2024: PRAN WAN LADAW LABAN (3) NA CHYUM LAIKA

Pranwan Ladaw Laban (3)
January 21, 2024
CHYUM MUNGGA DAW 1

Yona 3:1-5,10

Ya hti na gaw, myihtoi Yona a laika hta na rai nga ai.
Lahkawng lang ngu na hta Madu gaw Yona hpe shi a mungga tsun dan wu ai. Madu gaw, Rawt u; kaba la ai Niniwe mare de sa nna, ngai nang hpe hkang da ni ai hte maren hkaw dan su, ngu wu ai. Shing rai Yona gaw Madu a ga hpe madat la nna, Niniwe mare de rawt sa wa sai. Ya Niniwe mare gaw nhtoi masum ya sat dam lada nna, nachying kaba la ai mare rai nga ai. Yona gaw dai mare hta e lani sat hkawm nna, Nhtoi mali shi ya lai jang, Niniwe masha ni hten mat na ra ai, ngu nna jahtau tsun wu ai. Niniwe masha ni gaw Karai Kasang hpe kam sham ma ai rai nna, lusha gam na ladaw tawn da ma ai hte, kaji ai ni kaw nna kaba ai ni du hkra, lachyit nba bu hpun ma ai. Ya dai mare na ni gaw tinang a n hkru ai lam koi kau ai amu hpe, Karai Kasang mu wu ai rai nna, shanhte hpe ari jaw na lam, shi matsan dum ai hte tawn kau nna hpa n di mu ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 7:29-31

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, ngai tsun mayu ai lam gaw: ahkying ladaw gying mat wa sai. Dai rai nna, num lu ai ni gaw n lu ai zawn rai wa manu ga. Hkrap ngu hkrap ngoi ai ni mung, yawn hkyen ai lam n nga ai zawn; kabu gara ai ni gaw kabu hpa lam n nga ai zawn; hpaga ga ai ni gaw tinang nan hpa n madu lu ai ni zawn rai wa manu ga. Bai nna, ndai mungkan ga a ja sutgan hpe jum lang ai ni gaw, dai hta myit hkum manoi nga mu ga. Kaning rai nme law, ya anhte mu chye ai ndai mungkan ga gaw lai mat wa nga ai.
Karai Kasang a Mungga rai nga ai.

KABU GARA SHIGA 

Marku 1:14-20

Ya hti na gaw Marku a laika hta na Kabu Gara Shiga rai nga ai.
Yawhan gaw ap kau hkrum ai hpang, Yesu gaw Galile mung de sa du nna, dai aten ladaw dik wa ai hte, Karai Kasang a mung dan gaw ni wa magang ra ai: myit malai lu nna, dai kabu gara shiga hpe kam sham nga mu, ngu nna Karai Kasang a kabu gara shiga hpe hkaw dan mu ai. Galile nawng makau e garet hkawm nga yang, Simun hte Andre yan nau gaw, nawng hta e sumgawn kabai bang nga ai hpe, shi mu hkrup wu ai. kaning rai nme law, shan gaw nga hkan sha ai masha rai nga ai. Shaloi Yesu gaw, Ngai kaw hkan marit, masha hpe hkan hkwi na masha, ngai nan hpe shatai na made ai, ngu nna shan hpe tsun mu ai. Shaloi jang shan gaw dai sumgawn ni hpe kau da nna, Shi kaw hkan nang ma ai. Bai, loi mi hkawm sa wa yang, Zebedi a kasha Yaku hte shi a kanau Yawhan yan hpe Shi mu hkrup mu ai; shan gaw dai li hta e tinang a sumgawn ni hpe kapa nna nga nga ma la ai. Shaloi jang Yesu gaw shan hpe shaga mu ai; dai rai nna shan gaw. Shan a kawa Zebedi hpe nchyang ni hte rau, dai li hta e jahti da nna shi kaw hkan nang ma ai.
Madu a Kabu Gara Shiga rai nga ai.

2024: PRAN WAN LADAW LABAN (2) NA MUNGGA

“Tsun rit, Madu e, na shăngun ma wa madat nga nngai”, Samuel Madu Karai Kasang hpe htan ya ai. Madu mung shi hte nga nga ai rai nna, shi grawng rawt wa ai. Shi tsun mi tsun, kaman li la n tai mat ai”.

Masha langai hpra prat hta, Karai e byin shăngun mayu ai lam, kaning re ai ap nawng dawjau ai prat hku nna Karai Kasang hte htingbu wa hpe dawjau na lam hpe kumla jaw ai rai nga ai. Shăga la ai lam madung hku nna hpan lahkawng nga ai: dinghku de ai prat hte dinghku n de ai prat, prat tup Karai a magam ap nawng dawjau ai, ngu ai hpan lahkawng re.

Masha yawng gaw dinghku de ai aprat hpe lăta la na ahkang lu ma ai. Dai kata kaw pyi hpa, kaning re ai amu hku nna Karai Kasang hte htingbu wa hpe dawjau lu na, nga, shaga la ai lam n bung ai. Yi sun hkau-na galaw ai ni, laksama galaw ai ni, gat dut ai ni, laika sharin ai ni, ngu, hpan amyu myu hku shada dawjau hkat ma ai. Kaning re ai shăga la ai lam, ngu ai hpe ginhka chye shăngun ai lam ni gaw, tinang hkum nan shărawng ai myit (e.g., laksama amu/hkai sun amu), tinang hta grau adan rai mu lu ai atsam (ningbaw ningla/hkaw tsun sharin shăga), shing re ai hku nna; kanu kawa shing n rai tinang hpe hpaji jaw lu ai jau/sara hku nna ginhka matsun madun ai hkrun lam hpe lata la ai, shing re ai mai byin ai.

Masha kau mi mahtang dinghku n de ai prat tup mahkawn shabrang aprat hku nna Karai a mungdan a matu ap nawng dawjau ai ni nga ma ai. Hkum nan kaji ten kaw na myit lawm ai rai yang rai na, tinang myit n hkawn n sharawng tim, kanu kawa/jau sara ni e lam matsun ai hpe sawn shen yu nna dawdan hkap la ai rai yang rai na. Dai mung Karai a nsen rai nga ai. Kau mi hpe mahtang Karai e dingtawk shaga la ai.

Samuel a kanu gaw kasha n lu hkraw ai gumgai mat ai; alak rai akroi anoi akyu hpyi ai majaw lu la ai kasha shingtai hpe Jau Eli a lata hta ap ya kau ai. Karai hpe dawjau na matu, langai sha re ai shadang sha hpe shi a ga-sadi hte maren nawng ya kau ai. Samuel hpe Karai Kasang dingtawk shaga la ai. Jau Eli e lam matsun ai hte maren, Samuel gaw madat mara ai: “Tsun rit, Madu e, na shăngun ma wa madat nga nngai”, nga ai.

Yawhan a laika hta Yawhan Baptista gaw shi a sape yan hpe Yesu hte shachyen ya ai, “Mungkan mara la kau ya ai Karai a Sagu Kasha hpe yu mu!”, nga ai. Dai sape yan Madu kaw na mungga na la ai hpang Yesu a sape tai wa ma ai hta n-ga, Andrew mahtang kahpu Simon hpe Yesu hte shachyen ya ai. Simon mung sape tai wa ai hte yesu gaw shi hpe dingtawk laksan shaga la nna Yesu de da na Nawku Hpung a htingdun lung rawk shatai da ai.
Langai hpra hpe Karai e saw shaga nna laksan lit magam ni jaw da ai. Tinang nang a shaga la hkrum ai lam hpe myit sumru yu mai ga ai. Dinghku de ai aprat hta pyi shaga la ai lam hta na laksan shaga la hkrum ai lam mung nga ai. Ma shalet sara tai na, matsan dum ai amu galaw na, laksan wudang hpai na san da hkrum ai, dai zawn. Dinghku n de ai ni mung, dai zawn laksan dawjau na shaga la hkrum ai.

Sumru yu na matu:
 Samuel a kanu gaw shaning lawlaw maudung dung nna nga lai wa ai. Shi akroi anoi akyu hpyi nna lu la ai langai sha re ai shadang sha hpe Karai a amu gun na nawng jaw kau ai. Shi zawn, anhte akyu hpyi ga ai kun? Shi zawn, kasha ni hpe ap nawng gwi ga ai kun?
 Tinang nang a shaga la ai lam hpe manu shădan nna Karai e jaw ai lit magam hku myit pyaw myit dik ai hte dawjau ga ai kun?
 Kaga masha ni hpe Yesu hte shachyen ya ai amu galaw yu sai kun?

2024: PRAN WAN LADAW LABAN (2) NA CHYUM LAIKA

Pran wan Ladaw (2)
January 14, 2024
CHYUM MUNGGA DAW 1

1 Samuela 3:3-10, 19

Ya hti na gaw, Samuela a laika hta na rai nga ai.
Samuela gaw Madu a nawku nta hta, Karai Kasang a chyoi pra ai sumpu tawn da ai shara e yup nga yang, Madu shi hpe shaga wu ai. Samuela gaw, Nang e nga nngai, ngu nna htan wu ai. Shaloi hkinjawng agyi Eli hpang de gat sa nna, Nang shaga ai majaw, wa ring ngai, ngu wu ai. Eli gaw, Ngai n shaga ai; naw yup nga su, ngu nna tsun jang Samuela wa nna bai yup nga ai. Bai Madu gaw, Samuela e, ngu nna shi hpe bai shaga wu ai. Shi mung rawt nna Eli hpang de sa nhtawm, Nang shaga ai majaw wa ring ngai, ngu wu yang, Eli gaw Ngai sha e, ngai n shaga ai; bai wa yup nga su, ngu dat wu ai. Ya Samuela gaw Madu a lam hpe atsawm sha garai n chye nga ai; Madu mung shi a mungga shi hpe garai n tsun dan wu ai.
Masum lang ngu na hta Madu gaw Samuela hpe shaga wu ai. Shi mung rawt nna Eli hpang de sa nhtawm, Nang shaga ai majaw wa ring ngai, ngu wu yang, dai ma hpe Madu shaga nga ai gaw Eli dum wu ai. Dai rai ai majaw Eli gaw, Naw wa yup nga su; ya na lang bai shaga jang, Madu e, tsun rit; na a shangun ma madat nga nngai, ngu nna htan u, ngu dat wu ai. Shing rai Samuela bai wa nna, shi a shara e yup nga ai. Shaloi Madu sa tsap nna, shawng na zawn, Samuela, Samuela nga nna, shaga wu ai. Samuela mung, Tsun rit; na a shangun ma madat nga nngai, ngu nna htan wu ai. Samuela kaba wa nna, Madu shi hte rau nga nga ai; shi n-gun matsing ai Madu a mungga langai mi pyi n nga ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 6:13-15, 17-20

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, Masha a hkum hkrang gaw n se n sa ai amu a matu n re ai sha, Madu a matu rai nga ai; Madu mung dai hkum hkrang a matu rai nga ai. Karai Kasang gaw Madu Hkristu hpe jahkrung sharawt la sai rai nna, anhte hpe mung shi a n-gun atsam hte jahkrung sharawt la na mi ai. Nanhte a hkum hkrang ni Hkristu a daw shan ni rai nga ai hpe nanhte chye chyalu rai nga myit dai; Madu Hkristu hte matut manoi nga ai wa gaw, nsa wenyi a lam hta Madu hte langai sha tai wa nga ai. Dai rai nna, n se n sa ai amu hpe koi kau nga mu. Masha galaw ai shut hpyit mara kaga hte gaw, tinang a hkum hkrang a shinggan e galaw nga ai; n se n sa ai amu galaw ai wa chyawm gaw shi a hkum hkrang hpe nan shut hpyit da wu ai. Ya nanhte a hkum hkrang gaw Chyoi Pra ai Wenyi sa nga ai htingnu rai nga ai hpe nanhte chye nga myit dai. Nanhte tinang hkum hpe madu lu ai n rai; nanhte a matu jahpu manu jaw ya nna mari da sai ni rai nga myit dai. Dai re ai majaw, nanhte a hkum hkrang hte Karai Kasang hpe shagrau sha-a nga mu law.
Karai Kasang a Mung rai nga ai.

KABU GARA SHIGA

Yawhan 1:35-42

Ya hti n a gaw Yawhan a laika hta na Kabu Gara Shiga rai nga ai.
Bai hpang shani e, Yawhan hte shi a sape lahkawng rau tsap nga ma ai rai nna, Yesu lai sa wa nga yang, Yawhan gaw Shi hpe mada yu nna, Karai Kasang a sagu kasha hpe yu yu mu! Ngu mu ai. Dai sape yan gaw shi tsun ai ga na nna, Yesu kaw hkan sa ma ai. Yesu gaw gayin yu nna, dai yan hkan sa ai hpe mu wu yang, nan hpa tam myit ta? ngu nna hkap san mu ai. Shan gaw, Rabai e, nang kanang nga n ta? ngu nna Shi hpe n htang san mu ai. Yesu gaw, sa ma rit, shaloi nan mu na marin dai, ngu nna shan hpe tsun wu ai. Dai re ai majaw, shan hkan sa nna, Shi nga ai shara ganang re ai mung mu ma jang, dai shani tup Shi hte rau nga nga ma ai. Yawhan tsun ai ga na nna, Shi kaw hkan sa ai yan hta na langai mi gaw, Simun Petru a kanau Andre rai nga ai. Dai wa gaw shi a kahpu Simun hpe shawng mu nna, an gaw Mesiah hpe mu saga ai, ngu nna shi hpe tsun dan ma ai. (Mesiah ngu ai ga lachyum gaw, Hkristu nga ai, rai nga ai) Shaloi Andre gaw Yesu hpang de shi hpe woi wa wu ai. Yesu gaw shi hpe hkap yu nna, nang gaw Yawhan a kasha Simun rai nga ndai: nang kehpa ngu ai mying lu na rin dai, ngu wu ai. (Kehpa ngu ai lachyum gaw, lunghkrung nga ai, rai nga ai)
Madu a Kabu Gara Shiga rai nga ai.

2024: HKAWHKAM MASUM POI SHANI NA MUNGGA

Lai sai masha aprat aban ni hta kadai masha hpe n tsun hpaw dan ai lam, dai mungsung hpe Chyoi Pra Wenyi gaw Kasa ni hte myihtoi ni hpe tsun hpaw dan ai. Madu Yesu hta, Kabu Gara Shiga a marang e, tara maigan masha ni mung, hkum langai a dawshan tai wa ma ai; shanhte mung, maren sha re ai sutli kumhtaw dagraw hkam la lu ma ai, nga, Ehpesu laika hta tsun jahpra dan ai.

Moi na Israel masha ni gaw Karai Kasang hpe mu na hkum tsun, Lamu Kasa hpe mu hkrup jang si lu na, ngu, kam ma ai. Anhte Sinpraw masha ni gaw baren hpe mu hkrup ai masha gaw si nan si na, ngu, kam ma ai n rai a hka! Karai Kasang hpe nan mu nna asak hkrung lu na lam, shangai wa ai Yesu hta Karai Kasang gaw Shi a hkum hpe madun dan nu ai. Dai hpe Greek ga hku “Epiphany” ngu shamying ai.

Kabu Gara Shi-ga hta ka da ai hpaji rawng ai masha marai masum gaw tara maigan masha ni rai ma ai. Lamu kap shagan ni a shamu shamawt alai maka hpe masam maram ai, lachyum htai chye ai ni rai ma ai. Karai Kasang gaw shing re ai masha ni hpe Shi a hkye hkrang la ai masing a mungsung hpaw madun dan ai. Dai gaw, laklai dik ai, htoi tu kabrim ai shagan langai mi, shanhte hpe lam madun dan ai rai nga ai. Shing re ai shagan praw pru jang, yawng hpe uphkang ai hkawhkam shangai na lam, sawn hpan hpaji laika ni hta ka da ai. Dai gaw, myihtoi ni tau nau tsun da ai ga rai nga ai. Maigan amyu masha ni she rai tim, myihtoi ni tau nau hkaw tsun da ai ga hpe kam ma ai.

Shanhte gaw, dai hkawhkam hpe mu hkra tam hkawm na matu, hkrun lam hkawm hpang ma ai. Grai loi ai hkrun lam gaw n rai na re. Jan prang e hkawm ra ai; shana aten na katsi kashung hkam ra ai; kawsi hpang gara hkrum ai aten nga na. Grau nna dai htoi tu ai shagan gan mat mat ai majaw, myit ung ang myit daw rai, chyam dinglik hkrum ai aten nga na. Jahtum e, Bethleham de du wa mahka, dai laklai shagan bai rawt lung wa ai. Jahtum e shanhte tam ai wa hpe mu ma ai.

Mahte ka da ai lam gaw labau shang hkrak byin ai, ngu n tsun lu ga ai. Hkye La Madu du maw ai aten na lamik kumla ni a lam myihtoi ni tau tsun da ai ga ni nga ai. Israel amyu masha ni mung, shanhte hkrum sha nga ai maigan hpyen ni a uphkang roi sha hkrum ai kaw na shălawt woi na ningbaw ninghkrin, awng padang ninghkrin hpe myit mada a la nga ai aten mung re. Shing re ai shingdu labau hpe akyu jashawn nna, Mahte gaw makam masham a sung dik ai lam hpe ka shalat ai rai nga ai.

Karai a amyu masha ningbaw ningla ni, jau ni, jaiwa ni, n dum n dam nga nga ma yang, shagan a hpang e hkan nang ai maigan masha marai masum gaw Yerusalem de du ma ai. Hkawhkam Herod mung, dai shagan a lam myit lawm ai majaw, jau ni, jaiwa ni, hpaji chye ai ni hpe dai shagan a lam lachyum htai shăngun ai rai lu ai. Myihtoi ni a ga hpe kam ai rai tim, Herod gaw shi hta grau ai wa shangai wa sai chye nna, n kam hkam ai myit hte sat kau na maw ai.

Masha shagu, tinang a prat hkrun lam si mat ai nhtoi hta kre ai rai nga ai. Dai hkrun lam laman, jaw ai teng ai, myit pyaw hpa, yu tsawm hpa, mai kaja ai baw yawng hpe tam ga ai. Mai kaja ai lam yawng a ningpawt daju, asak Madu, dai Hkye La Madu Hkristu nan rai nga ai. Masha yawng gaw mi shawng e tsun ai jaw ai, teng ai, pyaw hpa, mai kaja ai baw ni hpe hkan tam ninglen, htani htana grin ai asak, n hten n mat lu ai kabu pyaw ai lam hkan tam mayu ma ai. Hkrun lam hta ruyak jamjau ai lam amyu myu, manghkang amyu myu hkrum katut na ga ai; myit daw ai aten, hkrat sum ai aten, lam yit lam dam ai aten ni mung hkrum katut na ga ai. Lam madun shagan mat mat ai aten ni nga na re. Dai grin ai sak a chyeju kumhpa ni, masha tai wa ai a jahtum na myit mada ai bandung du na matu, dai htoi tu ai shagan, makam masham a lam matsun woi ai hpang hkan nang ra ga ai.

Karai Kasang anhte langai hpra hpe lam amyu myu hku shadan dan ai: tsawra garum shingtau ya ai ni hku nna, awng padang hku nna, hkrat sum ai mahkrum madup hku nna, machyi makaw hku nna, shalan shabran ya ai masha hku nna, hpan amyu myu hku, Karai Kasang hpe mu tam lu na lam Karai e lajang da ya ai.

Sumru yu na matu:
 Tinang a prat hta kaning re ai mabyin hte mahkrum madup ni hku nna Karai Kasang hpe tam mu na hkinjang tai wa ai kun?
 Karai a tengman ai lam, chyoi pra ai lam, atsam rawng ai lam tam mu ai hpang kaga masha ni hpe ninghtoi shagan tai ya ga ai kun?

2024: HKAWHKAM MASUM POI SHANI NA CHYUM LAIKA

HKAWHKAM MASUM POI
January 7, 2024
CHYUM MUNGGA DAW 1

Esaia 60:1-6

Ya hti na gaw, Myihtoi Esaia a laika hta na rai nga ai.
Yerusalem e, rawt u; htoi tu u; na a nhtoi du na ra ai; Madu a hpung shingkang na a ntsa e dan hkung nga ai: Kaning rai nme law, nsin gaw ginding aga hpe, saiwan gaw amyu baw ni hpe kaup nga ai, rai ti mung, Madu gaw, na a ntsa e paw pru nna, Shi a hpung shingkang na a ntsa e dan pru na ra ai. Maigan amyu ni gaw na a nhtoi de, hkawhkam ni gaw na a nhtoi tu kabrim ai de du sa na mara ai. Baw sharawt nna, grup yin mada yu mu; shanhte yawng zuphpawng nna, nang hpang de du wa mara ai. Na a shadang sha ni gaw sumtsan mung de na wa nna, na a shayi sha ni gaw ba wa ai ni hpe hkrum na mara ai.
Shaloi, nang mu mada yang, na a myiman htoi kabrim na ra ai; na a myit masin kabu gara ai hte kaba wa na ra ai; kaning rai nme law, nammukdara a sutgan nang hpang de kayin wa nna, maigan amyu ni a arung arai ni nang hpang de du na ra ai. Gawlauk wunawng ni, Midian hte Ehpa Mung na gawla-uk hkalung ni gaw, nang hpe ka-up na ra ai; Sheba mung na ni yawng du na mara ai; shanhte gaw aja hte lawban lang nna, Madu hpe shakawn kungdawn na lam kajai gumhkawng na mara ai.
Karai Kasang a Mungga rai nga ai.

CHYUM MUNGGA DAW 2

Ehpesu 3:2-3a, 5-6

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.
Hpu nau ni e, Karai Kasang nanhte hpe jaw mayu ai chyeju lam, Shi nye a lata hta ap ya da sai hpe nanhte na lu sai nhten; dai hta n-ga, dai mung sung ga sung hpe shingran ga hte ngai hpe shana dat ai gaw, nanhte na la sai hpe nawn da nngai. Ndai mung sung lam, ya aprat e Shi a chyoi pra ai kasa ni hpe myihtoi ni kaw, Wenyi a shadan dan ai hte maren , moi shawng na aprat ni hta e shinggyim masha kaw n shana yu mu ai. Dai mung sung lachyum gaw, maigan amyu ni Yuda amyu ni hte rau, ga ndat a sali wunli hkam la lu nna, shanhte hte rau hkum hkrang langai sha tai wa ai hte, ga ndat ni hpe jawm lu jawm la ai ni tai wa nga ma ai.

Karai Kasang a Mungga rai nga ai.

KABU GARA SHIGA

Mahte 2:1-12

Ya hti na gaw Mahte a laika hta na Kabu Gara Shiga rai nga ai.
Ya, Herawt hkawhkam a lakhtak hta, Yuda mung na
Betlehem mare e Yesu shangai wa ai hpang, Sinpraw mung na hpaji rawng ai masha ni Yerusalem mare de du sa ma ai rai nna, shangai wa ai Yuda hkawhkam wa gaw ganang e nga a ta? Shi a shagan hpe Sinpraw mung hta mu lu sai rai nna, Shi hpe Nawku na matu sa du ga ai, nga nna san mu ai. Herawt hkawhkam dai ga hpe na jang, shi hte Yerusalem na ni yawng gaw myit kahpra mat ai rai nna, dai amyu na hkinjawng agyi ni hte tara sara ni yawng hpe jahpawng Shinggyim da nhtawm, shanhte hpe, Hkristu gaw ganang e shangai wa na a ta? nga nna san wu ai. Shanhte gaw, Yuda mung na Batlehem mare e shangai wa na ra ai; kaning rai nme law, myihtoi wa ka da ai gaw, Yuda mung na nang Batlehem e, Yuda agyini hta kaji htum rai nga ndai n rai; nye a amyu Israela hpe woi rem na Du gaw, nang kaw nna pru wa na ra ai’ nga ai, ngu nna shi hpe tsun dan mu ai.
Shaloi Herawt gaw hpaji rawng ai ni hpe lagyim shaga la nna, dai shagan shanhte kaw dan pru ai aten hpe azin ayang san la nhtawm, Nanhte sa wa nna, dai ma kaji hpe azin ayang hkan tam mu; shi hpe mu jang ngai mung shi hpe sa Nawku lu u ga, ngai hpe wa shana rit, ngu nna shanhte hpe Batlehem mare de sa shangun dat mu ai. Ya, hkawhkam wa a ga na la jang, shanhte pru sa wa ma ai. Shaloi, yu mu, Sinpraw mung e mu mada ai shagan gaw, shanhte a shawng e sa wa nna, ma kaji nga ai shara ntsa ang e hkring mat ai. Dai shagan hpe bai mu ai shaloi, shanhte nachying kabu gara nga ma ai. Dai nta de shang wa jang, ma kaji hte Shi a kanu Maria hpe mu ma ai rai nna, lahput hput di let Shi hpe Nawku ma ai. Tinang a sut sumpu ni hpe hpaw nna, Shi hpe Aja, Lawban hte mura ngu ai kumhpa sak jaw ma ai. Herawt hpang hku bai n wa mu ga, yup mang hta shanhte hpe madun dan ai majaw, shanhte gaw tinang a mung de lam kaga hku wa mat ma ai.
Madu a Kabu Gara Shiga rai nga ai.

2023: CHYOI PRA AI HTINGGAW POI SHANI NA MUNGGA

Sanpra ai masha St. John Paul II tsun ai, “Kun dinghku ni hpe manu shadan ra ai; hpa majaw nga yang, shinggyim masha amyu a shawng lam gam maka, kun dinghku ni hta shachyaw gaw sharawt ai re” nga ai. Kun dinghku a dinghpring chyoi pra ai lam hpe manu shadan nna sha, shinggyim uhpung uhpawng ni rawt jat galu kaba wa lu ai hte, shinggyim amyu masha grin lu na rai nga ai.

Masha shada sat hkat ai majan a majaw, kun dinghku ni kade wa hten bya mat ai hpe anhte chye ga ai. Mungkan hta nse nsa ai amu hpe ninggun jaw ai ladat ni a majaw, nse nsa ai amu ni a majaw kun dinghku ni kade she hten bya mat ai lam hpe myit yu mai ga ai. Tinghkrai akyu amyat pyaw hpa tam ai tsa-ya kanni ya 4-ya ni a majaw, kun dinghku ni htenza mat ai kade law a hka! Shinggyim uhpung uhpawng ni hta byin nga ai hten bya lam ni a ningpawt ninghpang gaw kun dinghku masha ni kaw na hpang ai rai nga ai.

Amyu masha shagu, htunghking shagu, makam masham shagu, kun dinghku a dinghpring chyoi pra sanseng ai lam hpe sharin ya ai, matsun maroi ga ni, hpaji jaw ga ni nga ai, htung tara ni nga ai. Ran rawng hkra kup tsup ai tara matsun hte sharin achyin ai lam gara htung tara makam masham hta mung n nga ai. Rai tim, dinghku shagu gaw shada tsawra makawp maga, sai ni yang ni ai zawn magyep kap ai, zinlum hkat chye ai, masha yawng a myit hta Karai e jaw bang da ya chyalu rai nga ai.

Dinghku byak mat ai ni hpe yu yang ja gumhpraw lu ai n lu ai hte hpa n seng ai daram, hpaji madang nga ai n nga ai hte mung n seng ai daram re ai hpe mu lu na ga ai. Hkungran ga-shaka jaw hkat ai shaloi na ga-sadi a ntsa e kangka ai hku hkan shadik ai lam gaw ahkyak dik ai hpe chye lu ga ai. Dai ga-sadi grin ngang na matu gyit shajup ya ai gaw tsawra myit madung rai nga ai. Tsawra myit a lachyum htai hkap la ai lam hta mung, htung tara lailen ni hpe chye na hkap la ai lam hta mung, shinggyim uhpung uhpawng ni shai hkat ma ai. Chyum laika

hta kuptsup ai sharin shaga lam nga tim pyi, Hkristan ni hta lachyum htai hkap la ai madang n bung hkat ai hpe mu lu ai.

Sirak a laika hte Kolose hpung masha ni hpe shadum ya ga, ndai hte hpe hkan lu yang pyi ram la ai. Gawng kya ai shinggyim masha hpe hkye la na matu, Karai a Kasha hkum nan, shinggyim hkum shan dagraw la nna dinghku masha langai tai wa ai. Kuptsup ai kasi kamang hpe jaw ya ai. Kabu Gara Shi-ga hta lawm ai Yesu hte ni htep ai ni a mying ni hpe yu yang, yawng gaw Karai Kasang hpe hkrit hkung ga ai ni rai ma ai; makam masham htung tara ni hpe hkan shatup ai ni rai ma ai. Hkye la Madu hpe myit mada let n sim n sa akyu hpyi ai ni rai ma ai.

Yesu gaw dinghku langai na nta masha sha n re ai, mungkan dinghku a dinghku masha mung tai wa ai. Dam lada grau ai shinggyim amyu masha a dinghku masha tai wa ai. Mahte 12:50 hta tsun ai, Kawa Karai a sharawg awng ai lam hpe hkan ai ni yawng, shi a kanu kawa, kahpu kanau kana ni re, nga ai. Masha yawng gaw mungkan dinghku na dinghku masha ni re ai lam hpe myit dum ga yang, shada ginhka hkat na lam hpa n nga ai. Chyasam, ngu hkat na lam mung n nga ai. Dai na matu Hkristu gaw mungkan dinghku hpawng a dinghku masha tai wa ai.

2023: CHYOI PRA AI HTINGGAW POI SHANI NA CHYUM LAIKA

CHYOI PRA AI HTINGGAW POI
Dececember, 2023
CHYUM MUNGGA DAW 1

Sirak 3:3-7, 12-14

Ya hti na gaw, Sirak a laika hta na rai nga ai.
Kashu Kasha ni tinang a kawa hpe hkungga lara na lam, Karai Kasang hkang da nu ai; kanu gaw shi a shadang sha ni a ntsa e up hkang na ahkang aya hpe Madu nan jaw da nu ai. Tinang a kawa hpe hkungga lara di ai wa gaw, shut hpyit mara shaprai kau ai amu hpe galaw nga ai; tinang a kanu hpe akaw alaw di ai wa mung, sutgan law law mahkawng da ai wa hte bung nga ai.
Tinang a kawa hpe hkungga ai wa gaw, asak galu na ra ai; kanu a myit shadik shapyaw ai wa mung, Madu hpe madat mara nga ai.
Ngai sha e, nwa asak kaba wa ai shaloi, shi hpe bau garum u; shi hkrung nga ai nhtoi mahkra hta, shi a matu yawn hkyen shara hkum tai e. Shi myit n gring wa ti mung, nang hkam kaja ai hte n-gun rawng ai wa gaw, nwa a myit n-gun kya ai hpe hkam sharang nna, shi hpe n gawn n sawn hkum di u; kaning rai nme law, nwa hpe sumnung shingdi ai hte galaw ya ai lam hpe galoi mung malap kau ya na n rai; na a mara raw dat ya na lam tai na ra ai.
Karai Kasang a Mungga rai nga ai.

CHYUM MUNGGA DAW 2

Kolose 3:12-21

Ya hti na gaw, Kolose masha ni hpang de San Pawlu shagun dat ai laika hta na rai nga ai.
Hpu nau ni e, nanhte gaw Karai Kasang a lata la ai amyu rai nna, chyoi pra ai ni hte tsawra hkrum ai ni rai nga myit dai. Dai re ai majaw, matsan dum chye ai, mai kaja ai, myit nem ai, sumnung shingdi ai, myit galu kaba ai dagraw nga mu; nanhte a n-gun kya ai hpe shada da hkam sharang nna, mara langai ngai nga yang gaw, shada da raw dat hkat nga mu. Madu gaw nanhte a mara raw dat kau ai hte maren, nanhte mung shada da raw dat ya mu. Hpang jahtum e, dai yawng hte hpe matut da na hte jahkum shatsup ya na matu tsawra ai myit hpe dagraw hpun nga mu. Nanhte a myit masin hta e mung, Hkristu a ngwi pyaw ai lam a up nga u ga; kaning rai n me law, hkum hkrang langai sha a daw shan ni tai lu hkra, nanhte hpe shaga la manit dai. Dai hta n-ga, chyeju dum ai myit nanhte hta e a rawng nga mu.
Hkristu mungga gaw, nanhte hta n taw n tsang a shanu nga u ga: hpaji byeng ya amyu myu hte nanhte shada da sharin shaga nna, shadum jahprang ya mu. Nanhte a kraw lawamg hta e Karai Kasang hpe chyeju dum let, shakawn kungdawn ga, mahkawn mangoi ga, wenyi hte seng ai laka ga hpe mahkawn mangoi nga mu. Nanhte hpa lam galaw myit yang, ga hte rai ti mung, amu hte rai ti mung, Madu Yesu a amying ningsang hta galaw nga nna, Shi a marang e Kawa Karai Kasang hpe chyeju dum nga mu.
Numsha ni e, tinang a madu wa hkang ai hku hkan nga mu; dai gaw Madu a man e sut nga ai. La ni e, madu jan ni hpe tsawra nga nna, shanhte hpe sumnung shingdi ai hku galaw mu. Ma ni e, kanu kawa ni hpe madat mara nga mu; dai gaw, Madu a man e sharawng awng ai lam rai nga ai. Kanu Kawa ni e nanhte a ma ni myit n kaji u ga, shanhe hpe ladu lai nna hkum hta ahkre nga mu.
Karai Kasang a Mungga rai nga ai.

Kabu Gara Shiga

Luka 2:22-40

Ya hti na gaw Luka a laika hta na Kabu Gara Shiga rai nga ai.
Mawshe a htung tara hte maren Maria a jasan jaseng ai nhtoi gu jang, ‘Shadang sha alat dai Madu a matu chyoi pra ai nga lu na’ nga nna, Madu a tara lam hta ka da ai majaw, ma Yesu hpe Madu kaw sa ap ya na matu mung, Madu a tara hta tsun da ai hte maren, U hkru du lahkawng, shing nrai, U ra lahkawng hpe hkungga nawng ya na matu mung, Maria yan Yosep gaw dai ma hpe Yerusalem mare de woi sa ma ai. Ya, Simun mying ai masha langai mi Yerusalem mare e nga ai, dai wa gaw Dinghpring ai hte tara hkungga nna, Israela hpe shalan shabran na lam myit mada nga ai wa rai nga ai. Chyoi Pra ai Wenyi mung shi a ntsa e nga nga ai. Simun gaw Madu Karai a Hkristu hpe garai n mu yang, si na n rai, nga nna Chyoi Pra ai Wenyi hte madun dan ai lu la nu ai. Shi gaw Chyoi Pra ai Wenyi shadut ai a majaw, Nawku htingnu kata de du sa wu ai: kanu yan kawa gaw Ma Yesu hpe tara htung hte maren di ya na matu woi sa mu ai shaloi, Simun gaw shi a lata hte Ma hpe pawn la nna, Karai Kasang hpe shagrau sha-a let, N-gawn Madu e, Na a ga hte maren Na a shangun ma ngwi pyaw ai hte ya wa shangun dat nit ga law: kaning rai nme law, masha amyu shagu a man e nang lajang da nna, maigan amyu ni hpe jahtoi dan na nhtoi hte, Na a amyu Israela a hpung shingkang rai nga ai, Na a hkye hkrang la ai lam hpe, nye a myi hte chyaw ngai mu lu se ai, nga nna tsun wu ai.
Kanu yan Kawa gaw Ma Yesu a lam tsun ai ga a majaw mau nga ma ai. Simun mung shanhte hpe shaman ya nna, kanu Maria hpe, Yu u, ndai ma gaw, Israela masha ni hta na, law law a matu kataw shara hte, law law a matu rawt wa na lam mung, masha ni kau da na masha law law a kraw lawang na myit mang ai lam dan leng wa na ra ai; na a masin salum hta nan nhtu htinggrang na ra ai, ngu nna Maria hpe tsun wu ai. 
Dai hta n-ga, Ashe amyu na Hpanuela a shayi sha, Anna ngu ai num myihtoi langai mi nga ai; Shi gaw asak grai kaba la sai; mahkawn aprat kaw nna sanit ning laman hta shi a madu wa hte nga nhtawm, ya asak matsat shi mali ning du ai gaida rai nga ai. Dai numsha gaw Nawku htingnu kaw na npru ai sha, lusha gam nna akyu hpyi ai hte, shani shana Nawku daw jau nga wu ai. Shi mung dai ahkying hta nan lai sa nna, Karai Kasang hpe chyeju dum shakawn let, Yerusalem a hkye hkrang la na lam myit mada ai ni yawng hte hpe, Ma Yesu a lam tsun dan mu ai. Maria yan Yosep gaw Madu a tara hte maren ra ai lam mahkra hpe hkan shatup nhtawm, Galile mung na shanhte nga ai Nazaret mare de bai wa ma ai. Ma Yesu gaw kaba wa ai hte n-gun atsam jat wa let, hpaji hparat hte hkum tsup wa nu ai; Karai Kasang a chyeju mung shi hta e a nga nga ai.
Madu a Kabu Gara Shiga rai nga ai.

2023: HKRISMAT POI SHANI NA CHYUM LAIKA

HKRISMAT POI SHANI

December 25, 2023

CHYUM MUNGGA DAW 1

Esaia 52:7-10

Ya hti na gaw myihtoi Esaia a laika hta na rai nga ai.

Kabu gara ai shiga gun nna, ngwi pyaw ai lam shana ai wa a lagaw, kade tsawm htap nga a hka Kaja ai shiga kajai gumhkawng ai hte, hkye hkrang la ai lam shana ya let, na a Karai Kasang up nga ai nga nna, Ziun hpe tsun shana ai wa a lagaw gaw, bum lang ntsa e gade tsawm htap nga a hka! Na a sin langa ni a nsen madat u; shanhte nsen sharawt nna kabu gara ai hte rau garu ma ai: kaning rai nme law, Madu gaw Ziun mare de nhtang wa ai hpe, tinang nan myi chyaw mu lu na ma ai. Yerusalem mare na katsi katsang shara ni e, mahkawn mangwi let rau garu mu; Madu gaw, Shi a amyu hpe shalan shabran ai hte, Yerusalem mare hpe hkye mawai la wu ai. Madu gaw, masha amyu baw ni mahkra a man e Shi a chyoi pra ai lahpum shadawng dan nna, anhte a Karai Kasang hkrang la ai lam gaw, lamu ga htum hkra dan leng wa sai.

Karai Kasang a Mungga rai nga ai.

CHYUM MUNGGA DAW 2

Hebre 1:1-6

Ya hti na gaw, Hebre masha ni hpang de San Pawlu shagun dat ai laika hta na rai nga ai.

Hpu nau ni e, Karai Kasang gaw moi na lakhtak hta, prat mi hte prat mi lam amyu myu hku nna, myihtoi ni a n-gup hte ji wa ni hpe ga tsun da nu ai. Ndai hpang jahtum na aten ladaw hta, Shi a Kasha a n-gup hte anhte hpe ga matsun jaw da mani ai. Dai Kasha hpe, sali wunli mahkra hkam la na matu, Karai Kasang san da ai rai nna, Shi a marang e ndai mungkan ga hpe hpan tawn da nu ai.

Dai Kasha gaw, Karai Kasang a hpung shingkang tu kabrim ai nhtoi rai nga ai hte, Karai a atai a hkrang sumla rai nga nna, Shi hkang da ai mungga a atsam hte, Shi yawng mayawng hpe bau sin nga ai. Ya shut hpyit mara shatsai kau ya nna, matsaw ningtsang na daru magam a hkra maga de shi dung nga nna, lamu kasa ni hta Shi grau reng ai amying hkam la sai hte maren, shanhte hta Shi grau reng ai wa tai nga ai. Kaning rai nme law, ‘Ngai Sha Nang rai nga ndai; dai ni e Ngai Nang hpe shaprat sade ai’. Bai nna, ‘Ngai gaw Shi a Kawa tai nna, Shi gaw Ngai sha rai na ra ai’ nga nna Karai Kasang tsun ai ga hpe , gara lamu kasa hpe Shi tsun yu a ta? Dai hta kaga, Shi a Kasha Alat hpe Mungkan ga de jashawn dat ai shaloi, ‘Karai Kasang a lamu kasa ni yawng Shi hpe nawku mu ga’, nga nna tsun wu ai.

Karai Kasang a Mungga rai nga ai.

KABU GARA SHIGA

Yawhan 1:1-5, 9-14

Ya hti na gaw, Yawhan a laika hta na Kabu Gara Shiga rai nga ai.

Shawng npawt e Mungga nga nga ai: dai Mungga gaw Karai Kasang hte rau nga nga nna, dai mungga nan Karai Kasang rai nga ai. Dai Mungga gaw shawng npawt e Karai Kasang hte rau nga nga ai. Arai yawng mayawng hte gaw Shi a marang e tai wa ai rai nna, Shi n galaw lawm ai gaw langai pyi n nga ai. Shi hta e, asak daju rawng nga ai rai nna, dai asak gaw masha ni a nhtoi rai nga ai.

Dai nhtoi gaw nsin hta htoi nga nna, nsin mahtang dai hpe n dang kau lu ai. Mungkan ga e shangai wa ai masha yawng hte hpe jahtoi ya ai Nhtoi nga nga sai. Shi gaw nhtoi majing rai nga ai. Shi gaw mungkan ga e nga nga ai hte, mungkan ga mung Shi a marang e tai wa sai; rai timung, mungkan ga gaw Shi hpe n chye wu ai.

Shi gaw shi a buga de du sa timung, Shi a baw sang ni shi hpe n hkap la ma ai. Shi a amying ningsang hpe kam sham nna, Shi hpe hkap la ai ni yawng hte hpe chyawm gaw, Karai Kasang a kasha ni tai lu na atsam Shi jaw da nu ai; dai ni gaw, asai the shaprat ai ni n rai, hkum shan a myit hte mung n rai, masha a myit maw ai lam hte mung n rai, Karai Kasang e shaprat ai ni she rai nga ma ai. Mungga gaw masha tai wa nna, anhte hte rau nga nga sai. Dai rai nna, Kawa hta na prat wa ai Kasha shingtai a hpung shingkang zawn, Shi a hpung shingkang hpe anhte mu lu saga ai.

Madu a Kabu Gara Shiga rai nga ai.

2023: DUSA LADAW LABAN (4) NA MUNGGA

Hkawnsek Maria kaw na shăngai wa na kasha gaw, Yaku a nta (Karai a amyu sha) a ntsa htani htana uphkang na hte, shi a mungdan tutnawng dinggrin nga nga na, nga ai. Dai shăngai wa na kasha gaw shinggyim masha e shăbyin ai amu n rai, Karai Kasang kaw na re ai lam, prat shagu hta makoi magap da ai mungsung, shăngai wa ai Yesu hta hpaw tsun dan ai, nga ai.

Gawng kya shut hpyit chye ai Hkawhkam Dawi gaw, Karai Kasang hpe ja ja myit dum ai, chyeju dum chye ai. Shi gaw hkik hkam ai hkaw htingnu e rawng nna ga-shaka sumpu mahtang ban hte ban, tap ginsum e sha rawng lu ai hpe myit dum ai; shi n rai dum ai. Dai majaw, Karai Kasang a matu hkik hkam ai htingnu gawgap ya na, nga ai. Shi a shăgrit shănyem chye ai myit, chyeju htang jaw chye ai myit masin a majaw, shi myit lu, sawn lu ai hta shadawn n mai ai daram, Karai Kasang shi hpe jaw na, nga ai. Dai gaw, shi a aru arat kaw na paw pru na Hkawhkam gaw, shi a ting-nyang hta htani htana hkaw dung lu na, nga ai ga-sadi Karai kaw na lu la nu ai. Kade kaba ai shagrau kumhpa rai a hka! Karai Kasang hpe chyeju htang jaw na lahpawt dum ga ai kun?

Dawi hpe jaw da ai ga-sadi, Hkawnsek Maria hte kasha Yesu hta dik wa ai lam, San Luka sakse hkam dan ai. Dai Hkawnsek ma gun wa ai lam gaw Karai Kasang kaw na re ai, Karai e shabyin ai amu re ai lam hpe mung, sakse hkam ya ai. Chyaloi nhkoi kaw na, prat hte prat makoi magap da ai, sung dik ai Karai a hkye hkrang la ai lam, dai mabyin ni hta Karai Kasang gaw hpaw malang dan sai, nga, San Pawlu sakse hkam ya ai. Karai e nan shădan dan ai, hpaw tsun dan ai lam hpe shinggyim masha gaw kam nan kam ra ai, kamsham myit hte madat hkam la ra ai lam, San Pawlu matsun ai.

Masha hkum shagu, tinang hkye hkrang la hkrum ai kaw du lu na lam, Karai e laksan chyeju jaw, masing maka ka dat ai lam hpe kamsham ai myit hte madat mara hkam la ra ga ai. Tinang n chye madat ai prat na mahkrum madup ni hta, Karai e mai kaja ai lam hpe kamsham nna, tinang sing la ai gam maka hku n rai, Karai e sing da ya ai prat a maka ni hpe grit nyem ai myit, kamsham ai myit, madat mara ai myit hte hkap la chye ra ga ai. Dawi a shăgrit shănyem chye ai myit, chyeju dum chye ai myit masin hte, dai Hkawnsek a makam masham hte madat mara ai alai hpe kasi shatai mai ga ai.

Dai Hkawnsek gaw, “Ngai hkawnsek rai nngai, dai gara hku byin lu na ta?” nga ai. Karai e shabyin ai amu hpe shi n chye na ai rai tim kamsham madat mara ai myit hte, “Na ga hte maren ngai hta dik wa u ga” ngu nna htan ya lu ai rai nga ai. Hkye la Madu a kanu tai na, ngu ai hta, kade daram ruyak jamjau hkrum na lam Maria gaw tau chye da ai n rai. Karai Kasang a matu n byin mai ai hpa n nga ai, ngu ai ga hpe shi kamsham ai. Karai Kasang hpe nhpaw n-ya ap nawng da lu ai.

Sumru yu na matu:
 Tinang lu lawm awng dang wa ai aten ni hta, Dawi zawn, Karai
Kasang hpe myit dum chyeju htang chye ga ai kun? Karai Kasang hpe nampum toi ai myit jasat hte chyeju htang ai she law ga ai kun?
 Karai a mauhpa chyeju ni hpe hkam la lu ai hpang, San Pawlu
zawn, kaga masha ni hpe mung hkye hkrang la ai chyeju hpe gam garan ya na gara hku shakut lawm ai kun?

2023: DUSA LADAW LABAN (4) NA CHYUM LAIKA

Dusa ladaw laban (4)
December 24, 2023
Chyum Mungga Daw 1

2 Sam 7:1-5, 8-12, 16

Ya hti na gaw Samuela a laika lahkawng hta na rai nga ai.
Ya, Hkawhkam Dawi gaw jut magup na shi a hpyen ni yawng a lata na, Madu a chyeju hte hkye la ai hkrum nna, shi a hkaw e ban sa lu ai shaloi, myihtoi Nahtan hpe shi tsun wu ai gaw: Yu u, ngai wa gaw marau hpun nta hta rawng nga ni ai; Karai Kasang a chyoi pra ai sumpu chyawm gaw sumpan sum hta e rawng nga ai. ngu wu ai. Shaloi Nahtan gaw, Madu nang hte rai nga ai rai nna, nang myit lu ai hte maren galaw u, ngu nna Dawi hkawhkam hpe htan ya wu ai. Rai ti mung, dai shana e pyi Madu a mungga Nahtan kaw du nna, tsun ai gaw, Nye a shagun ma Dawi hpe sa tsun su; Madu ning nga ai: Ngai sa nga na htingnu hpe nang galaw lu na masha rai n ni? Nye a amyu Israela a ntsa e up ai du tai na matu, nang sagu naw rem nga ai shaloi, sagu lawng hta na ngai nang hpe lata la sade ai. Nang sa wa ai shara magup de nang hte rau ngai nga nga nna, nang hpe hpyen ni nlang hpe na a man e ngai seng kau ya sade ai. Shing rai, ga ntsa na dan hkung ai ni a galu kaba ai amying zawn, ngai na a amying hpe mung, galu kaba shangun ya na de ai.
Nye a amyu Israela matu mung, nga shara ngai tawn da nna, htawm hpang de shanhte shamu shamawt n re ai sha, tinang shara e nga grin lu hkra , ngai shanhte hpe shangang na we ai. Nye a Israela a ntsa e tara agyi ni hpe tawn da ai aprat e, n hkru n kaja ai ni zingri zingrat lu ai zawn, htawm hpang de zingri lu sana n rai; ngai shanhte hpe ban sa shangun na we ai. Nang hkum hpe ngai galu kaba shangun nna, na a amyu matu hpe mung ngai shagrin da ya sana. Na a amyu matu hte na a mungdan gaw nye a man e dinggrin a nga nga na ra ai: na a magam tingyang mung, htani htana dinggrin a nga nga na ra ai, ngu nna Madu gaw Nahtan hpe htawn tsun shangun wu ai.
Karai Kasang a Mungga rai nga ai.

CHYUM MUNGGA DAW 2

Roma 16:25-27

Ya hti na gaw Roma masha ni hpang de San Pawlu shagun dat ai laika hta na rai nga ai.
Hpu nau ni e, Ngai hkaw dan ai kabu gara shiga hte maren hkan sa lu na matu, nanhte hpe shada shangang ya lu ai Karai Kasang kaw hpung shingkang a nga nga u ga law. Dai kabu gara shiga hpe ngai hkaw dan ai shaloi, Yesu Hkristu a lam hpe htawn shana ya nna, chyi n ma hpri n hpra kaw nna makoi magap da ai, hkye la ai mung sung ga sung hpe, ya e shadan dat nga ai hpe hkaw tsun dan nngai. Dai mung sung hpe anhte dan dan leng leng chye lu saga ai majaw, amyu shagu hpe makam masham a madat mara ai de shaga la na matu, masha yawng hte hpe dai mung sung lam hkaw dan na ra ai. Myithtoi laika ni dai lam hpe nan nan tau tsun dan ai hte, htani htana Karai Kasang Shi ra sharawng ai hku lajang da ai lam rai nga ai. Karai Kasang chyu sha hpaji hkum tsup nga ai rai nna, Yesu Hkristu a marang e Shi kaw htani htana hpung shingkang a nga nga u ga law. Amen.
Karai Kasang a Mungga rai nga ai.

KABU GARA SHIGA

Luka 1:26-38

Ya hti na gaw Luka a laika hta na Kabu Gara Shiga rai nga ai.
Dai aten hta, Karai Kasang e shangun dat ai lamu kasa Gabriela gaw, Galile mung na Nazaret mare e nga ai. Dawi a myu na Yosep ngu ai wa mahtan da ai mahkawn hpang de sa du ai: dai mahkawn a amying chyawm gaw Maria ngu ai rai nga ai.
Dai lamu kasa gaw Maria kaw du jang, Awe, chyeju hte hpring nga ndai; Madu nang hte rau nga nga ai, ngu wu ai. Maria gaw dai ga majaw masin kahpra nna, Ndai shachyen ai ga gaw hpa ngu mayu ai i? nga nna myit aru yu nga ai. Shaloi lamu kasa gaw, Maria e, hkum hkrit et; nang Karai Kasang a man e myiman pa nit dai: yu u, nang na-um nasin rai wa nna, shadang sha shangai na rin dai; Shi a amying Yesu ngu nna, nang shamying ya na ru ai.
Dai wa gaw galu kaba na ra ai rai nna, Tsaw Htum ai Wa a Kasha ngu ai hkam la na ra ai. Madu Karai Kasang mung Shi a kawa Dawi a tingnyang shi hpe jaw na wu ai rai nna, Shi gaw Yaku a nta ntsa e htani htana up nga na ra ai: Shi a mungdan mung htum ngu ai nga na n rai, ngu nna shi hpe tsun wu ai.
Maria chyawm gaw, Dai gaw kaning rai byin na a ta? Ngai la n chye ai hkawn jet rai nga nngai, ngu nna lamu kasa hpe tsun wu ai. Dai lamu kasa gaw, Chyoi Pra ai Wenyi na ntsa de du nna, Tsaw Htum ai Wa a atsam nang hpe shingnip ka-up na ra ai: dai re ai majaw, shangai na ra ai wa gaw, Chyoi Pra ai Wa, Karai Kasang a Kasha ngu ai hkam la na ra ai. Dai hta kaga, na a amyu jan Elizabet mung, gumgai rai sayang shadang sha na-um nasin hkum rai nga nna, maudung ngu ai num hta ya shata kru rai wa sai; kaning rai nme law, Karai Kasang n galaw lu ai hpa mung n nga ai, ngu nna shi hpe htan wu ai. Shaloi, Maria gaw, Yu u, Madu a shangun ma ngai rai nga nngai; na a ga hte maren ngai hta byin wa u ga, ngu nna lamu kasa hpe tsun wu ai.
Madu a kabu gara shiga rai nga ai.