PRANWAN LADAW LABAN (22) MUNGGA

Hparishe ni hte laika ka ai sara ni hpe Madu Yesu Hkristu galoi mung shadum jahprang ai lam langai gaw shanhte a myit masin san seng na matu shakut ai lam re. Ndai masha ni gaw shanhte hkan lang ra ai htung tara ni hpe nhprai n-yet ai sha masha man hta hkan shatup ai ni rai ma ai. Shanhte a yaw shada ai lam langai mi gaw masha man hta ding hpring ding man ai ngu ai hpe mu shangun mayu ai hta sha n-ga nhkan shatup lu ai ni hpe jeyang daw dan ai lam hpe galaw sa ai lam rai nga ai. Dai hta grau nna sawng ai gaw shanhte a myit masin hta tsaw ra myit hte gaw gap da na malai manang ni hpe nju ndawng ai, jeyang daw dan mayu ai hte masha hpe tsaw ra matsan dum ai myit ni nrawng nga ai. Dai rai yang Madu Yesu shanhte hpe htung tara ni hpe hkan shatup ai sha n-ga grau nna ahkyak nga ai myit masin hpe jasan jaseng nna masha ni hpe tsaw ra myit madun dan na matu tsun shadum ai rai nga ai.

Jahpoi atsawng hkrum ai Hparishe ni kaw nna kasi la mai ai lam langai mi gaw hkan shatup ra ai htung tara ni hpe tup hkrak hkan shatup ai lam rai nga ai. Htung tara ngu ai gaw shinggyim masha ni a ngamu ngamai lam hpe akyu jaw na matu yaw shada ai rai nga ai. Tinang hkan nang ra ai htung tara ni hpe hkan shatup ai shaloi manang ni jahpoi kau ai hpe hkrit tsang ai majaw shing nrai arawng lu mayu ai majaw nre ai sha tinang a mai kaja ai lam a matu re ngu nna myit hta bang tawn nna hkan shatup ai hte grau nna kaba ai tsaw ra myit hpe gaw gap da lu na matu ahkyak nga ai.

Madu Yesu shadum jahprang ai hte maren anhte hkan shatup ra ai htung tara ni hpe kaja ai yaw shada ai hte san seng ai myit masin hte hkan shatup lu nna Karai Kasang hpe graw nna kam sham ai hte htingbu wa hpe tsaw ra myit madun dan lu ai ni tai wa lu u ga.

Fr. Philip Aung, MS

PRAN WAN LADAW LABAN (22) SHANI NA MUNGGA

30^th August 2015

Karai Kasang hkap la ai nawku daw jau ai lam rai na matu masha hpe n san n seng di ai lam gaw hpa rai kun? 

Yuda ni gaw, Sinai bum hta Mawshe jaw da ai tara hte maren grai hkan shatup let galaw shakut sai. “Ngai Karai Kasang Chyoipra nga nngai majaw, nanhte mung tinang hkum hpe shachyoi shapra nna, Chyoipra nga mu: (J Jau 11:44) nga nna Karai Kasang Shi amyu masha ni hpe tsun da sai. Dai hpe mahta nna Ji wa ni gaw htung tara law law hpe ka lajang da sai hte dai gaw shani shagu na prat hta amyu masha ni a matu lit kaba rai wa sai. Madu Yesu, Shi a sape ni hpe lagaw lata san seng ai lam n nga ai sha lu sha, sha na ahkang jaw ai majaw, Hparishe ni hte laika ka ai Sara ni myit htum bu nga ai. Yerusalem mare kaw nna Galilee du hkra masha dat let Madu Yesu hpe mara jaw lu na matu shakut masai. Karai Kasang a yaw shada ai lam hte ga madat tawn da ai a lachyum tsun dan nna shanhte hpe Madu Yesu bai htang sai. 

                  Shanhte myit dai nawku makam masham lam nga ai hte myit, nyan hpe pat tawn da ai majaw Karai Kasang n dat da ai ga hpe kaman di kau ya ai lam, Madu Yesu bai htang tsun sai. Lam lahkawng hta Madu Yesu, shanhte hpe daru sharin sai. Langai; hpyi hpun ai lam; sumla hkrung shayi/shadang sha ni hkrang shala dan ai zawn, Karai Kasang a madat ga hpe ntsa lam yu yang grai hkan shatup ai zawn rai tim, myit kraw kata de gaw nat satan a amu rawng nga ai. Lahkawng; Karai Kasang a ga ndat ni hpe, tinang ra ai maga de gang la nna, mara tam mayu ai myit hpe Madu Yesu madi madun ya sai. N-gup aga hte gaw Karai Kasang nga nga tim, ta tut magam n lawm ai shanhte a masa hpe Madu Yesu tsun sharin shaga sai. 

Karai Kasang a mungga gaw, anhte hpe, gumrawng gumtawng ai myit, ting kyeng myit marin ai lam ni kaw nna shalawt ya na atsam nga nga ai. Dai mungga gaw, anhte a myit mang ai hpe atsam jat jaw ya nna, masin salum hpe san seng ya ai hte Karai Kasang sharawng ai hte shi a tsawra myit hpe chye na shangun ai. Madu a daw sha poi de sit shang wa na matu anhte hpe saw shaga nga ai. Na a myit masin salum san seng ai hte nang sit shang nga ai kun? Chyoipra ai Wenyi Karai Kasang jasan jaseng ya na hpe Madu Karai kaw hpyi la ga!

                  Anhte a sak prat hta nat satan kanang na pru wa ai rai? Anhte a sak prat hpe kaning di kau da ai rai? Nawku Hpung woi ningbaw ni hpe ndai lam hte seng nna Madu Yesu tsun shaga sai. Htung lai masa hpe awu asin di kau ai lam hpe koi yen ai nga tim, n kau mi Karai Kasang hpe hkrit ai majaw galaw ai, n kau mi shada da hpe hkrit ai majaw galaw ai rai sai. Teng sha wa awu asin re ai lam gaw, masha a sung htum ai shara kaw nna pru wa ai re lam, Madu Yesu tsun dan sai. Mara gaw byin pru ai n rai. Masha a kraw lawang kata kaw nna she n kaja ai myit, sharawng ai lam ni shawng byin pru wa ai. Dai majaw, Karai Kasang gaw matsan dum ai hte shi a kasha hpe shangun dat nna anhte hpe hkye hkrang la na shakut sai. Dai matsan dum lama ai chyeju hpe anhte hkam la lu na matu, anhte a mara ni hpe yin la ra ai. “mara n lu nngai, ngu tsun ai rai yang, tinang hkum tinang masu ai rai nna tengman ai gaw anhte kaw n nga sai. Lama na anhte a mara ni yin la ai rai yang, Karai Kasang gaw kang ka ai hte tara rap ra ai rai nna, anhte a mara ni hpe raw dat kau ya nhtawm, jasan jaseng ya na rai nga ai. Karai Kasang chyu sha anhte a myit, masin salum hpe san seng ya nna Chyoipra ai Wenyi a marang e hkum tsup shangun ai. 

                  Karai Kasang a mungga hte wenyi a marang e tengman ai ning htoi hpe anhte mu chye lu nna Madu Karai a matsan dum chyeju hte mara raw ya ai hpe anhte hkam la lu na re. tengman ai wenyi gaw anhte hpe shalan shabran ya na rai nga ai. Wenyi jahtoi ya ai marang e, teng ai hte myit sawn sum ru la lu nna, Hkyela Madu Yesu, anhte ni a mara hpe hkyem sa jaw ya ai lam chye wa nna Shi Madu hpang de sit shang na matu n-gun atsam jaw ya na re. 

                  Shut hpyit mara a magam prat kaw nna lawt lu hkra anhte kaning rai nga pra lu na rai? “shut hpyit mara gaw chyinghka makau e mayun hpum nga ai, dai gaw nang kaw kanan mayu nga ai; rai ti mung, dai hpe nang dang up lu na rai ndai” (Npt 4:7) nga nna Karai Kasang sadi jaw nga ai. Na a myit masin chyinghka makau e shut hpyit mara hpum nga na, ahkang jaw ai kun? shut hpyit mara hpe anhte ning shawng jaw lu na n rai, Karai Kasang a shaman chyeju jaw e, shut hpyit mara hpe up hkang dang kau lu na rai nga ai. Shi Madu a n-gun atsam gaw kaja ai hpe lata la na, n kaja ai hpe ning dang kau lu na chyeju jaw na re. Karai Kasang a tsawra atsam gaw nang a masin salum hpe galai shai ya lu ai lam nang kam sham ai kun? 

“Madu Yesu e, Na a Chyoipra ai Wenyi hte ngai hpe jahpring ya nna tsawra ai hte san seng san pra shangun rit. Kaja ai hpe lata la lu na hte nat satan hpe ning dang kau lu na chyeju atsam ngai hpe jaw ya rit law, Amen!!! 

PRANWAN LADAW LABAN (22) SHANI NA CHYUM LAIKA

30 August, 2015

Chyum Mungga Daw 1

Tara Jahprang 4:1-2, 6-8

Ya hti na gaw, Tara Jahprang laika hta na rai nga ai.

            1 Mawshe shawa masha ni mahkra hpe tsun mu ai gaw: Israela amyu e, asak hkrung nga lu nna, nanhte a nji nwa ni a Madu Karai Kasang jaw da ai mungdan hta, shang madu lu hkra, nanhte hkan shatup na matu, ngai sharing achyin da ai matsun maroi ga hte tara lam ni hpe madat mara la mu.2 Ngai nanhte hpe hkang da ai tara hta, kaga langai mi pyi jat lu na n rai; dai tara hta na langai mi pyi yet kau lu na n rai; Ngai nanhte hpe hkang da sai hte maren, nanhte a Madu Karai Kasang a tara matsun tup, nanhte hkan shatup lu na rai myit dai.

6 Dai rai nna, dai ga mahkra hpe sadi sahka ai hte hkan shatup nga mu. Shing rai, maigan amyu ni hpe nanhte a hpaji byeng-ya hta kung hpan ai lam madun dan na myit dai. Ndai matsun maroi ga mahkra hpe shanhte na yu ai shaloi, Kaja wa, ndai galu kaba ai amyu gaw, hpaji byeng-ya hkum tsup ai hte, kunghpan nga ai amyu rai nga ai, nga nna nanhte a lam kajai tsun na mara ai. Dai gaw teng nga ai;7 kaning rai nme law, anhte a Madu Karai Kasang hpang de anhte hpyi jahtau ai shaloi, Shi anhte hte ni nga ai zawn, galu kaba ai amyu kaga ni hta, dai zawn re ai Karai Kasang kadai lu a ta?8 Dai hta kaga, dai ni ngai nanhte hpe tawn da ai tara ding hpring ai daram, amyu kaga ni hta, dai zawn re ai matsun maroi ga hte hkang da ai tara hpe, kadai wa lu a ta?

Ya hti ai gaw, Karai Kasang a mungga rai nga ai.

Chyum Mungga Daw 2

Yaku 1:17-18, 21-22, 27

Ya hti na gaw, Kasa Yaku shagun dat ai Laika hta na rai nga ai.

            17 Hpu nau ni e, Kaja ai hte hkum tsup ai kumhpa yawng hte gaw, ntsa de na rai nga ai hte, nhtoi hkum ai a Kawa kaw nna yu hkrat wa nga ai; Shi hta e gale galau re ai hte, kayin kaye re ai shingnip rawng nga lu ai n rai.18 Shi hpan da ai baw mahkra hta e, shawng ngai ai nsi naisi zawn anhte tai wa lu na matu, Shi myit ra ai hku hkan let, tengman ai mungga a marang e, Shi anhte hpe shaprat dat mi ai.21 Nanhte a kraw lawang hta e hkai da ai mungga nanhte hpe hkye hkrang la lu ai rai nna, sumnung ai myit hte dai hpe hkap hkam la nga mu.22 Nanhte gaw tinang hkum hpe n hkalem myit ga, dai mungga hpe madat la ai ni sha n rai, dai hpe hkan galaw ai ni nan tai nga mu.27 Ya, kyindut hkrum ai jahkrai nmai ni hte gaida, gaina ni hpe kawan katsan nna, mungkan ga a awu asin re ai hpe koi kau yang gaw, Kawa Karai Kasang a man e san seng ai hte ra n rawng ai hku, nanhte a makam masham hpe hkan shatup nga myit dai.

Ya hti ai gaw, Karai Kasang a mungga rai nga ai.

KABU GARA SHIGA

Marku 7:1-8.  14-15. 21-23

        

Ya hti na gaw, Marku a laika hta na Kabu Gara ai Shiga rai nga ai.

1 Ya, Yerusalem mare na lung wa ai Hparishe ni hte tara sara nkau mi gaw, Yesu kaw sa du nna,2 Shi a sape nkau mi, lata n kashin ai sha, awu asin ngu ai hte shat sha nga ma ai hpe mu hkrup ma ai.3 Hparishe ni hte Yuda masha ni mahkra gaw, ji wa ni a matsun maroi hkan nga ma ai rai nna, lata hpe atsawm sha n kashin kau yang gaw, shat n sha ma ai; 4 gat de nna bai wa jang, hkum garai n shin yang, shanhte n sha yu ma ai. Dai hta n-ga, gawm ni, di ni hte magri ban wa ni hpe kashin kau ai hte, dai zawn re ai htung hking law law hpe shanhte hkran ra ma ai.5 Dai rai nna, Hparishe ni hte tara sara ni gaw, Na a sape ni, hpa majaw ji wa ni a matsun maroi hpe n hkan ai sha, awu asin re ai lata hte shat sha nga ma ta? ngu nna Yesu hpe san ma ni.6 Yesu gaw, Esaia ka da ai myihtoi ga gaw, nanhte hpyi hpun ai ni hta gaja wa teng wa sai: dai myihtoi wa ka da ai gaw: Ndai amyu gaw tinang a nten hte ngai hpe hkungga lara ti mung. Shanhte a myit masin ngai hte tsan gang malu ai:7 Masha a ga matsun hpe sha htawn sharin shaga nga ma ai majaw, Shanhte ngai hpe kaman lila nawku nga ma ai, nga nna rawng nga ai.8 Nanhte gaw Karai Kasang a hkang da ai ga hpe kau da nhtawm, masha a matsun maroi lam ni hpe sha hkan nga myit dai, ngu nna shanhte htan ya mu ai.14 Shawa masha ni hpe Yesu bai shaga la nna, shanhte hpe tsun mu ai gaw: Nanhte yawng ngai hpe madat la nna, ndai lam hpe chye na la mu:15 Masha a shinggan e nga nna, shi kata de shang wa ai hpa rai ti mung, shi hpe awu asin di kau lu ai nrai; masha a kraw kata de nna pru wa ai mahtang gaw, masha hpe awu asin di kau lu ai.21 Kaning rai nme law, masha a kraw kata de nna, n kaja ai myit mang ai, nse nsa amu galaw na, lagu na, masha sat na, num shaw na, law hpa ai, nju n dawng ai,22 hkalem ai, ngang kayut ai, manawn masham ai, shatan nhkan ai, gumrawng ai hte, angawk  re  ai myit pru wa ai.23 Dai n hkru ai lam nlang hte gaw kata de nna pru wa ai hte, masha hpe awu asin di kau wu ai.

Ya hti ai gaw, Madu a Kabu Gara Shiga rai nga ai.

PRAN WAN LADAW LABAN (21) YA NA CHYUM LAIKA

23 August, 2015

Chyum Mungga Daw 1   

                                                                              Yawshu  24:1-2, 15-18 

Ya hti na gaw, Yawshu a laika hta na rai nga ai.

            1 Yawshu gaw Israelsa amyu yawng hte hpe Shekem mare e jahpawng nna, Israela a du salang ni, ningbaw ningla ni, tara agyi ni hte hpyen du ni hpe shaga la wu ai.2 Shanhte gaw Karai Kasang a man de sa pru ai shaloi, Yawshu gaw Israela masha ni mahkra hpe tsun mu ai gaw:15 Madu Karai Kasang hpe jaw jau na nanhte ra yang gaw, gara hpe mahtang daw jau na gaw, dai ni jang lata la mu: Hka wora hkran e nga ai shaloi, nanhte a nji nwa ni jaw jau ai hpara ni rai na kun? Shing n rai, ya nanhte nga ai mung na Amori masha ni a hpara ni rai na kun? Dai ni jang lata la mu; ngai hte nye a nta masha ni chyawm gaw Madu hpe nawku daw jau na ga ai law, ngu nna tsun wu ai.

            16 Shaloi amyu msha ni gaw, Madu hpe kau da nna, hpara shaje hpe nawku jaw jau na gaw, anhte hte tsan gang nga u ga law;17 kaning rain me law, Madu Karai Kasang nan Egutu mung a mayam nta kaw na, anhte hte anhte a ji wa ni hpe woi wa mani ai.18 Anhte a man e dai lamik kumla kaba madun dan nna, anhte hkawm sa wa ai lam ting hta, anhte hpe bau sin nga ai hte, anhte lai sa wa ai mungdan shagu a amyu masha ni kaw nna, anhte hpe makawp maga la ai wa gaw, anhte a Madu Karai Kasang chyu sha rai nga ai. Dai re ai majaw, anhte mung Madu hpe nawku jaw jau na ga ai: Shi chyu sha anhte a Karai Kasang rai nga ai law, nga nna htan ma ai.

Ya hti ai gaw, Karai Kasang a mungga rai nga ai.

Chyum Mungga Daw 2   

                                                                                         Ehpesu 5:21-32

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

            21 Hpu nau ni e, Hkristu hpe hkrit hkungga ai myit hte nanhte shada da yen ya mu.22 Numsha ni e, Hkristu hpe madat mara ai hte maren, tinang a madu wa ra ai hku hkan nga mu.23 Kaning rai nme law, Hkristu gaw Nawku Hpung a baw rai nga ai zawn, madu wa mung madu jan a baw rai nga ai: Hkristu shi hkum nan dai hkum hkrang a Hkye Hkrang la ai Madu rai nga ai.24 Nawku Hpung gaw Hkristu a hkang ai hku madat ai zawn, madu jan ni mung lam shagu hta e madu wa ni hkang ai hku hkan nga mu ga.25 Lasha ni e, Hkristu gaw Nawku Hpung hpe tsaw ra nna, Shi hkum nan de a matu ap kau ya wu ai hte maren, nanhte a madu jan ni hpe tsaw ra nga mu.26 Hkristu gaw dai Hpung hpe shachyoi shapra ya na matu, hka hta mungga e dai hpe hka shin kau ya nna, jasan jaseng ya wu ai: shing rai, agang chyalang hte kapum kapam re ai hpa mung n lawm ai sha,27 chyoi pra ai hte ra n rawng ai, hpung shingkan htoi tu ai Hpung hpe, shi a matu tawn da wu ai.

            28 Dai hte maren, madu wa ni gaw tinang a hkum hpe tsaw ra ai zawn, tinang a madu jan ni hpe tsaw ra lu na ma ai. Tinang a madu jan hpe tsaw ra ai wa gaw, tinang hkum hpe nan tsaw ra nga ai.29 Masha kadai rai ti mung, tinang a hkum hpe n dawng n yawt ai n rai ai sha, dai hpe bau maka nna, lanu lahku ya wu ai.30 Hkristu gaw shi a Nawku Hpung hpe dai hku galaw ya wu ai; kaning rai nme law, anhte gaw shi a hkum hkrang na adaw ashan ni rai nga ga ai.31 Dai re ai majaw, lasha gaw shi a kanu kawa hpe kau da nhtawm, shi a madu jan hta manoi nga nna, shan lahkawng hkum shan langai sha tai wa na ra ai.32 Ya tsun ai chyum mungga hta sung la ai lam kaba ni rawng nga ai: rai ti mung, ngai mahtang gaw Hkristu hte shi a Nawku Hpung hpe sha-ang nna tsun nga nngai.

Ya hti ai gaw, Karai Kasang a mungga rai nga ai.

GABU GARA SHIGA 

                                                                                           Yawhan 6:63-69

Ya hti na gaw, Yawhan a laika hta na Kabu Garu ai shiga rai nga ai.

            60 Yesu sharin shaga ai mungga madat la ai hpang, Shi a sape ni law law wa, Ga ndai gaw yak la ai ga rai nga ai. Kadai wa madat lu na i? nga ma ai.61 Shi a sape ni tsun aput nga ma ai hpe Yesu chye wu ai majaw, Shi shanhte hpe, Ga ndai gaw nanhte a kam sham ai myit hten shangun wa sani?62 Masha Kasha gaw, myi shi nga ai shara de bai lung wa ai hpe nanhte mu yang gaw, kaning nga na myit ta?63 Asak jahkrung ya ai gaw nsa wenyi rai nga ai; hkum shan mahtang hpa mung n shabyin lu ai.64 Rai ti mung, nanhte hta na nkau mi gaw n kam n sham myit dai, ngu mu ai. Kaning rai nme law, Yesu gaw, n kam n sham ai ni kadai rai ma ai mung, Shi hpe ap kau na wa kadai re ai mung, shawng nna chye da nga ai.65 Yesu bai tsun ai gaw: Ndai lam a majaw she, nye Wa a ahkang hte n rai yang gaw, kadai mung ngai hpang de n du n sa lu ai, ngu nna ngai nanhte hpe tsun ma sade ai, ngu mu ai.

               66 Dai ahkying kaw nna Shi a sape ni law law wa nhtang mat wa nna, Yesu kaw n hkan nang masai.67 Dai rai nna Yesu gaw sape shi lahkawng hte hpe, Nanhte mung wa mat mayu myit ni? ngu nna san mu ai.68 Simun Petru gaw, Anhte kadai hpang de wa na rai ta?69 Nang gaw htani htana asak hte seng ai mungga lu ndai: anhte kam sham saga ai rai nna, nang gaw Karai Kasang a Chyoi Pra ai Wa rai nga ndai hpe chye nga ga ai, ngu nna Yesu hpe htan wu ai.

Ya hti ai gaw, Madu a Kabu Gara Shiga rai nga ai.

PRAN WAN LADAW LABAN (20)

Chyoi Pra ai Nu Maria hte Madu Yesu ni a kyu hpyi ga hpe myit sawn sumru yu ai shaloi Kawa Karai Kasang myit ra ai hku byin wa u ga ngu nna mu lu ai. Nu Maria a prat hta mung shi hkum nan byin mayu ai lam ni teng sha nga na re. Dai hte maren Madu Yesu mung shinggyim masha ni hpe hkye hkrang la ai lam hta Shi hkum nan ra sharawng ai lam hta hkawm sa na matu myit mai nga ai.  Raitim mung Karai Kasang a yaw shada ai lam hte shan yan a myit ra lam hkrum katut ai shaloi tinang myit ra ai hku nre ai sha Karai Kasang myit ra ai hku rai u ga ngu nna kyu hpyi let hkan shatup lai wa sai re.

Dai ni na Kabu Gara shiga hta Madu Yesu a Mungga ni hpe nhkap la lu ai ni, grau nna shi tsun ai ga, “shi a shan hpe sha nna sai hpe lu ai...” ngu nna tsun ai shaloi masha law law hte nhkap la lu ai hpe mu lu ai. Hpa majaw nga yang Madu Yesu a yaw shada ai lam hpe myit hta nhkawn ai majaw hte shanhte myit ai hku nna Madu Yesu a prat hta byin shangun mayu ai a majaw rai nga ai. Kadun ai hku tsun ga yang tinang a akyu amyat nnga ai rai yang Madu a hpang hkan ai ni byin na matu yak ai rai nga ai.

Myit sumru akyu hpyi mai ai lam hta anhte a wenyi hkrun lam hta kadai a myit ra ai lam hta hkawm sa ai kun? Karai Kasang a myit ra ai lam hta hkawm sa ai rai yang kade mi ru yak jam jau hkrum tim Karai Kasang hta galoi mung manoi manat nna hkawm sa lu na rai nga ai. Tinang a myit ra ai hpe Karai Kasang jahkum shatsup ya na hpe sha ra sharawng ai rai yang, myit ai hku nbyin wa ai shaloi Madu Yesu hpe masha ni kau da ai zawn Karai Kasang hpe shing du tawn da kau chye nna grau kaba ai mang hkang ni hpe hkrum hkra chye nga ai.

Anhte a asak aprat hta ngwi pyaw ai hte ru yak jam jau ai hkrum ai aten ni hta Karai Kasang hpe manoi manat nga let Karai Kasang ra sharawng ai hta matut nna sak hkrung nga sa lu ga law.

Fr. Philip Aung, MS

PRAN WAN LADAW LABAN (21) SHANI NA MUNGGA

 23th August 2015

Madu Yesu a yak hkak ai sharin shaga ai lam hpe na ai rai yang, nang kaning di bai htang na rai?

                  N kam ai hte kun, myit n lawm ai hte kun, (snr) chye na mayu ai myit hte kun? Madu Yesu gaw, Karai Kasang a hpaw shalen dan ai hpe hpring tup hkra shamai shatsai ya ai, lamik kumla ni madun ai hta masha 5000 hpe muk shalaw jaw sha ai, lam ni hte shadan shaleng ya sai. Dai re ai majaw, masha hkying lam, shi Madu a mungga sharin shaga ai hpe madat hkam la na matu hkan nang ma ai. Shi Madu chyawm gaw, chyam yu mai ai hte mung, hkap manga kau n lu ai lam; Karai Kasang a tsawra matsan dum ai kumla, tau chye ya ai lam, hte ning shawng jaw ai lam, ni hte mung anhte hpe jaw ya nga ai. Masha law law wa chyawm, ahtu kadawng ma ai.

                  “Ngai a shan hpe sha nna, ngai a sai hpe lu ai” ngu Madu Yesu tsun sharin ai ndai lam hta, hpang jahtum daw sha poi, lak lai ai asak muk (Chyoipra hkum), ni hpe madi madun ai rai tim, shi Madu a hpang hkan nang ai ni hpe pyi myit kataw shangun sai. Madu Yesu gaw; Sumsing lamu na muk; gasadi jaw da ai ngwi pyaw Mungdan de sa wa ai anhte ni a hkrun lam a matu wenyi lu sha, re ai lam hpaw tsun dan ai.

                  Shi a mungga madat ai ni a matu lapran shara Madu Yesu n jaw da ai. Karai a mungga (snr) hkalem sha ai wa ngu maga ga de hkap la shangun ai. Kasa ni pyi, dai gaw ‘yak la ai ga’ she rai nga ai, nga ai. Dai zawn tsun ai lam gaw, chye na na matu yak la ai sha n-ga, hkap la na mung yak la nga ai. Ndai lam hpe shi Madu tsawra ai sape ni hpe tsun dan ai marang e, shanhte a makam, kam hpa ai hte sadi dung ai lam hpe chyam ya lu sai. Htani htana Karai Kasang hte rau ning ngai nga lu na lam hpe Madu Yesu gasadi jaw nu ai.

Madu Yesu hpe kam sham na hte shi a mungga hpe hkap la na matu makam hte kam hpa ai myit ra kadawn ai. Jet ai makam gaw, mu mamu kam hpa ai n rai, kam sham ai lam hta du ladi re ai mung n rai nga ai. Hippo mare na san Augustine kalang tsun ai hta; “chye na na matu, ngai kam sham ai, hte ngai chye na ai majaw, grau nna kam sham lu ai” nga ai. Makam hte sawn hpan myit gaw rau hkawm sa ai rai nna Karai Kasang a tengman ai hte hpaw shaleng dan ai hpe chye na na matu makam gaw tam ya ai. Dai re ai majaw, anhte hpe garum la na hte lam woi ya na matu Chyoipra ai Wenyi hpe Karai Kasang jaw ya ai. “Shi hkum nan hpe chye chyang lu mu ga, hpaji byeng ya hte shingran shapraw ai wenyi nanhte hpe jaw ya u ga the, nanhte a kraw lawang na myi gaw htoi san wa malit ga, ngai hpyi nga nngai” (Eph 1:17-19) nga nna kasa Pawlu anhte hpe sharin da ai.

                  Makam ngu ai gaw, Karai Kasang shi hkum nan anhte hpe hpaw shaleng dan ai hpe ding hkrai bai htang ai lam rai nga ai. Madu Yesu gaw, Karai Kasang kadai re ai hpe shadan shaleng dan ai hta n-ga, Sumsing Lamu na kawa hte anhte hte dinghkrai mahku mara lam lu na hpe mung lajang ya ai. Kasa Petru yin la ai makam gaw, Shi hte Madu Yesu a lapran na mahku mara ai lam hta npawt hpang wa sai. Karai Kasang a mying hta tsun shaga na ahkaw ahkang hpe chye ya ai sha n-ga, lamik kumla ni hpe galaw shapraw na atsam lu ai hpe mung kasa Petru kam sham ai. Madu Yesu gaw, Karai Kasang a Chyoipra ai wa, Hkyela Madu teng sha rai nga ai hpe Petru a makam myi hte chye na ya lu sai. Dai makam chyeju jaw e, Madu Yesu gaw Karai Kasang atai masha atai rai nga ai hte Kawa Karai Kasang e Mungkan ga hpe tsawra ai majaw Shi a kasha shingtai hpe jaw kau ai hte du sa wa ai re lam hpe mung Kasa Petru chye nga ai. Madu Yesu tsun ai mungga ni hpe Petru hkap la lu ai gaw, Madu Yesu hpe Karai Kasang a kasha, mungkan ga hpe hkyela na wa re ai hpe shi chye na hkap la ai majaw re.

                  Makam masham gaw Karai Kasang e n dut ndang jaw ya ai kumhpa rai nna, Madu Karai gaw teng man nga ai hte kam hpa mai ai re majaw shi a mungga ni hpe bai htang lu na chyeju jaw ya ai. Anhte a shani shagu na prat hkrun lam hta Karai Kasang amu galaw nga ai hpe hkam sha lu na hte chye na lu na matu makam masham gaw akri madung rai nga ai. Madu Yesu hta htani htana hte seng ai Mungga nga ai rai nna na a prat hpe galai shai kau ya lu ai hpe, kasa Petru zawn, nang kam sham ai kun? Na a makam hpe jat ya na hte Mungga ni hpe chye na ai marang e, Shi Madu a Tsawra ai myit hte na a prat a matu lajang da ai hpe grau chye chyang wa na matu Madu Yesu kaw hpyi nem ga.

                  “Madu Yesu e, htani htana asak hte seng ai mungga nang lu nga ndai. Dai mungga hpe kabu gara kam sham ai hte madat hkap la lu na matu ngai a makam hpe n-gun shaja ya rit. Nang Madu a Tsawra ai hte Tengman ai lam kaw nna ngai a prat hpe jahka kau ya na lam hpa mung ngai hta n nga u ga law, Amen!!!

PRAN WAN LADAW LABAN (20)

August 16, 2015 

Pran Wan Ladaw Laban (20)

Nu Maria Sumsing Lamu de woi shalun la ai poi shani Mungga

Kasa ni a kam sham ai ga hta “... masha hkum hkrang bai hkrung rawt na ra ai, htani htana asak nga ai, ndai lam ni yawng hpe ngai kam sham nngai law” ngu nna rawng ai hte maren Rosary kyu hpyi shagu, laban hte poi kaba ni na Misa Hkung Ga shagu hta anhte kam sham ai lam hpe tsun hpaw sak se hkam kyu hpyi ai lam galaw ga ai.

Nu Maria hpe lamu de woi shalun la ai po hpe August shata (15) ya shani masat da ai rai tim, anhte yawng Nu Maria a poi Misa Hkung Ga hpe lu lawm na matu nyi ai laban shani hta htawt sit nna galaw ga ai. Ndai poi a lachyum gaw Karai a Kanu Hkawnsek Maria npawt shyut hpyitmara nkap ai sha na-una sin wa nna shing gyim masha tai wa ai hta n-ga shi a asak aprat hta mara nkap ai sha nga lai wa let Madu Yesu Hkristu a Kanu tai wa sai re. Nu Maria gaw anhte shing gyim masha ni yawng hta grau nna san seng san pra ai hte Karai Kasang myit ra sharawng ai lam hta sak hkrung hkawm sa wa sai anhte a Kanu rai nga ai.

Dai rai yang, mungkan ga ntsa hta sak hkrung nga sa ngut ai hpang anhte ala dingda nga ai bai hkrung rawt ai nhtoi hta lu la na akyu ara hpe Nu Maria gaw jau tau nna hkam la lu sai re. Nu Maria gaw shi a prat hpang jahtum aten hta hkum hkrang hte wenyi hpawn rai nna sum sing lamu de woi shangun la hkrum sai re.

Ndai poi a shadum jahprang ai lam gaw Karai Kasang jaw ya ai anhte a shing gyim hkum hkrang gaw manu dan nna awu asin shabyin ai hpe koi gam ra na re. Lahkawng ngu na hta Nu Maria hpe kasi la nna lam shagu hta Karai Kasang myit ra ai hte maren sak hkrung nga sa lu nna Karai Kasang a lak lai ai shaman chye ju hpe hpang na prat hta sha nrai ndai prat hta mung hkam la mai nga ai.

Nu Maria hpyi htinglu hting lai ya ai a marang e ding man san seng ai lam hta shi Kanu zawn hkawm sa lu nna Karai Kasang a lak lai ai shaman chye ju hpe anhte a prat hta hkam la lu u ga.

Fr. Philip Aung, MS

CHYOI PRA AI MARIA HPE LAMU DE SHALUN LA AI POI

16^th August 2015

“Num sha ni mahkra hta nang a lu ndai, na a hkritung na ma mung a lu nit dai law”
Dai ni, anhte ni, mungkan ga na asak htum mat ai hpang hkum hkrang hte wenyi hte hpawn, Sumsing lamu de shalun la hkrum ai; Nu Chyoipra ai Maria a poi nhtoi hpe myit dum shagrau hkungga nga ga ai.

                  Ya aten Sumsing lamu kaw du taw sai Nu Chyoipra ai Maria, anhte prat hta kade daram ahkyak kaba rai nna anhte hpe garum na jin jin rai nga ai hpe shi kanu a poi n’htoi ndai hta anhte kalang bai myit sumru yu na mai nga ai. Anhte a sumru yu ai lam n shut shai na mung ahkyak nga ai. Sumsing Mungdan gaw, htaw grai tsan ai lamu n’tsa shara mi kaw n rai nga ai. Hpa majaw?

                  Karai Kasang gaw shara shagu hta nga ai rai nga ai majaw, Sumsing Mungdan mung shara shagu e rai nga na re. Hebre ni kaw shagun dat ai laika hta, “ya ndai hte wa law la ai sakse ni gaw, anhte hpe sumwi zawn wang kawang da mi ai majaw” (Heb 12:1) nga ai hte maren, anhte myit yu na lam rai nga sai. Dai re ai majaw, Nu Chyoipra ai Maria Sumsing Mungdan hta e rai nga sai, ngu anhte tsun ai shaloi, shi kanu gaw anhte grai ni dik htum ai shara hta rai nga sai. Hpa majaw nga yang, anhte hpe sumwi zawn kawan da ai, dai law la ai sakse ni hta Nu Chyoipra ai Maria gaw ahkyak dik htum ai wa rai nga ai.

                  Rai yang, Nu Chyoipra ai Maria hte anhte hpe kawan da ai dai law la ai sakse ni gaw ya aten hpa galaw nga ma ai rai? Ndai gasan a matu mahtai gaw loi la nga ai; tsan tsan kaw nga nna, lani mi hta anhte mung shanhte hte rau ning ngai nga lu na hpe yu ala nga na malai, Sumsing Mungdan hta shanhte hte rau anhte mung rau sha ning ngai nga lu na matu shakut sa wa nga ai anhte hpe mai byin ai lam yan yawng hkra hte ta tut garum shing tau ya na rai nga ai.

“Nu Chyoipra ai Maria e, Karai a mungga hpe nang Nu hkap la ai marang e, Madu Yesu shangai wa sai hte mungkan ga gaw hkye la ai hkrum sai. Karai a mungga hpe hkap la chye na na the, anhte a shani shagu na sak hkrung hkawm sa lam hta ta tut sakse hkam lu na matu ra nga ai chye ju n-gun atsam hpyi garum ya rit law, Amen!!!

PRAN WAN LADAW LABAN (20) YA NA CHYUM LAIKA

16 August, 15

Chyum Mungga Daw 1                                              

Shingran 11:19, 12:1-6, 10

Ya hti na gaw, Shingran laika hta na rai nga ai.
            19 Sumsing lamu hta e Karai Kasang a chyoi pra ai Htingnu hpaw malang nna, dai Htingnu kata e Ga Shaka Sumpu hpe mu lu ai.12:1 Bai sumsing lamu kata e mauhpa amu kaba dan pru ai gaw: Jan lawai nna shata kabye ai hte, shagan shi lahkawng kap ai janmau gup ai numsha langai mi dan pru ai.2 Shi gaw na-um nasin rai nna, shangai na matu shinggyim machyi ai majaw, Jahtau hkrap nga ai.3 Bai, mauhpa amu kaga sumsing lamu kata e dan pru ai gaw: Yu u, hkyeng ai baren numraw kaba dan pru ai; shi gaw baw sanit hte nrung shit u nna, baw shagu hta ja kagup gup nga ai.4 Shi a nmai gaw lamu shagan htam masum hta na htam mi magawn la nna, ga de jahkrat dat wu ai. Kasha shangai maw ai numsha shi a kasha shangai dat jang, dai ma hpe sha kau na nga, baren numraw dai numsha a man e la tsap nga ai.

            5 Shaloi dai numsha gaw, amu baw shagu a ntsa de hpri sumdoi hte up na ra ai, shadang sha langai hpe shangai wu ai; shi a kasha hpe Karai Kasang a man de mung, Shi a tingnyang a man de mung gare shalun la wu ai.6 Dai numsha gaw nam mali de hprawng mat wa ai; dai yang e Karai Kasang gaw shi a matu nga shara lajang da ya wu ai.10 Shaloi sumsing lamu kata na nsen kaba gaw: Ya gaw, Karai Kasang a Hkristu up hkang na ahkang aya lu la nna, Madu Karai Kasang Shi a daru magam, hpung shingkang hte mungdan hpe lu la ai ahkying rai sai, nga nna tsun ma ai hpe ngai na nngai.
Ya hti ai gaw, Karai Kasang a mungga rai nga ai.


Chyum  Mungga Daw 2                                                                                 

1Korinhtu 15:20-26

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
            20 Hkristu si mat ai ni kaw na bai hkrung rawt sai rai nna, yup pyaw mat ai ni hta na, shawng si ai asi tai wa sai.21 Masha langai mi a jaw e mung, bai hkrung rawt wa na lam byin wa sai.22 Yawng mayawng gaw Adam hta e si mat wa ai hte maren, yawng mayawng gaw Hkristu hta e bai hkrung rawt wa na mara ai.23 Rai ti mung, langai hte langai tinang ang ai hku hte maren byin wa na ra ai: Hkristu gaw shawng si ai asi nnan re ai majaw, shawng na ra ai; dai hpang Hkristu bai du ai ladaw e, Shi hte seng ai masha ni hkrung wa na mara ai.24 Dai hpang e, Hpang Jahtum Nhtoi du na ra ai.

            Dai shaloi e, Hkristu gaw daru magam, hpung shingkang hte ahkang aya mahkra hpe jahten kau nna, Kawa Karai Kasang kaw dai mungdan hpe ap ya na ra ai.25 Kaning rain me law, Shi a hpyen ni yawng hte hpe, Shi a lagaw npu e tawn da ai du hkra, Shi up hkang nga na ra ai. 26 Hpang jahtum na hpyen wa ngu ai si hkrung si htan gaw, jahten kau ai hkrum na ra ai; hpa majaw nga yang, yawng mayawng hte hpe shi a lagaw npu e tawn da nu ai, nga nna Chyum Laika hta ka da nga ai.
Ya hti ai gaw, Karai Kasang a mung rai nga ai.

KABU GARA SHIGA 

Luka 1:39-56

Ya hti na gaw, Luka a laika hta na Kabu Gara ai Shiga rai nga ai.

            39 Maria gaw, Yuda mung na bum ga e nga ai; mare langai mi de alawan rawt sa nna, 40 Zakari a nta de shang nhtawm, Elisabet hpe hkrum shaga wu ai.41 Maria hkrum shaga ai ga hpe Elisabet na la jang, shi a hkritung na ma gumlawt nga ai.42 Elisabet mung, Chyoi Pra ai Wenyi hte hpring nna, nsen kaba hte jahtau let, Numsha ni hta nang a lu ndai; na a hkritung na ma mung a lu nga ai.43 Nye a Madu a kanu ngai hpe sa kawan ai gaw, hpa chyeju a jaw e rai ra ai i? Ngai nang hpe tsun de ga:44 Na a shakram ai ga nsen ngai na la ai hte rau, nye hkritung na ma kabu gara ai hte gumlawt nga ai.45 Madu shi hpe tsun ai ga dik wa na ra ai lam hpe kam sham ai numsha gaw, a lu nga  ai, ngu nna tsun wu ai.

            46 Shaloi Maria gaw; Nye wenyi mung ngai hpe hkye la ai Madu Karai Kasang hta kabu gara li ai.47 Shi a mayam jan a myit nem ai hpe Shi mada yu nu ai. Atsam rawng ai wa gaw ngai hpe galu kaba ai galaw ya ni ai, majaw, ya kaw nna shu shi shu masha, ngai hpe a lu ai ngu na mani ai. Shi a mying ningsang chyoi pra lu ai. Shi hpe hkrit kamyin ai ni a ntsa e, shu mashi shu masha du hkra, Shi a matsan dum ai myit a nga nga ai. Shi a lahpum hpe atsam hte ladawn dat nna, myit gumrawng nga ai ni hpe shabra kau nu ai. Du magam ni hpe tingnyang na jahkrat kau nna, myit nem ai ni hpe shagrau ya nu ai. Kawsi hkrum ai ni hpe kaja ai hte jahkru shakat nna, sut su ai ni hpe Kaman dat dat nu ai. Anhte a ji wa ni hpe tsun da ai hte maren, Abraham hte shi a kashu kasha ni hpe, prat dingsa e matsan dum ai lam dum nga let, Shi a shangun ma Israela hpe lanu lahku ya nu ai, ngu nna Maria tsun wu ai. Maria gaw Elisabet hte rau shata masum dang nga nhtawm, nta de bai wa mat ai.
Ya hti ai gaw, Madu a Kabu Gara Shiga rai nga ai.

ASAK JAW YA AI SUMSING LAMU NA MUK

Karai Kasang a mungga hpe kam sham ai hte madat mara ai hte nang hkap la nga ai kun?

Madu Yesu hte rau prat ai ni, Yuda Nawku hpung na agyi salang ni, Karai Kasang a mying nsang hte Shi Madu sharin shaga ai hpe ning hkap ma ai. Nazareth mare kaji na, laksama galaw sha ai wa ngu shadu ai, chye da ai hte hte Madu Yesu hpe n kaw ma ai. Bau kawa 'Yosep' hte kanu Nu Maria mung mying dan hkung ai ni n rai ai majaw dai zawn re ai yu maya masha marai mi Karai Kasang a mying hta tsun shaga lu ai kun? Karai Kasang chyu sha tsun, galaw lu ai lam ni hpe Madu Yesu, tsun galaw wa ai shaloi, grau grau she asawng let n ju n dawng wa ma ai. Karai Kasang kaw nna du wa ai, asak muk rai nna htani htana ahkrung nga na ra ai, ngu tsun shapraw sai (Yh 6:51).

Anhte ni mung, masha kaga ni tsun shaga ai hpe, anhte hta grau grit ai ngu yu let n kam madat ai lam ni byin chye ai. Dai kaga masha ni hku nna, Karai Kasang anhte hpe tsun mayu ai shiga ni hpe mung n lu la kau ai byin chye ai. Yuda masha ni Madu Yesu hpe aput angun nga ai lam kasa Yawhan tsun dan sai. Shanhte, Madu Yesu a ga hpe madat ma ai rai tim, mara tam, ahkyak la na matu sha rai nna, Shi Madu hku nna Karai Kasang tsun shaga mayu ai hpe na la na matu gaw n rai nga ai.

Masha kaga tsun ai hpe madat na matu lam yan law law nga ai; grau tsaw dap ai myit masa hte, myit n lawm ai sha, sharin la mayu ai myit, galu kaba wa nna galai shai na matu myit ni hte, madat mai nga ai. Karai Kasang a mungga hpe nang kaning rai madat la ai rai? Karai Kasang gaw, Shi a amyu masha ni hpe n taw n tsang prat hpe jaw ya ai rai tim, anhte gin lut kau chye ai.

Madu Yesu jaw ya ai Asak a muk gaw hpa rai ta? Shawng nnan, dai gaw Karai Kasang shi hkum nan jaw ya ai, ndai prat hta lai, hpang na prat du hkra na matu malu masha rai nga ai. Nam mali e nga lai wa ai prat ban na masha ni hta du na ra ai prat n-nga ai ngu Rabbi ni tsun ma ai. Bu hkawm laika hta, ga sadi jaw da ai Mungdan na hkrit hpa ni hpe dang kau lu na n-gwi ai ni gaw nam mali kaw sha, si ai ten du hkra wam dam nga hkawm ra ai, nga matsing da ma ai. Ga sadi jaw da ai Mungdan de n du shang lu ai Ji wa ni gaw du na ra ai prat hpe mung sum kau sai lam Rabbi ni kam ma ai. Madu Yesu, teng man ai asak hpe jaw ya ai ngu ai shaloi, Karai Kasang hte mahku mara nnan hpe bai jaw ya ai rai nna, kam hpa ai, tsawra ai hte madat mara ai lam jaw ya ai. Dai gaw, jet ai, n taw n tsang re ai, htani htana tsawra hkrum ai, hte dai Karai hta htani htana zup hpawng nga lu na lam rai nga ai. Madu Yesu hpe ningdang kau ai lam gaw, Sumsing lamu na Kawa Karai hte htani htana hpawng de nga lu na prat hpe ningdang kau ai lam nan rai nga ai. Madu Yesu hpe Sumsing lamu na muk re ngu hkap la ai lam gaw, ndai prat hta wenyi lu sha hkru kat na matu sha n rai, hpang na prat a hpung shingkang hpe hkap la ai hte bung nga ai. Madu Yesu hpe Asak a muk ngu nna nang hkap la ai kun?

Kyu hpyi

“Madu Yesu e, Nang gaw, ndai prat hta mung, hpang na prat a matu mung, ngai hpe asak jaw ya ai, ahkrung nga ai muk rai nga ai. Sumsing lamu na yu wa ai, asak jaw ya ai muk hpe galoi mung hpang gara marit nga ai hte, shani shagu na ngai a prat hta masha kaga ni hpe daw jau lu na, n-gun atsam, tsawra myit ni hpe mung ngai lu la mayu nngai law, Amen.

Chyum Mungga Sasana Magam Dap

Myitkyina