SAN PRA AI NI YAWNG A POI NHTOI MUNGGA

Kabu pyaw ai asak aprat hpe lu la na matu shinggyim masha ni kaja ai hte nkaja ai ladat hte galaw chye nga ai. Nkaja ai amu galaw nna kabu pyaw ai ngu ai hpe tam chye nga ai. Teng nga ai. Kalang lang rai jang nkaja ai amu hpe lagu galaw nna kabu pyaw chye nga ai. Tinang ra sharawng ai nkaja ai amu bungli hpe makoi magap nna galaw let kabu pyaw ai lam hpe lu la mai nga ai.

Rai tim, Madu Yesu tsun ai kabu pyaw ai asak aprat gaw mai kaja ai lam hta hkawm sa nna shakut shaja hkan shatup ai hta lu mai nga ai. Mai kaja ai hpe hkan shatup galaw sa nna lu la ai kabu gara ai lam gaw nkaja ai hpe galaw sa nna lu la ai kabu pyaw hpe lam hta grau nna kaba let ngang kang nga ai. Dai hta n-ga masha a mtu mung akyu pru nga ai.

Anhte a asak aprat hta n-kaja ai amu bungli hpe koi gam kau nna mai kaja ai lam hpe hkan shatup galaw sa let Madu Yesu jaw ya na kabu gara ai asak aprat hpe lu la u ga.

The heart of Jesus' message is that we can live a very happy life.

TENG MAN AI NGWI PYAW SIMSA LAM

Karai Kasang anhte a matu lajang da ya ai prat kaja gaw hpa mi rai kun?

Anhte prat a yaw shada lam hte hpang jahtum ten hte kaning rai matut mahkai nga a ta? Teng ai ngwi pyaw simsa lam; tsep kawp mai kaja ai hte, mai kaja ai lam yawng a daju, yawng hta grau kaja dik ai hpe anhte myit mada ala, ra sharawng ai n rai?

    Ndai ga san ni hpe bum ntsa na Tara (Mt 5:1-12) hta Madu Yesu tsun dan nga ai. Madu Yesu a mungga akri madung gaw; ‘anhte ni ngwi pyaw dik ai prat hta nga lu na’ ngu ai rai. Karai Kasang sharawng awng ai hpe kabu gara ai hte galaw sa let san pra ai prat de du na shaga la hkrum ai ni a lam hpe ndai ‘A’ lu ai lam matsat’ hta anhte mu lu na re. Madu Yesu a ‘A’ lu ai lam hpe gum hpawn nna yu yang, dai ‘A’ lu ai lam ni hte maren anhte a prat hkawm sa na shaga la hkrum ai rai sai. ‘A’ lu ai ngu ai lachyum gaw; ‘kabu lu ga ai’, ‘san pra nga ga ai’, ngu ai rai nga ai.

            Rai yang, Madu Yesu a, ‘A’ lu ai lam a lak lai ai gaw hpa mi rai kun? Hpa majaw, Shi Madu a sharin shaga ai lam a akri madung rai nga ai kun? ‘A’ lu ai lam ngu ai gaw; Karai Kasang bang da ya ai, anhte marai hkum shagu a salum hta rawng ai, ngwi pyaw sim sa lam hpe sharawng awng ai, hkri tung myit hpe bai htang galaw ai lam rai nga ai. ‘A’ lu ai lam sharin ya ai gaw, Karai Kasang anhte hpe shaga la na hpang jahtum na ten; du na ra ai ‘Karai Kasang a mungdan’ (Mt 4:17), “Karai Kasang hpe mu lu n lam” (Mt 5:8, 1Yh 2:1), “Madu a kabu gara ai hta shang lawm lu na” (Mt 25: 21-23), hte ‘dai ban sa ai shara’ (Heb 4:7-11) rai nga ai. Madu Yesu a ‘A’ lu ai tara lam gaw, ndai mungkan ntsa hta anhte hkan tam nga ai tang pyaw lam hpe mung ning hkap shangun nga ai.

          Karai Kasang chyu sha myit dik shara rai nga ai. Avila na San Teresa a akyu hpyi laika buk hta shi ka tawn da ai gaw; ‘nang hpe hpa mung n-gin jang lu u ga; hpa mung n-jahkrit lu u ga, arai yawng mayawng lai mat wa na re. Karai Kasang chyu sha agrin nga ai. Da krin da krang shakut ai lam gaw myit n-htum ai majaw lu la na re. Karai Kasang hpe lu la sai ni gaw, ningra ai lam n-nga sai hte Karai Kasang gaw anhte a matu law la sai”.

Karai Kasang gaw na a matu ram la sai kun? Karai Kasang gaw Madu Yesu Hkristu hta nhpaw n-ya prat anhte hpe jaw ya sai hte Karai Kasang hta n htum n wai ngwi pyaw simsa lam lu na gasadi jaw da sai. Nga manga yawng hta tsep kawp, tsaw dep dik ai mai kaja ai lam hpe nang tam nga ai kun?

     Madu Yesu jaw ya na nga ai ‘A’ lu ai lam hta lawm ai ngwi pyaw simsa lam gaw, mungkan ntsa anhte chye na da ai hte shai la nga ai. Kaning rai nna, matsan mayan ai lam hta, kawsi hpang gara ai hta, sharung shayawt ai lam hta, zingri zing rat hkrum sha ai hta, ngwi pyaw simsa ai hpe anhte tam la lu na rai? Wenyi hta matsan mayan hkrum ai ni gaw, reng dik htum ai sut gan Madu Karai hpe lu da ai hte lai jan hkra kabu pyaw ai lam hpe tam lu na re. Yawn hkyen hkrum ai ni gaw, Karai Kasang a mungga hte wenyi hta shalan shabran ai hte n-gun atsam lu la na rai nga ai. Myit masin hta sum num shingdi ai ni hpe n hpaw n-ya prat hte ngwi pyaw simsa ai a jet ai ru pyaw hpe Karai Kasang gaw shaleng ya na rai nga ai. Ndai mungkan ntsa hta anhte hkrum katut na re ai lam ni yawng hta Sumsing lamu na kabu gara ai lam gaw grau nga ai hpe Madu Yesu, sape ni hpe gasadi jaw da sai.

     “Ngwi pyaw kabu gara ai lam n- nga ai sha kadai mung n pra lu ai. Dai majaw, mungkan a tang pyaw lam ni hpe tawn kau da nna Wenyi a ngwi pyaw lam hpe hkan tam ai rai nga ai” nga nna San Htawma Aquinas tsun nga ai. Karai Kasang hpe chyu sha hpang gara nga ai ngwi pyaw simsa lam hpe nang chye nga ai kun?

“Madu Yesu e, Nang Madu hpe grau nna myit mada, hpang gara nga let htani htana ngwi pyaw simsa lam de sa wa lu na matu ngai a makam hpe shaja ya rit. Arai yawng hta nang hpe sha sharawng awng nga let Nang Madu a myit ra ai hpe hkan galaw ai marang e, hkum tsup kabu gara lam hpe tam lu mayu nngai law."

SAN PRA AI NI YAWNG MAYAWNG A POI

1 November, 2015

CHYUM MUNGGA DAW 1

Shingran 7:2-4, 9-14

Ya hti na gaw, Shingran laika hta na rai nga ai.

            Jan pru maga de na pru lung wa nna, ahkrung nga ai Karai Kasang a dazik lang ai Lamu Kasa kaga hpe ngai Yawhan mu nngai. Dai lamu kasa gaw, anhte a Karai Kasang a shangun ma ni hpe, kahtan e dazik garai n shakap yang, aga hpe mung, nammukdara hpe mung, hpun ni hpe mung hkum jahten kau mu, nga nna lamu ga hte nammukdara hpe jahten shabya na ahkang lu ai lamu kasa mali hpe, nsen kaba hte jahtau wu ai. Shaloi dazik shakap hkam la ai ni hpe hti ai jahpan ngai na nngai: Israela kashu kasha ni a amyu yawng hta na, sen mi mun mali e hkying mali dazik shakap ai hkam la masai.

            Dai hpang, yu u, mungdan shagu hta na mung, baw lakung shagu hta na mung, amyu baw shagu hta na mung, ga amyu shaga ai hta na mung, kadai n dang hti lu ai, masha unawng kaba hpe ngai mu nngai. Ndai ni gaw hpraw ai hpun palawng bu hpun nna, tinang a lata hta namhtan hpun lakung lang let, Tingnyang a man e mung, Sagu Kasha a man e mung, tsap nga ma ai. Shanhte gaw, nsen kaba hte jahtau let, Tingnyang hta dung nga ai anhte a Karai Kasang hte Sagu Kasha gaw, Awng dang nga u ga law, nga ma ai. Bai, lamu kasa yawng hte gaw dai Tingnyang hpe shinggrup let, salang ni hte dusat mali a grup yin e kawan tsap nga ma ai. Shaloi, shanhte gaw Tingnyang a man e dingnyawng dagup nna, Karai Kasang hpe nawku let, Amen, Shakawn kungdawn ai, hpung shingkang, hpaji byeng-ya, chyeju dum ya ai, arawng sadang, ahkang aya hte, n-gun atsam gaw, Karai Kasang kaw a nga nga u ga law, Amen, nga nna tsun ma ai.

            Shaloi salang ni hta na langai mi gaw, Hpun palawng ahpraw bu hpun ai ndai ni gaw, kadai ni rai nga ma ta? Kanang na pru wa ma ta? nga nna ngai hpe hkap san nngai. Ngai gaw, Nye a Madu e, nang chye nga ndai, ngu nna shi hpe htan wu ai. Shaloi shi tsun ai gaw: Ndai ni gaw, zingri zingrat kaba hpe hkam sharang ngut nna, Tinang a hpun palawng hpe Sagu Kasha a asai hta hkrut jahpraw la ai ni rai nga ma ai.

            Ya hti ai gaw, Karai Kasang a mungga rai nga ai.

CHYUM MUNGGA DAW 2

1 Yawhan 3:1-3

Ya hti na gaw, Yawhan shagun dat ai laika hta na rai nga ai.

Karai Kasang a kashu kasha ni anhte hpe ngu shamying mi ai majaw, Kawa gaw anhte hpe gade wa tsaw ra da mi hka! Shi a kashu kasha ni nan anhte rai nga ai. Dai rai nna, mungkan ga gaw shi hpe n chye wu ai majaw, anhte hpe mung n chye n hkap la ma ai. Tsaw ra ai ni e, Karai Kasang a kashu kasha ni, anhte ya e rai nga ga ai; hpang e anhte hpa tai na, garai n shadan dan nga ai. Dai hpe shadan dan ai shaloi, anhte Shi hte maren bung na ga ai lam hpe anhte chye nga ga ai; hpa majaw nga yang, Karai Kasang Shi hkum nan nga nga ai hte maren, anhte Shi hpe mu lu na ga ai. Ndai lam hpe myit mada ai masha yawng hte gaw, Hkristu Madu chyoi pra nga ai hte maren, tinang a hkum hpe shachyoi shapra ya ra ai.

            Ya hti ai gaw, Karai Kasang a mungga rai nga ai.

KABU GARA SHIGA

Mahte 5:1-12

Ya hti na gaw, Mahte a laika hta na Kabu Gara ai Shiga rai nga ai.

          Yesu gaw masha unawng uwa hpe mu jang, bum ntsa de lung wa ai; dai yang e Shi dung nga yang, Shi sape ni Shi a makau de sit sa wa ma ai. Shaloi Yesu shanhte hpe sharing shaga let, tsun wu ai gaw; Myit masin hta matsan mayan ai ni gaw, ngwi pyaw nga ma ai; lamu mungdan gaw shan hte a mungdan rai nga malu ai. Myit sumnung ai ni gaw ngwi pyaw nga ma ai; shanhte mungkan ga hpe madu lu na mara ai. Yawn hkyen hkrum ai ni gaw ngwi pyaw nga ma ai; shanhte shalan shabran ai hkrum na mara ai. Ding hpring ai hpe kawsi hpang gara ai ni gaw ngwi pyaw nga ma ai; shanhte gaw hkru kat wa na mara ai. Matsan dum chye ai ni gaw ngwi pyaw nga ma ai; shanhte matsan dum la ai hkrum na mara ai. Myit san seng ai ni gaw ngwi pyaw nga ma ai; shanhte gaw Karai Kasang hpe mu lu na mara ai. Ngwi pyaw sim sa ai hpe shabyin ai ni gaw ngwi pyaw nga ma ai; shanhte hpe Karai a kasha ni ngu shamying na mara ai. Dingman ai lam a majaw, zingri zingrat hkrum ai ni gaw ngwi pyaw nga ma ai; lamu mungdan gaw shanhte a mungdan rai nga malu ai. Nye a amying majaw masha ni nanhte hpe asawng zingri zingrat di ai hte, n teng n man ai hku mara amyu myu shagun da ai shaloi, nanhte ngwi pyaw nga myit dai: lamu mungdan hta e nanhte a shabrai kumhpa kaba nga malit dai majaw, kabu gara nna, ngwi pyaw nga mu.

Ya hti ai gaw, Madu a Kabu Gara Shiga rai nga ai.  

KAM SHAM SHARAWNG AWNG AI MYIT HTE HPYI GA

“Ngai myi mu mayu ai” ngu nna myi kyaw ai Bartimaeus Madu Yesu hpe htan nna shi a myi mu ai chye ju hpe hkam la lu sai. Bartimaeus a prat hta ahkyak dik htum gaw myi mu lu ai rai nga ai. Madu Yesu hpe kam sham ai sha n-ga, shi Madu hpe nhkrum hkrum hkra shakut shaja ai hpe mu lu ga ai.

Anhte kasi la mai ai lam langai gaw tinang a asak aprat hta byin mayu ai lam ni law law nga tim yawng hpe lu la na gaw nmai byin nga ai. Anhte ra ai hpe lu na nlu na ngu ai gaw tinang kade daram ra sharawng nna kade daram shakut shaja ai hta madung nga ai. Bartimaeus myi mu mayu ai a majaw e kade daram yak hkak ai raitim nbyin byin hkra shakut shaja let Madu Yesu hte mu hkrum nna myi mu lu ai chyeju hpe hkam la lu sai.

Dai rai yang tinang byin mayu ai ngu ai myit sha nre ai sha byin mayu ai lam gaw tiNang a prat hta ahkyak dik htum ai rai yang gaw shani shana ndai lam hpe chyu myit nna n-gun lagaw mahkra hpe jai lang let lu la mai nga ai. Anhte byin mayu ai lam gaw yawng a matu mai kaja ai lam rai nna tinang a prat hta ahkyak dik htum ai ngu nna hkam la let nsim nsa shakut shaja ai majaw lu la u ga law.

Fr. Philip Aung, MS

MYI KYAW AI BARTIMAEUS A KAM SHAM AI MYIT

Na a prat hta nang tsep kawp shalai kau n mai ai, ngu ai ahkaw ahkang kaba hkrum katut yu sai kun?

Dai zawn re ai mabyin, myi kyaw nna hpyi sha ai wa BaraTeme hta byin pru sai. Shi a ra kadawn ai lam a matu mara lai sa wa ai masha hte ni lu na matu shakut sai. Madu Yesu kadai re ai hte shi Madu a lam n kau mi hpe mung na yu tim, ‘Messiah’ Madu ngu ai; ‘Dawi a kasha’ rai nga ai lam hpe gaw shi atsawm n chye shi nga ai. Madu Yesu, shi hpe mu chye ya na matu BaraTeme hta grai shakut la ra sai. Masha law law wa shi hpe atsin sha nga na jet kau wu ai. Rai yang, masha dai ni hpa majaw, shi a jahtau marawn ai hpe shazim kau ya mayu ai kun?

BaraTeme mahtang shanhte a simsa lam hpe jahten kau ya nna Madu Yesu a ahkyak la ya na hpe ra sharawng nga ai. Masha law law hte hkawm sa nga yang, sharin achyin ai lam gaw, Rabbi ni agalaw nga ai lam rai nga ai. Madu Yesu mahtang, Shalai wa ai poi lawm na matu Yerusalem de lung wa ai lam ntsa hta rai nna, nawku poi sa masha law law mung Shi a hpang hkan nang ma ai. BaraTeme hpe shazim kau na shawa masha shakut ai rai tim, Shi a jahtau marawn ai nsen gaw Madu Yesu kaw da nu ai.

Ndai mabyin hpe yu nna anhte a lapran hta Karai Kasang kaning rai nna amu galaw ai, ngu ai ahkyak ai lam hpe chye la lu sai. Myi kyaw ai wa gaw Madu Yesu e mu la u ga shakut shaja ai rai tim, shi hpe pat shing dang ai ni hte hkrum sai. Madu Yesu mung, shi a sharin shaga nga ai lam hpe ding bai ding na jaw ai majaw, dai myi kyaw ai wa hpe ahkyak n la ai sha lai mat wa na mung mai byin nga ai. Ga shaga ai hta grau ahkyak ai magam bungli hpe galaw sai. Dai myi kyaw ai wa gaw Madu Yesu hpe tsep kawp ra kadawn ai hte Shi Madu mung dai wa a hkam sha lam hpe matsan dum ai sha n rai, shi hpe bai hkye mawai la sai. Mying dan hkung ai mungga hkaw ai ni hpe masha ni hkungga jaw na, madat ya na loi ai rai tim, matsan dum lama ai hte garum kahtau chye ai ni hpe grau tsawra ma ai. Madu Yesu gaw, makam myi hte Shi Madu hpe chye ya ai BaraTeme hpe hkum hkrang myi n mu ai kaw nna shamai shatsai ya nu ai.

Alexandria mare na Clement (AD 150-215), Nawku Hpung a kaji kawa, ndai BaraTeme a makam hte seng nna tsun shaleng ai hta, anhte a makam hpe mung Hkristu a Mungga n’htoi hta bang tawn da ra ai. “Karai Kasang htet da ai ga asan apra rai nga ai rai nna, shinggyim myi sha hpe jahtoi ya nga ai. Hkristu hpe hkap la u, mu lu na atsam hpe hkap la u, na a ning htoi hpe hkap la u, rai yang, Karai hte masha hpe asan sha nang mu lu na ra ai. Dai hte gaw aja hta jet htum ai, aja hta grau mai ra nna, lagat ntsin hte gitbaw hta n-ga, grau dwi nga ma ai” (shk.kn 19:9-10).

Nsin hta lup da hkrum ai myit masin hpe wenyi a ninghtoi jahtoi ya lu ai Karai hpe n ra sharawng ai kadai wa nga na a hka? Madu hpe shakawn kungdawn ga, Karai Kasang gaw kawa rai nga ai lam anhte hpe madun ya nga ai. Nang Madu a mungga gaw ngai hpe hkye la nna, Na a shakawn mahkawn ngai hpe sharin ya nga ai. Karai Kasang hpe tam let ngai dam mat wa ai rai tim, Nang Madu gaw ngai a hkrun lam hte ning htoi rai nna, Nang hta Karai Kasang hpe ngai mu la nna Kawa Karai hpe hkap la lu nna, Madu hte rau hkring htawng dagraw la lu ai ngai tai wa ai gaw, Nang Madu ngai hpe Na a hpu nau wa shatai la ai majaw rai nga ai. 

Dai majaw, Tengman ai Tara hpe malap mali re ai lam hpe kabai jau sa ga, anhte a myi hpe pat shingdang tawn ai lam ni hpe shatsai kau ga, hte Teng man ai Karai Kasang hpe myit aru yu nga ga, dai hpang Karai Kasang hpe mahkawn ndai hte shakawn kungdawn nga ga law; “htoi tu u law Ninghtoi e, anhte hpe ka up ai ninghtoi, si ai hka raw hta na anhte hpe, shaw la na matu hte, Sumsing Lamu a Ninghtoi gaw jan hta grau htoi tu kabrim nna mungkan ga kaw lu la mai ai dwi sau ai hta grau nga ai”!

Karai Kasang a shamai shatsai ai chyeju hte ninghtoi hpe nang tam nga ai kun? BaraTeme zawn ngang grin ai makam, Karai a mai kaja ai hte shaman chyeju hpe kam hpa myit kaba hte Madu Yesu hpe nang tam nga ai kun?

“Madu Yesu e, n kam sham ai hte shut hpyit mara a nsin kaw nna ngai hpe shaw la rit. Makam masham a myi ngai hpe jaw ya nna ngai na prat hta anga nga ai, Nang Madu a Tengman ai Mungga hpe chye lu u ga law."

PRANWAN LADAW LABAN (30) SHANI NA CHYUM LAIKA

25 October, 2015

CHYUM  MUNGGA  DAW  1

Yeremia 31: 7-9

Ya hti na gaw, myihtoi Yeremia a laika hta na rai nga ai.

7 Madu ning nga ai: Yaku a lam kabu gara ai hte mahkawn mangoi mu! masha amyu yawng hpe woi awn ai. Du magam hpe, grau ai nsen hte shagrau sha-a mu. Madu gaw shi a amyu masha ni ngu ai, naw ngam ai Israela a kashu kasha ni hpe hkye hkrang la sai, nga nna kajai gumhkawng let shakawn kungdawn mu. 8 Yu mu, ngai shanhte hpe dingdung mung de na woi wa nna, lamu ga htum ai de na shinggyim la na nngai: myi kyaw ai hte lagaw hten ai ni, na-um nasin re ai ni hte, shinggyim machyi hkrum ai numsha ni, yawng mayawng hte hpe ngai shinggyin la nna, masha unawng uwa kaba bai wa na mara ai. 9 Shanhte gaw hkrap ngu hkrap ngoi ai hte sa wa masai; ya, ngai shanhte hpe woi wa yang, shanhte hpe shalan shabran ya na nngai. Ahtu kataw shara n nga ai, malang ai numda lam hku, ngwi ai hka kau de ngai shanhte hpe lakawn woi wa na nngai. Kaning rai nme law, ngai gaw Israela a kawa rai nga nngai; Ehprim gaw nye a kasha alat rai nga ai.

          Ya hti ai gaw, Karai kasang a mungga rai nga ai.

CHYUM  MUNGGA DAW  2

Hebre  5: 1-6

Ya hti na gaw, Hebre masha ni hpang de San Pawlu shagun dat ai laika hta na rai nga ai.

    1 Masha hta na lata la ai, hkungga nawng ai jau shagu gaw, shut hpyit mara a jaw e, kumhpaw kumhpa hte shagu hkungga nawng ya u ga, Karai Kasang hte seng ai lam hta e, shinggyim masha ni a matu, ahkaw ahkang dang da ai wa rai nga ai: 2 shing rai, masha a n-gun kya ai lam ni shi hpe shing grup nga ai majaw, n chye n chyang ai ni hte lam dam mat wa ai ni hpe, shi myit galu kaba ai hte woi awn sa lu ai. 3 de a majaw, mung masha ni a mara a matu, shi hkungga nawng ya ra ai hta n-ga, tinang shut hpyit mara a matu mung, shi hkungga nawng ya ra nga ai. 4 kadai mung jau a arawng hpe, shi hkrai dang la lu ai n rai; Arun zawn, Karai kasang e shaga la ai hpe hkrum ra ai. 5 Dai hte maren, Hkristu mung hpung shingkang lu la na matu, jau a ahkaw ahkang, Shi hkum hpe shi hkrai dang da nu ai n re ai sha, “Ngai sha nang rai nga ndai; Dai ni ngai nang hpe shaprat sade ai.” nga nna Shi a lam tsun ai Wa kaw nna dai ahkaw ahkang lu la nu ai. 6 Dai hta kaga, “Nang gaw Melhkisedek a hkring htawng lam hte maren, htani htana hkungga nawng ai jau rai nga ndai.” Nga nna shara kaga mi hta, dai wa gaw Hkristu a lam naw tsun nga ai.

Ya hti ai gaw, Karai kasang a mungga rai nga ai.

KABU GARA SHIGA

Marku 10:46-52

Ya hti na gaw, Marku a laika hta na Kabu Gara ai Shiga rai nga ai.

         46 Yesu gaw Shi a sape ni hte masha unawng uwa kaba hte rau, Yerihko mare de na pru wa yang, myi kyaw nna hpyi sha ai, Bara-Time mying ai Time a kasha gaw, dai lam makau e dung nga ai.47 Nazaret na Yesu lai sa ai hpe shi na jang, Dawi a kasha Yesu e, ngai hpe matsan dum la e law, ngu nna hpyi jahtau wu ai.48 Masha law law wa, shi asim sha nga nga u ga, shi hpe daru kau mu ai. Shi mahtang, Dawi a kasha e, ngai hpe matsan dum la e, ngu nna grau jahtau shaja wu ai.

        49 Yesu gaw tsap let, Shi hpe nang de woi wa marit, nga ai. Masha nkau mi gaw dai myit kya ai wa hpe shaga ai hte, Ngwi pyaw n ga, hpa n hkrit ra sai; rawt u, shi nang hpe shaga nga ai, ngu mu ai.50 Shaloi Yesu shi hpe ga tsun nna, Ngai nang hpe hpa galaw ya na ra n ta? ngu wu ai.51 Myi kyaw ai wa gaw, Rabuni, nye a Madu e, ngai myi mu mayu ai, ngu nna Shi hpe tsun wu ai.52 Yesu gaw, Wa su; na a kam sham ai gaw nang hpe shamai ya nit dai, ngu nna shi hpe tsun wu ai. Dai wa gaw shaloi jang myi mu lu nna, Yesu sa wa ai lam de hkan nang nga ai.

Ya hti ai gaw, Madu a Kabu Gara Shiga rai nga ai.

AP NAWNG DAWJAU AI MYIT GAW KAJA HTUM

           Nang, ningbaw (snr) hpang hkan ai wa tai mayu ai kun? Yawng a shawng (snr) hpang jahtum masha nang tai mayu ai kun?

           Madu Yesu a sape lahkawng chyawm gaw Sumsing Mungdan hta shara kaja lu la na matu tsun nga ma ai. Hkik hkam ai shara hpe ra sharawng ai gaw anhte yawng hta rawng chyalu rai nga ai. Kadai wa, hpang jahtum hte kaji dik ai wa tai mayu ga ai rai? Madu Yesu, anhte n myit mada da ai lam galaw sai; tengman ai hkik hkam lam hte hpung shing kang gaw kaning re ai hpe madun ya sai. Lama na anhte hta numbat langai hte hkik hkam ai wa tai mayu ai rai yang, anhte hkum hpe anhte shangun ma a shara kaw nga ra nna, masha kaga ni a myit shang sha ai lam ni hpe anhte myit yu ya nna, tinang a akyu ara zawn galaw ya chye ai ni rai ra ai hpe tsun dan sai.

Arawng aya hpe, htum n-nga ai tsawra myit hte sak jaw ap nawng lam hte rau run na matu Madu Yesu matut da ya sai. Hkam sharang tsaw ra myit n lawm ai arawng aya gaw mazut ai rai nna tinang akyu a matu sha rai na re. Shi Madu hta byin na nni nkri lam hpe ading tawk, asan brang tsun dan sai. Shi a Mungdan hta rau sha ning ngai nga lu na matu, shi lu ai gawm hpe hkan lu lawm ra ai lam, sape ni hpe tsun dan nu ai. Dai gawm hta, nni nkri hkam la ai lam ni lawm nga ai hte Hkristu a mying hta tinang a sai hpe masha kaga wa a matu nawng ya kau ai du hkra rai nga ai.

Rai yang, anhte yawng a matu kaning re ai gawm hpe Madu Yesu myit da ya sai kun?  

Sape n kau mi a matu rai yang, hkum hkrang hta nni nkri hkam sha ai hte Hkristu a mying nsang hta tinang a asak ap nawng kau ai lam, dai zawn hta gawm hta lawm nga ai. Rai tim, anhte law malawng a matu rai yang, dai gawm hta, shani shagu na Hkristan nga sa lam rai nga ai; hkam sharang ai lam, myit daw myit hten ai lam, hkrat sum ai lam, shakut shaja ra ai lam, ni hte agung alau lam ni lawm nga ai. Madu Yesu gaw anhte ni yawng a matu Shi a prat hpe jaw kau sai hte shani shagu na anhte a prat hta mung masha kaga ni hpe tsawra myit hte galaw daw jau lu na matu saw shaga nga ai. Dai zawn re ai lit magam ni hpe kabu gara ai hte galaw lu na matu byin shangun ai gaw saw shaga nga ai. Dai zawn re ai lit magam ni hpe kabu gara ai hte galaw lu na matu byin shangun ai gaw tsawra myit re: Dai tsawra myit gaw anhte hte rau makau mayang na ni a sak prat hpe mung galai shai ya lu ai atsam rawng nga ai. Dai ‘Tsawra myit’ myit hpe kasa Pawlu tsun dan ai gaw, “kaning rai n me law anhte hpe jaw da sai Chyoipra ai wenyi e Karai Kasang a tsawra ai myit, anhte a kraw lawang hta e ru bang ya ma ni ai” (Rom 5:5) nga ai. Lama na, Karai Kasang a tsaw ra ai myit, anhte a prat hpe galai shai ya lu na ahkang jaw ai rai yang, kaning re ai nni nkri lam mung, yak hkak la sai n rai.

Madu Yesu a sharin shaga ai lam hpe, Nawku Hpung a shawng na Ji wa ni tsun dan ai gaw, ‘ap nawng daw jau ai lam gaw Hkristu hte rau up hkang ai lam rai sai’, nga ai. Anhte a htingbu ni/jinghku ni a mai kaja lam a matu anhte sak jaw ap nawng daw jau ai marang e, Karai Kasang anhte hpe tsawra ai zawn, anhte mung bai nhtang tsaw ra lu nna, Karai Kasang a Mungdan, arawng aya, ahkaw ahkang ni hpe garan la ai lam rai sai. Madu Yesu galaw lai wa sai zawn tinang a prat hpe manang wa na matu ap nawng ya na jin jin rai sai kun?

         “Madu Yesu e, masha kaga ni hpe daw jau ap nawng lu na matu shingdang tawn da ai, gumrawng gumtawng lam ni hte hkrit ai kaw nna, ngai hpe shalawt dat ya rit. Nang Madu a tsawra ai wan, ngai a salum hta mung agrung wa nna, nang Madu hta ngwi pyaw kabu gara ai hte ap nawng daw jau lu u ga law."

PRANWAN LADAW LABAN (29) MUNGGA

Dai ni na kabu gara shiga hta Yaku hte Yawhan gaw Madu Yesu hpang de sa nna shi a mungdan hta Shi Madu a makau e nga lu ai hpung shingkang hpe jaw na matu hpyi shawn ma ai.

Anhte shing gyim masha ni hta arawng ara hpe ra sharawng ai myit jasat nga chye nga ai. Dai rai yang mying kaba na, arawng aya lu na hpe hkan tam chye nga ai. Rai tim Madu Yesu tsun ai hpung shingkang arawng sadang gaw hpyi la nmai nga ai. Dai hta n-ga shakut nna mung tam la nmai nga ai.

Hpung shingkang arawng sadang gaw gingdan ai wa a matu Karai Kasang lajang shachyip tawn da ai sut gan rai nga ai. Ndai arawng sadang ni hpe lu la hkra shakut ai wa a matu nrai nga ai. Ting gyeng myit hpe kau da nna manang wa hpe daw jau ai wa, htingbu wa a ra kadawn ai lam hpe shawng nna jahpring shatsup ya ai wa a matu sha rai nga ai.

Madu Yesu a makau hta nga na hpung shingkang arawng sadang hpe ntam ai sha htingbu wa hpe tsawra myit kaba hte daw jau nna Karai Kasang a man hta hpung shingkang arawng sadang hte gingdan ai masha ni byin tai wa u ga.

PRANWAN LADAW LABAN (29) SHANI NA CHYUM LAIKA

October 17, 2015

CHYUM MUNGGA DAW 1

Esaia 53:10-11

Ya hti na gaw, myihtoi Esaia a laika hta na rai nga ai.

10 Madu gaw Shi a shangun ma hpe, nni nhkri kaba hte, myit htum hkra machyi shangun na rai nga ai. Madu a shangun ma gaw shi a asak hpe gawng malai hkungga shatai jang, shi a aru arat hpe mu lu na ra ai; shi a prat galu wa nna, Madu ra ai hku shi a lata hta byin wa na ra ai. 11 Shi a myit masin nni nhkri hkam la ngut jang, nhtoi hpe mu lu nna, shi a myit dik na ra ai.Nye a dinghpring ai shangun  ma gaw, shi a nni nkri a marang e, masha law law hpe ding hpring shangun nna, shanhte a shut hpyit mara hpe shi nan gun hpai na ra ai.

Ya hti na gaw, Karai Kasang a mungga rai nga ai.

CHYUM  MUNGGA  DAW  2

Hebre 4: 14-16

Ya hti na gaw, Hebre masha ni hpang de shagun dat ai laika hta na rai nga ai.

14 Sumsing lamu de hkrang shang wa sai, hkungga nawng ai Jau kaba, Karai a kasha Yesu Hkristu hpe anhte lu ga ai majaw, anhte kam sham ai nawku htung hta maju jung nga ga. 15 Kaning rai nme law, anhte a n-gun kya ai lam hpe, matsan n chye dum ai hkungga nawng ai Jau anhte lu ga ai n rai, lam shagu hta anhte zawn, agung alau hkrum yu ai hkungga nawng ai Jau kaba lu ga ai; rai ti mung, shi mahtang mara hpa mung n galaw yu ai. 16 Dai rai nna, matsan dum ai hkam la lu na hte, kyin dut ai aten e shadaw shalan ai chyeju mu lu hkra, chyeju tingnyang a man de, anhte nden ja ai myit hte sit shang wa ga.

      Ya hti ai gaw, Karai kasang a mungga rai nga ai.

KABU GARA SHIGA

Marku 10:35-45

Ya hti na gaw, Marku a laika hta na Kabu Gara ai Shiga rai nga ai.

35 Zebedi a kasha Yaku yan Yawhan gaw Yesu hpang de sit sa nna, Sara e an hpyi ai hte maren Nang jaw na hpe ra nga ga ai, ngu nna Shi hpe tsun mu ai.36 Yesu gaw, Nan hpa baw ra myit ta? ngu nna shan hpe tsun mu ai.37 Shan gaw, Na a hpung shingkang hta nang shang wa jang, Na a hkra maga de langai mi, pai maga de langai mi, dung nga lu na ahkang an hpe jaw mi, ngu nna hpyi ma ai. 38 Yesu mahtang, Nan hpa hpyi nga ai hpe n chye myit dai. Ngai lu nga ai gawm hpe, nan lu lu na rai nga myit ni? Ngai hkam la na kashin kamun hpe mung, nan hkam la lu na rai nga myit ni? ngu nna Yaku yan Yawhan hpe san mu ai.39 Shan gaw, An galaw lu na ga ai, ngu mu ai. Yesu htan let, Ngai lu nga ai gawm hta na, nan mung lu na rai nga myit dai: ngai hkam la na kashin kamun hpe mung, nan hkam la na rai nga myit dai: 40 rai ti mung, nye a hkra maga pai maga de dung nga lu na ahkang n jaw lu nngai; dai gaw, san da sai ni a matu sha rai nga ai, ngu nna shan hpe tsun mu ai. 41 Ya kaga sape shi dai ga hpe na yang, Yaku yan Yawhan hpe myit kahtet ma ai. 42 Yesu shi a sape ni hpe shaga la nna, Maigan amyu ni hta up na ahkang lu la ai ni gaw, masha ni a ntsa e gumrawng gumtawng ai hku galaw ma ai; du magam re ai ni mung shanhte a ntsa e adip arip hku hkang da ma ai.43 Nanhte chyawm gaw dai hku n mai galaw ai.44 Nanhte hta grau mayu ai wa kadai mung, yawng a mayam tai u ga:45kaning rai nme law, Masha Kasha pyi, shangun ma hpe yam sha na, nga nna du sa ai n rai; shangun ma a amu hpe galaw daw na hte, masha law law a matu, shi asak hpe gawng malai jahpu shatai ya na, nga nna du sa ai, ngu nna sape ni hpe tsun mu ai.

Ya hti ai gaw, Madu a Kabu Gara shiga rai nga ai.

MYIT DIK MYIT MADA SHARA

Ngwi pyaw simsa ai hte shimlum ai prat hpe sharawng ai anhte hpe, hpa gaw myit dik shara, myit mada shara jaw ya nga nta?

Sutgan lu su ai, shim lum ai prat hpe lu tawn da ai, shabrang wa marai mi, Madu Yesu hpang de sit sa wa ai. Shi hta ra kadawn ai lam langai mi nga nna, dai gaw; ja, gumhpraw hte mari la n lu ai, htani htana ngwi pyaw sim sa lam rai nga ai. Shi lu la ai mahtai chyawm, shi ra ai hte shai nga ai. Hkang da ai ga ndat ni yawng hpe shi hkan shatup ai nga tim, Madu Yesu tsun dat ai ga gaw Shi myit masin hpe hkra ya sai. Karai Kasang hpang de myit masin hkum hkrang yawng hte sit shang lu na Shi hpe lama mi pat hkum da sai. Arung arai hta shi ra kadawn ai lam n-nga tim, shi lu ai lam hta shi jung nga ai. Shi a lu su lam hta shi a myit mada shara hte myit dik shara hpe tawn da ai. Karai Kasang hpe chyu sha lu la da na matu, Madu Yesu tsun ai shaloi shi kajawng mat sai. Hpa majaw myit yawn ai hte Madu Yesu kaw nna shi hkawm mat wa ai kun?

Shi a sut gan hte ngwi pyaw simsa lam a myit mada shara gaw shara shut ai majaw rai nga ai. Shi hpe Madu Yesu ning dat ai ga tsun sai. Shi a sut su lam sum ma mat na tsang ai majaw, kaga masha ni hpe jaw kau na shi hkrit nga ai. Shi a sut su lam hta kabu pyaw ai hte shim lum lam mu tam ai majaw shawang tsawra myit kaba hte daw jau na hpe shi n galaw lu sai.

Sumsing Mungdan hta sut gan lu na matu hpa majaw ‘yawng dut kau na’ hpe Madu Yesu tsun ai rai kun? sut gan ngu ai shaloi myit masin de grai ni htep ai, ra marin ai hte byin mayu ai lam yawng hkra hte matut mahkai nga ai. Anhte a myit masin hta bang da dik htum ai gaw anhte manu shadan dik htum ai sut gan rai nga ai. Madu Yesu hpe nan anhte manu shadan dik ai sut gan hku nna lu da mai ai. Anhte lu da ai lam yawng hpe tawn kau nna Madu Yesu hpe anhte a sut gan shatai la ai lam gaw myit yawn hpa n rai, kabu gara mai dik ai lam rai nga ai. {makoi da ai sut gan a lam gashadawn ni hpe Mt 13:44 hta hti la mai ai.} anhte lu malu yawng hpe dut kau ai ngu tsun ai shaloi; myit dun nga ai lam ni, manaw manang ni hte kanawn mazum lam, ka up da ai lam, amu bungli, pyaw len chyai ai lam ni, nga pra sa ai lam ni, Karai Kasang hpe yawng a ning shawng shatai na kaw nna pat shingdang tawn da ai lam ni yawng rai nga ai.

Karai Kasang hpe mung htingbu wa hpe mung gam jaw gam ya chye ai wa hta Karai Kasang anhte hpe jaw ya ai daram anhte n lu jaw ai hpe mu lu na re. Karai Kasang gaw manu daw dan n lu ai Sumsing sut gan hte anhte hpe shaman ya nga ai. Karai Kasang gaw, ja gumhpraw hte mari n mai ai lam yawng hkra anhte hpe jaw ya ai. Karai Kasang shi chyu sha, anhte a masin salum kaw nna sung htum ai myit mada ai, sharawng awng ai lam ni hpe shadik ya lu ai. Madu Yesu hta jet ai kabu ngwi pyaw ai lam tam lu na matu shing dang tawn da ai lam yawng hpe nang tawn kau lu na rai kun?

Rai yang, hpa majaw, Madu Yesu gaw sut su ai ni, sut su mayu la ai anhte yawng hkra hpe dai daram laja lana tsun sai rai kun? Sut su nga mai ai lam hpe ning hkap ai rai kun? Madu Yesu gaw, sut su lam hpe mung, sut su ai ni hpe mung, ning hkap ai lam n-nga ai hpe anhte chye lu ga ai. Shi Madu hta sut su ai [kang hta ai ni] manang ni lu nga ai. Marai mi gaw sape pyi tai wa ai. Madu Yesu a sadi jaw ai lam gaw, Gashaka dingsa na hpaji ga hpe bai kahtap tsun ai lam rai nga ai. “Malang ai hku hkan nang ai, matsan mayan wa gaw, magaw ai hku hkan nang ai sahti wa hta, grau mai nga ai” (Ga 28:16, shk 37:16). “sut gan lu hkra tinang hkum hpe hkum jahki et; na a nyan hta hkum hpa et” (Ga 23:4). Madu Yesu tsun ai hte maren rai yang, sut su ai ni gaw, Karai Kasang a mungdan masha tai na n mai byin ai zawn rai nga ai.

Palestine lamu ga hta rai yang, gawla-uk gaw kaba dik ai du sat rai nga ai. ‘samyit na hku’ ngu ai hpe ading tawk lachyum hta la n mai na re. Dai gaw, mare chyinghka kaba pat kau ngut ai hpang du wa ai ni, mayun shang lu na matu galaw da ai, mayun chyinghka kaji rai nna masha marai mi pyi loi gum nna she shang mai ai. Gawla-uk rai yang, arung arai ni yawng jahkrat kau nna htimkum hkawm let sha shang mai ai rai nga ai.

Hpa majaw sut su lam hpe Madu Yesu sadi jaw tsun taw ai rai? Sut su lam gaw shut ai masa hta anhte hpe shang lawt lu shangun ai. “ngai gaw sut su nga nngai, ngai hta sut ring gan chying sali ai, ngai hpa n rai ni ai” (shngrn 3:17) nga ai majaw ‘Ladoki mare’ nawku hpung hpe sadi jaw daru sharin ga tsun sai. “sut su mayu ai ni gaw, hten byak nna shaza kau ai hta, masha ni hpe marit si shangun ai, . . . .gumhpraw marin ai myit chyawm gaw, n hkru n hkra ai amyu myu a ru pawt rai nga ai” (1 Tim 6:9-10). Lazaru hte sahti wa a labau hpe mung anhte hti la mai ai (Lk 16:19- ). Karai Kasang hpe daw jau na matu mung shanhte malap kau wu ai. Chyum laika e sharin ai gaw, anhte makoi da ai hpe sum kau nna, anhte jaw kau ai hpe lu la na’ nga ai. Gam jaw gam ya chye ai lam gaw ndai prat hta mung, hpang na prat hta mung, manu jahpu bai lu la na rai nga ai. Madu Yesu jaw ya na gaw, gumhpraw hte mung mari la n lu ai, lagut mung n lagu lu ai, sut gan rai nga ai. Anhte a myit masin hta rawng dik ai lam gaw anhte manu shadan dik ai lam rai nga ai. Na a sut gan gara kaw nga ai rai?

Madu Yesu e, Sumsing lamu na sut gan de du lu na, nang anhte a salum hpe hpaw ya ni ai. Nang Madu, ngai a sut gan tai nga ya rit, yawng mayawng Nang Madu hta jaw kau lu na matu ngai hpe n-gun atsam jaw ya rit law