa Udang hta si ai du hkra madat mara nga ai.

Dai re ai majaw, sumsing lamu lahta tang na dinghta tsang na hte katsan ga na lahput yawng mayawng hte gaw, Yesu a mying ningsang hte hput di nna, Yesu Hkristu gaw Madu rai nga ai, nga nna shinglet yawng mayawng hte gaw, Kawa Karai Kasang a hpung shingkang a matu mara kajai gumhkawng nga mu ga, Karai Kasang gaw Shi hpe shagrau nna, amying shingteng yawng mayawng hta grau ai amying nsang jaw da wu ai, rai nga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 23:1-49

Ya hti na gaw, Luka ka da ai hte maren Kabu Gara Shiga hta na rai nga ai.

Dai shaloi, hpawng nga ai ni nlang hte gaw rawt nna, Shi hpe Pilatu hpang de woi bang nhtawm, Ndai wa gaw anhte a amyu hpe lam woi shadam ai hte, Kehta hkawhkam hpang de hkansi bang na lam hkum da nna, Shi hkum dai Hkristu ngu ai Hkawkam rai nga ai, nga nna tsun ai hpe anhte mu ga ai, ngu nna Shi hpe mara jaw mu ai. Shaloi, Pilatu gaw, Yesu hpe, Nang Yuda masha ni a hkawhkam rai nga nni? ngu nna san wu ai; Shi gaw, Nang tsun ai hte maren ngai rai nga nngai, ngu nna htan wu ai. Pilatu chyawm gaw, Ndai wa hta hpa mara mung ngai n mu we ai, ngu nna hkinjawng agyi ni hte shawa masha ni hpe tsun wu ai.

Dai ni mahtang, Ndai wa gaw Yuda mung hte, Galile mung kaw nna ya nang du hkra, sharin shaga nga ai hte, mung masha ni hpe woi kabrawng wu ai nga nna grau tsun anin shadut ma ai. Pilatu chyawm gaw, dai na jang Shi Galile masha re ai n re ai san la nhtawm, Herod up ai mung na masha re ai shi chye wu yang, Herod shi dai mung Yerusalem mare e dai ten e nga nga ai rai nna, Yesu hpe shi hpang de sa bang shagun wu ai. Herod gaw Yesu hpe mu jang grai kabu nga ai. kaning rai nme law, Shi a lam na yu nu ai rai nna, Shi galaw dan ai lamik kumla langai ngai mu lu na, nga nna myit mada nga ai majaw Shi hpe mu mayu ai na la salu ai. Dai rai nna shi gaw Yesu hpe lam magup san yu wu ai. Raitimung, Yesu gaw ga hkaw mi mung n htan ya wu ai. Hkinjawng agyi ni hte laika ka ai sara ni chyawm gaw, rawt tsap nna Shi hpe mara grai grai jun da mu ai. Herod mung shi a hpyen masha ni hte Shi hpe aroi arip di nna jahpoi asawng nhtawm, reng ai hpun palawng jahpun nna, Pilatu hpang de bai sa shagun wu ai. Dai shani jang Herod yan Pilatu gaw shada bai hkau ma ai: shawng de chyawm gaw shada myit kraw n ngawn hkat ma ai.

Shaloi, Pilatu gaw, hkyinjawng agyi ni, du ni hte mung masha ni hpe shaga jahpawng nhtawm, mung masha ni hpe lam woi shadam ai wa re ai nga nna, ndai wa hpe nanhte ngai kaw sa bang manit dai: ya yu mu, nanhte a shawng e ngai Shi hpe san yu we ai rai yang nanhte shagun ai mara lam hpa mung ndai wa hta ngai n mu we ai. Dai hta n-ga Herod mung hpa mung n mu wu ai: Shi gaw Ndai wa hpe anhte hpang de bai sa dat shangun ra ai. Dai rai nna, yu mu, ndai wa gaw hpa si ging ai amu mung n galaw wu ai; dai majaw ngai Shi hpe anu sharin nna dat dat na we ai, ngu nna shanhte hpe tsun wu ai. Shing nga jang, shanhte nlang hte gaw, Dai wa hpe la kau u, Baraba hpe chyawm gaw dat ya mi, nga nna jawm jahtau ma ai: Baraba gaw mara e gumlau ai hte masha sat ai amu a majaw htawng hkrat ai wa rai nga ai. Pilatu gaw, Yesu hpe dat dat mayu wu ai rai nna, shanhte hpe bai shaga tsun wu ai. Raitimung, shanhte gaw, Dai wa hpe wudang hta jen da u, jen da u, nga nna jahtau nga ma ai. Dai rai nna, Pilatu gaw masum lang ngu na hta, bai tsun wu ai gaw, Ndai wa n hkru ai amu hpa galaw hkrum sata? Shi hta si ging ai mara ngai hpa mung n mu we ai: dai majaw ngai Shi hpe anu sharin nna dat dat na we ai, ngu nna shanhte hpe tsun wu ai.

Shanhte mahtang nsen kaba hte jahtau nna, Yesu hpe wudang hta jen da lu na lam atik anang hpyi shaja ma ai: Shing nga jahtau ai hte mung shanhte dang la ma ai. Dai majaw, Pilatu gaw shanhte hpyi ai hte maren rai u ga, nga nna daw dan ya mu ai. Shing nga Shi hpe shanhte hpyi ai hte maren, gumlau ai hte masha sat ai amu a majaw, htawng hkrat ai wa hpe dat ya nna, Yesu hpe gaw shanhte ra ai hku ap kau ya dat wu ai.

Yesu hpe shapraw sa wa nga ma yang, nam kahtawng de na wa ai Simun ngu ai Kureni mung masha langai mi hpe shanhte rim la nhtawm, wudang jahpai nna, Yesu a hpang e hkan nang shangun mu ai. Masha wunawng wuwa kaba hte, Shi a lam hkrap ngu hkrap ngoi, sharung shayawt nga ai numsha ni mung Shi a hpang e hkan nang ma ai. Yesu gaw, shanhte hpang de kayin nna, Yerusalem shayi sha ni e, Nye a majaw hkum hkrap myit; nanhte hkum dai hte nanhte a nshu nsha ni a matu hkrap nga mu: kaning rai nme law maudung num, na-um nasin n rai yu ai hkum hte, n chyu yu ai madoi chyu hpang gaw a nga lu ai, nga nna tsun na nhtoi du wa ra ai. Dai nhtoi e, bum ni hpe, anhte a ntsa daw kamyet mi, nga nna mung, kawng ni hpe anhte a ntsa e ka-up mi nga nna mung, shanhte shajang na mara ai. Shanhte hpun katsing hta ning di ma yang gaw, hpun chyahkraw hta kaning wa di na mara ta? ngu mu ai. Dai shaloi damya lahkawng hpe mung sat kau na nga Shi hte rau woi shapraw sa wa mu ai. Ya Pungkum ngu ai shara de du jang, shanhte gaw Shi hpe mung, damya yan hpe mung, Shi a hkra maga de langai mi, pai maga de langai mi di nna wudang hta jen da mu ai. Shaloi Yesu gaw, Wa e, shanhte a mara dat kau ya mu: shanhte galaw ai lam hpe shanhte n chye nga ma ai, nga ai. Shanhte gaw Shi a hpun palawng ni hpe mung, hpaida da nna karan la ma ai.

Mung masha ni gaw mada yu let tsap nga ma ai. Du aya lu ai ni mung Shi hpe asawng asang nga nna, Masha kaga hpe Shi hkye la ga ai, ndai wa gaw Karai Kasang a Hkristu ngu ai, Karai Kasang lata la ai wa rai yang gaw, Shi hkum dai Shi hkye la u ga, nga ma ai. Hpyen masha ni mung sit sa nna ntsin hkri ladawn nhtawm, Nang Yuda ni a hkawhkam rai n yang gaw, Na hkum dai Nang hkye la u nga nna Shi hpe roi ma ai. Shi a ntsa e mung, ‘Ndai wa gaw Yuda ni a Hkawhkam rai nga ai, nga nna Laika shakap da nga ai. Wudang hta noi nga ai damya langai mi mung, Nang gaw, Hkristu n rai nni? Na hkum dai hte an hpe mung hkye la mi, ngu nna Shi hpe roi wu ai. Langai wa mi chyawm gaw, Nang mung daw dan ai ndai hte wa hkrum da ninglen Karai Kasang hpe pyi n hkrit nni? An gaw tinang a mara majaw hkrum ging ai hte maren daw dan ai hkrum ga ai: Ndai wa chyawm gaw, n tsun n ang ai lam hpa mung galaw wu ai n rai, nga nna dai wa hpe daru let htan wu ai. Shing nga nhtawm, Shi gaw, Yesu e, Nang Na a Mungdan hta du wa yang ngai hpe dum rit law, ngu nna hpyi wu ai. Shaloi, Yesu gaw, Ngai nang hpe teng teng tsun de ga, dai ni jang, nang Ngai hte rau Hparadisu e nga na rai nga ai, ngu nna shi hpe htan wu ai. Ya gaw ahkying kru daram rai nga ai rai nna, jan a ahtoi nip mat ai majaw, hkying jahku du hkra mung ting nsin chyip rai mat ai; nawku htingnu na nba grang mun ka-ang brang rai ga mat ai. Shaloi Yesu gaw, Wa e, nye a wenyi Na a lata hta ngai ap ya de ai, nga nna nsen kaba hte jahtau wu ai: shing nga tsun ngut jang, Shi nsa hti mat ai. Shing rai byin ai lam ni hpe hpyen latsa up ai du wa mu wu yang, Gaja wa teng teng Ndai wa gaw, ding man ai wa rai nga ai nga nna Karai Kasang hpe shagrau sha-a wu ai. Dai lam yu na nga, sa hpawng ai masha nlang hte mung, shing rai byin ai lam ni hpe mu mu yang, sinda adup let bai wa ma ai. Shi hpe chye machye ni hte, Galile mung kaw nna Shi kaw hkan nang sai num ni gaw tsan tsan e tsap nna, dai lam ni hpe mada yu let nga ma ai.

Ya hti ai gaw Madu a Kabu Gara Shiga rai nga ai.

2019:LUSHA GAM LADAW LABAN (5) NA MUNGGA

Lusha gam ladaw na hpang jahtum na laban de du shang nga sa ga ai. Du na bat hta gaw Madu hpung shingkang hte Yerusalem shang wa ai lam chyoipra ai laban bat nawku daw jau ai aten mung rai nga sai. Anhte a makam masham a kri madung rai nga ai Madu Yesu a nni nhkri hkam ai, si hkam ai hte, bai hkrung rawt wa ai lam hpe bai myit dum nawku daw jau nga ai. Dai ni na Kabu Gara ai shiga hta e Tara sara ni hte hparishe ni gaw Madu Yesu galaw ai amu mahkra hpe chyam mayu ai, nju ai ni rai nga ma ai. Mara tam, jahpoi asawng ai ni mung rai nga ai. Dai ni mung Madu Yesu hpe lawt nlu hkra sa chyam nga ma ai. Madu hpe chyam ai hta jep ai tara nga ai hte maren galaw mu, nut jang mung tsawra matsam dum ai Madu rai nga nna dai hku tsun ai ngu nna bai tsun na rai nga ai. Mara raw ya u ngu jang mung Mawshe a jep ai tara hpe ninghkap ai lam rai nga ai lam hparishe ni chye nga ai majaw Madu Yesu hpa mung ntsun ai sha ga hta layung hte ka nga ai.

Ndai numsha a ntsa da ai hparishe ni a myit masa hte Madu Yesu da ai myit masa gaw shai nga ai. Hparishe ni gaw ndai numsha hpe nlung hte ang ai tara hte maren jeyang na ni rai nga ai. Yesu chyawm gaw ndai numsha hpe karai kasang hpang de gayin wa nna prat nnan hpe gaw gap na hpe shi sharawng nga ai. Dai majaw, ‘Numsha e ya shanhte kanang rai wa ma sata? Nang hpe kadai mung n-jeyang a ni ngu nna sang jang, dai numsha gaw, Madu e, kadai mung n-jeyang nngai,’ ngu nna htan wu ai. Ngai mung nang hpe n-jeyang na nngai wa nu, ya kaw nna mara hkum galaw nit ngu tsun dat u ai. Madu Yesu shi du sa ai mung, mara kap ai ni hpe mara kaw nna myit malai nna shi Madu hpang de sit shang wa na matu du sa ai rai nga ai. Dai majaw anhte ni mung masha ni hpe Karai Kasang a matsam dum ai hpe masha ni hpe jaw ya lu ai ni tai lu hkra shakut ra nga ai.

Sawn sum ru mai ai lam: Nye prat hta anhte hpe kaja ai lam de (Chyum Mungga hku) woi ai Madu Yesu zawn ni htep ai ni hpe mara n-shgun ai sha gade lang kaja ai de lam matsun wa sai kun?

2019:LUSHA GAM LADAW LABAN (5) NA CHYUM LAIKA

LUSHA GAM AI LADAW HTA LABAN 5

7th April, 2019

CHYUM MUNGGA DAW 1

ESAIA 43:16-21

Ya hti na gaw, myihtoi Esaia a Laika hta na rai nga ai.

Madu ning nga ai: Nammukdara hta lam waw nna, hka kaba ni hta lam hpaw ai wa; hpyen leng ni hte gumra ni hte hpawn, hpyen luksuk ni hte share ninghkring ni hpe si mat ai wan shat zawn jasim na matu, shanhte n rawt lu hkra, jahten shabyak ai de woi sa ai wa ngai rai nga nngai. Moi na amu hpe nanhte n dum ra myit dai; chyaloi nhkoi na lam ni hpe n gawn ra myit dai. Yu mu, amu nnan ngai galaw na nngai; ya pyi byin pru na ra ai; dai hpe nanhte n mu lu myit ni? Gaja wa, nam mali hkan e nmaw lam, hkraw hkun ai shara e hkanu hkashi, ngai shapraw na we ai.

Nam na ashu ashan ni mung, nam gwi ni hte u gawla-uk ni mung, ngai hpe shagrau na mara ai; kaning rai nme law, ngai lata la ai amyu masha ni luhpa lu na matu, nam mali hkan e hka hpung ni, hkraw ai shara e hka nu hka shi, shapraw na we ai. Nye a matu ngai san da ai amyu masha ndai gaw ngai hpe shakawn kaungdawn nga na mara ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

HPILIPI 3:8-14

Ya hti na gaw, Hpilipi masha ni hpang de San Pawlu shagun dat ai

Laika hta na rai nga ai.

Hpu nau ni e, Nye a Madu Hkristu Yesu hpe chye chyang ai lam hta; grau kaja ai lam kaga n nga ai, ngai nawn nga nngai; gaja wa, Hkristu a matu ngai yawng mayawng hte hpe sum kau ni ai. Shi hpe lu la nna, Shi hta grin nga lu yang gaw, ngai sum mat ai yawng mayawng hte hpe shanut shanaw zawn nawn nga nngai. Ya kaw nna jep ai tara a hkum tsup ai lam ngai n hkan tam nngai; Hkristu hpe kam sham ai a marang e, makam masham hta ru jung nna, Karai Kasang kaw na lu la ai hkum tsup ai lam hpe ngai ra sharawng nngai. Hkristu hte Shi a bai hkrung rawt ai lam a atsam chye lu nna, Shi si hkam ai shaloi na myit marai hpe grau nna dagraw la ai a marang e, Shi hte rau nni nkri jawm hkam la ai lam hpe chyu sha, ngai myit ndawt nga li ai. Ngai dai hku hkan lu yang gaw, si ai kaw na bai hkrung rawt wa ai ni hte rau ngai hkan lawm lu na nngai.

Shing rai tsun yang, ngai ya e pyi hkum tsup rai nga ai hpe n tsun nngai: ngai garai n awng ai ni; rai ti mung, Hkristu Yesu ngai hpe kumhpa jaw na matu hkap la ni ai hte maren, dai hpe ngai nan hkap la lu u ga gat shachyut nngai. Hpu nau ni e, ngai ya e pyi awng ni ai, ngai teng teng n myit nngai. Lam langai sha ngai tsun lu nngai: hpang na lam hte hpe malap kau nna, shawng na lam ni hpe hkan chyan la nngai. Hkristu Yesu hta e sumsing lamu de na kumhpa hpe lu la na matu, Karai Kasang anhte hpe shaga la sai hte maren, awng padang shadaw du hkra ngai gat shachyut nngai.

Ya hti ai gaw Karai Kasang a mungga rai nga ai.

KABU GARA SHIGA

YAWHAN 8:1-11

Ya hti na gaw, Yawhan a Laika hta na Kabu Gara Shiga rai nga ai.

Dai aten hta e, Yesu gaw Tsanlun Bum de sa mat wa ai. Hpang jahpawt jau jau e Nawku Htingnu de Shi bai sa wa ai rai nna, masha nlang hte Shi kaw sa ma ai; shi dung let shanhte hpe sharin shaga nga ai. Shaloi tara sara ni hte Hparishe ni gaw, shut hpyit nga ai masha num langai mi hpe dun sa nna, ka-ang e shatsap tawn da nhtawm, Sara e, ndai numsha hpe shut hpyit nga yang mu hkrup saga ai; ndai zawn re ai numsha hpe, nlung hte kabai sat kau lu na re ai, nga nna Mawshe gaw jep ai tara hta anhte hpe matsum jaw da mani ai: ya nang gaw kaning ngu na wu ta? Ngu nna Shi hpe san mu ai. Shing nga san ai gaw, Shi hta mara shagun na lam mu lu hkra, Shi hpe chyam dinglik ya ai rai nga ai. Yesu chyawm gaw ga de gum nna, ga hta layung hte ka nga ai.

Shanhte shing nga bai kahtap san san rai ma ai majaw, Shi rawt mada yu nna, Nanhte hta na mara n lu ai wa, shawng shi hpe nlung hte kabai mu, ngu nna shanhte hpe tsun mu ai. Shing nga tsun ngut jang Shi bai gum nna ga hta ka nga ai. Shanhte dai ga na jang, agyi salang ni shawng pru wa ai kaw nna, langai hte langai pru mat wa ma ai: shing rai Yesu Hkrai sha hti nga ai hte, dai numsha mung myi na shara e nga nga ai.

Shaloi Yesu bai rawt mada yu nna, Numsha e, ya shanhte kanang rai wa ma sata? Nang hpe kadai mung n jeyang a ni? ngu nna shi hpe san yang, dai numsha gaw, Madu e, kadai mung n jeyang nngai. ngu nna htan wu ai. Shaloi Yesu gaw, Ngai mung nang hpe n jeyang na nngai: wa nu; ya kaw nna mara hkum galaw nit, ngu nna tsun dat wu ai.

Ya hti ai gaw Madu a Kabu Gara Shiga rai nga ai.

2019:LUSHA GAM LADAW LABAN (4) NA MUNGGA

Dai ni na mungga hta Yesu gaw kanghta ai ni hte mara kap ai ni gaw shi a ga madat na nga shi hpang de sa ma ai. Shaloi Hparishe ni, laika ka ai sara ni gaw ndai zawn Madu Yesu hku nna mara kap ai ni hpe hkapla nna rau lusha nga ai hpe mu ai shaloi aput angun nga ma ai. Ndai hpe yu dat ai shaloi Madu Yesu shi du sa ai gaw, masha hpe chye na matu re ai lam hpe anhte hpe shadum ya nga ai. Dai majw anhte mung anhte shut hpyit ai galaw hkrup ai shaloi hkrit tsang ai lam nnga ai sha shi hpang de sit sa na matu sharing shaga ya nga ai. Ndai lusha gam ai ladaw laman hta anhte hta rawng nga ai nkaja ai lam ni hpe la kau ga, sharai la nna mai kaja ai lit magam ni hpe shachyen shaja nga ga. Bai Madu Yesu gaw mabyin langai hte shawa masha ni hpe sharing ya nga ai.

Masha langai mi shadang sha lahkawng lu ai. Kasha kaji mahtang gaw, kawa hpe shi la ang ai sali kumhtaw hpe karan ya na hpyi wu ai. Dai hpang nhtoi gade n na yang kasha kaji gaw arai mahkra shingyin la nhtawm, tsan ai mung de sa wa nna, shi a sutrai ginlut shamat kau wu ai. Dai shi nga ai mung hta hku kaba hku wa ai rai nna, shi gaw masha langai mi kaw sa shingbyi nga ai. Dai wa mung shi hpe wa rem shangun wu ai. Dai kaw e shi gaw kan si ai shaloi wa ni sha ai shapre kawp hte pyi pa gadai mung njaw sha wu ai. Shaloi shi gaw dum hprang wa nna shi a kawa nta de wa mat ai. Kawa mung kasha hpe tsan tsan kaw nna mu ai shaloi gat sa nhtawm shi hpe aput la wu ai. Dai gaw anhte hpe shut hpyit mara galaw ai shaloi Wa Karai Kasang gaw tsawra myit kaba hte raw dat ya ai ngu madun ya nga ai. Dai majaw anhte ni hpe galoi mung tsawra ai Kawa Karai Kasang hpang de sit sa nna shut ai lam tawng bang let htawng hpang de dai lam ni hpe koi yen kau nna mai kaja ai lam hta shakut nga ga.

Sawn sum ru mai ai lam: Anhte hpe Karai Kasang gaw galoi n kabai da ai hpe dum let tinang a kanu kawa ni a tsawra myit hpe mung dum shai nga ga. Ngai a shut kau sai lam ni hpe ngai dum let myit malai lu nga ai kun?

2019:LUSHA GAM LADAW LABAN (4) NA CHYUM LAIKA

LUSHA GAM AI LADAW HTA LABAN 4

31st March, 2019

CHYUM MUNGGA DAW 1

YAWSHU 5:9a, 10-12

Ya hti na gaw, Yawshu a Laika hta na rai nga ai.

Dai aten hta e Madu gaw Yawshu hpe, Dai ni, Egutu mung na kaya

kahpa lam hpe nanhte kaw na galau kau ya ma sade ai, ngu nna tsun wu ai. Shaloi, Israela kashu kasha ni Gilgala shara e dap jung nna, dai shata shi mali ya shana de Yerihko pa e Shalai dat ai Paska poi sha ma ai. Paska poi sha ai hpang shani jang, dai mung na mam hte galaw ai, matsi n rawng ai muk hte mam nmyi shanhte sha lu ma ai. Dai mung na mam sha lu ai hpang shani kaw nna dai manna dawm mat sai: htawm hpang e Israela kashu kasha ni manna n lu sha ma sai. dai shaning shanhte gaw Hkanan mung na nsi naisi sha ma ai.

Ya hti ai gaw Karai Kasang a mungga rai nga ai.

CHYUM MANGGA DAW 2

2 KORINHTU 5:17-21

Ya hti na gaw Korinhtu masha ni hpang de San Pawlu shagun dat ai Laika lahkawng hta na rai nga ai.

Hpu nau ni e, Hkristu hte matut mahkai hkrum ai wa gaw, masha nnan tai wa ai: prat dingsa htum mat nna, Shi prat nnan hta shang wa sai: Dai lam yawng mayawng hte gaw Karai Kasang kaw nna rai nga ai: Shi gaw Hkristu a Marang e anhte hpe Shi hkum lala hte htinglu htinglai ya mi ai; dai htinglu htinglai ya ai amu gun hpai na matu, Shi anhte hpe ahkang aya jaw da mani ai. Ngai tsun mayu ai gaw: Karai Kasang gaw Hkristu hta e nga nga nna, masha ni a ntsa e tinang a mara n shagun ai sha, mungkan ga hpe Shi hkum lala hte htinglu htinglai ya nga ai: dai htinglu htinglai ya ai lam a shiga hpe, Shi anhte kaw ap da ya mani ai.

Dai re ai majaw, Hkristu a dat kasa ni anhte rai nga ga ai: Karai Kasang anhte a n-gup ga hku nna shadum jahprang ya ai hte maren rai nga ai. Dai rai nna, Karai Kasang hte htinglu htinglai nga mu, nga nna Hkristu a amying hte nanhte hpe akroi anoi hpyi nem nga ga ai. Shi hta e Karai Kasang a ding hpring ai ni anhte tai wa u ga, mara n chye ai wa Hkristu hpe, Karai Kasang gaw anhte a matu shut hpyit mara shatai wu ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 15:1-3, 11-32

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Kang hta ai ni hte mara kap ai ni nlang hte gaw Shi a ga madat na nga, Yesu hpang de sa ma ai. Dai rai nna, Hparishe ni hte tara sara ni gaw, Ndai wa mara kap ai ni hpe hkap la nna, shanhte hte rau lu sha nga ai, nga nna aput angun nga ma ai. Shaloi dai ni hpe ndai ga shadawn Shi tsun mu ai gaw: Masha langai mi shadang sha lahkawng lu ai. Dai yan hta kasha kaji mahtang gaw kawa hpe, Wa e, ngai la ang ai Sali kumhtaw gaw, ngai hpe karan ya e, ngu nna hpyi yang, Kawa mung shan hpe sali wunli karan ya wu ai. 

Dai hpang nhtoi gade ya n na yang, kasha kaji gaw arai mahkra shinggyin la nhtawm, tsan ai mung de sa wa nna, dai shara e pyaw daw kadaw hkawm ai hte, shi a sut rai ginlut shamat kau wu ai. 14Shing rai lu malu shamat kau ma jang, dai mung e hku wa kaba hku wa ai rai nna, shi matsan chyaren hkrum magang nga ai. Shaloi dai mung na masha langai mi kaw shi sa shingbyi nga ai: dai wa shi a prang ga de, shi hpe wa rem shangun dat wu ai. Shaloi shi gaw, wa ni sha ai shapre kawp hte pyi, shi a kan jahkru mayu ti mung, kadai wa mung n jaw sha mu ai. Shing rai shi myit dum yang, Nye wa a shabrai sha ai ni gade wa n taw n tsang muk sha nga ma hka! Ngai wa gaw ndai yang e kawsi kyet ai hte hten bya magang wa nga nngai; Ngai rawt nna nye wa kaw wa nhtawm, Wa e, sumsing lamu hpe mung, nang hpe mung, ngai shut ni ai: ya kaw nna na nsha ngu na ngai n ging n dan nngai: na shabrai sha ai masha langai mi zawn ngai hpe tawn da e law, ngu na we ai, nga nna myit lu ai.

Shing rai shi rawt wa nna, kawa kaw du wa ai. Shi tsan tsan naw rai nga yang, kawa gaw shi hpe hkap mu ai hte matsan yu dum nna, gat sa nhtawm, kasha a du hta noi ginshum let shi hpe a pup wu ai. Shaloi kasha gaw, Wa e, sumsing lamu hpe mung, nang hpe mung, ngai shut ni ai: ya kaw nna na nsha ngu na ngai n ging n dan nngai, ngu nna kawa hpe tsun nem wu ai.

Kawa chyawm gaw shi a shangun ma ni hpe, Reng htum ai hpun palawng alawan la sa nna, shi hpe jahpun ya maru; shi a lata hta lachyawp chyawp ya maru; lagaw hta kyepding din ya maru; kawn tawn da ai dumsu kasha mung la sat mu: shing rai anhte kabu gara ai hte lu sha nga ga: hpa majaw nga yang, ndai ngai sha gaw si mat sai, ya bai hkrung Sali ai; mat mat sai mung, ya bai mu la se ai, ngu mu ai:  Shing rai shanhte pyaw pyaw rai nga ma ai. Kasha kaba wa chyawm gaw yi e nga nga ai. Yi de na wa nna shi nta du magang yang, chying bau dum ai hte ka manau ai nsen na wu ai.

Dai rai nna, ma langai mi hpe shaga la nhtawm, dai kaning re ai rai nga ai, san yu wu ai. Dai ma gaw, Na nnau bai wa ai rai nna, nwa mung shi hpe hkam akaja sha hkap la lu ai majaw, kawn tawn ai dumsu kasha sat nu ai, ngu nna shi hpe tsun dan wu ai. Dai na jang shi masin pawt nna nhku de n shang hkraw wu ai. Shaloi shi a kawa pru sa nna, shi hpe sa nem wu ai. Dai kasha chyawm gaw, Yu u, nde nlaw ning tup na a nchyang amu ngai galaw nna, nang hkang da ai ga ngai galoimung n lai nngai rai ti mung, nye jinghku ni hte pyaw pyaw rai nga na, nang lang mi mung bainam kasha langai mi pyi, ngai hpe n jaw yu ndai.

Shawa num ni hte kanawn nna, na a sut rai ginlut shamat kau ai ndai na nsha wa bai wa jang chyawm gaw, kawn tawn ai dumsu kasha, shi a matu nang sat nit hka, ngu nna shi a kawa hpe htan wu ai. Kawa gaw, Ngai sha e, nang gaw ngai hte rau tut anga nga ndai; nye a sut rai nga manga gaw, na a hkrai rai nga ai. Raitimung, pyaw pyaw rai kabu gara mai nga ai; hpa majaw nga yang, ndai na nnau gaw: si mat sai; ya bai hkrung ra ai: mat mat sai mung ya bai mu la saga ai, ngu nna shi hpe nem wu ai.

Ya hti ai gaw Madu a Kabu Gara Shiga rai nga ai.