2023: PASAK LADAW LABAN (6) NA MUNGGA

“Ngai hkang da ai ga-matsun ni hpe madat mara hkan shatup ai wa gaw ngai hpe tsawra ai wa rai nga ai; ngai hpe tsawra ai wa gaw Wa e tsawra hkrum na ra ai. Ngai mung shi hpe tsawra nna, nye a lam ngai shi hpe shadan dan na we ai”. Yesu Shi htet matsun ai ga ni hpe hkan shatup ai ni gaw Kawa Karai kaw na Shalan Shabran ai Wa hpe laksan chyeju kumhpa hku hkam la lu na lam tsun ai.

Dinghta ga ntsa anhte hkan madat ra ai tara matsun ni law la ai. Awmdawm ahkaw ahkang, ngu nna kam mi ra galaw, kam ai hku nga, tara matsun ni n ra sai ngu ai n re. Democracy uphkang masa, ngu ai majaw, masha ni hpe renghkang ai tara upade, tara matsun ni n ra sai n rai nga ai. Democracy uphkang masa na mung masha ni gaw tara a yaw shada lam ni hpe lachyum chye na nna hkan shatup na lam ninggun jaw ai. Comunit-Socialit uphkang masa, gumshem Du/Hkawhkam ni uphkang ai masa npu na mung masha ni gaw shanhte hpe n tara ai hku gyit hkang uphkang ai, n jaw ai tara matsun ni hte shawa masha ni hpe jahkrit shama, adip arip re ai hku uphkang ai hpe hkam sha ra ma ai. Tara matsun ni hpe hkrit ai majaw madat ya ma ai. Manghkang byin jang, hkrun lam pat jang mayun kumhpa jaw, gumhpraw jaw nna tara tawt mai ai masa ru-jung ai lam Russia/Miwa/Myanmar/Afgan….shingre mungdan ni hta adan sha mu lu ai; shimlum lam majing hpe n lu la mai ai. Arawng aya lu ai, gumhpraw lu ai ni lu su nga-mai nna matsan masha law grau wa ai. Japan, Korea, Singapore, Norway, Australia….. zawn re Democracy mungdan ni hta tara a yaw shada lam ni hpe mung shawa masha ni lachyum chye na hkawn hkrang nna madat mara hkan sa na lam hpe ninggun jaw ai majaw, masu magaw re, mayun kumhpa jaw, gumhpraw jaw nna mara magup, re ai lam ni grai taw ai. Dai majaw, mungdan sut lu nga-mai nna shimlum lam hpe atsawm rai lu la ma ai.

Lahta e shadawn dan ai mabyin ni hpe ginhka lu jang, Madu Yesu tsun ai ga hpe grau chye la lu na kam ai. Yesu sharin ya măyu ai lam gaw ndai re: tara matsun ni hpe madat mara ai ngu ai hta, Shi hpe tsawra ai, ngu ai gaw gumhpraw tingsen a man maga hte shingdu maga hpa, gumhpraw pa langai sha she rai nga ai. Tsawra kamhpa ai myit n lawm ai sha Shi a tara hpe hkan shatup lu na n rai; tsawra ai ngu ai hpa wa rai ta? De a lachyum hpe mung chye na hkawn hkrang ra ai. Shi gaw kam ging ai wa, ngu ai hpe shawng hkap la ra ai. Shi tsun ai, galaw ai, matsun ai yawng gaw tinang a akyu ara a matu re ai lam shawng hkam la ra ai. Shawng na Laban e sha, Yesu shi hpe n shut n shai kam ra ai lam, kam ging ai lam tsun mat wa sai. Ndai Laban hta gaw shi jaw da ai hkang da ga, tara matsun ni hpe hkan shatup ai rai yang shi hpe tsawra ai lam re.

Yesu jaw da ai hkang da ga, tara matsun ni gaw anhte a awmdawm ahkaw ahkang ni hpe gyit hkang kau na matu n rai, gumshem Du/Hkawhka ni zawn adip arip di ai n rai; shada tsawra hkat chye na lam sharin ya ai tara ni she rai nga ai. Myit masin san seng sanpra na lam, myit ding na lam, shada matsan dum mara raw ya chye na lam sharin ya ai she rai nga ai. “Myit san seng ai ni gaw Karai Kasang hpe mu lu na ma ai”, nga ai hte maren, tara matsun ni hpe hkan shatup ai a marang e, tara jaw ai wa Yesu shi hpe chye na, shi a mai kaja ai lam ni hpe chye lu na rai nga ai.

Masha langai shi kadai re ai lam grai chye la hkra rai tim, shi hte hku hkau ai lam n galaw lu yang shi hpe tsawra lu na n rai nga ai. Yesu hpe tsawra lu na matu mung, shi hte hku hkau ai lam hpe gawgap la ra ai. Shi a mungga ni hpe myit sumru yu ai hku nna, akyu hpyi ai hku nna, sakramentu ni hpe man man hkam la ai hku nna, tsepkawp kamhpa ai hku nna, hku hkau ai lam hpe gawgap la ra na rai nga ai. Rai tim, gawng kya ai shinggyim masha a matu, myi hte n mu lu ai Madu hpe tsawra lu na lam hta, shi a tara matsun ni hpe hkan shătup ai lam hta, teng sha ra rawng gawng kya ai lam nga ga ai. Dai majaw, laksan madi shadaw garum ya ai chyeju ra ga ai. Dai hpe Shălan Shăbran ai Wa, ngu ai, Chyoi Pra Wenyi a garum chyeju ra ga ai. Yesu tsun ai, matsun ai hta “Marai Masum Atai mi” re ai Karai Kasang hpe chye na lu na matu lam hpaw ya ai. Yesu shi lamu de lung wa ai hpang e sha, Chyoi Pra Wenyi hpe shăngun dat ya na rai nga ai.

Dai Shălan Shăbran ai Wa gaw anhte hpe shinggan kaw nna garum ai, ngu ai hta, grau nna anhte a myit masin wenyi kata hta rawng nga na lam, kamsham ai ni hte galoi mung a nga nga na lam tsun ai. Dai wenyi a atsam hte sha, shading sharai ai lam, shajaw ai amu ni, tinang kaw na hpang ai grup-yin hpe mung garam shatsawm ai amu ni galaw lu na rai nga ai.

Dai Wenyi a atsam hte Kasa ni, sape ni gaw myit hprang nna hkye hkrang la ai lam gaw yawng a matu re ai lam Kasa Laika hta tsun da ai. Kasa ni hkum nan myit malai myit ka-yin nna, shanhte yu kaji ai, sai kayau amyu_ Samaria masha ni hpang de sa nna shanhte a ntsa e lata ladawn ya ma ai. Shaloi, dai Samaritan masha ni mung, maren sha re ai chyeju kumhpa lu la ma ai lam sakse hkam da ai. Dai wenyi hta Hkristan ni asak majing lu la ai lam, hpang e Petru gaw shangun laika hta sakse hkam da ai.

Myit sumru yu na matu__
 Tinang a manghkang, lai shai wa ai masa hta hkan nna, tara matsun kau mi hpe madat mara hkan shatup na yak wa ai aten hta tsawra kamsham myit hte madat ya lu na kun?
 Tara matsun ni a yaw shada lam ni hpe kade chye na wa sai kun?
 Madu Yesu hpe grau chye chyang tsawra wa lu hkra, shi hte hku hkau ai lam gara hku gawgap la nga ai kun? 

2023: PASAK LADAW LABAN (6) NA CHYUM LAIKA

PASKA LADAW HTA LABAN (6)
May 14, 2023
Chyum Mungga Daw (1)

Kasa 8:5-8, 14-17

Ya hti na gaw Kasa laika hta na rai nga ai.
Hpilip gaw Samari mare de sa wa na, Hkristu a lam hkaw tsun dan wu ai. Shi tsun dan ai lam na la ai hte, shi madun ai lamik kumla mu ma yang, masha unawng uwa myit langai sha hte, Hpilip a ga madat mara nga ma ai. Kaning rai nme nga yang, nat kap ai ni law law hta na, n seng ai nat ni jahtau marawn let pru mat shajang ma ai; hkum katsing si ai ni hte lagaw hten ai ni law law mung, mai mat shajang ma ai. Dai rai nna, dai mare na masha ni nachying kabu gara nga ma ai. Samari masha ni, Karai Kasang a mungga hta la ma ai hpe, Yerusalem e nga ai kasa ni na ma yang, shanhte gaw Petru yan Yawhan hpe shangun dat mu ai: shan mung du jang, dai masha ni Chyoi pra ai Wenyi lu la na matu akyu hpyi ya ma ai; hpa majaw nga yang, dai Chyoi pra ai Wenyi gaw, shanhte hta na kadai a ntsa e mung garai n yu wa ai; Madu Yesu a amying hte kashin kamun hkam ai sha, naw rai nga ma ai. Dai rai nna, kasa Petru yan Yawhan shanhte a ntsa e lata mara ya jang, dai Chyoi pra ai Wenyi hpe hkam la ma ai.
Karai Kasang a Mungga rai nga ai.

Chyum Mungga Daw (2)

1 Petru 3:15-18

Ya hti na gaw Kasa Petru shagun dat ai laika langai hta na rai nga ai.
Hpu nau ni e, Nanhte a myit masin hta e Madu Hkristu hpe hkrit hkungga nga mu: dai Hkristu hpa majaw myit mada nga myit ta? nga nna masha langai ngai nanhte hpe san yu jang, lachyum tsun dan na matu tut nawng e jin jin rai nga mu; rai ti mung, sumnung ai hte hkungga ai myit hte ga htan ya mu. Nanhte myit asan sha rai nga ai hte amu mahkra hpe galaw nga mu; shaloi nanhte hkan ai Hkristu a nga sat nga sa ai lam a majaw, aroi arip hkrum yang, nanhte hpe shatan nhkan ai ni, n teng n man ai hku mara shagun ma ai hpe, masha yawng chye lu na mara ai. Dai rai nna, Karai Kasang dai hku hkraw nga yang, n kaja ai amu galaw ai majaw nni nkri hkrum ai gaw, grau nna kaja nga ai, kaning rai nme law, Hkristu gaw shut hpyit mara a majaw, kalang mi sha si hkam nu ai: Karai Kasang hpang de anhte hpe woi wa lu hkra, ding hpring ai wa Hkristu gaw, n ding n hpring ai ni a matu nni nkri hkam la nu ai: Shi gaw hkum tsawp hta sat kau hkrum ti mung, nsa wenyi hta jahkrung sharawt la ai hkrum nu ai.
Karai Kasang a Mungga rai nga ai.

KABU GARA SHIGA

Yawhan 14:15-21

Ya hti na gaw Kasa Yawhan a laika hta na Kabu Gara Shiga rai nga ai.
Yesu Shi a sape ni hpe tsun mu ai gaw: Nanhte ngai hpe tsaw ra ai rai yang gaw, nye a ga matsun hkan shatup na myit dai. Ngai mung ngai Wa kaw hpyi nna, Shi gaw, nanhte hte prat tup rau nga na matu, teng man ai hte seng ai Wenyi ngu ai, shalan shabran ai Wa kaga, nanhte hpang de shangun dat ya na ra ai. Mungkan ga gaw dai Chyoi pra ai Wenyi hpe nmu nchye ai majaw, nhkap la lu ma ai. Nanhte chyawm gaw dai Wenyi hpe chye nga myit dai; kaning rai nme law, shi gaw nanhte hte rau nga nga ai rai nna, nanhte hta mung rawng nga na ra ai. Nanhte hpe jahkrai zawn ngai kau da na n rai: nanhte hpang de ngai bai sa na ring ngai. Loi hkring mi rai jang, mungkan ga ngai hpe n mu dat na nu ai; nanhte chyawm gaw naw mu lu na ma rin dai: kaning rai nme law, ngai ahkrung nga nngai majaw, nanhte mung a hkrung nga na marin dai. Ngai gaw nye Wa hta nga nga ai mung, nanhte ngai hta nga nga myit dai mung, ngai nanhte hta nga nga nngai mung, dai shani e nanhte chye lu na marin dai. Nye a ga matsun lu la nna, hkan shatup ai wa gaw, ngai hpe tsaw ra ai wa rai nga ai: ngai hpe tsaw ra ai wa hpe nye Wa mung tsaw ra na wu ai: ngai mung dai wa hpe tsaw ra ai hte, ngai hkum nan shi hpe shadan dan na we ai.
Madu a Kabu Gara Shiga rai nga ai.

2023: PASAK LADAW LABAN (5) NA MUNGGA

“Ngai gaw lam rai li ai; tengman ai hte asak mung rai li ai” nga, Madu tsun ai. Hkrun lam kaw n hkawm ai masha gaw bandung de n du lu ai. Hkawm ai ladat jaw jang sha, hkrun lam ding-yang hkan galaw ai lam ni jaw jang sha, shimlum ai hku hkawm lu na rai nga ai. Anhte tsun ai, myit ai, galaw ai hpa mi rai rai, asak hpe bau ai hte makawp maga na matu galaw ai hkrai rai nga ai. Myit shut sawn shut ai majaw tsun shut, galaw shut ai majaw, nga-mu nga-mai lam hpe ahpye alam di kau lu ai. Dai majaw, Lam, Tengman ai, Asak_ masum hte hpe madu ai wa hta asak dun jung noi nga ra ga ai.

Lai mat wa sai laban hta “Ma Sa La” Myanma Socialist Lansin hkrun lam/policy matsun hkan nna mungdan hpe shaning (30) ning hkawt, uphkang lai wa ai. Jahtum e mungdan sut masa hkrat sum mat ai gaw mungkan e matsan dik htum ai mungdan langai jahpan shang mat ai. Mundan masha ni matsan mayan ai dik hkra rai mat wa ai. Shinggyim masha langai hpra a awmdawm ahkaw ahkang sum mat wa ai degree htum hkra_ lamu ga ni hpe adip arip hkan găshun ai, shabrai n jaw ai sha shawa bungli shăngun sha ai, porta hkan rim ai majaw hprawng kyin ai mung lak lak. Socialist/communist uphkang masa hpang woi ai Russia mung, dai ni du hkra Ma Sa La prat na masa hte n shai ai; dai ni du hkra matsan jamjau nna nga nga ma ai. Mungdan masha ni yawng lu su nga-mai shimlum lu na, ngu ai bandung de n du lu ai. Bandung du na matu galaw ai ladat ni hta adip arip re ai kumla ni, jahkrit shama ai ladat, masu magaw ai ladat, mayun kumhpa jaw hkat ra ai ladat,…shing re n jaw a ang ai, n tengman ai ladat law law hpe mu lu ai.

“Policy” ngu ai bandung de matsun ya ai hkrun lam jaw nan n jaw ai majaw, hkan nang ai ni yawng hten bya ai kaw, kawsi matsan mayan re ai kaw kre mat ma ai. Policy lata jaw ai mungdan ni sut lu nga-mai jawng ma ai. Dai gaw hkrun lam kade ahkyak ai ngu ai hpe madun ai. Bandung de du lu ai mahkrun jaw tim măsu măgaw ai, mayun kumhpa sha shajang ai, adip arip jahkrit shama hkat ai, jahpan măsu ai, n jaw ai mu tim mara madi madun n mai ai, dai zawn uphkang renghkan ai mungdan ni yawng matsan ai mungdan tai mat ma ai. Policy mung jaw, gawgap da ai hkrang jaw nna san seng ai, myit magaw n mai ai masa hku uphkang ai mungdan ni sut lu nga-mai ai hte shimlum ai hku nga lu ma ai.

Gara kaning re ai uphkang masa hta rai tim, kuptsup ai lam gaw n nga ai. Dinghta mungdan shăgu hta masu magaw ai, shăkrip hkat ai, awmdawm ahkaw ahkang hpe hkrup mi ra shăngun lang ai majaw, manghkang hkum hkra byin nga ai; myit masin wenyi htenza shajang ai gara mungkan mungdan mung n lawt lu ai. Shimlum awng dang ai mungdan law law hta mung matsan masha law htam ai ding-yang sha rai nga ai. Mungkan sutgan lu su nga-mai ninglen matsan dum n chye, akyang lailen htenza ai lam law law; hpaji kunghpan ninglen masu shingjawng hkat ai lam law law; myit masin wenyi rawt jat galu kaba ai lam n nga jang rawt jat galu kaba ai lam majing n rai na re. Mungkan sut su ninglen Lazaru hpe matsan dum n chye ai masha gaw teng sha masha ăngawk she rai nga ai. Nai mam law law htun da lu ai masha e tsun ai, “Nye wenyi e, lu lu sha sha rai, pyaw pyaw nga nit” ngu ai wa hpe Karai Kasang ning nga ai, “Dai na jang na wenyi hpe dawm la kau na; na a sutgan kadai a matu rai mat na ta?” nga ai.

Mungkan ga na hpaji machye machyang, sut su nga mai ai lam, shimlum dum ai lam ni, hpa mung grin lu ai n rai nga ai. Masha tai wa ai lam a jahtum na bandung gaw n htum n wai asak a chyeju kumhpa ni she rai nga ai. Karai a hpung shingkang arawng sadang a matu she rai nga ai. Dai Hkristu chyu sha, tengman ai hkrun lam rai nga ai. Prat hta dawdan ai lam galoi mung galaw nga ra ai hta dai Hkristu a tara hte shadawn yu nna sha jeyang dawdan mai ga ai. Shi gaw tengman ai lam rai nga ai. Grin ai jet ai kabu gara simsa ai chyeju ni hpe jaw ya lu ai mung dai Madu sha rai nga ai.

Kasa Laika hta Karai a mungga, asak jaw ai mungga re ai majaw Kasa ni gaw aten tup mungga htawn ai amu hta ap nawng da ra ai lam tsun ai. Dai mungga law law hkaw tsun htawn tsun lu ai majaw, kamsham ai masha law law jat wa ai lam tsun da ai. Petru a Shagun da tai Laika hta mung, dai mungga hpe kamsham hkap la ai ni gaw lata la hkrum ai amyu, jawjau ai amyu tai wa lu ai lam sakse hkam dan ai.

Myit sumru mai ai lam__
 Hkrun lam hkawm shagu akyu hpyi shaman ga ai kun?
 Ahkyak ai dawdan ra ai amu ni hta tengman ai lam re ai Madu kaw shawng hpaji hpyi chye ga ai kun?
 Anhte galaw ai amu yawng, asak a chyeju kumhpa hkam la na lam re ai; dai asak Madu hpe nan chyeju dum shakawn chye ga ai kun?

2023: PASAK LADAW LABAN (5) NA CHYUM LAIKA

PASKA LADAW HTA LABAN (5)
May 7, 2023
Chyum Mungga Daw (1)

Kasa 6:1-7

Ya hti na gaw Kasa laika hta na rai nga ai.
Ya, sape ni law htam wa ai nhtoi hta e, Greak ga shaga ai ni gaw, Hebre ga shaga ai ni hte myit n hkrum ai lam pru sai; gaida jan ni hpe shani shagu galaw lu galaw sha ai amu hta, shanhte a gaida ni hpe, jaw ang ai made n karan jaw ma ai, nga nna Greak ga shaga ai ni Hebre ni hpe aput angun nga ma ai. Shaloi Kasa shi lahkawng gaw sape hpung ting hpe shaga la nna, Anhte gaw Karai Kasang a mungga hpe kau da rap rai nna, shahpa daw jaw ai amu hta shakut yang n htuk nga ai. Dai majaw, hpu nau ni e, nanhte hta na, akyang lailen kaja rawng nna, Chyoi pra ai Wenyi hte hpring ai, myit su ai masha marai sanit hpe lata la mu; dai ni hpe ndai amu madu shangun na matu, anhte san da na ga ai; anhte chyawm gaw akyu hpyi ai amu hte, mungga hkaw dan ai amu hpe, htep lahti hkan shatup na ga ai, ngu nna tsun mu ai.Ga dai hpe salang hpawng ting na ra ai majaw, makam masham kup tsup ai hte, Chyoi pra ai Wenyi hpring ai Stephen ngu ai wa hte, Hpilip, Prokoru, Nekanora, Timun, Parmena hte Anti-ok mare na, shawng e Yuda tara htung de kayin shang wa sai Nikora hte hpe lata la nna, Kasa ni a man e tsap shangun da mu ai. Kasa ni akyu hpyi ngut jang, shanhte hpe lata mara jaw da mu ai. Karai Kasang a mungga mung, lani hte lani grau nna maden jat wa nna, Yerusalem mare hta sape ni law htam wa ai hte, hkinjawng ni law law wa dai makam masham lam hpe madat mara nga ma ai.
Karai Kasang a Mungga rai nga ai.

Chyum Mungga Daw (2)

1 Petru 2:4-9

Ya hti na gaw Kasa Petru shagun dat ai  laika langai hta na rai nga ai.
Hpu nau ni e, Madu hpang de sit sa marit; Shi gaw ahkrung nga ai nlung rai nga ai: masha ni dai hpe kau da ti mung, Karai Kasang a man e lata la ai hte hpu ging la ai nlung rai nga ai. Nanhte mung, ahkrung nga ai nlung ni tai wa nna, wenyi hte seng ai nawku htingnu hpe nanhte gaw shachyaw da lu na matu, Madu hpang de sit sa marit. Shing rai Yesu Hkristu a marang e, Karai Kasang sharawng awng ai, nsa wenyi hte seng ai hkungga hpe, Wa Karai kaw nanhte ap ya lu na matu, chyoi pra ai, jaw jau ai amyu tai wa na marin dai. Kaning rai nme law, Ngai lata la ai hte hpu ging la ai, ningjut jahtum na nlung hpe, Ziun hta e ngai gaw da se ai rai nna, dai hpe kam sham ai wa gaw dakan dakring tsap lu na ra ai, nga nna Chyum Laika hta rawng nga ai.
Nanhte kam sham ai ni a matu dai nlung gaw hpu ging la ai baw rai nga malit dai. Rai ti mung, n kam n sham ai ni a matu mara, Wahpang gaw ai ni lata kau ai nlung gaw, ningjut jahtum na nlung tai sai rai nna, ahtu kataw shara hte, myit kataw shangun ai lunghkrung mung tai wa sai. Karai Kasang a mungga hpe n kam n sham nga ma ai majaw, shanhte kataw hkrat wa ma ai; shing rai shanhte hkrum na matu, moi chyaloi nhkoi kaw nna lajang da ngut sai. Nanhte chyawm gaw, lata la ai amyu, hkungga nawng ai hkawhkam amyu ni, chyoi pra ai amyu baw hte, nsin kata de nna shi a mauhpa nhtoi de nanhte hpe shaga la ai wa a magam amu ni hpe shana shabra dat ya na matu, Karai Kasang e san da hkrum ai ni rai nga myit dai.
Karai Kasang a Mungga rai nga ai.

KABU GARA SHIGA

Yawhan 14:1-12

Ya hti na gaw Kasa Yawhan a laika hta na Kabu Gara Shiga rai nga ai.
Yesu shi a sape ni hpe tsun mu ai gaw: Nanhte myit hkum ru mu; Karai Kasang hpe kam sham mu, ngai hpe mung kam nga mu. Nye Wa a nta e nga shara law law nga ai; dai n nga yang, ngai nanhte hpe tsun dan ang sai; kaning rai nme law, nanhte a matu nga shara lajang na she, ngai wa na nngai. Shing rai ngai wa nna, nanhte a matu nga shara lajang da nhtawm, ngai nga nga ai shara e nanhte mung nga lu hkra, ngai bai sa nna, nanhte hpe ngai hpang de woi la na made ai. Ngai sa wa ai shara de du ai lam nanhte chye nga myit dai. Shaloi Htawma gaw, Madu e, Nang gade sa wa na pyi anhte n chye ga ai mi, lam kaning rai chye na ga ta? ngu nna Yesu hpe tsun wu ai. Yesu gaw, Lam gaw ngai rai nga nngai, teng man ai hte asak mung ngai rai nga nngai: ngai hta nna n rai yang gaw, kadai mung Nye Wa kaw n du wa lu ai. Nanhte ngai hpe chye sai rai yang gaw, Nye Wa hpe mung chye na manit dai. Ya kaw nna shi hpe chye nga myit dai, mu mung mu yu manit dai, ngu nna Htawma hpe htan ya ai.
Hpilip mung, Madu e, Wa hpe anhte hpe madun mu, shaloi anhte myit dik na ga ai, ngu wu ai. Yesu gaw, Hpilip e, ngai nanhte hte nde nlaw na hkra nga nga ti mung nang ngai hpe n chye n ni? Ngai hpe mu yu sai wa gaw Wa hpe mu yu nu ai: dai re ai mi, Wa hpe anhte hpe madun mi, nga nna hpa rai tsun n ta? Ngai gaw Wa hta nga nga nngai mung, Wa gaw ngai hta nga nga ai mung, nang n kam n ni? Ngai nanhte hpe tsun ai ga gaw, nye a myit hte ngai tsun ai n rai; ngai hta rawng nga ai nye Wa gaw Shi a amu hpe galaw nga ai. Ngai gaw Wa hta nga nngai mung, Wa gaw ngai hta nga nga ai mung, kam sham ra ai: dai n rai yang gaw, galaw dan ai amu ni dai hpe tau yu nna, kam sham nga u. Nanhte hpe ngai kaja wa teng teng tsun made ai gaw, ngai hpe kam sham ai wa gaw, ngai galaw ai amu lu galaw na ra ai; dai hta grau kaba ai amu lu galaw na ra ai; kaning rai nme law, ngai gaw Wa hpang de wa na nngai.
Madu a Kabu Gara Shiga rai nga ai.

2023: PASAK LADAW LABAN (4) NA MUNGGA

Hkrung raw ai Hkristu gaw “Madu hte Messiah” re ai lam, dai Hkye La Madu gaw kamsham ai ni a matu htani htana asak a chyeju kumhpa ni hpe hkam la lu ai chyinghka re ai lam; anhte a nga-mu nga-mai lam hpe makawp maga gawn reng ai wa re ai lam ni hpe sharin ya ai. Shakawn Kungdawn 23 hta tsun ai mung, “Madu gaw ngai hpe remsin ai Sagu Rem Wa rai nga ai; ngai hta ra kadawn ai hpa n nga ai” nga ai.

Ndai dinghta prat hta anhte manghkang amyu hpan law law hkrum katut ga ai. Machyi makaw, kawsi hpang găra, lu mayu pyaw mayu, yawn hkyen hkrum yu rai, ra kadawn ai lam, dumhprut ai lam law law rai ga ai. Machyi hkrum jang tsi sara hpang de; jawngma langai laika n chye jang hpaji jaw lu ai jawng sara hpang de; tara upde hte seng ai manghkang pru jang tara sara hpang de; myit hte seng ai machyi makaw rai jang myit hte seng ai tsi sara hpang de; shing rai sa bawngban nna matsun jaw dat ai hte maren hkam la shading sharai la ma ai. Sara tai ai ni mung ga-san shagu manghkang shagu hpe hkan sharai ya lu ai n rai; hpăran ya lu na mung n rai. Dinghta ga na machye machyang hte galaw lu ai atsam gaw dawchyen hkrai, n kup n tsup ai hkrai re ai hpe dum chye ga ai. Ra n rawng ai, hpa mung galaw lu ai, chye grau dik ai Sagu Rem Kaja hpe kade lang hpaji hpyi yu ga ta? Kuptsup ai kamsham myit hte hpaji hpyi yu ga ai kun?  

Yesu chyu sha, mai kaja ai lam yawng, awng dang ai lam yawng a Madu rai nga ai. Messiah, ngu ai hte maren, kaning re ai manghkang kaw na mung hkye la lu ai Wa rai nga ai. N htum n wai ai asak a chyeju kumhpa ni hpe hkam la lu na chyinghka lam gaw Yesu shi hkrai sha rai nga ai. Jaw dik kaja dik ai mahtai hte matsun jaw ya lu ai mung Yesu shi chyu sha rai nga ai. Jahtum chyalai kamhpa lu ai kadai n nga sai, ngu jang sha Madu Yesu hpang sit sa na rai kun? N htum n wai ai asak a chyeju kumhpa ni, ngu ai shaloi dinghta ga asak si mat ai hpang na prat hpe sha myit mada ai rai baw rai kun?

N htum n wai ai asak ngu ai hpang na prat a lam sha n re ai, ya ndai dinghta prat e nan hpang taw nga sai hpe myit dum ra ga ai. Dai majaw, n htum n wai ai asak a chyeju kumhpa ni hpe ndai dinghta prat hta nan hkam la ra ga ai. Dinghta prat hta anhte kamhpa ging ai, kamhpa mai ai masha ni law law nga ma ai rai tim, kuptsup ai kadai mung n nga ai hpe she chye ga yang, mai kaja ai lam, nga-mu nga-mai ai lam a ningpawt ninghpang hte madu re ai Sagu Rem Wa hpe galoi mung kamhpa na n rai a hka? Grau nna myit masin wenyi hte seng ai akyu chyeju ni, masha e n jaw ya lu ai; dai Madu kaw na lam matsun hpyi la ra ga ai. Ndai prat kaw na hpang ai hpang na prat de matut mat wa na asak kadai mi jaw lu na rai a hka!

Hkristu gaw ndai dinghta ga na prat hta nan, anhte a myit masin wenyi hta ra kadawn ai chyeju kumhpa ni hpe jaw ya ai hte, hten bya lam dam ai kaw na makawp maga ya ai wa rai nga ai. Shi e sharin ya ai tara matsun ni yawng hpe hkan shatup ai a marang e, dinghta ga na hkrit hpa ni yawng hpe koi yen lu na hte kabu gara simsa ai chyeju ni hpe hkam la lu na rai nga ai.

Shadum jahprang laika hta Kasa Petru tsun ai, Hkristu hkum nan n tara ai hku jeyang hkrum ai, n tara ai ni a lata hta si hkam ai, nga ai. Ndai dinghta prat hta n jaw n ang ai hku roi rip hkrum ga yang, hpa majaw jamjau hkrum ai a mahtai n lu ga yang, hkamjan sharang kau na hta lai nna hpa n nga ai aten ni mung hkrum katut ga ai hpe dum mai ga ai. Rai tim, kaman lila, majoi hkam kau ai n rai, hkam la na akyu ara kaba ai lam hpe shadum ya ai.

Myit sumru mai ai lam__
 Tinang dum tim n dum tim, Sagu Rem Wa Yesu gaw tinang hpe galoi mung makawp maga bausin  nga ai lam sumru yu ga ai kun?
 Sagu Rem Wa Yesu a tara matsun ni hpe madat mara hkan shatup na shakut ga ai kun?
 Ru tsang hkrum ai aten ni hta, manghkang ni hkrum katut ai aten hta Yesu hpe kamhpa ai myit tup hkra hte tsun dan garum hpyi ga ai kun?

2023: PASAK LADAW LABAN (4) NA CHYUM LAIKA

PASKA LADAW HTA LABAN (4)
April 30, 2023
Chyum Mungga Daw (1)

Kasa 2:14, 36-41

Ya hti na gaw Kasa laika hta na rai nga ai.
Chyoi pra ai Wenyi kasa ni a ntsa de yu hkrat wa ai Pentekawste shani e, Petru gaw sape shi langai hte rau pru wa nna, nsen shaja let, masha unawng kaba hpe tsun mu ai gaw: Nanhte Wudang hta jen da sat kau ai dai Yesu hpe, Karai Kasang gaw Madu hte Hkristu shatai ni ai gaw, Israela amyu ting, gaja wa chye nga mu ga, ngu nna tsun mu ai. Dai ga na jang, shanhte gaw, Hpu nau ni e, anhte kaning rai na rai ta? nga nna Petru hte kaga kasa ni hpe tsun ma ai. Petru gaw, myit malai lu nna, nanhte a shut hpyit mara raw dat kau ya u ga, nanhte hkum shagu Yesu Hkristu a amying ningsang hte kashin kamun hkam la mu; shaloi, Chyoi pra ai Wenyi ngu ai kumhpa hpe, nanhte hkam la na marin dai; kaning rai nme nga yang, ga ndat dai gaw, nanhte hte nanhte a nshu nsha ni hpe mung, ya sumtsan e naw nga ti mung, Shi nan jaw da sai ga ndat lam rai nga ai, ngu nna shanhte hpe tsun mu ai. Shi a sakse ga shanhte kam sham lu na matu, ga kaga law law hta lam madun dan nna, ndai myit magaw ai amyu hta na lawt pru wa mu law, ngu nna shanhte hpe shadum jahprang mu ai. Petru hkaw shana ya ai sakse ga hpe hkap yin la ai ni gaw Kashin Kamun hkam la nna, dai shani e masha hkying masum dang hpung shang jat wa ma ai.
Karai Kasang a Mungga rai nga ai.

Chyum Mungga Daw (2)

1 Petru 2:20-25

Ya hti na gaw Kasa Petru shagun dat ai laika langai hta na rai nga ai.
Hpu nau ni e, Nanhte hte seng ang ai amu hpe hkrak ding man ai hte galaw ninglen, ari dan hkrum sha nna, machyi sharang yang gaw, dai gaw Karai Kasang a man e akyu nga ai. Dai zawn re ai shakut sharang ai lam hkan na matu, nanhte hpe shaga da sai rai nga ai Hkristu mung, nanhte a matu nni nkri hkam sharang nna, shi a hkang hta nanhte hkan nang lu myit ga, kasi ningli tawn da nu ai. Hkristu gaw hpa mara n galaw yu ai; shi a n-gup hta na masu hkalem ai ga nna yu ai. Shi aroi arip hkrum yang, bai roi htang ai n rai; nni nkri hkrum yang, ahkrim nga ai n re ai sha, ding man ai hku daw dan ai wa lata hta Shi a hkum hpe ap da nu ai. Anhte gaw shut hpyit mara hte si hka mat wa nna, Karai Kasang myit ra ai lam hkan sa lu u ga, Shi gaw Shi a hkum hta nna, udang a hpun ntsa e, anhte a shut hpyit mara hpe gun kau nu ai: Shi a nma a marang e anhte shamai shatsai ai hkrum sa ga ai; kaning rai nme law, nanhte yawng sagu zawn dam mat ti mung, ya gaw, nanhte a nsa wenyi hpe yu lahku ya ai Sagu Rem Wa hpang de nhtang wa ma nit dai.
Karai Kasang a Mungga rai nga ai.

KABU GARA SHIGA

Yawhan 10:1-10

Ya hti na gaw Kasa Yawhan a laika hta na Kabu Gara Shiga rai nga ai.
Yesu gaw Yuda masha ni hpe tsun mu ai gaw: Sagu lawng de chyinghka lam hku n shang ai sha, kaga hku nna lung shang ai wa gaw, lagut hte damya rai nga ai. Chyinghka lam hku shang ai wa chyawm gaw, sagu ni hpe rem ai wa rai nga ai. Chyinghka sin ai wa mung, dai wa a matu chyinghka hpaw ya wu ai; sagu ni mung shi a nsen madat ma ai rai nna, shi gaw tinang a sagu ni hpe amying hte shaga nna, shinggan de woi la sa nga ai. Shi a sagu nlang hte woi shapraw nhtawm, sagu ni a shawng e sa wa nna, sagu ni mung Shi a nsen chye chyap ma ai majaw, Shi kaw hkan nang ma ai. Tsasam wa a nsen hpe gaw, sagu ni n chye n chyap ma ai majaw, tsasam wa kaw n hkan hkraw ai sha, hprawng mat wa ma ai, ngu nna Yesu shanhte hpe tsun mu ai.
Yesu gaw dai ga shadawn shanhte hpe tsun mu ai, raitimung, Shi tsun mayu ai lam a lachyum shanhte n chye madat ma ai. Dai re ai majaw, Yesu shanhte hpe bai tsun mu ai gaw: Ngai nanhte hpe gaja wa teng teng tsun dan made ai gaw, Ngai gaw sagu ni shang ai chinghka hku rai nga nngai; Nye a shawng e pru ai ni yawng hte gaw lagut hte damya rai nga ma ai: sagu ni mung shanhte a ga n madat ya ma ai. Ngai gaw chyinghka lam hku rai nga nngai: ngai hta shang ai wa gaw, hkye hkrang la ai hkrum na wu ai rai nna, shang wa pru wa lu ai hte, udat shara mu na ra ai.10Lagut wa gaw, lagu na, sat na, hpya sha na, nga nna she sa du ai. Ngai chyawm gaw sagu ni a asak hkrung lu na hte, nhpaw n-ya asak lu la mu ga, ngu nna sa ring ngai.
Madu a Kabu Gara Shiga rai nga ai.

2023: PASAK LADAW LABAN (3) NA MUNGGA

Ga-sadi/ga-shaka jaw ai, hkam la ai shaloi, n-gup ăga hku tsun shăpraw ai hte sha n ram dum ga ai. Ga-sadi/ga-shaka kang na matu, n-gup ăga hte hpawn kumla mung lawm jang sha kuptsup ai hku hkam la chye ga ai. Dawnghkawn a nhpang e myu tsaw ga-sadi jaw let baw gum hkung ga jaw ai, Chyum Laika ntsa lata mara nna ga-sadi hkam ai, hkungran ai aten marai lahkawng lata matut da let ga-sadi jaw hkat ai. Anhte a makam masham grung jap rut tsawm lu na matu, Karai a mungga hte mung, Chyoi Pra Hkum Sakramentu hku nna mung, hkungga shan sha ai hta kuptsup ai kaw du ai. Makam masham prat hkrun lam hta Karai a mungga hte mung, Chyoi Pra Hkum Sakramentu hte mung, jahkru shakat la na ahkyak ai lam sharin ya ai.

Yesu gaw shi hkum nan hkrun lam re ai, nga, Yawhan 14:6 hta tsun da ai; Kawa hpang de du wa lu ai hkrun lam gaw Yesu hkum nan re; shi hte rau n hkan hkawm ai kadai mung, Kawa kaw n du lu ai lam tsun da ai. Sape lahkawng hpe Yesu tsun ai, “Hkristu gaw nni nkri shoi-hpa hkam la ngut ai htawm she hpung shingkang dăgraw hkam la lu na n rai a hka?” nga ai. Sape ni mung tinang nang a wudang hpai let hkawm ai hkrun lam rai lu na rai nga ai.  

Shawng na Laban hta Yesu tsun ai, “Myi hte n mu lu ai rai tim kamsham ai ni gaw ah lu ma ai”, nga ai. Emaus de lam hkawm htang wa ai sape yan a hkrun lam na mabyin ni hta Yesu gaw ădan sha madun dan ai. Prat shagu na masha ni kamsham lu na lam sakse shatai ya ai. 

Yesu a sape ni Yesu hkrung nga ai aten ni hta mau-hpa kumla ni law law hpe mu la ma nu ai; kam ging ai sharin shaga ai lam ni, sadi jaw ai ga ni law law lang na la ma nu ai. Rai tim, Yesu shi sat kau hkrum jang ni htep dik ai sape ni kaw na hkawt, kamsham myit mada ai lam hten wa ma ai. Emaus de bai htang wa ai sape yan mung myit daw mat ai majaw, Yesu hte seng nna myit mada na lam hpa n nga sai myit lu ai majaw shan a mare buga de bai htang wa ma ai n rai a hka! Anhte a prat hkrun lam hta rai tim wudang hte bung ai myit ru myit tsang hpa amyu myu, machyi hkrat sum ai lam ni, n tara ai hku/ n jaw n ang ai hku galaw ai ni a marang e matsan jamjau amyu myu hkrum ga ai. Dinghta ga ăprat shătawng na n loi la ai. Mungkan ga gaw sape ni hpe n ju n dawng na lam, rai tim Yesu gaw sape ni hpe jahkrai ma ni hpe zawn n kau da na lam mung tau nau tsun da ai. Jahkrai hte bung ai sape yan hte rau hkawm lawm ai.

Emaus de htang wa ai sape yan a hkrun lam hta Yesu shi a hkum hpe nan madun dan ai. Shi a lam tsun da ai chyum laika ni hte myihtoi ga ni hpe lachyum htai dan ai. Shaloi sape yan a sinlum (lum lum re ai sin/salum) hta kadau kadap rai, wan hkru ai zawn hkam sha ma ai. Shălan shăbran ai chyeju hkam la lu ma ai; myit mada lu ai chyeju hkam la lu ma ai. Dai rai tim shan hta kuptsup ai hku Madu a lam chye la ma ai n rai: muk ahkyep alep di nna shan hpe gam jaw ai aten hta sha, Shi Madu re ai lam hpe chye la lu ma ai. Dai majaw, wenyi asak hkrung mahkrun, dinghta ga e bu hkawm ai aprat hta Karai Kasang a mungga hpe mung, Chyoi Pra Hkum Sakramentu hpe mung hkam la jang sha kuptsup ai chyeju kumhpa ni hpe hkam la lu ga ai. Prat a hkrun lam hta matut hkawm sa lu na rai nga ai. 

Prat hkrun lam/hkrun lam galu hta tinang hkrai n hkaw lu ai. Masha law law hte hkawm ai, shada madi shadaw hkat ai chyeju hpe lu la ai. Myi hte n mu lu ga tim, Yesu gaw kamsham ai ni hte arau hkawm lawm ai. Dai gaw, Chyum mungga hti ai hta, Chyum mungga hpe lakap nna sumru akyu hpyi ai hta, Shi Madu hte rau re ai lam sakse rai nga ai. Wenyi a lu-sha majing re ai Chyoi Pra Hkum hpe mung hkam la, rai nna sha dinghta ga na ruyak ai lam ni, myit daw hpa ni hpe awng dang tawt lai lu na rai nga ai. 

Kasa Petru a shagun dat ai laika hta, kamsham ai masha ni gaw ndai dinghta asak aprat hta dinghpring ai hku nga sa ra ai lam; hkye hkrang la ai lam hpe ja gumhpraw hte n rai, Yesu a sai hte mari da ai lam tsun ai. Anhte a kamsham myit, myit mada ai lam, Karai Kasang hta gindai dun noi nna asak hkrung ra ai lam hpe shadum ya ai.

Myit sumru mai ai lam__

 Makam masham hkrun lam hta ruyak jamjau hkrum ai, ung ang ai, myit daw ai aten ni hta Yesu hpe nang/ngai ngu brang lang tsun jahta yu ai kun?

 Chyum Laika hti dan ai aten hta, Chyum mungga htawn dan ai aten hta myit kap let madat la ai kun? Kraw kata hta gara hku hkam sha chye ai kun?

 Chyoi Pra Hkum hpe man man hkam la shakut ai kun?

2023: PASAK LADAW LABAN (3) NA CHYUM LAIKA

PASKA LADAW HTA LABAN (3)
April 23, 2023
Chyum Mungga Daw (1)

Kasa 2:14, 22-33

Ya hti na gaw Kasa laika hta na rai nga ai.
Chyoi pra ai Wenyi kasa ni a ntsa e yu hkrat wa ai Pentekawste shani e, Petru gaw sape shi langai hte rau rawt nna, nsen shaja let, sa du hpawng ai masha unawng hpe tsun wu ai gaw: Israela masha ni e, ga ndai madat la mu: Nanhte chye nga myit dai hte maren, Karai Kasang gaw Nazaret na Yesu hpe lata san da nna, nanhte hpang de shangun dat ai wa rai nga ai hpe sakse hkam ya na matu, dai Yesu a lata hte shi magam ningsam, mauhpa amu hte lamik kumla ni, nanhte a man e galaw dan wu ai. Karai Kasang shi ra sharawng ai hku yaw shada ai hte maren, Yesu hpe ap kau ai shaloi, nanhte gaw tara maigan ni a lata hte, shi hpe wudang hta jen sat kau myit dai, si hkrung si htan a nni nkri hpe Karai Kasang raw kau ya nna, shi hpe jahkrung sharawt nu ai. Hpa majaw nga yang, si hkrung si htan gaw shi hpe hkang shadang lu ai n rai.
Kaning rai nme law, dai Yesu hpe sha-ang nna Dawi tsun ai gaw: Madu hpe nye a myiman chyaw ngai tutnawng e mu lu nga nngai; Shi nye a hkra maga e nga nga ai majaw, ngai dakan dakring tsap lu na nngai. Dai re ai majaw, nye a myit masin kabu nga ai hte, nye a shinglet awng nga ni ai. Kaning rai nme law, nye a Wenyi hpe katsan ga de kau da ya na n rai; Na a chyoi pra ai Wa hten byak hkrum na, nang n hkraw nga ndai. Asak hkrung ai lam, nang ngai hpe madun nit dai; Na a man e nang ngai hpe kabu gara ai hte jahpring ya na rin dai, nga nna ka da nga ai. Hpu nau ni e anhte Wa daju Dawi gaw, nsa hkyet mat ai mung, lup kau ai hkrum ai mung, shi a lup gaw dai ni du hkra anhte hte rau nga nga ai gaw, ngai nanhte hpe tsun wam nga nngai.
Dai wa gaw myihtoi rai nga ai rai nna, shi a amyu matu hta na langai wa mi, shi a tingnyang hta dung nga lu na, nga nna, shi hpe Karai Kasang dagam shaka da ai hpe chye wu ai majaw, Hkristu a bai hkrung rawt wa na lam shi chye tau tawn ai rai nna, shi hpe katsan ga e n kau da na hte, shi a hkum shan hten byak n hkrum na lam, tsun da wu ai. Dai Yesu hpe Karai Kasang jahkrung sharawt la wu ai; anhte yawng mung, dai lam a sakse ni rai nga ga ai. Shing rai, Karai Kasang a hkra lata hte shagrau tawn nu ai rai nna, Chyoi pra ai Wenyi a lam, Kawa kaw na ga ndat lu la wu ai majaw, ya nanhte mu lu, na lu ai lam, shi ru jaw dat ru ai.
Karai Kasang a Mungga rai nga ai.

Chyum Mungga Daw (2)

1 Petru  1:17-21

Ya hti na gaw Kasa Petru shagun dat ai  laika langai hta na rai nga ai.
Hpu nau ni e, Nanhte akyu hpyi ai shaloi, myiman n lata ai sha, langai hte langai a amu hte maren daw dan ai Kawa hpe nanhte hpyi shaga nga myit dai. Dai rai nna, ndai dinghta ga ntsa e nanhte manam tai hkawm ai laman e, hkrit hkungga ai hte Shi a ga hkan shatup nga mu. Ji wa ni kaw nna hkan dagraw ai, akyu n pru nna, kaman lila re ai nga sat nga sa ai lam hta na, hten mat chye ai ja gumhpraw hte nanhte hpe hkye mawai la sai n rai; Hkristu ngu ai, ana ahkya n kap ai, ra n rawng ai sagu kasha a hpu ging la ai asai hte sha, nanhte hkye mawai la ai hkrum sai hpe myit dum nga mu. Dai Hkristu gaw, ginding aga garai n hpan da ai kaw nna, Karai Kasang e san da ai hkrum nna, ndai hpang jahtum ai aten e, nanhte a matu mara dan hkung pru wa sai. Si ai ni kaw na shi hpe jahkrung sharawt la ai hte, shi hpe hpung shingkang jaw ai Karai Kasang hpe, shi a marang e nanhte kam sham ai ni tai wa ma nit dai: shing rai, nanhte a makam masham hte myit mada shara gaw, Karai Kasang hta jung nga ai.
Karai Kasang a Mungga rai nga ai.

KABU GARA SHIGA

Luka 24:13-35

Ya hti na gaw Luka a laika hta na Kabu Gara Shiga rai nga ai.
Yesu bai hkrung rawt ai shani e, Yesu a sape lahkawng gaw, Yerusalem mare kaw nna deng sanit daram tsan ai, E-ma-u kahtawng de sa wa ma ai rai nna, lai wa sai nhtoi masum hta byin wa sai lam ni hpe shada tsun chyai nga ma ai. Shing rai tsun jahta let sa wa nga yang, Yesu hkum nan sit sa nna, shan hte rau hkawm sa wa ai, rai timung, shi hpe n chye mu ga, shan a myi hpe myi le le ya mu ai. Shaloi Yesu gaw, Nan hkawm sa wa let, shada da tsun jahta ai lam gaw hpa lam rai ta? ngu nna san yang, shan gaw myiman sum let hkring tsap nga ma ai. Shaloi dai yan hta na Hkle-o-pa ngu ai wa gaw, Nang gaw Yerusalem mare e sa manam nga da nhtawm, ya hte dai mare e byin ai lam ni hpe, nang hkrai sha n chye n ni? ngu nna htan wu ai. Dai rai nna Yesu gaw, Hpa lam rai ta? ngu nna bai san yang, shan gaw, Nazaret mare na Yesu a lam rai nga ai: dai wa gaw Karai Kasang a man e mung, masha yawng a man e mung, lata atsam hte n-gup hpaji a nsam rawng ai myihtoi wa rai nga ai. Rai timung, hkinjawng agyi ni hte anhte a du salang ni gaw, dai wa hpe sat kau ai lam daw dan na matu ap kau nhtawm, wudang hta jen da ma nu ai.
Anhte chyawm gaw dai wa gaw Israela amyu hpe chye hkrang la na wa re ai, ngu nna myit mada ga ai. Ndai lam ni byin ai gaw, dai ni masum ya du ti mung, dai ni e anhte a hpung hta na numsha nkau ni gaw anhte hpe wa shamau mi ai. Shanhte lup de jau jau e sa yu ai shaloi, Shi a moi mang hpe n mu jang, shanhte bai wa nna, Madu hkrung nga ai, nga nna shingran hta mu ai lamu kasa ni tsun dan ai lam, wa tsun shana mi ai. Anhte a hpu nau ni nkau mung, lup de sa yu nna, numsha ni tsun ai hte maren mu ma ai: dai wa hpe chyawm gaw shanhte n mu ai da, ngu nna dai sape yan Yesu hpe tsun dan mu ai. Shaloi Yesu gaw, Myihtoi ni htawn tsun ai ga mahkra hpe kam sham lu na, hpaji n rawng ai hte myit ja ai ni e, Hkristu gaw shing re ai nni nkri lam la nna, Shi a hpung shingkang hta shang ningngai na re ai, n rai ni? ngu nna shan hpe tsun wu ai. Shaloi Mawshe ka da ai kaw nna, myihtoi ni yawng ka da ai Chyum laika ni hta na, Shi hta ang ai ga yawng a lachyum shan hpe tsun hpaw dan mu ai.
Ya, dai yan sa wa ai kahtawng de du magang yang, Yesu gaw lai nna sa wa na zawn rai nga ai. Dai rai nna, shan gaw, An hte rau shang nga ga; jan du sai; nsin mung sin wa ra ai, ngu nna shi hpe tsun ma ai. Ya, shan hte rau shat sha na dung nga yang, shi muk la nna shaman nhtawm, ahkyep di ai hte shan hpe jaw mu ai. Shaloi shan a myi hpaw nna, Yesu nan rai nga ai chye ma ai: Shi chyawm gaw shan kaw na mat mat wa ai. Shan gaw, lam e an hte ga tsun nna, Chyum laika a ga lachyum tsun hpaw dan mi ai shaloi, an a myit masin gadau gadap mali ai, nga nna shada da tsun ma ai. Shan lahkawng dai ahkying hta nan rawt nna, Yerusalem mare de bai wa nhtawm, sape shi langai hte kam sham ai hpung manang ni rau hpawng ma ai hpe mu ma ai. Sape ni gaw, Madu teng teng bai hkrung rawt sai: Simun hpe mung shi a hkum madun dan mu ai, ngu nna shan hpe hkap tsun dan ma ai. Shaloi shan gaw, lam e hkawm sa wa yang byin ai lam ni mung, muk ahkyep karan ai hta Yesu re ai chye lu ai mung, tsun dan mu ai.
Madu a Kabu Gara Shiga rai nga ai.

2023: PASAK LADAW LABAN (2) NA MUNGGA

Yesu gaw Thomas hpe tsun ai, “Nang ngai hpe mu ai majaw kamsham nit dai; n mu lu tim kamsham ai ni gaw ah lu ma ai”, nga ai. Sape ni gaw Yesu si ai kaw na bai hkrung rawt sai lam hpe mu nna kamsham ma ai. Shanhte Thomas hpe tsun dan yang, Thomas gaw, shi hkum nan mu jang, masawp yu lu jang sha kam na nga ai. Thomas a n kam n sham ai gaw myi hte n mu lu ai kaga ni yawng a matu tsi kaba tai ya ai, kamsham lu na lam sakse tai wa ai.

Myi hte, na hte chyaw mu yu, na yu ninglen, n kamsham ai ni law law nga ma ai. Yesu a hpyen ni, Yesu e galaw ai shămai shătsai ai amu ni, nat hpe gawt shaden ai amu ni, si mat ai masha ni hpe jăhkrung sharawt ai amu ni, mu yu, na yu ma tim, shanhte n kamsham ma ai. Yawhan ka da ai hta Yesu gaw hti n dang hkra, ka matsing na n mai byin hkra law la ai mau-hpa lamik kumla ni hpe madun dan ai, nga ai. Yesu a prat na masha ni mu ninglen n kam ya ai ni law law nga ma ai. Dai majaw Yesu tsun ai, “N mu lu ai rai tim kamsham ai ni ah lu ma ai”, nga ai.

Makam masham gaw teng sha Karai a chyeju kumhpa rai nga ai. Shăgun dat ai laika hta Kashin Kamun hte seng nna Petru hkaw tsun ai, “Nanhte Shi hpe n mu lu ai rai tim, nanhte Shi hpe tsawra mi ai; n mu lu ai rai tim nanhte kamsham mi ai…. dai makam masham a shabrai gaw hkye hkrang la ai chyeju re”, nga ai. Anhte langai hpra a makam masham, tinang nang a kanu kawa kaw na shawng lu la hpang ga ai. Kanu kawa yan a makam masham hta kashin kamun hkam la nna makam masham nli tum rawng hpang wa ai rai nga ai. Ma prat hta makam masham sharin ya ai ni law law rai ma ai. Kaba wa ai shaloi, tinang nan chye madat hkap la kamsham wa ai.

Kamsham myit, ya dawdan hkap la nna ya jang tu kaba wa lu ai n rai. Jet ai, greng ai makam masham tai lu na matu chyam dinglik yu ai lam amyu myu hpe hkrum katut nna sha chye lu ai lam, Petru a mungga kaw na chye la lu ga ai. Ja hpe chyam na matu wan hta ju galip ai law law lang galaw yu nna she ja jet ai lam dawdan lu ai. San Augustine tsun ai mung, “Kamsham myit, ngu ai gaw, n mu lu ai hpe kam ai lam rai nna, dai a shabrai kumhpa gaw tinang kamsham ai hpe mu lu ai lam re”, nga ai. Ja/lungseng htu ai masha wa gaw shi htu ai nhkun kaw rawng nan rawng ai, ngu, kam ai majaw htu ai. Jahtum e ja/lungseng tawng hpe mu lu ai gaw shabrai kumhpa re, ngu, shădawn yu mai ai.

America Dan hpe mu tam la ai, mying gumhkawng dik ai Christopher Columbus gaw, chye ging ai hpaji ni yawng hkum tsup ai hpang Europa kaw nna sinna maga Attlantic Hpungdan hpe rap jang Asia sinpraw maga, India de du lu ai lam hpe hkrak kam ai. Mungkan ga gaw din ai lam hpe sakse hkam dan mayu ai. Shi a shawng na masha ni mung, shi a prat na masha ni mung, kadai n shadu ai; Attlantic Hpungdan hpe rap nna India du lu na kadai n chyam yu ma ai. Tsam mari rai, Spain mung Hkawhkam wa kam n kam rai sha, ra ai sanghpaw ni hte ja gumhpraw hpe madi shadaw ya ai. Panglai rap ai hkrun lam nau galu ai majaw, hka-leng kaba ai, nbung laja ai majaw, lu-hka hte sha-hpa hkyet wa ai majaw, hkan nang ai masha ni myit daw wa ma tim Columbus gaw myit n daw ai. Jahtum e Bahama Zunlawng kaw du ai. Kaba dik ai awng padang re ai hte America hpe shawng mu hkrup ai wa, ngu nna labau shang mat ai. N mu lu ai rai tim, shi chye da ai hpaji machye machyang gam ging ai hpe chye ai; kamsham ai myit hte shăkut shăja ai a marang e, San Augustine tsun ai hte maren, shi kamsham ai hpe mu lu ai shabrai kumhpa kaba la ai. Hpang e Magelan gaw Europa kaw nna Phililippine de du mat wa ai; Europa kaw nna Sinpraw Asia de hkrang ai panglai lam ni hkrang mat ai. Mungkan gaw pyet ai n rai, din din re ai, ngu ai hpe myi ningmu hku n rai, sawn shen dinglik nna chye lu ai, kam ai a akyu rai nga ai.

Nawku Hpung a sharin shaga lam ni, mungsung ni, n chye na ai lam kade she law; tinang hta byin lai wa ai mahkrum madup ni hta mung, makam masham mahkrun hku shădawn yu nna chye na hkap la yakhkak ai mabyin ni kăde she law.

Makam masham greng ja lu na matu, uhpung uhpawng hte jawm hpawm nna, shawa e madi shadaw ai hku nna sha mai byin ai lam Kasa Laika hta adan sha ka da ai. Shawng shawng na sape ni gaw hkrung rawt ai Madu hpe n mu tim, hkye hkrang la hkrum ai lam hpe ja ja kabu kamsham ai majaw, shanhte rau jawm pawng galung nga lu ai masa hpe shapraw dan ma ai. Kadai hta mung ra kadawn ai lam n nga ai, nga ai. Langai hpra gaw shawa hpung masha, Nawku Hpung hta dun noi nna sha, Hkristan asak hkrung mahkrun, tinang a makam masham grung ja wa lu ai lam shawng na sape ni sakse hkam da ma ai.

Myit sumru mai ai lam__ 
 Tinang a prat hta Karai a chyeju ni hpe adan re hku nna, laklai ai mabyin ni hku nna n hkam sha dum ai aten ni hta gara hku hkamjan lai wa ai kun?
 Akyu hpyi nna dan san ai hku akyu n hkam sha ai aten ni hta makma masham hpe gara hku hkap la chye ai kun?
 Tinang a, langai hpra a makam masham grung ja lu na matu kamsham ai masha uhpung uhpawng kade she ahkyak a ta? 

2023: PASAK LADAW LABAN (2) NA CHYUM LAIKA

PASKA LADAW HTA LABAN (2) / Divine Mercy Laban
April 16, 2023
Chyum Mungga Daw (1)

Kasa 2:42-47

Ya hti na gaw Kasa laika hta na rai nga ai.
Kashin Kamun hkam la ai hpung masha nnan ni gaw, Kasa ni a sharin shaga ai lam, hpu nau ni rau kanawn hpawng ai lam, muk ahkyep karan ai lam hte, akyu hpyi ai lam hta htep lahti hkan nga ma ai. Masha yawng hte mung hkrit kang shajang ma ai; kaning rai nme law, kasa ni gaw mau hpa amu hte lamik kumla law law hpe galaw dan ma ai. Kam sham ai ni nlang hte gaw shara mi hta rau hpawng nna, arai yawng mayawng hpe jawm lang ma ai; tinang a sut rai ni hpe mung shanhte dut kau nna, marai shagu hpe tinang ra ai hte maren karan jaw mu ai. Shani shagu myit langai sha hte Nawku Htingnu hta shanhte htep lahti machyu nga nna, shanhte a nta e muk ahkyep karan jaw ma ai. Shanhte gaw Karai Kasang hpe shakawn kungdawn let, kabu gara ai hte lusha shahpa jawm sha ma ai; masha mahkra a man e mung myiman pa nga ai. Madu mung, hkye hkrang la hkrum ai ni hpe, lani hte lani shanhte a hpawng hta jat wa shangun ya mu ai.
Karai Kasang a Mungga rai nga ai.

Chyum Mungga Daw (2)

1Petru 1:3-9

Ya hti na gaw Kasa Petru shagun dat ai  laika langai hta na rai nga ai.
Hpu nau ni e, anhte a Madu Yesu Hkristu a Kawa Karai Kasang kaw shakawn kungdawn a nga nga u ga: Yesu Hkristu si mat ai ni kaw nna bai hkrung rawt wa ai a marang e, anhte ngang kang ai hte myit mada lu na matu, dai kawa gaw matsan dum ai myit hte anhte hpe bai shangai shangun ma ni ai. Shing rai anhte bai shangai wa lu ai majaw, n run n hten ai, awu asin n kap ai hte, n wai n mat chye ai Sali wunli hpe, anhte hkam la na myit mada nga ga ai. Dai Sali wunli gaw nanhte a matu mara sumsing lamu hta e kyem da nga ai. Hpang jahtum na nhtoi hta, shadan dan na aten e, nanhte a matu lajang da sai, hkye hkrang la ai chyeju hpe hkam la lu na matu, kam sham ai myit a marang e, Karai Kasang a n-gun atsam nanhte hpe makawp maga na ra ai.
Ya chyahkring chyahkra e, nanhte agung alau hte tsinyam tsindam amyu myu hpe hkrum nga ti mung, dai hkye hkrang la ai lam a majaw, nanhte grai kabu gara nga lu myit dai. Ja ajet lu na matu, wan hta e chyam yu ra ai; nanhte a kam sham ai myit chyawm gaw, hten mat chye ai aja hta grau hpu nga ai rai nna, Yesu Hkristu dan pru ai nhtoi hta e, shakawn kungdawn ai, hpung shingkang hte arawng sadang hpe, nanhte hkam ging wa lu na matu, dai kam sham ai myit gaw, agung alau hte tsinyam tsindam a marang e shangang shakang ya ai hkrum na ra ai. Yesu Madu hpe nanhte n mu yu ti mung, shi hpe tsaw ra nga myit dai; shi hpe garai n mada mu ti mung, kam sham ma nit dai rai nna, ndang tsun hkra kabu sharawng nga myit dai; kaning rai nme law, kam sham ai myit hkan tam nga ai, nsa wenyi hpe hkye hkrang la ai shabrai kumhpa hpe, nanhte teng teng hkam la na hpe chye nga myit dai.
Karai Kasang a Mungga rai nga ai.

KABU GARA SHIGA

Yawhan 20:19-31

Ya hti na gaw Kasa Yawhan a laika hta na Kabu Gara Shiga rai nga ai.
Dai laban bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sayang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan mu ai. Sape ni mung Madu hpe mu lu yang, kabu gara nga ma ai. Bai, Yesu gaw, Nanhte ngwi pyaw nga myit ga; nye Wa ngai hpe shangun dat ai hte maren, ngai mung nanhte hpe shangun dat made ai, ngu mu ai. Shing nga nhtawm, sape ni a ntsa e nsa kawut nna, Chyoi pra ai Wenyi hpe hkap la mu; kadai a shut hpyit mara hpe rai timung, nanhte raw dat yang gaw, raw mat na ra ai; kadai a shut hpyit mara hpe rai timung, nanhte shagun da yang gaw, dai mara naw nga na ra ai, ngu nna shanhte hpe tsun wu ai. Shing rai Yesu sa du ai shaloi, kasa shi lahkawng hta lawm ai, Marun Ma ngu ai Htawma gaw, shanhte hte rau n nga nga ang ai. Dai rai nna, kaga sape ni shi hpe, Anhte gaw Madu hpe mu lu sa ga ai, ngu nna tsun dan mu ai. Htawma chyawm gaw, Shi a lata hta hpri hkang hpe ngai n mu, dai hpri hkang hta nye a layung n shawn yu, shi a garep hta nye a lata n bang yu yang gaw, ngai n kam nngai, ngu nna shanhte hpe tsun wu ai.
Dai hpang matsat ya du jang, Yesu a sape ni nhku e bai hpawng nga ma ai rai nna, Htawma mung shanhte hte rau lawm nga ai. Chyinghka la da ti mung, Yesu sa du nna, shanhte a ka-ang e tsap let, Nanhte ngwi pyaw nga myit ga law, ngu wu ai. Shaloi shi gaw Htawma hpe, Na a layung nang de ladawn nna, nye a lata hpe yu yu u; na a lata ladawn nna nye a garep hta bang yu u; n kam n sham ai myit hpe kau da nna, kam sham u, ngu wu ai. Dai rai nna, Htawma gaw, Nye a Madu, nye a Karai Kasang rai nga ndai, ngu nna shi hpe htan wu ai.Yesu gaw, Htawma nang ngai hpe mu lu ai majaw kam sham nit dai; n mu lu ti mung, kam sham ai ni gaw a lu ma ai, ngu shi hpe tsun wu ai. Ndai laika hta n ka da ai lamik kumla kaga law law mung, Yesu gaw shi a sape ni a man e galaw dan nu ai; rai timung, Yesu gaw Karai a Kasha dai Hkristu nan rai nga ai hpe nanhte kam sham nna, Shi a mying ningsang a marang e asak hkrung ai lu la myit ga nga nna ndai hte wa ka tawn nga ai.
Madu a Kabu Gara Shiga rai nga ai.