2023: LUSHA GAM LADAW LABAN (3) NA MUNGGA

“Hka ndai lu ai wa kadai mung bai hpang gara na n rai; …. Ngai jaw ai lu-hka gaw dai wa a kăta hta hka-hpawk tai wa nna, htani htana asak hpring kăbrat wa lu na rai nga ai”.

Asak hkrung na matu sha-hpa lu-hpa gaw ra madung rai nga ai. Sha-hpa n sha ai nhtoi ram ram na hkra hkrung lu tim lu-hka n lu ai sha kade ya mi n hkrung lu ai. Asak a chyeju kumhpa ni hta sha-hpa lu-hpa hta lai nna, tengman ai lam, tara rap-ra lam, shimlum lam, simsa ai lam, tsawra myit, awmdawm, dz., dz., tup wa dik wa na lam, kraw kata hta ja ja ra sharawng  ga ai. Jum yu lu ai, myi hte mu lu ai arung arai sutgan ni hta dai asak jaw ai chyeju kumhpa ni gaw myit masin wenyi hte seng ai akyu ara ni rai nga ai. Chyum laika hta asak a chyeju kumhpa ni a lam kumla shatai lang ai muk, sabyi chyaru, sau, ninghtoi, ndai ni hpe lang ai. Ya, asak hka-hpawk a lam, asak jaw ai a hkrung nga ai hka a kumla hpe kumla shatai nna sharin ya ai.

Yesu hte hkrum ai Samaria numjan gaw shi a prat hpe myit n dik lu ai: la marai (5) hte măzum nga lai wa nna hka bra mat ai. Ya, kru ngu na la hte tara n shang ai hku kanawn mazum nga ai. La ni hta ra rawng ai lam mi rai rai, shi hta ra rawng ai lam a majaw mi rai rai, myit pyaw myit dik ai lam n lu ai: tara rap-ra lam, tsawra lakawn hkrum na lam, shi hpe chye na mara dat ya lu ai lam, makam masham hte htunghking tara e masat hkap la ya ai lam, ….ndai zawn rai wenyi hta ja ja hpang gara taw nga ai numjan rai nga ai. Shi a sung la ai kraw lawang na dai wenyi a chyeju kumhpa ni hpe hkam la mayu nga ai. Sung ai hka-htung hte bung nga ai. Yesu jaw ya na asak jaw ai lu-hka hpe hpang gara taw nga ai.

Yesu gaw myi hte mu lu ai, jum yu chyim yu mai ai lu-hka a lam tsun hpang ai. Dai hpang, shi a sung la ai kraw kata na hpang gara ai lam ni hpe manaw shapraw ya ai. “Nang tsun ai la n lu nngai, nga ai ga, teng ai; nang marai manga hte kănawn lai wa nit dai; ya, kru ngu na la mung hkungran la n re ai”, ngu madi dat yang, dai numjan hprang wa nna Yesu hpe myihtoi hku chye na hkap la wa ai. Mi shawng e gaw amyu n bung ai tsăsam amyu la sha langai hku sha mu ai. Ya, myihtoi hku mu nu ai. Yesu gaw dai numjan hpe mara shagun ga n tsun ai. Shi ra kadawn ai wenyi a hpang gara ai lam, wenyi hte seng ai chyeju kumhpa ni a lam tsun dan ngut ai hpang, Yesu shi hkum nan asak a lu-hka, a hkrung nga ai hka re ai lam tsun dan ai; shi hkum nan Messiah re ai lam tsun shăpraw dan ai.

Mawshe gaw hpang gara shajang ai Israel masha ni a matu lung rawk hpe dawhkrawng hte kayet dat yang hka lwi pru wa ai. Yesu a sinlum (salum/ lum lum re ai sin) ningri hte galun waw hkrum ai shaloi, hka hte sai pru wa ai. Kashin Kamun hte kaga Sakramentu chyeju ni lwui pru ai, asak a hka-hpawk rai nga ai. Yesu gaw nlung zawn ja ai (mara n yin hkraw, mara magawp da ai jan) Samaria numjan a sinlum hpe ahkawk ya ai. Yesu tsun ai, “Karai Kasang gaw wenyi rai nga ai”, nga ai. Yerusalem kaw sha n rai, Karai Kasang hpe tam ai ni, Karai Kasang hpe gara shara kaw na rai tim Shi hpe tam lu, nawku lu ai, nga ai. Yesu gaw, wenyi hta hpang gara taw nga ai Samaria numjan a sinlum hta, kraw hta nga nga ai. Israel myu sha ni gaw zaibru jang e ning ngu madai ma ai, “Karai Kasang gaw anhte hte rau gaw nga nga ai kun?” ngu ma ai. Anhte mung, shani shagu na ruyak kyindut ni, ra kadawn ai lam law law hta Karai Kasang hpe n tsen ai, n hten ai lam ni byin chye ga ai. Karai gaw mu mada nga ai kun?

Asak a lu-hka jaw ai Yesu gaw Chyum Mungga hta, Sakramentu ni hta, teng sha nga nga ai. Ja Chyum mungga hpe hti sumru ai hta, akyu hpyi ai hta, Sakramentu ni hpe hkam la ai hta, Shi hte jahta hkat lu nna asak a lu-hka hpe hkam la mai ga ai. Shinggyim masha ni hta ra marin hpa, ra kadawn dik ai myit masin wenyi a chyeju kumhpa ni hpe Yesu hta lai nna kaga kaw hkan tam ga yang, panglai jum nstin ja lu ai hte bung na rai nga ai. Tsawra chye ai, chye madat ya ai, mara raw ya chye ai, kamhpa mai ai, tara rap-ra lam, dinghpring ai lam….ndai ni hpe hpang gara ai rai yang teng sha, Madu Yesu hpe tam ra ga ai. Shi mung a ni sha nga nga ai, tinang a kraw hta sha rawng nga ai. Ja gumhpraw sut su ai hte pyaw-hpa lu-hpa sha-hpa kaw na simsa shimlum lam majing hpe n lu la mai ai.

Dai asak hka-hpawk hpe mu tam la ai wa gaw shi a matu chyu sha, ngu nna kyem da lu na n rai. Mahkrun n mu ai ni hpe teng sha, shi hkam la lu ai chyeju kumhpa ni hpe gam garan ya na rai nga ai. Samaria numjan gaw Yesu hpe Messiah hku nna hkap la lu ai hte rau, arai yawng tat da nna mare de bai htang wa ai. Mare masha ni hpe wa shana ya ai majaw, masha law law hka-htung de hkan sa nna Yesu hpe sa jahkrum ma ai. Dai numjan a sinlum kraw kata hta asak hka-hpawk prut kabrat pru wa ai majaw, Yesu a sasana magam hta shang lawm madi shadaw lawm ai numjan tai wa ai.

Roma Laika hta San Pawlu tsun da ai, “Karai Kasang a tsawra myit anhte hta e ru bang da ya ai majaw, myit daw shara hpa n nga ai, mada ai lam galoi mung nga nga ai”, nga ai. Mara hta lup taw nga ai aten hta Hkristu e shinggyim amyu sha a matu si hkam ai lam gaw, Karai Kasang anhte hpe tsawra matsan dum ai sakse rai nga ai, nga ai.   
 
Myit sumru na lam_
 Yesu zawn, amyu htung hking/ makam masham n bung ai ni the hku hkau lam tam, jahta shaga hkat shakut ga ai kun? Shanhte hpe jet ai tsawra myit hte jahta bawngban na shakut ga ai kun?
 Shut hpyit lam dam ai ni hpe gara hku mu mada ga ta? Shanhte hpe matsan dum myit hte bawp la jahta shaga na shakut ga ai kun?
 Tinang lu la hkam la lu ai wenyi a akyu chyeju ni hpe gara hku gam garan nna sasana bungli hta shang lawm ga ai kun?

2023: LUSHA GAM LADAW LABAN (3) NA CHYUM LAIKA

LUSHA GAM AI LADAW LABAN (3)
March 12, 2023
Chyum Mungga Daw (1)

Pru mat wa ai laika 17:3-7

Ya hti na gaw Pru Mat Wa ai  laika hta na rai nga ai.
Israela a shawa hpung ting, Egutu mung de nna pru mat wa ai hpang, Re-hpi-dim e but nga ma ai; dai kaw e amyu masha ni hpang gara nna, Mawshe hpe aput let tsun mu ai gaw, anhte hte anhte a kashu kasha ni mung, anhte a yam nga ni mung, hpang gara ai hte si na matu, Egutu mung de na anhte hpe woi wa sa ni? ngu mu ai. Shaloi Mawshe gaw Madu hpe hpyi nem let, ndai amyu hpe ngai kaning di woi awn lu na rai ta? Ngai hpe nlung hte kabai sat kau na maw nga ma ai, ngu mu ai. Dai rai nna Madu gaw Mawshe hpe, Israela a agyi salang nkau mi hpe woi nna, dai amyu masha ni a shawng e sa wa su; dai hkanu hpe kayat ai dawhkrawng lang let sa wa su. Horeb bum na lunghkrung ntsa hta ngai na a man e tsap nga na ring ngai. Dai nlung hpe nang kayat na wu ai rai nna, amyu masha ni lu na matu, dai hta na hka lwi pru na ra ai  ngu nna Madu tsun wu ai. Mawshe mung Israela a agyi salang ni a man e shing di galaw wu ai. Dai shara kaw e, Israela amyu masha ni gaw, Madu anhte hte rau nga nga ai kun, n nga nga ai kun, nga nna Madu hpe chyam dinglik yu ai majaw mung, Mawshe hpe aput nna ndang kalang hkat ai lam a majaw mung, shara dai hpe, Massah hte Moriba ngu ai amying lahkawng hte shamying ya mu ai.
Karai Kasang a Mungga rai nga ai.

Chyum Mungga Daw (2)

Roma 5:1-2, 5-8

Ya hti na gaw Roma masha ni hpang de San Pawlu shagun dat ai laika hta na rai nga ai.
Hpu nau ni e, anhte a Madu Yesu Hkristu a marang e, kam sham ai hte ding hpring wa lu sa ga ai majaw, Karai Kasang hte hku hkau nga ga ai. Yesu Madu a marang e, anhte kam sham ai hte chyeju ningsang a prat hta shang lu sa ga ai; shing rai, Karai Kasang a hpung shingkang hpe myit mada nga ga ai majaw, nachying kabu sharawng awng nga ga ai. Dai myit mada ai gaw kaman lila n rai nga ai; kaning rai nme nga yang, anhte hpe jaw ya sai Chyoi pra ai Wenyi gaw, Karai Kasang a tsaw ra ai myit, anhte a masin salum hta e ru bang ya mani ai. Anhte hpa n byin lu ai shaloi, Karai Kasang lajang da ai aten hta, Hkristu gaw shut hpyit ai masha ni a matu si hkam sai. Gaja wa, ding hpring ai masha a matu si hkan na, ai n kam nga ga ai; mai kaja ai masha a matu, chyawm gaw, si hkam gwi na masha langai ngai nga nhten; rai timung, anhte mara kap nga ninglen, Hkristu anhte a matu si hkam ya ai gaw, Karai Kasang anhte hpe tsaw ra nga ai lam a sakse rai nga ai. 
Karai Kasang a Mungga rai nga ai.

KABU GARA SHIGA

Yawhan 4:5-15, 19-26, 39-42

Ya hti na gaw Yawhan a laika hta na Kabu Gara Shiga rai nga ai. 
Yesu gaw, Yaku e shi a kasha Yosep hpe jaw ai ga dachyawk makau na, Suhka nga ai, Samari mung na mare langai mi de du wu ai: dai yang e Yaku a hka htung nga nga ai. Yesu gaw lam hkawm ba ai majaw, hka htung makau e dung nga ai. Dai aten gaw shani ka-ang ahkying shi lahkawng daram rai nga ai. Shaloi Samari numsha langai mi hka ja na pru sa ai. Yesu gaw, Ngai hpe hka jaw lu e, ngu nna shi hpe hpyi ai: shi a sape ni chyawm gaw shahpa mari na matu mare de sa mat ma ai. Dai Samari numsha gaw, Nang Yuda masha rai nga ndai; ngai Samari numsha hpe hpa majaw lu na hka hpyi n ta? ngu nna shi hpe tsun wu ai, kaning rai nme nga yang, Yuda hte Samari masha ni shada da n hku n hkau nga ma ai. Shaloi Yesu gaw, Karai Kasang a kumhpa hte, Ngai hpe hka jaw lu e nga nna nang kaw hpyi ai wa, kadai re hpe nang chye taw gaw, nang shi  kaw hpyi nna, shi gaw nang hpe hkrung ai ntsin jaw na nit dai, ngu nna Yesu htan wu ai. Dai numsha mung, Madu e, Nang hka ja na rai hpa mung n lu ndai; hka htung mung sung nga ai; dai rai nna, dai hkrung ai ntsin hpe kanang na lu la n ta? Anhte a nji nwa Yaku gaw ndai hka htung anhte hpe jaw da mani ai rai nna, shi hkum nan hte shi a kashu kasha ni, shi a yam nga ni ndai hta na lu ma sai: nang gaw shi hta grau kaba n ni? ngu nna tsun wu ai. Shaloi Yesu gaw, ndai hka lu ai wa kadai mung, hpang bai gara na ra ai; ngai jaw ai hka lu ai wa chyawm gaw galoi mung hpang gara na n rai: dai ngai jaw ai hka gaw, htani htana asak lu na matu, dai wa hta e lwi pru ai hka hpawk tai na ra ai, ngu nna Yesu htan wu ai. Shaloi dai numsha gaw, ngai galoi mung hpang gara bai n hkrum na hte, nang de mung hka n sa ja ra u ga, hka dai ngai hpe jaw rit law.
Nang gaw myihtoi rai nga ndai hpe ngai dum se ai: anhte a ji wa ni gaw ndai bum ntsa e nawku masai; nanhte Yuda masha ni  chyawm gaw, Yerusalem mare e chyu sha Karai Kasang hpe nawku mai ai, nga nna tsun myit dai, ngu wu ai. Yesu gaw, numsha e, nye a ga hpe kam sham u: ndai bum e mung n rai; Yerusalem mare e mung n re ai, Wa hpe nawku na aten du na ra ai. Nanhte Samari masha ni gaw tinang nchye na ai hpe nawku myit dai; anhte chyawm gaw tinang chye ai hpe nawku ga ai: kaning rai nme law, hkye hkrang la ai lam Yuda amyu hta na pru ra ai. Rai timung, ding man ai hku nawku ai ni gaw, wenyi hta mung, teng man ai hta mung, Wa hpe nawku na aten du wa ra ai rai nna, ya e pyi rai nga ai: Wa gaw shing rai nawku ai ni hpe tam nga ai. Karai Kasang gaw wenyi rai nga ai: shi hpe nawku ai ni gaw wenyi hta mung, teng man ai hta mung, nawku lu na rai nga ai ngu nna shi hpe tsun wu ai. Dai numsha gaw, Hkristu ngu ai Karai Kasang san da ai wa du na ra ai hpe ngai chye nngai; dai wa du jang, shi anhte hpe lam magup tsun madun na ra ai, ngu wu ai. Shaloi Yesu gaw, nang hte ga tsun nga ai, ngai gaw dai wa nan rai nga ai, ngu nna shi hpe tsun wu ai.
Dai rai nna dai numsha gaw, shi a ntsin di bu tawn kau da nna mare de bai wa nhtawm, mare masha ni hpe, ngai galaw ai lam yawng ngai hpe tsun dan ya ai wa hpe sa yu marit; dai wa gaw Hkristu rai na kun, ngu nna wa tsun mu ai. Dai mare na Samari masha law law wa, dai numsha sakse hkam ya ai ga a majaw, Yesu hpe kam sham ma ai. Dai rai nna Samari masha ni Yesu hpang de du jang, shanhte hte nga nga na hpyi ma ai majaw, dai yang e lahkawng ya shi hkring nga ai. Yesu nan tsun ai ga a majaw mung kam sham ai ni grau law jat wa ma ai. Dai ni gaw dai numsha hpe, ya gaw, na a ga majaw chyu sha kam sham ai n rai sa ga ai: anhte nan na lu nna, ndai wa gaw, mungkan ga a hkye hkrang la ai Madu teng teng rai nga ai hpe anhte chye saga ai, ngu mu ai.
Madu a Kabu Gara Shiga rai nga ai.

2023: LUSHA GAM LADAW LABAN (2) NA MUNGGA

Yesu gaw sape marai masum hpang de sa nna shi a lata hte shanhte hpe ahtawk nna tsun ai, “Rawt mu! Hkum hkrit mi!” nga ai. Shanhte mada yu yang, Yesu hta lai nna kadai hpe mung n mu ma ai.

Yesu a ăsam galai nna tu htoi kabrim wa ai hpe mu la ma ai; lamu kaw na nsen na lu ai mung, “Ndai gaw ngai tsawra ai Kasha; shi a ga madat mu” nga ai nsen rai nga ai. Kabu n ma re ai sape ni, chyahkring mi sha praw rai, shingran zawn yupmang zawn, chyahkring pyaw lu ma ai. Ndai dinghta ga ntsa hta myit hkyi lit li ai aten law law nga ai zawn, kabu lu ai aten ni mung law law nga ai. Yawng gaw lai lai, rai nna byin ai. Sape ni gaw, Yesu hta lai nna kăga yu mada na, madat mara lu na n nga sai.

Dinghta ga ntsa myit ru myit tsang ai, yawn hkyen ai, myit măchyi ai, kabu ai, pyaw ai, jahpoi hkrum ai, shakawn hkrum ai…kăhti gălai she rai nga ai. Grin ai hpa mung n nga ai. Sape marai masum gaw laklai dik ai mabyin, shanhte a sara hte madu, Yesu asam galai nna tu kabrim wa ai, Tara jaw ai wa Moshe hte myihtoi ni a myihtoi re ai Eliya hte jahta shăga hkat ai hpe mu ai majaw ja ja kabu lu ma ai. Yesu gaw arawng aya kaba dik ai wa re ai lam hpe chye la lu ma ai. Shanhte a sara hte madu a jaw e ja ja arawng lu dum ma ai. Rai tim chyahkring mi sha hkam sha lu ma ai. Dap mada yu yang Yesu hta lai nna kaga kadai hpe mung n mu ma ai. Karai e matsun ai ga, “Shi a ga madat mu” nga ai.

Lu-sha jăhkran ai, gam ai ladaw hta shădawn sharam nna lu sha ai; pyaw hpa ni hpe byin mai ai daram koi shăkut ga ai; sharam jai nna lu mahkawng ai hpe gam jaw gam ya ai amu hta sak jaw akyu galaw ga ai. Lani mi hta anhte lu sha pyaw dum ai lam ni, lu da madu da ai sutgan ni yawng hte hka mat ra ga ai, kau da ra ga ai, ngu ai lam hpe myit dum shangun ai rai nga ai. Lu-sha jăhkran ai, pyaw hpa ni hpe sharam ai, n lu n lawm ai ni hpe garum ya ai amu ni galaw ai, akyu hpyi shăja ai, ndai zawn re ai amu ni a marang e, tinang nang a myit masin wenyi hpe shachyoi shapra la lu ai. Dinghta prat a jahtum e, Yesu hkam la ai hpung shingkang, tu kabrim hpraw tsawm ai arawng sadang hkam la lu na n shut n shai, myit mada lu ga ai.

Shinggyim hkum shan hte re ai Yesu hkum nan mung, shi a sape ni mung, Karai a shălan shăbran, myit mada lu ai shabrai kumhpa hpe mu mada hkam sha yu ra ma ai. Yesu gaw shi hte rau, sape ni hpe dai hpung shingkang woi hkam sha shangun ai. Ruyak kyindut ni hte myit ru myit tsang ai amyu myu a lăpran, anhte hkam la lu ai shalan shabran chyeju ni, lawt lu ai mahkrum madup ni, awng dang ai chyeju hte shakawn shagrau hkrum ai chyeju ni kade law ai hpe htang sumru let chyeju dum mai ga ai. Manghkang gaw myit n dik chye ai shinggyim masha ni, ra kadawn dum ai hkrai hkrai myit dum nna magawn hkrai magawn la mayu ai myit wa rai nga ai.

Tinang ra mayu ai, lu mayu ai hkrai sha myit ai ni Abraham a kasi hpe yu la mai ai. Karai e jaw ya na shăgrau kumhpa hpe chyip mak kamsham ai. Dai majaw, shi shingdu e kau da ra ai buga hte man nga ai kanbau bungli, hku hkau ai jinghku ni hpe kau da nna Karai e shangun ai buga de htawt sit hkawm ra ai. Sutgan law law hpe mung kau da ra ai. Hpang e chyam dinglik ai lam law law hpe hkam la ra ai. Madat mara ai lam hpe tup hkra hkan galaw wu ai.

Adam lu da ai hpe myit n dik nna grau mayu ai a majaw, madat mara lam hpe tawt kau ai. Ding-nye a ningpawat tai wa ai. Yesu gaw madat mara ai lam hpe tup hkra hkan galaw ai. Gawng kya ai shinggyim masha ni Yesu hta lai nna yu la na, ninggun la na masha kaga n nga sai. Anhte hkam la lu ai kabu gara awng dang ai lam ni mung n grin ai. Karai Kasang hpe mung, Shi shagrau ya na hpung shingkang hpe mung n mu lu, n hkam sha lu ai rai tim, Yesu tsun ai, galaw ai, sharin shaga ai lam yawng hpe yu la kamsham nna shi a ga hpe madat la hkan shatup ra ga ai. Madat mara ai, ngu ai gaw, machyi hkam, asum hkam, tinang ra sharawng ai lam ni law law hpe nyet kau, asum hkam ra ai.

Timoti hpe San Pawlu shadum ai lam hta mung, “Kabu Gara Shi-ga a jaw e hkam la ra ai ruyak jamjau lam ni hpe hkam sharang u” nga ai. Dinghpring chyoi pra na matu shaga da hkrum ai kamsham ai masha ni gaw teng sha, machyi hkam asum hkam ra ai lam ni law law nga ai. Myi hte n mu lu ai, myit hte pyi n hkawn lu ai, hpang na prat e shăgrau hkam la na hpung shingkang arawng sadang hpe hkam jan lu na lam langai sha nga ai: Yesu hta n di n hka, langai sha tai nna shi a matsun ga ni hkan shatup lu na rai nga ai”.

Sumru na matu
 Myit ru myit tsang ai lam ni hta myit hpyau ai kun, hkam la lu ai shabran shabran chyeju ni, gara hku tawt lai lu ai, ngu ai lam ni hpe htang sumru na.
 Karai a mungga hpe madat mara na kade ahkyak a ta?
 Rut sang hkrum ai aten ni hta gara kaw na mahtai tam grau ga ta?

2023: LUSHA GAM LADAW LABAN (2) NA CHYUM LAIKA

LUSHA GAM AI LADAW LABAN (2)
March 5, 2023
CHYUM MUNGGA DAW 1

Npawt Nhpang 12:1-4

Ya hti na gaw Npawt Nhpang laika hta na rai nga ai.
Madu gaw Abram hpe, tsun wu ai gaw: Na a bu ga hte na a amyu na nwa a nta de nna pru nhtawm, ngai nang hpe madun dan na mung de sa wa su. Ngai nang hpe amyu kaba shatai na de ai: nang hpe ngai shaman ya de ai hte, na a amying hpe ngai galu kaba shangun na rai nna, shaman chyeju lu la na matu, masha ni na a amying hpe gang la na mara ai. Nang hpe shaman ai wa hpe ngai shaman ya na we ai; nang hpe n gawn n sawn di kau ai wa hpe, ngai dagam kau na nngai. Ga ntsa na amyu baw shagu gaw na a marang e gumring gumrat ai chyeju hkam la na ma ra ai, ngu nna Madu gaw Abram hpe shaga la wu ai. Dai rai nna, Abram gaw, Madu shaga wu ai hte maren, pru sa wa ai.
Karai Kasang a Mungga rai nga ai.

Chyum Mungga Daw (2)

2 Timohti 1:8-10

Ya hti na gaw Saradaw Timohti hpe San Pawlu shagun dat ai laika lahkawng hta na rai nga ai.
Hkristu Yesu a kasa rai nga ai, ngai Pawlu gaw, ngai sha Timohti hpe ga shana dat nngai. Karai Kasang jaw ai n-gun atsam hpe kam hpa let, Kabu Gara Shiga a majaw nang hkrum ang ai ru tsang ai hpe hkam sharang la u. Karai Kasang gaw, anhte a magam bungli a majaw n rai, shi yaw shada ai hte maren, shi a chyeju hte anhte hpe hkye hkrang la nna, chyoi pra ai ni tai wa lu na matu, shi anhte hpe shaga la nna, chyoi pra  ai ni tai wa lu na matu, shi anhte hpe shaga da ma ni ai. Dai chyeju lam, moi chyaloi nhkoi kaw nna Hkristu Yesu hta e shi anhte hpe jaw da mani ai; rai timung, anhte a Hkye la Madu Yesu Hkristu ga ntsa e paw pru ai majaw, ya e shadan shaleng dat nu ai. Kaning rai nme law, Yesu Madu gaw si hkrung si htan a atsam hpe jahten kau ya nna, dai Kabu Gara Shiga a marang e asak hkrung ai lam hpe mung, htani htana nhten n bya re ai lam hpe mung, shi shadan dan nu ai.
Karai Kasang a Mungga rai nga ai.

KABU GARA SHIGA

Mahte 17:1-9

Ya hti na gaw Mahte a laika hta na Kabu Gara Shiga rai nga ai. 
Yesu gaw, Petru, Yaku hte shi a kanau Yawhan hpe shaga la nna, tsaw ai bum ntsa de shanhte hpe hkrai woi lung mu ai. Shaloi shanhte a man e shi a hpraw nsam galai mat nna, shi a myiman jan zawn htoi kabrin ai hte, shi a hpun palawng hkyen zawn hpraw tu wa ai. Dai hta n-ga, Mawshe yan Elia mung, Yesu hte ga shaga ai hpe shanhte dan mu lu ma ai. Shing rai Petru gaw, Madu e, ndai yang e anhte nga nga na, gade pyaw la a hka! Nang hkraw n yang gaw, nang e ginsum masum, na a matu langai mi, Mawshe a matu langai mi, Elia a matu langai mi, anhte gap sa ga, ngu nna Yesu hpe tsun wu ai. Petru gaw dai ga naw tsun nga yang, htoi tu sumwi shanhte hpe ka-up nga ai hte, dai sumwi hta na nsen ngoi pru nna, ndai wa gaw, ngai sharawng awng ai, nye a tsaw ra ai Kasha rai nga ai; shi hpe madat mara nga mu, nga ai. Sape ni dai ga hpe na jang, ga de dingyawm dagup nna, nachying hkrit gari nga ma ai. Shaloi Yesu gaw shanhte hpe sa ahtawk nna, rawt mu, hkum hkrit nga myit, ngu mu ai. Shanhte mada yu jang, Yesu hta kaga kadai hpe mung n mu lu ma ai. Ya dai bum de nna shanhte yu hkrat wa nga yang, Yesu gaw, Masha Kasha si ai ni kaw na garai n hkrung rawt yang, ndai shingran hpe kadai hpe mung hkum tsun dan mu, ngu nna shanhte hpe hkang dat mu ai. 
Madu a Kabu Gara Shiga rai nga ai.

2023: LUSHA GAM LADAW LABAN (1) NA MUNGGA

Agung alau, shut hpyit mara, mara a shabrai re ai si hkrung si htan, ndai masum hte mungkan ningnan lat ai kaw nna dai ni du hkra, dinghta ga e dingrin nga ai. Masha sa tai ai Karai a Kasha hkum nan, gunglau hkrum katut ai hpang, agaung alau hpe dang kau lu ai ladat madun dan ai. Kasa Pawlu mung, htenza gawng kya ai shinggyim masha amyu hpe myit mada ai lam jaw ya ai. Shut hpyit mara hta Karai a matsam dum hkye hkrang la ai chyeju kumhpa mahtang shadawn n mai hkra kaba ai, nga ai. Lu-sha gam ai/jahkran ai ladaw gaw htenza nga ai tinang a akyang lailen hpe sharai shajaw na aten, Karai a chyeju hte sha byin mai ai lam hpe myit dum shangun ai. 

Agung alau gaw atsam kaba la ai; mahkam kaba nan rai nga ai. Yu gyam ai chyinghtep hta shan hkyep loi sha tawn da ra ai.  Nga-myek chyinghkyi na kagyin-jai n-gup mi sha na daram sha re. Sha-hpa, pyaw-hpa, kabu hpa, agung alau ni a atsam kaba la ai. Lu sha lu ai, pyaw lu ai, kabu lu ai gaw chyăhkring mi sha, loi mi sha, hpang e yawn hkyen ra ai, hkrat sum hten bya ai lam mahtang kaba la ai. Akyang lailen htenza nga ai masha ni kalang ta htenza mat ai n rai ma ai; gau-ngwi, loi loi rai lahkam htawt sit nna htenza mat ai. Htenza mat ai myit masin arawn alai ni hpe sharai n mai mat hkra sawng nan mat ai ni law law nga ma ai.    

Satan gaw Ewa hpe gunglau ai shaloi makawk si hte hkam ai; grau ai agung alau kaba gaw, “Karai Kasang hte bung wa na” ngu ai ga rai nga ai. Makawk si mung tsawm ai, sama manam pyaw ai, grai mu na zawn san ai, Satan e tsun ai mung kaja wa mu dik ai, nga ai. Ewa sha ngut ai hpang madu-wa hpe mung jaw sha ai. Shan sha ngut ai hte hkan nang ai ari dam kaba la ai. Shut kaba gaw Karai a ga hpe lale ai, ninghkap ai, n madat ya ai lam rai nga ai. Hpaji ga-malai langai nga ai_ 

“Yesu gaw sharawng awng ai myit hte shi a asak hpe nawng kau na ya ai; Adam gaw shi a madu-jan hpe nawng ya kau na sharawng ai”, nga ai.   

Karai Kasang gaw Adam hpe san jep ai shaloi, madu-jan Ewa hpe hkungga shatai nawng kau ya ai: “Nang ngai hpe jaw da ai ndai num wa re”, ngu, shi lawt daw, Ewa hpe mara shagun kau ai. Kaja wa gaw Ewa e gunglau ai hpe Adam n ninghkap lu ai majaw, makawk si sha lawm ai rai nga ai. Masha a gawng kya ai lam dai re: tinang a mara hpe n hkap yin la kam ai. Manghkang byin jang tinang a mara hpe hpa hkra/ lawt lu hkra, masu ai, yip da ai, kaga masha wa hpe mahtang mara rut di chye ga ai. Ningpawt Ninghpang laika kaw nna sharin la lu ai lam dai re. Tinang nang a shut hpyi mara hpe yin la nna, n kaja ai akyang lailen ni hpe sharai na matu sut htuk dik ai aten rai nga ai.

Kabu Gara Shi-ga kaw na shărin la mai ai lam mi gaw, agung alau ni hpe tai htang na matu, Yesu zawn, Chyum Laika, Karai a mungga hpe laknak shatai, akyu jashawn ra ai lam rai nga ai. Masha gaw kawsi hpang gara hkrum ai aten hta, tinang hta ra kadawn ai lama ma ahkyak hkya ra wa ai aten hta, dumbret lam tam chye ga ai. Gumhpraw a matu hpa mung galaw gwi wa ai; masu nna, lagu nna, gashun nna, hkălem nna, …manghkang ran na matu masha pyi sat gwi wa ai. Shaloi, Yesu gaw nat hpe htan ya ai zawn, “Masha gaw muk (sha-hpa) hte sha hkrung nga lu ai n rai; Karai a n-gup kaw na pru ai mungga hte asak hkrung lu na” nga ai. Kaga ngam ai agung alau lahkawng gaw mungkan sutgan hte ahkang aya, tinang a arawng sadang, mying gumhkawng lam, …ndai ni rai nga ai. Mungkan sutgan, ja gumhpraw, arawng aya (postion/status), yawng gaw ahkyak ai. Rai tim, Karai Kasang gaw yawng mayawng a madu, mai kaja ai lam a ningpawt, ngu ai hpe n myit dum ai, tingkyeng akyu amyat hpe sha myit ai majaw, marin myit a majaw, gumrawng gumtawng myi-man lu mayu ai majaw, n tara ai hku, n jaw ai hku ja gumhpraw tam, arawng aya hpe n tara ai hku shăngun lang ai rai yang, teng sha wenyi asak sum mat lu ai. Karai Kasang hpe kamhpa na malai, mungkan e jaw ya ai ahkaw ahkang, lu lawm lam hpe sha myit nna Nat a ga hpe madat ai hte bung ai amu ni law law nga nga ai.  

Yesu gaw Chyum laika hpe sha akyu jashawn nna Satan hpe dang kau ai. Jahtum e lamu Kasa Yesu hpe sa gawn ai, nga ai. Karai Kasang hpe kamsham tsawra ai ni hpe teng sha, Karai Kasang e garum madi shadaw ya ai, ngu ai lam hpe sharin la lu ga ai. Shinggyim masha shut hpyit lam dam nga shajang tim, mara htat ga ai rai tim, Yesu hta madun dan ai Karai a matsan dum myit hte hkye hkrang la ai chyeju kumhpa mahtang shadawn n mai hkra kaba grau ai, nga, San Pawlu shărin ya ai. Kamsham ai myit hte tinang a hkum hpe ningdang nyet kau ai amu ni galaw let, myit masin wenyi, akyang lailen ni hpe hprang shatsawm la na sut htuk dik ai aten rai nga ai.

2023: LUSHA GAM LADAW LABAN (1) NA CHYUM LAIKA

LUSHA GAM AI LADAW HTA LABAN (1)
February 26, 2023  
Chyum Mungga Daw (1)

Npawt nhpang 2:7-9, 3:1-7

Ya hti na gaw Npawt nhpang laika hta na rai nga ai.
Madu Karai Kasang gaw aga hta na ga yun hte shinggyim hkrang hpe shachyaw wu ai rai nna, dai masha a ladi hta hkrung nga ai nsoi nsa kawut bang ya ai: shaloi shinggyim masha gaw hkrung nga ai nsa wenyi rawng ai masha tai wa sai. Dai hpang, Madu Karai Kasang gaw, sinpraw maga na Edin ngu ai shara e, sun langai mi hkai lajang da wu ai: dai kaw e shi shachyaw ai shinggyim masha hpe nga shangun da wu ai. Ya Madu Karai Kasang gaw yu tsawm ai hte, sha na matu mai kaja ai hpun amyu myu hpe, ga hta nna tu shagun ai: dai sun ka-ang e asak jahkrung jaw ai hpun hte, kaja ai hte n kaja ai hpe chye ginhka shangun ai hpun mung tu nga ai. Ya lapu gaw, Madu Karai Kasang hpan da ai dusat nhprang mahkra hta hpaji grau rawng nga ai. Dai lapu gaw shawng na numsha hpe, ndai sun hta tu ai hpun mahkra hta na, nan nsha lu na myit dai, nga nna Karai Kasang kaja wa tsun sa ni? ngu nna Ewa hpe san wu ai. Shaloi dai numsha gaw, ndai sun hta tu ai hpun ni a asi hpe an sha lu ga ai, rai timung, nan si ai n hkrum myit ga, sun a ka-ang e tu ai hpun a asi hpe nan n sha lu na myit dai; dai hpe mung hkum hkra mu, nga nna Karai Kasang tsun da nu ai, ngu nna lapu hpe htan ya wu ai. Dai rai nna lapu gaw, nan gaja wa teng teng n si  na myit dai. Dai namsi hpe sha ai nhtoi hta nan a myi hpaw nna, kaja ai hte n kaja ai hpe chye ginhka na ra ai majaw, Karai Kasang zawn nan tai wa na marin dai; kaja wa Karai Kasang dai lam hpe chye chyalu rai nga ai, ngu nna dai numsha hpe tsun wu ai. Shaloi, hpun dai gaw sha na matu mai kaja nga ai mung, mada yu ai shaloi tsawm la ai hpe mung, hpaji lu la na matu masha ra sharawng ai hpun rai nga ai hpe mung, dai numsha mu jang, dai hpun hta na asi di sha wu ai: madu wa hpe mung shi gaw jaw wu ai rai nna, Adam mung sha wu ai. Dai shaloi shan lahkawng a myi hpaw wa nna, singgu krin rai nga ma ai hpe dum chye ma ai. Dai rai nna, shan gaw lakum lap chywi matut nna, tinang a matu dangpai galaw ma ai.
Karai Kasang a Mungga rai nga ai.

Chyum Mungga Daw (2)

Roma 5:12-19

Ya hti na gaw Roma masha ni hpang de San Pawlu shagun dat ai  laika hta na rai nga ai.
Hpu nau ni e, Masha langai mi a jaw e shut hpyit mara mungkan ga e shang wa nna, mara a majaw si hkrung si htan shang nang wa ai hte maren, masha yawng mayawng mara kap nga ma ai majaw, nlang kaw e si hkrung si htan du bang wa sai. Mawshe a tara htung dingsa garai n nga yang, shut hpyit mara mungkan ga e nga nga sai; rai timung tara n da ai laman e mara shagun ai n nga ai. Ngai tsun mayu ai gaw, Adam shut hpyit kau sai majaw, tara tawt lai ai amu n galaw ai ni a ntsa e pyi, Adam kaw nna Mawshe a aprat du hkra, si hkrung si htan up hkang nga sai: Adam gaw, “Du Na Ra Ai Wa” kumla rai nga ai. Rai timung, chyeju kumhpa lam gaw, tara tawt lai ai lam zawn n rai; hpa majaw nga yang marai langai mi a jaw e yawng mayawng si mat sa yang gaw, Yesu Hkristu ngu ai masha langai mi a marang e, Karai Kasang a chyeju ningsang gaw, masha lanlak a matu grau nna law htam wa sai rai nga ai. Bai, dai chyeju kumhpa gaw, marai langai mi galaw ai shut hpyit mara hte grai shai nga ai; kaning rai nme nga yang tara tawt lai ai amu langai mi a jaw e, tara jeyang nhtawm daw dan ai lam byin pru sai. Ya e, tara tawt lai ai amu law law galaw ai hpang, ding hpring la lu hkra chyeju kumhpa pru wa sai. Dai hta kaga, marai langai mi tara tawt lai ai amu a majaw si hkrung si htan up hkang nga sa yang gaw, n taw n tsang ai chyeju ningsang hte, ding hpring shangun ai kumhpa hpe hkam la sai ni gaw, Yesu Hkristu ngu ai wa langai mi a marang e grau nna asak hkrung ai hte up hkang nga na ma ra ai. Dai rai nna, tara tawt lai ai amu langai mi a majaw, masha yawng hte gaw daw dan ai hkrum ma ai hte maren, ding hpring ai amu langai mi a jaw e, masha yawng mayawng ding hpring wa lu nna, asak sumdam lu la manu ai. Masha langai mi a n madat mara ai a majaw, nlang hte gaw mara kap ai ni tai wa sai hte maren, marai langai mi a madat mara ai lam a majaw, masha lanlak ding hpring ai ni tai lu na ma ra ai.
Karai Kasang a Mungga rai nga ai.

KABU GARA SHIGA

Mahte 4:1-11

Ya hti na gaw Mahte a laika hta na Kabu Gara Shiga rai nga ai.
Nat e gung lau ai hkrum na matu, dai Wenyi gaw Yesu hpe nam mali de woi sa wu ai. Ya, nhtoi mali shi ya, shana mali shi na tup, Yesu lusha gam ai hpang kawsi hkrum nga ai. Shaloi dai gung lau ai wa shi kaw du nna, Nang Karai Kasang a Kasha rai yang gaw, ndai nlung ni hpe Muk tai mu ga, nga nna hkang dat u, ngu wu ai. Yesu chyawm gaw, Masha gaw muk hte sha hkrung nga lu ai n rai; Karai Kasang a n-gup hta na pru ai mungga mahkra hte mung hkrung nga lu ai, nga nna ka da ai, ngu nna nat hpe htan ya wu ai. Shaloi nat gaw dai chyoi pra ai mare de Yesu hpe woi sa nna, nawku htingnu a nchyun e shadun da nhtawm, Nang Karai Kasang a Kasha rai yang gaw, na a hkum hpe le de jahkrat dat u; kaning rai nme law, nlung hta, na a lagaw n ahtu u ga, na a matu shi a lamu kasa ni hpe hkang da nna, shanhte a lata hta nang hpe pawn la na mara ai, nga nna Chyum Laika hta ka da ai, ngu nna tsun wu ai. Yesu gaw, Na a Madu Karai Kasang hpe nang chyam yu lu na n rai, nga nna ka da ai ga mung Chyum Laika hta rawng nga ai, ngu nna nat hpe htan ya wu ai. Bai, dai gung lau ai nat gaw, nachying tsaw ai bum ntsa de Yesu hpe woi lung nna, mungkan ga mungdan yawng mayawng hte, de a arawng sadang mahkra hpe madun dan nhtawm, Nang dingnyawm nna ngai hpe nawku yang gaw, ndai yawng mayawng hte hpe ngai nang hpe jaw na we ai, ngu wu ai. Shaloi Yesu gaw, Satan e, pru mat wa su; na a Madu Karai Kasang hpe nang nawku lu na rai nna, shi hpe chyu sha daw jau lu na ndai, nga nna Chyum Laika hta ka da ai, ngu nna shi hpe htan wu ai. Shaloi dai nat pru mat wa ai hte, lamu kasa ni Yesu hpe sa galaw daw ma ai.
Madu a Kabu Gara Shiga rai nga ai.

2023: PRANWAN LADAW LABAN (7) NA MUNGGA

“Sanseng chyoi pra ai hpe Jau, Mama ni, Hpungki sehkam ni hte, dinghku n de ai tinang a prat hpe ma da ai, nawng da ai ni tam shakut ai baw, ngu myit shut ai ni law law nga na re. Sanseng chyoi pra ai kaw du hkra, masha shagu hkan shakut na lit nga ai. Jawjau laika hta Karai Kasang ning nga ai, “Ngai nanhte a Madu, nanhte a Karai Kasang chyoi pra ai hte maren nanhte mung chyoi pra nga mu”, nga, matsun ai. Yesu tsun ai, “Sumsing lamu na nanhte a Kawa gaw kuptsup ai hte maren, nanhte mung kuptsup nga mu”, nga ai. Korentu laika hta, “Nanhte gaw Karai Kasang a htingnu rai mi ai, …dai gaw, chyoi pra ra ai lam hpe tsun ai.

Mother Teresa tsun ai ga hpe myit yu mai ga ai. Shi tsun ai, “Sanseng chyoi pra ai, ngu ai gaw laklai ai masha nkau mi akyu hkam sha na matu san da ya ai n rai; na matu, ngai a matu, yawng a matu re. Kadai mung hkan galaw lu ai lit re; hpa majaw nga yang, tsawra chye na lam hkaja nga ga yang, chyoi pra wa lu na matu hkaja nga ga ai re” nga ai. Shawa hpung masha ni law law hta, “sanseng chyoi pra ai” ngu ai hpe dinghku de ai ni, kanbau makan galaw sha ai shawa masha ni hte nau n seng ai zawn, dinghku n de ai Jau, Mama, Brother ni tam shakut ai baw, ngu, myit shut chye ma ai. N law dik, Jau Mama ni gaw shawa masha ni hta grau chyoi pra sanseng ma ai, ngu, shadu shut ma ai. Jau Mama ni gaw shawa masha ni hpe sanseng chyoi pra wa na lam sharin ya ai, matsun ya ai teng ai. Shawa masha ni hta grau chyoi pra ra ai, ngu ai mung gaw teng ai. Rai tim, tatut hta Jau Mama ni mahtang shawa hpung masha ni law law hpe n dep ai, ngu ai hpe mung dum ra ga ai. Mother Teresa tsun ai hte maren, sanseng chyoi pra ai lam gaw masha kau mi a matu laksan san da ya ai n re; yawng gaw chyoi pra ra ai. Yawng mung lit lu ai. Nhku kaw sha rawng, akyu sha hpyi shaja, lu-sha gam shaja, rai nna yak yak hkak hkak shakut tam nna sha lu mai ai baw n re ai lam, tsun dan ai. Tsawra chye hkra shakut shaman ai lam gaw chyoi pra wa lu na matu shakut ai lam re, nga ai. 

Yesu tsun ai, “Nanhte a hpyen ni hpe tsawra mu, nanhte hpe zingri ai ni a matu akyu hpyi ya mu”, nga ai. Grai yak la ai, n byin mai na zawn nga na kun! Yesu du sa ai gaw Moshe a Tara hpe kuptsup shangun na matu re, nga, shawng na Laban e sharin la sa ga ai. Tinang a hpyen wa hpe, tinang hpe zingri ai masha hpe kabu ai myit hte gaw n tsawra lu kun rai na re. N ju n dawng ai majaw, mara n dat ya hkat lu ai, mungkan e sat hkat ai kade she law. Ukraine e majan sum ai Russia hpyen hpung langai a ningbaw Kadirov kaning nga a ta? Shi gaw Ukraine mung masha yawng hpe sat kau na lam, Putin hpe tsun ai. Putin a majan n tara ai; n tara ai majan hta Russia maga nau sum wa jang mara kata ai mung shawa masha ni hpe bom majoi sharut bun ai hku, n tara dik ai hku matai dawp ai. Matai dawp ai, ngu ai gaw majan hte majan a wunma hpe grau grau sawng jat shangun ai lam, masha a labau hta tup rai nga ai. Tinang a kasha, shing n rai, sumtsaw wa hpe hkam sha ai myit hte tsawra ai rai tim, hpyen wa hpe gaw dai zawn re ai hkam sha myit n rawng lu na re. Rai tim, hpyen wa hpe tinang gaw hpyen n tai ya ai hku nna, matai n dawp ai hku nna mara dat ya ai kumla, lahkawng maga a akyu ara hpe tau ai asam kumla ni madun ai hku nna tsawra myit madun ai lam rai nga ai. Dai rai yang, hpyen wa hpe tsawra ai, ngu ai tara matsun hpe grau chye na re. 

Sanseng chyoi pra ai lam hpe yawng e dep lu ai, hkan galaw na lit lu ai hpe dai ni na chyum mungga ni hku nna sharin ya ai. Sanseng ai myit, chyoi pra ai myit n rawng ai sha, dinghta ga ntsa asak hkrung na n loi na re; simsa ai lam, kabu gara ai lam, myit pyaw ai lam ni hpe mung tam la lu na n rai nga ai.

2023: PRANWAN LADAW LABAN (7) NA CHYUM LAIKA

PRANWAN LADAW 7
February 19, 2023
CHYUM MUNGGA DAW 1

Jaw Jau Laika 19:1-2, 17-18

Ya hti na gaw Jaw Jau ai laika hta na rai nga ai.
Madu nan Mawshe hpe tsun wu ai gaw: Israela a amyu ting hpe ning ngu tsun u: Ngai Madu , nanhte a Karai Kasang chyoi pra nga nngai hte maren, nanhte mung chyoi pra nga mu. Na a nhpu nnau wa hpe n dawng n yawt ai myit hkum rawng u ga. Na a manang wa mara lu yang, shi hpe teng teng shadum jahprang na ra ai. Shing rai a majaw nang mara n lu na ndai. Na a amyu masha ni hpe nang hkum nan matai n htang lu na; na a htingbu wa a mara hpe hkum matsing da u; na a htingbu wa hpe na a hkum hte maren, nang tsaw ra lu na ndai: Ngai gaw Madu rai nga nngai.
Karai Kasang a Mungga rai nga ai.

CHYUM MUNGGA DAW 2

1Korinhtu 3:16-23

Ya hti na gaw Korinhtu masha ni hpang de San Pawlu shagun dat ai laika hta na rai nga ai.
Hpu nau ni e, Nanhte gaw Karai Kasang a nawku htingnu rai nga nna, Karai Kasang a Wenyi nanhte hta e rawng nga ai hpe n chye nga myit ni? Marai langai ngai Karai Kasang a nawku htingnu hpe jahten sharun kau yang gaw, Karai Kasang dai wa hpe Jahten sharun kau na ra ai; kaning rai nme law, Karai Kasang a nawku htingnu chyoi pra nga ai; nanhte mung dai htingnu rai nga myit dai. Kadai rai timung hkum myit shut mu: nanhte hta na marai langai ngai, ndai mungkan ga na hpaji madang hte sawn yu nna, ngai gaw hpaji rawng ai wa rai nga nngai, nga nna myit lu yang, hpaji byeng-ya majing lu la na matu, shi angawk angak tai wa na ra ai. Hpa majaw nga yang, ndai mungkan ga a hpaji byeng-ya gaw. Karai Kasang a man e angawk angak rai nga ai. Dai rai nna, “Hpaji rawng ai ni hpe, tinang daw ai hpaji lam hta shi shanut kau nu ai” bai,”Hpaji rawng ai ni a myit mang ai lam kaman lila rai nga ai hpe Madu chye nga ai” nga nna Chyum laika hta ka da nga ai. Shing rai masha a majaw hkum gumrawng nga mu.  Yawng mayawng hte gaw nanhte hte seng nga ai. Pawlu hte Apollo mung, Kehpa hte mungkan ga mung, hkrung mahkrung hte si hkrung si htan mung, ya e nga ai hte htawm hpang e nga pra na ra ai mung: dai yawng mayawng hte gaw nanhte hte seng ai baw hkrai rai nga ma ai. Nanhte mahtang Hkristu hte seng ai ni rai nga myit dai; Hkristu chyawm gaw Karai Kasang hte seng ai wa rai nga ai.
Karai Kasang a Mungga rai nga ai.

KABU GARA SHIGA

Mahte 5:38-48

Ya hti na gaw Mahte a laika hta na Kabu Gara Shiga rai nga ai.
Yesu shi a sape ni hpe tsun mu ai gaw: Myi a matu myi, wa a matu wa, nga nna jaw da ai tara hpe nanhte na yu manit dai. Ngai nanhte hpe tsun made ai gaw: n hkru ai wa hpe hpa mung hkum tai mu. Na a hkra shabyi bye ai wa hpe, maga mi naw ja ya u. Nang hpe tara dara nna, na a kata palawng hpe mung jaw ya u. Nang hpe dip nna, deng mi sa shangun ai wa hte rau, deng lahkawng naw hkan sa u. Nang kaw hpyi ai wa hpe jaw u; nang kaw nna hkoi shap mayu ai wa hpe, hkum koi kau u. Na a baw sang wa hpe nang tsaw ra lu nna, na a hpyen wa hpe n dawng n yawt lu na ndai, nga nna tsun ai ga hpe nanhte na yu manit dai. Ngai mahtang nanhte hpe tsun made ai gaw: nanhte a hpyen ni hpe tsaw ra mu; shing rai yang gaw, sumsing lamu na nanhte a Kawa a kashu kasha ni tai wa na marin dai kaning rai nme law, n kaja ai ni hte kaja ai ni a ntsa e shi a jan hpe pru shangun nga ai; ding hpring ai ni hte n ding n hpring ai ni a ntsa e marang jahtu ya mu ai. Nanhte hpe tsaw ra ai ni hpe chyu sha tsaw ra yang gaw, nanhte hpe hpa shakawn shara nga a ta? Kang hta ai ni mung dai hte maren galaw ma ai n rai ni? Nanhte a nhpu nnau ni hpe sha hkrum shaga yang gaw, hpa shagrau shara nga na myit ta? Dai majaw, sumsing lamu na nanhte a Kawa kup tsup nga ai hte maren, nanhte mung kup tsup rai nga mu. 
Madu a Kabu Gara Shiga rai nga ai.

2023: PRANWAN LADAW LABAN (6) NA MUNGGA

Awmdawm ahkaw ahkang (freedom) hte tara/upade, gara hku matut mahkai hkat ai, kaning re ai hta shai hkat nna, shinggyim masha shada kanawn mazum ai lam hta gara hku akyu jaw ai lam ni hpe sawn shen yu shangun ai. Masha langai hpra a awmdawm ahkaw ahkang hte gyit hkang ai tara matsun, ndai lahkawng hpe jang hta mara nna shen yu ga. 

Masha nga hpang ai hte tara matsun mung hkan nga ai: “Maga da ai hpun na namsi hkum di sha”, nga ai. Hkum da ai tara hpe n matang ai, n hkan ai majaw, shinggyim masha gaw si chye ai amyu tai wa ai. Dai ni na prat du hkra, hpung/hpawng langai lat shagu, gyit hkang ai tara matsun ni hte hkam sha lu ai ahkaw ahkang ni arau kapyawn nna tai wa ra ai. Bungli ningnan hkap la na rai yang, hkam sha lu na ahkaw ahkang ni hpa hpa re ai, tinang hkan shatup galaw ya ra na lit magam, hkan sa ra ai tara ni, arau kapyawn ai lam hpe chye lu ga ai. Tara hkan ai, lit/duty kangka ai rai yang, shabrai kumhpa lu la na, tara tawt ai rai yang, bungli kaw na shapraw kau hkrum na rai nga ai. 

Langai hpra a awmdawm ahkaw ahkang, masha byin tai hpang ai kaw na lu lawm wa chyalu rai nga ai. Rai tim, dai ahkaw ahkang hte rau kapyawn nna tinang nang lata la, dawdan, galaw mat wa ai amu langai ngai a majaw byin wa ai akyu ni, tinang lit la ra ai, lit hkam ra ai. Dawdan n jaw, lata la ai n jaw jang tinang hkum hkala hkrum kun, si ra kun, re ai hten bya ai akyu pru wa na rai nga ai. Dawdan jaw ai, lata la jaw nna galaw ai amu langai a majaw, tinang mung, kaga masha ni hpe mung, mai kaja ai akyu ni jaw ya lu na rai nga ai. Awmdawm ahkaw ahkang, ngu ai gaw jahten sharun amu galaw na matu n rai, tinang hpe mung, kaga masha ni hpe mung, kaja ai akyu galaw na matu akyu jashawn na lit nga ai. Dai lit hpe tara/upade, ngu ai kaja kun, jaw kun n jaw ai kun, shut jang hpa hpa byin na, ngu ai tara masa ni e lam matsun ya ai rai nga ai.

Sirak a laika hta Karai Kasang ning nga ai, “Wan hte hka, si ai kaw du ai lam hte asak hkrung lam, ra ai hpe lata la mu” nga ai. Dai hpang, tara matsun ni hpe hkan shadik ai hku nna Karai Kasang a myit hpe hkan shatup lu na, nga ai. Dai gaw asak a chyeju kumhpa ni hpe hkam la lu na lam rai nga ai. Yesu tsun ai mung, “Ngai du sa ai gaw Tara gaihpan hpe hpya run kau na matu n rai, tara hpe kuptsup shachying ya na matu she du sa nngai” nga ai. Moshe a Tara shi prat hte shi jaw ai rai tim, kuptsup ai n rai. Shinggyim masha ni e gaw da ai tara ni mung, aprat aban hkan nna galai shai ding-yang sha re.

Galoi prat e mung jaw nga na tara gaw “Karai a Tara Kanu 10” rai nga ai. Dai tara kanu 10 hte hpe mung, tsawra chye ai myit hku nna sha kuptsup ai hku lachyum htai lu na rai nga ai. Dai majaw, “Karai Kasang hpe tsawra ai hte htingbu wa hpe tinang a hkum hte maren tsawra lu na” ngu ai hta, Tara Kanu 10 hte myihtoi ni a matsun ga yawng shajup da ai, magum bu da ai lam, Madu Yesu kaw na chye la ga ai. Dai gaw Yesu e shakup ya ai amu rai nga ai.  

Tara hte maren jeyang ai, ngu ai hta, tara a yaw shada lam hpe chye na ra ga ai. Marai   langai hpra, tinang galaw ai amu hta kaning re ai myit masin, hpa yaw shada nna galaw ai, ngu ai gaw madung re ai lam hpe mung, tara masa hta ahkyak ai lam Yesu sharin ya ai. Dai majaw, “Masha num hkum shut” nga ai tara hpe shakup na matu Yesu tsun ai, “Masha jan hpe marin ai myit hte yu ai (myit hku shut ai) mung dai num hpe shut ai” nga ai. Masha hkum sat, ngu ai tara hpe gara hku shakup ya a ta? Myit masin kaw na n ju n dawng ai wa mung jeyang hkrum ging ai, ngu, tara hpe shakup ya ai. Matai dawp tara matsun, “Wa a matu wa, myi a matu myi” hpe mung matai n dawp mai ai lam; jeyang ai amu Karai a lata hta ap ya lam, tara hpe shakup ya ai.

Masha e gaw da ai tara matsun ni hpe yu ga. Tai shai ai mungmasa lahkawng hpe shadawn yu mai ga. Awmdawm ahkang akyu jashawn lang nau hpyau ai democracy mungdan ni hta, akyang lailen htenza ai lam kade she law: kadai a ga mung n kam madat wa ai, kaning re ai uphkang ai ni hpe mung ga-san hkrai san shalaw nna madap n kam ai, grau nna wenyi lam hta hkrat sum shangun ai manghkang ni grau law ai. Kunmunit mungdan ni, Russia-Miwa-Myanmar mung zawn re ai ni hta rai jang tara upade/tara matsun ni gaw maisau pa, laika buk hta sha rawng ai; arawng aya lu ai ni, lauban ni hpe makawp maga na matu yaw shada nna tara hpe gaw da ai: ahkaw ahkang lu ai ni tara hpe kam ai hku htai ai, masu magaw ai, tengman ai lam ni hpe yip da ai, mayun kumhpa sha ai, … ndai zawn re amu ni law grau ai hpe mu lu ai. Tara matsun ni gaw jaw ra ai, tara ra ai; n jaw ai n tara ai hkum ga/matsun ga hpe madat na lit mung n nga ai. Karai a tara hte nhtan shai nna matsun ai tara gara mung n tara ai, shut hpyit lam dam lam hte kaga manghkang law law pru pru wa lu ai. Karai e jaw ya ai nyan, machye machyang hte awmdawm ahkaw ahkang ni hpe akyu jashawn nna asak a chyeju kumhpa ni hpe hkam la shajang ga.

2023: PRANWAN LADAW LABAN (6) NA CHYUM LAIKA

PRANWAN LADAW HTA  LABAN 6

February 12, 2023

CHYUM MUNGGA  DAW 1

Sirak,15:15-20

Ya hti na gaw Sirak a laika hta na rai nga ai.

Ngai sha e, Nang  myit ra rang gaw, tara lam ni hpe hkan lang nna, Karai Kasang ra sharawng ai hpe, kangka ai hte hkan shatup lu na ndai. Karai Kasang gaw na man e wan hte hka hpe tawn da sai: na a lata ladawn nna, nang grau ra ai mahtang hpe lata la u. Asak hkrung lam hte si htan lam hpe, masha a man e tawn da sai rai nna, shi lata la ai mahtang shi hpe jaw na ra ai. Madu a hpaji byeng-ya nachying sung la ai: Shi mahkra dang chye ai hte yawng mayawng hte hpe mu mada nga lu ai. Karai Kasang gaw Shi hpan da ai masha shagu hpe Shi a myi hte mada yu nna, masha galaw ai amu mahkra hpe Shi matsing da nga ai. Madu Karai Wa gaw masha kadai hpe mung shut hpyit mara galaw shangun ai n rai; tara tawt lai na matu mung, Shi ahkang jaw wu ai n rai.

Karai Kasang a Mungga rai nga ai.

CHYUM MUNGGA DAW  2

1 Korinhtu 2:6-10

Ya hti na gaw Korinhtu masha ni hpang de San Pawlu shagun dat ai laika hta na rai nga ai.
Hpu nau ni e. (mungkan hpaji hparat hte ngai n hkaw dan ai ngu timung) Hkristian nga sat nga sa ai lam hta kung hpan wa sai ni hpe, hpaji byeng-ya amyu mi hkaw tsun dan ga ai: ndai mungkan ga na hpaji byeng-ya n rai: hten bya hkrum magang ra ai, ndai mungkan ga hpe up hkang ai du ni a hpaji byeng-ya mung n re ai sha, Karai Kasang a hpaji byeng-ya nan rai nga ai. Dai gaw, Karai Kasang e makoi magap da nna, shi a sung la ai hpaji hparat rai nga ai. Anhte kup tsup ai hku hpung shingkan lu la na matu, moi chyaloi kaw nna Karai Kasang yaw shada ai lam rai nga ai. Ndai prat na up hkang ai du ni kadai mung, dai hpaji hparat hpe n chye ma ai; chye taw gaw, hpung shingkang arawng sadang mahkra a Madu magam hpe, shanhte Wudang hta n jen da na ma ai. Rai timung, Chyum laika hta ka da nga ai hte maren,” Myi e n mu, na hte n na yu nna, Masha a myit hta n hkawn npru ai lam, Karai Kasang gaw shi hpe tsaw ra ai ni a matu lajang da nu ai,” nga nna tsun dan ga ai. Karai Kasang gaw Wenyi a lata hte ndai hpaji hparat hpe anhte kaw shapraw shadan da mi ai. Dai Wenyi mahtang Karai Kasang a sung htum ai du hkra yawng mayawng hte hpe sagawn yu nga ai.
Karai Kasang  a Mungga rai nga ai.

KABU GARA SHIGA

Mahte 5:17-37

Ya hti na gaw Mahte a Laika hta na Kabu Gara Shiga rai nga ai.
Dai jep ai tara hte myihtoi ni a ga hpe raw dat kau na, nga nna ngai sa du ai gaw, hkum nawn nga myit: raw dat kau na matu n rai, dai hpe shadik na she ngai sa du ring ngai. Nanhte hpe ngai teng teng tsun made ga, lamu hte aga garai n lai wa yang, dai hpe garai n shabyin byin gaw, dai jep ai tara kaw nna, ga kanu langai mi hte madin langai mi pyi, lai wa lu na n rai. Dai rai nna, kadai mung, dai kaji htum ai ga matsun langai ngai hpe tawt lai nna, masha ni hpe ning rai sharin shaga nga a yang gaw, sumsing lamu a mungdan hta kaji htum ai wa ngu na ma ru ai: ga dai hpe hkan galaw nna, sharin achyin ya ai wa chyawm gaw, sumsing lamu a mungdan hta, kaba ai wa ngu na ma ru ai. Kaning rai nme law, nanhte hpe ngai tsun ma de ai gaw, Nanhte a ding hpring ai lam, laika ka ai sara ni hte Hparishe ni a ding hpring ai hta n grau ma lit yang gaw, sumsing lamu a mungdan hta nanhte gaja wa n shang lu na myit dai. Masha hpe nang sat lu na ndai n rai; sat kau ai wa gaw,jeyang ai de ging dan nga ai, nga nna moi shawng na ni hpe tsun dan ai ga gaw, nanhte na yu ma ni ai. Ngai mahtang nanhte hpe tsun ma de ai gaw, tinang a kahpu kanau wa hpe masin pawt ai wa kadai rai ti mung jeyang ai hte ging dan nga ai: tinang a kahpu kanau wa hpe, Mana, nga ai wa gaw, dai salang hpawng a daw dan ai hte ging dan nga ai: Mana ndai, nga ai wa gaw, ngarai a wan hte ging dan nga ai. Dai rai nna dai hkungri de, na a kumhpa hpe nang la sa yang, na a nhpu nnau nang hpe mara shagun ai shara lama ma nga nga ai hpe, dai shaloi jang nang dum lu wu yang gaw, hkungri a man e na a kumhpa hpe tawn da nhtawm, na nhpu nnau hte myit jahkrum la na shawng sa nna, dai hpang e na a kumhpa hpe wa mara da u. Nang hpe hka galaw ai wahte rau, lam e naw sa wa yang, shi hte myit alawan jahkrum u; shing nrai, dai hka galaw ai wa gaw, tara agyi a lata hta nang hpe ap kau na ra ai; tara agyi gaw mang galang kaw nang hpe ap kau na ndai rai nna, htawng hta jahkrat kau ai nang hkrum na rin dai: nang hpe ngai teng teng tsun de ai gaw, peksan prai hkra nang garai n wa wa gaw, dai kaw nna nang pru lu na ndai n rai.

Masha num nang shaw lu na ndai n rai, nga nna tsun da ai gaw, nanhte na yu ma nu ai. Ngai mahtang nanhte hpe tsun ma de ai gaw, myit madu hte numsha hpe yu yu nna ra ai wa gaw, shi a myit hta, dai numsha hte, num shaw ai amu galaw nu ai. Dai rai nna, hkra maga na myi nang hpe shut shangun n yang gaw, dai hpe malawk kabai kau u; na a hkum ting hpe Ngarai mung hta jahkrat kau ai hkrum na hte, na a hkum daw langai mi hten na gaw, grau kaja nga ai. Na a hkra lata mung nang hpe shut shangun n yang gaw, dai hpe kahtam dut kabai kau u; na a hkum ting Ngarai mung de shang wa na hte, na a hkum daw langai mi hten na gaw, grau kaja nga ai. Na a madu jan hpe jahka mayu n yang gaw, shi hpe dat dat na laika jaw u ga, nga ai ga mung nga sai. Ngai ma htang nanhte hpe tsun ma de ai gaw, la shaw ai majaw sha n rai yang gaw, tinang a num hpe jahka ai wa gaw, shi hpe la shaw shangun nu ai; [dai jahka kau ai num hpe hkungran ai wa mung, num shaw ai amu galaw nu ai. Bai, Masu let nang n dagam lu na ndai rai nna, na a dagam ai ga gaw dai Madu kaw nang shadik lu na wu ai, nga nna moi shawng na ni hpe tsun dan ai ga gaw, nanhte na yu ma nu ai. Ngai mahtang nanhte hpe tsun ma de ai gaw, nanhte hpa mung dagam dala rai lu na myit dai n rai: lamu hpe dagam lu na myit dai n rai; dai gaw Karai Kasang a tingyang rai nga lu ai: aga hta mung n rai; dai gaw shi a lagaw mara ai shara rai nga lu ai: Yerusalem hpe mung n rai; dai gaw hkawhkam kaba a dung nga ai mare rai nga ai. Na a baw hta mung dagam lu na ndai n rai: nang gaw kara singgawng langai mi hpe pyi, hpraw u ga chyang u ga n galaw lu ndai. Na a ga gaw, Rai sa, nga yang rai u ga, N rai, nga yang, n rai u ga; dai hta lai ai ga nlang hte gaw n kaja ai wa hte seng nga ai.
Madu a Kabu Gara Shiga rai nga ai.