2023: PRANWAN LADAW LABAN (15) NA MUNGGA

Karai Kasang hpan da ai amu yawng gaw shi a shi akyu rawng ai hku hpan da ai. Lamu kaw na htu hkrat ai marang shing, n rai numri, lamu ga hpe madit ya nna tsingdu tsingman, hpun kawa, namlaw namlap ni hpe tu prut, tsit lali shăngun let, apu asi ni ja tsawm wa nna shinggyim masha hte dusat amyu ni sha lu na matu rai nga ai. Dai hte maren, Karai a mungga mung masha a myit masin hta jung nna prut ja wa lu na: san seng ai myit masin, sumnung shingdi ai alai, tsawra matsan dum chye ai alai, chyeju htang chye ai alai, dai zawn re ai wenyi a apu asi ni si jaw na matu Karai Kasang myit mada ai. Numri hte marang gaw shinggyim masha hte dusat ni hpe akyu n jaw da ai sha, salu tai nna lamu de mawng lung wa lu na n rai; Karai a mungga hpe mung lahpawt lama di kau lu na n rai, ngu ai gaw mungga madung rai nga ai.

Kabu Gara Shi-ga hta nli tum gat ai wa gaw kanang ang yang ang, li-tum law law hpe gat dat ai. Madu Yesu gaw shi du ai shara shagu hkan, mu hkrup ai masha ni yawng hpe Karai a mungdan hte seng ai mungga hpe n-hpaw n-ya hkaw tsun dan ai. Madat hkap la ai ni nga ai zawn, na la ninglen na-layawng yawng ai ni mung law law rai ma ai. Mungga hkap madat la ai ni hpan amyu myu nga ma ai: myit malai lu nna tinang nang a asak aprat hpe kaja ai maga gălai shai wa ai ni nga ai zawn, mungga gaw manu dan ai lam chye la ninglen tinang nang a nga-sa lailen hpe galai shai shangun na n kam ai ni mung law law nga ma ai.

Dai ni, anhte a prat hta byin nga ai lam ni hpe myit yu ga. Lai lam ntsa e hkrat ai nli tum__ Nawku Hpung a poi kaba ni, pyaw hpa poi, dawsha poi ni nga ai aten hta sha nawku sa ai hpung masha ni hte n bung a hka? Lung rawk a ntsa e hkrat ai nli tum__ Chyum mungga gaw asak jaw ai mungga, tengman ai mungga re ai chye ninglen, tinang hkam la ai ningmu hpe n tat kam ai, tinang pyaw len dum ai n kaja ai nga-sa lailen hpe n tat kau kam ai ni hpe tsun ai n rai a hka? Ju sumwum hta hkrat ai nli tum__ hpa lu hpa sha na, hpa bu hpung na, hpaga dingga, makan bungli, hpaji mahkrun, bungli mahkrun, ja gumhpraw, nga-mu nga-mai lam, ndai ni hta hkrai malawng aten jaw nna makam masham bungli ni hte tsan gang nga ai ni hpe ngu ai n rai a hka? Ga-sau kaja hta hkrat ai nli tum__   makam masham lam hta sharawng ai myit rawng ai, akyu hpyi nawku dawjau ai amu hpe man man galaw ai, tsawra matsan dum garum shingtau chye ai, mai kaja ai amu ni hta shang lawm ap nawng ai, shing re ai ni hpe tsun ai n rai a hka?

Nli tum hpe hkap la ai anhte a myit masin ni, lahta e tsun lai mat wa sai hpan 4 hta tinang gaw gara mahtang kaw ang ai kun? Shing ngu masat kau gaw n mai byin ai. Hpa majaw nga yang, anhte ow kap le kap re ai ni rai ga ai. Hpan maga mi kaw hkrai tup hkrak grin nan nga ga ai n re ai hpe myit dum mai ga ai. Agung alau ni mung hpan law law anhte hpe gunglau ding-yang re ai hte shut kataw ai, n gyeng mat ai aten ni law law she re ai hpe myit dum mai ga ai. Anhte mai kaja ai amu ni law law galaw nga ninglen, tinang n kam tat kau ai n kaja ai lailen lama ma mung lu ga ai hpe myit dum mai ga ai. Mai kaja ai amu re ai, galaw nan galaw ra ai amu ni hpe hprai kau ai aten ni mung law law nga ai n rai a hka!
Karai Kasang maga gaw anhte hpe shadum jăhprang lam matsun ai lam n-hpaw n-ya galaw ya ai; mai kaja ai amu ni galaw lu ai atsam marai hte ahkaw ahkang law law jaw da ai. Karai e jaw da ai chyeju kumhpa ni hpe lahpawt lama di kau ai aten ni law law wa n rai a hka? Ahkying aten hpe lahpawt lama di kau ai, tingkyeng akyu tam ai, lagawn lamawn nga shalai kau ai, lu lawm ai ja gumhpraw hpe lachyum n pru ai hku jai kau ai, shing re ai aten ni law law nga ai n rai a hka?

San Pawlu shadum ai hta, anhte san seng chyoi pra ai hku nga mayu ga ai, mai kaja ai amu ni law law galaw mayu ga ai. Rai tim, mungkan a agung alau mung kaba la ai majaw, anhte shut kataw ai, lamshe shang ai aten mung law law re ai majaw, n hkru n kaja ai baw kaw nna tsep kawp shălawt dat ya na lam hpe sung ai kraw lawang hta madai let ala nga shajang ga ai, nga ai. Ndai hkum shan e gyit hkang da ai lam ni kaw na lawt lu na nhtoi gaw hkum hkrang hpe kau da ai shani e sha byin lu na lam shadum ya ai. Makam masham amu hta n sim nsa shakut ai hte, Karai e nan shălawt dat ai nhtoi hpe akyu hpyi maja let a la nga ra ai lam hpe shadum ya ai.

Sumru yu na matu:
• Ga-sau gaw tinang a sinlum re, nga ai. Dai ga-sau grau grau kaja nna asi grau si wa lu hkra, myit masin hpe gara hku hkyen lajang ga ta?
• Karai a mungga anhte hpe gara hku asak jaw a ta?
• Mungga gaw masha tai wa ai, nga ai. Karai a mungga hpe tinang a ashan asai tai wa hkra gara hku hkan galaw mai a ta?

2023: PRANWAN LADAW LABAN (15) NA CHYUM LAIKA

PRANWAN LADAW HTA LABAN 15 
July 16, 2023
CHYUM MUNGGA DAW  1

Esaia 55:10-11

Ya hti na gaw myihtoi Esaia a laika hta rai nga ai.
Marang hte hkyen gaw, lamu de na htu hkrat nna, dai de bai nwa ai sha, nli gat ai wa hpe nli, makan galaw ai wa hpe sha hpa jaw lu hkra ga hpe madit let, matsun maku shaprut nna asi si shangun ai zawn, nye mungga mung dai hte maren tai na ra ai. Dai ngai hpang de kaman nhtang wa na nrai. Ngai ra ai hku shadik ya na ra ai.
Karai Kasang a Mungga rai nga ai.

CHYUM MUNGGA DAW 2

Roma 8:18-23

Ya hti na gaw Roma ni kaw San Pawlu shagun dat ai laika hta na rai nga ai.
Ndai prat na tsinyam tsindam gaw, anhte kaw e shadan shapraw ra ai hpung shingkang hte shadawn n ding nga ai, ngai myit nngai. Hpan da sai yawng myit ndawt ai hte Karai Kasang a kashu kasha ni paw pru na ra ai hpe ala nga ma ai. Hpan da sai nlang chyawm gaw, hten bya lam npu e, shagrit kau ai hkrum sai. Tinang ngu ai hku chyawm nrai, raitim, hten bya lam de sharen da hkrum ai kaw na, shalawt hkam nhtawm, Karai Kasang a kashu kasha ni a pru lawt ai hpung shingkang hta shang lu na myit mada nga nna, shagrit kau ya ai wa a majaw dai hpe hkam nga ai. Hpan da sai nlang, ya du hkra madai nna gadau gadap rai nga ai hpe anhte chye ga ai. Wenyi a chyeju hkam la ai anhte mung, tinang a kraw lawang hta madai nga nna, hkum hkrang a htingrai htingrat ai lam, kasha yin la ai chyeju hpe ala nga ga ai.
Karai Kasang a Mungga rai nga ai.

KABU GARA SHIGA

Mahte 13:1-23

Ya hti na gaw Mahte a laika hta na Kabu Gara shiga rai nga ai.
Yesu nawng makau e sa dung nga ai. Masha unawng shi hpang de zuphpawng sa wa ma ai. Li langai mi hta Yesu shang dung nga ai. Shawa masha ni mahkra gaw hkyingau hta e tsap nga ma ai. Ga shadawn law law hte shanhte hpe tsun mu ai gaw, Nli gat ai wa gaw nli gat na pru sa wa ai. Gat dat wu yang, nkau mi lam makau e hkrat nna, u ni hta sha kau mu ai. Nkau mi ga nlaw ai lung-rawk kaw hkrt nna, ga nhtat ai majaw, ya jang tu pru timung, jan katen jang krau mat nna ru njung lu ai majaw hkraw si mat ai. Nkau mi ju hpun nhpang e hkrat nna, ju hpun ni tu kaba wa ai hte lim kau mu ai. Nkau mi ga kaja hta hkrat nna, asi si wa ai. Nkau mi dang latsa, nkau mi kru shi, nkau mi sumshi si mayat wa ai. Na tu ai wa gaw na la u ga, ngu mu ai. Shaloi shi a sape ni sit sa wa nna, Ndai ni hpe hpa rai ga shadawn hte tsun dan mu ta? Ngu nna shi hpe san mu ai. Shi htan nna, Sumsing lamu a mungdan a sung htum ai lam ni hpe chye na shara, nanhte a matu hku nga malit dai; wora ni a matu chye na shara n hku malu ai. Kaning rai n me law, lu ai wa kadai hpe mung naw jat jaw na rai nna, shi law wa na ra ai; n lu ai wa kaw na pyi shi lu ai hpe naw shaw la na ra ai.

Dai rai nna shanhte mu lamu n mu ai hte, na lana n na la nna, n chye na ma ai majaw, ga shadawn hku ngai shanhte hpe tsun dan mawe ai. Shing rai, Esaia tsun ai myihtoi ga gaw shanhte hta dik ang wa sai. Shi gaw, Nanhte na lana n chye na la na mu ai, Yu layu e n mu na mu ai, Kaning rai n me law, ndai amyu gaw, Tinang myi hte n mu lu na hte Na hte n na lu nna, Myit hte n chye na lu mu ga she, Shanhte myit n kayin lu nna, Ngai shanhte hpe n shamai mai lu hkra Shanhte a myit mak nga nna, Shanhte a myi pat nga malu ai, nga ai. Nanhte a myi mu lu ai hte, nanhte a na, na lu nga malit dai majaw, a nga myit dai. Nanhte hpe ngai teng teng tsun made ga, nanhte mu lu ai arai ni hpe, myihtoi hte dinghpring ai masha law law wa, mu mayu timung, n mu ma ai; nanhte na lu ai lam ni hpe mung, na mayu timung,  n na lu ma ai.

Dai rai nna dai nli gat ai ga  shadawn hpe madat la mu. Kadai mung, dai mungdan lam hpe na ninglen n chye la yang gaw, dai n hkru ai wa sa du nna, shi a myit hta gat ai nli hpe shaw la kau wu ai: dai gaw lam makau e gat ai nli a lam gaw, dai ga hpe na nna, shaloi jang kabu gara ai myit hte hta la wu timung, kraw hta e ru n jung ai majaw, ladaw mi sha nga nga nhtawm, dai mungga a majaw ru tsang ai hte zingri zingrat hkrum jang, shaloi e myit kataw re ai wa hpe rai nga ai. Ju hpun hta gat ai nli a lam gaw, dai ga hpe na la ti mung, ndai prat na myit tsang ai hte hkalem kau ai sut gan gaw  dai mungga hpe lim kau nna, asi n si lu ai wa hpe rai nga ai. Ga kaja hta gat ai nli a lam chyawm gaw, dai ga hpe na la nna hta la nu ai hte, gaja wa teng teng asi si nna, nkau mi dang latsa, nkau mi kru shi, nkau mi sumshi jat wa ai wa hpe, rai nga ai, ngu wu ai.
Madu a Kabu Gara shiga rai nga ai.

2023: PRANWAN LADAW LABAN (14) NA MUNGGA

Myit masin wenyi hta shagrit shanyem lu ai ni chyu sha, Karai Kasang a mungsung, Karai a mungdan a lam hpe chye la lu na rai nga ai. Myit tsaw myit dap ai ni, tinang a atsam, machye machyang, ja gumhpraw, arawng power hpe kam ai ni, Karai e tsun hpaw dan mayu ai, sharin ya mayu ai lam ni hpe chye na hkap la na n loi ai, shanhte chye dum, lu dum ai majaw rai ma ai. Sumsing mungdan het seng ai lam ni hpe hkaja tam la lu na matu, grit nyem ai myit masin teng sha rawng ra ai lam hpe matsun ya ai. Hkum shan a marin ai myit hta len mat ai ni gaw si lu na rai nga ai; dai Wenyi chyeju atsam hte hkum shan a marin ai myit hpe kau da nna, wenyi asak mahkrun hta hkawm sa ai rai yang hkrung nga lu na, nga, San Pawlu sharin ya ai.

“IP Man” ngu ai sumla hkrung series mu yu ai ni nga na ma ai. Mying gumhkawng dik ai hkyen hpaji ninghkrin Bruce Li a sara rai nga ai. Sumla hkrung mabyin hta, IP Man gaw Foshan mare buga masha; shi gaw II ngu na mungkan majan prat hta, sut masa yak ai majaw gumhpraw chyai ai Hong Kong de htawt nga ai. Shi gaw hkyen hpaji sharin jawng hpaw hpang wa ai aten hta Hong Kong na kaga sara ni ninghkap ma ai. Matsan ai buga na masha wa lu su nga mai dik ai Hong Kong masha ni hpe hpa manu dan grau ai sharin ya lu na kun, ngu ma ai. IP Man gaw grai si mani ai. Shi hpe sa shingjawng hpaji chyam ai ni hpe mung laja lana n di ai, dang daw, akya kya sha di dang la ai ladat hte sharin shaga dat dat di ai. Marai kade sa chyam tim shi hpe dang lu ai masha n nga ai. Galu ai hku kaga lam ni hpe n tsun sai. Hkyen hpaji yawng hta kungkyang grau dik ai lam hpe chye ya ai brang lawn langai gaw Bruce Li re; shi shăgrit shănyem lu ai, kamhpa ai myit hte sharin la ai. Jahtum e awng dang kungkyang dik ai hkyen hpaji ninghkrin tai wa ai. Shăgrit shănyem n lu ai kaga hkyen chye dum ai ni law law, IP Man kaw na sung dik dam dik ai hkyen hpaji, n lu la ma ai. Bruce Li chyu sha sara kaw na hkringhtawng dăgraw la lu nu ai.

Sumsing mungdan kaw na yu sa ai wa, Yesu, shi chyu sha matsaw lahta tsang mungdan, Karai a mungdan a lam chye dik htum ai wa rai nga ai. Shi kaw na sharin la na lam, yawng hpe saw shăga ai. Shi hkum nan Karai a Kasha rai ninglen, shăgrit shănyem dik ai wa, sumnung shingdi ai wa re ai majaw, shi kaw na sharin hkam la mu, nga ai. Sharin achyin hkam la ai ni hpe bansa shăngun na, nga, saw shaga ai.  Dingman ai Hkye La Madu Messiah du sa ai shaloi, shi gaw, lawze jawn nna Yerusalem de du  shang wa na lam, myihtoi Zakariah tsun da ai. Awng padang ninglaw lu ai wa, kaga hpyen ninggun ja dum ai ni yawng hpe dang kau na wa gaw lawze sha jawn na re, nga ai. Shi gaw sumnung shingdi ai wa re, nga nna tau tsun da ai. Hpyen găsat gumra n jawn ai; lachyum gaw, găsat laknak ni hte, hpyen ninggun hte rai nna hpyen ni hpe shădang la na n rai. Shi a sumnung shingdi ai alai, tara rap-ra ai alai, hpyen ni hpe matai n dawp ai ladat, …shing re ai hku nna awng padang hkam la na wa re ai lam, myihtoi ga rai nga ai. Kungla shaman poi nhtoi na mabyin/mungga hte shadawn yu mai ai. Yesu gaw Pilatu a tara rung e tsun ai ga, “Ngai a mungdan ndai dinghta ga hte n seng ai” nga ai. Myi hte n mu lu ai, myit hte n hkawn lu ai sumsing mungdan a lam chye na hkap la lu na matu, Karai e n lau la yang, Karai e jahtoi ya ai n rai yang chye lu na n mai byin ai, ngu, shawng hkam la ra ga ai. Dai hta shăgrit shănyem ai lam rai nga ai.

Yesu gaw Kawa hpe chyeju shakawn ai hta, ma kaji zawn hkam măna madat kam ai ni hpe sha sumsing mungdan a sung dik ai lam ni hpe hpaw madun dan ai, nga ai. Bai, kaga shara hta tsun da ai, ma kaji zawn n tai lu ai kadai mung, Karai a mungdan de n shang lu na, nga ai. Masha a sung dik ai kraw kata na hpang găra ai lam ni hpe dinghta ga na hpaji machye machyang, ja sutgan ni e n jaw ya lu ai. Yesu gaw mungkan ga na n hkru n kaja ai lam ni hpe hpyen găsat ladat hku adip arip di nna shadang la ai n rai. Tsawra dinghpring ai, sumnung ai alai, mara dat ya ai alai, matsan dum chye ai alai, dai zawn, wenyi hte seng ai atsam marai hte shădang la ai wa rai nga ai.

Yesu shi jaw ya na bansa ai lam, ngu ai gaw, myit masin wenyi a sung dik ai kaw na hpang gara ai baw ni hpe jaw ya ai lam re. Yesu kaw n sit sa ai, shi kaw na n sharin la ai sha, dinghta ga na masha a nyan, hpaji, atsam hte kabu myit dik lu ai lam hpe tam ai gaw, li la ai lit gun da ai hte bung ai; hkiba la na re. Myit masin wenyi a matu ra kadawn dik ai chyeju kumhpa ni hpe hkam la lu ai gaw bansa ai lam majing rai nga ai.  
Sumru yu na matu:
• Yesu tsun ai ma kaji ni, nga ai gaw kadai kaning re ai ni rai ma ta?
• Lit-li gun ai ngu ai hpa hpa hpe ngu măyu ai kun? Tinang gun da ai, n jahkrat kau lu ai lit ni hpa hpa rai ta?
• Yesu shi bansa jaw na, nga ai; prat hta gara hku kade lang hkam sha lai wa sai kun? Tsun dan hkat mai ai.

2023: PRANWAN LADAW LABAN (14) NA CHYUM LAIKA

PRANWAN LADAW LABAN 14
July 9, 2023
CHYUM MUNGGA DAW 1

Zahkaria 9:9-10

Ya hti na gaw myihtoi Zahkaria a laika hta na rai nga.
Ziun shayi sha e nachying kabu gara nga u, Yerusalem shayi sha e garu jahtau u! Na a hkawhkam wa nang hpang de du na ra ai. Shi gaw dinghpring nga nna hkye hkrang la ai lam shapraw nu ai. Shi gaw sumnung myit rawng nna, lawze ntsa e, rai sa, lawze kanu a kasha ntsa e, jawn nga ai. Ngai gaw Ehprim a hpyenleng ni hpe, Yerusalem a gumra ni hpe, jahtum kau na nngai. Hpyen ndan mung agrawp kau hkrum na ra ai. Shi gaw maigan amyu ni hpe ngwi pyaw lam tsun dan nna, namukdara kaw nna, namudara du hkra, Uhprat hkanu kaw nna, lamu ga htum hkra up nga na ra ai.
Karai Kasang a Mungga rai nga ai.

CHYUM MUNGGA DAW 2

Roma 8:9,11-13

Ya hti na gaw Roma masha ni hpang de San Pawlu shagun dat ai laika hta na rai nga ai.
Nanhte hta Karai Kasang a Wenyi rawng nga yang gaw, nanhte hkum shan hta n rai, Wenyi hta nan rawng nga myit dai. Langai ngai gaw Hkristu a Wenyi n rawng yang dai wa shi hte n seng nga ai. Dai hta kaga, si mat ai ni kaw Yesu hpe hkrung sharawt la ai wa Wenyi gaw, nanhte hta e rawng nga a yang gaw, si mat ai ni kaw na Hkristu Yesu hpe hkrung sharawt la ai wa gaw, nanhte hta mung rawng nga ai Wenyi a lata hte nanhte a si chye ai hkum hkrang ni hpe mung, jahkrung ya na marin dai. Hpu nau ni e, hkum shan a myit hkan na matu, hkum shan a hka kap ai ni rai nga ga ai n rai, Hkum hkrang hte seng ai asak sha hkrung nga myit yang, nanhte sin a rai nga myit dai. Hkum hkrang shan a arawn alai hpe Wenyi hte sat kau myit nanhte hkrung nga na marin dai.
Karai Kasang a Mungga rai nga ai.

KABU GARA SHIGA

Mahte 11:25-30

Ya hti na gaw Mahte a laika hta na Kabu Gara shiga rai nga ai.
Yesu tsun ai, lamu hte ga a Madu, Wa e, hpaji bengya rawng ai ni hte myit kunghpan ai ni kaw na, ndai lam nang makoi magap da nhtawm ma kaji ni hpe madun dan ai majaw, ngai nang hpe shakawn kungdawn nngai. Ndai Wa e, Nang tsaw ai hku rai nga lit dai. Nye Wa ngai hpe arai yawng mayawng ap ya ni ai. Wa hta kaga dai kasha hpe kadai n chye lu ai. Dai kasha hte dai kasha jahtoi ya mayu ai masha hta kaga, Wa hpe mung kadai n chye lu ai. Hki ba nna lit li gun ai ni yawng hte e, ngai kaw wa marit! Ngai nanhte hpe bansa shangun na made ai.  Ngai sumnung ai hte myit gyip nga nngai.  Nye a lam sharin la mu. Nanhte a myit masin bansa ai hkrum na malit dai. Nye a kandang hpai loi ai hte, nye a lit mung tsang nga li ai, ngu mu ai.
Madu a Kabu Gara shiga rai nga ai.

2023: PRANWAN LADAW LABAN (13) NA MUNGGA

“Ndai kaji dik ai ni hta na marai mi, ngai a sape re ai majaw, shi hpe lu-hka htingkap mi jaw ai wa gaw teng sha, shabrai kumhpa n lu la ai n nga na ra ai”.

Anhte masha shada garum hkat ai ngu ai shaloi, jinghku daw ai shing n rai tinang chye ai hte hku hkau ai masha, arawng aya lu ai masha, tinang hpe akyu bai htang jaw lu ai masha, shing re ai ni a myi-man tau nna garum chye ai malawng maga n rai a hka! Kaning re ai masha hpe rai tim, ra kadawn nga ai masha langai mi hpe garum ya ai majaw, Yesu shi kaw na shagrau kumhpa n lu la ai n nga na, nga, Madu hkum nan ga-sadi jaw ai. Yesu gaw masha yawng a matu si hkam nu ai; dai majaw anhte hkrung nga ai lam gaw Yesu hta ru jung nna asak hkrung nga ra ai, Chyum mungga hku nna sharin ya ai.

Kalang mi na aten hta (1980 a hpang) Dominican mungdan e nnang nawn kaba byin ai majaw nta law law daw ăgrawp mat ai hte masha law law si mat ai. Asak lawt ai ni hta John, ngu ai la kasha langai mung lawm ai. Kanu yan kawa hpe tam n mu ma ai majaw, shan hpe si ai/mat ai jahpan de bang kau ai. John gaw jahkrai ma tai mat ai; kawa e du kaw gali ya da ai magri pa chyen mi sha noi ngam la lu ai. Jinghku ni mung jamjau hkrum mat ai majaw John hpe bau kaba na n mai byin ai majaw, shi hpe jahkrai ma bau ai jawng de ap ya kau ma ai. John gaw gam kaja ai; jahkrai jawng kaw grai na hkra n nga ra ai; America kaw na lu su ai htinggaw shi hpe bau la na matu America de woi mat wa ai. Kasha majing zawn tsawra hkrum ai; bau kanu kawa gaw John ra ai mahkra jaw ai. Dai  majaw shi gaw hpaji atsawm rai sharin la lu nu ai.

John gaw lu su ai htinggaw masha tai wa ai majaw, matsan masha ni a yakhkak jamjau ai lam hpe n chye ai sha kaba wa ai. Matsan masha ma manang ni hte n chye hkau ai; lam kau hkan hpyi sha ai mawhpyi ni hpe mung akyu n rawng ai, kadai hpe hpa akyu n jaw ai ni, ngu, sawn la ai wa re. Hpaji janmau gup la ngut ai htawm, shi a shangai dai-daw buga Dominica de sa chyai na myit lu ai. Shi a sumtsaw jan hte rau rai Dominica de sa mat wa ai. Shi loi pyi n myit mada ai mabyin hkrum katut nu ai: lam makau e n tsawm la ai mawhpyi dingla langai hpe mu hkrup ai. Mawhpyi dingla wa a du e gali da ai magri pa achyen hte shi a du e găli da ai magri pa chyen gaw raw sha bung ai hpe mu hkrup ai. Magri pa achyen a lam dingla wa hpe san yu yang John shi a labau nhpang hte mabyin hpe chye la ai hta, kawa majing re ai lam chye la nu ai. Mau n ma, hkap la na yak yak re ai mabyin. Sumtsaw jan a man e kawa re ai lam yin la n gui ai. Dai majaw dingla wa hpe Dollar tingsen loi sha jaw da nna America de htang wa mat ai.Matsan masha ni hpe matsan n dum chye ai John, mawhpyi ni hpe akyu n rawng ai masha ni, ngu, yu mătsat ai John, shi mu da ai mawhpyi gaw kawa majing re ai hpe sa mu hkrup ai majaw yawn hkyen kaba hkrum nu ai. Mu hkrum ninglen kawa majing hpe “Wa e” ngu n tsun da lu ai. Myit yu magang n rai dum magang re ai majaw, kawa hpe kalang bai sa hkrum na dawdan nu ai. Dai lang sumtsaw jan n lawm ai shi hkrai sa mat wa ai. Kawa mawhpyi hpyi sha ga ai lam-yan hkan tam hkawm ai; n mu ai jahtum grup yin masa chye ai masha langai hpe san yu yang lai sai shata hta mawdaw adawt hkrum nna si mat sai lam tsun dan ai. Yawn n ma; hkrap myi-prwi si ra rai hkrap kau nu ai. Amyu n daw, madang n bung re ai masha ni hpe n tsawra lu ai, yu matsat ai masha, kawa nan mawhpyi tai let si mat ai. Yesu a myi-man tau nna chye tsawra ai, matsan dum garum chye taw gaw!

Hkawhkam labau hta myihtoi Eliya hpe hkung ga hkap bawp la ai Shunem amyu shayi hpe Eliya chyeju htang ai; maudung re ai numjan hpe shăman ya ai majaw shadang sha lu na ga-sadi lu la nu ai. Myihtoi hpe hkap la ai majaw myihtoi kaw na shabrai kumhpa lu la ai. Yesu e sharin ya ai hku rai yang, lu su ai masha a myi-man tau nna, arawng aya lu ai Du magam a myi-man tau nna, jinghku daw ai/ hku hkau ai majaw shanhte a myi-man tau nna hkap jaw garum ya ai rai yang, shanhte kaw na shabrai kumhpa hkam la lu na, nga ai. Shawng e tsun dan ai John a lam, shi gaw kawa e shăman ya lu ai hpa chyeju kumhpa mung n hkam la lu ai; Yesu a myi-man hpe mung n tau ai. Hpa kaning re ai shăman chyeju mung n lu la ai. Yawn hkyen myit n dik ai lam sha lu la nu ai.

Yesu a myi-man tau nna jinghku n daw tim, n chye n hkau ai rai tim, ra kadawn jamjau hkrum ai wa hpe hkap bawp garum ya ai amu a majaw Madu shi kaw na shabrai kumhpa n lu la ai n nga na, nga ai. Madu shi jaw ya na chyeju kumhpa mahtang kade she grau na hpe myit yu mai ga ai.

San Pawlu shadum ya ai hta, yawng mayawng gaw Hkristu a hkye hkrang la ai chyeju kumhpa hkam la lu sai majaw, Yesu a myit masa hta jawm pawng let Karai Kasang a hpung shingkang a matu mara asak hkrung nga ra ai lam, sharin ya ai. Kashin kamun a marang e, anhte gaw Hkristu si ai hte bai hkrung rawt ai asak hta jawm pawng ga ai majaw, asak ningnan hta hkrung nga ra ga ai, nga ai. Amyu, madang ginhka ai myit hpe hprang kau nna yawng hpe tsawra hkap la chye ai myit hpe ban bang jat la ra ga ai. 
Sumru yu na matu:

•Tinang galaw ai matsan dum amu, mai kaja ai amu, garum jaw sak jaw ai amu, …ndai amu ni hta Karai a myi-man tau nna galaw ai kun, masha myiman tau ai malawng kun?
•Myu tsaw, jinghku maga, tinang a makam masham hpe maga, shing re ai amu ni hta hpyau mat jang byin chye ai manghkang ni hpa hpa rai kun? Yesu a myi-man tau nna galaw dat ai amu ni a shabrai kumhpa hkam la yu ai lam alak tsun dan na hpa hpa nga ai kun?

2023: PRANWAN LADAW LABAN (13) NA CHYUM LAIKA

PRANWAN LADAW LABAN 13 
July 2, 2023
CHYUM MUNGGA DAW 1

2 Hkawhkam 4:8-11, 14-16

Ya hti na gaw Hkawhkam laika lahkawng hta na rai nga ai.
Lani mi, Elisha gaw Shunem mare de lai sa wa sai. Dai yang arawng lu ai numsha langai mi nga ai. Shi Elisha hpe hkap galaw daw wu ai. Elisha galoi mung dai lam hku lai wa yang, dai nta hta shang manam nga ga ai. Dai num madu wa hpe tsun ai. Ndai hku lai lai re ai wa gaw Karai Kasang a chyoi pra ai masha rai nga ai hpe ngai dum she ai. Ntsa htap hta gawk kaji langai galaw nna, shi a matu yupku, shaku, lahkum hte pyending ni tawn da ga. Shi an kaw shang manam yang, dai gawk hta shang yup mai ai, ngu wu ai. Kaja wa dai lam hku bai lai ai shani e, shi dai gawk hta shang nna yup nga ai. 
Dai rai Elisha gaw, shangun ma Gehazi hpe, shi a matu hpa galaw shana ga ta? ngu wu ai. Gehazi gaw, shi kasha n lu nga ai. Madu wa mung dingla wa sai, ngu wu ai. Shaloi Elisha gaw, bai shaga u, ngu wu yang, num jan gaw chyinghka lam e tsap nga ai. Myihtoi wa gaw, nang htaning ndai aten hta e, shading sha ba na rin dai, ngu wu ai. Numsha gaw nye madu, Karai Kasang a masha wa e, na nchyang jan hpe mashu ga kum tsun et, ngu wu ai. Dai num sha na-um na-sin wa nna, ladu hkrum jang, Elisha tsun ai hte maren shadang sha shangai wu ai.
Karai Kasang a Mungga rai nga ai.

CHYUM MUNGGA DAW 2

Roma 6:3-4, 8-11

Ya hti na gaw Roma ni kaw San Pawlu shagun dat ai laika hta na rai nga ai.  
Yesu Hkristu hta kashin kamun hkam la ai anhte nlang hte gaw, shi a si hkam ai hta kashin kamun hkam nga ga ai hpe, nanhte n chye nga myit ni? Dai rai, Hkristu gaw Kawa a hpung shingkang hte si ai ni kaw na hkrung sharawt la hkrum wu ai zawn, anhte mung asak nnan hta e rawt hkawm wa lu hkra, dai kashin kamun hkam ai hta e, anhte si hkam nna shi hte rau lup makoi ai hkrum saga ai. Si ai ni kaw na hkrung sharawt la hkrum ai Hkristu gaw, galoi bai n si lu na hte, si hkrung si htan shi hpe galoi n madu lu na nu ai, anhte chye ga ai. Hkristu hte rau si hkam yang gaw anhte shi hte rau mung hkrung nga lu na ga ai, ngu nna anhte kam sham nga ga ai. Shi a si hkam ai gaw mara a matu kalang sha mi si hkam ai rai nga ai, Bai hkrung rawt ai chyawm gaw, Karai Kasang rau hkrung nga ai lam rai nga ai. Nanhte mung mara hte si hka mat ai ni rai nga manit dai rai nna, Hkristu Yesu hta e, Karai Kasang a man e hkrung nga ai ni rai nga ga ai, ngu nna myit la mu.
Karai Kasang a Mungga rai nga ai.

KABU GARA SHIGA

Mahte 10:37-42

Ya hti na gaw Mahte a laika hta na Kabu Gara Shiga rai nga ai.
Kadai mung ngai hpe tsaw ra ai hta, kanu kawa hpe grau nna tsaw ra ai wa gaw, ngai hte n ging dan nga ai. Ngai hpe tsaw ra ai hta, shayi shading sha hpe grau tsaw ra ai wa mung, ngai hte n ging dan nga ai. Tinang udang hpai let Nye a hpang  n hkan nang ai wa gaw, ngai hte n ging dan nga ai. Tinang asak lahpawt dum ai wa asak sum na ra ai. Nye a majaw asak jasum ai wa chyawm gaw asak mu lu na ru ai. Nanhte hpe hkap hkalum la ai wa, ngai hpe hkap hkalum la ai. Ngai hpe hkap hkalum la ai wa mung, ngai hpe shagun dat ai wa hpe hkap hkalum la ai rai nga ai. Myihtoi a myiman hpe tau yu nna, myihtoi hpe hkap hkalum la ai wa gaw myihtoi a shabrai lu la na ru ai. Dinghpring ai wa a myiman hpe tau nna, dinghpring ai wa hpe hkap hkalum la ai wa gaw, dinghpring ai wa a shabrai lu la na ru ai. Masha langai ngai gaw shapre a myiman hpe tau nna, ndai ma kaji langai ngai hpe ntsin kasi dinggap mi sha jaw wu yang, dai wa shi a shabrai nlu la na nrai, nga nna ngai nanhte hpe teng teng tsun nngai, ngu mu ai.
Madu a Kabu Gara shiga rai nga ai.

2023: PRANWAN LADAW LABAN (12) NA MUNGGA

Karai Kasang a mungdan a lam hpe sakse hkam dan ai amu hte hkrit tsang hpa, rau run run rai, sakse hkam shagu hkrit tsang ra ai lam ni a nga nga na re. Ndai dinghta ga na Karai a mungdan, ngu ai shaloi, tsawra ai lam hte tara rap-ra ai lam, ndai lahkawng gaw madung rai nga ai. Karai a mungdan hpe sakse hkam ai shaloi, sat kau hkrum na tsang hpa hkrum ai n law na re; dai hta grau law mi law hkrum na gaw jaw ai/tengman ai maga tsap na, n jaw n tara ai hpe ninghkap na n gui ai, nden n rawng ai manghkang she grau law na lam hpe myit dum shangun ai. Hkum hkrang sat kau hkrum na tsang hpa madang mi n rai tim, jaw ai, teng ai, tara ai maga tsap lawm shaga lawm ai majaw, tinang a arawng aya hte ahkaw ahkang, sut lu nga-mai lam, hku hkau lam hpe asum hkam kau ra ai, ndai zawn re baw ni rai nga ai.

Kasa ni a prat kaw nna dai ni na prat du hkra, makam masham hpe sakse hkam ai, sasana bungli galaw ai majaw, du-daw sai hkaw asak sum mat ai ni law law nga ma ai. Myihtoi Yeremiah gaw Karai a Mungga htawn shăna ai majaw, tara rap-ra lam hpe hkaw tsun ai majaw, n jaw ai n tara ai Du/Hkawhkam ni hte jawjau ai ni, mung shawa masha ni hpe tsun shădum ai majaw, n htum nni rai, yawng e hpyen tai wa ma ai lam hpe tsun da ai. Si n hkrit sakse hkam ai; Karai Kasang gaw shi a maga nga nga ai majaw, jahtum e hpyen ni kaya hkrum na lam tsun da ai. Shi hpe hku hkau ai ni, jinghku jing-yu ni du hkra, hpyen tai wa ma ai, shi hkrat kataw na lam hpe mada a la nga ma ai, nga ai. Hkristu nni nkri hkam ai, sat kau hkrum ai hpang, jahtum e bai hkrung rawt ai hta hpyen ni kaya hkrum ai lam hpe shăang ai myihtoi ga rai nga ai.

Karai a mungdan a lam hkaw tsun sakse hkam na Sape ni hpe Yesu dat dat ai shaloi, ningsin a kasha ni, dinghta ga a lam hpe sha myit ai ni, Karai Kasang hte shi a mungdan hpe n hkap la ai ni a ninghkap ai hkrum katut na lam, tau nau sadi jaw dat ai. Sape ni gaw hkrit tsang hpa law law a lapran, sasana bungli galaw ra na ma ai. Dai majaw, hkum hkrang hpe ahpye alam di ya lu ai ni hpe hkum hkrit mi, hkum hkrang hte hpawn wenyi hpe ngarai wan htung de jahkrat bang lu ai wa hpe grau hkrit ra ai lam sadi jaw ai. Hkrit tsang hpa law law a lapran, Karai Kasang gaw shanhte hpe n kau da na lam hpe mung shădum ya ai.

Sape ni hpe htet matsun ai ga ni gaw Yesu hpe chye chyang hkap la ai ni yawng hpe madi  tsun ai rai nga ai. “Dictatorship” ngu ai, tinang a myit shadang nna shawa a nsen hte ningmu ni hpe adip arip di nna uphkang ai mungmasa a npu e, teng ai jaw ai maga tsap ai share shagan ni law law, rim sharawng, adup abyen zingri ai, sat kau ai,…. shing re ai baw ni hpe hkam nna, tinang nang a nga-mu nga-mai ai lam hpe nyet kau ai shi-sawk masha ni, shi-laika sara ni, hkrang shala shingni ninghkrin ni, mungmasa gyin sharai ai masha ni zingri zingrat hkam la ma ai, si hkam ma ai. Prat shagu mungdan shagu e nga nga shajang ma ai. Karai Kasang a mungdan a matu, dinghpring rap-ra tara a matu, simsa lam a matu, Karai a mungdan gawgap ai myit hte makam masham kaw na prut pru ai myit atsam hte, Karai a mungdan a matu, ngu nna, ap nawng lu ai masha kade nga ma ta?

Anhte a mungdan hta n tara ai amu ni, masu magaw ai amu ni, mungmasa mying gang nna tingkyeng akyu tam ai amu ni, hpung makam masham mying gang nna sut lu nga-mai ai lam hpe tam la ai amu, makam masham mying gang nna mungmasa galaw sha ai amu ni, matsan masha ni hte n chye n chyang ai ni hpe adip arip di ai amu ni kade wa she law htam grung ja nga a hka! Kadai wa mi sa je la na ngu nna la nga na kun? Shing rai htenza nga ai mungdan hta makam masham hpăawn ningbaw ni gara hku tsun shaga ya ma ta? Ow kap le kap rai tinang a shimlum nga-mu nga-mai lam hpe sha myit ai makam masham ningbaw ni she law ma ai n rai a hka!  
Lai sai aten ladaw mi hta California Dakkasu sara re ai Stanley coppersmith ngu ai wa sawk sagawn ai amu langai galaw da ai. Dakkasu jawngma marai 1700 kaw na san sagawn ai lam_ prat hta awng dang ai, hkrat sum ai, shing re ai a hkinjang hpe jep sagawn da ai. Pru wa ai mahtai gaw ndai re_ tinang gaw hpa kaning re ai masha re ai, ngu ai hpe dum hprang chye la nna dai hte gingdan ai hku nga sa shakut ai ni gaw prat hta awng dang grau ai lam rai nga ai. Tinang gaw reng ai, dinghpring ai, myit sanseng ai, jaw ai maga hkrai tsap ai, n tara ai amu hpe matsat ai,…shing re ai li-tum ningja lu ai lam hpe dum chye nna tinang kaw rawng ai ningja ni hpe tang du hkra akyu jashawn ai ni prat hta awng dang ai lam grau lu la ma ai rai nga ai.

Tinang gaw Hkristan re, Karai a Kasha re, sasana amu hta shang lawm na lit lu ai wa re, Karai a mungdan masha langai re, n hkru n kaja ai maga galoi n lawm na, …. ngu nna hkam la hkan shatup ai rai yang, kade yakhkak jamjau ai rai tim, kaja ai amu ni a majaw hpyen shalaw la ai tai tim, Karai Kasang mung tinang a maga teng sha nga nga ai, ngu ai hpe kam ai rai yang, dinghta ga na zingri zingrat ai lam, shingjawng saw ai lam ni yawng hpe hkamjan awng dang lu na rai nga ai.

Sumru yu na matu:
• Tinang nang hta rawng ai li-tum ningja ni hpa hpa wa rai ta? Dai ali ningja ni hpe gara hku akyu jashawn ga ta?
•Mungmasa gyin sharai ai ni law law magrau grang nden ja ai myit hte zingri zingrat ai lam amyu myu hkam la ma ai; Karai a mungdan maden zinghka wa lu na matu nang/ngai, kade wa machyi hkam yu ga ta?
•N jaw n tara ai, shut hpyit mara awu asin hte hpring nga ai mungkan ga e Hkristan makam masham hpe gara hku sakse hkam dan lu na ta?

2023: PRANWAN LADAW LABAN (12) NA CHYUM LAIKA

PRANWAN LADAW LABAN 12 
June 25, 2023
CHYUM MUNGGA DAW 1

Yeremea 20:10-13

Ya hti na gaw Yeremia lika hta na rai nga ai.
Masha ni a shatan nhkan ai hpe ngai na lu nngai. Shoihpa shoirang shara magup rai nga ai. Nye a makyin jinghku ni pyi, mara shagun mu, anhte shi hpe lau lu nna, dang kau lu na nhten, shi hpe matai dawp lu nhten; nga nna ngai hpe gyam yu ai ni tsun ma ai. Raitim Madu gaw, gumshem ai share wa zawn ngai hpang maga e rai nga ai. Ngai hpe zingri zingrat ai ni yawng n dang lu nna, kadawng mat na mara ai. Shanhte myitsu ai hku n hkan ai majaw grai gaya kahpa hkrum nna, prat dingsa e n malap kau lu hkra, arawng sum na mara ai. Dinghpring ai ni hpe dinglik yu nna, myit masin hte kraw lawang hpe chye lu ai, zawnawng zawwa up ai Madu e, nye a amu hpe Na a man e, ngai shapraw dan ai majaw, Nang shanhte hpe matai dawp ai lam, ngai mu lu n ga. Madu hpe mahkawn mangoi mu; Madu hpe shakawn kungdawn mu; shi gaw n hkru ai ni a lata kaw na, matsan mayan ni a myit masin hpe mawai la ni ai.
Karai Kasang a Mungga rai nga ai.

CHYUM MUNGGA DAW 2

Roma 5:12-15

Ya hti na gaw Roma ni kaw San Pawlu shagun dat ai laika hta na rai nga ai.
Masha langai mi a jaw e mara yubak mungkan ga e shang wa nna, yubak mara a majaw si hkrung si htan shang wa ai hte maren, yawng mayawng yubak mara kap mat ai; masha nlang kaw si hkrung si htan du bang wa sai. Jep ai tara da ai du hkra yubak mara gaw mungkan ga e nga sa timung, jep ai tara n nga ai laman e yubak mara shagun ai, ngu ai n nga ai. Adam tara tawt lai ai hte maren Adam kaw nna Mawshe du hkra si hkrung si htan up nga ai. Adam gaw du na ra ai wa a kumla rai nga ai. Tawt lai lam zawn chyeju kumhpa lam chyawm gadaw ai n rai. Marai langai mi shut ai majaw ga daga si mat sayang, Karai Kasang a chyeju hta, Yesu Hkristu ngu ai masha langai mi a chyeju hte kumhpa gaw, lang lak a matu grau law htam nga ai.
Karai Kasang a Mungga rai nga ai.

KABU GARA SHIGA    

Mahte 10:26-33

Ya hti na gaw, Mahte a laika hta na Kabu Gara Shiga rai nga ai.
Yesu tsun ai, Shanhte hpe hkum hkrit mu; magap da nna n pru n dan lu ai arai n nga ai. Makoi da nna n chye na lu ai arai mung n nga ai. Ngai nanhte hpe nsin hta tsun dan ai lam hpe nhtoi hta e tsun dan mu. Nanhte na hta e na la ai lam hpe, nta ntsa nna hkaw dan mu, hkum tsawp hpe sat kau nna myit masin hpe n sat kau lu ai ni hpe hkum hkrit mu: myit masin hte hkum hkrang hpe hpawn ngarai mung hta e jahten kau lu ai wa hpe grau hkrit nga mu. Utsa lahkawng hpe peksan langai mi hte dut kau lu ai n rai ni? Nanhte a Kawa a myit hte n rai yang, dai ni hta na langai mi pyi ga de n hkrat ma ai. Nanhte a baw na kara singgawng mahkra hpe mung, hti da nu ai. 31Hkum hkrit myit. Utsa law law hta grau nna nanhte hpu nga myit dai. Kadai raitim masha ni a man e ngai hpe yin la ai wa hpe, lamu na Nye Wa a man e dai wa hpe ngai yin la na we ai. Masha ni a man e ngai hpe nyet kau ai wa hpe chyawm gaw lamu e Nye Wa a man e dai wa hpe ngai nyet kau na we ai.
Madu a Kabu Gara Shiga rai nga ai.

2023: YESU A SALUM NINGSANG POI SHANI NA MUNGGA

“Tsawra chye ai masha shagu gaw Karai e shangai shalat hkrum ai ni re ai hte, Karai Kasang hpe chye ai wa rai nga ai. Hpa majaw nga yang Karai Kasang gaw tsawra myit rai nga ai. Karai Kasang anhte hpe tsawra ai lam, Kasha shingtai hpe dinghta ga de shangun dat ai hta shadan dan ai; shing rai, Kasha hta anhte asak lu la na matu rai nga ai” nga, Yawhan a shagun dat ai laika gaw mungga madung rai nga ai.

Anhte masha langai ngai hpe tsawra lu ai gaw masha dai hta tsawra na zawn re ai baw ningli kaja ni nga ai majaw rai nga ai_ tsawm ai, sumnung shingdi ai, myit kaja rawng ai, kamhpa mai ai, myit sanseng ai,…dz., dz. Shi kaw na tinang akyu lama ma hkam la lu la yang sha tsawra lu na rai nga ai. Tara Jahprang Laika hta Moshe a n-gup hku Israel myu sha ni hpe shădum jăhprang ai: shanhte gaw hkik hkam ai amyu re ai majaw n rai, kaji kădun dik ai amyu, n law la ai amyu, Egutu mungdan e mayam tai ai amyu hpe Karai Kasang gaw mau-hpa hku hkye hkrang la nna shi a amyu masha shatai da ai. Shanhte hpe tut e tsawra makawp maga ya ai. Tsawra matsan dum myit san san hte sha n rai a hka? Kara Kasang maga shanhte kaw na myit mada ai lam kaga hpa n nga ai: kangka ai tsawra myit hpe sha myit mada ai. 

Ga-shaka Ningnan prat hta Karai Kasang a tsawra ai myit hpe gara hku mădun dan a ta? Yawhan a shagun dat ai laika hta tsun da ai__ Karai Kasang gaw Kasha hpe dinghta ga de shăngun dat nna dai Kasha a wudang hkungga a marang e, shinggyim masha amyu ting a shut hpyit mara hpe raw dat kau ya ai, nga ai. Mother Theresa gaw shi a Mama Hpung kaw na hka garan mat ai ahkaw ahkang hpyi la nna hkum nan matsan dik htum ai masha tai hkam la ai. India mung e matsan dik htum ai, yawng yawng e kabai kau da ai, lakawn ai lit la ai masha n lu mat sai masha ni hpe dawjau garum ya lu na matu, dai zawn hkam la ai. Karai a tsawra myit hpe mădun dan na matu n rai a hka! Nazi Camp kaw na bawng masha langai hprawng lawt mat ai majaw, bawng masha yawng a malai tai ya, sat kau hkrum maw ai wa hpe Jau Maximilian Kobe gaw shi a malai tai hkam nna si hkam ai lam hpe mung shadawn yu mai ga ai. 

Shinggyim masha a manan maka (taba wa) langai gaw tsawra măyu ai, tsawra hkam la măyu ai. Kaga ra kadawn ai lam yawng hkum tsup ai rai tim, n tsawra lu jang, tsawra myit hpe n hkam sha lu jang kaga yawng gaw hpa manu n dan mat ai hpe chye ga ai. Tsawra chye na hte tsawra hkam la na lam hpe hkaja ai, si wa ai nhtoi du hkra, kuptsup lu na n rai nga ai. Tsawra ai ladat, tsawra hkam la ai ladat n jaw ai majaw lit-li gun nna hki-ba shajang nga ga ai n rai a hka! Sumtsaw langai hpang langai galai ai masha langai hte shadawn yu mai ga ai. Kanu kawa a tsawra myit hpe n chye hkam la ai majaw kanawn mazum n chye mat ai ma ni nga ma ai zawn, kasha ni a tsawra myit hpe n chye hkam la ai majaw myit kaji garen hkrum ai kanu kawa ni kade she nga ma hka!

Karai Kasang gaw tsawra myit re, nga ai. Dai tsawra myit hpe kuptsup ai hku shărin la lu na matu, Karai Kasang gaw Kasha hpe dinghta ga de shăngun dat ai. Dai majaw Yesu gaw, “Lit-li gun nna hki-ba ai ni yawng ngai kaw du sa mi; ngai ban sa shangun na we ai” ngu, saw shaga ai. Sinlum/salum (lum lum re ai sin) hpe tsawra myit prut pru ai shara hku nna shinggyim masha ni masat hkap la ai. Dai majaw, kuptsup ai hku tsawra chye ai, tsawra myit hpe sharin ya ai Yesu a silum hpe hkung ga shagrau ai hte, chyeju dum ai, nawku ai lam galaw ga ai. 

Sumru yu na matu:

•Yesu a sinlum ningsang hpe kamhpa tsawra ai lam kalang marang galaw chye ga ai kun, nga ai akyu hpyi ga hpe kalang marang sha pyi tsun chye ga ai kun?

•Yesu a sinlum ningsang litany hpe bat mi kalang sha pyi man man tsun shakut ga ai kun?

Langai hpra, Karai Kasang e tsawra na lam gingdan ga ai kun? 

N gingdan tim loi sha pyi grau gingdan wa lu hkra gara hku shakut mai a ta? 

2023: YESU A SALUM NINGSANG POI SHANI NA CHYUM LAIKA

YESU A SALUM NINGSANG POI
June 18, 2023
CHYUM MUNGGA DAW 1

Tara Jahprang 7:6-11

Ya hti na gaw Tara Jahprang Laika hta na rai nga ai.
Mawshe gaw Isreala amyu ting hpe shaga la nna shanhte hpe tsun mu ai gaw: Nang gaw na a Madu Karai Kasang a matu chyoi pra ai amyu rai nga ndai; Na Madu Karai Kasang madu ging ai amyu nang hpe shatai na matu, ga ntsa ting na masha amyu yawng hta na, shi nang hpe lata la nit dai. Nanhte amyu kaga ni hta grau law ai majaw, Madu gaw nang hpe n ja nna, lata la ndai nrai; amyu kaga mahkra hta nanhte grau kaji nga myit dai.Madu nanhte hpe tsaw ra ai majaw mung, nji nwa ni hpe dagam da ai ga shaka shatup mayu ai majaw mung, nang mayam tai ai, Egutu mung a hkawhkam hpara-u a lata hta na, shi n-gun ja ai lata hte nang hpe hkye la nna, woi wa nit dai. Dai rai nna, na Madu Karai kasang gaw, Karai Kasang nan rai nga ai dum chye nga mu; shi gaw kangka re ai Karai Wa rai nga nna, shi hpe tsaw ra ai hte, shi a hkang da ai ga hkan shatup ai ni hpe prat hkying, mun du hkra ga shaka shagrin da nna matsan dum ai myit rawng ai Karai wa rai nga ai; Rai timung, shi hpe ndawng nyawt ai ni hpe jahten kau na matu, shanhte a hkum hpe nan ari dan jaw ai Karai Wa rai nga ai. Dai re ai majaw, ngai nang hpe tawn da ya ai hkang da ai ga, tara lam ni hpe matsun maroi ga mahkra hpe sadi sahka ai hte hkan sha hkan shatup lu na ndai.
Karai Kasang a Mungga rai nga ai.

CHYUM MUNGGA DAW 2

1 Yawhan 4:7-16

Ya hti na gaw Yawhan a shagun dat ai laika langai hta na rai nga ai.
Ngai tsaw ra ai shu, sha ni e, anhte shada da tsaw ra nga ga: tsaw ra ai myit Karai Kasang kaw na rai nga ai majaw, tsaw ra ai myit rawng ai kadai rai tiumng, Karai Kasang a kasha rai nga ai hte, Karai Kasang hpe chye chyang nga ai. Tsawra ai myit nrawng ai wa gaw, Karai Kasang a lam n chye n chyang wu ai; kaning rai nme law, Karai Kasang gaw tsaw ra ai myit madung rai nga ai. Anhte gaw shi a kasha a marang e ahkrung nga mali ga Karai Kasang gaw shi a kasha hpe mungkan ga de shangun dat ai hku nna, shi a tsaw ra ai myit anhte hpe madun dan nu ai; Anhte gaw Karai Kasang hpe tsaw ra ai lam tsun mayu ai nrai; Shi hkum nan anhte hpe tsaw ra nga ai hte, anhte a shut hpyit mara a matu gawng malai hkungga tai u ga, Karai Kasang shi a kasha hpe shangun dat ai lam tsun mayu nngai; dai gaw tsaw ai lam madung rai nga ai.
Tsaw ra ai jinghku ni e, Karai Kasang gaw anhte hpe ndai hte wa tsaw ra manit ai rai yang gaw, anhte shada da tsaw ra ai lam hkan shatup ra ga ai. Masha kadai rai timung Karai Kasang hpe mu yu sai nrai; anhte shada da tsaw ra nga yang gaw, Karai Kasang anhte hta e rawng nga nna, shi a tsaw ra ai myit gaw anhte hta hkum tsup wa lu ai. Karai Kasang shi a Wenyi anhte hpe jaw da mi ai majaw, shi hta e anhte nga nga ai hte, Shi mung anhte hta e nga nga ai hpe anhte chye nga ga ai. Mungkan ga a hkye la ai Madu tai na matu Kawa gaw dai Kasha hpe shangun ai lam, anhte mu lu sai hte maren sakse hkam ya nga ga ai. Yseu Hkristu gaw Karai Kasang a kasha rai nga ai, nga nna yin la ai wa kadai hta rai timung, Karai Kasang anga nga ai rai nna, shi mung Karai Kasang hta e anga nga ai. Karai Kasang anhte hpe nan teng teng tsaw ra da ai hpe anhte chye nga ai hte kam sham nga ga ai. Karai Kasang gaw tsaw ra ai myit rai nga ai: tsaw ra ai lam hkan nang let, nga sa ai wa gaw Karai kasang hta e a nga nga ai rai nna, Karai kasang mung shi hta e a nga nga ai.
Karai Kasang a Mungga rai nga ai.

KABU GARA SHIGA

Mahte 11:25-30

Ya hti na gaw Mahte a laika hta na Kabu Gara shiga rai nga ai.
Lani mi hta Yesu Madu tsun wu ai gaw; sumsing lamu hte ginding aga a Madu, Wa e, hpaji byeng-ya rawng ai hte, myit kung hpan ai ni kaw na ndai lam nang makoi magap da nhtawm, myit n kaba ai ni hpe madun dan ndai majaw, ngai Nang hpe chyeju dum nngai. Rai sa, Wa e, dai gaw Nang ra sharawng ai hku rai nga ai. Nye Wa gaw yawng mayawng hte hpe ngai kaw ap ya ni ai; Wa hta kaga Kasha hpe kadai mung nchye lu ai; dai kasha hte kasha jahtoi ya mayu ai masha hta kaga, Wa hpe mung kadai nchye lu ai. Hki ba la nna, lit li gun ai ni yawng hte e, ngai kaw wa marit; ngai nanhte hpe ban sa shangun na we ai. Ngai gaw sumnung shingdi la ai hte, myit grit nem nga nngai majaw, nye a kangdang hpe hpai mu, nye a lam sharin la mu; shaloi nanhte a myit masin ban sa ai hkrum lu na marin dai. Kaning rai nme nga yang, Nye a kangdang hpai loi ai hte, Nye a lit mung tsang nga li ai.
Madu a Kabu Gara shiga rai nga ai.