2023: CHYOI PRA AI HKUM HTE SAI POI SHANI NA MUNGGA

“Ngai a shan gaw sha-hpa majing rai li ai; ngai a sai mung lu-hpa majing rai li ai. Ngai a shan hpe sha nna ngai a sai hpe lu ai wa ngai hta (asak) dun nga nna ngai mung shi hta a nga nga na nngai”, nga, Madu tsun ai. Madu Yesu shi hta jung noi nga nna, shi a asak hta gălung kăhkyin nga nna sha hkrung nga mai ai lam rai nga ai.

Nga hte hka jahkran kau n mai ai zawn, masha hpe nbung nsa hte jahka kau n mai ai. Wenyi asak mung, Yesu Madu hte hka nna n hkrung lu ai. Masha langai mi a hkum hkrang asak gaw salum n hkring mat dingsa, masha dai hpe hkrung ai, ngu nna tsun ga ai. Hkum ting hpye nga ai kun, hkum katsing si ai kun, lagaw lata n gum ai kun, myi n mu na n na rai na kun, ayan machyi madai nna shoi chyum nga kun, shing re ai masha langai, wenyi lam hpe n sawn shalawm ai rai yang, “hkrung ai” ngu ai lachyum n nga mat na re. Hkum ting ra n rawng ai, hkam kaja nna bawnu gring ai masha langai gaw hkum hkrang a adaw achyen yawng hpe shangun lang lu ai. Masha langai mi “hkrung nga ai” ngu ai mung lachyum pru na rai nga ai.

Hkum ting hpe reng hkang ai gaw myit masin wenyi rai nga ai. Myit masin wenyi ja ai greng ai rai yang, masha a hkum hkrang gaw mai kaja ai amu hpan law law galaw lu ai rai nga ai. Hkum hkrang lu-sha hta lai jan nna myit masin wenyi a lu-hpa sha-hpa hpan law law ra kadawn ga ai_ shimlum ai, myit pyaw ai, myit rawt ai, nden ja magrau grang ai, kam ging ai, shamyet shanat mai ai, myit mada ai lam nga ai, tsawra ai,…. dai zawn. Yesu gaw wenyi a lu-sha majing rai nga ai________ 
• Shawa masha ni hpe kaya ai, masha hpawng e hkap la na hpe 
hpang gara ai numjan, Yaku a hka-htung e hka ja sa ai Samaritan 
hpe Yesu gaw lu-hka majing jaw ai.
• Nlung hte kabai sat kau hkrum maw ai Magdalena hpe Yesu 
gaw mara dat ya ai, asak aprat ningnan hpe jaw ai. 
Sari sadang hpe shagrau ya ai.
• Mara lu ai, ngu, shawa a man e mara gun ai ni, Zakeu hte 
kang hta masha ni hpe n kabai da ai; rau lu sha nna mahku 
mahkau mahkrai hkrai ya ai.
• Myi kyaw ai ni, lagaw lata hten ai ni, manggang kap ai ni,… shanhte hpe shamai shatsai ya ai hte masha a hkum ting hpe hkrang shagu ya ai.
• Nga sha hkwi nna kan bau ai Simon hte manang ni a jinghku tai ya nna grau ai arawng aya, 
Kasa arawng aya shagrau ya ai.
• Kasha shingtai si mat ai majaw yawn hkyen n ma re ai gaida jan, kasha hpe jahkrung sharawt 
ya nna shalan shabran ai lam majing hpe jaw ya ai.

Shanhte gaw hkum hkrang malu masha hta grau ai baw ni hpe kawsi hpang găra lai wa ai ni rai ma ai. Malu masha, bu hpun palawng, rawng ai nta hte kaga lang ra ai baw arai ni hta grau ai, myit masin wenyi hta hpang găra ai baw ni law law nga ai hpe myit dum mai ga ai.

Shat ma mi shing n rai n-gu buk mi hkap la lu na hta mani sumsai dan ai, ninggun jaw ga tsun ai, kabu ai nsam hpe grau ra kadawn ai ni kade she nga. Hpun palawng kumhpa lu la na hta grau nna kaya hpa lama ma a majaw, myit masin hta singgu krin rai, kaya hpa tai taw nga ai ni a matu shanhte a ntsa e chye na ya ai lam, mahku mara madun dan na hpe she grau marin na ma ai n rai a hka! Masha kau mi a matu hkum hkrang she hkamja ai rai tim, myit kaji găren rai, myit mada ai lam kata, myit daw nga ai ni a matu shalan shabran ninggun jaw ga hpe hpang găra nga ai ni kade she law! Yesu gaw, dai myit masin wenyi a chyeju kumhpa yawng hpe jaw ya lu ai wa rai nga ai. Dai majaw shi tsun ai, “Nye shan gaw sha-hpa majing, nye sai mung lu-hpa majing” nga nna tsun ai rai nga ai.

Hpang jahtum shana shat (Paska hkungga shan) sha ai aten hta, “Ndai gaw ngai a Hkum; ndai gaw ngai a Sai”, ngu ai shaloi, hkum hte sai găran mat ai lam gaw shi nni nkri hkam la ai hte si mat ai lam hpe myit dum shangun ai, “Ngai hpe adum nga na matu ndai galaw mu” nga ai. Yesu shi a hkum ting nawng hkrung nga ai aten hta dai mabyin ni hpe galaw da ai. Shi hkrung nga let shi si ai lam hpe jawjau ai amu hku nna shabyin ai. Shi hkrung nga let shi si ai lam hpe Sakramentu hku shabyin ai gaw shi galoi mung hkrung nga ai lam hpe myit dum shangun ai. Dai majaw, Missa hkungga nawngjau shagu, Yesu nni nkri hkam ai, si mat ai, bai hkrung rawt ai, ndai mabyin ni hpe Sakramentu hku nna bai shabyin ga ai re. Wenyi a lu-sha majing hpe shăbyin da ya ai. Kamsham ai myit hte hkam la ai ni hpe shachyoi shapra ai chyeju kumhpa amyu myu, anhte myit masin wenyi hta hpang găra ai baw yawng hpe jaw ya lu ai. 

Chyoi Pra Hkum hpe man man hkam la ai ni a matu Yesu a ga-sadi gaw, “Htani htana asak” rai nga ai. Si Du hpe awng dang nna bai hkrung rawt ai asak Madu hpe hkam la ai ni gaw n si lu na, ngu ai ga-sadi rai nga ai. 

Sumru yu na matu:
• Yesu tsun ai, “Ngai gaw sumsing lamu na muk…muk ndai sha ai wa n si lu na” nga, kahtap 
kahtap nna tsun ai hpa majaw rai ta?
• Chyoi Pra Hkum hpe kamsham tsawra ai myit law htam wa lu na matu hpa galaw ra ga ta?

2023: CHYOI PRA AI HKUM HTE SAI POI SHANI NA CHYUM LAIKA

CHYOI PRA AI HKUM HTE SAI POI 
June 11, 2023
CHYUM MUNGGA DAW 1

Tara Jahprang laika  8:2-3, 14-16

Ya hti na gaw Tara Jahprang Laika hta na rai nga ai.
Mawshe gaw Israela amyu masha ni yawng hte hpe tsun mu ai gaw; nanhte a Madu Karai Kasang nanhte hpe shagrit shanem nna, shi a hkang da ai ga hpe hkan mayu ai myit, rawng ai, n rawng ai chye lu hkra lai mat wa sai mali shi ning tup, nam mali hkan e nanhte hpe woi hkawm ai lam hpe dum nga mu. Shinggyim masha muk hte sha hkrung nga lu ai n rai, Karai Kasang a n-gup hta na pru mapru hte hkrung nga lu ai gaw, nanhte chye lu na matu, shi nanhte hpe shagrit shanem nna, kaw si jahkrum ai hpang, nanhte nmu yu ai, nji nwa ni mung n mu yu ai manna muk hte nanhte hpe bau ya manit dai. Egutu mung e mayam tai ai nta kaw na nanhte hpe woi shaw ai Madu Karai Kasang hpe hkum malap kau myit. Shi gaw wan lapu hte n-gaw gawk sawng ai hte, lu na hka kata nna hpang gara hkrum ai, nam mali kaba a ka-ang hku, nanhte hpe woi wa nu ai. Dai Madu gaw grai ja la ai lunghkrung hta na, nanhte lu na hka shapraw jaw nna, nanhte hpe bau maka ai hpe myit dum nga mu.
Karai Kasang a Mungga rai nga ai.

CHYUM MUNGGA DAW 2

1Kor 10:16-17

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e anhte a chyeju dum ai gawm gaw, Hkristu a Sai hte jawm pawng ai lam rai nga ai, n rai ni? Anhte ahkyep garan nga ai muk gaw, Hkristu a hkum hkrang hte jawm pawng ai lam rai nga ai n rai ni? Kaning rai n me law, anhte gaw marai law law rai nga timung, dai muk tawng mahtang langai sha rai nga ai. Shing rai, anhte yawng muk tawng langai sha hpe jawm sha ai majaw, anhte gaw hkum hkrang langai sha rai nga ga ai.
Karai Kasang a Mungga rai nga ai.

KABU GARA SHIGA

Yawhan 6:51-58

Ya hti na gaw Yawhan a laika hta na Kabu Gara shiga rai nga ai.
Yesu gaw Yuda masha ni hpe tsun mu ai gaw; Ngai gaw Sumsing lamu de na yu wa ai, hkrung ai muk rai nga nngai: muk ndai sha ai wa kadai mung, htani htana ahkrung nga na ra ai; mungkan ga asak hkrung nga na matu, ngai jaw ai muk chyawm gaw nye a shan rai nga li ai, ngu nna tsun jang, Yuda masha ni gaw ndai wa gaw kaning di nna anhte hpe shi a shan jaw sha lu na a ta? Nga nna shada da tsun hkat ma ai. Yesu gaw, ngai nanhte hpe kaja wa teng teng tsun made ga, Masha kasha a shan nanhte n sha, shi a Asai hpe mung n lu yang gaw, nanhte hta asak nrawng lu ai. Nye a shan sha ai hte, Nye a Asai lu ai wa gaw, htani htana asak lu la nu ai; dai wa hpe mung hpang jahtum na nhtoi hta ngai bai sharawt la na we ai. 
Kaning rai nme law, Nye a ashan gaw sha hpa majing rai nga li ai. Nye a shan sha ai hte, Nye a Asai lu ai wa gaw, ngai hta rawng nga ai; dai wa hta mung ngai rawng nga nngai. Ahkrung nga ai Nye Wa gaw, ngai hpe shangun dat ai rai nna, ngai gaw Wa a majaw hkrung nga nngai hte maren, Ngai hpe sha ai wa mung, Nye a majaw hkrung nga na ra ai. Ndai gaw sumsing lamu de nna yu wa ai muk rai nga ai; nji nwa ni sha ai muk zawn n rai: kaning rai n me law, shanhte yawng si mat masai. Ndai muk sha ai wa chyawm gaw htani htana ahkrung nga na ra ai ngu nna, Yesu tsun wu ai.
Madu a Kabu Gara shiga rai nga ai.

2023: CHYOI PRA AI TRINITA POI SHANI NA MUNGGA

Marai masum Atai Langai sha re ai Karai Kasang, kaga makam masham ni hta n mu lu ai. Tengman ai Karai Kasang hpe shawng chye la ai Israel amyu sha ni hte ndai prat na Israel makam masham hta, Triniti a lam hpe myit hta n hkawn lu ai. Israel a makam masham kaw na prut pru ai Islam hta mung, Triniti a lam hpe n hkap la lu ai. Karai Kasang hkum nan, makam masham labau hta gau-ngwi rai shadan dan ai.

Anhte akyu hpyi shagu wudang masat hte hpang nna wudang masat hte shăngut ga ai. Jau ni gaw masha, arung arai hte shara ni hpe shăman shăgu mung, wudang masat hte sha shăman ai. Nat shăden ai, nat hkyawt ai shaloi mung wudang masat galaw nan galaw ra ai. Wudang masat galaw shagu Kawa, Kasha, Chyoi Pra Wenyi, marai masum atai mi re ai Karai Kasang hpe myit dum ai hte Hkristu a wudang hpe myit dum ai majaw rai nga ai. Atsam kaba dik ai majaw rai nga ai.

Ga-shaka Dingsa prat hta Chyoi Pra Triniti a lam hpe adan rai nna n mu lu ai rai tim, Marai Masum Atai mi re ai Karai Kasang a lam hpe madi madun ai shara law law rawng ai. Ga-shaka Ningnan hta gaw Chyoi Pra Triniti a lam hpe asan rai mu lu ga ai; Karai a Kasha Yesu hkum nan kaw na dan san dik ai hku chye la lu ga ai. Shawng shawng na Hkristan Nawku Hpung gaw dai ni na Nawku Hpung zawn Ga-shaka Ningnan tup hkra lu lang ai n rai; Kasa ni a prat hta gaw Chyum Laika adaw achyen rai nna sha lang lu ma ai. Hkristan Nawku Hpung ningnan lat ai aten kaw na, Kasa ni a prat kaw nna, Chyoi Pra Triniti hpe kamsham hkap la ai. Kasa ni langai pyi n ngam ai hpang e sha, Nawku Hpung gaw Chyoi Pra Triniti hte seng nna kam ra ai lam ni hta shabawn lawm ai, dan dan pra pra rai wa ai.

Kawa Karai, Kasha Karai, Chyoi Pra Wenyi Karai, ngu nna Karai Kasang marai masum, “Atai Langai” ngu ai shaloi, shingtai tai ai hku lachyum lang da ai n re. “Byin ai tai ai” langai sha (one nature, being united), masha ga hku tsun yang baw masum rai tim salum langai sha, ngu na zawn she rai nga ai. Dai mungsung a lam hpe chye lu na hta grau ahkyak ai gaw dai Triniti Karai Kasang hpe chye na lam re. Masha marai lahkawng a lapran na kuptsup ai tsawra myit hte shadawn mai ga ai. Hku hkau ai lam tup hkra, shada a sharawng ai lam hpe tup hkra hkan galaw ai, madat ya hkat ai, dz., dz.

Missa akyu hpyi hpaw hpang ai daw hta, “Anhte Madu Yesu a (hkye hkrang la ai) chyeju, Kawa Karai a tsawra myit hte Chyoi Pra Wenyi a mahku mara zinlum ai lam nanhte hte nga nga u ga” nga, shachyen ai. Dai gaw, dai ni hti ai San Pawlu a shagun dat ai laika kaw na rai nga ai. San Pawlu a shagun dat ai laika ni hpe yu ai shaloi shara law law hta Chyoi Pra ai Triniti a lam hpe hpyan yan dan, shadan dan na matu shakut ai lam hpe mu lu ai. Kasa laika ting hpe yu ai shaloi, Chyoi Pra Wenyi a laksan bungli ni hpe shadan dan ai labau she rai nga ai.

Chyoi Pra Triniti a lam hpe Yesu hkum nan sharin shaga ai majaw sha, Marai Masum Atai mi re ai Karai a mungsung chye lu, kamsham lu ga ai re. Yesu shi hte Kawa, hkum kaga ga she rai tim, hkye hkrang la ai amu hta langai sha tai ai lam hpe law law lang tsun jahpra dan ai. “Chyoi Pra Wenyi hpe hkap la mu!” nga, Kasa ni hpe tsun ai. Shi sumsing mungdan de du ai hpang e sha dai Wenyi hpe shangun dat ai. De a hpang e sha, Kasa ni gaw sasăna magam hpe nden ja marai rawng ai hte hkaw tsun hkawm lu ma ai. 
Chyoi Pra ai Triniti gaw tsawra kahkyin dumdin ai, mahku mara, zinlum ai lam a ningpawt ninghpang re ai hte, kupstup dik ai kasi mung rai nga ai. Dai mungsun a lam hpe shinggyim masha a bawnu atsam hte n chye mai ai rai tim, kamsham ai myit hte dai Triniti Karai asak hta jung noi nna asak hkrung nga ra ga ai. Akyu hpyi shagu wudang masat galaw nna hkye hkrang la ai chyeju hpe hpyi la, hkam la ga ai. Dai hta grau ai amying ningsang n nga sai.

Chye la ai, ngu ai hta, Karai Kasang hte hkau man nga nna tsawra chye ai masha ni tai nga ra ga ai. Karai a ra sharawng ai lam hpe madat mara hkan sa ai ni tai nga ra ga ai. Shada tsawra hku hkau zinlum hkat ai amu ni anhte galaw ai amu shagu shadan shapra dan lu na rai nga ai.

Sumru yu na matu:
• Wudang masat galaw shagu adum sha rai nna galaw ga ai kun?
• Karai a lam hpe chye ai ngu ai hte Karai Kasang hpe chye ai, ngu ai gara hku shai a ta?
• Chyoi Pra Wenyi kaw na dingtawk akyu hpyi shakut ga ai kun?

2023: CHYOI PRA AI TRINITA POI SHANI NA CHYUM LAIKA

CHYOI PRA AI TRINITA POI 
June 4, 2023
CHYUM MUNGGA DAW 1

Pru 34:4-6, 8-9

Ya hti na gaw pru mat wa ai laika hta na rai nga ai.
Mawshe gaw dai lungpa lahkawng hpe lang let, Madu shi hpe hkang da ai hte maren, Sina bum de lung wa ai. Madu mung sumwi hta yu hkrat wa nna, dai yang e Mawshe hte rau tsap nga ai. Mawshe gaw Madu a mying hpe shaga wu ai rai nna, Madu shi a man e lai wa let, Madu gaw matsan dum ai hte n-gaw nwai ai myit rawng ai Karai Kasang rai nga ai: myit galu nga nna, sumnung shingdi ai hte, kangka ai hte hpring ai Karai Kasang rai nga lu ai, nga nna tsun dan wu ai. Shaloi Mawshe gaw gum dagup nna nawku let, Madu e, na a man e myit man pa ni ai rai yang gaw, Madu anhte rau sa wa ga law. Ndai amyu gaw masin ja ai amyu rai nga ti mung, anhte hpe na a sali wunli shatai da ya mi law, ngu nna hpyi wu ai.
Karai Kasang a Mungga rai nga ai.

CHYUM MUNGGA DAW 2

2 Kor 13:11-13

Ya hti na gaw Korinhtu masha ni hpang de San Pawlu shagun dat ai laika lahkawng hta na rai nga ai.
Hpu nau ni e, Kabu gara nga mu; hkum hkum tsup tsup nga nga na shakut nga mu; myit hkrum myit ra, ngwi pyaw simsa ai hku nga nga mu; shaloi, tsaw ra hte ngwi pyaw simsa ai lam a npawt daju, anhte a Karai Kasang nanhte hte rau a nga nga na ra ai. Chyoi pra san pra ai myit hte shada da shakram dat ma ai. Madu Yesu Hkristu a chyeju, Karai Kasang a tsaw ra ai hte, Chyoi pra ai Wenyi hte hkau ai gaw nanhte hte rau nga nga u ga law.
Karai Kasang a Mungga rai nga ai.

KABU GARA SHIGA

Yawhan 3:16-18

Ya hti na gaw Yawhan a laika hta na Kabu Gara shiga rai nga ai.
Yesu gaw Nikodemu hpe tsun wu ai gaw: Karai Kasang a Kasha hpe kam sham ai ni yawng hte gaw, hten bya n hkrum ai sha htani htana asak lu la mu ga nga, Karai Kasang gaw shi a kasha shingtai hpe jaw kau ai du hkra, mungkan ga hpe tsawra wu ai. Mungkan ga hpe tara dara u ga nga nna, Karai Kasang gaw dai Kasha hpe shangun dat wu ai n rai; mungkan ga gaw shi a marang e hkye hkrang la ai hkrum lu na she, shangun dat wu ai. Karai Kasang a Kasha hpe kam sham ai wa gaw, tara dara ai n hkrum lu ai; n kam n sham ai wa chyawm gaw, Karai Kasang a Kasha shing tai a myit ningsang hpe n kam n sham ai majaw ya e pyi tara dara ai hkrum nga ai.
Madu a Kabu Gara shiga rai nga ai.

2023: YESU LAMU DE LUNG WA I POI SHANI NA MUNGGA

“Pru sa mu; masha amyu yawng hpe sape shatai mu; Kawa a, Kasha a, Chyoi Pra Wenyi a mying ningsang hta shanhte hpe kashin kamun jaw mu. Ngai nanhte hpe htet matsun ai hkang da ai ga yawng, shanhte hpe sharin ya mu. Mungkan htum ai shani du hkra ngai nanhte hte a nga nga na nngai”.

Hkum hkrang hku nna shada hka mat na ni, Yesu gaw sape ni hpa hpa hkan galaw ra ai lam, Yesu shi a hkye hkrang la ai masing hpe sape ni matut galaw ra ai lam, jang jang e galaw ra ai amu hte prat galu matut galaw ra ai amu ni hpe Yesu htet matsun ai.

Mungkan e Chyum Laika daram law htam hkra dip shapraw dut lu ai laika buk kaga n nga ai. Kadai shinggyim masha mung Yesu hpe daram sawk sagawn hkrum ai n nga ai; shi a lam hkaja laika ka da hkrum ai kaga n nga ai. Rai tim,  Yesu gaw dinghta ga aprat jahtum du hkra, hkum nan hpa laika n ka da ai hta n-ga, sape ni hpe mung laika ka matsing da na lam, laika buk shapraw na lam n matsun da ai. Yesu shi gaw myihtoi ni hta myihtoi re ai hte maren, hkaw tsun sharin shaga ai hku nna, shi galaw ai amu ni, kumla ni hku nna hkye hkrang la ai masing hpe galaw shatup da ai. Kasa ni hte shawng shawng na sape ni mung, Yesu htet matsun ai, galaw shangun ai amu ni hpe n-gup a-ga hku nna htawn tsun hkaw dan lai wa ma ai. Hpang e she shanhte matsin lu ai daram ka matsing da ai rai ma ai.

Yesu shi kadai re ai, hpa hpa sharin shaga hkaw matsun lai wa ai, hpa hpa htet da ai lam ni hpe kahkyin shabawn nna ka da ai hpe Kabu Gara Shi-ga/Chyum Laika ngu shamying ai rai nga ai. Yesu hpe kamsham ai a marang e ka da ai laika ni hti n dang hkra law la ai rai tim, hti dan, hkaw tsun dan ai lam n galaw ai rai yang, dai laika buk ni gaw asak n rawng ai zawn, matsin sumhting san san sha tai mat na rai nga ai. Dai laika buk ni, Chyum Laika kaw na hkawt, nsoi nsa shaprawn na matu hti dan, hkaw dan, sumru yu ai rai yang sha ahkrung ai mungga tai wa na, asak jaw ai mungga byin tai wa lu na rai nga ai. Yesu gaw hkum hkrang hku nna shi a sape ni hte hka mat wa ai rai tim, shanhte hpe jahkrai ma ni hpe zawn kau da ai n re, nga ai. Shi sumsing mungdan de lung mat wa ai a marang e sha, dai Wenyi hpe shaăngun dat lu na lam htet da ai. Dai Wenyi a atsam hta sha, Kasa ni gaw Hkristu htet matsun ai amu, mungkan a jahtum du hkra, dinghta ga aprat htum ai aten du hkra, hkaw tsun sharin shaga lu na rai nga ai.   

Dai ni na Nawku Hpung hte kamsham ai ni, Yesu hpe myi hte n mu lu ai rai tim, Shi anhte hte galoi mung a nga nga ai lam hpe kamsham ga ai. Kashin kamun hkam la ai shaloi, shawng na lang, asak jaw ai Chyoi Pra Wenyi hpe lu la ga ai. Dai Wenyi a marang e asak hkrung lu ga ai. Ninggun shaja hkam la ai shaloi, grau hpring tsup ai hku hkam la lu ga ai. Sakramentu ni hkam la shagu, Hkristu a marang e dai Wenyi a chyeju kumhpa ni hpe hkam la lu ga ai. Myit masin wenyi asak hkrung nga, ja nga, prut tsawm nga lu na matu jaw ya ai kumhpa ni re. Kamsham myit, myit mada ai lam, tsawra myit, grung nga ai, matsan dum chye ai, garum chye ai, hkamjan lu ai, nden ja magrau grang ai….asak hkrung nga ai kumla rai nga ai. Myit daw ai, mara shagun hkrai chye ai, masu magaw ai, gumrawng gumtawng ai, dang sha ai, kam mi ra nga ai,…dai ni gaw asak n hkrung ai kumla ni rai nga ai.

Masha yawng mayawng asak hkrung nga na, hkye hkrang la ai kaw du na lam, yawng mung sumsing mungdan de lung wa lu na lam Karai Kasang ra sharawng ai. Dai majaw, Yesu htet matsun ai hta masha amyu shagu hpe sape shatai na lam, tara matsun ni hpe hkaw tsun sharin shaga na lam sape ni hpe htet matsun ai. Kashin kamun a marang e Hkristu a dawshan tai wa ai sape ni yawng mung Hkristu a hkye hkrang la ai masing hta shang lawm, madi shadaw lawm na lit lu wa ma ai.

Hkristu hpe chye chyang lu ai a marang e, shi a asak anhte hta rawng nga ai majaw, shadawn shadang n nga, kaba la ai atsam marai anhte hta rawng ai lam Ehpesu Laika hta San Pawlu shadum ya ai. Dai kaba dik ai, mungkan ting hpe Hkristu gawde ai mungdan chyam bra wa lu na masing hpe shapraw ya lu hkra, atsam marai Shi jaw da sai rai nga ai. Hkristu a mungdan gaw dinghta ga na lam n rai; myit masin wenyi hta gawde ai mungdan, Karai a mungdan rai nga ai. Karai a mungdan htani htana agrin ai, ngu ai hte maren, ndai dinghta ga kaw na hpang ai rai nga ai. Anhte a prat anhte ban na masha ni, anhte hkum nan, Karai a mungdan hpe gawde ai lam hta shang lawm lu ai gaw kaba la ai ahkaw ahkang hte kaba la ai sari sadang mung rai nga ai.

Myit sumru yu mai ai lam__

Akyu hpyi shagu wudang masat galaw ai; kashin kamun sakramentu a chyeju kumhpa ni hpe mung, kashin kamun ga-sadi hpe mung, bai myit dum dum di ai kun?

Shi hkang da ai ga ni/matsun ga ni hpe hkan shatup ai, ngu ai, hpa wa rai ta?

Hkye hkrang la hkrum ai masha shagu  gaw Madu shi htet matsun ai, “Hkaw tsun mu” ngu ai ga hpe hkan galaw na lit lu ai; nang/ ngai, gara hku hkan galaw nga ai kun?

2023: YESU LAMU DE LUNG WA I POI SHANI NA CHYUM LAIKA

YESU LAMU DE LUNG WA AI POI
May 21, 2023
CHYUM MUNGGA DAW 1

Kasa 1:1-11

Ya hti na gaw Kasa laika hta na rai nga ai.
Shawng e ngai ka da ai laika hta, Htawhpilu e, Yesu Sumsing lamu de shalun la hkrum ai nhtoi du hkra, shi galaw dan ai amu ni hte sharin shaga ai lam yawng hte hpe ngai ka lajang da se ai. Shi shalun la hkrum ai shani e, Chyoi Pra ai Wenyi a garum ai hte shi lata la ai kasa ni ga matsun hkang da nu ai. Yesu si mat ai hpang, dai kasa ni hpe shi a hkum shadan dan nna, kam ging ai sakse lam law law hte shi naw hkrung nga ai hpe madun da wu ai. Shing rai shanhte rau hpawng nga ai shaloi Yesu gaw, Yerusalem mare kaw na nanhte n pru ai sha, ngai kaw nna na la ai, Wa a ga ndat hpe ala nga mu; kaning rai nme law, ngai hkum nan nanhte hpe tsun da ai hte maren, Yawhan gaw hka hte kashin kamun jaw ai; nanhte chyawm gaw nhtoi gade n na yang, Chyoi Pra ai Wenyi hte kashin kamun hkam la na marin dai ngu nna shanhte hpe tsun mu ai. Dai rai nna, Yesu hte rau hpawng nga ai ni gaw, Madu e, dai mungdan hpe ya aten e Isaraela masha ni kaw bai de ya na rai ni? ngu nna san ma ai. 
Yesu mahtang gaw, Wa shi a ahkaw ahkang hte daw da aten ladaw hpe, nanhte chye shara n nga ai. Rai ti mung, Chyoi Pra ai Wenyi nanhte a ntsa e du jang, n-gun atsam lu la na myit dai rai nna, Yerusalem mare hte Yuda mung ting, Samari mung hte lamu ga htum hkra, nanhte nye a sakse ni tai wa na marin dai, ngu nna shanhte hpe tsun wu ai. Ndai ga tsun jang, shanhte yu nga ning len, shi hpe ntsa de shalun la ai rai nna, sumwi gaw shanhte a man e shi hpe magap la mat wa ai.Shanhte lamu de naw azi yu nga yang, yu mu, hpraw tu ai hpun palawng bu hpun ai marai lahkawng shanhte a makau e tsap pru nna, Galile masha ni e, htaw lamu de hpa rai azi yu nga myit ta? Nanhte a man na Sumsing lamu de shalun la ai wa dai Yesu gaw, nanhte mada yu nga yang, shi Sumsing lamu de lung wa ai zawn, dai hku shi bai du na ra ai. ngu nna kasa ni hpe tsun mu ai.
Karai Kasang a Mungga rai nga ai.

CHYUM MUNGGA DAW 2

Ehpesu 1:17-23

Ya hti na gaw, Ehpesu masha ni hpang de Kasa Pawlu shagun dat ai laika hta na rai nga ai.
Hpu nau ni e, anhte a Madu Yesu Hkristu a Karai Kasang hpung shingkang rawng ai Kawa gaw, shi hkum nan hpe chye chyang lu na matu, nanhte a myit masin hpe hpaji byeng ya hte myit leng ai chyeju shi jaw ya u ga, ngu nna ngai hpyi nngai. Karai Kasang shaga la ai a jaw e, myit mada shara gade wa nga ai hpe mung, Chyoi pra ai ni gaw hpung shingkang rawng ai Sali wunli gade wa hkrum lu na hpe mung; shi hpe kam sham ai ni a matu, shi a chyeju atsam gade wa galu kaba nga ai hpe mung, nanhte chye lu na matu, Karai Kasang nanhte a myit masin na myi hpe jahtoi jasan ya malit ga, ngu nna ngai hpyi nga nngai. Karai Kasang gaw, Hkristu hta shabyin da ai amu hpe gawn yu jang, nanhte chye lu na myit dai. 
Shi a atsam hte Hkristu hpe si mat ai kaw na sharawt la nna, Sumsing lamu hta shi a hkra maga e dung nga shangun da wu ai. Du magam, ahkaw ahkang, hpung shingkang hte up ai aya lu ai ni nlang hte a tsa e mung, ndai prat hte htawm hpang na aprat e shamying lu ai amying ahkang mahkra a ntsa e mung, shi hpe shagrau shatsaw da nu ai. Karai Kasang gaw arai baw sumhpa hpe shi a lagaw n-pu e tawn da nu ai rai nna, yawng mayawng hpe up hkang lu na matu, nawku hpung a baw shi hpe shatai da wu ai. Dai hpung gaw Hkristu a hkum hkrang rai nga nna, yawng mayawng hpe jahpring shatsup ya ai Hkristu gaw, dai nawku hpung a marang e jahkum shatsup ai hkrum wu ai.
Karai Kasang a Mungga rai nga ai.

KABU GARA SHIGA

Mahte 28:16-20

Ya hti nag aw Mahte a laika hta na Kabu Gara Shiga rai nga ai.
Yesu a sape shi langai hte gaw, shi shanhte hpe hkang da ai hte maren, Galile mung na bum de lung mat wa ma ai. Yesu hpe mu jang shanhte nawku ma ai; nkau mi mahtang n kam ma ai. Yesu shanhte hpang de sit sa wa nna, Sumsing lamu hta e mung, ginding aga hta e mung, up hkang na ahkang nlang hte hpe ngai kaw ap ya ai. Dai majaw, nanhte pru sa wa nna, masha amyu baw shagu hpe sape shatai let Kawa, Kasha, Chyoi pra ai Wenyi a mying ningsang hte, shanhte hpe kashin kamun jaw nga mu; ngai nanhte hpe hkang da mada shanhte hkan shadik lu mu ga, sharin shaga ya mu. Dai hta kaga lamu ga apart htum mat hkra, ngai nanhte hte rau dinggrin a nga nga na nngai, ngu nna Yesu Madu shi a sape ni hpe matsun dat mu ai.
Madu a Kabu Gara Shiga rai nga ai.

2023: PASAK LADAW LABAN (6) NA MUNGGA

“Ngai hkang da ai ga-matsun ni hpe madat mara hkan shatup ai wa gaw ngai hpe tsawra ai wa rai nga ai; ngai hpe tsawra ai wa gaw Wa e tsawra hkrum na ra ai. Ngai mung shi hpe tsawra nna, nye a lam ngai shi hpe shadan dan na we ai”. Yesu Shi htet matsun ai ga ni hpe hkan shatup ai ni gaw Kawa Karai kaw na Shalan Shabran ai Wa hpe laksan chyeju kumhpa hku hkam la lu na lam tsun ai.

Dinghta ga ntsa anhte hkan madat ra ai tara matsun ni law la ai. Awmdawm ahkaw ahkang, ngu nna kam mi ra galaw, kam ai hku nga, tara matsun ni n ra sai ngu ai n re. Democracy uphkang masa, ngu ai majaw, masha ni hpe renghkang ai tara upade, tara matsun ni n ra sai n rai nga ai. Democracy uphkang masa na mung masha ni gaw tara a yaw shada lam ni hpe lachyum chye na nna hkan shatup na lam ninggun jaw ai. Comunit-Socialit uphkang masa, gumshem Du/Hkawhkam ni uphkang ai masa npu na mung masha ni gaw shanhte hpe n tara ai hku gyit hkang uphkang ai, n jaw ai tara matsun ni hte shawa masha ni hpe jahkrit shama, adip arip re ai hku uphkang ai hpe hkam sha ra ma ai. Tara matsun ni hpe hkrit ai majaw madat ya ma ai. Manghkang byin jang, hkrun lam pat jang mayun kumhpa jaw, gumhpraw jaw nna tara tawt mai ai masa ru-jung ai lam Russia/Miwa/Myanmar/Afgan….shingre mungdan ni hta adan sha mu lu ai; shimlum lam majing hpe n lu la mai ai. Arawng aya lu ai, gumhpraw lu ai ni lu su nga-mai nna matsan masha law grau wa ai. Japan, Korea, Singapore, Norway, Australia….. zawn re Democracy mungdan ni hta tara a yaw shada lam ni hpe mung shawa masha ni lachyum chye na hkawn hkrang nna madat mara hkan sa na lam hpe ninggun jaw ai majaw, masu magaw re, mayun kumhpa jaw, gumhpraw jaw nna mara magup, re ai lam ni grai taw ai. Dai majaw, mungdan sut lu nga-mai nna shimlum lam hpe atsawm rai lu la ma ai.

Lahta e shadawn dan ai mabyin ni hpe ginhka lu jang, Madu Yesu tsun ai ga hpe grau chye la lu na kam ai. Yesu sharin ya măyu ai lam gaw ndai re: tara matsun ni hpe madat mara ai ngu ai hta, Shi hpe tsawra ai, ngu ai gaw gumhpraw tingsen a man maga hte shingdu maga hpa, gumhpraw pa langai sha she rai nga ai. Tsawra kamhpa ai myit n lawm ai sha Shi a tara hpe hkan shatup lu na n rai; tsawra ai ngu ai hpa wa rai ta? De a lachyum hpe mung chye na hkawn hkrang ra ai. Shi gaw kam ging ai wa, ngu ai hpe shawng hkap la ra ai. Shi tsun ai, galaw ai, matsun ai yawng gaw tinang a akyu ara a matu re ai lam shawng hkam la ra ai. Shawng na Laban e sha, Yesu shi hpe n shut n shai kam ra ai lam, kam ging ai lam tsun mat wa sai. Ndai Laban hta gaw shi jaw da ai hkang da ga, tara matsun ni hpe hkan shatup ai rai yang shi hpe tsawra ai lam re.

Yesu jaw da ai hkang da ga, tara matsun ni gaw anhte a awmdawm ahkaw ahkang ni hpe gyit hkang kau na matu n rai, gumshem Du/Hkawhka ni zawn adip arip di ai n rai; shada tsawra hkat chye na lam sharin ya ai tara ni she rai nga ai. Myit masin san seng sanpra na lam, myit ding na lam, shada matsan dum mara raw ya chye na lam sharin ya ai she rai nga ai. “Myit san seng ai ni gaw Karai Kasang hpe mu lu na ma ai”, nga ai hte maren, tara matsun ni hpe hkan shatup ai a marang e, tara jaw ai wa Yesu shi hpe chye na, shi a mai kaja ai lam ni hpe chye lu na rai nga ai.

Masha langai shi kadai re ai lam grai chye la hkra rai tim, shi hte hku hkau ai lam n galaw lu yang shi hpe tsawra lu na n rai nga ai. Yesu hpe tsawra lu na matu mung, shi hte hku hkau ai lam hpe gawgap la ra ai. Shi a mungga ni hpe myit sumru yu ai hku nna, akyu hpyi ai hku nna, sakramentu ni hpe man man hkam la ai hku nna, tsepkawp kamhpa ai hku nna, hku hkau ai lam hpe gawgap la ra na rai nga ai. Rai tim, gawng kya ai shinggyim masha a matu, myi hte n mu lu ai Madu hpe tsawra lu na lam hta, shi a tara matsun ni hpe hkan shătup ai lam hta, teng sha ra rawng gawng kya ai lam nga ga ai. Dai majaw, laksan madi shadaw garum ya ai chyeju ra ga ai. Dai hpe Shălan Shăbran ai Wa, ngu ai, Chyoi Pra Wenyi a garum chyeju ra ga ai. Yesu tsun ai, matsun ai hta “Marai Masum Atai mi” re ai Karai Kasang hpe chye na lu na matu lam hpaw ya ai. Yesu shi lamu de lung wa ai hpang e sha, Chyoi Pra Wenyi hpe shăngun dat ya na rai nga ai.

Dai Shălan Shăbran ai Wa gaw anhte hpe shinggan kaw nna garum ai, ngu ai hta, grau nna anhte a myit masin wenyi kata hta rawng nga na lam, kamsham ai ni hte galoi mung a nga nga na lam tsun ai. Dai wenyi a atsam hte sha, shading sharai ai lam, shajaw ai amu ni, tinang kaw na hpang ai grup-yin hpe mung garam shatsawm ai amu ni galaw lu na rai nga ai.

Dai Wenyi a atsam hte Kasa ni, sape ni gaw myit hprang nna hkye hkrang la ai lam gaw yawng a matu re ai lam Kasa Laika hta tsun da ai. Kasa ni hkum nan myit malai myit ka-yin nna, shanhte yu kaji ai, sai kayau amyu_ Samaria masha ni hpang de sa nna shanhte a ntsa e lata ladawn ya ma ai. Shaloi, dai Samaritan masha ni mung, maren sha re ai chyeju kumhpa lu la ma ai lam sakse hkam da ai. Dai wenyi hta Hkristan ni asak majing lu la ai lam, hpang e Petru gaw shangun laika hta sakse hkam da ai.

Myit sumru yu na matu__
 Tinang a manghkang, lai shai wa ai masa hta hkan nna, tara matsun kau mi hpe madat mara hkan shatup na yak wa ai aten hta tsawra kamsham myit hte madat ya lu na kun?
 Tara matsun ni a yaw shada lam ni hpe kade chye na wa sai kun?
 Madu Yesu hpe grau chye chyang tsawra wa lu hkra, shi hte hku hkau ai lam gara hku gawgap la nga ai kun? 

2023: PASAK LADAW LABAN (6) NA CHYUM LAIKA

PASKA LADAW HTA LABAN (6)
May 14, 2023
Chyum Mungga Daw (1)

Kasa 8:5-8, 14-17

Ya hti na gaw Kasa laika hta na rai nga ai.
Hpilip gaw Samari mare de sa wa na, Hkristu a lam hkaw tsun dan wu ai. Shi tsun dan ai lam na la ai hte, shi madun ai lamik kumla mu ma yang, masha unawng uwa myit langai sha hte, Hpilip a ga madat mara nga ma ai. Kaning rai nme nga yang, nat kap ai ni law law hta na, n seng ai nat ni jahtau marawn let pru mat shajang ma ai; hkum katsing si ai ni hte lagaw hten ai ni law law mung, mai mat shajang ma ai. Dai rai nna, dai mare na masha ni nachying kabu gara nga ma ai. Samari masha ni, Karai Kasang a mungga hta la ma ai hpe, Yerusalem e nga ai kasa ni na ma yang, shanhte gaw Petru yan Yawhan hpe shangun dat mu ai: shan mung du jang, dai masha ni Chyoi pra ai Wenyi lu la na matu akyu hpyi ya ma ai; hpa majaw nga yang, dai Chyoi pra ai Wenyi gaw, shanhte hta na kadai a ntsa e mung garai n yu wa ai; Madu Yesu a amying hte kashin kamun hkam ai sha, naw rai nga ma ai. Dai rai nna, kasa Petru yan Yawhan shanhte a ntsa e lata mara ya jang, dai Chyoi pra ai Wenyi hpe hkam la ma ai.
Karai Kasang a Mungga rai nga ai.

Chyum Mungga Daw (2)

1 Petru 3:15-18

Ya hti na gaw Kasa Petru shagun dat ai laika langai hta na rai nga ai.
Hpu nau ni e, Nanhte a myit masin hta e Madu Hkristu hpe hkrit hkungga nga mu: dai Hkristu hpa majaw myit mada nga myit ta? nga nna masha langai ngai nanhte hpe san yu jang, lachyum tsun dan na matu tut nawng e jin jin rai nga mu; rai ti mung, sumnung ai hte hkungga ai myit hte ga htan ya mu. Nanhte myit asan sha rai nga ai hte amu mahkra hpe galaw nga mu; shaloi nanhte hkan ai Hkristu a nga sat nga sa ai lam a majaw, aroi arip hkrum yang, nanhte hpe shatan nhkan ai ni, n teng n man ai hku mara shagun ma ai hpe, masha yawng chye lu na mara ai. Dai rai nna, Karai Kasang dai hku hkraw nga yang, n kaja ai amu galaw ai majaw nni nkri hkrum ai gaw, grau nna kaja nga ai, kaning rai nme law, Hkristu gaw shut hpyit mara a majaw, kalang mi sha si hkam nu ai: Karai Kasang hpang de anhte hpe woi wa lu hkra, ding hpring ai wa Hkristu gaw, n ding n hpring ai ni a matu nni nkri hkam la nu ai: Shi gaw hkum tsawp hta sat kau hkrum ti mung, nsa wenyi hta jahkrung sharawt la ai hkrum nu ai.
Karai Kasang a Mungga rai nga ai.

KABU GARA SHIGA

Yawhan 14:15-21

Ya hti na gaw Kasa Yawhan a laika hta na Kabu Gara Shiga rai nga ai.
Yesu Shi a sape ni hpe tsun mu ai gaw: Nanhte ngai hpe tsaw ra ai rai yang gaw, nye a ga matsun hkan shatup na myit dai. Ngai mung ngai Wa kaw hpyi nna, Shi gaw, nanhte hte prat tup rau nga na matu, teng man ai hte seng ai Wenyi ngu ai, shalan shabran ai Wa kaga, nanhte hpang de shangun dat ya na ra ai. Mungkan ga gaw dai Chyoi pra ai Wenyi hpe nmu nchye ai majaw, nhkap la lu ma ai. Nanhte chyawm gaw dai Wenyi hpe chye nga myit dai; kaning rai nme law, shi gaw nanhte hte rau nga nga ai rai nna, nanhte hta mung rawng nga na ra ai. Nanhte hpe jahkrai zawn ngai kau da na n rai: nanhte hpang de ngai bai sa na ring ngai. Loi hkring mi rai jang, mungkan ga ngai hpe n mu dat na nu ai; nanhte chyawm gaw naw mu lu na ma rin dai: kaning rai nme law, ngai ahkrung nga nngai majaw, nanhte mung a hkrung nga na marin dai. Ngai gaw nye Wa hta nga nga ai mung, nanhte ngai hta nga nga myit dai mung, ngai nanhte hta nga nga nngai mung, dai shani e nanhte chye lu na marin dai. Nye a ga matsun lu la nna, hkan shatup ai wa gaw, ngai hpe tsaw ra ai wa rai nga ai: ngai hpe tsaw ra ai wa hpe nye Wa mung tsaw ra na wu ai: ngai mung dai wa hpe tsaw ra ai hte, ngai hkum nan shi hpe shadan dan na we ai.
Madu a Kabu Gara Shiga rai nga ai.

2023: PASAK LADAW LABAN (5) NA MUNGGA

“Ngai gaw lam rai li ai; tengman ai hte asak mung rai li ai” nga, Madu tsun ai. Hkrun lam kaw n hkawm ai masha gaw bandung de n du lu ai. Hkawm ai ladat jaw jang sha, hkrun lam ding-yang hkan galaw ai lam ni jaw jang sha, shimlum ai hku hkawm lu na rai nga ai. Anhte tsun ai, myit ai, galaw ai hpa mi rai rai, asak hpe bau ai hte makawp maga na matu galaw ai hkrai rai nga ai. Myit shut sawn shut ai majaw tsun shut, galaw shut ai majaw, nga-mu nga-mai lam hpe ahpye alam di kau lu ai. Dai majaw, Lam, Tengman ai, Asak_ masum hte hpe madu ai wa hta asak dun jung noi nga ra ga ai.

Lai mat wa sai laban hta “Ma Sa La” Myanma Socialist Lansin hkrun lam/policy matsun hkan nna mungdan hpe shaning (30) ning hkawt, uphkang lai wa ai. Jahtum e mungdan sut masa hkrat sum mat ai gaw mungkan e matsan dik htum ai mungdan langai jahpan shang mat ai. Mundan masha ni matsan mayan ai dik hkra rai mat wa ai. Shinggyim masha langai hpra a awmdawm ahkaw ahkang sum mat wa ai degree htum hkra_ lamu ga ni hpe adip arip hkan găshun ai, shabrai n jaw ai sha shawa bungli shăngun sha ai, porta hkan rim ai majaw hprawng kyin ai mung lak lak. Socialist/communist uphkang masa hpang woi ai Russia mung, dai ni du hkra Ma Sa La prat na masa hte n shai ai; dai ni du hkra matsan jamjau nna nga nga ma ai. Mungdan masha ni yawng lu su nga-mai shimlum lu na, ngu ai bandung de n du lu ai. Bandung du na matu galaw ai ladat ni hta adip arip re ai kumla ni, jahkrit shama ai ladat, masu magaw ai ladat, mayun kumhpa jaw hkat ra ai ladat,…shing re n jaw a ang ai, n tengman ai ladat law law hpe mu lu ai.

“Policy” ngu ai bandung de matsun ya ai hkrun lam jaw nan n jaw ai majaw, hkan nang ai ni yawng hten bya ai kaw, kawsi matsan mayan re ai kaw kre mat ma ai. Policy lata jaw ai mungdan ni sut lu nga-mai jawng ma ai. Dai gaw hkrun lam kade ahkyak ai ngu ai hpe madun ai. Bandung de du lu ai mahkrun jaw tim măsu măgaw ai, mayun kumhpa sha shajang ai, adip arip jahkrit shama hkat ai, jahpan măsu ai, n jaw ai mu tim mara madi madun n mai ai, dai zawn uphkang renghkan ai mungdan ni yawng matsan ai mungdan tai mat ma ai. Policy mung jaw, gawgap da ai hkrang jaw nna san seng ai, myit magaw n mai ai masa hku uphkang ai mungdan ni sut lu nga-mai ai hte shimlum ai hku nga lu ma ai.

Gara kaning re ai uphkang masa hta rai tim, kuptsup ai lam gaw n nga ai. Dinghta mungdan shăgu hta masu magaw ai, shăkrip hkat ai, awmdawm ahkaw ahkang hpe hkrup mi ra shăngun lang ai majaw, manghkang hkum hkra byin nga ai; myit masin wenyi htenza shajang ai gara mungkan mungdan mung n lawt lu ai. Shimlum awng dang ai mungdan law law hta mung matsan masha law htam ai ding-yang sha rai nga ai. Mungkan sutgan lu su nga-mai ninglen matsan dum n chye, akyang lailen htenza ai lam law law; hpaji kunghpan ninglen masu shingjawng hkat ai lam law law; myit masin wenyi rawt jat galu kaba ai lam n nga jang rawt jat galu kaba ai lam majing n rai na re. Mungkan sut su ninglen Lazaru hpe matsan dum n chye ai masha gaw teng sha masha ăngawk she rai nga ai. Nai mam law law htun da lu ai masha e tsun ai, “Nye wenyi e, lu lu sha sha rai, pyaw pyaw nga nit” ngu ai wa hpe Karai Kasang ning nga ai, “Dai na jang na wenyi hpe dawm la kau na; na a sutgan kadai a matu rai mat na ta?” nga ai.

Mungkan ga na hpaji machye machyang, sut su nga mai ai lam, shimlum dum ai lam ni, hpa mung grin lu ai n rai nga ai. Masha tai wa ai lam a jahtum na bandung gaw n htum n wai asak a chyeju kumhpa ni she rai nga ai. Karai a hpung shingkang arawng sadang a matu she rai nga ai. Dai Hkristu chyu sha, tengman ai hkrun lam rai nga ai. Prat hta dawdan ai lam galoi mung galaw nga ra ai hta dai Hkristu a tara hte shadawn yu nna sha jeyang dawdan mai ga ai. Shi gaw tengman ai lam rai nga ai. Grin ai jet ai kabu gara simsa ai chyeju ni hpe jaw ya lu ai mung dai Madu sha rai nga ai.

Kasa Laika hta Karai a mungga, asak jaw ai mungga re ai majaw Kasa ni gaw aten tup mungga htawn ai amu hta ap nawng da ra ai lam tsun ai. Dai mungga law law hkaw tsun htawn tsun lu ai majaw, kamsham ai masha law law jat wa ai lam tsun da ai. Petru a Shagun da tai Laika hta mung, dai mungga hpe kamsham hkap la ai ni gaw lata la hkrum ai amyu, jawjau ai amyu tai wa lu ai lam sakse hkam dan ai.

Myit sumru mai ai lam__
 Hkrun lam hkawm shagu akyu hpyi shaman ga ai kun?
 Ahkyak ai dawdan ra ai amu ni hta tengman ai lam re ai Madu kaw shawng hpaji hpyi chye ga ai kun?
 Anhte galaw ai amu yawng, asak a chyeju kumhpa hkam la na lam re ai; dai asak Madu hpe nan chyeju dum shakawn chye ga ai kun?

2023: PASAK LADAW LABAN (5) NA CHYUM LAIKA

PASKA LADAW HTA LABAN (5)
May 7, 2023
Chyum Mungga Daw (1)

Kasa 6:1-7

Ya hti na gaw Kasa laika hta na rai nga ai.
Ya, sape ni law htam wa ai nhtoi hta e, Greak ga shaga ai ni gaw, Hebre ga shaga ai ni hte myit n hkrum ai lam pru sai; gaida jan ni hpe shani shagu galaw lu galaw sha ai amu hta, shanhte a gaida ni hpe, jaw ang ai made n karan jaw ma ai, nga nna Greak ga shaga ai ni Hebre ni hpe aput angun nga ma ai. Shaloi Kasa shi lahkawng gaw sape hpung ting hpe shaga la nna, Anhte gaw Karai Kasang a mungga hpe kau da rap rai nna, shahpa daw jaw ai amu hta shakut yang n htuk nga ai. Dai majaw, hpu nau ni e, nanhte hta na, akyang lailen kaja rawng nna, Chyoi pra ai Wenyi hte hpring ai, myit su ai masha marai sanit hpe lata la mu; dai ni hpe ndai amu madu shangun na matu, anhte san da na ga ai; anhte chyawm gaw akyu hpyi ai amu hte, mungga hkaw dan ai amu hpe, htep lahti hkan shatup na ga ai, ngu nna tsun mu ai.Ga dai hpe salang hpawng ting na ra ai majaw, makam masham kup tsup ai hte, Chyoi pra ai Wenyi hpring ai Stephen ngu ai wa hte, Hpilip, Prokoru, Nekanora, Timun, Parmena hte Anti-ok mare na, shawng e Yuda tara htung de kayin shang wa sai Nikora hte hpe lata la nna, Kasa ni a man e tsap shangun da mu ai. Kasa ni akyu hpyi ngut jang, shanhte hpe lata mara jaw da mu ai. Karai Kasang a mungga mung, lani hte lani grau nna maden jat wa nna, Yerusalem mare hta sape ni law htam wa ai hte, hkinjawng ni law law wa dai makam masham lam hpe madat mara nga ma ai.
Karai Kasang a Mungga rai nga ai.

Chyum Mungga Daw (2)

1 Petru 2:4-9

Ya hti na gaw Kasa Petru shagun dat ai  laika langai hta na rai nga ai.
Hpu nau ni e, Madu hpang de sit sa marit; Shi gaw ahkrung nga ai nlung rai nga ai: masha ni dai hpe kau da ti mung, Karai Kasang a man e lata la ai hte hpu ging la ai nlung rai nga ai. Nanhte mung, ahkrung nga ai nlung ni tai wa nna, wenyi hte seng ai nawku htingnu hpe nanhte gaw shachyaw da lu na matu, Madu hpang de sit sa marit. Shing rai Yesu Hkristu a marang e, Karai Kasang sharawng awng ai, nsa wenyi hte seng ai hkungga hpe, Wa Karai kaw nanhte ap ya lu na matu, chyoi pra ai, jaw jau ai amyu tai wa na marin dai. Kaning rai nme law, Ngai lata la ai hte hpu ging la ai, ningjut jahtum na nlung hpe, Ziun hta e ngai gaw da se ai rai nna, dai hpe kam sham ai wa gaw dakan dakring tsap lu na ra ai, nga nna Chyum Laika hta rawng nga ai.
Nanhte kam sham ai ni a matu dai nlung gaw hpu ging la ai baw rai nga malit dai. Rai ti mung, n kam n sham ai ni a matu mara, Wahpang gaw ai ni lata kau ai nlung gaw, ningjut jahtum na nlung tai sai rai nna, ahtu kataw shara hte, myit kataw shangun ai lunghkrung mung tai wa sai. Karai Kasang a mungga hpe n kam n sham nga ma ai majaw, shanhte kataw hkrat wa ma ai; shing rai shanhte hkrum na matu, moi chyaloi nhkoi kaw nna lajang da ngut sai. Nanhte chyawm gaw, lata la ai amyu, hkungga nawng ai hkawhkam amyu ni, chyoi pra ai amyu baw hte, nsin kata de nna shi a mauhpa nhtoi de nanhte hpe shaga la ai wa a magam amu ni hpe shana shabra dat ya na matu, Karai Kasang e san da hkrum ai ni rai nga myit dai.
Karai Kasang a Mungga rai nga ai.

KABU GARA SHIGA

Yawhan 14:1-12

Ya hti na gaw Kasa Yawhan a laika hta na Kabu Gara Shiga rai nga ai.
Yesu shi a sape ni hpe tsun mu ai gaw: Nanhte myit hkum ru mu; Karai Kasang hpe kam sham mu, ngai hpe mung kam nga mu. Nye Wa a nta e nga shara law law nga ai; dai n nga yang, ngai nanhte hpe tsun dan ang sai; kaning rai nme law, nanhte a matu nga shara lajang na she, ngai wa na nngai. Shing rai ngai wa nna, nanhte a matu nga shara lajang da nhtawm, ngai nga nga ai shara e nanhte mung nga lu hkra, ngai bai sa nna, nanhte hpe ngai hpang de woi la na made ai. Ngai sa wa ai shara de du ai lam nanhte chye nga myit dai. Shaloi Htawma gaw, Madu e, Nang gade sa wa na pyi anhte n chye ga ai mi, lam kaning rai chye na ga ta? ngu nna Yesu hpe tsun wu ai. Yesu gaw, Lam gaw ngai rai nga nngai, teng man ai hte asak mung ngai rai nga nngai: ngai hta nna n rai yang gaw, kadai mung Nye Wa kaw n du wa lu ai. Nanhte ngai hpe chye sai rai yang gaw, Nye Wa hpe mung chye na manit dai. Ya kaw nna shi hpe chye nga myit dai, mu mung mu yu manit dai, ngu nna Htawma hpe htan ya ai.
Hpilip mung, Madu e, Wa hpe anhte hpe madun mu, shaloi anhte myit dik na ga ai, ngu wu ai. Yesu gaw, Hpilip e, ngai nanhte hte nde nlaw na hkra nga nga ti mung nang ngai hpe n chye n ni? Ngai hpe mu yu sai wa gaw Wa hpe mu yu nu ai: dai re ai mi, Wa hpe anhte hpe madun mi, nga nna hpa rai tsun n ta? Ngai gaw Wa hta nga nga nngai mung, Wa gaw ngai hta nga nga ai mung, nang n kam n ni? Ngai nanhte hpe tsun ai ga gaw, nye a myit hte ngai tsun ai n rai; ngai hta rawng nga ai nye Wa gaw Shi a amu hpe galaw nga ai. Ngai gaw Wa hta nga nngai mung, Wa gaw ngai hta nga nga ai mung, kam sham ra ai: dai n rai yang gaw, galaw dan ai amu ni dai hpe tau yu nna, kam sham nga u. Nanhte hpe ngai kaja wa teng teng tsun made ai gaw, ngai hpe kam sham ai wa gaw, ngai galaw ai amu lu galaw na ra ai; dai hta grau kaba ai amu lu galaw na ra ai; kaning rai nme law, ngai gaw Wa hpang de wa na nngai.
Madu a Kabu Gara Shiga rai nga ai.