2024: PRAN WAN LADAW LABAN 14 NA MUNGGA

“Masha ni anhte hpe ning hkap raitim, anhte matut tsawra nga yang, dai tsawra myit gaw apu pu asi si wa na rai nga ai”

1960 ning, Africa dan na Sudan mungdan hta makam masham hpe zingri zingrat ai lam ni byin pru wa sai. Paride Taban mying ai shan chyang Hkristan marai mi gaw dai hkrit hpa lam kaw nna hprawng let ‘Uganda’ mung de du sai. Dai kaw nga nga ai ten, jau tai jawng lung ai hte jau aya hkam la lu sai. Simsa ai lam nga wa ai ten, Sudan mung dan de jau tai let bai wa sai. Shi gaw jau ginwang shara mi hta bungli shatsam hkrum ai rai tim, Africa hpung masha ni gaw shan chyang jau hpe grai n mu yu shi ai majaw teng teng jau re ai lam hpe n kam wu ai. Shawng de na jau ni gaw shan hpraw ai, shanhte hpe lu sha, tsi mawan, hpun palawng jaw ma ai rai tim, ya na jau wa gaw shanhte zawn matsan masha rai nga ai. Grau nna yak ai gaw, jau Taban kaw nna No. 2 Vatican Zuphpawng kaba a galai shai ai lam ni hpe mung shachyen ya ai lam rai nga ai. Dai galai shai ai lam gaw, dai masha ni hpe grai gin jang nga ai. Shanhte shada da, “Ndai masha shachyang wa gaw anhte a Nawku tawn hpe mung ting wang di kau nna Missa hkungga hpe mung anhte a myusha ga hte nawng ya nga ai, shi gaw jau n rai na re” nga nna tsun ma ai da.

Manu mana yak hkak ai hte shakut kau ngut ai hpang she hpung masha ni dai Jau Taban hpe hkap la ma ai. Dai ni na kabu gara shiga hta amyu sha ni Madu Yesu hpe n hkap la ai lam hte mung ndai mabyin gaw bung nga ai. Madu a amyu sha ni mung, “shi gaw anhte zawn sha bungli galaw sha ai wa nrai? Anhte hta jan nna kaning rai Karai Kasang hpe chye lu na rai? Shi hkum shi hpa shadu ai kun?” nga nna myit na nhten. Nazareth mare na masha ni chyu sha kaning rai laksama la wa mi Karai Kasang hpe chye lu na rai, nga nna mau ma ai. Shawng shawng na Hkristan ni a aten hta mung, Celsus mying ai wa mung, “nanhte hpung hpe woi de ai wa gaw nam mare na hpa n chye ai laksama la wa sha re mi”, nga nna Hkristan ni hpe asawng asang ngu ai da.

Yesu a aten na masha ni shi hpe n hkap la ai rai yang, anhte a prat hta masha ni anhte hpe n hkap la ai rai yang hpa mau na shara n nga na re. Shanhte ni Yesu Hkristu hpe n hkap la ai gaw shanhte hta grau nna chye chyang ai majaw sha nrai, Yesu a sharin shaga ai lam gaw shanhte hpung woi ni a sharin shaga ai lam hte n htan shai ai majaw mung rai na re. Yesu gaw, shanhte a nga sa lam ni, myit mang ai lam ni, myit masa ni galai kau na ning dat ai hte, mungdan lam sharin ya ai, tsawra matsan dum na matu, tengman tara hkan na matu hte mara raw dat hkyam sa jaw chye na matu lam madun ya lai wa sai. Dai ni na anhte a aten hta mung, shinggyim ahkaw ahkang lam, prat hpe manu shadan na lam, hkritung ma sat ai lam ni, masha dut sha ai lam ni, mungkan ga hpe jahten sharun ai lam ni hpe ning hkap tsun ai shaloi, anhte hkum nan mung n hkap la ai, ning dang hkrum sha lu na re.

Anhte a kun dinghku kata ni hta mung, anhte a lata la ai lam ni rai nga ai dinghku de ai, amu bungli tam galaw ai, jau, mama tai na lam ni gaw ngam ai ni hte n htan shai wa ai shaloi, n hkap la ai sha ning dang ai lam ni pru wa jang mau na lam gaw n nga na re. Ndai zawn rai ning dang kau ya ai lam ni byin wa ai ten, anhte gaw hkam sha lu na, pawt sindawng ai hte n-gun daw nna masin n si ai ni byin wa na re. Madu Yesu mung dai zawn sha hkam sha lai wa sai rai tim galoi mung asum n jaw ai lam anhte dum chye ra nga ai. Madu gaw shi kade lang mi ning dang hkrum ai rai tim, shi a Sape ni a majaw rai tim, tut nawng tsaw ra nga ai.

2024: PRAN WAN LADAW LABAN 14 NA CHYUM LAIKA

PRAN WAN LADAW HTA LABAN 14

July 7, 2024

CHYUM MUNGGA DAW 1

Ezekela 2:2-5

Ya hti na gaw, Ezekela a laika hta na rai nga ai.

Dai Wenyi gaw, ngai hta shang nna, shi ngai hpe tsap shangun nngai. Shaloi Madu tsun ai ga hpe, ngai na la se ai. Madu tsun ai gaw; Masha Kasha e, ngai hpe gumlau ai Israela a kashu kasha ni hpang de ngai nang hpe shangun dat nngai. Shanhte gaw, dai ni du hkra, kaji kawa ni hte hpawn, ngai hpe tut nawng e gumlau nna, shut hpyit nga ma ai. Shanhte a kashu kasha ni mung, myit ja ai hte ngai hpe n kaw n law di ni ai rai nga ma ai. Ngai nang hpe shanhte hpang de shangun nna, nang gaw, Madu ning nga ai, ngu nna shanhte hpe tsun u. Shanhte gaw gumlau ai amyu rai nga nna, madat timung, n madat timung, shanhte hta e myihtoi nga nga ai hpe shanhte chye lu na mara ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

2 Korinhtu 12: 7-10

Ya hti na gaw, Korinhtu masha ni hpang de San Pawlu shagun dat ai laika lahkawng hta na rai nga ai. Karai Kasang ngai Pawlu hpe madun dan ai, kaba dik htum ai shingran lam a majaw, ngai nau wa n gumrawng u ga, ngai hpe abyen na matu, satan a salung sala ngu ai, nye a hkum shan hta ju ai aju ngai hkrum nga nngai; shing rai, ngai, nau wa myit n kaba nngai. Ngai gaw dai hta na lawt lu na matu, Madu hpe masum lang akyu hpyi nga nngai. Dai rai nna Shi gaw, Nye a chyeju gaw, na a matu ram nga ai; kaning rai nme law, masha n-gun gaw kya ai hte nye a n-gun atsam hkum tsup nga ai, nga nna Madu ngai hpe tsun ni ai. Dai re ai majaw, Hkristu a n-gun atsam, nye a ntsa e, a up nga u ga, nye a n-gun kya ai lam hta ngai grau nna shakawng nga nngai. Dai rai nna, Hkristu a jaw e hkam sharang ai, nye a n-gun kya ai, asawng asang ai, kyindut ai, zingri zingrat ai hte, nni nhkri re ai lam ni hta ngai kabu nga nngai. Kaning rai nme law, ngai n-gun kya nga yang, n-gun atsam rawng nga nngai.

Ya hti ai gaw, Karai Kasang a mungga rai nga ai.

KABU GARA SHIGA

Marku 6:1-6

Ya hti na gaw, Marku a laika hta na Kabu Gara Shiga rai nga ai.

Yesu gaw Shi a buga de du wa ai; Shi a sape ni mung Shi kaw hkan nang ma ai. Laban nhtoi du jang, tara jawng hta e shi sharin shaga hpang nga ai. Yesu a ga madat la ai ni malawng maga gaw, myit na kahpra ma ai. Shanhte gaw, Ndai wa gaw dai lam mahkra hpe kanang na lu la a ta? Shi lu la ai hpaji byengya gaw hpa baw rai nga a ta? Shi gaw anhte a laksama wa chyu sha rai nga ai; Maria a kasha hte, Yaku, Yosep, Yuda hte Simun a kahpu kanau mung rai nga ai, n rai ni? Shi a kanu kanau ni mung anhte hte rau nang e nga nga ma ai n rai ni? Nga nna Shi a lam hta myit kataw wa ma ai. Yesu mahtang, Myihtoi gaw tinang a buga hta, tinang a mayu dama ni hte, tinang a nta hta nrai jang she, arawng lu nga ai, ngu nna shanhte hpe tsun mu ai. Machyi makaw hkrum ai nkau mi a ntsa e lata mara nna shamai ya ai hta kaga, dai yang e hpa magam amu hpe mung, shi n galaw lu ai. Shanhte a n kam n sham ai myit a majaw shi mau nga ai. Ya hti ai gaw, Madu a Kabu Gara shiga rai nga ai.

2024: PRAN WAN LADAW LABAN 13 NA MUNGGA

“Karai Kasang a mungdan gaw du magang ra ai!” Dai gaw, bum ntsa na Tara kanu (snr; A lu ai lam) zawn re ai hpe ahkaw ahkang hte sharin shaga ai Yesu, grau htum ai Tara hpe jaw ai wa, Nbung laru hte hka leng ni hpe shasim kau lu ai lamik kumla madun ai wa, myi kyaw ai ni, lagaw hten ai ni, nat kap ai ni hpe shamai shatsai ya lu ai Madu Yesu a mungga nan rai sai. Dai ni na Kabu gara shiga gaw, machyi masha ni hpe shamai shatsai ya ai hpe madi madun ai. Hti hkum 12 hpe anhte mu lu ai. Dai hti hkum 12 gaw anhte chye ai hte maren, Israela amyu lakung 12 hpe tsun ai rai sai.

Madu Yesu a hpang hkan sape 12 hte mung bai seng ang wa sai. Rai tim, grau nna ahkyak ai gaw, dai ni na Chyum mungga hta num hte makaji ni lawm ai lam rai sai. Hpa majaw dai lam hpe wa ahkyak la ma ai kun ngu marai langai ngai gaw san mayu na nhten. Tsun ga nga yang, Madu Yesu gaw shi hpang de du sa nna, garum hpyi ai ni yawng hpe shamai shatsai ya sai.

Dai gaw teng ai lam rai nga ai. Raitim, La/ Slg ni up hkang ai ndai Yuda htung/uhpung uhpawng hta dai ni na ai shamai shatsai ya ai gaw hpa mi rai sai kun? Num ma hte kaga, jahkrai, matsan masha, hte makaji ni gaw lawu tsang masha hpan ni ngu sawn da hkrum ma ai. Dai a marang e, shinggyim uhpawng hta kadai e masha n sawn la ya ai ni gaw shi Madu hte ni htep nga ai lam anhte chye lu saga ai. Shinggyim uhpawng shinggan de nga taw nga ai ni hpe grau nna ahkyak la na matu Madu Yesu sharin ya sai. Masha yawng hpang de kabu gara shiga hkaw tsun na nga ai shaloi, uhpung uhpawng a kabai da hkrum ai ni, hpa n re ai ni hpe Madu Yesu gaw grau shamyet nna tsun sharin nga ai. Na-im ngu ai mare na gaida jan a kasha hpe bai sharawt la ai hta Madu Yesu a tsawra matsan dum hkam sha chye ai myit hpe anhte mu ya na re.

Gaida jan langai a shadang sha shingtai hpe lup makoi na matu hpai sa wa ai shaloi dai matsan mayan gaida jan hpe matsan dum garum la sai. Ndai lam ni hpe mu, na la ai marang e, anhte uhpung uhpawng kata na dai masha ni hpe anhte kaning rai ahkyak la ya sai kun? Tinang hkum san dinglik yu na mai nga ai. Nawku hpung kaw nna matsan, jahkrai, gaidawng gaida ni a matu grau nna ahkyak la ai lam tsun dan nga ai. Tim, anhte kaja wa sha, anhte lapran kaw nga ai dai masha ni a ningtsa, jaw teng ai amu magam galaw ya sai kun? Dai masha ni ra kadawn ai hpe anhte galaw ya na lama ma malap sai kun? Anhte ni, grau nna n-gun atsam dat let shanhte a matu galaw ya na myit atsam nga ga ai kun? Uhpung uhpawng hta ahkyak n da kau sai ni hpe grau chye na sawn ya chye ai myit atsam rawng wa na matu anhte akyu hpyi ga. Madu Yesu a dai masha ni a ningtsa tawn da ai tsawra matsan dum garum tau chye ai myit masin hte galaw jaw ai lam gaw anhte hpe mung myit masin atsam marai jaw ya u ga, anhte akyu hpyi ga law!

2024: PRAN WAN LADAW LABAN 13 NA CHYUM LAIKA

PRAN WAN LADAW HTA LABAN 13
June 30, 2024
CHYUM MUNGGA DAW 1

Hpaji Byengya 1:13-15; 2:23-24

Ya hti na gaw, Hpaji Byengya laika hta na rai nga ai. Madu Karai Kasang gaw si hkrung si htan lam hpe, n shabyin da sai rai nna, hkrung nga ai ni hpe jahten shabya ai lam shi ra sharawng ai n rai. Nga yawng nga pra ahkrung nga na matu, Karai Kasang shanhte hpe hpan da nu ai majaw, sat kau lu ai agung shanhte hta n rawng nga ai; katsan ga na ni mung ndai dinghta ga ntsa e ahkang aya n lu ma ai; kaning rai me law, dinghpring dingman ai lam htani htana e agrin nga ai. Madu Karai Kasang gaw Shi a ahpraw asam hte bung hkra shinggyim masha hpe shachyaw da sai rai nna, dai masha wa hpe si n chye ai hku shi hpan da nu ai. Rai timung, nat a manawn masham myit a majaw, si hkrung si htan mungkan ga e shang wa nna, nat a hpang maga hkan lawm nga ai ni gaw, dai lam hpe chye chyang wa na mara ai.
Ya hti ai gaw, Karai Kasang a mungga rai nga ai.

CHYUM MUNGGA DAW 2

2 Korinhtu 8:7, 9, 13-15

Ya hti na gaw, Korinhtu masha ni hpang de San Pawlu shagun dat ai laika lahkawng hta na rai nga ai. Nanhte gaw makam masham hte ga shaga ai hta, chye chyang ai hte shakut sharang ai lam amyu myu hta, anhte hpe tsawra ai lam hta mung, ndai lam shagu hta hkum tsup nga myit dai. Dai rai nna, (Yerusalem mare na matsan mayan ai hpung masha ni hpe bau garum ai.) ndai tsawra dum ai lam hta, nanhte dang ai daram garum ya na hpe myit mada nga ga ai. Ndai amu hta e, masha kaga hpe kyindut ai shaloi garum ya ai majaw, nanhte nan kyindut hkrum na hpe ngai tsun nga nngai nrai; maren mara rai na lam hpe ngai myit nga nngai. Ya e, nanhte a jan gaw shanhte a taw ai hta shang lu na rai nga ai. Dai hku galaw yang, maren mara rai na ra ai. Shing rai, ‘Law law hta la ai wa jan ai n rai, Loi mi hta la ai wa mung naw ra nga ai n rai,’ nga nna Chyum Laika hta ka da ai hte maren dik wa na ra ai.
Ya hti ai gaw, Karai Kasang a mungga rai nga ai.

KABU GARA SHIGA

Marku 5:21-43

Ya hti na gaw, Marku a laika hta na Kabu Gara Shiga rai nga ai.
Yesu gaw, li hte wora hkran de bai rap wa yang, masha unawng uwa kaba Shi kaw sa hpawng ma ai. Dai nawng makau e, Shi naw nga ai. shaloi, tara jawng agyi ni hta na, Ya-iru mying ai masha langai mi sa du nna, Yesu hpe mu jang, shi a lagaw nhpang e dingnyawm nna, Nye a shayi sha kaji si wa magang nga ai; shi bran wa nna, naw ahkrung nga na matu, shi a ntsa lata sa mara ya rit, ngu nna akroi anoi shi hpe hpyi nem wu ai. Dai rai nna Yesu shi hte rau sa wa ai; masha wunawng kaba mung, Yesu kaw hkan gumbawm nna, shanhte gaw shi hpe kanawng matep hkra mu ai. Shi lahkawng ning tup sai htaw machyi ai numsha langai mi mung lawm nga ai,shi gaw tsi sara law law a lata hta nni nkri law law wa hkrum ai hte, shi lu malu mahkra hpe shama kau timung, n mai mat lu ai sha, grau nna yak wa lu ai.

Dai numsha gaw Yesu a lam na yang, shawa hpawng hta e Madu a shingdu maga de sa du nna Shi a hpun palawng hpe ahtawk wu ai. 28Kaning rai n me law, shi gaw, Dai Sara wa a hpun palawng hpe chyu sha ngai ahtawk lu jang, ngai mai wa na nngai, nga ai. Shaloi jang, sai htaw ai a npawt pat mat wa nna, shi a atsu atsam mai mat ai hpe, shi a myit hta e dum chye wu ai. Yesu gaw Shi hta na atsam pru wa ai hpe, Shi a myit hta shaloi jang chye dum ai majaw, dai shawa hpawng de kayin yu let, Nye a hpun palawng hpe kadai ahtawk ya sai i? ngu nna san mu ai. Dai rai nna, Shi a sape ni gaw, shawa masha ni Nang hpe kanawng matep hkra nga ai hpe, Nang mu nhtawm e, Ngai hpe kadai ahtawk ya a ta? naw nga n hka i? ngu nna Shi hpe htan mu ai.

Yesu mahtang, shi hpe ahtawk ai kadai re ai chye na matu naw kayin yu nga ai. Shaloi dai numsha gaw, shi hta byin ai amu hpe chye chyang ai majaw, hkrit gari let sit sa nna, Yesu a man e dingnyawm nhtawm, shi a lam mahkra hte hpe tengman ai hku tsun dan wu ai. Yesu mahtang, shayi sha e, na a kam sham ai gaw nang hpe shamai ya nit dai; nang machyi ai ana ahkya hta na lawt lu nna, ngwi pyaw ai hte wa nu, ngu nna shi hpe tsun dat wu ai. Yesu dai ga hpe naw tsun nga yang, Dai tara jawng agyi a nta de na, masha nkau mi sa du nna, Na a shayi sha si mat sai; dai Sara hpe hpa majaw naw shatsang nga n ta? ngu mu ai. Yesu mahtang, dai masha ni tsun ai ga hpe na jang, hkum hkrit et; kam sham ai myit sha rawng u, ngu nna tara jawng agyi wa hpe tsun wu ai. Shaloi, Petru, Yaku hte Yaku a kanau Yawhan hta kaga, shi kaw hkan nang na ahkang kadai hpe mung n jaw mu ai. Ya, dai tara agyi a nta de, du yang, kaming kamawng re ai, hkrap ngu hkrap ngoi ai hte sharung shayawt kaba hpe Yesu mada mu wu ai. Shi nhku de shang wa yang, nanhte hpa rai nga myit ta? Ma gaw si ai n rai, yup pyaw nga ai, ngu nna shanhte hpe tsun mu ai.

Shanhte chyawm gaw shi hpe asawng asang ngu kau mu ai. Yesu mahtang yawng hte hpe shaden kau ngut jang, dai ma a kanu yan kawa hte shi a manang masum hpe shaga la nna, dai ma taw nga ai shara de shang wa ma ai. lachyum gaw, Ma e, ngai nang hpe tsun de ai, Rawt u, ngu ai rai lu ai. Shaloi jang dai numsha ma rawt hkawm wa ai; shi a aprat gaw shi lahkawng ning rai nga ai. Shingrai shanhte nachying mau mahka mat ma ai. Dai lam hpe kadai mung n chye mu ga, Yesu shanhte hpe grai ginhtim da mu ai; dai hta kaga, ma hpe shahpa jaw na shi htet da mu ai.
Ya hti ai gaw, Madu a Kabu Gara Shiga rai nga ai.

2024: PRAN WAN LADAW LABAN 12 NA MUNGGA

Chyum Mungga daw lahkawng hta hkrung rawt wa sai Yesu Hkristu hta anhte yang gaw nnan bai hpan da hkrum ai masha ni rai ra ai nga nna San Pawlu sharin shaga da nga ai. Masha gaw hkum, sai, shan hte hpan shachyaw hkrum ai ni re.

Raitimung Madu Yesu Hkristu hta kam sham let Shi hta asak hkrung ai ni yawng gaw shinggyim hkum shan aprat hpe sha yu mada nmai mat ai. Madu Karai hta masha nnan tai wa saga ai. Lai mat, ngut mat sai prat dingsa de bai n kayin ai sha shawng lam prat nnan de sa wa ra ga ai. Raitimung anhte ni hta byin chye ai gaw prat dingsa hta mung kan ga hte seng ai lai akyang dingsa ni de bai bai nhtang sa mayu ga ai. Dai gaw kade daram sawng a ta nga yang, kalang lang rai jang ndang hkang lu ai panglai hka laru kaba zawn pyi sawng chye nga ai. Tinang hkum nan dai prat laru ni hta na lawt lu na matu shakut ai zawn Yesu Hkristu hpe mung jasu sharawt la na hkum malap ga. Anhte ni Madu Karai hpe kam hpa, kam sham ai myit kaba hte kyu hpyi na gaw grai ahkyak nga ai. Hpa majaw nga yang, Madu Yesu chyu sha anhte a ding hta prat a laru ni hpe shazim jahkoi kau ya lu ai majaw re.

2024: PRAN WAN LADAW LABAN 12 NA CHYUM LAIKA

PRAN WAN LADAW HTA LABAN 12
June 23, 2024
CHYUM MUNGGA DAW 1

Yoba 38:1, 8-11

Ya hti na gawYoba a laika hta na rai nga ai.
Madu Karai Kasang gaw bung sha kaw nna Yoba hpe than ya wu ai. Madu ning nga ai: Nammukdara gaw ga de nna kapaw pru wa yang, kadai wa chyinghka hte pat da a ta? De a hpun palawng gaw summwi, de a sanen gaw htat ai nsin, ngai shatai nna, de a matu lamu ga jarit tawn da yang, chyinghka ni hpe kadai wa htinggrang da sata? Ngai mahtang, “Nang du hkra nang sa lu nna, nang kaw na n lai lu na ndai; Na a gumrawng ai hka leng ni nang e sim mat na ra ai” ngu nna ngai Madu hkang da ni ai.
Ya hti ai gaw Karai Kasang a mungga rai nga ai.

CHYUM MUNGGA DAW 2
2 Korinhtu 5:14-17
Ya hti na gaw, Korinhtu masha ni hpang de San Pawlu shagun dat ai laika lahkawng hta na rai nga ai.
Marai langai mi yawng mayawng a matu si hkam sai majaw, yawng mayawng si hkam sai nga nna, anhte myit jahkut tawn da ai shaloi, Hkristu a tsaw ra ai lam anhte hpe shadut nga mi ai. Hkristu si hkam ai gaw ndai lam a majaw rai nga ai; masha ni gaw naw hkrung ai shaloi, tinang nan a matu n re ai sha, shanhte a matu si hkam nna bai hkrung rawt ai wa a matu, shanhte hkrung nga lu mu ga, Hkristu Madu yawng mayawng a matu si hkam la nu ai. Dai re ai majaw, ya kaw nna mungkan ga a lailen hte maren, masha a gingdan ai hpe n sawn yu ga ai. Shawng de gaw Hkristu hpe chye chyang ai shaloi, masha a lailen hku hkan sa ga ai; rai ti mung, ya kaw nna dai hku shi hpe n chye saga ai. Hkristu hte matut mahkai hkrum ai wa gaw, masha nnan tai wa ai prat dingsa htum mat nna, shi prat nnan hta shang wa sai.
Ya hti ai gaw, Karai Kasang a mungga rai nga ai.

KABU GARA SHIGA

Marku 4:35-41

Ya hti na gaw, Marku a laika hta na Kabu Gara Shiga rai nga ai. 
Lani mi hta shana de du jang, Yesu gaw Shi a sape ni hpe, Anhte wora hkran de rap sa wa ga, ngu nna tsun mu ai. Dai rai nna, shawa masha ni hpe kau da nhtawm, Yesu dung nga ai li the shanhte Shi hpe woi sa wa ma ai; li kaga mung hkan nang nga ai, Shaloi nbung laru kaba ru wa nna, hka leng ni li hta kaput bangwa ai majaw, dai li gaw hpring magang wa ai. Yesu chyawm gaw li mai de bunghkum langai mi hkum nna yup pyaw nga ai. Shaloi, sape ni shi hpe jasu nna, Sara e, anhte hka hta lup si wa nga ai; Nang hpa n tsang nga n ni? ngu nna Shi hpe tsun mu ai. Dai majaw Yesu rawt nna, nbung hpe daru kau ai hte, dai nawng hpe, Atsin sim rai nga u, ngu wu ai. Dai nbung mung num mat wa nna, mahkra asim sha rai mat wa ai. Shaloi shi gaw, Nanhte hpa majaw hkrit nga myit ta: Ya mung nanhte kam sham ai myit grai n rawng myit ni? ngu nna sape ni hpe tsun mu ai. Shanhte mahtang hkrit hkungga ai myit kaba hte mau nga nna, Ndai wa gaw kadai wa re ai i? Dai nbung hte nawng pyi Shi a ga madat nga ma hka! nga nna shada tsun ma ai.

Ya hti ai gaw Madu a Kabu Gara Shiga rai nga ai.

2024: PRAN WAN LADAW LABAN 11 NA MUNGGA

Dai ni na kabu gara shiga hta, masha marai mi ga ntsa e nli tum hkai ai lam Madu Yesu tsun ai hpe anhte na lu ga ai. Madu Yesu tsun ai hte maren, “dai gaw chyinghkrang tum zawn rai nga ai; ga ntsa e gat dat jang ga ntsa na tum amyu mahkra hta kaji htum dam timung, gat dat ai hpang tu wa nna, shatmai lap amyu mahkra hta grau kaba wa ai hte, lakung lakying kung dam wa nna, ntsa malen u ni de a shingnip hta e shingbyi nga lu ma ai, ngu mu ai” (4:31-32).

Ndai hta Madu Yesu tsun dan mayu ai lawm gaw, Karai Kasang a atsam hta rai yang, kaji dik htum ai nga timung, lak lai ai hte kaba dik htum ai de du wa lu ai, ngu ai lam rai nga ai. Teng sha wa, Madu Yesu tsun myit da ai lam gaw shi a htawm hpang na Nawku Hpung hpe tsun ai lam rai sai. Dai aten hta kachyi sha mi rai tim, gau ngwi ngwi gaw rawt jat galu kaba wa nna hpang e gaw mungkan ting chyam bra hkra kaba wa sai. Anhte marai hkum shagu a myit masin hta mung Madu Yesu anga nga ai hpe sawn la mai ai. Teng sha nga yang, anhte marai hkum hpra hpe mung shi Madu a marang e rawt jat galu kaba wa ai hte san pra masha pyi tai shangun mayu nga ai.

Kasa Pawlu a prat hpe ga shadawn yu yu ga. Shi gaw grai nga nna shakut lai wa sai Hparishe, Hkristan ni hpe zingri zingrat galaw lai wasai rai tim, Madu Yesu shaga la ai hte galai shai ya ai marang e, anhte chye ai hte maren, mau hpa Sasana majen je ai wa shi tai wa sai. Dai hte maren, kasa Petru hpe mung yu yu ga. Hkrit ja ai masha shi rai tim, Madu Yesu garum madi shadaw la ai marang e, marai rawng ai, shi a Nawku hpung a ningbaw nnan shi tai wa sai.

Dai hte maren sha anhte yawng hkra hpe mung Madu Yesu gaw atsam ningja jaw galai shai wa na hpe ra sharawng nga ai. Anhte kaw nna galaw ra ai lam gaw, tinang hkawm sa taw sai hkrun lam hta n shut n shai ding ding hkawm sa nna Madu Karai hte grau grau ni htep wa hkra madu Yesu lam woi sa wa ai hte shakut hkawm sa na lam sha rai nga ai. Dai shaloi, Madu Yesu gaw anhte hpe ngwi pyaw ai, awng dang gat hkrang ai, kabu gara ai, atsam marai rawng ai prat, san pra ai masha pyi anhte hpe byin shangun na re!

2024: PRAN WAN LADAW LABAN 11 NA CHYUM LAIKA

PRAN WAN LADAW HTA LABAN 11
June 16, 2024
CHYUM MUNGGA DAW 1

 Ezekela 17: 22-24

Ya hti na gaw, Myihtoi Ezekela a laika hta na rai nga ai.
Madu Karai Kasang ning nga ai; Dai rit hpun a ndung e tu nga ai, tsaw htum ai makrung hta na maku langai mi hpe ngai di la nna, tsaw ai bum ntsa e hkai da na nngai: tsaw htum ai Israela bum ntsa e ngai dai hpe hkai da na nngai. Dai gaw lakung lakying kying wa nna, asi si ai hte reng htum ai rit hpun tai na ra ai: de a npu e, u amyu shagu nga nga nna, de a lakung lakying ni a shingnip hta shanu nga na mara ai. Shingrai, Ngai Madu gaw, tsaw ai hpun hpe shanem kau nna, nem ai hpun hpe shatsaw nngai mung, tsit lali ai hpun hpe jahkraw kau nna, hkraw ai hpun hpe tsit lali shangun nngai mung, nam mali na hpun ni yawng chye lu na mara ai; ngai Madu nan tsun ai hte maren shabyin na nngai.
Ya hti ai gaw, Karai Kasang a mungga rai nga ai.

CHYUM MUNGGA DAW 2

2 Korinhtu 5:6-10

Ya hti na gaw, Korinhtu masha ni hpang de San Pawlu shagun dat ai laika
lahkawng hta na rai nga ai.
Hpu nau ni e, anhte galoi mung myit mada let kam nga ga ai. Madu hpe n mu lu timung, makam masham anhte hpe lam madun dan ai majaw, ndai hkum hkrang hta naw shanu nga yang, Madu hte anhte tsan gang nga ai hpe chye nga ga ai. Kaja wa, anhte myit mada let kam nga ga ai rai nna, ndai shinggyim hkum hkrang the hka mat nna, Madu kaw shanu lu u ga, anhte grau nna ra nga ga ai. Dai rai nna, anhte a hkum hkrang hta naw rawng nga timung, dai hkum hkrang hte hka mat wa timung, Madu a man e sharawng awng ai ni tai lu hkra, n sim n sa shakut shaja nga ga ai. Kaning rai me law, tara jeyang daw dan ai Hkristu a man e, anhte a lam mahkra dan pru na ra ai. Dai shaloi e, Kaja ai hte n kaja ai hpe, dai hkum hkrang hta galaw saga ai hte maren, anhte langai hte langai hkam la shajang na ra ai.
Ya hti ai gaw, Karai Kasang a mungga rai nga ai.

KABU GARA SHIGA

Marku 4:26-34

Ya hti na gaw, Marku laika hta na Kabu Gara Shiga rai nga ai.
Yesu shi a sape ni hpe tsun mu ai gaw; Karai Kasang a mungdan ndai zawn rai nga ai; Masha langai mi aga hta nli gat bang da nu ai. Shaloi shani shana shi yup wa, rawt wa nga ai rai nna, shi n chye ai hku dai nli gaw pru wa nna, tu kaba wa nga ai. Aga gaw shi chyu asi si shangun nna, shawng e maku, hpang e mam nsi, dai hpang mam nsi kata e n-gu tum kung wa shangun ai. Mam myin jang, nmut ta du ai majaw, dai nli gat ai wa, shaloi jang nhkyau lang nna, mam dan nga ai, ngu mu ai. Bai Yesu gaw, Karai Kasang a mungdan hpe hpa hte shabung lu ga ta? Hpa baw ga shadawn the shadawn na ga ta? Dai gaw chyinghkrang tum zawn rai nga ai. Ga ntsa e gat dat jang, ga ntsa na tum amyu mahkra hta kaji htum rai nga timung, gat dat ai hpang tu wa nna, singwum kaba tai wa ai hte, lakung lakying kung dam wa nna, ntsa malen u ni, de a shingnip hta e shingbyi nga lu ma ai., ngu mu ai. Shingrai ga shadawn hku law law hte, shawa masha ni matsing lu ai hte maren, Yesu shanhte hpe dai mungga lam tsun dan mu ai. Ga shadawn hte nrai yang gaw, shi shanhte hpe hpa mung n tsun dan yu ai. Rai timung, Yesu hte Shi a sape ni hkrai nga ai shaloi, dai ga mahkra a lachyum shi shanhte hpe tsun dan mu ai.
Ya hti ai gaw, Madu a Kabu Gara shiga rai nga ai.

2024: YESU A SALUM NINGSANG POI SHANI NA MUNGGA

 “Tsawra myit hte hpring tsup ai Yesu a Salum Ningsang”
Anhte shinggyim masha ni a Salum gaw tsawra myit a masat kumla rai nga ai hte myit mang, tsun shaga, shamu shamawt lam mahkra a npawt rai nga ai. Nawku hpung hta Yesu a salum Ningsang poi kaba hpe Wasarabyin Pius IX gaw 1856 ning kaw nna woi awn galaw ai rai nga ai. Hpa majaw ndai poi hpe galaw ai rai ta?

Masha a hkum hkrang hta masin salum gaw, tsawra ai, n ju n dawng ai, kabu pyaw ai, yawn ai, myit machyi ai, hkrit tsang ai, matsan dum ai, myit daw ai zawn re ai, myit a shamu shamawt lam mahkra hpe hkam sha chye ai shara re ai hpe masha ni kam ma ai. Chyum laika hta shaleng da ai masha a salum gaw dai hta grau nga ai. Masha a masin salum gaw Karai Kasang hte tsaw ra kam sham matut mahkai ga shaga ai daju shara rai nga ai. “Shada da tsawra nga ga (1Yh 4:11) nga ai hte maren anhte grai tsawra hku hkau ai masha ni, grau nna shanhte ru yak jam jau hkrum nga ai ten hta jahkring hkring myit dum akyu hpyi ya chye nga ga ai. Dai ten Madu Yesu mung anhte hte rau shanhte a matu akyu hpyi ya nga ai hpe myit dum la mai nga ai. “Wa e, shanhte a mara dat kau ya mu: shanhte galaw ai lam shanhte n chye nga ma ai” (Lk 23:34). Yesu a Salum ningsang poi hpe galaw ai gaw, anhte hpe tsawra matsan dum n jin ai Yesu hpe chyeju dum shagrau ai lam mung rai nga ai. Dai ni na kabu gara shiga hta, “Shi a garep hpe ri hte galun waw ya ai shaloi jang, sai hte n tsin pru wa ai” (Yh 19:31) ngu ai gaw Yesu anhte hpe gade daram tsawra ai hpe tatut madun dan ai lam rai nga ai. Madu Yesu gaw mabyin amyu myu hku nna anhte hpe shi a tsawra myit madun dan ai hpe law law lang n chye hkap la ga ai. Shi a tsawra myit kaba hte masha ni a mara raw dat kau ya ai, machyi makaw hta na shamai shatsai ya ai, shut hpyit mara hta na hkyela ai, kaja ai hte n kaja ai masha yawng hpe tsawra chye na hkap la, chyeju jaw ya ai Madu rai nga ai. Yesu gaw “hki ba la nna lit li gun ai ni yawng hte e, ngai kaw wa marit, ngai nanhte hpe  ban sa shangun na made ai” (Mt 11:28) nga nna tut e saw shaga hkap la n-gun jaw ya nga ai.

Kalang lang tinang a magam bungli galaw ai hta n kam mat wa ai shaloi kang ka ai hte galaw lu na saw shaga ai, ru yak jam jau, myit ru  myit tsang amyu myu hkrum nga ai ni hpe, shi hpang de wa na matu  Yesu saw shaga nga ai. Grau nna, Yesu shi a sape ni hte hpang jahtum  shana shat sha ten hta shi a tsawra myit sakse hku nna Chyoipra  hkum sakramentu hpe shabyin da ya sai. Ndai chyoipra hkum kaw nna  masha yawng gaw tut e lwi taw nga ai hka hpawk zawn anhte hpe  chyeju n taw n tsang jaw ya nga ai. Kalawari kawng ntsa Yesu u dang  hta jen noi da hkrum ai ten hta, “Wa e, shanhte a mara dat kau ya  mu: shanhte galaw ai lam shanhte n chye nga ma ai” nga nna anhte  shinggyim masha ni a mara a matu tsawra myit kaba hte hpyi nem  tawng ban ya ai rai nga ai.

Hpang jahtum Yesu a garep hpe Nri hte galun waw ya ai shaloi Sai hte N tsin pru wa ai gaw anhte shinggyim masha ni hpe tsawra dik  sai lam shadan dan ai rai nga ai. Dai ni na kabu gara shiga gaw mau  hpa Madu Yesu a tsawra matsan dum ai lam hta shang lawm na matu  anhte yawng hpe saw shaga nga ai. Yesu zawn grit nem ai, tsawra  matsan dum ai, mara raw ya ai, shada chye na hkap la ai, myit galu  kaba ai hte tinang a kun dinghku, uhpung uhpawng hta Karai Kasang  jaw ai kabu hpa shaman chyeju hpe lu la, garan jaw lu ai kun? ngu nna tinang a hkum hpe dinglik yu mai nga ai.

2024: YESU A SALUM NINGSANG POI SHANI NA CHYUM LAIKA

YESU A SALUM NINGSANG POI
9th, June 9, 2024
CHYUM MUNGGA DAW 1

Hosea 11:1, 3-4, 8-9

Ya hti na gaw, Hosea a laika hta na rai nga ai.
Madu Karai Kasang a mungga madat la mu: Israela gaw ma kasha naw rai nga yang, ngai shi hpe tsawra nna, ngai sha hpe Egutu mung de na shaga la se ai. Ngai nan Ehprim hpe hkawm sharin nngai; nye a lata hte shanhte hpe pawn nngai: rai timung, ngai lanu lahku ai hpe shanhte n dum n chye ma ai. Tsawra matsan dum ai sumri hte ngai shanhte hpe dun woi la nngai. Ma kaji hpe pawn ahpum nna angwi sha lusha jaw ai wa zawn ngai rai nga nngai. Nye a kraw kata e matsan dum ai myit hpring tsup nna nye a n gaw n wai ai myit katu nga ai. Ngai naw masin pawt kahtet ai hte maren, n daw dan mayu nngai; Ehprim hpe ngai bai jahten kau na n rai. Hpa majaw nga yang, ngai gaw masha n rai, Karai Kasang rai nga nngai: nanhte a ka-ang e shanu ai Chyoi pra htum ai Wa ngai rai nga nngai; ngai gaw nanhte hpe jahten shabya kau na myit n rawng nngai. 
Ya hti ai gaw, Karai Kasang a mungga rai nga ai.

CHYUM MUNGGA DAW 2

Ehpesu 3: 8-12, 14 -19

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.
Hpu nau ni e, Ngai gaw chyoi pra ai ni yawng hta kaji htum ai wa rai nga timung, maigan amyu ni hpe Hkristu a galu kaba htum ai sutgan lam tsun shana dan na matu mung, dai sung la ai amu lam gara hku dik wa na ra ai lam, masha yawng hte hpe madun dan na matu mung, ngai hpe dai chyeju jaw ya ni ai. Nga manga hte hpe hpan da sai Karai Kasang hta e, moi chyaloi nhkoi kaw nna, dai sung la ai amu lam makoi magap da sai. Ya e Nawku Hpung a lata hte, Karai Kasang a chyahtum chyalai re ai hpaji byeng-ya hpe, lamu lahta tang e nga ai du magam ni hte ahkang aya lu ai ni kaw, shana dan na ra ai; dai gaw, anhte a  Madu Yesu Hkristu hta e shabyin na matu, prat dingsa Karai Kasang yaw shada ai lam hte maren rai nga ai. Anhte a Madu Yesu Hkristu hpe kam sham ai a marang e, nden ja ai myit hte, n hkrit n kang let, Karai Kasang kaw shang wa ai lam anhte lu la ga ai.
 Dai lam hpe myit dum let, sumsing lamu hta mung, ginding aga hta mung, kawa ngu shamying ai yawng hte a npawt daju rai nga ai, anhte a Madu Yesu Hkristu a man e ngai lahput hput di let akyu hpyi nga nngai; Dai Kawa gaw, shi a Wenyi a marang e, shi a n taw n tsang ai hpung shingkang hte maren, myit kraw lawang de hkrang lu ai atsam hte, nanhte hpe shadaw shalan ya u ga; Hkristu gaw makam masham a marang e, nanhte a masin salum hta shanu nga lu u ga; Tsawra ai lam hta nanhte ru jung da nna, tsawra ai lam a ntsa e nanhte a nga sat nga sa ai lam a npawt nhpang gaw da lu myit ga; Shing rai, chye chyang ai myit hte n dang chye ai Hkristu a tsawra ai lam, de a nda de, dingdung de, tsaw de, sung de, gade wa galu kaba nga ai hpe, Karai Kasang a amyu masha ni yawng hte rau, nanhte chye na lu myit ga; Karai Kasang a hkum tsup ai lam, mahkra hte, nanhte hkum tsup lu mu ga matu, ngai akyu hpyi nga nngai.
Ya hti ai gaw, Karai Kasang a mungga rai nga ai.

KABU GARA SHIGA

Yawhan 19: 31-37

Ya hti na gaw, Yawhan a laika hta na Kabu Gara Shiga rai nga ai.
Dai shani gaw shachyip ai nhtoi rai nga ai hte, laban nhtoi e wudang hta mang n noi nga u ga, Yuda masha ni gaw jen noi nga ai ni a lagaw kayet daw nna, dai mang ni hpe htawm kau na, Pilatu kaw ahkaw ahkang hpyi ma ai. Dai majaw hpyen la ni sa nna, Yesu hte rau jen da ai yan a lagaw hpe, kayet daw ya mu ai: Yesu kaw du yang, shi si mat sai hpe shanhte mu ma ai majaw, Shi a lagaw hpe n daw ya mu ai. Rai timung, hpyen la langai mi gaw, Yesu a garep hpe ri hte galun waw ya wu ai rai nna, shaloi jang sai hte ntsin lwi pru nga ai. Dai lam, mu ai wa gaw sakse hkam ya ai rai nna, shi a sakse teng man nga lu ai. Nanhte mung kam sham lu myit ga, teng  man ai ga shi tsun nga ai gaw, shi nan chye nga ai. Hpa majaw nga yang, dai lam byin ai gaw,‘Shi a nra langai mi pyi daw nanrai,’nga nna chyum laika hta ka da ai gaw, dik wa na matu rai nga ai. Bai Laika langai mi hta, Shanhte galun waw kau ai wa hpe shanhte mu lu na ra ai’ nga nna ka da nga ai.
Ya hti ai gaw, Madu a Kabu Gara shiga rai nga ai.