2024: YESU A SALUM NINGSANG POI SHANI NA MUNGGA

 “Tsawra myit hte hpring tsup ai Yesu a Salum Ningsang”
Anhte shinggyim masha ni a Salum gaw tsawra myit a masat kumla rai nga ai hte myit mang, tsun shaga, shamu shamawt lam mahkra a npawt rai nga ai. Nawku hpung hta Yesu a salum Ningsang poi kaba hpe Wasarabyin Pius IX gaw 1856 ning kaw nna woi awn galaw ai rai nga ai. Hpa majaw ndai poi hpe galaw ai rai ta?

Masha a hkum hkrang hta masin salum gaw, tsawra ai, n ju n dawng ai, kabu pyaw ai, yawn ai, myit machyi ai, hkrit tsang ai, matsan dum ai, myit daw ai zawn re ai, myit a shamu shamawt lam mahkra hpe hkam sha chye ai shara re ai hpe masha ni kam ma ai. Chyum laika hta shaleng da ai masha a salum gaw dai hta grau nga ai. Masha a masin salum gaw Karai Kasang hte tsaw ra kam sham matut mahkai ga shaga ai daju shara rai nga ai. “Shada da tsawra nga ga (1Yh 4:11) nga ai hte maren anhte grai tsawra hku hkau ai masha ni, grau nna shanhte ru yak jam jau hkrum nga ai ten hta jahkring hkring myit dum akyu hpyi ya chye nga ga ai. Dai ten Madu Yesu mung anhte hte rau shanhte a matu akyu hpyi ya nga ai hpe myit dum la mai nga ai. “Wa e, shanhte a mara dat kau ya mu: shanhte galaw ai lam shanhte n chye nga ma ai” (Lk 23:34). Yesu a Salum ningsang poi hpe galaw ai gaw, anhte hpe tsawra matsan dum n jin ai Yesu hpe chyeju dum shagrau ai lam mung rai nga ai. Dai ni na kabu gara shiga hta, “Shi a garep hpe ri hte galun waw ya ai shaloi jang, sai hte n tsin pru wa ai” (Yh 19:31) ngu ai gaw Yesu anhte hpe gade daram tsawra ai hpe tatut madun dan ai lam rai nga ai. Madu Yesu gaw mabyin amyu myu hku nna anhte hpe shi a tsawra myit madun dan ai hpe law law lang n chye hkap la ga ai. Shi a tsawra myit kaba hte masha ni a mara raw dat kau ya ai, machyi makaw hta na shamai shatsai ya ai, shut hpyit mara hta na hkyela ai, kaja ai hte n kaja ai masha yawng hpe tsawra chye na hkap la, chyeju jaw ya ai Madu rai nga ai. Yesu gaw “hki ba la nna lit li gun ai ni yawng hte e, ngai kaw wa marit, ngai nanhte hpe  ban sa shangun na made ai” (Mt 11:28) nga nna tut e saw shaga hkap la n-gun jaw ya nga ai.

Kalang lang tinang a magam bungli galaw ai hta n kam mat wa ai shaloi kang ka ai hte galaw lu na saw shaga ai, ru yak jam jau, myit ru  myit tsang amyu myu hkrum nga ai ni hpe, shi hpang de wa na matu  Yesu saw shaga nga ai. Grau nna, Yesu shi a sape ni hte hpang jahtum  shana shat sha ten hta shi a tsawra myit sakse hku nna Chyoipra  hkum sakramentu hpe shabyin da ya sai. Ndai chyoipra hkum kaw nna  masha yawng gaw tut e lwi taw nga ai hka hpawk zawn anhte hpe  chyeju n taw n tsang jaw ya nga ai. Kalawari kawng ntsa Yesu u dang  hta jen noi da hkrum ai ten hta, “Wa e, shanhte a mara dat kau ya  mu: shanhte galaw ai lam shanhte n chye nga ma ai” nga nna anhte  shinggyim masha ni a mara a matu tsawra myit kaba hte hpyi nem  tawng ban ya ai rai nga ai.

Hpang jahtum Yesu a garep hpe Nri hte galun waw ya ai shaloi Sai hte N tsin pru wa ai gaw anhte shinggyim masha ni hpe tsawra dik  sai lam shadan dan ai rai nga ai. Dai ni na kabu gara shiga gaw mau  hpa Madu Yesu a tsawra matsan dum ai lam hta shang lawm na matu  anhte yawng hpe saw shaga nga ai. Yesu zawn grit nem ai, tsawra  matsan dum ai, mara raw ya ai, shada chye na hkap la ai, myit galu  kaba ai hte tinang a kun dinghku, uhpung uhpawng hta Karai Kasang  jaw ai kabu hpa shaman chyeju hpe lu la, garan jaw lu ai kun? ngu nna tinang a hkum hpe dinglik yu mai nga ai.

2024: YESU A SALUM NINGSANG POI SHANI NA CHYUM LAIKA

YESU A SALUM NINGSANG POI
9th, June 9, 2024
CHYUM MUNGGA DAW 1

Hosea 11:1, 3-4, 8-9

Ya hti na gaw, Hosea a laika hta na rai nga ai.
Madu Karai Kasang a mungga madat la mu: Israela gaw ma kasha naw rai nga yang, ngai shi hpe tsawra nna, ngai sha hpe Egutu mung de na shaga la se ai. Ngai nan Ehprim hpe hkawm sharin nngai; nye a lata hte shanhte hpe pawn nngai: rai timung, ngai lanu lahku ai hpe shanhte n dum n chye ma ai. Tsawra matsan dum ai sumri hte ngai shanhte hpe dun woi la nngai. Ma kaji hpe pawn ahpum nna angwi sha lusha jaw ai wa zawn ngai rai nga nngai. Nye a kraw kata e matsan dum ai myit hpring tsup nna nye a n gaw n wai ai myit katu nga ai. Ngai naw masin pawt kahtet ai hte maren, n daw dan mayu nngai; Ehprim hpe ngai bai jahten kau na n rai. Hpa majaw nga yang, ngai gaw masha n rai, Karai Kasang rai nga nngai: nanhte a ka-ang e shanu ai Chyoi pra htum ai Wa ngai rai nga nngai; ngai gaw nanhte hpe jahten shabya kau na myit n rawng nngai. 
Ya hti ai gaw, Karai Kasang a mungga rai nga ai.

CHYUM MUNGGA DAW 2

Ehpesu 3: 8-12, 14 -19

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.
Hpu nau ni e, Ngai gaw chyoi pra ai ni yawng hta kaji htum ai wa rai nga timung, maigan amyu ni hpe Hkristu a galu kaba htum ai sutgan lam tsun shana dan na matu mung, dai sung la ai amu lam gara hku dik wa na ra ai lam, masha yawng hte hpe madun dan na matu mung, ngai hpe dai chyeju jaw ya ni ai. Nga manga hte hpe hpan da sai Karai Kasang hta e, moi chyaloi nhkoi kaw nna, dai sung la ai amu lam makoi magap da sai. Ya e Nawku Hpung a lata hte, Karai Kasang a chyahtum chyalai re ai hpaji byeng-ya hpe, lamu lahta tang e nga ai du magam ni hte ahkang aya lu ai ni kaw, shana dan na ra ai; dai gaw, anhte a  Madu Yesu Hkristu hta e shabyin na matu, prat dingsa Karai Kasang yaw shada ai lam hte maren rai nga ai. Anhte a Madu Yesu Hkristu hpe kam sham ai a marang e, nden ja ai myit hte, n hkrit n kang let, Karai Kasang kaw shang wa ai lam anhte lu la ga ai.
 Dai lam hpe myit dum let, sumsing lamu hta mung, ginding aga hta mung, kawa ngu shamying ai yawng hte a npawt daju rai nga ai, anhte a Madu Yesu Hkristu a man e ngai lahput hput di let akyu hpyi nga nngai; Dai Kawa gaw, shi a Wenyi a marang e, shi a n taw n tsang ai hpung shingkang hte maren, myit kraw lawang de hkrang lu ai atsam hte, nanhte hpe shadaw shalan ya u ga; Hkristu gaw makam masham a marang e, nanhte a masin salum hta shanu nga lu u ga; Tsawra ai lam hta nanhte ru jung da nna, tsawra ai lam a ntsa e nanhte a nga sat nga sa ai lam a npawt nhpang gaw da lu myit ga; Shing rai, chye chyang ai myit hte n dang chye ai Hkristu a tsawra ai lam, de a nda de, dingdung de, tsaw de, sung de, gade wa galu kaba nga ai hpe, Karai Kasang a amyu masha ni yawng hte rau, nanhte chye na lu myit ga; Karai Kasang a hkum tsup ai lam, mahkra hte, nanhte hkum tsup lu mu ga matu, ngai akyu hpyi nga nngai.
Ya hti ai gaw, Karai Kasang a mungga rai nga ai.

KABU GARA SHIGA

Yawhan 19: 31-37

Ya hti na gaw, Yawhan a laika hta na Kabu Gara Shiga rai nga ai.
Dai shani gaw shachyip ai nhtoi rai nga ai hte, laban nhtoi e wudang hta mang n noi nga u ga, Yuda masha ni gaw jen noi nga ai ni a lagaw kayet daw nna, dai mang ni hpe htawm kau na, Pilatu kaw ahkaw ahkang hpyi ma ai. Dai majaw hpyen la ni sa nna, Yesu hte rau jen da ai yan a lagaw hpe, kayet daw ya mu ai: Yesu kaw du yang, shi si mat sai hpe shanhte mu ma ai majaw, Shi a lagaw hpe n daw ya mu ai. Rai timung, hpyen la langai mi gaw, Yesu a garep hpe ri hte galun waw ya wu ai rai nna, shaloi jang sai hte ntsin lwi pru nga ai. Dai lam, mu ai wa gaw sakse hkam ya ai rai nna, shi a sakse teng man nga lu ai. Nanhte mung kam sham lu myit ga, teng  man ai ga shi tsun nga ai gaw, shi nan chye nga ai. Hpa majaw nga yang, dai lam byin ai gaw,‘Shi a nra langai mi pyi daw nanrai,’nga nna chyum laika hta ka da ai gaw, dik wa na matu rai nga ai. Bai Laika langai mi hta, Shanhte galun waw kau ai wa hpe shanhte mu lu na ra ai’ nga nna ka da nga ai.
Ya hti ai gaw, Madu a Kabu Gara shiga rai nga ai.

2024: CHYOI PRA AI HKUM HTE SAI POI SHANI NA MUNGGA

Anhte Kahtawlik hpung masha ni, Missa hkungga de lit magam nga ai majaw sha sa ai gaw grai yawn hpa kaba rai nga ai. Sape ni hta hpang jahtum daw sha poi hta byin lai wa sai lam yawng gaw ya aten, anhte a man e anhte a matu byin nga sai. Teng sha nga yang, Chyoipra hkum Sakramentu gaw Hkristu hte anhte lapran tawn da ai Ga shaka nan rai nga ai. Dai Ga shaka gaw lai wa sai ten, Mawshe hte lata la hkrum sai amyu masha ni Karai Kasang hte tawn da ai Ga shaka hpe myit dum lu ai. Hkristu Madu gaw Shi a hkum hpe Kawa Karai Kasang hpang de ap nawng ai shaloi, Shi a hkum hkrang sha n-ga, sak hkrung nga sa ai ten na amu magam ni yawng hpe ap nawng jau ai rai sai. Dai lam ni yawng hpe wudang ning tsa na hkungga hta hkum tsup hkra galaw sai.

Shi a hkum hpe ap nawng ai shaloi, Hkristu Madu gaw, Shi hkum nan hkungga nawng ai wa hte hkungga mung tai wa sai. Chyoi pra hkum Sakramentu hpe shabyin ai aten shagu hta anhte gaw Karai Kasang a mungga hpe na la lu nna, Hkristu Madu a hpang hkan nang na matu Ga shaka kalang bai hkam la ga ai. Teng man ai lam hte tsawra matsan dum chye ai Karai kasang hpe zup hpawng sakse hkam let Ga shaka hpe sadi dung nna Karai Kasang a amyu masha ni kaja wa rai nga ai hpe madun dan let masha kaga ni hpe mung dai Ga shaka mahkrum madup de woi la nga ga ai. Laban ninghtoi na nawku daw jau ai lamang hta anhte kaning rai shang lawm ai lam gaw anhte ni a makam masham sung ai lam hpe madun dan ai rai sai. Chyoi pra hkum Sakramentu hta anhte galaw lai wa sai lam hpe sha shani shagu na sak hkrung hkawm sa lam hta bai nhtang galaw sa wa ga. Madu Yesu, anhte a matu tawn da ya sai ndai Chyoi pra hkum Sakramentu hpe grau chye na hkap la sharawng awng lu na matu akyu hpyi ga!

2024: CHYOI PRA AI HKUM HTE SAI POI SHANI NA CHYUM LAIKA

HKRISTU A CHYOI PRA AI HKUM HTE SAI POI
June 2, 2024
CHYUM MUNGGA DAW 1

Pru mat wa ai Laika 24: 3-8

Ya hti na gaw, Pru mat wa ai laika hta na rai nga ai.
Mawshe gaw Madu a ga mahkra hte shi hkang dat ai tara mahkra, amyu masha ni hpe tsun shana wu ai. Amyu masha ni yawng mung, Madu tsun matsun mahkra anhte hkan galaw na ga ai, nga nna lang lata sha htan ma ai. Mawshe gaw Madu a ga mahkra ka da ngut jang, jahgpawt jau jau rawt nna, bum lagaw e tawn hkungri gaw nhtawm, Israela amyu shi lahkawng hkan nna, nlung shadaw shi lahkawng jun da wu ai. Israela a kashu kasha ni hta na shabrang ni hpe shi shangun dat nna, shanhte gaw Madu a matu wan nat hkungga hte mahku hkungga di na usu ni hpe sat nawng ya ma ai. Mawshe gaw sai ka-ang hkup la nna, jarung hta bang tawn wu ai; ka-ang hkup gaw, tawn hkungri hta lapri bun wu ai. Dai ga shaka laika mung shi la nna, shawa hpawng a man e hti dan wu ai; shanhte mung, Madu tsun matsun mahkra hpe anhte madat let hkan galaw na ga ai, nga nna tsun ma ai. Shaloi Mawshe gaw dai sai la nna, amyu masha ni hpe lapri bun let, Yu mu, sai ndai gaw, ya ngai tsun dan ai Karai Kasang a mungga mahkra hte maren, Madu nanhte hte tawn da ai Ga Shaka a asai rai nga ai, ngu nna tsun wu ai. Ya hti ai gaw, Karai Kasang a mungga rai nga ai.

CHYUM MUNGA DAW 

Hebre 9: 11-15

Ya hti na gaw, Hebre masha ni hpe de shagun dat ai laika hta na rai nga ai.
Hkristu gaw, du na ra ai shaman chyeju lam mahkra a npawt daju Jau tai na matu du sa jang, ndai hpan tawn ai mungkan ga hte n seng nna, masha a lata hte n shachyaw ai, grau kaba ai hte grau hkum tsup ai nawku ginsum hta shi lai sa nu ai. Shing rai, bainam hte dumsu kasha a asai hte n rai, shi hkum nan a asai hte, chyoi pra ai shara de kalang mi sha shang nna, htani htana hkye hkrang la ai lam lu la nu ai. Ya, bainam sai, usu sai hte nga upra a wan wu hte, awu asin hkrum ai ni a ntsa e lapri ya jang, hkum shan san seng hkra shanhte hpe shachyoi shapra ya lu ai teng yang gaw, Karai Kasang kaw nawng ya ai Hkristu a asai gaw, ahkrung nga ai Karai Kasang hpe daw jau lu hkra, nanhte a myit masin hpe si gying ai arawn alai hta na, grau nna shachyoi shapra ya lu na n rai ni? Dai rai nna, Hkristu gaw Ga Shaka Nnan a htinglu htinglai ya ai wa rai nga ai; hpa majaw nga yang, shawng na ga shaka a tawt lai ai amu ni hta na masha ni hpe hkye hkrang la na matu, Hkristu gaw si hkam sai majaw, shaga la hkrum ai ni gaw, Karai Kasang ndat da ai htani htana sali wunli hkam la lu ma ai. Ya hti ai gaw, Karai Kasang a mungga rai nga ai.

KABU GARA SHIGA

Marku 14: 12-16, 22-26

Ya hti na gaw, Marku a laika hta na Kabu Gara Shiga rai nga ai.
Matsi n rawng ai muk sha ai poi hta shang ai shani e, Shalai dat ai poi hte seng ai sagu kasha hpe, Yuda masha ni sat nawng ai htung nga ai majaw, Yesu a sape ni gaw, Dai Shalai dat ai poi sha na matu, gara shara hta e na a matu sa shachyip na, nang ra nga n ta? ngu nna shi hpe san mu ai. Shaloi sape shi lahkawng hpe shi shangun dat nna, Mare de sa masu; hka dibu hpai ai masha langai mi mu na ra ai: shi a hpang e hkan nang nna, shi gara kaw shang timung, dai nta madu hpe, Nye a sape ni hte rau Shalai dat ai poi hpe ngai sha lu na, nye a matu san da ai gawk kanang nga a ta?
nga nna sara gaw san shangun dat mi ai, ngu mu: shaloi, lajang shachyip da ai ntsa gawk kaba shi madun na ra ai; dai yang e anhte a matu jin jin lajang da mu, ngu nna tsun dat mu ai. Dai sape yan pru wa nna, mare de shang wa ma yang, Yesu tsun dat ai hte maren mu ma ai rai nna, Shalai dat ai poi shachyip da ma ai. Yesu hte shi a sape ni shat sha nga yang, shi muk la nna, shaman nhtawm, ahkyep alep di nna shanhte hpe jaw let, la mu, ndai gaw Nye a Hkum rai nga li ai, ngu mu ai.Bai, gawm hpe mung shi la nna, chyeju dum shakawn ngut jang, shanhte hpe jaw nna, shanhte nlang dai hta na lu ma ai. Shanhte hpe Shi tsun mu ai gaw: ndai gaw, masha law law a matu ru kau ya ai, dai ga shaka hte seng ai, nye a asai rai nga li ai. Nanhte hpe ngai teng teng tsun made ga: Karai Kasang a mungdan hta e tsabyi chyaru nnan hpe ngai lu lu na nhtoi du hkra, ndai tsabyi chyaru hpe, ngai kalang mi pyi bai n lu na ni ai, ngu nna tsun mu ai. Dai hpang shakawn kungdawn ga mahkawn ngut jang, shanhte gaw Tsanlun Bum de sa wa ma ai.
Ya hti ai gaw, Madu a Kabu Gara shiga rai nga ai.

2024: CHYOI PRA AI TRINITA POI SHANI NA MUNGGA

“Kawa kasha, Chyoi pra ai wenyi gaw hkungga shakawn nga u ga!
Chyoi pra ai Trinita poi ninghtoi gaw, Chyoipra ai wenyi yuhkrat wa ai poi a hpang, Paska poi a hpang 50 ya ngu na shawng na laban hta rai nga ai. Ndai laban a hpang na daw hpe Nawku hpung kaw nna Pranwan ladaw ngu shamying ai rai tim ahkyak n la ai gaw n-nga ga. Laban shani shagu gaw Chyoipra ai Trinita hpe nawku shakawn shagrau ai ninghtoi ni sha rai nga ai. Ndai ladaw hta Hkristu Madu hte Karai Kasang a sung htum ai mung sung lam ni hpe myit sumru ding lik yu na aten ni rai nga ai. Masum raitim langai sha re ai Karai Kasang a sung htum ai lam hpe lachyum htai, mahtai tam na shakut ai hta hkap la kam sham nna hkan shadik nga sa na gaw htuk nga ai. Karai Kasang atai nga ai hte Shi a nyan marai hpe anhte chye madat lu na n rai.

Karai Kasang gaw anhte hpe tsawra ai majaw hpan da nna, tsawra ai majaw mara hta na hkye hkrang la let tsawra ai majaw Sumsing ja sut gan hpe mung jaw ya na rai nga ai. Hpan Madu gaw Shi hpe hkrit na hta, tsawra hkungga let kam hpa manoi manat na matu grau ra sharawng nga ai. Kawa, Kasha, wudang masat galaw ai hte seng nna jau James Mcking tsun da ai gaw matsing hpa nan rai nga sai.

Anhte wudang masat galaw ai shaloi, majoi mi, galoi mung a galaw nga nna galaw ai lam n rai ai sha, akyu hpyi ga langai mi hpe tsun let Chyoi pra ai Trinita Karai Kasang hpe kam sham ai lam sakse hkam ai rai nga ai, nga ai. Kashi kamun Sakramentu hpe hkam la ai shaloi, Trinita Karai Kasang a mying ningsang hte anhte hpe mara kaw nna shalawt dat ai hte shaman chyeju law law hpe hkam sha lu sai. Shaman chyeju ni yawng gaw Trinita Karai Kasang kaw nna yu hkrat wa let wudang masat a marang e anhte kaw du pru ai. Kawa, kasha, Chyoipra ai wenyi a mying ningsang marang e anhte a myit gaw kam sham ai lam, masin salum gaw tsawra ai hte lagaw lata ni gaw masha kaga ni hpe daw jau lu na matu katu u ga, Chyoipra ai Trinita gaw anhte hpe shadut shadum ya na matu ndai poi ninghtoi hta akyu hpyi ga

2024: CHYOI PRA AI TRINITA POI SHANI NA CHYUM LAIKA

CHYOI PRA AI TRINITA POI

May 26, 2024

CHYUM MUNGGA DAW 1

Tara jahprang 4:32-34, 39-40

Ya hti na gaw, Tara Jahprang laika hta na rai nga ai.

Da ndai gaw Israela a kashu kasha ni hpe Mawshe tsun ai ga rai nga ai: Ginding aga ntsa e Karai Kasang shinggyim masha ni hpe hpan da ai nhtoi kaw nna, nanhte garai n pra yang na, lai mat sai prat ni mahkra hta ndai lam hpe gawn yu mu: Lamu ga htum ai maga kaw nna maga mi du hkra , ndai daram kaba ai amu byin yu sa ni? Karai Kasang wan kata na tsun dat ai nsen hpe nanhte na la nna nang hkrung nga ai zawn, amyu kaga ni na la nna naw hkrung nga ma ni? Nanhte a Madu Karai Kasang gaw, lamik kumla hte mauhpa amu, n-gun ja ai lata ladawn ai lahpum hte nanhte a matu majan gasat ai, hkrit hpa amu hte chyam dinglik yu ai lam amyu myu hpe, Egutu mung hta nanhte man e galaw dan nna, masha amyu ni hta na nanhte hpe, Shi a amyu shatai na matu shaw la nu ai. Dai zawn re ai hku hpara shaje shi a matu masha amyu ni hpe lata la lu sa ni? Dai rai nna, Madu gaw sumsing lahta tang hte ginding aga ntsa e Karai Kasng langai sha rai nga nna Shi hta kaga Karai shaje n nga sai hpe, dai ni e dum hprang nna, kraw lawang kata e matsing gun la mu law. Nang the na a prat tup a matu nang hpe jaw da ai mungdan hta, nang asak galu nga u ga matu mung, dai ni e, ngai tsun da ai matsun maroi ga hte hkang da ai tara lam ni hpe nanhte hkan shatup lu na rai myit dai, ngu nna Mawshe hkaw tsun da ai rai.

Karai Kasang a Mungga rai nga ai.

CHYUM MUNGGA DAW 2

Roma 8:14-17

Ya hti na gaw, Roma masha ni hpang de San Pawlu shagun dat ai laika hta na rai nga ai.

Hpu nai ni e, Karai Kasang a Wenyi e woi lakawn la hkrum ai ni yawng hte gaw, Karai Kasang a kasha ni rai nga ma ai.Kaning rai nme law, bai hkrit kang na matu mayam a wenyi hpe nanhte hkam la manit dai n rai; Abba, Wa e, nga nna jahtau chye lu hkra, kasha shatai ai wenyi hpe nanhte hkam la manit dai.

Dai Wenyi nan anhte a wenyi hte hkrum nna, anhte Karai Kasang a kasha ni rai nga ga ai hpe, sakse hkam ya ma ai. Shi a kasha ni rai nga yang gaw, sali wunli hkam la ai ni mung rai nga ga ai. Hkristu hte rau hpung shingkang hkam la lu hkra, shi hte rau nni nkri hkrum nga yang gaw, Karai Kasang a sali wunli hkam la ai ni anhterai nga ga ai.

Karai Kasang a Mungga rai nga ai.

KABU GARA SHIGA

Mahte 28:16-20

Ya hti na gaw, Mahte a laika hta na Kabu Gara Shiga rai nga ai.

Yesu a sape shi langai hte gaw, Shi shanhte hpe hkang da ai hte maren, Galile mung na bum de lung mat wa ma ai. Shi hpe mu jang, shanhte nawku ma ai; nkau mi mahtang ai n kam ma ai. Yesu shanhte hpang de sit sa wa nna, Sumsing lamu hta e mung, ginding aga hta e mung, up hkang na ahkang nlang hte hpe ngai kaw ap ya ni ai. Dai majaw nanhte pru sa nna, masha amyu baw shagu hpe sape shatai let, Kawa, Kasha, Chyoi Pra ai Wenyi a mying nsang hte, kashin kamun jaw nga mu; ngai nanhte hpe hkang da mada shanhte hkan shadik lu mu ga, sharin shaga ya mu. Dai hta kaga, lamu ga aprat htum mat hkra, ngai nanhte hte rau dinggrin a nga nga na nngai, ngu nna Yesu Madu Shi a sape ni hpe matsun dat mu ai.

Madu a Kabu Gara Shiga rai nga ai.

2024: CHYOI PRA AI WENYI YU HRAT WA AI POI NA MUNGGA

Chyoipra ai wenyi yu hkrat wa ai poi hpe anhte galaw ai gaw Shi Madu hpe hkungga shagrau shakawn ai hte Nawku hpung nnan byin pru wa ai hpe myit dum ai lam rai sai. Chyoipra ai wenyi gaw Hkristu Madu a sape ni hpe ga-sadi jaw da ai chyeju kumhpa nan rai sai. Karai Kasang a chyeju kumhpa du hkrat wa ai gaw Mungkan ga n tsa na Hkristu Madu a Sasana magam bungli yawng hkum tsup ngut kre ai de du nna anhte ni shaman chyeju hpring tup hkam sha ai aten nan rai nga sai. Ndai aten hta Tsawra matsan dum n jin ai Karai Kasang a lam gam garan na aten mung rai nga ai. Dai zawn rai n-gam garan shi yang, tinang a sak prat hpe masha kaga ni hkungga hkap la ai, san seng ai ni rai nga na matu galaw shakut ra ai. Kaja ai dinghku kanu/kawa, san seng ai, sari sadang hte hpring ai Jau marai mi zawn tai na ra ang ai. Lahkawng ngu na hta, Karai Kasang hte ni htep kanawn mazum ai lam nga ra ai.

Dai ni na kabu gara shiga hta Madu Yesu gaw Kawa Karai Kasang hte ni htep ai hpe madun dan sai. Anhte hta, anhte hta e nga ai Karai Kasang a tsawra matsan dum, mai kaja ai myit hpe makau grup yin hpe madun dan lu ai kun? Karai Kasang anhte hte rau teng sha nga ai hpe hkap la kam sham ai rai yang anhte galaw ra ai magam bungli ni hpe galaw na matu n hkrit ra na re. Kalang lang, anhte ni gaw galaw ra ai amu magam ni hpe galaw na matu hkrit tsang ai, koi gam kau chye nga ai. Chyoipra ai wenyi yu hkrat wa ai poi gaw Nawku Hpung shangai ai nhtoi mung rai nga ai. Dai majaw, Nawku Hpung galu kaba ngang grin nga na matu kaning rai jawm hpawng galaw nga ai hpe bai masam maram yu na nhtoi mung rai nga ai. Chyoipra ai wenyi hpe hkam la lu sai ngai gaw, tinang nga ai buga ginra hta nawku hpung grau nna ngang kang, zin lum, galu kaba wa na matu, kaning re ai ta tut magam bungli ni hta shang lawm galaw let hkrung rawt sai Hkristu hpe sak se hkam nga ai kun?

2024: CHYOI PRA AI WENYI YU HRAT WA AI POI NA CHYUM LAIKA

CHYOI PRA AI WENYI YU HKRAT WA AI POI
May 19, 2024
CHYUM MUNGGA DAW 1

Kasa 2:1-11

Ya hti na gaw, Kasa laika hta na rai nga ai.
Ya Pentekawste shani du jang, kasa ni yawng shara mi hta rau hpawng nga ma ai. Shaloi, nbung laru kaba wa ai zawn, lamu de na nsen akajawng kadu pru nna shanhte rawng nga ai nta, dai nsen hte hpring chyat rai wa ai. Wan shinglet zawn re ai baw mung shanhte kaw dan pru nna, bra karan wa nhtawm, langai hte langai a ntsa e jung nga ai. Shanhte nlang hte mung Chyoi Pra ai Wenyi hte hpring nna, dai Wenyi shadut mu ai hte maren, ga amyu myu shaga wa ma ai. Ya, sumsing lamu a npu e nga ai masha amyu shagu hta na, tara hkan shatup ai Yuda masha ni Yerusalem mare e nga nga ma ai. Dai kadu ai nsen na la jang. Masha unawng uwa hpawng sanna, sape ni tsun ai ga hpe, tinang nang a ga hku na la lu ma ai. Shanhte mak mat ai rai nna, mau mahka let, Yu mu, ya shaga nga ai ndai ni gaw, Galile masha hkrai n rai ma a ni? Dai rai yang gaw, anhte langai hte langai, tinang nang a dai daw shara na ga hku na la lu ai gaw, kaning re ai i? Parhti, Media, Elam mung na ni hte, Mesopotamia mung e nga nga ai ni; Yuda hte Kapodoki mung, Pontu hte Asia, Hprugi hte Pamhpuli; Egutu the Kureni ginwang hkan e nga ai Libia mung na ni; Roma nna wa nga ai ni, Yuda masha ni hte tara nnan hta la ai ni, Kreti hte Arabi mung na ni anhte rai nga ga ai; rai ti mung, anhte yawng hte gaw, Karai Kasang a mauhpa amu magam lam shanhte hkai dan ai ga hpe, tinang nang a ga hku na la lu ga hka! nga nna myit kahpra let tsun ma ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 12:3-7, 12-13

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, Chyoi Pra ai Wenyi hte sha n rai yanggaw, Yesu gaw Madu rai nga ai, nga nna kadai n tsun lu ai. Ya, chyeju kumhpa amyu myu nga timung, dai ni hpe karan jaw ai Wenyi gaw, langai sha rai nga ai. Daw jau ai lam amyu myu nga ti mung, Madu langai sha hpe anhte daw jau nga ga ai. Mauhpa atsam amyu myu nga timung, yawng mayawng hta e dai lam mahkra hpe shabyin ai Karai Kasang gaw langai sha rai nga ai. Raitimung, akyu chyeju lu la u ga she, dai Wenyi gaw langai hte langai hta e, Shi a atsam shapraw shadan dan nga ai. Masha a hkum hkrang hta daw shan law law rawng nga ti mung, dai ni yawng hte gaw hkum hkrang langai sha jawm tai nga ma ai. Dai hte maren Hkristu mung, daw shan law law lu ai hkum hkrang langai sha rai nga ai. Anhte yawng mayawng, Yuda ni hte Greka ni rai ti mung, mayam ni hte shanglawt ni rai ti mung, hkum hkrang langai sha tai na matu, Wenyi langai sha hta e kashin kamun hkam la saga ai rai nna, anhte yawng jawm lu na matu, dai Wenyi hpe jaw ya mani ai.
Karai Kasang a Mungga rai nga ai.

KABU GARA SHIGA

Yawhan 20:19-23

Ya hti na gaw, Yawhan a laika hta na Kabu Gara Shiga rai nga ai.
Dai laban bat a shawng shani na nsin rim e, Yuda masha ni hpe hkrit ai majaw sape ni hpawng nga ai nta e chyinghka la da sa yang, shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape ni mung dai Madu hpe mu lu jang, kabu gara nga ma ai. Bai, Yesu gaw, Nanhte ngwi pyaw nga myit ga; nye Wa Ngai hpe shangun dat ai hte maren, ngai mung nanhte hpe shangun dat made ai, ngu mu ai. Shing rai nhtawm, sape ni a ntsa e, Shi nsa kawut nna, Chyoi Pra ai Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara hpe rai ti mung, nanhte shagun da yang gaw, dai mara naw nga na ra ai, ngu nna shanhte hpe tsun mu ai.
Madu a Kabu Gara Shiga rai nga ai.

2024: YESU LAMU DE LUNG WA AI POI SHANI NA MUNGGA

Shani shagu na anhte hkawm sa shamu shamawt nga pra ai aten, makau grup yin na masha ni a tsawra myit, mai kaja ai amu magam hte myit tau ya chye ai ni hpe hkam sha ai shaloi Hkristu anhte hte rau rai nga ai zawn hkam sha na re. kabu gara shiga hta, tsawra myit, ngwi pyaw sim sa lam, kabu gara ai, hte Tara rap ra lam ni hpring tsup ai mungdan gaw gap na matu anhte hpe saw shaga nga ai. Dai re ai majaw, ‘tsap nna mau mada nga ai hte’ n-ngut ai, Madu Yesu a Sasana magam bungli hta anhte hkan galaw matut ra ga ai.

Kashin kamun Sakrametu hpe hkam la ngut sai ni yawng gaw Karai Kasang a mungdan a matu da ting shakut shang lawm ra sa ga ai. Nawku hpunga makam masham e sharin shaga ai hte maren shani shagu sak hkrung hkawm sa wa ai aten ding hpring, ding man ai, sadi dung ai, tara rap ra lam hpe hkan ai prat hta nga pra na ahkyak nga ga ai. Tinang a prat nga sa ai hte makau grup yin hpe sakse hkam nna shanhte a wenyi masa lam hpe mung galai shai ya na matu shakut ra sa ga ai.

Dai rai yang, Hkristu ra sharawng ai mungdan hpe hkrang shapraw gaw gap sa wa lu na rai nga ai. Karai Kasang a kabu gara shiga shachyam shabra na matu shakut ai hta anhte ni gaw garum la ai n-nga, tinang chyu sha shaja ra na n rai. Anhte hte rau a nga nga na ngu gasadi jaw da sai Karai Kasang ga mungkan ga htum mat ai ten du hkra rau nga nga na ngu nna mung gasadi jaw da sai. Chyoipra Wenyi Karai Kasang hpe mung anhte hte rau nga nga na matu shangun dat ya sai. Hkristu Madu gaw anhte marai hkum shagu hta nga nga ai hpe mung anhte kam sham saga ai.

Hkristu Madu Sumsing lamu de lung wa ai poi nhtoi gaw, anhte mung lani mi na nhtoi hta Madu zawn hkum hkrang hte nawng bai hkrung rawt nna Sumsing sut gan hpe hkam sha na myit mada shara jaw ya sai. Dai aten rai n du shi ai ya aten hta chyawm, Karai a mungdan hpe magawp maga gaw gap let dai Madu a tsawra matsan dum myit hpe makau grup yin na hpu nau ni hpe gam garan let hkum hkrang, wenyi ngun atsam lu la na matu jawm shakut sa wa ga law.

2024: YESU LAMU DE LUNG WA AI POI SHANI NA CHYUM LAIKA

YESU LAMU DE LUNG WA AI POI
May 12, 2024
CHYUM MUNGGA DAW 1

Kasa 1:1-11

Ya hti na gaw, Kasa laika hta na rai nga ai.
Shawng e ngai ka da ai laika hta, Htawhpilu e, Yesu sumsing lamu de shalun la hkrum ai nhtoi du hkra, shi galaw dan ai amu ni hte sharin shaga ai lam yawng hte hpe ngai ka lajang da se ai. Shi shalun la hkrum ai shani e, Chyoi Pra ai Wenyi a garum ai hte Shi lata la ai kasa ni hpe, ga matsun hkang da nu ai. Yesu si mat ai hpang, dai kasa ni hpe Shi a hkum shadan dan nna, kam ging ai sakse lam law law hte Shi naw hkrung nga ai hpe madun dan wu ai. Shing rai shanhte rau hpawng nga ai shaloi Yesu gaw, Yerusalem mare kaw na nanhte n pru ai sha, ngai kaw nna na la ai, Wa a ga ndat hpe ala nga mu; kaning rai nme law, ngai hkum nan nanhte hpe tsun da ai hte maren, Yawhan gaw hka hte kashin kamun jaw ai; nanhte chyawm gaw nhtoi gade n na yang, Chyoi Pra ai Wenyi hte kashin kamun hkam la na marin dai, ngu nna shanhte hpe tsun mu ai. Dai rai nna, Yesu hte rau hpawng nga ai ni gaw, Madu e, dai mundan hpe ya aten e Israela masha ni kaw bai de ya na rai ni? ngu nna san ma ai.
Yesu mahtang gaw, Wa shi a ahkaw ahkang hte daw dan ahkying hte aten ladaw hpe, nanhte chye shara n nga ai. Rai ti mung, Chyoi Pra ai Wenyi nanhte a ntsa e du jang, n-gun atsam lu la na myit dai rai nna, Yerusalem mare hte Yuda mung ting, Samari mung hte lamu ga htum hkra, nanhte nye a sakse ni tai wa na marin dai, ngu nna shanhte hpe tsun wu ai. Ndai ga tsun jang, shanhte yu nga ninglen, Shi hpe ntsa de shalun la ai rai nna, sumwi gaw shanhte a man e shi hpe magap la mat wa ai. Shanhte lamu de naw azi yu nga yang, yu mu, hpraw tu ai hpun palawng bu hpun ai marai lahkawng shanhte a makau e tsap pru nna, Galile masha ni e, htaw lamu de hpa rai azi yu nga myit ta? Nanhte a man na sumsing lamu de shalun la ai wa dai Yesu gaw, nanhte mada yu nga yang, Shi sumsing lamu de lung wa ai zawn, dai hku Shi bai du na ra ai, ngu nna kasa ni hpe tsun mu ai.
Karai Kasang a Mungga rai nga ai.

CHYUM MUNGGA DAW 2

Ehpesu 1:17-23

Ya hti na gaw, Ehpesu masha ni hpang de Kasa Pawlu shagun dat ai laika hta na rai nga ai.
Hpu nau ni e, anhte a Madu Yesu Hkristu a Karai Kasang , hpung shingkang rawng ai Kawa gaw, Shi hkumnan hpe chye chyang lu na matu, nanhte a myit masin hpe hpaji byeng-ya hte myit leng ai chyeju Shi jaw ya u ga, ngu nna ngai hpyi nngai. Karai Kasang shaga la ai a jaw e, myit mada shara gade wa nga ai hpe mung, chyoi pra ai ni gaw hpung shingkang rawng ai sali wunli gade wa hkrum lu na hpe; Shi hpe kam sham ai ni a matu, shi a chyeju atsam gade wa galu kaba nga ai hpe mung, nanhte chye lu na matu, Karai Kasang nanhte a myit masin na myi hpe jahtoi jasan ya malit ga, ngu nna ngai hpyi nga nngai. Karai Kasang gaw, Hkristu hta shabyin da ai amu hpe gawn yu jang, nanhte chye lu na myit dai.
Shi a atsam hte Hkristu hpe si mat ai kaw na sharawt la nna, sumsing lamu hta shi a hkra maga e dung nga shangun da wu ai. Du Magam, Ahkaw Ahkang, Hpung Shingkang hte Up ai Aya lu ai ni nlang hte a ntsa e mung, ndai prat hte htawm hpang na aprat e shamying lu ai amying ahkang mahkra a ntsa e mung, shi hpe shagrau shatsaw da nu ai. Karai Kasang gaw arai baw sumhpa hpe shi a lagaw npu e tawn da nu ai rai nna, yawng mayawng hpe up hkang lu na matu, Nawku Hpung a baw Shi hpe shatai da wu ai. Dai Hpung gaw Hkristu a hkum hkrang rai nga nna, yawng mayawng hpe jahpring shatsup ya ai Hkristu gaw, dai Nawku Hpung a marang e jahkum shatsup ai hkrum wu ai.
Karai Kasang a Mungga rai nga ai.

KABU GARA SHIGA

Marku 16:15-20

Ya hti na gaw, Marku a laika hta na Kabu Gara Shiga rai nga ai.
Yesu gaw kasa shi langai kaw dan pru nna, shi shanhte hpe, Nanhte mungkan ting chyam hkra hkaw dan mu; kam sham nna kashin kamun hkam ai wa gaw hkye hkrang la ai hkrum na ra ai; n kam n sham ai wa chyawm gaw, daw dan ai hkrum na ra ai. Kam sham ai ni madun dan lu na lamik kumla gaw, da ndai ni rai nga ai: Shanhte nye a amying hte nat ni hpe shaden kau lu na mara ai; chyasam ga amyu myu shaga wa na mara ai; shanhte a lata hte lapu hpe magra jum lu na hte, gung rawng ai baw hpe lu ti mung, hpa mung n hkrum na ma ai; machyi makaw hkrum ai ni a ntsa e lata mara ya nna,dai ni bran wa na mara ai, ngu nna shanhte hpe matsun dat mu ai. Shing rai, Madu Yesu gaw, shanhte hpe ga tsun da ai hpang, sumsing lamu de shalun la ai hkrum nna, Karai Kasang a hkra maga e dung nga ai. Kasa ni gaw hkawm sa wa nna, shara shagu hkan e hkaw dan ma ai: Madu mung shanhte hpe shingtau nna, galaw dan ai lamik kumla hte Mungga hpe shagrin ya mu ai.
Madu a Kabu Gara Shiga rai nga ai.