2022: DU SA LADAW LABAN (3) NA MUNGGA

Prat shagu na masha ni, dinghta ga na nni nkri, machyi makaw hte shoi-hpa amyu myu a lachyum hpe tam ma ai; myit dik ai mahtai n lu kun (?). Makam masham baw hpan amyu myu gaw shălan shăbran ya ai mahtai amyu myu jaw ma ai. Babylon mungdan e yam sha hkrum ai Karai a amyu masha ni lawt lu na lam, kabu lu na lam, Isaiah shingran jaw ai; jahtum e Yesu du sa ai aten hta kuptsup ai mahtai hpe jaw ya ai: myi kyaw ai ni mu lu ma sai; daw hten ai ni hkawm lu ma sai; manggang kap ai ni mai tsai ma sai; na hpang ai ni bai na lu ma sai; si ai ni bai hkrung rawt ma sai; matsan masha ni kabu mai ai shi-ga madat la lu ma sai, nga ai.

Shaning law law maigan mung e mayam tai mat ai Karai a amyu masha ni gaw myit mada shara n nga, myit htum nga ma ai aten hta, Isaiah gaw dai amyu masha ni hpe tsun ai: myit shaja da mu, hkum hkrit mi, nanhte a Karai Kasang gaw dinghpring ai hku jeyang ya na ra ai, nga ai. Kaja wa mung Babylon empire hkrat sum mat nna Persian amyu rawt lung wa ai. Galai uphkang ai kade n na yang, Karai a amyu masha hpe shalawt dat nna tinang a mungdan, Israel de bai htang wa shangun ai. Dai gaw dan san ai kumla jaw ai sha rai nga ai. Kaja wa dai kaw kre ai n rai; dai Hkye La Madu Hkristu du sa ai aten hta sha, Isaiah a myihtoi ga gaw dik wa, tup wa lu na rai nga ai. Yesu Madu du sa ai aten kaw nna hpang ai, prat shagu na masha ni a matu ndai dinghta ga na tsinyam tsindam, ruyak shoi-hpa ni gaw jahtum n rai; n htum n wai asak nga ai lam, htani htana a grin nga ai, ruyak kyindut ni hte hkrap ngu hkrap ngoi nsen n nga ai, htani htana pyaw nga lu ai asak aprat nga ai lam hpe myit mada lu ai lam jaw ya ai.

Hpang na prat hpe la nga let ndai dinghta ga na ruyak shoi-hpa ni hpe majoi hkam sha shalai kau ra na kun? Ndai prat hta Yesu a shamai shatsai ai amu ni hpe n hkam sha lu ai baw kun? Madu Yesu a hkye hkrang la ai amu matut nna a nga nga ai. Kamsham ai masha ni a lăpran galoi mung a nga nga na re. Anhte mungkan ga a shut hpyit mara ni a majaw, ruyak jamjau ai, matsan mayan ai lam ni ding-yang nga nga na re. Shămai shătsai ai amu, matsan dum ai amu, hkye mawoi amu ni mung ding-run nga nga na re. Kamsham ai uhpung uhpawng shăgu hte kamsham ai masha shăgu, Karai a matsan dum hkye mawoi ai amu ni galaw nga na re. Karai Kasang hpe kamsham hkap la ai ni a matu hkye hkrang la ai amu ni hpe mu lu ai hte, dai hkye hkrang la ai amu ni hta hkum nan galaw lawm nga na re. Jăhtum chyălai, hpang jăhtum Madu bai du sa ai nhtoi hta sha ra n rawng, kuptsup ai hkye hkrang la ai lam hpe hkam la lu na ga ai. Kamsham ai ni gaw nni nkri, machyi makaw amyu hpan ni hpe myit galu ai hte hkamjan na lam, hkai sun galaw ai masha gaw myit galu ai hte shi a hkai nmai asi si jaw na, dan la shu la lu na nhtoi hpe myit galu ai hte a la nga ra ai lam, San Yaku shadum ninggun jaw ai. Ruyak jamjau ai lam, nni nkri hpan hkum hkra hkrum sha nga ga ai dinghta ga e asak hkrung nga ga yang, myit n daw n hten ai, Karai a shalan shabran ai lam ni hpe myit mada let, Hkristan prat hta kabu gara ai myit masin galoi mung prut ja nga ra ga ai

2022: DU SA LADAW LABAN (3) NA CHYUM LAIKA

DU SA AI LADAW HTA LABAN 3
December 11, 2022
CHYUM MUNGGA DAW 1

Esaia 35:1-6,10

Ya hti na gaw myihtoi Esaia a laika hta na rai nga ai.
Nam mali hte hkraw hkun ai shara gaw kabu gara na ra ai; Zaibru jang mung awng sharawng nna, mari pan zawn pu na ra ai; dai gaw grai wa pu an nna, sharawng let, kabu gara ai hte mahkawn mangoi na ra ai. Lebanon a arawng sadang, Hkarmela hte Sharon a hpung shingkang, shanhte hpe jaw na ra ai; shanhte gaw Madu a arawng sadang, anhte a Karai Kasang a hpung shingkang hpe mu lu na ra ai. N-gun kya ai lata hpe n-gun shaja mu; gari ai lahput ni hpe shangang mu; da ting mu, hkum hkrit myit, nga nna myit kaji ai ni hpe tsun mu. Yu mu, nanhte a Karai Kasang gaw matai htang na matu du na ra ai; nanhte hpe hpe hkye hkrang la na matu, shi nan shabrai kumhpa lang let du sa na ra ai. Dai shani e, myit hten ai ni myi mu lu nna, na n na ai ni na lu na mara ai. Lagaw hten ai wa gaw shan nga zawn gumtawng lu nna, ma-a ai wa a shinglet mahkawn mangoi na ra ai; kaning rai nme law, hkraw hkun ai shara e hka hpawk hpaw nna, zaibru jang e lwi na ra ai. Madu a majaw hkye hkrang la hkrum ai ni gaw nhtang wa nna, mahkawn mangoi let Ziun bum de du na mara ai; shanhte a myi man htani htana kabu gara ai dan hkung na ra ai. Shanhte gaw awng sharawng let kabu gara nga nna, yawn hkyen ai hte madai ai gaw sim mat na ra ai. 
Karai Kasang a Mungga rai nga ai.

CHYUM MUNGGZ DAW 2

Yaku 5:7-10

Ya hti na gaw Yaku a shagun dat ai laika hta na rai nga ai.
Hpu nau ni e, Madu bai du sa ai nhtoi du hkra shakut sharang nga mu law. Yu mu sun galaw ai wa gaw ga a asau asi hpe ala nga ai rai nna, marang nhpaw hta hpang shakoi na marang dai ga hta e htu shaya ai du hkra, myit galu ai hte shakut sharang nga ai. Nanhte mung shakut nga mu; Madu bai du sa na gaw ni magang ra ai majaw, myit hkum kaji nga mu. Hpu nau ni e, nanhte daw dan ai n hkrum myit ga, shada da hkum aput angun nga mu: yu mu, tara agyi wa gaw chyinhka makau e tsap nga ai. Hpu nau ni e, ru yak kyindut hkrum ai shaloi, nanhte gara hku shakut sharang ra ai hpe sharing la na matu, Madu a mying ningsang hta hkaw dan ai myihtoi ni gaw nanhte a kasi ningli tai wa ma lit ga.
Karai Kasang a Mungga rai nga ai.

KABU GARA SHIGA

Mahte 11:2-11

Ya hti na gaw Mahte a laika hta na Kabu Gara shiga rai nga ai.
Hkristu e galaw da ai magam amu ni a lam hpe Yawhan gaw htawng hta e na la jang,shi a sape nkau mi hpe shangun dat nna, Nang gaw, “Dai du sa na ra ai wa” rai nga nni? Shing nrai, kaga hpe anhte naw ala ra a ni? Nga nna Yesu hpe san dat mu ai. Yesu htan let shanhte hpe tsun mu ai gaw, nanhte na la ai hte mu lu ai lam mahkra Yawhan hpe wa tsun dan mu; myi kyaw ai ni myi mu lu ma ai; lagaw hten ai ni hkawm sa lu ma ai; manggang kap ai ni san pra lu ma ai; na lahpang ai ni na lu ma ai. Si mat ai ni bai hkrung rawt ma ai hte, matsan mayan ni hpe kabu gara shiga hkaw dan nga ai; ngai a majaw myit nkataw ai wa gaw alu nga ai, ngu nna htan ya wu ai. Ya dai dat kasa ni wa mat nga ai shaloi, Yesu gaw Yawhan a lam hpe lakap nna, shawa masha ni hpe tsun shadum ai gaw: nanhte hpa hpe yu na matu nam mali de pru sa wa myit ta? Nbung e kanga ai mai-aw hpa rai ni?  Dai nrai yang hpa hpe yu na sa myit ta? Kya mani ai lai sumpan bu hpun ai wa rai ni? N rai law. Reng htum ai hpun palawng bu hpun ai ni hkawhkam ni a htingnu hta tam ra myit dai. Dai n rai yang hpa majaw sa pru myit ta? Myihtoi langai ngai hpe sa yu na rai myit ni? Kaja wa dai a majaw rai sai; nanhte hpe ngai tsun made ga: myihtoi hta grau kaba ai wa mung rai nga ai. Kaning rai n me law, na a man e na a lam lajang magang na matu, nye a kasa hpe na a shawng de ngai shangun dat na we ai, nga nna chyum laika hta ka da ai gaw, Yawhan hpe nan sha-ang  ka da nga ai. Nanhte hpe ngai teg teng tsun made ga numsha kaw na shangai ai ni yawng hta na, kashin kamun jaw ai Yawhan hta grau kaba ai marai langai mi n paw pru ai; rai ti mung, sumsing lamu mungdan hta kaji htum ai wa gaw Yawhan hta grau kaba nga ai.
Madu a Kabu Gara shiga rai nga ai.

2022: DU SA LADAW LABAN (2) NA MUNGGA

Tinkyeng akyu amyat tam ai, masu magaw chye ai ningbaw ningla ni a majaw, shanhte a npu na masha ni, mung shawa masha ni ruyak jamjau amyu myu hkrum sha ma ai. Mung-masa, sut-masa hkrat sum mat ai majaw hten bya nga ai mungdan, ningsin chyip re ai aprat aban hta Isaiah gaw Hkawhkam Dawi hte bung ai ningbaw kăja du pru na lam hpe myit măda lu ai lam jaw ya ai. Kabu Gara Shi-ga hta Yesu gaw dai myit măda a la nga ai lam hpe shătup ya ai, tara rap-ra ai lam hte hpaji atsam mărai hpring ai wa, tara hte maren jeyang ai wa tai na lam hpe madi madun ya ai. Yesu Hkristu hpe kamsham hkap la ai a mărang e, amyu/madang n ginhka ai, yawng hpe hkap la tsawra dawjau ai lam gaw, Isaiah hta tsun da ai simsa lam majing hpe shabyin ya ai lam, Isaiah a myihtoi ga hpe shăteng ya ai lam hpe chye lu ai.

Isaiah jaw ai shingran_ Dawi a amyu matu, hkraw si maw ai hpun-du kaw na nnaw prut pru na. Dai dinghpring dik ai hkawhkam wa gaw ra n rawng ai, hpaji hte atsam marai kunghpan ai wa, shi uphkang ai npu na masha ni hta hpyen tai hkat ai ni n nga na,…kup tsup dik ai, simsa dik ai mungdan rai lu na lam tsun da ai. Hkristu Yesu du sa ai aten, Messiah uphkang ai ladaw na lam hpe shingran jaw da ai. Yesu a prat kaw na dai ni du hkra, shinggyim masha a labau hpe jep jen yu jang, dai ni na aprat du hkra, Isaiah jaw da ai shingran mungdan/mungkan n tup lu shi ai hpe mu lu na ga ai. Myit daw hpa n tai na kun? Masha kau mi na matu kamsham myit mada ai lam hpe teng sha shanut kau, azat kau ya ai hpa tai na kun? Kamsham myit n rawng ai wa a matu, tsawra ai myit hte yawng hpe awng dang ai lam n kam ai wa, mara dat ya ai a marang e simsa lam lu la ai hpe n kam ai wa, ndai zawn re ai masha langai a matu Isaiah a myihtoi ga teng wa ai lam galoi n mu lu na re. Isaiah a myihtoi ga byin wa, teng wa na matu hkan galaw ra ai lam ni hpe Yawhan Baptista hkaw tsun dan ai: “Myit malai lu nna nanhte a nga-sa lailen hpe shajaw sharai mu! Madu du sa na hkrun lam hpe lajang mu!” nga ai. Madu Yesu du ai aten kaw nna Karai Kasang a mungdan gaw ndai dinghta ga e hpang sai; kamsham ai ni gaw tsawra myit, dinghpring sanseng ai myit, mara dat ya chye ai, shada htingram hkat lu ai, myit masin hpe sharai shatsawm ding-yang galaw nga na re.

Mungkan e majan a nga nga na re; shada sat hkat nat hkat re ai amu ni a nga nga na re. Rai tim kaja wa simsa ai lam hpe jawm gawgap ding-yang, jawm sharai ding-yang re ai majaw, mungkan hten bya ai kaw na shalawt dat lu ai amu ni mung kade she law ai, awng dang ai amu ni kade nga lai wa ai lam ni hpe mung myit dum mai ga ai. “Myit malai lu nna nanhte a nga-sa lailen hpe shajaw sharai mu! Madu du sa na hkrun lam hpe lajang mu!” nga ai Yawhan Baptista saw shaga ai nsen, jahtau ai nsen gaw masha shăgu hpe, uhpung shagu, amyu/mungdan shagu hpe saw shaga ai. N madat kam ai ni, n kam n sham ai ni a matu Isaiah shingran jaw ai simsa lam kaw n du lu na rai nga ai. Kamsham ai myit hte hkan shatup ai masha ni hta, uhpung uhpawng ni hta, amyu/mungdan ni hta sha, simsa shimlum ai lam shăkut la ai daram hkam la lu na rai nga ai. N kamsham ai ni mungkan htum ai shani du hkra nga nga na ma ai. Kamsham ai ni mung, munkan htum ai shani du hkra, Isaiah jaw ai shingran byin tai hkra matut shakut sakse hkam na rai nga ai. San Pawlu gaw kamsham ai ni tatut hkan galaw na lam matsun kau mi jaw da ai: shăda chye hkap la hkat, hkam măna hkat, Hkrist a wenyi hta myit hkrum myit ra let Karai Kasang a hpung shingkang a matu asak hkrung nga na lam rai nga ai. Karai a matsan dum myit a jaw e, tara maigan masha ni mung Karai Kasang hpe nawku shăkawn kungdan lu ma ai, nga ai. Hkristmat poi a matu ja gumhpraw, bu hpun palawng hte kaga ra ai lam law law hpe hkyen shachyip magang let, Karai a mungdan a matu myit masin wenyi nga-sa lailen hpe hprang shatsawm ai amu ni matut galaw nga ra ai lam ni hpe shadum ya ai.

2022: DU SA LADAW LABAN (2) NA CHYUM LAIKA

DU SA AI LADAW HTA LABAN 2
December 4, 2022
CHYUM MUNGGA DAW 1

Esaia 11:1-10

Ya hti na gaw myihtoi Esaia a laika hta na rai nga ai.
Yese amyu a ndu hta nnaw rawt nna, shi a aru ni hta na makrung gaw asi si na ra ai. Madu a wenyi shi kaw sa nga nga ra ai: hpaji byeng-ya hte shaleng ya ai myit jaw ai wenyi, myit su ai hte nden ja ai myit jaw ai wenyi, chye chyang ai hte Madu hpe hkrit hkungga ai myit jaw ai wenyi shi hta e rawng nga na ra ai rai nna, shi gaw Madu hpe hkrit hkungga ai hta awng sharawng nga na ra ai. Shi mu hkrup ai hte maren n daw dan ai hte na hkrup ai hte maren n jeyang na ra ai: ding man ai hku hkan let shi matsan mayan ni hpe tara dara nna, myit malang ai hku hkan let, ahkaw ahkang n lu ai ni a hpang maga de daw dan na ra ai. Shi a n-gup ga ngu ai shingna hte, tinang ra ai hku shabyin na matu, nhtum nni di kau ai ni hpe kayat sharin ya nna, shi nten na pru ai nsoi nsa hte tara n lang ai ni hpe sat kau na ra ai. Ding hpring ai gaw shi nshang a shingkyit, kangka re ai gaw shi hkum hkrang a shingkyit rai nga ai. 
Shing rai, chyahkyawn gaw sagu kasha a manam tai nga nna, rawng gawk gaw bainam kasha hta rau hpum nga na ra ai; dumsu kasha hte hkanghkyi hkalung rau hkawm sa nna, ma kaji shan hpe dun woi na ra ai. Dumsu hte tsap rau ushat sha nna, de a hkalung ni rau hpum nga na mara ai; hkanghkyi gaw dumsu zawn yi hku sha na ra ai. Chyu chyu ai ma gaw pu htum a tsip ntsa e ginsup lu nna, chyu hka ai ma gaw pu hkram hku hta shi a lata manaw bang lu na ra ai. Nye a chyoi pra ai bum ting hta, shada da zingri ai hte, jahten shaza hkat na n rai, hpa majaw  nga yang, nammukdara hka gaw shi a shara hpe lim kau ai zawn, Madu hpe chye chyang ai lam mungkan ting pri rai na ra ai. Dai aten e, Yesu a aru gaw, masha amyu baw ni a matu dan hkung ai kumla tai na ra ai; shi shanu nga ai shara gaw, hpung shingkang rawng na ra ai majaw, maigan amyu ni shi hpe hkan tam na mara ai.
Karai Kasang a Mungga rai nga ai.

CHYUM MUNGGA DAW 2

Roma 15:4-9

Ya hti na gaw Roma masha ni hpang de kasa Pawlu shagun dat ai laika hta na rai nga ai.
Hpu nau ni e, Myit n htum ai sha shakut sharang ai ni hpe, Karai Kasang shalan shabran garum ya ai lam, Chyum laika hta hti lu ai majaw, anhte myit mada shara nga lu u ga, shawng e ka da ai lam shagu gaw, anhte hpe sharin achyin ya na matu ka da nga sai. Ya, anhte a Madu Yesu Hkristu a Kawa rai nga ai Karai Kasang hpe, nanhte myit mang langai sha hte, n-gup ga langai sha hte shakawn kungdawn nga lu myit ga, Hkristu Yesu a kasi ningli hpe hkan nna, nanhte shada da myit mang ara sha rai nga lu na matu, shakut sharang ai hte, shalan shabran ai lam mahkra a npawt daju Karai Kasang gaw, nanhte yawng hpe awng nga u ga law, Dai rai nna, Karai Kasang a hpung shingkang a matu mara, Hkristu gaw nanhte hpe hkap hkalum la sai hte maren, nanhte shada da hkap hkalum la mu. Ngai tsun nngai gaw: Ji wa ni kaw jaw da ai ga ndat hpe kangka ai hte shadik na matu chyu sha nrai, maigan amyu ni mung Karai Kasang a matsan dum ai chyeju a majaw, shi hpe shagrau sha-a lu mu ga; Hkristu gaw Yuda masha ni a ali ama tai wa sai. Shing rai: “Maigan amyu ni a ka-ang e, ngai nang hpe shakawn na nngai; Na a mying ningsang hpe mahkawn mangaoi na nngai,” nga nna Chyum laika hta ka da nga ai.
Karai Kasang a Mungga rai nga ai.

KABU GARA SHIGA

Mahte 3:1-12

Ya hti na gaw Mahte a laika na Kabu Gara shiga rai nga ai.
Kashin Kamun jaw ai yawhan paw pru ai shaloi, shi Yuda nam mali hkan e tara hkaw nna, Sumsing lamu a mungdan du magang ra ai majaw, myit malai lu mu, nga nna tsun wu ai. Shing rai, myihtoi Esaia gaw, Nam mali kata e nsen jahtau tsun nga ai: Madu a lam lajang da mu, shi a lam matsun ni hpe shading mu, nga nna Yawhan hpe sha-ang let tsun wu ai. Yawhan gaw gawla-u mun hte da ai nba bu hpun nna, shi nshang e shan-hpyi shingkyit kyit nga ai. Shi a shahpa mung dinggam-yaw hte nam na lagat jahku rai nga lu ai. Dai shaloi e, Yerusalem na ni, Yuda mung ting na ni hte, Yawdan hka ginwang shara magup hkan na ni, Yawhan hpang de pru sa wa ma ai rai nna, tinang a shut hpyit mara hpe shapraw dan let, shi a lata hte yawdan hka hta e kashin kamun hkam la ma ai. 
Ya, Hparishe hte Saduke masha ni law law wa Kashin Kamun hkam la na nga, sa ma ai hpe Yawhan mu jang, shanhte hpe shi tsun mu ai gaw: Pu htum amyu ni e, du magang ra ai ari dan hta na hprawng wa lu myit ga, nanhte hpe kadai shadum myit ta? Dai majaw, nanhte teng teng myit malai lu da ai rai yang gaw: htap htuk ai asi si mu. Abraham gaw anhte a wa rai nga mali ai, nga nna gumrawng ai hte nanhte a kraw e hkum tsun mu. Nanhte hpe ngai tsun ma de ga: Karai Kasang gaw ndai nlung ni hta na, Abraham a matu kasha ni hpe hpan shapraw da lu ai. Ya e pyi, dai dingwa gaw hpun npawt nhpang hkan e tawn da nga ai. Dai rai nna, asi kaja n si ai hpun mahkra hpe kran daw kau nna, wan hta kabai bang kau nga ai. Ngai gaw, myit malai lu myit ga, hka hta nanhte hpe kashin kamun jaw made ai, rai timung, nye a hpang e du sa ai wa mahtang gaw, ngai hta n-gun grau ja ai wa rai nga nna, shi a kyepdin gun na pyi ngai n ging n dan nngai. Dai wa gaw, Chyoi pra ai Wenyi hte mung, wan hte mung, nanhte hpe kashin kamun jaw ya na ra ai. Shi a lata hta hkuwawn lang nga nna, shi a mam chyarang hpe shi yit jasan nhtawm, shi a mam hpe dum hta shinggyin bang da na nna, mam nsan hpe chyawm n sat lu ai wan hta nat kau na ra ai.
Madu a Kabu Gara shiga rai nga ai.

2022: DU SA LADAW LABAN (1) NA MUNGGA

Isaiah tsun da ai myihtoi ga, tsawm dik ai; shălan shăbran ninggun lu hpa, shărawng shăra myit măda ăla nga ai baw mungdan she rai nga ai. Hkye La Madu Yesu du sa, nga lai wa ai mung, shăning 2000 jan wa sai. Isaiah a myihtoi ga găloi wa mi tup hkrak byin wa na ta? Isaiah gaw n mai byin ai shigran jaw da ai măhtang rai kun? Shing n rai hpang na prat, hpang na mungkan hta sha mu lu ai baw rai kun? Madu Yesu tsun ai gaw, “Nanht a Madu bai du sa ai aten hpe nanhte n chye mi ai majaw ala măja nga mu”, nga ai. San Pawlu shădum ai hta, “Anhte a hkum hpe makawp maga na matu, makam masham, tsawra myit, myit mada ai lam, ngu ai, laknak ni hte shinggang da ga” nga ai.

Isaiah jaw ai shingran hpe shi a prat na Israel masha ni sha n-ga, prat shăgu na makam masham a kasha ni myit mada ala nga ai lam rai nga ai. Mungkan ga gaw Isaiah a prat na masha ni, shi a hpang na masha ni, prat shăgu na masha ni, ala gawm kau ai zawn, majan găloi n sim ai mungkan ga she rai nga ai. Anhte a prat hpe yu yu tim, mungdan shagu, hpyen gasat laknak hpe shăgreng nna majan byin wa na nhtoi hpe ala maja nga shăjang ma ai. Kaja wa mung majan byin wa ai mungdan law law, shara law law she rai nga ai. Ukraine gaw majan byin wa na chye ai majaw, hpyen majan shăchyip da ai 7/8 ning na jang kaja wa majan bai byin wa ai. Hkyen lajang da ai majaw, Russia hpyen myit mada ai daram awng dang ai lam n lu ai she rai nga ai. Ukraine mung hkyamsa lu ai.

Nuclear majan byin jang mungkan htum ai nhtoi rai na hpe nuclear laknak lang da ai mungdan ni chye ma ai. Rai tim, Isaiah jaw da ai shingran hpe kădai n kam ya ai; laknak hpya run kau na, shayawm na, kade bawngban lai wa ma tim, laknak grau shăgreng nna chyu nga ma ai n rai a hka?

Yesu sadi jaw ai ga n teng ai kun? Mungkan masha ni hpaji kade madang tsaw wa ai rai tim, matut mahkai ladat kade madang tsaw wa ai rai tim, hka hpyen, wan hpyen, nbung laru hpyen, nnang nawn ai hpyen, byin wa jang masha law law si jawng ma ai n rai a hka! Ala maja hkyen lajang da ai majaw sut sum masha sum ai kaw na lawt lu ai, si madang htenza madang yawm ai rai tim, si arum mat ai ni mung law law. Moi n na yu ai Covid-19 a kăjawng sha chyam bra wa ai aten hta Miwa, Italy, Spain, USA, India,…masha kade si jawng lai wa a hka! Prat dep mădang dep masha ni si jawng ma ai n rai a hka! Shani shagu motor accident, jak rai ni adep adawt hkat ai accident, kaga accident baw hpan law law hte shani shagu masha si jawng ai n rai a hka!

Masha Kasha du sa ai nhtoi hta ndai prat, machye machyang kunghpan ai masha ni, hpa mung hpa a lam tau nau sawn tak chye ai masha ni gaw Noah prat na masha ni zawn sha, lu lu sha sha, num jaw num la, pyaw pyaw nga nga ai aten hta asak sum ai lam a kajawng sha du pru na lam, Madu Yesu shadum ya ai.

Lagut gaw nta madu n maja ai aten hta du sa ai; shaloi sutgan tat sum mat na, nga ai. Nta madu hte lagut gaw hpyen zawn rai nga ai. Yesu a hpyen ni, Yesu hpe n hku hkau ai ni hkrum katut na gam maka hpe tsun ai rai nga ai. Yesu hpe chye chyang hkau chyap ai ni a matu, Yesu galoi mi sa kăwan kăwan, kabu hpa rai na ra ai. Yesu a kăjawng sha du sa na hpe hkrit tsang shara n nga ai. Yesu du sa ai gaw nta masha ni hpe shăman ya na matu, kumhpa gun sa jaw na matu sa kăwan na re ai majaw, hkrit tsang n ra ai. Yesu Madu hte galoi mung hku hkau nga na kade ahkyak ai lam hpe shădum ya ai.

Yesu hte hku hkau nga lu na matu, makam masham kaba ra ai lam, tsawra myit kaba ra ai lam, Yesu tinang kaw galoi mi sa du kăwan tim shi hpe hkap bawp hkălum la lu na myit mada ai lam, ndai laknak ni hte shut hpyit mara hpe tai manga kau lu na rai nga ai.

Kamsham ai ni gaw, Isaiah a myihtoi ga dik wa na lam tinang nang a atsam marai nga ai dăram, “Na mungdan du wa ru ga” ngu nna Karai a mungdan, simsa ai mungdan hpe shani shagu gawgap lawm na rai nga ai. Isaiah jaw da ai shingran, kamsham ai masha ni sha akyu hkam sha lu na rai nga ai. Ra n rawng ai tara dinghpring ai lam, simsa ai lam tup hkra, kuptsup ai hku, ndai dinghta ga e mu lu hkam sha lu na n rai nga ai. Tinang a mungkan jahtum hta, nga- yawng nga-pra a jahtum na nhtoi, lahkawng ngu na lang Madu bai du sa ai aten hta sha mu lu na ga ai. Kamsham myit hte myit mada ala nga let, tinang nan a hkum hpe shachyoi shapra shachyip da nga ra ga ai.

2022: DU SA LADAW LABAN (1) NA CHYUM LAIKA

DU SA AI LADAW HTA LABAN 1
November 27, 2022
CHYUM MUNGGA DAW 1

Esaia 2:1-5

Ya hti na gaw myihtoi Esaia laika hta na rai nga ai.
Ndai gaw, Yuda mung hte Yerusalem mare a lam hte seng nna, Amot a kasha Esaia mu ai shingran rai nga ai. Du na ra ai prat hta e, Madu a nawku htingnu nga ai bum gaw, bum kaga ni a baw tai wa nna, kawng ni hta grau tsaw wa na ra ai; amyu baw mahkra dai de yan bang na mara ai; masha amyu law law wa sa du nna, sa marit, Karai Kasang gaw shi a lam anhte hpe sharin ya nna, shi a lam hku anhte hkan sa lu na matu, Madu a bum, Yaku a Karai Kasang a nawku htingnu de lung wa sa ga; kaning rai nme law, Ziun bum de na tara lam ni, Yerusalem mare na Madu a mungga pru na ra ai, nga nna tsun gara na ma ai. Madu gaw amyu ni a lam e tara dara nna, masha amyu law law hpe jeyang na ra ai; shanhte gaw tinang a nhtu hpe najawn, tinang a ri ni hpe nhkyau dup kau na mara ai; amyu mi gaw amyu mi hpe nhtu n shaw na hte, htawm hpang de hpyen majan sharin sa na n rai. Yaku a dap ni e, sa marit; Madu a nhtoi hta anhte hkan hkawm sa ga.
Karai Kasang a Mungga rai nga ai.

CHYUM MUNGGA DAW 2

Roma 13:11-14

Ya hti na gaw Roma masha ni hpang de Kasa Pawlu shagun dat ai laika hta na rai nga ai.
Hpu nau ni e, Ndai aten gaw Karai Kasang lajang da ai chyeju prat re hpe nanhte chye nga myit dai majaw, nanhte ya e yup hprang wa na ra ai; kaning rai nme law, anhte shawng nnan kam sham sa ga ai hta, dai hkye hkrang la ai gaw anhte hta grau nna ni wa sai. Shana ahkying lai magang wa nna, shani nhtoi du magang ra ai. Dai re ai majaw, nsin hte seng ai amu mahkra hpe kau da nna, nhtoi a hpyen hkying hpe dagraw nga ga. Tang pyaw shalat ai hte chyaru nang ai, hkum shan kayut ai hte nse nsa galaw ai, ga li ga law ai hte manawn masham ai hpe, n hkan tam ai sha, shani chyingtung e masha ni sadi sahka ai hte hkawm nga ai zawn, anhte mung htap htuk ai hte a hkawm sa wa ga. Dai hta n-ga Madu Yesu Hkristu hpe bu hpun dagraw nga mu: hkum shan a marin marit ai hpe shadik na matu hkum maw hkum galaw myit.
Karai Kasang a Mungga rai nga ai.

KABU GARA SHIGA

Mahte 24:37-44

Ya hti na gaw Mahte a laika hta na Kabu Gara Shiga rai nga ai.
Yesu shi a Sape ni hpe tsun mu ai gaw: No-a a prat e byin ai hte maren, Masha kasha bai du sa ai shaloi e mung bai byin na ra ai. Kaning rai nme law, dai sha-u garai n ing yang na masha ni gaw, No-a sanghpawli kata de shang wa ai nhtoi du hkra, lu lu sha sha, num la num ya rai nga ma ai rai nna, dai sha-u ing wa ai hte, yawng hte hpe magawn mat wa ai du hkra, shanhte ndum shami rai nga ma ai. Masha Kasha bai du sa ai shaloi mung, dai hku byin wa na ra ai. Dai shaloi e, marai lahkawng hkauna pa e rau nga ai rai nna, langai mi gaw woi la ai hkrum ai hte, langai mi hti nga mat lu na ra ai; 41numsha lahkawng htumrin hta rau rin nga ma ai rai nna, langai mi gaw woi la ai hkrum na ra ai, langai mi hti nga mat lu na ra ai. Dai rai nna, nanhte a Madu gara shani e du wa na hpe nanhte n chye myit dai majaw, a maja nga mu. Nta madu gaw, lagut sa na ahkying hpe chye lu yang, shi a nta hpe n tawk waw u ga, shi dai hpe sin nga na ra ai dum nga mu. Dai rai nna, nanhte mung jin jin rai nga mu; kaning rai nme law, nanhte n dum shami re ai ahkying hta Masha Kasha du wa na ra ai.
Madu a Kabu Gara Shiga rai nga ai.

2022: HKRISTU HKAWHKAM WA A POI SHANI NA MUNGGA

Dawid majan hta kunghpan ai majaw awng padang law law lu la ai. Shi hpe shingjawng lu ai masha n nga ai jahtum, Israel amyu ting Dawid kaw du sa nna ding-nyawm dagup ma ai; Dawid hpe Israel amyu ting a hkawhkam tang masat ya ma ai. Dai hpang mung Dawid gaw grai dinghpring ai wa she rai tim, shi hpe shingjawng saw ai ni, ga n madat ai ni yawng hpe sat agrawm kau ai. Yesu gaw Israel amyu ting a hkawhkawm hta n-ga, masha amyu baw ting a hkawhkam she rai tim, Chyum Laika chye dum ai ni, mungkan arawng aya lu ai ni, Shi hpe n hkap la lu ma ai. Yesu hpe “hkawhkam shaje, karai kasang shaje” ngu, masat nna jeyang sat kau ma ai. Lagut dămya langai sha Shi hpe masat hkap la ai; dai majaw, “Dai ni, nang ngai hte rau paradizu e ningngai lu na rin dai” nga, shagrau hkrum nu ai.

Dawid gaw Karai e laksan hkringsan da ai masha, htawm e du sa na Hkristu a kumla rai nga ai. Dinghpring dik ai hkawhkam she ngu tim, dinghta ga na kăga hkawhkam ni hte bung ai alai ni law law shi hta mu lu ai: arawng aya mărin ai, ja gumhpraw mărin ai, lamu ga hkan găshun hkawm ai, num mărin ai majaw Uriah hpe sat nna madu jan Bethsheba hpe găshun la kau ai, num law law la ai, lu lu sha sha, shingjawng saw ai ni yawng hpe gasat shămyid kau ai, shi a ga n madat ai/npu n taw kam ai ni hpe sat agrawm kau ai,….. Rai tim Israel labau hta dinghpring dik ai hkawhkam, ngu, masat da hkrum ai. Moi prat ya prat, n dinghpring ai Hkawhkam ni, Gumsan Gagam ni, mungdan uphkang Du ni hta dinghta alai găde she law na myit yu mai ga ai. Ukraine e byin nga ai majan hte anhte mungdan kata na mungmasa ni hpe yu nna chye lu ga ai: mung-Up mung-Du ni, arawng aya lu ai ni n tara jang, matsan dum myit n rawng jang, mung shawa masha ni hpe gawn ai/ lakawn ai myit n rawng jang,…. byin wa ai masha ni a nji n-mu, shanhte a hkrap ngu hkrap ngoi nsen ni kade she sawng lu ai hpe dum mai ga ai. Dinghta ga na Du/Hkawhkam ni hta ra rawng gawng kya ai lam law law a majaw, Karai Kasang hkum nan, Shi a amyu masha hpe yu gawn renghkang na lam Samuel Laika hta tsun da ai: dai gaw, du sa na Hkristu rai nga ai. Shi hpe jeyang sat kau ai ni gaw hpaji n chye ai masha ni, matsan masha ni n rai; chye dum kung dum, ninggun ja dum ai ni she rai ma ai. Yesu gaw shanhte hpe tai htang ai n rai; shi hpe sin makawp maga na asak sin hpyenla langai mung n tawn ai; ja gumhpraw htun da nna sasăna bungli galaw ai n rai; Shi a shărin shăga ai lam kădai hpe mung atik ănang hkap la shăngun ai n rai. Shi hpe hkap la nna hkam măna ai ni gaw_ tengman lam hpe hkap la ai ni, chyoi pra dinghpring lam hpe hkap la ai ni, Shi hpe chye na hkap la sai hpang dinghta sutgan arawng aya hpe n marin ai sha, sumsing sutgan arawng aya hpe myit mada ai ni, …. Karai Kasang hpe tam ai ni she rai ma ai.

Chyum Laika hta ka da ai masha kau mi_ Săpe 12, Zake-u, Mahte, maigan masha kau mi, hpyenla latsa up ai maigan masha, Niko Dimus, Arimathia na Joseph… Dan san dik ai marai mi gaw Yesu a hkra maga wudang ntsa jen da hkrum ai lagut damya wa rai nga ai. Yesu a hkye hkrang la ai mungga a lam shi na yu ai; Yesu a hkye hkrang la ai amu a lam shi na yu ai; myit shaja na nga ai rai tim, jahtum chyalai e Yesu gaw dinghpring ai wa, rap-ra tara hte mungkan simsa lam a matu, amyu masha yawng hpe hkye hkrang la na wa, Karai a Kasha re ai lam shi kamsham masat hkap la ai. Dai majaw, Yesu gaw htani htana asak shi hpe jaw na lam ga-sădi jaw ai.

Sumsing mungdan shang lekmat lagu la ai masha dăram n sawng tim, Pawlu gaw Yesu hpe rai n chye ai aten hta Yesu hte seng ai masha yawng hpe zingri lai wa ai. Shi gaw tengman lam, chyoi pra dinghpring lam hpe ja ja ra shărawng ai wa re. Yesu hpe n chye ai majaw hpyen tai lai wa tim, myit malai lu ai hpang Yesu hpe chye dik ai sape tai wa ai. Dai majaw, lahkawng ngu na Chyum mungga hta Pawlu gaw Yesu kădai re ai lam hpe grai kuptsup ai hku shadan dan ai.
 
Yesu gaw Pilatu hpe htan ai, “Tengman ai măga na masha ni gaw ngai a ga mădat ma ai” nga ai. Yesu hpe tinang a Hkawhkam hku măsat hkap la ai anhte pyi gaw prat hta law law lang măsu hkalem chye ga ai, n teng n man ai ga tsun chye ga ai n rai a hka! Tinang a gumrawng gumtawng ai majaw rai rai, mara lawt daw hkyamsa daw a majaw rai rai, amyat lama ma lu mayu ai majaw rai rai, tengman ai lam hpe nyet kau chye ga ai. Tinang a marin myit a majaw, sanseng chyoi pra lam, dinghpring lam hpe nyet kau chye ga ai.

Hkristu Hkawhkam gaw kădai hpe mung adip arip rai madat măra shăngun ai n rai; shut ai hte maren adan rai ari dam jaw ai n rai; tsawra matsan dum ai, sumnung shingdi ai, myit malai shagu mara dat ya na jin jin; myit gălu dik ai wa rai nga ai. Masha a kraw lawang, myit masin wenyi hpe renghkang yu gawn ai Hkawhkawm she rai nga ai. Kamsham ai masha shăgu mung Hkristu Hkawhkam a alai măsa hpe kasi yu la nna, shăda yu gawn renghkang na lam sharin ya ai. Mungkan sutgan arawng aya manoi ai, marin ai ni Hkristu Hkawhkam a npu e n taw lu ai; gumrawng gumtawng ai, tinang a matu tingkyeng akyu tam ai ni, matsan dum myit n rawng ai ni, tara n hkan ai ni, Hkristu Hkawhkam hpe tai shai hpyen tai ai alai sha madun na ma ai.

Hkristu Hkawhkam Poi hpe galaw ga yang, jahtum chyalai dai Hkawhkam gaw nga-yawng nga-pra hpe jeyang na Wa re ai lam hpe shadum ya ai.

2022: HKRISTU HKAWHKAM WA A POI SHANI NA CHYUM LAIKA

HKRISTU HKAWHKAM WA A POI
November 20, 2022
CHYUM MUNGGA DAW 1

2 SAMUELA 5:1-3

Ya hti na gaw, myihtoi Samuela a laika lahkawng hta na rai nga ai.
Israela amyu lakung ni yawng hte gaw, Hebron mare de Dawi kaw sa nna, Yu u, anhte gaw na a nrut nra, na a hkum shan rai nga ga ai. Moi shawng de anhte a ntsa e Sawlu gaw naw up nga yang, nang hkum nan Israela amyu hpe woi pru woi shang ai wa rai nga nit dai: Madu mung Nang gaw nye a amyu Israela hpe woi rem na wa hte, nye a amyu Israela a ntsa e Du Magam nang tai lu na ndai, nga nna Dawi hpe tsun ma ai. Shing rai Israela agyi salang ni yawng, Hebron mare de hkawhkam wa kaw sa du ma ai; Dawi hkawhkam mung, dai Hebron mare hta Madu a man e shanhte hte ga shaka tawn da wu ai rai nna, shanhte mung Dawi hpe namman chya ya nna, Israela a hkawhkam shatai da mu ai.
Karai Kasang a Mungga rai nga ai.

CHYUM MUNGGA DAW 2

KOLOSE 1:12-20

Ya hti na gaw, Kolose masha ni hpang de San Pawlu shagun dat ai laika hta na rai nga ai.
Nhtoi a mungdan hta e Chyoi Pra ai ni hte rau Sali wunli hpe jawm hkam la lu hkra, Kawa Karai Kasang nanhte hpe shaging shadan ai majaw, anhte Shi hpe chyeju dum shakawn nga ga ai. Kawa gaw nsin a ahkang aya kaw na anhte hpe mawai la nna, Shi a tsaw ra ai Kasha a mungdan hta jashawn ya mi ai. Dai kasha hta e shalawt dat ya ai hkrum nna, mara raw dat ya na akyu hpe anhte lu la saga ai. Kasha gaw myi e n mu lu ai Karai Kasang a hkrang sumla rai nga ai hte, hpan da ai baw yawng mayawng hta na alat ningshawng rai nga ai.
Sumsing lamu hte ginding aga hta nga ai yawng mayawng hte gaw, Kasha hta e hpan tawn da nga sai: mu lu ai baw sha n-ga, anhte n mu lu ai, hkawhkam tingnyang hta dung ai ni, ahkaw ahkang lu ai ni, up hkang na ahkang aya lu ai ni hte, hpung dagu rawng ai ni nlang hte gaw, Kasha a marang e, Shi a matu mara, hpan tawn da nga sai; hpa mung garai n hpan da yang, Shi nga nga sai hte, yawng mayawng gaw Shi a majaw grin nga ai. Nawku Hpung gaw Hkristu a hkum hkrang rai nga nna, Shi mahtang de a abaw rai nga ai. Shi gaw lam shagu hta kaba htum ai ningbaw ningla tai u ga, dai Hpung a npawt nhpang rai nga ai hte, si mat ai ni kaw na alat ningshawng wa rai nga ai.
Kaning rai nme law, Kawa myit ra ai majaw, Hkristu hta e Karai Kasang a atai hkum hkum tsup rawng nga sai. Yesu Hkristu udang hta si hkam nna htingrai htingrat ya ai shaloi, Karai Kasang gaw yawng mayawng hpe Shi hkum hte htinglu htinglai ya nga ai: rai sa, sumsing lamu e nga ai hte hpe rai ti mung, ginding aga e nga ai hte hpe rai ti mung, Hkristu a lata e htinglu htinglai ya nga ai hpe Karai Kasang lajang da wu ai.
Karai Kasang a Mungga rai nga ai.

KABU GARA SHIGA

LUKA 23:35-43

Ya hti na gaw, Luka a laika hta na Kabu Gara Shiga rai nga ai.
Mung masha ni gaw Yesu hpe mada yu let tsap nga ma ai. Du aya lu ai ni mung shi hpe asawng asang nga nna, Masha kaga hpe shi hkye la ai; ndai wa gaw Karai Kasang a Hkristu ngu ai, Karai Kasang lata ai wa rai yang gaw, shi hkum nan hpe shi hkye la u ga, nga ma ai. Hpyen la ni mung sit sa nna hkri ai tsabyi chyaru ladawn jaw nhtawm, Nang Yuda ni a hkawhkam rai yang gaw, na hkum hpe nang nan hkye la u, nga nna shi hpe roi ma ai. Shi a ntsa e mung, Ndai wa gaw Yuda ni a hkawhkam rai nga ai, ngu ai laika shakap da nga ai.
Wudang hta noi nga ai damya langai mung, Nang gaw Hkristu n rai nni? Na a hkum hte an hpe mung hkye la mi, ngu nna shi hpe roi wu ai. Langai wa mi chyawm gaw, Karai Kasang hpe pyi n hkrit nni? An gaw an a mara majaw hkrum ging ai hte maren, daw dan ai hkrum saga ai: ndai wa chyawm gaw n hkru n kaja ai hpa mung galaw wu ai n rai, nga nna dai wa hpe daru let htan wu ai. Shing nga nhtawm dai damya gaw, Yesu e, Nang na a mungdan hta du wa yang, ngai hpe dum rit law, ngu nna hpyi wu ai. Shaloi Yesu gaw, Ngai nang hpe teng teng tsun de ga, Dai ni jang nang ngai hte Hparadisu e nga na rin dai, ngu nna shi hpe htan wu ai.
Madu a Kabu Gara Shiga rai nga ai.

2022: PRAN WAN LADAW LABAN (33) NA MUNGGA

Jan pru rawt ai; dai hpang jan shang mat na n shut n shai. Shangai wa ai kadai mung si wa ai nhtoi de du na n shut n shai. Ningpawt ninghpang shagu gaw jahtum a ninghpang hkrai rai nga ai. Nga-yawng nga-pra a jahtum e byin na lam, mungkan ga dinghta ga a jahtum nhtoi hte seng nna Madu Yesu tsun shadum ai. Jahtum du ni wa yang na kumla kau mi hpe mung jaw da ai. Kaning re ai kumla ni hpe mu ai rai tim, dai jahtum na nhtoi hpe kadai n chye lu ai. Kamsham ai ni a matu, galoi, kaning rai, hpa byin na n chye ai rai tim; jahtum chyălai tinang sat kau hkrum na tsang shara she nga tim, hten bya ai kaw n du na, nga ai. Hkam sharang, hkamjan ai a marang e, tinang a asak lawt lu na rai nga ai.

Lai wa sai shaning 20 ning jan hta mungkan htum sa na, shaning, nhtoi du hkra chye da ai zawn nga makam masham hpung kau mi ja ja hkaw tsun lai wa ma ai. Dai ni du hkra n teng wa ai. Shawng shawng hkan e mung mungkan htum na shaning nhtoi tsun shamawng hkawm ai ni nga lai wa sai. Hkristan prat hpang ai ten kaw na dai lam hpe tak tsun hkaw tsun ai ni prat hte prat, nga lai wa ai sha re. Kaja wa gaw Yesu shi jaw da ai kumla ni hpe prat shagu e mu lu ai sha rai nga ai. Shing ngu ai majaw, Yesu jaw da ai kumla ni mung hpa n re ai, ngu kau na kun?

Byin wa na lam ni hte seng nna Yesu tsun ai lam hta, madung gaw numdaw masum hku nna dik wa na rai nga ai_
1) Yerusalem Nawku Htingnu hte Mare, teng sha hten run na lam; labau hta teng sha byin lai wa sai.
2) Masha langai si wa ai nhtoi hta shi a mungkan htum mat ai rai nga ai.
3) Hkrung mi hkrung, nga mi nga, yawng mayawng a jahtum nhtoi nga ai; dai hpang, Hkristu Madu gaw yawng mayawng hpe jeyang na rai nga ai. Ala shajin nga ra ga ai.
Ahkyak grau ai gaw, ya, ngu ai mungkan, shăni shagu e byin ai amu ni, shăni shăgu dawdan ai amu ni,…. langai hpra a matu dai gaw ahkyak grau ai rai nga ai. Ta-tut hta gaw tinang a mungkan htum ai nhtoi a matu hkyen shajin da na ahkyak grau ai. Shing rai la maja nga ai wa a matu, mungkan a jahtum nhtoi du tim shi a matu maren sha rai na n rai a hka?

Yesu du sa ai lai hkrang mung masum rai nga ai. Mungkan labau hta, shangai, si ai, hkrung rawt nna lamu de lung mat wa ai. Asak jaw ai wenyi hku nna du sa ai, mungga hku nna du sa ai, Sakramentu ni hku nna du sa ai, mabyin amyu myu hku nna du sa ai. Jahtum na lang gaw hpung shingkan hte du sa na, yawng hpe jeyang na rai nga ai. Shawng na lang du sa ai Madu hpe kamsham hkap la na; shăni shăgu na măbyin ni hta Shi hte matut mahkai nga nna Shi a myit hkan shadik ai rai yang, tinang a mungkan htum ai nhtoi mi rai rai, mungkan a jahtum na nhtoi hta rai rai, kabu gara ai myit hte Shi Madu hpe hkap bawp la lu na rai nga ai. Yawng mayawang a jahtum nhtoi hta du sa na Madu hpe gaw ala nga ra ga ai.

Hkrit hpa ni, tinang hpe nji n-mu gunjang shatsang ai baw ni, manghkang baw hpan ni, ru ai yak ai hte tinang a hkum hkrang asak sat kau hkrum na (ni dik ai jinghku e, manang wa e sat kau na) tsang ra hkra rai tim, n jaw n ang ai măga n yawng ai, n tara ai măga n tsap lawm ai, marin lawhpa ai myit hpe renghkang lu ai rai yang, hkrit tsang na lam n nga ai, nga, Madu tsun ai. Shing rai lu na matu, makam masham ngang kang ra ai, myit galu hkam sharang ra ai, machyi hkam ra ai, (tinang a asak hpe pyi) asum hkam ra ai lam ni nga na n rai a hka! Tinang a myit, tinang a hkum hpe n dang nyet kau ai, ngu ai a lachyum hpe grau shadan ya ai n rai a hka! Shaloi, tinang asum hkam ai daram Karai Kasang bai hkap jaw na rai nga ai.

Malaki Laika hta tsun da ai, dai nhtoi hta, n hkru n kaja ai ni, n tara ai ni hpe nat agrawm kau na, ru-pawt kaw na gawt kau na, nga ai myihtoi ga n dik wa shi ai kun? Shanhte gaw ja she ja, kadai e she n shakrip kau. Tara ai maga awng dang nna simsa ai aprat galoi mi she du?
Hkam sharang hkamjan lu ai chyeju, Karai a madi shadaw ai chyeju teng sha ra ga ai: “Maja let hkyen lajang nga mu; hkamjan lu ai majaw hkye la hkrum na ra ai!”

2022: PRAN WAN LADAW LABAN (33) NA CHYUM LAIKA

PRANWAN LADAW HTA LABAN 33
November 13, 2022
CHYUM MUNGGA DAW 1

Malahki 4:1-2

Ya hti na gaw, myihtoi Malahki a laika hta na rai nga ai.
1Dai Nhtoi du ra ai; dai gaw wan mang zawn grung kahtet nga ai: gumrawng gumtawng ai ni hte, tara n lang ai amu galaw ai ni yawng, yi hku ndu tai na mara ai. Du ra ai nhtoi gaw, npawt ndung n ngam hkra, shanhte hpe hkru kau na ra ai, nga nna Zaw nawng Zaw wa up ai Madu tsun ai. 2Nye a amying hpe hkrit hkungga ai ni a ntsa e chyawm gaw, ding hpring shangun ai ajan gaw, shamai shatsai ai atsam hte du pru na ra ai.
Karai Kasang a Mungga rai nga ai.

CHYUM MUNGGA DAW 2

2 HTESALONI 3:7-12

Ya hti na gaw, Htesaloni masha ni hpang de San Pawlu shagun dat ai laika lahkawng hta na rai nga ai.
Anhte kasi ningli hte maren gara hku hkan sa galaw ra ai lam hpe nanhte nan chye nga ndai. Anhte gaw nanhte hte rau nga ai shaloi, lagawn lamawn rai nna kaman nga nga ai n rai; manu n ya ai sha, kadai wa a lusha hpe mung anhte n sha saga ai. Nanhte hta na langai a ntsa de lit li ai n shangun u ga, amu magam hte ru yak ai hta, anhte shani shana bungli galaw saga ai. Shing rai galaw ai gaw, nanhte anhte hpe n bau ra ai majaw n rai; anhte galaw ai hte maren, nanhte hkan galaw lu na matu, nanhte a matu kasi ningli tai saga ai.
Nanhte hte rau naw nga nga yang, Amu bungli n kam galaw ai wa gaw shat mung n sha u ga, ngu nna nanhte hpe htet da ga ai. Nanhte hta lawm nga ai ni nkau mi gaw lagawn lamawm rai nna, hpa amu bungli n galaw ai sha, tinang hte n seng ai hta hkan kajam nga ma ai hpe, anhte na la saga ai. Shing rai galaw nga ai ni gaw, ti nang a asak bau ya na matu, amu bungli hpe atsawm sha hkan galaw mu ga, ngu nna anhte hkang dat ai hte shadum jahprang ya nga ga ai.
Karai Kasang a Mungga rai nga ai.

KABU GARA SHIGA

LUKA 21:5-19

Ya hti na gaw, Luka a laika hta na Kabu Gara Shiga rai nga ai.
Dai nawku htingnu gaw reng hkik ai nlung hte mung, alu kumhpa ni hte mung, mawn sumli da ai rai nga ai, nga nna nkau mi tsun yang, Yesu gaw, Nanhte mu nga ai arai ni gaw, nlung langai mi a ntsa e langai mi n mara hkra, mahkra hten bya ai nhtoi du na ra ai, ngu mu ai. Shing nga jang shanhte gaw, Sara e, dai zawn galoi byin wa na rai ta? Dai byin na ni wa magang jang, hpa kumla dan pru na ra ta? Dai byin na ni wa magang jang, hpa kumla dan pru na ra ta? ngu nna Yesu hpe san mu ai. Shaloi shi gaw, Nanhte hkalem kau ai n hkrum myit ga, sadi nga mu; kaning rai nme law, masha law law wa nye a amying hte paw pru nna, Ngai gaw dai wa rai nga nngai, ahkying mung du ra ai, nga nna tsun na mara ai: shanhte a hpang hkum hkan nang nga myit.
Hpyen gasat ai hte gumlau rawt ai lam na yang, hkum hkrit myit: dai lam ni gaw shawng byin wa na ra ai: rai ti mung, jahtum ai gaw, dai shaloi jang, rai na n rai, ngu mu ai. Bai Yesu gaw shanhte hpe tsun mu ai gaw: Amyu mi hte amyu mi, mung mi hte mung mi shada da gasat hkat na mara ai; 11nnang nawn kaba wa ai mung, shara kaga ga hta ana zinli hte hku hku ai byin wa na ra ai: sumsing lamu de na hkrit hpa hte lamik kumla kaba mung dan pru na ra ai. Rai ti mung, dai lam yawng garai n byin yang, masha ni gaw nanhte hpe rim la nna, zingri zingrat di nhtawm, tara jawng ni hte htawng ni hta ap kau na myit dai; nye a amying majaw hkawhkam ni hte du ni a man de nanhte hpe sa bang kau na mara ai. Dai shaloi e, nanhte nye a matu sakse hkam ya na aten rai nga ai.
Dai re ai majaw, nanhte kaning ngu nna hkap tsun htan na, n tsang ra sai: kaning rai nme law, nanhte a hpyen ni nlang, n hkap htang lu hkra, ngai nanhte hpe n-gup ga hte hpaji jaw na made ai. Nanhte gaw kanu kawa ni kahpu kanau ni, mayu dama ni hte jinghku jingyu ni e pyi, ap kau ai hkrum na marin dai: shanhte gaw nanhte hta na nkau mi hpe sat kau shangun na mara ai: nye a amying majaw masha yawng mayawng nanhte hpe n dawng n yawt na mara ai. Raitimung, nanhte a kara singgawng langai mi pyi, hten lu na n rai. Nanhte hkam sharang yang gaw, tinang a matu asak hpe lu la na marin dai.
Madu a Kabu Gara Shiga rai nga ai.