2023: PRANWAN LADAW LABAN (6) NA MUNGGA

Awmdawm ahkaw ahkang (freedom) hte tara/upade, gara hku matut mahkai hkat ai, kaning re ai hta shai hkat nna, shinggyim masha shada kanawn mazum ai lam hta gara hku akyu jaw ai lam ni hpe sawn shen yu shangun ai. Masha langai hpra a awmdawm ahkaw ahkang hte gyit hkang ai tara matsun, ndai lahkawng hpe jang hta mara nna shen yu ga. 

Masha nga hpang ai hte tara matsun mung hkan nga ai: “Maga da ai hpun na namsi hkum di sha”, nga ai. Hkum da ai tara hpe n matang ai, n hkan ai majaw, shinggyim masha gaw si chye ai amyu tai wa ai. Dai ni na prat du hkra, hpung/hpawng langai lat shagu, gyit hkang ai tara matsun ni hte hkam sha lu ai ahkaw ahkang ni arau kapyawn nna tai wa ra ai. Bungli ningnan hkap la na rai yang, hkam sha lu na ahkaw ahkang ni hpa hpa re ai, tinang hkan shatup galaw ya ra na lit magam, hkan sa ra ai tara ni, arau kapyawn ai lam hpe chye lu ga ai. Tara hkan ai, lit/duty kangka ai rai yang, shabrai kumhpa lu la na, tara tawt ai rai yang, bungli kaw na shapraw kau hkrum na rai nga ai. 

Langai hpra a awmdawm ahkaw ahkang, masha byin tai hpang ai kaw na lu lawm wa chyalu rai nga ai. Rai tim, dai ahkaw ahkang hte rau kapyawn nna tinang nang lata la, dawdan, galaw mat wa ai amu langai ngai a majaw byin wa ai akyu ni, tinang lit la ra ai, lit hkam ra ai. Dawdan n jaw, lata la ai n jaw jang tinang hkum hkala hkrum kun, si ra kun, re ai hten bya ai akyu pru wa na rai nga ai. Dawdan jaw ai, lata la jaw nna galaw ai amu langai a majaw, tinang mung, kaga masha ni hpe mung, mai kaja ai akyu ni jaw ya lu na rai nga ai. Awmdawm ahkaw ahkang, ngu ai gaw jahten sharun amu galaw na matu n rai, tinang hpe mung, kaga masha ni hpe mung, kaja ai akyu galaw na matu akyu jashawn na lit nga ai. Dai lit hpe tara/upade, ngu ai kaja kun, jaw kun n jaw ai kun, shut jang hpa hpa byin na, ngu ai tara masa ni e lam matsun ya ai rai nga ai.

Sirak a laika hta Karai Kasang ning nga ai, “Wan hte hka, si ai kaw du ai lam hte asak hkrung lam, ra ai hpe lata la mu” nga ai. Dai hpang, tara matsun ni hpe hkan shadik ai hku nna Karai Kasang a myit hpe hkan shatup lu na, nga ai. Dai gaw asak a chyeju kumhpa ni hpe hkam la lu na lam rai nga ai. Yesu tsun ai mung, “Ngai du sa ai gaw Tara gaihpan hpe hpya run kau na matu n rai, tara hpe kuptsup shachying ya na matu she du sa nngai” nga ai. Moshe a Tara shi prat hte shi jaw ai rai tim, kuptsup ai n rai. Shinggyim masha ni e gaw da ai tara ni mung, aprat aban hkan nna galai shai ding-yang sha re.

Galoi prat e mung jaw nga na tara gaw “Karai a Tara Kanu 10” rai nga ai. Dai tara kanu 10 hte hpe mung, tsawra chye ai myit hku nna sha kuptsup ai hku lachyum htai lu na rai nga ai. Dai majaw, “Karai Kasang hpe tsawra ai hte htingbu wa hpe tinang a hkum hte maren tsawra lu na” ngu ai hta, Tara Kanu 10 hte myihtoi ni a matsun ga yawng shajup da ai, magum bu da ai lam, Madu Yesu kaw na chye la ga ai. Dai gaw Yesu e shakup ya ai amu rai nga ai.  

Tara hte maren jeyang ai, ngu ai hta, tara a yaw shada lam hpe chye na ra ga ai. Marai   langai hpra, tinang galaw ai amu hta kaning re ai myit masin, hpa yaw shada nna galaw ai, ngu ai gaw madung re ai lam hpe mung, tara masa hta ahkyak ai lam Yesu sharin ya ai. Dai majaw, “Masha num hkum shut” nga ai tara hpe shakup na matu Yesu tsun ai, “Masha jan hpe marin ai myit hte yu ai (myit hku shut ai) mung dai num hpe shut ai” nga ai. Masha hkum sat, ngu ai tara hpe gara hku shakup ya a ta? Myit masin kaw na n ju n dawng ai wa mung jeyang hkrum ging ai, ngu, tara hpe shakup ya ai. Matai dawp tara matsun, “Wa a matu wa, myi a matu myi” hpe mung matai n dawp mai ai lam; jeyang ai amu Karai a lata hta ap ya lam, tara hpe shakup ya ai.

Masha e gaw da ai tara matsun ni hpe yu ga. Tai shai ai mungmasa lahkawng hpe shadawn yu mai ga. Awmdawm ahkang akyu jashawn lang nau hpyau ai democracy mungdan ni hta, akyang lailen htenza ai lam kade she law: kadai a ga mung n kam madat wa ai, kaning re ai uphkang ai ni hpe mung ga-san hkrai san shalaw nna madap n kam ai, grau nna wenyi lam hta hkrat sum shangun ai manghkang ni grau law ai. Kunmunit mungdan ni, Russia-Miwa-Myanmar mung zawn re ai ni hta rai jang tara upade/tara matsun ni gaw maisau pa, laika buk hta sha rawng ai; arawng aya lu ai ni, lauban ni hpe makawp maga na matu yaw shada nna tara hpe gaw da ai: ahkaw ahkang lu ai ni tara hpe kam ai hku htai ai, masu magaw ai, tengman ai lam ni hpe yip da ai, mayun kumhpa sha ai, … ndai zawn re amu ni law grau ai hpe mu lu ai. Tara matsun ni gaw jaw ra ai, tara ra ai; n jaw ai n tara ai hkum ga/matsun ga hpe madat na lit mung n nga ai. Karai a tara hte nhtan shai nna matsun ai tara gara mung n tara ai, shut hpyit lam dam lam hte kaga manghkang law law pru pru wa lu ai. Karai e jaw ya ai nyan, machye machyang hte awmdawm ahkaw ahkang ni hpe akyu jashawn nna asak a chyeju kumhpa ni hpe hkam la shajang ga.

2023: PRANWAN LADAW LABAN (6) NA CHYUM LAIKA

PRANWAN LADAW HTA  LABAN 6

February 12, 2023

CHYUM MUNGGA  DAW 1

Sirak,15:15-20

Ya hti na gaw Sirak a laika hta na rai nga ai.

Ngai sha e, Nang  myit ra rang gaw, tara lam ni hpe hkan lang nna, Karai Kasang ra sharawng ai hpe, kangka ai hte hkan shatup lu na ndai. Karai Kasang gaw na man e wan hte hka hpe tawn da sai: na a lata ladawn nna, nang grau ra ai mahtang hpe lata la u. Asak hkrung lam hte si htan lam hpe, masha a man e tawn da sai rai nna, shi lata la ai mahtang shi hpe jaw na ra ai. Madu a hpaji byeng-ya nachying sung la ai: Shi mahkra dang chye ai hte yawng mayawng hte hpe mu mada nga lu ai. Karai Kasang gaw Shi hpan da ai masha shagu hpe Shi a myi hte mada yu nna, masha galaw ai amu mahkra hpe Shi matsing da nga ai. Madu Karai Wa gaw masha kadai hpe mung shut hpyit mara galaw shangun ai n rai; tara tawt lai na matu mung, Shi ahkang jaw wu ai n rai.

Karai Kasang a Mungga rai nga ai.

CHYUM MUNGGA DAW  2

1 Korinhtu 2:6-10

Ya hti na gaw Korinhtu masha ni hpang de San Pawlu shagun dat ai laika hta na rai nga ai.
Hpu nau ni e. (mungkan hpaji hparat hte ngai n hkaw dan ai ngu timung) Hkristian nga sat nga sa ai lam hta kung hpan wa sai ni hpe, hpaji byeng-ya amyu mi hkaw tsun dan ga ai: ndai mungkan ga na hpaji byeng-ya n rai: hten bya hkrum magang ra ai, ndai mungkan ga hpe up hkang ai du ni a hpaji byeng-ya mung n re ai sha, Karai Kasang a hpaji byeng-ya nan rai nga ai. Dai gaw, Karai Kasang e makoi magap da nna, shi a sung la ai hpaji hparat rai nga ai. Anhte kup tsup ai hku hpung shingkan lu la na matu, moi chyaloi kaw nna Karai Kasang yaw shada ai lam rai nga ai. Ndai prat na up hkang ai du ni kadai mung, dai hpaji hparat hpe n chye ma ai; chye taw gaw, hpung shingkang arawng sadang mahkra a Madu magam hpe, shanhte Wudang hta n jen da na ma ai. Rai timung, Chyum laika hta ka da nga ai hte maren,” Myi e n mu, na hte n na yu nna, Masha a myit hta n hkawn npru ai lam, Karai Kasang gaw shi hpe tsaw ra ai ni a matu lajang da nu ai,” nga nna tsun dan ga ai. Karai Kasang gaw Wenyi a lata hte ndai hpaji hparat hpe anhte kaw shapraw shadan da mi ai. Dai Wenyi mahtang Karai Kasang a sung htum ai du hkra yawng mayawng hte hpe sagawn yu nga ai.
Karai Kasang  a Mungga rai nga ai.

KABU GARA SHIGA

Mahte 5:17-37

Ya hti na gaw Mahte a Laika hta na Kabu Gara Shiga rai nga ai.
Dai jep ai tara hte myihtoi ni a ga hpe raw dat kau na, nga nna ngai sa du ai gaw, hkum nawn nga myit: raw dat kau na matu n rai, dai hpe shadik na she ngai sa du ring ngai. Nanhte hpe ngai teng teng tsun made ga, lamu hte aga garai n lai wa yang, dai hpe garai n shabyin byin gaw, dai jep ai tara kaw nna, ga kanu langai mi hte madin langai mi pyi, lai wa lu na n rai. Dai rai nna, kadai mung, dai kaji htum ai ga matsun langai ngai hpe tawt lai nna, masha ni hpe ning rai sharin shaga nga a yang gaw, sumsing lamu a mungdan hta kaji htum ai wa ngu na ma ru ai: ga dai hpe hkan galaw nna, sharin achyin ya ai wa chyawm gaw, sumsing lamu a mungdan hta, kaba ai wa ngu na ma ru ai. Kaning rai nme law, nanhte hpe ngai tsun ma de ai gaw, Nanhte a ding hpring ai lam, laika ka ai sara ni hte Hparishe ni a ding hpring ai hta n grau ma lit yang gaw, sumsing lamu a mungdan hta nanhte gaja wa n shang lu na myit dai. Masha hpe nang sat lu na ndai n rai; sat kau ai wa gaw,jeyang ai de ging dan nga ai, nga nna moi shawng na ni hpe tsun dan ai ga gaw, nanhte na yu ma ni ai. Ngai mahtang nanhte hpe tsun ma de ai gaw, tinang a kahpu kanau wa hpe masin pawt ai wa kadai rai ti mung jeyang ai hte ging dan nga ai: tinang a kahpu kanau wa hpe, Mana, nga ai wa gaw, dai salang hpawng a daw dan ai hte ging dan nga ai: Mana ndai, nga ai wa gaw, ngarai a wan hte ging dan nga ai. Dai rai nna dai hkungri de, na a kumhpa hpe nang la sa yang, na a nhpu nnau nang hpe mara shagun ai shara lama ma nga nga ai hpe, dai shaloi jang nang dum lu wu yang gaw, hkungri a man e na a kumhpa hpe tawn da nhtawm, na nhpu nnau hte myit jahkrum la na shawng sa nna, dai hpang e na a kumhpa hpe wa mara da u. Nang hpe hka galaw ai wahte rau, lam e naw sa wa yang, shi hte myit alawan jahkrum u; shing nrai, dai hka galaw ai wa gaw, tara agyi a lata hta nang hpe ap kau na ra ai; tara agyi gaw mang galang kaw nang hpe ap kau na ndai rai nna, htawng hta jahkrat kau ai nang hkrum na rin dai: nang hpe ngai teng teng tsun de ai gaw, peksan prai hkra nang garai n wa wa gaw, dai kaw nna nang pru lu na ndai n rai.

Masha num nang shaw lu na ndai n rai, nga nna tsun da ai gaw, nanhte na yu ma nu ai. Ngai mahtang nanhte hpe tsun ma de ai gaw, myit madu hte numsha hpe yu yu nna ra ai wa gaw, shi a myit hta, dai numsha hte, num shaw ai amu galaw nu ai. Dai rai nna, hkra maga na myi nang hpe shut shangun n yang gaw, dai hpe malawk kabai kau u; na a hkum ting hpe Ngarai mung hta jahkrat kau ai hkrum na hte, na a hkum daw langai mi hten na gaw, grau kaja nga ai. Na a hkra lata mung nang hpe shut shangun n yang gaw, dai hpe kahtam dut kabai kau u; na a hkum ting Ngarai mung de shang wa na hte, na a hkum daw langai mi hten na gaw, grau kaja nga ai. Na a madu jan hpe jahka mayu n yang gaw, shi hpe dat dat na laika jaw u ga, nga ai ga mung nga sai. Ngai ma htang nanhte hpe tsun ma de ai gaw, la shaw ai majaw sha n rai yang gaw, tinang a num hpe jahka ai wa gaw, shi hpe la shaw shangun nu ai; [dai jahka kau ai num hpe hkungran ai wa mung, num shaw ai amu galaw nu ai. Bai, Masu let nang n dagam lu na ndai rai nna, na a dagam ai ga gaw dai Madu kaw nang shadik lu na wu ai, nga nna moi shawng na ni hpe tsun dan ai ga gaw, nanhte na yu ma nu ai. Ngai mahtang nanhte hpe tsun ma de ai gaw, nanhte hpa mung dagam dala rai lu na myit dai n rai: lamu hpe dagam lu na myit dai n rai; dai gaw Karai Kasang a tingyang rai nga lu ai: aga hta mung n rai; dai gaw shi a lagaw mara ai shara rai nga lu ai: Yerusalem hpe mung n rai; dai gaw hkawhkam kaba a dung nga ai mare rai nga ai. Na a baw hta mung dagam lu na ndai n rai: nang gaw kara singgawng langai mi hpe pyi, hpraw u ga chyang u ga n galaw lu ndai. Na a ga gaw, Rai sa, nga yang rai u ga, N rai, nga yang, n rai u ga; dai hta lai ai ga nlang hte gaw n kaja ai wa hte seng nga ai.
Madu a Kabu Gara Shiga rai nga ai.

2023: PRANWAN LADAW LABAN (5) NA MUNGGA

Hkristan hpung masha ni, Hkristu hpe kamsham ai ni kadai rai ma ta? Kaning re ai atsam ningja lu ra ma ta? Ngu ai lam hpe myit yu shangun ai. “Nanhte gaw mungkan ga a jum; mungkan ga a ninghtoi rai mi ai” nga ai. Yesu a sape ni, makam masham a kasha ni a shaga la hkrum ai lam madung gaw, mungkan a matu ninghtoi tai ya nna Karai a hpung shingkan arawng sadang hpe shadan dan na matu re ai lam, Madu tsun ai. Kamsham ai ni galaw lu ai mai kaja ai amu ni gaw masha a atsam madung n rai, Karai e jaw ya ai atsam chyeju san san re ai lam, San Pawlu shadum ya ai.

Anhte myu sha ni a myinghkawt law law nga ai hta, “Jum” ngu ai myinghkawt/htinggaw mying mung nga ai. Hpa majaw shamying ai labau gaw n chye ya ai; rai tim, jum manu dan ai, ahkyak ai lam hpe tsun shapraw ai rai na re, ngu, kam ai. Bai, “ninghtoi” ngu ai mying n nga tim, “htoi ai/tu ai/kabrim ai” ngu ai hku nna “Htoi Shawg, Naw Htoi, Ja Brim…” ngu nna tinghkrai mying ni shamying ya ai. Kalang lang myit yu ai, jum mying mying nna kadai hpe mung n chye kabu shangun, shawa hpe mung akyu nau n jaw re ai mu jang grai lahpawt dum na zawn nga hkam sha ai. Dai hte maren, “Htoi” mying gun da ai ni hta mung, ka-ni ya, tsa ya rai na kun, ningsin bungli/ sari sadang n nga ai alai maka hte hkrup mi ra nga nga ai kun, re ai mu jang htoi mying shamying ya ai hte n bung pre ai, ngu shatan hpa tai wa ai n rai a hka! Karai a hkye hkrang la ai chyeju san san hte Babylon bawng dung ai prat kaw na lawt kawt ai hpang, Palestine de bai wa nga lu ai Karai Kasang a amyu masha ni hta, masu magaw, n ju n dawng, manawn masham, matsan dum n chye, re ai amu ni a majaw Isaiah shanhte hpe shadum ai. Rap-ra tara hkan shatup ai, shada tsawra matsan dum garum shingtau hkat ai amu ni gaw shalan shabran ya ai, myit shapyaw ya ai, kabu shangun lu ai lam, san tsawm htoi tsawm ai masha tai wa lu ai lam shadum ya ai.

Kade kaning re ai mu hpa sha-hpa rai tim, jum n lawm yang madawn kau mayu na daram namchyim n rawng ai. Jum n lawm jang sha n mai ai shatmai tai mat na rai nga ai. Kade mi hpaji chye, ja gumhpraw lu ai, arawng aya lu ai rai tim, akyu hpyi shaja  nawku sa shaja ai rai tim, kaga masha ni a ntsa e gumrawng dan ai, sumnung shingdi si-mani ai ga n tsun chye ai, woi lu woi sha gam jaw gam ya n chye ai rai yang, Madu Yesu a ga hku tsun jang jum n rawng ai masha, ngu, tsun lu ai. Wan shanan hpe magap da ai hpa tai na re. Hkristan masha tai ai, Hkristu a sape tai ai ni gaw tinang lu lawm ai, byin ai tai ai, atsawm marai, kaga shaman chyeju ni hpe akyu jashawn nna n lu n lawm ra kadawn ai ni hpe gam jaw gam ya na, yawn hkyen ai ni hpe shalan shabran ya na, n tara dip sha hkrum ai ni a matu n-gup tai ya na, shut hpyit lam dam ai ni hpe shading sharai ya na, ndai zawn di nna masha ni hpe tsawra dawjau ai hku nna mungkan ga a jum, mungkan a ninghtoi tai ya na lam, Madu e matsun ya ai. Shing rai tara hkan shatup ai hte tsawra matsan dum amu ni galaw ai a marang e, tara n chye/Karai Kasang hpe n chye ai ni mu la nna Karai Kasang hpe mu tam shakawn lawm lu mu ga, “Mungkan a jum tai mu! Mungkan a ninghtoi tai mu!” nga ai rai nga ai.

Masha kau mi tinang nang sha gaw dinghpring hkra shakut ai, nawku sa shaja ai, akyu hpyi mung shakut ai; rai tim, shawa shamu shamawt ai amu, kaga masha ni hte ta hkindun nna bungli galaw n chye ai. Shing re ai ni mung nga ma ai. Nawku Hpung hta mung, nawku jawng ni hta music grai hkrak ai, dawjau lamang ni grai madang tsaw ai, hkaw tsun ai lam ni grai hkra ai,… ngu nna shada tsawra matsan dum, hkye mawoi la ai amu ni hta ninggun n dat ai rai yang, uhpung uhpawng ni hta matsan dik, yakhkak dik ai ni, lam dam nga ai ni hpe yu gawn mada mara ai lam n galaw ai rai yang, nawku jawng, sasana nta htingnu ni hpe mawn sumli da tim,  tsawm htap ai poi lamang ni kade galaw dan tim, hkawng mat ai jum zawn, wan shaman hpe shingnoi hte dagup da ai zawn shatai kau na tsang ra ga ai. Anhte galaw ai sasana magam bunli amyu myu ni hta, atsam marai madung gaw Karai Kasang kaw na re ai majaw, Karai Kasang hpe malap kau jang masha a machye machyang atsam marai ni gaw kaman lila sha tai mat na lam, San Pawlu shadum ya ai. Mai kaja ai bungle amyu myu galaw lu na atsam hka-hpawk gaw wudang re ai lam hpe shadum ya ai.

2023: PRANWAN LADAW LABAN (5) NA CHYUM LAIKA

PRANWAN LADAW HTA LABAN 5
February 5, 2023
CHYUM MUNGGA DAW  1

Esaia 58:7-10

Ya hti na gaw myihtoi Esaia a laika hta na rai nga ai.
Madu ning nga ai: kawsi hkrum ai wa hpe lusha jaw nna, nta n lu ai matsan mayan wa hpe shingbyi shara tam jaw mu; hpun palawng n lu ai wa hpe shabu jahpun nna, tinang a baw sang ni hte htingbu htingbyen ni hpe hkum koi kau mu. Sing rai na a nhtoi gaw, jahpawt manap na nhtoi zawn htoi wa nna, na a nma hta ashan alawan bai tu na ra ai; na a ding hpring ai lam na a shawng e saw a nna, Madu a hpung shingkang na hpang e sin langa tai na ra ai. Shaloi nang shaga yang, Madu htan na ra ai; nang hpyi jahtau yang, Ngai nang e nga nga nngai, ngu nna shi tsun na ra ai. Nang gaw, dip sha ai hpe mung, n teng n man ai hku mara shagun ai hte, n hkru ai ga hpe mung, na a kata na la kau ya nna, kawsi hkrum ai wa hpe na a shat jaw sha ai hte, nni nkri hkrum ai wa hpe shalan shabran ya ai rai yang, na a nhtoi gaw nsin hta htoi wa nna, na a sin mak ai gaw jan pungding zawn htoi tu na ra ai.
Karai Kasang a Mungga rai nga ai.

CHYUM MUNGGA DAW 2

1 KORINHTU 2:1-5

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, ngai nanhte kaw nnan sa du ai shaloi, grai tsawm madat pyaw ai ga hku, mungkan hpaji hparat hte, Karai Kasang a teng man ai lam nanhte hpe hkaw dan ni ai n rai. Ngai nanhte hte rau nga nga ai shaloi, Yesu Hkristu a lam, rai sa, Wudang hta jen da hkrum ai Hkristu a lam hta kaga, ngai hpa mung n tsun shana na nga nna myit da se ai. Dai shaloi e nye a n-gun atsam hpe n kam hpa ai sha, hkrit gari kaba hte nanhte kaw du sa nnai. Ngai nanhte hpe tsun ai ga hkaw dan ai kabu gara shiga gaw, shalen chye ai hpaji byeng-ya ga n re ai sha, Chyoi pra ai Wenyi a atsam rawng ai sakse ga n rai nga ai.Dai re ai majaw, nanhte a makam masham gaw, masha a hpaji hparat hte  n rai, Karai Kasang a atsam hte  sha grin nga lu ai.
Karai Kasang a Mungga rai nga ai.

KABU GARA SHIGA

Mahte 5:13-16

Ya hti na gaw Mahte a laika hta na Kabu Gara Shiga rai nga ai.
Yesu shi a sape ni hpe tsun mu ai gaw: nanhte gaw mungkan ga a jum rai nga myit dai; jum mahtang hpoi mat yang gaw, hpa hte  jashum ya lu na rai ta? Shinggan de kabai kau nna, masha ni e kabye ai hta kaga, hpa asung n shang lu ai. Nanhte gaw mungkan ga a nhtoi rai nga myit dai. Bum  ntsa e de da ai mare hpe shinggang kau lu na nrai. Pyending shatu nhtawm, hpai bung n-pu e kadai n tawn da ai; nta masha yawng hpe jahtoi ya na matu, pyending shadun hta tawn da ma ai. Dai rai nna, masha ni gaw nanhte a kaja ai amu ni hpe mu lu nna, sumsing lamu na nanhte a kawa hpe shagrau sha-a lu mu ga, shanhte a man e nanhte a nhtoi jahtoi ya mu. 
Madu a Kabu Gara higa rai nga ai.

2023: PRANWAN LADAW LABAN (4) NA MUNGGA

Kabu gara lu ai, myit pyaw myit dik ai, ngu ai lam hpe kaman sha, majoi mi lu la mai ai n rai. Lu mai ai lam hpe tam ra ai; mu chye ai hpang lu la hkra, machyi hkam shaman shakyang nna sha lu mai ai. Yesu jaw ai lam matsun (8) hpe mungkan sut su ai ni mung, matsan masha ni mung, lu mai ai lam re: shagrit shanyem ai hte matsan dum chye ai, ngu ai, wenyi laknak kaba lahkawng madung re. Zehpania mung dai lam hpe tsun ai, Kasa Pawlu tsun ai hta, Karai a man e kadai mi gumrawng dum na lam hpa n nga ai, nga ai.

Myihtoi laika ni hta kahtap htap rai nna mu lu ai ga-yan langai gaw, “Ngam nga ai masha nkau mi” nga ai. Dai ăngam kaw nna nnaw rawt na lam myihtoi ga nga ai. Dinghta ga e n jaw n ang ai maga, n tara ai maga kade gunglau ai rai tim, asak hpe jahkrit shama wa ai rai tim, myit masin sanseng dinghpring ai lam hpe n tat ai, Karai Kasang hta kamhpa shamyet shănat ai ni rai ma ai. Kaga myihtoi ni zawn myihtoi Zehpania mung maren sha tsun ai. Hkye hkrang la ai labau ting hta Israel amyu masha gaw shanhte a shaga la hkrum ai lam hta n kangka ma ai. Jahtum e, dinghpring ai ăngam kau mi hpe Yesu shi lata la nna ningnan sing re ai amyu masha shălat na rai nga ai. Yesu a prat hta chyum laika sara ni, jau ni, jaiwa ni, tara sara ni, hparishe ni, shanhte gaw grai chye dum, chyoi pra dinghpring dum ma ai. Matsan masha ni, Moshe a tara n hkan mai hkra gyip gyeng dik ai hku tara shaja da ma ai. Matsan masha ni, hpaji n chye ai ni, tara n chye mai, n hkan lu ai rai tim, kraw hta san seng ai myit hte Karai Kasang hpe tam ai ni mahtang ngam kau hkrum ai ni rai ma ai. Yesu a mungga hpe madat hkap la ai ni hta law mi law gaw dai zawn re ai masha ni rai ma ai.  

Wenyi asak mahkrun hta Karai Kasang a man e shagrit shănyem lu ai lam gaw wenyi asak mahkrun a htingdun rai nga ai. Yesu hpe n chye ai Confucius pyi gaw ning nga hpaji ga tsun da ai: “Shagrit shanyem ai ningja gaw kaga ningli ningja yawng a htingdun re” nga ai. Jet ai tsawra myit, madat mara ai, mara raw ya lu ai, htingram hkat lu ai, myit galu ai, dz. dz., kaja ai ningli ni gaw shagrit shănyem lu ai, ngu ai htingdun a ntsa e gaw sharawt nna sha prut tsawm wa mai ai lam hpe tsun ai. Yesu tsun ai kabu lu ai lam-yan matsat hta, shawng na ningja mung dai re_ “Wenyi hta matsan mayan ai ni kabu lu ma ai”, nga ai. Dinghta prat hta matsan mayan rai ninglen myit masin wenyi hta gumrawng gumtawng ai, Karai Kasang hpe kamhpa myit n rawng nna tinang a atsam marai hpe sha kam, maw lu maw sha ai, tara n hkung ga ai ni mung law law nga ma ai. Dinghta prat hta ja gumhpraw arawng aya lu ninglen, Karai hte masha a man e shagrit shanyem lu ai, Karai a man e tinang gaw kaman sha re ai, ngu, hkam la nna Karai hta madung shamyet shanat chye ai ni mung nga ma ai.   

Zahpania tsun ai hta, “Dinghta ga na grit nyem ai ni yawng, tara hkan ai ni yawng, Karai Kasang hpe tam mu”, ngu nna ga hpaw tsun ai. Bai, “Tara hpe tam mu, shagrit shanyem ai lam hpe tam mu” nga ai. Shing re ai ni kaning re ai shaman chyeju ni lu la na lam matut tsun dan ai_ Madu a nhtoi hta shanhte gaw tsit lali ai tsing-du pa hta shimlum ai hku nna sagu bainam ni hpe rem sha lu na ma ai, nga ai. Simsa kabu myit dik lu ai de du lu ai lam matsun (8) hpe Yesu gaw kuptsup dik ai hku matsun ya ai. Raitim, TV hte kaga Media hkan rai dut sha ai ni zawn, ya mari lang ya sha lu, pyaw lu, chyim yu lu, bu-hpun lu ai baw n rai nga ai. “Yawn hkyen hkrum ai ni kabu lu ma ai”, “Matsan dum ai lam hpe madun lu ai ni kabu lu ma ai”, “Dinghpring ai lam a majaw zingri hkrum ai ni, hpyen ni tinang hpe n gawn n sawn di ai hkrum ai ni kabu lu ma ai” nga, kam na zawn, hkap la mai na zawn n nga na re. Hkam la n gwi ai raitim, matsun ga hte maren hkan shadik ai rai yang, aten galu hta teng sha akyu hkam sha lu ai, myit pyaw myit dik lu ai lam rai nga ai. Kalang ta jang jang e akyu hkam sha ai lam n mu na re; rai tim kamsham myit hte hkan shadik ai rai yang, jet ai grin ai simsa lam, jet ai grin ai myit pyaw myit dik ai lam lu la n shut n shai rai nga ai. Shakut shaja nna, hkamjan nna sha lu mai ai hpe myit dum mai ga ai.

2023: PRANWAN LADAW LABAN (4) NA CHYUM LAIKA

PRANWAN LADAW HTA LABAN  4
January 29, 2023
CHYUM MUNGGA DAW 1

Zehpani 2:3,3:12-13

Ya hti na gaw myihtoi Zehpani a laika hta na rai nga ai.
Ndai mungkan ga na myit grit nem ai ni hte, Madu a tara hkan shatup ai ni yawng hte, Madu hpe hkan tam mu; ding hpring ni hte sumnung ai lam hpe tam ma nu; shing rai Madu a masin pawt ai nhtoi hta, nanhte shingbyi shara mu lu na nhten. Myit grit nem ai hte matsan mayan amyu hpe ngai jahti da nna, Israela mung hta naw ngam ai masha ni Madu a amying hta shingbyi shara tam nga na mara ai. Shanhte gaw n hkru n kaja ai amu galaw na nrai; masu ga mung tsun na nrai; shanhte a n-gup hta e hkalem ai shinglet tu lu na n rai; shanhte gaw jahkrit shama ai lam n hkrum ai sha lu sha nna, ngwi paw ai hte hpum nga na ma ra ai. 
Karai Kasang a Mungga rai nga ai.

CHYUM MUNGGA DAW 2

1 Korinhtu 1:26-31

Ya hti na gaw Korinhtu masha ni hpang de San Pawlu shagun dat ai laika hta na rai nga ai.
Nye a hpu nau ni e, Karai Kasang e shaga la hkrum ai ni nanhte gaw, kaning re ai masha rai nga myit dai hpe aru yu mu: ndai mungkan madang hku sawn yu jang, hpaji  byeng-ya rawng ai ni law law wa nanhte hta n lawm nga ai; ahkaw ahkang lu ai ni hte du amyu hta na, law law wa n lawm nga ai. Rai timung, Karai Kasang a man e shinggyim masha gumrawng gumtawng shara n nga u ga, hpaji rawng ai ni hpe kaya kahpa jahkrum na matu, mungkan ga na n-gun n ja ai ni hpe Karai Kasang lata la wu ai; n-gun lagaw rawng ai ni hpe kaya kahpa jahkrum na matu, mungkan ga na n-gun n ja ai ni hpe Karai Kasang lata la wu ai. Rai la dum ai masha kaba ni hpe shagrit kau na matu,mungkan ga na n-gun n ja ai ni hpe Karai Kasang lata la wu ai; shing rai, Karai Kasang a man e shinggyim masha shakawng shara n nga ai. Karai Kasang  gaw nanhte hpe Hkristu Yesu a adaw ashan shatai da wu ai; Karai Kasang myit ra ai majaw, dai Hkristu gaw anhte a hpaji byeng-ya hte ding hpring ai lam, shachyoi shapra ai hte htingrai htingrat ai lam tai wa sai. Dai re ai majaw, Chyum Laika hta ka da ai hte maren, arawng la mayu ai wa gaw, Madu hta arawng la u ga.
Karai Kasang a Mungga rai nga ai.

KABU GARA SHIGA

Mahte 5:1-12

Ya hti na gaw Mahte a laika hta na Kabu Gara Shiga rai nga ai.
Yesu gaw masha wunawng uwa hpe mu jang, bum ntsa de lung wa ai; dai yang e Shi dung nga yang, sape ni shi a makau de sit sa wa ma ai. Shloi Yesu shanhte hpe sharin shaga let, tsun wu ai gaw: Myit masin hta matsan mayan ai ni gaw ‘a’ lu ma ai; lamu mungdan gaw shanhte a mungdan rai nga ma lu ai. Myit sumsung ai ni gaw ‘a’ lu ma ai; shanhte mungkan ga hpe madu lu na mara ai. Yawn hkyen hkrum ai ni gaw ‘a’ lu ma ai; shanhte shalan shabran ai hkrum na mara ai. Ding hpring ai hte kawsi hpang gara ai ni gaw ‘a’ lu ma ai; shanhte hkru kat wa na mara ai. Matsan dum chye ai ni gaw ‘a’ lu ma ai; shanhte matsan dum la ai hkrum na mara ai. Myit san seng ai ni gaw ‘a’ lu ma ai; shanhte gaw Karai Kasang hpe mu lu na mara ai. Ngwi pyaw simsa ai hpe shabyin ai ni gaw ‘a’ lu ma ai; shanhte hpe Karai Kasang a kasha ni ngu shamying na mara ai. Ding man ai lam a majaw, zingri zingrat hkrum ai ni gaw ‘a’ lu ma ai; lamu mungdan gaw shanhte a mungdan rai nga malu ai; Nye a amying majaw masha ni nanhte hpe asawng asang zingri zingrat di ai hte, n teng n man ai hku mara amyu myu shagun da ai shaloi, nanhte ngwi pyaw nga myit dai: lamu mungdan hta e nanhte a shabrai kumhpa kaba nga malit dai majaw, kabu gara nna ngwi pyaw nga mu. 
Madu a Kabu Gara Shiga rai nga ai.

2023: PRANWAN LADAW LABAN (3) NA MUNGGA

Israel gaw mungkan masha ni a matu kasi tai, ninghtoi tai ya na shaga la hkrum ai amyu rai nga ai. Rai tim, mungdan lahkawng brang ga garan mat ai hpang dingdung-dingda hkawhkam yan shada n ju n dawng, shingjawng hkat re ai majaw, Naphtali hte Zebulun buga lahkawng na masha ni, hpyen ni a zingri zingrat awu asin di kau ya hkrum ai. Dai majaw ningsin chyip re ai buga, ngu, shamying hkrum ai. Mahte gaw Isaiah tsun da ai myihtoi ga, Yesu hta dik wa ai lam hpe madi madun ai. Yesu gaw dingnye hkrum ai buga hkan Kabu mai ai shi-ga hkaw tsun hpang ai.

Dai Kabu mai ai shi-ga gaw hpa rai ta? Yesu hkaw tsun hpang ai hta, “Karai Kasang a mungdan du magang ra ai; myit malai lu mu”, nga ai. Galile Nawng grup-yin na buga ni, grau nna Naphtali hte Zebulun buga masha ni hpe Yerusalem/Yuda mung masha ni gaw yu kaji ma ai. Tara n chye ai ni, tara n hkan ai ni, madang n nga ai ni hku nna yu kaji ma ai. Yesu gaw Yerusalem makau, Bethlehem, Yuda mungdaw hta shangai ai rai tim, Karai a mau-hpa masing hku, Nazareth e nga kaba wa ai. “Ningsing chyip” re ai hta nga ai masha ni kaw Kabu mai ai shi-ga shawng hkaw hpang ai. Galile grup-yin na masha ni a lapran ninghtoi kaba htoi tu wa ai. Shinggyim masha ni maw ai, sing ai hku n rai. Karai a tsawra matsan dum myit gaw kaji kadun ai ni, matsan grau ai ni hpe shawng ai ahkaw ahkang jaw chye ai lam hpe myit dum mai ga ai. Karai a magam gun ni, jau ni, mama ni, sara/sarama ni, sasana magam hta shamu shamawt lawm ai ni, arawng aya lu ai masha ni hpang, gumhpraw lu lawm ai ni a saw shaga ai maga, pyaw grau ai, alu grau lu mai ai maga shanang nna ahkyaw ahkang jaw grau ai kun? Ra kadawn grau ai masha ni, shara ni de Karai a tsawra matsan dum myit, shălan shăbran ai lam grau ahkaw ahkang jaw ang ai lam, Madu Yesu kaw na kasi la mai ga ai. Yesu gaw ningsin chyip re ai buga ni hta sasana magam shawng hpang dat ai.

Lam mi mung, Yesu gaw shi a sasana amu hpe madi shadaw na matu, shi hpe ni htep dik ai hku garum ya na masha saw ai lam hpe yu yu ga. Yerusalem grup-yin e hpaji chye chyang ai ni, makam masham tara masa, htung lailen masa kunghpan ai ni chyawm ai shara kaw na kung zet ai masha ni hpe n hkan tam saw la ai. Dai ningsin chyip re ai buga, n tai n mai rai nna nga shajang e buga masha ni hpe shawng shaga la ai: nga hkwi nna kanbau makan galaw sha ai Simon, Andrew, Yaku hte Yawhan, marai mali hpe shawng saw shaga ai. Shanhte masha hkan hkwi ai ni tai wa na ma ai. Ningsin chyip re ai buga na masha ni mare kaba hkan na masha ni zawn myit magaw ai, hkalem ai, maw sha ai, ja gumhpraw marin ai, gumrawng ai… ndai zawn re baw alai nau n nga ai. Shanhte gaw hpaji n chye tim Yesu hpe kam ging ai masha hku nna chye na hkap la loi ai ni rai ma ai. 

Korentu laika hta Pawlu gaw Korentu Mare kaba na hpung masha ni hta shada myit garan nna nga ma ai lam hpe mara madi madun ai. Mare kaba na masha ni hta shada tsawm shingjawng, chye shingjang, lu shingjawng, re ai majaw myit garan nna nga ma ai. Yawng gaw Hkrist a sape, Hkristu a magam gun ai ni tai na matu, shada dawjau na matu shaga la hkrum ma ai lam, madi madun ai. Hkristu a sape tai ai gaw sasana galaw ai ni tai ra ai, mungkan masha ni a matu ninghtoi tai ya ra ai lam hpe tsun shadum ai. Gumrawng gumtawng ai, rai dum ai, shingjawng hkat ai, chye dum lu dum ai uhpung uhpawng mahtang sinchyip ai shara tai wa lu ai. Langai hpra a myit masin hta mung shing re ai rai jang sinchyip nga ai hpe myit dum mai ga ai. Yesu gaw shi a sape tai na matu, shi a n-gup, lagaw lata tai ya na matu yawng hpe saw shaga ai. Hten run hten za nga ai dinghta ga na masha ni a matu ninghtoi tai ya na lam anhte hpe shăngun lang mayu ai. Hkristu a wudang gaw kaba dik ai atsam re ai majaw, dai wudang hta ninggun la ra ai lam hpe mung sharin la lu ga ai.

2023: PRANWAN LADAW LABAN (3) NA CHYUM LAIKA

PRANWAN LADAW HTA LABAN 3
January 22, 2023
CHYUM MUNGGA DAW 1

Esaia 8:23-9:1-3

Ya hti na gaw myihtoi Esaia a laika hta na rai nga ai.
Moi shawng de Madu Karai Kasang gaw Zebulun hte Na-hta li mung hpe shagrit kau timung, htawm hpang e, panglai lam makau e, Yawdan hka wora hkran na, amyu kaga ni nga ai Galile mung hpe arawng sadang hte hpring shangun na ra ai. Nsin hta hkawm nga ai amyu gaw nhtoi kaba hpe mu lu ma ai; si hkrung si htan mungdan a shingnip kata e shanu nga ai ni a ntsa e nhtoi dawng pru sai. Nang gaw shanhte a ngwi pyaw ai lam hpe shalaw nna, shanhte a kabu gara ai hpe jat ya mu ai: nmut ta e masha ni kabu gara ai hte, lanep garan ai ni mung kabu jahtau ai zawn, shanhte na a man e kabu gara nga ai. Kaning rai nme law, shanhte hpe shaba ai lit hte kahpa ntsa e mara ai kandang hpe mung, hpareng wa a ri hpe mung, Midian a lakhtak e byin ai zawn nang agrawp kau nu ai.
Karai Kasang a Mungga rai nga ai.

CHYUM MUNGGA DAW 2

1Korinhtu 1:10-13, 17

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, nanhte yawng hte gaw myit hkrum nga mu nga nna anhte a Madu Yesu hkristu a amying hte ngai nanhte hpe aja awa hpyi nem nga nngai. Nahte hta e hka wa bra wa na lam n nga ai sha, makam masham lam hta langai sha rai nga mu. Kaning rai nme law, ngai hpu ngai nau ni e, nanhte ga li ga law rai nga myit dai hpe hklo-e nta na ni ngai hpe sa shan mi ai. Ngai tsun mayu ai gaw: ngai gaw Pawlu hte seng ai; ngai mahtang Apollo kaw hkan nang ai; ngai gaw Kehpa a sape; ngai gaw Hkristu hte seng ai, nga nna nanhte langai hte langai tsun hkat shajang nga myit dai hpe ngai na la se ai. Hkrsitu hpe garan nna, daw langai hte langai nanhte hpe jaw ya sa ni? Pawlu gaw nanhte a matu Wudang hta jen da hkam sani? Pawlu a amying hta kashin kamun hkam manit ni? Kashin kamun jaw na matu n rai, dai kabu gara shiga hkaw dan na matu she, Hkrisut gaw ngai hpe shangun dat sai: rai timung Hkrsitu a Udang gaw kaman lila n rai u ga, mungkan hpaji ga hte nga hkaw tsun dan nngai nrai.
Karai Kasang a Mungga rai nga ai.

KABU GARA SHIGA

Mahte 4:12-23

Ya hti na gaw Mahte a laika hta na Kabu Gara shiga rai nga ai.
Yawhan hpe rim la ai hpe Yesu na la jang, shi Galile mung de htawt sa wa ai. Bai Nazaret mare de nna htawt mat wa yang, Zebulun hte Naphtali mung a lamu ga jirit hkan na, hka nawng makau e nga ai, Kapernaum mare de shi sa du nna dai hta nga nga ai.Shing rai myithoi Esaia tsun ai ga dik wa sai. Dai gaw Zebulun hte Naphtali a mung, nawng makau e, Yawdan hka wora hkran na, amyu kaga ni a Galile mung e, nsin kata e dung nga ai amyu gaw, nhtoi kaba hpe mu lu ai rai nna, si ai mung hte de a shing nip kata hta dung nga ai ni kaw, nhtoi dawng pru wa sai, nga nna ka da nga ai. Dai aten kaw nna Yesu gaw, sumsing lamu a mungdan du magang ra ai rai nna, myit malai lu mu, nga nna hkaw tsun hpang nga ai. Ya Galile nawng makau e garet hkawm wa yang, shan nau rai nga ai, Petru ngu ai Simun hte shi a kanau Andaru yan gaw, shan a sumgawn hpe nawng hta e kabai bang nga ai hpe Yesu mu hkrup wu ai: shan lahkawng nga hkan ai masha rai nga ma ai. Shaloi Yesu gaw ngai kaw hkan marit; masha hpe hkan hkwi na masha ngai nan hpe shatai na made ai, ngu nna shan hpe tsun mu ai. Shaloi jang shan gaw sumgawn hpe kau da nna, Yesu kaw hkan nang ma ai. Bai dai kaw nna naw hkawm sa wa yang kaga shan nau, Zebedi a kasha Yaku hte shi a kanau Yawhan hpe Yesu mu hkrup wu ai; dai yan mung shan a kawa Zebedi hte rau li hta dung nga let, shanhte a sumgawn hpe kapa nga ma ai rai nna, shan hpe shaga la mu ai. Shaloi jang shan gaw, dai hte shan a kawa hpe rap di kau da nna, shi kaw hkan nang ma ai. Bai, Yesu gaw Galile mung ting hta kawan hkawm let, shanhte a tara jawng ni hta sharin shaga nna, lamu mungdan a kabu gara shiga hkaw dan ai hte, machyi ai ni hte ana ahkya lu ai ni mahkra hpe shamai shatsai ya wu ai.
Madu a Kabu Gara shiga rai nga ai.

2023: PRANWAN LADAW LABAN (2) NA MUNGGA

Karai a Shangun Ma (Yesu), Israel amyu hpe hkye mawoi, gaw sharawt ai amu gaw amu kaji sha rai na re; mungkan ting a ninghtoi shi tai na ra ai, nga, Isaiah tsun da ai. Yawhan Baptista gaw masha ni hpe shachyen ya ai, “Yu mu, mungkan mara la kau ya ai; shi a ntsa e Wenyi gaw uhkru-du hkrang hku yu sa ai; shi gaw Wenyi hta kashin kamun jaw na wa rai nga ai”, nga ai.

“Karai a Sagu Kasha” ngu ai gaw Karai Kasang a matu hkungga shan tai na san da hkrum ai sagu rai nga ai. Dai sagu kasha gaw Karai Kasang e shangun ai amu hpe kangka ai hku hkan galaw na, madat mara dik ai shangun ma tai na rai nga ai. Jahtum e nni nkri hkam la nna sat kau hkrum na ra ai. Si mat ai hta labau kre mat na n rai; shi si hkam ai a marang e Karai a amyu masha ni hpe sharawt dat lu na, lai jan nna, mungkan ting e mu mada lu ai Hkye La Madu tai wa na rai nga ai. 

Dai sagu kasha hta, Karai Kasang gaw mungkan masha ni hpang de sa du kawan da lai wa sai. Dai Karai a shangun ma hta Israel amyu masha ni hpe kahkyin gumdin gaw sharawt da ya sai. N kam n sham ai Karai a amyu masha nan dai sagu kasha hpe sat kau ma ai. Dai sat kau hkrum ai hta dai Karai a sagu kasha hkungga shan tai nna mungkan mara la kau ya ai wa tai wa nu ai. Dinghta ga ntsa na manghkang ni, hka bra hpyen tai hkat nga ai mungdan ni, kawsi hpang gara manghkang, tai shai hkat ai masa law law a lapran gara hku asak hkrung lu na ga ta? Mungkan ting na amyu mungdan ni, machye machyang kumhpan ai ni, prat shagu e shakut shaja lam tam ma ti mung, mungkan ga na ruyak jamjau ai, ana zinli ni, tsinyam ni, n ju n dawng hka bra nga ai masa ni a nga nga ding-run rai nga ai. 

San Pawlu tsun ai hta, kamsham ai ni gaw Hkristu Yesu a amying gang let, chyoi pra dinghpring ai asak aprat gawgap ai marang e, Karai Kasang a ngwi pyaw simsa ai shaman chyeju hkam la na lam tsun da ai. Mungkan ting na tsindam amyu myu, manghkang amyu myu, rupawt majing gaw shut hpyit mara rai nga ai. Dai Karai a sagu kasha gaw, ra rawng ninggun kya ai ni, myit daw myit hten ai masha ni, shut kadang chye ai ni, shut hpyit mara hta lup taw nga ai ni hpe shamai shatsai ya na matu du wa ai wa rai nga ai. Hten za mat ai shinggyim masha ni a kanawn mazum lam hpe sharai ya na matu rai nga ai. Dai sagu kasha a hkye hkrang la ai chyeju hpe prat shagu na masha ni hkam la lu hkra, Missa hkungga hku nna matut jaw ya nga ai.

2023: PRANWAN LADAW LABAN (2) NA CHYUM LAIKA

PRANWAN LADAW HTA LABAN 2
January 15, 2023
CHYUM MUNGGA DAW 1

Esaia 49:3.5-6

Ya hti na gaw myihtoi Esaia a laika hta na rai nga ai.
Madu Karai Kasang gaw, Israela e, nang gaw nye a shangun ma rai nga ndai; na a marang e nye a hpung shingkang madun dan nga nngai, nga nna ngai Esaia hpe Madu tsun wu ai. Shingrai ngai gaw, Madu a man e arawng sadang lu ai hte, nye a Karai Kasang gaw nye a n-gun tai wa nu ai. Yaku a amyu hpe shi Madu hpang de bai wa shangun na hte, Israela masha ni hpe shi kaw bai jahpawng shinggyin na Madu gaw, ya ning nga ai: Yaku a amyu ni hpe bai sharawt nna, naw ngam nga ai Isaraela masha ni hpe bai woi wa na matu, nang nye a shangun ma tai ai gaw, na a matu amu kaji naw rai nga ai. Maigan amyu ni a nhtoi tai na hte, lamu ga htum hkra nye a hkye hkrang la ai lam tai na matu, ngai nang hpe naw san da na nngai. 
Karai Kasang a Mungga rai nga ai.

CHYUM MUNGGA DAW 2

1Korinhtu 1:1-3

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.
Tsaw ra la ai hpu nau ni e, Karai Kasang myit ra ai hte maren, Yesu Hkristu a kasa tai na shaga la hkrum ai ngai Pawlu hte, anhte a hpu nau wa Soshtenu gaw, Korinhtu mare na Karai Kasang a amyu masha ni hpe ga shana dat ga ai. Nanhte gaw Hkristu hta e shachyoi shapra ai hkrum nna, shara magup e anhte a Madu Yesu Hkristu kaw akyu hpyi ai ni yawng hte rau, Karai Kasang a chyoi pra ai amyu masha ni tai na matu, shaga la hkrum ai ni rai nga myit dai; hpa majaw nga yang, dai Yesu Hkristu gaw nanhte a Madu rai nga ai hte maren, shanhte a Madu mung rai nga malu ai. Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e nga nga malit ga law. 
Karai Kasang a Mungga rai nga ai.

KABU GARA SHIGA

Yawhan 1:29-34

Ya hti na gaw Yawhan a laika hta na Kabu Gara shiga rai nga ai.
Yawhan gaw shi hpang de Yesu sa wa ai hpe hkap mu yang, shawa masha ni hpe tsun mu ai gaw: wora de mada yu mu; dai wa gaw mungkan mara la kau ya ai Karai a Sagu Kasha rai nga ai. Ngai hta grau galu kaba ai wa langai mi, nye a hpang e du na ra ai; kaning rai nme nga yang, ngai garai n shangai yang shi nga nga sai, ngu nna ngai tsun ai wa gaw, ndai wa rai nga ai. Ngai gaw shi kadai re ai mung n chye nngai; rai timung, Israela masha ni a man e shi hpe madun dan na matu ngai sa du nna, hka hte kashin kamun jaw nga ai, nga nna Yawhan tsun wu ai. Dai hta kaga Yawhan gaw, dai Wenyi gaw U hkrudu zawn sumsing lamu de nna yu hkrat wa ai hpe ngai mu se ai: dai Wenyi mung shi a ntsa e dung nga ai. Ngai gaw shi kadai re ai hpe n chye nngai; rai timung, ngai hpe hka hta kashin kamun jaw shangun dat ai wa ngai hpe tsun ai gaw: kadai a ntsa de dai Wenyi yu hkrat wa nna a nga nga ai hpe nang mu jang, dai wa gaw Chyoi pra ai Wenyi hte kashin kamun jaw ai wa rai nga ai. Dai hte maren ngai mu se ai rai nna, ndai wa gaw Karai Kasang lata san da ai wa rai nga ai, nga nna sakse hkam wa ai, ngu nna Yawhan gaw shawa masha ni hpe tsun shadum wu ai.
Madu a Kabu Gara shiga rai nga ai.